يكون ورق

يا خالق فينا حبك
وحب اللي اتخلق
يا زارع بين ضلوعي
بستان والجِذر شقْ
غيّر في صدور عبيدك
القلب ماعمره دق
أو هاتلي قلب تاني
مش لحم يكون ورق !!
يا خالق فينا حبك
وحب اللي اتخلق
.
.
محمد حسين

منوع

الحمد لله , ثقتي في جيش مصر متهزتش أبدا , أهم بفضل الله وعونه قدرو في ساعات قليله جدا يعرفو أسماء الجنود اللي اتخطفو وأعلنوها كمان !!..

.

رسالتي للفريق السيسي
.
سيادة الفريق عبد الفتاح السيسي , صباح الخير , بعد التحيه العسكريه, خالتي بتسلم عليك , وبتقولك عيالك بيتخطفو في سينا كل يوم خميس الصبح , أسبوع خطف وأسبوع قتل , تنويع يعني عشان الملل , وانت قلت قبل كده ( إحنا مش هنخوض حرب نيابة عن حد وكل واحد يشيل ليلته ) , أهي جت ليلتك لحد عندك , الليله ليلتك يا معلم , مش مطلوب منك تحمي الثوره ولا تخلصنا من حكم الإخوان , إنت رب الجيش فاحميه , ونحن أرباب الثوره سنحميها , أرجوك سيادة الفريق بعد ما تخلص جولتك مع الفنانين ( والفنانات ) وتطلعهم على أخر استعدادات الجيش , وتلف بيهم بالدبابه الكابورليه , ياريت بعدها تتصرف , بيقولو على جنودنا خير أجناد الأرض , وخير أجناد الأرض ميتخطفوش من شوية صراصير , بلاش تشمِّت فينا قيادات الجيش الصومالي الذي لا يُقهر !!

.

صباح الخير , بيقولو إخوانا بتوع حماس ( أو الجماعات الجهاديه ) خطفو 7 جنود مصريين من سينا ( تاني ؟!) , يا سيدي ولا تزعل , بلاش حماس والجماعات الجهاديه , إخوانا المخلوقات الفضائيه بتوع كوكب المريخ اللي عايشين في سينا ومعاهم أسلحه خطفو جنودنا في سينا , حلوه كوكب المريخ دي ؟ , على فكره , هما نفس المخلوقات الفضائيه اللي قتلت جنودنا في رمضان وهما نفس المخلوقات الفضائيه اللي خطفت الظباط المصريين , ودايما حوادثهم دي بتحصل بعد قرار بيزعل حماس والإخوان , يعني مثلا هدم الأنفاق , التصدي لمشروع إقليم القناه , ممكن مجازا نقول إنهم مخلوقات فضائيه مش حمساويين ولا إخوان بس بيحترموهم !
أي قرار هياخده الجيش لاستعادة أبناؤه المخطوفين هيبقى مالوش أي تلاتين لزمه , الحل الوحيد يا سيسي إنت عارفه , وتقدر تعمله ( بعد ما تخلص قعدتك مع لبنى عسل وطحينه ) , الحل ببساطه هو التعامل ( بلغة الجيش تعامَلْ.... فعل أمر ) مع السفينه الفضائيه الأم ..............................اللي موجوده في المقطم !!.

.

.

حقيقه علميه 

.
في مصر , أول ما بيقعد اتنين ستات مع بعض على إنفراد بيقوم الشيطان متصل بالسكرتيره بتاعته , ويقول لها إلغي كل مواعيدي وارتباطاتي النهارده , أنا مش عارف القاعده دي هتخلص إمتى وابعتيلي قوة دعم من عندك ومتنسيش تبعتي بطانيه و طوربتين حشيش زياده لزوم السهره !!.

.

طالما محمد مرسي زار غيط القمح ومسك سنبلة قمح في إيده , يبقى أبشرو بال 7 سنين العجاف !!.

.

