تفعل ماتريد

لا تسألي الأقدارَ
أين لقاؤنا
ومتى يعودُ النبضُ
في قلبِ الوليدْ؟
.
بيني وبينكِ
تعرفين حبيبتي
سفرٌ بعيدْ
.
لا زلتُ أحيا هاهنا
لا شيئ ياعمري
جديدْ
.
لازلتُ ..رغمَ البعدِ...
أحمي طفلنا
فدعي الأقدارَ
تفعلُ ماتريدْ !
.
محمد حسين

مصر منوره بأهلها

مسمعتش إن حد في مصر ,اللي منوره بأهلها ,علق على تصريحات مرشح الرئاسه الأمريكي بإن أوباما دعم الإخوان بمليار ونص دولار , واللي قال الكلام ده لا مؤاخذه مش رئيس مجلس محلي مدينة السنبلاوين ! , ولا سمعت إن حد في مصر اللي منوره بأهلها علق على علاقات القيادات السلفيه بأمن الدوله , قمت أنا رحت لبازار متخصص في بيع التحف والأنتيكات , وقلت لعم الحاج البازاريست ( لو سمحت عايز أباجوره فرعونيه تكون على شكل طائر النأنأ !) , قام الراجل بصلي باشمئزاز وقالي مفيش طائر اسمه طائر النأنأ , قلت له مش مشكله , هاتلي أباجوره فرعونيه على أي شكل تحبه , المهم إن مصر تبقى منوره بأهلها !.
.
محمد حسين

الخطبه والمعلقه

في مصر, خطب الرؤساء والمسئولين هي أشبه ما يكون بمعلقات العصر الجاهلي, ستامبه واحده في الترتيب والفكره , فمثلا معلقة أمرؤ القيس كغيرها من المعلقات لابد من البدء بوصف الخمر ثم الإنتقال لوصف الخيل والإبل , ثم ذهب لمدح فاطمه التي أحبها حب عذري ثم عاد لوصف الإبل ( معرفش ليه؟ ) ثم انتقل لوصف حبيبته المتجوزه اللي كانت بتخون جوزها معاه , ثم عاد لوصف الخيل وبعدها وصف لشخصيته وفروسيته وإقدامه وبسالته بمنتهى

التواضع ! , وهكذا حتى تصبح مدونته 200 بيت شعري يعني مترين بالصلاه على النبي.
.
بينما تبدأ خطب الرؤساء بالتأكيد على العلاقات الثنائيه بين البلدين ( وصف الخمر ) و التأكيد على الوحده بين المسلمين والأقباط ( وصف الإبل ) , والتأكيد على أنه خادم لهذا الشعب ( الغزل العفيف ) ثم العوده لوصف الخمر والإبل ثم الإنتقال إلى صفحة البغدده والتنطيط , إنتو كتير وبتاكلو وتخلفو ومتشتغلوش هجيب لكو منين ؟!, (ودي بتبقى صفحة الغزل الصريح والخيانه الزوجيه)!.
.
أكثر مايزعجني في خطب رؤساء الجاهليه هي الإطاله ,فتجد أن أقل خطبة تستمر ساعتين , وعلى رأي عمنا جلال عامر ( رئيس التحرير في الجرائد الحكوميه بيكتب المقاله متر وربع ذي قماشة البنطلون ) , ساعتين كتير يا ريس , مرارتي الصغيره لا تحتمل.

الولاء للجماعه

بعد تدريس أهمية الإنضمام إلى جماعه دينيه من باب الولاء في كتاب التربيه الوطنيه للصف الأول الثانوي , إنتظرو العدد الجديد من كتاب الدين في الصفحه الأولى ( بسم الله نبدأ وقد ورد في الأثر أن قيادات الإخوان المسلمين جميعهم من نسل رسول الله صلى الله عليه وسلم وأن محمد مرسي ومحمد بديع هما الصحابيان الجليلان الباقيان من صحابة رسول الله ,.........والله الموفق والمستعان ).
.
محمد حسين ............قرفااااااااااااااان جدا

العجلاتيه

رحت المحل اللي فأخر الشارع عشان أصلح عجلة بنتي , الكاوتش بتاعها مهوي بقاله أسبوع وانا كل يوم أقول لها بكره بكره , قلت مبدهاش بقى , دخلت المحل لقيت العجلاتيه ملمومين كلهم قلت كويس عشان أخد رأي أكتر من عجلاتي في موضوع الكاوتش المهوي ده ولاخاب من استشار.
واحد قالي بنتك عمرها كام سنه قلت له 6 , قالي اتخطبت ولا لسه ؟ قدامك سنتين تلاته بالكتير وتجوزها , الجواز ستره للطفل برده , قلت له حاضر ,......... وا

حد تاني قالي على فكره السيده العذراء اتجوزت وهي عمرها 10 سنين , قلت له وماله , ...................وفجأه حصلت خناقه بين الإتنين العجلاتيه الكبار في المحل , واحد فيهم بيتهم التاني إنه مصاحب البلطجي بتاع الحاره ومقضيها خمره ونسوان ويقوله يا شيخ عيب على دقنك دي , يقوم التاني يقوله مش أحسن منك ياللي بتضحك عالناس وتفهمهم إنك بتموت في تراب الحاره وانت خاين وبتجيلك الفلوس من عند الكفار , المهم شويه كده والخناقه خلصت بعد مادخل ناس شكلها غريبه مش من حارتنا وأقنعو الطرفين إن مفيش داعي للخناق لأنكو واكلين شاربين نايمين سارقين سوا .......سبت المحل وانا حالف بأيمانات المسلمين ماصلح عجلة بنتي هنا.......................... ولا أسيب العجلاتيه والنصابين والحراميه يكتبو الدستور لبلدي!!.
.
محمد حسين

أباجوره فرعوني

مسمعتش إن حد في مصر ,اللي منوره بأهلها ,علق على تصريحات مرشح الرئاسه الأمريكي بإن أوباما دعم الإخوان بمليار ونص دولار , واللي قال الكلام ده لا مؤاخذه مش رئيس مجلس محلي مدينة السنبلاوين ! , ولا سمعت إن حد في مصر اللي منوره بأهلها علق على علاقات القيادات السلفيه بأمن الدوله , قمت أنا رحت لبازار متخصص في بيع التحف والأنتيكات , وقلت لعم الحاج البازاريست ( لو سمحت عايز أباجوره فرعونيه تكون على شكل طائر النأنأ !) , قام الراجل بصلي باشمئزاز وقالي مفيش طائر اسمه طائر النأنأ , قلت له مش مشكله , هاتلي أباجوره فرعونيه على أي شكل تحبه , المهم إن مصر تبقى منوره بأهلها !.
.
محمد حسين

إحذر

إحذرْ
.
إحذر فالدمعةُ من عينيكَ
تطوفُ الخدَ وتحرقني
إحذر فرحيلكَ فوقَ الماءِ
لبعضِ الوقتِ سيغرقني
إحذر من كثرةِ أسفاركْ
أنهكتَ العمرَ بترحالكْ
إحذر فالعمرُ يفارقني
.

لجنوني فيكَ حكاياتٌ
أحكيها للزمنِ الغابرْ
وأمنى النفسَ بلقيانا
وأخبئ دمعي وأكابرْ
إحذر من كثرة أسفارك
أنهكت العمر بترحالك
والموتةُ كالسهمِ العابرْ
.
أنتظركَ في شرفةِ داري
وأحدثُ نفسي وجداري
وأعيدُ رسائلكَ الأولى
تأخذني مثلَ الإعصارِ
إحذر من كثرة أسفارك
أنهكت العمر بترحالك
إحذر من رقةِ أوتاري
.
.
محمد حسين

ياعم جلال

ياعم جلال
.
ياعم جلال أمانه عليك
تجاوبنا ...تهاودنا
منين بكره يكون أحلى ؟
ماعمر الحظ ساندنا
وطاح فيهم
كأن مصيرنا فإديهم
لا إيد الله ولا فإيدنا
.
ياعم جلال أمانه علبك
كفايه تموت
وحشنا الصوت
وضحكة طفل يا غالي
بلدنا صاحيه بتقولي
ماييجي جلال
يكلمني...يفهمني
يضحكني على حالي !.
.................................
محمد حسين
إهداء إلى روح الراحل الرائع فيلسوف الغلابه , كبير العاشقين لمصر ( اللي كان بيحبها من ورا مراته !).

