Mohamed
Hussein
21
يناير 2016·
كنت واحد من أشد
المؤيدين والداعمين و المؤمنين بثورة 25 يناير , كنت واحد من اللي تفائلو جدا بتكوين
احزاب زي الدستور و التيار الشعبي , كنت واحد من اللي كان نفسهم الأحزاب دي تنزل الشارع
بقى و تلم الشباب حواليها و تلعب سياسه وتعافر و لما ييجي يوم 25 يناير نحتفل كلنا
و نشيل علم مصر و نعمل كارنافال .
.
اللي حصل إن قيادات
الأحزاب دي و قيادات الثوره و رموزها اتحولو بعد 25 يناير لنوعين , إما خاين بيبيع
بلده عشان خاطر وظيفه في جريده او برنامج في تلفزيون أو كام الف دولار , و إما مُفلس
خايب كسلان مالقاش حاجه يبيعها للشباب فقرر انه يبيع لهم شعارات و وهم , و كلا النوعين
لقى الشاب اللي يشتري الخيانه و الشاب اللي يشتري الوهم .
.
لما نوصل لمرحلة
معارضه أقل وصف لها هو ( الهطل السياسي ) و شباب يبقى عايش في غيبوبه , و تبقى ذكرى
يناير تيجي علينا كل سنه بحرق و قتل و تخريب و دعوات للتظاهر تحت أي افتكاسه , يبقى
عايزيني أحب ايه في 25 يناير ؟ احبها ازاي يعني ؟ و دي تتحب منين يا مولانا ؟
............................................................................................................................
Mohamed
Hussein
21
يناير 2016·
قتلي و جرحى في
انفجار في شارع الهرم , بعد ساعات من حادث سينا الإرهابي اللي راح ضحيته 8 أفراد ,
يعني الإرهاب لا مخلي عسكري ولا مدني , و كله طبعا بمناسبة اقتراب مولد سيدي 25 يناير
!! .
.
كولجيه يهرتلو
, دعوات حتى للحرق و التخريب تحت مسمى حرية الرأي ة التعبير (و حق الشهدا ) , و خرفان
يعلنوها صراحة و يبدأو التنفيذ , و تشتيت تام للاجهزه الأمنيه بين تأمين حدود و تأمين
الداخل , و مطلوب مننا نلوم الحكومه و نتهمها بالتقصير الأمني !! ياخي يلعن #$%^ أهلك
, يعني انت ليل و نهار تدعم في الإرهابيين و تخليهم يركبوك و تحاول تصوّرهم على إنهم
أصحاب قضيه , و الإرهابيين يقتلو و يحرقو و في الأخر ألوم الأجهزه الأمنيه اللي مفحوته
في الشارع و بتقدم الضحايا ؟!! , يعني أشجع المحرّض و أسأّف للقاتل و اعمله تمثال و
أجلد الضحيه و القتيل ؟ طب اشتمك تاني بإيه ؟.
........................................................................................................................
Mohamed
Hussein
21
يناير 2016·
قبل ذكرى يناير
.
و عندك عدد 8 شهداء
من الشرطه , فيهم ظابط كان فرحه بعد كام يوم , عريس يعني و اتزف للسما , طب ليه كده
؟ و ليه الحرب على الإرهاب مطوّله رغم السيطره الأمنيه الكامله على سينا , و الإرهابيين
دول بييجو منين و إمتى ؟ أسئله ماينفعشي يسألها عيل في تالته ابتدائي , بس حيث إننا
عندنا كولجيه بدرجة دكتور جامعه و مهندس يبقى ممكن تتسأل عادي !! .
.
الزمان و التوقيت
: .... قبل ذكرى يناير و مع شوية نطح من الخرفان بره مصر و شوية هري من الكوجيه جوّاها
, و ربهم الأعلى اللي اسمه 25 يناير , النخبه المزيفه , الدكاتره و المهندسين اللي
بدعي ربنا انهم يخلّصو تالته ابتدائي بقى و يعرفو يفكو الخط , منطقي جدا ان الأجهزه
الأمنيه تنشغل حاليا بتأمين منشأت و بخطة عمل هتاخد كل تركيزها في الكام يوم اللي جايين
, من باب الإحتياط عالأقل , و هيبقى وقت مناسب جدا لنشاط الإرهابيين , شعارات حضرتك
و فهمك و ادراكك ان الليله و الحدوته و القصه اسمها ميدان التحرير و تبقى شايف الدنيا
من خرم إبره يبقى بالتأكيد وصف شمام كوله بينطبق عليك .
.
المكان : ....
اسمه مصر , هبسطهالك , لو عندك بيت , فيلا مثلا , و عاليمين بيت و عالشمال بيت , و
كل واحد من اصحاب البيوت دي مهتم بجنينة بيته و مأمنها كويس و لو فيها حشرات أو فيران
هيرشها اكيد , في الحاله دي المجهود اللي هتبذله حضرتك في تأمين و تنضيف الجنينه بتاعة
فيلتك أد ايه ؟ طب لو عندك نفس الفيلا و جنب منك عاليمين خرابه و عالشمال خرابه ؟ يعني
مكان ممكن يلم ارهابيين و فيران و تعابين , هيبقى مطلوب منك مجهود أد ايه ؟ و ده اللي
حاصل , قطاع غزه بتحكمه عصابه مش حكومه , و ليبيا راحة في الوبا اللي اسمه ( الربيع
العربي ) , شرق ليبيا اللي هو حدودك الغربيه خارج سيطرة الدوله , يبقى السلاح هيجيلك
من الغرب و الإرهابيين من الشمال الشرقي , و مطلوب منك مجهود ألف ضعف لمجهودك العادي
.
