وطن يقتلنى..............محمد عبد العزيز

ماعادَ الموتُ يؤرقنىْ
ماعادَ العيشُ يُعنينىْ
فالوطنُ القابعُ فى قلبى
يسلبُ أيامى و سنينىْ
يسقطنى من فوق التلِ
يحطمُ رأسى ..فيُردينىْ
لم أبغِ يوما فى مرّةْ
الا وطناً يَحمينىْ
لم أرغبْ أبداً فى هجرةْ
الى كندا...او الصينِ
لكنّ الوطنَ يتحيزُ دوماً
لمن ظلّ يتاجرُ بالدينِ
لمن ذرفَ الدمعَ الكاذبَ
على جثةِ فلسطينِ
لمن باع الوهمَ مرارا
واحترف الكذبَ كلّ حينِ
لمن صمّ الاذنَ عن ظلمى
وقال:- امرك لا يعنينىْ

سأرابطُ دوما فى ثغرىْ
أناجى الوطنَ ويناجينىْ
أرجوه ان يرضى عنىْ
فرضاهُ وسامٌ فوقَ جبينىْ
لاشئَ سيمنعنى حبه
لاشئَ عنه سيثنينىْ
___________________
محمد عبد العزيز

مدينة الروبوتات...قصة قصيرة.........محمد عبد العزيز

مدينة الروبوتات...قصة قصيرة
ـــــــــــــــــــــــــــــــــــــــــــــــــــــ
المكان:- مصر 2015 -مصنع الروبوتات العملاق بالمقطم
عدّل (بديعوف)صاحب المصنع من وضع نظارته الكلاسيكية فوق أنفه، وحك ذقنه ،ثم بدت على ملامح وجهه الجدّية حينما أضاءت شاشة تليفونه المحمول، فسارع الى الرد على المتصل الذى كان (مرسيوف)،كان يطمأنه بشأن صفقة الروبوتات الجديدة التى ستصل الى المصنع اليوم،أخبره أن (أدون خيرى) كان يخضع الروبوتات لاختبارات الكفاءة والطاعة، وهى الان فى طريقها للمصنع.
وصلت الروبوتات للمصنع،واستقبلهم (بديعوف) بنظرات يختلط فيها الاعجاب والتمحص،قرر ان يتلو عليهم تعليمات التشغيل:- أنتم الان ملكية خاصة لهذا المصنع،الاوامر مطاعة ولا مجال للمناقشة،صحيح أنكم وصلتم لقمة التكنولوجيا،لدرجة اننا نطلق عليكم (روبوتات نصف بشرية)،الا انكم فى النهاية تخضعون لاوامرنا ،مفهوم .؟
ردت الروبوتات فى نفس اللحظة وبنفس النبرة الديجيتال الرخيمة:- مفهوم سيدى (بديعوف)
انتفخت أوداج الرجل وارتسمت على وجهه ابتسامة عريضة،لم ينتزعه منها سوى صوت هاتفه المحمول حاملا صوت (أدون خيرى) تحتل نبراته ذعر الكون كله وهو يقول:-كارثة يابديعوف ...كارثة...لقد أصيبت الروبوتات الأم بفيروس سريع الانشطار والانتشار،وبدأت تعطى أوامرا غير مفهومة للروبوتات الاصغر، وهم الان فى طريقهم الى المصنع...تصرف يابديعوف بسرعة
أنهى بديعوف المكالمة،وأطرق برأسه مفكرا وقال:- لابد انه الذى فعلها، لاشك انه (بوب) واعوانه
ــــــــــــــــــــــــــــــــــــــــــــــــــــــــ
اتجهت حشود الروبوتات نحو مصنع المقطم ،وبدأت تحيطة من كافة أركانه وجوانبه،سارع (بديعوف) الى تهدئتهم ، فقام بالدخول على البرنامج الخاص بالطاعة، أدخل الباسورد الخاص به،فظهرت له رسالة تفيد أن البرنامج قد دمر تماما،فتملكه التوتر وصاح فى الروبوتات :- انى أمركم الان ، فاسمعونى:- ماتقومون به الان خيانة عظمى ، انكم بذلك تدمرون هذا الوطن
رد عليه اكبر الروبوتات:- اى وطن الذى تتحدث عنه؟هذا الوطن ليس ملكك وحدك ايها الابله.
استبد القلق ب (بديعوف)...فقرر أن يصدر تعليماته للروبوتات الجديدة لمواجهة الحشود المحيطة بالمصنع...لكن المفاجأة ألجمته حينما وجد الروبوتات الجديدة قد انضمت الى الحشود العريضة،ويبدو ان الفيروس طالها هى ايضا.
وصل (ادون خيرى)، و(مرسيوف) الى المصنع، لينقذوا مايمكن انقاذه، لكن الروبوتات انقضت عليهم فى قوة وشراسة، حتى قضت عليهم تماما، ثم انفردت ب (بديعوف)، وقطعته اربا
لتعلن بذلك نهاية هذه المدينة الى الابد...مدينة الروبوتات
__________________________
محمد عبد العزيز
27-12-2012

يبقى الاسلام خالد..........محمد عبد العزيز

أشبعونا كلاماً عن النضالِ
وهم يتراقصونَ
على كلِّ الموائدْ
أوسعونا حديثاً..فى جدالِ
أخبرونا أنّ
الاسلامَ لاريبَ عائدْ
وكأننا نعبدُ العجلَ
أو نتوضأ ُ
فى ظلالِ المعابدْ
وكاننا نقدمُ القرابينَ
للشمسِ
ولاندركُ الالهَ الواحدْ
وكأننا أصهارُ ابى لهبِ
او لانعرفُ أشكالَ المساجدْ
ظنوا أننا دمى
يلهون َبها
ويحيكون لها ثوبَ المكائدْ
غدروا بنا
جعلونا قرباناً
للمصاعبِ والشدائدْ
مهما فعلوا بنا
فهم حتما زائلونَ
ويبقى الاسلامُ خالدْ
ويبقى الاسلامُ خالدْ
ـــــــــــــــــــــــــــــــــــــــــ
محمد عبد العزيز

الحكاية باختـــــــــــصار........محمد عبد العزيز

الحكاية باختـــــــــــصار
شعب هبّ
وفجأة ثــــــــــــــــــــــــار
كان بطيبته
فاكر إنه...كسر الحصار
كان بخيبته
فاكر إن ...الظلم غــــار
لكنه التقى
انه...شال بأف
وجاب حمــــــــــــــــــار

المزة والسيس والمجانص

عارف انت الشاب اللى عاوز يلفت انتباه بنت مزة،فيروح مسلط عليها واد هلف بعضل ومجانص ويكرمش له عشرين جنيه فى جيبه، عشان يعاكسها وفجأة ينقذها الشاب السيس من براثن العملاق، فتقع المزة فى حبه؟
ده اللى بيعمله الاخوان دلوقتى، بيسلط السلفيين ع الشعب ،عشان الشعب يقول يامامى ، نار الاخوان ولا جنة السلفيين،الفرق بين الموقفين ان الواد الهلف عارف ان دوره بينتهى لما الشاب السيس بيضربه فبياخد العشين جنيه المكرمشة ويروح،انما السلفيين فاكرين انهم بيستعبطوا الاخوان وبيسايسوهم عشان يركبوا على اكتافهم...بس احب اطمن المُزّة...مش هنسمح للشاب السيس او الواد المجانص انهم يقربوا ناحيتك ياقمر.

محمد عبد العزيز

الشعراوى وبدر

-عملت تجربة لطيفة جدا ع اليوتيوب:- كتبت (عبد الله بدر يسب..) ف السيرش طلع لى ف النتايج حوالى 7 صفحات ، كل صفحة فيها بتاع 20 فيديو بيبدأوا بنفس الجملة ، قلت اجرب اكتب (الشعراوى يسب)...لقيت النتايج (صفر)...وده الفرق الحقيقى مابين عالم جليل ، و بنى ادم سافل ، يدعى كذبا انه داعية،المشكلة الحقيقية ان امثال بدر كثيرون ويخرجون فى قنوات تدعى انها دينية.والمفترض فيها ان تراعى الاداب العامة .
-اتذكر ان الرقابة عملت مشكلة كبيرة جدا مع الفنانة (فاتن حمامة) عشان فاتن بتقول فى الفيلم(يابن الكلب)..كان من حيثيات الرقابة فى اعتراضها، ان الجملة تجرح الاداب العامة للشعب المصرى(خد بالك الفيلم ده كان فى السبعينات" وما أدراك ما السبعينيات") ...
-بدر وامثاله يبحثون عن شهرة زائلة لامحالة، فالتاريخ سيفلتر الوساخة وسيبقى على العلماء الاجلاء باحرف من ذهب..

محمد عبد العزيز

outsourcing

فى التجارة والسياسة هناك مايسمى (outsourcing)...يعنى مثلا تكون شركة واخده بعض الادويه لشركه تانيه وتعملها دعايه ،يعني تلاقي مكتب علمي واخد بعض ادوية افنتس او فايزر اللى مش معمولها دعايه وتعملها هي دعايه بنفسها..
وده اللى بيطبقه الاخوان حرفيا، يروح مصدر للناس افكاره عن طريق اشخاص يدعون انهم لاينتمون للاخوان ودايما يرددوا المقولة الشهيرة(انا مش اخوان بس بحترمهم على فكرة)...زى مثلا حزب الوسط اللى بيستعبطوا بيه الناس ويستغفلوهم وعاوزين يفهمونا انهم منشقين عن الاخوان( وهما اساسا راضعين من نفس الصدر)...والفئة دى بتتصدر للناس على المستوى السياسى...اما على مستوى الشارع يصدروا ابو اسماعيل( الاخوانجى ابا عن جد)..
-لكن التاريخ بيقول ان اغلب الشركات اللى بتعمل اوت سورسينج لشركات اكبر منها ، مابتعمرش كتير ف السوق، بل بالعكس ممكن تاخد الشركة الام وتنزلها اسفل سافلين...ممكن ده يحصل قريب عندنا؟؟قولوا اميــــــــــــن.

محمد عبد العزيز

ابراهيم عيسى وعبدالحليم قنديل

وضعت نفسى مكان ابراهيم عيسى وعبدالحليم قنديل، الاول اكثر من هاجم وفضح مبارك ونظامه فى عز جبروته، والثانى اكثر من شهر به مبارك وتركه عاريا فى الصحراء، الاثنان وقفا امام نظام فاسد فى نفس الوقت الذى صرح فيه محمد مرسى بانه يحترم رموز مصر الوطنية(احمد عز) و (زكريا عزمى)،و(كمال الشاذلى)....الاثنان الان فى نظر الاخوان واتباعهم،مجرد عميلان ماجوران لايريدان لمصر استقرارا.
والذى لايفهمه الاخوان، ان عيسى وقنديل ،قضيتهم هى الحرية فى اى عصر وان يقفوا امام اى طغيان،سواء كان يرتدى بدلة عسكرية او عباءة الدين،لذلك مجرد ان هاجمهم عيسى وقنديل انتقلوا من خانة الوطنية الى خانة العمالة مباشرة، رغم انهما اكثر من وقفا بجوار الاخوان عندما كان ينكل بهم مبارك
-وضعت نفسى مكانهما واتهامات من قبل (اهانة الذات الرئاسية)تلاحقهما، فوجدت نفسى اتساءل:- عمرك شفت سفالة كده؟

 

محمد عبد العزيز

التجربة الفنلندية

الجهل هو الفرخة التى تبيض ذهبا للانظمة الشمولية، والعلم هو عدوها الاول،لذلك لو اعترفنا جدلا بنتائج الاستفتاء،فانه من المؤكد ان الاخوان لن يهتموا بالتعليم فى مصر ، بل سيغرقونها فى بحر من الجهل.
-واذا اراد الاخوان النهوض بالعلم فى مصر فلينظروا الى التجربة الفنلندية(المصنفة كأفضل تعليم في العالم لـ عشر سنوات على التوالي)...وسر تفوق فنلندا الكاسح ياتى ضمن النقاط التالية:- 1-لا يعيّن أي معلم في فنلندا إلا بعد حصوله على الماجستير - على الأقل -
2-لا يوجد أي اختبارات إلزامية في أي مرحلة دراسية إطلاقا!... ما عدا اختبار واحد في 4 مواد في نهاية المرحلة الثانوية فقط.
3-تتم عملية تقييم الطلاب بشكل (وصفي) لا (رقمي)... بحيث لا يتم تحويل مستويات الطلاب الدراسية إلى أرقام، وإنما يوصف مستوى الطالب بشكل تعبيري,,,يعنى مثلا مدرس الرياضيات يوصف الطالب كده(الطالب متميز في تحليل المعادلات واشتقاقها من أصولها، لكنه لا يحسن التمثيل العددي والتعامل مع الأرقام والكسور".)
4-يتم انتقاء القيادات التعليمية بعناية فائقة، بحيث يرشح ذوي القدرات القيادية والمهارية والعلم بمجال تطوير التعليم... بدءا من وزير التعليم وحتى مدراء المدارس.
5-للمعلم كامل الحق والحرية في اختيار المقرر، إضافة وحذف المواضيع، وتحديد مصادر المعلومات كما يشاء!
-طبعا هتقولى اكيد المدرس هناك بياخد اعلى مرتب ف العالم..المفاجأة ان ترتيب فنلندا من حيث رواتب المعلمين هو العاشر!

