فكره

فكره حلوه برضه
.
الإخوان وقطر عندهم مليارات متلتله , ممكن يكونو رشو السيسي ( ومعاه المجلس العسكري ) بكام مليار عشان مايقفشي مع الشعب في 30 يونيو , وبعدين السعوديه والكويت هما كمان عندهم مليارات متلتله قامو رشو السيسي بكام مليار عشان يقف مع الشعب ويعزل مرسي , قام السيسي لأنه ماكر و مخادع ( ومعاه المجلس العسكري ) خد المليارات من هنا والمليارات من هنا وعبّاهم في زكايب وخباها في بطن الزير , وضحك على الإتنين , عزل مرسي صحيح لكن ساب الإرهاب زي ماهو ( إيموشن واحد بيحط صباعه على عقله دليل المفهوميه وكده ) !!.
.
يعني باختصار السيسي وقيادات الجيش المصري اللي اتفحتو 40 سنه في تراب مصر وجيشها خاينين وبالتالي يبقى الجيش المصري كله خاين , وطبعا الداخليه نابها من الحب جانب تبقى خاينه هي كمان والقضاء هو خاين في كل الأحوال , ونقابة الصيادين والعمال والفلاحين والصيادله خاينين والشعب المصري خاين .
سؤال لصديقي ( اللي حط صباعه على مخه دليل المفهوميه ) : هل تعتقد إن ال 90 مليون مصري فيهم حد شريف وعنده ضمير غير البرادعي ؟! سؤالي بمعنى أوضح , باباك ومامتك معانا في ال90 مليون الخاينين ولا مع البرادعي ؟ ولا هيفضل البرادعي لوحده كده يحلق وحيدا متفرداً في دولة الشرفاء ؟!!.
.
وبعد الرأي الهمام اللي كله مفهوميه ده لا يسعني أنا المواطن فلان الفلاني إلا أن أعلنها صراحة , نعم للدستور بتاع الخاينين , نعم للسيسي الخاين رئيسا , نعم لجيش مصر الخاين , نعم لشعب مصر الخاين , ...إبعت نصيبي بقى يا معلم سيسي في المصلحه دي , توتُه على كبُّوته , ويمين بالله ما هقبل أقل من فدانين أرض وجاموسه !!.

.

محمد حسين 

منوع ... محمد حسين

November 28

وان كنت ناسي أفكّرك !.
.
صباح الخير
لجنة دستور أعضاءها نادر بكار وأم أيمن و واحد عجلاتي وفرارجي , ومجلس شورى بيتكلم عن اللعبه اللي جت من الصين وبتسب السيده عائشه , واحد بيأدن في البرلمان وناس مش عايزه تقف للسلام الوطني .
.
إعلان دستوري في نصاص الليالي بصلاحيات إلهيه تحت بند تحقيق أهداف الثوره , وراجل تخين كده وبكرش , عريض المنكبين محاصر مدينة الإنتاج الإعلامي وعمل قدامها حمامات وجاب عجول وبدأ يدبحها , إعتداء على الصحفيين والإعلاميين والضيوف قبل دخولهم للبرامج الفضائيه .
.
عريض المنكبين بيحاصر المحكمه الدستوريه لمنع قضاتها من إصدار أي قرار , ونائب عام جاي من ( قطر ) عشان يجيب حق الشهدا !! .
.
تعذيب للمواطنين أمام وداخل قصر الإتحاديه بمعرفة البهلول أبو رياله , والإعتداء بالضرب على سفير مصري ومهندس في شركة تكنولوجيا عالميه واتهامهم بإنهم بلطجيه .
.
أم أيمن بصّت من شباك قصر الإتحاديه وشافت الولاد والبنات في الخيام بيمارسو الجنس ومعاهم واقي ذكري , والمذيعين في قنوات مصر 25 والناس والرحمه وغيرها بيطالبو باعتقال يسري فوده ومنى الشاذلي وباسم يوسف والإبراشي وعيسى وإيداعهم في السجون بدون محاكمات .
.
هتصوّت بنعم عالدستور وتدخل الجنه ولا تصوت بلا وتدخل النار ؟ والجيش حمى الثوره والشرطه شريك في ثورة يناير وبنشكر باكستان على مجهوداتها في حرب اكتوبر .
.
المعترضين على حكم مرسي هما 5 6734 في حاره زانقه وبيعملو حاجات مش حلوه ( تصريحات البهلول ) , مرسي وعدنا بإعادة حلايب وشلاتين لنا أثناء زيارته ( تصريحات نائب الرئيس السوداني ).
.
كفايه كده يا صاحبي , مش مهم أكمِّل , إنت عارف وانا عارف والعارف لا يُعرّف , مشكلتك مش في قانون التظاهر ولا قانون المحاكمات العسكريه , كل الحكايه إنك عايز البرادعي يحكم مصر , أي نظام حكم مفهوش البرادعي يبقى باطل وفاشي , قانون التظاهر هيتعدل ولو متعدّلش فمفيش شعب حر بيكتفه قانون ويمنعه من التظاهر , وقانون المحاكمات العسكريه ده موجود في مسودة دستور لسه ماصدرش , ولو صدر بالشكل ده فمطلوب من حضرتك تنزل وتصوت بلا ..تسقط الدستور بأكمله .
.
ولو قولتي لي البرادعي هيحكم مصر إزاي هديك شوية فول سوداني من العلبه دي ؟ بالثوره والتظاهر ؟ يوك ( باللغه الأردوغانيه ) , عشان تبقى عبيط لو تخيلت إنك هتنجح في ثوره ضد الشعب والجيش , ولو بالديموقراطيه والصناديق ؟ يوك برضه وانت عارف أخرك فين وكام , حلّك الوحيد هو دعم الإخوان والسلفيين و الجهاديين وعبود الزمر للبرادعي عشان احتمال ينجح , والناس دي يا صاحبي بتاخد حقها مقدّم , توته على كبّوته , وحقها انت عارفه كويس واسأل العساكر اللي ماتو .
.
عشان كده هقولك رأيي بالفُم المليان , أنا موافق إن مصر يحكمها رئيس عسكري جاي على ضهر دبابه مصريه ومش موافق يحكمها رئيس مدني جاي على ضهر مدافع الإرهابيين ودم العساكر الغلابه .

            حقيقه علميه
.
إذا كانت أسماء محفوظ هي ( عُكّاز إبليس ) فإن أحمد ماهر هو صاحب المحل اللي باع لإبليس العكاز وقال له ( خد دي على ضمانتي يا برنس ) .
ومن يوميها وإبليس ساند وعاكز وضارب كوعه اليمين ( أه بالظبط زي سوّاقين الميكروباسات ) ومن غير محرم كمان !!.
.
وقالك إبليس كان هيطبّق الشريعه و هو فصيل وطني بقى.
.
تبّتْ يدا إبليس وعكازه.... وألْف تَبْ لصاحب المحل !!.
.
من فضلك أيها الناشط المحموق : إقرأ كتاب ثورة يناير من أول صفحة وصول محمد مرسي لجولة الإعاده .

            عايز الحل ولا عايز حكاية ناشط سياسي دي تبقى مهنه ؟!
.
الحل بسيط خالص :
1- عندك دستور بيتكتب وهيتعمل لك استفتاء عليه لو مش عاجبك انزل صوّت ب لا وسقطه , سهله أهي ... بتتظاهر ليه بقى ؟!.
.
2- عندك قانون تظاهر لو مش عاجبك وشايفه مجحف طالب بتعديله أو تظاهر ضده بطريقه محترمه عشان مش تضيّع حقك , وخلي بالك انت نازل تتظاهر ضد قانون معين , إرفع شعارات بسقوط القانون مش سقوط النظام يا برنس !!
.
3- ابدأ استعد لأن الإنتخابات جايه , وبشكلك العفش ده ( حاليا ) مش هتاخد حاجه في أي انتخابات وهتقعد تولول زي الستات بعدها .
.
4- هات ( حباظه ) في انتخابات الرئاسه بصوتك , أو هات مرعي بتاع الكليمه أو خالد علي أو أي حد يعجبك ( صوتك وانت حر فيه ).
.
5 - هفك الشوق للتظاهر بدون سبب عشان يعني تفك عضلة السمّانه وترفع لياقتك البدنيه مفيش مشكله , بس مش من باب أولى تعمل مظاهره ضد الإرهاب ترفع فيها صورة العساكر الغلابه اللي بتموت عشانك و لا إيه ؟!
.
.............................
عايز تبقى مهنتك ناشط سياسي وتتظاهر من أجل التظاهر فانا هقولك برضه
.
1- لو بنات إخوان اتحكم عليهم بالسجن في قضايا تخريب وهيدخلو الأحداث وشايف الحكم ظالم انزل تظاهر وتعاطف معاهم , بس العسكري اللي مات مايستاهلش أصل صورته منزلتش في الجزيره وشبكة رصد وضحكته مش بريئه وريحته وحشه كمان .
.
2- لو فيه ماده في دستور انزل تظاهر ضدها واهتف بسقوط النظام مش سقوط الماده .
.
3- لو عندك نظام حكم مؤقت كل مهمته إنه يعملك دستور ( وانت اللي هتقبله أو ترفضه ) وانتخابات ( وانت اللي هتنتخب فيها ) , طالب بسقوطه عشان مفهوش الناس اللي انت بتحبها أو تقريبا لسه مخترعناش الذرّه في عهد عدلي منصور !!.
..............................
الحكايه سهله , بتتظاهر عشان قضيه معينه ولا بتتظاهر عشان تتظاهر و يتقال عليك متظاهر وتٌحشر مع المتظاهرين والمتظاهرات ؟!.

يتهيألي كده , مصر ( اللي هي الأرض والوطن والتاريخ ) بعد اللي شافته في السنتين تلاته اللي فاتو محتاجه جلسات تدليك ومساج و تأهيل نفسي لمدة 19 سنه جايين , أه نسيت , و 120 طن حشيش عشان تعرف تظبط دماغها , ثوره دي ولا ستانجالينا ؟!!.

            فرارجي الثوره !!
.
وعهد الله احنا فاهمين الديموقراطيه غلط خالص , صحيح إن من حق أي حد يحلم برئاسة مصر بس ده مش معناه إن كل من هبّ ودب يترشح للرئاسه , مش طابونه هي ولا جُرن الهبله ,... من حقك حاجه وإنك تكون مؤهل لكده حاجه تانيه خالص .
كل لما بشوف واحد فسل رقيع مالوش أي تلاتين لزمه وبيفكّر إنه يترشح لرئاسة مصر و عايز يبقى الرئيس وكداهون ( بيمارس حقه الديموقراطي بقى) , بفتكر مشهد من فيلم الكرنك , فريد شوقي وهو ماسك ( قارعة البوزه ) في إيده وبيقول للمعلم على الشريف ( الفرارجي ) لما جه يطلب إيد سعاد حسنى ( عليا النعمه انت مش بتتكلم , إنت بتنهق , دي دكتوره يا عالم , دكتووووووووووووووووووره ) .
.
وانا بقى في السنتين تلاته اللي فاتو خلّصت ييجي 40 قارعة بوزه وسمعت عن 40 مرشح للرئاسه كلهم يحملون لقب ( فرارجي الثوره ) !!.

November 29

مساء الخير , قبضو على علاء عبد الفتاح , رئيس مجلس إدارة جمعية ( خُلقنا لنعترض ...ونصلّح راديوهات ) !!.
.
وكيل النيابه ( في التحقيق ) : أهلا علاء بيه , تشرب شاي ولا قهوه .؟
علاء بيه : أنا أعترض على الطلب و أرى فيه محاوله فاشله من نظام فاشي قمعي لاستمالتي .
.
وكيل النيابه : طيب يا علاء , ياكشي تتحرق بجاز , بلا شاي بلا زفت , خلينا نبدأ التحقيق .
علاء : أنا أعترض على أسلوبك في الكلام , وده دليل على إن الشرطه والنيابه مصرّين على الإستمرار في بلطجتهم اللفظيه والماديه والمعنويه
.
وكيل النيابه : يابني ماتتعبشي قلبي معاك , أنا ورايا ناس غيرك , إسمك علاء عبد الفتاح صح ؟!
علاء بيه : أنا أعترض على إسمي , ومن حقي أقول أي إسم يعجبني , حريه شخصيه , إكتب عندك إسمي المعلم ( أبو العلاء المعرّي ) .
.
وكيل النيابه : وكنت بتدعو للتظاهر من غير إذن داخليه ليه يا أبو العلاء يا معرّي ؟
أبو العلاء : أنا حر , وطول عمرنا بنتظاهر من غير تصريح , حريتنا بننتزعها بإدينا مش بموافقه من حد .
.
وكيل النيابه : بس التصريح مطلوب لتنظيم العمليه يا أبو العلاء , والنظام ده موجود في كل الدول الديموقراطيه بشكل ما , يعني في امريكا مش ممكن تتظاهر من غير تصريح .
أبو العلاء : مصر غير أمريكا و احنا اللي عملنا ثورة يناير .
.
وكيل النيابه : طيب أفهم من كلامك إن الحكومه لو لغت قانون التظاهر , هتقول لأنصارك مينزلوش لأن مفيش داعي للنزول ؟
علاء : لأ طبعا , إحنا هننزل وقتها عشان هتبقى حكومه ضعيفه ومهترئه ومش بتعرف تثبت على رأي ولا تطبّق قوانينها .
.
وكيل النيابه : يا مثبت العقل والدين يارب , طيب يابني قوم روّح بيتكو , براءه .
علاء : يعني إيه براءه ؟ واحد اخترق قانون التظاهر ودعى لعدم احترام قوانين الدوله , إزاي تطلعه براءه ؟ أنا أعترض عالبراءه !!!.

مصطفى النجار كان بيقول إنه مش بيعرف ينام من ساعة ما سمع خبر الحكم على فتيات الإخوان , مع إنه كان بينام بعمق لما يشوف صورة العساكر الغلابه المقتولين و دمهم سايح , ما علينا , حد يبلغ الأستاذ مصطفى إن عدلي منصور وعد بالإفراج عن بنات الإخوان .
بصفه شخصيه أنا أرفض العقوبه اللي صدرت ضد فتيات الإخوان لأنها مبالغ فيها , وفي نفس الوقت أرفض فكرة إن رئيس الجمهوريه يكون من حقه أو من صلاحياته الإفراج عن متهم أيا ما يكون حتى لو كان أبويا الله يرحمه , دي مش دوله كده , لكن على أي حال , اهو يبقى عدلي منصور نفع البلد بحاجه , إيه هي الحاجه دي ؟ إنه قدر يساعد الأستاذ مصطفى النجار على النوم , ألف شكر لسيادة المستشار عدلي كالميبام !!.

شيل الواد م الأرض !!
.
من يوم ما حكمنا البهلول محمد مرسي وانا بتريأ أوي على حاجه معينه كانو بيرددوها بغباوه , حكايه إنه خليفة المسلمين أو حفيد عمر بن الخطاب وعمر بن عبد العزيز وعمر أفندي , وحكاية إن مصر جاي لها استثمارات بدشليون دولار واكتشفنا بير بترول أد الدنيا ومنجم دهب هيخّلي كيلو الدهب في مصر أرخص من كيلو الأوطه , وحكاية إن المستثمرين جايين مصر عشان يدخلو في دين الإستثمار أفواجا !!
وقلت ماشي أهو تهريج ناس نصابين بدقن وبيمشو وراهم ناس معاتيه برياله.
.
وعلى نفس السياق والنسق ( حلوه النسق دي يا حاج محمد ؟ ) , لازم أعبّر عن شعوري بالإشمئزاز والغثيان من كل واحد بيقول هو عدلي منصور محلش مشكلة الجهل والفقر والبطاله ومفتحشي عكا في الشهرين تلاته اللي فاتو وجاي يعمل قانون تظاهر ؟!! .
إف بجد والله , حاجه في منتهى اليَعْ العقلي , أه يا سيدي , مفيش حد هيحل المشاكل اللي فوق دي إلا رئيس دائم وفي مدة زمنيه طويله , كون إنهم فهموك إن فيه زرار كده هيدوس عليه رئيس الوزاره تقوم البلد تخلو من الزباله والبشر بقدرة قادر يتعلمو يرمو الزباله في أماكنها فانا مش ذنبي انك كنت غايب في حصة ( العقل زينه ) !!.
.
أه يا سيدي , ده راجل مستشار رئيس محكمه دستوريه اتعين رئيس مؤقت لحد ما يعملك دستور وانتخابات وساعتها يرجع يشتغل قاضي تاني , يعني تقدر تقول ده اللي ساند دركسيون العربيه لحد مانلاقي السواق بدل مالعربيه تنزل في الترعه .
أه يا سيدي , كل اللي تقدر عليه الحكومه الحاليه والنظام الحالي هو انها تعمل قانون لتنظيم التظاهر أو تعمل حد أدنى للأجور أو تعمل حواجبها !!.
.
أما بقى لو حضرتك مُصرّ إن رئيس مصر المؤقت الكيوت ده لازم يخترع لنا الذرّه فاسمح لأنصار النظام الحالي إنهم يقولو على عدلي منصور إنه خليفة المسلمين وحفيد على ابن ابي طالب وعلى الشريف و صيدليات على وعلى .
وبكده يبقى مفيش أي فرق بينك وبين الخروف الإخوانجي , هو كان شايف مرسي هيجيب لنا الفردوس الأعلى من الجنه لحد عندنا ( دليفري ) في ظرف شهرين تلاته وانت زعلان إن عدلي منصور مطلبشي نفس الأورد الدليفري بتاع الجنه في نفس المده الزمنيه !!

