Mohamed Hussein
31 يوليو 2019·
يقول تولستوي , إذا أزعجتكَ ذبابه و أردت أن تتخلص منها , فأنتَ لستَ مضطراً لجلب كتيبه من الدبابات و الصواريخ , كل ما عليك فعله هو أن تشتري ريد بتاع الدبّان و ترش منه كداهو,فسسسسسس .
.
محدش يضرب , محدش يضرب , إحنا لسه مغلوبين من الأهلي من كام يوم و خسرانين الدوري من إسبوع , يعني ظروفنا صعبه أقسم بالله , بس إيه رأيكو فيا و أنا عميق كده في نفسي و في أحشاء ذاتي ؟.
........................................................................................................
Mohamed Hussein
31 يوليو 2019 ·
مصر البهيه العفيه , سر المعبد , اللغز اللي حيّر الأعادي , و اللقمه اللي بتقف في زور كل خاين
.......................
مشهد الخلود
هديل ماجد : ممكن أطلب من حضرتك طلب يا سيادة الرئيس ؟ أنا بتمنى ان حضرتك تسمع صوتي
عبد الفتاح السيسي : انا نفسي أسمع صوتك , نفسي أسمع صوتك .
.
هديل : هغني مقطع من أغنية لأم كلثوم , مصر تتحدث عن نفسها
هديل : عايزه مايك
.
هديل بتغنى : وقف الخلق ينظرون جميعا كيف أبني قواعد المجد وحدي و بناة الأهرام كفوني الكلام عند التحدي , أنا تاج العلاء في مفرق الشرق و دُرّاته فرائد عقدي , إن مجدي في الأولياتِ عريقٌ , من له مثل أولياتي و مجدي ؟! .
.
الحضور : تصفيق حاد
عبد الفتاح السيسي يقوم يقف و يطلع عالمسرح يمسك إيد هديل و يمشي بيها
الحضور والوزراء والمسئولين يقومو يقفو ( ماهو رئيس الدوله وقف , و ده اللي إسمه الإحترام , انت في دولة عريقه مش في طابونه )
هديل ل السيسي : عايزه أسلم على حضرتك و أتصور مع حضرتك ؟
...................................
في المشهد نجوم و أبطال و قصة و حدوته
أم كلثوم : كوكب الشرق و هرم مصر الرابع
حافظ إبراهيم : شاعر النيل
مصر تتحدث عن نفسها : قصيدة بعظمة مليون ديوان لفيكتور هوجو و مليون لوحه لبيكاسو .
.
أم كلثوم و حافظ إبراهيم جزء من قوة مصر الناعمه , و مع إنهم مجرد جزء لكن أهميتهم و تأثيرهم يساوي ألف ضعف للكشك القطري بغازه بملياراته بشوية الصيع اللي بيصرف عليهم .
.
هديل ماجد : بنت مصريه جميله تلقائيه بسيطه , خضره زي أرضنا الخضره
عبد الفتاح السيسي : بني أدم مصري مخلص بدرجة رئيس دوله
..........................
خلاصة المشهد
مصر ماتنهزمش أبدا , أبدا أبدا , طول ما تاريخها فيه أم كلثوم و حافظ ابراهيم , و حاضرها فيه جندي واقف عالحدود و بنت اسمها هديل واقفه عالمسرح و رئيس دولة بيطلع عشان يمسك إيديها و يسندها
..........................................................................................................................
Mohamed Hussein
30 يوليو 2019 ·
شمره و شرشيره و شرشره و أوشبره و شضايه , و جمال حرف الشين , و مايه بتجري في قنايه و سد بنعمله من الطين , القطن كاسي العود و كل عام بيعود , أبيض كأنه فستان عروسه فوق الخَضار مفرود , أسامينا سيد و سلامه ونعمه و سيده و حسين , مش لؤي و باسل و أسامي مانعرف جابوها منين , والضحكه مالقلب طالعه مش ضحك ماسخ ولا ضحك عالزبون , كانت أيام بقى , أيام ماكان لنا شكل و طعم و معنى و لون , طب و شبكة العشره دول , مكانتش طفوله فقيره ولا القصه قصة عيش حاف , دي كانت جنه يا مولانا و كاملة الأوصاف ..
..................................................................................................
Mohamed Hussein
29 يوليو 2019 ·
هذا و قد صرحت السيده ( هبه ) مديرة العلاقات العامه بفندق العلمين أنه لا صحة لما تداوله البعض من أن تكلفة الإقامه في الفندق ل 6 ليالي هي مليون جنيه مصري , و قالت السيده هبه أن السويت في الليله الواحده ب 42 ألف جنيه , و في 6 ليالي ب 252 ألف جنيه , يعني ربع مليون جنيه فقط مش مليون جنيه كما يشيع البعض .
............................
مممممممممم أيوه كده يا أنسه , دانا كان قلبي هيقع والله , ربع مليون غير مليون برضه , دلوأتي بقى أقدر أتشجع و أقولك عايز أحجز لو سمحتي
- حضرتك هتحجز عندنا في فندق العلمين ؟
.
أيوه طبعا
- عايز سويت ؟
.
بالتأكيد يا أنسه .
- أحجز لحضرتك 6 ليالي ؟
.
لا يافندم , انا فلوسي يادوب تجيب 3 دقايق ونص , لو سمحتي احجزي لي 3 دقايق و نص عندكو في السويت رويال , هجيب العيال و أجي أعمل تشيك إن و أفتح باب السويت و أقفله ورايا تاني بسرعه عشان ألحق أعمل تشيك أوت , لو سمحتي خلي عثمان يجيب الشنط من العربيه , أيوه كده , خليه يرجعها تاني بقى .
.......................................................................................................................
Mohamed Hussein
29 يوليو 2019 ·
·
بنتين بلدياتي , من السنبلاوين
.
الأولى بدأت مشوارها و هي طفله عمرها 6 سنين , إنشاد في الأفراح و الموالد , لفّ على كعوب رجليها بين القرى و المدن وبعد شويه بقت تلف و هي راكبه حمار, و مشيت و كبرت , و كبرت و عليت , وطلعت لفوق لحد مابقت كوكب الشرق و سيدة الغناء العربي و هرم مصر الرابع , الست دي اللي صوتها و أنغامها و اهاتها شهدو على ملايين من قصص الحب و الغرام في الوطن العربي من شرقه لغربه , ولسه بيشهدو , الست اللي بقت تتعامل معاملة الملوك و رؤساء الدول , حتى جنازتها كانت جنازة ملكه و مش أي ملكه , دي مش ملكه بالوراثه ولا بشهادة الميلاد ولا عشان كانت بنت الملك الفلاني , طريق طويل أوي , من أول مولاي كتبت رحمة الناس عليك , لحد مكه و فيها جبال النور , و أوقاتي بتحلو اللي مالحقتش تغنيها عالمسرح .
.
و التانيه اللي أول مره تدخل فيها السيما و هي عيله صغيره , ولقت الناس بتسأّف لظهور البطله على الشاشه , قالت لابوها ( أنا حاسه إن الناس دي بتسأّف لي !! ) , بدأت برضه و هي طفله و لما بقي عمرها عشرين سنه بقى يتقال عليها عملاق تمثيل , تشوفها في أي فيلم أو مسلسل و معاها كتيبة نجوم بس ماتحسش بوجودهم , ماتشوفهمش , في الباب المفتوح ( مش هتلاقي حسن يوسف و محمود مرسي و صالح سليم , لأن فاتن حمامه موجوده ) و لحد أفواه و أرانب ( مفيش فريد شوقي و محمود ياسين , انتو متأكدين يا جدعان انهم موجودين في الفيلم ؟ أنا مش شايف غيرها ) , و كبرت البنت , كبرت أوي , لحد مابقت سيدة الشاشة العربيه .
.
رأيي الشخصي , أم كلثوم في الغنا و الطرب و فاتن حمامه في التمثيل ماينفعش يتقال عليهم نجوم و سوبر ستار و الألقاب اللي بقت سداح مداح و بتتقال لأي حد , لأ , هما في حتة تانيه خالص بعيدة عن بقية خلق الله , هما في جزيره وسط محيط , جزيره ماينفعش توصل لها وانت ماشي على رجليك ولا توصل لها بعربيه ولا بمركب ولا بطياره , محدش أصلا يعرف يوصل هناك
................................................................................................................
Mohamed Hussein
28 يوليو 2019 ·
انتو يا زملكاويه انتو ؟ أيوه انتو , أقسم بالله أنا زهقت من كتر التحفيل عليكو و مبقاش في وشكو حته سليمه ينفع أضرب فيها
- يا عم انت زملكاوي , انت نسيت ولا ايه ؟
.
يابني مانسيتش ولا حاجه , انا بقول كده بس عشان محدش ياخد باله مني , دي قاعده معروفه في علم النفس , بتقولك لو ماشي مع صاحبك في الشارع و صاحبك ده دخل خناقه ولقيت الطرف التاني أقوى بكتير , اضرب صاحبك معاهم عشان تخرج منها سليم .
..................................................................................................................
Mohamed Hussein
27 يوليو 2019·
قصه مصريه قصيره
.
- أستاذ سيد بيه راجل خمسيني متجوز و عنده بنتين و ولد .
.
- أستاذ سيد بيه خد مراته و الولاد و قالو نطلع لنا مصيف اسبوعين أهو نغير جو و نبلبط شويه في المايه .
.
- قبل مايروحو المصيف فاتو على محل بيبيع مايوهات , جابو مايوهات جديده لعدد 5 أفراد , بقيمة 1500 جنيه , كان عليهم عرض حلو .
.
- أستاذ سيد بيه دفع للقريه السياحيه 25 ألف جنيه في الإسبوعين و بلبط هو و الحاجه و الأولاد في البحر و البيسين , و صرفو قد 7 ألاف جنيه زياده جوه القريه , شاي و قهوه و بيناكولادا و حلبه حصى و شيبسي لحماده .
.
- أستاذ سيد بيه و السيده حرمه و الأنجال رجعو من المصيف بعد ما أخدو التان و هما داخلين القاهره لمحو فرع لكارفور من بعيد , الحاجه قالت له يا سيد أنا سمعت ان كارفور عامل عرض عالحبهان و دبس الرمان , استاذ سيد بيه ماكدبش خبر و الحاجه نزلت هي و الولاد , ملو العربيه طلبات للبيت و الغيط و الجيران و اشترو فواحات و معطر جو و جبنه ولحمه و سمك و توت برازيلي و خوخ ماليزي و خيار ألماني ( عليهم عرض ) و عند الكاشير طلع الحساب 5700 جنيه .
.
- و هما ماشيين في كارفور , الواد حماده موبايله الأيفون وقع فالشاشه اتكسرت , حماده عيط و اتشحتف , مامته الحاجه قالت له ولا يهمك يا حماده , فداك ألف موبايل, الحاج سيد طبطب على حماده ابنه لانه الواد الحيله والوريث و قال له قبل مانرجع البيت هكون مغيّرلك الشاشه , لجل حظهم كان فيه محل موبايلات في نفس المول و حماده غير الشاشه بتاعة موبايله ب 1700 جنيه بس ( كان عليها عرض ) .
.
استاذ سيد بيه رجع بيته و شال هو و الولاد الشنط و معاهم عم عبده البواب , و طلعو فوق فتحو باب الشقه , لقو خير اللهم اجعله خير , كعب فاتورة كهربا , عامله 452 جنيه ( عشان عندهم تكييف بيشغلوه ) , أستاذ سيد بيه مسك الكعب في ايديه و برّق و تنح و تصبب عرقا و قعد يسب و يلعن في البلد و المغول و الفرنساويين و العيشه و اللي عايشينها , وقام مصوره و منزل الصوره على صفحته عالفيس بوك و كتب فوق منها ( هنجيب منين يا كفره ؟! ) .
................................................................................................................
Mohamed Hussein
27 يوليو 2019 ·
لوجي بنتي بعد ما بعتت لها أغنيه لأم كلثوم تسمعها من كام يوم , النهارده بعتت لي الفيديو ده , جيل بيجيب من الاخر وفيديو بيختصر الحدوته
.
أب اللي هو أنا بيلعب دور أحمد زكي ( و يا بنتي لازم تسمعي أم كلثوم و الطرب الأصيل و تنضفي ودنك من أغاني المهرجانات )
و بنت من جيل مختلف بتلعب دور سعيد صالح ( كلّمنا بالشيعبي ) .
و غالبا الأم في المشهد هي يونس شلبي ( عاطف ) .
..................................................................................................................
Mohamed Hussein
26 يوليو 2019 ·
إعترافات فيسبوكيه
.
- أول ما عملت صفحتي دي من 10 سنين , كنت بغير أوي لما ألاقي واحد بيكتب بوست و يتعمل له 11 لايك عليه , و أقعد اقول في نفسي , ابن مين في مصر ده عشان ياخد 11 لايك ؟ ( بصوت سعيد صالح في هاللو شلبي ) , تلاقيه معاه واسطه جامده أو له حد قريبه أمين شرطه في مرور السلام .
.
- الباسورد بتاعتي كانت 5 أرقام , مانا حاسس بقى إن الدنيا أمان و مفيش حد بيفتح شباك أوضة حد على سهوه و من غير استئذان , ولاد الأصول مايعملوش كده , قبل ماتبقى الباسورد دلوأتي 37 رقم و 19 حرف و ترباسين و كالون 3 تكات .
.
- كنت بسيب صفحتي مفتوحه وانا نايم , ماعملش تسجيل خروج , عشان لو حد من الأصدقاء حب يقرا حاجه يلاقي بوستاتي موجوده , يعني معقوله هقفل باب التلاجه بقفل وانا نايم ؟طب افرض حد جاع بالليل أو كان عايز يشرب مايه ساقعه من عندنا؟ .
.
- ياما شوفت رجاله معجبين أوي بصور صديقات و يكتبو تعليقات بقى كلها حب و ورد وإنبهار و شألباظات, مع إن الصور بتبقى لبنات مشاهير و نجمات سيما من أوروبا و أمريكا ( بس هما اللي مش متابعين زي الكابتن باسم مرسي ) , بحس وقتها إنهم شبه عمر الشريف (حسين ) في فيلم إشاعة حب , لما جابوله صور لبنت يعمل انه بيحبها و يوسف وهبي قال له (يا جااااه النبي , بقى بتحب دي ؟ دي رئيسة وزراء بريطانيا ) .
.
- لما أكتب بوست و ألاقي صديقه كتبت تعليق و دخل صديق بعدها ماعملش حتى لايك عالبوست إنما عمل على تعليقها قلب و دبدوب و 17 ريبلاي بقول في سري , وانا اللي كنت فاكرك بتحب بوستاتي و بتحبني لشخصي ؟.
.
- في التايم لاين شوفت هري و حواديت لو جمعتها هتعمل مدونه أولها هنا و أخرها في أخر صلاح سالم , بس أكتر حاجه كانت بتضحكني هي إني ألاقي خروف لسه مألف خبر طازه أو هابد حكايه في ساعة عصاري و أشوف ردود الخرفان السريعه جدا عليه , يعني مثلا خروف يكتب ( عاجل , أنباء عن هروب السيسي و عائلته من مطار ألماظه إلى جهه غير معلومه ) و يدخلو الخرفان يعلقو ( مش هيلحق يهرب , هنجيبه لو راح اخر الدنيا , الطياره هتقع بيهم ) , وقتها بقول في نفسي ( ياولاد كلو بالراحه و امضغو الأكل كويس , الدنيا مش هتطير و البرسيم عمره ماهيخلص ) .
