Mohamed
Hussein
26 مارس 2015·
اعتراف
............... بوست للتاريخ ( و الجغرافيا جايز )
.
الجيل بتاعنا ده
كان جيل مسالم , و أخر عهدنا بالعنف و المخططات الخارجيه هو أفلام ناديه الجندي و روايات
اسمه ايه ده اللي انا مش فاكره , و كنا بنسمع عن الثورات دي سمع خير كأنها شئ فولكلوري
جميل هي و خضره محمد خضر , و الحروب بنقرا عنها في كتاب التاريخ , و في الجرايد بقى
بنحل الكلمات المتقاطعه بتاعة الأهرام و نقرا الهري بتاع عبد الوهاب مطاوع و نتعشى
و نغسل رجلينا و ننام .
.
فجأه و من غير
مرحله انتقاليه ولا انتقال سَلس لحالة السمليه العجيبه اللي كنا فيها لقينا نفسنا في
حاجه كده أشبه بمدينة ملاهي مخيفه , ثورات و حروب و جماعات و ارهاب و حريه و فيس بوك
, لقينا نفسنا بنركب المرجيحه و بعدين نتزحلق و ننزل على زحليقه كبيره لتحت , خبطه
خفيفه مش بتعور , شويه كمان و الإضاءه بدأت تضعف و شكل المراجيح بقى واخد شكل وحوش
حقيقيه , فركنا عنينا و قولنا دي تهيؤات , شويه كمان و بدأنا نسمع صوت حقيقي مجسم ثلاثي
الأبعاد للوحوش دي , طب يعني ممكن نكون متأكدين بس مش عايزين نعترف عشان الأطفال الصغيرين
اللي معانا في الملاهي مايخافوش , ماتخافش يا حماده مفيش حاجه يا حبيبي , ده عمو بتاع
الملاهي عايز يخوفنا عشان ننبسط و نفرح .
.
شويه كمان و سادت
حالة هرج و مرج غريبه و الناس بتجري و تخبط في بعض حتى صاحب الملاهي و مدرب الأسود
شوفناه بيجري , المراجيح غالبا بتتحرك , قصدي الوحوش , ماتخافش يا حماده , ده عمو بتاع
الملاهي عايزنا نخاف و نفرح .
.
بصو من الأخر
, و بما إننا وصلنا لل ليفل بتاع اللعب مع الوحش , ماعنديش شك إن فيه جهه أو جهات
( جمع مؤنث ... وابقى افتكر ان كيدهن عظيم ) , فيه جهات عالميه بتحرك الأحداث في ال
5 سنين اللي فاتو و من قبل كده , و هما اللي اتحكمو في مدينة الملاهي و اصوات الوحوش
واحنا كان كل دورنا اننا نتمرجح و نتزحلق و نفرح و نخاف , بس المفاجأه الأكبر كانت
في خروج الوحوش دي عن السيطره , عشان كده أنا شايف صاحب الملاهي خايف زينا ( و زي حماده
) , ماتخافش يا حماده , ده عمو اللي بيجري جنبك هو اللي بيعمل كده عشان نخاف و نفرح
.....................................................................................................................................
Mohamed
Hussein
26
مارس 2015·
مصر تشارك بقوات
جويه و بحريه في الهجوم على معاقل الحوثيين عدن .
.
أنا حاسس بيك
, متوتر , مرتبك , مش عارف تقول انت مع القرار و لا ضده , ماهو أصل الحوثيين دول مدعومين
من ايران , و في نفس الوقت حكاية مشاركة قطر و ترحيب تركيا و أمريكا بالضربات دي بتقلق
شويه , حقك تقلق ...بس تعالى هقولك على حاجه أو حاجتين , جايز تلاته حسب التساهيل
, و هتتفاجئ إن مفهمش كلمة اليمن ولا وحدتها ولا هجيب سيرة شرعيه , هتكلم عن مصر .
.
- حسبة مكسب و
خساره , إنت بتشارك في تحالف دولي يعني لا ايران ولا الجن الأزرق هيقدر يتكلم , انت
بقى هتكسب شوية مجد أدبي على شوية تدريب حي لقواتك البحريه و الجويه , طب هتخسر ايه
؟ ولا حاجه , الخوف من الخساير هيكون في حالة مشاركتك في الهجوم البري .
.
طب انت لسه خايف
من إن جيشنا يكون رجليها بتتسحب لمعارك خارجيه لا ناقه لنا فيها و لا جمل صح ؟ حقك
تخاف برضه , مانت مصري و بتحب جيش بلدك و بتحترمه ( ولّا ايه ؟ ) .
إنما ممكن أطمنك
, في شغلانتنا احنا , اللي هي الصيدله, الأيام علمتني إن أكتر ناس بيخافو من الأدويه
و يعملو لها ألف حساب هما الصيادله نفسهم , عارفين أهمية الأدويه و خطورتها في نفس
الوقت .
