Mohamed
Hussein
2 أبريل 2015·
ياسر برهامي :
انتظار اللايكات عالفيس بوك مرض خطير يفسد القلب !! ....مشايخ الفته بتوعنا اتجننو
رسمي , مش لاقيين حاجه يفتو فيها بعد ما خلّصو قصة نوع النمله اللي كلمت سيدنا سليمان
( دكر ولا نتايه ؟ ) , قعدو فيها بتاع 37 سنه الحكايه دي و اتعمل فيها مجلدات .
.
بكره هنلاقي مشايخ
بتفتي في شبكات الإتصالات و اللي يقولك : ورد في الأثر أن أحد الصالحين سُئل عن أفضل
الشبكات فقال ( إنّ في فودافون لَبَركه ) أما موبينيل يا إخواني فهي رجس من عمل الشيطان
.
و الشاهد أن صاحب
شركة موبينيل نصراني و العياذ بالله ( ده طبعا على أساس إن صاحب فودافون من نسل سيدنا
النبي ) !! .
.
ماتستنوش اللايكات
يا شباب عشان قلبكو يفضل سليم , و عليكم و الأي فون فإنه و الله لخير , و إياكم من
هذا ال ( جالاكسي ) اللعين و لا تصدقو أنه ( تاب ) فهو من أهل النفاق يخفي في نفسه
عكس ما يبديه و العياذ بالله , طوبى لمن يشتري الكورولا و حذاري أخي المسلم من الأوكتافيا
و الجيتا...و صُبْ لي كاس يا دكتور شهدي قصدي أقم الصلاه .
.......................................................................................................................................
Mohamed
Hussein
2
أبريل 2015·
استشهاد 9 مجندين
و ظابط في هجوم للإرهابيين على كماين بالعريش !!.
.
ده اسمه الإرهاب
, معركه طويله مفهاش هزار , أرض المعركه اسمها سينا , منطقه مهمله من نظام مبارك من
30 سنه , السيناويه أغلبهم بايع القضيه و انتماؤه لمصر بقى صفر ( بعيد عن الشعارات
الهبله ) , و السيناويه اللي لسه جواهم خير للبلد دي بعد اهمال نظام مبارك ليهم هما
غير مؤثرين على الإطلاق .
.
يعني باختصار
: إرهاب و أهالي مش متعاونين و منطقه مهمله مفهاش أي بنيه تحتيه و الجيش بيحارب و كل
كام يوم بيقدم شهيد .... باقي طرف أخير في المعركه دي , طرف مهم جدا , اسمه : مين بيرعى
الإرهاب ده و بيصرف عليه و بيمده بالسلاح ؟ .
.
الحكايه لازم يكون
فيها دول خارجيه , و يشترط في الدوله الخارجيه عشان تقوم بالدور ده شرطين اتنين بس
, أولا تكون حقيره بدرجه كافيه , ثانيا تكون مستفره بدرجه معقوله , أمريكا وقع اختيارها
على دولتين فيهم أنظمة حكم على درجه كافيه من الحقاره و حققت لها شوية استقرار حلوين
, هما باختصار قطر و تركيا .
.
تركيا فيها استقرار
سياسي و اقتصادي من سنين طويله مدعوم بقاعدة انجرليك و تدريبات عسكريه مشتركه مع الصهاينه
و حلم الإتحاد الأوروبي , يعني ظبّطناك اهو يا أردوغان و عارفين كمان انك بتحلم بعودة
( الباب العالي ) هنلعب معاك عالحته دي .
.
و قطر عدد سكانها
أقل من عدد سكان قرية كفر غنام في السنبلاوين , الغاز و البترول بيطلعو تحت السرير
, طب هنبيع الغاز و نجيب لكل واحد قطري 10 اجانب يخدمو معالي جناب سيادته و يهرشو له
في مناخيره , باقي ايه بقى ؟ أه انا عارف يا حمد انت و عيلتك انك حقير أوي و عندك عقدة
نقص عشان يعني بتحكم كشك عالخليج , برضه هنلعب عالحكايه دي .
.
تخيل اني في البوست
ماجبتش سيرة الإرهابيين نفسهم ولا اعتبرتهم طرف ؟ و لا قولت ان عمليتهم دي هي رد على
قتل العشرات منهم يوميا , عشان هما مجرد مفعول به مش أكتر , أو بمعنى أصح ( مفعول فيه
) !!.
..................................................................................................................
Mohamed
Hussein
2
أبريل 2015·
حكاية كوكي و سفروت
.
لوجي بنتي كل يوم
تستناني عشان احكي لها حدوته قبل النوم , و تنام و هي بتسمعها , أنا ببقى راجع مرهق
اوي و مش مركز خالص , بس هي لازم الحدوته يا بابا , طيب أمري لله هرتجل أي حاجه جايز
تعجب لوجي .
.
الغريبه اني كل
مره بعد ما أخلّص الحدوته اللي بألفها كل ليله دي بكتشف إن لها معنى في الأخر , لها
مدلول معين , بيجي منين المعنى و المدلول و انا مش مركز ؟ غالبا ده العقل الباطن و
بيرمي حاجات حلوه أحيانا .
من دقايق حكيت
للوجي حدوتة و نامت , قلت أحكيهالكو بقى عشان تنامو !!.
.
