Mohamed
Hussein
26
نوفمبر 2015·
أردوغان : بوتين
لا يرد على اتصالاتي الهاتفيه !!
.
يا بنتي استهدي
بالله ماتعمليش في نفسك كده , الغايب حجته معاه , مش جايز الموبايل بعيد عنه أو عامله
سايلنت ؟ أو جايز مشغول و إيده مش فاضيه , أو جايز يعني بقول جايز يكون بيجهز للطريقه
اللي هينفخِك بيها .
...................................................................................................................................
Mohamed
Hussein
26
نوفمبر 2015·
مندوب شركة مستحضرات
تجميل : بص حضرتك , احنا عندنا عرض عالمنتج الفلاني , لو خدت أوردر ب كذا ممكن تدخل
سحب على عربيه مرسيدس , يعني تاخد رقم و انت و حظك جايز تكسب المرسيدس .
.
أنا : بص يابني
, أنا الحاجه الوحيده اللي كسبتها في حياتي كانت ( عسليه ) من أم قرشين ساغ , كسبتها
من دكان خالتك توحيده الله يرحمها مرات عمك محمود أبو سعد ( الله يرحمه برضه ) , الكلام
ده كان من 30 سنه تقريبا , يوميها كنت طاير من الفرحه و البلد كلها عرفت و الناس جت
تبارك لي عشان كسبت ( العسليه ) , عربيه مرسيدس إيه يابني اللي ممكن أكسبها في سحب
؟ داحنا بنتشعلق في رضا ربنا .
..............................................................................................................................
Mohamed
Hussein
26
نوفمبر 2015·
هيما حبيبي
.
ابراهيم عيسى
: لست منحاز للمشروع النووي و اخشى من فهلوة المصريين !!
.
بس كده بانت لبتها
يا عم ابراهيم , إنت أفلست زي عشرات غيرك , أفلست فكريا , جايز من طولة القاعده عالبتاعه
دي قدام الهوا مباشرة , الحكايه بتبقى ممله و سخيفه و انا عاذرك والله , كل يوم لازم
تطلع و تقعد عالبتاعه , طب هتجيب مواضيع منين و كلام ؟ مانت لازم تعبّي الهوا , تعبيه
منين يا هيما ؟ تعبيه إزاي يابراهيم ؟ تتصرف كيف يا عبد الرحيم ؟ اه بس لقيتها , أحنا
ندخل عالفيس و تويتر و نشوف الناس بتهري في إيه و نهري زيهم , يعني زمان كان الإعلام
بيوجّه مواقع التواصل , و دلوأتي العكس .
.
المفاعل النووي
مش بدعه يا هيما , احنا مش بنعيد اختراع العجله ( حلوة الحته دي ؟ ) , فيه عشرات الدول
عملو مفاعلات نوويه , و الحكايه بدأت من عشرات السنين , يعني قديمه فحت , مصر بقى تحديدا
عملت الدراسه بتاعة المشروع ده من أيام السادات يعني من أيام الجنيه الجبس , و مصر
تحديدا فيها عشرات العلماء اللي بيفهمو في شغل المفاعلات , و لو مش عاجباك مصر وشايفها
عايشه بالفهلوه هقولك , بلاش مصر خليك في روسيا , بلاها ناديه و خد سوسو , أظن روسيا
مش عاجزه عن إدارة مفاعل نووي يابو خليل .
.
بص يا عم ابراهيم
, انت عارف إني بحبك , وعشان بحبك هقولك نصيحه لوجه الله , إنت عجّزت و لياقتك البدنيه
مابقتش أد كده , ماتعملش بقى زي عصام الحضري و تصر إنك تكمل لعب و تتحول ل ( خرم )
في الأخر , احترم تاريخك الإعلامي و اعتزل , اقعد في بيتكو و البس جلابيه بيضا مرحرحه
, وافتح أكاونت عالفيس و اهري مع الناس ....دي نصيحه لوجة الله .
.