كمان عندي قناعة
تامه و بنفس المبدأ , إن أكتر ناس بيحترمو قرار ( تحريك قطع عسكريه ) هما قادة الجيش
نفسهم , عارفين برضه أهمية القرار ده و خطورته في نفس الوقت , باختصار , قرار ضرب داعش
في ليبيا , قرار المشاركه في ضرب الحوثيين في اليمن بيبقى بعد دراسه طويله و تأنّي
, يعني مكانشي قرار اتنين قاعدين بيمصو قصب على شط الترعه .
....................................................................................................................
Mohamed
Hussein
26
مارس 2015·
قصة نجاح
.
كنت بشوفه من
20 سنه و أكتر , طفل صغير برئ عمره مايزدش عن 10 سنين , واقف في إشارات المرور و بيمسح
عربيات الناس , اللي يدي له 5 قروش واللي يزعق فيه و يقوله امشي , و هو بيجري قدام
العربيات و بينها , و مره أياميها كنت راجع بالليل شوفته ماسك كراسه و قاعد تحت عمود
نور بيذاكر .
.
جريت الأيام و
السنين , من يومين بس قابلت الطفل ده بالصدفه و انا بركن العربيه قدام السراج مول
, عرفته من أول نظره , يااااااه كبر الطفل بس ملامحه الجميله هي هي , بقى شاب زي القمر
, أنا عيني دمعت لما شوفته , و هو بقى أول ما شافني بصّ لي كده و قالي : أستسمح صاحب
الذوق العالي في 5 جنيه أجرة الجراج ؟!.
.......................................................................................................................................
Mohamed
Hussein
26
مارس 2015·
مسافة السكه
.
يعني ايه الطيران
المصري بيشارك في ضرب معاقل الحوثيين في عدن ؟ يعني و حدة اليمن و استقلالها, و إلا
هتتحول اليمن ( بوابتنا الجنوبيه ) ل 6 أقاليم أو أكتر ( كانتونات ) , يعني حماية مضيق
باب المندب و إلا هتتحول قناة السويس لمجرد بركة مايه ممكن نربي فيها بط .
.
مؤيد للقرار المصري
بتوجيه الضربات الجويه و البحريه للحوثيين , أرفض التدخل البري للجيش المصري في اليمن
.
.................................................................................................................................
Mohamed
Hussein
26
مارس 2015·
حقيقه علميه
.
لما بشوف خسايه
قدامي , مغسوله كده و مندّيه و ورقها كبير بتقوم عيني تزغلل , و أتحول لأرنب من أول
نظره , أيا ما يكون المكان اللي أنا فيه , ياكشي أكون في مطعم الماريوت , كركبه و زروطه
على كيف كيفك , لا تقولي بقى إيتيكيت ولا برستيج ولا الحلم العربي , هو أرنب مفيش غيره
.
.
الخسايه يا ولاد
ما بتتعملشي سلطه و لا كول سلو , الخسايه بتتمسك كداهو و تبدأ بالعيدان الكبيره تاكلها
بورقها بطريقة ( الخرش ) و بعدين تدخل عالصغيره المسكره دي لحد ما توصل للقلب و اللحظه
دي بتبقى أعلى نقطه في منحنى السعاده ..
.
لا استنى لسه ماخلصناش
, بعدين تمسك راس الخسايه و تقشّرها بسنانك كداهو و بعد ما تقشرها تمسكها في ايدك تاني
و تلقي عليها نظرة الوداع .
يا عم كول سلو
ايه بس ؟ دانا متربي في قرى السنبلاوين هو حد قالك إني من مواليد بندر توتنهام ؟!
.......................................................................................................................................
Mohamed
Hussein
25
مارس 2015·
صفحه في كتاب التاريخ
اليمني .
.
بعد حضارة سبأ
( 1200 ق .م ) و بعد الملكه بلقيس .
.
فلما كانت السنوات
الأولى من الربيع العربي في مطلع القرن ال 21 , دخل الحوثيون عدن و اعتقلو وزير الدفاع
اليمني و هرب الرئيس عبد ربه منصور إلى خارج البلد و حصلت الناشطه اليمنيه توكل كرمان
على جائزة نوبل للسلام ....و السلام ختام .
...................................................................................................................................
Mohamed
Hussein
25
مارس 2015·
عشان لا تنفع طبله
و لا طار
.
في رأيي الشخصي
, حاجتين اتنين دمّرو الإقتصاد المصري في أخر 20 سنه , فساد مبارك و الثوره اللي عملناها
عشان نخلص من فساد مبارك !! ....تقريبا كده احنا كمّلنا المسيره المباركيه , على طريقة
بيدي لا بيد عمرو .
.
