( محمد حسين - منوع ) ( من 18 ديسمبر 2014 - 25 ديسمبر 2014 )

Mohamed Hussein

25 ديسمبر 2014

رجب السويركي صاحب محلات التوحيد و الزفت النور اتحوّل لمحكمة ( الجنح ) بعد ما اثبتت التحريات اهانته لعلم مصر , مولانا كان بيطبع علم مصر عالجزم اللي بيبيعها !! .

طب ( جُنح ) إيه يا عم عبد الفتاح ؟ العلم اللي بيرفعو جنودنا عالحدود , العلم اللي مات مننا عشرات الألاف عشان يترفع في سينا , العلم اللي بيتلف فيه جثمان الشهيد يترسم عالجزمه و تبقى جُنحه يا سيادة الرئيس الجندي المقاتل ؟!!.

.......................................................................................................................................

Mohamed Hussein

25 ديسمبر 2014·

عايز تعرف إن الإنسان الطبيعي مش دايما بيولد و إنه ممكن يبيض زي الفرخه أحيانا ؟ بسيطه خالص :

هات انسان طبيعي عادي و احبسه في عشة فراخ في الصحرا بعيد عن أي بشر , امنعه من أكل اللحوم و الأسماك و خلّي كل أكله حبوب نباتيه يعني قمح , دره , و ممكن فتافيت عيش , و هات شوية رسامين من كلية الفنون الجميله دفعة 2001 و خليهم يرسمو على حيطان العشه من جوه فرخه و بيضه في كل حته , امنعه من الكلام و خليه يستخدم كلمتين بس , كاك ( لما يكون عايز ياكل ) و ( كاك كاك ) لما يكون عايز ينام , و هات له شويه مايه حطهم في علبه بلاستيك صغيره , اربط بؤه بأساتيك من بتاعة الفلوس و خلي حته صغيره من بؤه اللي باينه قدام ( زي المنقار يعني ) و بالليل هات له تليفزيون صغير 14 بوصه ناشونال يكون قديم و بيجيب قناه واحده و شغّل له طول الليل ريهام سعيد , و بس كده , هتيجي الصبح تلاقيه نايم و البيضه جنب منه .

.

أو بلاش تعمل كل اللي فوق ده , هات انسان طبيعي و خليه يقرا مقالتين بس من مقالات أحمد منصور اللي لسه بيكتبها لحد النهارده و بيقول فيها الأسباب و التوقعات و الإرهاصات و الدلائل و القرائن اللي بتؤكد إن الإنقلاب بيترنح !! .

.................

....................... أكادُ من فرطِ الجمالِ أبيْضُ !! .

.....................................................................................................................................

Mohamed Hussein

25 ديسمبر 2014·

كتبت بوست تهنئة لأقباط مصر بعيد الميلاد المجيد و نمت و صحيت لقيت 2 عملولي بلوك , و لما بمسك علاء عبد الفتاح و أمثاله غسيل و مكوى بلاقي واحد عملي بلوك , البوب الصالح لو جبت سيرته دي فيها 3 بلوك عالأقل , و لو دوست جامد في خيرت الشاطر و شلة الزلنطحيه هيتعملي 4 بلوك , و لو قلت إن أحمد موسى و توفيق عكاشة أخرهم يقعدو بنصبة شاي في أي إشارة مرور هيتعملي بلوكين و نص , طب دي مصلحه و عهد الله , أصلي لما وصلت ل 5 الاف صديق احترت اضيف اصدقاء جدد ازاي ؟ قايمة الإنتظار فيها كذا ألف إسم طالبين صداقه , لازم احذف ناس من عندي , يعني هدخل الصفحه و ادوّر في ال 5 الاف صديق و اشوف مين مش فعال أو حسابه مضروب عشان احذفه ؟ دي شغلانه بقى زي اللي بيدوّر على ابره في كوم قش , أهي جت من عند ربنا و تنضيف الصفحه عندي بقى توماتيكي توماتيكي .

.

استنو بقى هحكي لكو حكايه صغيره عشان أنا مزنوق في بلوكين تلاته دلوأتي , البت لمار بنتي الماجنه الفاسقه أم 4 سنين عندها النهارده حفلت بابا نويل في المدرسه , امبارح اشتريت لها لبس الكافر الماجن بابا نويل و الزعبوط بتاعه , و النهارده الصبح صحيت هي من النوم تغنّي أغنية الكفار و الملحدين دي :

بابا نويل بابا نويل شكله جميل

شنب و دقن و لون

وانا في النوم

إن ماي روم in my room

جاني و دق الرينج !!

قالي قوم صح النوم

النهارده عيد

عيد سعيد بابا نويل

جود مورنينج ماي سَن !! هيه .

...................................................................................................................................

Mohamed Hussein

25 ديسمبر 2014·

و بمناسبة فتاوي المشايخ اللي نازله من الحنفيه اليومين دول بإن تهنئة المسيحيين بأعيادهم حرام عايز أقول لكل أقباط مصر كل سنه وانتو بألف خير يا أهل مصر الطيبين , ميري كريسماس يا ولاد الحلال .

ماهو أكيد فيه قساوسه لهم نفس الدماغ بتاعة مشايخنا دي و بيقولو نفس الكلام , و عشان كده لما تقابل واحد مسيحي و تلاقيه منفعل و تقول له صلي عالنبي يا جورج هيقولك : عليه افضل صلاه و سلام يا عم .

احنا كده , الشعب المعجزه , من حق القساوسه و المشايخ بتوعنا يهرتلو زي ما هما عايزين و من حق الشعب يفضل زي ماهو من 1400 سنه لحد النهارده , شجرة طيبه أصلها ثابت و فرعها في السماء .

.................................................................................................................................

Mohamed Hussein

24 ديسمبر 2014·

ههههههههههههه أصدقائي الأهلاويه رفعو الشعار بتاعنا ( سنظل أوفياء ) بس هما بيقولوه كده ( عالحلوه و المره معاك ) , يالله الحمد لله , و لابد عن يوم معلوم تترد فيه المظالم .

.....................................................................................................................

