Mohamed
Hussein
27
سبتمبر 2018·
زي الأيام دي من
48 سنه مات راجل مصري أسمراني , و في جنازته المصريين كلهم تقريبا كانو في الشارع بيعزّو
بعض و ياخدو العزا من بعض !!, مشهد عجيب , لدرجة ان بيوت مصريه كتير عملت صوانات عزا
و كأن اللي مات واحد من العيله ( من أهل البيت ) .
.
اللي بيموت اجمالا
مهما كان شأنه في الحياه بيموت من غير مايكون في إيده كرباج يجبر بيه الناس يحضرو عزاه
ولا معاه مناصب و وظايف وفلوس و دنانير بيوزعها عالناس عشان يحضرو .
.
الموت يا أخي له
هيبه و جلال , و القلوب بين إصبعين من أصابع الرحمن , و المحبه زرعه بتكبر لوحدها في
الصدور , لا ينفع معاها ترغيب ولا ترهيب , يعني ماينفعش تتحايل على حد و تغريه عشان
يحبك ولا ينفع تعذبه و تعلقه على عمود نور عشان يحبك .
.
أنا شخصيا ماحضرتوش
, لا حضرت حياته ولا موته ولا أوعى عاللي جه من بعده , إنما مشهد الجنازه تحديدا كل
مابشوفه بلاقيه بيختصر كتب كتير و مجلدات .
.
ممكن تختلف و نختلف
على حاجات معينه في حكمه و ننتقدها , لكن الأعمى بس هو اللي ينكر إن ربنا سبحانه و
تعالى رمى محبته للراجل ده في قلوب الغالبيه الكاسحه من المصريين .
.
يعيش جمال حتى
في موته .
..............................................................................................
Mohamed
Hussein
27
سبتمبر 2018·
نقول تاني , بالراحه
خالص
.
في 2013 يعني من
5 سنين كنت نزلت أجازه من السعوديه , قاعدين في شقه في عين شمس بعد صلاة الجمعه , و
فجأه سمعنا في الشارع هيصه و زمبليطه , طلعنا البلكونه نشوف فيه ايه ؟ لقيناها مظاهرات
ماشيه في الشارع بتهتف للإخوان و مرسي راجع و أي بطيخ , بصيت عليهم دقيقه بالظبط ,
مراتي قالت لي دول شباب الإخوان ؟ قلت لها لأ , دول شباب الألتراس ( أهلي و زمالك
) , و شرحت لها الحكايه ببساطه , دي طريقة هتافهم و دي طريقه رفعة ايدهم , لما ييجي
ماتش للاهلي أو للزمالك ابقى شوفيهم في المدرجات .
.
هي الحدوته ايه
بالظبط ؟ بص يا مولانا
.
أي تجمّع أو تكتل
له طاقه معينه بيتم استغلاله سياسيا , أي حماس في أي جهه بيتم استغلاله , زي ايه ؟
زي النقابات (ده تجمع ) , زي المساجد ( ده تجمع ) , زي الألتراس ( ده تجمع ) و المثال
الأوضح جدا اتحاد الطلاب في الجامعات ( ده تجمع ) .
.
في كل الحالات
بيتم استخدام التجمع و الحماس أيا مايكون نوع حماسك , يعني متحمس لمهنه معينه ؟ نصطادك
في النقابات و نستغل حماسك ده , متحمس في سن الجامعه نصطادك في اتحاد الطلاب , متحمس
لنادي معين ؟ نصطادك في الألتراس , متحمس للدين ؟ نصطادك في الجوامع و الجمعيات الخيريه
, متحمس للحريه ؟ نصطادك في ثوره .
.
و أدي كل الحدوته
, الفكر البريطاني الصهيوني مابيتغيرش , و جماعة الإخوان هما مندوبهم في مصر .
.
عبقرية الفكره
البريطانيه في إنها مش بتخلق لك حماس معين أو شخصيه معينه , كل اللي بتعمله انها بتدرس
حالتك , سلوكياتك , اهتماماتك , متحمس لإيه ؟ وبس كده , يعني تجميع بيانات و منها يعرفو
نقاط ضعفك , الحماس الشديد هتعتبره نقطه ضعف , الحماس بصفه عامه بيكون عامل زي السيل
الجارف , والشطاره انك تسيطر عليه و تحوّل السيل ده لخدمة اهدافك و مصالحك .
.
انا بحب الخطيب
جدا مع اني زملكاوي , الخطيب أصلا بلدياتي من السنبلاوين , و مابحبش مرتضى منصور مع
انه رئيس النادي بتاعي و بلدياتي برضه , و مش مرتاح لدخلة تركي من أول ماجه مصر ( مع
كامل احترامي لفكرة الإستثمار في الرياضه ) , و شايف ان الكوره ماتنفعش من غير جماهير
, بس الجماهير يعني البني أدمين , راجل و مراته و عياله , اتنين تلاته اصحاب , واحده
و خطيبها , مش كيان بيسيطر عليه كابوهات و بيتم تسيسه و استغلال حماسه ( و توجيه السيل
الجارف ) .