.
- كبار شمامين الكوله زي الأسواني و ممدوح حمزه و خالد أبو النجا , لما بيكتبو بوستات أو تويتات , عمري ماتخيلتهم قاعدين على كرسي عادي زينا كده وزي مخاليق ربنا , دايما بتخيلهم وقت الكتابه قاعدين على حِجْر حد , تلاقي الكراسي مش مكفيه و ( الرجاله ) معذورين .
.....................................................................................................
Mohamed Hussein
26 يوليو 2019·
مندوح
.
ممدوح حمزه لسه عايش ولسه برضه شغال في الأندروير, ماهو المثل بيقول , اللامؤاخذه لما تكبر و تعجز و مايبقاش لها زبون بتشتغل لامؤاخذه تانيه و تكتب تويتات
.
وقالك مولاهم منكوح حمره اللي كان عايز يمسك حكم مصر أو يمسك رئاسة الوزرا عالاقل ( وهو قاعد في الخيمه بيشوف مقاسات العيال ) , المهم يمسك أي حاجه , قالك ايه بقى ؟!
.
عملنا قاعدة محمد نجيب العسكريه في غرب مصر و دي أكبر قاعده عسكريه مصريه , مش عشان نأمن حدودنا الغربيه اللي طولها 1200 متر و اللي بنأمنها من جانب واحد لأن الجانب التاني مش موجود و اللي بيترمي لنا من ناحيتها إرهابيين و سلاح يكفو لتدمير قاره , لأ احنا ماعملنهاش عشان كده , أومال عملناها عشان ايه يا مندوح ؟ مش عارف بس انا عندي قلق ( يشعر بالقلق و معه ثلاثه أخرون ) .
.
وقال كمان إنه الحكومه لها مقر دائم في مدينة العلمين الجديده غرب مصر , كده القلق زاد عندي , يكونشي الحكايه لها علاقه بخريطة تقسيم مصر اللي منتشره عالنت و عند أم نحمده بتاعة الكرشه ؟ تكونشي شوكلاته ( بصوت اسماعيل ياسين ) ؟! .
.
مش عزيزي منكوح حمره
- أي عيل صغير في تالته ابتدائي يعرف أهمية قاعدة محمد نجيب في تأمين حدودنا الغربيه و مواجهة ميلشيات أردوغان و قطر بنت الوسخه اللي منتشرين في ليبيا واللي بيندفع لهم مليارات الدولارات سنويا , وكمان مصر بتتولى حماية المياه الاقليميه الليبيه من سفن أردوغان لحد ما ليبيا ترجع لأهلها بالسلامه .
.
- أي عيل في تالته إبتدائي عارف إنه إداره مصر خلال سنه ولا اتنين هتبقى من العاصمه الإداريه الجديده , مبنى رئاسه و مبنى للحكومه و مبنى للبرلمان و مبنى لوزارة الدفاع و كل الوزارات , و دي مش في غرب مصر يا دوحه .
.
- و أخيرا , مش عزيزي منكوح حمره , الخرايط بتاعة تقسيم مصر اللي انت الوحيد بتشوفها عالنت دي تبرمها و انت عارف تحطها فين , إلا بالمناسبه , مش احنا برضه عملنا أنفاق تحت قناة السويس عشان نوصل لإسرائيل مايه ساقعه و بيبسي كولا بحسب رأيك الألماظات قبل كده ؟ والنبي يا شيخ تبقى تتطمن من حبايبك الصهاينه إذا كانت المايه وصلت لهم ولا لسه .
.........................................................................................................................
Mohamed Hussein
25 يوليو 2019 ·
أنا و بناتي
.
من كام يوم كنت بسمع الست على يوتيوب , شدني فيديو لبنت عمرها 13 سنه بتغني لأم كلثوم في مسابقه , البنت صوتها حلو أوي و احساسها بالموسيقى رائع و الأداء أروع , قمت أنا خدتني الجلاله و حيث إني من عشاق ملكوت اسمه أم كلثوم , اتحمست و بعتت الفيديو للوجي بنتي عالواتس , و معاه الرساله دي :
..............
أنا : اسمعي الفيديو و نضفي ودنك من المهرجانات و من الهباب اللي بتسمعوه , اهي بت قدك أهي
لوجي : بابا , بذمتك سمعت مهرجان رب الكون ميزنا بميزه ؟
.
أنا : لأ
لوجي : شوفت كزبره و حنجره ؟
.
أنا : بصراحة لأ .
لوجي : سمعت إسلام سنوفه ؟
.
أنا : في الحقيقه لأ .
لوجي : شوفت حمو بيكا ؟
.
أنا : برضه لأ
لوجي : طب خلاص , ماتتكلمش معانا بعد كده
.................................................................................................................
Mohamed Hussein
25 يوليو 2019 ·
يا أخي نفسي لما أكبر كده و أغتني و أتشهر , و أبقى أشهر من ساندوتشات الحواوشي و البناطيل الستريتش , إنه حد يقابلني في الشارع يسلم عليا و يقولي كلام كتير و طويل و عريض و هو بيسّلم عليا , و أنا أقوم مبتسم له كده ابتسامه لزجه و أرد عليه بكلمه واحده من 6 حروف ( تحياتي ) , إنت أصلك مش متخيل كمية الجمال و الشمخه و التناكه و النفخه الكدابه اللي في الكلمه دي , بتحسس اللي قدامك دايما إنه بيكلم طاهر القويري و نجيب ساويرس و مارجريت تاتشر و نرمين الفقي مضروبين في خلاط واحد .
.......................................................................................................................
Mohamed Hussein
25 يوليو 2019 ·
خناقه و عاركه لرب السماء داخل زريبة التنظيم الإرهابي الدولي في تركيا عند خليفة الشواذ , الخناقه بين الخرفان الكبار و بين ال ( حوالي ) الصغيرين .
.
الحوالي ( جمع حولي اللي هو الخروف الصغير ) , بيشتكو من إن كل فلوس التبرعات ( التمويل يعني بس بيحبو يدلعو كلمة تمويل فبيقولو تبرعات ) بياخدها الخرفان الكبار و يجمعو ملايين و يركبو عربيات فخمه و يسكنو في قصور , بينما الحوالي الصغيرين مش لاقيين ياكلو و بيشحتو في إشارات المرور .
.
معقوله يا جدعان ؟
- معقوله الإرهابيين اللي بيحرضو عالقتل و الحرق و الخراب يسرقو ؟
- معقوله الخونه اللي بيهربو من بلدهم و يروحو لأعدائها يسرقو ؟
- معقوله الخونه اللي شغلهم ليل و نهار انهم يشوهو بلدهم و جيشهم يسرقو ؟
- معقوله الناس اللي بتكدب و تألف و تزيف حقايق 24 ساعه يوميا يسرقو ؟
- معقوله الخواجات اللي مستعدين للتحالف مع الشيطان يسرقو ؟
- معقوله العيال اللي بيتعمل عليهم حفله ب 10 دولار مقطع يسرقو ؟
.
لا مش معقول أبدا الكلام ده , مستحيل يسرقو , اخلاقهم مابتقولش كده .
...................................................................................................................
Mohamed Hussein
24 يوليو 2019 ·
بعد المولد
.
في يوم زي النهارده بيبقى صباحية المولد , صباحية مباركه يا ولاد , في المولد بقى بتاع امبارح , معازيم مالهمش أي تلاتين لازمه في الحياه و صاجات و طرقعة كاسات و أزاير بيره و ناس بتسكر و بترجع في حجر بعض ومحدش سامع التاني , مولد بقى و موسم , كل سنه وانتو طيبين .
.
قلنا ماشي , جايز لما الناس تنام و تصحى تحط راسها تحت حنفية مايه و تفوق من السطلان بتاع امبارح , و جايز نلاقي حد يسمع
.
القصه يا بني أدمين مش قصة ثورة يوليو ولا عبد الناصر اللي مات من نص قرن و عامل لكو خرم في دماغكو , القصه بحر رمال بيشد رجليكو واحده واحده , القصه اسمها النداهه .
.
بتعمل ايه النداهه دي و عايزه ايه بالظبط ؟ عايزاك تفرد تاريخك الطويل العريض كله قدامك عالترابيزه و تفضل تشخبط فيه و تقطع و تشوه و تحرق , احرق تاريخك و رموزك الوطنيه و القوه الناعمه بتاعتك بإيديك عشان النداهه تحبك .
.
زي ايه مثلا ؟ الورق بيتفرد قدامك من أول ال 10 الاف سنه و تدخل في متاهه , احنا فراعنه ولا مصريين ؟ هما اليهود كانو عندنا ولا كانو فين ؟ مين اللي بنى الاهرامات ؟ شوفتو الاحتلال الانجليزي كان حلو ازاي و عمل السكه الحديد ؟ الملك كان معيش الشعب في رفاهيه و فخفخينا , شوفتو لما حكمكو واحد مصري حالكو بقى عامل ازاي ؟ ده الاحتلال جميل اوي , سعد زغلول كان سكري و بتاع قمار و أم كلثوم كانت شاذه جنسيا , و شجرة الدر كانت بتركن ضهرها على عمود في شارع جامعة الدول , احنا مانتصرناش في 73 و عبد الناصر خسر حرب 48 و ليه جيش مصر يشارك في تحرير الدول العربيه من الاستعمار ؟ ده الاستعمار جميل .
.
وبس يا سيدي , تفضل النداهه تشيل و تهبد فيك , و لما تشخبط و تعجن في تاريخك بإيديك باستخدام الطُعم ( الطعم هنا اسمه البحث عن الحقيقه , و مفيش حاجه اسمها حقيقه مطلقه في كتابة التاريخ , كل دول العالم بتكتب تاريخها بشكل يخدم مستقبلها , اسمه تجميل مش تزييف , بيعملوه عندهم في بلادهم و بيصنعو بطولات من ورق و من شواشي الدره , بس عندنا عايزينك تعمل العكس , ولازم تدور عالحقيقه يا زداحمد , انت اللي هتغني يا منعم ) , بلعت الطعم يا حماده , روح لحبيبتك النداهه .
.
هو التاريخ مهم ؟ لا ده مهم جدا , ده الحيطه اللي بتسند ضهرك عليها , ده الموتور اللي المفروض يدفعك لقدام , ده قوتك الناعمه اللي بتخلق جواك روح معنويه تخليك تنحت في الصخر .
.
مين بقى النداهه ؟ النداهه هي اللوبي الأمريكي الصهيوني البريطاني و صبيانهم في مصر زي يوسف زيدان , وصبيانهم في المنطقه زي قطر بنت الوسخه , النداهه مستعده تصرف ملايين و مليارات عشان تعجن في تاريخك العجنه دي .
.
وهو العجن في التاريخ بيكون له مضاعفات ؟ طبعا يا مولانا , و اهم مضاعفاته اسمها ( طمس الهويه ) , انت مهزوم و مش عارف لك عرق ولا نسب و ملكش انتصارات و رموزك كلها فاسده و شاذه , وصلت للمرحله دي ؟ تمام , كده النداهه مبسوطه منك أوي , و فخوره بيك , اه و عهد الله .
...........................................................................................................
Mohamed Hussein
23 يوليو 2019 ·
لو عايز تفهم هات عقلك و تعالى
.
أهم كام سؤال بينطو قدام عينيك لما تيجي سيرة عبد الناصر أو ثورة يوليو ( بالمناسبه انا لا حضرت عبد الناصر و لا أوعى عالسادات , و بالتأكيد جدي مكانشي من الظباط الأحرار ولا عبد الناصر هيديني وظيفه دلواتي ) .
.
1- عبد الناصر ضيع السودان مننا !!
لا غلط , مصر و السودان كانو تحت الاحتلال , بيحكمهم طرطور اسمه الملك اللي بيحركه قنصل بريطانيا , فلما بتستقل ك دوله بتستقل بنفسك وبس , سهله خالص أهي
.
2- مجانية التعليم و شوف النتيجه دلواتي !!
غلط , دي مش مشكلة عبد الناصر , إنت أقريت مبدأ انساني و أدمي , عداله اجتماعيه , بعد كام سنه كان أعداد الخريجين كتير أوي و كله بيتعلم ببلاش و سوق العمل مايستحملش , والدوله ماعندهاش فلوس تبني مدارس , هنا بتيجي مسئولية الرئيس اللي في السلطه , اللي هو تحديدا كان مبارك أو السادات , عندك مبدأ محترم وضعه عبد الناصر بس ظروف الحياه بتتطلب تعديل فيه , خلاص عدّله , خلي التعليم المجاني لحد تالته ثانوي بس , و الجامعه يدخلها المتفوقين أو يدخلها طلبه بفلوسهم زي مابيحصل في بريطانيا .
.
3- شوف الدولار كان بكام أيام الملك !!
- ده اسمه هبل يا حماده , تخيل انك راجل متجوز و مخلف 100 عيل , معيّش اتنين منهم كويس اوي و 3 عيشه معقوله , و 95 بتعاملهم بالسخره و الكرباج و مش موفر لهم أدنى متطلبات الحياه , ال 95 بيشتغلو و يجيبولك دخل وفلوس و قطن و مابتصرفش عليهم حاجه , لا بتستورد لهم ولا بتصرف عليهم تعليم و صحه و حياة أدميه , هيتوفر معاك فلوس كتير ( كدوله ) , لكن كشعب هتبقى تحت خط الفقر ب 17 خط , ده الوضع أيام الملك , مبادئ ثورة يوليو عكست الأيه , وبقيت هتصرف عالشعب و تخلي كل مواطن يحس انه بني أدم مش عبد , دي لها فاتوره و تكلفه , بتيجي بالتأكيد على حساب ميزانية الدوله و سعر العمله .
.
4- الإنجليز عملو السكه الحديد فالمفروض نحبهم و نبوسهم من بؤهم
- لا , هما عملو السكه الحديد عشان يعرفو ينقلو البضاعه بتاعتك , القطن و خلافه , يعني مش محبه ولا تغزل في جمال اللي خلفوك , مشروع هيعملوه بعشر قروش و يجيبو من وراه 100 قرش , و طبعا كان عندهم اعتقاد انهم هيحتلونا للأبد, فلما جيت انت رميتهم بره بلدك أكيد وقتها مكانوش هيفككو القضبان و ياخدوها معاهم .
.
5- عبد الناصر دمر زراعة القطن
- لا , انا اتولدت 76 و حضرت كارنافال اسمه زراعة القطن ممكن أكتب عنه مجلد كامل , زراعة القطن اتدمرت في أواخر التسعينات , وقتها كان الحاكم الفعلي لمصر اسمه ماما سوزان و بابا يوسف والي .
.
6- عبد الناصر فتت الأرض الزراعيه
- غلط , الأرض الزراعيه مش بتتفتت بالتوريث , بتتقسم على ورق , اسمها الحيازه , الأرض اللي كانت 10 فدادين اتورث فيها 5 و بعدين عشرين , كل واحد من العشرين بياخد قيراطين تلاته , محدش بيبني سور حوالين أرضه , هي حته حديده عرضها 5 سم بتتزرع ف بطن الأرض من تحت عشان تحدد ورث كل واحد , يعني مفيش شبر من الأرض مابيتزرعش بسبب التوريث , يارب تفهم
.
