Mohamed
Hussein
25
فبراير 2016·
عشان ما تتلخبطش
في الحاجات الجديده اللي نازل بيها الواد مارك , هقولهالك بالترتيب اهو :
.
أنا اسمي يارا
, عمري عشرين سنه , في سنه تانيه في كلية الهندسه , و في يوم وانا قاعده في الكافتريا
قعد قصادي شاب زي القمر , و لقيت عينه مش بتنزل من عليا , بصراحه هو كمان عجبني (
1- اعجبني ) , سمعت أصحابه اللي كانو قاعدين معاه عالترابيزه بيقولو له يا سيف , و
تاني يوم قعدت في المكان اللي انا متعوده اقعد فيه و لقيت سيف جاي يكلمني , عرفت انه
في بكالوريوس و كان كلامنا عادي , بس يوميها حسيت اني حبيته ( 2- احببته ) , و بعدها
بقيت استنى اني أقابل سيف بعد المحاضرات و ممكن نتمشى في الجامعه شويه و نقعد جنب شجرة
معينه , لاحظت من بداية علاقتنا ان سيف دمه خفيف جدا , كان بيعرف يضحكني ( 3- هاهاها
) , و في يوم عرض عليا سيف اننا ندخل سينما , اترددت شويه و بعدين قولت اوكيه , الفيلم
كان فيلم اجنبي رومانسي , و فجأه لقيت سيف بيبوسني , دي كانت أول بوسه في حياتي (
4- وااااو ) , و استمرت علاقتنا لحد ما خلصنا الإمتحانات , و يوميها قابلته و قلت له
انت كده خلصت الكلية يا سيف , هتيجي امتى بقى عشان تخطبني من بابا ؟ , اتفاجئت ان سيف
بيقولي انه مش هيقدر يرتبط دلوأتي عشان لسه عنده جيش و لسه هيكوّن نفسه , كلام سيف
بالنسبالي كان صادم ( 5- أحزنني ) , و افترقنا , وبعد اسبوعين كنت رايحه الجامعه عشان
اشوف النتيجه بتاعتي لقيت سيف بالصدفه قاعد مع ياسمين صاحبتي جنب نفس الشجره و عمالين
يضحكو و بيلعب لها في شعرها ( 6- أغضبني ) .
.
و توته توته خلصت
الحدوته .
.........................................................................................................................
Mohamed
Hussein
25
فبراير 2016·
قولت أصبح على
مصر برسالة بجنية زي الناس و أقول لها صباح الخير يا غاليه يا مهره يا عفيه , وانا
عندي موبايلين و فيهم رصيد الحمد لله , مسكت الموبايل الأولاني و بعتت الرساله فشلت
, بعتها تاني فشلت , جربت من الموبايل التاني مممممممم برضه فشلت , أه و الله , طب
يعني انا لو هستبعد ان حظي دكر و من النوع اللي بتقع عليه البلكونه في الصحرا ( و زملكاوي
) , يبقى مفيش قدامي غير تفسير واحد , إن مصر مش طايقاني أساسا و شايله منّي و معبيه
و مش عايزه من وشي حاجه , و تلاقيها مانسيتش اني كنت في يوم من الأيام شمّام كوله أد
الدنيا و كنت بعتبر البرادعي ده رئيس المجلس الأعلى للحكماء و العباقره و الفلاسفه
و مبيضين المحاره في الكره الأرضيه و الكوره الشراب , يا مصر خلاص بقى حقك عليا , مايبقاش
قلبك اسود كده , عيّل و غلط يا ستي , هاتي راسك ابوسها طيب .
..........................................................................................................................
Mohamed
Hussein
25
فبراير 2016·
عن الراجل اللي
إيده في النار
.
احنا ايدينا في
المايه يا باشا , قاعدين كده و مرحرحين , عايمين في ماية البطيخ , لابتوبك و صوابعك
الذهبيه و ابتسامتك الجميله , نهزر و نألش و نعمل كوميكس , ووقت الجد نحط حلول لمشاكلنا
الكبيره و احنا في نفس قاعدتنا , يعني الحلول بنحطها في وقت الفراغ , و يبقى مشروع
متكلف مليارات و مشارك فيه شركات عملاقه و استشاريين يسدو عين الشمس انما أكيد محدش
بيفهم أي حاجه في الدنيا غيري انا , دي القاعده رقم 1 في مواقع التواصل و في الصحافه
و الإعلام , أنا اللي بفهم و بس , انا و من بعدي الهيئات و الشركات و الإستشاريين
.
.
و بعد كل خطاب
للرئيس , محدش طبعا هيسمع ولا يقرا الراجل بيقول ايه , بنستنى الكلمه اللي هنعمل عليها
الألشه ( الأرنب اللي هنعمل عليه ملوخيه ) , و بعد ما نزهق من الكوميكس و الألشات و
الملوخيه بالأرانب نبدأ مرحلة التحليل اللوذعي العميق للكلمات , يعني الراجل لما قال
لو ينفع اتباع لاتباع أكيد يقصد ان فيه مخابرات و اجهزة دول بتحاول تشتريه بس هو رافض
, لأ لأ , هو اكيد يقصد الاعلام و البرلمان اللي اتخلّو عنه و باعوه فعلا , مع ان الجمله
لا تعني غير إن السيسي و للأسف ( بيتبسّط ) في الكلام أحيانا و ده غلط و زلة لسان مش
اكتر .
.