Mohamed Hussein

23 ديسمبر 2014·

أمي الغاليه خلفت 6 اللهم صل عالنبي , 3 ولاد و 3 بنات و انا اكبرهم , قامو ال 6 دول لما كبرو و خلصو جامعه اتجوزو 6 كمان ( 3 ولاد و 3 بنات برضه ) بقينا في عين الحسود 12 , بعد كده بدأنا في مرحلة الجيل الجديد بقى و الخلفه نزلت ورا بعضها , و اللهم صل عالنبي البيت اتملى عيال , المهم إن أمي بقى علمتنا ازي نحب بعض و نحبها قبلنا , و في أي موقف أو بإشاره منها بنتجمع كلنا تحت رجليها .

اللمّه دي و دفا البيت حوالين امي اللي هي الوتد بتاع الخيمه بيبقو كأنهم رئه جديده و نضيفه بنتنفس منها .

و انا كل ماتخنق من زحمة القاهره و المفرمه اللي اسمها ( حياة العاصمه ) بروح عند أمي عشان اتنفس .

بستغرب من الخوات اللي بيقاطعو بعض واللي يتخانقو مع بعض و اللي يزعل اخته و اللي تشمت في اخوها واللي يفوت عليه عيد و اتنين ماسلمش على امه ولا شافها , و يتهيالي لو امهم وزيره و لّا مستشاره و ماعرفتش تزرع الحب ده في ولادها تبقى ماتسواش تلاته ابيض .

.

و في سنه 2015 ليا امنيه واحده ................ ربنا يبارك لك في صحتك يامه .

.....................................................................................................................................

Mohamed Hussein

23 ديسمبر 2014·

و لما قطر تقفل الجزيره مباشر مصر و تركيا تحسّن شويه من خطابها الحنجوري ناحيتنا يبقى ده معناه ايه ؟ معناه ولا حاجه , معناه صفر .

ماهو اللي يقعد 3 سنين و اكتر ينفخ في نار الفتنه و يفكر ليل و نهار في خراب مصر و يبقى مأوى و ملجأ لكل صعلوك هارب و يحترف لعب دور الشيطان يعني وصل لمرحلة الكُفر السياسي بمصر لو في يوم شوفته لابس توب ابيض و ماسك سبحه في ايده و بيأدن للصلاه ( والسلام ) مش هصلي وراه و لا هسلّم .

ماعمريش سمعت و لا في الأساطير و الخرافات عن ديب صحي من النوم لقى نفسه غزاله بريه رقيقه , الديب هو الديب بيجري في دمه الكره و الشر مش خير و سلام و ورد , و برضه ماسمعتش عن ديب بيجري في دمه المِسْك ............ فإنَ المسكَ بعضُ دمِ الغزال ِ .

..........................................................................................................................

Mohamed Hussein

22 ديسمبر 2014·

من بريق الوجدِ في عينيكَ أشعلتَ حنيني

و على دربكَ أنّى رحتَ أرسلتُ عيوني .

مممممممممممممممممممممم

مممممممممممممممممممممم

يا فاتناً لولاهُ ما هزّني و جدٌ و لا طعمُ الهوى طاب لي

هذا فؤادي فامتلكْ أمرهُ و اظلمهُ إنْ أحببتَ أو فاعدلِ !!.

.

مش انا والله اللي بقول كده , دي كوكب الشرق و اعظم مخلوقات الله في القرن ال 20 الست اللي اسمها ام كلثوم , و الكلام طبعا في الأصل في الأصل للشاعر الرائع الله يرحمه عبد الله الفيصل .

طب الناس دي و الجيل ده كانو عايشين ازاي ؟ جابو الجمال و الرقه و الشياكه و الصوت و اللحن و الحرف ازاي و منين ؟ كانو بياكلو ايه و يشربو ايه ؟ طب أدفع كام انا عشان احضر حفله لأم كلثوم بتغني فيها ( من أجل عينيك ) ؟!.

.

أكتر لحظتين في حياتي بعيش فيهم حالة شجن حقيقيه و غريبه جدا هما اللحظه اللي اسمع فيها من أجل عينيك بتاعة سومه و اللحظه اللي اسمع فيها الطبلاوي و هو بيرتّل ( يا أيها النبي اتقى الله ) ............ و دموعي تنزل بقى في الحالتين .

.............................................................................................................

Mohamed Hussein

21 ديسمبر 2014·

بوست + 98

اهداء لصديقي العزيز فلان الفلاني

.

بص يا صاحبي , على سيرة كلامك ان السبسي عمره 90 سنه و بيطلّع في الروح و يادوب يستحمل تدليل البروستاتا مش اعباء الرئاسه و كده , هحكي لك حكايه صغيره .

.

أيام الإنتخابات الرئاسيه بعد ثورة يناير كان فيه مناظره شهيره بين ابو الفتوح و عمر موسى , قبلها كنت بميل انا لابو الفتوح و فاكره من ( الحمائم ) الكيوت بتوع الإخوان ( أه كنت حمار أوي ) , و بعد المناظره مباشرة دخلت على صفحتي و كتبت ان ابو الفتوح ( اللي انا بميل له ) أثبت انه مجرد بهلول برياله و اخره يقعد على مسطبه و إن عمرو موسى ( اللي انا مش بحبه ) أثبت انه راجل دوله بمعنى الكلمه .

.

كانت اكتر حاجه استفزتني في اجابات ابو الفتوح هي اصراره على حكاية الكشف الطبي على عمرو موسى , و كتبت انا تعليق على كده : ان عمرو موسى كبير في السن فعلا بس ده مش معناه انه ماينفعش رئيس , و اغلب ظني انه بيعاني من مشاكل في البروستاتا و دي مالهاش اي 30 علاقه بمهام رئيس الدوله .

.

نفس الكلام عايز أقوله لصديقي الغالي " هو انت مش عاجبك السبسي عشان عجوز أوي واكيد عنده مشاكل في البروستاتا ؟ هو انت عايز الناس تنزل تنتخب رئيس و لا تنتخب عنتيل ؟!! يعني عايز واحد بيعرف يحكم و لا واحد بيعرف ي*** ؟!!.

