منوع

عقول البشر عامله بالظبط زي العربيات , هتلاقي منها اللي سحب أمامي 1600 سي سي , وبتغرس منك في أول حفره ومتطلعش أو تنجرف مع أي شوية مطر أو رمل على الطريق , حاول تخلي دماغك دفع رباعي ومتخافشي من التفكير ( استهلاك البنزين !! ) .

.

.

في محل الخضار
.
وقال لي ( لمون مافي , جرجير مافي , حبحب مافي ) !! , الله بقى ؟ هو اللي احنا بنعمله في الناس هيطلع علينا ولا ايه ؟ أما إنك بنغالي غتيت صحيح وشبه صيدلي مصري أعرفه شغال في صيدليه أعرفها , عندك بنادول طيب ؟, ما تسكروها أحسن البقاله دي , سكِّر سكِّر !!.
.
ورد في الأثر أن سكِّر يعني إقفل , و (الحبحب ) هو البطيخ , واترميلون يعني من الأخر بس لونج شويتين , و (مافي ) يعني مفيش , إل نيا با , وانا بقى الصيدلي الغتيت اللي معندوش بنادول !!.أجمل خبر سمعته في حياتي , لو بعرف أرقص كنت عملتها , حل جماعة الإخوان الإرهابيين و وقف جميع أنشطتها , الله أكبر , داحنا كده بننضف أوي , لو سمحت لو سمحت , بيوت الله مفتوحه ومحدش هيمنعك من الصلاه , وبعد ما تصلي إرجع بيتك أو روح شغلك ( فإذا قضيت الصلاة فانتشرو في الأرض ) , والسيسي مش هيمنعك إنك تبر والدتك , وفلوس زكاتك وصدقتك روح بنفسك إديها للغلابه , هتلاقيهم حواليك في كل مكان , بلاش جمعيه رساله أو أي جمعيه ( انت متعرفش فلوسك بتروح فين وبيشترو بيها إيه ؟ ) , ولو عايز تتبنى طفل مشرد يتيم هتلاقيهم في الشارع متروحش تدفع فلوس في دور أيتام مشبوهه , ولو عندك استشاره دينيه اتصل بدار الإفتاء , خلصت الحكايه كده , شفت إنها سهله أوي إزاي ؟ أه نسيت أقول حاجه : مفيش نيه عند السيسي إنه يأجل موسم الحج السنادي , ومش صحيح أبدا أنه هيمنع الناس من صيام رمضان السنه الجايه ولا هيخلي رمضان 18 يوم , غورو بقى يا رباية الأفاعي .

أنحني احتراما لك يا عبد الفتاح السيسي , القضاء على جماعة الخوارج لا يقل أبدا عن انتصار 73 , في كلا الحالتين مصر انتصرت وقدرت تحرر أرضها من النجاسه !!.

.وعند أحد أصدقائي دخل صديق إخوانجي يعلق على بوست ( الإمام حسن لامؤاخذه البنا ) وكتب صديق صديقي ( لا يمكن أن نوفي الإمام حسن البنا حقه , ولو دخلت سيرته في كتب وزارة التربيه والتعليم لزانته , اقرأو أولا عن نضال حسن البنا وفكره !! ) .....وأنا من باب التفاعل مع صديق صديقي ومن باب إن صفحات الفيس بوك الكتابه فيها بتبقى مجاني , وإن عدد السطور بيبقى غير محدود والحبر بتاع الفيس مش بيخلص , أدعو صديق صديقي العزيز وكل أصدقائي الإخوان واللي مش إخوان بس بيحترموهم , أرجوك من فضلك , لو سمحت , بليز , سيل فو بليه , إكتب لنا موضوع تعبير عن نضال وفكر الإمام حسن البنا في هذه السطور التلاته 

....................................................................................
....................................................................................
....................................................................................
.
محمد حسين

.

.

السنه اللي فاتت كانو منزلين في كتب ( وزارة التربيه والتعليم ) السيره الذاتيه لمولانا العالم العلامه الأديب والمفكر والفيلسوف حسن البنا مع إن سيرة حسن البنا المفروض تنزل في كتب ( وزارة السفاله والجهل ) مش التربيه والتعليم , السنه دي حكومة ( الإنقلابيين ) منزله صوره خالد سعيد في كتاب المدرسه , والجيش والشرطه بيأمنو المدارس اللي صورة خالد سعيد موجوده في كتبها , إنما النشطاء والنحانيح مش عاجبهم , برضه مش راضيين , والنبي يا عبد العال لو جبنالك الدزنانور برضه هتقول عليه عُسفَر !!.

.

.

.صباح الخير , بعد سنيتين تلاته في الجامعه بتقدر تقول بسهوله إن أساتذتك الساده الدكاتره المحاضرين هما نوعين اتنين , نوع أكاديمي يجيد الشرح بطريقه مبسطه وسلسه ونوع باحث علمي ( عالم ) لا يجيد لغة الكلام , لكنه بارع في المعمل وفي تطبيق علمه على أرض الواقع , أي دوله في الدنيا محتاجه الإتنين , الشخص الأكاديمي المنظِّر والشخص الواقعي العملي , إنما لو فكرت تبدِّل الأماكن هتفشل تماما , قيادات الجيش مينفعوش يطلعو مع منى الشاذلي ويقولو كلام موزون ومترتب ومتزوّق , وحبيب قلبي ( ص ) ميقدرشي يحط رجله في الشارع , في المعمل , خصوصا لو كان المعمل ده فيه معيدين وباحثين وفنيين وعمال وفلاحين ونشطاء وسباكين , وفيه أنابيب ممكن تنفجر , ونار والعه ممكن تشبط في البالطو بتاعك وفيه واحد واقف ورا الباب وماسك في إيديه إزازة ماية نار ( حمض كبريتيك مركز ) عايز يرميها على وجه هذا الوطن !!.

.

.بجد والله وربنا يشهد , أنا مش بزعل ولا اتضايق أبدا من الزبون الغبي , ومش بزعل ولا اتضايق من الزبون التخين أوي وقصير وبكرش , ومش بزعل ولا أتضايق من الزبون الغتيت , إنما بنفجر بصراحه لما يكون الزبون اللي قدامي تخيت أوي وقصير وبكرش وغبي وغتيت ... أيوه بالظبط زي الراجل اللي واقف قدامي ده !!..

.

.

أهو ده عيبه بقى , الفيس بوك نايم والناس مش لاقيه حاجه تعملها , أدي عيب الإنقلاب !! , مفيش خطبه عرجاء لمرسي خليفة المسلمين , ولا فتوى شاذه لقيادي سلفنجي , مفيش تشكيله متخلفه لحكومه ولا لجنة دستور , مفيش زياره خارجيه يقابل مرسي فيها شيخ غفر كفر شيكاغو , مفيش رئيس وزاره نزل الفجر عشان يتفقد أحوال الرعيه ويتصوّر بالمره , مفيش محافظ رايح شغله بالجلابيه البيضا والطاقيه الشبيكه , يعني مفيش أحداث , أنا ضد إنقلاب 30 يونيو , لازم مرسي يرجع للسلطه عشان حتى نلاقي حاجه نشتغل عليها , إن شاالله يرجع خميس وجمعه بس !!.

.

.شوفي حضرتِك , أنا عندي المسكن بس المضاد الحيوي خلصان والله .

.
شلون يعني ؟
.
يعني المسكن موجود والمضاد لأ , تحبي حضرتك أجيب لك المسكن وتجيبي المضاد من صيدليه تانيه ولا تجيبي الإتين من صيدليه تانيه ؟
.
و انا محتاجه المسكن ولا المضاد ؟
.
حضرتك محتاجه الإتنين .
.
طيب هات المسكن واكتبلي عليه كام يوم
.
حاضر , ده هتستخدميه مرتين في اليوم عند الألم بس وتكوني واكله .
.
بكام المسكن ؟
.
ب 20 ريال حضرتك .
.
بس المضاد مش عندك , طيب خلي المسكن.... هجيبهم الإتنين من صيدليه تانيه !!.
.
طيب زي ما تحبي ( خدت علبة البروفين رميتها عالرف بعنف ) .
.
وهي خارجه مسكت علبة COTTON BUDS تمنها 4 ريال تقريبا وسألتني بكام دي ؟.
أه دي حضرتك ب 75 ريال !!.
..................... أنا قلت لابويا يدخلني كلية البوسته في طنطا وهو مرضيش !!.

.

.بقالي كام يوم برجع البيت ألاقي بنتي بتتفرج على مسلسل الكبير أوي في الأوضه ومراتي في الصاله بتتفرج على مسلسل ذات , أدخل أخطف لي لقطه من الكبير أوي عشان بنتي مش تزعل , وبعدين أطلع أتفرج على شويه من ذات , شدني أوي المسلسل ده , مؤلف وسيناريست عبقري , مخرج رائع وأداء مبدع من الفنانين اللي هما مش نجوم أوي , إمبارح كان مشهد الهديه اللي جابها البطل للبطله في عيد ميلادها ال 50 , ياااه عالتلقائيه والبساطه , مسلسل ذات بيأكد حقيقه في ذهني إن العمل الفني المحترم مش محتاج أجهزه وإمكانيات بملايين ولا نجوم بملايين , محتاج إتقان العمل بس , محتاج مجهود وتفكير وتأمل وبحث , بصراحه أنا بقرف من المؤلفين اللي بيكتو مسلسلات عن الريف والفلاحين أو عن البدو , بقرف من السيناريو اللي مالوش أي علاقه بالواقع ( إهييي يا جناب العمده , بت يا بهانه ) , وبقرف من طريقة التصوير واللبس , تحس إن القايمين على العمل قاعدين في شقه في الزمالك وعمرهم ما شافو الريف ................ ليلتين تلاته كده ويكون المسلسل جاهز وزي الفل وبارك الله فيما رزق ....مسلسلات وأفلام بنظام التيك أوي !!.

.

.