.
الخلاصه , الحرب
على الإرهاب عايزه نفس طويل واحنا نفسنا طويل , قدمنا شهدا و لسه هنقدم , احنا مش بنحارب
حرامية غسيل , و أخيرا قبل مانسى , أهل سينا قول عنهم زي ماتقول , و اشجيني بأم شعارات
الطيبه و الكرم و الوطنيه , و خليني محتفظ برأيي لنفسي , أصل شعاراتك العبيطه مش أغلى
من دم العريس اللي مات .
.................................................................................................................................
Mohamed
Hussein
20
يناير 2016·
أه في السياسه
الدوليه بتبقى عارف مثلا إن تركيا و قطر هما مجرد فارين بيطلقهم الخواجه الأمريكاني
الصهيوني في الغيط بتاع الوطن العربي عشان يخربو الزرعه , و ساعتها عداوتك بتبقى مع
الفارين مش مع الخواجه , ليه مش مع الخواجه ؟ عشان الخواجه الأمريكاني هو السوبرباور
الوحيده في العالم , و لما العالم بيبقى فيه سوبرباور واحده يبقى مفهوش توازن و ساعتها
الخواجه بيتحول لبلطجي بكل أريحيه , مش من الحكمه انك تروح تنطح فيه , بالعكس دانت
هتبقى مش طايق سحنة أهله و عارف انه العقل المدبر لكل المصايب و لازم تبتسم بقى و انت
بتقابله و تشيد بالعلاقات الثنائيه بين الدولتين .
.
اللي حصل في ال
5 سنين اللي فاتو و بعيد عن التفاصيل العبيطه , اللي حصل هو مخطط الخواجه البلطجي لحرق
الوطن العربي زي ما خططو من عشرين تلاتين سنه , بما في ذلك موضوع سد النهضه و انشاء
قناة الخنزيره والربيع العربي و افتكاسة امتلاك صدام لأسلحة دمار شامل و مصطلحات الفساد
و الديكتاتوريه و الديموقراطيه , كلهم على بعض اسمهم ( أدوات اللعبه ) , و ممكن تفكر
ايه اللي هيحصل في المستقبل و بناء عليه تعرف ايه اللي حصل في الماضي , اه أحيانا الحدوته
بتتفهم أكتر لما تبدأ بالصفحه الأخيره .
.
عندك يا سيدي
5 دول كان عليهم العين , 3 منهم خربو بدرجة كافيه جدا , درجة ترضي غرور الخواجه البلطجي
و فيرانه , هما سوريا و ليبيا و اليمن , لك أن تتخيل مثلا إن دولة زي سوريا من 4 سنين
فاتو كانت في وضع اجتماعي و اقتصادي و عسكري شكله ايه ؟ , و عشان ترجع لنفس الوضع ده
محتاجه مش أقل من 50 سنه , عارف يعني ايه نص قرن تعيش فيهم اسرائيل في نعيم ؟ بجانب
طبعا المزايا الإقتصاديه اللي هتعود عالبلطجي و فيرانه من نهب خيرات سوريا .
.
الدولتين اللي
فلتو الى حد كبير من المخطط هما مصر و تونس , و الخواجه مش هييأس و هيحاول بكل الطرق
حتى لو اضطر للعوده و تكرار ماحدث في ديسمبر 2010 و يناير 2011 , الحدوته مالهاش علاقه
لا بفاشيه ولا ديموقراطيه ولا ملوخيه , الحدوته اسمها حرق الغيطان و الزرعه , بس احنا
جاهزين يا مولانا الخواجه , الراجل الفلاح الطيب اللي كان أعمى فتّح خلاص و بقى ليه
ناب و خربوش .
....................................................................................................................................
Mohamed
Hussein
20
يناير 2016·
الرئيس الصيني
يزور البرلمان المصري غدا , و وفد في استقباله برئاسة دكتور على عبد العال
.
بكره الصبح ( مشهد
في البرلمان )
.
الرئيس الصيني
( مبتسم ) : شي جين بينج
.
توفيق عكاشه :
شينج بينج مين يا وله , ماتتكلم عدل يا وله , انا توفيق عكاشه مفجر ثورة يونيو و ثورة
عرابي , اوعي ياوله تكون من اللي بيلفو عالبيوت يبيعو كشافات و ولاعات و موبايلات مضروبه
؟ .
.
مرتضى منصور :
بلا شينج بلا بينج , انا عارفك على فكره , محمود طاهر هو اللي باعتك , بس و رحمة أمي
ماهسيبك لانت ولا محمود طاهر .
.