November 29 · Edited

لو كنت يا صاحبي
ف يوم بتقوم
من غير ما تكون
مديون للناس
.
و ف صدرك قلب
برئ واتنين
و ضلوع فدادين
مزروعه برغم الجور
إحساس
.
و ف بيتك ملح
و لقمة عيش
و عيون بتقول لك
من بدري
صابح رابح
والضحكه بترسم
ف شفايفك
طيبة دراويش
.
تبقى انت ف جنه
و بالألون
كان نفسي أعيش
زيك إنسان !! .
.
وهناخد إيه من
زخارفها ؟
مالكل هيرحل
أو ماشي
ملعونه الدنيا
متسواشي !!.
.
.
محمد حسين

November 30 · Edited

إحنا في زمن النفخ !!
.
صباح الخير
- مستشارة الرئيس الأستاذة سكينه فؤاد تصرّح ( شباب الثوره لن يضعو أيديهم في يد الإخوان !! ) , قال يعني كده بتحرجهم بنت المكّاره , طب هيضعو ياختي هيضعو ( ( سمير غانم في مسرحية المتزوجون !).
.
طالبات الإخوان السجينات وحركة 7 الصبح ( سبعه سبعه ونص يعني ) بيرفضو العفو الرئاسي لأنه جاي من رئيس الإنقلابيين , طيب ياكشي تتحرقو بجاز وسخ ( إنتو ومصطفى النجار ) , بالظبط زي مابو تريكه رفض يسلّم على وزير الرياضه بتاع الإنقلابيين , يا ريت الساده الأفاضل الإخوان مايدخلوش بقى مدارس الإنقلابيين ولا مستشفيات الإنقلابيين ولا شوارع الإنقلابيين ولا يشمو الهو في دولة الإنقلابيين , وبالتالي أحسن حل إنهم يسيبو دولة الإنقلابيين للإنقلابيين !.
.
قناة الجزيره تعلن عن بث فيديو جديد مسرب للفريق عبد الفتاح السيسي تمام الساعه العاشره مساء أمس الجمعه !! , ما علينا إن الفيديو هيكون للسيسي وهو بيصلي في البيت مش في الجامع والعياذ بالله , إنما أنا عرفت دلوأتي هو مرسي مكانشي بيهش ولا بينش في الرئاسه ليه ؟ أكيد كان ماسك كاسيت من أبو روحين وماشي ورا السيسي عشان يسجّل حواراته بناء على تعليمات محمد بديع ( سيده وتاج راسه ).... يا تاج راسي !!.
.
بعد شهرين تلاته من ثورة يناير , وبعد ما شوفت ثورة مصر و تونس واليمن وسوريا وليبيا , كانت بتصعب عليا الدول العربيه التي لم تطلها رياح الربيع العربي ( ولا مؤاخذه ) , وبدعي لهم من كل قلبي , يارب ارزقهم بثورات جميله زي عندنا كده .... مممممممم وبس يا سيدي , دلوأتي بقول ( لو لم أكن مصريا لوددت أن أكون موريتانياً ) , وماله يعني لما أكون ( محمد وِلْد حسين ) ؟ , موريتاني و أفتخر !!.

عزيزي فلان
.
أرجوك يا أخي الكريم لا تسئ الظن بي , فأنا لم أقل أبداً أنك خائن وعميل , إطلاقا وربي لم يحدث , كل ما قلته وأكرره إنك عيل ابن صرمه رقيع بسلسله و لبانه وحظاظه وأمك بتصرف عليك !!.
.
أم دماغك دي مفهاش فرامل , وعنيك مش شايفه مترين لقدام , بتثور لمجرد الثوره و لا انت عارف إتوبيس كام رايح فين ؟ , بتثور على نفسك أحيانا وانت قاعد وسط الرجاله ( ثورات لا إراديه.... ربنا يعافينا ) , وأخرة المتمه تقول لو مفيش البرادعي نجيب خالد على يمسك حكم مصر !! , أه تقصد يعني حاجه من ريحة البرادعي ( من قَطرُه ) ؟ طيب ماتجيب الشغاله الفليبينيه بتاعة البرادعي تمسك حكم مصر ؟! .
.
بقى يا عيل يا تيت يابن التيت , مصر اللي مرشّقه إرهاب , والشعب فيها انقسم 19 فريق وبيشرحو بعض بالموس ليل ونهار و 50 دوله أجنبيه حاطين مناخيرهم جواها هيحكمها خالد على ؟!.... يا بني الحكايه مش دورين طاوله بنلعبهم في قهوه عالمشاريب !!.
.
أقولكشي على حاجه ؟ مصر بتسلم عليكو أوي وبتقول لكو متشكرين يا رجاله عالواجب اللي انتو عملتوه في يناير , بس سيبوها ترتاح شويه , ده مشهد لمريضه راقده في المستشفى وحواليها طقم من الممرضات الفاشلين والأطباء الأكثر فشلا , وكل واحد ماسك في إيده سرنجه فيها دوا , وبيحقنها في جسم المريضه وكله أمل إنها تخف بدواه , وحالف بأيمانات المسلمين إن مفيش دوا هيريحها غير دواه ( حقل تجارب هي ) , مصر يا رجاله تعبت أوي من الشكشكه و غزة الإبره , ومبقاش في جتتها حته سليمه , سيبوها تنام شويه وتغمّض عنيها , الدوا اللي في السرنجه مش هيطير !!.

أرجوك حاول تفكّر ( بسرعه والنبي مفيش وقت ) !!.
.
- كارثه حقيقيه إنك تشوف الأحداث بتاريخ 29 نوفمبر 2013 زي ما كنت بتشوفها بتاريخ 29 يناير 2011 ( بنفس العيون ) وكأن سنتين تلاته مرّو علينا زي النسمه ( ماحسيناش بيهم ) , لا حصل فيهم تغييرات ولا تساقطت أقنعه , ولا شرايح معينه من المجتمع بانت على حقيقتها , حضرتك بتعمل ريستارت لنفس الدايره اللي مشينا فيها بغباوتها , و متخيل إن ده اسمه الثبات على الموقف ......... ثبّتك الله يا فتى عند السؤال !!.
.
- كارثه حقيقه إن كادر عنيك مايجبشي المشهد من بره مصر , لا فيه حروب أهليه حواليك ولا دول اتقسمت وبتتقسم ولا الدور جاي عليك , وكأن مصر دي قاعده في كوكب لوحدها كده ومنزّله رجليها في ماية البيسين .
.
- كارثه حقيقيه إنك تنسى أو ( تتناسى ) إن لولا الجيش المصري مكانتشي نجحت ثورة يناير ولا ثورة يونيو , والنبي لو نمنا في ميدان التحرير 9 سنين متصله ماكنا هنغير نظام لو الجيش مش واقف معاك . وبعدين تقولي إن ده دور الجيش وغصب عنه لازم يعمل كده , وحضرتك عايز تنزل تسب وتلعن في أم الجيش والمفروض انه يقف معاك ويحميك للمره التالته صح ؟! .... ما تجيب بوسه يا ناشط ؟!.
.
- كارثه حقيقيه إنك تثور بطريقة ( أنا مستبيع ) , واللي هيقابلني هعوّره ولو ملقتشي حد أعوره هعوّر نفسي .
.
- كارثه حقيقيه إنك تتعاطف أوي مع بنات الإخوان المحكوم عليهم بالسجن وكأننا عايشين في سويسرا , وانت دم العساكر الغلابه واصل لحد رجليك وركبك , وتقول عالبنات ابتسامتهم رقيقه أوي , طيب ودم العساكر اللي تحت رجليك يا عم النحنوح الرقيق ؟!
.
- كارثه حقيقيه إن حلم الديموقراطيه يتحول جواك لمرض وإدمان لدرجة إنك مستعد تعمل ديموقراطيه على أنقاض وطن , يعني تتخيل بعقلك المريض إنك هتركّب لمبات نور عشان تنوّر البيت من غير ما يكون عندك جدران وسقف , طيب هتركّب اللمبات دي فين يا مولانا ؟!!
.
- كارثه حقيقه إنك تتخيل إن صاحب الكلام اللي فوق ده جبان أو مش راجل أو مكانشي بينام ويقوم ويحلم بالديموقراطيه و الثوره , بالظبط زي ما عملت السيده المحترمه بتاعة حزب الدستور ( أ.ك ) في الرساله دي ( قبل ما تعملي بلوك )
02:54 مساءً
*******
انت راجل و الا مخنث و الا ايه يلعن ميتين اهلك !!.
.
مش لاقي كلام أقوله لها , ولا لأي حد .

التصويت على مواد الدستور حالا في لجنة تعديل الدستور
.
فيه واحد من الأعضاء معترض على كل المواد , حتى الماده بتاعة ( إن مصر دوله جميله ولها غمازات ) , أقطع دراعي من هنا إن اللي رافض كل المواد ده أكيد هو المندوب بتاع علاء عبد الفتاح في لجنة الدستور !!.

لو عايز تعرف طبيعة وثقافة شعبنا الجميل ده ممكن تبص على النخبه الجميله أوي دي اللي كانت في لجنة ال50 بتاعة تعديل الدستور , راجع شريط التصويت تاني وشوف بنفسك ( بص بعينك وارحم بقلبك ) , هتلاقي ناس معترضه على مواد زي مثلا ماده بتقول ( إن نهر النيل ده حاجه ههمه أوي ولازم نحافظ عليه يا ولاد ) !! , وهتلاقي ناس معترضه على ماده بتقول ( قناة السويس بنت حلال وبتاعتنا ولازم نحطها في عنينا ) !! , وهتلاقي ناس معترضه على ماده بتقول ( حرية الأديان والمعتقدات للديانات السماويه , يعني المسلم يصلي في الجامع والمسيحي في الكنيسه ومفيش مشكله ) , وهتلاقي ناس معترضه على ماده بتقول ( إن القطاع الخاص جزء مهم من اقتصاد الدوله ولازم ناخد بالنا منه وكداهون ) و هكذا ....هنا السؤال بقى مين ولاد الكلب النخبه اللي كانو بيعترضو عالكلام ده وبيكتبولنا الدستور ؟ إنت متأكد يا عدلي إنهم بيعرفو يكتبو أساسا ؟! ولما النخبه الدستوريه تبقى بالغباوه دي وبتعترض لمجرد الإعتراض , يبقى ليه نلوم عالشباب العادي اللي بينزل يتظاهر ويعترض ويقفل الشارع عشان غسيل ست أم شوشو جارتهم اللي فوق نقّط مايه على غسيلهم ؟ !!

December 1

مفرقعات !! .
.
صباح الخير
.
المنشقين عن الإخوان بيقولو هنصوّت ب نعم على التعديلات الدستوريه , عارفهم أنا المنشقين عن الإخوان دول , أبو الفتوح وعصام سلطان وابو اسماعيل والخضيري واحم منصور ........ ومحمد بديع !!
.
رئيس حزب النور بيقول إن التعديلات الدستوريه مرضيه في مجملها !! , أومال مندوبكو كان قاعد بمؤخرته على الزرار بتاع ( أعترض ) ليه ؟!.
.
عاصم عبد الماجد يصرّح من قطر ( بيجاهد هناك ) : الجيش المصري هو قوة إحتلال غاشم لمصر !! ....طيب تعالى بقى واحضر مظاهرات 6 ابريل والإشتراكيين الثوريين بالمرّه , أو خدهم يجاهدو معاك في قطر ...المهم تبقو إيد واحده ضد جيش الإحتلال المصري !!.
.
مصطفى بكري رجع يظهر تاني ويصرّح ويلوح بوطنيته وإنه واد جامد تنّين ....هو احنا يا ربي مكتوب علينا نخلص من عبود الزمر وخالد عبد الله يطلع لنا مصطفى بكري وتوفيق عكاشه !!.
.
قبائل النجيليه ( قبيله مصريه ) تسلّم الجيش المصري عدد 80 صاروخ جراد و 120 سلاح مختلف , ويقولك مصر مفهاش سلاح ولا ارهاب , داحنا ممكن نستغتى عن المعونه العسكريه الامريكيه ونجمّعها من القبائل ومخازن الإخوان !!.
.
خبر : علاء عبد الفتاح وعصام سلطان و الخضيري يجتمعون في زنزانه واحده ............. اتجمّعو العشّاق في سجن القلعه !!

هقولها والأرزاق بالله
.
عندك عروسه جميله زي القمر , والناس بتحوم حواليها واحد إنت عارف إنه بلطجي ( فلول ) والتاني عارف إنه شيخ منصر ( الدقون ) , وانت شاب سليم زي الفل ومش ناقصك حاجه , هي أساسا بتحبك انت , إنما لأسباب غير مفهومه قررت حضرتك إنك تلعن أبو الظروف اللي خلت بلطجي وشيخ منصر يحومو حوالين حبيبتك , وبقيت تضرب دماغك في الحيطه زي المخابيل وشويه تقعد جنب الحيطه وعينك رايحه جايه بين الإتنين , شويه تصرخ وتقول ( الحقيني يامه البلطجي هياخد حبيبتي ) وشويه تولول وتقول ( شيخ المنصر هياخد حبيبتي مني يابه ) ..... والأكاده إنك فاكر إن هي دي الإيجابيه والإقدام والشجاعه !!.
.
مصر يا مولانا مطمع للكل , لو فضلت على كده هتنام وتصحى تلاقي انتخابات قدامك وغيرك خطف حبيبتك , عدد الناخبين في مصر كلها مقسوم ببساطه شيديده ل 25 % دقون ودول إيدك منهم والقبر , يعني لو عملت لهم حاوي أو قرداتي مش هتقنع حد فيهم , بيروحو كده صندوق مقفول برابطه المعلم للمرشح أبو دقن ياكشي يكون إسمه أسامه ابن لادن أو حاخام من حاخامات اليهود أو كاسترو ( ما كلهم بدقن ) !! .
.
الباقي من الشعب 75 % , تلتهم على الأقل مش بينزل من بيتهم وينتخب , قول بقى مشغول قرفان مش فاضي , والباقي هيتقسم بينك وبين الفلول , انت وشطارتك وحشدك في الشارع , على سيرة الشارع لو حضرتك عملت إحصاء بين 10 ألاف مصري من مناطق مختلفه هتلاقي منهم 7 عارفين إن فيه حزب اسمه الدستور , و 17 عارفين إن فيه حاجه اسمها التيار الشعبي ...ودي نسب جميله أوي ومعقوله وتدخلك معهد لاسلكي لكن متجيبشي لك أغلبييه برلمانيه !! .
.
خليك على كده لو حابب , إضرب دماغك في الحيطه وقول مصر بتسرق وعيّط زي الولايا , ويوم الإمتحان هتتهان , وساعتها مش هيبقى من حقك تفتح بؤك , صناديق أهي و إنتخابات نزيهه يا حاج , نزيهه نفسها كانت واقفه في الطابور , وانت أوت , بره الجيم يعني , روح بقى قدم شكوى في برنامج همسة عتاب !!
.
حاجه أخيره هقولهالك , حكم مصر في إيدك إنت ده في حالة إن ربنا خلق لك عقل فجأه كده ومن غير مقدمات , إنزل وابدأ تجهيز نفسك للإنتخابات , وإلا الكعكه هتتقسم بين أبو دقن وابو كاس , وانت هتتفرم في النص يا حماده !!.

هه , هه , هه ( ضحكات شريره متقطعه بتاعة عادل أدهم ) , الإخوان في قلب ميدان التحرير يا قطه ورافعين صورة مرسي , كنتو بتقولو هنحمي الميدان ولا يمكن يدخلوه الإخوان , تبّاً لكم يا رفاق الأمس , مش لما تعرفو تحمو ***** الأول ؟!!.

طيب أنا راضي ذمتك
.
مش حضرتك اللي اخترت إسم عصام شرف لرئاسة الحكومه قبل كده ؟ ولما حسيت إن حكومته مش عاجباك قعدت تحلم بواحد اسمه الببلاوي , أه والله إنت اللي اقترحت الإسم ( أنا أساسا معرفشي حد اسمه الببلاوي غير منك ) , وقلت مفيش غيره الببلاوي هو اللي هينقذ مصر , هاتولنا الببلاوي عايزين الببلاي فين الببلاوي , وقبلها كنت متشعلق في رقبة الجنزوري وبتقول عليه الراجل القراري اللي هيعرف يمشّي المركب , قوم بقى ايه ؟ لا عجبك الببلاوي ولا الجنزوري ولا شرف.
.
حتى زياد بهاء الدين و حجازي و وزير الخارجيه و أغلب الموجودين حاليا كانو اقتراح من حضرتك يا سيدي الناشط بتاع برامج التوك شو , و انت اللي فضلت تحلم على الفضائيات بثورة 30 يونيو وتقول يارب ينزل الجيش ويخلصنا بسرعه , واهو الجيش نزل مع الناس وخلصنا بسرعه .
.
الأسماء اللي في لجنة الدستور دي كانت بالنسبالك أمله كبيره , وتقول عايزين دستور يكتبهولنا ناس محترمين زي الدكتور غنيم وفلان وعلان بدل دستور نادر بكار وام أيمن , دلوأتي بتخوّن الكل وتتهمهم بالفشل والغباء لمجرد إن البرادعي استقال من منصبه ؟و بقيت مقتنع إن الموضوع كله صفقه من بداية يناير 2011 ومشترك فيها أمريكا وروسيا والفلول و الصين وكازاخستان و عصابة اللهو الخفي , حطيت البرادعي في كفه والبشريه كلها في كفه , مجاش في ذهنك حتى إنه ممكن يكون اختلاف في موقف ورؤيا سياسيه مش أكتر .......... إيه المطلوب ؟ أند سو وات ؟ عايز إيه ؟ هتفضل مصر في ذهن حضرتك حقل تجارب لحد إمتى ؟!.

December 2

دراويش
.
صباح الخير
.
- المادة (٨٩) في الدستور الجديد :: تُحظر كل صور العبودية والاسترقاق والقهر والاستغلال القسرى للإنسان، وتجارة الجنس، وغيرها من أشكال الاتجار في البشر، ويجرم القانون كل ذلك.
.
الماده دي اعترض عليها حزب النور بتاع السلفيين !! , أومال البنت أم 9 سنين لما تبقى ماشيه وملفوفه كده وخرّاط (الأطفال ) خرطها , وتحلى في عين مولانا الشيخ يضرب معاها ورق عرفي إزاي؟ دي هتبقى اتجار بالأطفال وزواج قسري .
و مولانا الشيخ اللي جاي لنا من بلاد بعيده وراح لبيت راجل غلبان و طلب انه يتجوز بنته أم 9 سنين هيتجوزها إزاي ؟ ده هيبقى اتجار بالبشر وتجارة جنس , طيب مين هيدفع لمولانا الخليجي تكلفة الفندق وتذاكر الطيران والحشيش ؟!
.
الحكايه إن دراويش مصر وبهاليلها بيراعو في تصويتهم سلوكهم الشاذ المتخلف وبيراعو كمان دراويش وبهاليل المهجر !.
.
و لو أنا قررت إني أصوت ب نعم عالدستور ده هيبقى من أجل الحفاظ على هذه الماده , لأنها لوحدها تستحق , هي دي الماده اللي رفض الخرفان إقرارها في دستورهم واللي استقالت بسببها منال الطيبي , و قالت بعدها في أحد البرامج إنها لما اقترحت الماده على لجنة الخرفان قالو لها ( إحنا معندناش اتجار بالبشر ولا بالجنس يا دكتوره ) !!.
فكروني بنكته البقال اللي قال للزبون إنه ماعندوش جبنه و هو عنده جوه !!.