.صباح الخير , النهارده أول يوم دراسه في مصر , وانا بفتكر أول يوم دراسه أيام ما كنت لسه تلميذ صغير وحتى أيام الجامعه كان بيبقى يوم حلو أوي وزي الهباب !! , مكنتش بحب أروح المدرسه , طريقة التعليم في المدارس الحكوميه وشكل المدرسين كان يقطع الخلف ويقطع الخميره من البيت , المدرس أول ما يشوف التلميذ يكشّر في وشه كده , تقريبا كانو بيوزعو على المدرسين ( حبهان ) في أول يوم دراسه , وكل مدرس لازم يحط الحبهانه تحت ضرسه , بعد فتره كده بتلاقي منهم كام مدرس بقو يبتسمو زي مخاليق ربنا لكن أغلبهم كان بيحتفظ بالحبهانه لحد أخر يوم دراسه , تقريبا بيعتبروها عهده هي والخرزانه !!.

.

.

فكره غريبه جت في بالي , بقالنا سنين قاعدين عالفيس بوك , ليل ونهار , قابلنا فيه أصحاب كتير , كتبنا بوستات كتير , بعضها كان له ذكريات معينه , ممكن حتى تفتكتر حالتك النفسيه ومراتك كانت طابخه إيه في اليوم ده لما تقرا بوست لك قديم أوي , الصداقه أهم , والفيس بوك عامل زي كافيتيريا كبيييييره أوي , قاعد فيها الأصدقاء مع بعض , لعبة الكراسي الموسيقيه بتحصل أحيانا , لكنك بعد سنه واتنين وتلاته بتكوّن انطباعات معينه عن أصدقائك وعقولهم وثقافتهم وطريقة تفكيرهم , بتعيش معاهم وبيبقى بينكو ذكريات , عالم جميل مالوش علاقه بوشوش البشر ( إلا البنات المزز طبعا !! ) , إنما صداقه بين عقول وأرواح أكتر ( كتكووووووت ) , المهم يعني الفكره اللي جت في بالي إن المولد ده كله والموال اللي اسمه الفيس بوك و دولة الفيس بوك ممكن تختفي في لحظه , يعني في لحظه كده ميبقاش فيه حاجه اسمها فيس وبالتالي أصدقائك فينيتو , أرواحنا وصداقتنا في إيد عيل أمريكاني , يجرى إيه مثلا لو الواد مارك قرر فجأه إنه يقفل المحل بتاع الفيس ده أو يغير نشاطه ويحوله لمطعم كباب وكفته ؟!!.

.

.

محمد حسين 

.

يا ريتني ما غنيت

مهموم بحب الوطن
وأهلُه أهلِ البيت
وساعات بغنِّي شجن
يتردّ لي أوجاع
أجمل مافيه اتباع
حتى عقول الناس
عقول ما تدخل راس
يا ريتني ما حبيت
يا ريتني ما غنيت !!.
.
.
محمد حسين

منوع

إلحاقا لما سبق , النهارده عيد ميلاد كاتبنا الرائع الراحل المبدع جلال عامر , 61 سنه يا عم جلال , كل سنه وانت طيب يا خال , جلال عامر كتب ألاف المقالات الساخره , ولما تقرا مقالاته هتلاقي فيها شخصية جلال عامر وتربيته وأخلاقه , مفهاش تعارض , حتى أراؤه السياسيه هي هي , قال عم جلال ( الحزب الوطني وجماعة الإخوان المسلمين هما طرفي المقص لهذا الشعب ) , ولو عاش جلال عامر ألف سنه وكتب ملايين المقالات مكنتش هتلاقي تعارض في كتاباته , يا بيه ده واحد مباعشي دماغه لحد , عاشق تراب مصر , متسّق مع نفسه , جلال عامر من كتاب قلائل جدا في تاريخ مصر الحديث اللي ينفع يتقال عليهم كاتب كبير أوي , الحكايه مش بالسن أصلها ولا بالأقدميه , وشجرة الجميز لو عاشت ألف سنه عمرها ما هتبقى شجرة ياسمين !!.

.

.

صباح الخير , الكاتب الكبير أوي زيه زي الشاعر الكبير أوي زي الأديب الكبير أوي زي العيد الكبير أوي , المهم يعني تقدر تعرفه بسهوله وتعرف شخصيته وثقافته وفكره وحتى تربيته ونشأته من كتاباته , مسموح طبعا للكاتب الصحفي الكبير أوي إن يكون عنده شوية مرونه elasticity يعني خصوصا لو كان بيكتب في مجال السياسه , لكن الكاتب الصحفي اللي تجيب له مقاله من شهرين تلاته ومقاله النهارده وتحطهم جنب بعض على الترابيزه تلاقيهم قطّعو بعض وشرحو بعض بالموس , الكاتب اللي مقالاته عكس بعض , مينفعشي يتقال عليه كاتب كبير أوي ( ولا حتى من غير أوي ) , ده واحد بيسترزق مش أكتر , أرجوكم نقطة نظام , وبلاش الألقاب اللي بننعم بيها على كل من هب ودب دي , فهمي هويدي مش كاتب كبير أوي , لكن ممكن تقول كاتب عجوز أوي , كاتب مُسن أوي , كاتب طاعن في العمر أوي .

.

.

.مش معقول , مش ممكن والله , مريض ( كويتي ) دخل اشترى دوا وسألني عليه 3 أسئله محدده وكان مهتم يعرف الإجابه ولما عرفها شكرني جدا ( قالي : الله يرضى عليك , جزاك الله خير ) وسلّم عليا وهو طالع ............أه والله بجد , وعهد الله أنا نفسي أتصور معاه , طيب أعزمك على حاجه طيب ؟ هو فيه كده ؟ يعني أم وطنا العربي ده لسه فيه مريض بيسأل أسئله مختصره ويبقى منتظر الإجابه ويقول شكرا ؟ , أحمدك يارب إني عشت لحد ماشوف اللحظه دي !!.

.

.أبو العلاء المعري مش عاجبني يا أم أبو العلاء , مش عارف يلعب سياسه كده و كلامه مبهوق ومتعرفيش ياختي هو مناضل من ثوارنا ولا مناضل من منازلهم , أنا رأيي إنه يقعد في بيته ويكتب شعر في الخيمه والناقه والجمل أفضل أو يترافع في قضايا تعويضات ( غزوة أحد ) ................. هه يا خوانا فيه حد هنا من أنصار أبو العلاء المعري ( ص ) وهيرفع لي ضغطي ؟!.

.

.

يااااه يا عبد الصمد أفندي , الواحد انفعل الصبح انفعال , يا سلالالالام , اللي يغيظك بقى إن الجنازه كانت حاره والميت ( خالد علي ) اللي قال ثورة 30 يونيو نُص ثوره ونُص إنقلاب ( ونص لامبولي ) , وحرّج عليا بابا مروحشي السينما , حاسس إن جسمي بقى فيه كمية أدرينالين تكفي إني منمش 9 أيام بلاياليهم , لا أنام , يا مين ياخد مني اتنين كيلو أدرينالين ويديني مكانهم تغفيله ( أو مروحه ) , أو على رأي حليب الصافي ( خدو عيني نامو بيها ) !!.
أنا تقريبا قاعد دلوأتي بشوف الزبون اتنين وأحيانا تلاته ( في وقت الذروه ) , حاسس إن عيني هتقع من راسي , هتقع بسرعه أوي ( كصخرٍ حطّهُ السيلُ من خالد علي ) !!.
أصدقائي الأعزاء المؤيدين لأسيادنا السياسيين الكبار المفوهين المحنكين المناضلين , إيماني مني بمتطلبات المرحله , سوف لن أنسى في المرات القادمه أن أكتبهم هكذا , محمد البرادعي ( ص ) , عبد المنعم أبو الفتوح ( ص ) , خالد علي ( ص ) , أحمد ماهر ( ص ) , علاء عبد الفتاح ( ص ) وكل من له ( ص ) يصلي عليه .
أتحداك أن تعرف يوما هو مين ال ( ص ) بتاعي , جايز , إحتمال , ربما , بيرهابس , إنك ممكن تفهم في يوم من الأيام إن المواطن المصري لازم يكون له ( ص ) واحده بس إسمها م ( ص ) ر .

.

.

من أول زرع وحصد أهو ............... لو سمحت جاوب ب أه أو لأ ....مفيش إجابه تالته للأسف .
.
حضرتك مع ثورة 30 يونيو ؟
حضرتك نزلت الثوره دي أو تعاطفت معاها على الأقل ؟ .
حضرتك مقدر موقف الجيش اللي نزل حمى إرادة الشعب في 30 يونيو زي ما عمل في يناير ؟
حضرتك كنت رافض لحكم الإخوان وبيتمنى يغورو النهارده قبل بكره ؟
حضرتك مع خارطة المستقبل ولا ضدها ؟
حضرتك مع محاربة الإرهاب ولا ضده ؟
.
.
................ طيب إيه مشكلتك حاليا ؟ إيه اللي مش عاجبك ؟ ايه الكارثه اللي حصلت في الشهرين ؟ إيه اللي كان نفسك يحصل في شهرين ومحصلش ؟ .
هل مشكلتك إن الببلاوي عجوز وعدلي منصور هادي والسيسي مش بيطلع بخطبه كل يومين .؟ هل مشكلتك إن مصر مخترعتش الذره في الشهرين دول ومصنعناش مركب فضاء ؟ هل مشكلتك إن حكومة الببلاوي مقضتش على العشوائيات والفقر والجهل والمرض في شهرين ؟!!.
.
أسف يا برادعي , أسف يا خالد علي , أسف ياحمد ماهر , أسف يابو الفتوح , أسف لكل أصدقائي .

.

.خالد علي هيترافع ضد قرار حل جماعة الإخوان الإرهابيين ( فريد الديب النسخه الإسلامجيه ) , خالد على ضد اعتقال قيادات الإخوان بدون توجيه تهم ( أحمد ماهر اللي مش في سيكس إبريل ) , خالد على شايف إن 30 يوينو نُص ثوره ونص إنقلاب ( أبو الفتوح وهو صغير ) , خالد على عايز يعمل ثوره تالته ( في ساعة عصاري ) ولما تسأله ليه يا كابتن ؟ هيفكّر كتير ويقولك أصلنا لسه مجبناش حق سعد زغلول وشجرة الدر ( طيب والسادات والنقراشي باشا مالهمشي حق عندك يا كابتن ؟! ).

.

.

