( محمد حسين - منوع ) ( من 21 أغسطس - 28 أغسطس )

Mohamed Hussein

28  أغسطس

في جلسه خاطفه و سريعه كان فيها 3 من قرايبي الإخوان , كانت المحصله كالتالي ( عشان بس أصدقائي الأعزاء يبطّلو مناهده و وجع قلب مع اصحابهم الإخوانجيه )

.

1- قناة السويس بتتأمن بشركة أمن إسرائيليه .

2- حماس انتصرت على الصهاينه و هتخليهم ينامو من المغرب .

3- السيسي عميل أمريكا و عميل روسيا في نفس ذات الوقت .

4- الإخوان هينتصرو على الشعب والجيش و هيحطو السيخ المحمي في صرصور ودننا

.

هه يا صاحبي ؟ عرفت بقى إن الناس اللي لسه بتعبد البقره واللي بيعبدو رجل الكومدينو و طفاية السجاير و الناس اللي لسه فاهمه إن الفرخه أيام الملك فاروق كانت بتبيض 3 مرات في اليوم ( بعد الأكل ) و الناس اللي فاهمه إن الطياره و هي طالعه من أمريكا ورايحه اليابان لازم تعدّي عالمحيط الأطلنطي و المغرب والجزاير و تونس وليبيا و بعدين تركن في مصر عشان تموّن من بنزينة توتال اللي عالدائري و تكمل طريقها فوق البحر الأحمر و السعوديه و العراق والهند والسند و بلاد تركب الأفيال و فين وفين بقى , بلاد تشيل الطياره وبلاد تحطها لحد ما توصل اليابان ..أهي الناس دي كلها سابقين الإخوان بمليون سنه ضوئيه

.

( إلا صحيح محدش شاف البرادعي ياخوانا ؟ طب ماكتبش حاجه عن مشروع قناة السويس الجديده و لا قال إنه هيشتري أسهم فيها ؟!! ) .

Mohamed Hussein

27  أغسطس

الموضوع طلع بجد فعلا , احتفالات في قطاع غزه ب ( انتصار ) المقاومه , انتصار نفسها كانت ملثمه و بترقص معاهم في الشارع , و ده يا ولاد يبقى الإنتصار رقم 56734 للمقاومه الفلسطينيه , و الصمود بقى ده تخصصنا , و هنفضل كده ننتصر و نصمد و ننتصر و نصمد و نبيض و نفقس و نبيض و نفقس لحد مانجيب للصهاينه شلل أطفال أو حَب شباب .

صوت العرب من القاهره , أيها الساده جاءنا الأن البيان التالي , قامت قواتنا المسلحه بإسقاط 3000 طائره للعدو الصهيوني في أخر ساعتين , مممممممممممم أتاري إن التاريخ نفسه عباره عن أوضه و صاله , و الحمساويين لسه عقلهم متوقف عند سنة 67 , الشباب بيحتفل في الشارع و القيادات صامده في فنادق قطر و الغزاويين الغلابه بيلمّو دمهم و لحمهم و مش لاقيين حته ينامو فيها , انتصار ده ولا مش انتصار يا متعلمين يا بتوع الشرعيه ؟! .

Mohamed Hussein

27  أغسطس

اتفاق مصالحه فلسطيني اسرائيلي برعايه مصريه !! ... حماس و الجهاد بيشكرو مصر على دورها في المصالحه !!.

لا يا عم مش عايزين شكرانيه من حد , ده دور مصر و قدرها و احنا كده بنحب نعمل الواجب مع أي حد حتى لو مايستاهلش أو ما يسواش تلاته تعريفه في سوق الرجاله .

إنما يفضل السؤال الحلزوني هو هو , بعد ألاف القتلى والجرحى والمشردين من الغلابه في قطاع غزه ممكن حضرتك تجيب خبير ألماني أو لجنه من كبار المتخصصين اليابانيين و رزمه ورق A4 و دستتين تلاته أقلام و يقولولنا إيه اللي كسبته حماس من أم البهدله والفرهده و الخراب اللي حصل في الشهرين اللي فاتو ؟ طب ايه المكسب اللي كسبته القضيه الفلسطينيه ؟ طب تعرف حضرتك يا مسيو تقولي إيه رأي القدس ( لو نطقت ) في اللي حصل ؟!!.

.

حركة و لا مؤاخذه حماس بتقول إن إتفاق المصالحه هو تتويج للصمود !! ...يعني احنا دلوأتي كسبنا الصمود ؟ كسبنا صلاة النبي , أه افتكرته , هو ده الصمود اللي بنكسبه كل مره !! , دانا فرحان أوي كأني كسبت الجدول بتاع العجله في مسابقة زمان .

.

بص يا مولانا , إنت حضرتك بعد كده تلاقي عندك في درج الكوميدينو كام بومبه من بتوع العيد يكون الواد ابنك ناسيهم , تقوم تاخدهم و تروح جنب بيت جارك البلطجي و هو نايم و ترميهم عالشباك , يقوم البومب يعمل صوت كده ( بوم بوم بوم ) زي صوت طرقعه اللبان , يقوم جارك البلطجي يصحى و يجيب المدافع الرشاشه و الدبابات و ييجي يطربق بيتك عاللي فيه و انت ترجع ( من الجاكوزي بتاع الفندق ال 7 نجوم ) تلاقي نص عيلتك اتقتل و النص التاني اتشرد , تقوم واقف بقى قدام كاميرا الجزيره و صالب طولك و تقول للصحفي بمنتهى الحماس و لا مؤاخذه ( إحنا كسبنا الجدول قصدي الصمود ) !!.

