Mohamed
Hussein
27
نوفمبر 2014·
في فيلم جاءنا
البيان التالي , قال المعلم الحرامي اللي انا مش فاكر اسمه ( المهنه حرامي ) ان يوم
الحادثه بتاعة الطريق كانت رجالة الشرطه بيقومو بدورهم و رجالة الإسعاف بيقومو بدورهم
ورجالتي انا كمان بيقومو بدورهم !! .
.
نفس الفيلم ده
هيتكرر بكره , الشرطه و الجيش في حالة تأهب قصوى و الإسعاف أكيد , ورجالة المعلم الحرامي
( قناة الجزيره ) أكيد هما كمان بيستعدو , فيديوهات متفبركه على كام لقاء مسبق مع ناس
اتقتلت بكره ( قبل القتل و بعده مش مشكله ) و معنا من ميدان سفينكس الشهيد المرحوم
ابو مصعب , ممكن حضرتك توصف لنا هما قتلوك ازاي ؟!.
.
, العناوين جاهزه
من دلوأتي و الهري و الفتي , و النحانيح و الكولجيه مستعدين يبيعو تراب بلدهم بروايه
لأحلام مستغانمي أو شعارين من بتوع جابريل جارسيا .
.
بس سيبك من كل
الهري ده , الكوره لا في ملعب الشرطه والجيش ولا في ملعب الجزيره و خرفانها ولا في
ملعب الكولجيه , الكوره في ملعب الشارع المصري , الشارع المصري هو الغوله اللي هتاكل
الخرفان و تبلعهم لو فكرو يعملو بس شوية صداع في راس مصر بكره , أتحدى الجميع بالشارع
المصري .
.
عشان كده انا واثق
ان يوم 28 اللي هو بكره هيبقى زيه زي يوم 18 و يوم 38 , ولا أي حاجه , هما عارفين كده
كويس بس أهي هرتله و خربشه لزوم رفع اللياقه البدنيه و البقاء في الملعب مش أكتر
....................................................................................................................................
Mohamed
Hussein
27
نوفمبر 2014·
تاهت و لقيناها
.
الواحد يقعد عالفيس
و يهري في أي حاجه , بوستين تلاته عن بنتي و 7 بوستات عن الكولجيه و 56734 بوست عن
الخرفان وبعدين اسأل هو فين السيسي يا جدعان يقولو في روسيا , أقول طيب , أرجع اهري
عالفيس تاني بنفس الطريقه و بعدين اسال هو السيسي فين يقولو في امريكا , أقول ماشي
و اهري من جديد ويقولو لي السيسي في فرنسا و ايطاليا و الفاتيكان و في وسط شوية هري
من بتوعي خد جوله افريقيه محترمه .
.
اجمل احساس في
الدنيا ان الواحد يقعد يهري عالفيس وهو حاسس انه فري وانه مسنود على ضهر محترم , مابقيتش
خايف على مصر , الراجل ده عارف هو بيعمل ايه و ماشي في سكته , و لما بركّز في الصور
و الفيديوهات بتاعة زياراته بلاقي مقابلات تليق باسم رئيس مصر و اسم عبد الفتاح السيسي
, إحساس بالأمان افتقدناه في السنه الهباب بتاعة زيارة البهلول لباكستان واشادته بدورها
في حرب اكتوبر , أه يوم ما لبس السلطانيه .
.
نيجي بقى للحاجه
اللي زعلتني , قالولي السيسي اللي قابله في المطار في فرنسا هو تقريبا رئيس مجلس محلي
بندر مارسيليا , قلت لأ بقى دي عيبه اوي و ماتليقش بإسم مصر ولا السيسي , و لو هتقولي
اصل ده عادي عندهم في اوروبا والناس دي مش معقده و كومبليكس زينا هقولك اه احنا معقدين
و كومبليكس والحاجات دي بتفرق معانا و هما عارفين اننا معقدين و كومبليكس يبقى لازم
يراعو كده .
.