يعني دلوأتي مرسي لو راح يزور الصيادين هيدقو له منصه في قلب البحر ؟ ولا يهنشفو حته في البحر عشان يقف فيها بسلامته ؟ طيب هيروح ببدله وكرافته ولا بعوامه ؟!
أنا مش فاهم ليه خيرت الشاطر مصرّ إنه يطلّع مرسي بالشكل المهين ده ؟ اعتبره أخوك يا أخي .
حقيقي بجد والله , مرسي عشان يطلع بشكل محترم أو شبه محترم مش لازم أبدا إنه يغير الناس اللي تحته إنما لازم يغير الناس اللي فوقه !!.

.

ايه المنظر المقزز بتاع مرسي في غيط القمح ده ؟ بجد والله ده لو واحد بيتعمد يهين نفسه ميعملش كده , يعني نحصد قيراطين أرض عشان تحط فيهم المنصه يا خروف يابن الخروف , وانت سيادتك متعرفش تخطب من غير منصه بروح أمك , متربي يعني تحت برج إيفل ومكمل تعليمك في الليسيه ؟ , مامتك كانت بتجيب لك الأكل على المنصه وانت صغير ؟, كنت بتربط الجاموسه في رجل المنصه ؟ , فيها إيه لو وقفت في وسط الأرض ووسط الفلاحين الغلابه وكلمتهم راجل لراجل ذي ماسيدك عبد الناصر كان بيعمل ؟ من غير ميكروفون ولا منصه , بجد والله انت لو شفت منظرك ده في الصوره المفروض تتنحى أو تتنيل على عين اللي خلفوك , على فكره لبس الجلابيه حاجه محترمه أوي ولبس البدله والكرافته حاجه محترمه أوي , إنما الهبل والهطل بعينه إنك تلبس الكرافته عالجلابيه , وهو ده اللي انت عملته بالظبط , أو بمعنى أصح هو ده اللي اتعمل فيك بالظبط !!.

.

ايه المنظر المقزز بتاع مرسي في غيط القمح ده ؟ بجد والله ده لو واحد بيتعمد يهين نفسه ميعملش كده , يعني نحصد قيراطين أرض عشان تحط فيهم المنصه يا خروف يابن الخروف , وانت سيادتك متعرفش تخطب من غير منصه بروح أمك , متربي يعني تحت برج إيفل ومكمل تعليمك في الليسيه ؟ , مامتك كانت بتجيب لك الأكل على المنصه وانت صغير ؟, كنت بتربط الجاموسه في رجل المنصه ؟ , فيها إيه لو وقفت في وسط الأرض ووسط الفلاحين الغلابه وكلمتهم راجل لراجل ذي ماسيدك عبد الناصر كان بيعمل ؟ من غير ميكروفون ولا منصه , بجد والله انت لو شفت منظرك ده في الصوره المفروض تتنحى أو تتنيل على عين اللي خلفوك , على فكره لبس الجلابيه حاجه محترمه أوي ولبس البدله والكرافته حاجه محترمه أوي , إنما الهبل والهطل بعينه إنك تلبس الكرافته عالجلابيه , وهو ده اللي انت عملته بالظبط , أو بمعنى أصح هو ده اللي اتعمل فيك بالظبط !!.

.

أنا مشفق على مرسي من حكم مصر , والله بيصعب عليّ , فاكر إنت فيلم ( إوعى وشك ) لما أحمد رزق قال للعمال الفواعليه ( هتشتغلو دكاتره يا باشمهندسين ) , نفس الوضع كده , مرسي سأل بديع أنا هشتغل إيه في الليله دي يا بلدينا ؟ قالو هتشتغل رئيس مصر , يعني هتقعد على كرسي عبد الناصر ! , وهو الراجل كان أخره يلعب دور ذكي قدره بيدبح ويسلخ وينفذ التعليمات , ومع احترامي لكل المهن وعلى رأسها مهنة ( عمال الترحيله ) إنما قناعتي الشخصيه بتقول إن عامل الترحيله اللي اتعود إنه يكون شيال أو عتال في ظروف قاسيه جدا هيواجه صعوبه أكبر لو قعدته في مكتب وتكييف وقلت له اشتغل دكتور , ........... كل مُيسَر لما خُلقَ له !!.