من أهم أحلامي لبلدي مصر إن ييجي علينا يوم وألاقي فيه الخطيب بيطلع المنبر لخطبة الجمعه وهو معلّق باتش على صدره بيقول إنه تابع لوزارة الأوقاف والأزهر الشريف ومؤهل لمهنة ومهمة الخطابه , يعني عايز الخطيب يكون زيه زي الدكتور والمهندس معاه ترخيص بمزاولة مهنة ( الدعوه إلى الله ) , جزء كبير جدا من خراب عقول المصريين إن أي واحد معندوش ماكنة حلاقه أو مكسل يحلق دقنه فسابها لما تكبر شويه يتقال عليه شيخ وبعد يومين يطلع على المنبر ويعمل ( بيبي ) في عقول المسلمين !!.
كمان خطبة الجمعه تقتصر على المساجد الكبيره المرخصه فقط , مش كل واحد يعمل لي زاويه تحت بيته عشان يبني عليها دورين تلاته مخالفين وبعد شويه يحط فيها حصيرتين ومروحه ويجيب ابن خالته كهربائي السيلسيون عشان يخطب الجمعه للناس !!.

.

.

محمد حسين 

.

ضفاير

 ضفاير ضفاير
بنات لسّه لسّه
بأوصّه وضفاير
.
ونظرة عنيها
بريئه رقيقه
ما بتخفي الحقيقه
يا بنت بضفاير
.
ضحكتها اللي أيه
والقلب اللي مرمر
عود ياسمين وأخضر
متخبِّي في ضفاير
.
في ورقة زميلها
وصفت له شعورها
بسهم ومثلَّث
كلام مستخبِّي
ساعدني يا ربي
على بنت بضفاير
.
عصفور كان معدِّي
بتحبه ف خيالها
ندهتله بجمالها
شبكوه الصفاير
.
وامّا تحب ياما وتقول له في لحظه
بحبك بحبك
بتقوم ليه قيامه
على بنت بضفاير ؟!
.
يا ناس يا رذِّيه
يا غاويين أذيه
ليه تحاربو البنيه
وتقصُّو الضفاير ؟!!
.
.
محمد حسين

القرايه

ساعات يا صاحبي بفتكر
أقرا في عيون الناس واعيد
كل نظره بشوفها أيه
وساعات وحيد
بكفر واعيش
متهمنيش
حتى القرايه !!.
.
.
محمد حسين

منوع

قيود
.
صباح الخير , الواحد مننا بيوعى عالدنيا يلاقي نفسه محاصر بمجموعه كبيره جدا من القيود , لو فكرت شويه هتلاقيها موجوده حواليك في كل مكان وكل لحظه , مينفعشي تنزل من البيت من غير ما تسرّح شعرك , وكل عشرين تلاتين سنه لهم تسريحه شعر مختلفه ولازم تلتزم يا أخ علي ( هذا ما وجدنا عليه أباؤنا ) , قدرتك الجسمانيه عليها قيود , تقدر تشيل قلم أو كوميدينو لكن متقدرشي تحرك النخله اللي قدامك دي , القميص بيتلبس فوق والبنطلون تحت ( طيب مينفعشي العكس ؟) , البنت لازم تستنى إبن الحلال ييجي يخطبها , لكن لو بتحب هي واحد مينفعشي تروح تخطبه , وانت مينفعشي تنزل من بيتك عريان أو بالفالنه , عاداتنا وتقاليدنا بيقولو كده , ولما تييجي تكتب بوست بالعربي لازم تكتبه من اليمين للشمال مستحيل تكتب عربي من الشمال أو من فوق , ولو حبيت تقول للبت نوسه بحبك لازم تدور عالحروف الأربعه بترتيبها ده عالكي بورد , حرف الباء عامل زي الطبق كده وتحته نقطه أو بطاطسايه , طيب أنا مش لاقيه الحرف ده , تقريبا مش موجود عندي في الكي بورد أو كان موجود واختفى ...الزرار بتاع الطبق والبطاطسايه اتكسر , أعمل إيه بقى ؟ أفضل معلّق مشاعري كده لحد ما نلاقي حرف الباء ؟!. ..... ممممممممم أنا فكرت إني أكسر قيد من القيود دي , مش هلتزم بالحروف ولا بعددها أهو : ( نمالتمكتنتخ0قاتثقتثهقحقهتاخهخثحق ) يعني بحبك يا نوسه بس من غير قيود !!

.

.

تفتكرو لو البرادعي رجع من برّه واترشح للإنتخابات الرئاسيه اللي جايه قدام خالد علي ومكانشي فيه مرشحين غيرهم , تفتكرو مين اللي يكسب ؟

أنا عن نفسي هنتخب البرادعي , لأن الحكيم الصيني قال زمان : إذا كان لديك رغيفان من الخبز فبعْ أحدهما واشتري بثمنه سجارتين بانجو !!.

.

.في ليلةٍ أقلُ جمالاً من ليلتنا هذي سوف تأتين إلى خيمتي يا فرجينيا !!................... هو الباشمهندس اللي قال البؤين دول كان اسمه ايه ؟ وإيه ياض التناكه دي على ستك فرجينيا جميلة الجميلات ؟ أومال ياخويا لو كنت شبه أحمد عز ولا محبوب زي خالد على كنت عملت في البنيه إيه ؟ ...قطيعه تقطعك يا بعيد وقال سوف تأتين إلى خيمتي ؟ ده على أساس إن خيمتك دي شقه في الرحاب 118 متر ولها تراس بيطلّ عالبيسين ؟!!

.

.

حكايتي مع نوسه !!.
.
أنا إسمي مدحت وبيدلعوني يقولو لي يا ميمي , أنا راجل صحيح بس مش راجل أوي ( تقدر تقول نُص راجل ) , وفي يوم من الأيام كنا في ( نص ) اليوم كده وقابلت بنت اسمها نوسه في نُص الشارع , هي مش جميله أوي ...تقدر تقول ( نُص جميله ) , اتعرفت عليها وحبيتها نص حب , وقلت أتقدم لها بقى , خدت معايا نُص كيلو بسبوسه , ووصلت لشقتهم لقيت الباب مقفول نُص قفله , فتحت الباب ودخلت لقيت أبوها قاعد في ( نُص ) هدومه , قلت له يا أونكل أنا عايز أخطب نوسه ( نُص ) خطوبه كده لحد ما ربنا يفرجها , يعني ممكن نقرا ( نُص ) الفاتحه دلوأتي والنُص التاني بعدين , أنا ظروفي هتسمح بإني أدفع ( نُص ) المهر وأجيب ( نُص ) التلاجه و ( نُص ) أوضة النوم , قام أبوها قال لي عالبركه يابني أنا هجوزك نُص نوسه والنص التاني هسيبه لابو الفتوح ( عبد المنعم بقى أو حسام مش هتفرق كتير ) !!.
..................ممممممممم لا أبدا , ده بوست بطريقة ( النص ) أو لغة النص اللي بتعجب المثقفين , وانا حاسس إني بعد البوست ده هبقى زعيم سياسي وليا دراويشي , وعلى أي حال دي حكاية خالد على باختصار أو ممكن تقول إنها نُص الحكايه وفي انتظار النُص القادم !!.

.

.صباح الخير , أسعدني الحظ وكنت موجود في مصر يوم 30 يونيو , نزلت شاركت في الثوره في ميدان المحافظه في المنصوره , المنظر اللي شفته بعيني مش قادر أنساه , تقريبا شعب المنصوره بالكامل ماعدا 17 فرد كانو في الشارع , على كل شكل ولون , الست الفلاحه اللي لابسه جلابيه وجايه مع جوزها عالمتوسيكل وشايله علم مصر وبتزغرط , وبنت الجامعه اللي لابسه جينز وتيشرت , وطبيب مستشفى التأمين اللي قابلته هناك , والغلبان اللي جاي في ميكروباس بجنيه , والعامل اللي دخل يشارك بعد ما خلص يوميته , الشقق كلها على يمينك وشمالك معلقه علم مصر , الأعداد كانت بتغظي الشارع الرئيسي في المنصوره بداية من مستشفى التأمين الصحه وحتى شارع المشايه على النيل ...يتهيألي أعداد المتظاهرين في المنصوره كانت تكفي لتغيير نظام الحكم في القاهره !! , الإخوان وخالد على وأي حيوان مثقف هيقول إن اللي حصل في 30 يونيو ده إنقلاب أو نص إنقلاب أو تُمن بسطرمه ميلزمنيش صداقته , أمي قالت لي وانا صغير هنصحك بحاجتين ( يا محمد يا بني إحذر من البنات ومتصاحبشي الحمير !! ) , وبما إني مش قادر على الأولى فقلت لازم أقدر على التانيه !! , لو اللي حصل يوم 30 يونيو كان إنقلاب فأنا أول الموافقين , أنحني إحتراما لإنقلاب 30 يونيو , ولو ربنا ابتلانا بحاكم فاسد هطالب الشعب بالنزول في إنقلاب جديد مشابه ل 30 يونيو , ولو أقدر أوصل صوتي لدول العالم المتخلف هشجعهم على عمل إنقلابات مماثله ل 30 يونيو !!.

.

.أغبى حاجه هنا فعلا هي إن العربيات غالبا أوتوماتيك والبنزين نضيف أوي والطرق مفتوحه مفهاش مطبات ولا بلاعات وكاميرات رصد السرعه موجوده في كل مكان والسرعه المحدده ( بالكتير 110 ) , يعني مجرد إنك تسرح لحظه تلاقيك اتصورت يا معلم ( إضحك الصوره تطلع حلوه ) , اللي ينرفزك بقى عالأخر إن قيمة المخالفه الواحده ( اللقطه دي ) تساوي قيمة تلفزيون إل سي دي 32 بوصه , وقيمة مخالفه كمان تساوي قيمة تلاجه 14 قدم , ومخالفه تالته تجيب بتمنها غسالة الأطباق وطقم الكاسات والجيلي , يعني واحد سرحان على طول زي حالاتي ممكن ياخد مخالفات في مشوارين تلاته بقيمة مطبخ عروسه , وزغرطي ياللي مانتيش غرمانه..... عقبال عندك يا ست أم فاروق !!.

