Mohamed
Hussein
23 أبريل 2015·
و جايز , لأ أكيد
, نكتشف بعد سنه ولا عشره إن اللعبه اللي اتلعبت علينا بدأت من بدري أوي , من قبل قناة
الجزيره و قبل غزو العراق .
.
جايز نكتشف اننا
كنا مفعول به ( و فيه ) طول عشرين تلاتين سنه فاتو , و إن كل حاجه كانت مدروسه و محبوكه
بما فيها فساد مبارك و إفساده و اللعب كان على نقطة ضعف كل رئيس عربي , على عنترية
صدام و توريث جمال و جنون القذافي و على سلاح الدين وسلاح الوطنيه و حتى الفيلم الهندي
بتاع تحرير القدس .
.
و جايز , لأ أكيد
, نكتشف إننا كلنا واخدين دكتوراه فخريه في الحموريه , و إن الربيع العربي ده كان مجرد
الختم النهائي اللي خدناه على شهادة الدكتوراه , قصدي الختم النهائي اللي خدناه على
قفانا .
.
أيها الساده ,
و بموجب شهادة الدكتوراه المذكوره سابقا , إسمحو لي أن أوقّع باسمي كواحد من أنصار
الربيع العربي و من أوائل الحاصلين على الدكتوراه الفخريه في الحموريه .
.
أ.د / محمد حسين
.
...................................................................................................................................
Mohamed
Hussein
23
أبريل 2015·
الزمالك بقى يلعب
مايلعبش بيجيب ال 3 نقاط , يعني باختصار الزمالك بقى أهلاوي شويه و دي بشرة خير !!
.
.....................................................................................................................................
Mohamed
Hussein
23
أبريل 2015·
بص لنص الكوبايه
المليان ...... خليك متفائل
.
روحت الوحده الصحيه
بتاعة مدينة نصر اللي في عباس العقاد عشان أطعم بنتي في حملة التطعيم ضد شلل الأطفال
, طبعا انا كالعاده بوصل في أخر لحظه و أحيانا بستعبط و بوصل بعد أخر لحظه ب ساعتين
, الحمله استمرت 4 ايام و انا روحت في اليوم الرابع الساعه 6 المغرب , شوفتو رخامه
اكتر من كده ؟ .
.
المهم وصلت هناك
و بصراحه اتفاجئت من مقابلة الدكتوره هههههههههههههه لدرجة اني فضلت أتلفّت ورايا و
انا مفكرها بترحب بحد تاني مهم أوي و جاي , يعني مثلا يكون وزير الصحه جاي في زياره
تفقديه أو السيسي جاي يطعم حد من أحفاده , و أهلا و سهلا بحضرتك يا فندم , أفندم (
اللي هو أنا ) !! , وانتي يا حبيبتي اسمك ايه ؟ الله اسم جميل طب تعرفي كلمة لمار معناها
ايه ؟ , طب افتحي بؤك كده , خلي بال حضرتك ( و الكلام موجه ليا قصدي لحضرتي ) , بنت
حضرتك عندها ضرس فيه شوية تسوس صغيرين , بس, ابلعي بقى يا لمار , برافو عليكي شطوره
, باي باي يا قمر .
.
أهي المقابله دي
نسّتني شكل المبنى اللي طلعت فيه عشان أوصل لهم , حاجه كده غريبه أوي زي المباني اللي
كان بيستخبى فيها محمود المليجي في أفلام زمان , او تقريبا هو ده بطن الزير بتاع ابن
حميدو , عماره مبنيه من أيام الحمله الفرنسيه و من غير جدران , عمدان بس في الأرضي
, لا ياربي دي من غير عمدان , جدران بس , و طرقه شكلها غريب , يكونشي دي اللي صور فيها
محمد هنيدي مشهد مقابلته للحرامي في فيلم جاءنا البيان التالي ؟ أنا كنت داخل جوه و
فاكر اني هلاقي واحد يقولي : أحب أعرفك بنفسي , محسوبك فلان الفلاني و المهنه حرامي
, قصدي المهنه وكيل وزارة الصحه .
.
طب لما ده يكون
شكل مبني الصحه في مدينة نصر أومال في مدينة مغاغه شكله ايه ؟..
.
و للدكتوره المسئوله
عن حملة التطعيمات , عايز أقول لها : ألف شكر و ربنا يكتر من أمثالك , بس و النبي خلي
بالك لا تتخطفي وانتي مروّحه , أيوه احتمال كبير يكون أبو دهشوم و الدفاس لابدين ورا
البراميل اللي في الطرقه .