إنما اللي طمني
جدا بعد خطاب السيسي هو شعور حسيته و فكره فكرت فيها , ممكن نفهمها من السؤال ده ,
لو فيه أي جيش أجنبي قرب من مصر و بقينا داخلين على حرب رسميه , و السيسي طلع قال يا
مصريين أنا عايزكو تبقو معايا , بعد ساعه واحده هنلاقي تلتين الشعب في الشارع لابسين
البياده , رجاله و ستات , مع انه وقتها هيبقى بيقصد تبقو معايا بالدعاء و الدعم و الصبر
, يعني بيقصد المعنى مش اكتر , و ده اللي حصل في حكاية صبح على مصر بجنيه , اللي السيسي
مقالهاش بدعوه مباشرة او طلب مباشر انما كان بيضرب مجرد مثل بحسبة أرقام عاللي نقدر
نعمله و ازاي نقدر نساعد الدوله .
.
الشعبيه العجيبه
بتاعة السيسي دي و محبة الناس و احترامها و استجابتها حتى لمجرد ( التلميح ) هي اللي
عامله هسهس في عقول الخرفان و الكولجيه و جايبالهم مناخوليا .
..................................................................................................................................
Mohamed
Hussein
24
فبراير 2016·
العيال بتوع السجاده
الحمره
.
عن عيل هايف و
تافه , ساب خطاب الرئيس و المصارحه و الكلام عن حل ازمة الكهربا في سنه و حجم المشكله
الإقتصاديه و حلها و التنميه و التعليم و زيارته لليابان و البنيه التحتيه المتهالكه
و البلد اللي بنبنيها و حل مشاكل الشباب و التعامل مع العشوائيات , و المؤامره و الإرهاب
و الدين الخارجي وعلاقاتنا الدولية و انشاء المطارات و الطرق و الكباري و التفكير ل
15 سنه جايين و الصحافه الهبله بتاعتنا , و شكل الدنيا بره و جوه و اعترافه بالتجاوزات
و رفضه ليها , و قطع رجل اللي هيفكر يقرب من مصر , و مسك في حكاية ( لو ينفع اتباع
لاتباع ).
.
بالمناسبه يا جحش
, مبارك قعد 30 سنه يرمي لك خطابات موزونه بالميزان , مفهاش غلطه ولا كلمه تتمسك عليه
, خطابات تُدرّس , وكان وقتها بيبيع لك الوهم في أزايز وانت باختصار قاعد على حِجْره
بيهشتكك و يدلعك و انت بتضحك و تتكلم عن حكمة الرئيس وجماله و صحته ( لزوم الهشتكه
) !! .
.
عيب السيسي الوحيد
انه صادق و تلقائي و وطني عارف قيمة البلد دي , و بيقدّم لنا كشف حساب من غير تجميل
و لا تضليل , مع انه لو حب يبيع لك الوهم زي غيره هيقدر , و هيبيعه و يبيعك معاه .
........................................................................................................................
Mohamed
Hussein
24
فبراير 2016·
في مؤتمر رؤية
مصر 2030 بحضور السيسي , خطه شاملة لتحقيق التنميه المستدامه لمصر خلال 15 سنه , يعني
خطه أخرها عام 2030 , اومال ايه حكاية 2063 اللي الكولجيه بيهرو فيها بقالهم اسبوع
؟ , لا دي حضرتك كان السيسي بيتكلم فيها عن خطه خمسينيه لقارة أفريقيا مش مصر !! .
.
معقوله ؟ يعني
الهري بتاعهم طلع فستك زي كل مره ؟ و هما عارفين انه فستك ؟ أه طبعا عارفين و شحيبر
كمان عارف , طب الكولجيه هيعملو ايه دلوأتي في الموقف الهباب ده ؟ هيردو ازاي يعني
, أنا أقولك هيردو ازاي , اصلي و كتاب الله حافظهم من كُتر ما هريهم ببقى متكرر بشكل
ممل و سخيف .
.
الكولجي النهارده
هيتقمّص دور البواب في فيلم ميدو مشاكل , لما ميدو كان رايح يصلح الدش في المركز الثقافي
الأفريقي , الكولجي هيقولك 2063 ده كتير اوي , و مين يعيش ل 2063 , ده لا احنا ولا
عيالنا ولا عيال عيالنا هنلحق الكلام ده , طب يا سيدي دي 2030 مش 2063 , لا برضه كتير
, خمستاشر سنه كتير , مين يعيش ل 2030 , ده لا احنا ولا عيالنا , طب يا عم الكولجي
مش ناوي تغير لمبة الحمام اللي محروقه من يوم ماشتريت الشقه دي ؟ أه حاضر هغيرها طبعا
, استناني 70 سنه هروح أغيّرها و ارجع لك .
.
أما الكولجي القراراي
الثورجي المثقف التنين ف ده مش هيتقمص دور البواب , لا هيركز في إزازة المايه اللي
قدام السيسي وهيلاقي لعدم وجودها بعد فسلفي و اجتماعي عميق و انتصار للفقراء و المهمشين
( كان لازم يشرب من الأولّه ) , ازاي رئيس دولة بيدّعي انحيازه للفقراء بيشرب ماية
معدنيه ؟ انها الأنظمة الفاشيه المتوحشه يا ساده الكامنه في مظاهر البزخ و البروليتاريا
و الديماجوجيه و العنصريه القابعه في قعر ازازة المايه المعدنيه , إنها الإهانه و المهانه
, إنه الهوان .