و ممكن تقول إن
أمريكا لقت خراب النص الباقي في اقتصاد مصر في اختارين مفيش غيرهم , إما إن جمال يورث
الأبعديه بتاعة باباه الباشا أو إن الشعب يعمل ثوره عشان جمال مايورثشي الأبعديه ,
و يقول لأ , لأأأأأأأأأأأه , الأبعديه دي مش للتوريث , داحنا مانبقاش رجاله لو اتورّثت
, و زياده في الإحتياط إحنا هنحرق الأبعديه عشان نضمن ان محدش هيورثها .
.
زمان قالك كان
فيه راجع أقرع ماشي في الشارع و واحد غتيت أوي راح له و قاله انا عايز راسك دي أعملها
طبله , الراجل الأقرع انفعل و قاله ازاي يا جدع دي راسي أنا ؟ الغتيت قال ماليش دعوه
أصلها عاجباني أوي و انا هاخدها و اعملها طبله يعني هاخدها أعملها طبله , و تحت ضغط
الغتيت اضطر الأقرع إنه يطلع موس من جيبه و يشرّح راسه , و قال أهي أهي عشان لا تنفع
طبله و لا طار !!.
.
و ده بالظبط اللي
احنا عملناه في مصر تحت ضغط الغتيت .
.......................................................................................................................
Mohamed
Hussein
25
مارس 2015·
بس أنا قلقان من
حكاية حضور قطر للقمه العربيه دي , و الله قلقان , أصل القمه بتبقى متغطيه بمراسلين
عرب و أجانب و التلفزيون بيصور , و انتو عارفين السيسي بيحب يرتجل في خطابته و يجوّد
من عنده و هو أساسا مضياف و من النوع اللي بيحب يذكر الضيوف بأسمائهم و صفاتهم و يشكرهم
.
.
طب نفترض ان السيسي
سرح ثانيه و هو بيرتجل , و طلع في الكلمه الإفتاتحيه يشكر الضيوف كعادته و قال : و
عايز أشكر فخامة الرئيس عمر البشير رئيس دولة السودان الشقيقه و أشكر جلالة الملك سلمان
ملك المملكه العربيه السعوديه الشقيقه و أشكر سمو الأمير تميم رئيس دولة قطر بنت الوسخه
!! .
.
طب و الله بتكلم
جد , ممكن يحصل , أصل الهاشتاج ده انتشر أوي و بقى لازمه على كل لسان و أكيد السيسي
سمعه و قري عنه ألف مره , و تحس ان قطر بقت هي الدوله الوحيده في العالم اللي ماشيه
ببطاقه فيها الإسم الثلاثي #قطر_بنت_الوسخه .
.......................................................................................................................................
Mohamed
Hussein
24
مارس 2015·
وزير الخارجيه
المصري : أمير قطر سيشارك بالقمه العربيه بشرم الشيخ ( بتاعة السيسي يعني ) !! .
.
يا ترى الجزيره
هتتصرف ازاي في الورطه دي ؟
بتخيل اني وقتها
ممكن اقرا خبرين ورا بعض في شريط الأخبار بتاع الجزيره ( لازقين في بعض كداهو )
.
1- قائد الإنقلابيين
عبد الفتاح السيسي يستقبل الرئيس الجزائري بمطار القاهره . 2- الرئيس المصري المنتخب
عبد الفتاح السيسي يلتقي أمير دولة قطر على هامش القمه العربيه .
.........................................................................................................................
Mohamed
Hussein
24
مارس 2015·
هههههههههههههههه
بعد سر الرقم ( 4 ) في المؤتمر الإقتصادي الأخير , أعلنت الهيئه الهندسيه للقوات المسلحه
إن موعد الإنتهاء من الحفر في قناة السويس الجديده هو يوم 6 ابريل !! .
.
أنا حاسس إن السيسي
هيجيب الشركه الهندسيه المسئوله عن تصميم العاصمه الإداريه و يقول لهم عايز البوابتين
بتوع مدخل العاصمه دي يبقو على شكل نضارة البرادعي مع ظهير صحراوي في النص بينهم ,
و عايز كمان مبنى رئاسة الوزرا يكون على شكل سشوار !!.
.....................................................................................................................
Mohamed
Hussein
24
مارس 2015·
كان عليا بإيه
وجع الدماغ و المناهده دي ؟ , حقكو عليا يا خوانا , هما المسلمين بس الي هيدخلو الجنه
, المسلمين و بس , و بسسسسسس , عندي هنا أيات بتأكد كده , أيوه مولانا الشيخ قالي عالأيه
و انا بسمع كلامه عشان هو عارف تأويل القرأن , مش ربنا بيقول و ما يعلم تأويله إلا
الله و الشيخ فلان ؟ طيب يبقى زي ما بيقول مولانا الشيخ , إنما تقولي ( و رحمتي وسعت
كل شئ ؟ ) , مفيش أيه في القرأن بتقول كده اساسا , و تقولي ( الله يفصل بينهم يوم القيامه
) لأ الأيه دي مش كامله , المفروض ( الله يفصل بينهم يوم القيامه هو و ملانا الشيخ
) .