.

.صباح الخير , وانا طفل صغير كنت بقول لأمي أنا جعان , وكانت أمي تقولي ( صّبر نفسك بأي لقمه لحد مابوك يرجع من الشغل ) , ولما كبرت واتجوزت وخلفت , بقول لمراتي أنا جعان , فتقوم مراتي تقولي ( صبر نفسك بأي لقمه لحد بنتك ما ترجع من المدرسه ) !! , كان معكم مراسلكم المواطن صابر ( فور إيفر ) من داخل إحدى الأسر المصريه الفرعونيه الأصيله!!.

.

محمد حسين 

.

وحشتني بلدنا

وحشتني بلدنا لما
طوّل بينا السكوت
عايشين والغربه لمّه
ودي عيشه تساوي موت
.
وبنهرب من جناحها
وبنهرب من براحها
نلقى العالم تابوت !
.
حبِك مكتوب علينا
يا بلاد أحمد ومينا
وحشاني يا سفينه
مالهاش في البحر صوت
.
قالو لي بلدكو ماتت
وعليها مية سلام
قلت لهم لأ دي عايشه
لكن قاطعه الكلام
.
أنا أصلي عارفها يابه
حاكمينها بالديابه
بايعينها بالفلوس
وبلدنا دي عزيزه
لما بتزعل بتسكت
واما بتغضب تدوس
وفقلب النار تفوت
.
وحشتني بلدنا لما
طّول بينا السكوت
.
.
محمد حسين

منوع

لما ببقبل طلب صداقه من شخص وبعدين أكتشف إن الشخص ده كل اللي بيعمله إنه بينشر على صفحتي افتكاساته , يعني لا لايك ولا كومنت ولا شير ولا حتى استئذان في النشر , ساعتها ببقى عايز أقول له ( قبل ماحذفه طبعا ) : إنت مبتحبنيش لشخصي على فكره , واتعرفت علىّ عشان طمعان في قيراطين الأرض وحتتين السيغه اللي حيلتي , وانا هحذفك يا سونه يا خاين !!.

.

بيقولك يا سيدي الرئاسه والشرطه والجيش والأمن المركزي والمخابرات الحربيه والموسيقى العسكريه بيجرو مفاوضات مع العيال اللي خطفو الجنود !!...............هع هع , يا دين النبي يا جدعان , طيب ووزارة الري ووزارة التموين ؟ إزاي سيدنا باسم عوده مش معاكو ؟ طيب واليونسكو والأمم المتحده ومجلس الأمن والكوميسه والكومنويلث وكوم الدكه ؟ طيب والإتحاد السوفيتي وهتلر ونابليون وصلاح الدين الأيوبي وجورج واشنطن ؟ طيب نسقتو مع الأقمار الصناعيه الأمريكيه والهوت بيرد عشان يساعدوكو ؟ طيب عملتو حسابكو تقفلو الهويس وتقطعو الكهربا عن سينا والقناه ولا لأ ؟ طيب الجيش أمن نفسه بتخزين الحرب ومحصول القمح والرز كافي لإستهلال الشعب لحد ما المفاوضات تخلص ؟ طيب معاكو المضخات اللي هتقتحمو بيها الجدار بتاع العصابه ؟ أستاذ نبيل الحلفاوي ومدام ناديه الجندي معاكو ؟!
الله يرحمك يا عبد الناصر , كان بيحارب أمريكا وفرنسا وانجلترا واسرائيل في نفس الوقت وضهره متحناش لحد !!.

.

