Mohamed
Hussein
25
يناير 2018·
شوف يا حبيبي
, من الأخر كده و بمناسبة 25 يناير
.
المعجنه اللي حصلت
في مصر بعد 25 يناير و لمدة سنتين تقريبا , مش هتحصل تاني , ده قولا واحدا , احنا أصلا
ربنا نجّانا منها بأعجوبه أو بمعجزه , و فكرة انك تلاقي عدد من الفقهاء الدستوريين
عالشاشات اكتر من عدد عربيات الدره المشوي , و فكره ان كل اتنين شباب نامو في الميدان
كام ليله يتصلو ببعض و يعملو تشكيل حكومي ( و يجيبو البت مروه اللهلوبه تنظم المسائل
) , و فكرة إن الأوطان بتتحكم من على قهوه من قهاوي وسط البلد , و فكرة ان مصر تبقى
مشاع و مرتع لأنصاف المفكرين و أشباه السياسيين ( كأنها جُرْن الهبله ) , الحكايه دي
بح , سميها زي ماتسميها بقى , سميها فاشيه او سمّيها ديكتاتوريه , ياكشي تسميها نيرمين
.
.
المجتمع المدني
جربناه سنتين , و مش عاجبني والله ولا عاجب أمه ولا عاجب حد أبدا , ماحنا معندناش مثلا
قانون إسمه ( مكافحة المرقعه السياسيه ) و إلا كنا حبسنا البرادعي و عصام حجي و خالد
علي و كل واحد يتعمد انه يحرج بلده بأي شكل و مايعرفش الفرق بين الشخص المسئول و بين
المواطن العادي .
.
المجتمع المدني
جربناه لما كانو بيقفو بالشموع قدام السفاره الفرنسيه و ييجو عند بلدهم و يفتكسو ,
ده مش ارهاب , لا ده ارهاب بس احنا فاشلين , ماهو أصل ده عنف متبادل و المفروض نعمل
لهم مراجعات فكريه ,لحد ما فكريه نفسها لطمت على وشها
.
طيب حاضر لما يظهر
لنا جيل جديد يعرف الألف من كوز الدره سياسيا و يعرف الفرق بين المعارضه و الخيانه
( والمرقعه ) , و لما نلاقي ناس بيعرفو يلعبو سياسه و بيحطو لنفسهم خطوط حمره واضحه
زي إسم مصر و جيشها و تاريخها و هويتها و كيانها و أمنها القومي ( زي مابيعمل أي مواطن
في أي دوله في العالم ) , و لما نلاقي سياسيين مش ماركة ( خُلقنا لننسحب ) , و لما
نلاقي مؤسسات مجتمع مدني بتعمل لصالح البلد ( مش بتسترزق ولا بتقلب عيشها ) نبقى نقول
عندنا مجتمع مدني و نعوّل عليه .
.
و حتى ذلك حين
, و لحد اللحظه دي لازم تعرف إن مستقبل الأوطان مابيتسابشي للظروف , أصله مش دور كوتشينه
والله , لا مصر ولا امركيا ولا فرنسا و لا أي دوله كبيره مستقبلها بيتحط في إيد شوية
عيال و يتعمل عليه حوار مجتمعي بطريقة حادي بادي ( انا اعرف ان الفرخه يتعمل عليها
شوربه , لكن دوله و مستقبلها و امنها القومي و قراراتها السياديه يتعمل عليهم حوار
مجتمعي ؟! ماخدنهاش دي ) .
.
يعني يا حبيبي
, باختصار, الدوله سايبالك الفيس بوك و تويتر , اعمل فيهم ما بدالك , هاشتاجات و شألباظات
و اعمل استفتاء رئاسي و هات كيم كارديشان أو ياسمين الخطيب , و اتشألب في ازازتين بيره
, على كيف كيفك , بس ماتحلمش بأكتر من كده طول مانت ماشي في السكه بتاعتك , أقولك حاجه
؟ انت ممكن من باب التغيير تجيب موس و تشرّح راسك عشان ماتنفعشي طبله ولا طار , و ممكن
كمان تعتبر الحركه دي أليه جديده للإعتراض , اه و عهد الله .
..............................................................................................................
Mohamed
Hussein
25
يناير 2018·
الناس اللي من
امبارح قاعده تتريأ على خالد علي و اللي عمله , والله مانتو فاهمين حاجه , ولا عارفين
الناس دي بتفكر ازاي و هتكسب إيه .
.
بكره خالد علي
لما ييجي يكتب ال c.v بتاعه هيقول فيه إنه محامي
و ناشط سياسي و ناشط حقوقي و مرشح سابق لرئاسة الجمهوريه في 2014 ( حصل على المركز
السابع تقريبا ) , و مرشح محتمل غير مكتمل الأوراق منسحب مدني في 2018 و أحسن واحد
في مصر تتسرق منه التوكيلات و يتعرض لمضايقات .
.
و خالد البلشي
هيكتب في ال c.v بتاعه , كاتب صحفي و ناشط سياسي
و حقوقي ( برضه ) و مدرس فرنساوي و كهربائي سيلسيون متخصص في الإنسحاب التكتيكي , و
خبير في إقامة المؤتمرات و الندوات و أعياد الميلاد و حفلات الطهور .
.
شوف بقى لما يكون
السي في بتاعك دسم بالشكل ده ؟ هتتخطف خطف طبعا من أي اتحاد ملاك لعماره في مصر الجديده
, الناس هناك بيحفو و يدوخو السبع دوخات على بال مايلاقو بواب فيه المواصفات دي .