.
بالمناسبه , ألتراس
الزمالك زي ألتراس الأهلي , الكابوهات مسيسين , والشباب في الحالتين طيب و برئ و نازل
يشجع فريقه لكن بيتم استخدامه واستغلال طيبته و حماسه ( زي شباب 25 يناير و شباب الجامعات
و المصلين في المساجد )
.
مشكلة ماتشات الكوره
تحديدا انها متشافه و متذاعه عالهوا , لا ينفع فيها دوبلاج ولا مونتاج و لا دبرياج
, والغلطه فيها بفوره .
.
جمله صغيره مكتوبه
على لوحه في مدرجات وقت الماتش ممكن تعمل ازمه بين دولتين , قنبله صغيره تترمي وقت
الماتش ممكن تضرب لك النشاط الكروي سنين و توقف السياحه و الاستثمار .
.
الكيان اللي اسمه
ألتراس ( سواء أهلي أو زمالك ) ده اللي كتبته عنه في البوست اللي فات و شبهته بالديب
الصغير اللي بتربيه في بيتك ( في قصة الأعرابي ) .
.
يارب تكون الفكره
واضحه كده , و نعرف نفصل أبو قرش عن أبو قرشين .
........................................................................................................
Mohamed
Hussein
27
سبتمبر 2018·
لكل أصدقائي الأهلاويه
اللي فرحانين أوي باللي عمله الشباب الجميل بتاع الألتراس و هتافاتهم المسيئه , تعالو
احكي لكو حدوته :
.
كان فيه مره راجل
أعرابي ماشي في الصحرا و الدنيا بتمطر , الأعرابي لقى ديب صغير لسه رضيع بيتكتك من
البرد , قام صعب عليه و خده معاه للكوخ بتاعه .
.
الأعرابي كان عنده
معزه رابطها جنب الكوخ , بيحلبها و يشرب لبنها , بقى يقسم لبن المعزه بينه و بين الديب
الصغير الرضيع , و الديب بقى شويه بشويه بيكبر و يشرب لبن المعزه و يكبر .
.
لحد ما في يوم
من الأيام الأعرابي طلع الصحرا يصطاد كالعاده و الديب كان وقتها كبر أوي , رجع الأعرابي
للكوخ لقى الديب أكل المعزه !! ( اللي هي أمه اللي مرضعاه من لبنها ) .
.
يارب تكون الرساله
وصلت .
.........................................................................................................
Mohamed
Hussein
26
سبتمبر 2018·
سيرة ولازم تتقفل
.... الخطايا اللي ماعرفش عددهم كام .
.
أولا , إنك تخوض
في أعراض ستات ده فعل قذر و منحط , الخوض في الأعراض ملهوش مسمى غير إنه ( قذف محصنات
) و قذف المحصنات عقوبته عند ربنا أشد من عقوبة الزنا , يعني وانت قاعد بتهرتل بشوية
كلام و مش دريان تكتشف في الأخر ان الهرتله دي ألعن من الزنا .
.
ثانيا , التطاول
على شريحة معينه من المصريين , الفلاحين , بتوع الخضار , الكلافين , الزبالين , التطاول
والوصف بألفاظ منحطه ملهوش أي مسمى غير انه ( عنصريه ) ,و العنصريه مش باب من أبواب
التحضر, العنصريه عكس التحضر .
.
ثالثا , لما تكتب
بوست و اتنين وعشره باللغه العاميه و تلاقي صديق و اتنين و 100 بينصحوك و يقولو لك
الكلام ده لا يليق بلاش والنبي ترد و تبرر و تقول أصلكو مش فاهمين المعنى , اصل انا
اقصد سلوكيات , بقصد نوعيات , دي كمان خطيئه , خطيئة الاعتقاد بإن الناس لسه داّقه
عصافير على دراعها , و كأن بوستاتك دي مكتوبه باللغه الموزمبيقيه .
.
رابعا , انصر أخاك
ظالما أو مظلوما , قالو ننصره مظلوما فكيف ننصره ظالما يا رسول الله ؟ قال تكفّه عن
ظلمه !! ( ابقو اقرو الحديث للنهايه و النبي ) , و ده اللي بعمله دلوأتي .
.
خامسا , ثورة
52 فات عليها ييجي 70 سنه , و البشويه اتلغت و الطرابيش اتقلعت ( والحواجز اتشالت
), و بقى فيه حاجه اسمها مساواه و عداله اجتماعيه , ابن الوزير له صوت انتخابي زي ابن
الغفير, و ابن الملياردير زي ابن بياعة الخضار,وبما ان من حق كل واحد فيهم انه ينتخب
يبقى من حق كل واحد فيهم انه يقول رأيه في السياسه و حال البلد حتى لو رأيه ماعجبناش
( بالمناسبه مرسي كان استاذ جامعي بس كان خروف , و ابن بياعة الخضار ممكن يكون بيفهم
احسن مننا كلنا , و انا شخصيا لحد النهارده باخد الحكمه من أفواه العواجيز اللي عندنا
في البلد , الناس اللي عصرت الدنيا و اتعصرت معاها , مش من أفواه نيتشه و ديستوفسكي
و فيكتور هوجو )
.