صلو عالنبي , كان
يا ما كان يا ساده يا كرام ولا يحلى الكلام إلا بذكر النبي عليه الصلاة و السلام ,
كان فيه عصفور صغير أوي اسمه كوكي و أرنب صغير اسمه سفروت , كان كل واحد فيهم عايش
لوحده مالوش أهل , كوكي و سفروت اتقابلو بالصدفه في الغابه و اتصاحبو بسرعه أوي , و
في لحظه قررو انهم يعملو عشه صغيره يعيشو فيها سوا , جمعو شوية قش و شوية حطب من الغابه
و عملو العشه , وبقو كل يوم الصبح يطلعو ياكلو و يشربو و يلعبو في الغابه و يرجعو بالليل
ينامو مع بعض في بيتهم الجديد ده .
.
مرّت الأيام و
كوكي و سفروت كبرو , كوكي اتصاحب على شوية عصافير و هو بيلف في الغابه و سفروت اتصاحب
على شوية أرانب , شويه و العصافير بدأت تزن على ودن كوكي انه ماينفعش يعيش مع سفروت
عشان سفروت أرنب مش عصفوره , و الأرانب قالو لسفروت انت ازاي عايش مع عصفور ؟!.
.
كوكي بدأ يستجيب
لكلام العصافير و سفروت اتأثر بكلام الأرانب و في يوم من الأيام كوكي و سفروت اتخانقو
سوا و كل واحد فيهم مشي في طريق و بالليل رجع سفروت العشه مالقاش كوكي , فضل سهران
و مستني و كوكي مارجعش , سفروت مش عارف ينام , طلع يلف في الغابه لحد مالاقي كوكي نايم
جنب شجره , صحاه و قاله مارجعتش الغابه ليه ؟ كوكي قال لسفروت عشان احنا مش زي بعض
, سفروت قال لكوكي انا ماشوفتش منك حاجه وحشه ,احنا متربيين مع بعض , تعالى معايا
, كوكي قال لسفروت حاضر , أنا كمان ماكنتش هعرف انام من غيرك .
.
و رجع كوكي و سفروت
و هما راجعين شافتهم العصافير , العصافير قالو لكوكي : برضه ما سمعتش كلامنا ؟ و هتعيش
مع ارنب ؟ سفروت قال لهم أنا و الأرنب متربيين سوا و مش هسيبه عشان خاطركو , لو مش
عاجبكو مش تصاحبوني , شويه و هما ماشيين الأرانب قالت لسفروت : برضه مصرّ انك تعيش
مع عصفور ؟ سفروت قال لهم نفس الرد بتاع كوكي , و رجع كوكي و سفروت و عاشو مع بعض و
محدش قدر يفرّقهم أبدا .
.
و توته توته خلصت
الحدوته , حلوه ولا ملتوته ؟!.
..............................................................
..............................................................
كنت عايز أقول
, الكون أرحب و أجمل من كده بكتير , العلاقات بين البشر ماينفعش نكتّفها بقصيدة التشابه
اللي فيها ألف بيت مملين جدا , تشابه في الديانه , تشابه في العقيده , في اللهجه و
اللكنه , في الجنسيه في لون البشره , و في أخر القصيده هنوصل لتشابه في المستوى المادي
و الثقافي و الإجتماعي و في الطول و لون العيون و أخر بيت أأأأخر بيت في القصيده هيقولك
لازم تحب حد يكون بيشبهك بالظبط , يعني mirror image
و هتكتشف إنك هتحب نفسك و بس عشان مفيش حد في الكون يشبهك بالظبط
غير نفسك .
.
يا أيها الناس
إنا خلقناكم من ذكرٍ و أنثى و جعلناكم شعوبا و قبائلَ لتعارفو ..............صدق الله
العظيم .
...................................................................................................................................
Mohamed Hussein
1
أبريل 2015·
(
إلّا الغيبوبه أعْيَت مَنْ يداويها ) .
.
هههههههههههه ده
بوست على صفحة 6 لامؤاخذه ابريل
(( إحالة المجلس
العسكري بكامله للتقاعد وتشكيل جديد يشمل الكثير من الكوادر الشابة المشهود لها بالنزاهة
والكفائة والمؤمنين بحتمية إبتعاد الجيش عن السياسة
بدء إجراءات عمل
إنتخابات رئاسية مبكرة تحت إشراف كامل من الأمم المتحدة والإتحاد الأوروبي )) .
....................
....................
طبعا ده على أساس
اننا في مصر بنواجه مشكله سياسيه عويصه و إن نظام السيسي بيترنّح و رُكب السيسي بتخبط
في بعضها و الثورة في الميدان و العِرْسه في الحلّوب ؟!.
.
طب نشيل قيادات
المجلس العسكري و نجيب قيادات شابه زي سوكا بتاع الولاعه و مصطفى النجار والبت مروه
اللهلوبه ؟! طب مين هيشهد للقيادات الشابه بالنزاهه دي ؟ أصل الجمله دي بسمعها كتير
أوي ( مشهود لهم بالنزاهه ) إنما محدش بيقولي مين اللي بيشهد ؟ يكونشي قصدكو البرادعي
يشهد ؟ بس الراجل مايعرفش أي حاجه عن أي حاجه و لا هتسيبوه يختار القيادات الشابه بطريقة
( حادي بادي سيدي محمد البغدادي ) ؟!
.
