Mohamed
Hussein
27
أبريل 2017·
أربع ظواهر غريبه
حصلت في حياتي مش لاقي لها تفسير لحد دلوأتي
.
- لما كان عمري
8 سنين كنت بلعب كوره في الشارع و اتخانقت مع عيل صغير , و جت أم الواد ده و كانت تخينه
اوي و كف ايديها قد صينية الشاي , المهم الست دي ضربتني على رجلي و حصلت كدمه طبعا
, أمي ودتني للمجبراتي , عمل لي شوية خشب على رجلي كده و ربطها ( اللي مايعرفش المجبراتي
ده عباره عن نجار مسلح بس كان بيعالج البني أدمين ) , بعدها و رجلي ورمت اكتر , ورمت
أوي , تخيل مثلا لما طفل عمره 8 سنين يبقى قطر رجله تقريبا 30 سم ؟ جه عمي شاف المنظر
و شالني وداني لدكتور عظام , الدكتور من غير سلام ولا كلام نيّمني على ترابيزه و من
غير بنج ضرب مقص في رجلي وانا بصرخ و صوتي بيجيب لأخر السنبلاوين و جاب طشت كبير كده
و طلّع من رجلي كُتل دم معقوده لحد مالطشت اتملى , و بعدها بقيت اخف شوية بشويه بس
أثر ضربة المقص لسه موجود , السؤال بقى , هو كف إيد خالتك فضيله سرّه باتع اوي للدرجادي
؟ و هل حالتي كانت صعبه و خطيره لما روحت للدكتور ؟ بس انا قبلها بساعتين كنت بلعب
كوره في الشارع برضه !! .
.
لما كنت في تانيه
اعدادي دخلت أوضه و قفلت على نفسي من جوه و نمت , مش فاكر ايه اللي حصل , بس هما حكو
لي , قال ابويا و امي قعدو يخبطو عليا و ينادو و يصرخو ييجي ساعتين , و انا مابردش
ولا بصحى , حاولو يكسرو الباب ماعرفوش , جابو سلم و جه عمي و اهل البلد كلها و دخلو
لي من شباك الأوضه , قالو خلاص انا مت تقريبا , طب ايه اللي حصلي بقى ؟ مستحيل ده يكون
نوم , دانا ابويا كان صوته حيّاني و كنت بترعب منه حتى في أحلامي , طب انا كنت في غيبوبه
مثلا ؟ غيبوبة ايه دي ؟ مانا كويس أهو و زي الفل و مظبط أموري في التأمين الصحي .
.
وانا في الكليه
كنت مع 2 اصحابي و عايزين نتفرج على كاس القارات في ستاد المنصوره بالليل , اصحابي
من بلد جنبها قطر و هما واخدين عالتنطيط في القطورات و انا لا , المهم كان فيه قطر
واقف و قطر تاني جاي مقابل مش هيقف و هو ده اللي المفروض نركبه , أصحابي قالو هنستنى
عند باب في القطر الواقف ده و أول ماييجي باب في القطر اللي ماشي بسرعه ننط فيه , وهما
قرود طبعا و نطو , انا حبيت اعمل زيهم و وقفت في القطر اللي واقف و عايز انط في القطر
اللي ماشي كان الباب عدّى و بالتأكيد لو كنت نطيت كنت وقعت بين القطرين و اتعملت كفته
, انا مانطيتش ليه بقى ؟ عشان بجد والله سمعت صوت راجل بيقولي لا يابني ماتنطش اوعى
تنط , الغريبه اني مانطيتش و سمعت كلامه و بصيت في عربية القطر اللي انا واقف فيها
مالقيتش حد !! .
.
قبل ماتولد بيوم
, كان يوم خميس , و أيامينا مكانوش بيعرفو نوع المولود ولد ولا بنت الا لما يتولد
( و يشوفو بعنيهم ) , المهم ابويا الله يرحمه جاله هاتف في المنام قالو بكره ربنا هيرزقك
بولد و سميه محمد , و حصل فعلا , اتولدت تاني يوم , يوم الجمعه و سماني محمد , طب هل
معنى كده و معنى الرؤيه دي إني كنت أطلع حد مبروك ؟ بس انا ماطلعتش مبروك ولاحاجه
, يبقى العيب عند مين ؟ عندي ولا عند ابويا الله يرحمه ولا عند الراجل اللي جاله في
المنام ؟ .
.............................................................................................................................
Mohamed Hussein
27
أبريل 2017·
أه بالمناسبه
, مصر صرفت عشرات المليارت في أخر 3 سنين في شراء الأسلحه المتطوره و تحديث الجيش المصري
, خصوصا القوات البحريه و الجويه , المليارات المتلتله دي لو كنا صرفناها في التعليم
كان زمانا بقى عندنا احلى تعليم في كوكب الأرض و المجموعه الشمسيه , أه و الله أحلى
تعليم في أحلى فسحايه و أحلى خرابه و أحلى مخيمات لاجئين .
.
يعني في ساعة عصاري
تبقى قاعد حضرتك كده و مالي مركزك في خيمة على حدود السودان او على حدود مورتانيا و
الهوا بيطس في قفاك , و تلاقي ستاف من كل جنسيات العالم بيشرحو لك المنهج و المقرر,
تعليم انترناشونال أهو يا معلم و حاجه ببلاش كده , الله يسامحهم العسكر اللي حرمونا
من التعليم الانترناشونال المجاني اللي في مخيمات اللاجئين , يالله بقى هما هيروحو
من ربنا فين ؟
سانك يو فيري ماتش
يا مون أمور .
سيل فو بلي جيف
مي هامبورجر .
.........................................................................................................................
Mohamed
Hussein
27 أبريل 2017·
عفوا نحن لا نبيع
البانجو
.
حكيم عيون أفهم
في العين , و افهم كمان في كلام العين , يا عم أنا معنديش أي ولا أدنى اعتراض على حكاية
مرشح مدني و رئيس مدني لمصر , والله ما عندي , و عهد الله ما عندي , فتشنّي فتش , ايه
المانع لما يكون رئيس مصر دكتور عيون مثلا ( حكيم عيون ) أو مهندس ديكور أو صيدلي زي
حالاتي ؟ , ده حتى دكتور العيون أحسن واحد هيكون عنده ( رؤيه ) للمستقبل , ومهندس الديكور
أحسن واحد هياخد مقاسات البلد و يرتبها بشكل صحيح و جميل , و الصيدلي اللي زي حالاتي
أحسن واحد يفهم في ( التركيبه ) السكانيه لمصر .
.
طب ايه شرطي لانتخاب
مرشح مدني في المرحله الحاليه ( اللي هي مش أقل من عشرين سنه ) , هقولهالك في كلمتين
, أن يكون المرشح مصري للنخاع و يتعمل له تحليل دم في 3 معامل مختلفه و نتأكد من خلوه
تماما من أي أثار للكوله و إنه يكون ماقعدشي قبل كده قدام اعلامي أو قدام كتاب كتبه
واحد من اللي بينطبق عليهم وصف ( المثقف الحمار ) ................. يعني ايه الكلام
ده بقى ؟
.
بص يا مولانا
, انت تجهز مسدس فيه كام طلقه حلوين , و تجهز كمان قلم جاف فرنساوي ( عشان لو لقيت
حد ينفع تحط جنبه علامه صح ) , و تعمل الأتي
.
1- لو لقيت مرشح
مدني بيقول البرازيل و ماليزيا , ده ( المثقف الحمار ) , تضربه برصاصه و انت قلبك متطمن
تماما , عشان مصر مش البرازيل اللي في أقصى الجنوب الغربي للعالم ولا مصر ماليزيا اللي
في أقصى جنوب شرق أسيا , التاريخ و الجغرافيا بيقولو كده , و ده مش معناه انك ماتقدرشي
تعمل طفره و نهضه حقيقيه في مصر , انما معناه انك تبقى فاهم ان التحدي عندنا مختلف
تماما و كليّة عن شغل مهاتير محمد ولولا دا سيلفا .
.
