Mohamed Hussein
15 يونيو 2019 ·
لما تكون هي رايحه تزور أمها و واخده جوزها معاها , و تتفاجئ إن بنات خالتها موجودين , تمسك إيد جوزها و تضحك أوي عشان تثبت لبنات خالتها انها سعيده أوي في حياتها مع جوزها أبو عيالها , و إنه مش حارمها من أيتها حاجه .
..............................................................................................................
Mohamed Hussein
15 يونيو 2019 ·
النهارده الصبح عبد الفتاح السيسي راح يزور معسكر منتخب مصر اللي بيتدرب في ستاد الدفاع الجوي , بيقول لهم إن حلم البطوله و إسعاد 100 مليون مصري في إيديكو انتو , و بعدين بص عالملاعب و التجهيزات
.
أكتر حاجه عجبتني في الصور و المشهد إن الريس لما حب يسلم عاللاعبين واحد واحد اصطحب معاه كابتن الفريق أحمد المحمدي , مع إن السلام ده ودّي و كان ممكن يخلي محمد صلاح اللي يعمل كده باعتبار ان صلاح في ليفل شهره و نجوميه تاني خالص , بس هو عبد الفتاح السيسي تربية المؤسسه العسكريه اللي ماتعرفش التجاوز , فيه حاجه اسمها قائد كتيبة أو كابتن فريق حتى لو كان صف الجنود اللي قدامه فيهم واحد مرشح بقوة لجايزة أحسن لاعب في العالم .
..............................................................................................................
Mohamed Hussein
14 يونيو 2019 ·
على سبيل الإعتراف
.
لو واحده بعتت لي طلب صداقه و دخلت صفحتها لقيتها كاتبه في البايو بتاعها حاجة من الحاجات دي ( دم عروقي كبرياء , أنا امرأه قلما يجود الزمان بمثلها , إحذر من غضب أنثى المعرفشي ايه , ناعمة أنا كالحرير و حادة كالسيف , أبحثُ عن جُرْحٍ دفين بين صبّار القرافه , كل شئٍ حولي عبثٌ ينبعث منه دخان , لا تهمني خطواتي البطيئه فجمالي يسبقني دائما بخطوتين , كبريائي سر أناقتي , إخلع حذائك قبل أن تدخل صفحتي فهنا قُدس الأقداس و عباس ابن فرناس .... إلخ ) , بغمض عيني و أعمل بلوك فوراً أيا مايكون توجهها السياسي , أنا أصلي بقيت بروح لدكتور المراره أكتر ما بستحمى , و كل مره يقولي أهم نصيحة يا محمد , أهم نصيحه , إبعد عن السمك و ( البيض ) .
.................................................................................................................
Mohamed Hussein
13 يونيو 2019 ·
الدراما و السينما لهم دور مهم جدا في تشكيل الوعي بتاع أي شعب في الدنيا , فيلم قوي أفضل من مليون مقال , و مسلسل قوي أفضل من مليون خطبة عصماء و مليون ساعه عالهوا فيها شوية مذيعين و شوية ضيوف بيهرو و يتشألبو .
.
نجاح مسلسل كلبش و فيلم الممر لهم ترجمه واحده بس , ترجمه بتقول إننا حاليا في مرحلة وعي و في طفره وطنيه حقيقية بعد سنين طويله من الغيبوبه و التشويه و طمس الهويه
.
عندي اقتراح بخصوص فيلم الممر تحديدا , أتمنى اقتراحي ده يوصل لحد من المسئولين , بعد نهاية العرض التجاري للفيلم في السينما و بعد مايستكمل مسيرة نجاحه في الصيف الحالي , نبدأ مع الموسم الدراسي الجديد نعمل رحلات مجانيه لطلبة المدارس من أول اولى اعدادي لتالته ثانوي , رحلات مجانيه أو بأجر رمزي , اللي هو التكلفه اللي ممكن تاخدها قاعة العرض , و ياريت لو نقدر كل سنه نعمل فيلم بنفس القوه و الجمال .
.
تاريخنا و انتصاراتنا و صمودنا و حالنا و محتالنا محتاجين ألف فيلم جيد بعيد خالص عن أفلام و مسلسلات شمامين الكوله و خالد يوسف و بعيد تماما عن تمثيل فيفي عبده و هي بتهز رقبتها يمين و شمال عشان أصلها بتلعب دور المعلمه و كده, و بعيد تماما عن خفة دم مي عز الدين اللي يتفات لها بلاد .
..............................................................................................................
Mohamed Hussein
12 يونيو 2019 ·
و إيه يعني لما ابننا صلاح يلبس شورت و يروح يصيف في الغردقه و يبلبط في المايه ويصطاد سمك مشوي و مقلي فتقوم الجرايد العالميه منزله صورته وهو بيصيف و يصطاد و تبقى أكبر حملة دعاية للسياحة في مصر ؟
.
هو لو وطني و بيحب مصر بجد , لو بيحبها من قلبه , كان عزمنا كلنا و خدنا معاه و جاب لكل مواطن مركب و سناره و مزه روسيه و كيلو كباب و إزاتين بيره مشبّرين
..................................................................................................................
Mohamed Hussein
11 يونيو 2019 ·
بالراحه خالص , بهدوء شديد
.
بصو يا جدعان
- من حقنا نقول رأينا , و أيا مايكون رأينا و اتجاهه فهو مفيد للبلد , بس فيه فرق شاسع ما بين الرأي و الهبد .
.....................
بالراحه كده و واحده واحده
1- هو فيه طوفان ضرب المنطقه بتاعتنا دي أخر 10 سنين ؟
- أه طبعا .
.