...............................................................................................................
Mohamed
Hussein
24
يناير 2018·
بصو بقى , أنا
كمواطن زملكاوي صميم , نشأت و كبرت و ترعرعت في جمهورية الزمالك البيضا أم خطين حمر
, شايف إن مستوانا السنادي زباله , لا مش زباله , ده أزبل من الزباله بشويه , قعدت
أفكر و أفكر , ثم جلست أفكر و أفكر ثم رجعت أفكر و أفكر , كل ده و انا بشوف ماتشنا
مع المصري , طب الحل ايه ؟ نعمل ايه ؟ والنبي لو جبنا جوارديولا و اشترينا محمد صلاح
من ليفربول ماهنفلح برضه .
.
و في النهايه مالقيتش
غير حل واحد , هو اننا ننسحب من الدوري , أه يا عم ننسحب قبل مانقلع ملط , طبعا مش
هنقول اننا بننسحب عشان مستوانا زباله و بقينا ملطشة لكل الفرق , لا طبعا , احنا نجيب
الأستاذ خالد البلشي و نعمل مؤتمر صحفي للإنسحاب و نقول فيه إن الدوله الفاشيه و المناخ
الغير ديموقراطي هما السبب , أو نقول اننا انسحبنا اعتراضا على التحقيق مع سامي عنان
, ولو مانفعشي الحكايتين دول نقول اننا بننسحب من أجل الحفاظ على مكتسبات ثورة يناير
, أه و عهد الله .
...........................................................................................................
Mohamed
Hussein
24
يناير 2018·
يا سلام عليك يا
واد يا محمد , دماغك ألماظات والله , أنا هقوم أبوس نفسي بوستين و أخد نفسي حضن مطارات
, من أول ما أعلن خالد علي ترشحه وانا توقعت انه هينسحب و مش هيكمل للاخر , يابني العيال
دي انا حافظها و هارسها و عاجنها و خابزها , أولهم زي أخرهم , شعارين و بؤين و هاشتاجين
و يقلّبو عيشهم في قرشين و بعدين ينسحبو قبل الفضيحه , قبل مايقلعو ملط .
........................................................................................................
Mohamed
Hussein
24
يناير 2018·
ياريس علمونا في
البلد زمان إن ( المليان بيكب عالفاضي ) , و المايه مابتفوتشي على عطشان , فلو سمحت
يعني لو سمحت , كراتين التوكيلات اللي داخله طالعه دي نبعت منها خمس ست كراتين لابننا
خالد علي , اهو ابننا ولازم نشجعه .
.
طب هنروح بعيد
ليه , وانا في الجيش كان معايا عسكري بلاعبه ضومنه بالليل ( دومينو ) , و عشان محسوبك
حريف ضومنه قراري , كنت كل مره بغلبه بفضيحه , لدرجة ان الواد بطّل يلاعبني , طب اعمل
ايه انا ؟ هلاعب نفسي ؟ فكرت في فكره , و بقيت أقوله تعالي يابني لاعبني و خد لك
100 نقطه و الفوره من 101 , أه و عهد الله , ماهو ابننا برضه و كان لازم نشجعه .
.
استنى ياريس جت
لي فكره تانيه بمناسبة موضوع الضومنه , والله فكره حلوه , احنا بعد مانبعت لخالد علي
كراتين التوكيلات عشان يكمل العدد بتاعه , و عشان مايطلعش النهارده يعلن انسحابه من
الانتخابات الرئاسيه , نعمل ايه بقى ؟ نقوله انزل يا عم الانتخابات و معاك 14 مليون
صوت انتخابي هنحسبهم لك من قبل مايبدأ التصويت , أربعتاشر مليون و 995 الف يا سيدي
ولا تزعل , و الفوره من 15 مليون .
..........................................................................................................
Mohamed
Hussein
23
يناير 2018·
الحدوته من الجلده
للجلده .............بص يا مولانا
- سامي عنان شخص
مختفي تماما من المشهد السياسي و الإعلامي من سنين ( لدرجة ان ناس كتير كانت فاكراه
مات ) , و هو على بعضه شخص مكروه , يعني لو كان كمل للنهايه كان من رابع المستحيلات
تكون له أي فرصه في الفوز أو حتى يدخل جولة اعاده , أخره كان شوية أصوات الخرفان و
شوية من الشمامين مش كلهم , و القصه على بعضها ماتزيدش عن 10 % في أحسن حالاتها , أي
حد هيقول غير كده ملوش غير الجزمه لأن المراره نفسها مش مستحمله .
.
- عبد الفتاح السيسي
ناجح ناجح و ملوش منافس , دي الحقيقه , المنافس مش بيظهر في يوم و ليله ( روحو اتعلمو
يعني ايه سياسه و ممارسه ديموقراطيه الاول ) , مش هتجيب واحد من السرير أو من الفريزر
أو يكون ميت اكلينيكا من سنين و تنزله قبل الانتخابات بشهرين و تقول ده جبار و هينافس
, بطل مرقعه يا حبيبي .
.
- عبد الفتاح السيسي
مابتفرقش معاه ينجح ب 97 % ولا ب 57 % , و عهد الله مابتفرق معاه , هو مش في ثانويه
عامه , ولو كان حريص على شعبيه جارفه و نسبه كبيره و مجموع يدخله طب عين شمس مكانشي
في السنين اللي فاتت أخد قرارات قاسيه جدا زي قرارات التعويم و رفع الدعم و هيكلة الإقتصاد
و ترسيم الحدود .