2- لو لقيت مرشح
مدني بيقولك احنا بنشتري سلاح ليه ؟ ده تضربه بالنار و بعد ماتضربه تدوس عليه بعربيتك
رايح جاي 7 مرات عشان تتأكد انه مات أوي مش مات بس .
.
3- لو لقيت مرشح
مدني بيقولك احنا نتصالح مع الجماعه الارهابيه و ناخدهم في حضننا و نحتويهم و نجيب
لهم ورد و دباديب , ده ماتضربوش بالنار , ده تجيب له دبدوب حلو كده لونه روز و تبعته
( هو و الدبدوب ) ل فرج .
.
4- لو لقيت مرشح
مدني كان في الأصل رجل أعمال مالتي ملياردير نهب قوت الناس و جاب شوية محاسبين يعملو
له أحلى شغل للتهرب من الضرايب و يبقى موقفه قانوني و سليم , ده ماتنتخبوش , اللي سرقك
في يوم من الأيام لما تجيله فرصه هيبيعك انت شخصيا لو لقاك هتجيب له دولار لأنه باختصار
مفهومه عنك إنك مش اكتر من سلعه , حتى صوتك الانتخابي مجرد سلعه و هو تاجر شاطر .
.
5- و أخيرا بقى
, لو لقيت مرشح مدني اسمه محمد حسين عمره 41 سنه و طولة 173 سم و وزنه 76 كيلو , عنده
عربيه 2009 و بنتين و قطه و عيالها و لابتوب , و بيكمّل مصاريف الشهر بالعافيه , و
سالف فلوس من طوب الأرض و قاعد عالفيس يقول للناس احترمو بلدكو و جيشها و بكره أحلى
, ده تنتخبه فورا , بس على فكره , هو مش هيترشح في الانتخابات , عشان عارف انه غير
مؤهل لحكم بلد بحجم و عظمة مصر , و غير مؤهل حتى لحكم أصغر مدينه في مصر العظيمه ,
عارف و مستوعب و متصالح مع نفسه تماما .
.........................................................................................................................
Mohamed
Hussein
26
أبريل 2017·
الحدوته في كلمتين
, ولا عزاء لقطعان البقر و الأغنام .
.
لما اتسأل عبد
الفتاح السيسي النهارده عن موضوع الجزيرتين قال ايه ؟ قال ان الجهه الفنيه و التنفيذيه
عملت اللي عليها لكن احنا عندنا قضاء و برلمان بنحترم أحكامهم و قراراتهم !!
............ الكلمتين دول بيختصرو الحدوته للي عايز يفهم .
.
من أول ماتفتح
موضوع الجزيرتين و رأيي زي ماهو ماتغيرش , كل اللي شوفته في الاعلام وقتها و عالفيس
كان عباره عن خليط رائع و بديع من الهطل و الحموريه و ( المر*عه ) .
.
هما كام نقطه مفيش
غيرهم , ثوابت لازم نقف عليها قبل ما ننطق بكلمة واحده و نتفزلك .
- ترسيم الحدود
ده مسئول عنه جهات سياديه و مؤسسات وطنيه عريقه زي الجيش و الخارجيه و مؤسسة الرئاسه
, يعني مش بنجيب عيل بمازوره و نقوله تعالى قيس لنا يابني و شوف حدودنا فين .
.
- السيسي لو عايز
فلوس كان بعت ألف جندي بس لسوريا ولا اليمن كان خد شيك على بياض , بس هو لا بيبيع ثوابت
ولا بيبيع عقيدة جيش ولا بيبيع شبر من ترابها .
.
- السيسي لو عايز
فلوس كان فرّط في شبر واحد من أرض سينا أو انضم للتحالف الدموي اللي بتقوده أمريكا
لخراب المنطقه .
.
- ابراهيم عيسى
و شلة الزلنطحيه اللي مشيو وراه هما نموذج فج و صريح لفكرة ( المثقف الحمار ) , اللي
هو يبقى قاري كتير بس مش فاهم أي حاجه , مفيش حاجه اسمها استفتاء تعمله دوله على حاجه
يفترض بشكل ما انها متنازع عليها بين دولتين ( ده بصفه عامه ) , و حكاية بنبيع الجزيرتين
و قبضنا التمن دي اللي قولت عليها في أول البوست , اسمها ( المر*عه ) .
.
- أصل الحدوته
مفهوش جزيرتين , مش اسمه الجزيرتين , ده اجتزاء مخل و وقح , اسمه التالي مع بعض كده
( قوه عربيه مشتركه + جسر بري + اتفاقيه ترسيم حدود ) ده اللي قاله السيسي لما كان
سلمان هنا , مشروع و خطة متكامله لمصلحه مصر و المنطقه العربيه كلها ( و من غير ضرر
عالسعوديه ) , الخطه اترفضت من سلمان ( بضغوط أمريكيه وبريطانيه ) , و مكانشي فيها
فكرة الجزيرتين بيع وشرا و لا تنازل عن ملكيه , هي الحكايه مش ( نقلة سباخ ) إنما كان
فيها ترتيب مختلف على الأرض , و بما ان الخطه اترفضت من احد الطرفين يبقى لازم يكون
عندنا سكة رجوع , بشكل شيك و محترم , يعني الموضوع كان متكامل take it or leave it .
.
- هنا البرلمان
و القضاء الإداري يبقو سكة الرجوع المحترمه الشيك , سوري والله البرلمان رفض , احنا
أسفين والله القضاء قال لأ , أه بالمناسبه حكاية مؤسسات مستقله ذات سياده في ملفات
زي دي ؟ تبقى من ضمن ال ( مر*عه ) بتاعة أشباه المثقفين في مصر , قضائك مستقل وله سياده
و برلمانك نفس الشئ , إلا في حالة وجود طرف أجنبي هنا بيبقى البرلمان و القضاء مؤسستين
من مؤسسات الدوله و سيادة الدوله بتبقى هي الأساس .
.
يارب البهايم تفهم
بقى و تبطل نعير و جعجعه و تبطل تبيع صكوك الوطنيه للي بيرضع وطنيه من يوم ماتولد
.
........................................................................................................................
Mohamed
Hussein
26 أبريل 2017·
زمان من قد 10
سنين بس , كان أمين الشرطه ب ( يسوق ) شارع قدامه , و دلوأتي نفس العيل اللي كان ب
( يتساق ) قدام أمين الشرطه بقى بيتريأ على رئيس الدوله و يشتمه بالأب و الأم , رئيس
الدوله ده اللي بيعمل لقاء شهري مع الشباب و يلف محافظات مصر و بيقعد وسطهم و ياكل
معاهم و يشرب معاهم و يتكلم معاهم و يقولهم اللي عنده سؤال يسأله و نسمع بعض و مين
عنده فكره و مين عنده اقتراح !! .
.
فيه ناس كده تعشق
دور العبوديه أو ماينفعشي معاها غيره , حتى وان حاولو يظهرو نفسهم بمظهر الثورجي المناضل
المتحرر , لا هو عبد , جواه عبد , سلوكياته و تصرفاته بتوع عبد , واللي قبلنا قالو
,..... الحر تكفيه الإشاره و العبدُ يُقرعُ بالعصى .
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
Mohamed
Hussein
26
أبريل 2017·
طب ممكن حضرتك
تقولي هتنتخب مين في 2018
- مين ؟ أنا ؟
.
.
أه حضرتك
- وليه اقولك
2018 بس ؟, دانا ممكن اقولك هنتخب مين مدى الحياه لو كان لنا عمر
.
طب قول كده
- بص يا سيدي
, في 2018 عبد الفتاح السيسي
2022 السيسي لو
الدستور اتعدّل , و صدقي صبحي لو الدستور ماتعدّلش .
2026 صدقي صبحي
.
2030 هنتخب وزير
الدفاع اللي عينه صدقي صبحي اللي انا مش عارف اسمه
2034 هنتخب رئيس
مصر اللي فاز في 2030 ( اللي هو كان قبل كده وزير الدفاع اللي عينه صدقي صبحي )
.