.
و بعدين لو ربنا
حب يرحم حد من عبيده مش مسلم بسبب معاناته في الدنيا فانا عارف إن فضيلة الشيخ مش هيسمح
لربنا ( و العياذ بالله ) , و لعلمكو بقى , الملايكه على باب الجنه هيبقو وافقين يشوفو
بطايق الناس , بطاقتك لو سمحت ؟ لو مسلم عالجنه على طول , مش مسلم تبقى في نار جهنم
, و الله عملت خير عملت شر عملت حواجبك برضه في جهنم , كنت بار بأهلك و صادق و أمين
أو كنت بتعذب أمك و تربطها في رجل السرير برضه في النار .
.
دعوه عامه من مولانا
الشيخ لغير المسلمين : إفسدو يا رجاله , اخربوها مداين , عيشو حياتكو خمره و نسوان
و كدب و قتل و سرقه ( يا بختكو يا ولاد المحظوظه ) , أيوه افسدو براحتكو , مانتو كده
كده داخلين جهنم يا كفره , يا شلاليط , عارف ؟ بالك انت ؟ لو اتعذبت في الدنيا و صبرت
على مرضك من يوم ماتولدت لحد ما متت برضه في جهنم حدف يا كافر يا زومبي .
.
يااااااااااااه
الحمد لله , دانا كانت دماغي شطحت و فكرت إن رحمة ربنا ممكن تشمل غير المسلم لو حسن
عمله و قلت يعني أنا مش هكتّف إيد ربنا سبحانه و تعالى و رحمته , انا كنت هكفر يا رجاله
, بس لحقت نفسي في أخر لحظه , المجد لألهتنا العوالي .
.
لو سمحتو بقى
, أي حد مش مسلم في الأصدقاء يتوضا الأول و يقول دعاء دخول الفيس بوك و يقرا المعوذتين
7 مرات و يلف التراك بتاع ستاد القاهره 11 مره قبل ما يكتب عندي تعليق أو يدوس لايك
, أنا نبهت عليكو أهو , و إلا و الله أجيب لكو مولانا الشيخ ( مددددددددد ) .
.....................................................................................................................................
Mohamed
Hussein
24
مارس 2015·
عمر و سلمى و مزرعة
البيض .
.
و انا قاعد بتعشى
فتحت التلفزيون , لقيت فيلم عمر و سلمى , أول مره اشوفه , في الوقت ده كنت بفكر في
مشروع ( مزرعة بيض ) , في الفيلم عمر قابل سلمى بالصدفه , طب انا هبقى اجيب فرختين
كده و نبدأ بيهم المشروع , عمر سلّم على سلمى و ريحة البلسم اللي على أيديه فضلت لازقه
على إيد سلمى , و يعني لما الفرختين يولّفو على بعض كده في المشروع أكيد هيجيبولنا
بيض حلو , سلمى روحت البيت و كل شويه تشم في إيديها و تلاقي ريحة البلسم بتاع عمر
, الفرختين في المشروع هياخدو على بعض بسرعه أوي , و كلها كام يوم و عمر يتجوز سلمى
في الفيلم و الفرختين يبيضو في المشروع و يبقى كده عندنا فيلم رومانسي و مزرعة بيض
!! .
.
هههههههههههه ماهو
انا طول الفيلم بصراحه ماعرفتش اقتنع ان سلمى أنثى و طبعا مستحيل أقتنع إن عمر راجل
, و الحركات اللي بيعملها عمر دي مش حركات راجل عايز يحب دي حركات عيّل عايز إحم إحم
, يعني باختصار ممكن اتقبل ان الفيلم ده رومانسي بشرط تغييّر جنس البطل و البطله ,
يعني سلمى هتبقى بطل معقول و عمر هيبقى بطله رومانسيه أخر حاجه .
.
و بعدين يعني ايه
البطل مسح ايده في ايد البطله قامت اتشعلقت في ريحتها و دابت دوب ؟ , أنا أسمع في الرمانسيه
عن الحب من أول نظره ( إنّ العيونَ التي في طرفها حورٌ قتلننَ ثم لم يحيينا قتلانا
) , و أسمع عن الحب من أول كلمه ( يا قوم أذني لبعض أهل الحي عاشقةٌ و الأذنُ تعشقُ
قبل العينِ أحيانا ) , إنما اول مره أسمع عن الحب من أول مسحه !! , هي المناهج اتغيرت
أوي كده و لا انا مسافر من زمان ؟!.
......................................................................................................................................