.
- سامي عنان ارتكب
مخالفات و تزوير , ده اسمه القانون , بس بالنسبالي انا فيه حاجه اهم من القانون , حاجه
تخليني أقبل باستبعاده حتى لو مكانشي ارتكب أي مخالفات , و استبعاده مش عشان هو منافس
للسيسي زي ما قولنا , لا والله المرحوم مكانشي هيبقى منافس .
.
- بالنسبالي مفهوم
و كيان الدوله فوق رقبه القانون نفسه , يعني ايه ؟ يعني مشكلة سامي عنان مكانتش هتكون
وقت الانتخابات , انما في الشهرين اللي احنا فيهم دول , يعني ايه برضه ؟ يعني يا سيدي
في يومين بس مش شهرين , كانت حملة سامي عنان بتروج للتالي , الإخوان مش تنظيم إرهابي
إنما ضد الدوله , المخابرات المصريه قتلت الظابط المصري فلان , هنتعامل مع بديع و مرسي
و نحاول نرفع الظلم !! .
.
كده شكرا , يعني
ثاتك يو , ده في يومين بس , في بقية الشهرين كان ممكن الهرتله توصل لفين و لأي مستوى
؟.
هو انا عايز أقولك
ايه ؟ بص يا حبيبي تاني , انت قدام اختيار من اتنين مفيش غيرهم , إما انك مؤمن بمفهوم
الدوله و الكيان و الجيش و إن الدوله دي في حالة حرب حقيقيه مع تنظيم ارهابي خاين من
سنين و ان الجيش بتاع الدوله دي قدم ألاف الشهداء و الجرحى بسببهم , و إن الشهداء دول
بني أدمين والله زينا مش مخلوقات بلاستيك , و بالتالي ترفض تماما و نهائيا وجود أي
شخص يحاول تشويه الجيش أو عودة التنظيم الإرهابي ده حتى لو عودته في صورة ناخبين
!! .
.
أو انك شايف ان
الجماعه دي فصيل وطني و كيوت و مفيش ارهاب و جنودنا ماتو في حادثه موتوسيكل , في الحاله
دي من حقك تجيب سامي عنان و تجيب الإخوان و تجيب الديموقراطيه الأمريكاني ( و ماتنساش
تجيب معاهم خيمة اللاجئين اللي هنتهاك فيها ) , و تسرّح جيش مصر و تسيب الجنود و الظباط
يرجعو بيوتهم بقى , هيحاربو مين ؟ وليه يموتو ؟ يحاربو الإرهاب ؟ هو احنا عندنا إرهاب
يا جحش ؟ ده فصيل وطني , هو بس ضد الدوله شويه إنما هيبقى كويس , احنا هنحلفهم على
مصحف و نقرا الفاتحه و هيبقو كويسين .
........................................................................................................
Mohamed
Hussein
23
يناير 2018·
أستاذ خالد أستاذ
خالد
- نعم يا حبيبي
.
مصيبه كبيره والله
- خير فيه ايه
؟
.
حضرتك احنا مفحوتين
في الشوارع بقالنا اسبوعين و لسه مش عارفين نكمل ال 25 ألف توكيل , مع اننا عملنا مينشنات
و هاشتاجات وشألباظات و سمينا الحكاية دي ( معركة جمع التوكيلات ) .
- لا مش فاهم
, تقصد ايه ؟
.
يا مولانا لسه
ماكملناش التوكيلات بتاعة نص محافظات مصر , هنعمل ايه بقى ؟
- بسيطه , نقول
الأجهزه القمعيه و الدوله الفاشيه بتحاربنا و مش بتسمح لأنصاري انهم يعملو توكيلات
.
.
بس أنصار سيادتك
السبعتاشر نفر راحو عملو توكيلات عادي , لا حد حاربهم ولا حد طرطش عليهم مايه , و منزلين
صورهم عالفيس و هما متصورين في قلب الشهر العقاري ذات نفسه .
- طب نقول ان التوكيلات
بتاعتنا بتتسرق .
.
يا حاج توكيلات
ايه اللي تتسرق ؟ حكاية سرقة التوكيلات دي زي سرقة الستات بالظبط , موضه بطلت من سنين
, هو فيه حد بيسرق ستات الأيام دي ؟ .
- طب نقول احنا
محسودين و مربوطين و معمول لنا عمل على ديل سحليه يتيمه .
.
عمل ايه و شمهورش
ايه بس ؟ سيب الكلام ده لمرتضى منصور .
- طب استنى استنى
, تاهت و لقيناها .
.
خير , لقيت حل
؟
- أه , سامي عنان
اتقبض عليه عشان مخالفات إداريه و تزوير , دي فرصه حلوه نهرب فيها في الزحمه و الزيطه
من غير ماحد ياخد باله , نهرب بقى قبل ما نتفضح .
.
طب و لما نهرب
نقول ايه ؟
- نقول المناخ
العام و المناخ الديموقراطي و التضاريس و الشبوره المائيه و انعدام الرؤيه و حشائش
السافانا و ثقب الأوزون بيمنعو مسيرتنا الانتخابيه و نشعر أن أقدامنا تغوص في بحر من
الرمال المتحركه وبركة من الوحل التي تجذبنا جذبا ناحية الإخلال بمبادئ و قيم و أليات
و أبجديات و استحقاقات المرحله مما يؤدي إلى الإنبعاج رويدا رويدا في غسق الدجى .