ايه ده ؟ حيلك
حيلك , انت عايز تشلّنا ولا عايز تعسكر الدوله تماما ؟
- أه يا حبيبي
عايز أشلّكو و عايز أعسكرها و أخليها أخر عسكره متعسكره بالعساكر , عندك مانع ؟
.
اه عندي , انت
ليه تعمل كده ؟
- يابني مش ده
أم صوتي الانتخابي ؟
.
أه
- و مش ام الديموقراطيه
بتقول اني أدّي ام صوتي الانتخابي للشخص اللي انا عايزه ؟
.
أه
- طيب يبقى مال
امك انت ؟
.
صح , ده حقك الديموقراطي
بس عايز أفهم ايه مشكلتك مع المجتمع المدني ؟
- مش بحبه المجتمع
المدني ده
.
ليه مش بتحبه ؟
- عشان بيغيّر
طعم الملوخيه .
.
لا والله بسألك
بجد , ليه مش بتحبه ؟
- أصلي جربتهم
كذا سنه من بعد 2011 و شوفت بعيني امكانياتهم و خطاباتهم و أفكارهم و شعاراتهم و حلقاتهم
و برجالاتهم .
.
أيوه و توصلت لقناعه
بتقول ايه بقى ؟
- أقولك بصراحه
من غير زعل ؟
.
أه قول و مش هزعل
- قناعتي بقت المثل
الأبيح اللي كانو بيقولوه عندنا في البلد زمان
.
بيقول ايه المثل
الأبيح ده ؟
- مش هتزعل ؟
.
لا مش هزعل , قول
بقى
- المثل بيقول
, لا تمشي ورا المجتمع المدني ولا تخلّي المجتمع المدني يمشي وراك .
.......................................................................................................................
Mohamed Hussein
26
أبريل 2017·
هتعمل ايه يا حبيبي
؟
- هنعمل هاشتاج
.
.
هتقولو ايه في
الهاشتاج ؟
- هنقول مش عايزين
السيسي
.
هما مين دول اللي
مش عايزين السيسي ؟
- احنا اللي مش
عايزين السيسي .
.
انتو مين يا حبيبي
؟
- احنا الخرفان
و الكولجيه .
.
انتو الخرفان و
الكولجيه مش عايزين مين يا حبيبي ؟
- مش عايزين السيسي
.
.
هما مين دول اللي
مش عايزين السيسي ؟
- يوووووووه ما
قلت لك احنا .
.
ايوه قلت لي بس
ماقولتيش انتو مين يا حبيبي ؟
- قلت لك احنا
الخرفان و الكولجيه .
.
ايوه صح قلت بس
ماقولتش مش عايزين مين ؟
- يووووه دانت
بتشتغلني بقى و بتتريأ عليا .
.
لا و الله يا حبيبي
أبدا .
- أومال بتكرر
الأسئله ليه ؟
.
عشان بسلّيك ,
أصلي حاسس بيك أوي , و عارف انك بتشعر بالوحده .
........................................................................................................................
Mohamed
Hussein
26 أبريل 2017·
الأم المصريه
.
حبيبتي الغاليه
, كان عندها كيسه قماش بتاعة الفلوس بتحطها في صدرها زي كل الأمهات في الفلاحين , و
كنا واحنا صغيرين لما نقولها يامّه هاتي ربع جنيه أو بريزه نشتري حاجه من الدكان مثلا
, تقوم هي من غير سلام ولا كلام مطلّعه الكيسه من صدرها و تفتحها قدامنا نلاقيها فاضيه
و تقول والله فاضيه أهي , كل مره تطلع لنا الكيسه و كل مره نلاقيها فاضيه .
.
و تفوت سنين و
وراها سنين و نكتشف بالصدفه إن الغاليه كان عندها باستمرار و طول الوقت كيستين , واحده
دايما فاضيه والتانيه دايما فيها فلوس !! , و طبعا لما تمد إيديها تطلع لنا الفاضيه
, مستحيل إيديها تغلط أو تتلخبط في كده .
.
الحقيقه الغاليه
كانت معذوره و معاها حق تماما , واحده مخلفه 6 عيال عايزين يتعلمو و ياكلو و يشربو
و يلبسو و يدخلو الجامعه , و المعاش ملاليم , هتلاحق علينا طلبات ازاي و منين ؟ ماكانشي
قدامها حل غير تطبيق نظرية ( الكيستين ) لحد ما اتعلمنا كلنا و دخلنا الجامعه , ربنا
يرحمك يا غاليه .
.......................................................................................................................
Mohamed
Hussein
25
أبريل 2017·
أرحْنا بها يا
عبد الفتاح
.
أحلى جمله قالها
السيسي , لما تيجي سيرة احمد موسى و اللي زيه و يقول : الإعلام ده لا يمثل الدوله
!! , أخيرا ياريس , لقد هرمنا و عهد الله .
.
بالنسبه بقى لحبايبنا
الكولجيه بتوع لبانة ( أحمد موسى و انتو ماشيين ورا احمد موسى و أحمد موسى ده الإعلامي
بتاع السيسي ) , الريس بيسلم عليكو و بيقول لكو , هتمشو ولا تحبو تلعبو عالملابس الداخليه
؟!
.......................................................................................................................
Mohamed
Hussein
25
أبريل 2017·
أبطال مصر الحقيقيين
بيسلّمو عالسيسي , أبطالها الفدائيين , المقاتلين , المحاربين , اللي دافعو عن أرضها
و ترابها و شرفها و عرضها , أبطالها عمرهم ما كانو شوية صيّع عواطليه قاعدين على قهوه
في وسط البلد يتريأو على اسم بلدهم و جيشها و يتخيّلو إنهم لما يقلّبو كوباية السحلب
( بالمعلقه ) هيقوم كوكب الأرض يلف معاهم في اتجاة حركة (المعلقه ) باعتبار انهم مهمين
, مع ان حكايتهم باختصار عباره عن كلمة واحده اسمها ال ( معلقه ) !! .
......................................................................................................................
Mohamed
Hussein
25
· أبريل 2017
من غير هري كتير
, احنا في دولة ديموقراطيه , و الديموقراطيه لها قواعد و أسس ثابته , بعد سنه هيبقى
فيه انتخابات رئاسيه في مصر , هيترشح فيها عبد الفتاح السيسي , و الباب مفتوح طبعا
لأي حد عايز يسقط , حق السقوط مكفول للجميع , اقفو طابور يا خوانا , القصير قدام و
الطويل ورا و رجل الأعمال في النص , ماتقلقوش , هتسقطو , و الله هتسقطو , و رحمة أمي
هتسقطو , طب هاتو ايديكو كده , و شبكة العشره دول هتسقطو .
.
قولو بقى عايزين
حكم مدني , قولو السيسي فاشل , قولو أصل امه يهوديه و خالته من قبائل الأشانتي , قولو
بياكل مانجه و يلغوص و يعك هدومه ,قولو بيلبس الشراب فرده و فرده , برضه هتسقطو , انما
بصراحه يعني و بحق ربنا يكفيكو شرف المحاوله و يكفيكو جدا ان اسمكو يتكتب في التاريخ
و يتقال سقطو قدام عبد الفتاح السيسي .
.................................................................................................................................
Mohamed Hussein
25 أبريل 2017·
دينا الإسلامي
اللي شوّهوه ولاد التيت و قلبو حقايقه في عقول الملايين من العامه و البسطاء
............... احنا أسفين يا رسول الله .
.
- من كام سنه حصلت
حملة و هوجة و قالو لنا قاطعو المنتجات الدنماركيه عشان فيه رسّام دنماركي ابن تيت
رسم صوره مسيئه لسيدنا رسول الله , اتحمسنا و انفعلنا و قولنا كله بقى إلا سيدنا النبي
, ماعملناش يا أخي حملة مقاطعه للمنتجات الأمريكيه و البريطانيه و التركيه و لقناة
الخنزيره القطريه , مع انهم يا ( مؤمن ) اتسببو في قتل ملايين العرب و المسلمين , و
خراب دول , بقولك قتل ملايين العرب و المسلمين , ياريت أمك كانت خلفت دكر بط أو كلب
أرامنت لو كنت فاهم إن رسوم مسيئه لمحمد بن عبد الله هي أعظم عند محمد بن عبد الله
من حرق الدول و قتل و تشريد ملايين المسلمين .