7 - يعني كده نعتبر ان عبد الناصر نبي و قديس ؟
- لا , كان رئيس وطني شريف محترم , أخطأ في حاجات ممكن نقول , لكن اللي حضرتك بتهري فيه ده اسمه هبد , خروف بيركبك و بيسرح بيك , و من وراه دول حريصه جدا على تشويه اسم عبد الناصر
......................
ملحوظه , الصوره دي بتعني حاجتين , الزعامه و محبة الناس , و الزعامه غير البشويه خالص , ماينفعش تشتريها بفلوس , و محبة الناس مابتجيش بالكرباج .
...........................................................................................................
Mohamed Hussein
23 يوليو 2019 ·
لو سمحتي يا مدام
- نعم يا فندم
.
التعليق بتاع حضرتك على بوست جمال عبد الناصر
- ماله التعليق ؟
.
يعني هو مش واضح شويه
- اه فهمت , حضرتك عايزني أوضحه اكتر عشان تعرف وجهة نظري ؟
.
لا, الحقيقه أنا عايزك توضحيه أكتر عشان أعمل لك بلوك بضمير مستريح .
....................................................................................................................
Mohamed Hussein
23 يوليو 2019 ·
صور حصريه للعز و الرفاهيه و الفخفخينا اللي كان عايش فيهم الشعب المصري أيام جلالته , أيام الإستعمار والإستحمار الوسطي الجميل .
.
- الصوره الأولى توضح كيف أن الموضه كانت بتنزل في مغاغه و العياط و السنبلاوين و كفر غنام و كوم الشقافه قبل ما تنزل في باريس .
.
- في الصوره التانيه مواطن مصري شايل جلالته عشان يصطاد بط , المواطن ده هيرجع القصر بتاعه اخر النهار يلاقي الخدامه الفرنسيه مجهزاله البانيو و الجاكوزي والفولاتايل أويل , و بتاعة المساج الألمانيه بتدلك له عضلة السمانه .
.
- في الصوره التالته مواطن بيطلب من الباشا إنه يكون عنده شبشب يلبسه في رجله , شبشب و العياذ بالله , شوف طمع الناس يا اخي , مش كفايه انه يلاقي حصيره مقطعه ينام عليها ؟ لا و كمان عايز يلبس شبشب .
...................
الله يسامحك يا عبد الناصر انت و الظباط الأحرار
يالله يا جدعان قولو ورايا #الإستعمار_التام_أو_الموت_الزؤام .
......................................................................................................
Mohamed Hussein
22 يوليو 2019 ·
الصوره الكامله
.
عشان ماتتخضش كل مره و تشهق شهقة الملوخيه و تقول يا لهوي مع كل حدث و تقوم ضارب ايدك على صدرك كداهو , كوكب الأرض و منطقة الشرق الأوسط عشان نفهم اللي بيحصل فيهم لازم نجيب قرطاس فيشار كبير و نتفرج كأننا بنتفرج على مسرحيه لها مخرج و أبطال و مؤلف و كل واحد عارف دوره كويس , نتفرج و احنا حاطين دماغنا في تلاجه .
.
1- إيران سيطرت على سفينة شحن بريطانيه قامت بريطانيا تمخضت وقالت نعلق حركة الطيران للقاهره , يا ستي ايه اللي جاب القلعه جنب البحر ؟ لا هي القلعه مش جنب البحر ولا حاجه , كل الحكايه ان ده موسم سياحي و انت لسه منظم بطوله ب 24 دوله و عشرات الالاف من جنسيات مختلفه و ظهرت للعالم بشكل متحضر و مستقر و عندك قدرة تأمينيه هايله مهما كانت المؤامره ضدك , طب نضرب لهم كرسي في الكلوب بقى , اهو عيار مش هيصيب بس هيدوش .
.
2- مفيش عداوه بين بريطانيا و أمريكا و اسرائيل من جهه , و إيران من جهه تانيه , فيه توزيع أدوار , ديب و تعلب بيلعبو على بقره عشان يحلبو لبنها , ومش بعيد يكونو بيقسمو سوا , البقره بقت عارفه لان الكلام بقى يتقال صراحة , بس مش عارفه تخرج من الخيّه دي إزاي , لأنها دخلتها من سنين طويله أوي .
.
3- إيران و تركيا دول استعماريه قديمه , زيهم زي الكيان الصهيوني حديثا , كلاب السكك المسعوره مابتعضش في بعض , و بالتالي ماتنتظرش أي حرب بينهم ولا بعد 50 مليون سنه , ممكن بس يتهاوشو على صيده ( بلغة وزير خارجية الكشك القطري السابق ) .
.
4- يعني ايران و تركيا و تنظيم الإخوان الإرهابي و حركة حماس بتاعة 2006 و الكشك القطري و قناة الخنزيره و جماهير الجزاير مش هيحررو لنا القدس ؟ لا والله يا مولانا , كان على عيني , ولا هيقتلو جندي صهيوني واحد , انما هيفضلو يبيعو لك شعارات و خطب رنانه عشان انت بالنسبالهم اسمك الزبون الغشيم , الغشيم المسلم اللي بيعرفو يركبوه من قديم الأزل باسم شعارات نصرة الإسلام , من أيام الدوله الامويه و العباسيه , و زيهم في أوروبا لما حبو يركبو الغشيم بتاعهم في حروبهم الإستعماريه , قالو له بنحارب بإسم الصليب , لعبة قديمه و مابتخيبش أبدا , و ربنا يخلي الغشيم .
.
5- الدوله الوحيده في منطقتنا العربيه و في الشرق الأوسط , اللي لها سياسه متزنه و رصينه و قويه , اللي تاخد منها وانت مغمض عينيك هي مصر , ده كلام المفروض يقوله أي واحد حتى لو مش مصري بس متابع الاحداث , غير كده اقلب , مابين خاين أو عبيط أو أرعن أو لسه صغير .
.
6- مصر كان لازم يكون لها وجود في دول الجوار بعد ماشوفنا منهم و من حدودهم معجنه في اخر 10 سنين , و هنا بيبقى وجودك مش بغرض استعماري ولا بأطماع , انت مش عايز أكتر من إنك تحمي أمنك القومي و تقفل حنفيات الإرهاب من مهدها , من عند المحابس العموميه , الموضوع أشبه بإنك تكون عايش في بيت كبير , بس جنب منك أدغال من كذا جهه , و الأدغال دي بترمي عليك تعابين و فيران و سحالي , منطقي جدا انك هتقف جنب أي واحد بيحاول ينضف الأدغال دي و تساعده على قد ما تقدر .
........................................................................................................................
Mohamed Hussein
21 يوليو 2019 ·
أصدقائي الجدد ...سوسن و زينه و عنتر و شلبيه , و أخرون .
.
الحكايه بدأت بغيره محموده , ست ساكنه في العماره اللي قدامنا , بتتكلم عربي كويس بس ملامحها بتاعة شرق أوروبا , بتنزل كل يوم من شقتها في نفس التوقيت الساعه 1 بالليل , معاها كيس كبير مليان مكرونه مسلوقه و تلم القطط و الكلاب حواليها , هما عارفينها , تحط لهم اكل كلهم و احنا نشوف المشهد اليومي ده من البلكونه , لحد ما قررنا نعمل زيها , و اللي شجعنا اكتر ان الست دي اختفت فجأه , سافرت تقريبا اجازه , و أصحابها مستنيين بدون جدوى .
.
اتشجعت انا و البنات و أخدنا بواقي اكل من البيت و نزلنا , فيه قطه قدام العماره مخلفه 4 صغيرين , دي لها مكانه خاصه و عارفينها من الأول ( سوسن ) , شخصيتها عجيبه و بتدافع عن ولادها بشراسه و مش عايزه حد ياكل غيرهم , حتى جوزها بتوقفه انتباه جنبهم لحد مايخلصو هما أكل و لو اتبقى حاجه ياكلها ( الله يرحم فاطنه لما كانت بتقول للعمده ان اكبر حته في البطه ياخدها أبو العيلا ) , احنا اتغيرنا أوي يا لينا .
.
الموضوع وسع مننا شويه و بقينا نتنقل للرصيف التاني اللي فيه قطط اكتر , عرفونا و بقو يستنونا في نفس الميعاد , اهم واحده فيهم هي ( زينه ) , قطه سمره نظرها ضعيف , لازم تحط الأكل قدامها مباشرة عشان تشوفه , زينه قطه طيبه جدا مع بقية القطط ( اللي بيوصل عددهم ل 15 ) , و أي قطه عايزه تاكل معاها او حتى تاكل اكلها مش مهم , مش بتزعل .
.
شخصية زينه بدأت تظهر في موقفين , أول موقف لما السيد ( عنتر ) الكلب اللي بيحرس جراج العماره بقى ييجي يقف لحد كتفي فوق بمنتهى الجرأه عشان معايا كيس فيه أكل , و مايصبرش حتى لما أحط له منه , عنتر بقى يمشي ورايا لحد الرصيف التاني عشان ياكل أكل القطط اللي بحطه هناك , و هنا ظهرت زينه , البطله الخارقه , اللي هجمت على عنتر و هبشته ( أه قطه كيوت نظرها ضعيف بتهجم على كلب بلدي دكر علو كده ) , عنتر خاف و جري , و زينه في المشهد ده كانت بتحمي كل اصدقائها و بنات جلدتها من القطط .
.
تاني موقف حصل لزينه هو ظهور قطه صغيره اوي , بنت اسبوعين , مش بنتها انا متأكد , القطه دي ظهرت من عمارة مجاوره و بمجرد ظهورها لقيت زينه قررت انها تحميها و تتبناها و تقف جنبها و هي بتاكل عشان محدش يقرب لها , و تفضل تلف حواليها لحد مالقطه بنت الاسبوعين تقرر انها تمشي و ترجع للمكان اللي بتنام فيه .
.
السيد عنتر بقى بعد ما ضمن أكله كل يوم , بقى يعمل حركه عجيبه , يقف في التقاطع بين العماير و يهوهو بصوت جامد , تقوم تيجي شلة أصحابه من الكلاب و عددهم 8 , عشان ياكلو و يسترزقو , شلة عنتر عباره عن 7 دكوره و كلبه واحده نتايه ( شلبيه ), و طبعا لكو ان تتخيلو المشهد , كل كلب منهم ياكل و قبل ما يغسل إيده و بؤه يروح يتجوز شلبيه , تعبوها معاهم اخر تعب والله , وانا مش عارف هي مستحمله كده ليه و ليه ماشيه مع شلة صيع ؟
.
الحمد لله , مشينا في الموضوع من حوالي 5 شهور , و مش بنفوت يوم تقريبا , انا اعتبرت الحكايه ِورْد يومي , و تكفير ذنوب , يومنا مابيخلاش و يمكن تكون الحاجه البسيطه دي هي المنجيه , و عايز أقول لحضراتكو الموضوع مش مكلف ولا حاجه , و عشان تأكل 15 قطه و كام كلب ممكن تتكلف في المتوسط 5 جنيه يوميا ده لو معندكش بواقي اكل في البيت , ممكن ناس كتير تعملها و تاخد أطفالهم , مهم اوي تعلموهم الرفق بالحيوان .
.
الأكل ممكن يكون ايه ؟ أي حاجه يا مولانا , كام رغيف عيش و تبلهم بشوربة فراخ , كيس مكرونه من نوع رخيص تسلقه , بواقي و عضم و جلد فرخه كنت بتاكلها , بواقي سمك , و هكذا .
.............................................................................................................
Mohamed Hussein
20 يوليو 2019
إدارة ليفربول بتخطط إنها تخلّي الفلاح بتاع نجريج اللي جاي من ورا الجاموسه اللي اسمه محمد صلاح , تخليه أغلى لاعب في الدوري الإنجليزي (الأقوى في العالم ) , براتب سنوي 22.5 مليون جنيه سترليني , يعني نص مليار جنيه مصري في السنه , يعني مليون ونص في اليوم , يعني اليوم اللي صلاح هيكون فيه راحه و بيهشتك البت مكه هيلاقي جرس الفيلا بتاعته بيرن و واحد بيقوله اتفضل مليون ونص بتوع النهارده عشان انت هشتكت البت مكه , ربنا يزيد و يبارك .
.
إلى الساده القاطنين في إدارة ليفربول , نحيط سيادتكم علما بإن أنا كمان فلاح وعهد الله و جاي من ورا الجاموسه و أشول برضه, و مش هقول أكتر من كده بقى .
..................................................................................................................
Mohamed Hussein
19 يوليو 2019 ·
مكاسبنا بالجمله .
.
- شاب رائع اسمه محمد فضل
- رجال شرطه وجيش قامو بعمل خرافي
- حفل افتتاح و حفل ختام بيتوصفو بالعالمي
- تجهيز ملاعب في 4 شهور !! .
- صورتنا و شكلنا قدام العالم , و ستاد القاهره اللي اتملى في كل ماتشات مصر .
- خلصنا من اتحاد الكوره بتاع السبوبه و عرفنا قيمة المدرب الوطني
- اختبار تحدي لقوتنا و قدرتنا على تأمين أي حدث عالمي مهما كنا مستهدفين
- و أخيرا , و الأهم جدا جدا جدا , كلمة قالها المعلق الجزائري و قالها رئيس الاتحاد الموريتاني و غيرهم كتير ( مصر هتتعب أوي أي دوله تنظم البطوله بعدها , لأن محدش هيعرف يعمل اللي احنا عملناه , بالرغم من إنه أي دوله هيبقى قدامها فرصه سنتين تجهز نفسها و ملاعبها , سنتين مش 4 شهور ) .
.
منتخب الجزائر قدم أفضل كوره في البطوله , روح و أداء و عزيمه و إصرار .
ألف ألف مبروك لمنتخب الجزائر و لمدربهم الوطني الرائع جمال بلماضي اللي عرف يخلق روح جوه الفريق , و للشعب الجزائري الشقيق ( الصيع و الأوباش و صبيان تركيا و قطر لأ ) .
....................................................................................................................
Mohamed Hussein
19 يوليو 2019 ·
ده حالي بعد ما فضلت يومين أحجّز و أهدّي النفوس في موضوع المصريين و الجزائريين , و يا جماعه عيب , يا جماعه ما يصحش , واضح إني نجحت نجاح باهر , نجاح منقطع الهدوم .
.
يا سوسن , يا سوسن , الجمهور مابيعرفش يوقّفها , مابيعرفش يوقفها .
.............................................................................................................
Mohamed Hussein
18 يوليو 2019 ·
قواعد الزوجيه الأربعون ....قاعده رقم 17
.