................................................................................................................................
Mohamed
Hussein
23
أبريل 2015·
في الشأن اليمني
.............. 1 +1 = 9 !!.
.
- مابين عاصفة
الحزم و بتاعة الأمل اللي انا مش فاكر اسمها دي , هي الحكايه بدأت ازاي في اليمن ؟
بدأت بصراع بعد ما حصل لامؤاخذه الربيع العربي , اللامؤاخذه الثوره اليمنيه أطاحت بعلي
عبد الله لا مؤاخذه صالح , و الراجل راح السعوديه متشرح و خلصان و هناك عالجوه و ظبّطوه
و علفوه تمام , قام رجع اليمن تحالف مع الحوثيين ضد حكومة هادي منصور .مش مهم , المهم
ان اليمن في الوقت ده كان فيه طرفين اتنين 1+1 , ال 1 الأولاني بيتمثله الحكومه بتاعة
منصور و معاها الجيش اللي مابقاش جيش يعني معاها ربنا و مدعوم من السعوديه و دول الخليج
و مصر , و ال 1 التاني بيمثله الحوثيين و على عبد الله صالح اللي هو الراجل الأصيل
ده و مدعوم من ايران و حزب الله .
.
- بدأت عاصفت الحزم
, ضربات جويه و بحريه , يوميها أنا العبد لله الفقير رفضت التدخل البري المصري في اليمن
و قلت هتبقى مجزره و فاتوره مايقدرش عليها أي رئيس مهما كانت شعبيته , و اتمنيت حل
سياسي بأي شكل .
.
- ايران ظهرت في
الصوره و ساومت أمريكا و أوروبا على برنامجها النووي و عملو الإتفاقيه ( توتو على كبوتو
) , و القطع البحريه المصريه وصلت باب المندب و الإيرانيه كمان ( إثبات حاله ) , روسيا
قالت هو انا يعني بنت البطه السوده ؟ قامت دخلت و حطت لها رجل هي كمان , شويه كده و
مابقيتش تعرف هي أمريكا مع التحالف ولا مع ايران ؟ و روسيا مع مين ؟ و مين نايم في
حضن مين ؟ الله ؟ هي أمريكا بقت مع روسيا ولا انت مين انت و الجدع ه بيقول كلام غريب
أوي .
.
-المهم يعني و
الخلاصه و النتيجه و المنتج النهائي هيبقى شكله عامل ازاي في اليمن ؟ هيبقى بالظبط
نموذج لبناني جديد , و هيستقر الوضع على كده , حكومه سنيه و ميليشيات شيعيه بينهم حرب
بارده شبه تامر هجرس , و اقتسام للسلطه و الثروه اللي بقت عباره عن طشت نحاس و كرسيين
خرزان متقطعين , تركة المرحوم على عبد الله صالح و الثوره اللامؤاخذه اليمنيه .
.
- طب مصر استفادت
ايه و ليه حصل كده و فين رقم 9 اللي في عنوان البوست ؟ مصر حطت لها رجل هناك هي و السعوديه
, عشان وقت مايقعدو على ترابيزة المفاوضات يلاقو لهم كراسي , و ايران و روسيا و طبعا
أمريكا فممكن بسهوله تلاقي عدد الكراسي بقى 9 .
.
- طب مصر كانت
بتهدد بتدخل بري ؟ ده برضه كان مجرد تهديد لزوم تثبيت و حجز الكرسي , لكن السيسي مش
عبيط عشان يتورط التوريطه دي .
.
- باختصار يعني
باختصار , وصف الحاله اليمنيه , عامله زي راجل حصلت له مشكله في العمود الفقري و مراحش
لدكاتره و فضل كتير على كده لحد ما بقى ضهره محنى و عضمه مستقر على وضع الإنحناء ده
زي اللي عنده أتب , راح بقى للدكاتره بعدها فقالو له انت اتأخرت أوي يا حاج , لو لعبنا
في عمودك الفقري ممكن نكسره , و نصحه دكتور ابن حلال و قاله : خليك عايش كده زي مانت
أحسن , بالأتب بتاعك ده , دانت حتى شكلك كده وسيم و فوتوجينيك , انت تعرف ان البنات
في سويسرا بيموتو و يتهبلو عالراجل اللي عنده أتب ؟!.
.....................................................................................................................................
Mohamed
Hussein
22
أبريل 2015 ·
مزه جامده صاروخ
, لها سنين و كل يوم تلبس قميص نوم شكل , و تطلع من شقة الأستاذ حمدي على شقة المهندس
مروان على فيلا الدكتور هاني , حتى الراجل العجوز عم حسنين البواب ماسبتهوش في حاله
.