Mohamed Hussein

26  أغسطس

أغيب شويه عن الفيس أرجع ألاقي التايم لاين مليان خرفان , تقريبا كده صفحة الفيس بوك بتبقى عامله زي الشقه اللي لما صاحبها يسيبها كام يوم يرجع يلاقي العنكبوت معشّش فيها و الصراصير , ناولني يابني الزعّافه بتاعة البلوكات من عندك و هات الشبشب معاك .

Mohamed Hussein

25   أغسطس

سافرت يا مصر متدّاين

و مش خاين

ده أكل العيش

و مين يقدر يا محروسه

يعيش بهواكي و يخونك ؟!

.

أنا المعجون

بطين الأرض و ترابها

و انا الحارس على بابها

أنا العاشق و مجنونك

.

و أه راجعين خلاص راجعين

عشان كان الأمل صاحب

و متصاحبين

و مايهمّش سنين

ضاعت فدا صاحبي

مانا و صاحبي فدا عيونك

.

.

محمد حسين

Mohamed Hussein

24  أغسطس

و قالك : انشقاقات بين عناصر الإخوان داخل السجون بسبب المراجعات الفكريه !! ........ هههههههههه والله اللي كتب الخبر ده في اليوم السابع عامل أحلى دماغ و لا كأنه شب سجارة حشيش بطول شارع صلاح سالم , مراجعات فكريه !! فكريه دي تبقى خالتك يا مولانا .

طب دانا أيام ما كنت عبيط كنت فاهم إن الإخوان دول لهم جناحين زي عملة الساسه الأمريكان كده ( صقور و حمائم ) , و كنت من شدة عبطي بحط البلتاجي في قسم الحمائم , و بعد كده بقيت أبص لخلقة البلتاجي واقول : يا ربنا عالجمال و الرقه , بالذمه ده منظر حمامه ؟!!.

يا صحفيين اليوم السابع , يا بوابين الصحافه المصريه لمّوها شويه , لمّها يا عثمان , دي جينات يا حمار , أحفاد حسن البنا و سيد قطب عمرهم ما هيبقو في يوم من الأيام أحفاد طه حسين و عباس العقاد و فاروق جويده يا جحش بدرجة صحفي كبير .

Mohamed Hussein

22   أغسطس

في 2014

.

روحت الإداره التعليميه أجيب طلب ( إلحاق مصري عائد من الخارج ) عشان أقدم لبنتي في المدرسه هنا , لقيت الطلب عباره عن نموذج مليان تعهُّدات , تعهّد بإني رجعت مصر و إني هعيش هنا و إني بحب البلد دي و مش مسافر تاني و تقريبا هياخدو خالي رمضان رهينه عندهم لحد ما يتأكدو من كلامي قبل مايقبلو أوراق بنتي في مدرسه خاصه يعني مش هكّلف أم الحكومه قرش ساغ , الغريبه بقى إن النموذج ده واحنا في سنه 2014 فيه من فوق عالشمال مربع صغير مكتوب فيه طابع دمغه بجنيه !!.

عايزين طابع دمغه ؟ هو أنا عائد من قبيلة قريش يا ولاد التيت ؟ , إنما الحمد لله لسه فيه أمل , النموذج معمول على ورق A4 عادي مش على ورق بردي و لا على ورق الفل دلعني .

Mohamed Hussein

22  أغسطس

خطة هدّ الحيل

.

ده اللي بيعمله الإخوان و ألاضيشهم من شهور طويله , يحشدو لذكرى رحيل مرسي و يفشلو , و هما عارفين انهم هيفشلو بس ألاضيشهم مش عارفين , و يحشدو لذكرى فض اعتصام رابعه و يفشلو و هما عارفين , و هيحشدو ل 30 أغسطس و هيفشلو و برضه عارفين وبعد كده حشد ل 25 اكتوبر و 37 نوفمبر و 98 يناير 2015 ... و أي حاجه يهدو بيها حيل البلد دي .

.

و في كل مره و كل حشد لازم الجيش ياخد الموضوع بمحمل الجد , أصل أمن مصر القومي مش لعبه , دبابات الجيش تنزل تأمن الشوارع الرئيسيه و حالة استنفار في صفوف الأجهزه الأمنيه , و يبقى جيشك بيأمن حدودك ( 4 ألاف كيلو ) مع دول مابقتش دول ( بقت عصابات ) و يأمن الشوارع من الداخل والطرق الرئيسيه و يعمل طرق و كباري و مدارس و مستشفيات و مساكن و مشروع القناه الجديد و يهدم انفاق ويحارب ارهابيين و يطارد تجار سلاح و يصنع طائرات بدون طيار و صواريخ و دبابات و يفتح للناس أكشاك لتوزيع المواد الغذائيه عشان يسيطر شويه عالأسعار وجشع التجار , و في الأخر تلاقي صاحبك نايم على بطنه عالسرير في التكييف وهو لابس الشورت البمبي وماسك الموبايل التاتش سكرين و يكتب بوست بعنوان ( جيش المكرونه ) !! ...........#مكملين بالشورت البمبي

Mohamed Hussein

22  أغسطس

عنواني في القاهره ........ لو كنت غاوي

.

