مولد سيدنا الفيس بوك !
.
من سنتين تقريبا مكانش عندي حساب عالفيس بوك وكنت بعتبره رجز من عمل
الشيطان , ماهو المرء عدو ما يجهل , وبدأت الثوره ونصحني صديقي أحمد ميد
إني اعمل حساب , قلت له مبعرفش , اعملي وعملي مشكورا ومن هنا بدأت علاقتي
بالثوره وبعتبر نفسي من شباب الثوره عشان عندي حساب عالفيس بوك !! ما علينا
, بدأت أكتب فقام أصدقائي زيزو ومكي نصحوني إني أعمل مدونه , قلت لهم
مبعرفش اعملولي قام زيزو وميد
عملو المدونه
, وبعد شويه كتبت كتير فنصحني صديقي صبحي وزيزو بعمل بيدج قلت لهم مبعرفش
اعملولي وعملو البيدج , من الأخر أنا بعرف أكتب بس , وعلاقتي بالفيس بوك
بتقف عند حروف لوحة المفاتيح وبارك الله فيما رزق ! , قعدت عالفيس بوك كتير
لحد ما خلفيتي العسكريه ورمت يا ولداه , قابلت كتير وشفت كتير , بكتب
وبكتب , حسيت إن الفيس بوك ده عباره عن سوق ومولد كبير وصاحبه غايب , وإن
اللي قاعد بيكتب ذي حالاتي أو بينزل بوستات بيبقى عامل ذي اللي فارش ببضاعه
في السوق , أنا عن نفسي كنت فارش بكتابات سياسيه ومقالات ساخره وشعر ( على
أدي كده ) , وكل ماكتب حاجه استنى الزبون اللي بيعدي , يمكن حد يقلب في
البضاعه وتعجبه فيعمل لايك , أو يحب يشتري فيعمل شير , في الأول مكانش حد
بيعبرني وانا عمال أقول بوست أهو يا ناس , اشترو مني يا ناس , وألمح بطرف
عيني الناس ملمومه عند اتنين بياعين بس , بنت اسمها فيفي in in بتبيع ملابس
داخليه حريمي , وواحد إسمه مصعب بيبيع جلاليب بيضا قصيره , وانا وأمثالي
قاعدين بننش , بعد شويه بدأت الزباين تيجي لما غيرت العتبه وقربت شويه من
مدخل السوق , لكن لأ , مش مقتنع ,أنا فارش بشوية بضاعه لوز , مش ممكن يكون
مصيرها كده , قررت إني أدوس في الجامد شويه , ناديت على بنت صغيره عمرها 10
سنين , قلت لها تعالي يا حبيبتي اقعدي مكاني عالفرشه دي ومتخليش حد يلعب
في البضاعه لحد ماجي , قالتلي حاضر يا عمو , قلت لها عمو إيه بقى ؟ انت
اللي زيك عروسه ,اسمي محمد , قوليلي يامحاميحو , وسبتها ولفيت في الفيس
وضربت غطس جامد عشان أتعلم واوصل للسر , ووصلت للحقيقه الموجعه , صحابي
قالو لي عشان تكبر في الفيس قدامك اختيارين , يا إما تستشيخ يا إما عليك
وعلى الإغراء بقى والذي منه , قلت فنفسي أنا ماليش في المشيخه عشان مبحبش
ألبس الجلاليب القصيره والغطره! , ومكدبتش خبر , عملت صفحه باسم ( سونا
العاشقه ) , وحطيت صورة بنت شبه عريانه , صحابي كانو قالولي ركز عالركب
عشان بتعمل شغل حلو مع الشباب , وكتبت بوست بقول فيه ( بوستك بتوجعني يا
ميدو ..........مع صوره شخصيه لسونا ذات نفسها) , وعملت دعوه لكام صديق
معرفهمش وسبت البوست ونمت , ذي الصياد اللي بيرمي الشبك واستنيت للصبح ,
كانت المفاجأه 17000 صديق , 1500 لايك , 700 شير !!.
في النهايه عايز أقول حاجه وسامحوني ولا مؤاخذه يعني
.
الله يرحمها مصر , الله يرحمها , مكانتش هتموت أبداً لو كانت طوابير العقل
والعدل والعلم فيها أطول من طوابير الجلابيه القصيره والإغراء , والفيس
بوك هو اختصار لحال مجتمع!!.
.
محمد حسين