......................................................................................................................

Mohamed Hussein

21 ديسمبر 2014·

السبسي رئيسا لتونس و لا عزاء للخرفان و الكولجيه , تونس رجعت كامله لينا و مصر اليوم في عيد .

...................................................................................................................................

Mohamed Hussein

21 ديسمبر 2014·

و لقيت عندي جاكت شتوي قديم جيت البسه و بدوّر في جيوبه كده مممممممممم قوم يشاء السميع العليم مالقاش فيه 300 جنيه , أه و الله مالقيتش 300 جنيه و لا ساغ حتى .

أنا قلت أكتب بوست و اقول لكو كده أصلي لاحظت عالفيس ان كل اللي بيلبس جاكيت قديم من بتوعه و يدوّر في جيوبه بيلاقي 300 جنيه .

..................................................................................................................................

Mohamed Hussein

21 ديسمبر 2014·

مش ملاحظ أي علاقه بين الخبرين دول ؟

قطر باعته مندوب من عندها للمصالحه و في نفس الوقت الخرفان عاملين برلمان في تركيا ؟! و الحكايتين حصلو بعد زيارة ابن موزه لأنقره من كام يوم .

.

أنا ملاحظ , الحكايه كلها إن أمريكا ( اللي هي القرداتي الأعظم ) بتلاعب قرودها مش أكتر , تقول لقرد اقعد انت واستريح و تقول لقرد تاني قوم اتنطط , شويه كده وبعدين تبدّل الوضع و اللي كان بيتنطط يركن على جنب شويه و ياكل ( موزه ) و اللي كان على جنب يتنطط , ماهي سياسة أمريكا الخارجيه في الشرق الأوسط اسمها ( الليل الليل .... الليل يا ميمون ) .

السيسي بقى لو هارش الليله دي ( و اكيد هارشها ) فهو كمان يقدر يلاعب القرود في نفس السيرك و يطلب من تركيا و قطر يعملو عجينه الفلاحه .

..........................................................................................................................

Mohamed Hussein

20 ديسمبر 2014·

اعضاء برلمان الإرهابيين اللي كان في مصر اتجمعو في تركيا لما هربو , و تركيا هي حاليا ملجأ كل صعلوك و ارهابي , بترعاهم و تعلفهم زي المواشي , بس السيد العضو الإرهابي زهق من القاعده كده من غير شغله و لا مشغله , حاول يسلّي نفسه الفتره اللي فاتت , مرّه بالتفكير والتخطيط في أي عمل ارهابي , مره بترويج أي خبر افتكاسه, مره يكتبو شعارات مرسي راجع و مش هنتراجع , مره يلزقو أي كلمتين على أي صوره فوتو شوب , مره يعملو ندوه عن تحرير القدس ( دي بتبقى خميس و جمعه عشان وقت الفراغ ) , و برضه مفيش فايده .

.

و لما الزهق اتمكن منهم هو و ابن عمه الملل , اجتمع الإرهابيين و قالو نفكر في حاجه جديده , نعمل ايه يابو لهب ؟ رأيك ايه يا حنظله ؟ و كلمه من هنا على قنبله من هنا استقر بيهم الوضع انهم يعملو جلسات البرلمان القديم في تركيا , يعني تيار إسلامي مقدس هيعمل جلسات البرلمان الإسلامي المقدس في الأراضي التركيه المقدسه .

.

طب و الله فكره , و انا بقول بقى الحكومه تبعت لهم بقية السلفيين المقدسين بتوع نفس البرلمان , أهم يسلّوهم برضه , و احد يأدن و واحد يرقي و كده يعني , و هما طالعين بقى من جلسات البرلمان المقدس و ماشيين في الشارع التركي المقدس هيلاقو بنت مزه مقدسه راكنه على عمود مقدس و بتاخد في الساعه 50 دولار مقدسه و يطلعو بيها عالطريق الزراعي المقدس بتاع انقره اسطنبول .

و بعد شويه كده نبقى نعمل سلك شايك حوالين تركيا عشان نحجز الناس دي جواها , و الحكومه المصريه تعتبرها محميه طبيعيه ..

.

بالك انت بعد اسبوع ولا اتنين هتكون حكاية البرلمان دي بقت ممله و سخيفه و هيزهقو منها برضه و هتلاقي الخبر الجديد في وكالة الأناضول هو : عقد قران الصباع الصغير بتاع رجل أيمن نور على الصباع الكبير بتاع رجل عاصم عبد الماجد .

...........................................................................................................................

Mohamed Hussein

20 ديسمبر 2014·

حسيت ان الفيس عندي تقيل شويتين قلت ادخل اشوف المجموعات اللي بتترمّى عالواحد زي اعلانات المطاعم في القاهره , و لقيتني ما شاء الله عضو في 333 مجموعه أه والله وانا ماعرفش , أصلي مش من هنا .

.

ماهو في مصر كل ماتنين شباب يقعدو على قهوه بيفكرّو في حاجتين اتنين مفيش غيرهم , مين اللي هيحاسب عالمعسّل اللي هيشربوه و مين اللي هيبقى ادمن لل 17 مجموعه اللي هيعملوهم و هما قاعدين .

مجموعات و اسماء لها العجب , حاجات كده من نوعية : ماتيجي نحب مصر , تعالى نحب مصر , انت مابتجيش ليه نحب مصر ؟ مش تبقى تيجي نحب مصر ؟! رابطه مشجعي مغاغه , أم الشحات للتنميه البشريه , الطريق الى الله , أصل الطريق إلى الله , صحيح الطريق الى الله , محبي الشيخ ابو حوده الفسخاني , عشاق شعر الصدر بتاع تامر حسني , محل ماعرفشي ايه للستاير و الكرانيش , احنا بتوع السمّانه !! .

.

بقالي ساعه بحذف نفسي من المجموعات دي لحد ايدي ما وجعتني , زي ماكون بنقّى دنيبه من أرض الرز .

..................................................................................................................................