سادسا , الفلاحين
اللي خرج من عندهم مرسي و بديع و أغلب قيادات الجماعه الارهابيه هما برضه الفلاحين
اللي خرج منهم فاروق الباز و ام كلثوم و السنباطي و فاتن حمامه و عبد الحليم و انيس
منصور و الأبنودي و عبد الناصر و السادات و ليسته لها أول و ملهاش أخر .
.
سابعا , أغلب الفلاحين
ماعندهمش حسابات عالفيس , كل اعمامي و اخوالي كده , يعني لا شاغلين بالهم بمين لبست
فستان شكله ايه ولا يعرفو ثورة كام قامت فين , ناس بتنام من العشا و تصحى الفجر تشوف
أرضها و زرعتها , مش فاضيين للهري بتاعنا , و يمكن تعبهم و عرقهم و زرعهم و حصادهم
( و عدم وجود فيس بوك عندهم ) كان له دور مهم في النجاه بمصر من مرحلة الطوفان .
.
ثامنا , الأغلبيه
الكاسحه من الفلاحين مابيحبوش عيشة المدينة ( كلٌ ميسر لما خلق له ) , حتى أمي الله
يرحمها اتحايلت عليها عشان تيجي تشوف شقتي في القاهره و تقعد معايا اسبوع ولا اتنين
و كان ردها , أنا ماقدرش اغيب عن بيتي ولا استحمل عيشتكو دي يوم واحد , انا حياتي كلها
في الأرض و شوية الفراخ و البط اللي بربيهم دول .
.
تاسعا , عايز ترفض
سلوك معين و تلعنه ؟ ده حقك تماما , بس استخدم مصطلحاتك صح , قول فكر داعشي , قول وهابيين
, قول خرفان جماعه ارهابيه , قول متخلفين عقليا , انما ماتقولش فلاحين و بوابين و زبالين
و تهرتل , زي ماهو ماينفعش نقول اهل اسكندريه صفتهم كذا و اهل القاهره كذا و اهل بورسعيد
كذا .
.
لكل أصدقائي الغاليين
اللي بحبهم جدا و بعتز بصداقتهم , مصر بلدنا مش مستحمله والله , رجاء محبه , توقفو
عن الخوض في الأعراض عشان نبقى بني أدمين , و توقفو عن العنصريه عشان نبقى برضه بني
أدمين .
.
حاجه أخيره عايز
اقولها , انا كتبت البوست ده وانا عارف اني ممكن اخسر أصدقاء و عشرة سنين , طب ليه
عملت كده ؟ عشان انا بعتز جدا بجذوري دي ( ومش عيب على فكره ان الناس تعتز بجذورها
بدون التطاول على الغير ) و عشان سبب مهم , الوعي و التحضر هو معركتنا الأساسيه , ماينفعش
نحارب الجهل بعنصريه , ماينفعش نحارب التخلف بتخلف مماثل ( بالمناسبه , صديقك مَنْ
صدقك , لا مَنْ صدّقك ) .
.
أما السبب الأهم
على الإطلاق هو شعور جوايا وصل حد اليقين , لما حسيت اني لو ماكتبتش اللي كتبته , أبويا
و أمي الله يرحمهم هيلعنوني في قبرهم , اللي بيموت عندنا بنسميه عضم التربه , و انا
كتبت و مستعد لأي خساره عشان خاطر عضم التربه .
.
تحياتي و احترمي
للجميع
............................................................................................................
Mohamed
Hussein
25
سبتمبر 2018·
وزير التعليم الجديد
و دماغه
.
وانا بجيب البنات
من المدرسه النهارده , في تالت يوم دراسه .
.
لوجي ( ساته ابتدائي
) : بابا انا دخلت في مسابقه
أنا : مسابقة ايه
؟
.
مسابقه تبع وزارة
التعليم لكل مدارس مصر , في قراية القصص , نقرا 50 قصه على مدار السنه و نلّخصهم ,
كل قصه نلخّصها في نص صفحه في دفتر مخصوص لكده .
- طب القصص هتجيبوها
منين يا لوجي ؟
.
هنستعيرها من مكتبة
المدرسه , نستعير قصه و نرجعها و ناخد قصه تانيه .
- طب و الدفاتر
اللي هتلخصو فيها القصص منين ؟
.
من مكتبة المدرسه
برضه .
- طب الإشتراك
في المسابقه بكام ؟
.