.
- نص مليون معتمر
مصري في رجب , و العدد هيوصل لمليون معتمر في رمضان , تقريبا تلتين المعتمرين اللي
بيروحو السعوديه بيكونو من مصر مع ان عدد سكان مصر أقل من 10 % من عدد سكان المسلمين
في العالم !! , محتاجين حضرتك مليار دولار , عشان الحاجه ام ابراهيم بتطلع عمره كل
3 سنين و الحاج اسماعيل بيطلع كل سنه و إلا الناس تاكل وشه , روحانيات بقى و كده ,
و هنصلي في الروضه و قدام الكعبه للمره السبعتاشر , ايه يعني عشرين تلاتين ألف جنيه
, بنت خالي فقيره أوي و مش لاقيه تجهّز بنتها ؟ مش مهم انا طالع عمره , جاري مش لاقي
تمن الدوا و بينام من غير عشا ؟ ولا يهمني انا طالع عمره , أصلي بحب أغسل ذنوبي كل
3 سنين , طب يا مولانا اغسل ذنوبك عند جارك و بنت خالك و ماتروحشي لسيدنا النبي , هو
هيجيلك بنفسه في المنام .
.
- عملنا لجنة و
اللجنه انبثقت و عملت لجنة تانيه و اللجنه التانيه كبرت و خلّفت لجان كتير و بقى عندنا
كيان ضخم اسمه ( الاعجاز العلمي في القرأن الكريم ) , و في نفس الوقت اللي كنا بنعمل
فيه لجنه و ندوّر و ( نمقّق ) في أيات الله كان الغرب ( الكافر ) بيعمل مركز بحث علمي
, و المركز يكبر و الأبحاث تزيد و يخترعو و يتوصلو لنظريات , و احنا بقى مشغولين ,
لقينا أيه قرأنيه بتثبت ان الأرض كروية , الله اكبر جاء الحق , و الغرب ( الكافر )
ابن التيت لقى طريقه يصنع لنا بيها كل حاجه في حياتنا من الإبره للصاروخ , و لقى طريقه
تانيه يعمل بيها أسلحة دمار شامل و قمر صناعي يسيطر بيه تماما على كل شبر في الأرض
الكرويه !!
.
احنا أسفين يا
رسول الله .
..........................................................................................................................
Mohamed
Hussein
24
· أبريل 2017
ما زلت عند رأيي
, و احترامي لكل أصدقائي الأعزاء , أحمد موسى أخره يشتغل بواب لعماره مهجوره مفهاش
سكان , أو يمسك صُفّاره و يقف في قلب الصحرا ينظم المرور .
...................................................................................................................................
Mohamed
Hussein
24
أبريل 2017·
لسه عندي في قايمة
الأصدقاء بتاع 100 كده ولا 200 من الكولجيه و الخرفان متنكرين , و عندي قايمة طلبات
صداقه متعلقه كسرب حمامٍ من بغداد إلى الصين .
.
فكرت اني أدخل
على قايمة الأصدقاء , و اشتغل فلّايه بقى و افتح صفحاتهم نفر نفر , و اشوف المتنكرين
و اعمل لهم بلوكات , وبعدين طبعا انا تركيزي هباب و كسول جدا أكتر من أشقائنا الألمان
( بلاش الكلمه التانيه عشان حبايبنا بيزعلو ) و مانفعتش الفكره .
.
انما لقيت حل تاني
, عباره عن نداء , لكل أصدقائي و حبايبي و نور عيني الكولجيه و الخرفان , الشاطرين
و الشاطرات , المتنكرين و المتنكرات , الأحياء منهم و الأموات , بعد السلامو عليكو
.
لو كنت كولجي أد
الدنيا فعايز اقولك , اني صبح وليل صيف و شتا بشيل و أهبد فيك , كرباج بيلسوع على جتتك
, و القفا مش بيلاحق عالقفا , هتستفيد ايه بقى يا عبيط من وجودك في قايمة أصدقائي غير
حرقة الدم ؟ يا عبيط يا عبيط , انت تعملي بلوك و تفضي مكان عندك وانت الكسبان طبعا
, و تضيف مكاني أي حد من كبار الكولجيه , وائل عباس , رشا العزب , أم نحمده بتاعة الكرشه
, أي حد , و تقعدو تشمو شرابات بعض و تعيشو حياتكو .
.
ولو كنت خروف إرهابي
كيوت أد الدنيا برضه , هتستفيد ايه ؟ يا حبيبي دانا بصحى من النوم أغسل وشي و أسلخك
و اعلقك زي الجزارين على باب الصفحه , و أحيانا بسلخك من قبل ماغسل وشي , يبقى يا عبيط
الصح انك تعملي بلوك و تستفيد من المكان , و تضيف حد من كبار الخرفان و النعجات , أحمد
منصور , ايات العرابي , و تقعدو تقولو الجيش المصرائيلي و الكراكات غرقت في قناة السويس
و العسكر بياكل دراع العيال الصغيره و تعيشو حياتكو , ولو يا مولانا بتحب تشتمني و
كده مفيش مشكله , تاهت و لقيناها , اكتب اسمي على ورقه صغيره و الزقها على ضهر الموبايل
أو اللاب توب و اشتمني كل يوم 7 مرات .
.
حبايبي الخرفان
و الكولجيه , هذا العبد لله القاطن في الصفحه دي من بتوع تحيا مصر , من بتوع الأمل
و التفاؤل و بكره أحلى , يعني باختصار من الناس اللي بتبيع الورد , و انتو مناخيركو
يا عيني بقالها سنين مدفوسه في زريبه أو منقوعه في برطمانات كوله , لحد ما حصل لها
تأقلم على كده , وبالتالي هتشمو ريحة الورد تقولو يع ايه القرف ده , طب عليكو بإيه
بقى تحتفظو بصداقة واحد حيالله بيبيع ورد ؟.
........................................................................................................................
Mohamed
Hussein
24
أبريل 2017·
المرجيحه
.
من كام شهر كده
لو حضراتكو تفتكرو كان فيه تركيز شديد عالحوادث اللي بيكون طرف فيها أمين شرطه , و
فجأه يا مؤمن تلاقي الجرايد و الفيس بوك اترشّقو بحوادث من نوعية أمين شرطه يطلق النار
على ابن عمه , القبض على امين شرطه سرق ديشليون دولار من صندوق رعاية الأيتام و المكفوفين
, أمين شرطه يدهس مواطن بفسبه صيني في البدرشين , واحنا بقى نشير و نهيص و نفتي و نعك
و نعجن ........... تمام كده ؟ طيب تمام .
.
من كام يوم بس
لو حضراتكو مركزين هتلاقو الكلام و الأخبار و ( الكهارب ) كلها اتنقلت ناحية حوادث
الإغتصاب و التحرش و الخطف , سبعتاشر قول عشرين خبر في يومين تلاته , أب يعتدي على
ابنته , خال يعتدي على خالتك , أم تلقي بنفسها مش عارف منين , واحنا برضه نشير و نهيص
و نفتي و نعك و نعجن .......... تمام كده ؟ طيب تمام .
.
الحقيقه بتقول
ايه بقى ؟
- عملية التركيز
على شريحه معينه أو سلوك معين بتبقى مقصوده و الخطوات بتمشي كالتالي
1- استنى حادثه
تحصل , يكفيك حادثه واحده أو اتنين , ضيف عليهم حادثتين تلاته مشابهين حتى لو كانو
من تسع سنين ( محدش بياخد باله من التواريخ ) و ضيف كمان خمس ست حوادث هنألّفهم و احنا
قاعدين , التأليف أسهل حاجه ( محدش بيدور عالحقيقه ) .
.
