Mohamed
Hussein
17
يناير 2019·
ضمن حملة حياة
كريمة اللي قال عليها الريس , اتوبيسات بتلف الشوارع و تلم المفقودين و اللي بلا مأوى
و المشردين , توفر لهم مكان أدمي و أمن في البرد ده و لقمة ياكلوها و غطا يتغطو بيه
و 4 حيطان .
.
مممممممممم مش
كانو وفرو تكلفة الحمله و الإتوبيسات و المأوى و خدو الفلوس دي دعمو بيها وجبات المطاعم
اللي في سيتي ستارز ؟ يعني ايه راجل ياخد مراته و عياله يعزمهم عالغدا في سيتي ستارز
يلاقي نفسه دافع 1200 جنيه ؟ دولة الظلم و الفاشيه , أعداء تشيليز وبابا جونز و موري
سوشي و أبو شقرا .
.........................................................................................................
Mohamed
Hussein
17
يناير 2019·
السيفُ أصدقُ إنباءً
من الكتبِ
.
أبويا الله يرحمه
كان بيعاملني بطريقة بيت الشعر اللي فوق ده , وانا في ساتّه ابتدائي كنت شاطر في المدرسه
, بس جه عليا وقت و اتعلقت فيه أوي بلعبة البنج بونج ( تنس الطاوله ) و الضمنه ( الدومينو
) , في الوقت ده بطلت مذاكره و بطلت أعمل واجباتي , اخلص المدرسه و اروح اكل و اطلع
عالمكان اللي بيلعبو فيه , أقعد هناك لحد 11 بالليل مع ان قريتنا بتنام كلها من العشا
, أبويا الله يرحمه كل يوم يرجع بالليل يسأل امي محمد فين ؟ تقوله بيلعب بنج و ضمنه
في المكان الفلاني , يسكت و ينام , تاني يوم نفس الشئ , تالت يوم نفس الشئ , وسابني
عالحال ده اسبوعين بحالهم , انا لا مذاكره ولا في دماغ اهلي
.
لحد مايوم قاعد
عالحصيره بلعب ضمنه مع واحد من سكرتارية المدرسه , قاعدين على حصيرة قدام بيتهم جنب
ترابيزة تنس الطاوله , لقيت ابويا جاي , انا شوفته جاي كان شعوري بالظبط بالظبط هو
نفس شعور مرسي لما دخلو عليه يوم 3 يوليو و قالو تعالى احنا عايزينك في كلمتين !!,
أبويا بكل هدوء قال سلامو عليكو يا استاذ فلان , لو سمحت انا عايز محمد معايا شويه
, و خدني في إيده و رجعنا البيت , مانطقش بكلمة عتاب ولا قال ليه ولا ازاي , ولا كلمه
, و انا مجرور زي الخروف بتاع العيد .
.
أبويا دخّلني البيت
في اوضه لها بابين , قفلهم الاتنين من جوه ,و طلع خرزانه من جيب السديري , و رزعني
علقه مش بنساها لحد دلوأتي , صوت صريخي جايب لاخر الشارع , امي تخبط و تقول معلش ياحمد
, حد الله ياحمد وهو ولا الهوا , خدت الطريحه التمام , ايه اللي حصل بعد كده ؟ من غير
مبالغه والله , اللي حصل اني ماهوبتش ناحية الضمنه و البنج بونج لحد ماخلصت جامعه
, كنت أفوت جنبهم أترعب , أفتكر المشهد , رجعت اذاكر تاني و أعرف ان فيه أب بيتعب عشان
مستقبلي و خايف عليا .
.
المشهد ده جه في
ذهني و انا قاعد دلوأتي و جه معاه سؤال , أبويا الله يرحمه لو كان من بتوع الكتب و
التنميه البشريه و الطرق العلميه الساينتيفك لتربية الأبناء , و استناني مثلا يوميها
و لبس الروب بتاع أستاذ عماد حمدي و قالي يا محمد يابني اللي انت بتعمله ده غلط و مش
حلو لمستقبلك , و بليز بليز ماتعملش كده تاني , مش كده أومال ( بصوت استاذ عماد حمدي
) كان مستقبلي هيبقى شكله ايه ؟.
......................................................................................................................
Mohamed
Hussein
16
يناير 2019·
إمبارح كان ذكرى
ميلاد الراجل اللي مات من 50 سنه و لسه لحد دلوأتي عامل هسهس لشوية خرفان الجماعه الإرهابيه
و معاهم شوية المخابيل بتوع الملك و كاريتة الملك , عامل لهم لحد النهارده خرم في دماغهم
أكبر من ثقب الأوزون مع إنه مات من نص قرن .