...........................................................................................................................
Mohamed
Hussein
23
فبراير 2016·
هننتصر على كل
جيوش الدنيا مجتمعه , و هنغزو الفضاء , و شوراعنا هتبقى مرايات نسرّح فيها شعرنا ,
و هنفوز بكاس العالم و نغلب البرازيل 37 / صفر في النهائي , و الجنيه هيبقى ب 9 دولار
, و اليابانيين هييجو يشتغلو ( صُرماتيه ) عندنا , و هندّي قروض لصندوق النقد الدولي
و نفرض شروطنا عليه , و هنجبر روسيا انها تحط صورة مجدي عبد الغني و أيمن يونس على
الروبل بتاعها و إلا هنخرب بيتها , بس ده في حالة واحده بس , لما نبطّل نعمل مجموعات
عالفيس بوك و نضيف فيها الناس بنظام ( الفِرْده ) و لما نبطل كل ما نعطس نكتب بوست
و نعمل مينشن لكل أصدقاء الفيس بوك عليه , طيب يرحمكم الله يا مولانا , وانتي يا ستي
ضيفيني في مجموعة ( البحر الضائع ) و ( الورده الزمخشريه ) و مجموعة ( مين اللي قتل
نوسة العامشه ) مع اني وعهد الله مانا اللي قتلتها ولا أعرف مين اللي قتلها .
....................................................................................................................................
Mohamed
Hussein
23
فبراير 2016·
الفاتوره
.
و لما تهدى الأمور
في سوريا , و جيوش و أجهزة مخابرات ال 700 دوله اللي بيلعبو جواها يطلعو بالسلامه
( ده لو طلعو يعني ) , عارفين وقتها سوريا هتحتاج وقت أد ايه عشان ترجع لشكل سوريا
قبل ما يسمى بالثورة ؟ الإجابه بتقول مش أقل من 50 سنه , عشان بس سوريا ترجع اقتصاديا
وأمنيا و عسكريا و اجتماعيا زي ما كانت , و حط تحت اجتماعيا دي ألف خط , 50 سنه يا
مؤمن , ده بفرض ان كلاب السكك سابوها في حالها , فاتورة الخراب الشامل اللي حصل في
سوريا في 3 سنين تعادل دخول سوريا و هزيمتها في 8 حروب نظاميه ضد جيوش عسكريه كبرى
, لاحظ ان سوريا مانكسرتش بهزيمة 67 و شاركت معانا في انتصار 73 .
.
, 50 سنه هي الفاتوره
اللي هتدفعها سوريا عشان بس ترجع لنقطة الصفر , بعد ما داس عليها المخطط الأمريكي الصهيوني
للشرق الأوسط , المخطط اللي لعبته أمريكا بإيدينا احنا , يعني من غير ما توسّخ ايديها
.
.
اللي بيضحكني بقى
إني لسه بلاقي مصر فيها مجاذيب , لما تقرا كلامهم تحس إنهم مش هيرتاحو ولا يهدالهم
بال الا لما نعمل ثورة و نغير نظام حكم كل شهرين , أصلهم مثقفين أوي و معاهم دكتوراه
من بلاد بره , و في رسالة الدكتوراه بتاعتهم صفحة رقم 7 هتلاقي سطر بيقول : نظام الحكم
في مصر لازم يتغير كل شهرين هو و أنبوبة البوتاجاز !! .
....................................................................................................................................
Mohamed
Hussein
23
فبراير 2016·
خمسه لعقلك
................ لو بطلنا نهري
.
- أه صحيح , عندنا
معدلات تلوث أعلى من المعدلات العالميه , حوادث طرق أعلى من المعدلات العالميه , فساد
و بيروقراطيه اعلى من المعدلات العالميه , إنما كمان عندنا معدلات الهري و السخافه
و النطاعه هي أضعاف مضاعفه للمعدلات العالميه !! .
مواقع تواصل اجتماعي
, برامج توك شو , صحافه , اعلام , حجم الزباله اللي بتطلع مننا كل يوم و ال waste product يكفي كوكب الأرض و المجموعه الشمسيه , يعني ممكن
نقول لكوكب الأرض استريح انت و ماتهريش في حاجه , احنا هنهري و هنصدر هرينا ده ليكو
, هيكفي و يفيض .
.
- كوبري معدّي
على ترعه في اجا , الكوبري وقع لا هو ماوقعش دي الدعامه بتاعته هي اللي اتخبطت بكراكه
, يووووه مش الدعامه بتاعته , دي البتاعه العريضه اللي بتبقى عالمايه و سابقه الكوبري
من الناحيتين , اهه ؟ طب استفدنا ايه بقى ؟ كراّكه في المايه خبطت في البتاعه اللي
سانده الدعامه اللي هي سانده الكوبري ؟ ده خبر و النبي ؟ خبر خبر يعني ؟ أه منشور في
اليوم السابع , شوية عيال في مدرسه في الحوش وقت الفسحه بيرقصو على أغنية شعبيه ؟ طب
ايه المشكله سيادتك ؟ نعمل لهم ايه يعني ؟ فين الخبر بقى ؟ ايه ؟ هو ده الخبر ؟ عيل
صايع كتب رواية جنسيه و اتنشرت في جريده و اتحكم عليه بالسجن , حرية رأي ايه ؟ و خيال
مين ؟ رايحين تهرو فين ؟ المشهد لو بتشوفه بجوز عيون هيبقى ترجمته ان البلديه قبضت
على عيل بيبيع صور سكس في الشارع , انا ماشوفتوش اكتر من كده , انما لازم نهري , لو
بطلّنا نهري نموت .