2- عملت اللي قلت
لك عليه و ضيفت الحوادث الجديده و القديمه و الفكسانه على بعض ؟ كده بقى عندك 9 حوادث
يخصو نفس الشريحه أو نفس السلوك , يعني بقت ظاهره .
.
3- عندك اعلام
في مصر اغلبه مابين غبي و مابين بيسترزق و مابين عميل ( وأمه عارفه ) ؟ طب كده قشطه
, خليهم يهيصو و يعبّو الهوا , ده وائل الإبراشي هيعمل أحلى شغل بقى .
.
4- عندك شباب عالفيس
بوك عايز يملى صفحته اخبار و هري و افتكاسات و ياخد لايكات و قلوب و حبشتكانات ؟ و
بيبلع أي طعم نرميهوله ؟ ده كده عظمه أوي .
..
- طب النتيجه و
الغرض و المقصود ايه ؟ يعني ايه التارجت ؟
التارجت انك باستمرار
تحس ان الدنيا هباب حواليك , تفقد الثقه تماما في الأجهزه الأمنيه , نوصّلك شعور بعدم
الأمان في الشارع , لحد ماتوصل لدرجة انك تقول هطلّع عيالي من المدرسه , مش هودّي عيالي
النادي , ههاجر من مصر , مش هنزل من بيتنا , و هو المطلوب اثباته , اه بالمناسبه لو
ماقولتش انت الكلام ده , فيه رجالتنا اللي هيقولو و يكتبو و صفحاتهم كبيره عالفيس بوك
بأسماء مصريه و بيانات مصريه زي الفل ( و ممكن تكون الصفحه نفسها صاحبها خواجه أو ارهابي
قاعد في قطر أو تركيا أو بريطانيا ) .
.
و لأصدقائي الغاليين
اللي بقالهم سنين بيبلعو الطعم ( و يركبو المرجيحه ) عايز أقول لهم , يا ترى أخبار
أمناء الشرطه ايه دلوأتي ؟ مابقوش يقتلو و لا يدهسو الناس ؟ تابو خلاص يعني ؟ طب الحمد
لله .
يا ترى التحرش
و الإغتصاب ظهر في شوارعنا من اسبوعين بس و قبل كده كنا كيوت و مؤدبين ؟ طب يارب نرجع
كيوت تاني , قلبي الصغير لا يحتمل .
..............................................................................................................................
Mohamed
Hussein
23
أبريل 2017·
الجيل بتاعنا ده
اللي هو اتولد أواخر السبعينات أكتر جيل اتظلم في مصر كلها , لا لحقنا الجيل اللي قبلنا
اللي كان أخره القناه التانيه و تاكسي السهره و أوتار الليل , ولا لحقنا الجيل اللي
بعدنا اللي اتلغمط بقى ريسيفر و قنوات و نت و أفلام على كيف كيفك .
.
كان لما نحب نتفرج
على فيلم كده ولا كده نعاني الأمرّين , نتلم مجموعة أصدقاء زي الورد من طلبة الجامعه
( من نبت الأرض الخضره ) , و لو لقينا واحد مننا عنده تلفزيون حلو نلاقي البوستر و
الإريل بتاعهم تعبان و نفضل نظبّط الإريل طول الليل , لقينا حد عنده البوستر زي الفل
نلاقي التلفزيون هباب موديل 48 , لقينا واحد عنده البوستر و التلفزيون حلوين نلاقي
أبوه و أمه و عيلته كلها سهرانه معانا ( و الحاجات دي بتبقى عامله زي أكل الحمام كده
يعني بتحب العُزله ) , يا خوانا قومو نامو , لا أبدا مستحيل ننام و نسيبكو , دانتو
غاليين أوي هو احنا كل يوم بيجيلنا ضيوف زيكو , يا خوانا احنا لا ضيوف ولا غاليين ولا
نيله داحنا عيال صيع , لا أبدا دانتو أحسن ناس
.
وبس يا سيدي ,
أحلى سنين العمر قضيناها بالشكل ده , عشان كده تلاقي الجيل بتاعنا هو اكتر جيل حاليا
قوي و متماسك و بيدافع عن مصر و ترابها , ليه بقى ؟ عشان احنا الجيل اللي اتبهدل و
عرق و اتشعلق عالسطوح لحد عوده ما نشف , احنا الجيل اللي عرف و أدرك ان مفيش حاجه في
الدنيا بتيجي بالساهل .
...............................................................................................................................
Mohamed
Hussein
23
أبريل 2017·
يا عم هات ألفين
دولار و أنا أصوّر لك نفسي فيديو وانا لابس فانله بحمالات بس ( أه بس ) , و أقول السيسي
فاشل و مش عارف يحمينا و احنا بنصلي في الجوامع ( مع اني مش بصلي في الجامع غير الجمعه
) و ان البنات بيتحرشو بيا في الشارع و في المترو و في سيتي ستارز و في مراجيح السبتيه
, لسه 3 بنات متحرشين بيا من ساعه عند سوق المنهل و انا فضلت أعيط لحد ماربنا كرمني
ببنتين ولاد بلد جدعان حاشوهم عني , و بعدين بقى أنادي على صبحي الحلاق و أخلّيه يحلق
لي شعري زيرو , والله مصلحه أنا أصلا بكسل أسرّح شعري .
.
و لو زودت 20 دولار
كمان هخلّي القطه بتاعتنا اللي هي مدام بيري تطلع معايا في نفس الفيديو و تقول السيسي
فاشل برضه و تحكي عن قصتها لما كان بيتحرش بيها القط كاجو اللي اعتدى عليها و خلاها
بقت حامل .
.
طب هاتو ايديكو
كده , و عهد الله و ماليكو عليا يمين , أنا ممكن أصدق انه ييجي عليا يوم و البنات يتحرشو
بيا في الشارع , انما مستحيل أصدق ان ( خالتي ) اللي ظهرت في فيديو الجزيره ده حصل
مره من المرات انه اتحرش بيها راجل او حتى شمبانزي دكر .
.....................................................................................................................
Mohamed
Hussein
23
أبريل 2017·
المؤسسات و الأعمده
و الرموز
.
لما البابا تواضروس
يزور الكويت يقوم يقابله أمير الكويت , ليه بقى ؟ عشان شخص بابا الكنيسه المصريه بيتعامل
معاملة رئيس دوله .
.
لما شيخ الأزهر
يزور فرنسا يقوم يقابله الرئيس الفرنسي ؟ ليه بقى ؟ عشان شخص شيخ الازهر بيتعامل معاملة
رئيس دوله , ده شيخ للمرجعيه الإسلاميه الأكبر في العالم .
.
الكنيسه المصريه
دي عمرها ألفين سنه , و الأزهر عمره ألف سنه , ألف سنه و ألفين سنه يا مولانا , يعني
أجيال و بلاد نشات و بلاد اختفت من عالخريطه .
.
اسمهم مؤسستين
من مؤسسات الدوله المصريه التلاته أو أعمدتها التلاته , الجيش و الازهر و الكنيسه
, حائط الصد الأخير , عمدان الخيمه , أو ممكن نقول العمود الفقري لمصر.
.
مش عاجبك حاجات
معينه في مناهج الأزهر ؟ وانا كمان والله , دانا من أول الناس اللي اقترحو تطوير المناهج
و تنقيحها و فلترة الازهر من عملاء الجماعه الإرهابيه و عملاء الوهابيه , و أول واحد
اقترح ان الخطيب يطلع عالمنبر بتصريح خطابه و بكارنيه يعلقه على صدرة زي الطبيب و المهندس
, عشان مايخطبشي لنا الفرارجي و صبي العجلاتي .
مش عاجبك حاجات
معينه في بابا الكنيسه المصريه ؟ طب بأدب , اتكلم بأدب , و بعدين عايزه يعمل ايه ؟
لما يحصل انفجار في كنيسه ؟ يطلع يلعن دين أم مصر مثلا ؟ ده بابا الكنيسه يا جحش ,
عمود من عمدان الخيمه , عايز بابا الكنيسه يشم كوله ؟ عايز تشرّب صلاح الدين حشيش يا
كافر ؟ .
