Mohamed
Hussein
24
سبتمبر 2015·
عايزه 200 جنيه
عيديه يا ابراهيم .
.
هي خمسين حلوه
يا يسريه , و قولي لبيك اللهم لبيك .
..................................................................................................................................
Mohamed
Hussein
24
سبتمبر 2015·
أمي عماله تقولي
اقفل هباب البرك اللي قدامك ده ( اللي هو اللاب توب ) و قوم نام عشان تلحق صلاة العيد
و تفطر مع خواتك .
كبرت مهما كبرت
هتفضل أمي تشتم و تبستف فيا كده , حاضر يا غاليه , هقفل هباب البرك و اقوم انام عشان
صلاة العيد و الوزه و الفته .
.
كل سنه و حضراتكو
طيبين .
.................................................................................................................................
Mohamed
Hussein
23
سبتمبر 2015·
يا ترى الشباب
المفرج عنهم ليلة العيد هيفرحو و يروحو بيوتهم يعيدو على أهاليهم و يصلّو و يكبّرو
ولا هيدخلو عالفيس يكتبو عبث و حلحله و تخرصات و حزين عليكي يا بلدي ؟!.
.
يا شباب حاولو
تفرحو ولو من باب التغيير , خدو نَفَسكو شويه مايجراش حاجه , الثورات مش فعل مضارع
مستمر زي الطور المربوط في ساقيه , و قولو الحمد لله انكو اتقبض عليكو من الشرطه المصريه
في مخالفه لقانون مصري و اتسجنتو بأمر قاضي مصري و أفرج عنكو رئيس مصر , مش اتقبض عليكو
من داعش و لا اتسجنتو في كهوف تور ابورا ولا أفرج عنكو الحوثيين ... الدوله دي عجبتكو
أو لا اسمها في النهايه دوله .
..............................................................................................................................
Mohamed
Hussein
22
سبتمبر 2015·
لما كنا في اسكندريه
من كام يوم , كانت الناس مشغوله و ملهيه بالبحر و المايه و انا و بناتي طول الوقت بنلف
عالشط رايحين جايين نجمع قواقع , أشكال و ألوان , تسألني ليه هقولك مش عارف , هما كانو
حابين كده و انا كمان , يعني الواحد يبقى يكتب في كروت المعايده : ( من هواة القراءه
و جمع القواقع !! ) .
.
عملنا الحكايه
دي كل يوم لدرجة ان الناس اللي قاعدين عالشط كانو بيشوفونا و يتعاطفو معانا و يلمو
قواقع و يدوهالنا , يا عمو يا عمو اتفضل القواقع دي , ألف شكر يا حبيبي , ربنا يجعله
في ميزان حسناتك .
.
و لما رجعنا البيت
ماكنتش عارف هعمل بيها ايه و كان أخر تفكيري إني هختار القواقع اللي فيها خرم صغير
و اعملهم عُقْد بخيط ولا حاجه زي كده , بعد يوم لوجي اتصلت بيا و قالت عايزه مسدس شمع
و شمع و كانسون شارت لونه اسود , بعتت العامل جابهم و وداهم لها , و روحت بالليل لقيتهم
عاملين الشكل ده ( الفازه ), علبة شيبسي معدنيه ( صفيح ) كانت اختي جايباها للبنات
من دبي , و عليها فرخ الورق الإسود ملزوق بالشمع و القواقع تتثبت عليهم أشكال و ألوان
على شوية خرز من اكسسواراتهم و شوية دانتيل ماعرفشي من حاجات قديمه عندهم .
.
لوجي و لمار غالبا
استعانو بصديق او بمواقع لها في ال Artcraft
لكن ده مايمنعش ان الفكره عجبتني أوي و الأداء و التنفيذ , ده جيل
جديد من الزمالكاويه و طالع , مدرسة الفن و الهندسه فتحت بيبانها عالأخر .
.....................................................................................................................................
