Mohamed
Hussein
20
ديسمبر 2018·
التايم لاين النهارده
فيه كمية ملل تكفي كوكب الأرض و المجموعة الشمسيه , مش ناقصه بس غير نكتتين يقولهم
الخليل كوميدي و تعليق على الأحداث يكون بصوت الكابتن أيمن يونس , و في أخر مشهد خالص
قبل ما ينفجر تظهر ريهام سعيد بسحنتها وبوزها الشبرين و هي ماسكه الكوز في ايديها و
تسألني سؤال واحد : مش ندمان انك فتحت أكاونت عالفيس ؟ ندمان صح ؟ قول انك ندمان .
.......................................................................................................
Mohamed
Hussein
19
ديسمبر 2018·
ضحكة الصباح
.
صباح الخير
- حدث بالفعل
, مواطن تركي خلّف توأم و بعت لرئاسة الجمهوريه التركيه رساله إنه ظروفه الماديه مش
قد كده و محتاج عربة اطفال للتوأم بتاعه .
قامت رئاسة الجمهوريه
ردت عليه و قالت له مش هنقدر نساعدك بس ممكن نبعت لك صورة فخامة الرئيس رجب طيب أردوغان
, أه و عهد الله زي ما بقول لكو كده
..................
مشهد 1
الأب التركي لمراته
: بصي بقى احنا هنعلق صورة أردوغان في أوضة الولاد , عشان أولادنا التوأم أربكان و
خربشان يستلهمو قوة الشخصيه و نبع الإيمان و عمق الوجدان من الصوره .
الأم : اللي تشوفه
ياخويا .
.
مشهد 2 , مكالمة
تليفون , بعد مرور عدة ساعات
الأم : ألو , إلحق
يابو أربكان
الأب : خير يا
أم أربكان حصل ايه .
.
الأم : ولادنا
يا خويا ولادنا
الأب : ولادنا
مين .
.
الأم : أربكان
و خربشان , هو احنا عندنا غيرهم
الأب : مالهم الولاد
.
.
الأم : بقو بيزحفو
, حطيت الصوره قدامهم و لقيتهم بيزحفو و هما لسه ماكملوش 6شهور .
الأب : الله أكبر
, هذه من بركات مولانا الخليفه .
..
مشهد 3 , مكالمة
تليفون , بعد مرور يومين
الأم : إلحقني
يابو أربكان .
الأب : خير يا
أم أربكان حصل ايه تاني .
.
الأم : الواد خربشان
ابننا الرضيع ببص عليه في الأوضه مالقيتهوش , قلبت الشقه عليه و برضه مالقيتهوش , من
شوية لقيته داخل عليا و في إيده مزه من بيت الدعاره اللي جنبنا و في إيده التانيه ازازة
بيره .
الأب : ازاي يا
وليه , ده خربشان يادوب 6 شهور ؟
.
الأم : والله زي
ما بقولك كده
الأب : مممممم
هذا من فضل الله علينا .
.
مشهد 4 , جارتهم
بترن الجرس
الأم : اهلا و
سهلا يا أم جولن
الجاره : أهلا
بيكي يا حبيبتي , و النبي محتاجه طلب كده و مكسوفه منك اوي
.
الأم : لا ابدا
, يا خبر , داحنا جيران و الجيران لبعضها .
الجاره : بصراحه
بقالي كام يوم كل ماعمل رز يتعجّن مني , مش عارفه ليه
.
الأم : معقوله
يا ام جولن , طب تحبي أبعت لك شوية رز من عندي ؟
الجاره : لا مش
عايز اتعبك , انا بس كنت سمعت ان صورة فخامة الرئيس عندك .
.
الأم : يوووه
, هو مفيش حاجه بتستخبى في البلد دي , بس مالها صورة الرئيس
الجاره : والله
مكسوفه و وشي منك في الأرض , كنت بقول يعني لو أخد الصوره عندي يومين أعلقها في المطبخ
, يمكن الرز يظبط معايا تاني .
.........................................................................................................
Mohamed
Hussein
18
ديسمبر 2018·
مالك يا حبيبي
؟ لونك مخطوف ليه ؟
- مفيش يا استاذ
.
لا ازاي ؟ دانت
شكلك متغير خالص , ايه السبب ؟
- محمد صلاح
.