خبر عجيب , خبر يجنن , خبر يخلي الأقرع يبيع عفش بيته وهدومه ويشتري بكل تمنهم صبغة شعر !
.
قال بيقولك يا سيدي ( الرئاسه تكلف قيادات إخوانجيه بسيناء للتفاوض مع خاطفي الجنود !! )
سؤال رقم واحد : ماهي الرئاسه ؟ وماهو المنطق وماهو الأرشيف ؟!
سؤال رقم اتنين : قيادات إخوانجيه بسيناء بيشتغلو إيه ؟ إنتي جايه تشتغلي إيه ؟!
.
, على فكره الخبر ده ممكن تقراه بالعكس عادي ( مختطفي الجنود في سيناء يكلفون قيادات إخوانجيه بالتفاوض مع الرئاسه ) وممكن تقراه من النص ( قيادات إخوانجيه يكلفون مختطفي الجنود بالتفاوض مع مختطفي الرئاسه !! )
.
وممكن تقراه بالشكل ده ( أحمد باشا بيكلف أحمد بيه إنه يتفاوض مع أحمد أفندي )
..................... هو مش ده برضه يبقى اسمه زنا محارم ؟!!.
........................وانا كمان صبّلي معاك كاس يا دكتور شهدي .

.

محمد حسين 

راحو الأحباب

وساعات بتلاقي
في دفاترنا
شخابيط
وكلام مالهوش معنى
تعويذة ساحر
معقوده
على طرف كتاب
وحروف مبدوره
تقولشي حجاب ؟
راحو الأحباب
دي عيونا
بتكتب أحيانا
في الصفحه
بتحدف مواجعنا
والحبر الناشف
لو تعرف
في الأصل
ده كان بس دموعنا
متقولشي علينا
احنا الكتّاب
راحو الأحباب !!.
.
.
محمد حسين

منوع

صباح الخير , بيقولو أيمن الظواهري هو الوسيط في مسألة استعادة جنودنا المخطوفين في سينا , ومعرفش ليه سينا مكتوب عليها إن الخاطف فيها يكون هو نفسه الوسيط , يعني القاضي والجلاد , الخصم والحكم , نفس حكاية الراجل بلدياتنا زمان ( الحاج عبد الرحمن الحرامي ) , اللي كان بيسرق النحاس من بيوت الغلابه ويخبيه فوق سطح نفس البيت تحت كوم قش أو في أي مكان قريب , والغلبان صاحب النحاس المسروق يروح للحاج عبد الرحمن ويستنى حكمه في قضية النحاس المسروق , يقوم الحاج عبد الرحمن الحرامي يقول له النحاس موجود في المكان الفلاني وانا عايز منك ( عَوض ) كذا جنيه !! , هنا الحرامي لعب دور القاضي والجلاد , نفس اللي بتعمله التنظيمات الإرهابيه اللي في سينا , زمان كانت الناس غلابه وعايشين في نظام ( اللا دوله ) , والنهارده عايشين في نظام ال ( لا قانون ) , في الحقيقه مش متعاطف إطلاقا مع الجيش ( اللي بيلعب دور الراجل الغلبان اللي نحاسه بيتسرق ) , أحيانا كتير مش بتعاطف مع الضحيه , ماهو لما حضرتك توطي ضهرك وتِحْنيه عمّال على بطال مش هتعاطف معاك لما عدوك يحمّل على ضهرك نقلة سباخ ويقولك ( شي ...حا ...حا ) !!.

.

بعد اختياره نقيبا للموسيقيين , أنصار المرشح مصطفى كامل يرفضون الهجوم عليه ويؤكدون أن هذا الهجوم يقوده النصارى والفلول وأنصار حمدين , ويؤكدون دعمهم لأول نقيب موسيقيين مدني منتخب جاءت به الصناديق !!..

.