Mohamed Hussein

19 ديسمبر 2014·

كل سنه وانتو طيبين بمناسبة شجرة عيد الميلاد و المولد النبوي و انتخابات البرلمان المصري الجديد , مجلس النواب بقى اللي هيبقى كله نوّاب , يعني نايب و نايبه !! زيه زي غيره .

في البرلمان الجاي المفروض يعني الأغلبيه هتبقى للمستقلين , اللي هما غالبا مش مستقلين أو بعد ما بينجحو مابيبقوش مستقلين , الله يرحمه كمال الشاذلي كان استاذ في اللعبه دي و أكيد خيرت الشاطر كمان كان استاذ , كمال الشاذلي مات بس تلاميذه موجودين و خيرت الشاطر في السجن و تلاميذه بره , و اللي مايجيش بسبحة خيرت الشاطر بيجي بسبحة كمال الشاذلي , و اطيعو الله و اطيعو الرسول و أولي الأمر منكم .

مبارك الله يجحمه هو اللي ابتدع الليله دي , ليلة البرلمان اللي مش برلمان و فيه نواب مش نواب , حتى المعارضه كان عاملها على إديه , و فجأه و بعد ثورتين تلاته اكتشفنا احنا بقى ان مفيش حياه سياسيه في مصر ولا احزاب , فيه حزب وطني و إخوان و شوية عيال لابسين كوفيه فلسطيني و كوتشي وفاهمين ان الثورات هي فعل مضارع مستمر , و بيثورو زي التور المربوط في ساقيه و لازم الساقيه دي تلفّ على طول حتى لو مفيش مايه , برضه هتلف و تكسر تروسها بنفسها .

كل سنه و انتو طيبين .

.......................................................................................................................................

Mohamed Hussein.

19 ديسمبر 2014·

انا و لمار

...............................................................................................................

Mohamed Hussein

18 ديسمبر 2014·

و انا رايح البلد من كام يوم كده , لقيت حتة ارض في مدخل البلد تعمل لها بتاع فدان فيها مباني قديمه و مهجوره مالهاش اي تلاتين لازمه , الأرض دي ملك الدوله , يعني ملك الحكومه , قمت انا افتكرت ان قريتنا دي اللي فيها اكتر من 500 شاب مفهاش ملعب كوره و لا جُرن حتى للشباب يلعبو فيه و بالتالي مفهاش نادي رياضي واجتماعي , وبالتأكيد الشباب هيكون مسلّم دماغه تسليم أهالي إمّا للسبكي و حلاوة روح أو لوجدي غنيم و عبد الحميد كشك !! .

أنا قلت مبدهاش بقى , عم ابراهيم محلب راجل طيب أوي و أي حد بيقصده في مشروع خدمي مش بيتأخر , قمت مصوّر الأرض من كل جهه و خدت الأوراق اللي بتثبت ان قريتنا مفهاش نادي ولا ملعب و اتقدمت بطلب لعم ابراهيم محلب إنه يسمح لنا نعمل حتة الأرض دي ملعب و نادي اجتماعي ثقافي رياضي عشان نستغل فيه طاقات الشباب قام الراجل مقابلني بالأحضان و موقّع ييجي 17 توقيع عالطلب بتاعي وانا اقوله كفايه يا عم ابراهيم كفايه و هو يقولي لا ابدا , أنا مع أي مشروع يخدم الناس !! .

.

ههههههههههههههه طبعا اللي فات ده كان حلم , مانا اسمي محمد حسين مش محمود بدر و مش مترشح لأي حاجه .

.

الساده الأفاضل بتوع أي حاجه تعملها الحكومه صح و أي حاجه تيجي من ناحية محمود بدر صح عمر مصر ما هتتقدم بيكو .

و الساده الأفاضل اللي كل ما فرخه تبطّل تبيض في عشه فراخ في مصر يقولو السيسي هو السبب , والسيسي هو اللي خصص الأرض دي و السيسي بينام و يصحى يسأل عن محمود بدر و بيحلم بيه و هو نايم انتو برضو عمركو ما هتبنو طوبه في البلد دي .

...................................................................................................................................

( محمد حسين - منوع ) ( من 11 ديسمبر 2014 - 18 ديسمبر 2014 )

Mohamed Hussein

18 ديسمبر 2014·

المهم بقى يا لوجي , تعالى نكمّل حكايتنا بتاعة امبارح , و سيبك من محمود بدر و محمود الجوهري .

.

لما كان عمري 6 سنين , يعني أصغر منك بسنتين كده , كان جدي حسين طبعا عنده 22 حفيد موجودين في نفس البيت , بس وقع اختياره عليا انا عشان اسرح معاه بالغنم أه والله , و ماعرفش انا ليه يعني ؟ المهم كنا بنطلع بالغنم من 7 الصبح و نروح بيهم أراضي الدره الفاضيه بعد ما يتشال منها المحصول و نفضل جنبهم لحد المغرب , في الأرض كنا ممكن نلاقي كوز دره صغير ( بعبوله ) نقوم مفرّطينها و نأكّلها للخروف , و لو فيه خروف صغير ( حُولي ) و هيسرح معانا بشيله انا و انا ماشي رايح جاي , و عشان احنا كنا في الصيف يعني في الحر كان سيدي حسين كل كام يوم يقولي تعالى عشان نحمّي الغنم بقى , و نقوم رايحين عند الترعه و ننزل الغنم في الترعه وانا انزل معاهم احميهم و بالمره استحمى , و رغم إن الحكايه دي اسمها فعلا child abuse بس انا كنت ببقى فرحان اوي , فرحان اني بعمل حاجه مفيده على عكس ولاد عمي و زمايلي اللي من جيلي , و فضلت اسرح بالغنم مع جدي لحد ما بقى عمري 10 سنين و سيدي حسين مات و بعنا الغنم .

.

بكره بقى هحكي لك حكاية الجمل مع ابويا الله يرحمه و ليه بعناه هو كمان .

.......................................................................................................................................

Mohamed Hussein

18 ديسمبر 2014·

خبر بيقول إن محمود بدر خد من حكومة عم ابراهيم ابو محلب حتة أرض عشان يعمل عليها مصنع بسكوت !! .