.هقول تاني 

.
عوضين الغفير سمع إن الواد محفوظ الأهبل أبو رياله كان قاعد على القهوه بيشرب حجر معسل وإنه لسِّن بالكلام على ( منى ) بنت عوضين , وقال عنها حاجات بطّاله , فقام عوضين نطّ من على فرشته و لبس جلابيته و قعد يلِّف على بيوت البلد كلها بيت بيت ويقول لكل واحد بيقابله ( أنا منى بنتي أشرف من الشرف ) , يام محمود منى بنتي سمعتها زي الفل , يا عم مرعي منى بنتي انت عارفها كويس , يام نيازي صحي نيازي وقولي له منى بنت عوضين شريفه وهتفضل طول عمرها شريفه !!.
.
عن لجنة الدفاع عن البرادعي ضد التشويه أتحدث .

.

.

.خبر عجيب جدا على اليوم السابع , الخبر بيقول ( بيان تأسيس جبهه للدفاع عن البرادعي ورموز الثوره ضد التشويه ) !!.

رغم اعتراضي الشديد على موقف البرادعي الأخير , لكني حاسس إن أكبر إهانه وتشويه للبرادعي ورموز الثوره هي تأسيس جبهه للدفاع عنهم ضد التشويه !!.

.

.

لجنة ال 50 لتعديل الدستور دي قدامها طريق من إتنين , إما إنها تحبس مندوب السلفيين في أوضه ضلمه و تكمل شغل عشان يطلع لنا دستور محترم فعلا أو ترمي مناقشاتها ودستورها من الشباك وتركز مع مندوب السلفيين في اللجنه , تقعده كده وتفهمه إنه المفروض يقف في السلام الوطني ويقف لما يقولو دقيقه حداد , ويعرفوه إن حكاية السلام الوطني والحداد دي بدعه صحيح بس هي بدعه زيها زي العربيه الفورد وساندوتشات الهامبورجر و الموبايل والكاتشب .
شئ سخيف جدا إن لجنه يكون فيها مجدي يعقوب ومحمد غنيم تضم في عضويتها واحد من بتوع بول الناقه .
عمركشي شوفت إنت فريق كوره رايح يلعب مباراه دوليه مهمه جدا ممكن توصلنا كاس عالم وأصر المدرب إنه يجيب ( حباظه ) مع الفريق , وفي التدريبات اللي قبل المباراه مباشره كانو محتاجين يفهمو حباظه إن كرة القدم دي بتبقى حاجه مدورة كده وبتتشاط بالرجل ؟!!.

.

.

جمال عبد الناصر / حسني مبارك / محمد مرسي ........... مصر دي حكمها 3 أنواع من الرؤساء , الأول كان عنده خبره وكاريزما , والتاني عنده خبره وحساب في البنك والتالت عنده 4 عيال وأمهم !!.

أسعد الرؤساء المصريين حظا في تاريخها هو الرئيس القادم لمصر , حتى ولو كان من النطيحه والمترديه وما أكل السبع , لأن محمد مرسي ينزل في تصنيف الرؤساء منزلة ال ( صفر ) من الأشياء ونحن دائما نقارن الرئيس بمن سبقه مباشرة , هنيئا لك يا رئيسنا القادم فليس بعد الكفر ذنب وليس بعد الصفر عيب !!.

.

.صباح الخير , الدم بدأ يسيل في السودان , ومصر بلد المصبّ بالنسبه للسودان , يعني الدم هيوصلك هيوصلك , عمر البشير العسكري ( اللي بيطبق الشريعه الإسلاميه من ربع قرن ) بيقتل الأطفال والنساء , على حد علمي السودانيين مش لاقيين ياكلو عشان يعرفو يشترو سلاح ويتظاهرو بيه , يعني ثورتهم سلميه أقرب ما تكون لثورة جياع , ما رأي قناة الجزيره ( والأخت شيماء ) وشباب الإخوان و نشطاء الفيس بوك ......... أنا عارف رأي النشطاء في الثوره السودانيه , أكيد هيقولو اللي بيحصل في السودان ده نُص ثوره ونُص إنقلاب ( أو كما قال مولانا خالد علي في مُحكم تنظيره ) !!.

.

.

من كام شهر والجيش بيحارب الإرهاب في سينا و من يومين تلاته كان قرار المحكمه بحل جماعة الإخوان المسلمين ومصادرة أملاكها , والنهارده لجنة ال 50 لتعديل الدستور أقرت بعدم جواز إنشاء أحزاب على أساس ديني .... يعني جيشك بينضف البلد من الإرهاب ( الماضي ) والقضاه بينضفوها من السفاله ( الحاضر ) ولجنة الدستور بتنضف لك ( المستقبل ) , ومش عايزيني أتفائل ؟!! .......... يا محترم أنا مش عايز حاجه من أم البلد دي غير إني أشوفها نضيفه , نضف عقول الناس الأول وبعد كده الشوارع هتنضف بسهوله , والله العظيم أنا ما كنت أحلم بكده لا في شهرين ولا سنتين , هو انا اللي مجنون والنشطاء والنحانيح عاقلين ولا ايه بالظبط ؟!!.

.

.

كلامي عن السودان كان هزار من باب المحبه مش أكتر , بعيب على السودانيين صبرهم على حكم البشير ربع قرن تحت زعم تطبيق الشريعه , بعيب على السودانيين رضائهم بتقسيم السودان تحت زعم تطبيق الشريعه , بعيب على السودانيين إزدياد نسبة الفقر والبطاله والجهل عندهم تحت زعم تطبيق الشريعه , سخريتي هي صرخه بتقول باختصار , إنتو لسه جايين تفوقو دلوأتي ؟ هتلحقو الباقي من بلدكو فعلا ولا هترجعو لغيبوبة التُمباك وتطبيق الشريعه ؟! ................عارف إنت لما إبن عمك الكبير يقابلك في الشارع ويقوم ضاربك بالقلم ويقولك كنت فين وسايب أمك تعبانه كده وكلاب السكك بتنهش في لحمها ؟!!.
................. مش هتفهم حضرتك كده , يالله إديني درس في العنصريه , أنا هقعد وأستربع أهو .

.

.إصطباحه زي الفل والله , أول مريض دخل قالي ( اتفضل دي وصفه ( روشته ) من الطبيب , الطبيب اللي في المستشفى !! ) , تصدق إنت فاجئتني بالموضوع ده , أنا كنت فاكرها من الطبيب اللي في الكونسلفتوار !!.

تاني زبون شاب 20 سنه وجاي يجري مستعجل قالي عايز حليب ( هلالات ) , قلت له مفيش حاجه اسمها حليب هللات , انت تقصد ( رونالاك ) أكيد , رجع تاني جري يسأل أمه في السياره وقالي أه هو اللي انت قلت عليه , سألته عمر الطفل أد إيه ؟ قالي معرفش , بس توه وٍرع صغير , سنتين أو سنه أو 5 شهور مش فاكر !!.
التالته بقى كاشفه عند دكتورة الأسنان ومكتوب لها مضاد ومسكن , قلت لها المضاد كل 12 ساعه , قالت لي ( يعني تقصد 3مرات في اليوم ؟!! ) .
.............هما دول أول 3 زباين , إفرجها علينا يارب بس متفرجهاش أوي , وعلى رأي اللي قال ( الزبائن لا تأتي فرادى ) !!.

.

.

محمد حسين 

منوع

وانا صغير ( 7 سنين بالكتير ) , كان أبويا الله يرحمه بيشتغل في أرضنا ( الغيط ) , تقريبا كان بيُضم الرز , وبعدين أمي جابت ( أولِّه ) و غسلتها وملتها مايه ساقعه من ( الطرنبه ) , وقالت لي خد الأوله دي وديها لابوك في الغيط عشان زمانه عطشان أوي , أنا خدتها ومشيت ( المسافه كانت 2 كيلو تقريبا ) , وقبل ماوصل عند أبويا ب نص كيلو ضربت في دماغ أهلى إني أعمل لعبه كده , قلت أنا هرمي الأوله المليانه مايه دي لفوق واستناها وهي نازله وأقوم شاقطها بصباعي قبل ما تقع ( يعني أدخّل صباعي في ودن الأوله ) , طبعا الأوله وقعت على الأرض واتفشفشت 600 حته , وانا كنت بخاف جدا من أبويا , في اللحظه دي كان إحساسي هو نفس إحساس مرسي لما دخل عليه رجالة المخابرات في قصر الرئاسه وقالو له ( إنت مقبوض عليك يا كابتن ) , طيب أعمل إيه ؟ أتصرف إزاي ؟ الأدرينالين ضرب في كل مكان في جسمي , كان ممكن أروح لأبويا واعتذر له واقول له ( باردون داد ) وأرضى بقى بقلمين من النوع اللي بيصاحبهم وميض لحظي وزغلله خفيفه في العين أو أرجع لأمي واقول لها الأوله اتكسرت واسمع لي كلمتين في جنابي واخد أوله تانيه , الخوف خلاني أتصرف تصرف تالت , أنا يومها هربت , روحت قريه جنب قريتنا وفضلت فيها لحد المغرب تقريبا , كنت وقتها جعت أوي فرجعت بقى ورضيت بقسمتي ونصيبي !!.
الموقف ده افتكرته لما من كام يوم كده بنتي الصغيره لمار ( 3 سنين ) ضيّعت ريموت التليفزيون ( أيام القطه اللي كانت عندي في الصيدليه ) وبعدين أنا روحت للمار وانا مبتسم كده وقلت لها بمنتهى الهدوء والنحنحه , فشر البرادعي و عمرو حمزاوي , ( لمّوره حبيبتي ...وديتي ريموت التلفزيون فين ؟ ) , قامت بصّت لي من فوق لتحت كده وقالت لي شعشفشي ( يعني معرفشي ) , وكان ناقص تقولي ( ليه يا كباتن ؟ فيه حاجه ولا ايه ؟!! ).

.

.دعارة إيه يا بت ؟!...إعاره يا حاجه إعاره ....بنتك جايلها إعاره !!.

......... مشهد من مقابلة مدير قناة الجزيره مباشر مصر لاختيار مراسله جديده ل ( تغطية ) الأحداث في مصر !!.