طب هنجيب اشراف
من الأمم المتحده و الإتحاد الأوروبي بس ؟ طب و الصين و روسيا و الكوميسا و مجلس التعاون
الخليجي و الأتحاد العالمي للحوثيين و اللجنه العليا المنبثقه لتنظيم داعش و جمعية
رعاية الكولاجيه ؟
.
و طبعا لما نعمل
كده تقوم الثوره تنجح في مصر و تجيب مجموع كبير و تدخل صيدله و تقعد زي حالاتي كده
في الصيدليه و مصر تبقى زي اليمن و نوسه زي ابتسام .
............................................................................................................................
Mohamed
Hussein
1
أبريل 2015·
الروتين اليومي
, كل يوم افتح الفيس بوك ألاقي 65 إشعار , منهم 15 يخصو بوستاتي و الباقي لأ , ولا
اعرفهم والله يا بيه , يعني لو واحد عمل لي مينشن في تعليق أو بوست ( بالمدح أو بالقدح
) بيضيع هو و منشنه في زحمة الإشعارات .
.
طب ال 50 إشعار
اللي ماعرفهمش دول بيتكلمو عن ايه بالظبط ؟ هتلاقي مثلا , قامت زهرة الكمون المخمليه
بإضافتك لمجموعة ( بنحب مصر أوي هيييييييح ) , تم تغيير اسم مجموعة ( بنحب مصر أوي
هييييييييح ) إلى مجموعة ( بنحب هييييييييح ) , قامت زهرة الكمون المخمليه بتغيير مجموعتها
من مفتوحه إلى مغلقه ( من غير ترباس ) , قامت زهرة الكمون المخمليه بتغيير مجموعتها
من مغلقه إلى سريه ( يعني مغلقه بترباس ) و العياذ بالله , قامت زهرة الكمون المخمليه
برفع دعوه أمام محكمه الأسره و بتقول إنها مراتك و مخلف منها بنتين توأم , قامت زهرة
الكمون المخمليه بتسجيل البنتين باسمك في سجل مدني الفيس بوك تحت إسم ( كزبره و بقدونس
) , قامت زهرة الكمون بالذهاب إلى السيده نفيسه و كشفت راسها و بتدعي عليك هناك عشان
مابتروحش تشوف بناتك يا راجل يا ناقص .
.
أنا : حاضر والله
لما ألاقي وقت هبقى أروح أشوف كزبره و بقدونس عشان وحشوني أوي , و مش هعرف أفرق بينهم
أكيد بس مش مهم , ما هما الإتنين بناتي , بس والنبي يا عم تبلغ الست حرمنا المصون أم
كزبره ترحم أمي من الإشعارات بقى .
.................................................................................................................................
Mohamed
Hussein
31
مارس 2015·
محمد عطيه : متخوف
من دخول مصر بسبب هذه الرقصه !! .
.
الحقيقه أنا شوفت
الفيديو , برنامج الرقص مع النجوم , المدربه بتعلم محمد عطيه الرقصه الجديده ( مع إنه
ما شاء الله تبارك الله مش محتاج علام ) و بتقوله ماعرفش ايه كده و ( هيب هيب ) و هو
شغّال و الله مش بطال يعني , هيب هيب و ماله , هما هيبو بعض .
.
بس يا حماده ماتخافش
من رقصة هيب هيب دي , أصلنا متوقعين كده , أنا شخصيا من أول يوم شوفت سحنتك فيه و قولت
انك هتبقى بارع في رقصة ( هيب هيب ) .
.
إلّا صحيح بالمناسبه
, مش ناوي تهدي رقصة هيب هيب دي لشهداء الثوره ؟!.
......................................................................................................................................
Mohamed
Hussein
31
مارس 2015·
خبر في جريدة الشرق
الأوسط اللندنيه : (( البحريه المصريه تتصدى لمحاولات سفن حربيه ايرانيه اغلاق باب
المندب )) .
.
تفاصيل الخبر
: ونقلت صحيفة "الشرق الأوسط" اللندنية اليوم الثلاثاء، عن المصادر قولها
إن سفناً بحرية إيرانية أطلقت النار على 4 قطع بحرية مصرية تابعة لتحالف "عاصفة
الحزم" بالقرب من مضيق باب المندب، لترد عليها البحرية المصرية بقوة وتجبرها على
الفرار من محيط المضيق.
...................................................
.
لو عندي صديق يمني
أو حوثي أو مش حوثي بس بيحترمهم ياريت يكتب لي بين قوسين الجمله دي ( الإيرانيين فسيل
وتني و انتو المصاروه بتعتدو على سيادة اليمن و استقراره و سلامة أراضيه وسلامتها أم
حسن ) .
.
و لو عندي صديق
كولجي فيلزوف و ضليع في شئون الفلزفه السياسيه ممكن برضه يكتب الجمله دي بين قوسين
( #عبث , مضيق باب المندب محمي باتفاقيات دوليه و معمول له حجاب مايخرش المايه عند
مولانا الولي !! ) .
.
و لو عندي صديق
من بتوع خُلقنا لنعترض ممكن يكتب ( الحوثيين جزء من الشعب اليمني و مفيش حاجه اسمها
ايران هناك و احنا كده أقدامنا هتغوص في بحر من الرمال المتحركه و البط المسكوفي )
.
..................................................................................................................................
Mohamed
Hussein
30
مارس 2015·
عبقرية السيسي
.