يا سنه سوخه يا ولاد , مصطفى كامل بتاع ( قشطه يابه ) بقى نقيب الموسيقيين !! , المنصب ده كان بيتنافس عليه من 60 سنه أم كلثوم وعبد الوهاب !, بس مش مشكله , ماهو أياميها كان رئيس مصر اسمه عبد الناصر ( مش مرسي ) والأدباء والمفكرين والشعراء اسمهم افتح قوس طه حسين , العقاد , شوقي , بيرم التونسي , حافظ إيراهيم .......... وغيرهم كتير , إقفل القوس مش ( علاء صادق , وعبد الرحمن القرضاوي ووائل قنديل ) , يالله ماهي ليله سوده وشيلناها مره واحده بطريقه الكل أو مفيش All or none ......... يارب بقى النقيب الجديد يعين اتنين نواب له ( أوكا وأورتيجا ) , ده طلب شخصي يعني يا أستاذ مصطفى , ماشي يا برنس ؟ قشطه يابه ؟!!.

.

خبر بيقول , مرسي يطالب الجيش بتحرير الجنود مع الحفاظ على أرواح المخطوفين والخاطفين معا !! , وأنا يعني زيادة في الإحتياط أطالب الفريق السيسي إنه أول ما يشوف واحد من الخاطفين يبوسه من بؤه ويحضنه حضن اللي راجعين من غربه !!.

.

صباح الخير , استمرار النائب العام الملاكي في احتجاز سلمى صباحي على خلفية قضية أو افتكاسة ( التسويق الإلكتروني ) اللي عدد المشتغلين بيها في مصر يمكن يكون أكبر من عدد اللي انتخبو مرسي + عدد سكان قطر معا , انا شخصيا أعرف كتير من أصدقائي مشتركين أو اشتركو فتره , المهم يعني إن سلمى دي بنت راجل ( مش مان ) , عشان كده مش خايف عليها , الليله دي بيديرها كالعاده خيرت الشاطر ( ورُبَ رئيسٍ لكَ لم تأتِ به الصناديقُ ) , إنما بس افتكرت فيديو شفته من فتره لحمدين صباحي وهو قاعد جنب بنت خيرت الشاطر في مؤتمر للتضامن مع أبوها الخروف الأعظم لما كان في السجن , سبحانك يارب , هو ده الفرق بين الأصيل والخسيس أو بمعنى أصح بين المناضل الحقيقي والإخوان !!

.صباح الخير , استمرار النائب العام الملاكي في احتجاز سلمى صباحي على خلفية قضية أو افتكاسة ( التسويق الإلكتروني ) اللي عدد المشتغلين بيها في مصر يمكن يكون أكبر من عدد اللي انتخبو مرسي + عدد سكان قطر معا , انا شخصيا أعرف كتير من أصدقائي مشتركين أو اشتركو فتره , المهم يعني إن سلمى دي بنت راجل ( مش مان ) , عشان كده مش خايف عليها , الليله دي بيديرها كالعاده خيرت الشاطر ( ورُبَ رئيسٍ لكَ لم تأتِ به الصناديقُ ) , إنما بس افتكرت فيديو شفته من فتره لحمدين صباحي وهو قاعد جنب بنت خيرت الشاطر في مؤتمر للتضامن مع أبوها الخروف الأعظم لما كان في السجن , سبحانك يارب , هو ده الفرق بين الأصيل والخسيس أو بمعنى أصح بين المناضل الحقيقي والإخوان !!

.

محمد حسين 

الطوابير

دنيا وفيها بلاد 
مالهاش تاريخ 
ولا شكل 
بتنط ساعة الأكل
تاكل كما الصراصير
.
وبلاد كبيره يا ناس 
دهسوها قال بمداس
وقالو لها اقفي هناك
في أخر الطوابير !!.
.
.
محمد حسين