الحلول موجودة لتطوير العلوم وتنضيف العقول، لكن كيف سيطوروها وهى السلعة الرائجة لهم على الدوام....سلعة الجهل

محمد عبد العزيز

مصرى بجد.........محمد عبد العزيز

مصرى...أيوة ف البطاقة
قلبى مليان بالجراءة
معرفش أرقص ع الحبال
عمرى ما ابيع ولا اخون
لا كنت واطى ولا هكون
انا صبرى من صبر الجبال
فخور بدينى و مش بتاجر
انا لا بديع ولا حتى شاطر
ولا ببيع الدم اللى سال
ولان الخيانة مش ف بالى
ولان شرفى عندى غالى
مابقيتش اسمع للبغال
___________________
محمد عبد العزيز

التزوير وعبدة الشيطان

يعني إيه تزوير الإنتخابات في مصر ؟.......أرجوك حاول تفهم.
.
من 10 سنين كان فيه ظاهره خايبه في مصر اسمها ( عبدة الشيطان ) , شوية عيال سيس مراهقين متمردين بيعملو طقوس غريبه وشاذه , وانا فاكر كويس أوي إن مفيد فوزي في (حديث المدينه) بيسأل عيل منهم ( هو انتو فعلا بتمارسو جنس جماعي ؟! ) , فرد الولد وقال له ( لأ والله ياباشا , احنا بنبقى 3 أو 4 ولاد مع 3 أو 4 بنات بس !! ) , فكان رد مفيد فوزي عليه عبقري ( ماهو ده يابني الجنس الجماعي , ولا انت فاكر إن الجنس الجماعي ده عباره عن قبايل مع بعضها !! ).
.
في الإنتخابات المصريه تحت حكم الإخوان , توزيع الزيت والسكر والأنابيب ده تزوير , تجاوز سقف الإنفاق تزوير , استخدام المساجد للدعايه تزوير , فكره الصينيه تزوير , الورقه الدواره تزوير , تعطيل اللجان اللي معروف إنها هتصوت بلا لغياب فتح اللجنه أو الحبر السري تزوير , استبدال القاضي بمدير مدرسه إخوانجي تزوير , الترويج للأمر كأنه انتصار للدين والعقيده تزوير !! ...ولا حضرتك فاكر إن تزوير الإنتخابات بيعني إن واحد من ميليشيات الإخوان واقف برشاش ورا الستاره ويفول للي داخل صوت بنعم ولا أطخك ؟! ولا انت فاكر إن الإخوان حاطين عيل صغير جوه الصندوق بحيث كل ورقه تنزل عليه متصوت فيها ب لا يقطعها وياكلها ؟!.
يا سيدي 3 أو 4 ولاد مع 3 أو 4 بنات بيبقى اسمه جنس جماعي , واللي بيعمله الإخوان اسمه تزوير , وإلا يبقى الحزب الوطني كان بيعمل انتخابات نزيهه جدا لأن مكانش بيزور بطرق أصعب ولا أوسخ من كده , وصدق القيادي في الحزب الوطني اللي قال احنا بنتعلم التزوير من جماعة الإخوان المسلمين !!.........................يارب تكون فهمت

.

محمد حسين

ذي ما يقول الكتاب

وهتفنا ذي مايقول الكتاب
بس الكتاب مذكرلناش
نعمل ايه بعد الهتاف ؟
يحصل ايه بعد الهتاف ؟
باينه خاف
والله خاف
.
لبّستنا يالورق
في الحيطه والضلمه
ثوره وطاقة نور
جابت لنا العتمه
وعشان ما إحنا صغيرين
ومسلّمين
وعيال خُفاف
وقف الهتاف
سكت الهتاف !!.
.
.
محمد حسين

التجربه الدنماركيه

التزوير حاليا بالورقه الدواره قدام كل اللجان تقريبا , اقبال الإخوان على التزوير النهارده إقبال تاريخي يا فندم ! , وبكده تكون مصر نجحت في أول تجربه دنماركيه ! , ..................تزورلي الصندوق ده واديك 100 بكره ؟!!.

.

محمد حسين

الرسول المنتظر

إنت الرسول المنتظرْ .........!!
.
.
إوعاك ياريس تتعدل
أوعاك ياريس تعتذر
ولّا تحس بصوت خطر
دانت الرسول المنتظر
واحنا الغجر
إحنا الزكايب والغفر
.
وانت اللي شايل
في اليمين
غضن السلام
وانت اللي ماسك
في الشمال
ورد وحمام
وانت الهمام وانت التمام

واحنا اللئام

جوانا شر
واحنا اللي شايلين السلاح
غاويين الجراح
احنا اللي عايزين نتقتل
ونموت هدر
وانت الرسول المنتظر
.
أصل العقول لما بتركب
عالبغال
بتجيب عيال
ذي التيران بمخاخ بقر
وانت الرسول المنتظر
.
إعمل لنا طيب ياريس
بالشريعه ألف سجن
جهز لنا وجبة عشا
برسيم وتبن
لجل مصر ما تبقى جاريه
عند موزه وشيخ قطر
مانت الرسول المنتظر
.
وَحْيك بينزل من سكات
شايل أيات
وقايمه باسماء الولاد
وقايمه باسماء البنات
المغرضين الحاقدين
أولاد ماسون
ماحنا بوذا والماثون
وانت بترعى حقنا
مهما يكون
وكأننا عفواً بشر
مانت الرسول المنتظر
.
واحنا العصابه الخطافين
إحنا اللي عايزين نخطفك
ما أروعك
ما ألطفك
ياختي قمر
مين ده اللي يقدر يخطفك
وانت رسولنا المنتظر !!
.
.
محمد حسين

القاهره 30

بعد ما يتعين خيرت الشاطر رئيس وزاره هيكون دور مرسي وقتها هو نفس دور حمدي أحمد في فيلم القاهره 30 !! , إنما احنا كشعب وكسعاد حسني هنتبسط أكيد .

.

محمد حسين

فوانيس شابوره

لو حضرتك انضحك عليك في عربيه بتشتريها , وبعد ما دفعت تمنها مالقيتش فيها ماكينه ولا فتيس ولا دركسيون ولا فوانيس شابوره ! , حضرتك هتروح تشتكي البايع لأن العربيه مفهاش فوانيس شابوره ؟!
الإخوان بيكدبو ليل ونهار , بيتاجرو في دم الشهدا من سنتين , بيسرقو الشهدا حتى , بيعملو صفقات , بيتاجرو بأيات الله وبياكلو مال النبي , وحضرتك متضايق وزعلان أوي إنهم بيزورو استفتاء ؟! .....إمبارح لو حضرتك بتعرف تقرا , كان فيه رساله واحده صغيره خالص من الإخوان , بتقول الرساله ( إحنا كده وأعلى ما فخيلكو اركبوه ) , كلمنى انت بقى بالشوكه والسكينه , كلمني عن الديموقراطيه والشفافيه , كلمني عن الأليات المتبعه والحوار المجتمعي , كلمني عن الحوار البنّاء والإنفرا ستراكشر , كلمني عن سلميه واختها نزيهه , عشان إنت عيل أهبل !.

.

محمد حسين 

جلال عامر

أخي تجاوز الظالمون المدى , فهيا ننام بعد الغدا !!...................(جلال عامر).
.
نسى الفيلُ ساعةً أنه فيلْ , فافتكر إن زلومته حبل غسيل !!...................( محمد حسين ).
.
الحزب الوطني وجماعة الإخوان المسلمين هم طرفي المقص لهذا الشعب !!.............( جلال عامر ).
.
رغم أنها جماعه دوليه فهي لا تفكر في الإستعمار الخارجي لإنهم يؤمنون تماما أن أفضل وطن تستعمره هو الوطن الذي تعيش فيه !!.............( محمد حسين ).
.
وقف الخلق ينظرون جميعا , كيف أسرق ودائع البنك وحدي !!.........( جلال عامر ).
.
إغضب فأنت رائعٌ حقا متى تثورُ , إهدأ فأنت رائعٌ حقا يا أمورُ !!...............( محمد حسين ).
.
في الفصول المدرسيه تجري الإمتحانات والانتخابات , يعني غش في الشتا وتزوير في الصيف !!...............(جلال عامر ).
.
ملخص الثوره المصريه : عقارب الساعه لا تعود إلى الوراء , لكنها بتلف وترجعلك تاني !!................ ( محمد حسين ).
.
لا تصدق العريس فى فترة الخطوبة ولا المرشح فى فترة الدعاية............( جلال عامر ).
.
بعد تصريحات الست أم أيمن ( مرسي قنبله ذريه ) , والست منال أبو الحسن ( مرسي مدعوم من ربنا ) أيقنت تماما أن صوت المرأه عورة وإن الست مالهاش غير بيت جوزها !!............. ( محمد حسين )
.
سؤال: لماذا يتحدث هؤلاء عن حيض المرأة أكثر مما يتحدث أطباء النسا؟
ولماذا عن ملابس المرأة أكثر مما يتحدث مصممو الأزياء؟
الإجابة عند علماء النفس !!..................(جلال عامر )
.
الأستاذ عصام سلطان : البرادعي في رده وطنيه ويجب أن يستتاب منها ! , وانا عندي سؤالين , الإستتابه من الرده الوطنيه بتكون على يد شيخ ولا على يد محضر ؟
وماذا يقول المرء فيها , هل يستغفر ربنا أم يحيي العلم ويغني نشيد بلادي بلادي 9 مرات ؟!......................(محمد حسين )
.
.
.......................أفخر دائما بوضع صورة جلال عامر في البروفايل عندي , وهو مفيش وجه للمقارنه بيني وبين الرائع الراحل جلال عامر إنما حسيت النهارده إني بفتقده جدا.

الإستقرار

أخي المواطن الباحث عن الإستقرار في صعيد مصر وسينا والوادي الجديد , عزيزي المستقر , حضرتك اخترت الدستور ده ووافقت عليه ,إسمح لي بقى أقولك , لما ولادك يموتو في حادثة قطر بسبب الإهمال مش هتعاطف معاك , لما مراتك تتقتل على إيد الإرهابيين مش هتعاطف معاك , لما أمك تموت بسبب المرض والإهمال في المستشفيات مش هتعاطف معاك , لما انت تعيش حياتك في ضنك وكرب وتشرب ماية مجاري مش هتعاطف معاك.... عزيزي المستقر , اتحمل لوحدك نتيجة اختيارك ومتقولش أي !!.

.