مراتك هتجيلك في ساعة صفا وانتو لوحدكو , لابسه و متشيكه و بارفانات و حبشتكانات , تقعد جنبك لازقه فيك على غير العاده , وتبوسك بوسه في خدك مع انها ماعملتهاش من أيام ماكانت الفرخه ب 3 رجول , و تمسك صوابع ايدك تلعب فيهم و تبتسم و تقولك بصوت رقيق شبه صوت البنات بتوع خدمة العملا في الشركات الوهميه اللي بتعبي الهوا في أزايز , هتقولك حبيبي ( خلي بالك إن أخر مره قالت لك فيها حبيبي كان في عاشورا اللي فات ) , هتقولك حبيبي بصوت رقيق أوي و عنيها بتلمع و قال يعني مكسوفه و مرتبكه و الطقم بتاع نرمين الفقي ده , حبيبي ممكن تعترف لي و تحكي لي عن مغامراتك مع الجنس اللطيف وانا مسامحاك بس توعدني ماتكررهاش تاني , اعترف لي حبيبي و هسامح و محدش هيعرف خالص , ده ربنا بيسامح , وتقوم بايساك بوسه في خدك التاني ولاعبه في صوابعك اكتر و عنيها تلمع أكتر .
.
ممممممممممم اوعى يابني , اوعى تضعف و تنهار قدام طقم الحنيه و تعترف , لانك أول ماتعترف هتلاقي وش خشب بتاع نعيمه الصغير بعد ماكانت نرمين الفقي , و في ظرف ساعة زمن هتلاقي قرايبك و قرايبها و كل الحبايب و الأهل و الأنجال في الشرق الأوسط و شمال أفريقيا وامبابه و البدرشين عرفو مغامراتك , و هتعايرك بيها في الرايحه و الجايه و تطلع على جتتك المتداري و المستخبي و المستنيل على عينه , و مش بعيد تساومك على قيراطين الأرض اللي حيلتك في البلد .
.........................................................................................................................
Mohamed Hussein
18 يوليو 2019·
عبد الفتاح السيسي يستقبل الرئيس الجزائري و يشيد بأداء منتخب الجزائر في بطولة أفريقيا .
........................
........................
ايه ده , يعني عالمستوى الرسمي مش هنلعن جدود اللي خلفوهم ؟ لا والله حضرتك
طب خلاص نلعن جدودهم شعبيا و جماهيريا و فيس بوكيا ؟ برضه لا سيادتك
.
ليه لأ ؟ انت مش مصري يا أخي ؟ مابتغيرش عالبلد دي ؟ لا مصري للنخاع و للثماله و بغير عليها قدك مليون مره , بغير عليها من الهوا الطاير كأنها حبيبتي و أحيانا كأنها بنتي .
.
طب ليه بتعمل كده ؟ تعالى أقولك
يعني ايه العقل ؟
- يعني ماتقعش في خطيئة التعميم و تقول الشعب الجزائري همجي و بربر و كيت و كيت , و إلا ماتزعلش لما نفس اللي انت بتقول عليهم همج يكررو نفس الخطيئه و يقولو شعب رقاصات عشان شافو كام فيلم مصري فيهم رقاصه , و ماتلومش على قناة الخنزيره لما كانو بيجيبو خمسه سته مصريين على شط ترعه رافعين صوابعهم بعلامة رابعه و يكتبو الشعب المصري !! .
.
يعني ايه الحكمه ؟
- يعني ماتنجرش للهبل ده و الفتنه و حاول تصدق إن دايما وراها اللي بيشعلها و عايزها تكبر , واللي بيشعلها ممكن يكون أي حد أو اي جهه في أي دوله تانيه و أي قاره .
.
يعني ايه الكبير بقى ؟
- يعني انت , يعني حضرتك , الشعب اللي حضارته 10 الاف سنه , وعدد سكانه يساوي تلت عدد سكان الوطن العربي , ولو خدنا على كلام و تصرفات كام ألف صايع من كل دوله هنقطع علاقتنا بالدول العربيه كلها , الأردن و فلسطين و الكويت و تونس و الجزائر و المغرب و خلافه , سمّي الحاجات بمسمياتها , اسمهم شوية صيع و خرفان ولاد كلب , ماسمهومش الشعب الفلاني , عيب يا مولانا , مش وانت نايم على بطنك على سرير هتحكم على شعب و توصفه بالكامل بصفه معينه , حاول تكبر
.
و أخيرا , هنشجع مين ؟
شجع اللي تشجعه , الجزائر , السنغال , ياكشي تشجع مركز شباب السنبلاوين , يهمني ان البطوله اللي بتتلعب على أرضنا تخرج بأجمل وجه و أجمل صوره و أفضل تأمين , وبلاش تكون طعم عبيط لنار ممكن تحرق شعوب .
.
هو انت خايف منهم ؟ لا خالص
طب احنا نقدر عليهم ؟ نقدر عليهم وعاللي خلفوهم و عالقاره دي بحالها , انما الحكايه مش عاركه في خماره , و مش عشان شوية صيع ولاد كلب أغلبهم أكاونتات وهميه ننجر للهبل ده .
.
طب لو حد منهم غلط أو خرج عن القانون ؟ هينضرب بالجزمه و يتعلق على عمود نور , و بالقانون برضه .
.
أيوه يعني نعمل إيه ؟ يعني عندنا ضيوف نشيلهم فوق راسنا , المحترم منهم , واللي يقل أدبه هيتحاسب ,دي مسئولية الدوله , أما احنا كمواطنين فلو سمحتو , من فضلكو , اقتلو الصيع و المرتزقه بالتجاهل , التجاهل و بس .
.
اللهم قد بلغت .
..........................................................................................................
Mohamed Hussein
18 يوليو 2019 ·
صباح الخير
.
أردوغان قرر إنه يشتري منظومة الصواريخ الروسيه إس 400 , قامت أمريكا سابته لما خلص خالص وقالت له طب انت كده براءه , روح بيتكو بقى , مفيش طيارين أتراك هيتدربو عندنا ولا فيه مشاركه في برنامج الطياره f35 , و موضوع عضويتكو في حلف الناتو ده هنسيبه للحلف يقول رأيه فيه .
.
قامت تركيا ماسكتتش و ردت بتصريح ناري و مقدمة ناريه زي بتوع معتز مطر كده , وقالت بالفم المليان و بنبره حاده ( قرار واشنطن سيسبب جرحاً لا يلتئم في علاقتنا ) .
.
خلاص يا أردغ ماتزعلش خالص , النهارده 18 يوليو , خليك حافظ التاريخ ده و كل سنه تعمل له عيد ميلاد , سميه ( عيد ميلاد جرحي أنا ) .
.
بس نصيحه لوجه الله , ماتطلعوش تصاريح ( ناريه ) أكتر من كده , أنا بس خايف عليكو من الفتاء و خايف أكتر لا ترامب تكبر في دماغه و يقعد على تويتر في ساعه عصاري ويكتب توتيه , أي تويته حتى لو كلمتين , يقول مثلا ( مابحبش تركيا ) أو يقول ( أحبوش ) و نصحى تاني يوم نلاقي الليره بتاعتك قالعه ملط و بتجري في الشوارع تقول شوفو لي حاجه تسترني .
.........................................................................................
Mohamed Hussein
17 يوليو 2019 ·
الجزائر ولا السنغال , السنغال ولا الجزائر ؟
.
- هو احنا لنا تاريخ مشترك مع الجزائر ؟ أه طبعا
- شاركنا أيام عبد الناصر في ثورات تحرر الدول العربيه من الاستعمار و من بينها الجزائر ؟ أكيد .
- و الجزائر وقفت جنب مصر في حرب اكتوبر و حرب الإستنزاف ؟ أه حصل
- واحنا و هما بنتكلم لغه عربيه هي لغتنا الرسميه ( حتى لو كانو في الواقع بيتكلمو فرنساوي اكتر ) ؟ اه .
- و عندنا مبنى فخم كده و شارع بإسم المبنى و كيان بيجمع العرب كلهم حتى لو كان دوره محدود حاليا , اسمه جامعه الدول العربيه ؟ أه و الله .
.
- طب السنغال يعني أعدائنا ؟ لا خالص , ولا عمر كان فيه بينا عداوه , دوله أفريقيه زيها زينا , يعني ولاد قاره واحده و أم واحده .
- طب هتشجع مين ؟ أنا ولا انت ؟ أنا ؟ هشجع الجزائر
- بس أنا عايز أشجع السنغال ؟ إنت ؟ أه , طيب حقك , عادي انت حر , بس شجعها في البيت لو سمحت .
.
- لا لا انا هروح أشجع السنغال في المدرجات واقعد وسط الجماهير السنغاليه و جنب بكاكا داسا ؟ لا حضرتك مش هينفع , هيبقى شكلنا بايخ أوي
.
- إزاي شكلنا بايخ وليه ؟ عشان تخيل مثلا , بطوله في تونس أو الجزائر و مصر وصلت النهائي و هتلاعب نيجيريا , بقولك مثلا مثلآ, و فوجئت في النهائي ان اغلب جماهير الدوله العربيه المضيفه بتشجع الفريق التاني !! الصوره و المشهد ده مش هيتنسو لسنين طويله و هيعملو غصه كده مالهاش أي لازمه .
.
- بس هو يعني حضرتك نسيت اللي حصل في أم درمان ؟ لا والله مانسيت , ذكريات هباب , بس السياسه اجمالا مفهاش ديمومه , و الكام ألف جزائري همجي وقتها ماسمهمش شعب الجزائر , التعميم هنا كارثه
.
- طب مش واخد بالك بيقولو عننا ايه عالسوشيال ميديا ؟ لا انت كده بلعت طعم بيترمي لك من عشر سنين , السوشيال ميديا ده عالم وهمي , بينشط عليه الخونه و الخرفان و الصيع و اللجان الإلكترونيه .
.
- يعني ايه الكلام ده ؟ يعني شوية الجزائريين اللي بيشتمو فينا حاليا هتلاقي أغلبهم اكاونتات فيك مضروبه عاملها واحد صايع في الدوحه أو حتى في تل أبيب , و الأكاونتات الحقيقيه ماسمهوش جزائريين , اسمهم أعضاء التنظيم الإرهابي الدولي اللي بيحملو الجنسيه الجزائريه , هتلاقي فيه زيهم في تونس و الأردن وفلسطين و الكويت و كل دوله , اللي هما بتوع أردوغان خليفة المسلمين و اللي بتلاقيهم راشقين 24 ساعه على مواقع قناة الخنزيره , كارثه هنا برضه تقول ان دول الشعب الفلاني , التعميم كارثه .
.
- اه دانت بقى عايز تلعب دور حمامة السلام أبو قلب خسايه ؟ لا والله يابني , لا حمامه ولا غراب , انا عايزك بس تهدى و اللي هيّجو الدنيا في أم درمان مايلعبوش عليك نفس اللعبه دلوأتي , لان غالبا هما هما نفس الجهه .
.
- طب يهمني ايه ؟ يهمني إن ستاد القاهره يبقى مليان و الشكل يبقى حلو اوي بغض النظر عن مين هيفوز , و التامين و الصوره طبعا لان ده نهائي هينقله العالم كله .
.
- يعني أفهم من كده انك هتشجع الجزائر عشان العمق العربي و الحلم العربي والافتكاسات دي ؟ لا خالص , انا هشجعها عشان بصراحه يستاهلو يفوزو باللقب , عيال بتموت نفسها من أول البطوله , بياكلو نجيلة الملعب , عندهم روح و عزيمه و اصرار , و بيلعبو كوره حلوه , هشجعها عشان جمال بلماضي و رياض محرز و زمايله .
.
- طب اخر سؤال بقى , ماذا لو مصر كانت كملت في البطوله و قابلت الجزائر في النهائي و حصل حشد بالشكل القمئ اللي شايفينه حاليا ؟ والله يابني ده ستر ربنا و إلا كنا هنحتاج الجيش التاني والتالت الميداني عشان يأمنو ماتش كوره .
.....................................................................................................
Mohamed Hussein
16 يوليو 2019·
كنت دايما بستغرب أوي من موقف الكويت في حكاية الرباعي العربي و قطر , بستغرب من هنا لحد الفلوجه , و من هنا لحد حرب تحرير الكويت , يعني ايه وسيط بالظبط ؟ وسيط في ايه مش فاهم ؟ عيل صايع بيحاول يحرق و يخرب بيوت ناس محترمين جزمة أقل واحد فيهم برقبة الصايع و أهله , انت بقى داخل وسيط ازاي ؟ و المفروض تعمل ايه كوسيط ؟ تقول لنا معلش يا جماعه ده الواد الصايع ده من لحمنا فسيبوه يحرق بيوتكو عادي عشان نفسيته ماتتعبش وبشرته متتأثرش ؟ .
.
الحقيقه استغرابي مكانش استغراب , و في حالة زي كده بشوف إن الوسيط هو طرف متواطئ زيه زي العيل الصايع بالظبط , طيب ماشي , الكويت مليانه خرفان , و أي خروف ملوش أي تلاتين لازمه ممكن يبقى عضو برلمان و يطلع يشتم في مصر و يتطاول على أسياده , برضه ماشي , مش مشكله , كلب و بينبح , تيجي سيرة بوش الإبن يقولو سيدنا و ابن سيدنا , و تيجي سيرة جنود مصر اللي حررو أرضهم يقولو كنتو بتحاربو بفلوسنا , ماشي , السياسه إجمالا مفهاش ديمومه , و احنا اتعودنا ننسى بسرعه و نفضل في توب الكبير اللي مش بيصغر عقله .
.
لحد ما وصلنا لحكاية ترحيل أعضاء الجماعه الإرهابيه من الكويت ,الحكايه دي ماجاتش بالمحايله ولا بطريقة عشان خاطرنا و عشان خاطر العيش والملح , المسئولين في الكويت مش هيعملو كده إلا للشديد القوي , و الشديد القوي بيعني إنك كنت عايش طول السنين دي ( بتتوسط للإرهابيين و ترعاهم و تتوسط للصايع اللي بيصرف عليهم ) على طريقة جحا لما قال ( مش بعيد عن مؤخرتي ؟ يبقى خلاص ) , و توهمت إن الحكايه بعيد عنك , لحد ماجت لحظه ولقيت في حجرك أدله بتقول إن الموضوع كله ( مش بعيد عن مؤخرتك خالص ) وإن اللي اتخطط لمصر و السعوديه و الإمارات و غيرها كان متخطط لك زيه بالظبط بس انت اللي غشيم , الحكايه في اعتقادي لها علاقه بصندوق و كنز المعلومات اللي اسمه هشام عشماوي و اللي اكيد عصرناه عندنا , و هشام عشماوي في رأيي ممكن نعتبره تاني اهم حدث يخص الإرهابيين بعد اقتحام جبل الحلال و الحاجات اللي لقيناها فيه .
.
أتمنى من طويل عمره و من الساده الأفاضل في دولة الكويت الشقيقه يكونو فهمو و استوعبو , و يفهمو إن المتغطي بالإخوان عريان , و إن الأحمق بس هو اللي بيحط راسه في بؤ ديب و يراهن على وعد الديب و أخلاقه .
..................................................................................................
Mohamed Hussein
16 يوليو 2019 ·
يا حكومه , مراتي بتأكّلني مكرونه مسلوقه و جرجير و سلطه خضره و بقدونس و بتأكّل القطط بتاعتها سمك و فراخ و لحمه و عكاوي , ولما أسألها بتعملي كده ليه ؟ تقولي حرام عليك , القطط دي من فصيلة الحيوانات أكلة اللحوم .
مش عارف أقنعها إزاي إننا من نفس ذات الفصيله , هل أكل دراعها مثلا عشان تصدق ؟.