Mohamed
Hussein
23
مارس 2015·
أوووووووف , الواحد
زهق من نفسه بجد , كل يوم تبرير للسيسي و تطبيل , هو أنا ايه ؟ ايدي مش بتوجعني من
مسكة الطبله دي ؟ عيب يا محمد اللي بتعمله ده , مش كل ما السيسي يعمل حاجه تقول صح
, طب يا راجل خلي عندك حصوة ملح و قول على حاجه غلط , إنما كده كتير , كده أوفر أوي
, أوفر بجد , انا مش عارف أنا طايقني إزاي ؟ .
.
يعني مثلا لما
بدأ المؤتمر الإقتصادي , هنقول ماشي إنك توقعت انه مؤتمر اقتصادي لجلب المستثمرين عشان
اقتصادنا اتدمر في الكام سنه اللي فاتو , و اوكيه انك توقعت انه مش مؤتمر لبيع مصر
ولا حاجه , و اكتشفنا ان السيسي لا باع مصر ولا باع مدينة نصر , ماشي يا سيدي , فلتت
من طبلتك الحكايه دي و ماكنتش مبرراتي .
.
إنما إيه قولك
في حكاية سد النهضه ؟ بتطبل للسيسي ليه ؟ عشان راح و عمل اتفاقيه و قال هنبقى موجودين
و مراقبين ؟ طب ده كلام ؟ ينفع كده يعني ؟ مستحمل نفسك ازاي ؟ جاوب جاوب جاوب يا جبان.
.
استنى يا عم هجاوب
أهو , مانا أصلي مش عارف طريقه أفضل للتعامل مع سد النهضه من اللي عمله السيسي , تعرف
انت طريقه أفضل ؟ لا ماتعرفش ؟ طب استنى هنسأل ناشط سياسي يكون ضليع في قواعد السياسه
الدوليه و الفجل الرومي .
.
تررن تررن , ترررنرن
رن , ألو , حضرتك الناشط السياسي الضليع ؟ طب لو سمحت يا أستاذ ضليع كنت عايز أسأل
حضرتك عن أفضل الطرق للتعامل مع أزمة سد النهضه لو كنت شايف ان طريقة السيسي مش صح
, اكتب لنا يا ضليع هنا الطريقه و النبي بالمقادير و حياتك ماتنساش ( .................................................................................................................................................................................................................
) .
و من غير تأتأه
, إيه ؟ بتقول إيه ؟ مش عارف ؟ طب انا مش هحرجك و هبسّطلك السؤال , ما رأيكم دام فضلكم
في ال 3 اختيارات دول ؟ هتقول ايه يعني لو حصلو ؟
.
1- السيسي لبس
بدلته العسكريه و طلع عالهو من قصر الرئاسه و وجه رسالة تهديد بالحرب علنيه و معلنه
ضد أثيوبيا و أعلن حالة الإستعداد القصوى في الجيش و بدأ في تحريك السفن الحربيه ناحية
باب المندب ................ أعتقد رأيك هيكون كده : ههههههههه السيسي الأرعن بيجر
البلد لحرب لا طائل منها , لقد وقع في فخ الإمبرياليه التوسعيه في وقت نعاني فيه من
الإقتصاد الريعي و التنميه السلطويه .
.
2- السيسي قال
مالناش دعوه يا موهيي , مالنا بس و مال اثيوبيا ؟ ما يعملو اللي يعملوه , داحنا ورانا
هم ما يتلم يا ناس , عليا الطلاق مانا رايح أثيوبيا دي ............ أعتقد رأيك هيكون
كده : السيسي الضعيف المهترئ مش عارف أهمية ماية النيل بالنسبه للمصريين , شخصيه ضعيفه
غير قادره على إدارة شئون البلاد و نحن نمر بنفق مظلم لا تلوح في الأفق أي بادرة ضوء
, حينها ستصبح قطرة الماء أغلى من الفقاعه الحيزبونيه .
.
3- السيسي عمل
اللي عمله فعلا ........ و انت طبعا عارف تعليقك.
.
خلاص يا ضليع ؟
هديت شويه ؟ بالإذن , هقوم أنا بقى أجيب الطبله و عدّة التبرير .
...................................................................................................................................
Mohamed
Hussein
23
مارس 2015·
السيسي في السودان
, السيسي في اثيوبيا , السيسي في قلب سد النهضه ذات نفسه و هينزل لهم من الحنفيه كمان
, اتفاقيه و مبادئ مشتركه عشان نبقى حلوين مع بعض , هتعملو مشروع ؟ و ماله , حقكو
, بس احنا راشقين جواه , يعني مش بنمص قصب على شط الترعه و نتشحتف , لكو مصالح ؟ على
راسنا و هنراعيها بس احنا كمان لنا مصالح .