محمد حسين

ذا دوج

اتفرجت من كام سنه على فيلم أمريكي , كان اسمه تقريبا ( بول ذا دوج ) , بيحكي عن زعيم عصابه عثر على شاب صيني قوي وشرس , وأخده معاه ورباه على السمع والطاعه العمياء , وكان بيركب للشاب ( اسمه بول ) حديده على وشه عشان يقدر يسيطر عليه , ولما يحب زعيم العصابه ينتقم من أحد أعداؤه يشيل الحديده من على الشاب ويطلقه على عدوه , يعني باختصار كان بيعامله كأنه كلب مدرب على طاعه سيده , وهكذا استمر النص الأول من الفيلم لحد ما الشاب ده قابل البطله اللي بدأت تفهمه إنه إنسان له كرامه مش كلب لسيده , وفعلا بدأ الشاب يقتنع وفي الأخر هجم على رئيس العصابه وقتله تقريبا , المهم بقى إن الفيلم ده بشوف نصه الأولاني بيحصل في مصر كل يوم ونفسي جدا أشوف النص التاني !!

.

محمد حسين

التقي الورع

الراجل التقي الورع اللي قتل السادات بقى رئيس حزب سياسي بيشارك في حكم مصر وبيدعم الإخوان , وابن عمه الراجل التقي الورع اللي شارك في قتل السادات بقى بيحضر احتفالات اكتوبر في المقصوره الرئيسيه , والراجل التقي الورع اللي خطط لقتل رفعت المحجوب بقى عضو مجلس شورى معين !! ومين عالم , مش ممكن بعد كده نشوف فاروق جويده بيتجلد قدام تمثال النهضه لأنه بيكتب شعر رومانسي ؟! , الله يرحمه جلال عامر ( ابتسم قبل أن تصبح الإبتسامه جريمة هتك عرض ) !!

.

محمد حسين

إحنا الطيور

أحنا الطيور
اللي بتهدم عشها
ساعة النهارْ
.
واحنا الزهور
اللي بتحبس عطرها
لجل مايرضى
الكبارْ
.
واحنا اللي كنا
مشرّقين ومصممين
معدش فينا يا أمل
غير انكسارْ !.
.
.
محمد حسين

تحرير مصر

حارس خيرت الشاطر اللي اتقبض عليه بسلاح ألي , له صور وهو بيتدرب في قطاع غزه على إيد الجهاديين هناك ! , المجموعه اللي اعتدت على المستشار الزند وضربت نار في الهواء منهم اتنين فلسطينيين !.
إحنا بعد كده مش هنخرج بمظاهرات لتحرير فلسطين من الإحتلال الإسرائيلي , لأ... إحنا هنتظاهر لتحرير مصر من الإحتلال الفلسطيني , وبدل مانرفع شعار عالقدس رايحين شهداء بالملايين , هنقول عالقاهره رايحين شهداء بالملايين , وهتجتمع الجامعه العربيه بمقرها الجديد في الدوحه لشجب واستنكار العدوان الفلسطيني على مصر............أرجوك انتبه .

.

محمد حسين

حبر ف ورق

ثورتي حبر ف ورق
ولّا بستان اتحرق ؟!
أنا اللي ضايع من كتابي
ألف سطر مخضّرين
ماتو كده من غير تمن
إحساس مهين
لما حروفك تتشنق !!.
.
محمد حسين

ايه المانع ؟

يا ترى إيه اللي مانع رئاسة الجمهوريه إنها تنشر أسماء شهداء الإتحاديه العشره بتوع الإخوان !! , أسماءهم وعناوينهم لو سمحتو في بيان رسمي يقوله ياسر على ؟!........سهله أوي دي.
يا ترى إيه المانع اللي خلى رئاسة الجمهوريه متبعتش تسجيلات الكاميرات بتاعة أحداث الإتحاديه للنيابه اللي طلبتها ؟...غالبا النيابه هتلاقي عليها فيلم لكريم عبد العزير برده !!.
يا ترى إيه المانع إن اللجنه العليا للإستفتاء تنشر أسماء الساده القضاه اللي بيشرفو على الإستفتاء , الأسم ورقم اللجنه بس والوظيفه لو سمحت .؟!..............سهله أوي عشان عندهم الكشوفات.
هه يالله قولو لي يا خرفان , هتنشرو أسماء الشهداء العشره وعناوينهم رسمي ؟! , هتنشرو أسماء القضاه ووظايفهم رسمي ؟! , هتبعتو للنيابه تسجيلات الإتحاديه ؟!.
.
في مصر حاجتين إتنين هما المعجزات , إن راجل عنده 7000 سنه يخلف وإن إخواني يفكر !!.

.

محمد حسين

غير متضامن

غير متضامن مع أحمد عرفه ( أدمن صفحة لازم حازم ) الذي تم اعتقاله بالأمس , أحمد عرفه بحسب الدستور الجديد اللي ممكن يشيل سيف عشان الناس تصوت عليه بنعم , الدستور ده بقى بيبيح اعتقاله لمده 12 ساعه , ممكن تبقى 12 شهر بدون محامي أو محاسبه أو توجيه تهمه , أحمد عرفه عمل دعوات على صفحات السلفيين الكبيره للحشد والإعتصام والحرق , أي عيل تيت ابن تيت وعايز يعمل نفسه بيس وشيك ووسطى وصاحب مبدأ وخرابيط ويتضامن معاه ميلومش إلا نفسه , بالمناسبه لما يطلع عليك أحمد عرفه بسيف ولا سنجه ولا مدفع رشاش وانت متظاهر أو معتصم بعد كده ابقى إركع على رجليك وقول له ( بليز مستر عرفه , بليز , أرجوك ارحمني , دانا كنت متضامن مع جنابك !! ) , واللي خاده ابراهيم عيسى اللي كان حارق نفسه دفاع عن الإخوان قبل الثوره تاخده انت سيادتك من عرفه !

.

محمد حسين

اقرا الدستور

أرجوك حاول تقرا وتفهم الدستور بالشكل ده !
.
فيه ماده بتبيح اعتقالك وعدم تسليمك للنيابه قبل مرور 12 ساعه , وده بيعني ايه ؟ بيعني إنك مش هيكون معاك محامي ولا تقدر تتصل بأهلك .
في الدول الناميه والمتخلفه اللي ذي حالتنا بيكفي جدا إنك تعمل ثغره في الدستور أو القانون وبعد كده الثغره دي بتكبر تكبر تكبر لحد ما تبقى باب يفوت جمل .
ماهو سيادتك مش كل معتقل هيبقى اسمه أحمد بهجت وعنده محامين ومستشارين قانونيين هيقفو معاه فورا ويطبقو نص القانون , يعني ال 12 ساعه ممكن تبقى يومين تلاته , أسبوع , ولا انت فاكر إنك هتقف للبيه الظابط بالساعه ؟ .
في مناقشة وزير العدل مع وائل الأبراشي من شهر في الماده دي تحديدا قال مكي إن المده أسبوع بالكتير ؟ رد الإبراشي وقال أسبوع كتير ممكن ينطحن المعتقل ويتعذب فيه , قال مكي طيب نخليها يومين , رد الإبراشي ولا يومين ولا دقيقتين , إنت بتتكلم على مبدأ .
.
وده في الإسلام بالمناسبه اسمه سد الذرائع , يعني حضرتك لما ربنا سبحانه وتعالى حرم الزنا قال ( ولا تقربو الزنا ) , يعني متهوبش ناحيته عشان دي سكه لها أول ومالهاش أخر .
.
سيادتك في الدول المتخلفه ذي حالاتنا , بيبدأ فساد المسئول مثلا بإنه يعمل مناقصه لإنشاء طريق وتيجي شركه عايزه المسئول يرسي عليها العطا تقوم تعزمه على أكلة سمك وجمبري ودي بتبقى كافيه في الأول وألف مبروك .
.
وبيستمر الفساد لحد ما يوصل إنك تسأل المسئول في يوم من الأيام جبت القصر الكبير ده منين يقوك يقولك تعالى بص من الشباك ده , ويقولك شايف إيه ؟ تقوله مش شايف حاجه , يقولك أهو الطريق اللي انت مش شايفه ده اتكلف 50 مليون !!!.
.
محمد حسين

عصام سلطان

لذيذ أوي الراجل عصام سلطان ده , قبل الثوره له فيديو بينتقد الإخوان ويتهمهم بالتجاره بالدين والزيت والسكر , وبعد الثوره اشتغل شويه على شفيق وبعد كده على جبهة الإنقاذ واتهمهم بالخيانه والعماله ومدح في عبقرية وجمال ودلع الإخوان !.
.
الدرس رقم واحد للأخ عصام سلطان في الظهور الإعلامي :
حاول متنتقدش حزب أو تيار نقد واضح وصريح قدام كاميرات الفيديو يا سلطان.
مانت مش عارف الأيام مخبيالك إيه يابو السلاطين !.
.
زمان العيال طلعو نكته على ياسر عرفات , إنه راح يحج فطاف وسعى ووقف وعمل كل الأركان بس مرضاش يرجم إبليس ولما سألوه إنت رافض ليه ؟ قال لهم مش يمكن اتفاوض معاه في يوم من الأيام !!.
.
كل عيش يا سلطان وحاول أن تحترف دور المنافق والأفعى والأرمله اللي جايه في أي مصلحه ومتسيبش وراك دليل !.
.
محمد حسين

سعد الشاعر

أنا عاذر الناس اللي شايفه إن دكتور عبد المنعم أبو الفتوح معارض شرس وقوي وإنه وطنيه قوميه محصلتش , مانا زمان والله كنت لما بسمع مصطفى بكري ورجب حميده وهما بيخطبو في البرلمان كانت عيني بتدمع من الفرحه واسمع السلام الوطني في ودني واسجد سجدة شكر الله وأقول أحمدك ياربنا إن مصر فيها معارضه شريفه بالشكل ده !!
أصل انا كمان واحد من الشعب الطيب ده ياخال, أه والنعمه , من نبت الأرض الخضره , وكان سعد الشاعر بيوصف خضره الشريفه (أم أبو زيد الهلالي) في شرايط الكاسيت بتاعته ويقول ( بين ال....وال....يبرك الجَمل ويفزْ ) !!.

.

محمد حسين

في قاع برطمان الطرشي

وإيه يعني المشكله ؟ , ماهو مرسي بيعمل إعلان دستوري كل يوم تلات , والزند بيعمل مؤتمر صحفي كل يوم اتينين , واحنا بنعمل مليونيه كل يوم جمعه , إيه المشكله بقى لما نعمل دستور كل يوم أربع ؟! , على الأقل الشعب ميزهقش ويسقّط مننا , وهو ده بقى اللي بيتسمى في علم النفس ( الإستقرار في قاع برطمان الطرشي !! ).

.

محمد حسين

ريحة الورد

جميله أوي الحكايه دي , بقى النائب العام قدم استقالته للمجلس الأعلى للقضاء بس اشترط إنهم يقبلوها يوم الحد ! , يعني مينفعش الخميس ؟ لأ يا سيدي مينفعش , هتكون طبخة الدستور لسه مخلصتش , أنا غلطان يا جدعان , إحنا مش بقينا عايشين في عذبه ولا طابونه , ومرسي مين اللي هنخطفه ؟ إذا كانو الإخوان خاطفين البلد كلها وحاطينها في شوال وقافلينه من فوق بحبل الشريعه الإسلاميه , إحنا عايشين في برميل طرشي معتق بقاله 84 سنه , محدش يكلمني بقى عن ريحة الورد عشان مبقيتش شامم حاجه.

.