لما خرجنا من
30 يونيو كانت الإداره الأمريكيه ماتعجبكش يا مولانا , يعني هري و لت و عجن في الطالعه
و النازله , و أوباما كان ناقص يطلع عالهوا و هو لابس تي شيرت رابعه .
طب كان الحل إيه
عشان ترجع العلاقه بين مصر و أمريكا تاني ؟
السيسي كان قدامه
حلين اتنين مفيش غيرهم , الأول انه يتحايل على أوباما و كل شويه يبعت وزير و سفير و
جوابات غراميه و دباديب و ورد و غالبا كان أوباما هيسوق في الهبل و الدلع و الدلال
أكتر .
و الحل التاني
( اللي عمله السيسي ) عشان يرجع علاقتنا بأمريكا بمنتهى السرعه هو باختصار إنه يوطّد
علاقتنا بروسيا !!.
.
ماهو انت لو كنت
متجوز ( كيت وينسلت ), بس فجأه الست وينسلت دي لوت بوزها و شافت نفسها و بقت تكلمك
من طراطيف مناخيرها هيبقى برضه قدامك نفس الحلين ( لو كنت لسه باقي عليها ) , إما إنك
تتحايل و تتسهوك و تجيب ناس تتوسط بينكو أو تدخل عليها و في إيدك مارتينا هينجز بتاعة
التنس ( بحبها البت دي ) .
......................................................................................................................................
Mohamed
Hussein
30
مارس 2015·
عايزك تتخيل بس
.
و انت ماشي بعربيتك
في صلاح سالم رايح ناحية فندق سونيستا و معرض الكتاب , فجأه الدنيا بقت زحمه و بعدين
الطريق وقف خالص و بقىت بتمشي خطوه كل نص ساعه لحد ما وصلت لكمين هو اللي موقف الطريق
, في الكمين لقيت واحد من الحوثيين بلبسهم العجيب ده بيقولك ( عااااااا ) يعني وريني
رخصك , و هو أساسا أحول يعني بيكلمك و انت فاكره بيكلم النص نقل اللي وراك , بصيت عليه
بصه سريعه و اكتشفت انه ماستحماش من 9 سنين و طبعا مايعرفش يعني ايه معجون سنان و مخزّن
بتاع نص كيلو قات تحت خده اليمين و لابس شبشب قديم بصباع في رجليه و شايل بندقيه قديمه
أوي اللي هي بتاعة الغفير عبد المنعم ابراهيم في فيلم الزوجه التانيه ....بس حاول تتخيل
المشهد و هو بيقولك ( عااااااا ) يعني وريني رخصك !! .
.
سيبك انت من حوار
سنه و شيعه و موزمبيقيين ده , و سيبك من الهري بتاع ايران و الخليج , و النبي يا شيخ
, بذمتك يعني , مش من حقي كمواطن عربي من نبت الأرض الخضره إني أسأل : وين اليمن يامّاي
؟!!.
.....................................................................................................................................
Mohamed
Hussein
30
مارس 2015·
في مصر , أكتر
مشروع مربح جدا و بيجيب فلوس حلوه أوي هو مشروع ( دار أيتام ) , أصلنا شعب ( متدين
) بطبعه , انت بس كل اللي عليك تشوف أي شقه إيجار قانون جديد و تجيب لك كام طفل يتيم
( أو حتى مش يتيم ) , و تعمل شوية دعايه حلوين , بس كده , وقابل يا معلم , زكايب فلوس
, لا تقولي تجارة سلاح ولا مخدرات ولا دعاره ولا شغل في قناة الجزيره , مدام ياسمينا
هتيجي تديك فلوس من غير ما تعدّها حتى ( أصل كان عليها ندر ) , و مدام بوسي هترمي في
حجرك عشره قول 50 ألف , أصلها راجعه من بره فرحانه أوي بعد ما عرفت ان الست اللي كانت
شاكه إن جوزها يعرفها تبقى أخته بس هي مكانتش تعرف , و الحاج صلاح ربنا كرمه وشطّب
الفيلا فقال يتبرع بكام ألف .
المهم انت بس ماتنساش
عدة الشغل , هما 3 حاجات , شقه قانون جديد و كام طفل ( يٌفضل يكونو بنات ) و لوحه كبييييييييره
مكتوب عليها ( قال رسول الله صلى الله عليه و سلم : أنا و كافل اليتيم كهاتين في الجنه
.. و أشار إلى إصبعيه السبابه و الوسطى ) , و طبعا تاخد زكايب الفلوس دي و ترميها في
الحساب بتاع مراتك ( الحاجه أم محمود ) في بنك فيصل ( عشان إسلامي و ابن اسلامي )
, و تسيب في حساب البنك بتاع دار الأيتام 125 ج عشان لو حد سألك تقوله كشف الحساب أهو
, ده لو حد سأل أساسا .
.
أقولك المفاجأه
بقى , إنت بعد ما تتنغنغ في الدنيا و تقضيها مارينا و زفلطه هتدخل الجنه في الأخره
, أومال إيه يا جدع دانت كافل يتيم , كافل وابن كافل كمان .
.....................................................................................................................................