.
- في توقيت هو
الأصعب في تاريخ مصر و المنطقه , في مخطط خراب طايل و طايح , يبقى قدرتنا على الهري
بالشكل ده هي الجزء الاعظم من الخطه , سخافتنا هي الجزء الأهم في خطة اللي عايزين يخربوها
, و بعد ما اعلامنا و صحافتنا ينتجو 500 مليون طن من الهري و الزباله اليوميه , لو
فكرنا بس ندوّر في الزباله دي هنكتشف إننا مانعرفشي حاجه عن النوبه و ثقافتها و اهلها
, و لا سينا و ناسها ولا حلايب و شكلها , ولا مطروح و جمالها و تقاليدها ولا نعرف حاجه
عن الفن الشعبي و التراث المصري ولا نعرف اي حاجه عن بلدنا , ولا زرعنا شجره و لا روينا
فكره , ولا صنعنا مشبك غسيل حتى , ساقيه و بتلف عالفاضي , هري و خناقات , خناقات و
هري , مياصه و بلطجه , بلطجه و مياصه , و كأن دورنا في الحياه نتقمّص شخصية الشرير
بتاع زكي رستم أو دور الواد المايع بتاع لوسي ابن طنط فكيهه .
.......................................................................................................................................
Mohamed
Hussein
23
فبراير 2016·
اليوم العالمي
للتخلّص من الأتب .
.
كروت بتتحرق و
كان لازم تتحرق , النهارده توفيق عكاشه و مرتضى منصور , و قبل كده مصطفى بكري , و يارب
قريب جدا أحمد موسى , و نبقى اتخلصنا من الأتب و الحِمْل اللي محسوب علينا و شايلينه
على ضهرنا من سنتين .
.........................................................................................................................
Mohamed
Hussein
22
فبراير 2016·
تعرفو , في الفتره
اللي فاتت حسيت اني إيماني و عقيدتي مهزوزين شويه , لحد ما في يوم فتحت الفيس بوك و
شوفت بعيني صورة البيضه اللي مكتوب عليها لفظ الجلاله , من بعدها حسيت إني بقيت أحسن
كتير , عشان كده بنصح كل شاب بيعتقد إن إيمانه و عقيدته مهزوزين إنه يتفرج عالبيضه
3 مرات في اليوم لمدة اسبوعين , أه البيضه اللي في الصوره يا جدع , و بعدها يقدر يعمل
أي حاجه بقى ولا يهمه , لو شرب بانجو طول اليوم من غير أكل عمره ما هيكح , و لو نط
في المحيط الهادي و هو مش بيعرف يعوم عمره ما هيغرق , و لو نام على قضيب قطر و القطر
فات من فوقه مش هيجراله حاجه بشرط إنه وقت مالقطر بيعدي من عليه يفتكر شكل البيضه و
يقوم شادد عضلة ايده شويه بس , يعني يعمل كداهو .
.
و الله تعالى اعلى
و أعلم .
........................................................................................................................
Mohamed
Hussein
22
فبراير 2016·
مش هقاطع الإعلام
الفاشل بتاعنا , عشان ببساطه شديده مش بتفرج على تلفزيون من 3 سنين يعني مقاطع من بدري
, في لحظة كده أدركت تماما ان البدله و الكرافته و السشوار و جيل الشعر مش بيعملو بني
أدم و إن الفستان و الكتّافات و الضحكه اللزجه و التأتأه مش بيعملو اعلاميه , و إن
الاعلاميين اجمالا بياكلو عيش مش اكتر ( قصدي بياكلو جاتوه ) , عندهم مساحه لازم (
يعبّوها ) كل يوم عشان ياخدو مليون جنية في الشهر من اعلانات السمنه و البيبسي و الشيخ
المبروك اللي بيفسر الأحلام وطبعا أدوية الضعف الجنسي , هيعبوها بقى بأي حاجه , و بأي
هري و السلام .
.
..... واحده اتطلقت
من جوزها مع انها كانت بتحبه و الله , عيل أكل دراع اخوه و هو نايم , سجادة حمره اتفرشت
عالأرض , فرشة سنان لقوها واقعه في الحمام , مدرس ضرب تلميذ بالشلوت , موتوسيكلات في
موكب الرئيس , عربية كار اتقلبت في مدخل أجا بس الحمار عايش , بيضه مكتوب عليها لفظ
الجلاله , الريس حلو لا الريس وحش , طب خلاص وحش لأ حلو إنما وحش , الدستور جميل بس
محتاجين نغيره , لأ مش هنغيره اصله جميل , يعني الهري هو كلمة السر بتاعة المرحلة
, و شعار كل الإعلاميين في مصر (( الهريُ في الأرضِ بعضٌ من تخلينا ....لو لم نجدهُ
عليها لاخترعناهُ )) .
.
للأسف , احنا في
زمن الأي حاجه في أي حته , و لما يكون النخبجيه و المثقفين شايفين ان الهبل بتاع احمد
مالك و احمد ناجي حرية رأي وإن السخريه من جيش مصر حرية تعبيرو بيهرو في أي افتكاسه
و يتعاطفو مع أي كلب جربان ماشي في الشارع , يبقى لازم يطلع مننا اعلاميين بنفس التشوّه
و الهطل اللي في عقولنا , يعني من نفس القماشه , هذه بضاعتنا رُدت إلينا .