نعمين للدستور الجديد !!
.
1- في أوروبا والدول المتقدمه , اللي ابوه وامه مش متربيين بتبقى الحكومه هي أبوه وامه , يعني إبنك هناك مش بيبقى إبنك رغما عن أنف الحكومه , لو مثلا ( جاك ) اتجوز ( جاكلين ) وخلفو بنت سمّوها ( نوسه ) , وبعد سنتين تلاته جاك اتخنق من جاكلين ومن أم جاكلين وبقى يطلّع همه في نوسه , يكويها مره , يرزعها بالكرسي في دماغها مره , هنا بقى بتبقى نوسه مش بنت جاك وجاكلين , بتبقى بنت الحكومه وبياخدوها من الأب والأم ( لأنهم غير مؤهلين لتربية نوسه ) وتروح نوسه لعيله تانيه ربنا حرمهم من الإنجاب وتتربي تحت عين الحكومه .
.
لو شرويدر ( السكران طيبنه ) خلّف بنت اسمها ( زيزي ) , ولما كبرت زيزي واتدوّرت وبقت عروسه , بقى شرويدر يجيب صحابه السكرانين عشان يمارسو الجنس مع بنته و مراته , هنا بقى تبقى زيزي مش بنت شرويدر , دي بنت الحكومه , وشرويدر بيدخل السجن .
.
لو حد في أقصى أقاصي الدول المتقدمه ( في الغابات والأحراش ) وافق إن بنته تتجوز وعمرها 9 سنين ولا 12 سنه , هيتنفخ نفخة البلالين في ليلة العيد وهيتعمل عليه في الإعلام حفله بسلطاتها وبابا غنوجها .
.
الحكايه هناك مش سايبه سيادتك , ومعندهمشي بهاليل ودراويش السيده زي عندنا , عشان كده تكفيني مادة ( منع الإيذاء النفسي والجسدي والإتجار بالبشر والجنس ) عشان أقول نعم للدستور .................. نعم للدستور .
.
2- مادة وزير الدفاع بتعني إن صلاحيات رئيس الدوله غير مطلقه في إقالة وزير الدفاع وتعيينه , فيه مجلس أعلى للقوات المسلحه بيشارك في اتخاذ القرار , موافق جدا , مينفعشي قائد الجيش المصري يتغير كل يوم تلات حسب الرئيس اللي جاي , مش كل رئيس هييجي ويجيب وزير دفاعه معاه , مش طابونه هي , في النهايه الجيش هو اللي بيشيل الليله ويدفع الفاتوره , السنتين تلاته اللي فاتو قالو كده وإن كنت ناسي أفكّرك ؟............. نعم للدستور.
.
3- مادة المحاكمات العسكريه للمدنيين أقبلها تماما , ماهو أنا سيادتك لا عمري اعتديت على منشأه عسكريه ولا سرقت دبابه , ولا حضرتك عملت كده , وكل علاقتنا احنا ( البشر العاديين ) بالماده دي زي علاقة البابانيين بخبر بيقول ( نقص أدوية البلهاريسيا في اليابان !! ) , الياباني هيقول يعني ايه بلهاريسيا ؟ وانا كمان بقول يعني ايه محاكمات عسكريه ؟ , ولو حكاية الخناقه مع عسكري في بنزينة الوطنيه مخوفاك ولازم تتخانق وحابب تغتت على مخاليق ربنا فأحب أقولك بعد 200 متر هتلافي بنزينه ( شل ) ادخلها واقلع اللي في رجلك واضرب العامل اللي فيها عشان انت كده هتبقى انسان محترم طالما بتعرف تتنطط عالغلابه , أنا شخصيا اتعودت أقول لأي عامل في أي بنزينه ( شكرا ) بعد ما يخلص شغله ( تقدر تقول يعني إني عيّل مش متربي ) !!............ نعم للدستور .
.
ملحوظه أخيره , في مادة المحاكمات العسكريه بتبقى زيها زي المحاكمات المدنيه ( العقوبه على أد الجرم ) ,مش كل واحد بيتحاكم عسكريا بيتحكم عليه بالإعدام وينضرب بالنار , فينا ناس بيتخضو أوي و تلاقيه فاكر إنه لو ضرب عسكري في البنزينه هيحكمو عليه إن دبابه تمشي على بطنه 19 مره , أو صاروخ يدخل من ودنه اليمين ويطلع من ودنه الشمال أو من أي حته تانيه !!.

شعارات !!
.
ياسر برهامي يصرّح ( اشتركنا في وضع الدستور الجديد خوفا على مصر من الكُفر البواح ... ولسنا حلفاء للعلمانيين ) !!.
أقطع دراعي من هنا لو كان ياسر برهامي يعرف معنى الكلمتين دول ( العلمانيين .... البواح ) !!.
.
في ثورة 19 كان المتظاهرين كلهم بيهتفو ( الإستقلال التام أو الموت الزؤام !! ) , ولا واحد من المتظاهرين وقتها كان يعرف معنى كلمة الزؤام , أهي ( الكفر البواح ) دي عامله زي ( الموت الزؤام ) بالظبط , شعارات يا مولانا شعارات ... عشان كده لا بننفع في دين ولا بتعيش لنا ثورات !!

لقطه بتختصر المشهد
.
ممثل المعاقين في لجنة الدستور بيقف أثناء السلام الوطني ( وهو معاق ومعاه عذره لو مقامش ) , وممثل حزب النور اللي زي البغل عريض المنكبين مبيقومش !!.
بجد حاجه تقرف والله , لو عايزين البلد دي تنضف بجد , إخنقو أخر إخوانجي فيها بدقن أخر سلفنجي !!.
واحد يحرق العلم والتاني ميرفعشي علم بلده والتالت ميقفشي للسلام الوطني والرابع يرفع علامة زفت بدل علم مصر في بطوله دوليه والخامس يسب في جيش مصر على الفضائيات بره والسادس يقول الجيش ده قوة إحتلال لمصر , والسابع يقول نقسمها وكل واحد ياخدله كام محافظه والسابع بيستنجد بأمريكا ..... وغيره وغيره .
.
و ولاد الصرمه النحانيح يقولو أصل مادة المحاكمات اعسكريه وقانون التظاهر مش عاجبني !! نياهاهاها يا دين أمي , مش لما رفقاء الميدان بتوعكو يعرفو يعني ايه كلمة وطن نبقى نتكلم في التفاصيل ؟!.
.
يعني يا نحنوح واخد في إيدك واحد بيكفر بكلمة وطن أساسا عشان يعترض معاك على ماده داخل حدود هذا الوطن ؟! ....ده جنان رسمي وعهد الله

.....قصيدة 3 خرفان ل ( هشام الجخ ) !!
.
حزب مصر القويه وحركة 6 ابريل والإشتراكيين الثوريين بيحشدو للتصويت ب لا على الدستور !! .
.
لو حضرتك قلت لي إيه الفرق بين مصر القويه و6 إبريل والإشتراكيين الثوريين ؟ , وإيه الفرق بين ابو الفتوح واحمد ماهر ؟ هديك لمونه من الشوال ده !!.
.
من سنتين وانا بقول إن حزب مصر القويه ده الدولاب الفاضي اللي عمله مكتب الإرشاد عشان لما دولاب حزب ( الحريه والعداله ) رجوله تتكسر ويتخلّع من بعضه يلاقو دولاب فاضي ينقلو فيه الهدوم والفوط والملايات والأندر ورور يا جناب العمده !!.
.
ولو عايز تعرف توجهات 6 ابريل حاليا ومن غير سفسطه ولا فزلكه اسأل مولانا أحمد ماهر , لو الماده بتاعة المحاكمات العسكريه اللي مش عاجباك اتشالت من الدستور هتصوّت بإيه ؟!!.

December 3

شيك على بياض !!.
.
أحمد شاب جميل ومن عيله وعلى خلق , و حج بيت الله ييجي 300 مره , وبعدين راح اتقدم لسميره عشان يخطبها , أبو سميره سأل عليه وعرف إنه كويس أوي جدا خالص , قال على بركة الله , وكتبو الكتاب وعلّو الجواب ( مع إني مش عارف يعني ايه علّو الجواب ) , وبعد سنتين تلاته أحمد اتغير وقلب 180 درجه , بقى يعامل مراته معامله زي الزفت , يضربها ويشتمها ويرجع كل يوم البيت وهو سكران طينه , متعرفشي بقى إيه اللي حصل ؟ , يا ترى أحمد اتعرف على ( على علوكه ) وانحرف بسببه , ولا ( زيزي ) صديقة الطلبه وقعت في طريقه ؟ , سميره اشتكت لابوها وقالت له اللي حصل واللي بيحصل وانت السبب يا بابا , قال لها يا بنتي ( هو أنا بشم على ضهر إيدي ولا أعرف الغيب ؟) , شوفناه وقتها كويس ووافقنا , إستحملي بقى عشان خاطر بيتك وولادك !!.
.
أحمد التاني , شاب لذيذ وأمور وكتكوت , وقف ضد ظلم نظام مبارك , وهتف بسقوط الفساد وشارك مع ملايين غيره في ثورة يناير العظيمه , فقلنا خلاص شكله كويس , نعمله زعيم سياسي شاب ما يجراش حاجه , وبعد سنه واتنين أحوال أحمد التاني اتغيرت , بقى كلامه مش مفهوم ومش راكب على بعضه , مواقفه بقت غريبه ومريبه من ساعة وصول الإخوان للسلطه , يوم ما يعمل نفسه عنتر كان بينزل قدام بيت مرسي ويرمي عليه برسيم ( تصدق معرفتكش انا كده ؟ ) , أو يقف قدام وزارة الداخليه ويرمي عليهم ملابس داخليه , أو يقف قدام وزارة الري ويطرطش عليهم مايه !!.
.
اللي هي باختصار إشغال الرأي العام عن مرسي نفسه والإخوان كجماعه كانت بتسابق الزمن لأخونة مصر , تظاهر ضد أي حد تاني واعمل نفسك مش واخد بالك , وأديك موجود في الشارع أهو عشان محدش يتكلم بقى .
.
طيب انا مش قادر أقول لحضرتك نفس الرد بتاع أبو سميره , مش قادر أقولك معلش بقى إحنا لقيناه كويس واستحمل عشان خاطر البيت والولاد ومصر يا سميره !!.
.
في السياسه حضرتك مفيش حاجه اسمها شيك على بياض بيندفع مقدم لأي شخص طالما تاريخه كان كويس , لو الحكايه كده فمفيش حد تاريخه أنضف من تاريخ مبارك( شارك في حرب أكتوبر و كان جيد في أول 10 سنين من حكمه ) , إنما الشيك المقدم وصك الغفران ده هو كان أحد أسباب فساد مبارك .
.
في حالة أحمد الأولاني ممكن نقول لسميره استحملي ولو انه مش شرط إنها تستحمل , وفي حالة أحمد التاني مينفعشي أقولك يا سميره استحملي , تاريخ الشخص في السياسه لا يشفع له مستقبلا , وربنا خلق لك عقل وجوز عيون تشوف بيهم , لما تلاقي نفسك بتحط علامة استفهام وبعدها علامة استفهام والتالته والرابعه يبقى من حقك تشك , ولا إيه يا سميره ؟!.

حاول تفكّر .
.
الراجل اللي مات ده اسمه أحمد فؤاد نجم , شاعر لسانه فصيح , و وطني عاشق لتراب بلده , إتسجن كتير في عهد عبد الناصر والسادات , مش عشان هو تبع جماعه ولا تبع حزب ولا تبع تنظيم دولي , ولا كان بيعمل اجتماعات سريه لهدم مصر ولا كان بيسعى لحكم ولا سلطه , كان بيقول رأيه في النور ويحط صباعه في عين التخين , ومع ذلك مجاش في يوم وتاجر بسجنه وألمه ( 18 سنه سجن ) , ولا قال انا اتعذبت في سبيل حرية البلد دي وعايز أحكمها بقى , ولا عمره قبل كلمة إهانه لمصر ولا لجيشها , اتسجن أيام عبد الناصر مع جيل رائع من الكتاب والمفكرين الشرفاء , ومع ذلك تجيب له سيرة عبد الناصر يقولك ده ( الزعيم , مش مهم إنه أهانا إحنا بس رفع راس مصر ) !!.
هو ده الفرق بين المصريين والخو...اجات !!......... ألف رحمه عليك يا عم نجم .

نماذج إخوانجيه مثقفه !!.
.
ماهو اليوم الهباب باين من أوله بقى .
.
- محامي إخوانجي وبيقولو عليه فقيه دستوري بيقول ( اللهم أمتنى على الإخوان ) !!.
.
- طبيب إخوانجي أخصائي صدر في المستوصف اللي جنبي ( بيصلّي بينا إمام كمان ) , جه يوم ماسبيرو ولقاني قرفان , قالي فيه ايه ؟ قلت له المسيحيين بيتقتلو في ماسبيرو والجماعات الإسلاميه عايزه الناس تنزل بالسيوف عشان تقتلهم ...فكان رده ( أحسن دول مسيحيين ولاد .... و يستاهلو )!! .
.
- طبيب باطنه إخوانجي في مستشفى معتقد ومؤمن تماما إن عبد الناصر قتل 300 ألف جندي مصري , وإن مصر لو كانت انتصرت في 67 كانت انتشرت فيها الدعاره والخمره والعلمانيه عشان كده ربنا اكرمنا بالهزيمه !!.
.
صيدلي مصري إخوانجي , بقى شايف إن الموضوع في مصر هو خطه أمريكيه مع الجيش من قبل 25 يناير !!
.
- أستاذ مساعد إخوانجي في إحدى كليات الطب , بقى يعذّب المتظاهرين المصابين المعترضين على حكم مرسي ( كانو بينزفو وقتها ) !!
.
مهندس إخوانجي شايف إن عبد الناصر والسادات وجلال عامر دول أقزام , وطبعا لو سألته مين العمالقه ؟ هيقولك سيد قطب و البلتاجي و أم أيمن !! , وعهد الله أنا شوفت صوره واحده لسيد قطب وهما جايبينه في شوال , قلت الخلقه دي لا يمكن تكون بتفكر أساسا ...ده بكتيره ينفع حرامي غسيل !!.
.
مذيع في الجزيره ( كلهم إخوان ) بيتكلم عن وفاة أحمد فؤاد نجم ويقول ( مات أحمد فؤاد نجم اللي كان مبيصليش وبيدعم العسكر ) !!.
...............
..............
كفايه كده والله تعبت .
.
الخلاصه , العقول دي تعفنت من 84 سنه و بدأت يطلع منها طحالب وفطريات وبقت ترمي زبالتها علينا , مستحيل يكون فيه امل فيهم , والنماذج اللي فاتت هي أكبر دليل على إنهيار التعليم في عهد مبارك !!.

سؤال في مادة البيولوجي !!
.
لو عندك بيضتين مسلوقين ومحطوطين في طبق صيني , واحده فيهم بيضة فرخه والتانيه بيضة دجاجه ...إزاي تعرف تفرّقهم عن بعض ؟!
.
أنا أقول لحضرتك
.
إمسك البيضه الأولانيه وقول لها أحمد فؤاد نجم مات هتقولك ( أحسن , ده كان حشاش ومش بيصلي وبيأيد الجيش ) , قول لها العساكر الغلابه بيتقتلو في سينا هتقولك ( يستاهلو دول بتوع جيش الإنقلابيين الخاين الفاشي ) ...... لو قالت لك الإجابات دي تبقى بيضة فرخه .
.
إمسك البيضه التانيه بقى وقول لها القاضي حكم على بنات الإخوان بالسجن واتهمهم بالبلطجه وقطع الطريق هتلاقي دموعها نزلت وغرّقت الطبق وقعدت تعيط و تتشحتف وتشتم في جيش الإنقلابيين الفاشي ..... لو عملت لك كده تبقى دي بيضة الدجاجه .
.
أديني عرّفتك أهو الفرق بين البيضتين !! , بكره بقى هقولك الفرق بين الفرخه والدجاجه !!

إحذرو من النوعيه دي !!
.
فيه ناس بتنضم لصفوف المعارضه مش لأي سبب , كل الحكايه إنها ملقتشي لنفسها كرسي فاضي في صفوف المؤيدين !!.
النوعيه دي بتبقى عينها على أول كرسي يفضى وهتطلع جري عليه , النماذج كتير أوي في مصر ............... أشهرها وائل قنديل !!.
.
الفرق بين معارضة واحد زي عمنا أحمد فؤاد نجم و واحد زي وائل قنديل ( أسف على التشبيه والمقارنه ) هو نفس الفرق بين العربيه الحقيقيه اللي ماتورها عفي , والعربيه اللعبه بتاعة الأطفال ( أم زمبلك ) !!.