محمد حسين

الفرختين

طبيعي جدا وكالعاده , إن المصريين في الخارج اللي صوتو بنعم للدستور هما المصريين في الدول المتقدمه الديموقراطيه الحره ذي السودان واليمن والبحرين والسعوديه وليبيا .....!! , وإن المصريين اللي صوتو ب لا هما اللي عايشين في الدول المتخلفه الديكتاتوريه ذي تركيا وفرنسا والنمسا واليونان وأمريكا واستراليا !!.
من سنين وانا شايف إن موضوع سفر المصريين للخارج ده قضية أمن قومي , وكنت أتمنى يتفتح باب لسفر الملايين

من المصريين إلى أوروبا واستراليا وأمريكا , منطقي جدا إن اللي بيعيش في دوله بيتأثر كتير بعاداتها وثقافتها , يعني لو حضرتك أرسلت دكتور يشتغل في أفغانستان 10 سنين , تأكد إنه وهو راجع من الغربه هينسى السماعه بتاعته والمشرط وجهاز الضغط وهيرجع بأربيجيه وسيف وخنجر !!
بصو كده للشعبين التونسي والمغربي , لمستوى ثقافتهم وتحضرهم لأن أغلبهم بيسافر لفرنسا وأسبانيا , عموما الإخوان عارفين الكلام ده كويس أوي وعشان كده في الفتره الجايه هيضيقو جدا على السفر لأوروبا وهيفتحوها عالبحري للسودان وليبيا ! , الإخوان عندهم فرختين بيبضو دهب في صندوق الإنتخابات , المصريين في الدول المتخلفه والمصريين في النجوع والقرى والعشوائيات وهيحرصو جدا على الفرختين !!
.
محمد حسين

الميكانيكي والحلاق

بعد استقالة زغلول البلشي المشرف على الإستفتاء وإعتذار نصف القضاه الذين أشرفو على المرحله الأولى , واستقاله النائب العام ومحاصرة المحكمه الدستوريه ,و بعد التزوير الفج اللي فضحنا في السي إن إن , ممكن تقولي حضرتك إحنا بنكمل إيه بالظبط ؟! , يعني حضرتك عربيتك سخنت في الطريق وجبت واحد قالك إنه ميكانيكي وهو أصلا حلاق , وبعدين لقيته بيفك الفانوس بتاع العربيه وانت واقف مستغرب وقلت مش مشكله هو أدرى , بعد شويه لقيته بيفك العجل وقلت مش مشكله هو أدري , بعد شويه لقيته بيدهن في الصاج وقلت مش مشكله هو أدري , بعد شويه لقيته بيلعب في الكلكس ( الزماره ) هتقول إيه ؟! ,يا سيدي الإخوان فاشلين فاشلون فاشلات فشلاء .......حضرتك العربيه سخنه والميكانيكي حلاق , يا رب تصدق.

.

محمد حسين

إيديوت

سوف يذكر التاريخ بكل حزن وأسى أن جماعة الإخوان المسلمين قامو بدور أغبى ديكتاتور في العالم وأقصرهم عمراً , بالمناسبه , في علم النفس , أقل درجه من الذكاء يحملها رجل أحمق ويطلق عليه ( إيديوت ) , وهذا الإيديوت لا يحتاج منك أن تقتله أو تخطفه أو تعتقله , هو غالبا يقتل نفسه بنفسه , فقط عليك أن تتركه , فهو يضع يده في النار ولا يشعر ويقفز في الماء ولا يشعر , ويعبر الطريق دون أن ينظر , ولا يعرف ما يسمى بال ( فيزيكال دانجيرز ) , .........يعني بالبلدي كده متخافوش مرسي لا هيتخطف ولا يحزنون , سيبوه إنتو بس وهو هيتصرف !!.
.
محمد حسين

ممنوعون

سأعودُ لحبكِ
كلَ مساءٍ أسألهُ
ماذنبُ الليلهِ نقتلها
كليالٍ ماتتْ
بالأمس ؟!
.
مابالُ عيونكِ
تضحكُ لي
ويداكِ ستحملُ لافتةً
(( ممنوعٌ أنتَ من اللمسِ )) !.

حكايه لذيذه

غريبه أوي الحكايه دي , حكايه لذيذه خالص , بتختصر الموقف لو عايز تفهم ولو مش عايز تفهم قول بقى جملتك الشهيره ( أنا مش إخوان على فكره ) واخلع من هنا .
صلو على اللي هيشفع فيكو , عليه الصلاة والسلام
بيقولك بقى يا سيدي في أحداث الإتحاديه , الأشاوس بتوع الإخوان بعد ما ضربو اللي رايح واللي جاي وحققو معاهم في الشارع سلموهم لرئاسة الجمهوريه , قام النائب العام الجديد بتاع مرسي انتدب اتنين وكلاء نيابه للتحق

يق في الواقعه ومع المتهمين , الإتنين وكلاء نيابه راحو عاينو المكان وخادو المتهمين من عند مرسي وحققو معاهم , واكتشفو ببساطه شديده إن دول المعتدى عليهم مش المعتدين , مش البلطجيه , ناس واقفه قدام وكيل النيابه بتنزف من كل مكان في جسمها ويبقى هما البلطجيه ! , والبلطجيه دول سيادتك عباره عن سفير وصيدلي ومهندس في شركة أورانج العالميه وراجل بواب على باب الله ( أنا فخور بالبلطجيه بتوعنا والله ) , المهم وكلاء النيابه قرروا إطلاق سراحهم لعدم وجود أدله ولأنهم معتدى عليهم مش معتدين , قام عمك الحاج النائب الخاص بتاع مرسي اتصل بيهم وامرهم إنهم يحبسو البلطجيه , كده بالعافيه يعني , قام وكلاء النيابه رفضو وأطلقو سراحهم , قام النائب الخاص بتاع مرسي قرر نقل وكيل النيابه المسئول للعمل في بني سويف ( يعني نفاه لجزيرة مالطه ! ) , قام الساده وكلاء النيابه في شرق القاهره علّقو العمل وطالبو النائب العام بالإستقاله ( والله رجاله ) , وامبارح في مداخله تليفونيه لقاضي قال فيها إن اللي عمله النائب الخاص بتاع مرسي يستحق السجن لأنه تدخل في احكام النيابه وتوسط لديها بحسب الماده 120 من قانون العقوبات , عموما الخروف الأعظم على الفور نشر للخرفان الصغيرين إن وكيل النيابه الممتنع ده كان شغال محامي لشفيق ! ومحدش بيقرا ولا يتنيل , دي التهمه الجاهزه لأي حد في القضاء والتهمه الجاهزه للثوار والمعارضين هي الخمره والنسوان , إوعو تتلخبطو بقى يا خرفان, ومتنسوش إن البرسم بيتاكل وماية الترعه بتتشرب , بالمناسبه وكيل النيابه مكانش محامي لشفيق إنما المؤكد والاكيد إن سليم العوا كان المستشار القانوني لحبيب العادلي.........................فرغة الحدوته , حلوه ولا ملتوته ؟!
.
محمد حسين

الإنقراض

كنت صغيراً جدا , أصغر مما ينبغي , حين أخبرني أحدهم أن التدبر والتأمل في خلق الله هو ركن مهم جدا من أركان الإيمان الحق , وأن التفكير هو أفضل طريقه لشكر الله على نعمة العقل , الأن أصبحتُ كبيرا جدا وأكثر شيباً مما ينبغي في مجتمع أصغر وأتفه مما يجب أن يكون عليه !.
وجب على أن أقول , أن الحضارات لا تقُاس بعدد السنين التي نحياها وإنما تقاس بعدد الساعات التي نفكر فيها , ولو كان الأمر بعدد السنين لأصبحت الديناصورات أكثر المخلوقات ثقافةً وتحضراً ولما انقرضت من على وجه البسيطه ,...................باختصار , عدد الذين يفكرون في مصر قليل جدا , وعدد ساعات التفكير محدود جدا, ولن تشفع لمصر سنوات العمر التي عاشتها , أخشى عليها من الإنقراض !!.
.
محمد حسين

غفرانك اللهم

في الصفحات الكبيره للإسلاميين , بيكتبو جمله شهيره في نهاية كل بوست ( لاتخرج قبل أن تقول سبحان الله ) , ولما شفت كام بوست من بتوعهم إكتشفت إن مش دي الجمله الأنسب والأوقع اللي المفروض تتكتب , المفروض يكتبو في نهاية كل بوست ( لا تخرج قبل أن تقول غفرانك اللهم !! ).

.

محمد حسين

شيوخ المساجد

الشيوخ والخطباء يصعدون للمنبر في خطبة الجمعه لا ليحثو الناس على التقوى والعمل الصالح ولكن لحثهم على التصويت بنعم للدستور !! , ليه بقى يا سيدي ؟ والله ماعرف !, طيب إيه الحلال أوي في نعم والحرام أوي في لا ؟! مش عارف سيادتك , على العموم بعد ما الإخوان يخلصو على الليبراليين والثوار هتبقى الخناقات في المساجد بين خطباء الإخوان وخطباء السلفيين , وهتشوف حضرتك في الجامع سنج ومطاوي وسيوف ويمكن مولوتوف , ساعتها مش هتقدر تقول ( إن المساجد لله ! ) وهتقول إن المساجد للي عنده سنج وسيوف وبلطجيه أكتر ! , اللهم عليك بكل من دنس مساجدك ومنابرك وتاجر بدينك اللهم أمين .

.

محمد حسين

حياه أو موت

عندي قناعه تامه إن الإستفتاء على الدستور الحالي هتكون نتيجته نعم , بالتزوير نعم , بالزوق بالعافيه نعم , طيب ليه كده ؟ الموضوع مالوش علاقه بتمرير الدستور المتخلف ده , الموضوع له علاقه بعقيدة الإخوان , هما بيعتبرو إن ملعبهم اللي بيكسبو فيه دايما هو الصندوق , كل ماتكلم حد منهم هيقولك ( دعنا نحتكم للصندوق , خلي الصندوق يقول رأيه ) , خروج الإستفتاء بنتيجة لا يعني إنكسار هيلمان الجماعه الوهمي , مش هيقدر

و يكملو خطتهم في أخونة الدوله , هتلاقي الناس بتقول لهم مجلس الشورى بياخد صلاحيات تشريعيه ليه ؟ وليه الإسلاميين فيه 90 % بأمارة إيه ؟ , هتقول لهم بتحكمو مصر لوحدكو إذاي وانتو أقليه ؟ , ليه مجلس حقوق الإنسان أغلبه إسلاميين ؟ ليه الدستور اللي جاي تكون لجنة صياغته أغلبها إسلاميين ؟, يعني باختصار هتنكسر عينهم , وعشان كده لازم حضرتك تعرف إن التزوير قادم لا محاله , أنا شخصيا صوتت بلا وعايز حضرتك إنت كمان متقاطعش الإستفتاء وصوت ب لا , كل المطلوب هو مراقبة عملية التزوير وفضحها , في كل الأحول الدستور ده مش هيعيش , أنا بتكلم عن ضمانه للإنتخابات البرلمانيه والرئاسيه بعد كده.

.

محمد حسين

صوره للذكرى

ميليشيات الإسلاميين بقو غاويين يتصورو في الشارع وهما شايلين السنج والسيوف والأسلحه ومواسير الحديد في إيديهم ومبتسمين للكاميرا ( صوره للذكرى ) ,كأنهم بيتصورو وفي إيديهم ورده ولا سبحه ولا سواك ! , وبيخبو الأسلحه في محلات التوحيد والنور ومحلات الحلويات المملوكه لقياداتهم ........................................زمان لما كنت بشوف أفلام عادل إمام اللي بيتكلم فيها عن الجماعات دي كنت بقول ( لأ لأ لأ..ده كده كتير...عادل إمام مزودها اوي.... ومتحامل على الناس دي ) ودلوأتي لو شفت الأفلام دي تاني وقابلت عادل إمام هنصحه يبطل تمثيل عشان مبيعرفش يمثل !!

.