طيب تمام أوي , عموما احنا لازم نشجع الشباب و حماس الشباب و وطنية الشباب و حَبْ الشباب , و المشاريع الصغيره و المتوسطه مهمه جدا في تقدم الأمم و استقلالها و سلامة اراضيها و سلامتها ام حسن .

.

بص يا عم ابراهيم انا مش هقعد ألفّ و ادور , ومش هنام بقى وانا شايل منك و متعبّي , العدل بيقول باختصار , لو محمود بدر خد حتة أرض من الحكومه تبقى الحكومه دي مستعده تماما تدّي قطع أراضي مماثله لعدد 33 مليون شاب مثلا ( المؤيدين و المعارضين ) بنفس الأليه , يعني لو باعت لمحمود بدر تبيع لنا بنفس السعر , لو خدها ايجار أو حق انتفاع نبقى زيه بالظبط , أنا عايز حتة أرض يا عم ابراهيم اعمل عليها مزرعة فواكه ( أنا عايزه ورد يا ابراهيم ) , و ابن عمي الإخوانجي عايز حتة ارض يعمل عليها مشروع , هه قلت ايه ؟! نمضي العقد ؟!.

...............

‫#‏مؤيد ‫#‏مش ‫#‏طبّال

.......................................................................................................................................

Mohamed Hussein

18 ديسمبر 2014·

و لما وصلت البيت قعدت لوجي تحكي لي عن رحلتها في كدزانيا اللي في التجمع الخامس فقلت احكي لها انا كمان عن طفولتي اللي في أدغال السنبلاوين بقى , ماهو محدش أحسن من حد :

.

بصي يا لوجي , و انا صغير كده و لحد ما بقى عمري 10 سنين عشت في بيت بالطوب الني ( الطين يعني ) , البيت ده كان فيه 4 أوض و طرقه و مطبخ و حمام و زريبه !! .

البيت له مدخل واحد , أول ما تدخلي هتلاقي اوضتين على يمينك بعدهم المطبخ و أوضتين على شمالك بعدهم الحمّام , و زريبه كبيره في الأخر .

.

كل أوضه فيها راجل و مراته و عياله , اللي مخلف 5 و اللي مخلف 6 , و الزريبه مليانه خرفان و معيز و فراخ و فيها جمل كبير و حمار , يعني كان عددنا بالظبط بالظبط 4 رجاله و 4 ستات و بتاع 22 طفل و طفله و 40 خروف و معزه و 75 ديك و فرخه , و كلنا بندخل من نفس المدخل و عايشين مع بعض في سلام .

.

بكره بقى هكملك الحكايه .

......................................................................................................................................

Mohamed Hussein

17 ديسمبر 2014·

حتى لوجي بنتي أم 8 سنين بقت تتصل بيا و تقولي انت اتأخرت بره يا بابا و بتعمل ايه كل ده ؟ هههههههههههههه الناس دي عايزه مني ايه يا عم ابراهيم ؟ يعني انا كده ابقى متجوز اتنين و خاطب البت الصغيره ام 4 سنين ؟!!.

.....................................................................................................................................

Mohamed Hussein

17 ديسمبر 2014·

بقت سخيفه أوي حكاية ( أبو 50 % ) دي , يتهيألي غنّينا فيها كتير و عزفنا عالربابه و بقت عامله زي حلة الطبيخ البايت .

وانا في المدرسه كنت بفحت نفسي مذاكره عشان ادخل كلية قمه و بعد ما دخلت الكليه بسنتين فتحت الجامعات الخاصه ولقيت ابو 60 % بيدخل طب و صيدله !! .

و هيتخرجو زيهم زينا و يبقى معاهم نفس الكارنيه اللي اتفحتنا عشانه , طب نعمل ايه طيب ؟!.

.

انا ضد بلطجة ظابط الشرطه و ضد انه يسئ استخدامه لصلاحياته و ضد الألفاظ اللي بيستخدموها و ضد العنف اللي ممكن يحصل في الأقسام حتى لو كان ضد خرفان الجماعه الإرهابيه و بس , لكن مش هبقى برياله و اقول انا ضد ( أبو 50 % ) !!.

.

بالمناسبه و على سيرة المجاميع و مقياس تقييم البشر بتاعنا ده , عايز أقول لكو معلومه عالماشي , العقاد مادخلش مدارس ( يعني 0% في الثانويه العامه ) و مرسي كان استاذ في كلية هندسه و البلتاجي و أيمن الظواهري كل واحد فيهم طبيب ( يعني أبو 190 % ) !! .

.

.......... ايه رأيك بقى نشيل أبو 50 و نجيب لك ابو 190 % عشان مثقف و عبقري و جامد فحت و بيفهم في دولة القانون و الأخلاق و الإنسانيه و الحريات و سابق سنه و أذكى خواته ؟!!.

....................................................................................................................................

Mohamed Hussein

17 ديسمبر 2014·

شخصيات مصريه

.

امبارح الساعه 1 و نص بالليل سمعت صوت بينادي و يغني في ميكروفون صغير في الشارع , طلعت في البلكونه لقيته راجل على باب الله معاه طفلين و طبله , بينادي عالناس يساعدوه و يغني و بعد كل مقطع من الأغنيه يطبّل , الراجل صوته روعه , طبلته سليمه , أداؤه رائع , فنان يعني و عهد الله فنان , وقفت انا اتفرج عليه و الناس كلها نايمه , بس الساعه 1 و نص و الناس نايمين و المحلات قافله , انت كده اتأخرت أوي يا فنان .

.

و الصبح كل يوم الساعه 8 بالظبط بتيجي ست عجوزه ( فوق ال 70 ) تقف في التقاطع اللي قدام البيت , تبيع لمون و نعناع , السكان في المنطقه هنا بيستبشرو بضحكتها و دعوتها , و كل واحد يبدأ يومه بكلمتين معاها , و جوز جنيهات و يسمع له دعوتين حلوين عالصبح , يشتري حزمة نعناع و يحطها جنبه أو مايشتريش , ولسان حالهم كلهم بيقولو للست دي you made my day .

.