طبله ب 12 مليار

أتحداك أن تعرف إسم رئيس مجلس إدارة مؤسسه الاهرام ورئيس تحريرها الحاليين أو السابقين , في عصر الرئيسين محمد حسني مبارك ومحمد مرسي العياط يتم إختيار رؤساء تحرير ورؤساء مجلس إدراه الصحف القوميه من عجينة الموظفين الحكوميين ( العرض حالجيه), وإذا عرفت اسمه بالصدفه أتحداك أن تكون قد قرأت له مقاله أو تدوينه أو طقطوقه حتى , ومن بين عشرات وربما مئات الصحفيين المبدعين لن تجد أحدهم مذكورا في قائمة السيره العط

ره لروساء التحرير.
مصر تخسر سنويا 10 مليار جنيه بسبب الجرائد الحكوميه والقنوات الحكوميه , أضف إلى ذلك 2 مليار جنيه لمجلس الشورى الذي ليس له أي دور إلا إختيار ( العرض حالجيه ) , ثم نتوسل للبنك الدولي واللي يسوى واللي ميسواش ونقوله ( سلفني 3جنيه ).
.
سيادة الرئيس محمد مرسي , إذا لم تكن واحدا من هؤلاء الطغاه الذين يكلفون مصر 12 مليار جنيه سنويا لشراء ( طبله ) فأرجوك إصدر قرارا بإلغاء مجلس الشورى وقرار أخر بتخصيص الجرائد الحكوميه ومبني ماسبيرو...فمصر لا تملك رفاهية دفع 12 مليار من أجل (طبله) للنظام الحاكم .

.

محمد حسين

طابخي الفته

تقريبا كده والله أعلم إن موضوع تهجير الأقباط من رفح حقيقي , لكن يا ترى إيه السبب ؟ هل ده تمهيد لإعلان سيناء إماره إسلاميه مستقله , ولا المهندس خيرت الشاطر عايز رفح كلها تكون ملكه باللي فيها واللي عليها ؟! ما علينا , معاكو ربنا بقى يا أقباط مصر , ملحقتوش يا ولده تخلصو من إيد النظام السابق و (صانعي الفتنه) قمتو وقعتو في إيد النظام الحالي و(طابخي الفته ), وانا اللي كنت حاسدكو عشان شفت كام مسيحي فاتحين محلات دهب ولا كام واحد عنده عربيه مرسيدس خنزيره موديل 79 وشغال مقاول , أنا هموت نفسي يعني لما نشوف الاول إحنا الليبراليين كفار ولا لأ نبقى نشوف لكو حل.

.

محمد حسين

برلمان السويد

أنا متفائل جدا بشباب حزب الدستور , عيال شكلها حلو ودماغها عمرانه , وهدومها مكويه وبشرتها بتبرق , ربنا يوفقنا يا رجاله , إن شاء الله في الإنتخابات البرلمانيه اللي جايه هنفوز بأغلبيه كاسحه في برلمان السويد!.

.

محمد حسين

منى الطيبي

من أسباب استقالة منال الطيبي من لجنة الدستور أنها طالبت بقانون يحرم ويجرم ( الإتجار بالنساء ) , كان الرد المتوقع الساذج ( احنا معندناش إتجار بالنساء ) يا دكتوره , إفتكرت الله يمسيه بالخير العيسوي ( إحنا معندناس خرطوش ) .
بماذ أسمي إذا إجبار الأطفال والفتيات القاصرات في الريف المصري على الزواج من عواجيز ومسنين الخليج ؟!
دكتوره منال أنت تتحدثي إلى عقول تعرف عن السرقه أنها سرقة كوز دره وسرقة موبايل وسياره , لكنها لا تفهم أن سرقة اللحن والقصيده والفكره والبحث العلمي هي أيضا سرقه واجبة التجريم...هم يفهمون معنى الإتجار بالنساء أن هناك سوق يذهب إليه النساء ليتم بيعهن بالدراهم والدنانير....أنت تتحدثين إلى عقول من الزمن الغابر تكتب لنا دستور المستقبل!.
.
محمد حسين

الإخوان وحماس

لا أجد ولا أستشعر أي فارق بين حكومة حماس في غزه وحكومة الإخوان في مصر , كلاهما له نفس الشكل والعقل والهيئه والسحنه والأنصار والتابعين , كلاهما يردد نفس الخطابات والشعارت والجمل الرنانه .......لم تنجح الأولى في أي شئ إلا في تقسيم فلسطين إلى نصفين ومنح إسرائيل ( أحفاد القرده والخنازير ) أعظم هديه مجانيه , ولن تنجح الثانيه في أي شئ إلا في تقسيم مصر ثقافيا وحضارين إلى نصفين كثاني اعظم هديه تحصل عليها إسرائيل من الإسلاميين..........عن الدستور والديموقراطيه أتحدث.
.
محمد حسين

المشوهون

حملة تشويه منظمه من صفحات الإخوان للرئيس الراحل جمال عبد الناصر في ذكرى رحيله , لو أن محمد مرسي يعيد توزيع الثروه لتصل إلى الفقراء مثلما فعل ناصر, لو أن محمد مرسي يرفع كرامة مصر والمصريين , لو ان محمد مرسي يستطيع جمع العرب بشعبيه وزعامه حقيقيه , لو ان محمد مرسي يرسي قواعد صناعه عسكريه ويتبرأ من تبعية الغرب والشرق , لو أن محمد مرسي يموت فقيرا معدما مثلما فعل ناصر , فأنا أول المرحبين بالسجن والراضين به إذا كان هو الثمن...........

كذب المشوهون ولو صدقوا.

.

محمد حسين

الموناليزا

بحق الله , لا أجد أي مبرر أو تفسير منطقي لهجوم الإخوان على الزعيم الراحل عبد الناصر إلا محاوله فاشله بائسه لاستبدال زعامة ناصر بزعامة مرسي , تذكرو يا إخوان أن لوحة( الموناليزا) مهما طال عليها الزمن فهي تباع بملايين الدولارات في أكبر معارض العالم , أما لوحة ( أم ليزا ) فتباع ب 5 جنيه في العتبه.
.
محمد حسين

28/09/2012

التبول اللاإرادي

بقالي ساعه بقرأ الأخبار , دماغي لسعت والكلام والأخبار دخلت في بعضها , خبر بيقول إرسال ياسر برهامي للتوسط لحل مشكلة سيناء وخبر بيقول العلاج ببول الإبل مفيد لحالات التبول اللاإرادي وخبر بيقول طريقة عمل الجمبري يصلصة البشاميل........يعني أفهم من الكلام ده إننا لو بعتنا ياسر برهامي لصنية البشاميل هيحل مشكلة الإبل ويعالج الجمبري من التبول اللا إرادي ؟!
.
محمد حسين

ولا تايهه في المغاره

وانت ماشي جوه حاره
وسط حاره
تسأل الناس الغلابه
ايه العباره؟
تلقى ناس متكسرين
ومتربين
بس يضحك
ضحكه بتصغر سنين
هما دول بس البشاره

تعرف الأحلام دي ماتت

ولا عايشه

ولا تايهه في المغاره!
.
محمد حسين

باقة زهر

وكأنكِ من باقةِ زهرٍ

تأتينَ لغرفةِ أشعاري

وتلوحُ ظلالكِ في عيني

تعبثُ يمناكِ بأوتاري

وتقلبُ صفحاتي مهلاً

لاأحسنُ صنعاً بالنارِ !
.

.

.
محمد حسين

شلاليت

الشيخ ياسر برهامي : هل ذهبت لشفيق ليلة إعلان النتيجه ؟ لا لم أذهب ولم أتصل له...هل ذهبت يا شيخ ياسر ؟ لا إتصلت به فقط ؟ يامولانا إنت رحت لشفيق ؟ أه رحت لشفيق.
.
نادر بكار : مبروك الزواج وإن كان تصادف مع قرار إقالتك من منصب المتحدث الرسمي لحزب النور , تقريبا قيادات الحزب قالو طالما هيتجوز يبقى يأسف ويعتذر لمراته بعد كده , الجوازات وشوش يا ندوره, بالحق إيه موضوع علاقتك واتصالاتك بأحمد شفيق ؟ هو انت

كنت شغال في أمن الدوله فعلا ؟!
.
محمد مرسي : خطابك أمام الأمم المتحده ممتاز , حتى عدم ذكرك لكلمة إسرائيل يعني تجاهلها وإهمالها .
.
عمرو حمزاوي : مزعل صديقي محمد حبيب منك ليه يا عموره , إوعى يكونو أفشوك في الطريق الصحراوي مع بنت أختك ! إحنا ناس علمانيين لنا تقاليدنا وعاداتنا ومنعملش كده.

.
حازم صلاح : سيبك من حكاية المناظرات وشغل المصاطب ده , وارجع لمهنتك الأصليه ( المحاماه ) , أصل المشرحه مش ناقصه قتله.
.
طارق الزمر : مبروك الإفراج عن زميلكم المتهم بمحاولة اغتيال مبارك في أديس أيايا , وحضرتك خططت لقتل السادات , كده المجموعه كملت بفضل الله ....ماتولع بقي ولا احنا فبنزينه !.
.
عصام سلطان : حضرتك مجبتش سيرة البرادعي بقالك 9 ساعات , لعل يكون المانع خير ...أنا بتطمن بس , دينا علمنا كده.
.
العقل والإحساس : طولتو أوي في الغربه ووحشتوني , حاولو تنزلو مصر أجازه إن شا الله خميس وجمعه.