.وعلى سيرة الهجوم الإرهابي المسلح على قاعده بحريه أمريكيه ومقتل 4 , عايز أقول للرئيس الأمريكي ( مسطر بريذيضنط أوباما ) إن اللي عمل كده ناس طيبين وبتوع ربنا , إرهابيين سلميين وفصيل وطني أمريكي لا يجب إقصاؤه , أنا بحذرك يا مولانا من استخدام العنف في تعقب الجناه , كما أطالبك بالحفاظ على أرواحهم , واعلم أن ما يحدث وسيحدث في أمريكا سوف يتوقف في اللحظه التي يخرج فيها سيدنا بن لادن من قبره ...............مممممممم مش انت حضرت العفريت يابن الصرمه , إصرفه بقى !!.

.

.

وفيها ناس فاكره إن الخاين ممكن تديله حبايه كده يحطها تحت لسانه مع بؤ مايه ويتحول ويبقى وطني على طول , الحبايه السحريه أو العشبه السحريه اللي حولت الديك ( لهيطه ) وخلّته أد الفيل , وخلّت محمد صبحي يضرب المعلم عكوه الجزار , الناس دي لما كبرت بقى اسمهم النشطاء السياسيين والنحانيح بتوع ( المصالحه وفصيل وطني )...هي حبايه كده يحطها الإخوان تحت لسانهم ( بعد 80 سنه خيانه ) ويبقو وطنيين على طول !!.

.

.ولما الجيش يتدخل بقوه ويواجه الإرهاب في سينا ولا الصعيد ويحمي أرض مصر ولا أقباطها يقولو له ( إنت عنيف أوي يا سيسي ) , ولما يستنى ويتأنى يقولو ( ياااه إنت لسه فاكر تتدخل يا سيسي )............علاء عبد الفتاح هو نموذج لليساري بتاع ( خُلقنا لنعترض ونصلّح راديوهات ) !!.

.

.زمان في البلد عندنا , كانت لما أم تخلف عيل وتخاف عليه من الحسد أو عيون الناس كانت بتسميه شحاته أو الشحات أو شحته , أنا يتهيألي مصر محسوده فبقترح يعني عشان نفك الحسد والنحس والعمل اللي معمول لها ده إننا نسميها ولو لفتره مؤقته ( جمهورية شحاته الشحات شحته العربيه ) !!.

.

.

يا مراري ياني ...واحد سوداني شغال في المستوصف اللي جنبي وبيحب يهزر بقى ( وباللهجه المصريه كمان ) , دخل عليا وقالي عايزينك تمسك حكم مصر يا دكتور ...قلت له مش فاضي , عندي فواتير بعملها ونوفالجين فاصوليا ببيعه , قالي ( بيقولو إن رئيس مصر اللي جاي هو فريق متقاعد من الجيش وإن الجيش هيفضل يحكم مصر على طول ) , قلت له مين اللي بيقول ؟ قالي ( المنجّدين ...المنجدين اللي بيتنبأو بالأحداث ويتوقعوها دول ) !!
........ تصدق معاك حق يا زول , هي مشكلتنا في المنجدين فعلا !.
توب علينا يارب من المنجّدين ومخاريزهم !!.

.صباح الخير , أخيرا ليلة إمبارح خلصت وانا عمّال بقول لها ( عدّي يا ليله ) , كانت حفله يا مولانا معموله على شرفي وشرف كل مواطن زملكاوي شريف , صدقيني يا عزيزه ده أنا مواطن زملكاوي شريف , النهارده رجعنا تاني لقصة ( عنب ديبو ) , الجيش المصري بيضرب البيوت والجوامع في سينا وبيقتل الأطفال يا بيه !! , يا ربت الحفله كانت استمرت والليله معدتش , بحس إن أصدقائي مسحوبين كده من ( المختمه ) بتعاتهم والجزيره ماشيه وراهم بتقول ( شي ...حا ...حا يا ناشط ...شي يا سياسي ) , يا مولانا الجحش اقف قدام المرايا واسأل نفسك سؤالين : إنت فوضت الجيش بمحاربة الإرهاب ولا فوضته بعمل أوبرا عايده ؟!... طيب الطيار المصري لما هيضرب على بيت مختبئ فيه إرهابي هيعرف منين إن البيت فيه أطفال ؟ يعني يركن الطياره صف تاني وينزل يخبط عالبيت ويقول للإرهابي والنبي لو عندك أطفال طلعهم ؟! , طيب اسأل نفسك سؤال تاني , هو جيش مصر هيقتل أطفالنا ليه ؟ عملها امتى ؟ ده جيش مصر العظيم اللي حارب عشرات الحروب عشان تراب بلدك ولا جيش أبرهه الأشرم ؟! لو عايز تعرف الإجابه متتفرجشي عالجزيره ولا أقولك ( حا يا ناشط ....شي يا سياسي ) !!.

.

.

.قاعد مخنوق وزهقان وبتخانق مع دبان وشي , هو الواحد ينفع يغيّر النادي اللي بيشجعه ؟ طيب أعمل ايه عشان أغيره ؟ أروح للسجل المدني واعزم عالموظف باتنين جنيه وسجاره كليوباترا واقول له غيرلي اسم النادي في البطاقه ؟ طيب فيه ماده في الدستور بتقول ( يحق للمواطن تغيير النادي اللي بيشجعه دون الرجوع للأزهر أو الكنيسه ) ؟! , بس تصدقو بالله , لو روحت السجل المدني والموظف قالي أكتب لك اسم النادي الجديد ايه ؟ هقول له الزمالك ........... على رأي سومه ( وإن كنت أقدر أحب تاني هحبك انتَ )........موتو بغيظكم يا أهلاويه !!.

.

.

العامل عندي أول مره يستخدم مطهرات ( فلاش ) في تنضيف الحمام , عمّال بيكح في الحمام بقاله ربع ساعه وصوت كحته مسمع في المنطقه كلها , ما الخيبه لا يكون شرب الفلاش !! , المهم بقى إن العمال عندنا لهم دورين أساسيين لا ثالث لهما , إنه ينضف الصيدليه وإنه يحميها من السرقات بتاعة الحراميه ( الإنكلابيين ) , ولما العامل طوّل في كحته كده والمفروض أن هو ده اللي هيحميني افتكرت عبد السلام محمد في فيلم الخُط بتاع الصعيد لما كان بيقول لعادل إمام ( أنا السفاح اللي جاي أقتلك .... أنا السفاااااااااااااااااح ) !!............ تعالى يا عبد السلام يابني أوديك المستوصف اللي جنبي .

.

.صباح الخير , وقالك يا سيدي ( مسيحيين ضد الأنكلاب !! ) هع هع , وصوري يا جزيره بقى ( ومعانا مداخله من ماريانا ...شيماء سابقا ) , طيب أنا يعني معنديش خيار ولا فاقوس , وعارف كويس أوي إن مصر دي زي ما فيها شويه من المسلمين ولاد صرمه يبيعو نفسهم ب 3 تعريفه فيها برضه شويه من المسيحيين ولاد صرمه يبيعو نفسهم بتلاته تعريفه , ماهو انت مش واخد بالك , مصر دي بيجيلها أوقات كده بتسكر وتقعد تضرب بانجو وتطلع تتسرمح بالليل مع أي راجل يقابلها وبعد كده تبقى حامل وتخلف الأشكال الوسخه دي , فأكيد يعني تكون اتسرمحت مع واحد مسيحي في ليله من ذات الليالي , قالك مسيحيين ضد الإنكلاب وشايفين إن فترة حكم الإخوان هي أكتر فتره الأقباط أخدو فيها حقهم هع هع , على يدي ... على يدي , خدو حقهم تكفير وحرق كنايس وأبناء ساويرس وبتوع أمريكا , هو ده اللي اتقال عليهم , يا مولانا إذا كانو المسلمين في مصر مش طايقين جماعه الإخوان المسلمين يبقى المسيحيين هيحبوهم إزاي ؟!!.

.

.

محمد حسين 

وشوش كلحه

وفيها وشوش متعرفشي
ما غير تنداس
ولجل الناس ما تكسبها
تعاملها كأي مداس
.
وشوش كِلْحه
تشوف الدنيا في عنيها
تقول غرقانه وبتغرق
ولما الوش يتغير
بيتغير من السئ
إلى السئ
إلى الأسوأ !!.
.
.
محمد حسين

منوع

صباح الخير , السعوديين لما يحبو يعزمو حد على قهوه يقولو له ( اتفضل معانا , نتقهوا سوا والله !! ) , وانا قاعد دلوأتي بشرب نسكافيه قلت أعزم عليكو يعني عزومة صيادله ( أسوأ من المراكبيه ) , ( اتفضلو معايا ... نتنسكف سوا والله , اتنسكفو معايا ).

.

.

بس يا سيدي , وكل يومين تلاته تقع عيني على فتوى غريبه وشاذه من نوعية الفتاوي الخاصه بالمرأه , كتب يا مولانا ومجلدات تكفي لعمل جبل عالي أوي , ممكن في أوقات فراغنا المستمره نبقى نطلع عالجبل ده ونمارس الرزيله الفكريه بعيد عن أعين العالم المتحضر , ملايين الصفحات في الحيض والبيض وخروج المرأه ودخولها وصوتها ومناخيرها في مجتمع عربي لحد النهارده مش عارف يصنع مشبك غسيل أو حتى ال ( ليّ بتاع الشيشه ) , والشهاده لله يعني من فتره كده وأنا رأيي إن أي كتاب من النوعيه دي لازم يبدأها الشيخ المؤلف العالم العلامه الفاهم الفهامه بالسطرين دول كاستفتاحه أو اصطباحه يعني ( هذا ومن المعروف أن المرأه هي ظاهره كونيه بدأت في الظهور في منتصف القرن العشرين وتحديدا بعد ضرب هيروشيما بالقنبله النوويه وبداية ظهور البترو دولار , واكتشف هذه الظاهره الكونيه ( المرأه ) فريق من العلماء اليابانيين وأعزو وجودها إلى تجمّع حزمة من الإشعاعات النوويه وتكثيفها على سطح أملس فكانت المرأه ...لذا وجب التنبيه , إحذروا المرأه , إحذروا الإشعاعات النوويه ) !!.

.