شوف حضرتك , انت توصل أول جسر السويس من ناحية كوبري الحرفيين , تدخل شارع جمال عبد الناصر , هتعرفه بسهوله , هتلاقي على ناصيته ميكروباسات مصديه مافهاش مرايات و راشقه في بعض بطريقة الحلزونه يامه الحلزونه , حضرتك تستعين بالله و تقرا الشهادتين و ما تيسر من القرأن , و يُحبذ إنك تكتب وصيتك و تستخير ربنا و تدخل بقى , هتلاقي فكهاني على إيدك اليمين واخد 3 متر من الشارع لمسافة 7 متر طول , بعد منه عتبه عاليه في الرصيف , تقريبا بلاعه و اتردم عليها , بعدها عاليمين قطيع خرفان عددهم 17 خروف واخدين ييجي قيراطين من الرصيف بعدهم كوم زباله ارتفاعه مترين و نص , بعد كده عربية دره مشوي ( ماتاكلش منها ) و مطب رخم , و بعدين واد فارش بريموتات صيني مضروبه , بعدها محل فول و صيدليه وقدامها شوية خرفان صغيرين ( فيهم حولي يعني خروف صغير ) , بعدين هتلاقي بلاعه أو حته ساقطه شويه من الرصيف مايجراش حاجه يعني , بعدها هتلاقي عربيه مصديه و مرميه من ييجي 17 سنه , وراجل بيبيع شرابات وفلايات .

.

وانت ماشي هتلاقي شوارع عالشمال , عرض الشارع بتاع 4 متر و العماير فيه ارتفاعها 12 دور , و فيه عربيه راكنه يمين و عربيه شمال و مطلوب منك تعدّي من النص ( بعربيتك ) , والمكان اللي مافهوش عربيات راكنه هتلاقي فيه اسياخ حديد محطوطه عشان تحجز الركنه , عد بقى حضرتك 36 سيخ حديد بالظبط ..يعني ركنة 18 عربيه و هتلاقيني بعد السيخ رقم 36 قاعد في سايبر بكتب لكو البوست ده عشان ماعنديش شبكة نت في البيت ولا شبكة موبايل حتى ....ابقى تعالو زوروني بقى واهو بالمره تركبو ألة الزمن و ترجعو 90 سنه لورا , هتلاقوني مستنيكو بالطربوش الأحمر أبو زر و هشوفكو من المشربيه ...بحبك يا مصر , ممنون يا هانم .

( محمد حسين - منوع ) ( من 14 أغسطس - 21 أغسطس )

Mohamed Hussein

20  أغسطس

في البنزينه قررت بصفه نهائيه و بعد تفكير عميق إني أغسل العربيه , عامل المغسله اللي عمّال يمسح و يسيّأ و منتظر اتنين تلاته جنيه بقشيش لقى راجل عجوز ماشي بيبيع عرقسوس , العامل نادى على بتاع العرقسوس و اشترى منه كوبايه بجنيه , قاله عشان تستفتح يا حاج ........... أجمل حاجه في مصر إن الغلابه بيحسو ببعض , و اللقمه اللي متأكّلشي فار بيقسموها اتنين رجاله مع بعض .

Mohamed Hussein

19  أغسطس

مصر في كلمتين ( كهربا و تكاتك )

.

الناس في البلد كلت وشي يا عبفتاح , ولاد عمي نصهم اخوان , قالولي حبيب قلبك عامل فيك كده ليه ؟ يا راجل الكهربا بقت بتيجي عندنا في البلد كأنها ظاهره كونيه , زي كسوف الشمس و خسوف القمر و تعامد أشعة الشمس على مناخير الملك الفرعوني ماعرفش مين , العيال يا سيسي في بلدنا بقو يطلعو يجرو في الشوارع لما النور ييجي و يغنو النور جه النور جه زي ما كنا احنا بنعمل من 30 سنه أيام ما كانو بيركبو عمدان النور في البلد !!.

اسبوع واحد قعدته هناك حاسس إن نظري بقى أقوي 10 مرات ..بقيت زي الخفافيش يا عبده ياخويا و بشوف في الضلمه , الله يعمر بيتك يا شيخ .

.

و لما تسوق عربيتك في شوارع مصر المحروسه لازم و حتما و لابد تحذر خطأ نفسك , إنك تسرح يعني او تتكلم في موبايل و تنشغل , و تحذر خطأ الغير , يعني سواق ميكروباس يرمي جتته عليك فجأه , و تحذر خطأ الحكومه , يعني بلاعه مكشوفه و تنزل فيها بعربيتك زرع بصل أو عضمايه في الرصيف ارتفاعها نص متر تكسر العربيه حتى لو كانت ستانلستيل أو عربية ماركة كاتربيلر , وانت سايق كمان لازم تحذر من فوقك و من تحتك و عن أيمانكم و عن شمائلكم , ممكن تريسكل يطلع لك من تحت الأرض زي فيلم نهاية العالم أو توكتوك ينزلك من السما و يرشق في الكبّوت ........... عمار يا ليبيا .

Mohamed Hussein

17  أغسطس

نزلت المنصوره يوم ذكرى فض اعتصام رابعه , قلت انا مش هيهمني حشود الإخوان ولا الطرق المقفوله , و بعدين بصيت يمين و شمال , فوق و تحت , فين أنصار الإخوان ؟ أنصار الإخوان فين يا حاج ؟ ماشربوش عندك عصير برتقان أنصار الإخوان يا عمنا ؟ و فين و فين بقى لقيت لمّه كبيره جايه فيها ييجي 70 واحد و هيصه و زمبليطه و تكاتك و موتوسيكلات , قلت بس أنصار الإخوان ظهرو أهم , شويه لقيت عربيه سبقتهم وبدأت تعمل دواير و تفحّط بلغة السعوديه و عربيه وراها معلّقه ورد و طرحه بيضا , عرفت إن اللمه دي بتاعه عروسه وفرح , الله بقى ؟ انتو بتتجوزو إزاي يا مصريين في ذكرى رابعه ؟ مش خايفين طيب من الحشود الغفيره ( اللي هي مرات الغفير ) ؟!.