لماذا

لماذا يمنعونَ حبيبتي

عنا الهواءْ

لماذا 
يقتلون الحلمَ فينا

والرجاءْ

لماذا الشمسُ نخفيها

بأيدينا

وينتحرُ الشتاءْ
.

.

.
محمد حسين

لسابع جد

ومصر بلدنا مذكوره
سبع مرات
ومين هيعد ؟
.
ومنحوسه لسابع جد
.
مغول وتتار
على استعمار
وحاجه تسد
.

وثوره تبتدي بفكره
نسلمها نطعمها
لبوز القرد
.
.
ده حتى النحس صاحبنا
لا بنسيبو ولا يسيبنا
نديم والكاس
.
بيسترنا بديك أهله
كأنه لباس
.
ولما يغيب بيوحشنا
ونندهله
وليك شوقه يابو الأنحاس
.
.
إحنا البلاد اللي بترمي
خيرها لبره
بلكونه تنزل على روسنا
فقلب الصحره
والموت ناسينا وبيماطل

وكل يوم
بيقول بكره !.
.
محمد حسين

أنتظر دخولي للجنه

سأقاومُ حبكِ حتى الموتْ
لكني متُ كثيراً بالأمسِِ
وبعثتُ لأجلك ياعمري
أنتظرُ دخولي للجنهْ !.
.
محمد حسين

عصفورا أحمق

أتصوّر أن يأتي يومٌ
تتوحّدُ ألوانُ الطيفِ
في اللونِ الأغمقْ
ونسمي عصفوراً يشدو
عصفوراً أحمقْ
تتبدّلُ أحلامُ الطفلِ
ننتظرُ الموتَ فلا يأتي
وننادي الشمسَ فلا تشرقْ !.
.
محمد حسين

فتحيه وعوضين

سيادة الرئيس الأب صباح الخير
بعد التحيه
فتحيه صحيت من النوم مالقيتش عوضين جوزها نايم في فرشته , قامت مفزوعه وقلبت الشقه كلها , وشقتهم يا ريس أوضه وصاله والله يعزك عفشة مايه , طلعت تجري ذي المخابيل في الشارع لحد ماولاد الحلال قالولها اللي حصل , واللي حصل ياريس إن عوضين جوز فتحيه لبس الجلابيه اللي حيلته وطلع يصلي الفجر , وهو راجع من الصلاه طلعو علي

ه ولاد الحرام وخطفوه , وقال طالبين 10 مليون جنيه فديه . وعوضين ومراته دول ناس غلابه أوي بيكملو عشاهم مايه , والحراميه فاكرين إنه عشان اسمه (عوضين البرنس) يبقى معاه ملايين , يعني تشابه أسماء , وهي الحكايه بالأسماء ياناس , يعني الرجاله اللي من عيلة الديب بياكلو العيال الصغيرين ؟! , المهم عوضين اتسحّب كده من ورا الحراميه وكلم مراته على تليفون عمي محفوظ البقال ’ قالت له متقلقش يا عوضين أن هوصل للسيد المسئول واكلمه عشان يطلعوك من عندك , قام عوضين قالها إوعي تعملي كده , الحراميه دول ناس طيبين أوي , دانا هنا باكل 3 طقات في اليوم ده غير الشاي وباكو المعسل , اعتبريني مسافر الأردن ومتفكريش في موضوع خطفي ده , كلها سنه ولا حاجه وارجعلك , ومش بعيد على ربنا وانا راجع يدوني مروحه وكاسيت من أبو روحين , المهم خلي بالك انتي من نفسك ومتنسيس تحطي ورقتين جرنان يدفو صدرك وانتي نايمه..وانا طلبي الشخصي يا ريس هو سؤال محيرني : هل يجوز الإعتكاف للمرأه الحائض ؟!.
.
محمد حسين

التلقين

بينما كنت أؤدي فريضة الحج , وبعد رمي الجمرات وقفت في أحد الأركان للدعاء , اقتربت مني سيده مصريه مسنه , يبدو من حالها أنها سيده فقيره , قالت لي هذه السيده الطيبه ( والنبي يابني إدعي بصوت عالي عشان أدعي وراك ) , وجدتني لا إراديا أقول لها ( يا أمي ادعي باللي في قلبك ذي ما يطلع , ماتخليش بينك وبين ربنا حاجز ) , بعد ذلك شعرت أنني ارتكبت خطأ ما فربما كانت هناك أدعية واجبه أو سنه لا لبس فيها , حتى عرفت أ

ن الأمر غير ذلك وأن ماقلته بدون علم صحيح.
هنا أتسأل عن فكرة وسياسة التلقين التي نعيش فيها , كيف أشغل نفسي بأدعيه موضوعه عن روحانية وجلال هذه اللحظه وكأنني في امتحان شفوي أمام الله سبحانه وتعالى , سياسة التلقين في المدارس التي تجور على العقل والفكر والتعمق , حتى بعد الموت حضرت عشرات الجنازات وشاهدت الشيخ يلقن الميت بما يتوجب عليه قوله عندما تأتيه الملائكه , عرفت أيضا أن هذا الأمر بدعه.........متى نتوقف عن سياسة التلقين , ونعطي للقلب مساحه كافيه لمناجاة ربه ونعطي للعقل مساحه كافيه للتفكير والتأمل؟ لماذا يعاملوننا في المدارس كأطفال وفي المساجد كأطفال , حتى بعد الموت يعاملوننا كأطفال؟!.

.

محمد حسين

والحب قرار

لا زلتُ سجيناً في مرفأْ
أنتظرُ النوّةَ والإعصارْ
وسفائنُ تأتي أو ترحلْ
من غيرِ حصارْ
وتودعُ شطأنَ الموتِ
وكهوفَ النارْ
.
يوماً سأغادرُ مرساتي
فالموتُ قرارْ
والحبُ قرارْ
.
محمد حسين

بينما أنا كذلك

وبينما أنا كذلك , دخل علىّ رجل ضخم الجثه , كانت هيئته هكذا , لم ينطق الرجل بكلمه واحده , فقط أشار بيده اليمنى إلى هذا الإتجاه , فالتفت لأجد هذا المنظر الرائع الخلاب , نهضت من مكاني مسرعا وتوجهت إلى حيث أشار , كلما اقتربت من المكان زاد انبهاري حتى تشبثت قدماي بالأرض , اقترب مني الرجل ووضع في يدي هذا الشئ , فرحت به جدا وتوجهت مسرعا إلى زوجتي التي انبهرت هي الإخرى بما أحمله في يدي , طلبت منها أن تضعه

برفق في هذا الدولاب الخاص بالأشياء الثمينه , أخبرتني أن الدولاب ممتلئ عن أخره , وأنها ستضعه في الدولاب الأخر.., وقضينا ليلتنا نحمد الله على النعمه التى حصلنا عليها.
.
.......................................................................................................حد لسه مش فاهم حاجه في مشروع النهضه ؟!
.
محمد حسين

الأنسه حفيظه

الحمد لله , تزوجت الأنسه حفيظه( ربنا يحفظها ), أو بالأحرى سمو الأميره حفيظه ( ربنا يحفظها ) ,وهي إبنة سلطان بروناي , تزوجت من شاب من عامة الشعب ( شوف التواضع ) , تكلف حفل الزواج بحسب صحيفة الديلي ميل مبلغ 20 مليون دولار ( من مال الشعب ) , وتم الزواج في قصرها المكون من 1700 غرفه ( من مال الشعب ) , لكن ما إن ترى صورة العروس في فستان الزفاف وهو فستان محجبات لا يظهر شعره واحده من شعر راسها لا تملك إلا أن تكبر وتحمد الله , بارك الله فيكي يا إخت حفيظه وحفظ والدك زخرا للإسلام والمسلمين !!.
.
محمد حسين

بحروف الصمت

فارغةٌ كل دواويني
أكتبها بحروفِ الصمتْ
لا أجدُ لوصفكِ عنواناً
ينقطع الصوتْ
أتجمدُ حينَ سألقاكِ
لا أعرفُ أحداً يا عمري
يكتبُ أشعاراً
بعد الموتْ !
.
محمد حسين

كيف ترى قيادتي

الفرق بين شيخ الزاويه ورئيس الدوله أن الأول مهمته الرئيسيه هي حماية حدود الله أما الثاني فمهمته الرئيسيه هي حماية حدود الوطن , الأول مهمته تنظيف القلوب والثاني مهمته تنظيف الشوارع , الأول مهمته بناء العقيده السليمه والثاني مهمته بناء المستشفيات والمدارس............فكيف ترى قيادتي ؟!

.