2- مصر نجت من الطوفان ده ؟
- أه .
.
3- يعني الحرب خلصت و نرمي السلاح و ندلدل رجلنا في ماية البيسين ؟
- لا , عدينا مرحلة الطوفان بس الحرب ماخلصتش , الجزء الصعب خلص , اللي باقي اسمه الجزء الطويل , اللي محتاج نفس طويل .
.
4- طب ليه مصر تجاوزت و نجت من الطوفان و غيرها لا ؟
- بعد كرم ربنا سبحانه و تعالى و حفظه للأرض دي فيه اسباب مهمه , زي الشعب و هنا بقصد الشعب الغير مسيس , يعني الفلاح و العامل و الطالب و ست البيت اللي مشغوله بتربيه عيالها , و الناس اللي مكانشي عندها وقت تهري و تهبد , لو على شعب الفيس بوك و تويتر كان زمانا خربناها مداين.
.
5- و ايه كمان من أهم أسباب النجاه ؟
- الجيش و الشرطه والأزهر و الكنيسه و المؤسسات السياديه , مهمه جدا الحكايه دي , مهمه اوي , و يمكن تكون كلمة الفصل بينا و بين الدول اللي ماقدرتش تنجو من الطوفان .
.
6- طيب الكلام ده معناه ايه ؟
- معناه باختصار انك تحط في بطنك بطيخه صيفي و تصدق بقى إن اللي قدر ينجو بالبلد دي من الطوفان لاهو خاين ولا جاهل , ده و طني و مفتح عنيه , و شرب البحر فمش هيغلب في إنه يشرب بحيره .
.
7- يعني ايه الكلام ده ؟
- يعني يا مولانا أي حاجه تخص الأمن القومي لمصر , لو سمحت , من فضلك ماتهريش و تهبد فيها , لا انت أذكى من مؤسسات البلد دي الأمنيه و السياديه ولا انت اكتر وطنيه منهم ( و ده لا ينتقص من وطنيتك في شئ ) .
.
8- حاجات زي ايه اللي بتخص الأمن القومي دي ؟
- زي السوريين اللي في مصر و عددهم كبير , حتى لو حضرتك متخوف لازم تفهم إنك في دوله مش في طابونه , وفيه حسابات لكل شئ , و الدوله مش بتدار بقاعده مسطبه , ولا بطريقة انتو حلوين تعالو , لا انتو وحشين امشو بقى , امشو يا وحشين
.
9- و زي إيه كمان يخص الأمن القومي ؟
- زي تعديل الدستور , خصوصا المواد المتعلقه بالجيش ومدة الرئاسه و حماية الجيش لديموقراطية الدوله , الحاجات دي حتى لو يبان قدامك انها شغل برلمان فانت لازم تفهم ان البرلمان هنا مجرد واجهه ديموقراطيه مش اكتر , وان كل كلمة في المواد دي أشرف عليها مؤسسات سياديه بما فيها مؤسسه الرئاسه .
.
10- و زي ايه برضه ؟
- زي قانون الجنسيه , ده أمن قومي و ألف خط أحمر , تأكد برضه ان رجالة البلد دي لا بيبيعو جنسيتها لكل من هب ودب , ولا بيخفي عليهم كل الهري اللي بنهريه في الموضوع ده و كل التخوفات , و البرلمان هنا كمان مجرد واجهه .
...........................
يارب تكون رسالتي وصلت بطريقه واضحه , مع كل و كامل احترامي للجميع .
...................................................................................................................
Mohamed Hussein
11 يونيو 2019 ·
عارفين بقى ؟ تلتين مشاكلنا و تلتين الهري اللي داير اليومين دول سببهم الحقيقي إن الموسم الدراسي خلص في أغلب البيوت المصريه ,فحصل بعدها هجوم من جروبات الماميز, و بعد ماكانو مشغولين بالإمتحانات و البوكلت و التابلت و حوت الكيميا و ديناصور الأحياء هجمو علينا و بقو بيتكلمو و يهبدو في تأمين الكماين و العلاقات بين الدول و الشعوب و قانون الجنسيه و يسألو فين دور المؤسسات السياديه ؟!.
.
لسه من شويه شايف واحده من جروبات الماميز بتقول ان الجنسيه المصريه هياخدها اي عيل معدّي في الشارع و مصر هتتملي اسرائيليين و فلسطينيين و هندوس و دروز ومنفلوطيين و بيزنطيين و البلد هنبيعها بالشبر و الكيلو و الحته ( افتكرت مشهد لعادل امام في مدرسة المشاغبين و المدرسه بتقول له , بكره تكبرو و كل واحد فيكو يمسك حته في البلد , قال لها انا همسك حته قد كده ) , المهم ردت عليها واحده صاحبتها من جروبات الماميز برضه و قالت لها معاكي حق يا حبيبتي , يا حبيبتشي , قامت ست أم شوشو ماكدّبتش خبر و ركنت سبت الغسيل على جنب و دخلت هي كمان و قالت , احنا شكلنا انضحك علينا , البلد بتضيع من إيدينا و الإخوان كان معاهم حق .
.................................
.................................
يا معالي وزير التعليم , لو سمحت , من فضلك , خلي الموسم الدراسي 12 شهر في السنه , و لو قدرت تخليه 13 شهر يبقى قشطه .
.
يا معالي وزير الإتصالات , لو بتحب مصر , لو بتحبها من قلبك , اقطع النت عن جروبات الماميز .
.
يا سيادة الريس , أنا مستغرب لك يا أخي , مستغرب لك والله , انت بتجيب صبرك و قوة احتمالك دي منين ؟ و ليه لحد دلوأتي ماحطتلناش مفتاح قصر الرئاسه تحت الدواسه اللي قدام الباب ؟! .