و في لحظه قررت
المزه دي انها تتوب و تتحجب لمدة ساعه واحده بس , و كمان تدي فيها دروس في الدين ,
المزه طلعت على قناة فضائيه و حيث ان قدامها ساعه واحده ( قبل ما ترجع لشغلانتها الأصليه
) فكان مطلوب منها خطبه واحده , المزه فكرت كده و فكرت و اختارت للخطبه عنوان ( غض
البصر ) !!.
.
اللي فاتت دي مش
حكايه حقيقيه , ده كان تعليقي عالخبر ده
.......... أمريكا
مش عاجبها حكم القاضي المصري الصادر ضد مرسي !!.
.
أمريكا !! , اللي
هي أكبر سفاح و قاتل و بلطجي و مغتصب لأموال الشعوب في العصر الحديث مش عاجبها أحكام
القضاء , أمريكا اللي هي بتاعة جوانتانامو و ابو غريب و رصاصها لسه راشق في صدور العراقيين
و الفلسطينيين و لها تار بايت عند الغلابه في كل ركن و حاره من حواري كوكب الأرض مش
عاجبها أحكام القضاء , و لو قولنالها كده هتقولك : انتو ازاي و بأي حق تتهجمو عالناس
في بيوت الدعاره ؟!
.................................................................................................................................
Mohamed
Hussein
22
أبريل 2015·
أخبار اليوم السابع
!!.
.
- ضبط شهريار بمحافظة
كذا يمارس الجنس مع 10 سيدات !!.
و قالك برفقته
10 سيدات يمارس معهن الجنس دون زواج !!......... تصدق انت فاجئتني , انا كنت فاكره
متجوزهم هما ال 10.
.
- الخبر التاني
( بعده على طول ) : ضبط 3 سيدات بمحافظة كذا يمارسن الجنس مع واحد غني و بيقولو : احنا
متجوزين بس بنحسن الدخل !!........طب كويس انكو خرجتو من بيوتكو عشان تحسين الدخل مش
تحسين النسل !!.
.
رساله إلى الأستاذ
الدكتور العلّامه خالد صلاح :
(( انت ايه حكايتك
بالظبط ؟ دانت لو عايز توسّخ سمعة تايلاند مش هتكتب اكتر من كده , تكونشي عندك مشكله
نفسيه من وانت صغير و عملت لك عقده ؟ بقيت عامل زي الأفلام الهابطه بتاعة السبعينات
و شغل ناهد شريف بقى و الناس دي , جريدة الكترونيه دي ولا جريدة صفره ؟ خلاص معدش فيه
أخبار تكتب عنها ؟ يعني نعملك انفجارين تلاته عشان المراسلين بتوعك يهرو في أي حاجه
بدل ما هما قاعدين قدام شقق الدعاره ؟ أقولك على حاجه من الأخر ؟ بص انت تسرّح المراسلين
بتوعك دول و تجيب كام صوره عريانه و تنزلهم ورا بعض على الموقع ( بدل الأخبار )زي جريدة
الشبكه اللبنانيه بتاعة زمان , و تلم حواليك شوية عيال مراهقين يتفرجو و يخرمو اللابتوب
بعنيهم , و نسمّيك خالد صلاح صديق الطلبه .
.
و طبعا لو اترشحت
في أي انتخابات لازم تكتب تحت اسمك ال title
: خالد صلاح رائد الإعلام الهادف , أه طبعا رائد الإعلام الهادف , أومال إيه ؟ رائد
الإعلام الهادف و رائد الفضاء و رائد الفصل و رائد عبد الحميد رائد )) .
...................................................................................................................................
Mohamed
Hussein
22
أبريل 2015·
من فضل الله
.
عندي أصدقاء و
فولورز أكتر من 8 ألاف , فخور بيكو جدا و بتباهى قدام الناس , أنا كده عندي عزوه و
عيله كبيره و سند , أتحدى يدخل عندي عالصفحه حد غريب و يغلط فيا و انا مش موجود , كان
بالتأكيد هيطلع من غير هدومه .
.
أكتر صداقات بتسعدني
على الإطلاق هي صداقة الزوجين , يعني يكون عندي صديق قديم و يقول لمراته ضيفي محمد
عندك أو العكس , يعني أنا كده صديق العيله ؟ و صفحتي مؤهله لدخول بيوت الناس ؟ طب هعوز
من الدنيا ايه تاني ؟
.