محمد حسين

تسليم السلطه

على مدار التاريخ الإسلامي وبعد انتهاء عصر الخلفاء الراشدين , ثلاثه فقط استطاعو أن يقنعو العامه من الناس أن رئيس الدوله هو نفسه شيح الزاويه وأسموه مجازا ( الخليفه ) , الثلاثه هم الأمويون والعباسيون والإخوان المسلمون , فإذا كان الأول والثاني قد سلمو السلطه بعد 4 سنوات فانتظروا من الإخوان أن يفعلو ذلك !.
.
أنا على يقين أن أغلب أنصار الإخوان لديهم قابليه واستعداد تام لتقبل عملية تزوير للإنتخابات لصالح الجماعه أو حتى إلغاء الإنتخابات برمتها , تحت نفس المبرر الأزلي العقيم ( الضرورات تبيح المحظورات), ومن أجل سواد عيون مشروع النهضه الإسلامي.

.

محمد حسين

صوتك مرفوع

صوتك مرفوع
حقك ضايع
والكل بيعمل مش سامع
.
لوكنت يا صاحبي
في أخر الكون
أو كنت فدولة
بني صهيون
كانت هتهون
.
بس إنت فدوله
فنص الكون
مليانه كنايس وجوامع !
حقك ضايع
.
محمد حسين

ونتجوز هدى سلطان

الرئيس مرسي ظهر في مشاهد وهو بيصلي أكتر من المشاهد اللي ظهر فيها زكي رستم بيصلي في الفيلم إياه مع فريد شوقي , مش باقي على نهاية فيلم النهضه غير إننا نلم ونجمع حبيات السبحه المفروطه من صناديق الإنتخابات ومكتب طنطاوي ! , وبكده نوصل للنهايه السعيده ونتجوز هدى سلطان.

.

محمد حسين

وإسرائيل مدعومه من الشيطان

سيادة الرئيس : الحب يصنع المعجزات لكنه لا يصنع الخبز , والشجره لكي تنمو تحتاج إلى الماء وليس الدعاء , وإذا كنت سيادتك مدعوما من الله عز وجل ( كما يقولون ) فاعلم أن إسرائيل التي سبقتنا ب 50 عاما مدعومه من الشيطان ! , فتوقف أرجوك عن هذا الهراء اللفظي والفكري فأنت تبدو في المشهد كبائع ورد بائس قرر أن يبيع الزهور لأطفال الصومال !.
(إذا نزل مؤمن وكافر إلى النهر فسوف ينجو من الغرق من يجيد السباحه...........د /مصطفى محمود).
.
محمد حسين

الليبراليه

أفضل أنواع التجاره هي التجاره مع الله ورسوله وأياته وأسوأ أنواع التجاره هي التجاره بالله ورسوله وأياته........فإذا لم يسعفك الحظ لتكون التاجر الأول فحاول جاهدا ألا تكون التاجرالثاني .
أن تمتنع عن التجاره برمتها أفضل لك من أن تكون التاجر الثاني...................عندها تصبح الليبراليه فرض عين !!.
.
محمد حسين

الحكايه

الحكايه
مش سولار
مش دولار
مش قرض شايل جزمته
ويبقى في إديه القرار
.
الحكايه باختصار
.
إحنا قلوبنا مكسحه
بياكلها دود

ولا فيها نور
ولا فيها خير
مش عندنا أزمة وقود
إحنا في أزمة ضمير
.
.
إحنا في حالة حصار !!.
.

محمد حسين

سيناء والأفلام الهندي

دكتور محمد مرسي : السلام عليكم ورحمة الله وبركاته
صباح الخير ياريس
تقارير إسرائيليه تفيد بتوغل كبير للجهاديين والسلفيين في سيناء , وجود التقارير في حد ذاته بيعني إن إسرائيل نفسها متوغله , يعني طوب الأرض موجود في سينا ماعدا الدوله المصريه! , أظن ياريس إن حضرتك كده الحمد لله , صلاه وصليت , عمره واعتمرت و وحجيت بيت ربنا يجي 300 مره , ممكن الله يباركلك تشوف لنا موضوع سينا ده وتقول لنا هي العمليه نسر فشلت ليه ؟ أظن المشكله مش في إسم العمليه ! , حتى لو سميناها العمليه سيفين ........على فكره سينا دي بتاعتنا والمصحف, ده احنا حتى عندنا ( أفة ) أغاني وأفلام بتاعت سينا رجعت كامله لينا , لو ضاعت سينا مننا هنعمل إيه بالأغاني والأفلام (الهندي) ؟!.

.

محمد حسين

تخاريف مواطن عاقل

تخاريف مواطن عاقل
.
بعد إتمام عملية خلط الدين بالسياسه , حصلنا على معجون أسنان بيغير طعم الملوخيه ومرقة دجاج بالفلورايد , فلا تسأل الشمس إن غابت عنا يومين بداعي المرض أوالزهق , فقريبا جدا سوف نعتاد حياة الظلام وندمن العيش في الكهوف.
.
إذا كنت هذا الرجل الذي يعتقد أن قادة الإخوان اجتمعو في يوم ما في عام ما في حقبة ما و قام أحدهم معترضا على قرار للمرشد لأنه يتنافى مع أسس ومبادئ الديموقراطيه , فأنت ح

تما هذا الرجل الذي يعتقد أن أمريكا الأن تجلس ( القرفصاء ) في ركن غرفه صغيره مظلمه على المحيط الأطلنطي , تبكي وترتعد فرائصها بعد وصول الإخوان للحكم.
.
أحيانا أحسد الشهداء الذين سقطو في ما كان يسمى ( الثورة) , ليس لأنهم أحياء عند ربهم يرزقون........ ولا يحزنون , فأمر الشهاده والجنه لهم لازال عالقا في مكتب الإرشاد ولدى مشايخ السلفيه , فيفتون بأنهم شهداء قبل وأثناء الإنتخابات وبالتالي يدخلون الجنه , ويفتون بأنهم بلطجيه بعد الوصول للحكم وبالتالي يدخلون السجن , أنا أحسدهم لأنهم رحلو قبل أن يرو أقدام مصر تغوص في هذا ال (بيبي ) السياسي.
.
شكرا للجنة الدستور الثوريه التي تناقش ماده لسجن المواطنين بتهمه إزدراء الرموز السياسيه , والشكر موصول للقاضي الشامخ الثورجي الذي حكم ببراءة جميع المتهمين بقتل الشهداء بينما حكم بالسجن عامين على مواطن بتهمة سب الرئيس , شكرا لوزير الشباب أسامه يس الذي حل مشكلة جرافيتي محمد محمود بالرسم على جدران مراكز الشباب ودورات المياه العمومي ,
.
قريبا جدا سوف يتم حذف أسماء الشهداء من كتب التاريخ والجرائد على أن تعاد كتاباتها على أوراق ال ( تواليت ).

.
محمد حسين

لا تخلف الوعد

قالتْ تعالى
.
لاتخلفِ الوعدَ الذي
واعدتني
فالوعدُ دَينْ
.
دعني أحبكَ يا حبيبي
من جديدْ
حتى أحبك مرتينْ
.
دعني أفتشُ

في جبينكَ ساعةً
أين الهوى
أين الرجولةُ والصبا
أين القصائدً تختفى
أين التقين
كيف التقين ؟
.
دعنى لأسكنَ
في شفاهك
أو حروفك
أو بين بين.

.

محمد حسين

البلالين

أراد الرجل أن يغير من ديكور المنزل الذي يعيش فيه , حيث يقيم هو وزوجته و10 من الأبناء أغلبهم لا يقتنعون برأيه ولا قراراته وأفكاره , خطرت بباله فكره عبقريه , نادى على زوجته واصطحبها إلى غرفة النوم , أغلق الباب وراح يشرح لزوجته المطيعه فكرته باختصار , قال لها سأحضر العديد من البلالين , كل منها على شكل قطعه جديده من قطع الديكور الذي نريد تركيبه , ثم يأتي دورك يازوجتي الحبيبه , قالت له وما دوري تحديدا

؟ , قال الرجل , كل يوم عليك أن تنفخي بالون من كيس البلالين الذي سأحضره , ثم إخرجي به إلى أبنائنا , ونلاحظ رد فعل أبنائنا المتمردين من هذا الشكل الجديد , فعلت الزوجه ما أمرها به زوجها , وكانت كلما خرجت ببالون ثار غضب الأبناء المتمردين وخوفهم من شكل البالون الجديد , هنا يأتي دور الرجل مره ثانيه فيخرج من جيبه ( دبوس إبره ) ويفرقع البالون المخيف , فتتحول صيخات الغضب إلى صيحات أعجاب وتصفيق حاد لحنان الأب ورحمته بأبنائه, وهكذ تكرر الموقف , حتى جاء اليوم الذي........!.

.