عموما ملحوقه
, لما الراجل بتاع فرنسا ييجي يزورنا نقابله في القصر مقابله زي الفل زي ما هو عمل
و نعزمه على رقاق و بط , انما في المطار بقى نبعت شوقي غريب يقابله و هو جاي و في الرجوع
نبعت معاه ريهام سعيد تودعه و اكيد هي في الطريق هتطلع الميكروفون و تقوله : انت مش
حاسس انك غلطان لما بعتت فلان يقابل السيسي ؟ انت عارف مين هو السيسي طيب ؟ طب قولي
انك ندمان على فعلتك دي , واكيد طبعا رئيس فرنسا هيشد المسدس من جنب اي واحد من الحراسه
و يقتل ريهام و ينتحر و نبقى بكده جبرنا والحمد لله .
......................................................................................................................................
Mohamed
Hussein
27
نوفمبر 2014·
انتي فين يا حكومه
؟
.
على طريق اسكندريه
الزرعي و عالدايري , وانا ماشي العصر والمغرب والعشا لقيت التريلات و العربيات النص
نقل ماشيين بنفس الغباوه , الحاره الشمال كالعاده , تصرفات بتوحي بشرب جدول المخدرات
بتاع الصيدليه بالكامل , دي حاجه مش محتاجه معامل ولا تحاليل ولا دوسنتاريا , تعرفها
كده بالعين المجرده بمجرد ماتشوف سواقتهم ... مش الحكومه كانت حددت معاد لسير التريلات
دي ولا انا يتهيألي ؟ انتي فين يا حكومه ؟!.
.
في الإستراحه بقى
اتعرفت على سواق لوري أد الدنيا , اسمه أبو حشيشه , قلت له مش الحكومه حددت لكو معاد
تمشو فيه وقالت امشو يمين وماتشربوش زفت ؟ قالي حكومه ايه ؟ بالك انت , الإداره العامه
للمرور دي مفهاش واحد دكر , قلت له يعني لو قابلك امين شرطه دلوأتي وسحب رخصك هتبقى
مبسوط ؟ قالي لو قابلني امين شرطه هنفخه ( بلاش أقول الكلمه التانيه التقيله اللي قالها
بقى ) .
.
.قلت له ياسطى
ابو حشيشه هو ده اسمك ؟ قالي أه اسمي الثلاثي ابو حشيشه مسطول السكران , و سواقة اللوري
دي وارثها ابا عن جد , قلت في بالي ممممممم يعني الحكومه عارفه ان اسمك ابو حشيشه مسطول
السكران ؟! و مش بعيد تكون هي اللي مسميّاك !! .
.
طيب ياسطى ابو
حشيشه مسطول السكران هو انت ليه بتشرب مخدرات وانت سايق ؟ قالي دي كيف يا بيه و الواحد
مايعرفشي يسوق الا لو كانت دماغه طايره في السما , قلت له طيب ماتشرب نسكافيه يا أخي
او بيبسي ؟ قالي نسكافيه و بيبسي !! انت فاكرني عيل سوسو ولا توتو من بتوع اليومين
دول , طب عليا الطلاق انا لو دخلت على مراتي في يوم وانا فايق مش مسطول لاترقع بالصوت
الحياني و تطلب الطلاق !! .
................................................................................................................................
Mohamed
Hussein
25
نوفمبر 2014·
في شارع كبير جدا
في مدينة نصر , صف عربيات ماشي له أول و مالوش أخر و العربيات تقريبا راكبه فوق بعض
عشان المطر , فجأه الطابور ده وقف , عشان ايه بقى ؟ عشان فيه عربيه فيها عريس و عروسه
و قررو يوقفو الشارع و واحد من المعازيم نزل يضرب صواريخ في الهو !! ممممممممممم هي
في الأول كانت في الهوا بعدين الموضوع فرط منه و بقينا نشوف الشراره بترزع في العربيات
, انت و حظك بقى , مفيش ثانيتين و شوفنا نار كبيره والعه في أول الطابور , أه دي تقريبا
تبقى عربية العروسه أو فستانها !! .
.
طبعا الدنيا اتقلبت
هرج و مرج , الستات نزلو جري من عربياتهم و خدو اطفالهم وبقو يجرو في عكس الإتجاه عشان
يبعدو عن النار اللي والعه , مشهد أشبه بالزلزال , طب احنا عايزين نرجع لورا قبل مالنار
تشبك في العربيات ورا بعض زي السبحه كده إنما هنرجع ازاي ؟ , ده أخر الطابور ده واصل
للدايري تقريبا !! , الناس تصرخ عشان العربيات ترجع و الحركه زي السلحفه , يعني النار
أمامكم والعربيات راشقه خلفكم !! .