مصطفى بكري ( منحني
بزاوية 30 درحة ) : يا فندم ( شي ) من سعادتك أوامر و ( جين ) معاليك دفعه للامام
, و ( بينج ) بنت جناب سيادتك هنشيلها في عنينا و نبقى خدامين تراب رجليها .
.
الرئيس الصيني
( منفعل ) : مممممممممم يا ولاد الصرمه أنا بعرفكو بنفسي , بقولكو اسمي , يالله يا
بت يا ( لي ) نشوف مصالحنا , احنا ايه اللي جابنا هنا , الله يعين السيسي عالأشكال
دي .
.................................................................................................................................
Mohamed
Hussein
19
يناير 2016·
الدوله اللي ترعى
الإرهابيين اللي هربانين من مصر و تأكلهم و تعلفهم و تموّلهم و تصرف عليهم و تفتح لهم
جرايد و قنوات عشان يتهجمو على مصر و جيشها , الدوله اللي رئيس حكومتها مابيخليش أي
مناسبه إلا و يرفع فيها شعار رابعه بتاع الخرفان , الدوله اللي بتدعم الإرهاب و إيديها
ملطخه بدماء جنود مصر الشرفاء , الدوله دي ماينفعشي التصالح معاها , لا بوساطه السعوديه
ولا غيرها .
.
أه صح السياسات
الخارجيه للدول مفهاش قطيعه بنسبة 100 % و مفهاش قطيعه للأبد و مفهاش حب و كره , بس
ده مايمنعش إن نظام أردوغان عليه فاتوره كبيره أوي لمصر و سوريا و العراق ولازم يدفعها
الأول , حرق الأوطان و تخريبها و نهبها عمره ماكان ولا هيكون ( مجرد اختلاف في وجهات
النظر ) .
................................................................................................................................
Mohamed
Hussein
19
يناير 2016·
الجماعه الإرهابيه
في تركيا و ألمانيا و بريطانيا ( و بلاد الغرب الكافر ) بيخططو لمسيرات في ذكرى 25
يناير , و طبعا هياخدو تصاريح من الأجهزه الأمنيه في بلاد الكفار و الفرنجه و هيهتفو
ضد مصر و جيشها و احتمال يغنو أغنية لتحرير القدس من قلب بريطانيا اللي هي أصلا أسست
للكيان الصهيوني , و لوجود الصهاينه في بلاد العرب , أقسم بالله ولادها !! .
.
وانا أصلا مش عارف
إيه علاقة الخرفان بذكرى 25 يناير , أعتقد إنهم في اليوم ده كانو قاعدين مع مبارك و
عمر سليمان و بيتكلمو عن حتة كبيره من التورته , ولا جايز يقصدو بعد 25 ؟ بس هما بعد
25 كل اللي عملوه انهم ركبو على ضهر شوية حمير , يعني لا بتوع ثورات ولا لهم فيها أساسا
, طب على كده ممكن في مسيرتهم يعملو نموذج مجسم لخروف راكب على ضهر حمار , و على فكره
لو عملو كده الحمار مش هيزعل ولا هياخد على خاطره .
.
عموما الجماعة
الإرهابيه عامله لها برلمان صغير محندق كده في تركيا , حاجة عالأد يعني , و ممكن لو
البرلمان الخرفاني اللي في تركيا شاف مسيرات كبيره في ألمانيا و اتأثر بهتافات الشرعيه
في بريطانيا و عجبة فكر النخبه اللي في أمريكا ساعتها ياخد قرار بعزل الرئيس التنزاني
من منصبه و إيقاب العمل بدستور بوركينا فاسو .
..........................................................................................................................
Mohamed
Hussein
18
يناير 2016·
في بيتنا اللي
في البلد , ذكريات و سنين , و حاجات خدت من جتتنا راقات , و ضحك و جري و لعب و تنطيط
و شقاوه وشعبطه على فروع الشجر , و تعب و فقر و شقى لذيذ بيوصل لحد ( العظمه ) .
.
فاكر لما كان عمري
10 سنين و كنا يادوب بنينا الدور الأرضي في البيت ده , و انا مش فاهم أي حاجه في أي
حاجه , لقيت عمدان و جدران طلعت كده فجأه , و كوم تراب كبيير أوي جنب البيت , أبويا
الله يرحمه تقريبا كانت فلوسه شطبت على كده , و مش معاه فلوس عشان يجيب ( لودر ) يردم
البدروم اللي ارتفاعه مترين تقرييا , فقرر إننا نردمه بنفسنا , جبنا الحمار و الغبيط
و مقطفين و فاس و بدأنا معركه اسمها ردم البدروم في بيت مساحته اكتر من 150 متر و بارتفاع
مترين , أمسك الغبيط قصاد ابويا و هو يعبي المقطف بالفاس و يفضي في الغبيط ده و لما
الغبيط يتملي أخد الحمار و هو محمل و ادخل جوه البيت و اقلب الغبيط أفضيه وارجع تاني
, الحكايه دي اسمها دور أو نقله , طب عملنا كام دور بقى ؟ مش عارف , بس بحبسة بسيطه
ممكن نتكلم في 600 , وبحسبه ابسط لو بنعمل 30 دور في اليوم يبقى قعدنا نردم في البدروم
3 أسابيع لحد ماتردم ( مع ان اللودر كان يردمه في ساعتين تلاته ) , الحكايه بالظبط
كأنك قررت تنزح الماية اللي في بحيرة ناصر بالمعلقه .