محمد حسين

متى يشاء

ما كنتُ أعرفُ
أن في أوطاننا
رجلاً سيأتي في يديه
حقيبةٌ سوداءْ
يطعمنا متى يشاءْ
يمنعنا متى يشاءْ
يقتلنا متى يشاءْ
.
ما كنتُ أعرفُ
أن رئيسنا يوماً

سترسله السماءْ !.
.
محمد حسين

بالمسطره

رسمو الشهيد
بالمسطره
والفرشه والألوان
قالو له حقك تتمسح
يابن المره
أصل انت
نجست المكان

.
محمد حسين

قلعة للحب

لو يقذفونَ بجبهتي
تحتَ الشظايا
أو يحرقون دفاتري
حتى النهايه
يوماً سأعثرُ
في دروبكِ يابلادي
عن قلعةٍ للحبِ
في زمنِ البغايا !.
.
محمد حسين

مزادات

مزادات
.
عملو علينا في البلد
مزاداتْ
قال بيه يجامل بيه
وبيه يهادي البيه
وبيه يبعنا لبيه
مازهقنا م البهوات !.
.
وبيه يقول للبيه

خدلك نشان مني
كافؤك يابيه بنشان
علشان قتلت ابني
ابني الكبير اللي اتقتل
قلتو إنه مات !
.
هو احنا
ياللي اسمك وطن
عايشين في أرضي
مستورين
ولا في زمن النخاسه
مقهورين
ولا في سوق التلات !
.
ساعات بقدم شكوتي
لله بذل
وساعات يضيع مني
الرجا والنور واضل
ساعات !

.

محمد حسين

طريقة عمل أيس كريم بالكوسه

هحاول أستجيب لطلب أصدقائي , إني أبطل انتقاد الإخوان وأنوع في كتاباتي
.
لكِ يا سيدتي (طريقة عمل أيس كريم بالكوسه )
.
المقادير : اكيلو كوسه طازجه...اعلبة أيس كريم من السوبرماركت
.
طريقة التحضير : إغسلي الكوسه جيدا تحت الحنفيه , ولو مستعجله مش مهم تغسليها , ثم ارشقي حبات الكوسه بطريقه عشوائيه في علبه الأيس كريم , قدميها لأطفالك مع ابتسامه حانيه , هذا الشكل الذي حصلتي عليه هو صورة بالكاربون لنظام حكم الإخوان والسلفيين في مصر !!.
.
صديقي العزيز : زمان قريت سطرين لخالي جلال عامر بيقول فيهم ( ليست مهمة الناقد إنه يصحى من النوم يغسل وشه ويقعد ينتقد في الحكومه...لا أبدا ....مش شرط يغسل وشه !! ).

.

محمد حسين

حكم البنغاليين

أصعب وأغبى حادثه ممكن تشوفها في الطريق , لما يكون الإتنين سواقين بنغاليين , تقف قدام الحادثه تجيبها يمين تجيبها شمال وتسأل نفسك هي إذاي حصلت بالشكل ده ؟ , لا مش ممكن تيجي كده أبدا ,هو شكل العربيه بقى عامل كده إذاي ؟ يا مثبت العقل والدين يارب..........
وأصعب وأغبى حادثه ممكن تشوفها في حكم الأوطان لما يكون الإتنين ( سواقين ) إسلاميين , إخوان وسلفيين ! , إحساسي إننا هنشوف بلد يحتار الأطبا فيها , والدنيا هتتفرج علينا وهي بتضرب كف بكف وتقول لاحول ولا قوة إلا بالله , حصلت إذاي دي ؟ , شكلها بقى عامل كده ليه ؟! .

الأيات واليافتات

بعد كثرة الفتاوي الشاذه عقليا وجنسيا التي يطلقها مشايخ الفضائيات ومشايخ بير السلم والزريبه :
.
الإخوان المسلمون حولو القرأن الكريم , كتاب الله , من (أيات) للهدايه الربانيه إلى ( يافتات) للدعايه الإنتخابيه , يعلقونها في الشوارع والأزقه وفوق أكوام الزباله , وأينما وجد الناخب تجد اليافته والأيه , وبعد الإنتهاء من موسم الإنتخابات والتجاره بالدين , لا يهتم الإخوان بلم وتجميع لافتاتهم من الشوارع , فيتركونها ليعبث بها الأطفال والغوغاء ومشايخ الجهل........................................
..........................................................
أهكذ تفعلون بكتاب الله يا ظل الله في الأرض ؟!.
.
اللهم لا تؤاخذنا بما فعل المشايخ منا !.
.
محمد حسين

ليس في الأقدار حيله

كنا سننسجُ
من خيوطِ الشمسِ
أحلاماً جميلهْ
.
كنا سنلعنُ
ذات يومٍ موتَنا
باسم الفضيلهْ
.
أقدارنا عبثتْ
بأحلامِ الصبى

لاتسأليني يابلادي
عن لقانا
ليسَ في الأقدارِ
حيلهْ !.
.
محمد حسين

غواصتين في النيل

قبل شهر , أشرف الرئيس مرسي بنفسه على العمليه (نسر) لتطهير سيناء , وبفضل الله تعالي ودعوات المخلصين من أبناء الجماعه, استطاعت الجماعات الجهاديه اليوم السيطره على نقطه تابعه للجيش المصري ورفع علم تنظيم القاعده عليها !. 

.
أنا بقول بقى إن الغواصتين بتوع ألمانيا , بدل ما نصحى في يوم نلاقيهم اتسرقو وبيتباعوخرده في الحرفيين , ممكن نستغلهم ونعمل فيهم برنامج عشاء فاخر بين ضفاف النيل للساده المحبين ( مينيمم تشارج 50 جنيه للفرد ) حتى تتحقق العداله الإجتماعيه ( بالحب )!.

.

محمد حسين

الشموع الحمراء

طب والله العظيم أنا جوايا كلام عن الرومانسيه والحب والورد والشموع الحمراء يتعبى ف ( زكايب ) , لكن منهم لله اللي كانو السبب , كل مافتح المحروق اللي اسمه النت ألاقي خبر مستفز أو موقف يتعارض مع حدود العقل للكائنات وحيدة الخليه , يقومو يطلّعو الحيوان اللي جوايا , وفجأه ألاقي ضميري بيقولي ( رومانسية إيه وزفت إيه اللي هتكتب فيها ؟ ) وشويتين كمان ويقوم ضميري رازعني المثل البلدي إياه ( إحنا ف نهضه ولا فشم ورد! ) , منك لله يا مرسي قتلت الحب جوانا.

.

محمد حسين

المعجزات والإيمان

يا محترم , مش مهم خالص إن السينما اللي هيتعرض فيها الفيلم المسئ تتهد عشان حضرتك تتأكد إن ربنا سبحانه وتعالى غاضب لرسوله , مش مهم خالص إنك تلاقي لفظ الجلاله منحوت على شجره في مدينة السلام أو بطيخه في مدينة ديلهي عشان تتأكد إن ربنا سبحانه وتعالى موجود , المعجزات لا تصنع الإيمان ....ذي مانا كده متأكد إن عندك مخ وبتفكر ( أحيانا ) رغم إني مشفتش مخك ولا مره.....فكرو وتدبرو وأمنو يرحمكم الله.
.
محمد حسين

أهل الكهف

أحد المشايخ في الجمعيه التأسيسيه للدستور يفتي بأنه يحق للفتاه أن تتزوج في سن التاسعه !.
.
هذا الشيخ هو نموذج متكرر ومنتشر في قرى ونجوع مصر , مشايخ الجهل , لايعرفون التاريخ ولا ينظرون إلى عقارب الساعه , هم أقرب ما يكون إلى أهل الكهف , لايدركون أن جسم الفتاه الأن يختلف عن جسم مثيلتها من 1400 سنه , وأن صحتها البدنيه والنفسيه تختلف , وأن متطلبات الحياه الزوجيه والأمومه تختلف , وأن طبيعة الأمراض ومشاكل

الحمل والولاده تختلف.
.
ليس عيبا أن يكون لدينا رجلا بهذا العقل الحجري , العيب كل العيب أن نستحضر أرواح أهل الكهف ليكتبو لنا دستورا للمستقبل.
.
وأزعم أن كل ما أنجزته الثورة حتى الأن هو تجميع مشايخ الجهل من كافة ربوع مصر في مكانين محددين ( البرلمان وجمعية الدستور ) ,
.
سأحاول أن أكون متفائلا فأقنع نفسي أن خطوة التجميع هي الخطوه الأولي والهامه جدا قبل خطوة ( الحرق بجاز وسخ )!.
.
ملحوظه : أقصد الحرق الفكري وليس الحقيقي....مثلما مشروع النهضه هو مشروع فكري وليس حقيقي.

ماما أمريكا

ماما أمريكا
.
رحبت الولايات المتحده بفوز الإخوان في الإنتخابات , ولا أظن أن الأمريكان و الصهاينه يرتعدون خوفا الأن من فوز محمد مرسي والجماعه ( برغم تصريحات الست أم أيمن) , فهم لديهم من العقل والخبره السياسيه ما يؤكد لهم أن شعارات الإخوان تبقى شعارات ( عدة الشغل ) , وأن حكم الإخوان لمصر لن يكون أقل حلاوه (وطراوه) من حكم الحزب الوطني.