.......................................................................................................................
Mohamed Hussein
11يونيو 2019·
مصر و سوريا , هنا دمشق من القاهره .
.
عيشت و اتعاملت مع سوريين كتير , خصوصا في السعوديه , و لقيت ان فيهم ميزه و عيب , هي ميزه و عيب في نفس الوقت , إنهم بيعرفو يعيشو في أي دوله و أي مجتمع و يتعايشو و مايحسوش بأي غربه , خصوصا البنت أو المرأه السوريه , ممكن تتجوز مصري أو خليجي او تونسي و تعيش في دولة جوزها و كل فين و فين لما ترجع تشوف أهلها .
.
طبعا ماتوقعتش زي كل الناس إنه ييجي علينا يوم و تكون مصر فيها مليون سوري مثلا , و ييجو كلهم مع بعض في ظرف سنه ولا اتنين , تشوفهم في كل مكان , الراقي و الشعبي , في المولات و الشوارع , أصحاب محلات و عمال , يعني الغني جه و الفقير برضه جه .
.
فيه مشهد بيوجعني جدا و بشوفه يوميا و مش بعرف أنساه , مشهد الست السوريه اللي ممكن تشوفها قدام مول أو شارع رئيسي عامله أكل بيتي و بتبيعه , أو عفوا بتتسول بأي طريقه و تقولك ( من شان الله ) , الحقيقه أنا مش عصفوره و لا قلبي قلب خسايه ولا بتاع سوسوسو , إنما برضه مش حجر ولا حديد مسلح , كل الحكايه إني في اللحظه دي بحط مراتي و أختي و مرات حضرتك في مشهد مماثل , بعكس الأيه , ست بيت معززه مكرمه في بيتها , عندها شقه و مصدر دخل و أولاد ملمومين حواليها , فجأه لظروف ما , بسبب جيش مش متماسك مثلا او حرب أهليه أو مؤسسات ماعرفتش تتعامل مع الحدث أو شعب عزيمته مش زي عزيمتنا , فجأه مراتي و مراتك لقو نفسهم واخدين العيال في ايديهم و مستنيين على منطقه حدوديه و يروحو دوله تانيه يعملو اكل بيتي يبيعوه في الشوارع أو يقفو و يقولو ( حاجه لله ).
.
عارف ان ده مش طبع فينا و إننا مش بنسيب أرضنا , ولا كوليرا ولا طاعون ولا قنبله نوويه ممكن تخلينا نسيبها بالسهوله دي , إنما برضه بقولك مثلا مثلا , فيه كام ست سوريه بقى بالوصف ده ؟ عشرات الألاف اعتقد , فيه كام شاب فقير جه من غير فلوسه و بيدور على حياه كريمه ؟ مئات الألاف .
.
طب نعمل ايه ؟ ولا حاجه يا مولانا , فيه منهم حمار و خروف كده في نفسه و عقله ضاني و بيحب مرسي و أردوغان ؟ أه فيه منهم كتير اوي , زي ماعندنا كتير , طب دول نعمل فيهم ايه ؟ هي يعني المشرحه كانت ناقصه قُتله ؟ لا مش هنعمل حاجه , احنا شعب يابني و كل واحد فينا بيحمل لقب مواطن مش رئيس دوله , يعني ايه ؟ يعني حضرتك السوريين و كل الأجانب في مصر بيتعمل لهم تصريح أقامه يتجدد كل كام شهر ولا كل سنه , والله صاحبنا ده بيهلفط في الكلام و يعبر عن حموريته و بس ؟خليه مرمي , اهو بكره يفهم أو يموت , طب تخطى مرحلة الهلفطه شويه ؟ تصريحه بيتلغى و بيترحل و يبقى لاجئ في أي خيمه في أوروبا ولا تركيا و أردوغان حبيبه يبيع و يشتري فيه , زود اكتر وبقى يحرض ضد الدوله بيتحاكم و يتحبس , زود شويه كمان ؟ بيتعدم , احنا دوله مش طابونه .
.
باختصار عايز أقول , إرحمو عزيز قوم ذل , و مش هناخد الكل بذنب شوية معاتيه و خرفان , ثقو في مؤسساتنا الأمنيه و السياديه و اسمعو كلام الريس عشان بيخاف عالبلد دي أكتر من أي حد فينا , و كفايه هبد يرحمنا و يرحمكم الله .
..........................................................................................................
Mohamed Hussein
11 يونيو 2019 ·
زمان كان عندنا مثل في البلد بيقول ( زي ضرب الغازيه في حمارها ) , و لما دوّرنا على أصل المثل ده لقينا إن الغازيه ( الرقاصه بتاعة زمان ) كان دايما بيكون عندها حمار تروح تحضر بيه الأفراح و الموالد ( قبل مايخترعو العربيات ال BMW و قبل مايبقى اسمها الفنانه الاستعراضيه ) , و دايما معاها عصايه صغيره أوي بتضرب بيها الحمار برقه و سهوكه و تقول له حا , حا يا حمار .
.
أهي ليليان داوود دي بتفكرني بالغوازي بتوع زمان , بتلف بين البلاد و القرى و النجوع , من الثوره المصريه للتونسيه لليبيه للسوريه للسودانيه , غازيه بقى و راكبه حمارها و كل يوم في فرح و مولد شكل , بتتعب و تعرق صحيح بس بتكسب فلوس كتير , المشكله يا أخي في الحمار اللي هي راكباه و متبهدل معاها من 8 سنين و بتستخسر فيه حتى شوية العلف , و برضه بتضربه بالعصايه بمنتهى السهوكه و الرقه و منتهى الديموقراطيه و الربيع العربي , و تقول له حا , حا يا حمار .