و أكتر بوست عنيا
بترتاح لما بتقع عليه هو بوست كاتبه صديق بيقول لمراته أو خطيبته ( بحبك ) أو صديقه
بتقول لجوزها او خطيبها ( ربنا يخليك ليا ) , بأي لغه بقى و بأي شكل , بصوره و ورد
أو من غير , بكلمه واحده من 4 حروف , أو ببوست طوييييل بس ترجمته هي كلمة ( بحبك )
, أهي كلمه على صغرها بتدوّب جبال , و تزيح من عالضهر هموم الدنيا .
.
يا جدعان ماحنا
بنهري في السياسه و الدين و القنبله الذريه كل يوم , و بنتجرأ و نتكلم في نوع الطيارات
الحربيه و الخطط العسكريه و أفضل الطرق لحكم نيكاراجوا و رأي الدين في بوس الإيد و
خلط الشبت بالكسبره و جت يعني عند كلمة ( بحبك ) و الكي بورد بيعلّق ؟! طبعا لأ , قولوها
بقى و كتّرو , ربنا يديم عالجميع محبته .
................................................................................................................................
Mohamed
Hussein
21
أبريل 2015·
تكشيرة الناس بتقول
محبوب
و يارب الخلق تصبّرنا
هتموت و نموت
كان قدرك و كأنه
قدرنا
.
بصراحه يا خال
أنا ليا سؤال
طب تعمل ايه
لقلوب و نفوس
لما الضحكه تكون
بفلوس
و البايع تايه
عن دارنا ؟!!
.
محمد حسين
...................................................................................................................................
Mohamed
Hussein
21
أبريل 2015·
بعد أحمد فؤاد
نجم و جلال عامر , رحل عبد الرحمن الأبنودي , أخر عنقود المبدعين اللي عاشقين بهيه
........... الله يرحمك يا خال .
.....................................................................................................................................
Mohamed
Hussein
21
أبريل 2015·
خلي بالك
.
1- خلي بالك ,
القضاء المصري اللي حكم على مرسي في أحداث الإتحاديه ب السجن 20 سنه هو نفس القضاء
المصري اللي حكم على بديع بالإعدام و هو نفس القضاء اللي برأ مرسي من تهمة قتل الحسيني
أبو ضيف .
.
- خلي بالك , محامي
مرسي علق عالحكم و قال انه متوازن ( رغم انه كان بيتوقع البراءه ) , و ده اعتراف صريح
و واضح من المحامي بجريمة موكله , اللي هي التحريض على القتل و رعاية التعذيب في قصر
الإتحاديه أيام ما كان مدنس بحكم الإخوان .
.
- خلي بالك , دفاع
مرسي ممكن يطعن عالحكم و ينقض و يستأنف , والحكم يتخفف ل 10 سنين ولا تلاته مش عارف
و مش مهم , كل اللي يعنيني و يهمني هو اعترافهم بالجريمه .
.
- خلي بالك , القضيه
فيها أوراق و حيثيات و شهود و ستاف محامين يا طوله يا عرضه و قاضي و نيابه , يعني الحكايه
مش لعبه , والقاضي ده مش بيخترع تهمه أو جريمه , و كون إن أنا و حضرتك مابنفهمش حاجه
في شغل القضاء فده مش معناه اننا نركن ضهرنا في الحيطه كده و نفتح بؤنا عالأخر و نتكلم
بكل تناكه و أنعره كدابه و نقول : القضاء مسيس .
.
- خلي بالك , القضايا
دي بيحكم فيها القاضي قدام المتهم و المحامين و النيابه , مش وهو نايم في بيتهم , عشان
لو الجماعه الإرهابيه مارست هوايتها في الحرق و التخريب و القتل ماتبقاش تقول : أصلهم
اتظلمو في الحكم على بديع و مرسي و لا تتعاطف معاهم و إلا تبقى محرض على القتل و تستاهل
20 سنه زي سيدك و تاج راسك , مولاك البهلول محمد مرسي .
..................................................................................................................................
Mohamed
Hussein
20
أبريل 2015·
أبويا الله يرحمه
ماراحشي مدارس و لا كان بيعرف يكتب اسمه , يعني بالتأكيد مايعرفش حاجه عن التنميه البشريه
و الطريقه المثلى لمعاملة الأطفال في سن معين , و مع ذلك كان بيتصرف معايا بحكمه عجيبه
و هدوء و طولة بال و لا تقولي بقى ابراهيم الفقي ولا الناس دي .
.