.
مممممممم انا مش
فاهم حاجه يا أستاذ
- ولا انا و عهد
الله , بس نبقى نقول البؤين دول و احنا بنهرب من سلم الخدامين .
..................................................................................................................
Mohamed
Hussein
23
يناير 2018·
و كما قال الشاعر
الهندي القديم ( قطمه أحسن من نحته )
.
بعد بيان القياده
العامه للقوات المسلحه , نشد كرسي بقى و نقعد و نحط في بطننا شادر بطيخ صيفي , البلد
دي يابني لها درع و سيف ,و جيش على قلب رجل واحد , مش هتتساب تاني للصدفه ولا للخونه
, ولا أي حد أيا مايكون يقدر يعمل وقيعه بين الشعب المصري و الجيش المصري , احنا شعب
طلع له جيش أو بمعنى أصح جيش و طلع له شعب , بص من الأخر , احنا توأم سيامي ملتصق من
ألاف السنين , و اللي شبكنا يخلصنا , هاتو بقى الدفاتر من أول مينا و تحتمس عشان نعرف
مين بالظبط اللي شبكنا ببعض الشبكه دي .
.
سامي عنان ارتكب
مخالفات اداريه حمقاء هيتحقق معاه بسببها , ده غير حكاية محاولة الوقيعه بين الشعب
و الجيش ( الحكايه دي حقل ألغام , ممنوع الاقتراب منها , و كان اقترابه منها هو قمة
الحماقه ) , سامي عنان مايختلفش كتير عن الخرفان , مايعرفوش أماكن حقول الألغام في
مصر , الخرفان حاولو يلعبو في هوية مصر و شعبها وطعمها و تاريخها ( حقل ألغام ) قامت
الشوارع و الحواري ابتلعتهم , و سامي عنان حاول يلعب في علاقة الجيش بالشعب , نفس الحدوته
و نفس الحماقه .
.
عزيزي سامي عنان
, لا الأمريكان نفعوك ولا الخرفان , و أديك حرقت نفسك بنفسك , انت مش بس اتحرقت , دانت
اتحمّصت يا مولانا , و عايز أقولك حاجه أخيره , يلا الله يكون في عونك معلش ( بصوت
دلال عبد العزيز ) .
.............................................................................................................
Mohamed
Hussein
22
يناير 2018·
لأي حد لسه شاكك
في الموضوع , عايز أقوله
.
بص يا مولانا
, سيبك من شمامين الكوله لانهم بيمشو و يشتغلو بطريقه عشوائيه , ماتعرفشي فيها مين
الكبير و مين الصغير و مين الأستاذ و مين التلميذ و مين القيادي و مين التابع و مين
الراكب و مين المركوب .
.
ركز في خرفان الجماعه
الإرهابيه , لأنهم العكس تماما , بيشتغلو بطريقه قطيع كامل في اتجاه معين , محدش بيتصرف
من دماغه , التعليمات بتروح للكل و في نفس التوقيت , فلما تلاقي ابن القرضاوي و يوسف
ندا و قناة الخنزيره و صفحات الخرفان بدأت الترويج بشكل تدريجي لسامي عنان اعرف انك
قدام تعليمات من قيادة الجماعه الارهابيه و من مرشدهم الحقيقي ( اللي ممكن يكون رئيسة
وزراء بريطانيا على فكره ) , لا حضرتك بديع و مرسي و الشاطر هما مجرد خرفان في القطيع
.
.
و لما تشوف و تتأكد
بعنيك يبقى لازم تبصم بالعشره , سامي عنان هو مرشح الأمريكان و حلف الشيطان و الجماعه
الإرهابيه , قولا واحدا .
.
تقولي بقى سامي
عنان كده يبقى حرق نفسه أو حرق مناخيره , دي مش قصتي , كرسي الرئاسه يزغلل عين أي حد
, ده صحيح , بس لما يكون بطريقه شرعيه و وطنيه , إنما سامي عنان طمع في الكرسي عن طريق
الأمريكان و الجماعه الإرهابيه القتله اللي بيحاولو من سنين يحرقو مصر و يخربوها ,
يبقى شخص خاين , وبس كده , من غير تنظير ولا فزلكه .
.................................................................................................................
Mohamed
Hussein
22
يناير 2018·
حتى لا يطير الدخان
.
ليه عبد الفتاح
السيسي ؟ و ليه اختيار أوحد بالنسبالي ؟ أنا لا شغال في وظيفه حكوميه ولا أنا سياسي
عندي منصب ولا عايز أبقى سياسي ولا عايز منصب , ولا طمعان في مصلحه من السيسي ولا السيسي
أصلا عنده اي مصلحه ممكن تفيدني شخصيا .
.
- من كام شهر لما
سألوه عن علاقتنا بأمريكا , قال إن أبجديات العلاقه السابقه غير ملزمه لنا !! , قالها
السيسي بكل أدب و هدوء , الترجمه مش محتاجه واحد خبير لأن الكلام مش هيروغليفي , الترجمه
إن أول مره من أيام عبد الناصر نرجع نعامل أمريكا بندّيه , صح فيه مصالح مشتركه حريصين
عليها ومعندناش فكرة الصدام , و صح احنا مش بقوة أمريكا , لكن بنتعامل بنديه , نديه
مش موجوده في سياسات مصر من سنين طويله و نديه مش موجوده على الاطلاق في أي دوله في
منطقتنا العربيه .