هتلعب بديلك يا
معلم ؟ احنا موجودين و مراقبين ديلك كويس أوي و عندنا اختيارات تانيه , طب ليه مش اختيارتنا
التانيه في الأول ؟, عشان أثيوبيا مش لوحدها ( من 20 سنه و هي كده...الله يجحمه مبارك
) , يعني القوه اختيار أخير , مش عايشين احنا في جُرن الهبله .
.
طب البديل ايه
؟ البديل نجيب شوية خرفان يحكومنا و يعملو اجتماع على الهوا و نقول هنضرب أثيوبيا بالطيارات
, لا نضربها بالمنجانيق , ليسَ هذا برأي , بُوركت يا أبا الحكم , و شعل الفته و الحناجر
و الرحرحه ده .
.
بوست بعيد تماما
عن المراهقه السياسيه و البهلله ...شابو يابه عبفتاح .
................................................................................................................................
Mohamed
Hussein
23
مارس 2015·
رئيس حزب النور
: إسمي على قوائم الإغتيالات بتاعة الإخوان و لا أخشى إلا الله !! .
.
هههههههههههه يا
راجل عيب عليك , إنت فاكر نفسك عبد الفتاح السيسي ؟ , عيب والله تقول على الإخوان كده
, عيب عيب , دانتو واكلين شاربين قاتلين سارقين مكفّرين الشعب سوا ( و لّا نسيت ؟
) , ده حتى الصناديق كانت قالت لدين أبوكو نعم ( و لّا نسيت ؟ ) و سيدنا النبي نزل
بنفسه و ملّس بإيديه الشريفه على قبة برلمان الإخوان و البهاليل ( و لّا نسيت ؟ ) و
اللي ماينتخبشي مرسي يبقى كافر والسلعوه هتاكله ( و لّا نسيت ؟ ) .
إزاي يا جدع تقول
على خليفة المسلمين كده ؟ و هما الإخوان عندهم قايمة اغتيالات يا مولانا ؟ دول ناس
بتوع ربنا و مبروكين و بيمشو عالحيط , لا لا مالكش حق أبدا يا يونس ياخويا , إنت كده
بتشوّه دولة الخلافه اللامؤاخذه الإسلاميه و عاصمتها و لا مؤاخذه القدس .
........................................................................................................................
Mohamed
Hussein
23
مارس 2015·
أحمد منصور , كلب
الجزيره و الإخوان , و مقال ابن @#$% , و قالك : فلان بتاع مكتب الإرشاد في الأردن
كان على علاقه بالمخابرات الأردنيه و بالتالي بالمخابرات الصهيونيه و ال سي أي إيه
!! و إن يا ولداه كده اسرار الجماعه العريقه العظيمه المجاهده بتوصل للمخابرات الأمريكيه
عن طريق عضو المكتب بتاع الأردن و التنظيم الربّاني بتاعهم مخترق !! هههههههههههه و
شرف ريري سيلان كده يبقى التنظيم مخترق .
.
يعني المراقب العام
بتاع الإخوان في الأردن ( مش مصر ) هو اللي على علاقه بالمخابرات الأمريكيه , إنما
بتوع مصر فله و ماراحوش حتى الخارجيه الأمريكيه ياخدو التعليمات من كام يوم و لا كانت
السفيره الأمريكيه في مصر بتزور مكتب الإرشاد أكتر ما بتستحمى , و لا التنظيم الإرهابي
ده كله هو في الأصل صناعة مخابرات أمريكيه و موساد .
.
محاوله فاشله و
بائسه لغسل الثوب القذر , ..............هات بوسه يا حماده .
................................................................................................................................
Mohamed
Hussein
22
مارس 2015·
كباريه
.
الفاعل : بتعرف
تكتب كويس ؟ شكلك كده بتعرف تكتب كويس .
المفعول به : لا
يعني مش أوي بس ليه خير ؟ .
.
الفاعل : عايزينك
تكتب لنا بوستات و مقالات تلعن فيها جدود أبو الجيش و العسكر
المفعول به : بس
انا صفحتي صغيره فيها 17 صديق و محدش بيقرالي .
.
الفاعل : ماتقلقش
, احنا هننشر بوستاتك و مقالاتك على صفحاتنا و جرايدنا اللي فيها ملايين .
المفعول به : انتو
؟ انتو مين ؟ .
.
الفاعل : لا عيب
على واحد مثقف و ثائر حر و مبدع زيك يسأل السؤال ده .
المفعول به : أه
فهمت , خلاص فهمت .
.
الفاعل : بتعرف
تكتب شعر كمان صح ؟ قول انك بتعرف .
المفعول به : لا
طشاش يعني .
.
الفاعل : يا عم
طشاش ايه بس ؟ انت مستقلّ بنفسك كده ليه
المفعول به : طب
عايزين شعر عن ايه ؟.
.