يا بابا الإشتراك
ببلاش و القصص ببلاش و حتى الدفاتر , و لما أقرا 50 قصه هدخل امتحان السنه الجايه في
الوزاره و لو فوزت هسافر دبي على حسابهم .
- دي فكره هايله
يا لوجي و كلها مكاسب .
.
ازاي يا بابا ؟
مانا ممكن مافوزشي في المسابقه , أصلا مصر كلها اللي هيفوز منها يمكن 1 ولا 5 ولا
10 , هبقى كسبت ايه ؟
- هتبقى كسبتي
انك قريتي 50 قصه و كتاب و عرفتي تلخصيهم بخط ايدك , يعني ثقافه أكتر وفكر أكتر و لما
تلخصي القصه من دماغك هتبقى ثقتك في نفسك أكبر و شخصيتك أقوى , و هو ده اللي بيعمله
الوزير
.........................................................................................................
Mohamed
Hussein
25
سبتمبر 2018·
كلمتين و بس
....................حالنا و محتالنا
.
همجية ناحية اليمين
يقابلها همجية ناحية الشمال , عنصريه يمين و عنصريه شمال , و تعالى بقى نشوف مين همجي
اكتر و عنصري أكتر .
.
أنا يابني عايز
أعلمك التحضر , صح هعلمهولك بطريقه عنصرية بس مش مهم , مش انت فاكر نفسك معاك صكوك
الجنه والنار ؟ أنا كمان معايا صكوك التحضر و التمدن , انتو جهله و رعاع و أوباش و
بوابين و زبالين , وانتو فاسقين و ماجنين و ديوثين و كفره و ملحدين .
.
اسكت يا جاهل ياللي
بقيت تشيل موبايل زينا و عايز تناطحنا راس براس .
وانت اسكت يا فاسق
يا ديوث ياللي مراتك بتقول لزميلها صباح الخير في الشغل.
.
انت أبوك كان قائد
طابيه ؟ لأ ؟ تبقى مش متحضر ولا من مستوايا .
وانت أبوك كان
بيلبس جلابيه قصيره و يسمع شرايط عبد الحميد كشك ؟ لأ ؟ تبقى مش متدين ولا من مستوايا
.
.
اتنين بيتخانقو
يا مولانا على كشك سجاير , مين اللي هيديره ؟ واحد أعمى و واحد مشلول , الأعمى قال
للمشلول أنا اللي هدير الكشك ده لأنك مابتعرفش تتحرك من مكانك , قام المشلول قال له
, يعني انت اللي هتعرف تشوف طلبات الناس يا راجل يا أعمى ؟!.
.
مبارك عجنها في
بعضها عجن , و مخلّاش لها ملامح ولا طعم ولا هويه , وبقى السؤال اللي بيطرح نفسه ,
هي مصر فين بالظبط ؟ فين ال 7000 سنه حضاره ؟ ولّا الجمله دي بقت أكلاشيه بنلطعه على
صفحاتنا و بؤ بنقوله في وقت الفراغ ؟ و الله يا سيدي لو عايز تعرف مصر فين والموضوع
شاغلك أوي , ابقى دور عليها وسط الكراكيب .
.
أنا لو هحمد ربنا
مليون مره على نفس الحاجه , هتبقى بحمد ربنا إن عندنا جيش عظيم قدر يشيل الليله دي
كلها وقت الأزمه و الطوفان .
.
مصر لو كانت اتسابت
لنا بعقولنا دي و بأجيالنا دي و أمراضنا النفسيه دي كان زمانا خرّطناها للبط , وعلى
فكره , مش أي بط والسلام , لأ حاسب , كل واحد هياخد حته و يخرّطها للبط بتاعه , ماهو
البط المتدين اللي معاه صكوك الجنه غير البط التاني اللي معاه صكوك التحضر ,طب بذمتك
بذمتك , بطتي أحلى ولا بطّتك ؟! .
.
رأيي من سنين مش
هغيره , المعركه الأهم و الأخطر اللي قدام عبد الفتاح السيسي هي معركة العقول و الهويه
, إزاي نبقى مصريين و بلد حضاره فعلا ؟ إزاي ننضف العقول من السباخ و الفكر الإرهابي
و إزاي ننضف العقول التانيه من الأنعره الكدابه و عوجة اللسان , إزاي نجيب بلالين مليانه
ديناميت و بلالين مليانه هوا و نحوّلهم لاتنين بني أدمين !! .
..........................................................................................................
Mohamed
Hussein
24
سبتمبر 2018·
مجرد ترشح صلاح
للبالون دور ده انجاز ماوصلش له اي لاعب عربي ولا حد هيوصل له (غير صلاح ) ولا حتى
بعد 500 سنه .
.
يكفيك يابني تبقى
واحد من أفضل 3 لاعبين في العالم السنادي , حتى لو مافوزتش بالجايزه الأولى , لسه قدامك
سنين تلعبها و تمتعنا و تقف في نفس المكان ده تاني و تالت و رابع و ترجع و في إيديك
الحلم , حلمك و حلمنا .