Mohamed Hussein

15  أغسطس

السيسي زار روسيا مرتين و متجاهل أمريكا تماما , ده اسمه موقف سياسي واضح لا يحتمل التأويل و لا الغرغره السياسيه , خريطه جديده بتتشكل في منطقه الشرق الأوسط , حلف أمريكا و حلف روسيا , حلف أمريكا فيه الصهاينه و قطر وتركيا و حماس و الإخوان و الجزيره و واشنطن بوست و منظمة هيومان رايتس واتش , ولو مش مصدقني إن الصهاينه وحماس في نفس الحزب و شغّالين عند نفس الكفيل ابقى اسأل خالد مشعل تختار مين يرعى محادثات السلام مع الصهاينه هيقولك أمريكا , مين يبقى مسئول عن المعبر ؟ هيقولك أمريكا , طب بتصدق مين و بتثق فيه ؟ أمريكا.

.

هي حماس كده من 10 سنين , تبات في حضن الرئيس الأمريكي كل يوم بالليل و تصحى الصبح تقول ده راجل واطي و سافل و أمه تخينه و مابيعرفش و إني أخاف ألا أقيم حدود الله , و تفضل عالنغمه دي لحد الدنيا ما تليّل و بعد كده تدخل فرشتها تاني ...أصلها سقطت في الكيما و واخده الموضوع هوايه.

.

صحيح إن روسيا مش بتبيع سبح و سجاجيد صلاه , بس السيسي قرر إنه يبعد تماما عن حلف الشيطان الأعظم , حلف الخراب المستعجل و ابقى اسأل عن أمريكا في سوق الدم و الخراب #العراق #أفغانستان #السودان #ليبيا #اليمن .

( محمد حسين - منوع ) ( من 7 أغسطس - 14 أغسطس )

Mohamed Hussein

14  أغسطس

نزلت من شقتي لقيت أمي و مرات أخويا قاعدين بيقرّصو العجين عشان يخبزو عيش طري ( عيش غلّه ) في الفرن , وانا نازل بمج النسكافيه واللاب توب على كتفي ولا اللي جاي من شيكاغو , قومت قاعد جنب أمي و مرات أخويا وهما بيخبزو .

.

بفتح الفيس لقيت إن هيومان رايتس واتش طلّعت تقريرها امبارح عن فض اعتصام رابعه , و قالت جريمه ضد الإنسانيه !! , هيومان لا مؤاخذه رايتس لا مؤاخذه واتش المنظمه اللامؤاخذه الأمريكيه لحقوق اللامؤاخذه الإنسان ابقو اقرو تقاريرها عن جرايم الصهاينه في فلسطين و جرايم أمريكا في العراق و أفغانستان و جونتانامو وسجن أبو غريب عشان تعرفو إن المنظمه دي هي التطور الطبيعي لريري سيلان .

.

و شوف يا جدع حكمة ربنا , يشاء السميع العليم و بالصدفه البحته إن هيومان رايتس زفت تطلع تقريرها في نفس يوم الحشد بتاع الإرهابيين لإحياء ذكرى رابعه , يعني بعد سنه بالظبط مش سنه إلا إسبوع ولا سنه و إسبوعين , و لسه الناس بتاخد التقارير دي على صدرها و تصدق و تنفعل و تعيش بمبدأ : إوعى إيدك كده ملخت الكُم ) !!.

.

كان معكم مراسلكم العبد لله من أمام فرن الحاجه غاليه , و سألت أمي , إيه رأيك يامّه في تقرير هيومان رايتس واتش اللي معمول من ييجي 100 صفحه ؟ قالت لي هاتو يابني نخبز بيه رغيفين أصل القش مش هيكفّي الخبيز !!.

Mohamed Hussein

13  أغسطس

رابعه بقى وأدب رابعه , مات يوميها 500 لا 5000 هما أصلا 50 ألف بس أخر كلام نص مليون حسب إحصائيات الجزيره و بالأسماء , و لو عايز أسماء اللي ماتو في الحرب العالميه التانيه هتلاقيهم عند الجزيره و أسماء اللي ماتو في غزو الهكسوس و وزن الفيل بتاع أبرهه اللي كان رايح يهد الكعبه , كله عند الجزيره , الورق ورقهم و الختم بتاعهم , و أطيعو المرشد و أطيعو خيرت الشاطر و قناة الجزيره ( ولله المثل الأعلى و لرسوله و المؤمنين ) .

و الجيش المصري بقى حرق الجثث كمان , أصله جيش من المجرمين و المخابيل , اللي ماعمل كده في جثث الصهاينه أيام الحرب بس عملها في جثث بهاليل الإخوان و قدام الكاميرات !! .

إنزل يابني و احشد و احرق و اقطع و خرّب , أصل يناير مماتش فيها ألفين من أنضف شباب مصر , بس أهاليهم مابينزلوش يحرقو البلد ولا عملو ذكرى لاستشهاد ولادهم , فرق شاسع بين انك تكون شهيد وطن و إنك تكون شهيد البلاله و الفكر الوثني.