.
- اللي يفتكر من
حضراتكو بعد 30 يونيو , و زربحة أوباما و هيلاري كلينتون , أوباما كان ناقص يطلع عالهوا
و هو لابس تي شيرت رابعه , و بعدها لمّ الخرفان الهربانين عنده و فتح لهم الكونجرس
و مبنى الخارجيه .
.
- طيب ده كويس
, لما جبت سيرة سامي عنان , و رأيي مجرد رأي او افتراض , إنما كان قصدي انه راجل أمريكا
أو كلبها , سميها زي ماتسميها , الحكايه دي مش بتخضني أوي , هقولك ليه ؟ يابني السياسه
الدوليه مفهاش أخلاقيات , مفهاش ethics
, أمريكا الدوله العظمى يلزمها في كل خرابه عفريت , و بتبقى مجهزه عفريت و اتنين بدايل
للعفريت الأصلي , ده مش في مصر بقى , أمريكا بتعمل كده في كل الدول المؤثره الإقليميه
و العالميه , وبيتعمل فيها كده احيانا , هتلاقي روسيا تدخلت بشكل ما في الانتخابات
الأمريكيه , و هتلاقي أمريكا في يوم من الأيام جابت رئيس اسمه جورباتشوف , كان مجرد
عميل لها , و وصلته لمنصب رئيس الاتحاد السوفيتي ( اللي قدر طبعا بمجهود فردي يجيب
دُورف الإتحاد السوفيتي و يفككه ) .
.
- المهم ان لعبة
التداخلات السياسيه دي ممكن أتفهمها , باعتبار اننا عايشين في كوكب بائس وارد فيه كل
حاجه , يعني مشكلتي مع سامي عنان مش انه علاقته قويه جدا بالأمريكان حتى بعد ماساب
منصبه , إنما مشكلتي في اللي وراه ؟ هييجي لوحده بإيده فاضيه ولا هيجيب الجماعه الإرهابيه
معاه ؟ لا هيجيبهم معاه لأنه مستحيل هييجي غير بيهم أصلا , و بالتالي سامي عنان مش
مجرد واحد عميل لأمريكا و علاقته حلوه بيهم و لو وصل لكرسي الرئاسه هيرجّع مصر تحت
عباية أمريكا تاني و يضمن لها شوية استقرار ( كتير من رؤساء دول العالم وصلو للرئاسه
بالشكل ده ) , ياريتها على قد كده , إنما لأ , عنان هييجي بالجماعه الإرهابيه معاه
و أول حاجه ممكن تحصل هي انقسام في الجيش المصري , أي حاجه بعد كده تبقى سهله جدا
, و مصر حاليا تبقى شبيهه بالإتحاد السوفيتي و تتقسم , باختصار : سامي عنان هو جورباتشوف
مصر .
.
طب ليه برضه أمريكا
و محور الشر مش طايقين عبد الفتاح السيسي للدرجادي , لدرجة انهم يرمو تقريبا أخر كارت
عندهم ؟ عشان باختصار اللي عملته مصر في ال 4 سنين اللي فاتو , بنية تحتيه و حل مشاكل
ضخمه زي الكهربا و العشوائيات والطرق و الأهم إعادة تسليح الجيش المصري , حاجات ماتعملتش
في خمسين سنه , اللي عمل كده في أصعب سنين مرت على مصر يبقى ممكن يعمل ايه في ال 4
سنين الجايين, اللي مستحيل هيكونو أصعب من اللي فات ؟ هتبني بلدك تماما و توقفها على
رجليها و تبقى الضربه اللي ضربنهالك ماموتتكش والضربه اللي مابتموتش بتقوّي , هتروح
فين بقى يا مولانا في منطقة الشرق الأوسط اللي فيها اسرائيل و مطلوب فيها دايما انك
ماتكبرش بشكل زياده عن اللزوم , اقتصاديا و سياسيا و عسكريا ؟ .
..................................................................................................................
Mohamed
Hussein
21
يناير 2018·
لوعايزين نفهم
.
خبر حلو أوي ,
محكمة مانهاتن تبرئ السعوديه من اعتداءات 11 سبتمبر
.
ايه الحدوته دي
؟ بص يا سيدي
- من فتره كده
الكونجرس الأمريكي أقر قانون اسمه قانون جاستا jasta
وده اختصار ل ( justice against sponsors of terrorism act) يعني العداله في مواجهة رعاة النشاط الإرهابي
, القانون ده الغرض منه توجيه الإتهام للسعوديه بضلوعها في أحداث 11 سبتمبر , حلو كده
؟ طيب جميل
.
- و بناء على القانون
اللي أقره الكونجرس الأمريكي بدأ المتضررين من 11 سبتمبر يرفعو دعاوي قضائيه للمطالبه
بتعويضات من السعوديه أو حتى فرض قيود و حظر عليها , ده شئ جميل خالص اخر حماده .
.
- بعدها نزل الرئيس
الأمريكي ترامب للسعوديه و غرف له بتاع نص تريليون دولار ( 500 مليار دولار ) , و رجع
أمريكا تاني .
.
- النهارده المحكمه
الامريكيه قالت والله يا جماعة الخير الأدله اللي انتو جايبينها لتورط السعوديه مش
أدله قويه , ولو عندكو أدله قويه ابقو هاتوها بس بعدين !! .