طب يارب تكون العروسه
فرحت والعريس انشكح بأم الحركه دي أو فرح بعروسته المحروقه , ماهي الجوازه عشان تتم
يلزمها مأذون وشهود و صواريخ و إلا يبقى الجواز باطل .
.
إحنا قدامنا ييجي
الف سنه لما نفهم ان حدود حريتك بتنتهي عند حرية الأخرين , والحاجه اللي ممكن تبقى
كارنافال بشكل محترم لما بتزيد عن حدها بتبقى إرهاب , أه ده اسمه ارهاب المواطن العادي
البسيط !! .
.
استقيمو يا بشر
عشان نعرف نقول لأم الحكومه انها تستقيم .
..................................................................................................................................
Mohamed
Hussein
25
نوفمبر 2014·
السيناريو 28 نوفمبر
.
السيناريو بتاعهم
.
.
- هينزلو رافعين
المصاحف ( هارش ؟ ) , لو حد في الشارع رفع علم مصر هتقوم الجزيره مصوراه , المصحف ضد
العلم ؟! وانتو فين يا سلفيين ؟! يقومو السلفيين بطريقة ( إوعى إيدك كده ملخت الكُم
) نازلين جري بالجلابيه اياها والكلسون و المصاحف , يرفعوها هما كمان , الإخوان يجرو
قدام و السلفيين معاهم , المصاحف تبدأ تقع من إيدهم ( أيوه يا سيدي وقعت مش رموها والعياذ
بالله ) , يقوم العساكر دايسين عليها في الهوجه تقوم الجزيره مصوره المشهد , أعوذ بالله
من غضب الله , جيش الإنقلابيين الكافر بيدوس على المصاحف بتاعة ربنا , صوري يا جزيره
.
يا أستاذ يا أستاذ
, محدش نزل يجري وراهم و لا حد داس عالمصاحف , ممممممممم يابني انت عبيط , نزلو و داسو
و الفيديوهات اهي جاهزه من اسبوعين !!.
.
السيناريو بتاعنا
احنا بقى .
.
- هينزلو بالمصاحف
واحنا في البلكونات , هيهتفو اسلاميه اسلاميه هنقول و نعم بالله يا رجاله , المصاحف
هتقع منهم هننادي عليهم ياشيخ يا شيخ الحق قميص عثمان وقع منك , مش هيلاقو حد بيجري
وراهم هيتجننو و يهتفو السيسي قاتل هنقول ممممممم ماشي بس علّو صوتكو شويه عشان أوباما
مش سامع , هيبدأو يحرقو العربيات و يشخبطو على حيطان البيوت , في الوقت ده هننزل احنا
بقى , و نجيب مصور الجزيره بنفسنا , نقول له تعالى يا حماده صوّر مشهد النفخ ده , ونبص
للكاميرا ونبتسم و نقول تشيز !!.
.
أه نسيت , احتمال
في اليوم ده يظهر راجل عجوز واقرع كده عايش في بلاد بعيده و عيل شعره طويل و طوّالي
بيعيط و يتشحتف , هيقولولك بنبيع ديموقراطيه , ماتبقاش تشتري منهم .
.................................................................................................................................
Mohamed
Hussein
24
نوفمبر 2014·
و البنت سر أبوها
.
لوجي بنتي وانا
جايبها من المدرسه قالت لي يا بابا النهارده جت لنا ميس جديده بس إيه بقى ؟ مزه مزه
يعني , و كانت لابسه ماعرفشي ايه و ايه وايه و جوليرو !! , ما علينا إني ماعرفشي الجوليرو
ده , المهم قلت لها بجد يا لوجي ؟ مزه مزه فعلا ؟ اللهم صل عالنبي .
.
بصي بقى أنا هوديكي
المدرسه و اجيبك كل يوم , و لعلمك انا عايز أجي أقابل الميس دي عشان مستواكي في الماث
مش عاجبني .