يا خساره , دانا
كنت راسم لك صورة بورتريه أد كده و معلقها في الرسيبشن .
......................................................................................................................................
Mohamed
Hussein
25
نوفمبر 2015 ·
فن و علم إسمه
( المندبه ) .
.
أتاري إن حكاية
المندبه و الكربلائيات دي طلعت فن و علم فعلا , فن له أصول و قواعد , اول قاعده فيه
و أهم قاعده على الإطلاق هي إنك ماتعملشي حاجه خالص , اه و الله , أهم حاجه إنك ماتعملش
حاجه !! , شوفت سهله إزاي ؟ ألف مبروك , انت كده خدت شهادة الماجستير في علم المندبه
.
.
أه يا سيدي ماتعملش
حاجه , بالعكس , تقعد و ترحرح و تريح عضلة السمّانه , و تأرّخ لسلبيتك و تبررها و تفسرها
و تحبها و تبوسها و تنيمها في حضنك , وقبل ماتنام تدعي ربنا إن الدنيا تخرب ( دي القاعده
التانيه في فن المندبه ) , قول يارب جيب عاليها واطيها , أي حاجه بس عشان أعرف افتح
المندبه بكره , حادثه ولا انفجار , أي خراب يعني , و بعدين تشرب اللبن و تقول دعاء
قبل النوم و تنام .
هبسطهالك , يعني
مثلا , مرتضى منصور و توفيق عكاشه مانجحوش في الإنتخابات ( اتفاجئت صح ؟ ) , لا مانجحوش
, دخلو إعاده , و حضرتك و حضرتي و حضرتها , و الناس دول و الناس دوكهما يقدرو بسهوله
جدا ينزلو في جولة الإعاده و يسقطوهم ( بدل ما ننزل صورهم في كوميكس من دلوأتي ), بس
حاسب , إنت لو عملت كده تبقى كسرت القاعدتين الأهم في علم المندبه اللي حضرتك بارع
و متخصص فيه , قاعدة السلبيه و قاعدة الدعاء بخرابها .
.
زمان أنيس منصور
الله يرحمه قال ( لو قضية لوكيربي اتحلت , الليبيين اللي قاعدين عالمصاطب هيتكلمو في
ايه ؟!! ) , و انا عايز اقول لحضرتك نفس الكلمتين بالظبط , لو عكاشه و منصور سقطو و
الحكايه اتحلت يعني , حضرتك بقى هتهري في إيه ؟!! .
....................................................................................................................................
Mohamed
Hussein
25
نوفمبر 2015·
السعاده هي
.
فرن معمول من الطين
, و حديده كبيره في نصه , و تحت الحديده تولّع في شوية ( قش رز ) صغيرين , بعد شويه
أمي تمسك ( المطرحه الخشب أو النشّابه ) و تحط عليها العجينه بتاعة رغيف عيش و تفردها
كداهو , و ترميها في الفرن , تشم ريحة الخبيز , و يطلع لك رغيف عيش طري و سخن .
و انا قاعد جنب
أمي عالأرض أو على شوية قش , قدامي صنيه نحاس صغيره , عليها طبق فيه حتة جبنه قديمه
وقشرة برتقان كانت مع الجبنه في قلب ( البلاص ) , و شوية ( سريس ) مغسول و مندّي ,
لسه جايبينهم حالا من أرض البرسيم .
أمي تبقى قدام
( الصهد ) بتاع الفرن , و تلف عشان ترمي لي الرغيف عالصينيه ( من المطرحه رأسا إليك
) و تشوفني وانا بفطر و تبتسم , الكلام ده يبقى قدام البيت , يعني في نور ربنا , أهي
دي بقى قمة السعاده بالنسبالي , ابتسامه و رضا و لقمه في نور ربنا .
.
.
أقولكو على سر
؟ أنا بكره تشيليز و كنتاكي و ماكدونالدز و كل مطاعم البلاستيك , و بكره أمريكا , و
بقرف جدا من دلع بناتها , بحسه دلع ماسخ , شبه أكلهم بالظبط , دلع بلاستيك .