............................................................................................................
Mohamed
Hussein
24
سبتمبر 2018·
أردوغان خليفة
الشواذ هيتجنن بسبب اللي بنعمله في البحر المتوسط , و اتفاقيات ترسيم الحدود و التنقيب
عن الغاز و أخر حاجه جننته هي خط الغاز اللي هيجي من قبرص لمصر عشان تتم إسالته في
مصانعنا .
.
الغاز والبترول
و الكهربا اسمهم على بعض كده مصادر الطاقه , و لما تمتلكها و تحقق فيها اكتفاء ذاتي
و تصدير تبقى امتلكت نص قوتك الإقتصاديه , و ده اللي هيجنن خليفة الشواذ .
.
طب ليه أردوغان
لسه لحد النهارده فاتح قنوات للخرفان اللي هربانين عنده و بيصرف عليهم و يعلفهم هو
و الشاذ ابن موزه ؟ هل عشان مرسي يرجع أو راجع أو هيرجع ؟ لا يا مولانا , خالص , نهائي
, هما و الخرفان عارفين و متأكدين ان قصة مرسي دي انتهت من زمان .
.
أومال ايه السبب
؟ السبب انه يفضل عندك دايما شوكه في زورك , وقت الحرب الحاليه اللي بنخوضها ضد الإرهاب
أهم بيشوّهو في بلدك و جيشك على قد مايقدرو و بيجملو في وجة الإرهاب القبيح , و لو
دخلنا في حرب عسكريه مباشرة مع تركيا هنبقى عسكريا الكفتين متعادلين , و نتميز عليهم
بالشجاعه و ثقافة الحروب و مفهوم التضحيه ( احنا جيشنا مابيقلعش ملط ولا جيش من المرتزقه
زيهم ) , الحاجه الوحيده اللي هيتفوقو علينا فيها هي الخنجر اللي في ضهرك , نص مليون
عضو رسمي في التنظيم الإرهابي الدولي , عايشين وسطينا و في شوارعنا و بيوتنا و مصالحنا
الحكوميه , تخيل دورهم ممكن يكون ايه وقتها ؟
.
الخروف اللي في
حربنا ضد الإرهاب من سنين مستعد يفتح بيته و شركته و مخزنه عشان يبقو مستودع أسلحه
أو تدريب و إيواء للإرهابيين زمايله , ممكن يعمل ايه لو دخلنا في حرب نظاميه معلنه
و صريحة ضد خليفة الشواذ ؟
.
عشان كده انا واحد
من الناس مؤمن تماما إن فيه تهمه اسمها ( الإنتماء لجماعه إرهابيه محظوره ) , أه دي
في حد ذاتها تهمه , مجرد انتمائك بيعني انك قنبله موقوته , مش ضروري نستنى لما تنفجر
عشان يبقى في إيدينا دليل ملموس .
.
أه بالمناسبه
, لو حصل و مصردخلت حرب مع بهلول اسطنبول ( مابننجرش لحرب بسهوله لكن ممكن تُفرض علينا
) إنما لو حصل و أردوغان عايز يستخدم مطارات قريبه من مصر مش هيلاقي احلى ولا أجمل
من مطارات تل أبيب , و وقتها القرضاوي و كل قيادات الخرفان هيرّحبو و هيقولو التالي
( لا بأس , فاليهود أبناء عمومتنا , أما الجيش المصري فهو جيش صهيوني !! ) , يابني
ابقى صدق لما أقولك انهم بيرضعو زباله و كدب و نطاعه و خيانه و وساخه من يوم ما يتولدو
.
.......................................................................................................
Mohamed
Hussein
23
سبتمبر 2018·
حكاوينا 2
..... المره الوحيده اللي أمي زعقت لي فيها و شتمتني .
.
كنت في تالته ثانوي
, بذاكر بشكل بشع , حاسس إني في معركه , عايز أفرح الراجل ده و الست دي , انام عالترابيزه
وانا بذاكر مش عالسرير , أذاكر وسط الأراضي و انا ماشي والكتاب في ايدي , أذاكر و انا
رايح الجامع أصلي , و أذاكر و انا راجع ( من غير كتاب ) , إنما أراجع فصل معين من ماده
معينه .
.
المهم , كان عندنا
دراس للرز , الرز بتاعنا محطوط في جُرن بعيد شوية عن البيت , و الدرّاسه اللي هي الأله
اللي بتدرس الرز جت , أبويا الله يرحمه واقف عالدرّاسه من فوق بيغذّيها رز ( رز بالقش
بتاعه ) و أمي الله يرحمها ورا الدرّاسه بتلم الرز اللي يطلع و تعبيه في شكاير , و
أنا طبعا الحمار اللي هيشيل الشكاير يوديها البيت .