........................................................................................................................
Mohamed Hussein
10 يونيو 2019 ·
يا أستاذ يا أستاذ ؟
- نعم يافندم
.
هو حضرتك خلصت هبد في الشعراوي و نحلت وبره و أدليت بدلوك في علوم الدين و فسرت اللي ورا الكلام واللي تحت الكلام ولا لسه ؟
- اه حصل .
.
تمام , و تقمصت شخصية أبو الأسود الدؤلي على شوية سيبويه و قعدت تفنط في حروف التويته بتاعة محمد صلاح و التشكيل و الإعراب عشان تعرف يقصد مين بالشهدا ولا لسه ؟
- اه تقمصت و زي الفل .
.
و لبست بدلة رئيس الجمهوريه و خدت مفتاح قصر الرئاسه وقعدت تنظر عالشعب السوري و تجيب شعوب على مزاجك و تمشيها على مزاجك ؟
- أه طبعا .
.
و قلت بؤين في موضوع قانون الجنسيه اللي بينط في حجرك كل كام شهر و قعدت تقول انا لا أقبل , لا أقبل ولن أتزحزح و شوّحت بإيدك كداهو ؟
- اه عرفت إزاي ؟
.
و بقيت في لحظه خبير أنفاق و في لحظه خبير كماين ثابته و متحركه و خطط و تأمين و في لحظة خبير اقتصاد و هريت و اتشألبت في التسليح و العلاقات الدوليه و القنبله الذريه و دورة كربس و الإنقسام الميتوزي و أسباب انهيار الإتحاد السوفيتي و بقيت خبير نظم تعليم و انظمه تربويه و شعب مرجانيه و أوزون و سمسار مراكب و قباني ولا لسه ؟
- أيوه عملت كل ده .
.
طب تمام أوي , ده شئ عظيم و هايل , ممكن بقى لو سمحت , لو فيها قلة ذوق مني يعني , تمسك اللمبه دي و تطلع عالكرسي ده و تركبها في الدوايه اللي فوق في السقف دي لأنك أطول مني ؟
- لا حضرتك لمبة ايه اللي أركبها؟ اللمبه دي محتاجه كهربائي ,يعني حد متخصص .
...........................................................................................................................
Mohamed Hussein
10 يونيو 2019 ·
المطيه و ناس بتحرق صوابعها بإيديها .
.
المطيه يعني الركوبه , يعني الحمار لما يتحط على ضهره بردعه و اللي رايح واللي جاي يركبه و يسرح بيه , يسرح بيه لأي حته هو عايزها بقى .
.
غريبه أوي , اجازة العيد خلصت و مع ذلك محمد صلاح لسه ماجاش زرانا ولا إدّى للبنات عيديه , الغرور ركبه باين , و ايه يعني يا جدع لما يفوت على 100 مليون مصري يعيد عليهم ولا هو يعني هيتكبر على أهله وناسه ؟! شكله هيتكبر , يبقى لازم و حتما ولابد ننحت في وبره عشان يرتدع و مايعملش كده تاني .
.
و الشعراوي ياخويا , اه الشعراوي , ايه الكلام الغريب اللي بيقوله ده ؟ بقى فيه حد عاقل يقول الكلام ده ؟ يالله بينا يا رجاله ننحت وبر الشعراوي كمان , و ديني مانا سايبه إلا لما يقول حقي برقبتي !!.
..................
بصو يا بني أدمين , ماحنا هنفهم يعني هنفهم , مبقاش عندنا حتى رفاهية الجهل , لأن الحكمه بتقول , ليس ضروري أن تكون خائنا لتخدم عدوك , يكفي جدإ إنك تكون حمار أو مطيه .
....................
هقول لكو أسماء و كيانات و قولو لي ايه العامل المشترك اللي بينها , محمد صلاح , الشعراوي , مجدي يعقوب , ام كلثوم , جمال عبد الناصر , أمناء الشرطه و ظباط الشرطه و الجيش , القضاه , الأزهر الشريف .
.
فكّرو كده يمكن تلاقو عامل مشترك , أيوه بالظبط هو ده , كلهم في فتره من الفترات و في توقيتات معينه اتعرضو لحملات تشويه ممنهجه و مكثقه , الواد يا اخي بتاع السوشيال ميديا اللي شغال مع أكرم صفوان شايف شغله كويس أوي , أو يمكن و جايز احنا اللي بنديله فرصه للنجاح لأننا بنجيد لعب دور ( المطيه ) .
.
الشعراوي مات من 20 سنه و حملة التشويه طلعت فجأه , عبد الناصر مات من 50 سنه و حملات التشويه بتطلع فجأه , أم كلثوم بيرمو لها حمله تشويه كل شويه , الأزهر و تشويهه مستمر , الجيش و الشرطه و أمناء الشرطه , تصدق يا مؤمن من سنتين تلاته كده الواد بتاع اكرم صفوان ركز على امناء الشرطه , و هووووب تلاقي في ظرف 24 ساعه 75 حادثه بطلها أمين شرطه , اللي قال للسواق وريني رخصك فاتأخر في تطليع المحفظه قام ضاربه بالنار, و اللي اتخانق مع جاره عشان الغسيل بينقط قام ضربه بالنار , واللي مراته طبخت له الأكل أورديحي فقام دايس عليها بدبابه و هكذا , و فجأه وقفت الحمله و الواد بتاع اكرم صفوان شال ايده من عالزرار , من وقتها ماسمعناش عن حادثه واحده لأمناء الشرطه , ممممممممممممم أكيد تابو توبه جماعيه , اه تلاقيهم تابو , هي تابو مفيش كلام .