.......................................................................................................................................
Mohamed
Hussein
25
نوفمبر 2015·
الرد الروسي
.
التمهيد : وقف
كل أشكال التعاون العسكري مع تركيا , نشر قاعدة صواريخ بشكل ما مختلف , اعلان ان الطيارات
الروسيه هتطير بعد كده و معاها مقاتلات روسيه , اعلان ان تركيا دوله داعمه للإرهاب
و تحذير للمواطنين الروس من السفر إلى أنقره .................. ده كله اسمه التمهيد
و تهدئة الرأي العام الروسي شويه مش اكتر .
.
الرد الروسي هيكون
خلال أيام , رد محسوب و مدروس و بيوجع , ليه بقى ؟ اللي وجع روسيا أكتر من اسقاط الطائره
هو حكاية قتل الطيارين , بوتين قال ان تركيا ماتصلتش بيهم قبل ماتضرب الطياره و فضّلت
الإتصال بحلف الناتو , روسيا راجعه عشان تاخد دورها القديم كقوى عظمى , الجو كان سامح
أوي و كراهية الناس للأمريكان هيأت الظروف دي , روسيا تحديدا اعتقد اكتر من اي دوله
في الإتحاد الأوربي مش بتعتز بقوتها الاقتصاديه أو العلميه أد ما بتعتز بقوتها و قدرتها
العسكريه , ده شئ في الجينات و التركيبه الروسيه .
.
اللي عملته تركيا
و عمله أردوغان هو باختصار إنهم لبسو في حيطه سد بتحريض خبيث من الناتوأو حتى أوباما
, الحكايه مش أحلام ولا أماني إنما توقعاتي , مولانا اللي ربى دقنه فجأه و بيقول هتنصرو
روسيا على دوله مسلمه يعني ؟ عايز أقولك كلمه أبيحه بس بالفصحى , مش لاقي رد غيرها
و الله و ربنا يسامحني بقى , الرد في كلمه واحده : قحّه يا مولانا .
.............................................................................................................................
Mohamed
Hussein
24
نوفمبر 2015·
بتوع البليله
.
انفجار حافله لأمن
الرئاسه التونسيه في قلب العاصمه تونس , 15 قتيل على الأقل .
.
تونس مش محتاجه
مصالحه ولا حاجه يا برادعي , لسه واخدين جايزة نوبل للسلام من كام يوم ( تقديرا للجنه
الرباعيه على جهودهم في المصالحه و الحوار الوطني و لم الشمل !! ) و مع ذلك ضربها الإرهاب
, و باريس مكانتش محتاجه حوار مجتمعي يا ست جميله اسماعيل و مع ذلك ماسلمتشي .
.
كل شعاراتكو وافتكاستكو
و الهري بتاعكو عن مواجهة الإرهاب بالمصالحه و الحب و الحوار أثبتت إنكو لا سياسيين
ولا نخبه ولا نيله , انتو باختصار ................ بتوع بليله .
.....................................................................................................................................
Mohamed
Hussein
24
نوفمبر 2015·
ههههههههههههههه
قابل يا سيدي و قعد معازيمك
.
اجتماع استثنائي
للناتو بطلب من تركيا بعد اسقاط الطائره الروسيه
.
أردوغان في اجتماع
الناتو : بصو انا مش عارف اعمل ايه ؟ شكلي كده لبست في الحيطه , انتو هتبقو ورايا يا
رجاله ولا هتسيبوني لوحدي , روسيا هتفشخنا لو سيبتوني , يا سنتك السوده يا أردغ .
.
حلف الناتو : ماتقلقش
يا حمار , كمل انت بس و احنا وراك , روح انت دلوأتي و احنا هنيجي بعد شويه , هنلم الرجاله
و نيجي .
.
أردوغان : هتيجو
هتيجو يعني ولا كلام و خلاص ؟ مانا عارف بعد شوية بتاعتكو دي .