بدأت أمي تعبّي
الشكاير و الدرّاسه شغاله , و تقولي دي وديها عالكوم الفلاني اللي في الأوضه , قررت
أذاكر برضه وانا شايل الشيكاره على ضهري و ماشي , أراجع أي حاجه , اهو بتسلى , حمار
شايل الرز على ضهره و بيراجع نظرية أرشميدس مثلا .
.
شكاير الرز اللي
حوّلتها كلها كانت رز نضيف و جودته حلوه , فيه شوية رز بيطلعو مش حلوين ولازم ينفصلو
في مكان لوحده , أمي نبهتني ان الشكاره دي تتحط في جنب لوحدها , في جنب لوحدها يا محمد
, يا محمد في جنب لوحدها , وانا اقول ماشي و حاضر , معرفش في الوقت ده قررت أتنيل و
اراجع ايه بالظبط و سرحت و نسيت , و روحت قلبت شكارة الرز الوحش عالرز الحلو , و دي
طبعا كارثه في حد ذاتها .
.
أمي عرفت و زعقت
لي و شتمتني , و بعدين لما روّحنا و خلصنا دراس شرحت لها الأسباب و الحيثيات و الدوافع
و حلفت لها اني كنت بذاكر وانا ماشي يعني مفيش سبق إصرار ولا ترصّد , فتقريبا صعبت
عليها و أصدرت حكم بالعفو عنّي , و قالت خلاص هغربله كله تاني الله يسامحك ( على فكره
ده كان محصول نص فدان , يعني غربلته هتحتاج 3 أيام متصله عالأقل , HARD WORK ) .
............................................................................................................
Mohamed
Hussein
22
سبتمبر 2018·
حكاوينا
................ حكاية الجمل
.
لما اتولدت و فتحت
عيني عالدنيا لقيت اننا عايشين في بيت من الطين ( الطوب الني ) , البيت كان عباره عن
4 أوض , كل أوضتين في وش بعض , و كل راجل و مراته و عياله في أوضه ( أبويا و أمي و
5 عيال في أوضه , أختي الصغيره خالص كانت لسه ماتولدتش ) .
.
بعد الأربع أوض
فيه حمام عالشمال و أوضة معيشه عاليمين , و بعدين زريبه كبيره , الزريبه فيها قطيع
من الخرفان , أكتر من 20 و شوية فراخ بيتنططو حواليهم , و حماره بيضا و حماره حمرا
( بُنّي ) و جمل .
.
كل الحيوانات دي
بتخرج من الصاله ( اللي بين الأربع أوض ) الصبح بدري و تدخل المغرب من نفس المكان
.
.
المهم الجمل ده
كان دوره ايه بقى ؟ كان وسيلة لنقل المحصول في موسم الحصاد , يعني الرز و الغلّه و
الدره و الحطب و خلافه , الجمل أنا شوفته و هو بيتحمّل عليه الحِمْل , بيشيل تقريبا
قد عربية ربع نقل , و ميزته انه مش محتاج سكه او طريق واسع زي العربيه , بيمشي على
أي مشايه صغيره و على ريشة الأرض و يدوس في أي حته ولا يهموش .
.
أبويا الله يرحمه
كان عفي و لما بيتعصب بيضرب جامد , في مره من المرات و هو سارح بالجمل ضربه جامد عشان
ينخ , و الجمل فضل شايلّه الموقف ده , لحد بعدها بكام يوم كان أبويا بيشتغل في الأرض
و الجمل معاه و مفيش حد من اخواته , يعني أبويا لوحده .
.
الجمل لقى ان ده
الوقت المناسب للثأر , و مسك أبويا من رجليه و علّقه في الهوا و بقى يلّفه زي المروحه
( قوة الجمل مرعبه ) , ابن عمه كان بيشتغل في أرض جنبهم و شاف المنظر و طلع جري , ضرب
الجمل على حنكه بفرع شجره لحد مانّزل أبويا و هو طبعا بينزف بغزاره , الجمل جري و هرب
في بلاد بعيده بس عرفو يجيبوه , و ابن عم أبويا شال أبويا على كتفه مسافه بالظبط 3
كيلو لحد ماوصله البيت , بعد ماربط له الجرح.
.
جدي الله يرحمه
عالج أبويا و رفض إن حد يضرب الجمل أو يعاقبه بس في نفس الوقت حلف إن الجمل ده مايدخلش
البيت تاني , و باعوه فعلا .
..................................................................................................
Mohamed
Hussein
22
سبتمبر 2018·
بين الثرى و الثريا
, زمن العمالقه و زمن الأقزام
.
بقالي كام يوم
بتابع مسلسل أم كلثوم على يوتيوب , ماعرفش بشوفه للمره الكام , أم كلثوم بالنسبالي
مش مجرد مطربه شهيره أوي , ولا كوكب الشرق ولا الهرم الرابع , أنا بشوفها دوله كامله,دوله
لها تاريخ و حضاره و طعم و هويه و جذور و ملكوت , ممكن نقول دولة مصريه صغيره .