...............................................................................................................................
Mohamed
Hussein
21
فبراير 2016·
عصام حجي , العالم
المصري الشاب , أو بمعنى أصح كبير الكولجيه الشباب , نظرتي ماتغيرتش فيك يا بطل , كولجي
قراري , تحط عيشة على ام الخير و تحليل سياسي عن بعد ( من منازلهم ) , تلم شوية صور
من تلاميذك الكولجيه و تدلي بدلوك بقى , و طبعا ماتنساش عبد العاطي كفته , و اي صوره
مع اي خبر افتكاسه زي الطفل الرضيع ابو 4 سنين اللي اتحكم عليه بالاعدام , و سؤال عميق
عن اخبار العلم و العلماء , و الشباب اللي بيتسجنو من أول رضيع , و الشاب الايطالي
كمان مصر اللي قتلته ( مع ان ايطاليا نفسها مقالتش كده ) , بس انت اكيد عارف ان مصر
اللي قتلته , بوست تحريضي فج و مقرف , هو انت تلميذ البرادعي ولا أستاذه ؟.
.
و أه يا مصر لو
جبتي عصام حجي بقى , اوعى وشك , طفره علميه و اقتصاديه و أمنيه و اجتماعيه غير مسبوقه
, و بعلمه الغزير هيحل لنا كل المشاكل , البيروقراطيه و الفساد و الاقتصاد و القضاء
و الأمن و الحرب في سوريا و الفلوس هتبقى تحت رجلينا زكايب , و يجوز العازب و يفك المربوط
و يعمل لنا مركبة فضاء ونكتشف سر التحنيط و نمشي عالحيط و بإشارة من صباعه اللي مليان
علم ده هنلاقي الدنيا وردي بس احنا اللي ملناش في الطيب نصيب , انا عارف كانت تايهه
عننا فين دي ,
.
مصر يا دكتورنا
الكبير فيها 30 ألف عالم بره و جوه , واخد بالك من الرقم ؟ 30 ألف عالم على الأقل
( انت اصغرهم و أتفههم ) و أخر واحد ممكن يفيد مصر ببكرة خيط , تشتغل في وكالة ناسا
,تشتغل في قناة وناسه ده رأيي فيك و بكره الأيام هتثبت , سلامنا للحاجه الغاليه ماما
أمريكا راعي العلم و الأدب و السلام و حقوق الانسان و حقوق الأطفال و حقوق العصافير
في العالم .
...............................................................................................................................
Mohamed
Hussein
21
فبراير 2016·
الريس برايز الشهير
بالكاتب الروائي أحمد ناجي
.
للأسف ضيعت بتاع
ربع ساعه و عصرت على نفسي مشنة لمون عشان أقرا جزء من رواية احمد ناجي اللي اتحبس بسببها
, و على فكره انا بقالي ساعه بكتب في البوست ده , كتبته مره ب 10 سطور من رواية احمد
ناجي و استبدلت حروف كتير بنجوم عشان الكلمات ماتنفعشي للنشر , و بعد ما عملت كده قريت
البوست لقيته برضه ماينفعشي للنشر !!
.
بصو , من الأخر
كده و باختصار , عارفين البوستات و القصص الجنسيه اللي ممكن تشوفوها على صفحة الفيس
بوك بتاعة ( ريري التعبانه أوي ) وبقية صفحات السكس ؟ أهي دي بالظبط , بنفس اللغه و
نفس الكلمات والمصطلحات , يعني الأستاذ العظيم احمد ناجي أخره يبقى ادمن لصفحة سكس
و يكتب فيها قصص و يحكي عمل ايه مع جارتة الست ام شوشو لما اتقابلو في شقتها و تنتهي
الروايه بانهم خدو دش بقى و نعيما يا مولانا , و ممكن بعد ماينشر روايته عالصفحه يدخل
للأصدقاء عالشات و يطلب كارت شحن ب 50 جنيه , الحكاية لا فيها عمل أدبي ولا ابداع ولا
حرية تعبير ولا حرية بطيخ .
.
طب انا أفهم ان
واحد أفلس أدبيا و فكريا زي باسم يوسف يتعاطف مع أحمد ناجي بعد ما تعاطف مع أحمد مالك
بتاع الواقي الذكري , إنما اللي مش قادر أفهمه بجد : هي نقابة الصحفيين رايحه تهبب
ايه ؟ تتعاطف مع ايه بالظبط ؟ مع الك* و لّا الز** ولا المعنى الفكري و الأدبي العميق
لكلمة ( البل** ) ؟! طب ليه النقابه ماطلعتشي بيان قبل كده تتعاطف فيه مع الكاتبه الصحفية
( ريري التعبانه أوي ) ؟ , إلا بجد صحيح هي الصحافه عندنا في مصر يبقى اسمها صاحبة
الجلاله ولا صديقة الطلبه ؟!
.
أصدقائي اللي عندهم
تعاطف لا ارادي و مصطلحات رنانه من بتاعة حرية التعبير و النقد المجتمعي و الفرز الجماهيري
و الوعي البرجوازي و الفول الحريتي , حاولو تتعالجو و النبي , داحنا باقي لنا level واحد و نقابل الشيطان في الدور النهائي .
......................................................................................................................
Mohamed
Hussein
21
فبراير 2016·
البلطجيه و الكولجيه
و إلإعلامي أبو 10 مليون ......... مصر فوق الجميع
.