مثلا , لما كنت
في خامسه ابتدائي كنت بضيّع يومي كله في لعب البينج بونج ( تنس طاوله ) و الضٌمنه
, كان عندنا ترابيزة بينج بونج في البلد وانا قاعد جنبها لحد الساعه 12 بالليل , لا
بذاكر ولا بفتح كتاب , أبويا يرجع من شغله يسأل أمي : هو محمد فين ؟ تقوله عند ترابيزة
البينج !! , يوم في التاني و في تالت يوم لقيت أبويا جايلي هناك و انا قاعد بلعب ضمنه
مع راجل كبير , كانت الساعه داخله على 11 بالليل , أبويا استأذن من الراجل و قالي تعالى
يا محمد .
.
رجعت البيت و هو
ماسك ايدي بمنتهى الرقه و الحنيه , و لما دخلنا البيت قام داخل عالمندره ( اللي هي
الصالون ) و قفل البابين بتوعها علينا , و بكل هدوء و ابتسامه قام مادد ايده و مطلّع
خرزانه كبيره كان مخبيها في جيب السديري , الجيب ده بيبقى طويل أوي واخد مساحة الصدر
كلها من فوق لتحت .
.
أبويا طلع الخرزانه
و رزعني علقه ماخدتهاش في حياتي و انا اصرّخ و اصوت و اعيط , طبعا أمي تخبط عالباب
ما تخبط ولا الهوا , طب معلش ياحمد , طب سامحه و النبي , ولا كأنه سامع حاجه .
أنا خدت العلقه
دي اللي استمرت اكتر من نص ساعه , الخرزانه علمت على كل حته في جسمي , و من يوميها
ماهوبتش ناحية ترابيزة البينج بونج و فضلت على كده 11 سنه لحد ما بقيت في بكالوريوس
, و كنت كل مافوت على ترابيزة بنج افتكر العلقه بتاعة أبويا و اقوم ماشي بسرعه .
.
الله يرحمك يابه
, و الله اعلم من غير العلقه دي كان زماني دلوأتي قاعد عالقهاوي بلعب ضمنه مع الدوكش
و الدفاس و شغال تبّاع على عربيه نقل .
.
قال تنميه بشريه
قال ............. السيفُ أصدقُ أنباءً من الكتبِ .
..............................................................................................................................
Mohamed
Hussein
20
أبريل 2015·
و بعد ما زهقت
من كتر الحكايات اللي بحكيها لبناتي قبل النوم و بألّفها في لحظتها قلت أحكيلهم عن
طفولتي المشرده في صورة ( كان يا ما كان يا ساده يا كرام و لا يحلى الكلام إلا بذكر
النبي عليه الصلاة و السلام يا عبد السلام , كان فيه ولد صغير اسمه محمد ) .
.
طبعا قمة الإصطدام
و صراع الحضارات بيحصل و انا بحكي , يعني مثلا أحكي لهم عن محمد اللي كان بيروح يجمع
القطن في أراضي الناس واليوم ب 2 جنيه , ألاقي لمار تقولي : ليه 2 ج ما كان ياخد
150 جنيه ؟ أقول لها صح هو كان بياخد 150 جنيه في اليوم , و ألاقي لوجي تقولي بس محمد
كان لازم يلبس gloves في إيده و فيس ماسك و هو بيشتغل
و كل شويه يغسل إيديه ب ديتول هاند جيل عشان الجراثيم .
أقول لها صح هو
كان بيعمل كده .
.
و أحكي لهم عن
محمد اللي راح يشتغل في الوسيه , يجمع لمون و بصل و يعبيهم في زكايب و بعدين عالضهر
كده محمد و الناس اللي شغالين معاه راحو كلهم يتغدو عيش و طعميه و بصل جنب سطبل الخيول
بتاع البيه .
لمار : يعني ايه
خيول ؟ أنا : يعني هورسز , لمار : أه يعني هورس و هورس و هورس سيكستين ؟ أه هما سيكستين
.
لوجي : طب ليه
ماروحتوش تتغدو في مطعم شيك في أي مول بدل الأكل جنب ريحة الهورسز ؟ أنا : تصدقي معاكي
حق , فاتتنا الحكايه دي .
.................................................................................................................................
Mohamed
Hussein.
19
أبريل 2015.
مستاء و في قلبي
كتير طعنات
و تعبت خلاص من
كيت ورا كيت
لنا جيش بيحارب
يعني ثبات
علشان ماتضيعش
حيطان البيت
و الواد أبو جيبه
3 فتحات
و رجوله مفيش
مش عاجبه الجيش
!!
.