.
المهم يا سيدي
و انا بتفرج بسرح و بعمل مقارنات و ربط غريب , في المره الأخيره وقفت عند مشاهد معينه
, بعد نكسة 67 و تنحي عبد الناصر و بعدين نزول الشعب يطالبو بالرجوع و رجوع ناصر ,
و استدعاؤه لأم كلثوم اللي كانت قررت تبطل تغني وقتها , و لما قال لها انتي لازم تغني
و احنا هنحارب و دورك مايقلش عن دور أي جندي في الحرب دي , و تقرر أم كلثوم السيده
المصريه انها تغني أغاني أغلبها وطنيه , و هي عارفه ان الأغاني دي مش هتحقق نجومية
أغانيها الباقيه لأنها مرتبطه بمرحله معينه و فترة إعداد للحرب .
.
هتغني ازاي ام
كلثوم ؟ عالمسرح في القاهره أول خميس من كل شهر زي ماهي متعوده ؟ لا , هتلف محافظات
مصر و تروح للناس في قلب مدنهم , و تعمل حفلات مجانيه و تجمع تبرعات من أثرياء كل محافظه
(و كله للمجهود الحربي ) .
.
اصبر عليا بس عشان
تستوعب المشهد , في الوقت ده كانت أم كلثوم داخله على 70 سنه , و صحتها مستحيل تكون
زي الأول , هتركب قطر يمشي بيها 10 ساعات عشان توصل لمحافظة كذا و تغني ؟ مش يمكن عايزه
فلوس ؟ لا دي حفلات دخلها كله للمجهود الحربي .
.
مش يمكن عايزه
نجوميه ؟ هنا لازم حضرتك تقف و تقف انتباه كمان , شهرتها قبل اللحظه دي ممكن أقولهالك
في كام جمله , رئيس بريطانيا رفض انها تتعالج عندهم عشان فيه نسبة خطأ في العمليه حتى
لو 1 % و قال مانقدرش نتحمل المسئوليه دي , عبد الناصر يكلم رئيس أمريكا عشان يعالجو
أم كلثوم , رئيس فرنسا يرد على برقيتها بعد ما غنت في باريس و يوصفها بأعظم الصفات
, لما كانت تسافر دوله عربيه كانت بتتعامل معاملة رئيس دوله , نجومية ايه تاني اللي
تحتاجها ام كلثوم الست اللي بقى عمرها 70 سنه؟ و ايه يدفعها للمرمطه و البهدله و اللف
عالمحافظات و المدن ؟ هي اجابه واحده , عشان كانت مصريه للنخاع و عملاقه في فنها ,
و العملاق بتبقى قضية بلده هي قضيته .
.
سرحت في الحكايه
دي وانا بشوف حال الفنانين و اللامؤاخذه النخبجيه في اخر كام سنه , مصر في حرب أسوأ
بكتير من حرب الاستنزاف , و مكانش مطلوب منهم يعملو حفلات مجانيه ولا يلفو كعب داير
عالمدن عشان يوعّو الناس و يحمسوهم , مكانشي مطلوب اكتر من إنهم يكتبو على صفحاتهم
في مواقع التواصل ويقفو جنب بلدهم , مكانشي مطلوب اكتر من انهم يعملو أعمال فنيه لنفس
الغرض و الغايه ( و يا سيدي ماتكونشي مجانيه ولا حاجه ) , هل ده حصل ؟ هل نخبجية مصر
وقفو جنب بلدهم و هي بتحارب ولا مارسو النطاعه و المرقعه و كانو عبء و عاله على دولتهم
إلا من رحم ربي ؟!
.................................................................................................................
Mohamed
Hussein
21
سبتمبر 2018·
معقوله حضرتك ماتعرفش
الفنان العظيم و الأسطوره السينمائيه و المسرحيه أحمد مالك ولا تعرف أعماله الفنيه
الخارقه المبدعه التي حملت شعلة النور في بحر الظلمات ؟
- لا والله يابني
ماعرفه ولا حد يعرفه و خالته ذات نفسها بتتلخبط في اسمه .
.
مانا توقعت كده
, عشان انا كمان ماعرفوش و عهد الله
- طب ليه يكون
عضو لجنة تحكيم في مهرجان سينمائي دولي ؟
.
بص حضرتك هو أنا
فكرت في الموضوع ده كتير مالقيتش غير حل واحد
- ايه هو بقى ؟
.
عارف الناس العباقره
اللي بيبقو سابقينا بمليون فدان , اللي تلاقيه مثلا ألف كتاب مفهوش ولا كلمه أو كتب
مقاله فاضيه او بوست مفهوش ولا حرف ؟
- اه عارفهم .
.
ممكن يكون اختيار
احمد مالك تم على هذا الأساس , لأنه ماعملش أي عمل فني عليه القيمه , يعني مجرد صفر
.
- ازاي مش فاهم
؟
.