- البلطجيه هما
الكتله الاعظم في أمناء الشرطه , رجالة أبو جبل , 7 منهم اتقبض عليهم و هما رايحين
مدينة الإنتاج الإعلامي عشان يطلعو في برنامج على الهوا , اتقبض عليهم ليه ؟ عشان رجل
الأمن قبل مايطلع في برنامج لازم ياخد تصريح أو موافقه من وزارة الداخليه , أه و عهد
الله , رجل الأمن بيختلف تماما عن مهندس الديكور و بياع البليله و الباك الشمال بتاع
اسكو .
.
- أنصار أبو جبل
في الشرقيه عملو اعتصام في مديرية الأمن , و الشرقيه هي كلمة السر , من ساعة فض الاعتصام
بتاع امناء الشرطه هناك بطريقة ( أطبطب و أدلع ) , لاحظ كمان ان الشرقيه هي المحافظه
الوحيده في مصر اللي كان بيحصل فيها تفجير لبرج كهربا كل يومين .
.
- الإعلامجيه اللي
بياخدو 10 و 15 مليون عايزين جنازه و يشبعو فيها لطم , لازم ( يعبّو الهوا ) عشان مرتبهم
يمشي , و حبذا لو تعبية الهوا تمت بفرقعه و نسبة مشاهدة عاليه و اعلانات , و الملايين
تجيب ملايين و شعارات الوطنيه المزيفه نبقى نشيلها في الدولاب , مش هتحمض ولا حاجه
.
.
- و الكولجيه مشغولين
بالطفل ابو 4 سنين اللي اتحكم عليه بالغلط مع ان الحكايه غلطه في الإسم , و المقصود
الأب مش الطفل , بس مش مشكله احنا كمان عايزين ( نعبّي الفيس ) و يا سلام لو نعبية
بشوية فرقعه , مش عشان ملايين ولا حاجه انما لايكاتكم تكفي و يبقى لنا قضيه و الهريه
بتاعتنا تبقى دايما هي ( قُبلة الحياه ) .
.
- وزارة الداخليه
يبدو انها اضعف من التعامل مع ملف أمناء الشرطه , و مش هنتجاهل ابدا فرضية ان الهوجه
دي تكون مقصوده و محاولة للوصول لنقطة صدام بين الداخليه و أمناء الشرطه و بالتالي
حالة انفلات أمني , لكن في النهايه لازم يكون فيه تعامل قوي , بشده و حكمه , حاجه مدروسه
, ويكون فيه بديل جاهز , و جايز يكون ده الوقت المناسب للتعامل مع ( أمين الشرطه البلطجي
و الإعلامي البلطجي ) , فيه دعم شعب كافي جدا لأي تعامل هيتم معاهم حاليا .
.
- و لو كانت وزارة
الداخليه مش هتقدر على حل مناسب بهدوء و يكون مدروس تبقى تسلم الملف كله لرجالة الجيش
, هما هيتصرفو أكيد , في كل الأحوال الجيش هو اللي بيشيل الليله يبقى خلية يشيلها بدري
بدري .
.
- و في النهايه
لازم نفهم كلنا , ان الدوله اللي عايزه تقف على رجليها و تمشي لقدام هي الدوله اللي
مابيتلويش دراعها من حد , مصر فوق الجميع .
............................................................................................................................
Mohamed
Hussein
21
فبراير 2016·
العمق الإستراتيجي
للهيافه
.
حصل إن حضرتك في
سنه واحده عملت التالي , تعاطفت مع محمود مالك و عملت هاشتاج لنسرين النرش و قلت الحريه
لاسلام الدمنهوري , و سجنتو احمد سلطان بتاع الإخوان ليه يا ظلمه , و تعاطفت مع سيهام
سيف و قلت سيهام على الأسفلت , و عملت هاشتاج لسليم جاويش و غيرهم كتير
.
لا في أي حاله
فيهم استنيت تعرف التهمه هي ايه و اتقبض عليهم ليه ؟ طب اصبر 7 دقايق حتى , ولا قريت
لهم كتاب ولا مقاله و لا سمعت لهم أغنيه ولا طقطوقه و لا تعرف لهم موقف سياسي ولا موقف
عبود حتى , و قبل ماتتعاطف معاهم ب 3 دقايق لا كنت تعرف اساميهم ولا تسمع عنهم , و
لو حد قالك قبلها تعرف احمد سلطان ؟ هتقول ده بتاع البليله اللي عالنصيه اكيد .
.
انت بس بتلاقي
ناس بتتعاطف فبتقوم طالع جري و متعاطف معاهم ( صاحب واجب يعني ) , و بعد كام يوم من
التعاطف هتكون نسيت اساميهم اكيد ( و الدليل اني كتبت اساميهم فوق كلها غلط و ممكن
ماتخدشي بالك عادي ) , المهم تصحى من النوم يا بطل و تقول يا مسهل يارب , يا ترى هنتعاطف
مع مين النهارده ؟ مانا لازم اعمل هاشتاج و اهري و اتعاطف كل يوم في حاجه جديده , أومال
يعني يقولو عليا ايه في البلد ؟ طب شكلي يبقى ازاي قدام خطيبتي و أهلها ؟!
.