December 4

ميد إِنْ تشاينا !!
.
صباح الخير
اللي قابلينا قالو ( التقليد حجِّة البليد ) , وحضرتك لو مش واخد بالك فمصر يا حماده طالعه من تحت حكم مبارك زي ما يكون دايس عليها قطر ( متشلفطه يعني ) , كسور وكدمات وجروح ونزيف داخلي وخارجي ........ بس إحنا ليه معندناش وزير دفاع مدني ؟!!.
.
يا سيدي الفاضل بقولك مصر مش ألمانيا ولا فرنسا , مش بيحدّها من الشرق سويسرا ومن الغرب السويد , إنت جارك الوحيد اللي بيفهم هو عدوك الأزلي والباقي أخطر منه بغبائهم وغباوتهم ....بس إحنا ليه معندناش وزير دفاع مدني ؟!!.
.
يا مولانا المشكله والقصه مش في مدني وعسكري , مفيش مشكله ممكن نقول للسيسي يلبس بدله وكرافته أو بنطلون جينز وتي شيرت لونه بافته عشان تحس بالأمان , ولو تحب يعني بدل ما يقف ويعمل بإيده التحيه العسكريه ممكن يرقص لك عشره بلدي فشر الست سهير ذكي في زمانها ..... بس إحنا ليه معندناش وزير دفاع مدني ؟!!.
.
يابويا , الدول اللي فيها وزير دفاع مدني دي دول عتيقه في الديموقراطيه , من خمسين ستين سنه شغاله , وكبرت مع بعضها كده ( مين جاور السعيد يسعد ) , وبقى عندها مؤسسات وشعوب مثقفه , مش لسه فاكرين إن عادل عبد العال وحساسين هيعالجو السكر والإيدز والسرطان بخلاصة اللبان الدكر , ........... بس إحنا ليه معندناش وزير دفاع مدني ؟!!
.
يا خال , الدول اللي فيها وزير دفاع مدني فيها كمان إن وزير الدفاع ممكن يكون واحده ست ( ومزّه إذا تطلب الأمر ) , إيه رأيك نبقى زيهم ونمسّك ( غاده عبد الرازق ) منصب وزير الدفاع بدل ماهي قاعده تلعب في شعرها كده ؟ .......بس إحنا ليه معندناش وزير دفاع مدني ؟!!
.
يا سيدي أبوس إيد اللي خلّفوك , كفايا شعارات وتقليد أعمى , إنت داخل عليا المستشفى ومعاك مريضه خلصانه ومتشلفطه ومفهاش حته سليمه على بعض وبتنزف من كل مكان وفي الأخر جاي تقولي يا دكتور والنبي عايز أعالجها من حب الشباب ؟!!.

لجل الورد !!
.
أنا أفهم إن واحد زي عنتره بن شداد يتعب ويحارب ويكافح ويسافر لملك الحيره عشان يجيب مهر عبله ( ألف من النوق العصافير ) , والنوق يا مولانا جمع ناقه , قالو عالنوع ده ( العصافير ) عشان خفيف كده وسريع وبيجري فريره زي العصافير , وأفهم بقية القصه الخرافيه الهلاميه لحد ما رجع عنتره بمهر عبله بنت عمه , وبقول في نفسي ( الحب ولّع في الدره يا جدعان ) , وجايز يعني تكون عبله جمالها محصلش , وشبه صوفيا لورين في زمانها .
.
وانا أفهم إن واحد زي حالاتي مكانشي حيلته اللضا , يقوم يذاكر ليل ونهار , صيف وشتا , في البيت والشارع والحمّام ( أه والله ) , وفي تالته ثانوي يخلّص شيكارتين فول حريتي ( ناشف ) وهو بيذاكر , بيقزقهم ( مكانشي عندنا فزدق سيادتك) , كام سنه سهر وتعب وبهدله عشان يدخل كليه عليها القيمه ويطلع من تحت خط الفقر قبل ما الخط يقفل عليه .
.
وأفهم إن لاعب كرة قدم ناشئ يتدرب في عز البرد والمطر ويتسلق جبال وينام تحت عربيه نقل بمقطورتها ويجري بتاع 60 ألف كيلو أو 3 سنين ( أيهما أقرب ) عشان يرفع من لياقة البدنيه ويحقق حلمه بالإحتراف في الدوري الأسبابي .
.
إنما اللي مش قادر أفهمه , إن شاب زي الفل يسيب محاضراته ويطلع يتظاهر عشان البهلول مرسي , أو ينزل يعتصم عشان يرجع البهلول مرسي , أو يخرّب ويبلطج ويقاطع أخوه وأمه ويعرض نفسه للسجن وحتى القتل عشان البهلول مرسي .
.
عمركشي سمعت عن واحد بيسهر ويذاكر ويتعب ويكافح عشان يدخل دبلوم صنايع ؟ , طيب عمركشي سمعت عن واحد فضل سنين ينحت في الصخر ويتغرب عشان يتجوز تهاني الجبالي ؟ .... يا مولانا ( إن عشقت إعشق قمر ) !!.

December 4

عم أحمد راجل مِتْوكِّل
على ربه و داير يلاغيها
و ملامح وشِّه بتتشكِّل
من صورة مصر وحواريها
.
مطاطاشي لكلب ولا ديابه
ولا صاحب شلّه من البهوات
طول عمره يصاحب في غلابه
من ساعة الوِلْد لحد ما مات
.
في العشق ده فارس
مش عاشق
في الصف الأول كان راشق
و حصانه قصيده بتتغنّى
ماسمعتش عن وصفه بهيه
و جمالها الواصل بالجنه ؟!
.
.
محمد حسين

الحلم الجميل
.
بعد ثورة يناير مباشرة , سرحت بخيالي في حلم جميل وسقف أحلامي بدأ يعلى ويعلى , وصل بيا الحال في الحلم إني أتخيل في يوم من الأيام إني خرجت مع صحابي في رحلة سفاري عشان نصطاد ( أسود ) من الصحرا , أيوه ياخويا أسود , أومال هنصطاد بنات ؟! , المهم توهنا في الصحرا دي , وبعدين مفيش مشكله معانا جهاز ثريا صغير كده ( زي اللي كان مع مرسي البهلول يوم ماهرب من السجن ) واتصلنا برقم الطوارئ في وزارة الداخليه , وبعد 3 دقايق و 17 ثانيه بالظبط لقينا طياره هليكوبتر أباتشي ومعاها طقم مسعفين وأطباء و وجبات كافيار , كانو جايين ينقذونا بقى وبيعتذرو عن التأخير لمدة 17 ثانيه , أيوه حاجه كده زي اللي بنسمع عنها في بلاد الغرب الكافر !!
.
هيه كانت أحلام بقى , يدينا ويديكو طولة العمر , دلوأتي بقيت بحلم إني لو عملت حادثه في صلاح سالم ( لا قدر الله ) تجيلي عربية إسعاف قبل ما يفوت 3 أيام ودمّي يتصفى !!.

وتبقى قاعد في أمان الله لا بيك ولا عليك وتلاقي واحد اقتحم عليك خلوتك من غير لا إحم ولا دستور 2013 , و بعت لك رساله عالشات و لوكلوك لوكلوك , يا أخي طيب قول إحم او على الأقل قول نعم للدستور !!.

December 5

ال ( ولا حاجه ) !!.
.
صباح الخير
يتهيألي أنا كتبت كتير , كتبت عن كل حاجه تقريبا , فقلت من باب التغيير يعني إني أكتب عن ال ( ولا حاجه ) , اللي هي مرادف لكلمة ( مفيش ) , ال ( ناثنج ) , وخصوصا إنها كلمه مهمله ولا تلقى أي احترام في كل المراجع و الكتب لا سيّما كتاب الحساب ( وقالك ال ولا حاجه يعني صفر , تساوي صفر ) .
.
ال ( ولا حاجه ) هي محصلة سعادتنا المزعومه , هي الحلقه الأولى والأخيره من تمثيلية الإبتسامه المصطنعه من تأليف وإخراج الظروف , واحنا مجرد كومباس صامت فيها .
.
ال ( ولا حاجه ) , هي أحلامنا البسيطه في ثوره على نظام فاسد , اللي دهستها عقول نخبه مثقفه وحركات سياسيه أكثر حماقه و تخلف من التخلف نفسه.
.
ال ( ولا حاجه ) هي وطنية الإخوان وحبهم للبلد دي , هي قلوبهم السوده , هي انتمائهم وغيرتهم عليها .
.
عشان كده أنا متعاطف النهارده مع كلمة ( ولا حاجه ) , تقدر تقول بمرّن نفسي جايز أعرف أتعاطف مع النخبه أصحاب العقول المتخلفه ( ال ولا حاجه ) , أو مع الإخوان أصحاب القلوب السوده ( ال ولا حاجه ).
.
ال ولا حاجه هي الأمل في بكره , الحلم بمستقبل رائع , عارف إنت ؟ عارف ؟ أصعب شئ إنك تحت وطأة الظروف وبعد إدراكك لانتشار ثقافة ال ( ولا حاجه ) في مجتمع ما تضطر إنك تحلم بامبارح !!.......... حلم بأثر رجعي , مجاز مرسل باعتبار ما كان !!.

السيسي رجل العام على مجلة تايم !!
.
تفوق على أردوغان , خليفة المسلمين بتاع رابعه و 44 شخصيه أخرى ( رؤساء دول ومشاهير ) , حتى الرقم ده (44 ) له دلاله يا مارد !! .
.
طب ركّز معايا والنبي , انا بحترم السيسي جدا بس مصوتش له ولا لغيره ومش بحب هبل التصويت ده , وكنت فاكر إن شعبية السيسي موجوده في المناطق الشعبيه وسط الغلابه والبسطاء بس , إنما التصويت الإلكتروني بيتطلب يكون عندك كمبيوتر ونت ولك في الليله دي , وده مش متاح لأغلب المصريين , ومع ذلك السيسي يكسب !!
.
طيب ركّز تاني كده , عدد سكان تركيا أد عدد سكان مصر ومستوى معيشة الأتراك أعلى ممنا بكتير , يعني اللي عنده نت وبيصوت كتير جدا ومع ذلك السيسي يكسب !!.
.
بتوع رابعه وأنصار التنظيم الدولي الإرهابي حول العالم أكيد صوتو لأردوغان نكاية في السيسي أو بمعنى أصح نكاية في مصر , ومع ذلك السيسي يكسب !!.
.
هه بقى ؟ حد له شوق في حاجه ؟ مين قال إنه عايز ينزل انتخابات الرئاسه في مصر عشان ينافس عالمركز التاني ؟!!.
.
الدوري محسوم للأهلي من بدري يا شباب , دور أول كمان , ودي شهادة حق من واحد زملكاوي !!.

حقيقه ممتعه و موجعه في نفس الوقت !!
.
الناس الدهماء والغوغاء والمتسلّقه أمثالي ( وأمثال حضراتكو ) لما بنقول رأينا في حاجه أو في حد أو في مرحله أو في حزب بنقوله بعفويه كده , من غير زواق و لا حسابات لوغارتميه معقده , يعني بندبح ونسلخ براحتنا ( الليله ليلتك يا عمده ) , ونشيل ده ونحط ده مكانه ولا يهمنا لا كبير ولا صغير , نلعن جدود أبو البرادعي على حزب الدستور الصبح ونسب للسيسي بعد الضهر ونشكر للفلول والإخوان طول الليل .
.
أما النخبه والكتاب الكبار والسياسيين بتوع التوك شو اللي بيشتغلو بالساعه ( زي ماكنة دراس الرز ) فلازم تبقى فاهم إنه لما بيتسأل أي سؤال لازم يفكر قبل الإجابه في 90 حاجه مختلفه .
.
يعني مثلا لو المذيعه سألته إيه رأيك في أداء حزب النور ؟ صديقنا النخبوي الصحفي المشهور هيفتكر قبل الإجابه إن جاره في التجمع الخامس قيادي في حزب النور وعلاقتهم طيببه ببعض , وإن بنت الشيخ الفلاني بتاع حزب النور مصاحبه بنته في الجامعه الألمانيه , وإنه لو داس جامد في حزب النور هيتمنع من الظهور في قناة الرحمه وقناة الناس وقناة الرحمه يا ناس , كمان هيفتكر إن واحد قيادي في حزب النور كان وعده بمنصب معتبر في جريده هيعملوها جديد , عشان كده دايما هتلاقي إجابة النخبوي ( التوكشوي ) بتطلع بالشكل ده : ((( هو أداؤه دون المستوى وإن كان في المجمل جيد , وعليه علامات استفهام معينه ولو إن علامات الإستفهام تحيط بالمرحله برمّتها , وبه أناس جيدون ومخلصون وإن كان البعض منهم ( قله قليله ) أساءت إلى الأغلبيه )) !!.
.
شوفت بقى الإجابه النموذجيه بتاعة النخبويه التوكشويون ( التوكشويين ) ؟!! , أديني إديتك العلم اللي تنتفع بيه لما تبقى قيادي ومشهور أهو .
.
............. وهي دي يا أصدقائي ميزة إن محدش يكون عارفك أساسا , اللهم أحشرنا مع الصعاليك ولا تحشر في زورنا كلمة الحق بدون زواق !!.

صورة ملكة جمال مصر 2013 أعادت الأمل إلى نفسي ونفسوياتي , أنا كده أستحق لقب مزّ السينما المصريه بلا منازع ( مناصفةً مع محمد البلتاجي ) , ألف شكر لأعضاء لجنة الإختيار ( الساده أصحاب القلوب الرحيمه ) !!

اليوم خلص أهو , 5 ديسمبر , ذكرى أحداث الإتحاديه , الحمد لله المسيرات والمظاهرات اللي عملتها 6 إبريل والإشتراكيين الثوريين النهارده عدت على خير والحشد كان رائع , وقفتهم كانت مشرفه وخصوصا لما رفعو صورة الحسيني أبو ضيف , وفكّرو الناس كلها بشهداء الإتحاديه والناس اللي كانت بتتعذب جوه قصر الرئاسه بعلم محمد مرسي , فرحت كمان لما نددو بالفتره القبيحه اللي حكم فيها الإخوان مصر .... ربنا يبارك فيكو يا نشطاء مصر , أيوه كده , ..................... إيه ؟ بتقول إيه ؟ محدش نزل ولا تظاهر ؟ يا جدع مش ممكن , طيب دوّر هنا ولا هنا كده هتلاقيهم واقفين , دوّر كويس دول ناس شرفاء وثوريين والمسأله عندهم مبدأ , يعني مش فارق معاهم عسكر ولا إخوان ...دوّر بس وانت هتلاقي !!.

بكره الجمعه , عايز أفكّر أصدقائي الأعزاء بفضل قراءة سورة الكهف قبل صلاة الجمعه , لا تنسو يا أصدقائي , أه نسيت , واللي معاه حتة حشيش يلحق يشربها الليله دي قبل ما ينام , متنساش ياض !!.

December 6

دستور يا سيادنا !!
مساء الخير .
.
مشكلة التصويت على دستور 2013 وارتباطه الوثيق بدخول الجنه , الحكايه بقت فولكلور لذيذ ابتدعه الإخوان ( الله يجحمهم ) .
.
دلوأتي حضرتك لو صوتت عالدستور ب ( نعم ) هتدخل الجنه بحسب تصريح قيادات حزب النور , ولو صوتت ب ( لا ) هتدخل الجنه برضه بحسب تصريحات قيادات الإخوان.
المتفائل هيشوف المشهد كده , داخلين الجنه داخلينها سواء قلت نعم أو لا , لكن من جهه أخرى ممكن تكون النار هي المصير المحتوم لنا بعد عملية التصويب , أقولك إزاي ؟ إنت لو صوتت ب نعم هتدخل النار حسب تصريحات قيادة الإخوان ولو صوتت ب لا هتدخل النار حسب تصريحات قيادات النور , الله بقى ؟ يعني كده نار وكده نار .
.
من باب التفاؤل بميل للنظره الأولى ( الجنه الحتميه ) , وعشان نفض الإشتباك في حكاية جنه هنا وجنه هنا ( يعني جنتين إزاي ؟ ) , ممكن نتاجر بأيات الله زي ما علمونا ولاد الصرمه ونقول ( يا أخي الكريم مش ربنا سبحانه وتعالى قال : ومن دونهما جنتان ؟!! ) , أومال ايه بقى ؟ هتعترض على كلام ربنا ؟ إكفر بقى ................ مممممممممممم الله يخرب بيتك يا مرسي لبيت اللي جابك على بيت الإخوان على بيت السلفيين !!.

إعرف خروفك و علِّم عليه
.
يوم وفاة شاعرنا الكبير المبدع أحمد فؤاد نجم كتبو عنه ( الحشاش , اللي مكانشي بيصلي , إلى الجحيم , إبقى خلي السيسي ينفعك ) !!.
والنهارده كتبو عن نيلسون مانديلا ( المناضل الشريف البطل ) !! , ده على أساس إن نيلسون مانديلا مقطّع حُصر الجامع وبيبيع سبح وسجاجيد صلاه قدام الحسين , وحج بيت الله 300 مره ؟!.
.
بالمناسبه , ولأسباب لا يعلمها إلا الله ( وأي حد عنده شويه عقل هيعرفها برضه ) , مش هتلاقي أديب أو مفكر او فيلسوف أو شاعر عليه القيمه مؤيد لفكر الخرفان , كل اللي بيأيدوهم من نوعية عمال الترحيله ( التراحليه يعني ) , أه يا سيدي فيه طبيب تراحلي ومهندس تراحلي واستاذ جامعه أخره في سوق المفكرين إنه يلبس طاقيه زي بتاعة توفيق الحكيم !!.
.
يارب تفهمو بقى , الحكايه عند الخروف الإخوانجي مالهاش علاقه لا بدين ولا بتدين , كل الحكايه إن أحمد فؤاد نجم لعن جدود أبو الإخوان وقال على مرسي ( أهطل ) , والله , والله لو كان شاعرنا الراحل كتب بيتين شعر بس مدح في حق مرسي كانو عملو منه بطل قومي وزعيم ومش بعيد قالو ( ده خليفة المسلمين في الشعر ) !!.
.
ولو نيلسون مانديلا كان فاضي وبصحته شويه و قال ( بؤين ) إنتقاد للإخوان , كانو كتبو عنه النهارده ( إلى الجحيم أيها الشيوعي الكافر الزنديق ) , ومش بعيد أبدا كانو قالو إن مانديلا أساسا ( ناصري متنكّر ) !!.
.
الخلاصه , ممكن أبقى زملكاوي وراضي وقانع بالمركز التاني ( إيموشن واحد هيعيط ) , أو فقير شويه وراضي وقانع بالمركز ال 19 من أصل 20 , إنما لازم أحمد ربنا سبحانه وتعالى على نعمة العقل , وكل ماشوف خروف أقول ( الحمد لله الذي عافانا مما ابتلى به كثيرا من خلقه ) !!.