...........................
طب نفهم ايه من
المعجنه دي ؟ بص يا مولانا , قانون جاستا ده قانون للوي دراع السعوديه ( و حلبها )
, أقره الكونجرس ( المنتخب بالصناديق , أه الزناديق ) , وبعد كده جه ترامب ( المنتخب
بالزناديق برضه ) لم شوية فلوس حلوين على حس قانون لوي الدراع , بعد كده جت المحكمه
( القضاء النزيه الشفاف أكتر من اللانجريهات الأيطالي وقال الأدله مش كافيه ) .
.
يعني ايه الكلام
ده ؟ يعني يا محترم , البرلمان بيكون جهه رقابيه وتشريعيه في الدوله إذا كان الأمر
داخلي ( داخل الدوله نفسها ) أما لما يكون الموضوع خارجي و يخص دوله تانيه هنا بيتحول
البرلمان لمؤسسه من مؤسسات الدوله زيه زي الحكومه , بيتبادلو الأدوار و بيكمّلو بعض
.
.
و يعني برضه يا
محترم , القضاء المفترض يكون عادل و نزيه لو كان الأمر بيتعلق بقضيه داخليه , واحد
امريكاني قتل واحد امريكاني , ست أمريكانيه سرقت كوز دره , راجل أمريكاني اسمه على
بوند بيسرق الغسيل , أما لما يكون الامر بيتعلق بدوله خارجيه و فيه مصلحه وسبوبه للدوله
الامريكيه ؟ هنا بيكون القضاء الأمريكي مؤسسه من مؤسسات الدوله زيه زي البرلمان و الحكومه
.
.
اللي عايز أقوله
لحضرتك ايه بقى ؟ فكرة فصل السلطات في المطلق هي فكره بلح , لا تليق بعقل عيل في كي
جي 1 سياسه .
- الدوله الأمريكيه
بتمارس بلطجتها بكل الأشكال وبكل مؤسساتها , و طالما الموضوع فيه خير لأمريكا و زكايب
فلوس يبقى ليه لأ ؟ .
- المواطن الأمريكي
ممكن يكون فاهم الحكايه دي ويسميها ( براجماتيه ) , مقبوله منه , مع إنه لو بني أدم
مش هيسميها كده , انما انا كمواطن مصري و عربي و شرق أوسطي ماينفعش أقول براجماتيه
( زي مالحمير بيقولو ) , إنما دي اسمها بلطجه ( سمّي الأشياء بمسمياتها و ماتخليش حد
يلاعبك بالمصطلحات ) .
- طب فين بقى نزاهة
القضاء الأمريكي وشفافيه البرلمان الأمريكي و الضمير الأمريكي و أخلاق أمريكا ؟ ممممممممممم
طب قرّب ودنك كده , هوشوشك بالراحه خالص , يلعن #$%@# أهلك , اه و عهد الله .
..............................................................................................................................
Mohamed
Hussein
20
يناير 2018·
بص يا حبيبي
.
أنا لا بنجّم ولا
بقرا الفنجان ولا أوشوش الودع , و كمان مابعرفش أبلع حكاية بص العصفوره بالسذاجه اللي
بشوفها , و الأهم إني عندي جوز عيون و عقل صغير كده على قدي , إنما ماشي حاله .
.
في الانتخابات
الرئاسيه اللي جايه , شوفنا اتنين مرشحين قصاد السيسي , محمد انور السادات و خالد علي
, الإتنين على بعض كده بسلطاتهم بباباغنوجهم أولهم و أخرهم خمسه سته % , مافهومشي مرشح
ممكن يهز شعره من شعر عبد الفتاح السيسي ( واحد منهم سمّى حكاية جمع التوكيلات بمعركة
جمع التوكيلات !! مع العلم إن أي ناخب من حقه يعمل توكيل , و بالتالي 25 ألف توكيل
تعني 25 ألف صوت انتخابي , تخيل معاليك اللي بيسمّي جمع 25 ألف صوت انتخابي معركة ممكن
يكون تأثيره ايه على شعبية السيسي ؟ ) .
.
حلو كده ؟ طيب
تمام , تعالى بقى ناخد سامي عنان المرشح الجديد ده على جنب و نتكلم بهدوء
- سامي عنان تم
استبعاده من المشهد العسكري تماما من كام سنه , حتى الإحتفالات بتاعة الجيش اللي بيحضرها
القاده الحاليين و السابقين ممنوع سامي عنان من حضورها , و ده معناه انه وراه مصيبه
و كارثه , طبعا في عرف و عقيدة الجيش المصري ( و كل الجيوش الكبرى ) أن قادة الجيش
بتفضل أسرارهم ضمن خزينة أسرار الدوله و يعيش و يموت و محدش يعرفها ( الحكايه مش جرن
الهبله ) .
.
- سامي عنان باختصار
تم استقطابه في وقت من الأوقات و بأي طريقه كانت إنه يكون مجرد كلب لأمريكا ( و ده
مش عيب في المؤسسه العسكريه ولا في الجيش المصري , ده مجرد فرد تم استقطابه و بعدها
الجيش ككيان قام بتحييده باحترافيه و من غير شوشره ) .
.
سامي عنان نزل
الإنتخابات لأن أمريكا قررت انها ترمي الكارت الأخير بتاعها بعد مافشلت كل محاولاتها
السابقه , طب دي محتاجه شرح شويه .
.