قالت لي يا بابا
بس دي مدرسة ساينس , قلت لها مستواكي في الساينس زي الزفت , قالت لي يا بابا انا جايبه
فول مارك ماث و ساينس !!
مممممم اخرسي يا
بنت , انتي هتعرفي اكتر من ابوكي ؟ أقولك مستواكي هباب يبقى هباب .
............................................................................................................................
Mohamed
Hussein
24
نوفمبر 2014·
المتحدث باسم الجيش
الصهيوني يهنئ المتسابقه العربيه الصهيونيه منال موسى بعد خروجها من مسابقة أراب أيدول
العربيه !! .
و قال إن القايمين
على المسابقه عارفين انها اسرائيليه و وافقو و دي بادره كويسه !! .
.
و بس كده يا مولانا
, بعد ما كنا في جيل سميره موسى بقينا في جيل منال موسى , جاسوسية ايه بقى و زفت ايه
؟ احنا عدينا المرحله دي , بقينا نتكلم في هوية وطن , الملحدين بيطلعو عالهو في كل
البرامج اكتر من الشيفات بتوع الطبيخ , و اصحاب الفكر الصهيوني بقو نجوم في مجتمعاتنا
العربيه .
.
اسمح لي اعرفك
بنفسي , أنا ( صهيوني و أفتخر ) , تشرفنا استاذي الصهيوني و انا أخوك ( ملحد وليا الفخر
) .
.
و كان رأيي من
فتره إننا مش جيل شجاع عمل ثوره ولا حاجه , إحنا جيل خواجات و اتعمل عليه ثوره , بالظبط
زي الفرخه اللي بيتعمل عليها شوربه , عمركشي شوفت حد بيمدح في شجاعة و بسالة الفرخه
المسلوقه ؟!.
.
يالله يابني ,
إنزلي بقى بالشعار #مسلوقين و #مكملين .
...................................................................................................................
Mohamed
Hussein
23
نوفمبر 2014·
رساله إلى كولجي
.
ماهو لما الخرفان
يضحكو عليك و يقنعوك انهم يوم 28 حاجزين لك في البيسين بتاع هيلتون رمسيس ( عشان مايته
طاهره ) و ياخدوك عند نافوره في مكان عام و انت تقوم متحمس أوي و قالع هدومك ملط و
تنزل تستحمى فيها قدام الناس و الشعب ( زي فيلم عادل امام ) يبقى لازم تتوقع انك هتطلع
مش هتلاقي هدومك , تخيل منظرك بقى وانت طالع من احداث 28 نوفمبر وانت سلبوته كالعاده
؟ , يا استاذ يا أستاذ , بتعرف تلفّ ؟ طب لف كده ؟!.
.....................................................................................................................................
Mohamed
Hussein
23
نوفمبر 2014·
الخيانه لابسه
كاجوال
.
أووووووف , عيشه
صعبه أوي , الجراج بياخد كام و البواب و فاتورة الكهربا و النت والتليفونات , مصاريف
المدارس غاليه أوي , البيت يلزمه كذا ألف عشان بس تعيش عيشه متوسطه كده , طب و الدكاتره
و اللبس و الفسحه ولو كل اسبوعين ؟ لا كده كتير أوي بقى , الأله الحاسبه هنّجت و مش
قادره تكمّل .
.
هتجيب منين 7 ألاف
مثلا كل شهر , قول 10 ألاف عشان تبقى في الأمان ؟ مفيش مهنه هتجيب لك كده , مرتب الطبيب
في المستشفى أقل من ألفين و الصيدلي أقل و المدرس , و لما تتفحت مش هتوصل للرقم اللي
فوق ده , طب قدامك بقى حل من اتنين , إما إنك تفتح محل جزاره و تجيب لحمه مستورده و
لحم حمير و تعلقها و تكتب عليها لحم بلدي و كل شوية يجيلك التفتيش ويخرب بيتك إو إنك
تشتغل ناشط سياسي , الأولى حرام عندنا والتانيه حلال حلال , دي مش فلوس بس ( من غير
تفتيش ولا خراب بيوت ) , لا دي فلوس وشهره و نجوميه كمان .
.