موريس بتاعنا وموريس بتاعهم

موريس بتاعنا وموريس بتاعهم
.
قولي حضرتك إيه الفرق بين موريس صادق المسيحي العنصري اللي عمل الفيلم المسيئ وبين الشيخ المسلم العنصري اللي حرق الإنجيل واتبول عليه ؟إيه الفرق , كل الفرق بينهم إن الأول هو موريس بتاعهم والتاني هو موريس بتاعنا , وكل من له موريس يطبطب عليه !.
.
.ولأننا شعب متدين مش عنصري ولا منحاز بغباوة ,فأنا على يقين إننا هندور على موريس ( بتاعهم ) ونحاكمه ونقتله ونشنقه ونجلده ونحط السيخ المحمي في صرصور ودنه , أما موريس بتاعنا هندلعه ونهشتكه ونفتح له قناه فضائيه عشان يعلمنا سماحة الدين الإسلامي , ولو كتر في الكلام شويه هنمسكه مشيخة الأزهر ! , جاتها نيله اللي عايزه نهضه!.
.
محمد حسين

التعليم الحكومي

في الصباح الباكر يدخل التلاميذ من بوابة المدرسه , يقفون في صف واحد متعرج ( كأنه طابور ) , ويؤدون تحية العلم وهم نيام ( كأنهم مصريين ) , ثم يدخلون إلى غرفه بأربع جدران (كأنها فصل ) , ويدخل المدرس ثم يبدأ برفع يده والتلويح بها ( كأنه بيشرح ) , فيضع أحد التلاميذ إصبعه على رأسه ( كأنه بيفكر ) , ثم يدق الجرس ( كأن الحصه انتهت ) , وفي نهاية اليوم الدراسي , يهرول التلاميذ إلى غرف الدروس الخصوصيه المحصنه ضد القوانين والمدفعيه الثقيله ( كأن عندنا مجانية تعليم ) , وفي المساء يظهر السيد الوزير على شاشات الفضائيات يتحدث عن مشاكل الوزاره ( كأن عندنا وزاره ) , وانا بقالي ساعه بهرش في مناخيري ( كأني بكتب عن مشكلة التعليم الحكومي ! ).
.
محمد حسين

أحلامنا غير ما بتتوصف

أحلامنا غير 

ما بتتوصف

أحلامنا شارع 

بالبياده بيترصف

من غيرضمير

أحلامنا غيرْ

.

والشمس فينا بتنطفي

قبل النهار مابيختفي

.

وحمام مكتف في الميدان

ساعة الأدان

مبقاش يطير

أحلامنا غير

.

الناس في قهوة حيّنا

قاعدين يشوفو ويسمعو

قاتل وشيخ اتجمعو

ماشيين في شارع

(أنجاجيه)

دم الحمام

من غير مايقصد والنبي

طرطش عليه

أسف يا بيه

توصلو بألفين سلامه

توصلو بمَيتين سلامه

والله كَنْ الدنيا 

رايحه للقيامه

.

ويارب خير

.

محمد حسين 

من أنا

إني لأعرفُ منْ أنا

لكن بعضاً من جنوني

سوف يبقى غامضاَ

لازلتُ أجهلُ من أكون؟!.

.

محمد حسين

ويمشي في الأسواق

أبذل مجهودا كبيرا ومضنيا في إقناع شباب الإخوان أن رئيس الدوله يأكل الطعام , ويمشي في الأسواق وقابل للنقد , تماما مثل محاولاتي لإقناع السعوديين إن اسمي ( مش محمد !).

مسألة شخصيه

نعم أعترف ,فانتقادي لجماعة الإخوان مسأله شخصيه بحته ( تار قديم وبايت ) , وليس للأمر علاقه بالسياسه ولا مصلحة مصر ولا يحزنون....
فقبل سنوات نشب خلاف حاد بين أبي (عليه رحمة الله ) وبين القيادي الإخواني خيرت الشاطر , كان الخلاف على قطعة أرض كبيره جدا بمنطقة رفح , حينها هدد الشاطر أبي بالقتل واستولى على قطعة الأرض التي بنى عليها لاحقا مجموعه من المولات الفخمه في مدينة رفح الإسترتيجيه( راجع تكليف الرئي

س مرسي للشاطر بالإستثمار في مدينة رفح ! , وتصريحات الناشط السيناوي عن خيرت الشاطر), بعدها مات أبي حزنا وكمدا على أرضه.
.
أما الموقف الثاني من التار البايت , فكان لأمي التي سألتني ذات يوم ( لماذا أم أيمن ؟ ) , فأنا أفهم السياسه أفضل منها ولدي شخصيه أقوى ( أقدر أن أعترض يوما ما).
.
والموقف الثالث لأخي المترجم الحاصل على الماجستير الذي أضطر للسفر بعدما أعطى قيادات الإخوان نصف مناصب البلد لنادر بكار.
.
أعيدو لأبي أرضه واسألو الشاطر من أين لك هذا , واقنعوا أمي لماذا أم أيمن وأخبرو أخي عن مواهب نادر بكار الدفينه التى أهلته لهذه المناصب...حينها سأنسى تاري معكم وأتوقف عن نقدكم.
.
ملحوظه / أبي هو الشفافيه وأمي هي الإنصاف وأخي هو العدل.
.
محمد حسين

أحلم

أحلمُ أنْ أصبحَ
في يومٍ
عصفوراً منزوعَ الريشِ
أتجمدُ تحتَ الأمطارِ
فأحنُ لصدركِ يا أمي.
.
أحلمُ أنْ أصبحَ إنساناً
منزوعَ القسوةِ
 والسُمِ !.
.
محمد حسين

مذكرات البرادعي

محمد البرادعي يكتب مذكراته عن ( سنوات الخداع ) , اصبر يا دكتور شويه متستعجلش , وابقى اكتبها مره واحده !.

.

محمد حسين

المطبخ السياسي

في المطبخ السياسي الأن , تجري عملية طبخ و (تطبيخ ) لدستور جديد لمصر , من أجل مستقبل أفضل لأجدادنا (الله يرحمهم) !.
.
المقادير : 2 كيلو إخوان , ا كيلو سلفيين , 2 ملعقه كبيره من الجهاديين , ليمونتين كبار من الجماعات الإسلاميه ( فرع سيناء ).
.
طريقة التحضير : سمي بالله واعجن.
.
طريقة التقديم : تقدم العجينه في طبق من الأحاديث النبويه مغلف من الخارج ببضع أيات من القرأن الكريم.
.
طبق الحلو المقترح : لقمة الظواهري أو أم لادن.
.
............عفوا فلحوم أعدائنا حلال , مدبوحه على الطريقه الإسلاميه.

.

محمد حسين

صباح الورد والنهضه

سألت عليكي من بدري
بقالنا كتير
مصبحناش
قالو لي عنيها مكسوره
.
وأول مره من ساعة
ماكنا صغار
أشوف كرامتنا مستوره
بتوب الذل
.
صباح الورد والنهضه
صباح الفل

.

محمد حسين

حتى أختفي بين السطور

إني لأعشقُ 

أنْ أراكِ

في ثيابٍ باليهْ

.

لايعرفُ 

الحبَ الجميلَ

حبيبتي

مَنْ كان 

يعنيه الثيابْ

.

فتجرّدي 

من كل ثوبٍ فاخرٍ

وضعيه جنباً 

وارتدي

من أجلِ ليلتنا

قميصاً 

من لُحاءِ النخلِ

أو من بعض 

صفحات الكتابْ

.

ثم اتركيني 

كي أطيلَ النظرَ

في عينيكِ

حتى أختفي 

بينَ السطورْ!.

.

محمد حسين

قالو

قالو 

بأنكِ لنْ تعودي

فارتضيتْ

قالو كفانا وانتهينا

فانتهيتْ

قالو بأنكِ لن تعودي

ذاتَ يومٍ

تذكرين ملامحي

حتى بكيتْ ! .

.

محمد حسين

البلاهه والبلاده

في الوقت الذي يتظاهر فيه ألاف الشباب في عدد من العواصم العربيه ويحرقون السفارات اعتراضا على الفيلم المسيئ , تقيم السعوديه مسابقه لإختيار ملكة جمال الماعز ....فعلا , مابين البلاهه والبلاده ( فركة كعب ) وتاريخ مشترك !.

.

