Mohamed
Hussein
10
يناير 2019·
وزير الخارجيه
الأمريكي من القاهره : السياسات الخارجيه الأمريكيه في عهد أوباما ساهمت في انتشار
الإرهاب و العنف و الفوضى في الشرق الأوسط !! .
.
مممممم اصبرو على
امريكا سنتين تلاته كمان , لما ييجي وزير خارجيه جديد , وقتها هيعترف ان أمريكا مش
بس ساهمت , إنما هي و بريطانيا كانو العقل المدبر لكل الإرهاب و الخراب اللي حصل في
المنطقه من 2010 و يقولو sorry احنا أسفين يا جماعه , زي ماعترفو
بعد كام سنه من خراب العراق و قالو sorry
برضه .
.
ساعتها هتلاقي
صاحبك اياه أبو زمبلك بنفس الدماغ و نفس الشعارين و البؤين , هيسمع وزيرخارجيه أمريكا
و هو بيعترف بلسانه , و يقوله لا أمريكا حد جميل ماتقولش عليها كده , و الإرهاب و خراب
المنطقه و هدم الجيوش و حرق البلدان سببهم كتب التراث و أحمد الطيب شيخ الأزهر و الفاشيه
و أسعار الطماطم و البطيخ اللي من غير بذر .
............................................................................................................
Mohamed
Hussein
9
يناير 2019·
سأل رجل أعرابي
حكيم الزمان وقال له يا حكيم , خبّرني بالله عليك , ماذا تريد المرأه ؟ ما الذي يسعدها
؟
- فتبسم الحكيم
و ربَتَ على كتف الأعرابي و قال له : و عهد الله يابني المرأه ذات نفسها ماهي عارفه
هي عايزه إيه .
.
فنظر الأعرابي
إلى الحكيم و قال له : بس انت برضه حكيم الزمان و قاري و مطّلع يعني أكيد تعرف , ولا
انت موظف في شركة عمر أفندي ؟
- فصمت الحكيم
لبرهه و لمعت عيناه و قال للأعرابي : يا بني , إذا أردت أن تسعد المرأه فعليك أن تحبها
و تحتويها و تحضنها و تكون باستمرار سندا لها و تحب امها و ابوها و عيلتها و بيتهم
و شارعهم و الواد حماده ابن اخوها الصغير , عليها أن تجد فيك حبيبها و زوجها و أبوها
و أخوها و ابنها و ابن خالتها ومدرس الجغرافيا اللي كان بيدرس لها في أولى اعداداي
, و تقول لها كلام حلو كتير و تجيب لها هدايا في عيد ميلادها و عيد خطوبتكو و عيد جوازكو
و عيد الأم و العيد الصغير و العيد الكبير و عيد العمال و تنظر لها دائما بابتسامه
و إذا كانت غاضبه تطبطب عليها و تقول لها معلش يا حبيبتي و لو صينية البطاطس اتحرقت
منها في الفرن تقول لها فداكي و لو نزلت بعربيتها الزيرو اللي انت سالف عشان تكمل تمنها
ورشقت بيها في عمود نور في قلب الصحرا تقول لها خدت الشر و راحت , و تبتسم , ولو نايمه
ماتصحيهاش ولو صاحيه ماتنيمهاش و لو قالت لك انا بدأت الريجيم من ربع ساعه تقول لها
مش معقوله دانتي خسيتي أوي و بقيتي مانيكان و لو أأأ
- فربت الأعرابي
على كتف الحكيم و قال له : طب هستأذن انا بقى يا مولانا عشان يادوب أخطف العصر 370
ركعه .
.................................................................................................
Mohamed
Hussein
9
يناير 2019·
مش هجلد محمد صلاح
ولا هصغره و أقلل من فرحته بجوايز ماكناش نسمع عنها قبل كده , ولا هشارك في اغتياله
معنويا على حاجه ممكن مايكونشي مقصود من وراها شئ , رصيدة لدينا يسمح .
.
اللي حصل من صلاح
كانو كلمتين مجامله لا طلعو ولا نزلو , يعني لو كانت المذيعه اللي سألته قاعد جنبها
بشير التابعي أو نبيل محمود أو شريف اكرامي او محمد حسين اللي هو انا , أي حد يعني
, كان صلاح من باب المجامله هيقول لها اللي قاعد جنبك هو أسطورة كرة القدم في كوكب
الأرض و المجموعه الشمسيه .
.