ماله محمد صلاح
؟
- بيعمل دعاية
لشركات ملابس عالميه
.
طب كويس اوي ,
ده نجم عالمي كبير و الدعايه دي بملايين ربنا يزيد و يبارك
- و كمان غيّر
حاجات كتير في ستايله .
.
وماله برضه , نجم
عالمي و له رعاه و لازم يظهر بشكل معين وسط نجوم العالم
- مانا حضرتك مبسوط
من كده , مبسوط اوي
.
أومال فين المشكله
يا حبيبي ؟
- المشكله في مرات
محمد صلاح
.
نعم !!
- اه مراته
.
مالها يا سيدي
؟
- مش بتتطور و
تتحضر زي جوزها كده , لسه عايشه في دور الفلاحه
.
اه الفلاحه , قولت
لي بقى , طب عايزها تعمل ايه ؟
- تقلع الحجاب
و تغير ستايل لبسها و تبقى زي المتحضرين في اوروبا و تعرف انها مرات نجم عالمي .
.
اها , طب قولي
- نعم .
.
تحب مرات محمد
صلاح تطبخ لك ايه بكره عالغدا ؟
- ايه ؟ انا حضرتك
بتكلم عن التطور و التحضر و التحرر .
.
هي دي معلوماتك
عن التحضر و التطور يابني ؟ تغير ستايل حياتها و لبسها عشان مايتقالش عليها فلاحه
, و نحشر نفسنا جوه بيوت الناس و خصوصياتهم و نحط مناخيرنا و نرسم للناس لبسها و أكلها
و مشيتها و نفرض أفكارنا و خزعبلاتنا على الغير , و نتخيل كده اننا مودرن و متحضرين
, قولت لي بقى انت بتشتغل ايه ؟
- انا حضرتك بحمل
شعلة النور في بحر الظلمات .
.
اه عارفهم عارفهم
, طب عارف الإنجليز و الأوروبيين لو شافو مرات محمد صلاح معاه هيقولو عليها ايه ؟
- ايه ؟
.
هيقولو سيده فاضله
, زوجه , انسانه لها ستايل لبس و حياه معين متمسكه بيه و لازم نحترمه , عارف ليه هيقولو
كده ؟
- ليه ؟
.
ممممممم عشان هما
متحضرين فعلا , و عارف انت بتهري الهري ده ليه ؟
- ليه ؟
.
عشان انت مجرد
مُدّعي تحضر ( زي مٌدّعي التدين بالظبط ) ..
- يعني ايه ؟
.
يعني فستك يا مولانا,
بس عاجبك دور الفستكه ده و بتتشألب فيه بمنتهى الأريحيه .
........................................................................................................................
Mohamed
Hussein
18
ديسمبر 2018·
عزيزي الخروف
عزيزي الهبدجي
الهريجي اللي مركوب من الخروف بقاله 8 سنين و استحلى الحكايه , تحيه مش طيبه و بعد
.
بقى يا مولانا
, فكرة انك تحاول تهبد في أي حاجه عشان ترسخ جواك شعور الدونيه و جلد الذات و جلد الدوله
, هي فكره ملهاش علاقه بالألمعيه ولا بتعنى انك سابق كوكب الأرض بمليون فدان ولا حاجه
, إنما لها علاقه بذهاب العقل , ذهب و لم يعد , أو ممكن نقول لها علاقه ببطانة الفستان
بتاعة معاليك , اللي دايما مرفوعه على طول , و بالمناسبه , مفيش بطانه فستان بتترفع
لمدة 8 سنين سهوا !! .
.
مولانا الخروف
, مولانا الهبدجي , مفيش أي علاقه بين الفقر و السمنه , بين السمنه و الفقر , مفيش
علاقه بين الإتنين , فكرة ان فيه علاقه بينهم لو قالتها البت بنتي اللي في تالته ابتدائي
و عزة جلال الله هقعدها من المدرسه و تبقى تشتغل خياطه و كفايه عليها لحد كده .
.
السمنه يا خروف
, السمنه يا هبدجي لها علاقه بستايل الحياه , بأسلوب الحياه , بأكل مقابل حركه , بتاكل
قد ايه و ازاي ؟ و بتحرق قد ايه و ازاي .
.