.
مرتبات القضاه كانو بيزودوها كل يوم تلات ,انما من سنتين تلاته بطلو يزودوها , والازهر هو السبب في الإرهاب اللي ضرب الشرق الأوسط و باريس و بروكسل و كوم الشقافه , إيوه اومال ايه ؟ الدنيا كلها بتمشي بحسب رغبة الواد الصايع اللي شغال مع أكرم صفوان .
.
الحقيقه انه مفيش حاجه بتتم صدفه , كلها لعبه بتاعة مخرج العرايس , ضرب في مؤسسات الدوله و تشكيك و تشويه , وضرب في الرموز الوطنيه بتاعة الشباب , و الرموز التاريخيه عشان في النهايه نبقى بلا مؤسسات ولا رموز ولا تاريخ ( ده مايمنعش ان كل مؤسسه لها اخطاء و كل رمز حالي أو تاريخي مابيبقاش معصوم من الخطأ ) , و احنا نلايك و نشير بعنف و نتركب و نحرق صوابع إيدينا بإيدينا , و الواد بتاع أكرم صفوان يسّأف لنا و الجزيره تبقى مبسوطه منكو و مخرج العرايس يقول لكو great , يعني هايلين بس بالإنجليزي .
.......................................................................................................
Mohamed Hussein
·9 يونيو 2019
تعبنا ماراحشي عالفاضي
.
البت لوجي بنتي دخلت في السن الرخم , اللي هو بتاع 12 و 13 سنه , في اللبس مثلا مانلاقيش لبسها في الأطفال عشان كبرت ولا في الحريمي عشان لسه صغيره !!.
.
السن بتاع التمرد و الرخامه و التاتو و الباديكير و المانيكير و الإنبهار بالماركات العالميه و الأفلام و الأغاني الأجنبي مش العربي و ديسباسيتو مش أم كلثوم , السن اللي مابيعجبوش العجب ولا بيعجبه حاجه في البلد , السن اللي بيحسسوك فيه إن الواحد منهم بمقام ألف و عقله ألماظات و جبار وبيمشي عالحيط و ممكن يحكم كوكب الأرض والمجموعه الشمسيه بصباع رجله الصغير, و تيجي تكلمهم فيه عن الوطنيه و الإنتماء و التاريخ يحسسوك إنك دقه قديمه و تراديشنال كده في نفسك , و تريأة و ألش و كومكس , ماهو جبار بقى وبيمشي عالحيط .
.
النهارده لوجئ فاجئتني بصراحه , بابا أنا عايزه أروح سينما , بس احنا يا لوجي خلصنا أجازة العيد و انتو اتفسحتو فسحتين 9تلاته و خلاص , لا بس ماروحناش سينما , طيب اللهم طولك يا روح , عايزه تدخلي فيلم إيه ؟ عايزه أدخل فيلم الممر , فيلم الممر يا لوجي ؟! اه فيلم الممر , بس ده فيلم بيتكلم عن حرب الإستنزاف وبطولات الجيش المصري في الفتره دي , مانا عشان كده عايزه أدخله , طيب لو ماكنتيش تحلفي , يوم الخميس ولا الجمعه هدخلك فيلم الممر .
.
ممممممممم طب والله من فرحتي نسيت إني هتعوّر في 240 جنيه ( 4 تذاكر ) غير قرطاسين فيشار من الحجم الكبير , يبقى المجموع 300 مقفوله , مفيش مشكله خالص , كله يهون عشان خاطر مصر , مصر دي أمي , مفيش نفحه بقى من ست الحبايب ؟! .
........................................................................................................
Mohamed Hussein
8 يونيو 2019 ·
هما مابيلعبوش سيادتك , الجزيره و قنوات الخرفان و صفحاتهم و وسائل الإعلام العالميه و مراكز حقوق اللامؤاخذه الإنسان مابيلعبوش , بينفذو التعليمات بالحرف , اه مجرد أدوات تنفيذ حقيره , هما أتفه من إنهم يكونو بيخططو او يدبرو أو حتى يفكرو , اللي بيخطط و يفكر فوق منهم بكتير و مش هتشوفه في الصوره أبدا .
.
اللي خطط لليله بتاعة الشرق الأوسط دي مكانشي أقصى أمانيه شوية إرهابيين و مرتزقه يجيبهم يحاربو بالسلاح و يرمي لهم شوية دولارات و حشيش , دي الصوره المصغره اوي , الصوره الأكبر و الأشمل بتبقى جوه العقول , اللعبه الأخطر لعبة عقول .
.
هتلاقيهم مثلا بعد كل حادث إرهابي يروجو للتالي , اللي استشهدو في سينا دول ماتو أساسا في ليبيا , تقوم تفهم من كلامهم ان جيشنا بيحارب عالأرض في ليبيا و يقدم شهدا مع ان ده مش حقيقي و هما عارفين انه مش حقيقي , و تفهم من كلامهم برضه ان كده المتحدث العسكري و المتحدث باسم وزارة الداخليه بيضحكو علينا , و ده برضه مش حقيقي .
.
و هتلاقيهم بيروجو في نفس الوقت لإن ده مش إرهاب ولا دول إرهابيين , دول ناس شايلين سلاح بيحاربو جيش و شرطه شايلين سلاح واحنا ناس مدنيين بقى فملناش دعوه بالقصه دي , شوفت اللعبه بتتلعب ازاي ؟ .
.