.
جمال عبد الناصر
ممكن يكون اكتر زعيم سياسي في العالم اتعرض لحملات تشويه ممنهجه من يوم مامات , حملات
شارك فيها دول و اجهزة سياديه و إعلام و جماعات و مؤرخين و كتاب , حاولو يلزقو له كل
التهم اللي ممكن نتخيلها , و في النهايه فشلو .
.
طب ليه حاولو و
ليه يشوهو واحد مات من سنين طويله ؟ عشان المبدأ نفسه مرفوض , مبدأ انه يكون في تاريخك
زعيم تعتبره قدوه و مثل أعلى رغم أخطاؤه و خطاياه ( ماهو ماكنش نبي ) , زعيم مصري قضى
على مفهوم الإستعمار في المنطقه كلها , بنى بلده بإيده و بإيد شعبها مش بإيد الخواجات
, أسس لمبدأ المساواه , مات في جيبه سبعتاشر جنيه , الحكايه دي مرفوضه سيادتك و مطلوب
من معاليك انك تشوف تاريخك كله مشوه و رموزك التاريخيه كلهم فاشلين وصيع و خونه , و
في النهايه ماتلاقيش حيطه تسند ضهرك عليها , دي الحرب النفسيه يا مولانا , حرب حتى
على التاريخ .
.
أي شعبيه و أي
زعامه و أي شخصيه تخلي واحد ينهزم في معركه يقوم يطلع و يعلن مسئوليته الكامله عن الهزيمه
( مايتحججش بحجج ) و يقول هرجع مواطن و اسيب الكرسي , يقوم الشعب نازله في الشارع و
يقوله مش هتمشي , على جثتنا انك تسيب الكرسي ده , ولو غلطت غلطه هنصلّحها سوا و إيدنا
في إيدك .
.
أي شعبيه و أي
زعامه لشخص يموت ( يعني لا بقى في إيده سيف ولا تحت منه فرس ) يقوم يحزن عليه وطن عربي
بالكامل , وملايين يشاركو في جنازته و البيوت في مصر تتحول لصوانات و الناس تاخد العزا
من بعض ؟ أي محبه زرعها ربنا في قلوب الناس لشخص جمال ؟ عارفين ليه ؟ عشان قال ل
90 % من الشعب المصري كانو تحت خط الفقر بألف كيلو , قال لهم انتو بني ادمين , لكو
حق تتعلمو و تاكلو و تشربو و تتعالجو و تعيشو , انتو مش عبيد ولا مواشي .
...........................................................................................................................
Mohamed
Hussein
15
يناير 2019·
الدوله المصريه
.
فضيلة الإمام الأكبر
شيخ الأزهر يتدخل شخصيا لدى مجلس التأديب الأعلى بالجامعه من أجل تخفيف العقوبه على
طالبة ( الحضن ) .
.
ده كان رأيي من
أول ما قريت الخبر , واللي كنت بتمناه , فكرة انه مفيش عقوبه و أصل الناس بتتفرج على
افلام بالشكل ده سيادتك ده اسمه هري و هجص , من 50سنه عبد الحليم حافظ قعد يحضن و يبوس
في فيلم أبي فوق الشجره لحد ما شفايفه ورمت و مع ذلك ماقلدناش سي عبحليم ولا حاجه
, بدون عقوبه لطالبه في كلية أزهريه شئ غير مقبول على الإطلاق .
.
و في نفس الوقت
العقوبه كانت قاسيه جدا و مبالغ فيها , و كان لازم نراعي سن البنت و مستقبلها و إنه
ممكن يكون تصرف لا إرادي
.
الأصل في العقوبات
مش الإنتقام من شخص ما , إنما الأصل في العقوبات بيبقى اسمه الردع و الردع هنا بيكون
للغير , عشان شوارعنا ماتبقاش مليطه سيادتك
, مَنْ أمن العقوبه
أساء الأدب
.
بص يابني باختصار
عشان ماتوجعش دماغك و دماغنا معاك , عايزها مليطه و من أنصار خالد أبو النجا؟ روح أوروبا
أو أمريكا أو تركيا عند خليفة المثليين هتلاقي الدنيا حواليك بيس و زي الفل .
.