الفقر ممكن يكون
له علاقه بالنحافه مش بالسمنه لكن برضه مش قاعده , الصومال شعب في اغلبه نحيف و اليابان
شعب في اغلبه نحيف .
.
- اللي سافر الخليج
هيلاقي الخلايجه اغلبهم تخان و بكرش , رجاله و ستات , الخلايجه مش فقرا بس عندهم نفس
ستايل حياتنا , أكل نشويات كتير , و كسل و حركه مفيش , يمكن بعذرهم في توقيتات معينه
اللي بتكون فيها درجة الحراره فوق 50 مثلا .
.
- احنا شعب بيحب
الأكل , من قديم الأزل و احنا كده , حتى المناسبات و الأعياد مرتبطه عندنا بالأكل
, و جوه الأسره الواحده هتعرف و تشوف , انت ماكملتش اكلك ليه ؟ والله مانت قايم الا
لما تخلص طبق المحشي و صنية البسبوسه , هو الأكل مش عاجبك ؟ قول بقى ان الأكل مش عاجبك
.
.
- لما بنفرح بنعبر
عن فرحتنا بالأكل و الحلويات , و لما بنزعل و نكتئب بناكل برضه , دي ثقافه و طبيعه
, و مش عيب على فكره لو بس عرفنا نعمل عليها كنترول شويه , و عرفنا نعوض الأكل ده بمشي
كتير و حرق اكتر و عرفنا نبطل وجبات التيك أوي و الوجبات اللي بين الأكل و بعضه .
.
- في الريف عندنا
هتلاقي اغلب الستات جسمهم مليان اوي و اغلب الرجاله العكس , مش معقول يكون الراجل غني
مثلا و مراته فقيره , مش منطق يا جحش , انما المنطق إن ستايل حياة الراجل بيخرج و يشتغل
في الارض و يمشي كتير و يحرق و يبذل مجهود ( مضطر ) , و الست قاعده في البيت بتعمل
شغلها و تربي عيالها و مجهودها البدني بيكون اقل بكتير فالحرق بيكون أقل ( مضطره )
خصوصا لما الولاد يكونو كبرو شويه او حد منهم اتجوز و الست بتبدأ ترتاح تماما .
.
الأكل الصحي مش
الكافيار و اللحمه و البروتين و احنا بقى أصلنا فقرا و مش معانا فلوس نشتري الحاجات
دي , بطّل هبد يابقره , الأكل الصحي هو اللي بيتعمل في البيوت عادي بس المفروض بكميات
محدوده و تشكيله تشمل طبق سلطه و خضارو فاكهه , طبق السلطه بيتكلف 3 جنيه , خيارتين
و حباية طماطم , مش محتاج انك تكون مليونير , سهله الحكايه ولا أضربك فين تاني ؟ طب
خلاص مش هضربك بس عشان خاطري و خاطر ربنا و خاطر العقل البشري ابقى اتأكد كويس ان بطانة
الفستان مش مرفوعه
...............................................................................................................
Mohamed
Hussein
17
ديسمبر 2018·
بعد الهزار و الفرفشه
.
نتكلم جد بقى
, و اهي سيره و اتفتحت , حكاية السمنه و الكرش و الأوزان الزياده دي
إيه أضرارها عالبني
أدم ؟ أمراض عضويه كتير جدا , ضغط و سكر و تصلب شرايين و بلاوي متلتله .
.
طب أصل المشكله
فين ؟ أصل المشكله أسلوب حياه LIFE STYLE
اللي هو ازاي يعني
؟ طريقة حياتنا , أكلنا , نومنا , مجهودنا , حركتنا .
الحل فين ؟ الحل
في تغيير ستايل حياتنا المرضي ( يعني المسبب للمرض )
و دي نعملها ازاي
؟ بأدوية الريجيم ؟ لأ , بصالات الجيم ؟ لأ .
اومال نعملها ازاي
؟ بالمشي و الحركه يا مولانا , مش مطلوب منك أكتر من انك تمشي , امشي كتير على قد ماتقدر
و اكتر شويه .
.
طب نمشي فين ؟
هنا مربط الفرس , و السؤال اللي جه في ذهني من فتره , بين بيتي و مدرسة البنات 7 دقايق
مشي و مع ذلك لازم يروحو بالعربيه , ليه ؟ عشان مفيش مكان يمشو فيه في الشارع .