أهي مصر دي كل ما بتضغط علينا و تخنقنا تقوم باعتالنا اتنين كاراكتير زي اللي فوق دول , غلابه صحيح بس بيعرفو يرسمو البسمه على شفايفك , بيقولو لك ( الدنيا لسه بخير ) , هي مصر كده أو جايز أنا شايفها كده عشان بحبها بغباوه , ....مَنْ منكمُ يُحبّها مثلي أنا ؟.

.......................................................................................................................................

Mohamed Hussein

16 ديسمبر 2014·

سوزان وانجيكو من جمهورية كينيا الشقيقه باعتالي طلب صداقه , بتشتغل جراحة مخ و أعصاب في مستشفى كينيا العام ( دي تبع التأمين الصحي بتاع شرق الدلتا تقريبا ) , و حاطه على بروفايلها صورة واحد بيبوس واحده بوسه من بتوع بلاد بره , أصلي يعني مش تقليد , طب إنتي عايزه مني إيه يابنت عم الحاج وانجيكو ؟!.أنا لا بعرف كيني ولا بفهم في المخ ولا البوس وكل اللي اعرفه عن كينيا إننا كنا بنجيبها قبل كل بطوله افريقيه و نلاعبها ماتش ودي و نغلبها 6/1.

................................................................................................................................

Mohamed Hussein

16 ديسمبر 2014·

مجرد ملاحظه

.

لما كنت مسافر بره كنت بنزل أجازاتي كلها بالعربيه , مره كل سنه , و بما إني مغرم بالسفر عالطرق الطويله بين المحافظات كنت بلاقي وقت كافي جدا اتأمل فيه العربيات و ماركاتها و مين راكبها .

.

بعد ثورة يناير لاحظت إن فيه ملتحين كتير و منقبات راكبين عربيات فخمه , يعني مرسيدس و بي ام و أوبل و فولكس و كده , النسبه اللي شوفتها في الشوارع و الطرق كانت زياده بشكل ملحوظ .

.

و لما حبيت أفكر بعقلي ( و العياذ بالله ) لقيت إن الظاهره دي معناها احتمال من اتنين , إما إن الناس اللي معاهم فلوس في مصر التحو و اتنقبو و ( ربنا هداهم ) فجأه , أو إن الملتحين و المنقبات نزلت عليهم ثروه من السما ( أو من قطر ) .

.

يعني سؤالي باختصار , بعد الثوره مصر دخلها دقون كتير ولا فلوس كتير ؟ أو نقدر نسأل السؤال كده : أنهي جه الأول ؟ البيضه و لا الفرخه ؟ الدقن و النقاب ولا الفلوس و العربيات الفخمه ؟!! ............ أهي مجرد ملاحظه .

.

بالمناسبه , مفيش مانع ابدا ان الملتحي و المنتقيه يركبو عربيه فخمه ياكشي يركبو طيارات أباتشي , إنما برضه مفيش في الإسلام ولا المسيحيه ولا البوذيه أي نص مقدس يمنع إني أفكّر و اسأل و اتسأل !! .

.........................................................................................................................................

Mohamed Hussein

16 ديسمبر 2014·

و هي يعني ريهام سعيد ممكن تخترع قصص أو تألفها أو تحبّش القصه بشويش إثاره و ساسبنس ؟ أه طبعا , ممكن تعمل كده و يكون عندها خطه ب لأي ظروف , ماهي الست شغاله عالحاجات الغريبه , يعني واحده كلت دراع جوزها , و احد عمل ودن مراته ساندوتش و خده معاه الشغل , عيل صغير بيطلع نار من بؤه , و كده يعني , طب افرض بقى جه عليها يوم و مالقتش حدوته من حواديت أمنا الغوله دي ؟ تعمل ايه الست الطيبه ريهام سعيد ؟ و هي عندها بيت عايز ياكل و يشرب و كام عربيه و جراج و سايس و بودي جاردات ؟ هتعيش إزاي من غير مليون جنيه في الشهر ؟ تشحت عالقهاوي ولا تخترع و تألف زيها زي غيرها ؟

ماهو لما يكون مرتبك أخر الشهر محتاج شكارة من بتوع الرز عشان يتشال فيه يبقى وحشين دول يا ابراهيم ؟ .

.

مش بس ريهام اللي بتعيش الدور ده , المواطن البسيط هو كمان ماعندوش مانع يشارك في الليله بتاعة الغوله دي و يتألق كمان , هتلاقي مثلا واحده ست ابنها انضرب في المدرسه بلوح خشب , طلعت الست دي مع وائل الإبراشي النهارده و هي لابسه عبايه قديمه ( والواد على حجرها ) , تاني يوم مع منى الشاذلي و هي لابسه طقم جديد من التوحيد و النور ( والواد على حجرها ) , تالت يوم مع ريهام سعيد بعد ما يكون ربنا فتح عليها بقى و اشترت طقم تحفه و بوليرو من كايرو فيستفال سيتي ( والواد طبعا مش على حجرها ) و جنبها محامي لابس بدله و كرافته .

.

ريهام بتسرح بالناس و تقلّب عيشها , و المواطن هو كمان بيقلب عيشه , واحنا عملنا ثورتين و قدرنا نغير 17 نظام بس بصراحه ماقدرناش نغير فريق الإعلاميين المكسحين , فريق البكابورتات في ‫#‏مولد ‫#‏سيدي ‫#‏الإعلام .

......................................................................................................................................

Mohamed Hussein

16 ديسمبر 2014·

هي الحكومه الإستراليه قتلت الراجل الإرهابي اللي كان معتقل الرهائن عندهم ليه ؟ مكانش عندهم في استراليا واحد سابقهم بمليون سنه ضوئيه و يطلب المصالحه مع الإرهابيين؟ طب مفيش شباب ثورجي استرالي ينزل يتظاهر عشان حقوق الإرهابيين ؟

طب ليه اللي عملته استراليا بيعتبره الكولجيه عندنا عمل بطولي و لما مصر عملت كده قالو عيب و مايصحش و فصيل وطني ؟.

.