منوع

السلفيه الجهاديه بتهدد الشرطه والجيش في مصر وبتقول يعني ( إحذروا غضبنا ) , وأعلنت من كام يوم تعاطفها مع الخاطفين ! , ومرسي ومن وراه خرفان بديعه متعاطفين مع الخاطف والمخطوف ( هع هع يعني بيشجعو اللعبه الحلوه ! ) ومفيش حد متضامن مع الجنود والجيش غير المصريين !!
على أي حال , معلومه عالماشي كده , محصلش في تاريخ مصر حكاية خطف الجنود دي , لا تاريخها الحديث ولا القديم ولا المرقّع حتى , دي ظاهره كونيه جديده خاصه بحكم الإخوان ( حصري يعني ) , الجهاديين والإرهابيين والبقايا والفُضل بتوع تنظيم القاعده بدأ يطلع لهم صوت ويجمعو نفسهم في ( إمارة سيناء ) , وكده تبقى جبرت يا عمنا , كلها شهرين تلاته لما أمريكا تخلص من حتة الغسيل اللي في إيديها ( سوريا ) بعد ما عصرت وكوت حتة الغسيل الأولانيه ( العراق ) , وتلاقيها بتتهم مصر بإنها بترعى الإرهاب , إي وربي بترعى الإرهاب , ( وهو فيه دليل إن مصر بترعى الإرهاب أكتر من إن اللي بيحكمها تنظيم إرهابي ؟! ) , وبعدين نلاقي بقى الدبابات بتاعة جون وكاترين وإليزابيث بنت خالتها داخله القاهره , وأمريكا بتاخدنا فُمين على إيديها بداعي محاربة الإرهاب .
إنما السؤال اللي محيرني والله , لو حصل كده وأمريكا أعلنت الهجوم على مصر , في الوقت ده بقى الإخوان هيحاربو أصلا ؟ طيب هيحاربو مع مين ؟!!.

.

.

صباح الخير , إحنا عملنا الثوره دي باختصار عشان نصوّر حسن البرنس نائب محافظ الإسكندريه , ولو سألتني طيب مين هو محافظ الإسكندريه ؟ هقولك اسمه السداسي كمان , إسمه ( المحافظ اللي النائب بتاعه حسن البرنس ! ) , صاحبنا البرنس نفسه بقى ماشي ووراه عيل بكاميرا سوني سايبر شوت ( أم 300 ريال ) , مره يتصور وهو راكب عجله ( ذي محمد سعد في فيلم اللمبي ) , ومره يتصور وهو بيبوس مواطن غلبان من بؤه ( ذي جميل راتب في فيلم طيور الظلام ) , ومره يتصور وهو بيدي لمواطن غلبان حتة بطيخ , وانا كمواطن ( غلبان برضه ) مقدرش أعترض عالبطيخ , لأني لو قلت إن بطيخ مولانا أقرع يبقى أكيد بقصد إن مولانا أقرع ( ذي ما قال فريد شوقي في الفيلم زمان ) , الحكايه كلها أفلام حمضانه وافتكاسات عفى عليها الزمن , ويبدو إن الإخوان نموهم العقلي والذهني توقف من 82 سنه , يعني مع دق أول وتد في مربط الإرشاد , قصدي مكتب الإرشاد !!.

.نياهاهاها , من يومين البلتاجي ( معرفش بيشتغل إيه بالظبط ؟) زار سجن العقرب ومعاه واحد من السلفيه الجهه ديه ( مش الجهه التانيه ) , الكلام ده كان بعد خطف الجنود ال7 في سينا , قام النهارده مرسي أفرج عن يجي 20 واحد كانو مسجونين في نفس سجن العقرب ( اللي زاره البلتاجي ! ) عشان الجنود المخطوفين يرجعو وقبلها قال للجيش حافظو على أرواح الخاطفين , يعني باختصار رجالة عبود الزمر خطفو كام جندي عشان إحنا حابسين كام واحد من رجالته , فقمنا أفرجنا عن رجالته عشان نرجع جنودنا ( على طريقة هتحرقلي محصول القمح هسملك البهايم ), وغالبا رجالته متهمين بقتل ودم وبلاوي سوده ( أكيد مش بيكتبو شعر يعني ) , إنما الشهاده لله حبسنا بنت صباحي عشان كانت بتلعب المزرعه السعيده عالنت !!...... طابونه دي ولا مش طابونه يا متعلمين يا بتوع المدارس ؟!!.