محمد حسين

المناظره

بمجرد ما تشوف مناظره بين عمرو حمزاوي ويسري حماد على مواد الدستور هتتأكد من حاجه مهمه جدا , إنك لازم تروح للدكتور الكويس أوي لما تكون تعبان حتى لو كان الدكتور ده حشاش ! , وتختار المهندس العبقري عشان يبنيلك البيت حتى لو كان مبيصليش , وتجيب وزير تعليم يطور لك منظومه التعليم حتى لو كان خمورجي وبتاع نسوان ! , وعلى الساده الخطباء والمشايخ العوده إلى مساجدهم لهدايه الناس وعلى الساده التُربّيه العوده إلى القرافه وعلى الساده الدراويش العوده إلى حلقات الذكر! , كل الإحترام للجميع ولكن..........................إدي العيش لخبازه !.
محمد حسين

نعمٌ نعم

نعمٌ نعمْ
نعمٌ نعمْ
نحن الجواري والخدمْ
قلنا نعمْ
نعمٌ نعمْ
.
نحنُ الجرادٌ بلا وطنْ
نحمي رئيساً
من عدمْ
قلنا نعمْ

نعمٌ نعمْ
.
نحن العبيدُ سنحني
من أجل مولانا صنمْ
قلنا نعمْ
نعمٌ نعمْ
.
هيا اذهبو
ماذا سأشرحُ للغنم؟!
قولو نعمْ
نعمٌ نعمْ !
.
محمد حسين

الديكتاتوريه والفرق

فرق شاسع بين الديكتاتوريه في عهد مبارك والحزب الوطني والديكتاتوريه في عهد مرسي والإخوان , في الحاله الاولى أراد مبارك أن يكون ديكتاتورا فصنع لنفسه شعب من العبيد , وفي الحاله الثانيه أراد الشعب أن يكون مرسي ديكتاتورا فأصبح شعبا من العبيد !!.
.
محمد حسين

من دون تراخيص

فاتنةٌ أنتِ وأخشاكِ
عيناكِ مؤسسةٌ كبرى
تعملُ من دونِ تراخيصِ
لا تعرفُ دولةَ قانونِ
تحتكرُ السوقَ ولا ترمي
للغيرِ جمالاً يكفيهِ
تلعبُ بالسوقِ وما فيهِ
وأنا كالطفلِ فهل تقبلْ
عينكِ تشغيلَ الأطفالِ ؟!
.
محمد حسين

لاؤه نعم

متحاولش تقنع صديقك الإسلامي بإن الدستور فاشل , متتعبش نفسك , هو اتعود إنه يقول نعم لأي حاجه تخص الإخوان , لازم يقول نعم , حتما ولابد يقول نعم ,..........ولولا الشهاده لكانت لاؤهُ نعمُ !!.

.

محمد حسين

محاوله للإنتحار

المناقشات مع أنصار التيار الإسلامي هي محاوله للإنتحار , هي الخروج خارج حدود العقل والوصول لمدائن الأشباح , أغلبهم ضد الإبداع وعنده إفلاس فكري , وهو ده بقى الإفلاس الفكري اللي بيخليهم ( ييجو في الهايفه ويتصدرو ) , وفورا تتخيل إنك أمام المهدي المنتظر أو أحد القديسين الذين لا يأتيهم الباطل من بين يديهم ولا من خلفهم , يعني ناس بتبيع سبح وسجاجيد صلاه ! , أنا والله لا مثقف ولا عبقري ولا يحزنون إنما لا

زلت أحتفظ ببعض العقل للتمييز بين الإبداع والإسفاف.
مثال بسيط
...بيت شعري بيقول ( لولا الشهاده لكانت لاؤه نعم ُ ) الله على الإبداع , ....لولا و لو بتسمى أدوات إمتناع لإمتناع , وبيبقى القصد منها المبالغه والبلاغه ليس إلا....إنما إخوانا ليهم رأي تاني !!!!!.
.
مثال للتوضيح...أحمد شوقي في بيت شعر شهير ( وطني لو شُغلت بالخلد عنه ...نازعتني إليه في الخلد نفسي ) الله على الروعه والإبداع, لاحظ وجود لو , فين الحرمانيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
.
مش عارف هو المفروض أبدأ معاهم من أول زرع وحصد وعمو حسن زارع بصل ولا دول ناس متخرجين من الجامعه ؟!.............لو الناس دي بتمثل نص المجتمع فعلا يبقى ربنا يعوض علينا .

.

محمد حسين

هي الحكايه إيه ؟

هي الحكايه إيه ؟
طِلعتْ حقيقه بجدْ
وسط الفراعنه عبيد
عاشقين لبوس الإيد
والعِرْق خيط يتمد
.
يا شمس لا تشرقي
عاللي غوى العتمه
هيَ العقول ضلمه
بنيان بحيطه وسد !!.
.
صوتي أنا مفزوع
على ناس متسواشي
ذي الجبل مزروع
واقف ومش ماشي
بكره الجبل يتهد
.
إيدي بطول النيل 
وقصيره مش طايله
وتعبت م المواويل
وغلبت في محايله
ياهل الكنانه حرام
حطو لليلكم حد
.
دورت في الألابيم
مالقيت لكم صوره
عند البلاد في الغرب
عايقه ومنصوره
وتقولو شعب تاريخ
فين الحضاره بجد ؟  

.
.
محمد حسين

استفتاء باطل

استفتاء باطل ودستور باطل , أنا توقعت التزوير لكن مش بالشكل ده , الإخوان بيلعبو دور المزور الغبي الأهبل , ذي مدرس الإبتدائي الغلبان اللي فجأه ركب مرسيدس زيرو ! , يمكن لو كان ركب فيات قديمه كان هيبقى ليها منطق والناس تقول وفر من مرتبه وخاد سلفه وباع سيغة مراته , قوة الإسلاميين في الشارع لا تصل ل 30% , فبدأو يزورو بكل الطرق وبدأو من حيث انتهى نظام مبارك , الغريبه انهم كانو بيعانو من التزوير ده زمان ,

سبحان مغير الإخوان ! , عموما أصدقائي الأعزاء أرجوكو محدش يكلمني عن نتايج وانتخابات , حتى لو التصويت طلع ب لا فهو مزور , نسبة الرافضين أكبر بكتير من أي نسبه معلنه , مش مهم الدستور , في ستين داهيه الدستور , هنعمل غيره مش مشكله , إنما اللي يهمني انتخابات برلمان ورئاسه , هما دول الإخوان اللي هيشرفو على برلمان ورئاسه , التزوير ساعتها هيكون أضعاف مضاعفه , بالنسبه بقى للي كان بيقول انتخبه ونغيره بعد 4 سنين أحب أسأله ( إنت حاسس بإيه دلوأتي ؟َ ) واللي كان بيقول نحتكم للصندوق , إيه شعورك ؟ , أي قرار غير النزول للشارع بصوره سلميه وحشد كامل لإسقاط النظام هيبقى نوع من العبث والهطل , أي شعار غير ( يسقط حكم المرشد ) هيبقى نوع من الشذوذ العقلي , أنا أعتذر إني شاركت في المسرحيه بتاعة الإستفتاء دي.

.

محمد حسين

ميليشيات أبو اسماعيل

ميليشيات أبو اسماعيل بعد ما حرقت مقر حزب الوفد واتقبض على بعضهم وفتشو مقر حملة أبو اسماعيل دلوأتي هيحاصرو وزارة الداخليه وبيطالبو بإقالة الوزير ( وكأنهم بيلعبو دور المعارضه ! ) وبعد شويه هيرجعو عند مدينة الإنتاج الإعلامي يكملو حصارها عشان العجل مستني هناك على نار ! , وفريق منهم هيروح يحاصر المحكمه الدستوريه وفريق ينزل يقفّل كباريه الهرم وفريق يقفّل حفلة إليسا !! , وهي دي بقى اللي بيسموها الدوله العميقه ! بمعنى إنك لازم تشمّر بنطلونك وانت داخلها , يا سلام عليكو يا فراعنه , كنت زمان لما بسمع في صوت العرب أخبار بتتكرر عن اشتباكات بين أنصار سمير جعجع وأنصار الميشيل عون في لبنان كنت بحس إن لبنان دي في كوكب تاني ( كوكب القرود ), أتاريها لازقه فينا والباب في الباب !!.

.

محمد حسين

إحترسي

إحترسي
منطقةٌ خطرهْ
ممنوعٌ جداً أن تقفي
كظلالٍ بين الأجفانِ
هذا عنواني أكتبهُ
للنومِ
فيجهلُ عنواني !.
.
محمد حسين

ليه لأ

( أنيس منصور , أحمد زويل , فاروق الباز , محمد حسنين هيكل , طه حسين , العقاد , جلال عامر , فاروق جويده , السنهوري , فاتن حمامه , أم كلثوم , الأبنودي , أحمد فؤاد نجم , أحمد مختار , يوسف شاهين , حافظ إبراهيم , مصطفى مشرفه , الشعراوي , مصطفى محمود ...........الخ ) , أظن الأسماء دي بيمثلو أكبر مبدعين في مصر في القرن ال 20 ( كلا في مجاله ) , بيمثلو الكريمه المثقفه والمبدعه والموهوبه , سؤال لحضراتكو , مين في الأسماء دول صوّت أو كان هيصوت لو عايش للإخوان ولمشروع الدستور بنعم ؟! , وليه الإجابه كلها هتكون ( لا أحد )..................دعوه للتأمل.

.

محمدحسين

حدود البجاحه

الخبر بتاع إن جبهة الإنقاذ خططت لخطف مرسي بعد ما تشربه حاجه صفرا هيطلع فطشه في الأخر كالعاده , الخبر المتفبرك ده قاله واحد مغمور من الإخوان عشان يأثر على أصوات اللي محددوش هيصوتو بنعم ولا لا , وبعد الإستفتاء هيطلع قيادي إخواني يقول إن الخبر مش صحيح وإن عضو الإخوان فهم الموضوع غلط , السؤال لأصدقائي الإخوان لو فيكو حد منصف وعاقل يقولي , بعد حملات التكفير , وبعد التحوين وبعد تلقي أموال من الخارج وبعد التخطيط لخطف رئيس الدوله وكلها كذب في كذب , سؤالي الصريح : إيه أخر حدود الفُجر عند قياداتكو ؟! , ولو الحكايه خصومه سياسيه هسألكو , انتو مش وصل لكو حديث رسول الله ( وإذا خاصم فجر !! ) , حسبنا الله ونعم الوكيل.

.

محمد حسين

أنا بهرب

أنا بهرب ساعات ليكي
عشان خايف
بخاف منك على روحك
وانا في الضلمه
مش شايف
وهتضمي الغريب تاني
وتنسيني
مانا عارفك
أنا عارف !!.
.
محمد حسين

إليسا

اللي عايز هيفاء وهبي تحبه يعمل علاقه مع إليسا , واللي عايز مرسي يسيب الحكم حالا يخطف خيرت الشاطر و يعمل علاقه مع إليسا أو يخطف إليسا ويعمل علاقه مع عصام العريان!! ههههههههههههههههههههههههههه يا نفوخ أمي ياني.

.

محمد حسين

عم مغاوري

يا سبحان الله , أنا من الأول شاكك في الراجل اللي اسمه البرادعي ده , عاملي فيها طيب وسُهنّ وبيتأتأ ويتلجلج , ويقول الحريه يا ريم , الديموقراطيه يا وائل , العدل يا محمود , الحمّام يا منى! , واهو في الأخر طلع هو عم مغاوري الجنايني رئيس العصابه اللي بتسرق العيال الصغيرين !!.

.

محمد حسين

هيخطفو مرسي

قال بيقولك , البرادعي وصباحي وعمرو موسى واحمد شفيق ومحمد دحلان وضاحي خلفان وابراهيم بتنجان والمخلوقات الفضائيه وعصابة الورده القرمزيه واللهو الخفي كانو بيخططو لخطف مرسي !! ليه ياعم هما هيخطفو صوفيا لورين الله يرحمها ؟!, ده حيالله مرسي , مرسي اللي بيستخدم المنديل لبؤه ومناخيره في نفس اللحظه , مرسي اللي بيبل صباعه بلسانه عشان يقلب الورقه , مرسي اللي باقيله خطبتين في الأمم المتحده ويتنخم ويتف عالأرض وهو بيخطب !!

.