Mohamed
Hussein
29
مارس 2015·
على فكره , مش
معنى إنك تعرف الفرق بين الدبابه و الطياره العسكريه و عارف يعني إن الدبابه هي بتاعه
كده عامله زي العربيه النيسان جوك و لها ماسوره طويله من قدام بس بتلفّ على رُمّان
بلي , و الطياره العسكريه بتبقى أصغر شويه من الطياره اللي بنركبها و نروح بيها الحجاز
و فيها اسلحه بس مفهاش كراسي ( فارشين حصيره جوه ) , مش معنى كده إن حضرتي أو حضرتك
نبقى خبراء عسكريين .
.
عايز تبقى خبير
عسكري و تقول جيش مصر اتورط و ماتورطش , و أصل المفروض وربما و حيثما و بما أن , بسيطه
خالص , روح اتفحت في جيش مصر 40 سنه و ابدأ من ملازم , و لما تبقى مشير أبقى تعالى
اتحفنا بخبرتك العسكريه .
.
بالمناسبه مصر
فيها بتاع 200 ألف صيدلي و أنا أقلهم علما و درايه ( أه و الله ) و مع ذلك مش هقبل
إنك تيجي تخنقني في شغلي و تعملي فيها ابن سينا .
.
الفيس بوك أحيانا
بيخلينا نطلّع البهلول اللي جوانا و نفتي في أي حاجه بمنتهى الثقه , يعني واحنا سايبين
إيدينا كداهو , و اللي يقولك خطتنا في سينا غلط , لا ضرب داعش مش صح , احنا متورطين
في اليمن , الطيارات بتاعة فرنسا دي مش حلوه و الفتيس بتاعها بيقفش بسرعه .
.
مش بنعرف نسكت
ابدا , لسانا ده مش بيبطّل , و تقريبا لازم و حتما ولابد نملى صفحة الفيس بوك بأي هري
و بهلله ............. أن الأوان ترحلي يا دولة البهاليل !! .
....................................................................................................................................
Mohamed
Hussein
29
مارس 2015·
إضحك و احمد ربنا
لو الصوره طلعت أساسا .
.
- السودان بعتت
3 طيارات للمشاركه في عاصفة الحزم , واحده منهم وقعت و الطيار بتاعها الحمد لله بخير
( للأسف لسه عايش ) , شوفت صورته , اللهم صل عالنبي , عنده جفاف و لو عمل تحليل هيموجلوين
هيطلع 7 , طب يا زول مش كنت تظبط نفسك في مستشفى التأمين الصحي بتاعة الخرطوم قبل ما
تطلع الطلعه دي ؟ .
.
- من كام سنه
, و بعد حادثة أديس أبابا , فيه صحفي سأل مبارك ( الله يجحمه , أهو عشان ماتزلعوش
) , و قال له يا ريس السودان بتهدد إنها تحارب مصر , قام مبارك قاله السودان عندها
3 طيارات و دبابتين ...............مبارك نق فيها , أهم بقو طيارتين يا فقر .
.
- لما تقولي إنشاء
قوه عربيه موحده و تكون فاهم يعني إننا هنعملها بطريقة ( نأخذ من كل رجلٍ قبيله ) هتضحكني
و الله , أصل الحكايه مش كده خالص و المشاركه بتبقى معنويه مش اكتر و أحيانا بتكون
( حب من طرف تالت ) , هبسّطهالك : نفترض مثلا إنك قلت القوه العربيه الموحده دي قوامها
100 ألف جندي و 5 الاف ظابط و طيارتين , هقولك التقسيمه تبقى ازاي , إحنا هنجيب 17
جندي من جيش لبنان و 3 من الصومال و 4 من البحرين و اتنين من قطر ( هيكونو واحد الماني
و واحد ميكسيكي بس متجنسين ) و ناخد الطيارتين بتوع السودان قبل ما يقعو و نكمل ال
100 ألف من مصر .
.
قوه عربيه موحده
معناها باختصار فرقتين من جيش مصر و شوية معازيم جايين يسأّفو .
.......................................................................................................................................
Mohamed
Hussein
29
مارس 2015·
محبوس و الله في
الصيدليه دي , عايز أروح البلد و أقعد في ساعة عصاري تحت شجرة صفصاف و جنب مني قنايه
بتجري فيها المايه و ألعب في المايه بإيدي كداهو و اشوف الدنيا خضره حواليا و أفتكر
اللي قال ( كل عين تعشق حليوه و انتي حلوه في كل عين , يا حبيبتي انا قلبي عاشق و اسمحي
لي بكلمتين ) ...الله يرحمك يا عم نجم .
و افضل كده كل
يوم و كل عصريه , و لما الهوا يلفحني و انا قاعد أحط شبشبي تحت راسي و انام ( أعمله
مخده ) , في نور ربنا بقى .
.
هو ينفع الواحد
يسيب الشغلانه دي و يشتغل في مهنه تانيه اسمها ( عاشق مصر ) ؟ , مهنتي : بحب مصر ,
طب مين هيديني مرتب أخر الشهر ؟!.
..................................................................................................................................
Mohamed
Hussein
29
مارس 2015·
وزير الخارجيه
السعودي : النظام السوري فقد شرعيته !! .
.
هنا بقى مربط الفرس
, فجوه كبيره هتمنع أي عمل عربي مشترك , سوريا بالنسبه للعرب بصفه عامه و بالنسبه لمصر
بصفه خاصه ماتقلش أهميه عن السعوديه و اليمن , إنما هي الحكايه ماشيه إزاي ؟ .
.