و يروجو كمان لأن الإرهابيين اللي هما مش إرهابيين عباره عن ناس اتظلمت من اهل سينا و اتهجرو من بيوتهم فبينتقمو و كده , أه الإرهابيين اللي بنلاقيهم من تشاد و النيجر و فلسطين و كازاخستان و السودان و أفغانستان و السنبلاوين و مغاغه و ديروط اسمهم أهالي سينا اللي اتهجرو من بيوتهم !! .
.
فهمت يا مولانا ولا لسه ؟ فهمت يعني ايه إدارة العمليات الإرهابيه ؟ إزاي تدير الحدث و تلعب في عقول ( المرجفين ) و تلففهم حوالين نفسهم يقومو يفقدو الثقه في كل شئ و يشكو حتى في صوابع ايديهم .
.
طب انت شوفت صفحات بتهبد الهبد اللي فوق ده , تفكر في هبدهم أو تخاف ؟ لأ طبعا , الخوف هزيمه و الجهل كمان هزيمه , أيوه تعمل ايه يعني ؟ ولا حاجه يا مولانا , تدخل صفحتهم دي و تكتب لهم كلمتين اتنين بس وانت مبتسم , بس يا خو* , سواء كان موقع قناه او مركز حقوقي او جريده اجنبيه أو صفحة حد من الخرفان و الشمامين , و على فكره لما تقوله يا خو* هتبقى كرمته أخر كرم .
.......................................................................................................
Mohamed Hussein
8 يونيو 2019 ·
النطاعه و العبط .
.
99.9 % من اللي بيهرو و يهبدو بعد أي حادث إرهابي بتكون علاقتهم بالتأمين و التسليح و الخطط العسكريه زي علاقة خرفان الجماعه الإرهابيه بالوطنيه و زي علاقة مذيعين الجزيره بالشرف , يعني بينهم و بين بعض مسافات و سفر بلاد .
.
النطاعه هي إنك تقعد تنظّر عالناس في شغلهم و تفتكس و انت بالكتير تعرف الفرق بين الطياره و الدبابه , ده أخرك يعني .
.
طب لما تكون مواطن مصري و مهتم بحال بلدك و أمنها و استقرارها تعمل ايه في موقف زي ده ؟ هنقول تاني و عاشر :
.
- تترحم على شهدائنا و أولادنا و اخواتنا رجالة الجيش و الشرطه اللي بيحمو أرضنا و عرضنا .
.
- ماتهريش كتير حتى ولو من باب المحبه و الاهتمام , ماتبقاش زي الدبه اللي قتلت صاحبها , اهل مكه أدرى بشعابها .
.
- ماتنشرش أي خبر أو تقرير أو أو إلا من الصفحات الرسميه المعتمده .
.
- تفهم إن دم ولادنا اللي بيستشهدو مش سلعه تجيب بيها لايكات و لا موسم بنبيع فيه وطنيه , و إلا تبقى مجرد نطع.
.
- مانروّجش للحادث بشكل كبير و مانكتبش عنه كتير , و إلا هنبقى بنحقق للإرهابيين و اللي وراهم اللي هما عايزينه , هما بيعملو العمليه الارهابيه و أقصى أمانيهم انه يتم الترويج لها بشكل كبير , و نلاقي نفسنا في حالة قلق و خوف و حداد , لأ , احنا بنعيد و بنلعب مع عيالنا , و بنتعلم و بنشتغل و ولادنا بيحمونا , احنا أُمّه بتعرف تعيش و تضحك و تشتغل و تحب حتى و هي بتحارب .
.
- نقطه مهمه للي محتاج توضيح , للوطني اللي بس مش فاهم , او بيتخض بسرعه , حرب يعني حرب , حرب يعني خساير , و بتتحسب إزاي ؟ بتتحسب بنسبه و عدد و مقارنة سنه بالتانيه , يعني كام عملية ارهابيه في ال2014 و كام عمليه ارهابيه في 2019 , عدد الشهدا هنا كام و هنا كام , ده كمان مقياس النجاح , و بلد أمنه مش معناها انها زيرو في العمليات الإرهابيه , ولا معناها انها زيرو في الجريمه .
.
- نقول أكتر , الأجهزه الأمنيه في أي دوله لما تكون صاحيه اوي و متدربه كويس و متطوره جدا , بتواجهها مثلا ألف عملية تهريب مخدرات من عالحدود في السنه , تنجح في إحباط 700 عمليه منهم و 300 لأ ( ده نجاح كبير جدا ) , و ال 300 اللي ماتنجحش فيهم يتوزع فيها مخدرات من التجار عالشباب , تنجح تاني في القبض على 200 تاجر و 100 لأ , و هكذا , يعني الحكايه مستحيل تكون صفر في أي بلد في الكون , دي طبيعة الأشياء .
.
- فاحنا كمصر بنواجه إرهاب مدعوم من دول عظمي و دويلات و أكشاك , و إرهابيين و مرتزقه من جنسيات مختلفه بيتصرف عليهم عشرات المليارات و بيتخطط لهم على اعلى مستوى في منطقه صحراويه مساحتها تعادل مساحة خمس ست دول ( ده اسمه حجم التحدي ) , تبقى ناجح امتى بقى ؟ لما تقدر تحبط أغلب العمليات في وقت التخطيط لها , و لما تقدر تتصدى لأغلب العمليات اللي ماقدرتش تحبطها من البدايه , اغلب العمليات مش كلها , لانك مستحيل تتصدى ل كلها , حتى لو كان اسمك الولايات المتحده الأمريكيه أو اليابان .
.
- باختصار , النطاعه انك تنظّر عالناس في شغلهم بجهل , و إنك تروج للحادث من مصادر بير السلم و إنك تستغل الحادث في جمع شوية لايكات و شهره وهميه , و العبط إنك ماتبقاش فاهم فتقوم تتخض أوي , ماتبقاش فاهم يعني ايه إرهاب و يعني إيه جريمه و يعني إيه حرب .