.
هو الشارع متصمم
بحيث انه مايكونشي فيه مكان للمشاه ؟ لا بالعكس , فيه مكان كبير جدا للمشاه بس كله
اتاكل و اتعجن و اتشوه , فتارين محلات طالعه بره , فلان دق كام سيخ حديد , فلان هيفتح
محل فرفع مستوى مكان المشاه اللي قدامه , فأصبح الممشى مش مستوى ولا ممهد ولا يصلح
للمشي .
.
الحل ايه ؟ الحل
عند الساده المحافظين , إزالة كل الإشغالات دي بقوة القانون , اعادة رصف طريق للمشاه
و العجلات , بأي نوع بلاط رخيص , المهم يكون الممشى كله مستوى و ممهد , اغلب شوارع
القاهره و المدن فيها مكان للمشاه , ده لما نتخلص من بلطجة الأهالي و البوابين و أصحاب
المحلات .
.
طب الحكايه دي
تفيد في ايه ؟ تفيد إن الناس ترجع تمشي على رجلها تاني ( تلتين مشاويرنا بالعربيات
بتكون لأماكن نعرف نروحها مشي ) , ولما الناس تمشي على رجلها صحتهم الجسديه و النفسيه
هتتحسن جدا و طبعا أدائهم في العمل و انتاجهم.
.
ممكن نمنع الدليفري
( بقرار شعب مش قرار دوله ) , لما حضرتك تنزل من بيتك تشتري حاجتك بنفسك و تتمشي (
بلاش تمسك تليفون و تتصل بالصيدليه و السوبرماركت و الفكهاني و الفرارجي ) اللي أهما
أصلا تحت بيتك .
.
ستايل حياتنا لما
يتغير حاجات كتير هتتغير للأفضل , طب هقولهالكو بشكل بسيط , عندي خال في البلد لسه
متوفي من سنتين , خالى توفى و عمره 80 سنه , ولحد ماتوفى مكانشي في راسه شعرايه بيضا
, كان بياكل كل حاجه و اللحمه لازم يكون فيها دهن كتير و إلا مش هياكلها , طب ليه ماجتلوش
امراض ؟ عشان كان يوميا يمشي سته سبعه كيلو , يلف على ارضه و يزور الناس و يبذل مجهود
بدني , لا وزنه يزيد ولا يجيله اكتئاب, أغلب الجيل ده كده في الريف عندنا , نادرا مايحتاجو
ادويه , و طبعا من رابع المستحيلات انهم يسمعو عن الأدويه النفسيه .
.
الحكايه و باختصار
, عايزين منتج نهائي صح ؟ لازم تقدمو معطيات صح , ماينفعش تنام على بطنك عالسرير و
عايز كل حاجه تجيلك لحد عندك أو تروح مشوار تقوم راكب العربيه من قدام البيت لنفس المكان
اللي رايحه بالظبط و( تتفاجئ ) ان وزنك زاد و ترهل و انك بتاخد سبعتاشر نوع دوا .
.
الدوله هتستفيد
ايه ؟ هتوفر مليارات من الأدويه اللي ملهاش أي لازمه , هتوفر مليارات في البنزين ,
هتوفر قدره اكبر على العمل و الإنتاج .
.
ملحوظه اخيره للشباب
و الأهالي و بحكم طبيعة شغلي , الهري و الهجايص بتوع الجيم و الماسل بيلدنج و الأمينو
أسيدز و الكورتيزون , بيدمرو الجسم حتى لو شوفت شكل ابنك بعضلات فخمه و فخيمه كده فتأكد
انه بلاستيك , ده بلاستيك , و بالمناسبه اكتر ناس بتاخد منشطات جنسيه هما شباب الجيم
المتجوزين اللي في العشرينات !! .
....................................................................................................................
Mohamed
Hussein
17
ديسمبر 2018·
..
173 سم , 75 كيلو , مفيش كرش , يعني من المواطنين الشرفاء
.
يالله كل واحد
من أصدقائي يقول طوله و وزنه عشان هنعمل تحديث للصفحه بما يتناسب مع متطلبات العصر
و أليات المرحله و خطة الحكومه و توجيهات فخامة الرئيس .
.
بالنسبه للسيدات
, مسموح لهم يقولو وزنهم بتاع الصيف مش بتاع الشتا .