الحكايه ان دول
الخليج ضد بشار الأسد و ده معلن و صريح , و اعتقادي إن السيسي لا يعترف بوجود ثوره
في سوريا ( ثورة الدواعش ) , بس إيده متكتفه , مصر مرت بظروف زي الهباب و الدعم الخليجي
كتّف إيدينا , كانت خطوه جريئه من السيسي إنه مايدعوش المعارضه السوريه لتمثيل سوريا
في القمه العربيه , يعني مش معترف بيها ولا بوجودها , لكنه في نفس الوقت ماقدرش يوجه
دعوه للنظام السوري و فضل كرسي سوريا فاضي .
.
هنفضل كده نلف
في نفس الدايره و نرجع لنفس النقطه , بشار الأسد فاسد ( زي أغلب حكامنا العرب ) و قول
قاتل قول سفاح , بس ربنا وحده يعلم سوريا كانت هتبقى كام دوله دلوأتي ؟ كان متخطط لها
تكون كام دوله ؟ . في مرحله زي اللي مرينا بيها دي يبقى ملعون أبو الديموقراطيه عالثورات
و الحريات , وحدة الأوطان أهممم حتى لو كانت قايمه على فساد , خلّي بلدك حته واحده
و اتأكد من كده الأول و بعدين ابقى اعمل ديموقراطيه براحتك .
.
حلم بيراودني
, أنا لا اعرف بشار ولا اعرف الدواعش , إنما أعرف سوريا , و حلمي اللي صعب يتحقق (
دلوأتي عالأقل ) إني أقرا خبر عن زياره السيسي ل دمشق و اجتماعه بالأسد , بشار الأسد
لازم يتنازل شويه و يلم الدور و بلاش سوريا تنعزل أكتر من كده و في نفس الوقت مصر لازم
تقف جنب سوريا , سوريا يعني الدوله و الشعب و الحدود و العلم و النشيد و التاريخ .
.
السيسي يقدر و
مش هبالغ لو قلت انه الرئيس العربي الوحيد اللي يقدر .
.......................................................................................................................
Mohamed
Hussein
28
مارس 2015·
يا سلام بقى يا
عبد الفتاح ياخويا لو تكمل جميلك و تضرب ضربة معلم كمان ( الضربه القاضيه ) , هقولك
ازاي :
انت تدعو قادة
منظمة المؤتمر الإسلامي للإجتماع في القاهره و أردوغان بتاع تركيا يحضر و يقول كلمته
و يشكر فخامة الرئيس المصري عبد الفتاح السيسي و يشكر مصر حكومةً و شعبا .
و مرسي بقى و اتباعه
يجيلهم مناخوليا رسمي , و يمشو في الشارع وشعرهم واقف كداهو زي فؤاد خليل و عنيهم مبرّقه
زي ما تكون منقوعه في برميل أتروبين و يبقى سهل جدا التعرف عليهم في الشارع , أي عيل
شعره واقف و عنيه مبرقه نطلب له السرايا الصفره على طول و نلمّهم بقى و نرتاح .
.
عارف انت العيال
الكولجيه بتوع ( أنا مش إخوان بس بحترمهم ؟ ) هنلاقيهم برضه ماشيين في الشارع بشعر
واقف و عيون مبرّقه , و لما نقفش عيل منهم هيقولك والله لأ , أنا مش إخوان بس ببرّق
زيهم !! .
.......................................................................................................................................
Mohamed
Hussein
28
مارس 2015·
ههههههههههه الواد
ابن مرسي اتهبل هو و ابوه , أه و الله اتجننو رسمي .
.
الواد بيقول على
امير قطر ( جرذ ) و نازل تقطيع في فروته , مش ده كان حامي حمى الحريه و الثوره و الشرعيه
ياهبل يابن الأهبل ؟! , مانا قلت لك اهدى واصبر شوية تاخد حاجه حلوه , هه ؟ خدت ولا
لسه ؟! و هي عامله إيه دلوأت ؟
.
وابوه باعت رساله
للقاده العرب اللي مجتمعين في شرم الشيخ بيقول لهم إنتو ازاي وافقتو تحطو إيديكو في
إيد السفاح عبد الفتاح السيسي ؟ ازاي بتتكلمو عن محاربة الإنقلاب في اليمن و جايين
لقائد الإنقلاب في مصر ؟ انتو كده تبقو فيرزاس نوت أجينست , و بعدين سايبني مرمي في
السجن بالشكل ده , انا الرئيس الشرعي , دانا كده ماحصلتش عاشور بتاع الزقازيق حتى
, طب طلّعوني من هنا عشان أشد سكينة الكهربا و اخد 20 جنيه .
...................................................................................................................................
Mohamed
Hussein
28
مارس 2015·
ملخص القمه العربيه
.
- كلمة تاريخيه
للرئيس المصري عبد الفتاح السيسي اللي قدر يجمّع الشامي و المغربي , و تصفيق حاد بعد
ما قال ( تحيا الأمه العربيه ) .
.
- تميم ابن موزه
بدأ كلمته بشكر فخامة الرئيس المصري عبد الفتاح السيسي !! , ....اللي قبلنا قالو (
مسير ابن موزه تجيبه رجليه بلاش الكلمه التانيه ) .
.