.
و تسألني جبت الصبر
و طولة البال منين ؟ أقولك غالبا أكون لقيتهم في كوم تراب وانا صغير أو في شوية طين
على جرف الترعه , إحتمال يعني , إنما بالتأكيد مالقيتهمش في وجبة هابي ميل بتاعة الأطفال
اللي بتقدمها مطاعم ماكدونالدز .
.
اشتري مني بس
, بياع الفريسكا ده افتكاسه هو وبتوع عربية الدره المشوي , اللي عملو كده عارفين اننا
في زمن الإعلام المفتوح عالبحري و مواقع التواصل و الهاشتاجات , باختصار احنا في زمن
قصص النضال المزيفه , زمن صناعة أبطال من ورق , احنا في زمن الغباوه , مصر فيها ملايين
بيناضلو على لقمة العيش , و اللي قاعد على تويتر بيكتب تويته من كام حرف أكيد مش بيناضل
, و ممكن أكون انسان مثقف و كيوت و جوايا قلب خسايه و اقوله انت مش بتناضل ولا حاجه
و انا مش appreciate الهباب اللي بتهببه ده .
.............................................................................................................................
Mohamed
Hussein
18
يناير 2016·
إعادة ضبط المصنع
.
الساعه 5:30 ,
قومو يا عيال , يالله عشان تلحقو تلبسو و تفطرو و تروحو المدرسه , ماما التوكه بتاعتي
فين , مين اللي في الحمام , كده هنتأخر , مش عايز افطريا ماما , طب هلبس , الساعه
7:10 يووه انتي ماجهزتيش شنطتك من امبارح ليه ؟ فين علبة الألوان , مش عندك أرت النهارده
, بسرعه بقى عشان اتأخرنا , يالله يا ماما بسرعه , استنو بسخّن العربيه , تيت تيت تيت
, ماتطلع يا غبي , واقف في نص الشارع بيعمل ايه ده , 7:50 دقيقه , باي يا ولاد خلو
بالكو من نفسكو , يادوب هرجع أروق الشقه و اجهز الغدا .
.
الساعه 2:30 ,
عملتو ايه في المدرسه ؟ طيب الحمد لله , اطلعو بقى و تغيرو هدومكو على طول عشان تتغدو
, جنا اقعدي اعملي الهوم ورك بتاعك طالما اتغديتي , لا مفيش تلفزيون ولا نت , حاضر
, وانت يا يوسف البس عشان عندك برايفيت , الساعه 4:10 تيت تيت تيت , ما تطلع يا غبي
, هو انا موعوده بالأغبيا النهارده ياربي , اطلع يا يوسف و ركز مع المدرس , انت محتاج
كل درجه في الفرينش , حاضر حاضر , الساعه 6 , هه ؟ عملت ايه ؟ فهمت كويس ؟ أه يا ماما
, طيب الحمد لله , يالله عشان يادوب نلحق درس الفيزيكس , مستر حسام مابيحبش التأخير
, الساعه 8 , يوسف فهمت حاجه ؟ يعني ايه معقول ؟ ازاي معقول ؟ ليه مافهمتش كويس ؟ يوسف
انت نايم على نفسك كده ليه ؟ طب خلاص خلاص لما نوصل ابقى نام على طول .
.
الساعه 10 م :
مساء الخير يا حبيبتي , مساء النور العشا جاهز عندك عالسفره , ايه ده مش هتقعدي معايا
شويه ؟ لا و الله مانا قادره و لا عارفه افتح عنيا , بص محتاجين فلوس عشان الدروس و
مخنوقه كمان عشان يوسف مافهمشي كويس أوي في درس الفيزيكس , تصبح على خير بقى .
.
.
الحقيقه :
في مصر , في المحروسه
, حاليا يعني دلوأتي يعني now , هتلاقي العلاقه بين الزوج و الزوجه , بين الزوجه
و الزوج , بين الاتنين المتجوزين , العلاقه دي محتاجه إعادة لضبط المصنع , و أول و
أهم خطوه في إعادة ضبط المصنع هو تفوير وتفجير عملية البلطجه و التخريب و العك اللي
اسمها العمليه التعليميه في مصر , مفيش أي دوله في الكون بيتعلم فيها الطفل من 6 الصبح
ل 10 بالليل و مامته تتعك جنب منه و الأب يتفحت عشان يجيب فلوس الدروس , احنا كده بنزغط
دكر بط مش بنعلم طفل , احنا كده بندمر أسر و نقتل أطفالنا , لا الراجل عارف يشوف مراته
ولا الطفل عنده وقت عشان يلعب و يفكر و يبتكر و يعيش طفولته , إوقفو المهزله دي ياريس
...ده مشروعك القومي , اهم عندي من قناة السويس الجديده و من مشروع الضبعه و من أي
مشروع تاني .
.
مطلوب قرار حازم
و حاسم بتجريم الدروس الخصوصيه , يعني اعتبارها جريمة زي الدعاره و تجارة المخدرات
.
................................................................................................................................