الفاعل : اكتب
لنا اغنيه عن الظلم و حكم العسكر , أي كلمتين و ماتقلقش احنا هنتصرف , و قول يا تنام
و انت واقف يا تصحى ماعرفشي ايه كده , و كتّر من كلمة الدم و الظلم و الفقر و الحريه
و الثوره و الميدان والشهيد في الأغنيه .
المفعول به : فاهم
فاهم بس هتنتشر ازاي اغنيتي ؟ .
.
الفاعل : هنذيعها
في قنواتنا كل 7 دقايق و هتبقى منتشر أكتر من الدره المشوي و الجوافه و مشهور أكتر
من مؤخرة كيم كارديشان و العياذ بالله .
المفعول به : بس
الأغنيه هتبقى كلماتها ضعيفه و مش عارف يعني هتنفع ولا لأ ؟ .
.
الفاعل : ماتقلقش
, هننزل معاها بصور قتلى ياكشي يكونو من بنجلاديش و شوية موسيقى حزايني و اضاءه خافته
و الكربلائيات دي احنا أصلا اللي اخترعناها .
المفعول به : طيب
اللي تشوفوه .
.
الفاعل : بتعرف
تلحّن ؟
المفعول به : لأ
خالص .
.
الفاعل : كويس
اوي يبقى انت اللي هتعمل لنا لحن الأغنيه الجديده بتاعة ظلم العسكر .
..................................................................................................................................
Mohamed
Hussein
22
مارس 2015·
يعني ايه فريق
عمل ( تيم ورك ) ؟
.
يعني صاحب المشروع
يقعد مع مدير المشروع و المحاسب بتاع المشروع و الفنيين و العمال بتوع المشروع و يعملو
خطة عمل و يقسّمو الشغل بينهم ( كل واحد حسب مجال اختصاصه ) , الكلام ده لازم يتم في
جو يملأه الحب و الإحترام أه و الله .
.
يعني مثلا
أنا صاحب الصيدليه
أقعد مع مدير الصيدليه ( اللي هو أنا ) و المحاسب بتاع الصيدليه ( اللي هو أنا طبعا
) و المساعد بتاع الصيدليه ( يعني أنا ) و العامل بتاع الصيدليه ( اللي هو أنا بالتأكيد
) و عامل التوصيل ( اللي هو أنا أغلب الأحيان ) , و نعمل خطه عمل و نقسّم الشغل بينا
, و محمد الصيدلي ماينفعشي يتدخل في اختصاصات محمد المحاسب , و لازم عشان المشروع ينجح
إننا نحب بعض و نحترم بعض , يعني من الأخر كده أنا مضطر أحترمني و أحبني .
.......................................................................................................................................
Mohamed
Hussein
21
مارس 2015·
أمي
.
لما دخلت الجامعه
كانت أمي ماتعرفشي الكليه بتاعتي كام سنه , كل ماقول لها نجحت يامه تقولي باقي كام
سنه يابني ؟ مش هتخلّص بقى عشان تساعدني ؟ و انا أقول لها حاضر يامه , هاااااانت .
و طبعا ماكنتش
بشيّلها هم المواد اللي عندي والإمتحانات والصعب و السهل , هتعبها ليه بس ؟ هتزعل و
تشيل في نفسها و مش هتفيدني بحاجه , أمي اساسا مابتعرفشي تقرا ولا تكتب .
.
بس البنات بيبقو
غيرنا , لما أختي دخلت طب بيطري بقت كل شويه تميل على أمي و تقول لها عالمواد اللي
بتاخدها و ادعي لي يامّه و سهوكة البنات دي , كنت انا في الوقت ده خلصت جيش و بشتغل
في القاهره , مره اتصلت بأمي وبقول لها عاملين ايه يامه و مال صوتك مش عاجبني ؟ قالت
لي : اختك عندها امتحان أناتومي anatomy
بكره و خايفه منه أوي !! .
, وانا فطست على
روحي من الضحك , قلت لها انتي عرفتي الأناتومي يامّه ؟ أخلاقك باظت يا غاليه .
.
يارب بحق تعبها
و سهرها عشانا يشفيكي يا أمي , كل سنه وانتي طيبه يا حبيبتي .
......................................................................................................................................
Mohamed
Hussein
20
مارس 2015·
الحكايه سهله أوي
بس حاول تركز
.
- امبارح الحوثيين
طلعو بغارات جويه ( يعني طيران ) على قصر الرئاسه اليمني , و الحوثيين دول شيعه أو
زيديين وليعوذُ بالله ( انا عايز اكتبها كده ) , و النهارده داعش طلعت على جوامع الحوثيين
في اليمن و فجرت مسجدين منهم , و قتلو اكتر من 100 واحد , و داعش دول سُنّه و ليعوذُ
بالله برضه .
.