- الرئيس اليمني
هادي منصور أو منصور هادي مش فاكر , المهم انه هادي و خلاص , وصل لشرم الشيخ على طيارة
الملك سلمان و لما الملك سلمان حب يرجع الرياض تاني قاله خدني معاك برضه )... رايح
جاي ببلاش أهو , سفلأه يعني .
.
- الرئيس الفلسطيني
لسه مقالشي كلمته تقريبا , أكيد هيفاجئنا المره دي و يتكلم عن حلم الدوله الفلسطينيه
و عاصمتها القدس و حق العوده للاجئين ( دانا حفظتهم من كتر ما بسمعهم ) ...قول يا عباس
ماتتكسفش .
.......................................................................................................................................
Mohamed
Hussein
28
مارس 2015·
اتفضلو معايا النسكافيه
.
قلت أفتح موقع
الجزيره , ليا سنين ماشوفتوش , لأ استنى يا محمد , قبل ما تفتح الموقع قول كده تتوقع
ايه المكتوب ؟ أنا : بسم الله الرحمن الرحيم , بؤ نسكافيه أهو عشان أفتّح عيني بس
, الجزيره هتشيد بمشاركة تميم في القمه العربيه ( في شرم الشيخ ) و في نفس الوقت هتقولك
الدوله الإسلاميه بتتمدد في سينا ( على بُعد 3 متر من القمه العربيه !!) , طب خد بؤ
تاني و فكر كده يا ترى موقفهم ايه من اليمن ؟ أه أكيد بترحب بعاصفة الحزم و المشاركه
القطريه فيها و في نفس الوقت هتقولك الحوثيين مسيطرين على باب المندب و منطقة الخليج
العربي و كلها ساعتين زمن و يحتلو الهند و جحافل الحوثيين على مشارف طوكيو , طب ايران
يا محمد ياخويا إيران : أهه , إيران بقى يا سيدي أكيد هتنتقد وجودهم في اليمن و في
نفس الوقت تقول إن صنعاء و مضيق باب المندب في مرمى الصواريخ الإيرانيه !!.
.
الله يفتح عليا
, الله يفتح عليا , ماهو ديل الكلب عمره ما ينعدل , و ريري سيلان غالبا لما بينصلح
حالها بتقعد عالكيس و تستقبل الزباين من ورا الباب ( ده بعد التوبه النصوحه ) !! .
.
و انتي مش هتيجي
بقى يا ريري ؟ لأ أجي إيه مانا توبت يا حاج و اتحجبت زي مانت شايف و بعدين أنا كبرت
عالحاجات دي , بس عندي لك بنت إنما إيه بالسلوفانه بتاعتها , و شرفك إنت أول إيد هتلمسها
, أدخل بقى و هتدعي لي , و خلي الحساب و انت طالع , طيب ساعه زمن و راجع لك , بارك
الله فيكي يا أخت ريري .
.....................................................................................................................................
Mohamed
Hussein
27
مارس 2015·
أحمد منصور مُنظّر
الإخوان و الجزيره كاتب مقال , طب والله كنت فاكر المقال بتاعه مضروب , لعبه يعني أو
اشتغاله , طلع بجد , و اللي يوجعك بقى انه معمول له ألاف اللايكات و الشير و التعليقات
.
بيقول ايه بقى
مولانا أحمد منصور ( و الكلام ده مكتوب امبااااااااارح ) : إن السيسي الخاين اجتمع
مع العلويين و الإيرانيين و الحوثيين في القاهره من كام يوم و مؤيد لهم و بيموت في
دباديب الشيعه , و إن الخليج السني لما عرف كده ماخلاش مصر تشارك في عاصفة الحزم
!! .
.
طب يعني لما يبقى
ده اعلامي و منظر سياسي و مشهور و له ملايين المتابعين , يبقى ليه عم مصطفى بتاع الجراج
مايترشحش لمنصب الأمين العام للأمم المتحده ؟!!.
.......................................................................................................................................
Mohamed
Hussein
27
مارس 2015·
عملت تسجيل خروج
من الفيس بوك النهارده و جيت ادخل بعد ساعه قام الفيس مارضيش يدخّلني , حاولت مره و
اتنين و عشره و في كل مره تجيني نفس الرساله : (اصبر شويه احنا بنعمل صيانه في الفيس
دلوأتي , أسفين يا سيدي على إزعاجك , استنى دقايق الدنيا مش طارت يعني ).
.
المهم فين و فين
بقى بعد ييجي نص ساعه لقيت الصفحه فتحت , تقريبا الرجاله خلصو صيانه و لمّو عدتهم و
مشيو , يارب يكونو صلحو الحنفيه بتاعة المطبخ قبل ما يمشو , متشكرين يا رجاله , ألف
شكر و الله , طب اقعدو اشربو شاي .
.....................................................................................................................................
Mohamed
Hussein
27
مارس 2015·
المزايا السبعه
لإنك تكون عايش في القاهره و راكب عربيه قديمه أوي موديل 1935 و صاجها متطبق في بعضه
, أيوه اللي هي العربيات اللي حضرت النحاس باشا و أيام الملك و الوحده بين مصر والسودان
و حضرت حسنين هيكل و هو بيطلع بطاقه من سجل مدني أم درمان
.
1- ممكن تركن عربيتك
في أي شارع من شوارع مصر الضيقه دي , اركنها صف تاني صف تاسع ولا يهمك , إيه ؟ هتتخبط
؟ ما تتخبط , يا راجل مش جايز لما تتخبط ربنا يكرمك و صاجها يرجع زي الأول تاني ؟ مش
بيقولو نَفْي النفي إثبات ؟!.