.
حلف الناتو : يا
حيوان قلنالك جايين , مالك مرعوب كده ليه ؟
.
أردوغان : طيب
انا رايح اهو بس والنبي و النبي مش تتأخرو الله لا يسيئكو , هات العواقب سليمه يارب
, أمان ربي أمان .
.................................................................................................................................
Mohamed
Hussein
24
نوفمبر 2015·
الصوره في عيون
الحمار
.
1- صوره رقم واحد
, بتجمع مرتضى منصور و سعيد حساسين و ابن مرتضى و كام شكل من الأشكال الضاله دي , شكل
برلمانا أهو يا جدعان , شوفتو السواد اللي احنا فيه ؟!! .
مع انك ممكن تعمل
صوره تانيه و تحط فيها سمير غطاس و ابن ابو العز الحريري و غيرهم كتير من ناس نضيفه
و تشرف , بس الصوره التانيه مش هتناسب الفكر السوداوي اللي جواك , انا شخصيا لا هحط
الصوره دي ولا دي , و اجمالا و باختصار , و عشان انا مخلّص ابتدائيه يعني بعرف أقرا
ألف باء , هشوف الصوره الكامله على إن هي دي أم الديموقراطيه اللي صدعتنونا بيها ,
اختيار الناس , يجيبو مرتضى منصور أو يجيبو أبوزيد الهلالي , لا السيسي اختارهم ولا
الحكومه , هو حضرتك ماخلصتش ابتدائيه ليه قبل ماتيجي تقرفنا بالديموقراطيه ؟! طب فاكر
الصوره في برلمان 2012 و الأشكال اللي فيها ؟ مش كنت بتعتبرها تجربه رائعه و رائده
في الإختيار الديموقراطي الواعي ؟ مش تبقى تتنيل على عين أهلك و تخلص ابتدائيه الأول
.
.
2- صوره رقم اتنين
, هي صوره مكبره و مجسمه للسودان و اثيوبيا و تركيا و حتى قطر , و أي دوله على خلاف
مع دولتك يحاول الحمار يكبّرها جدا , مره حمار يقولي السودان هتنفخنا , و حمار تاني
يقول أثيوبيا من أقوى 10 جيوش في العالم , و حمار يتكلم عن عظمة قطر , و أحدث حمار
هو اللي شايف ان تركيا بعد ما وقعت الطياره الروسيه تبقى سيطرت عالمنطقه ( طب ابلع
ريقك بقى عشان الفقره اللي جايه محتاجه رجاله !! ) .
.
الحمار اجمالا
بيصحى من النوم يرفّس يمين و يرفّس شمال و ينهق و ينزل بوستات عشان يأكدلي انه حمار
, يا حمار انا مصدقك والله , انت مش محتاج كل شويه تثبت حموريتك و توثقها في الشهر
العقاري , طب أحلف لك على ايه إني مصدقك و إني مش محتاج حتى أشوف المهنه في البطاقه
؟!
و عشان أثبت لك
كمان هقولك أهو , قطر حلوه و جامده فحت و الإخوان كيوت و بتوع موسيقى كلاسيك و تركيا
هتنفخ روسيا و السودان و اثيوبيا هيدمرو مصر بصباع رجليهم الصغير و برلمان الخرفان
و السلفيين كان تحفه فنيه لا تخطر حتى على مخيلة بيكاسو , هه مبسوط مني يا حمار ؟!
.
....................................................................................................................................
Mohamed
Hussein
23
نوفمبر 2015·
الشهيد اللي مات
في سينا النهارده , النقيب عمرو وهيب , مات عشان احنا نعرف نقف في طابور انتخابات و
نكمّل أخر استحقاق ديموقراطي في خارطة الطريق .
مصر دي لها درع
و سيف , مش هيسمحولنا أبدا إننا نبقى لاجئين في خيام في بلاد العرب و لا مرميين على
قضبان السكه الحديد في بلاد الخواجات .
.