- بص يا سيدي في
2014 كانت الفكره انه محدش ينزل ولا يترشح قدام السيسي , حتى نزول حمدين صباحي كان
خارج الفكره الأمريكيه ( حمدين فيه كل العبر بس مش كلب أمريكا ) , المهم تم الترويج
انه كومبارس و مسرحيه هزليه , و عوّلت أمريكا و ( والإخوان ) بعدها على امكانية اسقاط
السيسي بثوره أو مظاهرات و هاشتاجات و شألباظات و قنوات تتفتح و تشويه ( هتلاحظ حضرتك
ان الدعوات للتظاهر كانت كل شهرين تقريبا ) .
.
- فشلت الحكايه
دي كمان و الدوله المصريه مشيت في سكتها و طريقها زي ماهي عايزه , و أصبحت امكانية
اسقاط السيسي بغير الصناديق مستحيله , وبالتالي مبقاش فيه غير الكارت الأخير , سامي
عنان , اللي أمريكا و الإخوان هيوفرو له كل الدعم , في محاوله بائسه أخيره .
.
ده رأيي , و قناعتي
, ماهو مش معقول عشان أحارب فارين أجيب تور يهد في حيطان المعبد بالكامل ( شوف أول
تويتات للمتحدث باسم عنان هتلاقيه بيضرب في عقيدة الجيش المصري و بيتهم المخابرات المصريه
بقتل ظباط مصريين !! ) .
.
احنا باختصار قدام
معركة مصير , مش قصة عبد الفتاح السيسي , لا والله خالص , احنا قدام سكة السلامه و
سكة اللي يروح مايرجعش , وانا شخصيا مش جوايا أي خوف , على الإطلاق , يابني اللي عملناه
من 2013 ل 2018 مستحيل هييجي أصعب منه , يا جبل مايهزك ريح , و اللي شرب البحر يشرب
البحيره .
.................................................................................................................
Mohamed
Hussein
20
يناير 2018·
أيها الشعب السيد
في الوطن السيد ( سيد يا سيد )
نعم يا أستاذ ؟
عايز ايه في ليلتك دي ( بصوت سعيد صالح ) ؟
.
إنني و من منطلق
حرصي على أأأ
- يا عم خلصنا
, قول عايز ايه
.
عايز اترشح للرئاسه
عشان انتشلكو من الأوضاع الهباب و أجيب لكو ساندوتشات حلاوه بالقشطه .
- و ماله يا حاج
, الدستور بيديك الحق تترشح و بيدينا الحق نحلم بساندوتشات الحلاوه بالقشطه , هتجيب
مين معاك ؟
.
هجيب هشام جنينه
نائب للرئيس لشئون الشفافيه
- استنى استنى
, فاكره انا هشام جنينه ده , رئيس الجهاز المركزي للمحاسبات السابق
.
أيوه هو بعينه
- مش ده اللي جهز
تقرير الفساد و بدل ما يسلمه للجهات السياديه و الرقابيه كمفهوم و أبجديات أي دوله
في العالم , قام طالع يتكلم عن تقريره في الجرايد و القنوات ( كأنه بيشتغل في جرن الهبله
) و ساب الناس تفهم من تقريره ان فيه شخروميت مليار دولار مسروقين أول امبارح والدوله
مش عارفه تجيبهم , مش إن تقريره بيتكلم عن مخالفات اداريه من سبعين سنه و قضايا مرفوعه
و خلافه .
.
أيوه ايه يعني
لما يعمل كده ؟
- أه فهمتك فهمتك
, بس انت عندك غلطه يا سيد المعلمين
.
غلطة ايه ؟
- كده يبقى هشام
جنينه مش نائب رئيس لشئون الشفافيه .
.
أومال لشئون ايه
؟
- لشئون شم الكوله
يا حاج .
.
يعني ايه مش فاهم
؟
- يعني مش ناقصك
في الفريق الرئاسي غير أيمن نور يعمل مؤتمر عالهوا عشان يحل مشكلة سد النهصه ( يبقى
نائب الرئيس لشئون الأمن القومي و الأمن الغذائي و أمن و سلامة المواطنين ) و ممدوح
حمزه ( لشئون الأندروير ) و حازم عبد العظيم لشئون ( بيراقبوني من شطافة الحمام يا
سعادة البيه ) والواد سواق التوكتوك الشهير ( لشئون الأصلاح الاقتصادي و المعيشي و
حقوق الإنسان و تصليح الراديوهات )
................................................................................................................
Mohamed
Hussein
19
يناير 2018·
في اليوم التالت
لمؤتمر حكاية وطن ........... شهادة حق
.
شوف يا سيدي المشهد
كده و اقعد و اتفرج .
.
- سامح شكري ده
حدوته لوحده , التاريخ هيقول و يكتب عن راجل عظيم اسمه سامح شكري , أسد الخارجيه المصريه
في توقيت في منتهى الصعوبه و الحرج .
.
- عبد الفتاح السيسي
بيقول , عملنا حاجه جديده و هي إننا نمارس السياسه بأخلاق و قيم و مبادئ مصريه , و
دي كانت معادله صعبه جدا قدرنا نحققها , لا والله ياريس دي مكانتش معادلة صعبه , دي
كانت معادله مستحيله , خصوصا في التوقيت ده .
.