.وبعد اللي حصل في الكام شهر اللي فاتو دول , يجب إدراج ماده في الدستور المصري تنص صراحةً أنه لا يجوز بأي حال من الأحوال بيع مصر إلا بموافقة 80 % من الشعب المصري ...بلاش 50% + 1 دي , لأن مصر فيها ملايين متلتله من النشطاء السياسيين والنحانيح ( غير الإخوان والإسلامجيه طبعا ) , والنحانيح دول ممكن يبيعو مصر بحتة حشيش أو حظّاظه أو دراع بلاي ستيشن !!.

.

.

و دمعه سابت أثر
على خد بات محروم
بتساوي ألف كتاب
من سيرة العشّاق !!.
.
محمد حسين

.

.

و لعلمك بقى , الإداره الأمريكيه وال cia وال fbi و الwc ...كلهم على بعض كده مش هيقدرو يقبضو على الإرهابيين اللي نفذو الهجوم على القاعده البحريه الأمريكيه , عارف ليه ؟ عشان أمريكا مفهاش حي ولا منطقه اسمها مدينة نصر !!.

.

.ومصيبة مصر حاليا في نشطائها السياسيين أه والله , فاكر انت مسرحية هللو شلبي لما سعيد صالح الي عامل نفسه عيّان قال للدكتور محمد صبحي ( تكشف عليا ليه ؟ بتاع ايه تكشف عليا ؟ هو انت ظابط ؟ أنا ميكشفشي عليا غير البيه الظابط !! ) , وأهي مصر يا عم ( شلبي ) زي ما هيا بحطّة إيدك متغيرتش , ودلوأتي تقدر تسمع نحنوح بيقول لظابط مخابرات ( هتحارب الإرهاب في سينا إزاي ؟ هو انت ناشط سياسي ؟ ميقدرشي عالإرهاب في سينا غير الناشط السياسي ) !!.

.

.أهي سيره واتفتحت !!

.
وعلى سيرة النقاب , طبعا هو فضل وأجره عظيم , لكنه مش فرض على المرأه المسلمه , سيبك من كل ده وفكّر معايا بهدوء على إجابه للسؤال ده ؟
الوضع الحالي في مصر ( تفجيرات وعمليات انتحاريه وإرهبايين ) , يعني وضع غير مستقر أمنيا , وأغلب المشبوهين والإرهابيين بيتنكرو في صورة إمرأه منقبه , مفيش أسهل من كده , سؤالي كالتالي , لو قلت لك أنا أتمنى منع المنقبات من دخول الأسواق العامه والشعبيه والمترو لأني معرفشي اللي داخله دي ست منقبه فعلا ولا ارهابي متنكر , وبطالب طبعا بتأمين الأماكن دي ونشر صور المجرمين والإرهابيين والمشبوهين على رجال الأمن , هتقوم انت تقولي ( بس أنا مقدرشي أشيل وزر إني أجبر ست مسلمه على قلع النقاب ) , طيب يا صاحبي ....تقدر حضرتك تشيل وزر طفل في السوق دمه ساح عالرصيف بسبب عمليه انتحاريه نفّذها إرهابي كان متنكر في صورة ست منقبه ؟! تقدر ؟ أنا مقدرش ....فكر بهدوء وبلاش تتشنح قبل ما ترد !!.

.

.

في مدرسه بنتي من 7 صباحا , من النجمه , مع أول يوم من العام الدراسي الجديد بنختار لها الفصل بقى ( الكيلاس ) , المهم وسط حشد كبير ولفيف من الأمهات كان فيه كم أب كده , أنا واحد منهم , الموظفات والميسّات بتوع المدرسه حاولو يطردونا عشان عيب وميصحش ولا يمكن أبدا , وفي نهاية الطُرقه ( الرواق يعني أو الردهه حسب ترجمة أنيس عبيد ) كانت واقفه ست صوماليه قصيره ومنقبه زي أغلبهم , المهم قاعده تنادي وتقول حرام , حرام , رجاله حرام !! ........... أنا لو كنت ضغطت عليها شويه كانت قالت هتخشو النار يا كفره !! , عارف إنت سيادتك إيه هو الحرام اللي تقصده ؟ إن الراجل وهو معدي كده من الطرقه قدام الستات المنقبات إحتمال يعني يكون طيفه داس على طرف العبايه !!.

.

.

محمد حسين 

الموت ده ليه أشكال

والحِمْل يبقى تقيل
لو كنت حد كفيف
محتاج لإيد ترعاك
واخوك ده ماسك سيف
واقف ورا ضهرك
ساعتها بس تموت
من غير ما يطلع صوت
الموت ده ليه أشكال
ودي موته من قَهْرك !!.
.
.
محمد حسين

عبسه وتكشيره

والضحك ساعات
بيكون شايل
في جيوبه عَبْسه
وتكشيره
.
وساعات بتكلِّم
عن موتنا
وانا قصدي حياه
مبخافشي ولا اهرب
م السيره
.
وساعات تلقاني
بطير بجنون
وساعات مسجنون
بخرج من أوضتي
بتأشيره
.
شاعر
والشاعر لو تعرف
حبِّة أحاسيس
دايخين على بعض
مش زي البعض
مش جسم و شعر
و إيد عيره !!
.
.
محمد حسين

منوع

أتمنى لو أنَّ أحدَهم يقدرُ على اعتقالِ هذا العالَم ( الكوكب ) ويضعه تحتَ الإقامه الجبريه دون محاكمه عادله أو منصفه , هو لم يكن عادلاً أو منصفاً منذ البدايه , والجزاءُ من جنسِ العمل !!.

.

.

صباح الخير , اللهم احفظ دماء أقباط مصر من همجية الإرهابيين المنتمين ( ظلما ) إلى دين الإسلام , اللهم اخسف بالإرهابيين وبدارهم الأرض ................ هكذا يجب أن يكون دعائي أنا ك ( مسلم ) عندما أتابع ما يحدث في دلجا و كرداسه وغيرها , مش ممكن هيقبل عقلي إني أدعي ربنا بحقن دماء الطرفين , القاتل والمقتول , الجاني والمجني عليه , المجرم والضحيه !!.

.

.

طيب الحمد لله , الحد الأدنى للرواتب 1200 مش 800 , وقناة الفراعين اتقفلت على صباع توفيق عكاشه ومرتضى منصور , ومرسي هيتحاكم محاكمه علنيه يعني على عينك يا تاجر , والسيسي مش ناوي يترشح للرئاسه , والإرهاب شوفتوه بعنيكو , والفصيل الوطني طلع وطني أخر حاجه , ولجنة الدستور مفهاش فلول مبارك ولا يحزنون .......... أصحابي بتوع يسقط حكم العسكر والصفقه وعودة الدوله العميقه عندي ليهم سؤال : هو أستاذنا الدكتور محمد البرادعي ( ص ) لما يرجع من بره هيرجع لابس أبيض فابيض وراكب حصان أبيض فابيض كعادة الفارس المنقذ في أفلامنا العربي والهندي ولّا هيرجع ومعاه مروحه وكاسيت من ابو روحين زي اللي راجعين من الأردن ؟!!.

.

.يااااااه , الواحد فاكر إن أخر ضحكه ضحكها من قلبه كانت في 2007 , أو 2005 مش فاكر تحديدا , اللي هي الضحكه اللي عينك تدمّع فيها دي , بس انا فاكر إنه كان يوم تلات وكنا بعد العصر , ذكريات بقى .

.

.

محمد حسين 

فصول الروايه

فصول الروايه
.
.
روايه ماسكها
وبقرا بتمعُّنْ
بتبدأ بصرخه
وصرخه وضحكه
وصورة جميله لأم
وشموع
في نُص الروايه بدأْت
الدموع
وقبل ما تخلص
فصولها بثواني
لقيت حد جاني
كأنه عارفني
رمالي الروايه
وقالي كفايه
هتفضل يا صاحبي
حمار للنهايه
بتجلد في ذاتك
وكل ما تفضى
بتقرا بتمعُّنْ
في ( قصة حياتك ) !!.
.
.
محمد حسين

منوع

أعظم طبيب في الكون هو اللي يبعتلي المريض بروشته فيها صنفيني اتنين , مضاد حيوي ( كينوكس 500 مجم ) , ومسكن للألم ( رابيدوس 50 مجم ) , ليه بقى ؟ أولا لأن الصنفين دول تحديدا موجودين ورا ضهري يعني مش بقوم من عالكرسي , ثانيا لأن حسابهم 100 ريال ( ميه مقفوله ) يعني مش هدور على فكّه وباقي للمريض !!.
ياااه , الواحد بعد 5 سنين من شغله في السعوديه إكتشف إنه بقى سعودي ولازم يركن العربيه قدام المحل اللي رايحه عشان ميمشيش 10 متر , بس أنا قاومت السلوك ده وفضلت أقاوم وأقاوم والحمد لله بعد 10 سنين نجحت و بقيت سوداني !!.

.

.

وخالد علي طلع واحد من إياهم , اللي فشلو في الكيميا فاشتغلو في الأحياء .. أه يا سافله وانا اللي كنت فاكرك مؤدِّبه !!.

.

.

مش كل حاجه حصلت لنا على المستوى الشخصي في السنتين اللي فاتو هي حاجه سيئه أو مؤلمه , فيه ميزه كبيره أوي واحنا مش واخدين بالنا منها , إنك تبدأ تدريجيا تحترم عقلك وتحبه ( تحبه من قلبك حب عنيف ) , لما تشوف أصدقائك نشطاء الفيس بوك وهما عمالين يهبّلو ويتخبطو في برميل غباوتهم ساعتها هتحب عقلك وتحمد ربنا على النعمه دي , عارف إنت لما تدخل قسم الحروق الخطيره في أي مستشفى , وتلاقي مناظر صعبه جدا وقاسيه , ساعتها بتقعد تدعي للمصابين بالشفا وبتتاثر شويه واحتمال تعيط , لكن بيجيلك شعور غصب عنك بالسعاده إنك سليم ومعافى , بتقعد تحسس على كل حته في جسمك كده وتقول ( الحمد لله أنا سليم أنا سليم , أحمدك يا ربنا ) , الفيس بوك أحيانا بيكون هو قسم الحروق الخطيره في عقول البني أدمين ’ الحكايه مش فزلكه ولا انا أذكى خواتي , لكن اللي ميعرفشي عدد حروف اللغه العربيه مينفعشي يشتغل مدرس عربي !!.

.