أحمد سافر للجهاديه
و الجهه ديه و
ديه و ديه
مرّه يحارب في
حدود ليبيا
مره ف صنعا و مره
ف سينا
قال دي بلدنا و
لما هتغرق
مش هنلاقي لروحنا
سفينه
.
و سألتي أنا مين
؟
سمّيني فلان
هبقى أكتب إسمي
على الجدران
أنا واحد عاشق
من ناسك
أنا إبنك لو رافع
راسك
.
و في ساعة النصر
هكون عدّيت
و حفظت العهد و
صنت البيت
من غير شعارات
وان مت شهيد فالرب
شهيد
هتعيشي يا بلدي
و مات مين مات
.
و الواد أبو جيبه
3 فتحات
و رجوله مفيش
يا خراشي يا ناس
مش عاجبه الجيش
!!.
.
.
محمد حسين
...........................................................................................................................
Mohamed
Hussein
19
أبريل 2015·
يعني ايه رخامه
و تناحه و تباته و سفاله ؟! .......... من معجم عبد المجيد الصحّاح .
.
الرخامه : انك
تعمل جروب عالفيس بوك عشان بس تقتل وقت الفراغ , أه الفراخ .
.
التناحه : انك
بعد ما تعمل الجروب تقوم عامل اضافه لكل مخاليق ربنا اللي تعرفهم و اللي ماتعرفهمش
, و كل أعضاء فيس بوك في كوكب الأرض و المجموعه الشمسيه و درب التبانه , من غير استئذان
.
.
التباته : انك
كل شويه تكتب بوست في أم الجروب ده عن مغامراتك مثلا مع عصاية الدولسي أو ازاي السشوار
أثر على نعومة شعرك .
.
أما السفاله فهي
إنك بعد ما تخنقنا بالإشعارات و الواحد يشتغل زي الفلّايه ( و يقعد يحذف و يلغي ) تقوم
منزل بوست كاتب فيه ( أصدقائي الغاليين اللي سألو عليا أحب أطمنهم اني بخير , كنت في
مهمه انسانيه مستعجله و ايموشن لقلبين تلاته على وش بيغمز و وش مكسوف ) , ده طبعا بعد
غيابك و انقاطعك عن الفيس من الساعه 3.57 د ل 3.59 د ..طب كويس انك طمنتيني , أنا أصلي
كنت بدأت أتوغوش !! .
................................
................................
يا بنات , لو اتقدم
لكو عريس من النوعيه اللي فوق دي و النبي ماتقبلو عشان هتتخنقو من ساعتين زمن , و لو
دخل الحمام دقيقه هيرجع يقولك انا عارف انك كنتي قلقانه عليا اوي عشان مش عارفه تعيشي
من غيري , و يفضل يشاور بإيده و يفتكر نفسه جمال عبد الناصر .
.
و انتو يا شباب
لو واحد فيكو راح اتقدم لبنت يسألها أول سؤال : هو حضرتك عندك جروب عالفيس و بتخنقي
الناس والبشريه بالإشعارات و المغامرات ؟ لو قالت لك أه , خد التورته و بوكيه الورد
في إيدك من سكات و اهرب بجلدك , عشان انت عمرك ما هتعرف تحبها ولا تخلّف منها , النوع
ده أساسا بيبيض مش بيولد .
..................................................................................................................................
Mohamed
Hussein
19
أبريل 2015·
و بعد ما كلاب
السكك يقومو بدورهم المفضل في التحريض على فتنه طائفيه , و بعد ما مشايخ الفته ينامو
و يصحو و مفيش على لسانهم غير تكفير الاقباط و تكفير المسلمين اللي مش تبعهم , و بعد
ما أمريكا كل شويه تكتب تقرير عن اضطهاد الأقباط في مصر يقوم يحصل مشهدين اتنين يشطبو
عالكل و يعملو علامة اكس .
.
مشهد استقبال السيسي
في الكاتدرائيه و الحفاوه البالغه و مشهد استقبال شيخ الأزهر في نفس الكاتدرائيه بنفس
الحفاوه .
.
و شوف حكمة ربنا
يا جدع , في اليوم اللي شيخ الأزهر يروح يزور فيه الكاتدرائيه أشوف صورة محمد بديع
بالبدله الحمره ورا القضبان ........... هي دي عبقرية مصر .
................................................................................................................................
Mohamed
Hussein
18
أبريل 2015·
رومانسيات
2015
.
واحد بيحب واحده
, و هي بتحبه أوي , بتتنفسه , و بتغير عليه جدا , قال لها عايز أتجوزك , قالت له موافقه
بس انا مهري غالي .
.