و طبعا في خلال
السنه أفتيت و دليت بدلوك في كل حاجه , من أول الطيارات الرافال و السفينه ميسترال
و أبار الغاز و أسعار العمله و سد النهضه و قناة السويس و التحالفات الدوليه لحد مشابك
الغسيل و حجر المعسل و اترسخت عندك قناعة ان مفيش حد في الكون بيفهم اي حاجه في أي
حاجه غير جنابك , دانت كشكول يا جدع , شهر عقاري متنقل , زي الباز أفندي كده , راجل
قاري و مثقف ومضطلع , و عليك كرافته ترد الروح .
.................................................................................................................................
Mohamed
Hussein
20
فبراير 2016·
الساده الصحفيين
و الكُتّاب و الإعلاميين اللي عقولهم ألماظات , أبطال معركة اللمون الشهيره , بثقافتكو
العميقه و علمكو الغزير و إرهاصاتكو للمستقبل و فكركو المترسّخ في وجدان البُعد الباعد
جبتو لنا رئيس بهلول كان بيشتغل سكرتير للمرشد بتاعه و بيبع أسرار مصر و وثائقها لكشك
عالخليج , يعني كمان بيشتغل بوسطجي ( عشان يحسّن دخله ) , طب و الله العظيم لو كنتو
جبتو لنا الواد حسان العبيط ( أبو وزه ) اللي كان في فيلم ( صراع في الوادي ) كان بقى
أرحم .
.
ممكن لو سمحتو
بقى تعتزلو و تتحجبو و تقعدو في البيت ؟! و ترحمو الناس من افتكاساتكو , ده من باب
( حصوة الملح ) يعني , ولّا بلاش , انتو أصلا قيمتكو اكبر بكتير من انكو تتكلمو عن
مصر و السياسه المحليه و الدوليه و المستقبل و حال الناس و نظام الحكم رئاسي ولّا برلماني
( ولّا ياختي كده ينفع و كده ينفع ) , أقول لكو على فكره , سافرو أمريكا و عيشو فيها
, و حاولو تفيدوهو بأفكّاركو و ثقافتكو يمكن ربنا يسهل و نلاقي امريكا بتشحت عندنا
على باب السيده , او ممكن عشان الزهق و الملل تاخدو ثقافتكو و علمكو و سلطاتكو وبابا
غنوجكو و أقلامكو و كراساتكو و النظرة العميقه للأشياء بتاعة المثقفين و المفكرين دي
و تروحو تكتشفو حركة الكثبان الرمليه في الصحراء الغربيه .
.
علاء الأسواني
, بلال فضل , يسري فوده ( و غيرهم كتير ) , مصر مش هتبقى حقل تجارب تاني لشوية شمّامين
كوله .......... انتهى الدرس يا غبي .
...................................................................................................................................
Mohamed
Hussein
20
فبراير 2016·
المشهد , مشهد
الركوب بما يرضي أبو قراط .
.
.
و قرر السيد الطبيب
المحترم فلان الفلاني إنه يعمل الوقفه الإحتجاجيه المتفق عليها عشان عنده قضيه عادلة
جدا و هي حماية المستشفيات من بلطجة امناء الشرطه , و الدوله لسه ماخدتشي رد الفعل
المناسب و اللي يرضي جموع الساده الاطباء .
.
و في نفس الوقت
, في الكواليس , و بسرعه جدا قرر الطبيب الإخوانجي علان العلاني إنه يلحق من بدري و
يعمل صفحات عالفيس لاعتصام الأطباء و رتّبو الامور و ستفو الدنيا , الكاميرات تيجي
و الجزيره و العناوين و الألشات و الكوميكس و الفبركه و مفيش مانع من شوية : يسقط يسقط
حكم العسكر .
.
السيد الطبيب المحترم
فلان الفلاني في وقفته الإحتجاجيه و قضيته العادله جدا رفع اصبعين من ايديه بعلامة
النصر , و الطبيب الإخوانجي علان العلاني هو كمان وقف ورا فلان الفلاني و رفع علامة
النصر , بس ب 4 صوابع مش 2 , و هو ده المشهد باختصار .
................................................................................................................................
Mohamed
Hussein
19
فبراير 2016·
الحدوته
.
- كان عندي شاب
صغير في العشرينات ضمن قايمة الأصدقاء , علّق عالبوست الاخير تعليق وقح , قبل ماعمله
بلوك فتحت صفحته , لقيت انه تبع ( ألتراس أهلاوي ) , و أخر بوست كاتبه على صفحته هو
خبر عن نزول ألتراس اهلاوي قدام مديرية الامن مع أهالي الدرب الأحمر !! مع تعليق من
جنابه بيقول ( ولعوها يا رجاله برافو عليكو ) , طبعا قمة الهبل و العبط و النطاعه إن
حد ييجي النهارده ويسأل : هو ايه علاقة ألتراس أهلاوي ( اللي هو بتاع كوره) بوقفة احتجاجيه
لأهالي الدرب الأحمر ؟!! .
.
و الحدوته بتقول
, و من غير ما نتنازل عن حقنا و قناعاتنا في دولة العدل و في قصاص سريع و في تطهير
جهاز الشرطه , بس لازم كمان نبقى عارفين التالي :
.
1- فشلو في تركيع
مصر بالإرهاب , فكانت الخطه البديله هي تركيعها اقتصاديا و أمنيا , و في كلا الحالتين
قررو انهم يلعبو على الحلقه الأضعف اللي هي الداخليه ( وتحديدا أمناء الشرطه...ده الكارت
اللي هيلعبو عليه الفتره الجايه ) .
.