مصر كلها كانت مُعتقله من الإرهابيين , مصر بشوارعها وناسها وتاريخها و نسيجها و تركيبتها , حتى اسألو بديع و الشاطر ومرسي و عاصم عبد الماجد و عبود الزمر و ابو اسماعيل و ام ايمن و اسماعيل هنيه و ايمن الظواهري .

هو كان فيه حد بيحكمنا في السنه السوده غير الأشكال دي ؟!...إرهابيين دول ولا بتوع ورد و موسيقى كلاسيك ؟!!.

...............................................................................................................................

Mohamed Hussein

15 ديسمبر 2014·

هو انبي مش ناوي يجيبها البر ليه ؟ هنلاقيها من مين ولا مين ياربي ؟ و أم الدوري ده هناخده ولا هنفضل أوفياء ؟ مرتضى منصور هيقلع ملط و ينزل في اشارة روكسي ينظم المرور بنفسه لو ماخدناش الدوري .

.................................................................................................................................

Mohamed Hussein

15 ديسمبر 2014·

قصيدة أحمد عز

.

.

... أحمد عز اترشح للبرلمان

** لا ماترشحش

... لا اترشح

** طيب خلاص اترشح

... ازاي يترشح و هو فلول و ابن صرمه ؟

** القانون بيسمح له يترشح

... يبقى قانون ظالم و ابن ...

** طب انت كنت عايز ايه ؟

... عايزين قانون عزل سياسي لكل فلول النظام

** أنهي نظام ؟

... النظام اللي قامت ضده ثورة يناير

** طب و النظام اللي قامت ضده ثورة يونيو ؟

... هه !!

** ولا حاجه

... طب فكرك احمد عز لو اترشح هينجح ؟

** اه طبعا ينجح

... ليه بقى ؟ تزوير طبعا

** لا , شعبيته و فلوسه ينجحوه , ماهو اللي مايجيش بعصاية الزيت و السكر و صكوك الغفران بييجي بفلوس أحمد عز و وظايفه الخاليه .

... يعني كده الفلول هيرجعو البرلمان , انا مش عايزهم يرجعو تاني

** ولا انا و الله

... طب والحل

** مفيش حل

... ليه بقى , هي البلد دي مفهاش رجاله ؟

** لا فيها , و فيها احزاب زي الفل ظهرت بعد يناير

... طب تمام يبقى اتحلت

** لا

... ليه ؟

** عشان دي احزاب ثورجيه بتاعة ثورات و مظاهرات و قنابل غاز و مداخلات عالتلفزيون و بيعتمدو عالبت مروه الشاطره اللهلوبه , أحزاب مالهاش في السياسه ولا البرلمان ولا النقابات و المحليات

... يعني ايه ؟

** يعني فيه اكتر من 400 كرسي فاضيين في البرلمان ولازم يتملو بأي شكل , و طول ما الثورجيه لابسين الكوفيه الفلسطيني و الكوتشي هيتملى فلول و إخوان .

... يعني أفهم من كده إن أحمد عز هيترشح ؟

** أحمد عز مين ؟!.

... أحمد عز جوز زينه و ابو الواد اللي هو مش ابنه باين !!.

** قوم ياض من قدامي

.............................................................................................................................

Mohamed Hussein

14 ديسمبر 2014·

إنما الميزه الأكبر للثورتين اللي عملناهم , و الميزه المشتركه يعني , هي اننا عرفنا إن أغلب المثقفين في مصر بياخدو ثقافتهم من معين ثقافي واحد اسمه ( الهَبْو ) , و كلهم بيقرو من نفس الكتب اللي عنوانها ( سيبها و خدها يوم السبت ) .

.

دول بقى اسمهم المثقفين يعني النخبه , يعني الكريمه بتاعة المجتمع , يعني ال توب أو زا توب , يعني من الشيفروليه وانت طالع .

.

مرّه واحد نخبجي قال الكنايس في مصر مليانه سلاح و دبابات فقمنا احنا قولنا عليه فقيه دستوري , و واحد تاني نخبجي جامد قال الستات بينزلو الغيطان عشان يُغتصبو قلنا بس ده شكله نخبجي أوي و عملناه رئيس وزاره .

.

لحد ما وصلنا لنخبجي مالهوش حل , قالك ان ازمة الكهربا دي سببها الواد اللي بياخد 50 جنيه و يشد السكينه , ده بقى عملناه رئيس , بلا ميجا وات بلا بلح أمهات .

و نخبجي ينزل يتظاهر عشان الحكومه عملت قانون للتظاهر ( مش واخد لي بالك انت يا حاج محمد ) .

و نخبجي زعيم قالك احنا نتصالح مع الإرهاب و ناخده حضن مطارات و نبوسه من بؤه , واهو يبقى زيتنا في دقيقنا و رصاصنا في لحمنا , ده عملناه زعيم .

.

و في الأيام الجايه هتلاقي الهري بتاع النخبجيه كله عن انتخابات مجلس النواب , تقسيم الدواير بقى و ازاي الباجور تبقى اكبر من السنبلاوين ؟ و نعملها بالفردي ولا القايمه ؟ يعني توماتيكي توماتيكي ولا نُص توماتيكي توماتيكي ؟ , مع إن المواطن البسيط أساسا لحد النهارده مايعرفش الفرق بين عضو البرلمان و بين شيخ الحاره , أصل النخبجيه مكانوش فاضيين في ال 4 سنين اللي فاتو , أه مش فاضيين يشرحو للناس يعني ايه عضو برلمان و دوره ايه و مواصفاته بتبقى ازاي ؟ كانو مشغولين في الهري و الهري المضاد .

.

يا سعاد , نخبتك بتشرب ماية الجوزه يا سعاد .

.......................................................................................................................................

Mohamed Hussein

14 ديسمبر 2014·

عندي حاجه مش مظبوطه في صفحة الفيس , تقيله أوي , انكزوني يا أهل الخير .

....................................................................................................................................

Mohamed Hussein

14 ديسمبر 2014·

مثلث الرعب ( و كلمة السر : بنستعبط )

.