محمد حسين

لبسني من صنع بلادي

صباح الخير على عيونك يا مصر , مش ملاحظه إننا تقدمنا أوي في موضوع صناعة الطواغيت ده ؟ , أظن جه الوقت اللي ننتقل فيه من مرحلة الصناعه إلى مرحلة التجاره , في الحاله دي بس تأكدي إن الإتجار أفضل وأهون بكتير من التعاطي ! , ولا إنتي رأيك إيه ؟ أظن ماهتقولي ( لبسني من صنع بلادي !).
.
محمد حسين

شنوده

شهادة حق للزمن ( وانا مش إخوان على فكره ) .
.
تعمد مبارك , طوال فترة حكمه , استخدام أبسط قواعد الديكتاتوريه , أو ألف باء ديكتاتوريه , سياسة ( فرق ..تسد ) , تعمد حرق الكنائس , وإشغال نار الفتنه الطائفيه كل فتره ليغطي على أحداث أو مواقف أو مخططات التوريث , واصدر بعض القوانين التي تعد إضطهادا للأقباط في مصر , ومع ذلك وقف هذا الرجل شهما وطنيا , لم ينساق وراء المتعصبين من أبناء ملته , كانت خطاباته دائم

ا تؤكد على مبدأ التعايش والمواطنه والتاريخ المشترك لهذا الشعب , إنه البابا شنوده , تحية تقدير إلى روح هذا الرجل.
.
أكتب هذه الشهاده بعدما قرأت من بعض الجهلاء سبابا واضحا لرجل توفاه الله , ولم يقصر أبدا في حق بلده, وكأنه بعد موته مسؤلا عن فيلم أنتجه مسيحي صهيوني متطرف.
.
فليذهب الجهلاء إلى الجحيم , أو إلى أي مكان ( بعيدا عن عقلي ).
.
محمد حسين

كالأطفال

رفقاً بحديثي مولاتي
إني والشوقُ يغالبني
أتلعثمُ في حبكِ جداً
كالأطفالْ!.
.
محمد حسين

في شقة مصر المشبوهه

في شقة مصر القديمه المشبوهه , يقيم مجموعه من الشباب , منهمكون في شرب البانجو ومنقوع البراطيش , أذكاهم وأكثرهم ثقافه هو (مرعي) الحاصل على الشهاده الإبتدائيه بطريقة التعليم المجاني , وعندما يهم أحدهم ب (فك زنقته) يقف طويلا أمام الحمّام مترددا حائرا , فهو لايعرف قدمه اليمين من الشمال ويريد أن يدخل الحمام بقدمه اليسرى.
وفي العماره المقابله , توجد شقه فخمه مهيبه , يسكنها مجموعه من المتعلمين المثقفين ,

لديهم أحدث الأجهزه ويرتدون أشيك ( البدلات ) , لديهم أموال ونفوذ لا حصر لها.
فإذا حدث خلاف بين سكان الشقه المشبوهه وسكان الشقه الفخمه , يرسل الطرف الأول موفدا منهم اسمه أبو إسلام , ينزل أبو إسلام من الشقه عريان ملط , اللهم إلا ( اللباس أبو أستيك ) يستر به عورته وفي يديه ( سنجه ) , أبو إسلام شكله مميز جدا بوجود ( 9 بشلات ) في وجهه المشع بالنور , يطرق أبو إسلام باب الشقه الفخمه بعنف شديد , حتى أن الباب كاد يتحطم تحت يديه , فيفتح له الباب شخص مبتسم , يقول له sorry ,can i help you .....وهنا يتلعثم أبو إسلام , فلم يزل تأثير البانجو موجود في دمه , وتذكر الأن أنه لا يجيد اللغه الإنجليزيه ولا اللغه العربيه.
والأصل في المشكله أن واحد متخلفا ( بلديات ) المقيمين في الشقه الجديده , كان قد اهان سكان الشقه القديمه كلهم.
.
هنا صرخ أبو إسلام بلهجه لم يعرفها صاحب البيت وحذره وتوعده , إذا لم يكف بلدياتك عن بذائته فسوف نحرق شقتك , وانصرف أبو إسلام دون أن يفهم صاحب الشقه لماذا جاء هذا الرجل ولماذا انصرف وماذا يريد؟!.
..........................................................................
مشكلتنا أننا نعترف بتخلفنا ورجعيتنا و نردد كل يوم أن أمريكا دوله متقدمه ودوله عظمى , وحين نضطر للتعامل معها نتعامل معها على أنهم متخلفون وغوغاء.

مشكلتنا أننا لانجيد التعامل وليس لدينا لغه للخطاب , لذلك نكون دائما الطرف المظلوم الخاسر , ويكونون هم الطرف الظالم الرابح.

.

محمد حسين 

الفصل الثاني

لماذا لم ينشر شباب الإخوان خبر الإفراج عن حسن عبد الرحمن اليوم , ولماذا نشرو خبر توجيه الإتهام لطنطاوي وعنان , لماذ يصر شباب الإخوان على نشر الفصل الأول من المسرحيه الهزليه( فصل توجيه الإتهامات ) ويمتنعون عن نشر الفصل التاني من نفس المسرحيه( فصل البراءه للجميع )؟!
.
محمد حسين

الشطرنج

في لعبة الشطرنج , الوزير هو القطعه الوحيده التي تتحرك بمنتهى الحريه ,للأمام وللخلف ولليمين واليسار وبالجنب.
وفي مصر في لعبة السياسه , الوزير هو القطعه الوحيده التي تتحرك بناء على تعليمات السيد الرئيس وتنام بناء على تعليمات السيد الرئيس وتموت بناء على تعليمات السيد الرئيس!.
.
لكي نصبح دوله متقدمه , علينا أن نستدعي الوزراء من علب الشطرنج , ونخبرهم فقط أن الملك هو الشعب.
.
محمد حسين

حكايات

لأحلامي حكاياتٌ

وأبنيةٌ

وجندولٌ

وغيطانٌ من الزهرِ

وطفلٌ لم يزل يلهو

بساحة قصره المزعوم!

.

محمد حسين

طائر النهضه

الواد ابن أختي مأصوف الرقبه بيسألني ويقولي ( ياخال , هو طائر النهضه بيبيض ولا بيولد ؟ ).
قلت له ( غور يا وله, داهية تاخدك انت وأمك في يوم واحد , ياحمار يابهيم , طائر النهضه من الطيور المقدسه , والطيور المقدسه يا طور لا بتحلب ولا بتبيض ولا بتولد , الطيور المقدسه بتعُبد يا جحش ).
.
يارب سامحه ده عيل صغير ومبيعرفش.

.

محمد حسين

وادي الذئاب

الحمد لله , قتلت رجلا مسالما أمنا في عقر داري نصرة لرسول الله , بأبي أنت وأمي أيها الشيطان !.
.
رحمة الله على شيخنا الراحل محمد متولي الشعراوي , فبعد رحيله لم أعد أعرف الفرق بين الشيخ الجليل والراقصه المحترمه.
.
الدوله ( الأم ) التي تنجب ( موريس صادق , وجدي غنيم , خالد عبد الله , مصطفى بكري , أحمد شوبير ) هي بالتأكيد أم قضت حياتها تتنقل بين البارات ولم يخبرها أحد أن الخمره والحشيش تؤثر على النمو العقلي والسلوكي للجنين !.
.
أحتاج إلى صديق جديد , صديق يحزن ويأسف لقتل الأطفال في غزه وفي سوريا وفي العراق ويأسف لقتل الرجال في السفاره الأمريكيه بليبيا وفي برج التجاره العالمي , صديق يأسف للقتل بدون وجه حق , صديق لا يسعده منظر الدماء البشريه وهي تسيل , صديق نجا بعقله واستطاع الفرار من وادي الذئاب !.
.
محمد حسين

وجدي غنيم

الحمد لله والصلاة والسلام على رسول الله الذي أمرنا وإياكم بحسن الخلق , أما بعد :
.
( مين دول ال ( تيت ) ولاد ال ( التيت ) أحفاد ال ( تيت ) والخنازير اللي بيسبو سيدنا النبي , عايز أقول لهم إن ال( تيت ) اللي معلقينو على صدركو ده تحطوه في ( تيييييييييييت ) , وحياة أمي اللي هيقرب من سيدنا رسول الله لاطلع ( تيت ) أمه ....( تيت ) أمكو كلكو..)
وصلي اللهم على سيدنا محمد وعلى أله وصحبه وسلم تسليما كثيرا.......
.
دي كانت أخر خطبه لفضيلة الشيخ الجليل وجدي غنيم!.
.
محمد حسين

التأشيره

في معبرِ حبكَ يا وطني...رفضو إعطائي التأشيرهْ ..وأزالو المدخلَ والمعبرْ !................

.

محمد حسين

علم القاعده

منظر جثة السفير الأمريكي وهو مقتول في ليبيا رغم أن المسلمين أجاروه وفتحو له سفاره وتعهدو بحمايتهم بحسب مفاهيم الإسلام والمفاهيم الإنسانيه , هذا المنظر الرائع لدم مسئول أجنبي, أبلغته مأمنه , ثم قتلته سوف يعطي انطباعا إيجابيا رائعا للمواطنين الغربيين عن الإسلام ,أتوقع أن يقدم الألاف من شباب الغرب على اعتناق الإسلام في الساعات القادمه !!.
.إذا كان من نتاج الثورة خروج طارق وعبود الزمر من السجن ليصبحا نجمي مجتمع وقادة أحزاب ,فلا عيب أن نجد علم تنظيم القاعده يوضع على السفاره الامريكيه بالقاهره في مظاهرة تأييد لرسول الله وأنا لا أعرف حتى الان أي علاقه لسيدي رسول الله بتنظيم القاعده.