هقولك الطريقه
, طوّل شعرك و اخبط أي شوية شعارات عالفيس , حط صورة جيفار واكتب عن ديستوفيسكي , قول
يسقط أي حاجه من أي حته والبس الشال الفلسطيني , هتجيلك فرصه ماتسيبهاش بقى , مداخله
تليفونيه مع الجزيره , مداخلتين كمان و بعد كده تطلع معاهم عالهوا , الساعه ب ألفين
دولار ( يعني الحسبه اللي فوق دي تخلص في ساعة زمن ) وتبقى مشهور و مناضل وفلوسك حلال
.
.
الناس الطيبه فاهمه
التمويل و العماله و الخيانه بالمفهوم الكلاسيك بتاع زمان , إن قطر و لّا أمريكا لابدين
في غيط الدره و معاهم شكارة فلوس و ييجي الخاين من دول يقول كلمة السر في غيط الدره
و يدخل ياخد اللي فيه النصيب , أو إن العمليه تتم في غرزة حشيش و تدخل حضرتك تلاقي
الواد خيشه بيقولك يا أستاذ يا أستاذ المعلم أبو شفه ساب لك الكيس ده و كوباية الشاي
دي وقال المشاريب على حسابي .
.
الحكايه باختصار
انك تبقى عارف ( هما ) عايزين ايه و تعمله و انت راضي , وهما عارفين انك عارف اللي
هما عايزينه و راضيين , و قناة فضائيه أو جريده شغلتهم إنهم يوفّقو الروس في ( الحلال
) .
.....................................................................................................................................
Mohamed
Hussein
23
نوفمبر 2014·
غريبه أوي الحكايه
دي , البرادعي رجع يتنحنح تاني بعد ما المجتمع الدولي كله بلا استثناء اعترف بالنظام
الحاكم في مصر , يعني بعد ما اتحلت , و وائل غنيم ظهر فجأه يقول الثوره مستمره بعد
غياب سنين ( أخر مره شوفته فيها لما كان بيتشحتف مع منى الشاذلي عالهوا ) , و كل ده
جاي قبل 28 نوفمبر بكام يوم ( فجأه يعني ) !!.
.
دي مش اسمها سياسه
, دي لعبة الكراسي الموسيقيه بيحركها الشيطان الأعظم اللي اسمه امريكا , وفي لعبة الكراسي
الموسيقيه المصريه هتلاقي ناس بتجري و ناس بتسبق و ناس عايزه تسرق كرسي , و تسألني
بقى الكولجيه فين من الليله دي ؟ أقولك ماهما دول الكراسي اللي بيتقعد عليها يا مغفل
, انزلي يابني بشعار حق الشهداء , هتلاقي اليافطه عندك تحت السرير ماطلعتش من سنتين
, إلا صحيح هو وائل غنيم كان فين أيام حكم الخرفان ؟ يااااااااااااه كل ده في الحمّام
؟!
...............................................................................................................................
Mohamed
Hussein
23
نوفمبر 2014·
مسعد ابو الفجر
, المناضل السيناوي أبو سبع تلسن بيتكلم عن الجيش المصري المجرم السفاح اللي حرق (
الخُص ) بتاع أهله في رفح عشان ينتقمو منه يعني !! , وهو يا حيوان الجيش المصري لما
يحب ينتقم منك هيروح يحرق شوية جريد مغروسين في الأرض ولا مترين قماش على شوية بلاستيك
بتوع خيمه ؟!
.
يعني الجيش نزل
بطياراته و دباباته وسأل الناس ماتعرفوش الخص بتاع أهل مسعد ابو الفجر فين ؟ و فين
وفين بقى على بال ما وصل للخص وقام ضربه بالطيران من فوق و بالغواصات النوويه من تحت
, مع إنه يعني على حد علمي إن الخص ده بيتحرق بعود كبريت , أو عقب سجاره من أي عيل
سبارسجي معدّي .
.
و كل ما يتحرق
الخص بتاع أمك قصدي بتاع أهلك تكتب بوست تتهم فيه الجيش المصري و تقول سلاح الطيران
المصري الفاشي حرق الخص بتاع أمك ( خص أمك يعني ) , و لو صينية البطاطس اتحرقت في الفرن
يبقى اكيد الجيش الفاشي هو اللي حرقها عشان انت مناضل فشيخ و مضطهد يا ولداه , و أكيد
الجيش معيّن عقيد مباطشي في الفرن بتاعكو من جوا عشان يحرق البطاطس .