31 يوليو 2019·
يقول تولستوي , إذا أزعجتكَ ذبابه و أردت أن تتخلص منها , فأنتَ لستَ مضطراً لجلب كتيبه من الدبابات و الصواريخ , كل ما عليك فعله هو أن تشتري ريد بتاع الدبّان و ترش منه كداهو,فسسسسسس .
.
محدش يضرب , محدش يضرب , إحنا لسه مغلوبين من الأهلي من كام يوم و خسرانين الدوري من إسبوع , يعني ظروفنا صعبه أقسم بالله , بس إيه رأيكو فيا و أنا عميق كده في نفسي و في أحشاء ذاتي ؟.
........................................................................................................
Mohamed Hussein
31 يوليو 2019 ·
مصر البهيه العفيه , سر المعبد , اللغز اللي حيّر الأعادي , و اللقمه اللي بتقف في زور كل خاين
.......................
مشهد الخلود
هديل ماجد : ممكن أطلب من حضرتك طلب يا سيادة الرئيس ؟ أنا بتمنى ان حضرتك تسمع صوتي
عبد الفتاح السيسي : انا نفسي أسمع صوتك , نفسي أسمع صوتك .
.
هديل : هغني مقطع من أغنية لأم كلثوم , مصر تتحدث عن نفسها
هديل : عايزه مايك
.
هديل بتغنى : وقف الخلق ينظرون جميعا كيف أبني قواعد المجد وحدي و بناة الأهرام كفوني الكلام عند التحدي , أنا تاج العلاء في مفرق الشرق و دُرّاته فرائد عقدي , إن مجدي في الأولياتِ عريقٌ , من له مثل أولياتي و مجدي ؟! .
.
الحضور : تصفيق حاد
عبد الفتاح السيسي يقوم يقف و يطلع عالمسرح يمسك إيد هديل و يمشي بيها
الحضور والوزراء والمسئولين يقومو يقفو ( ماهو رئيس الدوله وقف , و ده اللي إسمه الإحترام , انت في دولة عريقه مش في طابونه )
هديل ل السيسي : عايزه أسلم على حضرتك و أتصور مع حضرتك ؟
...................................
في المشهد نجوم و أبطال و قصة و حدوته
أم كلثوم : كوكب الشرق و هرم مصر الرابع
حافظ إبراهيم : شاعر النيل
مصر تتحدث عن نفسها : قصيدة بعظمة مليون ديوان لفيكتور هوجو و مليون لوحه لبيكاسو .
.
أم كلثوم و حافظ إبراهيم جزء من قوة مصر الناعمه , و مع إنهم مجرد جزء لكن أهميتهم و تأثيرهم يساوي ألف ضعف للكشك القطري بغازه بملياراته بشوية الصيع اللي بيصرف عليهم .
.
هديل ماجد : بنت مصريه جميله تلقائيه بسيطه , خضره زي أرضنا الخضره
عبد الفتاح السيسي : بني أدم مصري مخلص بدرجة رئيس دوله
..........................
خلاصة المشهد
مصر ماتنهزمش أبدا , أبدا أبدا , طول ما تاريخها فيه أم كلثوم و حافظ ابراهيم , و حاضرها فيه جندي واقف عالحدود و بنت اسمها هديل واقفه عالمسرح و رئيس دولة بيطلع عشان يمسك إيديها و يسندها
..........................................................................................................................
Mohamed Hussein
30 يوليو 2019 ·
شمره و شرشيره و شرشره و أوشبره و شضايه , و جمال حرف الشين , و مايه بتجري في قنايه و سد بنعمله من الطين , القطن كاسي العود و كل عام بيعود , أبيض كأنه فستان عروسه فوق الخَضار مفرود , أسامينا سيد و سلامه ونعمه و سيده و حسين , مش لؤي و باسل و أسامي مانعرف جابوها منين , والضحكه مالقلب طالعه مش ضحك ماسخ ولا ضحك عالزبون , كانت أيام بقى , أيام ماكان لنا شكل و طعم و معنى و لون , طب و شبكة العشره دول , مكانتش طفوله فقيره ولا القصه قصة عيش حاف , دي كانت جنه يا مولانا و كاملة الأوصاف ..
..................................................................................................
Mohamed Hussein
29 يوليو 2019 ·
هذا و قد صرحت السيده ( هبه ) مديرة العلاقات العامه بفندق العلمين أنه لا صحة لما تداوله البعض من أن تكلفة الإقامه في الفندق ل 6 ليالي هي مليون جنيه مصري , و قالت السيده هبه أن السويت في الليله الواحده ب 42 ألف جنيه , و في 6 ليالي ب 252 ألف جنيه , يعني ربع مليون جنيه فقط مش مليون جنيه كما يشيع البعض .
............................
مممممممممم أيوه كده يا أنسه , دانا كان قلبي هيقع والله , ربع مليون غير مليون برضه , دلوأتي بقى أقدر أتشجع و أقولك عايز أحجز لو سمحتي
- حضرتك هتحجز عندنا في فندق العلمين ؟
.
أيوه طبعا
- عايز سويت ؟
.
بالتأكيد يا أنسه .
- أحجز لحضرتك 6 ليالي ؟
.
لا يافندم , انا فلوسي يادوب تجيب 3 دقايق ونص , لو سمحتي احجزي لي 3 دقايق و نص عندكو في السويت رويال , هجيب العيال و أجي أعمل تشيك إن و أفتح باب السويت و أقفله ورايا تاني بسرعه عشان ألحق أعمل تشيك أوت , لو سمحتي خلي عثمان يجيب الشنط من العربيه , أيوه كده , خليه يرجعها تاني بقى .
.......................................................................................................................
Mohamed Hussein
29 يوليو 2019 ·
·
بنتين بلدياتي , من السنبلاوين
.
الأولى بدأت مشوارها و هي طفله عمرها 6 سنين , إنشاد في الأفراح و الموالد , لفّ على كعوب رجليها بين القرى و المدن وبعد شويه بقت تلف و هي راكبه حمار, و مشيت و كبرت , و كبرت و عليت , وطلعت لفوق لحد مابقت كوكب الشرق و سيدة الغناء العربي و هرم مصر الرابع , الست دي اللي صوتها و أنغامها و اهاتها شهدو على ملايين من قصص الحب و الغرام في الوطن العربي من شرقه لغربه , ولسه بيشهدو , الست اللي بقت تتعامل معاملة الملوك و رؤساء الدول , حتى جنازتها كانت جنازة ملكه و مش أي ملكه , دي مش ملكه بالوراثه ولا بشهادة الميلاد ولا عشان كانت بنت الملك الفلاني , طريق طويل أوي , من أول مولاي كتبت رحمة الناس عليك , لحد مكه و فيها جبال النور , و أوقاتي بتحلو اللي مالحقتش تغنيها عالمسرح .
.
و التانيه اللي أول مره تدخل فيها السيما و هي عيله صغيره , ولقت الناس بتسأّف لظهور البطله على الشاشه , قالت لابوها ( أنا حاسه إن الناس دي بتسأّف لي !! ) , بدأت برضه و هي طفله و لما بقي عمرها عشرين سنه بقى يتقال عليها عملاق تمثيل , تشوفها في أي فيلم أو مسلسل و معاها كتيبة نجوم بس ماتحسش بوجودهم , ماتشوفهمش , في الباب المفتوح ( مش هتلاقي حسن يوسف و محمود مرسي و صالح سليم , لأن فاتن حمامه موجوده ) و لحد أفواه و أرانب ( مفيش فريد شوقي و محمود ياسين , انتو متأكدين يا جدعان انهم موجودين في الفيلم ؟ أنا مش شايف غيرها ) , و كبرت البنت , كبرت أوي , لحد مابقت سيدة الشاشة العربيه .
.
رأيي الشخصي , أم كلثوم في الغنا و الطرب و فاتن حمامه في التمثيل ماينفعش يتقال عليهم نجوم و سوبر ستار و الألقاب اللي بقت سداح مداح و بتتقال لأي حد , لأ , هما في حتة تانيه خالص بعيدة عن بقية خلق الله , هما في جزيره وسط محيط , جزيره ماينفعش توصل لها وانت ماشي على رجليك ولا توصل لها بعربيه ولا بمركب ولا بطياره , محدش أصلا يعرف يوصل هناك
................................................................................................................
Mohamed Hussein
28 يوليو 2019 ·
انتو يا زملكاويه انتو ؟ أيوه انتو , أقسم بالله أنا زهقت من كتر التحفيل عليكو و مبقاش في وشكو حته سليمه ينفع أضرب فيها
- يا عم انت زملكاوي , انت نسيت ولا ايه ؟
.
يابني مانسيتش ولا حاجه , انا بقول كده بس عشان محدش ياخد باله مني , دي قاعده معروفه في علم النفس , بتقولك لو ماشي مع صاحبك في الشارع و صاحبك ده دخل خناقه ولقيت الطرف التاني أقوى بكتير , اضرب صاحبك معاهم عشان تخرج منها سليم .
..................................................................................................................
Mohamed Hussein
27 يوليو 2019·
قصه مصريه قصيره
.
- أستاذ سيد بيه راجل خمسيني متجوز و عنده بنتين و ولد .
.
- أستاذ سيد بيه خد مراته و الولاد و قالو نطلع لنا مصيف اسبوعين أهو نغير جو و نبلبط شويه في المايه .
.
- قبل مايروحو المصيف فاتو على محل بيبيع مايوهات , جابو مايوهات جديده لعدد 5 أفراد , بقيمة 1500 جنيه , كان عليهم عرض حلو .
.
- أستاذ سيد بيه دفع للقريه السياحيه 25 ألف جنيه في الإسبوعين و بلبط هو و الحاجه و الأولاد في البحر و البيسين , و صرفو قد 7 ألاف جنيه زياده جوه القريه , شاي و قهوه و بيناكولادا و حلبه حصى و شيبسي لحماده .
.
- أستاذ سيد بيه و السيده حرمه و الأنجال رجعو من المصيف بعد ما أخدو التان و هما داخلين القاهره لمحو فرع لكارفور من بعيد , الحاجه قالت له يا سيد أنا سمعت ان كارفور عامل عرض عالحبهان و دبس الرمان , استاذ سيد بيه ماكدبش خبر و الحاجه نزلت هي و الولاد , ملو العربيه طلبات للبيت و الغيط و الجيران و اشترو فواحات و معطر جو و جبنه ولحمه و سمك و توت برازيلي و خوخ ماليزي و خيار ألماني ( عليهم عرض ) و عند الكاشير طلع الحساب 5700 جنيه .
.
- و هما ماشيين في كارفور , الواد حماده موبايله الأيفون وقع فالشاشه اتكسرت , حماده عيط و اتشحتف , مامته الحاجه قالت له ولا يهمك يا حماده , فداك ألف موبايل, الحاج سيد طبطب على حماده ابنه لانه الواد الحيله والوريث و قال له قبل مانرجع البيت هكون مغيّرلك الشاشه , لجل حظهم كان فيه محل موبايلات في نفس المول و حماده غير الشاشه بتاعة موبايله ب 1700 جنيه بس ( كان عليها عرض ) .
.
استاذ سيد بيه رجع بيته و شال هو و الولاد الشنط و معاهم عم عبده البواب , و طلعو فوق فتحو باب الشقه , لقو خير اللهم اجعله خير , كعب فاتورة كهربا , عامله 452 جنيه ( عشان عندهم تكييف بيشغلوه ) , أستاذ سيد بيه مسك الكعب في ايديه و برّق و تنح و تصبب عرقا و قعد يسب و يلعن في البلد و المغول و الفرنساويين و العيشه و اللي عايشينها , وقام مصوره و منزل الصوره على صفحته عالفيس بوك و كتب فوق منها ( هنجيب منين يا كفره ؟! ) .
................................................................................................................
Mohamed Hussein
27 يوليو 2019 ·
لوجي بنتي بعد ما بعتت لها أغنيه لأم كلثوم تسمعها من كام يوم , النهارده بعتت لي الفيديو ده , جيل بيجيب من الاخر وفيديو بيختصر الحدوته
.
أب اللي هو أنا بيلعب دور أحمد زكي ( و يا بنتي لازم تسمعي أم كلثوم و الطرب الأصيل و تنضفي ودنك من أغاني المهرجانات )
و بنت من جيل مختلف بتلعب دور سعيد صالح ( كلّمنا بالشيعبي ) .
و غالبا الأم في المشهد هي يونس شلبي ( عاطف ) .
..................................................................................................................
Mohamed Hussein
26 يوليو 2019 ·
إعترافات فيسبوكيه
.
- أول ما عملت صفحتي دي من 10 سنين , كنت بغير أوي لما ألاقي واحد بيكتب بوست و يتعمل له 11 لايك عليه , و أقعد اقول في نفسي , ابن مين في مصر ده عشان ياخد 11 لايك ؟ ( بصوت سعيد صالح في هاللو شلبي ) , تلاقيه معاه واسطه جامده أو له حد قريبه أمين شرطه في مرور السلام .
.
- الباسورد بتاعتي كانت 5 أرقام , مانا حاسس بقى إن الدنيا أمان و مفيش حد بيفتح شباك أوضة حد على سهوه و من غير استئذان , ولاد الأصول مايعملوش كده , قبل ماتبقى الباسورد دلوأتي 37 رقم و 19 حرف و ترباسين و كالون 3 تكات .
.
- كنت بسيب صفحتي مفتوحه وانا نايم , ماعملش تسجيل خروج , عشان لو حد من الأصدقاء حب يقرا حاجه يلاقي بوستاتي موجوده , يعني معقوله هقفل باب التلاجه بقفل وانا نايم ؟طب افرض حد جاع بالليل أو كان عايز يشرب مايه ساقعه من عندنا؟ .
.
- ياما شوفت رجاله معجبين أوي بصور صديقات و يكتبو تعليقات بقى كلها حب و ورد وإنبهار و شألباظات, مع إن الصور بتبقى لبنات مشاهير و نجمات سيما من أوروبا و أمريكا ( بس هما اللي مش متابعين زي الكابتن باسم مرسي ) , بحس وقتها إنهم شبه عمر الشريف (حسين ) في فيلم إشاعة حب , لما جابوله صور لبنت يعمل انه بيحبها و يوسف وهبي قال له (يا جااااه النبي , بقى بتحب دي ؟ دي رئيسة وزراء بريطانيا ) .
.
- لما أكتب بوست و ألاقي صديقه كتبت تعليق و دخل صديق بعدها ماعملش حتى لايك عالبوست إنما عمل على تعليقها قلب و دبدوب و 17 ريبلاي بقول في سري , وانا اللي كنت فاكرك بتحب بوستاتي و بتحبني لشخصي ؟.
.
- في التايم لاين شوفت هري و حواديت لو جمعتها هتعمل مدونه أولها هنا و أخرها في أخر صلاح سالم , بس أكتر حاجه كانت بتضحكني هي إني ألاقي خروف لسه مألف خبر طازه أو هابد حكايه في ساعة عصاري و أشوف ردود الخرفان السريعه جدا عليه , يعني مثلا خروف يكتب ( عاجل , أنباء عن هروب السيسي و عائلته من مطار ألماظه إلى جهه غير معلومه ) و يدخلو الخرفان يعلقو ( مش هيلحق يهرب , هنجيبه لو راح اخر الدنيا , الطياره هتقع بيهم ) , وقتها بقول في نفسي ( ياولاد كلو بالراحه و امضغو الأكل كويس , الدنيا مش هتطير و البرسيم عمره ماهيخلص ) .