Mohamed
Hussein
17
يناير 2016·
كنا حلوين و هايلين
و جامدين أوي و نعجبوك بصراحه , لا و مثقفين يا جدع و أذكيا و عباقره و عارفين كل حاجه
في كل حته , و ماتفوتناش التايهه , ولا حد يقدر يضحك علينا أبدا , و الواحد مننا كان
بمقام ألف , أه و مقام سيدي عبد الرحيم القناوي , شوفنا ارهابيين دخلو مصر و اقتحمو
السجون المحصنه بالرشاشات و قتلو ظباط و عساكر و طلّعو زمايلهم الإرهابيين من السجون
و احنا نسأّف و نهلّل و نقول هييييه , يا دين النبي , ايه الحلاوه دي , حريه حريه
.
.
ذكرياتي في يناير
.
#العائدون_من_شم_الكوله
.
.......................................................................................................................
Mohamed
Hussein
17
يناير 2016·
الحكايه
.
- الحكايه مش عاركه
في خمّاره , ولا هي شغل هبلوله الشغاله , و احنا عالفيس بوك بنعرف نكتب و نفك الخط
بس مابنعرفش نفكر ولا نبص قدامنا مترين , بنكتب و نهري بطريقة ( إوعى إيدك كده ملخت
الكُم ) , الحكاية مش فتحة صدر , و لا كلمتين فصحى مقعرين قريتهم حضرتك في كتاب و جيت
لزقتهم هنا , الحكايه أكبر من الكلمتين و فتحة الصدر و هرينا اليومي المعتاد .
.
- الحكايه يلزمها
منطق و عقل و تجميع أحداث , ماتغميش عنيك و تقول أنا شايف كويس , الحدوته بتقول شوية
أخبار , ممكن تعتبرهم مكعبات , و مطلوب من حضرتك تجمعها و ترتبها و بس , تدمير العراق
( الديموقراطيه الأمريكاني ) , إسرائيل بتكبر , مصالح اقتصاديه , السيطره على أنظمة
الحكم في الخليج , هاتو فلوسكو عندنا , الطيارات و الدبابات و الصواريخ بقت موضه قديمه
زي السوالف الطويله و البناطيل الشارلستون , استخدام الظواهر المناخيه في الحروب ,
فكره حلوه برضه بس مش كفايه , ال كام مليون بتوع اسرائيل وصلو لمرحلة معينه من الرفاهيه
و التقدم العلمي , و فكرك يعني لما نهد أقوى 3 جيوش عربيه كده نبقى حققنا الأمان للصهاينه
, لا مش كفايه , محتاجين أمان أكتر , لازم نخنق الشعوب .
.
مانت عندك مصر
مثلا , الجيش فيها عامل زي الفاكهه في الجنه , تقطع ثمره يطلع مكانها اتنين , و شعبها
أصلا جيش , لو هدّينا جيشها هيطلع منها جيش أده مرتين , من الشعب , يبقى محاولة هدمه
مش كفايه , لازم نخنق الشعب , نخنقه بإيه , أه صح , بؤ المايه , نقفل الحنفيه , أثيوبيا
دي دولة غلبانه أوي , الواد ابن الكلب اللي قاعد يتكلم عن امكانيات أثيوبيا العسكريه
, و عهد الله انت كان خساره فيك صباع الطباشير اللي اتعلمت بيه , مفيش وجة مقارنه بين
جيش مصر و جيش أثيوبيا يا بقف , أومال اثيوبيا جابت فتحة الصدر بتاعتها دي منين اذا
كنا نقدر نطربقها على دماغهم في ساعتين زمن , مانت لو عرفت الإجابه عالسؤال تبقى عرفت
الحكايه .
.
الحكايه ان تركيا
هي كمان بتفكر تعمل سدود على دجله و الفرات , تدمير الجيش العراقي مكانشي كفايه , لازم
نخنق الشعب , تركيا و أثيوبيا عرايس متحركه في ايد مخرج العرايس الأمريكي , و مصالح
اقتصاديه و تظبيط و حلف ناتو و دلع بقى , و لو ماعرفناش نخنق الشعوب اللي ممكن تكون
بتهدد أمن و رفاهية المواطن الصهيوني يبقى عالأقل هنعرف نساومهم و نلوي دراعهم بحدوتة
اسمها ( بؤ المايه ).
.
الحكايه هي ان
حضرتك هتكون مضطر لحرب حتميه في المستقبل , الموضوع لا له علاقه بتنمية أثيوبيا ولا
بتنمية تركيا , أصلا أصلا الحكومات الأثيوبيه و التركيه بيلعبو دور حمدي أحمد في فيلم
القاهره 30 .
.
يبقى احنا عالفيس
بوك مطلوب مننا ايه ؟ مطلوب مننا نسكت شويه و نبطل هري و نسيب الرجاله تشتغل و نبقى
مستعدين و بس , و لو عندنا وقت فراغ ممكن نتكلم فيه عن التاتو الفراشه و أحدث صيحة
لرسم الحواجب .
...................................................................................................................................
Mohamed
Hussein
16
يناير 2016·
اتفاق بين مصر
و سويسرا على اجراء جولة مباحثات جديده بشأن الأموال المهربه !! .
.