وثنيات الإخوان ( الصهيونيه الجديده )!!.
.
عايز تعرفها ؟ شوف مشهد فتيات الإخوان اللي لبسوهم أبيض وركبوهم عربيه بكبوت مكشوفه ( كأنها عربية سجن ) ومشيو بيهم في مسيره ( مثيره للشفقه والغثيان ) , وقالك يعني كده متضامنين مع فتياتهم اللي في السجن يا ولداه ( اللي رفضو العفو الرئاسي )!!.
.
مشهد مقزز و مقرف , ورغبه ملحّه في استعطاف العالم بأي ثمن , أعتقد أن القاعده رقم واحد في الفكر الإخوانجي هي ( كيف تلعب دور الضحيه باستمرار ؟ ) , هم مستعدون لأي شئ وكل شئ , حتى لو وصل الأمر بأحدهم أن يذبح نفسه لاستعطاف العم سام , أو يذبح ابنه تحقيقيا لرؤيا أو تعليمات من ربه الأعلى ( المرشد العام ) !!.
.
مش ممكن يكونو دول بشر طبيعيين من نسل أدم , و إلا يكون سيدنا أدم له خطيئه تانيه غير إنه أكل من الشجره ( والعياذ بالله ) , أعوذ بالله من الشيطان الرجيم !!.

December 7

حج مبرور !!
.
صباح الخير
عندنا في بلدنا , لما واحد بيروح الحجاز (عشان يحج يعني ) بيرجع من هناك يلاقي ولاده دهنو واجهة البيت ورسمو عليها ( جَمَل وسفينه وطياره أحيانا ) وكتبو تحتهم عبارات من نوعية ( ألف مبروك يا حاج , حج مبرور وذنب مغفور , .....الخ ) , كانت أول حاجه بتلفت إنتباهي في المشهد ده هو السؤال : ليه بيرسمو جمل ( مش حصان ) ؟ مع إن الحصان بياخد المسافه من السنبلاوين للحجار في شهرين ونص بس , يعني أسرع أهو , بلد بتاعة جمال صحيح !!.
.
الأمر ده مع تكراره لم يخلو من واحد ابن تيت , حبّ إنه ينال لقب حاج ( سفلقه ) , فقال لولاده إنه رايح يحج وخاد القرشينات وراح جمصه ولا راس البر قعد هناك اسبوعين يبلبط في المايه لحد ما الحج خلص ورجع لقى ولاده داهنين الحيطه وراسمين أم الجمل وأم السفينه وبكده ينال صاحبنا اللقب المنتظر ( الحاج ) !!.
.
ثورة يناير خرّجت الإنسان الطيب اللي جوه ناس كتير مننا , و بقى فعل الخيرات هو السمت العام لكتير من شباب الثوره وشاباتها , ناس مننا أدركت فجأه إن فيه مستشفى اسمه 57357 وبقو يروحو يسلمو على الأطفال المرضى ويتبرعو للمستشفى , واللي بقى يروح دور الأيتام , واللي عمل صفحه عالفيس وقال ( نبني بلدنا ) , واللي جاب فكره أو مشروع لزراعة الكثبان الرمليه في بحر اللهو الخفي , كلام حلو والله , إنما بقيت أقلق أوي من حكاية الصور والتصوير ومقاطع الفيديو , وعارف الإجابه النموذجيه بنت التيت اللي هي بتقول ( ده من باب نشر التجربه وتحفيز الأخرين على فعل الخيرات يا أخي الكريم !!) , ماشي , بس الموضوع أفور , وحاسس إن الصور والفيديوهات والقصص طغت على المشهد برمّته .
.
كمان ذهني الخبيث راح لبعيد وافتكرت موضوع الجمل والسفينه وقلت إذ ربما يكون فيهم عيّل ابن تيت مراحشي مستشفى سرطان الأطفال أساسا وكتب عن تجربته مع الأطفال المصابين بينما هو ( يبلبط في شرم الشيخ مع المزه بتاعته ) !!.

خبر عجيب
.
بيقولك يا سيدي في خبر متداول على المواقع الإلكترونيه والفضائيه ( النساء قادمات إلى كوكب الأرض !! ) , أه والختمه الشريفه زي مابقولك كده , جايين منين بقى الله أعلم , أكيد من مجرّه فضائيه كانت راكنه صف تاني في درب التبانه , ومن يوم الخبر ده مانتشر ومشايخنا السلفيين سابو كل حاجه في إيديهم وتفرغو للتفكير في الطريقه المثلى لأقامة علاقه زوجيه مع النساء القادمات , تفكير بقى ومقارانات فقهيه ومورابات وأحكام , اللي يغيظك في الخبر إن النساء القادمات نفسهم سمعو بموضوع مشايخ السلفيه وتفكيرهم , فاتعلّقو جنب سحابه فوق كده , وحلفو بأيمانات المسلمين ماهما نازلين إلا لما المشايخ يرسو لهم على بر ويعرفو الطريقه !! , يا ستي انزلي بقى خيلتينا , إنزلي وبعد كده ربنا يفرجها .
.
يا جدع متاخدشي على كلامي , أو خد وهات بالباقي لبان .

ولما وصل محمد مرسي للرئاسه قالو ده حفيد عمر بن الخطاب وهيستكمل مسيرة عمر بن عبد العزيز , وفي عيد العمال قالو هيستكمل مسيرة عبد الناصر , ولما دخل السجن قالو هيستكمل مسيرة نيلسون مانديلا !! , كويس إنهم مقالوش مسيرة سيدنا يوسف , وزمان مرسي يا ولداه نفسه اتقطع وجاله حَوَل من استكمال المسيرات دي.
بالك انت لو لقو صوره لمرسي وهو بيبلط في البانيو ( أو في طشت نحاس ) هيقول أكيد عايز يستكمل مسيرة رانيا علواني !!.
ولو شافوه ماسك في إيده قرص جلّه , هيقولو بيستكمل مسيرة ( مارتينا هينجز ) واللي في إيده ده مضرب تنس يا جاهل !!.

بنات الإخوان اللي اتحكم عليهم ب 11 سنه من اسبوعين , اتحكم عليهم بعد النقض ب سنه مع ايقاف التنفيذ ولسه الحكم النهائي ممكن يطلعو فيه براءه أو حتى ياخدو مكافئه !! .
نفس القضاء اللي هيتقال عليه شامخ النهارده كان بيتقال عليه ابن كلب مسيس من اسبوعين .
ونفس النحانيح اللي دموعهم غرّقت الفيس بوك من اسبوعين على الحكم القاسي الفزيع الشنيع المريع هيقولو النهارده إن القاضي ضعيف ومهترئ مش عارف يثبت على حكم لأنه قاضي مسيس ودوله رخوه لا تستطيع الثبات على مبدأ ...يسقط يسقط حكم العسكر !!..
يابني وعهد الله أنا حافظكو زي كف إيدي داهو !!.

إضحك من قلبك
.
الرئيس الأمريكي باراك أوباما بيقول في أحد اللقاءات أنه ممنوع من استخدام هاتف ال ( أي فون ) بناء على نصيحه من جهاز المخابرات الأمريكيه , وبعد الفحص والتمحيص اكتشو السبب , والسبب يا سيدي إن فيه أشاعه طلعت من فتره بإن شركة أبل المنتجه للأي فون سمحت للمخابرات الأمريكيه بالتجسس على هواتفها !!
يعني سيادتك المخابرات الأمريكيه بتتجسس على موبايل رئيس أمريكا الصبح وتروح له بعد صلاة العصر تقول له انت ممنوع من استخدام الموبايل ده يا مستر بريزدنت ألا يكون حد بيتجسس عليك ولا حاجه ( من باب يعني حرّص ولا تخونش ) !!.
.
نياهاهاها , طيب ده رئيس أمريكا وبيتجسسو عليه , أومال إحنا بيعملو فينا إيه بقى ؟! تلاقي راجل مصري عجوز عالمعاش كده ضرب ورقه عرفي مع بنت 19 سنه في معهد لاسلكي , وقاعد بيكلمها عالأي فون , وفجأه تجيله رساله مترجمه من المخابرات الأمريكيه بتقول ( مش عيب عليك يا راجل يا شايب يا عايب تتجوز على مراتك بنت من دور عيالك ؟ روح يا شيخ منك للي كلت دراع جوزها , يو أر سو باد........ إنتهت الرساله ) !!.

في الصين معرفشي سنة كام كده , كان فيه مجموعه من المخربين اللي هدفهم هدم الدوله وإحداث فتنه داخليه , الحكومه تعاملت معاهم بإطلاق الرصاص الحي , ولمت جثث القتلى و بقى كل أب ييجي يطلب جثة إبنه يقولوه إدفع تمن الطلقه اللي ضربناه بيها الأول !!
.
لو كانت الصين في الوقت ده عندها حركة زي 6 إبريل أو زعيم زي البرادعي كان زماننا إحنا اللي بنصدر لها دلوأتي لعب الأطفال وكل حاجه من الإبره للصاروخ , ومكانتشي بقت تاني اكبر إقتصاد في العالم.
.
خلاصة الكلام , النحنحه لا تبني وطن , ولو عندك أرض محتاجه تتعزق بالفاس مينفعشي تجيب شاعر زي فاروق جويده وتقول له اعزق لنا الأرض دي والنبي , ده مش عيب في الشاعر وبالتأكيد مش عيب في الأرض !!.

December 7

إِفْتحْ شبابيك
واقفل بابك
لملم في ضلعوك
أحبابك
في زمانا العاشق
زي الطير
والحر في سجن
ديابه أسير
والكلب بينبح
من يومه
لا تعاتب كلب
ولا تلومه
ما هيفهم
وجعك وعتابك
إفتح شبابيك
واقفل بابك !!
.
يا بلاد مسجونه
ف حرف الخاء
و كلاب عايشين
على حرف النون
ونصيبك حرفين
م الأسماء
بتشكِّل كلمة
خان يخون !!
.
أقزام ولئام
أقزام ولئام
ماتقولي
التمن العادل كام
لو واحد كان
عاشقك بجنون ؟!!
.
.
محمد حسين

December 8

كلاكسات
.
صباح الخير
- في دستور 2012 الإخوان قدّمو الدستور لأنصارهم في كرتونه مقفوله , وقالو لهم ( كالعاده ) كل المطلوب منكو إنكو تقولو نعم للكرتونه دي ( يُمنع منعا باتا فتح الكرتونه تحت أي سبب ) !!.
.
وفي دستور 2013 قدمولنا الكرتونه مفتوحه وقالو لنا اتفرجو عالبضاعه وقلّبو فيها كويس ولو عجبتكو قولو نعم ( يُمنع منعا باتا إنك تقول نعم من غير ما تشوف البضاعه بنفسك ) !!.
.
حلوه الليبراليه مفيش كلام , بس الحكايه عندنا احنا مأفوره شويه , واحد فتح الكرتونه ولقي من ضمن البضاعه فردتين شراب فيليله فقعد على جنب يضرب أخماس في أسداس ويقول يا ترى دول بتوع مين ؟ لأ أنا هصوت ب لا عشان شاكك في موضوع الشراب الفيليه , أهو المواطن ده رغم رخامته وغباوته بس عاجبني , إنما إيه قولك في اللي مننا وقال هصوت ب لا أصل الراجل اللي جاب لي الكرتونه شكله مش عاجبني , مكانشي لابس بدله وكرافته ونضاره ولا واخد جايزة نوبل ؟! .
.
بعد يومين وإسبوعين وشهرين هيكون فيه انتخابات , وسيبك من الرئاسيه لأنها محسومه سلفا !! , إنما بكلمك عن البرلمان يا مولانا البرلمان , هل تعلم أن صوتك كناخب مش بتفرق معاه عدد البوستات السياسيه اللي كتبتها ولا عدد الكتب اللي قريتها ولا عدد اللغات الأجنبيه اللي تعرفها ؟ يعني لو كنت كتبت مليون بوست سياسي وقريت ألف كتاب وتعرف 10 لغات أجنبيه هيكون لك صوت زي عم محفوظ بتاع الجراش وجمالات مرات البواب .
.
حضرتك هتصحى من النوم إذ فجأة وتلاقي ناس رايحه وجايه تقوم تسألهم فيه ايه ؟ يقولك النهارده الإنتخابات بتاعة مجلس الشعب , وهتلاقي نفسك بره اللعبه وبره الصندوق , ومصر جالها برلمان دقون تاني , مش عشان شعبيتهم أكتر , لأ هما على بعضهم كده باختلاف دقونهم يعملو 25 % بالكتير , إنما أنا وحضرتك كنا نايمين مرهقين جدا بعد ماتخانقنا خناقه لرب السما على موضوع الشراب الفيليه !!.
.
لو وصل الإسلاميين للحكم تاني هنزل أتظاهر واعتصم لوحدي بدون سبب , وانا مش محتاج سبب أصلا , مانت لو كنت بتفهم , كنت عرفت إن الملايين اللي نزلت في 30 يونيو منزلتش عشان ديموقراطيه ولا حريه ولا نزلت ترجع حق الشهدا إنما نزلت باختصار عشان ترجّع بلدها .
.
يعني راجل متضايق من مراته , صوتها عالي ولسانها طويل وضاربه بوز شبرين , وبعدين اتخطفت , أول ما سمع الخبر قال أحسن تستاهل !! , وبعد ثواني افتكر إن دي مراته اللي مهما كان هي مراته وحبيبته , ونزل عشان يرجعها وهو ماشي في الطريق مفكرشي في لسانها الطويل ولا عيوبها , ...ليه حضرتك مصرّ إن مراتك تتخطف تاني ؟!

عملولي ريبورتات وانا بصلِّي يا سعادة البيه !!
.
- من يوم ما عملت حساب عالفيس بوك ويشهد ربي عمري ما علمت ريبورت في حد مهما كانت غلاسته وغتاتة أمه ولسانه الطويل , في أول سنتين كنت كل اللي أعرفه هو حكاية إلغاء الصداقه , حتى فكرة حظر فلان دي معرفتهاش غير مؤخرا .
.
- صفحتي بقت تقيله أوي وتقدر تقول أتقل من صدر أحمد المغير ذات نفسه , بكتب البوست يظهر للناس بعد 5 دقايق عالأقل , بلاقي الأصدقاء الأونلاين عندي 40 ولما اعمل ريفريش ألاقيهم بقو 300 في نفس اللحظه ولو عملت ريفرش تاني يبقو 35 , و بعد ماكتب البوست ألاقي عدد الأصدقاء نقص اتنين أو تلاته ( حسب نوع البوست ) , صفحتي تقريبا عليها جوست ومعمول لها عمل .
- عندي إحاس من مواطن جاهل بشئون الفيس بوك المعنويه والكرويه إن كمية الريبورتات المعموله للصفحه تكفي لغلق قناة السويس مش صفحة فيس بوك عاديه صاحبها مواطن غلبان ( وزملكاوي كمان ) , إنما هنقول ايه بقى ؟ , مانا في الأول كنت بنتقد الإخوان والفلول ودلواتي بنتقد الإخوان والفلول والنحانيح و حركة 6 إبريل و حركة 7 الصبح وحركة الليل وأخره ....تقريبا كلهم بقو إيد واحده , وبقى أمثالي هو العدو المشترك .
.
- وأنا للأسف معرفشي حاجتين , الحاجه الأولى , الواد مارك صاحب القهوه دي ليه عمل حكاية الريبورتات دي وسمح لناس إنهم يقفلو صفحة حد مع إنه اتربى في بلد حرية الرأي والعقيده والمعتقد , شكله كده فيه عرق إخوانجي أو عرق حصاوي أو تلاقي أمه من البدرشين أساسا .
.
الحاجه التانيه اللي معرفهاش هي كلامي اللي فوق ده , هل يستوجب النكز ولا يستوجب الغُسل ولا يستوجب رميتين حرتين واستحواذ ؟!!.

خروف قيادي كبير !!
.
وكتب الخروف القيادي على صفحته مقسما بأغلظ الأيمان أن هذا ما حدث : عبد الفتاح السيسي تعرض لمحاولة إغتيال وأنه يُعالج الأن في السعوديه ( إشمعنى السعوديه مش ألمانيا مثلا ؟ ) , وإن محمد إبراهيم حاول يهرب ( يفلت بجلده يعني ) , بس المخابرات العسكريه منعته , وقالت له هتشتغل وزير داخليه ( لحد ما نقيلك ) ولا نحط السيخ المحمي في صرصور ودنك ؟!
.
وإن المخابرات بتتكتم على خير محاولة اغتيال وزير الدفاع حتى لا يفت ذلك في عضد الجنود ( مشهد مقتبس من قصة شجرة الدر ما علينا ) , وإن فيه قلق في الحرس الجمهوري بعد ما عرف بعض الظباط إن زمايلهم اتقتلو واندفنو بعلم المخابرات في دارس الحرس الجمهوي , وإن الجيش بيقتله بتاع تلتميت ربعميت ظابط كل يوم الصبح ( عالريق ) لأنهم بيرفضو تنفيذ أوامر جيش الإنقلابيين !!
.
هذا ما كتبه هذا الخروف القيادي وبتزعلو لما أقول عليه خروف ؟ , أومال اللي يكتب كده ومصاحب علي علوكه وسيد كوخه هيبقى ايه ؟طيار !!.
.
اللي يغيظك إن البوست ده متشيّر بتاع تلتميت ربعميت مره وسط تصفيق حاد من الخرفان والتابعين ومن تبعهم بالبرسيم إلى يوم الدين , صيحات الحمد لله ( وسجدة شكر للمولى ) , الله أكبر , ربنا انتقم من الإنقلابي قائد الإنقلابيين ............ ممممممممم بقى دول اللي كانو هيحكمو مصر يا تيت ولاد التيييييييييييييييت .؟!!
.
طيب سيبك من الخرفان وبرسيمهم , تعالى بقى لصاحبك النحنوح هتلاقيه بيشكك في إن الصفحه مضروبه ( لا هي حقيقيه ) بس مشكلته الإنكار , الخروف بينكر إنه خروف والنحنوح بينكر إن الخروف خروف , وكأن مصر هتحط رقبتها ما بين خروف مكتمل أركان الخرفنه و بني أدم شايف الخروف بعنيه وبيقول عليه مش ممكن ده يكون خروف , ده فصيل وطني أهو .
.
صديقي العزيز النحنوح أنت لا تعرف , وعهد الله يا شيخ والعيش والملح اللي بينا مانت عارف أي حاجه , ومش بتقتنع ولا بتصدق , طيب هات إيدك كده , وشبكة العشره دول لو خروف قيادي كتب على صفحته إن مفيش بني أدم إسمه عبد الفتاح السيسي وإن وزير الدفاع المصري هو إبليس الرجيم اللي تنكّر في صورة بني أدم بس ربنا نصرنا عليه ( وانصرف ) بفضل دعوات مؤيدي الشرعيه وقراءة المعوذتين , هتلاقي ألاف بيعملو لايك وشير ويهلللو ويكبرو !!.