......................................................................................................
Mohamed
Hussein
16
ديسمبر 2018·
مستشار أردوغان
خليفة المثليين : من يريد أن يشرب الخمر فليشرب و من يريد أن يزني فليزني بشرط ألا
يكون ذلك على الملأ !! .
.
لو سمحت يا مولانا
, سؤال رفيع بس
- اتفضل يا ابني
اتفضل .
.
بالنسبه للخمسين
ستين ألف بيت دعاره و شذوذ جنسي المرخصين اللي بيدفعو ضرايب لخليفة الشواذ بتاعك ,
و بالنسبه ل 300 ألف تركي اللي بيشتغلو بصفه رسميه في البيوت دي , نظامهم ايه ؟
- نظامهم على الملأ
طبعا , و على فكره دي أقل حاجه عندنا بس احنا مابنحبش نتكلم عن نفسنا كتير.
.
أه فهمتك , أكيد
عشان الحسد
- لا يا ابني
, عشان ربنا يبارك لنا في الرزق الحرام , و بعدين احنا بنغسل ذنوبنا كل شويه و نبدأ
على نضافه .
.
بتغسلوها ازاي
يا مولانا ؟
- بنعمل جايزه
للأطفال اللي بيواظبو على صلاة الفجر و بنديهم بسكلته
.
مممممممم والجايزه
دي فلوسها من ضرايب الدعاره و الشذوذ برضه ؟ تاخدو جزء من الضرايب و تشترو بسكلته ؟
و الله ماحد بسكلته إلا معاليك .
.......................................................................................................................
Mohamed
Hussein
16
ديسمبر 2018·
انا عايز أبقى
محافظ القاهره يا سامي
- إوعى تعمل كده
, بدل مايحصل لك زي اللي حصل لعبشكور
.
عبشكور مين ؟
- محافظ صاحبي
ماتعرفوش
...................................................................................................................
Mohamed
Hussein
15
ديسمبر 2018·
الكنيسه فين ياعماد
؟.
.
ده السؤال اللي
سأله السيسي النهارده , و الحقيقه هو مش سؤال هو استنكار , بمعنى , انا شايف ان مفيش
كنيسه , مش بسأل على مكانها , انا بسأل هي ليه مش موجوده و ازاي ماتكونش موجوده , مش
عملت منطقه سكنيه جديده ؟ هتعمل فيها مدرسه و مسجد و مستشفى و نقطة شرطه مثلا , يبقى
لازم في نفس التوقيت نعمل الكنيسه
.
قعدنا عشرين تلاتين
سنه نستنى قانون موحد لدور العباده وتروح برلمانات و تيجي برلمانات , و تروح سحنات
و تيجي سحنات , و كله يهري و كله يعجن , و محصلة الهري تبقى صفر .
.
عبد الفتاح السيسي
النهارده و بالسؤال اللي هو استنكار ده , بينسف القوانين الباليه , مصر الحديثه اللي
بنبنيها بتعني بيت للسكن و مدرسه للتعليم و مستشفى للعلاج و جامع و كنيسه للصلاه ,
دي مُسلّمات بلد فرعونيه مسيحيه مسلمه , و على المتضرر اللجوء لأقرب حيطه و يضرب دماغه
و دماغ أمه فيها .
.
عبد الفتاح السيسي
مش سلفي و هيلبس أمك النقاب , ولا علماني و هيقلع أمك الحجاب , السيسي مواطن مصري بدرجة
رئيس دوله , بيحافظ على هويه بلد حاول اللي قابله انهم يدمروها , بيرجع لمصر جيناتها
بالتدريج ( من غير صدام ) , و مش ذنبه أبدا إن خمسين ستين سنه من العجن الوهابي و السلفي
و خمسين ستين سنه من العجن الغربي في الهويه المصريه خلقو في بلده جناحين مالهمش أي
تلاتين لازمه , جناح عايزها نقاب و عبايه سوده و جلابيه بيضا قصيره , و جناح عايزها
ملط و شذوذ و دعاره , الأول تحت بند التدين ( و حَدْف الشرق ) و التاني تحت بند التحرر
( وحدف الغرب ) .
.