اللي هي أموال
مبارك و حاشيته في البنوك السويسريه , اللي هما بتاع 4 مليار جنيه , ماحنا معكوكين
في الليله دي من 4 سنين , و طبعا سويسرا مجمده الفلوس دي لكن مش هترجعها بسهوله , ليه
مش بسهوله ؟ عشان دي سمعة البنوك السويسريه اللي اقتصاد دولتها قايم بصورة كبيره على
استثمار أموال المودعين من كل مكان في العالم و خصوصا أموال الحراميه بتوع وطنا العربي
.
.
اللي هيحصل كالتالي
, احنا هنعمل جولة مباحثات و نبعت وفود و نحجز فنادق و الوفود تاكل جمبري و ستاكوزا
و بعدين ييجي وفد من سويسرا نحجز له فندق هنا و جمبري برضه و ستاكوزا , و هكذا , وفد
رايح و وفد جاي , و صنية جمبري طالعه و طبق ستاكوزا داخل , و نفضل كده بتاع 17 سنه
و نصرف لنا 30 مليار جنيه عالوفود و الزيارات عشان نعرف نرجّع ال 4 مليار جنيه , و
بعدين تيجي سويسرا في الأخر تقول سوري يا جماعه , احنا مش متأكدين إن كانت فلوس مبارك
اللي عندنا جت له من طريق مشروع ولا من طريق لا مؤاخذه , وي أر سو سوري , أه و عهد
الله سو سوري .
.
و الحل في رأيي
عشان نخلص من الليله دي و مانقعدش نعشم نفسنا , احنا نبعت تلغراف لسويسرا ب 9 جنيه
نقول لهم , هتجيبو فلوس مبارك ولا لا يا ولاد *** الكلب ؟ ولازم تحلفو لنا على مصحف
, لو قالو لا , يبقى نستعوض ربنا في الفلوس دي و نسيبهالهم , و ندعي على سويسرا في
صلاة الجمعه , إلهي يارب يا سويسرا تشتري بفلوس مبارك دوا و تصرفيهم عالدكاتره و المستشفيات
.
...................................................................................................................................
Mohamed
Hussein
16
يناير 2016·
ماهو كمان عشان
تفهم دماغ حد و تعرف بيفكر ازاي لازم تحط نفسك مكانه , لو حطيت نفسك مكان الكولجيه
مثلا هتعرف الحكايه من أولها لأخرها , عددهم بقى قليل أوي و شعارات اصلنا نخبه و أصلنا
الناس اللي فوق دي بقت ممله و سخيفه حتى بالنسبالهم , المهم ان العدد القليل ده بالمنطق
كده ماينفعشي يلعب سياسه و ينزل الشارع و إلا هيتفضح و يتعرى و يبقى كتب بإيده شهادة
وفاته , و بالتالي الخيار الوحيد المتاح قدامه هو مبدأ التظاهر , أو التظاهر بالرغبه
في التظاهر!! .
.
الحاجه التانيه
هتلاقيهم مع نقص العدد و عزوف الناس عنهم و احساسهم انهم بقو مزنوقين في ركن الحلبه
و مش عارفين يغطو وشهم هتخليهم يفكرو بجديه بس هيكونو مترددين , مترددين مابين التحالف
مع الخرفان ( تحت مبدأ رفقاء الميدان و الهيييييح ) أو رفض التحالف باعتبار إن الخرفان
ركبوهم قبل كده 19 مره ( على سهوه ) , عشان كده هتلاقي الكولجي جواه صراع داخلي في
مسألة الخرفان , يعني باختصار عامل زي اللي عايزه تتباس بس خايفه من عباس مممممممممممم
مشيها تتباس و عباس .
.......................................................................................................................
Mohamed
Hussein
16
يناير 2016·
كلمتين لوجة الله
.
- في ال 5 سنين
اللي فاتو , اللي عيشناهم بالعرض مش بالطول , كانو 5 بمقام 50 , حصل إني وقفت في صفوف
المعارضه في 3 سنين منهم , معارضه لنظام مبارك , معارضه لنظام طنطاوي , معارضه لنظام
محمد بديع اللي كان عنده سكرتير اسمه محمد مرسي .
.
- و في صفوف المعارضه
كنت زي التلميذ النجيب المجتهد , يجري و را قيادات و رموز , يقعد قدامهم و يستربع
, يفتح بؤه كده و ينبهر بكلامهم , اللهم صلي عالنبي , ايه الحلاوه دي , قول يا سيدي
قول , بتقول ايه ؟ عندنا صناديق سياديه فيها دشيليون دولار , أوباااا كده هتلعب معانا
بقى , طلّعي الفلوس اللي في الصناديق السياديه يا حكومه بنت تيت , يا نظام حرامي ,
يا حرامي .
.
- و بتقول ايه
كمان ؟ ثروة مبارك اللي سرقها تكفي سكان أفريقيا , قشطه أوي , اللهم صلي عالنبي , و
هتعرفو ترجعوها كمان ؟ أيوه بقى كده , إيه ؟ بتقولو ايه ؟ هتبعتو جوز رجاله لسويسرا
و معاهم الشكاير الفاضيه و تجيبو فلوس مبارك و تيجو و نتمردغ في النعيم , عدالة السماء
نزلت على ستاد باليرمو .