كانت أيام !!
.
هو : إمسكي يام محمد , الفلوس معاكي أهي , هاتي نص كيلو لحمه عشان العيال بقالهم ييجي شهرين ماشافوش اللحمه , وهاتي لهم كيلو بلح أو جوافه اللي تلاقيه أرخص فيهم .
.
هي : أيوه ياحمد بس دي 10 جنيه تجيب نص كيلو لحمه بالعافيه .
هو ( مقاطعا ) : يا ستي بلاش البلح ولا الجوافه , هاتي اللحمه أهم .
.
هي : طيب محمد كان عايز يروح الرحله بتاعة اسكندريه مع الفصل بتاعه .
هو : رحلة إيه ؟ مفيش فلوس لرحلات .
هي : ماهي الرحله مجانيه على حساب الإداره التعليميه معموله لفصل المتفوقين بس .
هو : طيب خلاص يروح يا ستي
هي : بس جزمته مقطوعه وانت عارف .
هو ( يفكر ) : خلاص محمد كبر ويتهيألي جزمتي تيجي على مقاسه أو حتى واسعه سنه مش مشكله , خليه يلبس جزمتي وانا هورنّشهاله , ولما ربنا يفرجها هشتري له جزمه جديده .
............................................
الله يرحمك يابو محمد , ده ربك فرجها من وسع , فرجها اوي بس انت ملحقتش , إبنك عنده في التلاجه 7 أنواع جبنه وتفاح أمريكاني و كرز معرفشي من دولة إيه كده ؟ , والفريزر مليان لحمه وفراخ , اللهم لك الحمد .
.
بالك انت يابو محمد , لو كنت عايش , كان زمان ابنك جاب لك عبايه صوف وساعه حلوه كده تليق بيك , وماكنة حلاقه بالكهربا , وتلفزيون إل سي دي ألوان تشوف فيه ماتشات الأهلي , إنت صحيح كنت أهلاوي بس انا مسامحك , حد في الدنيا يحب ياسر ريان يابه ؟! .
.
الله يرحمك يابو محمد .

إلى السيد / ببلاوي أفندي كعب الغزال المتحنّي !!
................. بعد التحيه
.
- طلبة الإخوان حرقو عربية شرطه في المنصوره , يعني أخويا يروح الجامعه و يا إما يرجع أو ميرجعش حسب ما يقرر طلاب الإخوان !!
.
- المصلين الإخوان اعتدو على إمام مسجد وطردوه وضربوه بالأحذيه , يعني أنا أروح أصلي في الجامع أرجع أو مرجعش حسب ما يقرر المصلين بتوع الإخوان !!.
.
- انفجارات في الشيخ زويد , يعني ابن عمي ينزل من بيته هناك ويرجع أو ميرجعش حسب ما يقرر الإرهابيين بتوع الإخوان !!
.
كل يومين تلاته عساكر بتتقتل في سينا , يعني ابني يدخل الجيش ويا إما يرجع أو ميرجعش حسب ما يقرر أنصار الإخوان !!.
.
- مذيع الجزيره بيقول ( وهي مصر حيلتها ايه عشان قطر تحتاجه ؟! ) , يعني أنا أبقى مصر رافع راسي أو مبقاش حسب ما يقرر أنصار الإخوان في الخارج !!
.
................... المهم مش هطول عليك لا تنام منّي , إنما سؤالي : أنتي جايه تشتغلي إيه ؟!.
مكسوفه من إيه يا بيضه ؟ حد ماسك عليكي سيدهات من أيام علاقتك الأثمه بالملكه نفرتيتي ؟!!........ حكومتك مهزوزه ومرتعشه ولا تصلح إلا في عمل الكوافيرات ( يعني ملقاط وفتله يا ببلاوي ).

December 9 · Edited

إمبراطورية قطر !!
.
صباح الخير
- أيمن نور بعد ماختفي فتره طويله في لبنان ( المقررات هناك سهله على فكره ) قرر إنه يسافر عشان يستقر في دوله تانيه ( أو حتى عشة فراخ بس تكون أمان ) , تسافر فين ياواد يا أيمن ؟ تروح فين يا أيمن ؟ تستقر فين يا أيمن ؟ أه لقيتها , مفيش غيرها قطر ..... ملاذ كل لاجئ صعلوك ومأوى كل مهاجر حقير ..... صفيحة الزباله العربيه .
.
- أيمن نور في حديث تلفزيوني بيقول إنه ميعرفشي رئيس مصر المؤقت اسمه ايه ؟ مانت معذور يا ريس , الدولارات بتعمي العين , وأكيد تكون عارف إسم الخدامه الفلبينيه اللي بتعمل بودي كير لموزه , ستك بقى وتاج راسك .
.
- عاصم عبد الماجد بيجاهد في قطر , وعمّال بيتشقلب في برلمين غاز طلع منهم وقالك إن الجيش المصري هو قوة إحتلال غاشمه .
.
- عز الدين شكري ( بحس تصريحات تهاني الجبالي ) , والعهده على الرواي , اتعرض عليه من وفد ياباني تقديم مساعدات لمصر فقال لهم استنو شويه عشان فيه موجه ثوريه جايه في 25 يناير 2014 ....الله بقى ؟ إنت معانا ولا مع الناس التانيين يا برنس ؟ ....طيب يادوب تلحق أول طياره طالعه على قطر .
.
- عارف يا ببلاوي , لو صحت التكهنات إن حكومتك فيها أشكال وسخه مزروعه وإنك بتساندهم إما بالتواطئ أو بالصمت , وعهد الله يا شيخ , وحياة ثورة عرابي وثورة سعد زغلول اللي كنت بتتفرج عليهم من المشربيه هتشوف نفخ ما كنت تحلم بيه في حياتك , لأ النفخ المره دي هيكون على الشعب , لا جيش ولا شرطه , سيبو الطلعه دي علينا احنا .
.
الشعب ده شوفته بعيني , بعفويته وبساطته وفرحته في 30 يونيو , وعلى فكره السيسي مش محتاج يعتقل الأقزام والفيران ويشغل وحداته العسكريه أكتر ماهي مشغوله , دعوه واحده للناس للنزول , وخلّي بقى طلبة الإخوان يتظاهرو و 6 ابريل يعتصمو , ساعتها مش هنلاقي لهم قطع غيار , والفعل من الشعب , إبقى قول عالشعب فاشي بقى يا روح مامتك لما يقطعكو بسنانه , حلوه شعب فاشي دي ؟ جديده صح ؟ إكتبها عندك في كراسة التحضير لبرامج التوك شو , إكتبها هتنفعك .

صفوت حجازي يردد : أنا الشمس في كبد السماء !! .......... يا كبد أمك ياخويا , خف إيدك شويه عن الراجل يا شاويش , ده مهما كان قيادي كبير في الجماعه وكان عايز يحرر القدس أه و عهد الله , مايغركشي السكسوكه اللي جالك بيها , لو قالك أنا هتلر قول له أكيد , لو قالك أنا نيرون قول له نيرون وابن ام نيرون كمان , لو قالك أنا السحليه العملاقه , قول له وماله ياخويا مش عيب , سبحان من أبدعك !! .
إنما الحقيقه أنا مقريتشي في أي كتاب أو مرجع أو أثر أو نبوءه أو طقطوقه أو زغلوله إن اللي هيحرر القدس هيبقى راجل تراللي ( خُلَل يعني ) !!.

كنت بتناقش مع واحد صاحبي وقال لي :أنا هنتخب خالد على لو اترشح للرئاسه عشان هو شباب والفتره الجايه محتاجه رئيس شباب, قلت له وانا شرحه , هنتخب صافيناز هي كمان شباب أوي وركبها حديد !!.

قال لي بس أنا معرفشي حاجه عن صافيناز و لا تاريخها السياسي .
قلت له ولا انا اعرف حاجه عن خالد علي وتاريخه السياسي !!.

خبر و جمله مفيده
.
الخبر بيقول إن عامل بنغالي لقى محفظه فيها 26 ألف ريال , وقدر يوصل لصاحبها السعودي و رجّعهاله , السعودي حبّ إنه يكافئ العامل البنغالي فاداله 15 ريال !! , أيوه زي ما حضرتك قريتها كده , خمسة عشر ريالا فقط لا غير .
.
طيب تخيّل لو كان اللي لقى المحفظه ورجعها لصاحبها ده واحد لبناني مثلا ؟ كان السعودي هيكافئه بألف ريال على الأقل , ولو كان أمريكي كان السعودي كافئه ب 100 ألف دولار ( مع إن اللي في المحفظه يساوي 7 ألاف دولار مش أكتر ) !!.
.
لو حضرتك كتبت على صفحتك بيتين شعر روعه هتاخد عشره خمستاشر لايك و مش هتلاقي واحد يقولك ( الله يفتح عليك ) , لو أحلام مستغانمي عطست على صفحتها هتاخد 30 ألف لايك , و 10 ألاف شير للعطسه ( مع إنها معديه على فكره ) , وتعليقات من قبيل : يرحمكم الله , ألف لا بأس عليكي , سلامتك يا جميل .....
.
لو محمد حسان أفتى إن ساندوتشات الجبنه الرومي حرام هتلاقي 100 ألف واحد بيتناقلو الخبر , ولو حضرتك قلت إن صلاة العصر 4 ركعات مش هتلاقي واحد يقولك ( صح ...بارك الله فيك ) .
.
لو مقطع فيديو انتشر لعمرو دياب وهو بيحلق دقنه في البيت هتلاقيه اتشير 100 ألف مره , ولو حضرتك نزلت فيديو وانت بتحلق دقنك مش هتلاقي واحد يقولك نعيماً !!.
.
لو البرادعي كتب على صفحته ( تقسيم مصر هو الحل الأمثل والنموذجي من أجل عيون الديموقراطيه ) هتلاقي مليون لايك , ولو حضرتك قولت وحدة تراب البلد دي أهم من الديموقراطيه نفسها هتلاقي ريبورتات للصبح .
.
الحكايه باختصار إننا مش بنقيّم الفعل نفسه ( العمل ) ومش بنقرا ولا نفكّر , ودايما بنقيم صاحب الفعل , بناخد العلم من العالم مش العكس ( حتى لو كان علم غلط ) لكن صاحبه وصل لمرحلة من النجوميه تكفي بإنه لو قلع ملط ومشي في الشارع محدش ينتقد الفعل بالعكس هيعتبروها موضه جديده ويقلدوها !!.

أوعدك هتفهمني المرّه دي
.
- صورة ظابط شرطه وهو بيضرب نار على المتظاهرين هي صورة مقززه ومقرفه بكل معنى الكلمه , وبتقول باختصار إن الدوله دي فيها فساد وخصوصا في جهاز الشرطه وتسوجب العقوبه والمحاسبه والمسأله .
إنما المرعب والمخيف والقاتل هو صورة الجهاديين وهما بيدبحو عسكري في سوريا !!.
.
- صورة عسكري بيضرب قنابل غاز على معتصمين سلميين هي صوره غير مقبوله إطلاقا .
إنما المرعب والمخيف والقاتل هو صورة جنودنا المقتولين في سينا ساعة الفطار .
.
- لو حضرتك راكب عربيتك وجنب منك مراتك وولادك في الكنبه الورانيه , وتوهتو في الطريق , دخلتو في طريق مقطوع وضلمه , ولمحت بعينك عربيتين قافلين الطريق وناس واقفه على بعد 2 كيلو , هيييجي في ذهنك إنك رايح لنصيبك وقدرك في 3 اختيارات مفيش غيرهم , إما إن العربيات دي كمين شرطه أو قطّاع طرق أو إرهابيين .
.
ترتيب أمنياتك في الوقت ده هيكون كالتالي : يارب يكون كمين شرطه ( فاسده ) وأخرهم هيسحبو مني الرخصه , ولو مكانوش كده يبقى يارب يكونو قطّاع طرق , ياخدو العربيه وحتتين الدهب اللي مع مراتي ويروحو لحالهم , وهتفضل تدعي إنهم ميكونوش جماعه إرهابيه !!.
.
- لو حضرتك شوفت مشهد لظابط شرطه ( فاسد ) ماسك سلاحه وبيطارد واحد من الإرهابيين المسلحين ( حافظ كتاب الله و مقطّع حصر الجامع ) , هتعمل ايه ؟ أنا شخصيا هقف مع الظابط ( الفاسد ) وهتمنى يدوس الإرهابي ( اللي حافظ كتاب الله ) ويفرمه بالعربيه .
.
- باختصار :- في أي دوله في العالم , اللي بيشيل سلاح هما رجل الشرطه ورجل الجيش , أي حد تاني يشيل سلاح لازم ينضرب بالنار فورا ومن غير محاكمه .
.
- الظابط اللي بيتجاوز في استخدام صلاحياته ده بيمثل دوله فيها فساد , أما الإرهابي اللي شايل سلاح فده بيمثل غابه فيها حيوانات , وانا مضطر أحافظ على مفهوم الدوله , وحكاية تطهيرها من الفساد دي تاخد وقتها .
.
- عشان كده أنا ضد التصالح مع أي جماعه أو حزب بيشيل سلاح ضد الدوله , حتى لو كان أبويا هو رئيس الجماعه و الحزب ده , ودي المره الوحيده اللي هقول فيها كده بقى واسمحولي .............. تراب مصر أهم , وأمن الناس أهم , طز في البرادعي ( هو مش نبي لا ينطق عن الهوى ) !!.

December 10

على مسئوليتي
.
صباح الخير
.
- وانا صغير , في تانيه ابتدائي , مكانشي عندنا مدرسه في قريتنا , وكنت بروح المدرسه في قريه جنبها , بنمشي مسافة 4 كيلو رايح جاي تقريبا , في الطريق ده كان فيه ترعه ولازم نعدّيها , لو مشينا مباشرة عالطريق هيقابلنا كوبري في مدخل قريتنا وممكن نعدي من عليه , لكن فيه طريق مختصر كده بيتطلب منك إنك تعدي من على ماسوره حديد بعرض الترعه قطرها 40 سم بالكتير , ودايما الماسوره دي كانت بتبقى مخرومه وبتنقط مايه على جسم الماسوره , يعني من الأخر بتزحلق الناس , معرفشي ليه بقى أنا كنت في كل مره مصرّ إني أعدي من عليها , نوع من الفزلكه تقريبا .
.
في أول مره وقعت في الترعه وراجل ابن حلال أنقذني قبل ماغرق , وفي تانيه مره كانت الترعه مفهاش مايه كتير ووقعت برضه بس عرفت أطلع لوحدي , طبعا برجع البيت هدومي متبهدله وكتبي بايشه من المايه ( الشنطه بتاعتنا كانت قماش !! ) وفي البيت أخد العلقه التمام من الحاجه أمي ربنا يديها الصحه , فين وفين بقى على بال مافهمت إن ( الفزلكه لا تفيد ) , والمفروض أمشي لحد الكوبري واعدي من عليه لحد ماكبر شويه واعرف أعدي الماسوره من غير ماقع ( حدث بالفعل ) .
.
في جولة الإعاده لانتخابات الرئاسه اللي فاتت , كان فيه لوحه قماش عريضه بعرض الشاع تبع الإخوان , عليها صورة بلال فضل ويسري فوده ومحمود سعد وغيرهم , مكتوب عليها إعلاميين الثوره , شرفاء الإعلام .
ولما فاز مرسي , اتشالت اللوحه واتعمل بدالها قايمة اغتيالات فيها نفس الأسماء ( الإعلاميين الشرفاء ) !!.
وبقى باسم يوسف يتقال عليه باسم سوسته وبلال فضل بيتكفّر عالهواء مباشرة , واتحاصرت مدينة الإنتاج الإعلامي في غزوة العجول الشهيره .
.
مش عارف ليه عندي احساس إن اللوحه القماش القديمه هتظهر تاني في الفتره الجايه , وجايز يعني ( ترشيداً للإنفاق ) يكون الإخوان لسه محتفظين بيها في مستودعاتهم جنب الأسلحه والمتفجرات , إلا بقى إذا كان البلتاجي خدها وفصّلها لباسين زي الواد في فيلم خالد يوسف.
.
إنما الحقيقه , العيب مش في الإخوان ,الحلنجيه اللي بينصبو عالناس وأولهم النخبه المثقفه ولا مؤاخذه , العيب في النخبه دي , اللي مصرّه إنها تلعب دور محمد حسين وهو في تانيه ابتدائي , وتعدّي من عالماسوره اللي بتزحلق , مع إن الكوبري موجود بس محتاج شوية وقت زياده , في المره الأولانيه لقيو راجل طيب طلعهم من الترعه قبل ما يغرقو , وفي المره التانيه الترعه مكانشي فيها مايه كتير ولقيو الراجل الطيب برضه .... بس الراجل الطيب زهق وفاض بيه يا ساده , مفهاش مره تالته , إعمل اللي انت عايزه في برامجك , وهتبقى جنت على نفسها برامج !!.

قصه أعجبتني !!
.
يُحكى أنَّ شاباً صالحاً تقياً ورعا أراد أن يتزوج , فذهب إلى أحد الرجال الصالحين وقال له أريد أن أتزوج ابنتك , رد عليه الرجل الصالح قائلا ( أهلا بك يا بني , لكن ابنتي عرجاء صماء بكماء ) , قال الشاب ( وأنا قبلت , يكفي أنها ابنتك سيدي الشيخ ) , فقال له الشيخ ( إذا لا بأس , بارك الله لكما ).
.
ولما دخل الشاب على زوجته قال السلام عليكم فردت عليه السلام , فصٌعق الشاب من الصدمه ( هي إذا تسمع وتتكلم ) , ثم وقفت وتقدمت نحوه , لاحظ أنها ليست عرجاء أيضا , الله أكبر ولله الحمد !!
.
الترجمه بقى
كان فيه واد مقطّع حصر الجامع , وقال يعني إنه يكمل نص دينه فراح للشيخ بتاعه قال له أنا عايز أتجوز بنتك يا مان , الشيخ قاله ( قشطه بس بنتي تعبانه مُلّه , لا بتمشي ولابتنطق ولا بتسمع ) , الواد قال مش مشكله هبقى أظبّطها في التأمين الصحي , أنا موافق ديل deal ؟ الراجل قال له قشطه ديل .
الواد بقى بعد ما دخل على عروسته لقاها مشغله الكاسيت على أغنية سيرة الحب وهاتك يا رقص , الله دي بتمشي وبترقص كمان , و قالت له تعالى يا حماده........ صلاة النبي أحسن !!.
.
الحكايه باختصار إن القصص الهلاميه اللزجه دي من وحي خرافات وخزعبلات مشايخنا والغرض منها هي انتزاع الأهات من صدور الحاضرين , تكبيييير .
.
واحد صاحبي مسيحي كتب على صفحته إن عندهم نفس القصص الهلاميه اللزجه دي ( من تأليف القساوسه برضه لانتزاع أهات المصلين ) , وهو ده بقى المفهوم الحقيقي للوحده الوطنيه , يعني وحدة في الخرافات والخزعبلات .
.
الجيل بتاعنا الكتكوت اللي اتربى عالقصص اللي بالشكل ده لازم لما يكبر يصدق إن أبو الفتوح مش إخوان وإن حماس وقطر والإخوان هيحررو القدس وإن عادل عبد العال وسعيد حساسين بيفهمو في الطب والدوا أكتر من معامل أبحاث شركة جلاكسو العالميه !!.