.
الخلاصه عايز أقول
لكل أصدقائي , الأزهر و الكنيسه هما مش بس عمدان خيمه لا دول جزء من القوه الناعمه
لمصر , كيانات عملاقه مصريه تأثيرها بيوصل لكل مكان في العالم , كانو موجودين بالمناسبه
أيام توفيق الحكيم و طه حسين و العقاد و ام كلثوم و أحمد شوقي و رامي و سعد زغلول و
عرابي , يعني وجودهم لا يمنع أبدا ظهور قامات أدبيه و فنيه و سياسيه كبيره , وجودهم
لا يمنع وجود العمالقه , لا يمنع حراك سياسي او حراك أدبي و ثقافي , مش ذنبهم اننا
في زمن الأنصاص و الأرباع و أشباه المثقفين و إن رموزك و قاماتك يبقو خالد على و أحمد
ناجي و الواد بتاع الكندوم و باسم يوسف و زاب ثروت و أم نحمده بتاعة الكرشه .
.
عايز تنتقد انتقد
بأدب و بطريقة التطوير و البناء مش التشويه و الهدم , عايز تمارس السياسه عايز تلعب
ثوره عايز تتظاهر عايز تنتقد الحكومه و السيسي عايز تهري في أي حاجه عايز تعمل تاتو
على دراعك , ده حقك , انت حر تماما , إنما يبقى دائما للشخصين بابا الكنيسه و شيخ الأزهر
مكانة رمزيه خاصه جدا , و يبقى الأزهر و الكنيسه عمودين في خيمة لها 3 عمدان .
.....................................................................................................................
Mohamed
Hussein
22
أبريل 2017·
حكاية المهندس
المصري اللي شغال في البحريه الأمريكيه .
.
بسم الله الرحمن
الرحيم , يارب ارزقني بمراره تستحمل و قولون يكون مفيش زيه أبدا و صبر أيوب و شنطة
سيمسونايت سوده فيها مليون دولار .
.
حدوته المهندس
المصري اللي شغال في البحريه الأمريكيه و اتحكم عليه بالسجن 40 سنه بتهمة التخابر لصالح
مصر بغض النظر عن وجود قضيه فعلا بإسم المهندس المصري و حكم بالسجن , لكن الحدوته اللي
منشوره كخبر في اليوم السابع في 2014 ( يعني من 3 سنين ) , تقرا التفاصيل بتاعتها تلاقيها
ماتدخلش دماغ عيل في ساتّه ابتدائي , أه خالد صلاح بيشغّل معاه شوية حمير ( أو خونه
!! ) .
.
, وقال ايه ياخويا
, ظابط في ال FBI اتصل بالمهندس المصري ده و
انتحل صفة ظابط في المخابرات المصريه و المهندس قابله ( لقاه ظابط في المخابرات المصريه
فعلا و اسمه مغاوري باين , اه شكله مغاوري خالص ) فقام المهندس أول ما شافه بقى قاله
بص يا حظابط مغاوري انا عايز أصور الغواصات النوويه و التكنولوجيه البحريه و حاملات
الطائرات و ابعتها على سي دي لمصر عشان انا بشتغل معاكو في المخابرات المصريه , مش
انت برضه في المخابرات المصريه يا حظابط مغاوري ؟ و عايز كمان 1500 دولار عشان اشتري
كاميرا و اصور بيها , عاتو فلوس ( بصوت اللمبي ) .
.
أصدقائي الغاليين
, أبوس ايديكو بقى , الأخبار دي بيبدأ ( استدعائها ) و ترويجها من عند الخرفان و الكولجيه
واحنا نشيّرها وراهم , عشان في النهايه يتقال شايفين مؤيدين السيسي المخابيل ؟ جايبين
خبر من 3 سنين و ماسكين فيه , و نظهر احنا في دور سعد العبيط اللي ماسك صفاره و واقف
ينظم المرور في إشارة روكسي .
.
أصدقائي الغاليين
جدا , احنا كمؤيدين للدوله المصريه , احنا المرابطين عمود الخيمه , مش مديونين للخرفان
و الكولجيه بحاجه , محدش كاسر عنينا ولا عين الدوله , يعني انا مش مضطر أدوّر في دفاتري
على خبر قديم عشان أقول للخرفان شوفتو بقى احنا بدّلنا أيه حجازي بالمهندس الفلاني
, لا خالص ولا يعنيني الصفقه دي تمت بمين أو تمت بإيه , انا عندي مؤسسات سياديه بثق
فيها و جهاز مخابرات مصري فوق راسي .
.
أما خرفان مصر
و كولجيتها فعايز أقول لهم , احنا على فكره بدّلنا أيه حجازي بدستتين شمع سبوع و كام
حجر معسل , هاتو أخر ما عندكو و مصر مفهاش اكتر من الحيطان , اختار لك حيطه حلوه كده
و اضرب دماغك فيها .
..........................................................................................................................
Mohamed
Hussein
22
أبريل 2017·
عبد المنعم أبو
الفتوح يعترف : سألتقي زعيم اخوان تونس و قيادات الجماعه في لندن !! .
.
يالله يا حبايبي
, تعالو اقفو طابور , كل اللي كان بيقول أبو الفتوح مش اخوان و منشق عنهم و بيكرههم
, تعالو هنا , و كل واحد يرزع صاحبه قفا بتاع بوابين , عايز أسمع صوت طرقعة القفا و
انا قاعد مكاني , اضرب فوفو جامد يا لوسي , بلاش طريقة ضرب الغازيه في حمارها دي .
.
خلاص كفايه ضرب
, تعالى يا فوفو انت و لوسي , و انتو قفاكو سخن و جميل كده و اللي عنده سؤال يسأله
.
.
لو سمحت لو سمحت
- نعم يا حبيبي
.
.
هما ليه قيادات
الإخوان في كل الدول العربيه لما بيحبو يهربو و يعيشو و يتجمعو بيسافرو بريطانيا و
أمريكا ؟ مش اليابان و فرنسا و روسيا و ماليزيا مثلا ؟
- عشان بريطانيا
هي دولة المنشأ و الصنع بتاعتهم و أمريكا الراعي الرسمي , يعني الأومّايه و الراعي
الرسمي .
.
ايه ده ؟ يعني
الإخوان مش اعداء البريطانيين و الأمريكان و الصهاينه و هيحررو القدس ؟
- طب تعالى قرب
ودنك عشان أقولك حاجه بخصوص موضوع تحرير القدس و مش عايز حد يسمعها .
.
قرّبت أهو , قول
بقى بصوت واطي .
- حاضر , قدس امك
.
.........................................................................................................................
Mohamed
Hussein
22
أبريل 2017·
أنا على دين دولتي
.
بما إن السيسي
هيزور طال عمره بكره , فقد قررنا نحن صاحب الصفحه الغلبانه اليتيمه دي تعليق الإنتقاد
لطال عمره و سياسات طال عمره و حركات طال عمره و حبشتاكانات طال عمره , بصفه مؤقته
, حتى يتبين الخيط الأبيض من الخيط الأسود من الفجر , و إن عدتم عدنا .
.
والنبي يا طويل
العمر حاول تخيب ظني فيك مره , أصلي ماخبيش عليك صورتك جوه عقلي زي الهباب و الأطران
, صورة فيها سوريا و اليمن و إياد مدني و عسيري و بترول أرامكو و 200 مليار دولار لترامب
و أسوأ ما فيها رقصتك مع الشاذ الصهيوني اللي بيحكم كشك عالخليج , صوره هباب هباب يعني
مش أي كلام .
................................................................................................................
Mohamed
Hussein
22
أبريل 2017·
عالم الفيس بوك
...... جُرْن واسع أوي بيرمح فيه الخيل ( و الحمير )
.