Mohamed
Hussein
21
سبتمبر 2015
أنا روحت أجيب
المعاش و لقيته كام ميه .... و لقيت كتير طلبات بتحوم حواليا ...أدي ميتين كاملين للأكل
ولّا الشرب ..و متين لضغط و قلب ..و زيهم فواتير....و الباقي برضه قليل مايجيب جلابيه
دي حسبه لو تتظبط
هتخون دفاترها
تسألني ماشيه ازاي
...هقولكم بالستر ..هو اللي ساترها.
.................................................................................................................................
Mohamed
Hussein
21
سبتمبر 2015·
ايه بقى ايه ؟
ناخد دوري و ناخد كاس و نلب الأهلي اتنين , مش ناقص غير فريرا يشكّل الحكومه الجديده
في مصر .
.
#زملكاوي_وعيلتي_كلها_زملكاويه
.
.....................................................................................................................................
Mohamed
Hussein
21
سبتمبر 2015·
و هو انت يعني
لما تغرّق الشريط الحدودي بالمايه عشان تهد الأنفاق على دماغ اللي فيها تتوقع من بتوع
حماس يقولو إيه ؟ طبعا هيقولو المايه دي مالحه و هتأثر عالمايه الجوفيه عندنا و هتهد
البيوت اللي عالشريط الحدودي !! اه طبعا و بما إنها مايه مالحه فأكيد هتأثر على بشرة
خالد مشعل ( يوووووه خالد مشعل مش عايش في غزه ) و هتأثر على ثقب الأوزون و مؤشر ناسداك
و حركة الأجرام السماويه و هتعمل تغييرات كمان في الجدول الدوري بتاع مندليف و جدول
الدوري بتاع الكوره , طب خلاص المره الجايه هنبقى نغرق الشريط الحدودي بماية زمزم أو
هبعت لهم ماية حقن من عندي من الصيدليه عشان معقمه .
.
يابه انت بتتكلم
عن ناس لما بيحصل اقتحام للمسجد الأقصى بيطلعو يصوتو و يقولو افتحو معبر رفح !! مع
إني مش عارف ايه علاقه معبر رفح بالمسجد الأقصى بس أهي الأرض كرويتن تلف حول نفسها
, ناس من الأخر الشيطان بيتعلم منها أصول و فقه ( الوساخه ) , تلاقي القيادي الحمساوي
كده جايب ابليس و عياله في جلسة علم و هما قاعدين قدامه و مستربعين , و هو ماسك الخرزانه
و يقول لهم اتعلمو ياولاد الكلب دانا بقالي 10 سنين بشرح لكو لحد ماصوتي اتنبح .
.....................................................................................................................................
Mohamed
Hussein
20
سبتمبر 2015·
أصدقائي الأعزاء
........... تنويه هام .
.
بكره بإذن الله
و في تمام الساعه السابعه مساءً بتوقيت القاهره هختفي فجأه أنا و أبناء جلدتي من الزملكاويه
, ماتقلقوش علينا , احنا هنبقى موجودين عالفيس بس متنكرين ولابدين في غيط الدره , تحسبا
يعني لأي ظروف , و الله حصلت المعجزه و عدالة السماء نزلت على ستاد بتروسبورت هنطلع
من غيط الدره و نيجي ننفخ شريف اكرامي و شلته و نطلّع كبت و ألش السنين , حصل زي مابيحصل
أدينا لابدين , و غيط الدره بيجمعنا .
....................................................................................................................................
Mohamed
Hussein
20
سبتمبر 2015·
نظرية دارون في
مصر ... تاريخ 100 سنه تطوّر , من أول الهمزه و الشده ( بتوع طه حسين ) لحد الحطه و
القَطّه ( بتوع مدحت شلبي ) .
.
لأصدقائي اللي
زعلانين اوي و بيقولو كرسي وزير التعليم قعد عليه طه حسين , اتفضلو معايا في الصالون
.
.