.

محمد حسين

برقه وضحكه مرسومه

وفوسط الزحمه قابلني دليل

راجل مسكين بيبيع مناديل

وسألته تبيع الدنيا بكام

قالي بلقمه مقسومه

وأغنيه في ساعة العصر

 من سومه

واصلي الفجر في ترابها

واشوف بلدي بتتعايق

برقه وضحكه مرسومه

.

محمد حسين

وبلاد تركب الهوا

تحية إجلال وتقدير للشيخ الجليل اللي حرق الإنجيل , وانا كل مافتكر إن دول اللي بيحكمو مصر ويعلموها الدين , وكل ما فتكر إن المليون مصري اللي بيستخدمو الفيس بوك هما كريمة المجتمع ونخبته المثقفه بقول لمصر تحمد ربنا عاللي بيحصل لها وتبوس إيديها وش وضهر ..... مش هما دول خلفتك ؟ عشان تبقى تفتكري تاخدي الحبايه قبل ماتنامي.
يا أمة ضحكت من جهلها الصومال وليتشتنتاين وبلاد تركب الهوا.

.

محمد حسين

عكازك

حنانك هو راس مالك
وطيبتك هي بروازك
وييجي الليل على ولادك
تلميهم...تغطيهم
إلاهي تفرحي بيهم
ويبقو يا مصر عكازك

.

محمد حسين

علم أمريكا

الحمد لله حرقنا علم أمريكا عشان فيلم متصور بكاميرة موبايل وبكتيره كان هيتنقل لكام عيل بالبلوتوث , الفيلم اللي صورة شوية عيال شغلتهم في أمريكا إنهم يغسلو عربيات هيشوفو ملايين الأشخاص...والعيال دي بعد مظاهره النهارده هينزلو مصر راكبين BMW وهنجري عشان نتصور معاهم!

.

محمد حسين

خليفة قيصر وظله في الأرض

نحن أعطينا ما لقيصر لقيصر , وما لله لقيصر , ثم أصبحنا نعبد قيصر ونحاسب الله على تصرفاته وقدره بنا.
فإذا ألمتك شوكه تقول ( ليه يارب الشوكه دي تيجي فيه أنا دونن عن باقي البشر ؟).
بينما ليس من حقك أن تقول لقيصر ( لماذا تختار المسئولين من أنصاف الكوادر وأرباع وأعشار الكوادر طالما يدينون بالولاء لك ؟!)......................أهلا بنا في دولة الخلافه , حين يصبح الرئيس هو خليفة قيصر وظله في الأرض.

.

محمد حسين

فقد عادت لأيدينا

تعالي نسألُ الماضي

لماذا لم يلاقينا ؟

تعالي نختلي يوماً

نعاتبُ فيه ماضينا

.

تعالي نبدأُ العمر

ببعضٍ من طفولتنا

فقد عادتْ لأيدينا

.

محمد حسين

حفلة زار

أشكال وشخصيات وعقول الساده المسئولين الجدد من محافظين ووزراء وأعضاء في تأسيسيه الدستور والمجلس الأعلى للصحافه وحقوق الإنسان توحى بأن إجتماعهم القادم مع السيد الرئيس سوف يتحول لحفلة زار , مدد يا سيدي العريان مدد !.
.
ربنا يوفقهم ويقدرو يطلعو من جتة مصر الجني ابن الجنيه اللي ناحسها وجايبلها الفقر.
.
محمد حسين

قائد السياره

السيد الرئيس محمد مرسي أصبح قائدا لمصر شئنا أم أبينا , ومش دايما قائد السياره بيكون هو مالكها أو المتحكم فيها , أحيانا كتير بيكون هو الشوفير أو سواق الهانم ( الجماعه ) !.

.

محمد حسين

المستثمرين وحمدين

المستثمرين الأجانب لن يستثمرو أموالهم في مصر بسبب زيارة السيد الرئيس , ولن يمنعهم من إستثمار أموالهم مقابلة حمدين صباحي الذي قال لهم ( مصر وحشه متستثمروش فيها ) !.
.
المستثمر يحتاج إلى 4 شروط ( الأمن ..الإستقرار...الشفافيه الحكوميه...القضاء على البيروقراطيه ) , إذا توفرت هذه الشروط في مصر سوف يأتي المستثمرون بدون زيارة من الرئيس , ولن يمنعهم حمدين صباحي من دخول مصر !.
.
أنا بقيت حاسس إن أول خطوه في استعادة الإقتصاد المصري هي استيراد 80 مليون بافيته ( مريله ) عشان نعلقها على صدورنا لأننا شعب برياله , ومفيش مانع إن توكيل استيراد البافيتات يروح لخيرت الشاطر !.
.
محمد حسين

رئيس وزراء مصر والسودان

كلما أوهمت نفسي أنني سأصبح كاتبا أو صحفيا في يوم من الأيام , أقرا مقاله للشاب ( عمر طاهر ) أشعر بعدها أنني أشبه بحيوان ( السلبنطح ) الموهوب المثقف !.
.
وكلما أوهمت نفسي بأنني أعرف شيئا عن الشعر أقرأ بيتين لفاروق جويده ثم أنظر لنفسي في المرأه .....وانتو عارفين الباقي !.
.
الغريب أن أحدا منهما ( جويده وطاهر ) ليس عضوا في المجلس الأعلى للصحافه ولا حقوق الإنسان.
.
وهنا ظهرت لي بادرة أمل , فحسب معايير الإختيار لدى الإخوان والحزب الوطني من قبلهم أتوقع أن أصبح أنا رئيسا لوزراء مصر والسودان قبل بلوغي سن الأربعين!.
.
محمد حسين

ولا

وطال الليل على ولادك

وإمتى الفجر يتدلّىَ

فقير محروم جفاه النوم

في نار الحاجَه يتقلّىَ

مادول ناسك ومن راسك

مش إنتي يامصر جيبتيهم

بكامل رغبتك ولّا ؟!

.

محمد حسين

شرف الخنافس

إقامة مباراة السوبر ( رغم معارضة الألتراس ) حفاظا على هيبة الدوله !
افتكرت الله يرحمه يوسف بيه وهبي في فيلم ( إشاعة حب ) لما كان الواد ال( إحم ) بيقوله (وشرفي يا أونكل ) ورد يوسف بيه وهو بيضرب الإحم على مؤخرة الطائر بتاعته , وقال له ( شرفك ولا شرف الخنافس ).............ودي بقى تبقى هيبة الدوله اللي ولادها ماتو فطيس ولا هيبة الخنافس ؟!

.

محمد حسين

في سله واحده

عندما أشاهد مدحت شلبي ومجدي عبد الغني وابراهيم يوسف مجتمعين في قناه واحده وفي برنامج واحد.....أتذكر الحكمه الشهيره ( لاتضع البيض كله في سله واحده ).
.
محمد حسين

أحمد ذكي

الفن المصري فيه الهابط والجيد والجيد جدا , وأغلب شباب الإخوان بدللون على أفكارهم بقفشات و ( ألشات ) من الأفلام والمسلسلات المصريه , ثم في نهاية حديثهم لا ينسون هذه الجمله ( لعنة الله على الممثلين والممثلات العاهرات ).
.
تماما مثل الرجل الجائع الذي يجلس إلى المائده وينتقي ويأكل ويأكل ويأكل حتى يمتلئ كرشه ثم يركل الطعام والمائده بقدمه وهو يقول باشمئزاز ( إيه الأكل المقرف ده ).
.
في الولايات المتحده انحلال وفجور أخلاقي , وفيها أيضا علم ومعامل أبحاث واحترام لحقوق الإنسان وعداله اجتماعيه , ولا يتردد قادة الإخوان في العيش فيها لأن المميزات تغطي تماما على العيوب , ويرسلون أبناءهم للتعليم والعمل هناك...وبعد ذلك لا ينسى القيادي الإخواني في نهاية خطبته الإنتخابيه هذه الجمله ( لعنة الله على أمريكا الكافره العاهره ) .
.
تخيل أن بيتك تعرض لحريق هائل وأبناءك نيام , وأنت خارج البيت , فهم رجل من الجيران وعرض حياته للخطر وأنقذ الأطفال قبل إختناقهم , ثم أتيت حضرتك مسرعا ولسانك جاهز ومستعد لكلمات الشكر والثناء ودعوه للصداقه مع هذا الرجل المنقذ الطيب , لكنك رأيت على يديه ( صليب ) فانعقد لسانك ولم تنطق بكلمه ثم أخذت أطفالك وأعطيت للرجل ظهرك وأول سؤال سألته لأطفالك قبل الإطمئنان على صحتهم , ( إوعى يكون الراجل ده عملكو حاجه وحشه ؟ خدو بالكو ده راجل مسيحي كافر , أوعي يا ندا يكون لمس إيدك ؟).
السؤال : عمرك شفت سفاله أكتر من كده ؟! إيموشن أحمد ذكي المنحل الفاسق الله يرحمه.