إمبارح يا مؤمن
, و زي كل يوم يعني , الكلام كتر و دلدق و طرطش , و هريه من هنا و هريه من هناك , لحد
ماوصلنا ( كالعاده برضه ) لليفل بتاع : طب هو السيسي اتفق مع ترامب على ايه ؟ ولو فيه
صفقه يبقى صفقه مقابل مين أو مقابل ايه ؟.
.
و بعد تحليل عميق
و أشعه بالصبغه و أشعه فوق محشيه على حالتنا دي , طلع التشخيص و مالقيتش مبرر غير حاجه
واحده بس , حاجه بتقول ان المواطن المصري المعدّل بعد 2011 , اللي هي النسخه الأخر
حماده أو أخر فيصل , المواطن ده بقى عنده عقده و كلكيعه من كلمة مواطن !! , يعني مش
معترف بكلمة مواطن , أو شايفها كلمة أبيحه , كلمة دونيه , مش تقسيم الدول مؤسسات و
وزارات و أجهزة سياديه و شعوب , مش المواطن ده له حقوق و عليه واجبات و له مربع أد
كده بيجري فيه , غير المربع بتاع المسئول , غير المربع بتاع الاجهزه السياديه ؟ لا
خالص , احنا خلطنا المربعات و فتحناها على بعض عشان المربع بتاعنا صغير و ضيق و خنيق
و مش أد المقام ( و أمك تخينه أوي يا ممتاز ) , و بعدين الصيف داخل و الدنيا بقت حر
ولازم شوية براح و الهوا يطس في قفانا .
.
و في جرن الفيس
بوك , هتلاقي النهارده برضه خيول و حمير و زربحه على كيف كيفك , هو وزير الدفاع الأمريكي
جه مصر ليه ؟ و جايب معاه ايه ؟ و قلناله ايه هنا ؟ طب ايه حكاية زيارة سامح شكري و
صدقي صبحي لروسيا الشهر الجاي و 2+2 ؟ اشمعنى الشهر الجاي يعني ؟ ليه مش الشهر ده ؟
هو السيسي هيزور السعوديه بكره ؟ هيقول لسلمان ايه ؟ وسلمان هيقوله ايه ؟ طب ليه يزور
السعوديه يوم الحد ؟ ليه مش السبت أو الإتنين , ده حتى الإتنين حلو و أجازة الحلاقين
, و بعدين السيسي هيجتمع مع سلمان امتى بقى ؟ بالليل ؟ لا طبعا ماينفعش لازم يجتمعو
بالنهار , عشان النهار له عنين ( عماد صاحبي لسه مأكد لي ان النهار له عنين ) .
.
و بينما نحنُ مشغولون
في جرن الفيس بوك كان فيه جيوش بتقع حوالينا و بلاد بتتحرق و تتقسم و تخرب , و حتى
الجرن نفسه بيجري معانا فيه تعالب عاملين أكاونتات , و ديابه عاملين نفسهم خيول , واحنا
فرحانين بالعجن و الهري , و الشوي و القلي , طب ايه علاقة زيت عباد الشمس بالعلاقات
المصريه الأمريكيه ؟ انه الخضوع و الخنوع و والبتاع و البتوع , انه الهوان , انه المستكه
و الحبهان .
.....................................................................................................................
Mohamed
Hussein
21 أبريل 2017·
أيه حجازي
.
ناشطه حقوقيه مصريه
أمريكيه , سيبك سيبك , كلمة ناشطه دي أي عيل صغير في الشارع بقى يعرف يألّف فيها كتاب
دلوأتي .
.
أيه حجازي من ضمن
الناس اللي ظهرو بعد 2011 , جمعيات بقى و بتلم أطفال الشوارع و حقوق انسان و حقوق عصافير
كناريا , مالمخابيل في نعيم , و أصحاب العقول في راحه .
.
اتقبض على أيه
حجازي بتهمة لها علاقه بأطفال الشوارع ( استغلال و اتجار ) , وقتها انت بقى ك حودة
الجن قعدت تلطم و تجيب طين و تحط على دماغك , و تقول الدوله الفاشيه و ازاي تقبضو عالبنت
الكيوت بتاعة الجمعيات و الحقوق و الاطفال , وبقت أيه حجازي بطله قوميه زي مئات الصيع
اللي اتحولو لأبطال قوميين في أخر 6 سنين .
.
بعد محاكمة استمرت
3 سنين للمصريه الأمريكيه الجاسوسه أيه حجازي المحكمه طلعتها براءه , هوبااااا فين
بقى سيادة الدوله على أرضيها ؟ و فين سيادة القضاء ؟ و فين سيادتي و فين سيادتك ؟ هقولك
سيادتك .
.
عارف ياد يا حوده
؟ من رحمة ربنا بمصر ان انت و اللي زيك ماحكموش البلد دي ساعه واحده ولا شاركو في حكمها
حتى , أه صدقني , انت واد جن صحيح , بس جن في شم الكوله , يعني متمكن , و اي حد بيديك
حاجه صفره بتشربها و ياخدك و يروح بيك حته ضلمه .
.
واحد من 6 سنين
شرّبك حاجه صفره وقالك أيه حجازي دي كيوت اوي و بتحب مصر و بتلم أطفال الشوارع و تاخدهم
في حضنها كداهو , و لما اتقبض عليها شربك حاجه صفره برضه و قالك دي كده تبقى دوله فاشيه
, و لما افرج عنها بعد 3 سنين محاكمه قالك دي كده تبقى دوله مفهاش سيادة قانون , دوله
بترضخ و تخضع و تخنع و كل الحاجات اللي اخرها حرف العين دي .
.
سيادة القضاء يا
حوده موجوده تماما , بس فيه حاجه اعلى من سيادة القضاء اسمها سيادة الدوله ( دي بتظهر
لما يكون اللي بيتحاكم طرف أجنبي .. أيه حجازي هنا هي طرف أمريكي أجنبي ) , و في لحظه
من اللحظات يبقى القضاء مؤسسه من مؤسسات الدوله , يعني ايه الكلام ده ؟ يعني ايه حجازي
تم الإفراج عنها في صفقه تبادليه غير معلنه , لأنها امريكيه الجنسيه , عايزين ايه حجازي؟
طيب و احنا عايزين فلان أو عايزين كذا , زيها زي أي جاسوس و عميل .
.
اه بالمناسبه
, القضاء الإداري ( اللي بيحكم في اتفاقيه ترسيم الحدود ) هو كمان مؤسسه من مؤسسات
الدوله المصريه مش من مؤسسات بوركينا فاسو و البرلمان كمان من مؤسسات الدوله , افهمها
زي ما تفهمها بقى .
.
أهمية ايه حجازي
ايه و ايه حجم الصفقه ؟ والله دي ممكن تتخيلها بس لما تشوف ترامب بعت طياره تاخدها
مخصوص و مين قابلها هناك و ليه راحت البيت الأبيض على طول ؟ و زي ماقلت لك , ماتشربشي
حاجه صفره تاني , و سيب الرجاله تشتغل .
.............................................................................................................................
Mohamed
Hussein
21
أبريل 2017·
البؤساء و زراير
القميص
.
البؤساء لا يدخلون
الجنه ولا هيدخلو النار على فكره , هيفضلو كده في الأوفسايد , بؤساء الفيس بوك اللي
دايما و أبدا ليل و نهار صيف و شتا فاتحين زراير القميص كلها ( و مش خايفين لا عضم
صدرهم يسوّس ) .
.
البائس اللي فاتح
زراير قميصه على طول مع إنه يا ولداه لو مراته قالت له إلحقني فيه فار في المطبخ بيجري
يلبس 3 شرابات صوف و جزمتين فوق بعض قبل مايدخل المطبخ عشان احتمال الفار يعدي من جنب
رجله , البائس ده بقى اللي بتلاقيه عالفيس يقول دايما : طب نقطع علاقتنا بأمريكا ,
نقطع علاقتنا ببريطانيا , نقطع علاقتنا بتركيا و قطر و السعوديه , احنا ازاي نستحمل
الوقاحه دي ؟ فينك يا عبد الناصر , فينك يا سادات , فينك يا مصيلحي ( مش عارف مين مصيلحي
بس أهو اسم و جه معايا كده ) .