ألف مبروك لمصر
اكتمال خارطة الطريق , و مبروك عليك الجنه يا شهيد .
......................................................................................................................................
Mohamed
Hussein
23
نوفمبر 2015·
اضحك من قلبك مع
المشاهير و ( النخبجيه )
.
1- فيريرا قال
لمرتضى منصور قبل مايهرب ( أنا بقالي 3 شهور مش باخد مرتبي ) , قام مرتضى رد و قاله
: اسكت ياللي بتشرب خمره !! .
أهو مرتضى منصور
ده بقى رئيس واحد من اكبر أندية أفريقيا بالانتخابات و الديموقراطيه , و ده نموذج حي
لإن الديموقراطيه أحيانا بتجيب ناس كويسين و أحيانا بتجيب ( جاز ) , و الله يا مورتا
أنا ماعرف ان فيه خواجه بيبقى مدمن عرقسوس !!.
.
2- توفيق عكاشه
نزل في الانتخابات البرلمانيه بعد ثورة يناير و جاب 170 صوت تقريبا , يوميها قال إن
فيه مؤامره كونيه ضده و تهديد من عصابة الولاويلة الحمره , و طبعا حياة الدرديري شهدت
عالكلام ده و قالت له حصل و على يدي , كان الدكتور توفيق قاعد هنا و رئيس عصابة الولاويله
الحمره قاعد هنا .
و توفيق عكاشه
نزل الإنتخابات دي و شكله هيسقط برضه فقام قال ان وزارة الداخليه مستقصداه ( هي و وزارة
الري تقريبا ) , و أخر كلام لتيفه إنه انضرب عليه 16 طلقه امبارح و صاروخين باتريوت
, بس هو قام عامل دراعه كداهو , قامت الصواريخ و الكام رصاصه جم في العضله و عدّت على
خير , أهو انا مش بقلق غير عالعضله دي .
.
3- وائل قنديل
بعد ثورة يناير ربنا فتح عليه و هرب و سافر لندن وبقى يكتب في جريده مملوكه لحكومة
قطر ( بنت الوس** ) و يقبض باليورو , طبعا كل كتاباته هري و هرتله و شتيمه في مصر وعامل
نفسه مناضل و كده , أهو وائل قنديل ده تحديدا لما بشوف صورته و الله و الله بفتكر الخياطه
اللي كانت في فيلم هاني رمزي , اللي سافرت بعقد عمل بره و بتقبض بالدولار عشان هتخيط
ب( مكنتها ) , أكيد وائل قنديل هو كمان بيخيط بمكنته .
.....................................................................................................................................
Mohamed
Hussein
23
نوفمبر 2015·
السودان , أثيوبيا
, داعش , كولجيه , إخوان , و مممممم و الأخ شعبان
.
- عمر البشير كل
يوم تلات يطلع يقول : حلايب و شلاتين سودانيه و هنرجعهم للسودان حتى ولو بالقوه , بالمناسبه
عمر البشير تخلى عن نص السودان في غدوه سمك , و ممكن يستغنى عن دارفور بكوباية عصير
قصب عادي .
و عن قوة السودان
العسكريه , فاكر موقفين , الأول أيام محاولة اغتيال مبارك و لما السودان هددت بشن عدوان
على مصر و مبارك يوميها قال : السودان عندها طيارتين و 3 دبابات !! .
و التاني لما الطياره
الصهيونيه ضربت مصنع كيماويات في السودان من كام شهر و طلع وزير الدفاع السوداني قال
الرادار بتاعنا ماشافشي الطياره الاسرائيليه عشان الطيار كان طافي النور !! ...أظن
مفيش كلام تاني يتقال .
.