دي سفينة يابني
أدمين , أقدم و أعرق سفينه في الكون , لها تركيبه خاصه و فريده , لما يطلع لها جناحين
في مرحلة طمس الهويه , يبقى دور المواطن المصري اللي بدرحة رئيس دولة انه يتخلص منهم
و من أفكارهم بالتدريج , الجناحين بيبطّأو حركة السفينه و ممكن يكسروها , و القبطان
عارف و فاهم , و بالتأكيد بالتأكيد مش هيسيبها للحويني ولا لخالد أبو النجا .
...........................................................................................................
Mohamed
Hussein
15
ديسمبر 2018·
أثيوبيا تعلن رسميا
تأخر اكتمال بناء سد النهضه لسنة 2022 ( طولة العمر لحضراتكو ) , بعد ما كان المفروض
يكتمل في 2017 , عندهم شوية مشاكل فنيه و هندسيه و ماديه و منفلوطيه و خسرانين بتاع
مليار دولار لحد دلوأتي , 2022 ده طبعا في احسن الحالات , ماهي المشاكل الفنيه ممكن
تلاقي بعد كده مشاكل فنيه أنقح منها , و رُبّ قومٍ ذهبو إلى قومٍ فلاقو عندهم مشاكل
فنيه قامو خدو تاكسي و رجعو .
.
بس حضرتك سد النهضه
اكتمل بناؤه و خزن المايه خلاص و نهر النيل نشف و الديناصورات ظهرت في شوارع مدينة
نصر , استاذ معتز مطر مأكد الكلام ده
- ممممممم و ايه
كمان يا حبيبي ؟
.
و احنا عملنا انفاق
تحت قناة السويس عشان نوصل ماية النيل لاسرائيل , استاذ ممدوح حمزه أكد عالموضوع ده
- بس فهمتك فهمتك
, دلواتي نهر النيل نشف بسبب سد النهضه اللي لسه ماتبناش أساسا , و نهر النيل اللي
نشف ده هناخد منه مايه نوصلها لاسرائيل , مايه من الناشف يعني
.
ايوه بالظبط كده
حضرتك
- عموما يا حبيبي
انت حالتك مش خطيره , مدد بس عالشيزلونج و قولي و صارحني , أخر مره طلعت فيها فوق سطوح
الواد حماده كانت امتى ؟ صارحني بالحقيقه عشان نحاول نلم المتكسّر و نسد الفجوه اللي
بقت أوسع من ثقب الأوزون .
...............................................................................................................
Mohamed
Hussein
14 ديسمبر
2018·
مجلس الشيوخ الأمريكي
يحذر السعوديه من شراء أسلحه من روسيا و الصين , و بيقول المجلس الموقر إن الحكايه
دي هتضر العلاقات بين الرياض و واشنطن و هتعمل مشاكل لرب السما , و في نفس ذات البؤ
قال نفس ذات المجلس الموقر برضه إنهم هيفتحو حكاية تورط الأمير محمد بن سلمان في مقتل
الصحفي السعودي خشبندي أفندي .
.
بص يا مولانا
- لو لسه فاهم
إن أمريكا بتتأثر و تعيط و تتشحتف على حقوق الإنسان و على فلان اللي مات في الدوله
الفلانيه , إركن على جنب .
.
- لو لسه فاهم
إن فصل السلطات بيعني إن برلمان الدوله يكون متعارض مع الأمن القومي و الإقتصادي والسياسات
الخارجيه لنفس الدوله و كأنهم بيلعبو في جُرن الهبله , إركن على جنب
.
- لو لسه فاهم
إن الديموقراطيه و الحريات مفهوم مطلق و نقي بالشكل الأبله المتخلف عقليا اللي تعرفه
و فاهم إن الدول العظمى بتحترم سيادة الدول التانيه , إركن على جنب .
.
- لو لسه فاهم
إن أمريكا عندها مبادئ و قيم و أخلاقيات يعني ethics من الحجم الكبير ( الكومبو ) , لأ بقى ماتركنش على
جنب ولا حاجه , في الحاله دي تروح تولع في نفسك لأنك بالتأكيد هتبقى عاله على بيتك
و أسرتك و مجتمعك و عالعقل البشري .
.
قوم يابني يالله
, استهدى بالله كده و ولع في نفسك , بدل ماتعيش عمرك كله و انت مستني الكتاكيت اللي
هترميها الحدايه .
............................................................................................................................