.
- و عندكو حل لسد
النهضه بس الحكومه بنت التيت مش عارفاه ؟ أنا طول عمري مبهور بعقلكو و منبهر و كلي
انبهارات , و عندكو مشاريع جباره كمان و أفكار بنت حرام تخليني أنام في مصر أصحى ألاقي
نفسي في السويد ؟ لا كده كتير , انا مش مصدق نفسي يا لمبي .
.
- و بس يا سيدي
خلصت الحدوته و صحيت من الحلم , حلم اسمه افتكاسات المعارضه , عالم تاني يا جدع واااااسع
و براح , مليان هتش و نتش و رحرحه , و كلام كده يتقال في الهواء الطلق , هو حد له عندنا
حاجه , مانقول دشيليون و نقول سويسرا و السويد , هو الكلام بفلوس ولا كان بفلوس , و
نبيع افتكاسات للناس طالما فيه المغفل اللي بيشتري , و نطلع في التلافزيون و نقول البنيه
التحتيه و الإنفراستراكشر , و احنا عايزين نظام الحكم بتاعنا يكون رئاسي , لا برلماني
, لا بقى نخليه مختلط , نص رئاسي و نص برلماني و نص لامبولي .
.
- المحصله و الخلاصه
, فجوه من هنا لحد أسوان بين حكم دوله بحجم مصر و في ظروف زي اللي احنا فيها دي و تبقى
راسك فيها ألف حاجه و ألف اعتبار وألف حتمال لكل قضيه , و بين انك تقعد في العالم المرحرح
ده اللي اسمه المعارضه و تبيع كلام و تعزف عالربابه و تغني , انت اللي هتغني يا منعم
.
.
- أصدقائي اللي
لسه قاعدين في عالم الرحرحه , وحشتوني و الله , و انتو عاملين ايه دلوأتي ؟ انا بحسدكو
على فكره , أصلك لما تكون مؤيد لنظام زي السيسي حاليا و تقعد تفكر في أي قضيه و تحط
نفسك مكان السيسي هتحس ان حاجات كتيره طابقه على نفسك , طب نكمل مفاوضات في موضوع السد
و لا نهده على دماغهم ؟ بس لو هديناه هتكون الحكايه لها عواقب , هي السودان مالها مايعه
و صايصه كده و البشير مش عارف اننا يوم مانضرب السد هتغرق الخرطوم , الحكايه فيها ان
, طب ممكن بعدها ندخل حرب , امريكا هتقف مع مين ؟ طب اقتصادنا وقتها هيكون ازاي ؟ طب
نعمل ايه في الإرهابيين اللي جوه البلد وقتها , طب خلاص نكمل مفاوضات و نضغط , يوووووه
عالم خنيق , خنيق و الله .
.
الله يكون في عونك
يا ريس .
....................................................................................................................................
Mohamed
Hussein
15
يناير 2016·
إعتراف
.
لما بشوف طفل فقير
واقف على عربية دره مشوي أو عربية موز و هدومه قديمه و جايز مقطعه بقعد أركّز معاه
و افتكر طفولتي , و لما بشوف غفير أو حارس قاعد في عماره بتتبني لسه و جايب ( قصعة
) فاضيه و حاطط فيها شوية خشب و مولع فيهم و عامل راكية نار عشان يتدفى هو و عياله
ببقى عايز أجري و اقعد جنبه عشان بفتكر أبويا الله يرحمه .
.
حكاية إنه يكون
عندي شقه و عربيه و صيدليه و بدله و كرافته و بناتي في مدارس لغات , الحكايه دي مش
داخله دماغي خالص , التوب ده مش توبي , و القاهره بأضوائها فشلت تماما في إنها تميّل
دماغي و تغويني و تشدني ناحيتها ( رغم إني عايش فيها ) .
.
و لما أجي احكي
لبناتي حدوته بالليل غصب عني بيكون أبطالها من الغلابه و الفقرا و الناس اللي بتكافح
, الولد اللي بيشتغل و يتعلم في نفس الوقت , و الراجل اللي بايت في غيطه جنب ماكنة
الري عشان بيطفي شراقي , ياخي فشلت اني أحكي لهم و لو مره عن بطل للحدوته كان بيشتغل
ناشط سياسي في الفضائيات أو بطل بيكافح على تويتر .
.
و في الحدوته بتيجي
التفاصيل , لازم هتيجي , ريحة الخبيز و الندى و الطين و الخضره و صوت العجله بتاعة
ماكنة الري و هي متعلقه في عربيه كار و ماشيه و صوت المواشي و أدان الديك وضحكة الناس
اللي مش بيغسلو سنانهم ب( سينسوداين توتال كير ) , و لا بيحطو على شعرهم فازلين , و
شط الباميه اللي كنت بجمعه كل كام يوم , وقرن الفول الأخضر و شراشيب الدره , و النومه
على حمل برسيم طري و مندّي , و كلمة العواف عليهم و صباح الخير يا صبايا , و الغربال
و المنخل و حصيرة الجبنه و القاعده عالنصبه جنب الترعه و تبوس إيد خالتك الكبيره وعمك
الكبير .