Mohamed Hussein

11 August

أصدقائي اللي سألو عليا في غيابي بشكرهم جداً , خدت أجازه اضطراريه لمدة 4 أيام , مسافة السكه على رأي حبيب قلبي , الحمد لله وصلت البلد عند الحاجه أمي أخيرا , دي صورة بيتنا في البلد , شوية هوا يردو الروح بس مفيش واي فاي !!.

Mohamed Hussein

8  أغسطس

4 أيام في الطريق من غير نوم تقريبا , أنا لو جاي من كوكب من بره المجموعه الشمسيه و درب التبانه كان زماني وصلت قبل كده , لو جاي راكب على جناح فرخه كنت وصلت قبل كده

.

في الطريق بقى شوفت الناس الغلابه اللي زي حالاتنا عملو فرع لجمصه في العين السخنه , ميكروباسات قديمه و الناس نازله البحر قدام القرى السياحيه الفخمه , نظام الست ام جلابيه منفوخه والراجل اللي جايب فردة كاوتش و عاملها عوامه , شقّة بطيخ داخله البحر و لبشة قصب عالشط , منظر مش حضاري اطلاقا , صح من حق الغلابه ينزلو البحر و يصيفو بس مش بالشكل ده ومش في المكان ده , ده مش شط مخصص للعوم , دي منطقة قرى سياحيه , فين الدوله و شرطه السياحه ؟ يكونوش قاعدين يمصو قصب و ينحتو في قشر البطيخ مع الناس ؟!.

.

اللي كان بيحلم يركب أله الزمن ويرجع 60 سنه لورا مفيش داعي يتعب نفسه في التدوير على ألة الزمن , ممكن ببساطه شديده يدوّر على أي ميكروباس طالع سفاجا و يدخل المينا هناك هيعرف انه رجع 60 سنه لورا , فرخ الكربون و الوصل بخط الإيد والاستاذ فلان لازم يوقّع هنا بس هو ماجاش , ممكن تروحو له البيت , والبيه الظابط مممممممم ما علينا

.

في مينا سفاجا بعد المغرب مكانش فيه عبّارات ولا بشر بس كان فيه 3 مجموعات من الكلاب الضاله اه والله ضاله جدا كمان , مجموعه لونها أبيض و مجموعه بيج و مجموعه رمادي , وحصلت بين ال 3 مجموعات عاركه لرب السما وانا شاهد على كده و مستعد أقول أقوالي في المحضر قدام ال ممممممم البيه الظابط , الكلاب البيضا هي اللي غلطانه , هي اللي راحت للكلاب البيج في مكانها والكلاب الرمادي حاولت تتدخل عشان تلم الموضوع بس الموضوع كان كبر و خرج عن السيطره .

.

بالليل على الساعه 12 كده , دخلت عساكر الشرطه تدوّر على أي حد يكون دخل المينا من غير تصريح , بس يا ترى ال80 كلب ضال اللي شوفتهم جوه المينا معاهم تصريح ولا معرفه حد مسئول و معاهم واسطه ؟! .

.

................... عمار يا ليبيا .

( محمد حسين - منوع ) ( من 31 يوليو - 7 أغسطس )

Mohamed Hussein

6 أغسطس

لاهو انت كنتي مستنيني لما أنزل مصر يا عبفتاح عشان تبدأ مشروع تنمية قناة السويس ؟ بتحبني أوي كده يا عبده ؟ , طيب خلاص أنا هبقى أجي أشرف بنفسي عالمشروع و اتمريس عليكو , و اقولك احفر هنا و اردم هنا , مش أنا ناشط فيس بوكي ؟ يبقى لازم أتمريس , وانت عارفني مابحبش الحال المايل , هتمشي معايا عِدل هتبقى صاحبي و حبيبي و كفاءه , هتفكّر تلعب كده ولا كده ممممممممم ما يقدر عالقُدره إلا ربنا يا عم الحاج , إحنا نمشيها مفاوضات يا مصيلحي .

.

أقولك على حاجه أحسن ؟ أنا مش هاجي أشوف شغلكو , أنا واثق جدا في الهيئه الهندسيه و في جيش مصر العظيم , هشتري بس كام سهم كده للبنات , هات 50 سهم و خد 5 ألاف أهي يا عبفتاح , مدّ إيدك يا راجل قبل مارجع في كلامي .... ( 5 ألاف جنيه تمن عزومتين تلاته في سيتي ستارز و فسحه للأطفال في كدزانيا ) .

Mohamed Hussein

6 أغسطس

فرق كبير بين إنك تعمل مشروع لتنميه قناة السويس بأموال المصريين عشان في النهايه يمتلكه المصريين و بين إنك تعمل نفس المشروع و تملّكه لكلاب السكك .

السيسي عمل المشروع و هيعمله بفلوسنا احنا و يبقى ملكنا , و مرسي لما وصل للحكم قال أنا هجيب لكو 200 مليار جنيه ولا ماعرفشي كام , وفي النهايه نكتشف إن الفلوس دي كانت استثمارات قطريه صهيونيه في قناة السويس !! , يعني بنبيع أمننا القومي للخوااااا ( الخواجات ) , و لو صبرنا شويه كانت حلايب راحت مننا زي ما قال نائب الرئيس السوداني , و تقولي عملنا ثوره ليه في 30 يونيو ؟!

Mohamed Hussein

5 أغسطس

سكة سفر

.