- زمان قريت حكايه
عن باحث كان بيحضر رسالة دكتوراه عن ( أبو فراس الحمداني ) , الباحث قعد سنتين تلاته
يذاكر و يبحث و يتفحت بس حظه الهباب وقعه في لجنة بيرأسها طه حسين هتناقش له الرساله
, طه حسين سأل الباحث رسالتك عن مين ؟ الباحث قاله ( أبو فرّاس الحمداني ) نطقها كده
( بفتح الفاء و تشديد الراء ) زي ماحنا بننطقها , طه حسين قاله صفر , تُعاد الرساله
على أن يعرف الباحث اسم مَنْ يبحث عنه , و اسمه أبو فِراس الحمداني ( بكسر الفاء و
فتح الراء من غير تشديد ) !! .
.
- حكاية تانيه
عن طالب مجتهد أوي في اللغه العربيه و كل سنه يدخل امتحان الماده بتاعة دكتور قراري
و ياخد صفر مع انه مجاوب كويس جدا , يعيد الإمتحان تاني سنه و ياخد صفر و في تالت سنه
راح للدكتور و سأله : يا دكتور انا بجاوب كويس أوي و باخد صفر ليه كل سنه ؟ الدكتور
قاله أه يبقى انت اللي بتكتب همزة الإجابه على الألف مش تحتها ( الأجابه ) , و الله
يابني مابفتح كراسة إجابتك ولا ببص فيها , بشوفها من بره و اديك الصفر !! .
.
صديقي العزيز
, الناس دي كانت زمان و زمان كان فيه طه حسين قاعد على كرسي الوزاره و العقاد قاعد
عالقهوه و نجيب الريحاني عالمسرح و أم كلثوم بتغنى و السنباطي بيلحن و أحمد شوقي بيمخمخ
و رامي بيكتب و يتدلع و الست بتلبس جيبه قصيره و الواد الصايع أوي لما يقرب من واحده
عشان يعاكسها يقول لها ( ممنون يا هانم ) .............ده كان زمااااااااااااااااااااااااااان
.
.
دلوأتي سيادتك
احنا في زمن أوكا و أورتيجا و زاب ثروت و مشايخ البترودولار و المزه و البناطيل الستريتش
و الحطه (و القطه) و سعيد الهوا و التحرش بالصوابع و المجاميع 110% في الثانويه العامه
و مدرسين العربي مايعرفوش الفاعل من المفعول , يا مولانا احنا في زمن الغباوه , تقولي
طه حسين كان قاعد هنا , مرارتي مش مستحمله , أه بالمناسبه كرسي رئيس الوزاره اللي قعد
عليه هشام قنديل سكرتير بديع ( السيكا بتاعه ) كان قاعد عليه سيدنا يوسف
.
.......... وزير
التعليم ده مجرد واحد مننا , واحد زينا ( أو ذينا ) , قول للزمان ارجع يا زمان , ارجع
يا ذمان !!.
.......................................................................................................................................
Mohamed
Hussein
20
سبتمبر 2015·
هههههههههههه و
عهد الله هم يضحك فعلا , الحكايه فرطت عالأخر , المذيعه ( اللبنانيه ) ليليان داود
مش عاجبها وزير التنميه المحليه , و الصحفي ( السعودي ) ماعرفشي مين مش عاجبه وزير
الثقافه و الناشط ( النمساوي ) محمد البرادعي مش عاجبه الحكومه على بعضها , و مذيع
الجزيره ( القطريه ) مش عاجبه وزير التعليم .
.
و فيه كلام كده
إن راعي غنم ( موزمبيقي ) رفض يسرح بالغنم النهارده و لما أهل القبيله سألوه ماسرحتش
بالغنم ليه قالهم انا معترض على وزير النقل في الحكومه المصريه الجديده .
.................................................................................................................................
Mohamed
Hussein
20
سبتمبر 2015·
خايف على مصر من
اللي حزين عليها ليه مكانشي حزين زمان ؟ , ولّا خايف م اللي عاش في سنين بيهري بس ساعة
الجد يجري راح يدوّرعالأمان ؟ , لسه خايف م المخطط و المقدّر و اللي مكتوب عالبيبان
؟ .
.
طول ماجيشها الحر
عايش يحمي أرضك و المدينه , طول ما بذرة خير بتكبر جوه فينا , تبقى مصري قولها واضحك
, طزززززززززز في ولاد اللذين .