........................................................................................................................
Mohamed
Hussein
15
يناير 2016·
يوم 25 يناير الجاي
هيحصل التالي :
.
- هتلاقي 50 ألف
واحد عالفيس بوك كاتبين انهم نازلين و مكملين و راجعين و حمدين و جلاوين , و أي حاجه
أخرها ياء و نون .
.
- هتلاقي 50 واحد
في الميدان و عربية بطاطا .
.
- هتلاقي 500 ألف
بوست عن الحريه للجدعان و لفلان و علّان و كتّان و حمدان و الملاعب الترتان .
.
- هتلاقي 5 مليون
صوره على مواقع التواصل لناس بيقولو انهم في التحرير , صور من 2011 أو حتى من قبلها
, يارب ما يغلطو بس و ينزلو صور أبيض و أسود من أيام السوالف الطويله و البناطيل الشارلستون
و المشربيه و الحناطير و ممنون يا هانم .
.
- هتلاقي عنوان
الجزيره : مظاهرات حاشده في مصر قوامها 500 مليون و 17 متظاهر و نص .
.
- هتلاقي أوباما
بيعبر عن سعادة بالحشود الحاشده المحشوده اللي في ميدان التحرير و بيطالب السيسي بترك
الحكم لل 50 متظاهر المدعومين بعربية بطاطا .
.
- هتلاقي قنوات
الخرفان بتطالب السيسي انه يسمع كلام أوباما حقنا للدماء و من باب الإحتياط هيقولو
يا سيسي يا جبان يا عميل الأمريكان !! .
.
- هتلاقيني على
أخر النهار كده بكتب بوست أواسي فيه الكولجيه و الخرفان و أقول لهم : اللي خد منكو
الفيل قادر يرجعه .
.
- و أخيرا هتلاقو
السيسي بيفتتح مشروع أو مصنع و بيتصور سيلفي مع شوية شباب و بنات و عمالين يضحكو و
صديقاتي السيساويه هيكشرو عن أنيابهم و يعلنو الحرب عالبنات اللي ظهرو مع السيسي في
الصوره السيلفي .
.......................................................................................................................................
Mohamed
Hussein
15
يناير 2016·
زي النهارده
.
كان فيه راجل مصري
أسمراني و مكانشي فيه وسائل إعلام و لا سوشيال ميديا و لا برامج توك شو ولا فوتوشوب
عشان تحوله لزعيم أو تصنع منه زعيم , بس هو بقى زعيم , بقى زعيم إزاي و ليه ؟ اسأل
جدي و جدك المصري و اسأل أجدادنا في سوريا و الجزائر و اليمن و في كل مكان في الوطن
العربي , بقى زعيم يعني ايه ؟ يعني هو و عربيته و موكبه يتشالو على أعناق الناس من
غير كرباج و لا إكراه , يتشالو كده محبه و احترام , بقى زعيم لدرجة انه لما مات اتعمله
صوان في كل بيت و شارع و الناس كانت بتاخد فيه العزا كأنه واحد من أهل البيت ( ده مش
خوف يا حمار ده واحد مات هيخافو من ايه ؟ ) .
.
لما كان عمري
12 سنه تقريبا ربنا كتب لي إني أروخ أشتغل في الوسيه يوم , وسيه من بواقي أيام الملك
, وسية يعني باشا لابس بدله و عنده كام حصان و شغال معاه كام نفر اسمهم خولي و احنا
الكلافين , حاجه كده جايز ربنا حافظ عليها عشان تبقى شاهد على العصر , على عصر الملك
( اللي الجارسون كان فيه طلياني و الخدامه فرنسيه يا بقف يا شمام الكوله ) , في اليوم
ده عرفت جمال عبد الناصر عمل ايه لمصر , واحد زي حالاتي مالوش جذور شركسيه ولا جد جده
كان من البشوات فأكيد ماكنتش هبقى مع حضراتكو هنا عالفيس بوك , حضراتكو على بعض مش
هتكونو موجودين هنا , أكيد كان زمانا النهارده بنشتغل كلافين في سرايا الباشا ( بس
سيبك ده أيام الملك كان الجارسون طلياني و بتاعة البليله ألمانيه ......... من يوميات
المثقف البقف ) .
.
زي النهارده اتولد
الزعيم اللي كانت أموال مصر كلها تحت إديه , بس لما مات , مات و في جيبه 17 جنيه ,
إنما من باب الوجاهه الإجتماعيه و الثقافيه , أو بمعنى أصح من باب ( عُقدة النقص و
مبدأ خالف تُعرف ) يحلو لكل بقف و جحش إنه يهاجم الزعيم و يشوف التاريخ بعين واحده
و يقرا رأي الخرفان في جمال عبد الناصر و يصدقهم مع إنه طول النهار و الليل بيقول عليهم
خرفان !! .
.
و لما رئيس دولة
يموت من نُص قرن تقريبا و يفضل اسمه و سيرته و صورته و محبته في قلوب مئات الملايين
في العالم كأنه يادوب مات أول امبارح , يبقى الراجل ده اسمه باختصار الزعيم .
.
.
رحم الله جمال
عبد الناصر .
...............................................................................................................................