.

عندي قناعة شخصيه إني مش نافع في شغلانة الصيدله دي , لا هي عاجباني ولا انا عاجبها من الأخر كده , وبقول يعني ذي ما دخلنا بالمعروف نخرج بالمعروف , هي لها عندي إيه ؟ شهادة وترخيص وكام كارنيه ؟ تاخدهم حلال عليها وتديني ال 17 سنه اللي اتعلمتهم عشانها , والفلوس اللي صرفتها عليها ( 1275 جنيه و 170 مليم ) , ونفس المأذون اللي هيجوزني على كرسي في قهوة العواطليه يطلقني أنا وهي , أنا عارف إنها هتسيّحلي بقى قدام نقابة المهن الطبيه وتقول ( خادتني لحم ورمتني ذي السرنجه البلاستيك المستعمله ) , إنما يا ستي مش كده أحسن من إننا نبقى عايشين مع بعض ومحدش فينا طايق التاني ؟!, مش يمكن ربنا يبعت لك صيدلي ابن حلال يحبك وتحبيه ؟ يكون واد كيماوي كده ومتركب وال ph بتاعته تكون موزونه بميزان حساس ومتعايره بالسحاحه؟!
وجايز ربنا يحقق لي أنا كمان حلمي وأشتغل صياد سمك , الشغلانه اللي كنت بحلم بيها من صغري , يكون عندي مركب صغير ( وشوية غزل ) واخرج من الفجريه أقول يا فتاح ياعليم يا رزاق ياكريم , ورزق البحر واسع , يااااااااااه , مش هتعامل مع بشر خالص , هتعامل بس مع الموج والمايه والسما والطيور المهاجره والسمك أشكال وألوان , حتى النوّه لما هتفكر تئذيني هتبلغني قبلها !!.

.

سلمى صباحي خادت إفراج النهارده من افتكاسة ( التسويق الإلكتروني ) , حمد الله عالسلامه يا بنت الغالي , بس عايز أوجهلك رساله :
بعد ما تستريحي كده وتشربي بؤ مايه متفضيش شنطتك اللي كانت معاكي في الحجز , عشان هتحتاجيها تاني , خليها كده ذي ماهي بحطة إيدك , التهمه الجديده جاهزه , وهي إنك متهمه باستخدام قلم ليزر وتسليطه على عين الحكم الرابع في مباراة مصر والجزاير سنه 89 , الأحراز كلها موجوده في النيابه , قلم الليزر موجود والكوره اللي كانو بيلعبو بيها وعين الحكم !!.

.

محمد حسين 

مش لاقي ضي

بموت في أرضك
واندفن
وانا لسه حيّ
والشمس مانعه
ضيّها
مش لاقي ضي
معرفش ليه بنحبها
وكل ماهرب وابتعد
ألقاني جاي !!.
.
.
محمد حسين

الخواجه رئيس

يا جُندي ليه موجوع
في الوصف والحاله ؟
وليه بتبكي دموع
ما بيبكي رجّاله
.
قالي مخافشي الموت
ولا اخاف من المتاريس
زميلي كنا اتنين
خطفوه كلاب إبليس
وإديه مغلوله
يا نخوه تيجي منين
طول ما ( الخواجه )
رئيس ؟!!.
.
.
محمد حسين