محمد حسين

العالم المتحضر

في كل دول العالم المتحضره , الأجهزه الأمنيه عباره عن جيش وشرطه .......وفي مصر جيش وشرطه وميليشيات وولاد أبو اسماعين !!.
.
في كل دول العالم المتحضره , المعارضه إما على صواب أو على خطأ ............وفي مصر المعارضه على صواب أو على خطأ أو كافره !!.
.
في كل دول العالم المتحضره يتم التحقيق مع الخائن الذي يتلقى تمويل أجنبي بتهمة الخيانه العظمي ويُسجن , وبعد ذلك ينكشف أمره للعامه.... وفي مصر ينفضح وتشوه س

معته وينسى الحاكم أن يحقق معه ويسجنه !!.
.
في كل دول العالم المتحضره يتظاهر المعترض ويعتصم أمام قصر الرئاسه ومبنى المحافظه لأنها جهات تنفيذيه ذات خصومه مع المعترض....وفي مصر يتظاهر المؤيد أمام القضاء ( جهه مستقله وليست جهه تنفيذيه ) وأمام القنوات الإعلاميه ( قطاع خاص مستقل ) !!.
.
في كل دول العالم المتحضره هناك شعوب تبحث عن الحريه ...وفي مصر هناك حريه تبحث عن الشعب ولم ولن تجده !!.
.
محمد حسين

من أول الغنوه

أنا من أوّل الغنوه
وقلت خلاص
مفيش داعي أغنيها
لا فيه سمّيعه
ذي زمان
ولا ألحان تكفيها
.
هغني لمين
وانا شايفك
صنم مسكين
مابين تكفير
وبين تخوين
مقضيها
.
وكام الساعه يا مصري
وسنَتَك كام ؟
وساعتك كام ؟
إذا تايه ومش عارف
ما ترميها
.
وهتخلي
اللي شايل سيف
وكان قاتل بيحكمنا
ويقتلنا بدون لزمه
عشان ما بلدنا في العتمه
ينجّيها ؟!
ومين قالك
عذاب الناس بيرحمها
وقتل الناس بيحييها ؟!
.
ويا مصري
تلات علامات على جبينك
وانا عارفك
وشايفينك وحافظينك
تلات خطوات نخطيها
.
هنتكفر
وتقتلنا
وهتروح البلد فيها !!.
.
محمد حسين

بالروح والدم

الإخوان بقياداتهم وشبابهم يخرجون عن صمتهم ويقولون سنفدي مرسي بالدم !! , يارب سلم , يا خرفان ليس في الديموقراطيه شعار ( نفديك بالدم ) , هذا هو شعار الفاشيين والديكتاتوريين , إذا حكم البرادعي في يوم من الأيام وخرجتم عليه فلن أفديه بدمي ولا بصباع رجلي الصغير , فليرحل البرادعي وليأتي من يأتي وليذهب البرادعي وحزبه إلى الجحيم وتبقى حرمة الدم لا تعادلها أي حرمه , لعنة الله على مشايخكم الشواذ عقليا الذين صورو لكم الأمر أنه جهاد في سبيل الله ضد الكفار ! , لعنة الله على كل من كفّر وكل من أحل دم مصري من أجل الحفاظ على السلطه أو الوصول إليها , لعنة الله على كل من لغى عقله وأصبح يتحرك كالثور الهائج مربوط العينين الذي يعتقد أن شرع الله يمكن أن تقيمه على بركه من دماء المسلمين !!.

.

محمد حسين

يا هوووه

يا ناس يا هووووووووووووه
.
ولاد الحرام اللي اخترعو الديموقراطيه قالو من حق المعارض يعارض ولو متمتش الإستجابه لمطالبه يتظاهر ولو متمتش الإستجابه يعتصم ولو متمتش الإستجابه يرفع شعار إسقاط النظام حتى لو نظام منتخب من ساعتين , يا ريتكو تشوفو المظاهرات في الدول الاوروبيه اللي كل قياداتها منتخبه ديموقراطيا من أجل فقط رفع أسعار البنزين أو خطه تقشف لحكومه .
يا ناس يا هوووووووه , مش من حق الأنصار أصلا ينزل

و الميادين حتى ولو بمظاهرات سلميه ولو نزلو وده مش من حقهم فممنوع عليهم الإشتباك مع المعارضين , دي مهمة الدوله بكل أجهزتها ’ هي تتصرف بقى , بالحوار ماشي بتنازلات ماشي بوعود ماشي باعتقالات ماشي بعفريت أزرق ماشي , لكن مش من حقك إنت تنزل , ومش من حقك تعتصم قدام محكمه ولا قدام قنوات إعلاميه , والله مش من حقك , دي مش جهات تنفيذيه ممكن تمارس ضدها حقك في الديموقراطيه , الجهات التنفيذيه هي الرئيس ورئيس الوزراء والوزراء والمحافظين ورؤساء المدن وحتى العمده وشيخ الغفر , اسمهم المسئولين, أما القضاء فهو جهه مستقله حره مش جهه تنفيذيه والإعلام جهه مستقله حره مش جهه تنفيذيه , الله يخرب بيت أبو اللي فهمكو يعني إيه ديموقراطيه !!

.

محمد حسين

الخلطه

ما تحددو موقفكو يا إسلاميين عشان نعرف نتفاهم
.
حضراتكو لو عايزيتها ديموقراطيه , فلازم تعرفو إن الرئيس المنتخب ديموقراطيا محمد مرسي أقسم اليمين الدستوري في أول تعيينه وأقسم على احترام الدستور والقانون , ولما عمل الإعلان الدستوري فده اسمه حنث بالمين الدستوريه ويستوجب عزله وماحكمته ورميتين حرتين واستحواذ !!.
.
ولو عايزينها دلوة الخلافه اللي فيها الخليفه بيحكم بدون معارضه واللي فيها تحريم الخروج عالح

اكم فاحنا متفقناش على كده والله , والناس اللي صوتت لمرسي مكانش مكتوب في ورقة التصويت انتخبوه خليفه للمسلمين مدى الحياه ولا تعارضوه !!.
.
أنا عارفكو وحافظكو وعارف انتو عايزين ايه ؟ , انتو عايزينها خلطه من الإتنين , توصلو للحكم بالإنتخابات والحزب السياسي وتفضلو في الحكم بالجماعه الدينيه وتحريم الخروج عالحاكم.....بس احنا مش موافقين ولا مؤاخذه وليكن مايكون يعني !!

.

محمد حسين

التهليس

ناس متعلمين ومتخرجين من الجامعه وبيقولو إن الناس معتصمين قدام قصر الإتحاديه عشان معاهم خمره ونسوان وتوبس !! , بس ده قذف محصنات ومحصنين يا مولانا ! , عموما نداء لكل أصدقائي الثوار الصيع ولاد الحرام , يا صديقي الثائر الصايع والنبي ياشيخ لو معاك موزه جامده وإزازة خمره مشبره فمفيش داعي تروح قدام الكاميرات والحرس الجمهوري وقصر الرئاسه وتعمل كده بدل ما الإخوان يقتلوك بعد ما يمسكوك متلبس بعلبة الجبنه الن

ستو , عموما مشاركه مني في ثورتكو بتاعة النسوان والخمره فانا أدعو كل ثاير صايع عايز يهلس إنه يتصل بي وانا عندي شقتين في القاهره , واحده متشطبه والتانيه لأ , عموما مش هتفرق معاكو متشطبه ولا لأ , اللي عايز بس يكلمني وانا أقول له ياخد المفتاح منين , ومتبقوش تنسوني بقى من الحاجات دي لما أنزل مصر بإذن الله , روح يابني ربنا يوفقك !!

.

محمد حسين

كابلات

كان فيه مره 3 أنفار بيركبو كابلات تليفون, واحد بيحفر وواحد بيركب الكابلات والتالت بيردم . وفي يوم من ذات الأيام الراجل اللي بيركب الكابلات غاب , قام الإتنين التانيين قالو واحنا يعني هنقعد كده ؟ قامو واشتغلو , واحد يحفر وواحد يردم ,واحد يحفر وواحد يردم عشان اليوميه بتاعتهم متضعش بس!!.................... هو ده بالظبط اجتماع مرسي النهارده , حضر اللي بيحفر واللي بيردم أما اللي بيركب كابلات محضرش ! , وأكيد انتو قاعدين دلوأتي مستنيين الكابلات تشتغل والحراره تيجي في التليفون ! , ناس طيبين أوي يا خال

.

محمد حسين

خافو عليه من الندى

لا تقربي
شفتى سُدى
.
فالأمر يبدو للجميعِ
محرماً ومحصناً
ومعقدا
.
أحتاج صكاً بأساً
من قبلِ
أن تأتي غدا

.
يا لهفتي
لن أقتربْ
وضعو لزهركِ
شاخصاً
خافو عليه
من الندى !!
.
محمد حسين

عم بخ

الإعلان الدستوري بتاع يوم الجمعه لغى الإعلان الدستوري بتاع يوم التلات , بس بتاع يوم الجمعه حصن نفسه من الطعون والطاعون والكوليرا والقضاء والقدر , بديع بيتكلم ويحكم والشاطر بيتكلم ويحكم ومرسي قاعد في كنبة الأنتيريه ولسان حاله بيقول ( ماشي يا عم بخ ...هي بقت كده يعني...إنت جايبني هنا أنظم المرور ؟!! ).

.

محمد حسين

عشان متنضربش على قفاك

عشان مش يضحكو عليك ( عشان متنضريش على قفاك !).
.
حكاية تعديل مواد الدستور بعد إقراره هي نُص المعلومه فقط , عادة الإخوان ولا هيشتروها , حضرتك تعديل أي ماده من الدستور يستوجب إنك تستنى للبرلمان الجاي ودي سهله , وتقترح التعديل ب موافقة 20% من أعضاء البرلمان ودي سهله , أما إقرار التعديل فيتطلب موافقة 67% من أعضاء البرلمان ودي مستحيل !! ليه بقى يا سيد الناس ؟ , عشان لو سألت عيل صغير في مصر حاليا مين ياد ممكن ياخد تلتين مقاعد البرلمان في أي برلمان قادم هيقولك مفيش , محدش , مستحيل , لا الإسلاميين هياخدوها ولا الليراليين هياخدوها , يعني إيه يا مولانا الكلام ده ؟ يعني حضرتك تاخدالدستور بالهنا والشفا كحقنة طويلة المفعول مدتها 100 سنه ولا نزول أثارها بإزالة السرنجه من خلفيتك العسكريه على فكره !!.
.
محمد حسين

ليس بعد الكفر ذنب

في دين الله وشريعته ليس بعد الكفر ذنب , فلا يعنيني أنك تحسن إلى الفقراء وتصل رحمك إن كنت قد كفرت مسبقا , وفي حكم الأوطان ليس بعد القتل والكذب والتدليس وسرقة الشهداء والحنث باليمين ذنب !! , تحقيقات النيابه ذكرت أن عدد القتلى 6 منهم واحد من الإخوان ! وشهادة الشهود اكدت أن الإخوان طلبو منهم أن يقولو أن شهيدهم إخوان , محمد بديع في الأزهر شيع جثتين منهم واحد لسه عايش ومش إخوان , ماذا أنتظر منكم ؟ صفقه

على دماء الشهداء مع العسكر , تجاره بدين الله , تجاره بجثث الشهداء , كذب وتلفيق تهم , تركيب صور وفبركتها , أرسال ميليشيات إلى المعتصمين والإعتداء عليهم , محاصرة القضاء والإعلام ,.....ماذا أنتظر منكم ؟ هل هناك مكفرات للديموقراطيه أكثر مما سبق ؟ عن أي صندوق تتحدثون ؟ يا ساده صناديق الشهداء أكثر قدسيه من صناديق الإنتخابات , ليس فيكم خير ولو كان فيكم لاتبعتكم....محمد مرسي أنت لست رئيسي.

.