................................................................................................................
Mohamed
Hussein
22
نوفمبر 2014·
كنت واحد من أشد
المعجبين بمحمد البرادعي , بعقله و أفكاره , ولما لقيته واقف وقفة راجل في 28 و 30
يونيو جنب شيخ الأزهر وبابا الكنيسه قلت ظني ماخيبش فيك يا بوب , و اليوم اللي عملت
فيه اكس عالبرادعي هو يوم ما كان نائب رئيس مصر واستقال فجأه و فتح الباب لسهام ولاد
الكلب في كل مكان في العالم انها ترشق في جسم مصر .
.
قلت هو حر لو مش
عاجبه طريقة التعامل مع اعتصام رابعه ( مع إنه اكتر واحد كان عارف إن المفاوضات فشلت
تماما مع الإخوان ) و إن الجيش ( مُكرهٌ اخاك لا بطل ) , بس حريته تبقى بحدود لما يبقى
نائب رئيس , وعشان ضميره الأخضر الحونين ده كان يقدر يستنى اسبوع ولا اتنين و يتحجج
بأي حجه للإستقاله ( يقول اختلاف في وجهات النظر مثلا ) إنما مش فروسيه أبدا إنك تسلم
بلدك فريسه سهله للديابه تحت بند و داعي ومبرر ( الضمير الحي )...........كده تبقى
انت انتصرت لنفسك و ماتجيش في يوم من الأيام و تكلمني عن الفروسيه .
.
مصر والسيسي تعبو
جدا بعدها عشان يوقفو السهام اللي جايالنا من كل ناحيه , تعبو أوي عشان مصر ترجع للإتحاد
الأفريقي و تعترف دول العالم كلها بالنظام السياسي الحاكم في مصر ..تعبنا لحد ما نجحنا
( أخرها زيارة السيسي لفرنسا والفاتيكان ) .
.
النهارده جاي البرادعي
يقول الإخوان كانو واخدينا لحرب أهليه ولابد من محاربة الإرهاب و الديموقراطيه مابتجيش
في يوم و ليله !!.
هههههههههههه الكوميديا
السوداء , طب و ال كام ألف كولجي اللي انت سايبهم في مصر يا بوب يعملو إيه دلوأتي بعد
تصريحاتك دي ؟!!.
.............................................................................................................................
Mohamed
Hussein
21
نوفمبر 2014·
مشايخنا يا رسول
الله
.
الشيخ طلع على
المنبر , بدأ الخطبه زي الفل , و بعدين اتكلم عن تلويث ماية النيل , كلام جميل أوي
, و دعى الناس و جموع المؤمنين للمحافظه على ماية النيل الخالد الذي يجري بأمر الله
......... روعه لحد كده .
.
الحكايه فرطت منه
بعد شويه , وبدأ الإسهاب في حكاية يجري بأمر الله دي , قال إيه مولانا ؟ إن سيدنا عمرو
بن العاص لما فتح مصر لقى المصريين بيقدمو قربان للنيل كل سنه ( بنت في كامل زينتها
) عشان النيل يجري , قال لهم لأ طبعا الكلام ده حرام و شرك و النيل بيجري بأمر الله
, إحنا مش هنرمي حد ........... تمام أوي .
.
و لما قال عمرو
بن العاص كده لأهل مصر ( الكفار ولاد الصرمه ) قام النيل بطّل يجري , مابيتحركش يا
مولانا , استنو يوم , اسبوع , شهر , اتنين والنيل مابيتحركش ولا بينطق , قام عمرو بن
العاص بعت لسيدنا عمر بن الخطاب و حكى له الحكايه .
.
سيدنا عمر بن الخطاب
بعت لعمرو بن العاص جواب وقاله أول ما يوصلك الجواب ده ارميه في ماية النيل , عمرو
بن العاص فتح الجواب ولقى مكتوب فيه ( من أمير المؤمنين عمر بن الخطاب إلى نيل مصر
, لو كنت تجري بأمر الله فاجري ولو كنت تجري مش عارف ايه كده ) المهم يعني ما علينا
, عمرو بن العاص رمى الجواب في النيل من هنا وقام النيل طلع يجري فُريره , و لا قطر
اسكندريه !!.