- و أثيوبيا طلع
منها تصريح إن مصر ماتقدرش على شن هجوم عسكري علينا , بصو حكاية سد النهضه دي قديمه
أوي و بدايتها كانت من عشره عشرين سنه مع توغل صهيوني في أثيوبيا و غياب تام للدور
المصري ( كان مبارك أياميها مشغول مع ننوس عين أمه الوريث ) , كل المفاوضات اللي بتتم
دلوأتي هي مجرد ( هري ) لكسب الوقت , السيسي عارف كده كويس , أما فتحة الصدر بتاعة
أثيوبيا دي فملهاش أي علاقه بامكاياتهم العسكريه ( أعتقد أثيوبيا مش أحسن حالا من السودان
) , إنما مسنودين على تحالف صهيوني أمريكي , و الغرض من بناء السد هو محاوله لخنق مصر
, يعني كداهو , هنعمل ايه بقى ؟ ولا حاجه , هنصبر و نقف على رجلينا و بعدها هنتصرف
, ثقو في كده , اننا هنعرف نتصرف , خلو وزير الري يروح و ييجي و يكتب ورق و تقارير
, الدوله لها حل تاني خالص لسد النهضه بس في وقته , مش هنفتح جبهات دلوأتي .
.
الكولجيه و الإخوان
و داعش وائل قنديل و أبو الفتوح و محمد عطيه و ريري سيلان و خالد أبو النجا , كلهم
على بعض كده بيحاولو يرمو حتة حديده صغيره في الترس اللي بيلف , عارفين انهم عيار مش
هيصيب لكن هيدوش , برضه لهم وقتهم و هنجيبهم من شعرهم ( بقميص النوم ) .
.
أما بقى الأخ شعبان
ف ده مواطن مصري عنده أكاونت عالفيس بوك و بقاله كام يون يا ضنايا عمّال ينزل صور لألاف
الشباب في التحرير و يقول الصوره دي من ساعتين , و التحرير الأن , و أخبار عن سقوط
ضحايا و كده , طبعا الصور قديمه من سنين بس الراجل مصمم بقى , و الله انت صعبان عليا
يا شعبان , طب مش كفايه ان اسمك شعبان ؟ و النبي يا خوانا لو حد يعرف شعبان ده يسلم
لي عليه و يبوسه و يحطه جنب الحيطه في أي حته ناشفه .
.
الخلاصه , اللي
بيتأمرو علينا كتير أوي بس انا لا خايف ولا قلقان , مسنود على جيش عظيم و رئيس مخلص
لبلده و تاريخ مابيكدبش , ...... و مصرُ باقيةٌ و الشمسُ و القمرُ .
....................................................................................................................................
Mohamed
Hussein
22
نوفمبر 2015·
و على سبيل الفرحه
و التفاؤل
.
صفحتي دي هي مجرد
صفحه شخصيه صغيره مش بيدج ولا جروب , يعني أوضة و صاله و مطبخ مترين في مترين و منشر
غسيل صغير أوي , حاجه كده زي شقق الحكومه بتاعة اسكان الشباب , ده طبعا لو قارناها
بصفحه زي بتاعة 6 ابريل اللي فيها اكتر من مليون مشترك أو رصد اللي فيها 8 ملايين
, الصفحات اللي ليها تمويل بالملايين و لها متحدثين رسميين في اكتر من دوله و أدامن
يا طولهم يا عرضهم و ترويج و تستيف و خرابيط .
.
و مع ذلك , التفاعل
على كتيرمن البوستات عندي باللايك و التعليق و الشير بقى أكتر من صفحة 6 ابريل و شبكة
رصد , الكلام ده على اد ما بيفرحني بس له معنى كده و دلاله يفهمه أي عيل صغير في ابتدائي
, المعنى إنهم اتكشفو و اتعرّو قدام الناس , وحالهم بقى يصعب عالكافر , الصفحات دي
زمان لما كان أدمن بيدخل يعطس في بوست كان بيلاقي 100 ألف واحد يقولو له ( يرحمكم الله
يا بطل ) في أول نص ساعه .
.
و بما أن الشئ
بالشئ يُذكر , لو رصد و 6 ابريل يقدرو بحالتهم دي يغيرو نظام الحكم في مجلس محلي أبو
كبير ( مش مصر ) يبقى أنا بالتأكيد من حقي أحكم قارة أفريقيا !! , و بناء عليه لازم
أوجّه الشباب أنا كمان ,يعني هي جت عليا أنا ؟
.