.بص يا سيدي , الجيش كان قاعد تحت شجره كده في ساعة عصاري وقال يعني ينضّف مسدسه ويتأكد إنه شغال , فقام ضرب طلقه فشنك في الهوا , الطلقه دي بقى اسمها سامي عنان , الغريبه إن الطلقه فشنك وأي حد بيفهم عارف إنها فشنك , ومع ذلك يا مؤمن تلاقي ناشط سياسي فيس بوكي ( من منازلهم يعني ) يقولك ( أه أه أه ياني , بنزف يا ناس , هموت يا جدعان , الطلقه جت في عيني أه يا عيني ) , ياض انشف ياض الله يخرب بيتك وانت طلعت عيّل خِرع كده شبه الواد لوسي بتاع فيلم أشاعة حب , وكل شويه ألاقيك نازلي ببوست بتقول فيه ( وشرفي يا أونكل , سامي عنان هو رئيس مصر الكادم ) !!.

.

.

صباح الخير , الزيّاطين بيشجعو منتخب مصر واحنا مش معاهم , سامي عنان هو كارت بطاطا يعني كارت محروق , لو الجيش هينزّل مرشح لانتخابات الرئاسه يبقى أكيد مش عنان , إنما بدأ شغل المخابرات يعجبني ....إيه رأيكو في النطيحه والمترديه دي ؟ لأ لأ مش ممكن أبدا ...طيب خلاص بلاش منها , تاخدو الواد الجميل السليم ال cc ده ؟ أيوه أيوه .... وبس يا سيدي , وأنور وجدي يتجوز ليلى مراد ويبوسها من بؤها وتنزل لوحة النهايه the end .

.

.

أيامنا الحلوه
.
واحنا صغيرين في بلدنا , كانت بيوت الفلاحين كل بيت بيعتمد على الكاسيت بشكل أساسي لسماع الأغاني , وكان عندنا 4 أنواع من الأغاني , الولاد المتعلمين زي حالاتي تلاقي عندهم شرايط أم كلثوم ونجاة وفايزه ومياده , والبنات المتعلمين تلاقي عندهم عبد الحليم , الستات الكبار اللي مراحوش مدارس كانو بيعشقو أغاني فاطمه عيد وليلى نظمي وعايده الشاعر , وال 3 دول تحديدا كانو واكلين الأفراح في القرى عندنا , تسمع صوت فاطمه عيد وهي بتغني ( لومّاوي يا لومّاوي يا لوميه ... القلب داب في هواك يا غالي عليا ) , والرجاله الكبار اللي مراحوش مدارس كانو بيعشقو المنشدين والمداحين ( الحكّائين ) زي سعد الشاعر وعبد المعبود , اللي بيلفّو في الموالد والأفراح ويحكو عالربابه حكاياتهم الشعبيه زي حكاية أبو زيد الهلالي , الغريب والعجيب في فن المنشدين إنك تلاقي مثلا سعد الشاعر بدأ الليله بمدح سيدنا النبي عليه الصلاة والاسلام وبعدها مباشرة تلاقيه بيوصف جمال صدر خضره الشريفه ( أم أبو زيد الهلالي ) !! , خلط رائع وعجيب بين التصوف وحب أهل البيت وبين الغزل ( الصريح أحيانا ) , مصر دي عظيمه أوي بتنوعها الفني والثقافي ولا عزاء لمن لا يفهم !!.

.

.

وفي سنه 2013 يا مؤمن , وبعد ألاف وجايز ملايين السنين من إنقراض الديناصورات , وبعد 100 سنه من اكتشاف الكهرباء وبعد 200 سنه من فك رموز حجر رشيد , وبعد 50 سنه من الصعود للفضاء وبعد 100 سنه من اكتشاف القنبله الذريه ولسه مصر فيها ناس بتعتقد إن صوت المرأه عوره و إن ( الحرمه ) مش منحقها تعلّق أو تقول رأيها , و مصر يا خال لسه فيها أهل الحَضَر والمدن الكبيره شايفين البدو و أهل الريف (الفلاحين ) متخلفين , وأهل البدو شايفين الفلاحين مالهمشي أصل والفلاحين شايفين أهل الحضر ماشيين على حل شعرهم !!............ واللي ميعرفشي بيقول عدس , راديكاليه ورفض للغير مالهوش مثيل , المجهول دايما غلط وسئ وقمئ , والجهل سيد الأخلاق , وتييجي حضرتك تقولي ديموقراطيه وحريات وحقوق إنسان ؟!!.

.

.صباح الخير , بقلّب في دفاتري القديمه اللي لسه محتفظ بيها في البرج اللي باقي من عقلي أفتكرت إني الحمد لله تلقيت تعليمي الديني ونا صغير على يد مدرسين وخطباء لا ينتمون إلى جماعة الإخوان ولا السلفيين ولا الجماعه الجهاديه , إنما كانو خطباء الأوقاف وفي الكتّاب كنت بروح للشيخ عوضين , راجل مالوش في السياسه ولا في فتاوى النكاح ولا يعرف عاصمة أمريكا اسمها ايه , حافظ كتاب الله بقراءاته السبعه وكلمتين عن أركان الإسلام وبر الوالدين والكباير وحلو أوي كده .

تخيل حضرتك إن فتوى زي بتاعة السلفي ياسر برهامي ( عامل زوجتك المسيحيه كأنك تغتصبها ) , أو رأي زي اللي قاله الإخوانجي صبحي صالح ( اللهم أمتني على الإخوان ) , تخيل إن جمله واحده من دي كانت كفيله لواحد مثلي إنه يدخل في حظيرة الإلحاد من أوسع أبوابها !!.
الحمد لله أنني أدركت إسلامي قبل أن أعرف وجوههم الغبره !!.

.

.الوايت نايتس افتكر فجأه إن الزمالك اتلب 4 من الأهلي ورايح يحرق النادي , الكلام ده فات عليه إسبوع تقريبا , وانا كواحد زملكاوي وليا الجنه ( قصدي ليا الفخر ) , بشوف إن الكوره ( غالب ومغلوب ) , وبالنسبه لحالتنا يعني بتبقى الكوره ( متعادل ومغلوب )..... من سنتين وانا صوتي اتنبح , ألتراس أهلاوي , وايت نايتس , حركة 6 زفت إبريل وكل تنظيم له قياده هو تنظيم مخترق بالتأكيد , فلوس خيرت الشاطر وحسن مالك اشتغلت من بدري , فلوس تجارة السلاح والعمله والمخدرات ولا انت ياد فاكر إن الإخوان بيصرفو مليارات على الإنتخابات من محل العطاره اللي سابهلهم المرحوم ؟!, الحكايه سهله , إرمي شويه فلوس في حجر القياده بتاع الألتراس تلاقي أنصار التنظيم ( المحترمين غالبا ) بيدافعو عن أهداف المموِّل من غير ما يحسو , إرحمو مصر بقى , بيصعب عليا أوي إن تنظيم غبي زي جماعة الإخوان يخدعكو بالشكل ده , تنظيم الإخوان اللي أخرهم في التنكر إن الواحد يحلق دقنه أو يلبس نقاب , بالذمه مش مكسوفين ؟!!.

.

.أجمل لحظات لما الواحد يكلم مراته عالشات بتاع الفيس بوك ( رغم إنها معاه في البيت !! ) , محادثه من زمن الفن الجميل , حسين صدقي وكازينو الورده البيضا , يا خساره مفيش في الإيموشنز صوره لاتنين عصير برتقان , بوست لن يفهمه إلا المتجوزين اللي عندهم عيال مبيناموش , إحنا متشكرين جدا يا عم مارك , جميلك على راسنا يا خال , تعاشرب شاي بقى , اتفضل والله !!.

.

.

.كارثه حقيقيه إنك تقف على الحياد في لحظات الحرب على الإرهاب , إنك تقف في نص الطريق بين عسكري شايل سلاح بيحاول يحمي مستقبلك وولادك ومالوش أي ذنب إن أم دولتك فيها إرهابيين ومش فرحان وسعيد أوي إنه رايح يتقتل وبين إرهابي شايل سلاح بيهدد حتى استقرار دولتك على بعضها , الكارثه الأكبر إنك تعتبر موقفك الحيادي ده من الإسلام , لأ يا خال , ده مش موجود في الإسلام ولا في أي دين سماوي , ممكن تلاقيه بس في دين ( أم ترتر ) صفحة عبد المنعم ابو الفتوح !!.

.

.

.كنتُ أقرأ في كتاب يتحدث عن أولويات المواطن العربي واهتمامته فلم أجد أن من بينها القراءه , أغلقت الكتاب فورا وألقيت به من النافذه , أبدا لن أشقَ الصف العربي , عربيٌ أنا وأفتخر !!.

.

.

الفرق بين محاربة الإرهاب أيام مبارك ودلوأتي , إن محاربة الإرهاب أيام مبارك كان بيموت فيها العساكر الغلابه , دلوأتي بيموت لواءات ورتب كبيره , الإتنين شهدا ودمهم واحد , بس المعنى مختلف , أيام مبارك كان فيه ( مسرحيه ) إسمها الحرب على الإرهاب بيرمو فيها كام عسكري , ودلوأتي فيه حرب على الإرهاب بجد ,........... النشطاء السياسيين يمتنعون , يخرسو للأبد !!.

.

.