هو ايه اللي حصل و اللي بيحصل واللي هيحصل ؟ يا ترى عندنا خطه لبعد بكره عالأقل ( مش هقول ل 20 سنه جايين ) ؟ ولا عايشين اليوم بيومه زي عّمال الترحيله ؟

.

اللي حصل إننا غيرنا حكومه كل شهر ونص ( زي حقن بنسلين طويل المفعول ) , و بنعمل مظاهره كل 3 ايام ( زي حقن أدينوبلكس بتاعة الأعصاب ) وجبنا عصام شرف ( من الميدان ) و رجعنّاه تاني و جبنا الجنزوري ( من الفريزر ) و مشيناه و جبنا زيد و عبيد و فلان و علان و ترتان و كل شويه نقول لا لا مش نافع مش نافع .

.

الحكايه بتقول إن فيه مثلث له 3 اضلاع , ضلع اسمه الشعب و ضلع اسمه الحكومه و ضلع اسمه الإعلام , و كل ضلع بيتعامل مع الضلعين الباقيين بطريقة ( بنستعبط ) , يعني الحكومه تيجي من هنا و تاني يوم تلاقي المواطن بيسألها هو احنا ليه مش زي سويسرا ؟ يقوم الإعلام يعمل حفله عالمواطن و الحكومه و حكاية سويسرا دي .

.

كأننا بالظبط بنعمل مشروع فيه 3 شركا , المشروع بيقول هنعمل مزرعة فاكهه في طريق اسكندريه الصحراوي , و معروف ان المزرعه دي هتنتج بعد 3 سنين , بس من تاني يوم بتلاقي المواطن جايب الإعلامي و رايحين للحكومه ( اللي بتدير المزرعه ) و يسألوها : أخبار محصول الجوافه ايه ؟ الحكومه تحاول تفهم المواطن و الإعلامي إننا لسه يادوب بنقول يا هادي و بنعمل المواسير و بنحفر البير بس مفيش فايده , يطلع الإعلامي بالليل يتكلم عن الحكومه اللي استلمت المزرعه امبارح و ماشوفناش ولا قفص جوافه لحد النهارده , تقوم الحكومه لما تزهق من المواطن و الإعلامي تلعب معاهم نفس الدور ( بنستعبط ) و تروح تشتري كام شجرة جوافه مزروعين و منتجين من اي مزرعه و تجيب المواطن و الإعلامي و يحتفلو هما التلاته بمحصول الجوافه !! .

...............................................................................................................................

Mohamed Hussein

14 ديسمبر 2014·

أغيب كام ساعه عن الفيس أرجع الاقيه فاضي و بينش , حالة سكون تام أو ملل جايز , لدرجة إني لقيت واحد صاحبي من كتر زهقه كاتب شعر في جيوبه الأنفيه و بيتغزّل فيها , أه و عهد الله .

هي الجماعه الإرهابيه مختفيه فين اليومين دول بعمايلها السوده ؟ كانت مصايبهم بتعمل نشاط كبير في الفيس , ما الخيبه يكونو بيرقدّو على مصيبه كبيره , يارب يختفو كده للأبد و يديم علينا نعمة السكون و التغزّل في الجيوب الأنفيه .

.

ممكن تقول هاني رمزي في فيلم غبي منه فيه لما ركب الإتوبيس و قبل ما يتحركو سأل السواق : هو باقي كتير على شرم الشيخ ؟ هنا الحكومه بتبقى هي السواق و يوم ما تزهق من اسئلة المواطن بتقوم جايبه لوحه بجوز جنيهات و تحطها قدام الأتوبيس عاليمين مكتوب عليها : شرم الشيخ 17 متر , مع إن فيه لوحه ورا الأتوبيس بالظبط بتقول : شرم الشيخ 650 كيلو !! .

.

الحكايه اننا عايشين في طابونه , حكومات بتعجن و مواطن بيحرق العيش و إعلام ب ( يهوّي ) عالنار , و في النهايه هيطلع لك حاجه كده شِبْه مدوّره , بيقولو عليها رغيف عيش , و لازم ناكلها من سكات و نقول : اللهم دمها نعمه واحفظها من الزوال .

.................................................................................................................................

Mohamed Hussein .

13 ديسمبر 2014·

أخويا هاني عمل عشه للحمام والفراخ من شوية خشب لمّهم , أخويا ده فنان و الله , و المنظر من على سطوح بيتنا بقى حمامه بيضا و نخله الهوا بيلاعب ضفايرها !! .

لايف يا طير يا غريب

على قلبي كنّك ناي

بتغني لحن عجيب

و تقولّي غنّي معاي

مانا كنت كاتب

عالضلوع ممنوع

دخلت ليه و ازّاي ؟!

.

محمد حسين

Mohamed Hussein

12 ديسمبر 2014·

اكتر تلاته في مصر بيفقعو لي ال ( مرارتين ) هما ريهام سعيد و منى الشاذلي و أيمن يونس , إنت بس تدّي للواحد فيهم ميكروفون و النحنحه تبدأ زي السهم , بيبقى لها أول و مفيش أخر , 24 ساعه فلسفه و فزلكه و تهتهه مفيش مشكله , تحس إنهم كانو خُرس و لسانهم ده لسه طالع أول امبارح بالليل , خد بقى منهم دروس في الوطنيه و الرياضه و الإنسانيه و علم النفس و الإجتماع و الطب و الفلك و التحنيط .

.

بتخيل مجرد تخيل إننا جمعنا التلاته دول في ستوديو واحد , يعني مكان مقفول عليهم و يطلعو عالهوا , ميكروفون لكل واحد فيهم و كوباية ينسون عشان الزور , يا ترى إيه اللي ممكن يحصل ؟ أكيد هيتكلمو في نفس الوقت و كل واحد يهري في سكه و محدش يسمع التاني , و بعد شويه الاستوديو يسخن و ينفجر و يحصل هزه أرضيه في مدينة الإنتاج الإعلامي و يطلع لنا البتاع ده ( الأله العملاقه ) اللي طلعت من تحت الأرض في الفيلم الأجنبي , و يبقى ده عقاب ربنا اللي نستحقه

...........................................................................................................................