و بعد ما سوقت بتاع 1500 كيلو بصيت لعيني في المرايا لقيتها حمره فوشيا قلت تبقى الزياره وَجَبِت يا عطيه , قصدي مَج نسكافيه معتبر عشان أفوق واعرف أكمّل ال 500 كيلو الباقيين , ركنت في أول استراحه وقلت هنزل اجيب مايه و نسكافيه وبالمرّه أبص على عَجَل العربيه , و نزلت جبت مايه و نسكافيه تقيل زي الحبر عشان ده اللي بيحوأ في جتتي , و ركبت العربيه و دوّرتها و بعدين افتكرت إني مابصّتش عالعجل , فتحت الباب و نزلت تاني قلت قبل ماتحرك بقى عشان لو فيه مشكله ألحقها هنا وبعدين ركبت وسوقت بتاع 150 كيلو وافتكرت اني لما نزلت في المره التانيه لفّيت حوالين العربيه زي اللي بيلف حوالين مقام بس ماشوفتش العجل برضه !! , قلت والله مانا واقف ولا نازل , هو انا مخي دفتر يعني .

.

يا بيه انا بسافر طرق اد كده يا طولها يا عرضها ببركة دعوة الحاجه غاليه أمي ( روح يابني ربنا يسهّلك طريقك ) , هتقولي إنت بقى شيّك عالزيوت والكفرات والمايه قبل ماتسافر هقوم هازز لك دماغي زي البنغاليين و اقولك ( معلوم معلوم ) و مش هعمل حاجه ( زي البنغاليين برضه ) .

Mohamed Hussein

4 أغسطس

إمبارح عمرو الليثى عمل لقاء مع ناس راجعين من ليبيا , منهم شاب سلفي سو كيوت , اللهم صل عالنبي , و قال الشاب السلفي الكيوت أنا عايز أوجه رساله للشعب الليبي الشقيق : إنتو بتعملو فينا كده ليه ؟ داحنا مسلمين زيكو و حتى ليبيا مفهاش مسيحيين ولا ديانه تانيه و لا احنا مسيحيين !!.

الله يفتح عليك يا مولانا , يعني لو مسيحيين أوكيه تتقتلو عادي ؟ أدعي عليك بإيه طيب ؟ روح يا شيخ إلهي ربنا يكرمك انت و عمرو الليثى بعقد عمل ل داعش , عند الناس اللي يقدرو مواهبكو و امكانيتكو .

Mohamed Hussein

3 أغسطس

ليبيا راحت في الوبا , الناس اللي راجعين من هناك بيقولو مايعرفوش مين بيضرب مين لصالح مين و مين بيحكم إيه ؟ جبهه كبيره واتفتحت على مصر , تمويل قطري و سلاح أمريكي لخراب الوطن العربي و الإقتراب شوية أكتر من مصر , إعتقادي إن فيه تدخل عسكري مصري بشكل مخابراتي في ليبيا حاليا و قريب جدا احتمال نضطر لتدخل عسكري كامل .

.

حدودنا مع ليبيا ألف كيلو و كده مفيش دوله في ليبيا ولا حكومه عشان تتعامل معاها بشكل دبلوماسي , لو حصل و اضطرينا لكده هيبقى إنهاك زياده للجيش المصري و حمل فوق الحمل و طبعا حماس بتطوّل مدة العدوان على غزه لأطول وقت ممكن !! .

.

أي مثقف حمار هيقول ساعتها إن تدخلنا العسكري في ليبيا إعتداء على سيادة الدول إبقى قوله يا جحش يا مثقف انت بتحمي حدودك و أمنك القومي مع دوله بينك وبينها نص متر , و ستك وتاج راسك أمريكا بعتت قواتها لمسافة كذا ألف كيلو في أفغانستان والعراق عشان تحمي أمنها القومي في واشنطن !!.

Mohamed Hussein

3 أغسطس

خايف لا المناهده في السياسه ليل و نهار تقصف عمرنا و نعجّز بدري , و انا بقى بصراحه عايز أعيش , أيوه على الأقل لحد ماشوف بناتي لابسين الفستان الأبيض و يقعدو يناقرو في بعض كالعاده , هو صح انا هبقى ألعن من عادل إمام في فيلم عريس من جهة أمنيه و هتلكك لكل عريس ييجي لأي بنت فيهم , يعني بعد ما نستوفي شروط المؤهل المحترم و الوظيفه أم 4 ألاف دولار أساسي والشقه بتاعة الرحاب و الطول يكون مناسب و الوزن زي الطول - 100 , و يكون من عيله طيبه وابن ناس كويسين , مايكونشي له قرايب إخوان من الدرجه الأولى و لا السابعه حتى أيوه أنا مش ناقص غباوه في العيال أحفادي بدل ما وديني أطخهم عيارين .

.

و لما نستوفي الشروط دي يروح يجيب لنا فيش و تشبيه و شهادة الجيش و شهاده من شيخ الحاره و رئيس الحي و ناخد خاله رهينه عندنا لمدة 70 سنه عشان نضمن بس إن معاملته تبقى حلوه لبنتنا أومال إيه ؟ و بعد ما يجب الحاجات دي و يوافق عالشروط هرفض الجوازه , و اقول للبنات يلبسو الفستان الأبيض عشان نفسي أشوفهم لابسينه و يروحو ستوديو نانسي اللي في شارع عين شمس يتصورو و يرجعو البيت يغيرو هدومهم و ينامو , إحنا ماعندناش بنات للجواز .