.......................................................................................................................................
Mohamed
Hussein
20
سبتمبر 2015·
الباز أفندي
.
في حياتنا دي كام
باز أفندي ؟ ساقط توجيهيه و سمسار مراكب و قباني و محلل سياسي و خبير عسكري و مدقق
لغوي , سيباويه و ابو الأسود الدؤلي مماتوش , و من امبارح اتحول الخبراء العسكريين
لفقهاء في الإملاء و النحو و رُبّان للمركب نورماندي تو , الموضوع وصل عندي لحد صفحتي
, ستوب هنا , عندك يا سيد المعلمين , انت كده بتبيع المايه في حارة السقايين .
.
مولانا المدقق
الإملائي و كل من هو شغال باز أفندي من امبارح , ياريت ترجعو لصفحاتكو وتقرو بوستاتكو
تاني ولا أدخل أجيب لكو الجلاليب من الدولاب ؟ دانا بشوف مهازل عالفيس و حروف و كلمات
تجيب بواسير , في الفصحى احنا ضايعين و في العاميه كمان , مفيناش أستاذ حمام و التعليم
محتاج وزير معاه قنبله ذريه عشان يفوّره و يخلصنا من حكاية الدروس و الطلبه اللي هجرت
المدارس و الأسر اللي اتدمرت بسبب تعليم عيالها , وزير بالشكل ده هيكون مرضي جدا بالنسبالي
حتى لو كتب يذاكر بحرف السين ( يساكر ) .
.
ملحوظه : سيباويه
بتتكتب من غير ألف , بتتكتب كده ( سيبويه ) بس ممكن مجازا بحسب النطق الدارج تكون مبلوعه
, و ابو الأسود ناقصها همزه في الأول (و أبو ) في الفصحى و في العاميه من غير همزه
, و في العروض لو بتكتب عاميه حرف الألف بيختفى من الوزن تماما يعني مالهوش وجود و
تبقى كده ( وبو) متحرك متحرك ساكن ( فَعنْ ) , إجمالاً لو مش عارف الكلمه بتتكتب ازاي
اسأل مولانا الإمام العلامه جوجل محمد جوجل زي مانا بعمل بالظبط , كنت بغلط كتير في
حرف ال (ز ) زمان من قلة التركيز و بقيت اسأل مولانا جوجل لحد ما اتعلمت , أنا كده
أبقى أحق بالوزاره من الهلالي .
.
#عمتم_صباحاً
.
..........................................................................................................................
Mohamed
Hussein
19
سبتمبر 2015·
ياريس
.
و النبي يا شيخ
الله يكرمك , قبل ما تختارو تشكيل حكومي شوف الأسماء المرشحه عندها أكاونتات عالفيس
ولا لا ؟ , ولو لقيت اتأكدو انه مابيغلطش في حرف ال ( ز) مع إن العاميه بتعتمد عالنطق
و كلنا بنغلط في حرف ال (ز ) و الأحسن تجيبو الوزير من كتاب عبد المجيد الصحّاح , و
كمان يُفضل إنه يكون مابيكتبش نكت ممله عالفيس و ألشات من اياها مع إننا عايمين في
بحر من النكت الممله و الألش الهايف , و ياريت و حبذ و جهبذا لو عرفت هو بياكل المانجه
ازاي في بيتهم ؟ ياترى بالشوكه و السكينه ولا بالفالنه الحمالات و يلغوص , مالخيبه
لا يكون بيلغوص زينا , الحاجات دي أصلها بتفرق معانا أوي , و لو فيه ستات في الأسماء
المرشحه تبعتهم لاحمد موسى عشان يقول لهم هيلبسو ايه و البروتوكول بيقول ايه و ياريته
يفصل هو فساتين و تاييرات الوزيرات بإديه الشريفه دي .
.