محمد حسين

الحمامه

إمبارح وانا قاعد في الصيدليه , لمحت بعيني حمامه شكلها جميل أوي ماشيه على السلم وباينه من ورا الإزاز , بعد شويه لاحظت إن الحمامه مش بتطير لو حد قرب منها واتأكدت إنها مش قادره تطير فعلا , المهم خادتها معايا عشان محدش يئذيها ودخلتها المعمل وجبت لها مايه تشرب , وسيبتها في المعمل , ودلوأتي انا محتار بجد , أطلعها الشارع تاني وهي بحالتها دي , ممكن عربيه تدوس عليها لا قدر الله ولا أحبسها في المعمل , مانا كده كاتم حريتها ؟ , مش مشكله هلاقي حل بإذن الله , المهم نرجع لموضوعنا , كنا بنقول إيه ؟ أه...افتكرت كنا بنقول البرادعي عنده ميليشيات مسلحه !!.

.

محمد حسين

الإعلان الدستوري

في مشهد الإعلان الدستوري الجديد ( بتاع يوم الجمعه مش التلات) كان فيه 5 واقفين في كادر الكاميرا....يا ريت تشوفو المشهد تاني هتلاحظو حاجه غريبه جدا , إن ال5 اللي واقفين مجموع أعمارهم 442 سنه !! جايين يحلو مشاكل ثورة الشباب !!.

.

محمد حسين

وليه يا مصري

و ليه يامصري ترميني
في بير وانا اخوك ؟
وليه ياورد تئذيني
بأصعب شوك ؟!
دي ثورة جيل
بنقتلها ونحييها
ونقتلها ونحييها
لا انا عارف أقول ماتت
وأنعيها
ولا قادر أقول مبروك !!

.
.
زرعت الغل يا شيخنا
بإسم الدين
دعيت للقتل يا شيخنا
لناس سالمين
هنحصد دم يا فاسد
ومش خايف
تكون واحد من الحاصدين ؟!
.
محمد حسين

دولاب الخزين

مصر بقت عامله ذي دولاب الخزين , تحط فيها أي حاجه تشيل وتستوعب ومتقولش لأ , لكن لما تحاول تطلّع منها حاجه هتطلع عينيك , ولو فكرت للحظه واحده إنك تحرك الدولاب ده خطوه لقدام ..............ابقى قابلني !!.

.

محمد حسين

من أول السطر

تعالو نبدأ من أول السطر
.
واحد بيقول ليلى علوي مش بتخرج حامل من الميدان بس ...لا دي بتخرج حامل من كل مكان تروحه !! طيب ده إسلامي لو حبينا نعلمه أبجديات الإسلام نبدأ منين ؟!.
.
واحد بيقول هنجاهد في سبيل الله ضد المعتصمين قدام الإتحاديه ! ده إسلامي وإنسان لو حبينا نعلمه يعني ايه كلمة إنسان نبدأ منين ؟!..............فقدت الأمل فيكي يا مصر .

.

محمد حسين

الحكومه أم أحمد

مرسي بيعامل الحكومه على إنها ( أم أحمد ) , وبيحاول يربي عياله بالطريقه التقليديه العقيمه إياها , يرسم الخطه مع أم أحمد بالليل , وتاني يوم أم أحمد تشد عالعيال ( تعلن فرض ضرايب ) , العيال يهيجو ويعيطو ويضربو رجليهم في الأرض , وفجأه يرجع الأب ( مرسي ) من الشغل يقول لهم مالكو يا عيال , يقولو له ماما فرضت علينا ضرايب يا بابي ! , يقوم مرسي يقول لهم ولا يهمكو , أعلن أنا أبو أحمد إلغاء قرار ماما بفرض الضرايب , وهنا يطلع العيال جري ويتشعلقو في رقبة أبو أحمد هذا الأب الطيب الحنين الحنون المتحني ويبوسوه من خده ومن راسه ومن بؤه , وبكده يتحقق له المراد من رب العباد وتزيد شعبية أبو أحمد عند عياله اللي برياله ويا سيدي إن كان على أم أحمد فمفيش حد بيزعل من أمه أبدا مهما كان ولو العيال زعلو أوي يطلقها ويجيب لهم أم جديده.

.

محمد حسين

نطاهر الشعب

لما تشوف فيديوهات الإتحاديه بتاعة يوم الأربع , هتلاقي ميليشيات الإخوان بتعتقل واحد من الثوار أو الناس الماشيين في الشارع وتضربه وتعذبه ( دور الشرطه الفاسده ) , وبعد ما تلاقيه بينزف ويادوب قادر يتنفس تستجوبه , مين اللي بعتك ياد إنطق , خدت كام ياد ؟, وتهدده ( دور النيابه الفاسده ) , ولما متطلعش منه بحاجه تحكم عليه إنه فلول وبلطجي ( دور القاضي الفاسد ) , يعني الحمد لله , احنا كده لا محتاجين تطهير للقضاء ولا للشرطه ولا للنيابه , الإخوان جابو من الأخر ونزلو ميليشياتهم يعملو الأدوار التلاته في الشارع عشان يبدأو على نضافه ( قصدي على وساخه ) , شعار الإخوان في الحكم (مش مهم نطهر حاجه طالما بنعرف نطاهر الشعب !!).

.

محمد حسين

ملايكه

إوعى حد يضحك عليك ويقولك الإخوان عندهم ميليشيات مسلحه بتنزل الشارع وقت اللزوم , إوعى حد يضحك عليك ويقولك الإخوان عندهم لجان إلكترونيه بتشتغل وقت اللزوم , إوعي حد يضحك عليك ويقولك الإخوان مش هيسلمو السلطه ولا بعد 100 سنه ولا بانتخابات ولا بالطبل البلدي , إوعى حد يضحك عليك ويقولك الإخوان معندهمش مشروع ولا يحزنون , إوعى حد يضحك عليك ويفهمك إن الإخوان مش بيقبلو بوجود معارضه ورأي أخر لحكمهم , إوعى حد ي

ضحك عليك ويفهمك إن مصر رايحه على إيران دوغري ,.....الإخوان دول ملايكه ملايكه ملايكه , أنا لما ببقى قاعد بتفرج على التليفزيون أنا وبنتي لو لقيت خيرت الشاطر (الراجل السمح أبو وش طفولي ده ) هيخطب بحوّل القناه على طول , مش عشان حاجه , أنا بخاف بس من كتر التقوى والصدق اللي عنده يطلع له جناحين ويطير قدام الكاميرات وبنتي تتخض !!.

.

محمد حسين

سليم العوا

يا نهار أبيض , بيقولو سليم العوا شارك في كتابة دستور السودان , وأكيد قال لهم ( من أجل الإستقرار ) , وإن حسن الترابي عنده معلومات خطيره هيقولها بالليل , عشان كده السودان اتقسم ( بيطبق الشريعه الإسلاميه ) , المهم يعني إن العوا كتب دستور السودان مش تركيا ولا النمسا...أنا كده اتطمنت على مصر , أصلي كنت بدأت أتوغوش !!

.

محمد حسين

الدستور الملاكي

لماذا أقاطع هذا الدستور الملّاكي؟
.
1- طريقة اختيار الأعضاء لكتابة الدستور لا تليق بمصر ومنهم من بالكاد يجيد الكتابه وأغلبهم لا يعرف الفرق بين الدستور وكتب عذاب القبر ونعيمه التي تباع على الأرصفه !.
.
2- مواد الدستور المختلف عليها وضعها الإخوان لتأسيس دولة استبداديه وكأنهم ينوون البقاء في السلطه مدى الحياه.
.
3- لا يوجد في اعتراضنا أي ماده لها علاقه بالشريعه ولكنهم سيصورون الامر هكذا لأنصارهم , فك

لمة الشريعه هي الفرخه التي تبيض لهم دائما البيضه الذهبيه .
.
4- سوف يتم تزوير الإستفتاء , وبالمناسبه الإخوان زورو كل الإنتخابات منذ بداية الثوره , هتسألني إذاي ؟ مش هجاوبك عشان لساني اتدلدل في شرح الموضوع ده بقالي سنتين .
.
5- وفي النهايه الدستور القادم سوف يكون مثل الطفل الذي ولد بمرض لا شفاء منه ( دستور ابن موت ) وسوف يسقط عاجلا أو أجلا لأنه لا يعبر إلا عن كاتبيه.
.
محمد حسين

أنا صح

في جولة الإعاده , أيام معصرة اللمون , قالو لي مرسي أحسن من شفيق شويه , قلت لهم الإتنين أوسخ من بعض , قالولي طيب انتخبه عشان تعرف تعارضه , قلت لهم لو نجح مرسي محدش هيعرف يعارضه ,ممكن نعارض شفيق مرسي لأ , قالولي انتخبه ولو معجيكش غيره بعد 4 سنين , قلت لهم الإخوان لو وصلو للسلطه مش هيسيبوها ولا بعد 40 سنه, لا بصندوق الأنتخابات ولا بالطبل البلدي !! , أنا صح , وعلى رأي أحمد حلمي i am right , الميزه الوحيده في وجود الإسلاميين في مصر بالنسبه لي إنهم بيأكدولي باستمرار إن عقلي حلو ولازم أحمد ربنا على نعمة العقل , اللهم لك الحمد .

.

محمد حسين

وعاشق غلب

مانا عاشق مريض بيكي
لا بتعالج
ولا عارف أبطّل أحبْ
.
واشوف السكه ألف طريق
و ليه أعمى
وبختار الطريق الصعبْ ؟!.
.
حكايتك إيه يا محبوبه ؟
تعبتيني

وجعتيني
.
ساعات بحلف
وبتشطّر
واقول توبه ولا بقدر
أنا مغلوب
وعاشق غُلبْ !.
.
محمد حسين

سلام سلاح

اللواء محمد العصار ( الإسم ده مش غريب علىّ !! ) نائب وزير الدفاع بيدعو المؤيدين والمعارضين للحوار بكره في دار الدفاع الجوي , وبيقول الناس هتيجي تاكل وتشرب وتتكلم مع بعض ( هما حبو بعض ! ) , عموما الدعوه دي هي تفريغ لمظاهرات الثوار من مضمونها , ذي ما بتعمل مظاهرات الإسلاميين بالظبط , وانا كنت لحد امبارح حاطط أمل عالجيش إنه يثور من أجل مدنية الدوله اللي هتضيع فطيس لكن يبدو إني عبيط وإن جنرالات الجيش لا يعنيهم إلا إتمام الصفقه بحماية النظام السابق , وسلام سلاح لمدنية الدوله اللي قريب جدا هنلفها في علم مصر ونعمل لها جنازه عسكريه ونضرب لها 12 طلقه في الهوا !! .

.

محمد حسين

الزبون الألماني !!

امبارح دخل لي زبون ( ألماني طبعا ) وسمع صوت التليفزيون شغال , سألني مين اللي بيتكلم ؟ قلت له محمود سعد , ضحك ضحكة المثقف العليم ببواطن الأمور وقالي أه بتاع توفيق عكاشه ! , والنهارده دخل لي زبون ألماني برضه وسألني هو البرادعي لسه له عين يتكلم ؟! , عموما ....إجماع الشعب ( الألماني) الحر الديموقراطي! على حب الإخوان والنظام وكراهية الثوره والبرادعي وصباحي ده أكبر دليل على إن الثوار صح !!.

.