قال لها لو عايزه
1000 من النوق العصافير زي اللي عنتر جابهم لعبله موافق , لو عايزاني اتمرن سباحه و
أعدّي المانش في شهر طوبه ماعنديش مانع , عايزاني ألفّ التراك بتاع ستاد القاهره 7
ألاف مره في نفس واحد مفيش مشكله , عايزاني أكتب باسمك كل اللي حيلتي و اللي حيلة الجيران
من عنيا , أعلّق لوحه كبيره على كوبري قصر النيل و اكتب عليها احمد بيحب منى و أحط
صورتي و صورتك حاضر , أجيب لك عيلتي كلها يقولولك انهم هيشيلوكي في عنيهم و تاخدي خالي
رهينه عندكو لحد ما تتأكدي عادي والله .
.
قالت له : لأ
, مش عايزه كل ده , أنا مهري هو الباسورد بتاع الفيس بوك .
.
أحمد رجع بيتهم
و تاني يوم كان كاتب كتابه على هنادي بنت عمه عشان مايزعلش أبوه , طبعا , ده رضا الوالدين
من رضا ربنا .
.....................................................................................................................................
Mohamed
Hussein
18
أبريل 2015·
يوم الخميس بالليل
قفلت الصيدليه الساعه 12 و قلت أشد الرحال عالبلد , أمي ماتعرفش و لو عرفت كانت بستفتني
في التليفون ( عشان مش عايزاني اسافر بالليل ابدا ) , مشيت بتاع ساعتين و كنت قربت
على أجا و المنصوره فجأه لقيت الشبوره نازله , حاجه كده تخليك مش شايف قدامك ولا وراك
ولا عاليمين ولا الشمال , طبعا مشيت على سرعة 7 ك /ساعه , و قلت انا و نصيبي , لو فيه
عربيه واقفه في الطريق أو حد معدّي فانا هرشق فيه بالتأكيد , شغلت كل الأنوار اللي
في العربيه و مفيش فايده , المهم الوصله دي ماتزدش عن 35 ك خدت مني ساعتين , و لما
قربت من بلدنا و حيث اني مش شايف أي حاجه ماشوفتش حتى الطريق اللي داخل عالبلد و قمت
مكمّل و ماشي على طول .
.
و فين و فين على
بال ما لفيت و رجعت و حسست عشان اشوف الطريق , وصلت البيت قبل الفجر بربع ساعه و صحيتهم
و امي اتخضت و زعلت و انا صالحتها وبوست إيديها ( أه بالمناسبه فيه شيخ في الأصدقاء
عندي أفتى إن بوس الإيد شرك بالله !! ) يووووووه يعني أنا كده أشركت للمره ال
567345 , المهم قلت لها هطلع انام عشان خلصان , أمي و مرات اخويا سألوني نعملك ايه
عالغدا ( رز معمر ولا محشي ؟ ) عشان دول أكتر أكلتين بحب أكلهم في البلد , قلت لهم
هي غدوه واحده و هرجع القاهره تاني , اعملو اي حاجه بقى عشان انا محتار , صحيت من النوم
لقيتهم عملو الإتنين !! .
.
يا جمالو يا جمالو
, أنا أدعو الشيف شربيني لمناظره على الهوا مباشرة ضد أمي و مرات أخويا في عمايل الرز
المعمر و أتحدى , لا تقولي بقى إسلام البحيري ولا الحلم العربي .
...............................................................................................................................
Mohamed
Hussein
18
أبريل 2015·
معركه حامية الوطيس
ولا الفطيس مش فاكر
.
- حالة هجوم شرسه
على اسلام البحيري , و هجوم مضاد من أنصار البحيري ( أقل بكتير ) على الأزهر .
.
- الحكايه اتطورت
لنشر صور قديمه لفلان و علان و ترتان , وشوفت اسامه الأزهري و هو بيبوس ايد على جمعه
؟ يا جدع ما يبوس , واحد بيبوس ايد شيخه هو يعني كان بيبوس إيد هياتم ؟!.
و في المقابل اسلام
البحيري هو الصهيوني الماسوني المسيحي اللي أمه يهوديه و جده كان بيخدم في معبد بوذا
....هاتي بوذا يا بت .
.
- دخول في تفاصيل
ما كان يجب أن يتطرق لها المسلم العادي و لا حتى المسلم السوبر لوكس , و مش ده كان
الغرض و لا الهدف ولا التارجيت , و هيخلص الهري بعد يوم و اتنين و احنا ماشوفناش منتج
معين , مفيش product يعني , ماكنه وبتلف عالفاضي
, مش بتطلع قماش .