.
عزيزي البائس أبو
قميص من غير زراير , لا عبد الناصر هينفعك ولا السادات هينفعك ولا حتى مصيلحي , عشان
الوطن العربي حاليا غير الوطن العربي ايام ناصر و أيام السادات , وانت يا فيلسوف الغبره
تقعد لك سنتين تلاته مركوب من الإرهابيين و تقول مفيش مؤامره و هيتأمرو علينا ليه و
يوم ما تفوق و تفهم تقول فينك يا عبد الناصر ؟ لا ده انت كده لسه مافوقتش ولا فهمت
, انت اتقلبت بس من جنبك اليمين لجنبك الشمال .
.
السياسه عمرها
ما كانت ( فتحة صدر ) , السياسه فن المتاح و الممكن , و المتاح النهارده غير المتاح
امبارح غير المتاح من عشرين سنه غير اللي هيبقى متاح بعد عشرين سنه .
.
انظر حولك يا فيلسوف
؟ هه شايف ايه ؟ بص كويس كده ؟ هتقطع علاقتك بالدول الارهابيه و تروح تضرب قطر بالطيران
و المنجنيق ؟, برافو , تصفيق حاد و مزمن , هه مسنود على ايه حضرتك بقى ؟ لما تقطع علاقتك
بأمريكا و بريطانيا و دول الخليج ؟ على احتياطي نقدي جبار ؟ على تحالف قوي مع مجموعة
دول عربيه ؟ للأسف الدول العربيه الحضاريه الوحيده اللي كان ينفع تتحالف معاها في توقيت
زي ده هي الدول اللي خربت , سوريا و العراق و اليمن , طب بص على جيرانك كده وشوف الجبهات
, ليبيا مفيش لا جيش ولا دوله , السودان متقسمه و الشمال الحدودي معاك بيحكمو خروف
ضاني , فلسطين اتقسمت و القطاع الحدودي معاك بيحكمه خروف ضاني , هتتحالف و تتسند على
مين بقى ؟ وانت هتبقى تقريبا قطعت علاقتك بنص الكره الأرضيه ؟ .
.
عزيزي الفيلسوف
البائس أبو قميص من غير زراير , من فضلك سيب الرجاله تشتغل بهدوء , و احتفظ بافتكاساتك
و عنتريتك لنفسك , أه و ماتنساش موضوع الفار اللي في المطبخ .
..................................................................................................................
Mohamed
Hussein
21
أبريل 2017·
توتيات
.
الموسم بدأ , و
كل مامشي خمسين متر ألاقي راجل بيّاع قاعد كده و قدامه طبق بلاستيك كبير مليان توت
أشكال و ألوان , و لأنَ التوت اللي بسرقه من عالشجره أحلى , سوف أنتظر .
...................................................................................................................
Mohamed
Hussein
21 أبريل 2017·
الشخليله
............ إزاي بقى بيغتصبو عقلك ؟ .
.
لا هما مش بيلعبو
في عقلك ولا بيأثرو عليه , انا ماكنتش عايز اصارحك بالحقيقه , الحقيقه هما بيغتصبو
عقلك , كنا مخبيين عليك بس عشان روحك المعنويه في شم الكوله متتأثرش , ده اغتصاب مكتمل
الأركان , بس انت أكيد حبيته , او اتعودت .
.
الحقيقه مفيش حاجه
اسمها مواطن أو انسان شايل سلاح , المواطن أو الانسان بيشيل قلم فرنساوي أو ورده أو
كتاب أو شريط كاسيت أو بطيخه أو ب 5 جنيه عيش فينو أو جرنان الأهرام أو بيشيل بنته
على رقبته و يتمشى بيها في الجنينه , أما اللي بيشيل سلاح ضد أجهزة الدوله الأمنيه
ف ده اسمه إرهابي .
.
طب الارهابي ده
يعني مش انسان مش بني أدم مش مواطن ؟ لا حضرتك لا انسان ولا بني ادم ولا مواطن , اسمه
الإرهابي .
.
يعني مالوش حقوق
انسان ؟ لا و عهد الله مالوش , ولا في أي دين سماوي له , ولا في أي دستور لأي دوله
له .
.
بس الدول الديموقراطيه
اااا , لا ستوب كده يا مولانا , خد التقيله بقى , الدول اللي اخترعت افتكاسة الديموقراطيه
, الدول اللي بتسمي نفسها ديموقراطيه , الدول اللي زرعت شجرة الديموقراطيه بتقولك انه
ملوش حقوق , بتقولك الارهابي ملوش حقوق , بتقولك لما يتعلق الأمر بأمن الوطن فلا تحدثني
عن حقوق الإنسان
.
طب الفيلم اللي
عاملاه الجزيره و قنوات الخرفان ده يطلع ايه بقى ؟ يطلع فيلم مفبرك و عبيط كنت أتمنى
يكون صحيح .
.
ليه بتتمنى يكون
صحيح ؟ انت شراني اوي كده و قلبك ميت ؟ أه يا حبيبي , لما تكون البلد و ترابها و أمنها
القومي في خطر مش بيبقى فيه قدام المواطن غير اختيار من اتنين , إما انه يكون قلبه
ميت عشان بلده تعيش ( يعني زي حالاتي كده ) , أو يكون عيل لامؤاخذه و أمه عارفه ( زي
جنابك كده ) .
.
بس انا خايف و
قلقان من غياب القانون في التعامل مع المدنيين اللي مش ارهابيين ولا شايلين سلاح ,
والله يا حبيبي ماعتقدش فيه ظابط جيش ولا ظابط شرطه هيوقفك في الشارع و يضربك بالنار
عشان رخصة سواقتك منتهيه او عشان بتمضغ لبانه او عندك فانوس مكسور أو قاعد عالرصيف
بتاكل بطاطا أو شاقط مزه في الطريق الصحراوي .
.
يعني ايه الكلام
ده ؟ يعني بطل افتكاسات و هري و مرقعه , و حاول تلبس بنطلونك , حاول ولو من باب التغيّير
يا أخي
.
......................................................................................................................
Mohamed
Hussein
21
أابريل 2017·
لما حادث ارهابي
في فرنسا يتقتل فيه فرد شرطه يقوم يطلع الرئيس الفرنسي يقول : أنه يجب على جميع الفرنسيين
إدراك أن الشرطة الفرنسية تعمل عملًا صعبًا للغاية ومعرضة للخطر دائمًا !! .
.
بجد و النبي الشرطه
عندكو معرضه للخطر و بتقوم بعمل صعب للغايه ؟ اومال احنا المفروض نقول ايه ؟!! يعني
عبد الفتاح السيسي لو حب يتكلم عن تضحيات الشرطه و الجيش في مصر و الظروف البشعه اللي
بيشتغلو فيها المفروض يعمل ايه ؟ يجيب ربابه و يعزف عليها ؟ .
................................................................................................................
Mohamed
Hussein
21
أبريل 2017·
قناة الخنزيره
الارهابيه و بقية قنوات الخرفان شغالين اليومين دول في فبركة أفلام عن الجيش المصري
, دعم الارهاب بقى على عينك يا تاجر , واضح ان رجالتهم ( قصدي خوا*اتهم ) مزنوقين زنقة
الكلاب في سينا , و واضح ان الخنزيره و عيالها و إرهابها في الرمق الاخير , أفلسو تماما
و بيلعبو بقى على أخر كارت , الروح المعنويه , انما حلوه حكاية ظابط في الجيش المصري
مربي دقنه و بيقتل في المدنيين دي , والنبي حلوه , أه يا خو* , احنا في الجيش بنقتل
المدنيين و عندي في الصيدليه بنقتل المدنيين و أبو وليد البواب اللي جنبي بيقتل المدنيين
, و بناكل دراع العيال الصغيره و بنخرم الأوزون كمان , وانت طبعا اكتر واحد عارف اننا
بنخرم الاوزون , و لّا هتنكر ؟!.
.....................................................................................................................