- على عبد العال
, الراجل ده أول مره أسمعه بتركيز , يبدو ان حالة التشويه له كانت متعمده , الراجل
كلامه مرتب جدا , واعي , مثقف , بيتكلم بمنتهى الحريه و الجرأه , مش بيهلفط ولا بيعجن
, يعني شهاده حق يستحق أن يكون رئيس لأول برلمان مصري بعد ثورة 30 يونيو العظيمه .
.
- طب سيبك من كل
اللي فوق ده , و ركز تاني , شوف الناس اللي قاعدين , ركز كويس , أتحدى لو واحد مثلا
من فنزويلا مايعرفش شكل رئيس مصر , و قلت له بص عالشاشه و قولي مين في دول رئيس مصر
؟! مستحيل هيعرف .
.
- هي الحكايه ايه
؟ الحكايه ان عبد الفتاح السيسي أرسى برضه حاجه جديده , فكرة العمل الجماعي , التيم
ورك , انا فرد من مجموعه , أنا مش الإله ولا الإمبراطور , أنا مسنود بالناس دي مش هما
اللي مسنودين بيا
مممممممم الله
يرحم أيام ماكان ( الأمبراطور ) بيقعد عالكرسي الإمبراطوري و نواب البرلمان أقصى أمانيهم
انهم يسلمو عليه و يبوسو إيده ( الشريفه ) .
.............................................................................................................
Mohamed
Hussein
19
يناير 2018·
يوميات شاب ثائر
.............. فين المشاريع بتاعة السيسي ؟ .
.
صحي الشاب الثائر
الكيوت من نومه و بعد ما دعك عينيه بتاع 7 مرات قام من عالسرير و حاول يولّع النور
عشان يشوف قدامه , كانت المفاجأه انه لقى النور بيولع عادي خالص زي كل يوم في أخر سنتين
تلاته ( الله يرحم أيام الشمعه و الكشافات و مواتير الكهربا ) .
.
لبس الشاب هدومه
و قرر انه ينزل يزور واحد صاحبه في المنصوره , و في الطريق دخل أول بنزينه و لقى فيها
بنزين زي كل البنزينات اخر سنتين تلاته ( الله يرحم ايام طوابير العربيات على محطات
البنزين اللي ممكن تقعد جنبها ليله بحالها ) .
.
بدأ الشاب يتحرك
بعربيته بعد ما موّنها في نص دقيقه , و قال هيطلع من مدينة نصر للمنصوره , مشي الشاب
في طريق الحي العاشر و قرر انه يطلع الدايري , لقى كوبري جديد , تحفه معماريه , و مفيش
الصينيه اللي كانت بتركنه عالدايري نص ساعه و أحيانا ساعه .
.
طلع الشاب عالكوبري
ده و مسك الدايري في 7 ثواني , و مشي عالدايري تلت ساعه لقى لوحة جديده لانج بتقوله
طريق شبرا بنها الحر , قال ايه الحكايه دي ؟ طب نجرب , و خرج فعلا من المخرج بتاع طريق
شبرا بنها , لقى حاجه وهم كده , طريق زراعي حر مفيش جنبه قريه ولا مدينة ولا عطله ولا
مطبات , أول طريق زراعي حر يتعمل في مصر , مشي الشاب في الطريق اللي معمول 4 حارات
في كل اتجاه , و قطع مسافة 40 كيلو لحد بنها في تلت ساعه , مش في ساعه زي ماكان بيحصل
في الطريق القديم .
.
وصل الشاب بنها
و منها لكفر شكر و هووب لقى كوبري قدامه في ميت غمر, ايه ده انا مش هقف هنا في ميت
غمر ساعه ولا حاجه لحد مالناس تعدي الطريق و العربيات و التكاتك و الموتوسكلات ؟ لا
دانت هتطلع الكوبري ده في اول ميت غمر و تنزل تلاقي نفسك عدّيت ميت غمر , يعني قصة
النص ساعه بتاعة زمان بقت 3 دقايق .
.
و كمل الشاب الثائر
الكيوت لحد اجا , و هناك لقى كوبري جديد برضه بيقوله لو سمحت ماتقفش في مدخل اجا ولا
دقيقه واحده , طب اعمل ايه ؟ اطلع الكوبري ده و انزل هتلاقي المنصوره قدامك , طب و
أجا ؟ مانت عدّيتها يابني خلاص .
.
وصل الشاب للمنصوره
ولقى التحفه المعماريه الأهم و المشروع الأضخم خارج نطاق القاهره الكبرى , كوبري سندوب
, حاجه كده تحسسك انك في أوروبا او في دبي مش في المنصوره , كوبري على كذا ارتفاع و
كذا اتجاه , بيربط 4 محافظات ببعض , يعني مش هقف في الحته المكعبله دي و استنى القطر
يعدّي و الميكروباصات اللي قافله الطريق لحد ماتحمل ؟, لا حضرتك مش هتقف ولا دقيقه
.
.
وصل الشاب لحد
بيت صاحبه لقاه قاعد مع أبوه , سأل أبو صاحبه عن كيس العلاج الكبير اللي كان دايما
بيلاقيه جنبه في كل زياره , العلاجات اللي كان بياخدها للكبد , قام الراجل ابتسم وقاله
كيس علاج ايه بقى ؟ مانا اتعالجت من فيروس سي وخلاص .
.
وبعد ما اتغدى
الشاب الثائر الكيوت في بيت صاحبه قام مطلع التابلت بتاعه و فتح صفحته عالفيس بوك و
كتب , فين بقى أم المشاريع اللي عملها السيسي ؟
.........................................................................................