عايزها قندهار
وضلمه و فكر سوداوي و إرهاب يكبر جواك زي المارد روح أفغانستان أو الصومال هتلاقي طلبك
هناك , و في النهايه أفكارك في دماغك و جواز سفرك في جيبك و أي حد يقولك طريق المطار
مقفول شرّحه
.
البلد دي لها طبيعه
و خصوصيه وهويه معينه , اسمها الوسطيه , ماتبقاش عيل ابن امبارح و عايز تشكل بلد يا
طولها يا عرضها على مزاج اللي خلفوك
.
هنبني أكبر كاتدرائيه
في الشرق الأوسط و يحضر افتتاحها شيخ الأزهر عشان احنا اسمنا الدوله المصريه , هنسبق
في تعليم بناتنا و يوصلو لأعلى الشهادات و أعلى المناصب و يبقى عندنا عالمة ذره من
100 سنه فاتت عشان احنا اسمنا الدوله المصريه , هنرفض البوس و الأحضان في شوارعنا عشان
احنا اسمنا الدوله المصريه .
................................................................................................................
Mohamed
Hussein
14
يناير 2019·
الفنان خالد أبو
النجا يتضامن مع ( طالبة الحضن ) و يدعو جميع الطلبه و الطالبات و اللي كانو زمايل
و الأصدقاء و اللي كانو أصدقاء إنهم يحضنو بعض في الشارع و يتصوو كمان .
.
مؤيد جدا لرأي
الأستاذ خالد أبو النجا , و على فكره بقى انا كنت زميل ياسمين الخطيب في المدرسه ,
حتى بالأماره هي كانت غايبه في الحصه بتاعة ( مَنْ هو عميد الأدب العربي ؟ ) , هبقى
أفكرها بالموضوع ده .
.
#الحضنُ_أصدقُ_إنباءً_من_شوربة_العدس
.................................................................................................................
Mohamed
Hussein
13
يناير 2019·
طبيعة الأشياء
.
دوام الحال من
المحال , أم كلثوم و عبد الحليم و فاتن حمامة و عمر الشريف بجلالة قدرهم مالهمشي ألتراس
حاليا ولا كتيبة مدافعين , ليه ؟ عشان ماتو أو بطلو يمثلو و يغنو , صح لسه لهم عشاق
بالملايين لكنهم مش بياخدو شكل الألتراس ولا الكتيبه , الألتراس حاليا هتلاقيه لعمرو
دياب و منير و السقا و أمير كراره وشيرين عبد الوهاب , حتى لو كان مستواهم أقل من اللي
رحلو, بس معلش هي دي طبيعة الأشياء .
.
و في عالم كرة
القدم , مصر طلعت نجوم كتير أوي , زي الخطيب و حسن شحاته و حازم إمام و فاروق جعفر
و طاهر أبو زيد و أبو تريكه و محمد بركات و حسام حسن و غيرهم , كلهم كانو نجوم على
مستوى مصر و الوطن العربي و شويه في أفريقيا , يعني معروفين في المنطقه دي , و كلهم
اعتزلو و نجوميتهم قلت , وفضلت الذكرى , مش أكتر من كده .
.
اجمالا و انت مغمض
عينيك لازم تقول بالفم المليان , صلاح حدوته تانيه خالص , مع كل احترامي للأسماء اللي
فوق , البحيره لا تخطئها عين , بس البحيره لا تقارن بالمحيط , فرق شاسع بين شعبيه وسط
200 مليون و شعبيه وسط 4 مليار بني أدم , صلاح في عالم كرة القدم المصريه مجاش زيه
ولا هييجي و في عالم كرة القدم الأفريقيه فيه شخص واحد يتفوق عليه في النجوميه , هو
جورج وايا رئيس ليبريا الحالي , يعني ممكن نقول إنه التاني في تاريخ القاره وقدامه
فرصه كبيرة يبقى الأول .
.
لاعب الكره لما
بيعتزل نجوميته بتقل زي الفنان اللي بيعتزل , وممكن يستعيد شويه من نجوميته لو اشتغل
مدرب و حقق انجازات كبيره ( زي حسن شحاته ) أو بقى رئيس نادي كبير اوي ( زي الخطيب
) , غير كده لا , بتفضل الذكرى و المفترض و المنطقي مايكونشي فيه ألتراس ولا كتيبة
مدافعين .
.