2- قررو ان خطتهم
تمشي بالشكل ده , تركيز على تصرفات و بلطجة بعض امناء الشرطه ( الكارت ) , و نشر أخبارهم
وبلاويهم ( الحقيقيه و المضروبه ) , مع شوية مقالات و صور و تهييج في وسائل الإعلام
الخرفانيه و العالميه .
.
3- بعد كده تحصل
حالة احتقان من الناس ناحية التصرفات دي , تقوم الدوله كرد فعل تاخد قرارات قاسيه ضد
أمناء الشرطه بصفه عامه ( و هتبقى مضطره ) زي عودة المحاكمات العسكريه أو سحب السلاح
من بعضهم أو أو أو , يقوم امناء الشرطه يعتصمو أو يضربو عن العمل أو ينسحبو من المشهد
الأمني بشكل ما , يقوم يحصل انفلات امني كامل في البلد .......... وبس كده
.
4- و طبعا فيه
نقطتين مهمين في الكارت بتاع امناء الشرطه , إن عددهم كبير جدا ( اكتر من 300 ألف
) , سهل جدا رشوة أغلبهم ( و هنا بالتأكيد مش بنتكلم عن 20 جنيه مكرمشه ) , و سهل جدا
في العدد الكبير ده يكون فيهم ألاف تابعين للجماعه الارهابيه .
.
5- الدوله و الحكومه
مطلوب منهم التعامل بشده و حكمه في نفس الوقت , حق الناس في العدل و القصاص و التطهير
مع عدم الوصول لنقطة صدام و بالتالي لانفلات أمني ( مرحلة المشي على الحبل ) .
.
6- أخر حاجه بقى
, اللي هيسأل هما مين دول اللي فشلو و قررو و خططو ؟ أهو ده برضه سؤال أعبط من السؤال
بتاع علاقة ألتراس أهلاوي بأهالي الدرب الأحمر !! .
.................................................................................................................................
Mohamed
Hussein
19
فبراير 2016·
الحمد لله , السيسي
قابل وزير الداخليه في شرم الشيخ في اجتماع عاجل , و طلب منه تعديلات تشريعيه لضبط
الأداء الأمنى و عرضها على البرلمان خلال اسبوعين , تعديلات تشريعيه يعني قوانين هيقرها
البرلمان مش قرارات من وزير الداخليه , و القوانين أقوى من القرارات , الكلام اللي
قاله السيسي في الإجتماع مفهوش مواربه , أشاد بتضحيات جهاز الشرطه صحيح لكن ده مايمنعشي
من سن قوانين رادعه , و المعنى : مش هندفع فاتورة حد .
.
القوانين و التعديلات
التشريعيه دي شكلها ايه ؟ مش مهم خالص , اللي يهمنا ترجمتها في الشارع , يعني مانقراش
أخبار تاني زي الأخبار بتاعة الكام يوم اللي فاتو , و رغم خوفنا المشروع الأيام اللي
فاتت بس كنت عارف ان السيسي هيتصرف , ليه عارف ؟ عشان الراجل ده وقف لمخطط أمريكي مكتمل
الأركان في مصر من يوم 30 يونيو , و ضغوط أكبر من تخيلنا , و أكيد جاله ألف فرصه للتخلص
من الحمل اللي على ضهره و الضغوط دي ( بمصالحات أو تقسيم تورته بشكل معين ) , و أكيد
انه رفض , يعني محدش بيعرف يلوي دراعه .
.
اللي يستحمل ضغوط
امريكيه ( و عربيه و دوليه ) لمدة سنتين تلاته , ماينكسرشي على إيد شوية أمناء شرطه
.
.
أتوقّع قريب جدا
بإذن الله هنرفع يافطه مكتوب عليها : جود باي دولة حاتم .
....................................................................................................................................
Mohamed
Hussein
19
فبراير 2016·
إنما أجمل حاجه
فعلا , و الحاجه اللي بتطمني أوي على مصر و تقولي ماتخافشي هي إننا بنعرف وقت الجد
نخاف !! , الخوف ده حق مشروع , و شعور صحي جدا .
.
أغلب الأصدقاء
عندي عالصفحه مؤيدين للسيسي , انما امبارح حسو بالخوف , تعليقاتهم كانت واضحه , حق
الخوف و حق الإعتراض على بعض السياسات الرخوه ( من وجهة نظرنا ) لنظام سياسي بنأيده
و نحترمه ده حقنا , و لما المعارضه تبقى منقوعه لشوشتها في الهبل و الهطل و البلاله
( و الخيانه أحيانا ) يبقى تنبية رئيس الدولة و تحذيره مسئولية الكتله الأكبر من المؤيدين
, اللي هي الكتله الأروع , اللي هي حضراتكو .
.
بنأيد نظام سياسي
يا محترم , و فيه دولة قبل النظام و أهم منه , مش طبالين , لا قولنا عالسيسي انه خليفه
المسلمين و وصل للسلطه بشرعيه ربّانيه , و لا قولنا عالسيسي انه سابقنا بمليون سنه
ضوئيه و إن الباطل لا يأتيه من بين يديه ولا من تويتاته !! .
.
ياريس عبد الفتاح
, مفيش نظام سياسي في الكون بياخد التأييد بنظام ( شيك على بياض ) , إلا النظام الخرفاني
طبعا ( اللي هو نظام القطيع ) , عشان كده اسمح لنا و اسمع لنا , هنكون سندك و عكازك
في الطريق الصح , و غير كده هنكون جرس الإنذار .
......................................................................................................................................
.