.
- الأزهر مؤسسه
عريقه ده كلام بجد مش كلام جرانين , فيها أخطاء و مشاكل , وفيه مناهج محتاجه تعديل
, و جزئيات بتصطدم بالعقل البشري و أتمنى حذفها لأنه مش من ثوابت العقيده , يعني بتفق
مع مولانا اسلام البحيري في بعض أفكاره و كتبت عنها من سنين , بس الشاهد امبارح ان
اسلام كان فرد حريص على ترويج نفسه في مواجهة مؤسسه عريقه اسمها الأزهر الشريف , و
أسامه الأزهري و على الجفري كانو بيدفعو عن الأزهر مش بيدافعو عن شخوصهم .
.
- من الحماقه إننا
نحمل الأزهر الشريف لوحده مسئولية ظهور جماعة الإخوان الوثنيه و ظهور السلفيين و ظهور
داعش و بوكو حرام , يعني ماينفعش نحاسبه على ضعفه في أخر كام سنه أو تهميشه في عهد
مبارك , الجماعات دي ظهرت بفلوس البترو دولارز و أجهزة المخابرات الأمريكيه و الصهيونيه
, الأزهر لا كان عنده جيش ولا حكومه ولا فيه منصب اسمه وزير دفاع الأزهر ...يعني الليله
كانت اكبر بكتير .
.
- بالنسبالي أنا
شخصيا , لو بتصلي 5 مرات و تصوم و تشهد الشهادتين و ماتكدبش ولا تسرق ولا ترتكب الكبائر
تبقى انت كده مسلم فله و شمعه منوره , و لو قاعد بتسمع خطبة الجمعه قدام شيخ أزهري
أو شيخ موزمبيقي يبقى تاخد من كلامه اللي يعجبك و سيب الباقي و انت طالع من الجامع
, الخطبه مش حقنه و لازم تاخدها لحد أخر نقطه عشان تخف و تقوم بالسلامه .
.
- نفسي في حتة
جبنه قريش و رغيف عيش طري و عودين سريس أكلهم و أتوضا من قناية المايه و أصلي ركعتين
في أرض البرسيم اللي لسه بينبّت ( الرِبّه ) و ليذهب التلفزيون و الفيس بوك و التوك
(شوز ) إلى الجحيم .
......................................................................................................................................
Mohamed
Hussein
18
أبريل 2015·
ملخص مناظرة البحيري
و الأزهري
.
إسلام البحيري
للأزهري : انت ماقريتش كتابات و مقالات اسلام البحيري قبل ما تيجي , إنت ماتعرفش مين
هو اسلام البحيري ؟ إسلام البحيري اللي كتب التراث اشتكت منه , اسلام البحيري اللي
كان باقي له يومين و صورته تنزل عالجنيه .
.
أسامه الأزهري
للبحيري : انت مادرستش في الأزهر و لا انت عالم في الأزهر , و ماتعرفش ايه هو الأزهر
, الأزهر اللي بقاله ألف سنه بيعلم الناس , الأزهر أساسا هو اللي بيطبع الجنيه ..
..............................................................................................................................
Mohamed
Hussein
17
أبريل 2015·
بدأت أتعاطف مع
محافظ اسكندريه , أه والله , أصلي كل مابفتح اليوم السابع بلاقي نحت في وبر الراجل
, إيشي محافظ اسكندريه حضر طهور ماعرفش مين و مراته معاه , إيشي فيه 7 اتجمعو في موقف
ماعرفش ايه و بيطالبو بإقالة محافظ اسكندريه , إيشي التاتو اللي على دراع محافظ اسكندريه
بيعوق عجلة الإنتاج و حايش في الضلفه بتاعة دولاب العمل .
حمله أوفر أوي
, و بعدين المثل بيقول ( إذا رأيتم خالد صلاح بينتقدني 9 مرات في اليوم فاعلمو أني
ماشي صح ) , الراجل ده شكله بيشتغل فعلا .
.
بص يا عم الحاج
يابو غمازات انت , أنا هبدأ أحبك , مش عشان غمازاتك لأ , أهو نكايةً كده و بالعند في
خالد صلاح و اليوم السابع , و عشان تعرف إني بدأت أحبك فعلا عايز أقولك يعني لو حابب
تعمل للمدام توكيل عام في الشهر العقاري و تروح هي تحضر مكانك في اجتماعات مجلس الوزرا
انا ماعنديش مانع .
.
#حبو_محافظ_اسكندريه_بالعند_في_خالد_صلاح.
...................................................................................................................................