عبقرية أحمد مالك
تكمن في انه ماعملش أي حاجه تخص الفن و الإبداع , يعني صفحته الفنيه بيضا ( أو بيضه
) .
- اه ممكن والله
, بس ماهو عم محفوظ بتاع الجراج ماعملش أي عمل فني عليه القيمه ولا حد يعرفه , ليه
مايخدوش عم محفوظ عضو في لجنة التحكيم ؟
.
ده برضه سؤال وجيه
, إنما قولي , هو عمك محفوظ بتاع الجراج جاب واقي ذكري ونفخه و عمله بلالين و نزل يتريأ
بيه عالعساكر الغلابه ؟
- أكيد لأ .
.
خلاص يبقى مش من
مستواهم
- هما مين دول
؟
.
ولاد الوسخه اللي
بيعملو للزباله سعر و قيمه .
...........................................................................................................
Mohamed
Hussein
21
سبتمبر 2018·
يا جني يا جني
يابن الجنّي
- أيوه عايز ايه
؟
.
يابني اسمها شبيك
لبيك
- طب شبيك لبيك
, عايز إيه ؟
.
بص
- بصيت أهو
.
أنا البنات عندي
من أول الصيف بينامو 7 الصبح و يصحو 7 المغرب
- ها و بعدين ؟
عايزني أجيب لك منبه على حسابي ؟
.
لا يا ناصح ,عايزك
تقلب مواعيد نومهم و تبقى من 7 المغرب ل 7 الصبح
- ده امتى سيادتك
؟
.
النهارده و بكره
عشان المدرسه هتبدأ بعد بكره
- طب بص انت
.
بصيت أهو
- أنا ممكن اجيب
لك مزرعة فاكهه ( جنينه ) مزروعه كلها جوافه من اللي انت بتحبها و تكون بتطرح صيف و
شتا و أعمل لك جواها فيلا صغيره كده و بيسين و أجيب لك كيم كارديشان تبات معاك في الجنينه
( في الجونينه ) .
.
جميل أوي , موافق
- و ممكن أخلي
الزمالك يفوز بالدوري سبعتاشر سنه متصله
.
أيوه موافق
- و أخلّي ريهام
سعيد و أيمن يونس كوميديانات فشر أحمد حلمي و أحمد مكي
.
جميل جدا , موافق
برضه
- و أخلي شمامين
الكوله يبطلو هبد و هري و يبطلو يتركبو من الخرفان
.
رائع , موافق طبعا
, بس ماقولتليش هتعمل ايه في الموضوع اللي طلبته منك ؟
- موضوع ايه ؟
.
.
موضوع إنك تشألب
نوم بناتي و تخليهم ينامو المغرب عشان يصحو الصبح
- شوف سعادتك
, أنا هقولك الحقيقه , انا أصلا عفريت تحت التدريب و مش متثبت , بس لو أصريت على طلبك
ده يبقى هستقيل و أطلع معاش مبكر و ألبس جلابيه بيضا و أقعد في بيتنا .
............................................................................................................
Mohamed
Hussein
21
سبتمبر 2018·
السفير البريطاني
في العراق بيقول إنه دعى سعادة السفير الإيراني و اتباحثو حول أوضاع العراق و اتفقو
إن الحكومة العراقيه الجايه تحسن الخدمات و تقدم وظائف للمواطنين !! .
.
السطرين اللي فوق
دول هما المعنى الحرفي للإهانه و الذل
.
لما دولة بعظمة
و تاريخ و حضارة العراق يتحكم فيها كلاب السكك و يختارو حكوماتها و يرسمو سياساتها
.
.
لما جيشك بيقع
بيتلم عليك كل الصيع و الأوباش و عربجية التاريخ , و يتباحثو و يتفقو و يختارو لك كل
حاجه حتى اللقمه اللي هتاكلها و الهدمه اللي هتلبسها , و بريطانيا تقول و إيران ترسم
و تركيا تغنّي و أمريكا تعزف عالعود , و مش بعيد حتى قطر بنت الوسخه ( اللي هي كشك
عالخليج ) تشد كرسي و تقعد و يبقالها دور .
.
لما جيشك بيقع
يبقى أي قرد معدّي في الشارع هيتنطط عليك .
.
لما جيشك بيقع
بتبقى سيادتك على أراضيك مش موجوده , و سيادتك في قرارك مش موجوده , يعني باختصار بتبقى
سيادتك مش سيادتك .
.
بنشتري سلاح ليه
و بنحدث جيشنا باستمرار ليه و ليه بنقف في ضهر جنودنا و ظباطنا ؟ عشان يا نطع مايجيش
علينا يوم و نقرا خبر زي اللي فوق ده عن مصر , عشان مايجيش يوم و يتنطط علينا كلاب
السكك و القرود و حتى الصراصير و يختارو لنا لقمتنا و هدمتنا و معاد نومنا و خط سيرنا
و أسماء عيالنا
.............................................................................................................