امبارح عبد ربه
منصور عرف يهرب من قصر الرئاسه قبل طيارات الحوثيين ما توصل و النهارده بالتأكيد نفس
ال عبد ربه منصور مكانشي موجود في الجوامع وقت تفجيرها , هتقولي ليه ؟ مانت شكلك مش
مركز معايا , طبعا عشان عبد ربه منصور سني و ليعوذ بالله و الهجوم كان على مساجد الشيعه
والزيديين و ليعوذ بالله .
.
و بالنسبه اللي
كان واقف بيشرب سجاره في البلكونه بقاله كام شهر و هيسألني : يطلع مين عبد ربه منصور
ده ؟ هقول له , ده يبقى الرئيس اليمني سيادتك , ثمره من ثمار الربيع العربي و أحد أهم
افرازاته حتى اسأل توكل كرمان .
توكل كرمان بقى
راحت على تركيا و خدت الجنسيه و بتروح امريكا تدي محاضرات هناك عن جمال الربيع العربي
و غمّازاته و نجاح الثوره اليمنيه ههههههههههههه أه و النعمه زي مابقولك كده .
.
طب ايه اللي حصل
في اليمن ؟ هقولك تاني , الحوثيين الزيديين وليعوذُ بالله هجمو عالرئيس السني وليعوذ
بالله , قام الصهاينه ( ربنا يعمر بيتهم كمان و كمان ) قالو لإيران : انتي هتسيبي الحوثيين
الشيعه بتوعك في اليمن كده من غير سلاح ؟ دي حتى تبقى عيبه في حقك و مايصحش , ابعتي
لهم سلاح , و الأمريكان قالو لدول الخليج : وانتو هتسيو داعش السُنه كده في سوريا و
العراق و اليمن من غير سلاح ؟ دي حتى تبقى عيبه في حقكو و مايصحش .
.
واحد هيسألني و
يقولي يا كابتن لطيف : و هما الحوثيين شيعه و زيديين فعلا و داعش سُنه ؟ هقوله والله
يابني مانا عارف , مانا كنت خايب في الكيميا و انا صغير , و كنت شاطر بس في الجغرافيا
, و فاكر كويس أوي ان عدد الدول العربيه كان 22 دوله ( أيام زمان ) !! .
.....................................................................................................................................
Mohamed
Hussein
20
مارس 2015·
مانا ماعرفشي نجيب
ساويرس ولا نجيب المستكاوي حتى , و لا اعرف مين بيموّل قناة TEN
ياكشي يكون اللي بيمولها عبد الفتاح القصري أو صالح سليم او تحتمس
التاني .
.
كل اللي اعرفه
اننا في حالة حرب حقيقيه مش لعبه , و إن 70 % من الحرب دي بتبقى حرب إعلاميه , بلدنا
كانت في خطر و مازالت .
و كلاب قطر بيصرفو
عالجزيره مليارات في السنه عشان يحرقو بلدك لو قدرو , طب حضرتك كإعلامي و لا مؤاخذه
هتواجه مافيا الجزيره دي بإيه ؟ بشوية بنات مزز ( لحم يعني ) من اللي هما تلتين حروف
اللغه مش بيقولوها ( دلع و كداهون ) و لو قابلو عالم ذره هيسألوه إيه أخر أعمالك الفنيه
و بتحب تاكل إيه ؟ .
و لا هتواجه مافيا
الجزيره بسمير صبري الله يرحمه و 5 مووووووواه و كوم اللحم الكبيراللي اسمه فيفي عبده
؟! .
.
لو انت راجل صناعه
و قلت هبني مصنع و نعمل سمنه , هقول عليك راجل ابن $&*$# ( و بلاش نفسّر ) , عشان
أم البلد دي مش ناقصه سمنه , و لو عملت لي فيها راجل إعلام و قلت هنعمل قناة منوعات
و نجيب شوية لحمه و شويه أموات تبقى برضه ابن #$%&# .
.
و عن قناة تين
أحب أقول لهم بجد بجد : يلعن تين أبوكو .
.....................................................................................................................................
Mohamed
Hussein
20
مارس 2015·
قناة التحرير غيّرت
اسمها لقناة ten , و قناة ten
دي بقى نازله بوسطها قصدي نازله بتقلها , اعلانات مغرقه كوبري اكتوبر
و كل شبر في مصر , و برامج هادفه مستهدفه مليانه اهداف , صباح الورد و قمر 14 و 5 موووووووواه
و اكيد هيسيبو فقره بالليل لبرنامج ( يا مدندش يا قميص النوم ) !! .
.
أه نسيت حاجه
, البرامج هيقدمها سناء منصور و سمير صبري و فيفي عبده و صباح الله يرحمها ( و يديها
الصحه ) و عز الدين أيبك و توت عنخ أمون .
.
حد لسه عايز إعلام
هادف ؟!.
....................................................................................................................................