مراجيح
.
- واحد صاحبي مشير مقال لمصطفى النجار ( بتاع مبنامشي الليل على بنات الإخوان اللي كانو مسجونين ) , أنا أول مره أعرف إن مصطفى النجار بيكتب مقالات , وكنت فاكره عضو مجلس شعب سابق وحاليا بيقضي معظم وقته قدام المرايه يقرّص في خدوده عشان تتنفخ كده وتبقى حلوه زي الستات ماكانو بيعملو لبناتهم زمان .
.
عموما أكيد المقال ده كتبه أيام ماكان مبيعرفشي ينام ( الأرق وحش برضه ) , وتلاقيه لما عرف إن الحكم على بنات الإخوان اتخفف خالص نايم دلوأتينوم عميق , محدش يصحيه بقى , ولما يصحي براحته قولوله محمد بيقولك والنبي يا شيخ وحياة خدودك الوردي تصوّت ب لا عالدستور , ولا تزعل نفسك خالص !!.
.
- طلبة الإخوان في جامعة الأزهر وجامعه القاهره خاربينها مداين و 100 طالب في كل كليه عايزين يوقفو الدراسه فيها , بس الأمن ابن الحرام دخل لهم الجامعه , المكان المقدس الطاهر القديس القدسي , ضربونا بالغاز واحنا بنحرق الجامعه يا بيه !!.
.
- أحد المشايخ المشاهير قال إنه لما قابل نيلسون مانديلا دعاه للإسلام , وده بيأكد حقيقه فعلا , إن لو مخلوقات فضائيه نزلت على كوكب الأرض عندنا هينقسم المشايخ إلى قسمين , قسم هيدعو المخلوقات الفضائيه للإسلام وقسم هيشوف الطريقه المثى لجماع المخلوقات الفضائيه , وغالبا القسم التاني هيبقى هو هو القسم الأولاني .
بتخيل مشهد هزلي للشيخ مع نيلسون مانديلا وهو بيدعوه لاعتناق الإسلام , مش كان أولى بمانديلا إن هو اللي يدعو الشيخ إلى إعتناق الإنسانيه ؟!!.
.
- دور النشر بتواجه مشكله كبيره مع المكتبات في عملية التوزيع , المكتبات بترفض استلام الكتب الرخيصه ودواوين الشعر , بتقول مالهمشي زبون سيادتك , ولما اقترحت عليهم إننا نغير نشاطنا ونكتب عن الطبيخ وأحدث الطرق لنفخ الشفايف كان الرد الصادم بالنسبالي ( قالو لي أه والله ده اللي بتطلبه المكتبات فعلا إنت عرفت إزاي ؟!! ).

قمة التراللي اللي في دماغ النشطاء والنخبه !!.
.
عايزين الشرطه تعاملنا في المظاهرات بالطريقه السويسري مع إننا بنتظاهر بالطريقة الصومالي !!.
.
ورد في الأثر إن المتظاهر يرميك بالطوب والحجاره والمولوتوف ويحرق عربيتك ويدخل الجامع ويعمل إنه بيصلي أو يدخل معمل الكليه ويعمل إنه بيتعلم , بس انت ممنوع تدخل وراه ... أصلها اماكن ولا مؤاخذه مقدسه !!.
.
دي نخبه مصري أم الأجنبي !

أحمد منصور من مقر جهاده في ( عشة الفراخ القطريه ) يكتب على حسابه الشخصي : طلاب وطالبات ( مصر ) أكدو أنهم الذراع الضاربه لل ( ثوره المصريه ) و حملو ( القوى السياسيه ) مسئولية التحرك داخل مصر وخارجها لإسقاط ( الإنقلاب ) !!.
.
واخدلي بالك انت من الي بين القوسين ؟ قالك طلاب مصر ( مش طلاب الإخوان ) , والثوره المصريه ( والله زمان يا ميدان !! ) , والقوى السياسيه ( معروفه طبعا 6 و 7 والنحانيح !! ) , داخل مصر وخارجها !! أه يا مراري ياني .
.
وطبعا أعضاء حركة 6 هينزلو مع أعضاء حركة 7 إيد واحده , ماهما أعضاء بقى مع بعضيهم !!.
.
بالك إنت , زمان كان فيه حاجه مشهوره عند العرب , يقولك فلان الفلاني ده عاش في كنف فلان وربّاه فلان فأحسن تربيته .
.
أهو أخونا أحمد منصور عاش في كنف ( أو كنيف بمعنى أصح ) حمد وربّته موزه فأحسنت تربيته , نعم الإبن البار يا بني.
.
أه نسيت حاجه , أحمد منصور مش إخوان على فكره ولا أيمن نور ولا عاصم عبد الماجد ولا وائل قنديل بس الصدفه جمعتهم في نفس اللحظه في عشة الفراخ القطريه ( شوف حكمة ربنا يا جدع ؟ ) , بالصدفه البحته.............................. ورُبّ صدفةٍ خيرٌ من ألف دولار !!.

قطه غتيته أوي , لقت باب الصيدليه مفتوح قامت داخله , وانا عمّال أقول لها ( بس ...بس ...بس ) مفيش فايده , مش بتمشي , الغريبه إنها وقفت كده وبصّت لي باستغراب , في الأول قلت في نفسي بس أكيد القطه دي مبتعرفشي عربي , جايز اتربت في بيت عيله فلبينيه ولا حاجه , وانا مبعرفشي نداء شعبي لطرد القطط غير كلمة ( بس ) , هذا ما وجدنا عليه أباؤنا !!.
.
بس لما ركّزت في عنيها ونظرتها شويه حسيت إنها بتقولي ( إنت اللي غلطان لأنك سايب باب الصيدليه مفتوح , وطالما الباب مفتوح يبقى أنا من حقي أدخل وأخرج وقت ماحبّ , الدستور بيديني الحق ده , ومش من حق أي مخلوق كان إنه يقولي بس ) .
قلت بس , أنا كده فهمت , طالما انتي بالغتاته دي وغاوية مناهده تبقى أكيد اتربيتي في بيت واحد مصري عضو في حركة 6 إبريل !!.

December 11 · Edited

حزب مصر البردعه !!
.
صباح الخير
مشهد سياسي في الزريبه , مجموعه من الحمير على كل شكل ولون , منهم الحمار الوحشي ( هتلاقيه مخطط كده وشرس شويه ) لكنه بيتركب برضه عادي , ومجموعه من الخرفان في نفس الزريبه وغزاله وزرافه وفيل وأسد وشوية حيوانات تانيين .
.
الخروف قال للحمار أنا عايز أركبك ونروح مشوار كده صغير وهجيب لك هديه حلوه , الحمار قال له على جثتي , ده لا يكمن أبدا , إنت نسيت لما ركبتني في المرتين تلاته اللي فاتو وبرضه قلت لي هجيب لك هديه ؟, وفي الأخر وصلت المكان اللي انت عايزه ورميتني في الترعه , ولولا ولاد الحلال جابو حبل وشدوني كان زماني غرقان .
.
الخروف قال للحمار , يا أخي الكريم , لا تسئ الظن بي , إنت عارف الوضع والظروف والمتسجدات وفيه حيثيات وأبعاد كتير إنت متعرفهاش , المره دي مختلفه تماما لأن زوايا الرؤيا واضحه , وهديتك أهي يا سيدي , شوفتها ؟ بس هديهالك لما نوصل , قلت إيه ؟
.
الحمار قال له لأ مستحيل أنا أصلا جسمي لا يمكن يلمس جسمك مباشرة كده , الحمار الوحشي يقول عليا إيه وانا حالف قدامه وموقّع على وثيقه إن جسمي وجسمك ما يلمسو بعض ؟ , ولا الغزاله ولا الفيل وباقي الحيوانات اللي مش بسلم من كلامهم ؟!
.
الخروف قال للحمار في دي عدّاك العيب , وطالما انت حالف فانا مش هضيع حلفانك أبدا , وجسمي مش هيلمس جسمك كمان عشان نتقي الشبهات , ثواني وانا هحل لك المشكله دي , وراح الخروف جري وجاب بردعه ربطها على ضهر الحمار وقال له أهو يا عم , اللي لامس جسمك هي البردعه وانا هركب فوق البردعه دي , أظن كده يبقى محدش له عندنا حاجه وركوبنا شرعي وحلال ؟!
.
الحمار فكرّ ثواني وقال كده تمام , إركب بقى , الخروف وقف على حجر كبير كده اسمه ( حجر الثوره وحق الشهدا ) , ونط على ضهر الحمار وقال له ( حا بقى يا صاحبي , شي يا حبيبي ونور عيني )
....وبكده خلصت الحلقه رقم 3 أو 4 مش فاكر من مسلسل الحمار والخروف ( في الزريبه ) !!.
................................................
................................................
النحانيح هيصوتو ب لا على الدستور , بعد ما حزب مصر القويه أعلن إنه هيصوت ب لا , والإتنين هيحشدو لمظاهرات ضد أي حاجه وكل حاجه , ............... والخروف هيركب كالعاده , بس ركوب حلال لأن أبو الفتوح موجود في النُص , وده أحسن واحد يلعب دور ( البردعه ) !!.

يااااااااااااااه , أخيرا هيزفلتو الشارع اللي جنب الصيدليه , أنا مش مصدق نفسي يا لمبي , عربية الأزفلت وصلت ( أيوه الأزفلت ) , والطريق ده مكسّرينه بقالهم ييجي تسع ست شهور , وكل يوم تيجي عربيه ترشه مايه وعربيه تانيه لها روله كبيره كده تدكّه كأنها بتعمل رقاق , وتاني يوم يتكرر نفس المشهد , عارف انت البتاعه أم روله دي مره جابها اسماعيل يس في الفيلم بتاعه وكان عنده بنطلون عايز يكويه وراح حطه تحتها , الشارع ده اندك دك يا جدعان , كأن مالوش أهل يسألو عليه , اتفرم يعني من الأخر , بيفكرني بحال مصر في ال 3 سنين اللي فاتو , يالله جايز بشرة خير وتكون مصر هتتزفلت قريب عشان نرتاح بقى.

الضحك حتى الثماله ( إضحك من قلبك مع الليبراليين ) !!
.
حدث بالفعل , إتنين من أصحابي الليبراليين المحترمين جدا , اللي بيحبو مصر بجد , واحد فيهم قال إنه هيصوت ب لا عالدستور لأنه دستور العسكر !! , والتاني قال إنه هيصوت ب لا برضه بس عشان مادة ( حكومه مدنيه ) فهمها إن القصد منها إن وزير الدفاع ممكن يكون مدني , وقالك ده لايمكن أقبل بيه أبدا وهصوت ب لا !!.
يعني واحد فاهم إن ده دستور عمله الجيش وخد فيه أكتر من حقه ( دستور عسكري تماما ) والتاني فاهم إن ده دستور اتلوى فيه دراع الجيش ومخدش حتى حق إن وزير دفاعه يكون من أبناء القوات المسلحه , والإتنين اتفقو إنهم يصوتو ب لا ( أه زي الإخوان وابو الفتوح ) ...
باختصار : أستاذ خليفه خلف خلف خلاف المحامي !!
.
صاحبي التالت بقى قال لي متقلقش يا محمد , الإخوان مش هياكلو عيش في مصر تاني , مممممممممممم هما بالشكل ده فعلا مش هياكلو عيش , هياكلو بقلاوه ياكلو جاتوه ياكلو كل اللي يحبوه .
.
من سنتين وانا بقول إن أسعد مخلوقات الله حظا في مصر هو محمد بديع , يا فرحته بيكو والله .

القاضي يستشعر الحرج !!
.
من كام يوم قريت مقال كاتباه ظابطه شرطه , عجبني اوي المقال , حلوه حكاية القاضي يستشعر الحرج دي , كل شويه قاضي بيستشعر الحرج , حقيقي جميله .
.
طيب فكّر معايا كده :
.
رجل الشرطه لما بينطلب منه مطاردة بلطجي او تاجر مخدرات مش بيمتنع ويقول أنا بستشعر الحرج واحتمال كبير يتقتل ( لكن مش من حقه يقول أو يمتنع )!!
.
ظابط الجيش لما بيطلع في حمله لمطاردة الإرهابيين أو بيواجه عدو في حالة حرب مش من حقه يمتنع أو يستشعر الحرج واحتمال كبير يتقتل !!.
.
العسكري الغلبان واقف خدمه بالسلاح ودمه بيتصفى بس مش بيستشعر الحرج ومش من حقه يعترض .
.
لو حضرتك دخلت مستشفى والطبيب في الطوارئ كان واقف من 12 ساعه و نايم على نفسه تماما ومعاك حاله مستعجله مش من حقه يمتنع او يستشعر الحرج .
.
إنما معالي صحب السمو الملكي القاضي المصري من حقه كل شئ ومن حقه يمتنع عن أي شئ , في البدايه كنت بفهم حكاية يستشعر الحرج دي على إن القاضي بيكون له صلة قرابه أو معرفه بأحد أطراف القضيه فيعني درأً للشبهات ينسحب .
.
إنما أغلب ظني إن الليله حاليا بقى فيها إغراءات وفلوس وتهديد ( إحتمال ) وموضه وليله سوده مش هنخلص منها ...بالمناسبه العسكري والظبابط بيتهددو برضه وعندهم اغراءات لاستشعار الحرج يا معالي صاحب السمو الملكي القاضي المصري الشامخ !!
.
ملحوظه لأصدقائي : لو حضرتك بقى فهمت من الكلام ده إني متحيز لشرطه وجيش وإني فلول وكداهون فانا مش ذنبي إن دماغك دي مش بتاعتك وامك هي اللي شاريهالك !!.

شكر واجب
.
بعيد عن أمراض حضرتك المستوطنه وبغض النظر عن تهيؤاتك ومخاوفك و خزعبلاتك , أقدر أقول إني لحد النهارده مش شايف أي خطأ لعبد الفتاح السيسي غير خطأ واحد و وحيد , خطأ جايز يوصل لحد الخطيئه ,
وهو إنه سمع كلامنا في 30 يونيو ونزل معانا , حمى ثورتنا واستجاب لطلب الملايين اللي نزلت وكانت خايفه على بلدها وعرّض حياته للخطر , هو ده خطأ السيسي لأننا بكل صراحه وباختصار منستاهلش .
.
كان المفروض يسيب البلد ويسلمها للإخوان زي ما عمل طنطاوي , حتى طنطاوي كان معذور لما قال إن الإخوان هما الفصيل الوحيد الجاهز لحكم مصر وكان خايف من حرب أهليه وخراب جايز .
.
إنما السيسي مش متربي وغبي , بقى حد يا راجل يسمع كلام ناس زي دول ؟ داحنا بقينا 40 حزب وحركه وبنقطّع في بعض ؟!.
عايزك انت بقى تتخيل كده إن عملية عزل مرسي فشلت كان ايه اللي هيحصل للسيسي نفسه ؟ أكيد كنا هنلم أشلائه من كل محافظه حته , ولحد النهارده تبقى عبيط وساذج لو مفهمتش إن عشرات الملايين من الدولارات ممكن تتصرف على عملية اغتيال لعبد الفتاح السيسي , أجهزة مخابرات لدول كتير ممكن تشترك في العمليه تلبية لطلب التنظيم الدولي , الشر اللي جوه الإخوان يكفي , وفلوسهم متلتله ولو مش معاهم قطر موجوده وأمريكا واسرائيل في الخدمه ومجانا لو تحب .
.
كل احترامي الشخصي لشخص عبد الفتاح السيسي من مواطن مصري مبقاش لاقي ناس كتير حواليه , ربنا يحفظك يا شيخ .
.
أه نسيت حاجه مهمه , أنا هنتخب حمدين صباحي اللي أعلن ترشحه النهارده ( يارب نعجب أصدقائي بتوع يسقط حكم العسكر ...ولا صبّاحي عقيد متقاعد وانا معرفش ؟!! ).

واحد صاحبي برادعاوي كتب على صفحته تعليقا على طريقة التعامل مع شغب الإخوان في جامعة الأزهر : يجب على كلا الطرفين إلقاء السلاح والإحتكام إلى المفاوضات والحلول السياسيه !!.
.
أه والله ده بالنص تقريبا , والطرفين سيادتك يقصد بيهم الإجهزه الأمنيه من ناحيه وميليشيات وطلبة الإخوان من ناحيه !! .
.
هاتولي عقل تاني بقى ستانلستيل ( أو حاجه كده من منتجات كاتربيلر ) عشان أعرف أعيش وسطيكو , بقى اعتراف ضمني بوجود سلاح في إيد ميليشيات الإخوان وفي نفس اللحظه بيقولك الدوله ترمي سلاحها ,يعني الشرطه والجيش يمشو من غير سلاح , تقريبا كل واحد فيهم يستلم وظيفته ومعاها ديوان شعر لفاروق جويده بدل السلاح عشان يحمي بيه الشعب !!.
.
يا ناس , دماغي ورمت وفلطحت و بقت عامله زي البطيخ السعودي ( الحبحب ) , حاسس إني باقي لي يومين تلاته مناقشه مع البرادعاويه وبتوع 6 إبريل وهمشي في الشارع أقول : أنا نور الإله , أنا الشمس في كبد السماء !!.