احنا أصلنا مش
بنقيم المرشحين إحنا بنفلّيهم , بنشتغل فلايه ياريس الله يعزك , و عشان ترتاح من الزن
بتاعنا عالفيس بوك هقولك من الأخر , انت تخلع إيدك من الموضوع كله و تقول ياشباب احنا
عايزين 33 وزير لوزارات كذا و كذا و تعرض الموضوع في حوار مجتمعي ( عشان كمان تعجب
جميله اسماعيل )و تسيب ال 20 مليون مصري اللي عندهم أكاونتات عالفيس يختارو هما التشكيل
الوزاري , و عهد الله هنبهرك , و الله هنبهرك و هتلاقي قدامك 40 مليون قايمه بأسماء
الوزرا بمعدل قايمتين من كل مواطن عشان كل واحد فينا عنده اتنين أكاونت يعني داخل عالفيس
بنفرين و أكيد وجهة نظر النفر الأولاني تختلف تماما عن وجهة نظر النفر التاني .
.......................................................................................................................................
Mohamed
Hussein
19
سبتمبر 2015·
نبيله مكرم , سحر
نصر , غاده فتحي , اللهم لك الحمد و الفضل و المنه , اللهم باعد بيننا و بين تهاني
الجبالي كما باعدت بين المشرق و المغرب .
............................................................................................................................
Mohamed
Hussein
19
سبتمبر 2015·
سُئل حكيم الزمان
: يا حكيم , فمن هو الكولجي يا تُرى ؟ .
.
فقال الحكيم :
يا بني , أما الكولجي فهو ذلك الشخص الذي لو جبت له ورقه و قلم و قلت له اكتب لنا هنا
أسماء الوزرا اللي ترشحهم للتشكيل الوزاري و خليته يكتب فعلا , و بعد ساعه ورّيت له
نفس الورقه اللي هو كاتبها بإيده و سألته إيه رأيك في التشكيل الوزاري ده ؟ هيقولك
زفت طبعا و سئ جدا و دون المستوى و لا يبشر بخير , مانا قلت مفيش فايده و كأن ثوره
لم تقم .
.
على الهامش : مره
وانا في الكليه كان عندنا اتنين معيدات في قسم العقاقير , واحده فيهم اسمها أمل و التانيه
حنان ( أمل الصغيره و حنان الكبيره ) , أمل بقى كانت تطلب مننا نرسم لها شكل الخلايا
في قطاع عرضي للنبات من تحت الميكرسكوب , و كل ما واحد فينا يرسم و يروح لأمل يوريها
الرسم بتاعه تقوله زفت زفت مين الحيوان اللي رسم الزفت ده ؟ , المهم عشان احنا كنا
عيال مخلصين و مقطعين البطاقه عملنا حركه حلوه , روحنا للمعيده التانيه حنان في يوم
و قولنالها احنا مش عارفين نرسم الخلايا دي ممكن حضرتك ترسميها هنا في أجندتي ؟ فرسمتها
حنان و قمت واخد الاجنده موريها لأمل : قالت لي زفت زفت مين الحيوان اللي رسم الزفت
ده ؟ قلت لها الدكتوره حنان ( ربنا يقدرنا على فعل الخير ) !! .
.
غالبا امل دي لما
كبرت بقى اسمها جميله اسماعيل .
...................................................................................................................................
Mohamed
Hussein
19
سبتمبر 2015·
أكتر اتنين عاجبني
في الحكومه الجديده هما أحمد زكي بدر وزير التنميه المحليه و سحر نصر وزيرة التعاون
الدولي , الأولاني عشان شخصيته قويه و التانيه عشان حواجبها حلوه .
......................................................................................................................................
Mohamed
Hussein
19
سبتمبر 2015·
زمان كان مدرب
الزمالك يقولك أنا أحط رضا عبد العال في التشكيل و أكمل الفريق بأي 10 لاعيبه تانيين
, و لما رضا عبد العال راح الأهلي كان مدرب الأهلي يقول نفس الكلام , عبد العال في
التشكيل و نكمل بأي حد .
في الحكومه الحاليه
و اللي قبلها مدرب الحكومه قصدي رئيس الحكومه بيلعب دور مدرب الأهلي و مدرب الزمالك
, أنا أحط أحمد الزند و أكمل الفريق بأي لاعيبه تانيين .