الولد ده اللي
رفع اسم مصر لعنان السما , اللي في قلب ملاعب انجلترا و قدام كاميرات العالم في لحظة
التكريم بيحط علم مصر على كتفه , اللي كان بيموت حرفيا لما مصر دخل فيها هدف في مباراة
التأهل لكاس العالم , اللي شارك في بطولة كاس العالم و هو مصاب .
.
اللي مابينكرش
فضل بلده ولا جميلها عليه , اللي مابيتأخرش أبدا في مساعدة بلده و قريته و مدينته
, اللي وصل ان تمنه في الملاعب يساوي مجموع أسعار لاعبي الدوري المصري بالكامل منذ
بدء الخليقه و لحد دلوأتي , اللي وصل لمرحلة انه يكون واحد من تلاته مرشحين لجايزة
أفضل لاعب في العالم , اللي بقى رمز و قدوه لملايين الأطفال و الشباب في كل مكان على
وجه البسيطه
.
اللي خلى اسم مصر
بيتنطق كل 3 أيام بكل لغات العالم و بيسمعه مليار بني أدم لما بيتقال النجم المصري
, اللي متأخرش مره عن منتخب بلده في أي بطولة أو مباراه ( غيره بيتأخر و بيمتنع و بيتحجج
و بيتلكك ) , الولد ده لازم ندعمه , و لو غلط غلطه مش مقصوده نفوتها , عشان فعلا رصيدة
لدينا يسمح .
.......................................................................................................................
Mohamed
Hussein
8
يناير 2019·
لعبة حلوه بزمبلك
.
لحظات الهري بتبقى
جميله اوي , شبه المولد كده , هيصه و بوليله و واحد بيشخلل و واحد ماسك صاجات و رقاصه
نص لبّه , ولعبة الساحر و كوميكس و شألباظات و عيل تايه من ابوه و ست قاعده على جنب
بترضع ابنها , مولد يا مولانا مولد
.
بعد الهري و المولد
المفروض الناس بتقعد مع نفسها بهدوء تشرب كوباية شاي و تركن ضهرها على مسند و تفكر
بقى , ماهو مش حقيقي ان التفكير بيقصف العمر و بيأثر على نضارة البشره ولا حقيقي انه
هيجيب لك حب شباب
.
طب لو مافكّرتش
هيجرالنا ايه ؟ ولا حاجه , خلاص البلد عدت و فاتت , و حماده اللي فات مش هييجي تاني
, تفكيرك من عدمه و ذكائك من غبائك هيبقو حاجه لك انت و لولادك من بعدك , عايز تبقى
بني أدم ملو هدومك و لا مجرد بقره مطلوقه في غيط برسيم و حبلها على ضهرها , عايز تبقى
بني أدم ولا لعبه حلوه بزمبلك , القرار قرارك
.
بص يا مولانا
- حدث زي افتتاح
مسجد الفتاح العليم و كاتدرائية ميلاد المسيح و في مكان فنكوش زي العاصمه الاداريه
الجديده و بالشكل المعماري الوهمي ده و مع بعض في نفس التوقيت و تحديدا في احتفالات
مصر بأعياد الميلاد , كل كلمه في الكام سطر اللي فاتو لها معنى و لها دلاله و لها رساله
, والرساله أكيد أكيد مش لحضرتك .
.
- شيخ الأزهر و
بابا الكنيسه مش قاعدين بيلعبو مع معاليك في الشارع عشان كل شويه تحط اسمهم في اي جمله
عبيطه , الاتنين دول تحديدا بيمثلو عمودين من أعمدة الدوله , كل واحد فيهم كلمته لازم
تكون موزونه بميزان دهب , مش بتوع هري و شعارات و افتكاسات , كل واحد فيهم بيتعامل
بره مصر معاملة رئيس دوله , جزء من القوه الناعمه لبلدك و دورهم في 30 يونيو في منتهى
الخطوره و الأهميه ده لو عايز تفهم , اهميتهم بتيجي من أهمية المكان و الكرسي اللي
قاعدين عليه , يعني أيا ما يكون اسمهم , فمعلش يعني انت ممكن تحب اسلام البحيري و الهلالي
او حتى تحب نرمين الفقي زي مانا بحبها بس مع احتفاظك بشوية احترام للعمودين بتوع الخيمه
.
.