December 12 · Edited

أدوات النصب وشيوخه !!.
.
صباح الخير
- صعد الشيخ الكبير على المنبر , وبدأ يقص على المصلين ما رأه بأم عينه , وكيف أن رجلا فقيرا جلس أمام الكعبه يتضرع إلى الله أن ينتشله من فقره ويسد عنه دينه , وماهي إلا لحظات حتى أتى رجل غريب ( لابس أبيض فابيض ) وألقى في حجر هذا الفقير شنطه مليانه دولارات !!....الله أكبر , تكبيييييير من المصلين , بكاء في شتى أنحاء المسجد ونهنهه وشحتفه , حتى أن بعض المصلين الفقراء تعلّقت عيناه على أبواب المسجد في هذه اللحظه فلربما يأتي هذا الرجل اللي لابس أبيض فابيض ومعاه الدولارات !!.
.
جلس الشيخ الكبير مفسر الأحلام أمام شاشة التلفاز , تلقى مكالمه هاتفيه من سيده قالت أنا زوجها متجوز عليها وانها حلمت , خير اللهم أجعله خير , إن جوزها كان قدامه طبق فيه 4 صوابع محشي وقام إدى للست المتصله صباعين محشي ولمراته التانيه صباعين محشي , هنا ينبري الشيخ في تفسير الحلم ويقول لها ( طالما إداكي صباعين وللتانيه صباعين يبقى هيعدل بينكو !! ) .
أنا أول مره أعرف إن صباعين محشي في الحلم بتعني العدل , طيب ماحنا كده يبقى عندنا عدل من زمان زايد وفايض ومالي الحلّه ( قصدي الدوله ) !!.
الغريب إن الشيخ مفسر الأحلام في نهاية كل حلم بيفسره لازم يقول الجمله أو الأيه دي ( قُضي الأمرُ الذي فيه تستفتيان ) ......... مممممممم أيوسفُ أرى يابن المره ؟!!.
.
في معجنة العلاج بالأعشاب والطب النبوي جلس عادل عبد العال وسعيد حساسين يتحدث كل منهما كيف أنه ( بفضل الله وتوفيقه ) توصل إلى علاج لمرض ( الإستبحس المنغولي ) بخلاصة منقوع نبات الحيزبون !! .
لابد لكل منهما ان يبدأ حديثه بأيات الله ويختمه بأحاديث لرسوله , ولا مانع من إضفاء بعض القدسيه ( النبويه ) على تركيباته اللوزعيه , من قبيل أن رسول الله كان يشرب كذا لما كان بيجيله كذا ........ ممممممم نبويه بتسلم عليك أيها الشيخ الدكتور !!.
.
قنوات فضائيه تشاهد فيها الإعلانات وفي الخلفيه يأتيك صوت أحد مشاهير المشايخ وهو يقرأ القرأن , الإعلانات أغلبها إعلانات للمقويات الجنسيه والأندر وير يا جناب العمده , ومن باب الصدفه البحته يصر صاحب القناه إن الشيخ يقرأ من كتاب الله سورة سيدنا يوسف ويركز على الحته بتاعة إمراءة العزيز مع سيدنا يوسف , أيوه هي دي , الله يفتح عليك يا شيخ!!.
.
الخلاصه
هؤلاء المشايخ وأشباه المشايخ وأشباح المشايخ وتجار الدين ما كانو ليأكلو خبزاً ( أو بقلاوه ) في أم الكنانه وأم اللي جابوها , لولا أننا شعب يعاني نصفه من الجهل ويعاني النصف الأخر من التدين المصطنع ( القاعده تقول : كل نصّاب يلزمه جاهل ) , من فضلك حدثني عن الديموقراطيه والصناديق في وقت أخر !!.

خزعبلات المصريين , فيها حاجه حلوه !!
.
- خزعبلاتنا لا تنتهي , وبناخدها معانا في أي مكان بنروحه ( بكرتونتها كده ) , تقدر تقول فولكلور ومتعودين عليه من باب العشره يعني .
.
1- واحد عامل حساب عالفيس وباعت لي طلب صداقه مسمّي نفسه ( عذاب القبر ) وحاطط صوره مخيفه !!
اللمبي ستايل ( يالله ياد من هنا يلعن أبو اللي جابك ) , قبر يلمّ العفِش يا واطي !!.
.
2- لما واحد مصري مغترب بيكلم مراته في الموبايل وحضترك تبقى واقف بالصدفه على بعد 40 متر بتسمع كل المكالمه بوضوح شديد ( أيوه يا هبه ...إنتي وحشتيني أوي , العيال عاملين ايه ...حاضر هجيبلك العبايه الكحلي وجبت لك كمان قمصان نوم ....... إلخ ) , لو صبرت شويه عالمكامله هتعرف هبه وجوزها كانو بيعملو ايه في ليلة الخميس و بالتفصيل !!
.
3- إمبارح وانا بجيب بنتي من المدرسه , بنقف عالبوابه كده وممنوع ندخل , وكل واحد بيمسك الميكروفون وينادي على اسم بنته , جه واحد مصري ومسك الميكروفون وقال ( هنا محمد ابرهيم حسنين ) مممممممممممم إيه يا عم انت بتنادي على بنتك ولا بتطلع لها بطاقه !!
.
واحد تاني فطسني من الضحك بدون ما بقصد , بنته اسمها مريم , مسك الميكروفون وقعد يقول ( مريم , مريمم , مريمممممممممم ) !!
والتاكسي اللي جاي م الحمام عليه خميسه من قدام !!.
.
4 - مره كده في لحظه تجلي فكرت وبجد والله , لو صبحي صالح ( بتاع اللهم أمتني على الإخوان ) دخل الجنه , وقابلني هناك ( يا سيدي بقول مثلا ) وعرف إن أنا كنت واحد من الإنقلابيين في الدنيا , يا ترى هيصدق إن ربنا ممكن يدخل حد من الإنقلابيين الجنه ؟ ولا هيقول دي مؤامره على الرئيس الشرعي المنتخب , مشترك فيها الملايكه ؟!!.

ده تعليق واحد عندي , كاتب إنه رئيس مجلس إداره , هو حر ياكشي يكون رئيس وكالة ناسا , أي حد من أصدقائي الأعزاء بيفكر بنفس الطريقه دي يا ريت مشكورا يعمل لي بلوك , وكفايه كده أوي , ملعون أبو ثورة يناير على ثورة يونيو عالكل كليله , لما توصل لتمني حرب أهليه وانشقاق في جيشك يبقى ليس بعد الكفر ذنب , الساده النحانيح ياريت يدخلو صفحة معالي رئيس مجلس الإداره ويعرفو مصر رايحه على فين أو ميدخلوش ويحذفوني ويرحمو أمي , شوفوه كاتب ايه عن جيش مصر .
.
Mohamed Farid Hassanein · 248 من الأصدقاء المشتركين
قريبا يرفع الرافضين للقهر والقتل السلاح فى وجه الطغاه, تذايد الفقر والجريمه وتهريب الاموال سوف يشعل المعارك فى المدن والقرى, وحتما سوف ينضم شباب ضباط الشرطه والجيش الى الشعب.

عبيد البياده ...... نعم أعترف
.
- لو كنت تقصد بالبياده الجزمه الميري اللي كان لابسها العساكر اللي اتقتلو وهما بيفطرو في رمضان قبل اللي فات !!
.
- لو كنت تقصد بالبياده الجزمه الميري اللي بيلبسها الظابط وهو طالع يحارب الإرهابيين عشان يحميك ويحمي ترابك ويا يعيش يا يموت !!.
.
- لو كنت تقصد بالبياده الجزمه الميري اللي لبسها أبويا وجدي وهما بيحاربو في 56 , 67 و 73 والإستنزاف !!
.
- لو كنت بتقصد بالبياده الجزمه الميري اللي لابسها عسكري دلوأتي وواقف بيها خدمه على حدودك مع ليبيا ولا السودان في عز البرد وانت نايم تحت البطانيه !!
.
- ولو كنت تقصد بالعبوديه هنا هي احترام وتقدير وتوقير الكيان نفسه ( الجيش المصري ) ............ فأنا أوّل العابدين !!.
.
أدي أخرة شُرْب وأكْل حشيش
بتسبّ وتلعن قال ف الجيش
الجيش المصري لا عمره لا خان
و لا عمره يخون
................يا كلاب صهيون !!.

شوطه كده ماشيه عالفيس بقالها يومين تلاته , قالك اكتب أهم 10 كتب أثرو في حياتك , وشاركها مع معرفشي كام واحد من أصدقائك .
يعني باختصار المثقفين الجامدين تنين يعملو أاد لبعض !!.
.
وشوف بقى يا مولانا هتلاقينا كلنا مثقفين أخر حاجه , واسماء الكتب المكتوبه أغلبها أجنبيه وشغل مراجع بقى , أو عربيه بس عميقة المعنى ولها بعد فلسفي يضرب بجذوره في أعماق العقل الباطن , و تنبري جذوة اللهيب الثقافيه في بؤرة تكوين الشخصيه المصريه.
.
والنبي إحنا شعب زيّاط , أيوه زياط , ( زاط يزيط فهو زيّاط ) , ولما احنا مثقفين للدرجادي الإخوان عاشو وسطنا 80 سنه إزاي ووصلو لحكم مصر إزاي ؟ وعادل عبد العال ومحمد حسان بقو مليونيرات إزاي ؟!!.
.
أنا شخصيا من باب نشر الثقافه هشارك في الشوطه دي ببعض الكتب اللي قريتها النهارده الصبح ( من 9 ل 9 ونص كده )
.
1- الأمير ...the prince مكيافيللي
2- المبادئ .... إسحاق نيوتن
3- أصل الأنواع the origin of species ...تشارلز دارون
4- النسبيه .... ألبرت أينشتاين
5- كفاحي ....أدولف هتلر
6- ثروة الأمم the wealth of nations أدم سميث
7- رأس المال ....كارل ماركس
8- رواية الفيل الأزرق ... أحمد مراد
9- الأسود يليقُ بكِ .... أحلام مستغانمي
10- تفسير الأحلام the interpretation of dreams ....سيجموند فرويد
.
.
مشاركه مع @أبوشفتوره , @الدفاس , @أبو دومه , @ريري سيلان , @سنيه ركبه

عساكر غلابه , نصيبهم من الدنيا دي 3 حاجات , يقفو خدمه بالسلاح في عز البرد واحنا نشتمهم من تحت البطانيه ( ونسب ونلعن في الجيش ) , ويتفجرو بسياره مفخخه واحنا نقول ( الحل الأمني لا يفيد ) من تحت البطانيه برضه , ويموتو واحنا ننساهم ونتكلم عن الحب والرومانسيه ومشروب السحلب الدافي والمشي تحت المطر مع حبيبك.
يابني موت بقى , موت ومتتعبشي قلبي معاك , إنت لا كده عاجب ولا كده عاجب , موت يابني , الموت للي زيك راحه !!.

مطلوب زعيم لمصر , الأن , فورا , دون إبطاء , تُلغى خارطة الطريق , تؤجل أي عملية انتخابيه , مطلوب دعم كامل من الشعب والإعلام للحرب ضد الإرهاب , مطلوب حمله كامله ومحكمه للجيش والشرطه لا تتوقف للقضاء على الإرهابيين , مطلوب فورا فصل كل طالب إخوانجي يمارس بلطجته داخل أسوار الجامعه , مطلوب اعتقال الكلب القطري وكل أسرته وترحيلهم إلى مصر وفضح مخططهم الصهيوني القذر ومن ثم ضربهم بالنار في ميدان التحرير , مطلوب اسقاط الجنسيه المصريه عن كل كلب مصري يعمل في قناة الجزيره , مطلوب رفع علم مصر على كل شبر من تراب هذا الوطن , مطلوب زعيم مطلوب زعيم مطلوب زعيم , اللهم قد بلغت اللهم فاشهد !!.

December 13

فكره
.
مساء الخير
خد لك فكره , واشتري دوله لبكره !!.
.
موضوع المصالحه والصلح والتصالح ده حاجه جميله أوي , يا سلام , هو حد يطول ؟ كلنا بنحلم بالإستقرار وعايزين أمن وسلام , وانا بالمناسبه لا سادي ولا مازوخي ( حلوه مازوخي دي يا حاج محمد ؟) , يعني لا غاوي تعذيب الغير ولا مغرم بتعذيب نفسي .
.
إنما خلينا معاك لأخر الطريق , هفترض جدلا إن الدوله قررت التصالح مع الجماعه الإرهابيه بكل فروعها وسلطاتها وبابا غنوجها , وسط تصفيق حار من الشعب المثقل بجراحه وألامه , يعني قعد كبارات البلد دي مع قيادات الإخوان والزمر ومندوب عن اسامه بن لادن وقالو خلاص يا ولاد عفى الله عما سلف , وقامو حضنو بعض في مشهد درامي مؤثر , وقررت الدوله الإفراج عن قيادات الإخوان والإبقاء على مكتب الإرشاد بفلوسه المتلتله , وتقديم إعتذار رسمي إلى محمد مرسي والسماح لهم بخوض الإنتخابات اللي جايه تحت إسم حزب الحريه والعداله مقابل توقف أعمال الإرهاب والعنف ... حلو الكلام ده ؟
.
طيب دخلنا بقى الإنتخابات وقبل إعلان النتيجه بساعتين تلاته راح مندوب من الجماعه لعبد الفتاح السيسي وقال له لو مأعلنتش فوز مرشحنا هنخربها مداين ( حصل الكلام ده قبل كده ولا محصلش ؟! ) , السلاح سلاحنا والإرهابيين بتوعنا قلت ايه يا سيسي ؟! أو بعد سنه مثلا الإخوان خدو 30 % في البرلمان وراح نفس المندوب لرئيس الدوله يهدده بعودة الإرهاب لو الرقم 30 متصلحش وبقى 60 ؟ هتعمل ايه سيادتك ؟!
.
حبيب قلبي سابقا my ex love محمد البرادعي , لو قرر لسبب ما إنه يمارس العمل السياسي في فيينا وطلع في برنامج توك شو وقال على جماعه إرهابيه ناشئه في النمسا ( يعني مالهاش تاريخ إسود ولا حاجه ) إحنا لازم نتصالح معاها ... عارف إيه اللي هيحصل ؟ 10 دقايق بالظبط وهتلاقي البرادعي مقبوض عليه ومتحول لمستشفى المجانين للكشف عن قواه العقليه !!
.
أتدرين معني ( كسر هيبة الدوله يا صفيه) ؟! , أهو الكلام اللي فات ده معناه كسر الدوله وهيبتها والإبقاء على خيبتها أبد الدهر , التصالح مع الإرهاب يعني أنك تضع يدك وأصابعك طواعيةً في فم الذئب بينما تعتقد أن وثيقه ما وقعتها مع هذا الذئب كافيه بحماية أصابعك !!.

أفلام عادل إمام ............ اختصار المشهد
.
- رياض الخوالي وعادل إمام في فيلم ( طيور الظلام ) هما قيادي إخوانجي و قيادي في الحزب الوطني .......الإتنين اللي خربوها مداين !!.
.
- نادر وداليا في فيلم ( السفاره في العماره ) هما علاء عبد الفتاح وأحمد ماهر ( معرفشي مين فيهم داليا تحديدا ) , ممدوح حمزه هو الدكتور شهدي , وأسماء محفوظ هي الداده الرفيقه عطيات , ...........خُلقنا لنعترض ونصلّح راديوهات !!.
.
- محمود في فيلم ( مرجان أحمد مرجان ) هو نادر بكار , يا إخواني إن مرجان أحمد مرجان هو مثال للأمانه والشرف فاحذرو ( أن تصيبو قوما بجهاله فتصبحو على ما فعلتم نادمين ) !! .
.
- أنا وحضراتكو وكل الساده القاطنين بمدينة الفيس بوك بنلعب دور ( أنيتا هنري جوتنبرج ) جايين نخرب البيت بفزلكتنا , وعندنا مبرر لخرابها إن ولادك يا مصر مش يعرفو يعني إيه ديموقراطيه , مش يعرفو يعني إيه سيكس !!.
.
- أما بقى وائل قنديل وعلاء صادق وأحمد موسى ومصطفى بكري فكان لهم دور كبير جدا في فيلم عمارة يعقوبيان !!.

أحلام العصافير ....ذكريات بقى
.
وانا صغير في ابتدائي كده كان ابويا الله يرحمه عنده عَجَله ( دراجه هوائيه بالإنجليزي ) , وكان ممنوع حد فينا يركبها , في الوقت ده كنت بحلم إني لماكبر أطلع طيّار , عشان أبويا يوافق إنه يديني العجله بتاعته أركبها ويبقى مأمن عليّا ( قصدي عليها ) , وبعدين قلت الله ؟ ماهو انا لو بقيت طيار هيبقى معايا فلوس كتير , وساعتها مش هحتاج العجله بتاعة أبويا وأقدر إني أتأجر أتخن عجله من وراه !!............... الخوف حلو مفيش كلام .

خليكو فاكرين بقى
.
بكره هتُعلن نتيجة انتخابات نقابة الأطباء , أتوقع فوز قايمة الإخوان ( أطباء من أجل مصر ) في القاهره والجيزه وبعض المحافظات .
سيبك من الهري اللي بتسمعه دلوأتي , وطبعا النتيجه دي هتٌترجم في الخارج إنها شعبيه للإخوان , وانا صوتي اتنبح إن أم الإرهابيين على بعض مش بيمثلو أكتر من 20 % من الشعب ده , بس 20 % كتله واحده , صندوق مقفول ,مابيختلفوش , مابيقطعوش هدوم بعض , توب قماش منضربشي فيه مقص .
إحنا لأ , كل واحد فينا عامل حزب وبيلعن في الحزب التاني , كل 3 مع بعض بيعملو تكتل وإتلاف عشان يسقطو التلاته التانيين , و جتها نيله اللي عايزه خلف .
.
هتبقى صفعه قويه على قفا النحانيح ونشطاء الغبره والليبراليين عموما , درس قاسي يا ريت تتعلموه قبل انتخابات البرلمان , هناخد الصفر المتين في البرلمان مع إننا أغلبيه , خليكو كده بقى , شويه واقفين في الشارع يتظاهرو وشويه واقفين في البلكونه يعترضو وينددو وشويه نايمين تحت البطانيه بيدفّوها !!.