.
- كبار شمامين الكوله زي الأسواني و ممدوح حمزه و خالد أبو النجا , لما بيكتبو بوستات أو تويتات , عمري ماتخيلتهم قاعدين على كرسي عادي زينا كده وزي مخاليق ربنا , دايما بتخيلهم وقت الكتابه قاعدين على حِجْر حد , تلاقي الكراسي مش مكفيه و ( الرجاله ) معذورين .
.....................................................................................................
Mohamed Hussein
26 يوليو 2019·
مندوح
.
ممدوح حمزه لسه عايش ولسه برضه شغال في الأندروير, ماهو المثل بيقول , اللامؤاخذه لما تكبر و تعجز و مايبقاش لها زبون بتشتغل لامؤاخذه تانيه و تكتب تويتات
.
وقالك مولاهم منكوح حمره اللي كان عايز يمسك حكم مصر أو يمسك رئاسة الوزرا عالاقل ( وهو قاعد في الخيمه بيشوف مقاسات العيال ) , المهم يمسك أي حاجه , قالك ايه بقى ؟!
.
عملنا قاعدة محمد نجيب العسكريه في غرب مصر و دي أكبر قاعده عسكريه مصريه , مش عشان نأمن حدودنا الغربيه اللي طولها 1200 متر و اللي بنأمنها من جانب واحد لأن الجانب التاني مش موجود و اللي بيترمي لنا من ناحيتها إرهابيين و سلاح يكفو لتدمير قاره , لأ احنا ماعملنهاش عشان كده , أومال عملناها عشان ايه يا مندوح ؟ مش عارف بس انا عندي قلق ( يشعر بالقلق و معه ثلاثه أخرون ) .
.
وقال كمان إنه الحكومه لها مقر دائم في مدينة العلمين الجديده غرب مصر , كده القلق زاد عندي , يكونشي الحكايه لها علاقه بخريطة تقسيم مصر اللي منتشره عالنت و عند أم نحمده بتاعة الكرشه ؟ تكونشي شوكلاته ( بصوت اسماعيل ياسين ) ؟! .
.
مش عزيزي منكوح حمره
- أي عيل صغير في تالته ابتدائي يعرف أهمية قاعدة محمد نجيب في تأمين حدودنا الغربيه و مواجهة ميلشيات أردوغان و قطر بنت الوسخه اللي منتشرين في ليبيا واللي بيندفع لهم مليارات الدولارات سنويا , وكمان مصر بتتولى حماية المياه الاقليميه الليبيه من سفن أردوغان لحد ما ليبيا ترجع لأهلها بالسلامه .
.
- أي عيل في تالته إبتدائي عارف إنه إداره مصر خلال سنه ولا اتنين هتبقى من العاصمه الإداريه الجديده , مبنى رئاسه و مبنى للحكومه و مبنى للبرلمان و مبنى لوزارة الدفاع و كل الوزارات , و دي مش في غرب مصر يا دوحه .
.
- و أخيرا , مش عزيزي منكوح حمره , الخرايط بتاعة تقسيم مصر اللي انت الوحيد بتشوفها عالنت دي تبرمها و انت عارف تحطها فين , إلا بالمناسبه , مش احنا برضه عملنا أنفاق تحت قناة السويس عشان نوصل لإسرائيل مايه ساقعه و بيبسي كولا بحسب رأيك الألماظات قبل كده ؟ والنبي يا شيخ تبقى تتطمن من حبايبك الصهاينه إذا كانت المايه وصلت لهم ولا لسه .
.........................................................................................................................
Mohamed Hussein
25 يوليو 2019 ·
أنا و بناتي
.
من كام يوم كنت بسمع الست على يوتيوب , شدني فيديو لبنت عمرها 13 سنه بتغني لأم كلثوم في مسابقه , البنت صوتها حلو أوي و احساسها بالموسيقى رائع و الأداء أروع , قمت أنا خدتني الجلاله و حيث إني من عشاق ملكوت اسمه أم كلثوم , اتحمست و بعتت الفيديو للوجي بنتي عالواتس , و معاه الرساله دي :
..............
أنا : اسمعي الفيديو و نضفي ودنك من المهرجانات و من الهباب اللي بتسمعوه , اهي بت قدك أهي
لوجي : بابا , بذمتك سمعت مهرجان رب الكون ميزنا بميزه ؟
.
أنا : لأ
لوجي : شوفت كزبره و حنجره ؟
.
أنا : بصراحة لأ .
لوجي : سمعت إسلام سنوفه ؟
.
أنا : في الحقيقه لأ .
لوجي : شوفت حمو بيكا ؟
.
أنا : برضه لأ
لوجي : طب خلاص , ماتتكلمش معانا بعد كده
.................................................................................................................
Mohamed Hussein
25 يوليو 2019 ·
يا أخي نفسي لما أكبر كده و أغتني و أتشهر , و أبقى أشهر من ساندوتشات الحواوشي و البناطيل الستريتش , إنه حد يقابلني في الشارع يسلم عليا و يقولي كلام كتير و طويل و عريض و هو بيسّلم عليا , و أنا أقوم مبتسم له كده ابتسامه لزجه و أرد عليه بكلمه واحده من 6 حروف ( تحياتي ) , إنت أصلك مش متخيل كمية الجمال و الشمخه و التناكه و النفخه الكدابه اللي في الكلمه دي , بتحسس اللي قدامك دايما إنه بيكلم طاهر القويري و نجيب ساويرس و مارجريت تاتشر و نرمين الفقي مضروبين في خلاط واحد .
.......................................................................................................................
Mohamed Hussein
25 يوليو 2019 ·
خناقه و عاركه لرب السماء داخل زريبة التنظيم الإرهابي الدولي في تركيا عند خليفة الشواذ , الخناقه بين الخرفان الكبار و بين ال ( حوالي ) الصغيرين .
.
الحوالي ( جمع حولي اللي هو الخروف الصغير ) , بيشتكو من إن كل فلوس التبرعات ( التمويل يعني بس بيحبو يدلعو كلمة تمويل فبيقولو تبرعات ) بياخدها الخرفان الكبار و يجمعو ملايين و يركبو عربيات فخمه و يسكنو في قصور , بينما الحوالي الصغيرين مش لاقيين ياكلو و بيشحتو في إشارات المرور .
.
معقوله يا جدعان ؟
- معقوله الإرهابيين اللي بيحرضو عالقتل و الحرق و الخراب يسرقو ؟
- معقوله الخونه اللي بيهربو من بلدهم و يروحو لأعدائها يسرقو ؟
- معقوله الخونه اللي شغلهم ليل و نهار انهم يشوهو بلدهم و جيشهم يسرقو ؟
- معقوله الناس اللي بتكدب و تألف و تزيف حقايق 24 ساعه يوميا يسرقو ؟
- معقوله الخواجات اللي مستعدين للتحالف مع الشيطان يسرقو ؟
- معقوله العيال اللي بيتعمل عليهم حفله ب 10 دولار مقطع يسرقو ؟
.
لا مش معقول أبدا الكلام ده , مستحيل يسرقو , اخلاقهم مابتقولش كده .
...................................................................................................................
Mohamed Hussein
24 يوليو 2019 ·
بعد المولد
.
في يوم زي النهارده بيبقى صباحية المولد , صباحية مباركه يا ولاد , في المولد بقى بتاع امبارح , معازيم مالهمش أي تلاتين لازمه في الحياه و صاجات و طرقعة كاسات و أزاير بيره و ناس بتسكر و بترجع في حجر بعض ومحدش سامع التاني , مولد بقى و موسم , كل سنه وانتو طيبين .
.
قلنا ماشي , جايز لما الناس تنام و تصحى تحط راسها تحت حنفية مايه و تفوق من السطلان بتاع امبارح , و جايز نلاقي حد يسمع
.
القصه يا بني أدمين مش قصة ثورة يوليو ولا عبد الناصر اللي مات من نص قرن و عامل لكو خرم في دماغكو , القصه بحر رمال بيشد رجليكو واحده واحده , القصه اسمها النداهه .
.
بتعمل ايه النداهه دي و عايزه ايه بالظبط ؟ عايزاك تفرد تاريخك الطويل العريض كله قدامك عالترابيزه و تفضل تشخبط فيه و تقطع و تشوه و تحرق , احرق تاريخك و رموزك الوطنيه و القوه الناعمه بتاعتك بإيديك عشان النداهه تحبك .
.
زي ايه مثلا ؟ الورق بيتفرد قدامك من أول ال 10 الاف سنه و تدخل في متاهه , احنا فراعنه ولا مصريين ؟ هما اليهود كانو عندنا ولا كانو فين ؟ مين اللي بنى الاهرامات ؟ شوفتو الاحتلال الانجليزي كان حلو ازاي و عمل السكه الحديد ؟ الملك كان معيش الشعب في رفاهيه و فخفخينا , شوفتو لما حكمكو واحد مصري حالكو بقى عامل ازاي ؟ ده الاحتلال جميل اوي , سعد زغلول كان سكري و بتاع قمار و أم كلثوم كانت شاذه جنسيا , و شجرة الدر كانت بتركن ضهرها على عمود في شارع جامعة الدول , احنا مانتصرناش في 73 و عبد الناصر خسر حرب 48 و ليه جيش مصر يشارك في تحرير الدول العربيه من الاستعمار ؟ ده الاستعمار جميل .
.
وبس يا سيدي , تفضل النداهه تشيل و تهبد فيك , و لما تشخبط و تعجن في تاريخك بإيديك باستخدام الطُعم ( الطعم هنا اسمه البحث عن الحقيقه , و مفيش حاجه اسمها حقيقه مطلقه في كتابة التاريخ , كل دول العالم بتكتب تاريخها بشكل يخدم مستقبلها , اسمه تجميل مش تزييف , بيعملوه عندهم في بلادهم و بيصنعو بطولات من ورق و من شواشي الدره , بس عندنا عايزينك تعمل العكس , ولازم تدور عالحقيقه يا زداحمد , انت اللي هتغني يا منعم ) , بلعت الطعم يا حماده , روح لحبيبتك النداهه .
.
هو التاريخ مهم ؟ لا ده مهم جدا , ده الحيطه اللي بتسند ضهرك عليها , ده الموتور اللي المفروض يدفعك لقدام , ده قوتك الناعمه اللي بتخلق جواك روح معنويه تخليك تنحت في الصخر .
.
مين بقى النداهه ؟ النداهه هي اللوبي الأمريكي الصهيوني البريطاني و صبيانهم في مصر زي يوسف زيدان , وصبيانهم في المنطقه زي قطر بنت الوسخه , النداهه مستعده تصرف ملايين و مليارات عشان تعجن في تاريخك العجنه دي .
.
وهو العجن في التاريخ بيكون له مضاعفات ؟ طبعا يا مولانا , و اهم مضاعفاته اسمها ( طمس الهويه ) , انت مهزوم و مش عارف لك عرق ولا نسب و ملكش انتصارات و رموزك كلها فاسده و شاذه , وصلت للمرحله دي ؟ تمام , كده النداهه مبسوطه منك أوي , و فخوره بيك , اه و عهد الله .
...........................................................................................................
Mohamed Hussein
23 يوليو 2019 ·
لو عايز تفهم هات عقلك و تعالى
.
أهم كام سؤال بينطو قدام عينيك لما تيجي سيرة عبد الناصر أو ثورة يوليو ( بالمناسبه انا لا حضرت عبد الناصر و لا أوعى عالسادات , و بالتأكيد جدي مكانشي من الظباط الأحرار ولا عبد الناصر هيديني وظيفه دلواتي ) .
.
1- عبد الناصر ضيع السودان مننا !!
لا غلط , مصر و السودان كانو تحت الاحتلال , بيحكمهم طرطور اسمه الملك اللي بيحركه قنصل بريطانيا , فلما بتستقل ك دوله بتستقل بنفسك وبس , سهله خالص أهي
.
2- مجانية التعليم و شوف النتيجه دلواتي !!
غلط , دي مش مشكلة عبد الناصر , إنت أقريت مبدأ انساني و أدمي , عداله اجتماعيه , بعد كام سنه كان أعداد الخريجين كتير أوي و كله بيتعلم ببلاش و سوق العمل مايستحملش , والدوله ماعندهاش فلوس تبني مدارس , هنا بتيجي مسئولية الرئيس اللي في السلطه , اللي هو تحديدا كان مبارك أو السادات , عندك مبدأ محترم وضعه عبد الناصر بس ظروف الحياه بتتطلب تعديل فيه , خلاص عدّله , خلي التعليم المجاني لحد تالته ثانوي بس , و الجامعه يدخلها المتفوقين أو يدخلها طلبه بفلوسهم زي مابيحصل في بريطانيا .
.
3- شوف الدولار كان بكام أيام الملك !!
- ده اسمه هبل يا حماده , تخيل انك راجل متجوز و مخلف 100 عيل , معيّش اتنين منهم كويس اوي و 3 عيشه معقوله , و 95 بتعاملهم بالسخره و الكرباج و مش موفر لهم أدنى متطلبات الحياه , ال 95 بيشتغلو و يجيبولك دخل وفلوس و قطن و مابتصرفش عليهم حاجه , لا بتستورد لهم ولا بتصرف عليهم تعليم و صحه و حياة أدميه , هيتوفر معاك فلوس كتير ( كدوله ) , لكن كشعب هتبقى تحت خط الفقر ب 17 خط , ده الوضع أيام الملك , مبادئ ثورة يوليو عكست الأيه , وبقيت هتصرف عالشعب و تخلي كل مواطن يحس انه بني أدم مش عبد , دي لها فاتوره و تكلفه , بتيجي بالتأكيد على حساب ميزانية الدوله و سعر العمله .
.
4- الإنجليز عملو السكه الحديد فالمفروض نحبهم و نبوسهم من بؤهم
- لا , هما عملو السكه الحديد عشان يعرفو ينقلو البضاعه بتاعتك , القطن و خلافه , يعني مش محبه ولا تغزل في جمال اللي خلفوك , مشروع هيعملوه بعشر قروش و يجيبو من وراه 100 قرش , و طبعا كان عندهم اعتقاد انهم هيحتلونا للأبد, فلما جيت انت رميتهم بره بلدك أكيد وقتها مكانوش هيفككو القضبان و ياخدوها معاهم .
.
5- عبد الناصر دمر زراعة القطن
- لا , انا اتولدت 76 و حضرت كارنافال اسمه زراعة القطن ممكن أكتب عنه مجلد كامل , زراعة القطن اتدمرت في أواخر التسعينات , وقتها كان الحاكم الفعلي لمصر اسمه ماما سوزان و بابا يوسف والي .
.
6- عبد الناصر فتت الأرض الزراعيه
- غلط , الأرض الزراعيه مش بتتفتت بالتوريث , بتتقسم على ورق , اسمها الحيازه , الأرض اللي كانت 10 فدادين اتورث فيها 5 و بعدين عشرين , كل واحد من العشرين بياخد قيراطين تلاته , محدش بيبني سور حوالين أرضه , هي حته حديده عرضها 5 سم بتتزرع ف بطن الأرض من تحت عشان تحدد ورث كل واحد , يعني مفيش شبر من الأرض مابيتزرعش بسبب التوريث , يارب تفهم
.