المهمه الأولى
: بصراحه مش عاجبني رئيس تنزانيا , شيلوه يا ولاد , و هاتولنا واحد تاني يكون أسمراني
!!
.......................................................................................................................................
Mohamed
Hussein
22
نوفمبر 2015·
برلمان 2015
.
الإقبال على التصويت
في الجوله التانيه من الإنتخابات البرلمانيه أعلى بكتير من الجوله الأولى , توقعاتي
إن المنوفيه كالعاده هتقلب الموازين , المنايفه بيشيلو مصر في أي استحقاق ديموقراطي
, يتهيألي العيل أول ما يتولد عندهم بيغطسو صباعه في الحبر الفسفوري .
.
عندنا في مدينة
نصر من ضمن المرشحات مزه حلوه اسمها ( د / سوزان فوزي ) , صورها ماليه الشوارع , رمز
الكتاب , شعار حملتها ( بالعلم هنبني مصر ) , أنا بقول كده برضه والله , القراءه للجميع
, أه وعهد الله , يارب تنجحي يا سوزان و تبقى عضوه في البرلمان , ولّا احنا يعني هيبقى
مكتوب علينا نصطبح بخلقة مصطفى بكري و الإبتسامه اللزجه بتاعة نادر بكار ؟! .
....................................................................................................................................
Mohamed
Hussein
21
نوفمبر 2015·
وجدتها وجدتها
, الحمد لله , الحمد لله , أصلي كنت هزعل أوي لو مالقيتش ( الحته ) دي , بحب اسمعها
, بحبها اوي و كنت خايف تروح عليا نومه و ماسمعهاش .
.
من كام شهر كده
كان ليا صديق عبقري ( بس من إياهم ) , صديقي العبقري اللي من اياهم نشر على صفحته تقرير
ان فيه تسريب مايه في نقطه معينه في قناة السويس الجديده ( الكلام ده كان قبل افتتاح
القناه بشهور ) و طبعا عمّت على صفحته الأفراح و الليالي الملاح , قبل مادخل انا بقى
واضرب كرسي في الكلوب , و الرد المنطقي و البسيط جدا باختصار إن مشروع اتكلف 60 مليار
جنيه و شغال فيه شركات عالميه عملاقه بالتأكيد يعني عندهم جوز مهندسين يعرفو يحلو مشكلة
تسريب المايه دي !! .
.
اللي وجدتها بقى
النهارده هي ( حته ) مماثله لصديق عبقري تاني , من اياهم برضه , ماهما تقريبا بيتعلفو
من نفس ( الطوّاله ) , وقال صديقنا العبقري إن مشكلة المفاعل النووي بتاع الضبعه هي
دي : هنوّدي النفايات النوويه فين ؟ هنتصرف فيها ازاي ؟! .
.
أه يا مولانا
, دراسه اتعملت في عشرات السنين و مفاوضات استمرت شهور , و روسيا و شركة روس أتوم و
الحكومه المصريه و قصه سبقنا فيها عشرين تلاتين دوله , و علماء رايحين جايين , و تكلفه
أكتر من 100 مليار جنيه , وبدايه التشغيل بعد كذا سنه من دلوأتي , و عملنا حسابنا في
تصميم المفاعل و تشغيله و احتياطات الأمان بس تصدق نسينا هنعمل ايه في النفايات النوويه
؟!! انا مش عارف مصر و روسيا كانو هيعملو ايه من غير ملاحظتك الفكيكه دي ؟ انت حبيبي
و الله , ابقى تعالى بقى مابتجيش ليه , مش تبقى تيجي ؟!.
.................................................................................................................................
Mohamed
Hussein
21
نوفمبر 2015·
و قالت الصناديق
لبرشلونه نعم , نعمين تلاته , أربع خمس نعمات .