.
أحمد بيه الزند
هو البلاي ميكر بتاع الحكومه و كل حكومه , هو صانع الألعاب و صانع اللذه و صانع البهجه
و صانع البيتزا .
.
طب هو أكيد لاعيب
حريف و كل المدربين مقتنعين بيه , أومال انا مش طايقه ليه ؟ و الله مانا عارف , أكيد
العيب فيا , ربنا ينتقم مني بقى .
.......................................................................................................................................
Mohamed
Hussein
19
سبتمبر 2015·
ههههههههههههه
اضحكو يا عيال , سفير قطر يقود مصالحه بين حماس و اسرائيل !! , الخبر ده بالظبط زي
خبر كان ممكن تقراه زمان : سيد يوسف (لاعب الترسانه ) يقود مصالحه بين ابراهيم يوسف
و اسماعيل يوسف ( و التلاته خوات و شبه بعض بالظبط ) , يعني أسره مع بعضيهم .
..................................................................................................................................
Mohamed
Hussein
18
سبتمبر 2015·
سؤال و له إجابه
.
إزاي الإداره الأمريكيه
قدرت تقنع المواطن الأمريكي إنها بتحارب الإرهاب و إن الإرهاب ده كخه و في نفس الوقت
نفس الإداره دي بتستضيف قيادات الجماعات الإرهابيه على أراضيها و بتدعم إرهاب داعش
في سوريا و ليبيا ؟ و إزاي قدرت تقنع المواطن الأمريكي إنها نشرت الديموقراطيه في ربوع
العراق بعد ما خربتها مداين ؟! .
.
الإجابه باختصار
: عشان المواطن الأمريكي مثقف و فاهم و عارف يعني إيه مصلحة بلده , امريكا مفهاش خرفان
ولا كولجيه ولا حركة 6 زفت , إنما فيها مواطن عارف إن الديموقراطيه داخل أمريكا هي
( بيض ) و خارج أمريكا ( مش بيض ), يعني عارف إن الحكومه بتاعته بتبيع شعارات وفلايات
بره أراضيها عشان تحافظ على مستوى معيشي معين لمواطنيها و تعرف تسوّق لاقتصادها و أسلحتها
و تحافظ على أمن و سلامة الكيان الصهيوني , و طبعا هو كمواطن موافق جدا , مش بس موافق
ده مستعد تماما يفرش بنفس شعارات و فلايات الحكومه في شوارع شيكاغو وفي السي إن إن
والواشنطن بوست .
.
بس ده مايمنعش
( و إحقاقا للحق ) إن المواطن العربي هو كمان مثقف و فاهم برضه و يعرف يفرق كويس جدا
بين صدر صافيناز و مؤخرة كيم كارديشان .
.......................................................................................................................................
Mohamed
Hussein
18
سبتمبر 2015·
العمليات العسكريه
في سينا مابتتوقّفش , كل يوم , صبح و ليل , خدمه 24 ساعه , الرجاله هناك مابيناموش
, بيلمّو الفيران و ينضفو أرض الفيروز , صحرا و مطاردات , مدافع و دبابات , نار و عرق
و دم , كل واحد فيهم بيطلع من كتيبته و هو حاطط احتمال 50/50 , خمسين يرجع خمسين مايرجعش
.
.
وانا صحيت من النوم
بعد صلاة الجمعه , حتى مالحقتش الصلاه , و شربت النسكافيه بتاعي و نزلت فتحت الصيدليه
, بين الصيدليه و البيت 4 دقايق مشي , بس انا جيت بالعربيه عشان مش معقول امشي 4 دقايق
, و فتحت الباب و شغلت التكييف وفتحت اللابتوب و بعتت العامل يجيب لنا فطار و لما فطرت
حسيت ان دماغي تقيله و عايز أنام تاني , يااااااااااه عندي كسل سوداني أصلي , لا لا
, أنا بتعب أوي و ببذل مجهود خرافي , انا كده المفروض أبقى بطل قومي و صورتي تنزل عالجنيه
.
.....................................................................................................................................