- الإعلام الأمريكي
و البريطاني و الغربي كله على بعضه كده بسلطاته و حبشتكاناته اعلام مسيس , يعني سلاح
في إيد اجهزة مخابرات الدول , مراكز حقوق الانسان و العصافير الكناريا و هيومان رايتس
واتش و كل الهجايص دي مجرد أسلحه , عرايس في ايد مخرج العرايس , أدوات ضغط و ابتزاز
, الغرب يابني مابيبعش سبح و الحدايه مابترميش كتاكيت و قمة الحماقه انك تبقى نايم
في بيتكو في البدرشين و متخيل ان تيريزا ماي و ترامب بيتشحتفو على حالك أو بيفكرو هيجوزو
الواد اللي حيلتهم ازاي و خدت حقوقك ولا لسه ؟, الشفافيه و المصداقيه و النقاء و الصفاء
و الوفاء كلمات جميله اوي , ممكن تبقى تقراها في دواوين فاروق جويده و تتعشى و تغسل
رجليك و تنام .
....................................................................................................
Mohamed
Hussein
7
يناير 2019·
رسالتي إلى قناة
ال CBS الإعلاميه الأمريكيه النزيهه
.. ممممممم لو
جه واد تسموه سعيد على إسم جده , و لو جت بنت سموها نزيهه , يالله بقى ربنا ينتعك بالسلامه
.
....................................................................................................................
Mohamed
Hussein
7
يناير 2019·
قناة ال CBS عملت بالظبط زي اللي راحت تجيب حق أخوها قامت رجعت
حامل , مش تبقى تستهدي بالله يا بنتي ؟ ولا انتي رايحه و عارفه اللي هيحصل ؟ والله
تلاقيكي عارفه , وانا اللي كنت فاكرك مؤدبه .
...........................................................................................................
Mohamed
Hussein
7
يناير 2019·
بحب السيسي جدا
بس مش موافق على تعديل الدستور , أرفض تماما , هو يكمل التلاتين سنه بتوعه و بعد كده
يتفضل مشكورا يقعد في بيتهم , ولا يحكم مصر يوم واحد بعدها , البلد مليانه رجاله تقدر
تكمل .
....................................................................................................................
Mohamed
Hussein
6
يناير 2019·
على فكره , لما
الساعه تيجي 12 المسيحيين هيبوسو بعض في الكنيسه
- مين ياهبل اللي
قالك الكلام ده ؟
.
عوض ابن خالتي
قالي انهم بيبوسو بعض في الكنيسه
- عوض ابن خالتك
ده مسيحي او دخل كنيسه قبل كده ؟
.
لا , بس ايه ,
واد بيعرف يقول في الأمجاد السماويه و فلان راح السما
- طب اسكت بقى
عشان ماتغاباش على أمك .
.............................................................................................................................
Mohamed
Hussein
6
يناير 2019·
اتنين أصحاب
.
تخيل حضرتك اتنين
أصدقاء أو زمايل عايشين في بيت واحد و أرض و احده وبيشتغلو نفس الشغلانه , بعد 5 سنين
أو 10 سنين بالكتير هتلاقيهم اتأثرو جدا ببعض و أثرو في بعض , كل واحد أخد من التاني
حاجات , حاجات في الطباع , في المصطلحات و اللغه , في الأعياد و المناسبات , في العادات
و العبادات , و بعد شويه بيحصل بينهم تداخل لدرجة تخليك صعب جدا تفرّق بينهم , تداخل
و تشابه حتى في الملامح .
.
طب ليه مستغرب
لما بتلاقيني بحب أشوف بابا الكنيسه ؟ و أشوف القساوسه في الشارع و صلبانهم على صدرهم
, و أحب احتفل بأعيادهم ولو جت فرصه هتلاقيني أول واحد قاعد عالكرسي قدام الديك الرومي
, و ليه تستغرب لما تلاقي جورج و مينا بيتمزجو من ترتيل الطبلاوي و تواشيح النقشبندي
و يشترو حلاوة المولد و يمتنعو عن الأكل و الشرب طواعية في نهار رمضان , ليه تستغرب
لما تلاقي أجراس الكنايس بتضرب مع مدفع الإفطار و البابا تواضروس بيقول كلمة في افتتاح
اكبر مسجد في مصر , و ليه تستغرب لما شيخ الأزهر يبقى أول الحضور للكاتدرائيه و أول
واحد بيقول كل سنه و انتو طيبين .
.
اتنين يا مولانا
عايشين مع بعض من 14 قرن , في نفس البيت و نفس حتة الأرض و نفس المدرسه و نفس الشارع
و نفس الشغل و عندهم نفس الهموم و المشاغل و نفس الأحلام و الأماني , ليه تستغرب لما
ملامحنا تتداخل و وجوهنا تتشابه و خطوط ايدينا تبقى واصله لبعض ؟ .