...................
انتهت القصه .
.
طب يا مولانا يعني
عايز تقول إن مصر في اللحظه دي اتنقلت من وثنية الكفار والمشركين ( يرمو البنت في النيل
) لوثنية المؤمنين الأتقياء ( يرمو الجواب بتاع خليفة المسلمين ) ؟ طب هديك عشه جنيه
لو قلت لي ايه الفرق بين الوثنيتين ؟!!.
.
و السؤال اللي
جه في بالي , هو نهر النيل عرف منين إن ده خط سيدنا عمر ؟ مش جايز الخطاب ده اللي كاتبه
الحارث بن حلّزه و قال يعمل فينا فصل و حركه مثلا ؟ مش كان أولى بنهر النيل إنه يجيب
خبير خطوط و يتأكد من صحة الخط قبل مايجري كده و يتقطع نفسه ؟!!.
.
يا شيخ الأزهر
الشريف العظيم الرائع : ماهو حاجه من اتنين بقى , يا إما تحرقو الحشيش اللي بيتزرع
في كتب السيره والتراث , يا إما تقولو لي ماتحضرش خطبة الجمعه تاني يا محمد يا حسين
و ماتقرفناش !!.
...............................................................................................................................
Mohamed
Hussein
21
نوفمبر 2014·
الشاسيه الإخوانجي
مايختلفش عليه اتنين , الشكل , اللبس , شكل الدقن , نظرة العين , الإبتسامه الصهيونيه
الصفرا .
.
امبارح كان فيه
برنامج على التلفزيون عن الراجل ابو دقن و مراته المنقبه اللي عذّبو بنتهم ( ساره
.. 7 سنين ) , أوّل ما شوفت الأب قلت لمراتي ده سلفي , شاسيه السلفيين مختلف عن الإخوان
.
.
المهم بقى اللهم
صل عالنبي , الأب شيخ جامع ( وطبعا حافظ كتاب الله !! ) , وكان بيضرب بنته بضلفة الكوفدينو
عشان خدت صباع كفته من التلاجه بتاعتهم ( مش بتاعة الجيران ) .
الأم المنقبه قالت
للأب الملتحي وهو راجع ( من الجامع طبعا ) بنتك سرقت صباع كفته ( من تلاجتنا ) طب دي
تعمل ايه لما تكبر يا شيخ ؟ يقوم الشيخ عروقه تتنفخ وأي حاجه تقابله يقوم ضارب بيها
بنته ( بيربيها تربيه اسلاميه بقى زي ما بيقول ) !! .
.
كسور في الفك و
تهتك في فروة الراس ويلزمها بتاع 17 عمليه جراحيه , و في النهايه اختلف الأب الملتحي
مع الأم المنقبه , وبقت عركه بينهم لرب السما عالهوا مباشرة , هو يقول انتي اللي لسعتيها
بالسكينه و حرقتي رجليها من تحت , وهي تقول طب مانت فتحت لها دماغها ياخويا !!
..........................
ولما تبقى حافظ
كتاب الله من غير فهم ولا تربيه ولا تثقيف هتبقى كمثل الحمارِ يحمل أسفارا , والنبي
و مين نبّى النبي نبي ماهتنفعك دقنك لو كانت بطول صلاح سالم ولا انتي نقابك هيشفع لك
قدام ربك .
.
و في النهايه بقى
هيتشابه الإخوانجي والسلفي , الأول بيحرق ويقتل عشان شرع الله والتاني بيحرق بنته و
ممكن يقتلها عشان خدت صباع كفته من التلاجه ( يعني برضه عشان شرع الله ) , و الإتنين
بيبقو فرسين لا يٌشق لهم غبار في مضمار الغباوه .
...............
تاكس تاكس , ودّيني
حارة الكفار ياسطى شارع الملحدين , عمارة عَبَدةِ الشيطان اللي تحتها سيد المشرك بتاع
الفول , بسرعه الله يعمر بيتك .
................................................................................................................................
.