....................................................................................................
Mohamed Hussein
7 يونيو 2019 ·
البت لوجي بنتي جمّعت عيديات 700 جنيه و لمار 700 زيها , يبقى المجموع 1400 , مبلغ كبير و مغري .
طب أقول لهم هاتو الفلوس دي أحوّشهالكو ؟
ولا أقول لهم نستثمرها في مشروع صغار المستثمرين ؟
و لّا احط لهم حتة حشيش في شنطة المدرسه و أبلغ عنهم ؟
ولا أقول إنهم على صلة بالجماعات الإرهابيه ؟
و لّأ أقول إنهم لما بتيجي سيرة الريس بيقولو كلام مش حلو و يعملو بإيديهم كداهو ؟
..........................................................................................................
Mohamed Hussein
4 يونيو 2019 ·
كل سنه و حضراتكو طيبين و كل حبايبكو بخير و سعاده و مصر دايما مرفوعه راسها بأهلها و ناسها
.
كلمتين عايز أقولهم لأصدقائي من باب المحبه
- حكاية المعايدات اللي بتتبعت في رساله للكل , تهاني و مباركات , احيانا بينطبع عليها اسم الشخص كأنها صوره يعني , و دوسة زرار تروح للكل , الأصدقاء و الفولورز و المغول و المماليك , الحكايه دي في الواقع بتفكرني بأعضاء مجلس الشعب زمان اللي كانو قبل كل مناسبه يعلقو يافطه قماش بعرض الشارع , السيد فلان الفلاني عضو مجلس الشعب يهنئ أهالي الدائره الكرام بمناسبة كذا , و الحقيقه كنت لما بشوف اليافطه دي مش ببقى عارف المطلوب ايه ؟ نجيب سلالم مثلا و نطلع كلنا نرد التهنئه على نفس اليافطه , و نقوله ومعاليك طيب و بخير ؟ ولا نعمل اننا مش واخدين بالنا و لا نعمل ايه بالظبط ؟ و الحقيقه ممكن بشكل ما تكون مقبوله عضو برلمان بيعمل دعايه لنفسه و يفكر الناس بإسمه , مقبول ماشي .
.
- لكن أصدقائي بيستفيدو ايه لما يعملو الحكايه دي عالفيس بوك ؟ بتحسو بايه يعني ؟ خلاص كده عملتو اللي عليكو وبعتو التهنئه للناس , و كل ثانيه تيجي رساله بتهنئه من حد مايعرفنيش اساسا ولا انا في دماغه بس هو بيبعت للكل ؟ طب المفروض نرد ولا نعمل لوحه مماثله و ندوس على زرار مماثل و نبعت للكل و اللي يفتح الماسينجر عنده يتفاجئ اننا قاعدين في الأنتريه من غير احم ولا دستور , معالي الأستاذ الدكتور محمد حسين يهنئكم بعيد الفطر المبارك .
.
- بصو هو الكلام مش مترتب او انا مش عارف اقول وجهة نظري , هقولها بشكل تاني و احترامي للجميع , عشان نبقى بني أدمين فاحنا مش ضروري نكون اعضاء مجلس شعب , كفايه اوي نبقى بني أدمين , أيوه نعملها ازاي دي بقى ؟ كل واحد يكتب على صفحته بوست تهنئه , على صفحته هو , مش على حيطان الناس ولا يعلق صورته في أنتريهاتهم فجأه , ولما يكتب تهنئه على صفحته تقوم الناس تقوله و انت طيب , طب هو له اصدقاء غاليين اوي مش زي بقية الناس يعمل ايه ؟ يبعت لهم رساله من سطرين , كل سنه وانت طيب يا فلان , عيد مبارك عليك و على اسرتك , رساله فيها اسم الشخص الغالي عليك , حتى لو كانو عشرين شخص فالحكايه مش هتاخد 10 دقايق , انما فيها أدميه بما يكفي .
.
- برضه هو انا عايز أقول ايه ؟ عايز اقول ان اللي بيحصل ده اسمه مسخ , حاجه كده بلاستيك , و شويه بشويه بنفقد أدميتنا و بنتحول لكيانات الكترونيه ملهاش أي صفه ولا طعم , و زراير بتدوس عليها تبعت للكل , بنتخلى عن أدميتنا لأن فيه برامج معموله مخصوص عشان تحولنا لعرايس ممسوخه , و ييجي عليك يوم تفتكر إن أخر مره سلمت فيها على حد بالإيد و سلام حار كانت من عشرين تلاتين سنه !! .
.
- اخر حاجه عايز اقولها لأصدقائي الأفاضل اللي عندهم اجازة الصيف 4 شهور بس مابيحلاش لهم المصايف إلا في ال 3 أيام بتوع العيد , وتلاقي استاذ حسن خد مراته و عياله و راحو شرم , واخته مدام نرمين راحت مع جوزها الساحل , و امهم قاعده في مدينة نصر , واخوهم في طنطا , بيعيدو على بعض ازاي و بيعيدو على امهم ازاي ؟ برسالة عالواتس و وراها قلب و دبدوب و وش مكسوف و يشعر بالبهجه؟ يعني مش هيتقابلو و يعيدو على بعض و يبوسو ايد امهم وياكلو مع بعض لقمه أو يشربو كوباية شاي ؟ ده حتى كلمة عيد من عاد يعود , يعني ناس بتود بعض , لا هو كده حلو اوي , عشان احنا لازم نتطور و نساير العصر و نتحول من لحم و دم ومشاعر و صلة أرحام لكائنات بلاستيك وبرامج و إيموشنات مصطنعه و مسخ جميل .