محمد أبو تريكه
حاليا مجرد محلل لمباريات كرة القدم في قناة قطريه , يعني شانه شأن أيمن يونس و مجدي
عبد الغني , نجوميته و سحره في عالم كرة القدم المفروض تكون انتهت و الباقي ذكرى ,
فكون إنه له ألتراس حاليا بيحاولو ينفخو الروح في القتيل و يخترعو لأبوتريكه نجومية
جباره ( حاليا و هو مبطل كوره من سنين ) , الحكايه دي ملهاش أي تفسير غير تلميع و ترويج
لشخص ما من جهة ما .
.
ملحوظه , انا هنا
مش بتكلم عن أحكام قضاء ولا أخلاق فلان و علان , أنا بتكلم عن طبيعة الأشياء وعلامة
الإستفهام , و كل الساده أعضاء ألتراس أبو تريكه الحاليين يسألو نفسهم سؤال , فين ألتراس
محمود الخطيب و ألتراس حسن شحاته وحسام حسن و حازم إمام و بركات ؟ وفين حتى ألتراس
أم كلثوم و فاتن حمامه , لو عرفتو الإجابه هتبقو عُمَد والله .
...................................................................................................................
Mohamed
Hussein
12
يناير 2019·
شوفت يابني اللي
حصل ؟
- خير حصل ايه
؟
.
مصيبة أقسم بالله
, مش عارف أجيبهالك إزاي
- لا قول بسرعه
.
مديرة مدرسة بتشتكي
و تقول إن عندها تلامذه كتير بياكلو من الزباله
- يا نهار اسود
, بتتكلم جد ؟
.
اه والله , بتقول
مدرستها بس فيها 35 عيل مش لاقيين ياكلو و بيطلعو يدورو عالأكل في صناديق الزباله
- اه بقى , عشان
تبقو تفرحو بالعاصمه الإداريه و أكبر جامع و أكبر كاتدرائيه و أطفالنا مش لاقيين ياكلو
.
المصيبه الأكبر
كمان
- هو فيه أكبر
من كده؟
.
أه يا سيدي , اعضاء
من البرلمان بيطالبو بتعيين وزير اسمه وزير الجوع عشان الناس و الأطفال اللي مش لاقيين
ياكلو عددهم كتير أوي .
- يا فضيحتنا قدام
العالم , هو احنا بقينا في قاع الأمم من شويه , حسبي الله و نعم الوكيل , يارب نغور
من البلد دي بقى , يارب هجره
.
عايز تهاجر و تروح
فين يا حبيبي ؟
- أي دوله محترمه
يا أخي , دوله يكون الإنسان فيها له كرامه , حكومتها تكون بتوفر له لقمته و سكنه و
هو قاعد مستريح كده , نتعامل فيها زي البني أدمين
.
أه فاهمك طبعا
, بس تقصد دوله زي إيه؟
- زي بريطانيا
يا سيدي , نفسي أهاجر بريطانيا و أسيبكو تاكلو من الزباله براحتكو
.
لا ماهو انا نسيت
أقولك
- نسيت تقولي إيه
؟
.
الخبر بتاع الأطفال
اللي بيطلعو من المدرسه يدورو عالأكل في الزباله و أعضاء البرلمان اللي بيطالبو بتعيين
وزير للجوع
- ماله الخبر ؟
.
الخبر ده حضرتك
في بريطانيا .
.....................................................................................................................
Mohamed
Hussein
11
يناير 2019·
بشوف أصدقاء جامعيين
عالفيس بوك بيغلطو غلطات إملائيه و عزة جلال الله لو بنتي اللي في تالته ابتدائي غلطتها
هطلعها من المدرسه و أخليها تشتغل خياطه أو صبي ميكانيكي و أسمّيها بليه , يعني يبقى
كفايه عليها تعليم لحد كده .
.
الأغرب بقى إن
نفس الأصدقاء بتوع ( والهي , مومكن , فعلن , مثلن , طبعن , إنشاء الله , الله و أكبر
, و نعمه بالله ) مابيفوتوش فرصه إلا لما ينظّرو على اللي خلفوني في كل حاجه من أول
السياسات الدوليه لشغل المخابرات لاقتصاديات الدول للتسليح , للبنيه التحتيه , و لو
جت لهم فرصه يهرو في القنبله الذريه مش هيتأخرو
.
زمان كان سلو بلدنا
إن اللي مش عارف بيقول مش عارف , دلوأتي بقى سلو بلدنا إن الكل عارف , و الكل عارف
القرد مخبي ابنه فين , حتى لو كانو في الأصل فاهمين إن إبن القرد هو الجحش الصغير و
بالإنجليزي اسمه small lion
.................................................................................................................
ليست هناك تعليقات:
إرسال تعليق