.
2- مش هتزعل لو
طلعت بيتك وافتكرت انك مقفلتش مراية العربيه , أيوه المرايا اللي انت شاريها ب 7 جنيه
من رمسيس دي , إيه ؟ ممكن تنكسر ؟ ما تنكسر , لو نزلت لقيتها مكسورها , فكها و خدها
في إيدك لنفس البيّاع بتاع رمسيس و هو ملزم يديك واحده مكانها أو يرجع لك ال 7 جنيه
, مش انت واخد ضمان 99 سنه على عيوب التصنيع ؟ يبقى لسه الضمان بتاعك شغال , بس خلي
بالك , اتأكد إن المراية الجديده اللي هتاخدها صيني أصلي , إوعى يضحك عليك و يديك مراية
ألماني , أيوه ولاد الحرام ماخلوش لولاد الحلال حاجه .
.
3- لو وقّفك كمين
في الشارع , عُمْر الظابط ما هيديك مخالفة أمن و متانه , مخالفه ليه ؟ مانت فُلّه أهو
, هو هيدي المخالفه لبتاع ال بي إم 2014 عشان عنده شرخ في الإزاز 3 سم , إنما انت لأ
, مخالفه بتاع ايه ان شاء الله ؟ ولا هو استكراد للناس و خلاص .
.
4- لو عربيتك سخنت
في صلاح سالم أو على كوبري اكتوبر و هي أكيد هتسخن ماتقلقش خالص , شايف المروحه اللي
انت مركبها في سقف العربيه دي عشان تهوّي عليك في الحر و تعملك جو ؟ أهي المروحه دي
تحتها سلك طويل 5 م و مربوطه بمسمار قلاووظ , فك المسمار بمفك أو حتى بمفتاح الشقه
و افتح كبوت العربيه و خد المروحه تهوي عالموتور شويه لحد ما يبرد و بعدين زود مايه
من الجركن و اتوكل على الله .
.
5- طبعا مراتك
و حماتك و عيالك و والدتك من حقهم يركبو معاك و يقعدو في الكنبه الورانيه و ياكلو سمك
و رنجه و بصل أخضر و يظروطو الدنيا , لأ مغلسه ايه بس ؟ انت كل كام يوم كده تكنسها
بمقشه خشنه ( بنسميها عندنا في الفلاحين الإنْو ) , و لو عندك فرح و عايز توجّب مع
العريس هات اتنين شباب و شيلو العربيه اقلبوها على وشها و خلو العجل فوق و ارفعوها
و انفضوها نفضتين حلوين هتبقى زي الفل , ماتنساش تفتح البيبان قبل ما تنفّض العربيه
.
.
6- لو عايز تغسل
عربيتك روح اقف بيها تحت حبل الغسيل بتاع ست شوشو , اعرف اليوم اللي بتنشر فيه غسيلها
و وقف العربيه تحت البلكونه , ساعة زمن هتلاقيها مغسوله , و ماتنساش تطلّع البنطلون
بتاع الواد حماده ابن ست شوشو اللي وقع على كبوت العربيه .
.
7- و دي أهم ميزه
على الإطلاق , عربيتك تقدر تسافر بيها بالليل في كافة الطرق الزراعيه و الصحراويه بمنتهى
الأمان , ماتقلقش خالص من العيال الجدعان ولاد البلد اللي هما بيبقو شايلين أر بي جيهات
و بيثبّتو العربيات عالطريق , لو ثبّتوك ماتقلقش , بطّل العربيه و اديهم المفتاح مع
ابتسامه حانيه , هتلاقي واحد منهم قرب منك و دخّل دماغه من الإزاز و قالك : عايز حاجه
يابه ؟ روح الله يستر طريقك , عايز فلوس طيب ؟ و غالبا هيرمي عليك 200 ج و سجاره كليوباترا
, خدهم منه وماتزعلوش , و شغل عربيتك و اتوكل على الله .
.......................................................................................................................................
Mohamed
Hussein
27
مارس 2015·
مايجراش حاجه أبدا
لما تسمع صوت سارينه و تطلع تبص تلاقي عربية شرطه و كام عربيه مصفحين عليهم عساكر لابسين
و مأفرزين و ظابط لابس قميص واقي و العربيات بتمشي بسرعه أوي , غالبا هيأمنّو مكان
أو فيه قنبله أو حريق أو ضرب نار , مايجراش حاجه أبدا لما تشوف المنظر ده و تقول :
ربنا يحفظكو .
.
بعيد عن الهري
و الفزلكه و الكعبره و موضه التقعير اللي حطت علينا فجأه , الناس دي و هي ماشيه كده
محدش فيهم عارف هيرجع بيته ولا لأ , يعني احتمالية الرجوع بتبقى 50 % (50/50 ) , ماهو
لو عقلك و جمجمتك ماستوعبوش إنك تقول جمله زي دي في موقف زي ده يبقى مالهمش أي لازمه
, ممكن تشيل عقلك ترميه و تاخد الجمجمه تحط فيها أكل للفراخ عشان ينأنأو أو تعملها
طفاية سجاير .
.....................................................................................................................................
ليست هناك تعليقات:
إرسال تعليق