7 - يعني كده نعتبر ان عبد الناصر نبي و قديس ؟
- لا , كان رئيس وطني شريف محترم , أخطأ في حاجات ممكن نقول , لكن اللي حضرتك بتهري فيه ده اسمه هبد , خروف بيركبك و بيسرح بيك , و من وراه دول حريصه جدا على تشويه اسم عبد الناصر
......................
ملحوظه , الصوره دي بتعني حاجتين , الزعامه و محبة الناس , و الزعامه غير البشويه خالص , ماينفعش تشتريها بفلوس , و محبة الناس مابتجيش بالكرباج .
...........................................................................................................
Mohamed Hussein
23 يوليو 2019 ·
لو سمحتي يا مدام
- نعم يا فندم
.
التعليق بتاع حضرتك على بوست جمال عبد الناصر
- ماله التعليق ؟
.
يعني هو مش واضح شويه
- اه فهمت , حضرتك عايزني أوضحه اكتر عشان تعرف وجهة نظري ؟
.
لا, الحقيقه أنا عايزك توضحيه أكتر عشان أعمل لك بلوك بضمير مستريح .
....................................................................................................................
Mohamed Hussein
23 يوليو 2019 ·
صور حصريه للعز و الرفاهيه و الفخفخينا اللي كان عايش فيهم الشعب المصري أيام جلالته , أيام الإستعمار والإستحمار الوسطي الجميل .
.
- الصوره الأولى توضح كيف أن الموضه كانت بتنزل في مغاغه و العياط و السنبلاوين و كفر غنام و كوم الشقافه قبل ما تنزل في باريس .
.
- في الصوره التانيه مواطن مصري شايل جلالته عشان يصطاد بط , المواطن ده هيرجع القصر بتاعه اخر النهار يلاقي الخدامه الفرنسيه مجهزاله البانيو و الجاكوزي والفولاتايل أويل , و بتاعة المساج الألمانيه بتدلك له عضلة السمانه .
.
- في الصوره التالته مواطن بيطلب من الباشا إنه يكون عنده شبشب يلبسه في رجله , شبشب و العياذ بالله , شوف طمع الناس يا اخي , مش كفايه انه يلاقي حصيره مقطعه ينام عليها ؟ لا و كمان عايز يلبس شبشب .
...................
الله يسامحك يا عبد الناصر انت و الظباط الأحرار
يالله يا جدعان قولو ورايا #الإستعمار_التام_أو_الموت_الزؤام .
......................................................................................................
Mohamed Hussein
22 يوليو 2019 ·
الصوره الكامله
.
عشان ماتتخضش كل مره و تشهق شهقة الملوخيه و تقول يا لهوي مع كل حدث و تقوم ضارب ايدك على صدرك كداهو , كوكب الأرض و منطقة الشرق الأوسط عشان نفهم اللي بيحصل فيهم لازم نجيب قرطاس فيشار كبير و نتفرج كأننا بنتفرج على مسرحيه لها مخرج و أبطال و مؤلف و كل واحد عارف دوره كويس , نتفرج و احنا حاطين دماغنا في تلاجه .
.
1- إيران سيطرت على سفينة شحن بريطانيه قامت بريطانيا تمخضت وقالت نعلق حركة الطيران للقاهره , يا ستي ايه اللي جاب القلعه جنب البحر ؟ لا هي القلعه مش جنب البحر ولا حاجه , كل الحكايه ان ده موسم سياحي و انت لسه منظم بطوله ب 24 دوله و عشرات الالاف من جنسيات مختلفه و ظهرت للعالم بشكل متحضر و مستقر و عندك قدرة تأمينيه هايله مهما كانت المؤامره ضدك , طب نضرب لهم كرسي في الكلوب بقى , اهو عيار مش هيصيب بس هيدوش .
.
2- مفيش عداوه بين بريطانيا و أمريكا و اسرائيل من جهه , و إيران من جهه تانيه , فيه توزيع أدوار , ديب و تعلب بيلعبو على بقره عشان يحلبو لبنها , ومش بعيد يكونو بيقسمو سوا , البقره بقت عارفه لان الكلام بقى يتقال صراحة , بس مش عارفه تخرج من الخيّه دي إزاي , لأنها دخلتها من سنين طويله أوي .
.
3- إيران و تركيا دول استعماريه قديمه , زيهم زي الكيان الصهيوني حديثا , كلاب السكك المسعوره مابتعضش في بعض , و بالتالي ماتنتظرش أي حرب بينهم ولا بعد 50 مليون سنه , ممكن بس يتهاوشو على صيده ( بلغة وزير خارجية الكشك القطري السابق ) .
.
4- يعني ايران و تركيا و تنظيم الإخوان الإرهابي و حركة حماس بتاعة 2006 و الكشك القطري و قناة الخنزيره و جماهير الجزاير مش هيحررو لنا القدس ؟ لا والله يا مولانا , كان على عيني , ولا هيقتلو جندي صهيوني واحد , انما هيفضلو يبيعو لك شعارات و خطب رنانه عشان انت بالنسبالهم اسمك الزبون الغشيم , الغشيم المسلم اللي بيعرفو يركبوه من قديم الأزل باسم شعارات نصرة الإسلام , من أيام الدوله الامويه و العباسيه , و زيهم في أوروبا لما حبو يركبو الغشيم بتاعهم في حروبهم الإستعماريه , قالو له بنحارب بإسم الصليب , لعبة قديمه و مابتخيبش أبدا , و ربنا يخلي الغشيم .
.
5- الدوله الوحيده في منطقتنا العربيه و في الشرق الأوسط , اللي لها سياسه متزنه و رصينه و قويه , اللي تاخد منها وانت مغمض عينيك هي مصر , ده كلام المفروض يقوله أي واحد حتى لو مش مصري بس متابع الاحداث , غير كده اقلب , مابين خاين أو عبيط أو أرعن أو لسه صغير .
.
6- مصر كان لازم يكون لها وجود في دول الجوار بعد ماشوفنا منهم و من حدودهم معجنه في اخر 10 سنين , و هنا بيبقى وجودك مش بغرض استعماري ولا بأطماع , انت مش عايز أكتر من إنك تحمي أمنك القومي و تقفل حنفيات الإرهاب من مهدها , من عند المحابس العموميه , الموضوع أشبه بإنك تكون عايش في بيت كبير , بس جنب منك أدغال من كذا جهه , و الأدغال دي بترمي عليك تعابين و فيران و سحالي , منطقي جدا انك هتقف جنب أي واحد بيحاول ينضف الأدغال دي و تساعده على قد ما تقدر .
........................................................................................................................
Mohamed Hussein
21 يوليو 2019 ·
أصدقائي الجدد ...سوسن و زينه و عنتر و شلبيه , و أخرون .
.
الحكايه بدأت بغيره محموده , ست ساكنه في العماره اللي قدامنا , بتتكلم عربي كويس بس ملامحها بتاعة شرق أوروبا , بتنزل كل يوم من شقتها في نفس التوقيت الساعه 1 بالليل , معاها كيس كبير مليان مكرونه مسلوقه و تلم القطط و الكلاب حواليها , هما عارفينها , تحط لهم اكل كلهم و احنا نشوف المشهد اليومي ده من البلكونه , لحد ما قررنا نعمل زيها , و اللي شجعنا اكتر ان الست دي اختفت فجأه , سافرت تقريبا اجازه , و أصحابها مستنيين بدون جدوى .
.
اتشجعت انا و البنات و أخدنا بواقي اكل من البيت و نزلنا , فيه قطه قدام العماره مخلفه 4 صغيرين , دي لها مكانه خاصه و عارفينها من الأول ( سوسن ) , شخصيتها عجيبه و بتدافع عن ولادها بشراسه و مش عايزه حد ياكل غيرهم , حتى جوزها بتوقفه انتباه جنبهم لحد مايخلصو هما أكل و لو اتبقى حاجه ياكلها ( الله يرحم فاطنه لما كانت بتقول للعمده ان اكبر حته في البطه ياخدها أبو العيلا ) , احنا اتغيرنا أوي يا لينا .
.
الموضوع وسع مننا شويه و بقينا نتنقل للرصيف التاني اللي فيه قطط اكتر , عرفونا و بقو يستنونا في نفس الميعاد , اهم واحده فيهم هي ( زينه ) , قطه سمره نظرها ضعيف , لازم تحط الأكل قدامها مباشرة عشان تشوفه , زينه قطه طيبه جدا مع بقية القطط ( اللي بيوصل عددهم ل 15 ) , و أي قطه عايزه تاكل معاها او حتى تاكل اكلها مش مهم , مش بتزعل .
.
شخصية زينه بدأت تظهر في موقفين , أول موقف لما السيد ( عنتر ) الكلب اللي بيحرس جراج العماره بقى ييجي يقف لحد كتفي فوق بمنتهى الجرأه عشان معايا كيس فيه أكل , و مايصبرش حتى لما أحط له منه , عنتر بقى يمشي ورايا لحد الرصيف التاني عشان ياكل أكل القطط اللي بحطه هناك , و هنا ظهرت زينه , البطله الخارقه , اللي هجمت على عنتر و هبشته ( أه قطه كيوت نظرها ضعيف بتهجم على كلب بلدي دكر علو كده ) , عنتر خاف و جري , و زينه في المشهد ده كانت بتحمي كل اصدقائها و بنات جلدتها من القطط .
.
تاني موقف حصل لزينه هو ظهور قطه صغيره اوي , بنت اسبوعين , مش بنتها انا متأكد , القطه دي ظهرت من عمارة مجاوره و بمجرد ظهورها لقيت زينه قررت انها تحميها و تتبناها و تقف جنبها و هي بتاكل عشان محدش يقرب لها , و تفضل تلف حواليها لحد مالقطه بنت الاسبوعين تقرر انها تمشي و ترجع للمكان اللي بتنام فيه .
.
السيد عنتر بقى بعد ما ضمن أكله كل يوم , بقى يعمل حركه عجيبه , يقف في التقاطع بين العماير و يهوهو بصوت جامد , تقوم تيجي شلة أصحابه من الكلاب و عددهم 8 , عشان ياكلو و يسترزقو , شلة عنتر عباره عن 7 دكوره و كلبه واحده نتايه ( شلبيه ), و طبعا لكو ان تتخيلو المشهد , كل كلب منهم ياكل و قبل ما يغسل إيده و بؤه يروح يتجوز شلبيه , تعبوها معاهم اخر تعب والله , وانا مش عارف هي مستحمله كده ليه و ليه ماشيه مع شلة صيع ؟
.
الحمد لله , مشينا في الموضوع من حوالي 5 شهور , و مش بنفوت يوم تقريبا , انا اعتبرت الحكايه ِورْد يومي , و تكفير ذنوب , يومنا مابيخلاش و يمكن تكون الحاجه البسيطه دي هي المنجيه , و عايز أقول لحضراتكو الموضوع مش مكلف ولا حاجه , و عشان تأكل 15 قطه و كام كلب ممكن تتكلف في المتوسط 5 جنيه يوميا ده لو معندكش بواقي اكل في البيت , ممكن ناس كتير تعملها و تاخد أطفالهم , مهم اوي تعلموهم الرفق بالحيوان .
.
الأكل ممكن يكون ايه ؟ أي حاجه يا مولانا , كام رغيف عيش و تبلهم بشوربة فراخ , كيس مكرونه من نوع رخيص تسلقه , بواقي و عضم و جلد فرخه كنت بتاكلها , بواقي سمك , و هكذا .
.............................................................................................................
Mohamed Hussein
20 يوليو 2019
إدارة ليفربول بتخطط إنها تخلّي الفلاح بتاع نجريج اللي جاي من ورا الجاموسه اللي اسمه محمد صلاح , تخليه أغلى لاعب في الدوري الإنجليزي (الأقوى في العالم ) , براتب سنوي 22.5 مليون جنيه سترليني , يعني نص مليار جنيه مصري في السنه , يعني مليون ونص في اليوم , يعني اليوم اللي صلاح هيكون فيه راحه و بيهشتك البت مكه هيلاقي جرس الفيلا بتاعته بيرن و واحد بيقوله اتفضل مليون ونص بتوع النهارده عشان انت هشتكت البت مكه , ربنا يزيد و يبارك .
.
إلى الساده القاطنين في إدارة ليفربول , نحيط سيادتكم علما بإن أنا كمان فلاح وعهد الله و جاي من ورا الجاموسه و أشول برضه, و مش هقول أكتر من كده بقى .
..................................................................................................................
Mohamed Hussein
19 يوليو 2019 ·
مكاسبنا بالجمله .
.
- شاب رائع اسمه محمد فضل
- رجال شرطه وجيش قامو بعمل خرافي
- حفل افتتاح و حفل ختام بيتوصفو بالعالمي
- تجهيز ملاعب في 4 شهور !! .
- صورتنا و شكلنا قدام العالم , و ستاد القاهره اللي اتملى في كل ماتشات مصر .
- خلصنا من اتحاد الكوره بتاع السبوبه و عرفنا قيمة المدرب الوطني
- اختبار تحدي لقوتنا و قدرتنا على تأمين أي حدث عالمي مهما كنا مستهدفين
- و أخيرا , و الأهم جدا جدا جدا , كلمة قالها المعلق الجزائري و قالها رئيس الاتحاد الموريتاني و غيرهم كتير ( مصر هتتعب أوي أي دوله تنظم البطوله بعدها , لأن محدش هيعرف يعمل اللي احنا عملناه , بالرغم من إنه أي دوله هيبقى قدامها فرصه سنتين تجهز نفسها و ملاعبها , سنتين مش 4 شهور ) .
.
منتخب الجزائر قدم أفضل كوره في البطوله , روح و أداء و عزيمه و إصرار .
ألف ألف مبروك لمنتخب الجزائر و لمدربهم الوطني الرائع جمال بلماضي اللي عرف يخلق روح جوه الفريق , و للشعب الجزائري الشقيق ( الصيع و الأوباش و صبيان تركيا و قطر لأ ) .
....................................................................................................................
Mohamed Hussein
19 يوليو 2019 ·
ده حالي بعد ما فضلت يومين أحجّز و أهدّي النفوس في موضوع المصريين و الجزائريين , و يا جماعه عيب , يا جماعه ما يصحش , واضح إني نجحت نجاح باهر , نجاح منقطع الهدوم .
.
يا سوسن , يا سوسن , الجمهور مابيعرفش يوقّفها , مابيعرفش يوقفها .
Mohamed Hussein
18 يوليو 2019 ·
قواعد الزوجيه الأربعون ....قاعده رقم 17
.