Mohamed Hussein

2 أغسطس

اللي مصدق كلام فريد الديب يصدق إن مبارك كان بيقطع من لحمه الحي و يدينا , أو كان بينزل كل يوم الفجر يشتغل بالفاس و يجيب الأجره أخر اليوم يوزعها عالشعب , أو يصدق إن مبارك ساب الحكم و هو أفقر رئيس دوله في العالم واحنا اغنى الشعوب , ده حتى مبارك و ولاده حالتهم كرب أصعب من حالة عم مصطفى بتاع الجراج و عياله .

.

مبارك كتّر خيره يا ولاد , استلم مصر و هي طالعه متدمره بالقنابل النوويه و يوم ما ساب لنا الحكم كان عندنا شركات عملاقه زي تويوتا وتوشيا و إل جي و ليكزس , في 30 سنه من حكمه بقينا نصنع كل حاجه من الإبره للصاروخ و بقت مصر تاني ولا تالت أقوى اقتصاد في العالم , ياكشي احنا بس شعب نمرود و مابيعجبهوش العجب .

.

طب يا أخي بص لدولة اليابان اللي كانت طالعه منتصره من حرب و منتشيه ولا متدمره و لا يحزنون و حكمها واحد طاغيه لمدة 30 سنه و عندها كل الموارد , زراعه وصناعه و مواد خام و بترول و سياحه و تاريخ وأثار و قناة ملاحيه هي الأعظم في العالم و مع ذلك الإمبراطور هناك خرب بلده مداين , الزباله بقت ماليه الشوارع ولا فيه تعليم ولا صحه وجاب شوية ألاضيش صيع يفصلو له القوانين على مقاسه هو و ابنه و مراته الإمبراطوره الحيزبون .

.

يا ساده , اللي عمله مبارك في مصر هو معجزه بكل المقاييس هيفضل يتكلم عنها التاريخ لحد لسانه ما يوجعه , عشان كده انا مش عارف إحنا عملنا ثوره في يناير ليه ضد الراجل العظيم ده ؟ , أتارينا شعب لعين أوي , ربنا ينتقم مننا احنا يا شيخ .

Mohamed Hussein

2 أغسطس

مطار طرابلس بقى أشبه بسوق الخرده , و الجماعات الإسلاميه في ليبيا كل يوم بتسيطر على أرض جديده و داعش في العراق بتجنّد الستات والأطفال و برضه بتكسب أرض , هتقولي الجماعات دي بتجيب الأسلحه و المؤن والعتاد والفلوس منين ؟ هقولك مممممم أسأل أمريكا و قطر وانت تعرف ( أموال البترو دولارز ) , لا لا أنا غلطان , حقك عليا , دي أكيد الأسلحه دي بتنزل عليهم من السما بواسطة الملايكه أم جناحين و احتمال كبير يكون ربنا بينزّل عليهم مائده كل يوم مع الأسلحه و شنطة الدولارات و أزايز الحاجه السقعه المشبّره عشان المجاهدين يتعشو و ينامو و يصحو يجاهدو و هما شبعانين كده و فريش , أيوه المائده نازله من السما مش من طيارات الأباتشي الأمريكيه و حتى الأسلحه هتلاقي مكتوب عليها ( صٌنع في الفردوس الأعلى ) بس انا اللي مش واخد بالي , بلاش دي , أقولك حاجه ؟ هما بيجبو الأسلحه والصواريخ و الفلوس اللي بيشترو بيها الكلاب و الخونه من محل العطاره بتاع المرحوم !!.

.

يا الله يا ولي الصابرين , حدودنا مع غزه و مع الصهاينه موال تاني و جبهه دايما مفتوحه , كل يوم الخناق بيضيق حوالين رقبه مصر ( إنت الهدف الأكبر يا جحش ) , و مالناش غير جيشها بعد ربنا يحميها , حماده اللي لسه فاهم إن حماس و الإخوان و داعش و القاعده عايزين يعملو دولة خلافه إسلاميه برعاية قطر و تركيا مايفرقش كتير عن حماده اللي لسه فاهم إن أمريكا و أوروبا بيبيعو لنا ديموقراطيه ( طازه ) و رأيي الشخصي إن حماده الأولاني يمسك إيد أخوه حماده التاني و يسلّمو نفسهم لأقرب سرايا صفرا , مصر دلوأتي ماشيه على الحَبْل و محتاجه ولادها جنبها عشان تعرف تعدّي .... يارب سلّم.

Mohamed Hussein

1 أغسطس

النتيجه واحد واحد يعني ( باطه ) بلغة الكوتشينه.

.

عملنا ثوره في يناير , تعالى نحسبها بالورقه والقلم حسبة مكسب وخساره

.

مكسبنا كان إننا قدرنا نشيل مبارك و رجالته و نظامه و نمنع توريث الحكم و نوقف حنفية الفساد المفتوحه عالأخر أو عالأقل نقلفها شويه بس هي لسه بتنقّط , مكسبنا كان في حبس صفوت الشريف و فتحي سرور وكل شله الترزيه بتوع مبارك اللي خربوها مداين و خلصنا من طلّتهم البهيه و وشوشهم العِكره.

.