.
و ليه تستغرب ان
ترابطنا العجيب ده و كأنه توأم سيامي ملتصق يكون مزعج لكل أعداء مصر , الترابط قوه
, الترابط سلاح , الإنتماء خط دفاع أول , شئ مزعج جدا لأعداءك .
.
كل سنه و أهل مصر
الطيبين بخير و سعاده
...............................................................................................................
Mohamed
Hussein
5
يناير 2019·
افتتاح مسجد الفتاح
العليم و كاتدرائية ميلاد المسيح في العاصمه الإداريه الجديده
.
مسجد و كاتدرائيه
من اكبر المساجد و الكنائس في العالم , هيكونو باكورة المشاريع المفتتحه في العاصمه
الجديده , خير بدايه
.
لأ عبد الفتاح
السيسي مش سلفي وهيلبس أمك النقاب ولا علماني و هيقلع أمك الحجاب , ده راجل مصري منقوع
لشوشته في تراب البلد دي و نيلها و تاريخها و هويتها و جيناتها , لما فكّر قال الاتنين
يتعملو مع بعض و يتم افتتاحهم في نفس الوقت , و لو كان لسه حد من أجدادنا الفراعنه
عايش كان السيسي بناله معبد , عشان هي اسمها مصر , الفرعونيه المسيحيه المسلمه , و
على الساده المتضررين إنهم يضربو دماغهم في أتخن و أوسخ حيطه .
.
البابا تواضروس
هيقول كلمة بكره في افتتاح مسجد الفتاح العليم , اه والله في افتتاح المسجد , ماهي
دي يا مولانا البلد اللي حيرت أعدائها , البلد اللي ملهاش كتالوج ولا لها دراع عشان
يتلوي .
....................................................................................................................
Mohamed
Hussein
4
يناير 2019·
صباح الخير
.
في فرنسا بلد النور
و الحريه و العطور و ساندوتشات الحلاوه بالقشطه , قرر المسئولين هناك انهم يبنو مسجد
مختلط , يصلّي فيه الرجاله مع الستات عادي و الإمامه تبقى بالتبادل , مره راجل و مره
ست و كده , و الستات يسيبو شعرهم , و أرجع المسئولين الفرنسيين السبب في كده إن كتير
من المسلمين بطلو يروحو يصلو لانهم مش عاجبهم الفكره بتاعة ان الجامع بيصلي فيها الرجاله
بس , يعني ايه ياخويا ادخل جامع عشان أصلي فرض ربنا ألاقي كل اللي بيصلي جنبي شوية
خناشير ؟ دي حاجه تسد النفس و تقطع الخميره من البيت .
.
عموما انا شخصيا
معنديش مشكله في الفكره , هي فكره جميله و بره الصندوق , كل أملى بس و رجائي إن الساده
المسئولين ينبهو عالستات اللي هتصلي إمام انهم مايلبسوش في الإمامه بناطيل ستريتش و
بادي ستوماك , و إلا وقت الركوع و السجود هتبقى معجنه أقسم بالله , وساعتها الإقبال
على الصلاه في المسجد ده هيبقى تاريخي يافندم زي الإقبال على القراءه في مكتبة جامعة
القاهره في فيلم التجربه الدنماركيه .
.
الجيل بتاعنا ده
جيل اتظلم كتير , في مرحلة المراهقه ماحضرناش النت ولا القنوات بتاعة القمر الأوروبي
و كان أخرنا نتشعلق عالسطح عشان نظبط الإريال و نركب بوستر يلقط لنا قناة من لبنان
ولا حاجه , حتى في الصلاه اتظلمنا , لما كنت اروح أصلي في الجامع كنت دايما بلاقي جنبي
أبوكو عبمجيد الله يرحمه , الراجل ده يطلع من بيتهم حاطط الجلابيه على كتفه ولابس سديري
و لباس طويل تحت الركبه , ممكن تسميه لباس برمودا , تخيلو بقى لو كنا عشنا طفولتنا
و شبابنا جنب الجامع المختلط بتاع فرنسا ده , مش كان زمانا ملتزمين بالصلاه في المسجد
و مش بنفوت فرض واحد ؟ خصوصا الفروض الحريمي .
...........................................................................................................
ليست هناك تعليقات:
إرسال تعليق