................................................................................................................................
Mohamed
Hussein
21
نوفمبر 2015·
علاقتنا بقت وحشه
أوي بروسيا , أوي أوي يا جدع , سوباد يا مان , و الدليل توقيع اتفاق الضبعه النووي
و عمل منطقيه صناعيه روسيه شرق بورسعيد , و روسيا كمان قررت تفتح لها قنصليه في الغردقه
!! .
.
أنا خايف علاقتنا
بروسيا تسوء أكتر من كده و نصحى من النوم الصبح نلاقي بوتين منزّل صورة الأهرامات و
أبو الهول على الروبل الروسي .
.........................................................................................................................
Mohamed
Hussein
20
نوفمبر 2015·
ساعتين بالظبط
وانا بلفّ للمار بنتي على وجبة الأطفال بتاعة كنتاكي , روحت الفرع اللي في السراج مول
لقيتهم قفلوه , روحت الفرع بتاع شارع النادي الأهلي و الدنيا زحمه جدا و استنيت دوري
ييجي ساعه عشان أخد الوجبه دي .
فشلت كل محاولاتي
في اقناع لمار إن مفيش أي جدوى للواحد عشان يستنى حتة فراخ بيضا متجمده و كلها هرمونات
بتترمي في الزيت !! , يعني لا فيها فايده ولا ليها طعم .
.
خايف لما البت
تكبر تبقى كولجيه , و تقعد أيام و أسابيع تستنى تويتة البرادعي ( عم كنتاكي بتاع السياسه
) !! .
........................................................................................................................................
Mohamed
Hussein
20
نوفمبر 2015·
عنتيل حزب النور
في اسماعيليه
.
الحقيقه يعني و
ماتزعلوش مني , مفهومنا عن الحريه صفر , الديموقراطيه بالنسبالنا لوغاريتمات , بنخلط
الحياه الشخصيه بالحياه العامه و نضربهم في الخلاط يقوم يطلع لنا مسخ غريب اسمه ( مفهومنا
عن الحياه ) .
.
حزب النور بالنسبالي
هو حزب مرفوض تماما , بكيانه كده , لوكشه واحده , مش عشان فيه عنتيل ولا اتنين , حياة
الناس الشخصيه لا تعنيني في ممارسة حقي الديموقراطي , بتاع ستات بقى ولا بيشرب بانجو
دي مش مشكلتي , قافل بابه على نفسه و هو شاذ جنسيا أو بياكل المانجه و يزروط الدنيا
و يوسخ هدومه مش مهم , رفضي لحزب النور سببه باختصار هو رفضي لعقليتهم الوثنيه المتحجره
, رفضي للفكر الوهابي و القصص الهلاميه بتاعة محمد حسان , رفضي للتجاره بدين ربنا
, رفضي لإهانة المرأه و تشويه عقول الشباب , رفضي للإمعان في تكفير الغير و تفريخ جيل
جديد من الإرهابيين , او خلق ارهابيين تحت الطلب !! .
.
في الإنتخابات
البرلمانيه الحاليه و اللي جايه و اللي بعدها و أي انتخابات هتحصل هتلاقي مرشحين كتير
( نماذج من الشعب ) , منهم الكويس و السئ , اللي فاهم يعني ايه عضو برلمان , و اللي
مش فاهم حاجه خالص , اللي داخل عشان عايز يشارك في الحياه السياسيه بقوه و اللي داخل
عشان الحصانه و الكارنيه و الهيبه , منهم المحترم و الفاسد , اللي بيجري على اكل عيشه
و اللي بيسرق قوت الشعب , اللي حياته الشخصيه ناصعة البياض و اللي حياته الشخصيه معجنه
, اللي بيشرب حشيش و اللي بيشرب عرق سوس , و يوم ما نعرف نرّتب ( و نفنّط ) النماذج
اللي فوق دي بترتيب صح واحنا بنختار هنبقى عرفنا ألف باء ديموقراطيه .
....................................................................................................................................