إنما خسرنا وطنيتنا و حبنا لتراب البلد دي , إهانة إسم مصر و جيشها بقت وجهة نظر المفروض نتناقش فيها , علم مصر بقى بيتحرق في الميدان و يتعمل بدلة رقص و جيشها العظيم بقى اسمه جيش المكرونه و جيش نوال , حريه بقى وكداهون , فينا اللي عايش الدور أوي و ممكن يتعاطف مع أي كلب ضد بلده و جيشها , ونفس جيلنا المثقف التنين اللي عمل الثوه هو هو جيلنا الحمار الحصاوي اللي بيتركب من أي واحد مربي دقنه أو مطوّل شعره , أي واحد يبدأ كلامه بقال الله وقال الرسول أو أي واحد يبدأ كلامه بقال جيفارا و قال دستوفسكي ( و لله المثل الأعلى و لرسوله ) .

.

جيل أبائنا صحيح رضي بظلم و فساد مبارك و نظامه لكنه جيل عاش ومات من غير ما يهين إسم مصر ولا جيشها .

طز بقى في جلينا إحنا , لأ طزين , إحنا ماعملناش حاجه يا بشر عشان نفوز , إحنا على أد ما عملنا على أد ماتعمل فينا........ و النتيجه باااااااااااااااااطه.

Mohamed Hussein

1 أغسطس

علم مصر اللي بيقف قدامه كل تلميذ و طالب و جندي و ظابط و يديله التحيه , علم مصر اللي بيترفع على كل مؤسسه حكوميه مصريه و كل سفاره مصريه في العالم , علم مصر اللي استشهد عشانه عشرات الألاف عشان يترفع على حتة من أرضنا كانت محتله , علم مصر اللي بيتلف فيه جسم الجندي الشهيد ماينفعش يبقى بدلة رقص يا عبد الفتاح , و رحمة كل دم سال على أرضها ما ينفع .

عندنا قانون بيعاقب أي حد يهين العلم , صافيناز مش سياسه عليا زي زهيره , صافيناز تتسجن زي أي كلب بيتجرأ و يهين العلم و بعد ما تخلص سجنها تترحل على بلدها , في ستين ألف داهيه , عجلة التنميه مش هتقف في مصر لما رقاصه تغور من أرضها .

Mohamed Hussein

1 أغسطس

هاللو شلبي , العيال كبرت , مدرسة المشاغبين

.

تكشف عليا ليه ؟ تكشف عليا بتاع إيه ؟ هو انت ظابط ؟ أنا مايكشفش عليا غير البيه الظابط .

و ابقى سلّم لي على جوزك يا اسماعيل بيه , سانتانتانضانو الإذاعه المحليه , هنا البي بي سي كولا , مرسي ابن المعلم زناتي الله يرحمه يا رجاله .............. الله يرحمك يا فنان و يجزاك خير عن كل بسمه رسمتها على على شفاه الغلابه .

Mohamed Hussein

31 يوليو

يعني ايه منطق ؟!

.

1- بطبيعتنا شعب على نياته أو نقدر نقول ( حسن النيه ) , كتير مننا كان فاكر مصطفى بكري و رجب حميده والإخوان هما رموز النضال الوطني في عهد مبارك

و أكيد يعني ماتكون حضرتك شوفت في أيمن نور زعيم فذ قدر يقف في وش مبارك و يترشح قدامه كمان .

.

2- معلش , ماحنا مش ربنا اللي بيعلم خائنة الأعين و ما تخفي الصدور , بس لما الأمور بتبان و الوشوش العيره بتقع مش عيب بقى إننا نبدأ نحط علامات إكس على ناس ( كُنّا نعدُّهم من الأبرار ) .

.

3- شبكة رصد شبكه كبيره ولها تمويل محترم , يعني صورها وبوستاتها مابتنزّلهمش بطريقه الشير من فلان أو علان , لا بيعملو كل حاجه على إديهم , فلما تلاقي عندهم صوره ملعوب فيها لازم يكون اتهامك مباشر لهم , ماهما أكيد عندهم المصممين والمزورين وبتوع الفوتو شوب , الكلام ده لاحظته من زمان , من قبل صورة الإتنين اطفال اللي قالو الجيش قتلهم يوم فض اعتصام الحرس الجمهوري وبعدين طلعو أطفال سوريين , و عليه استمرت شبكة رصد في التزوير لحد النهارده , كل يوم صوره متفبركه و ملعوب فيها و لايك يا جدع وشير , وبتاع 100 ألف حمار حصاوي ينقلو الصوره على صفحاتهم .

.

4- أخر إبداعات شبكة رصد في التزوير كانت صورة الناس في صلاة العيد في مصر و هما بيصلّو العيد و كل مجموعه واخده اتجاه غير التانيه والستات وسط الرجاله عادي , أنا طبعا راجل صيدلي بتاع نوفالجين فاصوليا وفوار فواكه وماليش اوي في الفوتو شوب , بس ربنا بيبعت لنا ولاد الحلال اللي بيفهمو , اللي طلّعو كذا غلطه في الصوره تقول باختصار انها متركبه و بحموريه كمان .

.

5- طيب إجمالا أنا كفرت بشبكة رصد من البدايه , أومال حضرتك بعد ما شوفت ألف صوره متفبركه عندهم ليه مستني إن الصوره رقم 1001 تبقى بنت حلال مصفي ؟!.

.

6- حسن الدوكش كل يوم يدخل يلاقي مراته نايمه مع راجل شكل و يسامحها , أصله حنين و مرهف الحس , مره في التانيه في التالته في العاشره في الألف مفيش فايده , لا بتتوب هي ولا تبطّل بس هو لسه بيسامحها لحد النهارده .

عزيزي النحنوح و الناشط السياسي و الفيس بوكي , ياريت تحدد اختيارك بوضوح , هو انت حسن النيه و لّا حسن الدوكش ؟!!.