مراتك هتجيلك في ساعة صفا وانتو لوحدكو , لابسه و متشيكه و بارفانات و حبشتكانات , تقعد جنبك لازقه فيك على غير العاده , وتبوسك بوسه في خدك مع انها ماعملتهاش من أيام ماكانت الفرخه ب 3 رجول , و تمسك صوابع ايدك تلعب فيهم و تبتسم و تقولك بصوت رقيق شبه صوت البنات بتوع خدمة العملا في الشركات الوهميه اللي بتعبي الهوا في أزايز , هتقولك حبيبي ( خلي بالك إن أخر مره قالت لك فيها حبيبي كان في عاشورا اللي فات ) , هتقولك حبيبي بصوت رقيق أوي و عنيها بتلمع و قال يعني مكسوفه و مرتبكه و الطقم بتاع نرمين الفقي ده , حبيبي ممكن تعترف لي و تحكي لي عن مغامراتك مع الجنس اللطيف وانا مسامحاك بس توعدني ماتكررهاش تاني , اعترف لي حبيبي و هسامح و محدش هيعرف خالص , ده ربنا بيسامح , وتقوم بايساك بوسه في خدك التاني ولاعبه في صوابعك اكتر و عنيها تلمع أكتر .
.
ممممممممممم اوعى يابني , اوعى تضعف و تنهار قدام طقم الحنيه و تعترف , لانك أول ماتعترف هتلاقي وش خشب بتاع نعيمه الصغير بعد ماكانت نرمين الفقي , و في ظرف ساعة زمن هتلاقي قرايبك و قرايبها و كل الحبايب و الأهل و الأنجال في الشرق الأوسط و شمال أفريقيا وامبابه و البدرشين عرفو مغامراتك , و هتعايرك بيها في الرايحه و الجايه و تطلع على جتتك المتداري و المستخبي و المستنيل على عينه , و مش بعيد تساومك على قيراطين الأرض اللي حيلتك في البلد .
.........................................................................................................................
Mohamed Hussein
18 يوليو 2019·
عبد الفتاح السيسي يستقبل الرئيس الجزائري و يشيد بأداء منتخب الجزائر في بطولة أفريقيا .
........................
........................
ايه ده , يعني عالمستوى الرسمي مش هنلعن جدود اللي خلفوهم ؟ لا والله حضرتك
طب خلاص نلعن جدودهم شعبيا و جماهيريا و فيس بوكيا ؟ برضه لا سيادتك
.
ليه لأ ؟ انت مش مصري يا أخي ؟ مابتغيرش عالبلد دي ؟ لا مصري للنخاع و للثماله و بغير عليها قدك مليون مره , بغير عليها من الهوا الطاير كأنها حبيبتي و أحيانا كأنها بنتي .
.
طب ليه بتعمل كده ؟ تعالى أقولك
يعني ايه العقل ؟
- يعني ماتقعش في خطيئة التعميم و تقول الشعب الجزائري همجي و بربر و كيت و كيت , و إلا ماتزعلش لما نفس اللي انت بتقول عليهم همج يكررو نفس الخطيئه و يقولو شعب رقاصات عشان شافو كام فيلم مصري فيهم رقاصه , و ماتلومش على قناة الخنزيره لما كانو بيجيبو خمسه سته مصريين على شط ترعه رافعين صوابعهم بعلامة رابعه و يكتبو الشعب المصري !! .
.
يعني ايه الحكمه ؟
- يعني ماتنجرش للهبل ده و الفتنه و حاول تصدق إن دايما وراها اللي بيشعلها و عايزها تكبر , واللي بيشعلها ممكن يكون أي حد أو اي جهه في أي دوله تانيه و أي قاره .
.
يعني ايه الكبير بقى ؟
- يعني انت , يعني حضرتك , الشعب اللي حضارته 10 الاف سنه , وعدد سكانه يساوي تلت عدد سكان الوطن العربي , ولو خدنا على كلام و تصرفات كام ألف صايع من كل دوله هنقطع علاقتنا بالدول العربيه كلها , الأردن و فلسطين و الكويت و تونس و الجزائر و المغرب و خلافه , سمّي الحاجات بمسمياتها , اسمهم شوية صيع و خرفان ولاد كلب , ماسمهومش الشعب الفلاني , عيب يا مولانا , مش وانت نايم على بطنك على سرير هتحكم على شعب و توصفه بالكامل بصفه معينه , حاول تكبر
.
و أخيرا , هنشجع مين ؟
شجع اللي تشجعه , الجزائر , السنغال , ياكشي تشجع مركز شباب السنبلاوين , يهمني ان البطوله اللي بتتلعب على أرضنا تخرج بأجمل وجه و أجمل صوره و أفضل تأمين , وبلاش تكون طعم عبيط لنار ممكن تحرق شعوب .
.
هو انت خايف منهم ؟ لا خالص
طب احنا نقدر عليهم ؟ نقدر عليهم وعاللي خلفوهم و عالقاره دي بحالها , انما الحكايه مش عاركه في خماره , و مش عشان شوية صيع ولاد كلب أغلبهم أكاونتات وهميه ننجر للهبل ده .
.
طب لو حد منهم غلط أو خرج عن القانون ؟ هينضرب بالجزمه و يتعلق على عمود نور , و بالقانون برضه .
.
أيوه يعني نعمل إيه ؟ يعني عندنا ضيوف نشيلهم فوق راسنا , المحترم منهم , واللي يقل أدبه هيتحاسب ,دي مسئولية الدوله , أما احنا كمواطنين فلو سمحتو , من فضلكو , اقتلو الصيع و المرتزقه بالتجاهل , التجاهل و بس .
.
اللهم قد بلغت .
..........................................................................................................
Mohamed Hussein
18 يوليو 2019 ·
صباح الخير
.
أردوغان قرر إنه يشتري منظومة الصواريخ الروسيه إس 400 , قامت أمريكا سابته لما خلص خالص وقالت له طب انت كده براءه , روح بيتكو بقى , مفيش طيارين أتراك هيتدربو عندنا ولا فيه مشاركه في برنامج الطياره f35 , و موضوع عضويتكو في حلف الناتو ده هنسيبه للحلف يقول رأيه فيه .
.
قامت تركيا ماسكتتش و ردت بتصريح ناري و مقدمة ناريه زي بتوع معتز مطر كده , وقالت بالفم المليان و بنبره حاده ( قرار واشنطن سيسبب جرحاً لا يلتئم في علاقتنا ) .
.
خلاص يا أردغ ماتزعلش خالص , النهارده 18 يوليو , خليك حافظ التاريخ ده و كل سنه تعمل له عيد ميلاد , سميه ( عيد ميلاد جرحي أنا ) .
.
بس نصيحه لوجه الله , ماتطلعوش تصاريح ( ناريه ) أكتر من كده , أنا بس خايف عليكو من الفتاء و خايف أكتر لا ترامب تكبر في دماغه و يقعد على تويتر في ساعه عصاري ويكتب توتيه , أي تويته حتى لو كلمتين , يقول مثلا ( مابحبش تركيا ) أو يقول ( أحبوش ) و نصحى تاني يوم نلاقي الليره بتاعتك قالعه ملط و بتجري في الشوارع تقول شوفو لي حاجه تسترني .
.........................................................................................
Mohamed Hussein
17 يوليو 2019 ·
الجزائر ولا السنغال , السنغال ولا الجزائر ؟
.
- هو احنا لنا تاريخ مشترك مع الجزائر ؟ أه طبعا
- شاركنا أيام عبد الناصر في ثورات تحرر الدول العربيه من الاستعمار و من بينها الجزائر ؟ أكيد .
- و الجزائر وقفت جنب مصر في حرب اكتوبر و حرب الإستنزاف ؟ أه حصل
- واحنا و هما بنتكلم لغه عربيه هي لغتنا الرسميه ( حتى لو كانو في الواقع بيتكلمو فرنساوي اكتر ) ؟ اه .
- و عندنا مبنى فخم كده و شارع بإسم المبنى و كيان بيجمع العرب كلهم حتى لو كان دوره محدود حاليا , اسمه جامعه الدول العربيه ؟ أه و الله .
.
- طب السنغال يعني أعدائنا ؟ لا خالص , ولا عمر كان فيه بينا عداوه , دوله أفريقيه زيها زينا , يعني ولاد قاره واحده و أم واحده .
- طب هتشجع مين ؟ أنا ولا انت ؟ أنا ؟ هشجع الجزائر
- بس أنا عايز أشجع السنغال ؟ إنت ؟ أه , طيب حقك , عادي انت حر , بس شجعها في البيت لو سمحت .
.
- لا لا انا هروح أشجع السنغال في المدرجات واقعد وسط الجماهير السنغاليه و جنب بكاكا داسا ؟ لا حضرتك مش هينفع , هيبقى شكلنا بايخ أوي
.
- إزاي شكلنا بايخ وليه ؟ عشان تخيل مثلا , بطوله في تونس أو الجزائر و مصر وصلت النهائي و هتلاعب نيجيريا , بقولك مثلا مثلآ, و فوجئت في النهائي ان اغلب جماهير الدوله العربيه المضيفه بتشجع الفريق التاني !! الصوره و المشهد ده مش هيتنسو لسنين طويله و هيعملو غصه كده مالهاش أي لازمه .
.
- بس هو يعني حضرتك نسيت اللي حصل في أم درمان ؟ لا والله مانسيت , ذكريات هباب , بس السياسه اجمالا مفهاش ديمومه , و الكام ألف جزائري همجي وقتها ماسمهمش شعب الجزائر , التعميم هنا كارثه
.
- طب مش واخد بالك بيقولو عننا ايه عالسوشيال ميديا ؟ لا انت كده بلعت طعم بيترمي لك من عشر سنين , السوشيال ميديا ده عالم وهمي , بينشط عليه الخونه و الخرفان و الصيع و اللجان الإلكترونيه .
.
- يعني ايه الكلام ده ؟ يعني شوية الجزائريين اللي بيشتمو فينا حاليا هتلاقي أغلبهم اكاونتات فيك مضروبه عاملها واحد صايع في الدوحه أو حتى في تل أبيب , و الأكاونتات الحقيقيه ماسمهوش جزائريين , اسمهم أعضاء التنظيم الإرهابي الدولي اللي بيحملو الجنسيه الجزائريه , هتلاقي فيه زيهم في تونس و الأردن وفلسطين و الكويت و كل دوله , اللي هما بتوع أردوغان خليفة المسلمين و اللي بتلاقيهم راشقين 24 ساعه على مواقع قناة الخنزيره , كارثه هنا برضه تقول ان دول الشعب الفلاني , التعميم كارثه .
.
- اه دانت بقى عايز تلعب دور حمامة السلام أبو قلب خسايه ؟ لا والله يابني , لا حمامه ولا غراب , انا عايزك بس تهدى و اللي هيّجو الدنيا في أم درمان مايلعبوش عليك نفس اللعبه دلوأتي , لان غالبا هما هما نفس الجهه .
.
- طب يهمني ايه ؟ يهمني إن ستاد القاهره يبقى مليان و الشكل يبقى حلو اوي بغض النظر عن مين هيفوز , و التامين و الصوره طبعا لان ده نهائي هينقله العالم كله .
.
- يعني أفهم من كده انك هتشجع الجزائر عشان العمق العربي و الحلم العربي والافتكاسات دي ؟ لا خالص , انا هشجعها عشان بصراحه يستاهلو يفوزو باللقب , عيال بتموت نفسها من أول البطوله , بياكلو نجيلة الملعب , عندهم روح و عزيمه و اصرار , و بيلعبو كوره حلوه , هشجعها عشان جمال بلماضي و رياض محرز و زمايله .
.
- طب اخر سؤال بقى , ماذا لو مصر كانت كملت في البطوله و قابلت الجزائر في النهائي و حصل حشد بالشكل القمئ اللي شايفينه حاليا ؟ والله يابني ده ستر ربنا و إلا كنا هنحتاج الجيش التاني والتالت الميداني عشان يأمنو ماتش كوره .
.....................................................................................................
Mohamed Hussein
16 يوليو 2019·
كنت دايما بستغرب أوي من موقف الكويت في حكاية الرباعي العربي و قطر , بستغرب من هنا لحد الفلوجه , و من هنا لحد حرب تحرير الكويت , يعني ايه وسيط بالظبط ؟ وسيط في ايه مش فاهم ؟ عيل صايع بيحاول يحرق و يخرب بيوت ناس محترمين جزمة أقل واحد فيهم برقبة الصايع و أهله , انت بقى داخل وسيط ازاي ؟ و المفروض تعمل ايه كوسيط ؟ تقول لنا معلش يا جماعه ده الواد الصايع ده من لحمنا فسيبوه يحرق بيوتكو عادي عشان نفسيته ماتتعبش وبشرته متتأثرش ؟ .
.
الحقيقه استغرابي مكانش استغراب , و في حالة زي كده بشوف إن الوسيط هو طرف متواطئ زيه زي العيل الصايع بالظبط , طيب ماشي , الكويت مليانه خرفان , و أي خروف ملوش أي تلاتين لازمه ممكن يبقى عضو برلمان و يطلع يشتم في مصر و يتطاول على أسياده , برضه ماشي , مش مشكله , كلب و بينبح , تيجي سيرة بوش الإبن يقولو سيدنا و ابن سيدنا , و تيجي سيرة جنود مصر اللي حررو أرضهم يقولو كنتو بتحاربو بفلوسنا , ماشي , السياسه إجمالا مفهاش ديمومه , و احنا اتعودنا ننسى بسرعه و نفضل في توب الكبير اللي مش بيصغر عقله .
.
لحد ما وصلنا لحكاية ترحيل أعضاء الجماعه الإرهابيه من الكويت ,الحكايه دي ماجاتش بالمحايله ولا بطريقة عشان خاطرنا و عشان خاطر العيش والملح , المسئولين في الكويت مش هيعملو كده إلا للشديد القوي , و الشديد القوي بيعني إنك كنت عايش طول السنين دي ( بتتوسط للإرهابيين و ترعاهم و تتوسط للصايع اللي بيصرف عليهم ) على طريقة جحا لما قال ( مش بعيد عن مؤخرتي ؟ يبقى خلاص ) , و توهمت إن الحكايه بعيد عنك , لحد ماجت لحظه ولقيت في حجرك أدله بتقول إن الموضوع كله ( مش بعيد عن مؤخرتك خالص ) وإن اللي اتخطط لمصر و السعوديه و الإمارات و غيرها كان متخطط لك زيه بالظبط بس انت اللي غشيم , الحكايه في اعتقادي لها علاقه بصندوق و كنز المعلومات اللي اسمه هشام عشماوي و اللي اكيد عصرناه عندنا , و هشام عشماوي في رأيي ممكن نعتبره تاني اهم حدث يخص الإرهابيين بعد اقتحام جبل الحلال و الحاجات اللي لقيناها فيه .
.
أتمنى من طويل عمره و من الساده الأفاضل في دولة الكويت الشقيقه يكونو فهمو و استوعبو , و يفهمو إن المتغطي بالإخوان عريان , و إن الأحمق بس هو اللي بيحط راسه في بؤ ديب و يراهن على وعد الديب و أخلاقه .
..................................................................................................
Mohamed Hussein
16 يوليو 2019 ·
يا حكومه , مراتي بتأكّلني مكرونه مسلوقه و جرجير و سلطه خضره و بقدونس و بتأكّل القطط بتاعتها سمك و فراخ و لحمه و عكاوي , ولما أسألها بتعملي كده ليه ؟ تقولي حرام عليك , القطط دي من فصيلة الحيوانات أكلة اللحوم .
مش عارف أقنعها إزاي إننا من نفس ذات الفصيله , هل أكل دراعها مثلا عشان تصدق ؟.