منوع

صباح الخير يا عصابه ريا وسكينه
.
قبل انتخابات الرئاسه المشؤمه قرينا خبر الهجوم على قسم تاني العريش وسرقة بيانات المواطنين والماكينه اللي بتطبع بطاقات الرقم القومي وهنا ظهر إسم مولانا ( حماده شيته ) , الحادثه دي راح فيها اتنين ظباط واتنين جنود , عشان كده نقدر نقول إن حمادة شيته مسجون سياسي ( يا مرارة أمي ياني ) , خلصت سبوبة الإنتخابات والجهاديين دعمو مرسي , ماهو ده الدعم سيادتك , ماكينه ببطايقها وأرقامها واطبع يا مولانا الشيخ ( المسجون السياسي ) , اتمسك حماده شيته مش عشان سرق الماكينه وساعد ملانا بديع في تزوير الإنتخابات , لأ , عشان قتل الظباط والعساكر , قامت الجهاديه السلفيه حبت تخرجه من السجن وطبعا بديع موافق , يعني انت عايزه يعض الإيد اللي اتمدت له ؟ طيب ماهو فيه انتخابات جايه وهنحتاج ( الماكنه ) , طيب يعملوها إزاي اللعبه دي ؟ , لو أفرجو عنه مباشرة الدنيا هتتقلب والإعلام ( ابن الحرام ) هيفضح مشايخنا ( بتوع ربنا ! ) , خلاص ياعم اخطفلك كام عسكري وهدد بقتلهم وطالب بالإفراج عن شيته واحنا نفرج عنه ونحرر العساكر ونطلع منها ذي القرعه مالضفيره وأبطال كمان , السجن اللي مسجون فيه حماده شيتا هو نفسه السجن اللي زاره مولانا البلتاجي ( بتاع ربنا برضه ! ) من كام يوم , خلاص كده بقى , هي دي العصابه باختصار , وأيام كحلي بعيد عنك لما يتقال عن البرادعي وباسم يوسف ( بلطجيه وكفار ) ويتقال عن شيته (مسجون سياسي ) !!.

.

غريبه أوي , الجنود المخطوفين في الفديو بيقلّو أدبهم على السيسي ويتكلمو عن مرسي ب ( حنيه أوي ) , مع إني عارف ( بصفتي مجند سابق أد الدنيا ) إن وزير الدفاع ده في عرف الجيش هو الغوله أم عين حمره , الحكايه فيها إن وأخواتها ...............وإخوانها !!.

الموضوع هيخلص بتحرير الجنود اللي غالبا ( مخطوفين كده وكده ) , ذي ما كنا زمان واحنا عيال صغيرين بنلعب ( عريس وعروسه ) , يعني الإخوان نازلين بفرقتين ( خاطفين ومخطوفين ) , قوم إيه , خير اللهم اجعله خير , محمد مرسي البطل المغوار قدر يحرر الجنود ( الفريق التاني ) من غير ما نقطة دم تطرطش على تي شيرت الرقيب اللي في الفيديو , والسيسي الفاشل يتشال , ومفيش مانع نفرج عن شوية البهاليل بتوع الجهاديه السلفيه , يعني عصفورين بحجر واحد , على أي حال لو حصل كده فانا مش هزعل , مرسي في كل الأحوال هيعملو منه إله ( الإله بهلول ) , والسيسي لو كان بالضعف والسذاجه دي يبقى من الأصل مكانش يلزمنا في حاجه , ومش مهم اللي هيجي بعده , كان اسمه مخيمر بقى ولا هريدي مش هتفرق كتير , إنسو وزير الدفاع , غالبا هو كمان لونه ( مخطوف ) دلوأتي !!.

.

مرسي عمل دعوه للحوار الوطني بمناسبة الجنود المخطوفين , وطبعا اول الحاضرين هيكون عصام سلطان وسليم العوا وأيمن نور ووزير الأوقاف , أكيد هيبقى فيها أوبن بوفيه , يعني محاشي ومخاصي وخلافه , وممكن بعد الغدا يطلب من الإذاعه المصريه إنها توقف بث برامجها وتشغل أغنية ( أنا في انتظارك لأم كلثوم ) عشان يبث العزيمه ( والعزومه ) في صدور الجنود المخطوفين ( وبطون الجحوش المعزومين ) !!.

.

محمد حسين