محمد حسين 

على كل كتف وشال

أنا إسمي كان مكتوب
بين القلوب اتشال
ورايتي كانت توب
على كل كتف وشال
.
إخوان وكلب وخان
رفعو علم غيري
ماتمرشي ليه خيري
يا صُحبة الأندال ؟!.
.
.
محمد حسين

لجل بكره توحشيني

اللي باين من جمالك 
وحده يكفي 
إن أيّ بنات تغير 
واللي باين من جمالك 
يا حبيبتي مش كتير !.
.
يحسدوني الناس عليكي
قالو ما فلحظه افترقنا
هما مالهم بس بيكي
وبفراقنا ؟
 طبع ناسنا ليه عجيب ؟
مش كفايه 
إني ساعة النوم بغيب ؟! . 
.
حتى أحلامي سواعي
 بنسى أضمك جوه عيني 
عارفه ليه يا حبيبتي بنسى 
لجل بكره توحشيني !!
.
.
محمد حسين 

نبيل فراج

بيولّع شمعه بموته
 وف موته تلاقي حياه
 ويضحّي بروحه عشانها
 مستقبل بنتي معاه
 ده شهيد و ( نبيل ) الواجب 
 ( فرّاج ) يا فرج الله . .
.
.
محمد حسين 
في وفاة الشهيد اللواء نبيل فراج 

ورق فيس بوك

صباح الخير , حكى لي صديقي إياه قائلا ( عمركشي شوفت واحد بيقلِّب في صفحته الشخصيه عالفيس وفجأه لقى قدام عنيه بوست لحبيبته ( الإفتراضيه ) , تقوم إيديه تترفع لا إراديا من على الماوس وعنيه تتسمّر قدام الشاشه , لحظه تأمل عميقه لإسم صاحبة الحساب حتى لو كان إسم وهمي , توتر شديد بمجرد مشاهدة صورة البروفايل الخاصه بها حتى لو كانت صوره لراجل عجوز أو طفل صغير , بعد ثواني إيده ترجع للماوس تاني يحاول يعمل لايك عشان يلفت إنتباها إنه موجود وبعدين يقول لأ , هعمل لايك , لأ , يكتب كومنت ويحذفه , يقول ( قليلٌ من الكومنت لا يضر ) , لأ لأ , ما أسكر كثيره فقليله حرام , يكتيب ويحذف , ضربات قلبه بتبتدي تزيد , مستوى الأدرينالين بيرتفع عنده لمستويات قياسيه ......... !! )
يا صديقي فلان , هذا هو الحب في صورته الفيسبوكيه , ورسائلُ حبٍ هاربةٍ من كتب مارك بن ام مارك , الحب في أخر إصداراته last edition.
يا صديقي , لعنة العشق والهوى تطارد الرجل المصري من أيام القدماء المصريين وكليوباترا وورق البردي وحتى حدثاء المصريين و ( هي ) وورق الفيس بوك !!.

.

.

محمد حسين 

الطالب المتخلف والناشظ السياسي

بوست في مستوى الطالب المتخلف والناشط السياسي !!
.
ممكن حضرتك تنزل في مظاهرات الإخوان وتموت أو في مظاهرات الثوار وحزب الدستور وتموت , بتدافع عن قضيه معينه أو عن فكر وعقيده معينه أحسبك عند الله شهيد , لكن عسكري الجيش سيادتك مش بيدافع عن فكر معين ولا قضيه معينه ولا حزب معين , هو أصلا اترمى في سينا عشان يحارب الإرهاب ويأمن حدودك , بيدافع عن أرضك وعرضك , لو سألته هيقولك يا ريت تكليفي كان جه في أي وحده عسكريه في المنصوره جنب بيتنا وبعيد عن الأرف ده , ظابط الجيش كمان اللي بيحارب الإرهابيين في سينا كان يتمنى إن توزيعه ييجي في مستشفى المعادي العسكري أو في إدارة الخدمات الطبيه بعيد عن الأرف ده , ظابط الشرطه يقولك زمايلي عايشين حياتهم في شرطة المطار أو في شرطه السياحه في شرم الشيخ وانا اتكتب عليا ابقى وسط الأرف ده ....الخلاصه الناس دي بتعرض حياتها للخطر عشانا وغالبا بترجع جثه من سينا , يعني زوجه أرمله وأطفال أيتام , مش مأيدين لحزب ولا جماعه هما بس بيقومو بدورهم في حماية بلدك ....النهارده الجمعه 13/09 عايزك تحط نفسك مكان وزير الدافاع , في لحظه كده لقى نفسه بيحارب إرهاب الإسلاميين وحماس في سينا و بيأمن محافظات مصر كلها من الداخل وهيتعامل مع مصايب وكوارث الإخوان في مظاهراتهم .............. إرحمو من في الأرض يرحمكم من في السماء !!.

.

.

محمد حسين 

حكاية صديقي

حكاية صديقي ............ كوافير نسائي حضرتك ( بائع الورد ) !!.
.
حكى لي صديقي أنه تعرّف على فتاه قال لي أن جمالها ( ظالمُ الحسنِ ! ) , أحبها صديقي وهام بها عشقا , أما هي فقالت له منذ اللحظه الأولى أنها مرتبطه وعلى خلاف مستمر مع حبيبها ( الرسمي ) وأن موضوع (فك الإرتباط ) بينهما هو أمر مفروغ منه , مسألة وقت لا أكثر بسبب الظروف الإجتماعيه المحيطه .
بعد فتره كان صاحبي قد أفاض على حبيبته من حنانه وكلماته العذبه , فتحسنت حالتها النفسيه جدا وعادت إلى حبيبها ( الرسمي ) وهي في قمة السعاده !!.
قلت لصاحبي , يا صديقي أنت مجرد ( كوافير نسائي نفسي ) زيّنت الفتاه وأعددتها نفسيا بكلماتك ومشاعرك وأهّلتها تماما للعوده إلى حبيبها , كذلك هو حال الشعراء والقساوسه والمشايخ , يعدّون الإنسان نفسيا إلى حياه أسعد وأجمل في انتظار الحبيب الموعود , كلهم يا صديقي يقومون بمهنة ( بائع الورد ) .
أما مهنة بائع الورد فهي مهنه راقيه جدا , ربما تكون أسمى المهن , ولكن يا صاحبي لها قاعدتان رئيسيتان :
أولا : لا تقع في حب الفتاه التي ( تزيّنها وتعدها لحبيبها ) , هي ليست لك , فاحتفظ بمسافة خطوتين بينكما !!
ثانيا : أنت تبيع السعاده للأخرين , ولا أحد سوف يهتم بسعادتك , هذه هي قواعد اللعبه .

.

.

محمد حسين 

ماسك الديابه

نصالح مصالح
ونعرف نخاصم
بنفس الطريقه
حياتنا ما كانت
قي لحظه بريئه !!
.
وصوتنا اللي واطي
وماسك الغلابه
وراه الديابه
بتكدب وتعوي
وتخفي الحقيقه
حياتنا ما كانت
في لحظه بريئه .
.
.
محمد حسين

منوع

حتى لا يطير الدخان ........ من أنف صديقي !!.
.
الله يخرب بيتك يا سيسي يا كافر يا عدو الله , شهرين يا تيت يا ابن التيت وانا قاعد بشكر في الجيش وبمجّد في الجيش وبطبّل للجيش وبلحس بيادة الجيش لحد ما لساني شقّق , شهرين يا كافر ولا مره بعتت لي ال 50 ألف دولار راتب شهري اللي وعدتني بيهم , طيب أدفع قسط الفله منين أنا دلوأتي ؟ ومصاريف النادي والمدرسه الإنترناشونال والشاليه بتاع مارينا والأبروكت توستر , ما نابني إلا إني خسرت أصحابي النشطاء السياسيين اللي بيطلعو في التلفزيون ويقولو ( في الواقع ممممم , والبنيه التحتيه infra structure ) , والبت بنتي كل يوم تقولي يا بابا هو أونكل سيسي مش هيبعتلي الدبابه الكابورليه ال( بينك ) اللي وعدني بيها ؟ , حتى البنت كسرت بخاطرها , روح يا شيخ إلهي لا تخسر ولا تكسب وتفضل كده في الأوفسايد !!.

.

.

صباح الخير , أصاب أصحاب الرايات الصفر ( الهيجان ) مش البوار ( هيجان اللحظه الأخيره أو العشاء الأخير ) , حتى إنهم جننونا صاحبي العاقل الوحيد اللي كان فينا , إنما فيه حاجه كده جت في ذهني أرجو من أصدقائي يفكرو فيها بتمعن ورويه وتمهل وتاتا تاتا , في 25 يناير خرجت ملايين والجيش تخلى عن مبارك فسقط نظام مبارك وفي 30 يونيو خرجت ملايين أكتر والجيش تخلى عن مرسي فسقط نظام خيرت الشاطر !! , طيب هسألكو سؤال , أنا هفترض إن الجيش مكانشي له أي دور في الثورتين , وإن الثوار فضلو في الميادين لحد ما مرسي رحل لوحده بدون تدخل من الجيش ( وده كان مستحيل يحصل ) لكن أهو افتراض , وبعدين جيشنا ( بتاع سوسن ) قال لجبهة الإنقاذ وحركة تمرد والحركات الثوريه أنا راجع لثكناتي بقى , راجع لفوطتي وبشكيري , اتعاملو انتو مع الإخوان ومظاهراتهم وإرهابهم في سينا وميليشياتهم في الشارع وقناة الجزيره والضغوط الأمريكيه وحركة حماس وأردوغان , احكمو مصر يا ساده بدون أي تدخل مننا , إيه رأيكو ؟ إيه اللي كان ممكن يحصل ؟!!............. مش جه الوقت بقى إننا ننحني إحتراما لجيشنا العظيم من أصغر عسكري لأكبر رتبه فيه ولا لسه هنكابر ونتناقش بغباوه بطريقة ( إوعى إيدك كده ملخت الكُم ) !!.

.

.دول اللي كانو بيحكمونا يا نحانيح , ده واحد كان بيكتب لنا الدستور وتقريبا عضو برلمان وقيادي سياسي بارز واحتمال كان يمسك مشيخة الأزهر !!.

.
ياسر برهامي يفتي : على المسلم المتزوج مسيحية أن يعاشرها كالإغتصاب بدون مودة .. و عليه أن يبغضها في الله !!.
.
إنما لفضيلة الشيخ برهامي عايز أقول , أنا عندي قاموس سفاله أكبر من اللي عند مرتضى منصور بس مراتي محلفاني , وعشان انت رجل دين ولحوم العلماء مسمومه وكده يعني , عايز أقولك يا مولانا إنت المفروض تذاكر وتتثقف وتتنور وتتعلم وتقرا لمدة 10 ألاف سنه ولما تنجح بعد ال 10 ألاف سنه أتوقع إنك تصلح تكون فردة صندل بلاستيك أو طفاية سجاير !!.

.

.

محمد حسين 

ضحكة الصابرين

فيها سبايك دهب
في ضحكة الصابرين
الكنز هو الكنز
ما عمره يوم اندفنْ
صَبْر الغلابه وطنْ
عايشينه ملّه ودين !!.
.
.
محمد حسين