محمد حسين

أعترض على كونك أنثى

أعترضُ
على كونكِ أنثى
أعترضُ
على وصفكِ أنثى

هذا التوصيفُ بلا معنى

هذا التعريف بلا مأوى
لا أعرفُ أنثى تتلحّنْ
تُقرأُ من نوتةِ ألحانِ
.
أحتاجُ لوصفكِ سيدتي
سيلاً من عودٍ وكمانِ
أحتاج لوصفكِ فناناً

مجنوناً ليسَ كفناني
.
أعتذر كثيراً لا أقدرْ
أنْ أعرفَ وصفكِ سيدتي
أسف جداً !.
.
محمد حسين

لا للدستور

في مهزلة الإستفتاء على الدستور , رفض 90 % من القضاه الإشراف , فقالو مش مشكله هنكمل بالنيابه الإداريه ولو مش مكفيه هنكمل بمجلس الدوله ولو مكفاش هنكمل بأمناء شرطه ولا رابطة الحلاقين !.
في مهزلة الإستفتاء , كل الإسلاميين هيقولو نعم مع اختلاف دقونهم وتوجهاتهم , مع إن الدستور مش إسلامي ولاهو دستور عامل عُمره ومغسل وضامن جنه , إنما نكاية في الكفار اللي هما احنا !.
في مهزلة الإستفتاء على الدستور هيتم الت

زوير ( طباعة بطاقات تصويت جاهزه , عمل بطاقات لمجهولي الهويه , حشد الناس بالزيت والسكر والجوامع ) !.
في مهزلة الإستفتاء على الدستور , نعم مش هتدخلنا الجنه ولا النار إنما المؤكد الأكيد إنها هتدخلنا على إيران وهناك مش هتقابل ملايكه وحور عين , هتقابل مُلل وسيوف وكرابيج !.
في مهزلة الإستفتاء هيستعين الإخوان بكوادر التزوير بتاعة الحزب الوطني , عندهم تراكم خبرات في تزوير استمر 50 سنه , ومش هيغلبو , وعلى رأي عم جلال هتلاقي نتيجة الإستفتاء في الأخر ( البعض قال نعم والباقي قال نعمين !! ).
.
لا للدستور......يسقط يسقط حكم المرشد.

.

محمد حسين

إقبلها هكذا

الإخوان يعرفون جيدا أن معركتهم الحقيقيه مع الليبراليين والثوار , لذلك استعانو بكل فصائل الإسلاميين رغم الإختلاف الكبير بينهم واستعانو بالجيش والشرطه ( تكريم وزيادة مرتبات وترقيات ومنح اوسمه ) , وعندما ينتهي الإخوان من معركتهم معنا سوف يتفرغون للإسلاميين (السلفيين..الجهاديين ...الجماعات الإسلاميه ) ثم ينتقلون إلى أخونة الجيش والشرطه , هذه هي دولة الإخوان القادمه , اقبلها هكذا أو ارفضها برمتها , الأيام بيننا .

.

محمد حسين

العميل الفاشل

ياسر علي هو المتحدث الرسمي باسم مرسي ومرسي هو المتحدث الرسمي باسم مكتب الإرشاد ومكتب الإرشاد هو المتحدث الرسمي باسم قطر والشيخه موزه وقطر هي المتحدث الرسمي باسم أمريكا , يبقى نفهم من كده إن البرادعي عميل , وهو العميل الوحيد اللي زرعته أمريكا في دوله هايفه عبيطه ذي مصر ومقدرتش تمسكه أي منصب أو تديله حته أد كده من التورته !! أنا أطالب بتغيير رئيس ال سي أي إيه وال إف بي أي والموساد !

.

محمد حسين

للأسف

البشر أصحاب القلوب المريضه والعقول التي تجاوزت حد الغباء , أرجوكم تابعو ما يفعله النائب العام الجديد في تحقيقاته , وما يفعله مع وكلاء النيابه ؟! , لم أكن مخطئا أيضا حين قلت أن مرسي عندما أقال عبد المجيد محمود وعين غيره فقد استبدل النائب الخاص لمبارك بنائب خاص له هو , وكل ديكتاتور فاسد يحضر كلابه معه , للأسف لم يمت الشباب من أجل هذا اليوم........يسقط يسقط حكم المرشد.

.

محمد حسين

العنصريه

كنت أتمنى أن أجد في هذا الدستور الأحمق ماده تحرّم وتجرّم العنصريه , وتضع حداً وعقوبه واضحه رادعه للذين يكفرون الناس أو يسخرون من دينهم أو عرقهم أو لون بشرتهم , للأسف الشديد فهذا الدستور لن يمنع وجدي غنيم مثلا من أن يقول للمسيحيين ( يا شراميط يا أنجاس ) ولن يمنعه من أن يقول لليبراليين ( يا كفار ) , في أمريكا إذا دخلت لمقابلة صاحب عمل من اجل وظيفه خاليه وسألك عن ديانتك أو جنسيتك فمن حقك أن تسجنه !.............................عن أي دوله وأي دستور تتحدثون ؟!.
.
محمد حسين

أختبر جروحي

إقبالكِ جرحٌ لا أكثرْ
و بعادكِ جرحٌ لا أكثرْ
عذراً سيدتي
لا أعرفْ
لا أعرفُ أيهما أكبرْ ؟
فدعيني أختبرُ جروحي !.
.
محمد حسين

موتة خدامك ْ

في الحربِ
سأبتسمُ طويلاً
وسأنزعُ طوعاً
أسلحتي
لو كنتُ سأعرفُ
ياعمري
أني مقتولٌ بسهامكْ
.
خادمكِ الطائعُ
لن يهربْ

أبداً أبداً
ما أجملَ موتة خدامكْ !.
.
محمد حسين

حكاية النائب الخاص الجديد

غريبه أوي الحكايه دي , حكايه لذيذه خالص , بتختصر الموقف لو عايز تفهم ولو مش عايز تفهم قول بقى جملتك الشهيره ( أنا مش إخوان على فكره ) واخلع من هنا .
صلو على اللي هيشفع فيكو , عليه الصلاة والسلام
بيقولك بقى يا سيدي في أحداث الإتحاديه , الأشاوس بتوع الإخوان بعد ما ضربو اللي رايح واللي جاي وحققو معاهم في الشارع سلموهم لرئاسة الجمهوريه , قام النائب العام الجديد بتاع مرسي انتدب اتنين وكلاء نيابه للتحق

يق في الواقعه ومع المتهمين , الإتنين وكلاء نيابه راحو عاينو المكان وخادو المتهمين من عند مرسي وحققو معاهم , واكتشفو ببساطه شديده إن دول المعتدى عليهم مش المعتدين , مش البلطجيه , ناس واقفه قدام وكيل النيابه بتنزف من كل مكان في جسمها ويبقى هما البلطجيه ! , والبلطجيه دول سيادتك عباره عن سفير وصيدلي ومهندس في شركة أورانج العالميه وراجل بواب على باب الله ( أنا فخور بالبلطجيه بتوعنا والله ) , المهم وكلاء النيابه قرروا إطلاق سراحهم لعدم وجود أدله ولأنهم معتدى عليهم مش معتدين , قام عمك الحاج النائب الخاص بتاع مرسي اتصل بيهم وامرهم إنهم يحبسو البلطجيه , كده بالعافيه يعني , قام وكلاء النيابه رفضو وأطلقو سراحهم , قام النائب الخاص بتاع مرسي قرر نقل وكيل النيابه المسئول للعمل في بني سويف ( يعني نفاه لجزيرة مالطه ! ) , قام الساده وكلاء النيابه في شرق القاهره علّقو العمل وطالبو النائب العام بالإستقاله ( والله رجاله ) , وامبارح في مداخله تليفونيه لقاضي قال فيها إن اللي عمله النائب الخاص بتاع مرسي يستحق السجن لأنه تدخل في احكام النيابه وتوسط لديها بحسب الماده 120 من قانون العقوبات , عموما الخروف الأعظم على الفور نشر للخرفان الصغيرين إن وكيل النيابه الممتنع ده كان شغال محامي لشفيق ! ومحدش بيقرا ولا يتنيل , دي التهمه الجاهزه لأي حد في القضاء والتهمه الجاهزه للثوار والمعارضين هي الخمره والنسوان , إوعو تتلخبطو بقى يا خرفان, ومتنسوش إن البرسم بيتاكل وماية الترعه بتتشرب , بالمناسبه وكيل النيابه مكانش محامي لشفيق إنما المؤكد والاكيد إن سليم العوا كان المستشار القانوني لحبيب العادلي.........................فرغة الحدوته , حلوه ولا ملتوته ؟!
.
محمد حسين

صبر الصيادين

لو حضرتك بتلتزم الصمت حاليا وبتوصف حالتك بإنها ( صبر الصيادين ) , فلازم تعرف إن فيه فرق كبير جدا بين صبر الصيداين وبرود الحلاقين!, سيادتك إحنا حاليا بنعوم في ماية الطرشي ومفيش مجال هنا لصبر الصيادين , عمرك شفت صياد بيرمي سنارته في ماية الطرشي ومستني رزق ربنا يجيله ؟!....................ثورو تصحّو !!

.

محمد حسين

أخشى عليها من الإنقراض

كنت صغيراً جدا , أصغر مما ينبغي , حين أخبرني أحدهم أن التدبر والتأمل في خلق الله هو ركن مهم جدا من أركان الإيمان الحق , وأن التفكير هو أفضل طريقه لشكر الله على نعمة العقل , الأن أصبحتُ كبيرا جدا وأكثر شيباً مما ينبغي في مجتمع أصغر وأتفه مما يجب أن يكون عليه !.
وجب على أن أقول , أن الحضارات لا تقُاس بعدد السنين التي نحياها وإنما تقاس بعدد الساعات التي نفكر فيها , ولو كان الأمر بعدد السنين لأصبحت الديناصورات أكثر المخلوقات ثقافةً وتحضراً ولما انقرضت من على وجه البسيطه ,...................باختصار , عدد الذين يفكرون في مصر قليل جدا , وعدد ساعات التفكير محدود جدا, ولن تشفع لمصر سنوات العمر التي عاشتها , أخشى عليها من الإنقراض !!.
.
محمد حسين

الطبيبُ والثورة..........محمد عبد العزيز

فحصَ الطبيبُ الثورةَ النازفةْ
قالَ:- إنّ الجُرحَ غائرْ
لن تحيا طويلاً
إلا إذا...
 نُقلَ لها دمُ ثائرْ
الا اذا...
 زال فيروسُ الخيانةِ
وقُطّبتْ جروحُ الضمائرْ
إلا اذا صارت حقيقةٌ
وليس شعراً
فوق الدفاترْ

الا اذا..استلهمت روحَ شهيدٍ
لم ترهبهُ
كلابُ المخافرْ
احتضن صدره رصاصةَ الغدرِ
ولم يلق بالاً...للمصائرْ

انقذوا الثورةَ الجريحةَ
والا زوروها كلَ عامٍ
فى المقابرْ
______________________
محمد عبد العزيز

الماريونيت....قصة قصيرة جدا

الماريونيت....قصة قصيرة جدا
ـــــــــــــــــــــــــــــــــــــــــــــــــــــــ
أخذ الجمهور مكانه فى قاعة المسرح الفسيحة،,وتأهب الجميع لمشاهدة العرض الذى طالما انتظروه،فى تلك الاثناء اعد (خيرى ماهر) عرائسه، وبمهارته المعهودة فصل خيوطهم الرقيقة ،وامسك بهم جميعا فى يده الضخمة،واختبأ وراء الكارافان ، ثم قرر أن يبدأ العرض بدميته المفضلة،التى البسها بدلة لامعة ونظارة ذهبية ،كان قد رسم على وجهها لحي

ة خفيفة مخضبة بالبياض،رفع الدمية عاليا ،ففرح الجمهور خاصة الاطفال الصغار،بدأت الدمية فى ترديد كلمة واحدة:-انا الرئيس....انا الرئيس
فاستقبل الجمهور كلمة الدمية بضحكات عالية،فبدا الغيظ يسرى فى نفس(خيرى)،الذى حاول ان يرفع صوته مجددا ،لكنه كلما حاول ذلك كانت الكلمات تخرج منه بصوت مضحك ، فكاد الجمهور ينقلب على بطنه من كثرة الضحك....ساعتها استبد به الغيظ فقرر ان يظهر بنفسه غلى الجمهور...وقال بصوته العالى:- انا الرئيس
لكن الجمهور استقبله بالامتعاض،وعلى عكس ماتوقع خيرى...ثبت الجمهور مكانه ، ولم يخف...وقال بصوت واحد:- برة....برة
_______________________
محمد عبد العزيز