................................................................................................................
Mohamed Hussein
3 يونيو 2019·
دار الإفتاء تعلن : احنا عارفين إن عندكو 3 علب زبادي لسه موجودين في باب التلاجه و مهانشي علينا يبقو إكسبايرد و يترمو .
.......................................................................................................................
Mohamed Hussein
3 يونيو 2019 ·
خلاصة الكلام
.
صورة صلاح مع أبو هبابه و أي سيره لأبو هبابه على لسان صلاح بتنرفز و تستفز الناس و انا منهم , صلاح ممكن يكون بيتعامل بحسن نيه و بطيبة الفلاحين اللي زي حالاتي , و ممكن يكون انشغاله بعالم الاحتراف بكل تفاصيله بييخليه مش مستوعب الفكره اللي بنتكلم فيها و ممكن و ممكن و ممكن .
.
طب يعتذر مثلا ؟ لأ , انا شايف إن الاعتذار ملوش لازمه , و تقييمي للموقف كله ان حركة أبو هبابه و تلزيقه في صلاح في كل مناسبه وراها إن و كان و كل علامات الإستفهام لأنها زادت أوي عن الحد و بيتم الترويج لها بشكل مريب
.
أه وارد جدا تكون الجماعه الإرهابيه بتحاول تحرق حد بنجومية صلاح و تدمر قدوه عايش و هيعيش عليها شبابنا و أطفالنا أو بيحاولو يستقطبوه ناحيتهم , أه انا مؤمن تماما إن شهرة صلاح و نجوميته تخطت كل الحدود و الحواجز و هنا مايبقاش مجرد شخص عادي يٌقبل منه اللي بيُقبل من غيره , و المعنى الكامل لأهمية صلاح في حياتنا و حياة الأجيال الجايه بتتطلب تدخل من الدوله و بيتطلب إدارة , إداره ماتتعارضش مع حيثيات الإحتراف اللي عايشها صلاح , يعني يكسب زي ماهو عايز و يعمل اعلانات و خلافه و يلعب في الفريق اللي يحبه , ربنا يزيده , إدرة تتعامل باحترافيه و حذر مع كيان اسمه محمد صلاح , ممكن الكيان ده يكون خير كبير للشباب و لمعنى الطموح في كل المجالات , و ممكن لا قدر الله تنقلب الحكايه لصدمة العمر و لإحباط جيل بحاله .
.
إداره هنا بقصد بيها مؤسسه سياديه و جهه بتجيد التعامل و الشرح و التوضيح و الرعايه و الحمايه و كل شئ , إدارة هنا بقصد بيها رجالة البلد دي اللي شالوها و بيشيلوها دايما , إدارة هنا ماقصدش بيها أبدا شوية الأرزقجيه و السببوبجيه بتوع اتحاد الكوره , لأن الموضوع أكبر منهم و أنضف بكتير .
.
لو سمحتو يا ساده يا أفاضل , ماتسيبوش الولد ده لأي جهه قذره تشوهه و تستغله و في النهايه تهدمه أو تبعده عن حبه لبلده , احنا أولى بإبننا .
.
أما أصدقائي الأفاضل اللي مستحيل أشكك أبدا في وطنيتهم و حبهم للبلد دي , عايز أقول لهم , اللوم مطلوب و العتاب واجب من غير تشويه ولا دبح , و عايز أقول لهم كمان ياريت عشان خاطر ربنا ماتمشوش توزعو صكوك وطنيه عالناس و تصنفهوهم في لحظة غضب , وياريت تفهمو إن دم الشهيد مش لعبه عشان نلف و ندور بيه عالبوستات و نحطه في رقبة الناس اللي بتحب البلد دي بجد , يعني باختصار ياريت تهدو شويه , و للجميع كل الاحترام .
...........................................................................................................
Mohamed Hussein
2 يونيو 2019 ·
بنجيد احنا و نتنفنن في تقطيع الرموز في كل المجالات , مايجيلناش نوم يا أخي لو ماقطعناش فيهم و شوهناهم , و كل رمز في كل مجال عايزينه نسخه طبق الأصل من كل واحد فينا , ماعرفش إزاي .
.
أحمد زويل العالم الحاصل على جائزة نوبل واللي عرض على مصر كل علمه و أبحاثه و قال للبلد انا تحت أمرك , قطعناه برضه , أصله كان مستشار للرئيس الأمريكي , أصله مابيحبش المحشي وانا بحب المحشي , و أي هبل في الجبل .
.
فاروق الباز نفس الشئ , جه وجايب معاه مشروع عظيم لمصر , يا ترى جايبه ليه ؟ مش يمكن وراه إن و أخواتها ؟ ده عايش في أمريكا يا عم الحاج و هي أمريكا هيجيلنا من وراها خير ؟
.
أم كلثوم عملت اللي محدش عمله ولا حد هيعمله لا في الفن ولا في حبها لبلدها , و مع ذلك , يا عم ام كلثوم غنّت أيام الملك و الملكيه , نرجمها بقى ونشوهها .
.
محمد صلاح , اللاعب المصري و العربي اللي مجاش ولا هييجي زيه , بالأرقام و الحسابات , هداف الدوري الإنجليزي الأقوى في العالم لموسمين متتاليين , اللاعب اللي لعب اتنين نهائي دوري أبطال أوروبا سنتين ورا بعض ولولا اصابته المتعمده في النهائي الأول كان هيبقى فيه كلام تاني , دوري أبطال أوروبا اللي بقينا نشوفه و نتفرج عليه و يتقال فيه اللاعب المصري فلان الفلاني بعد ما كان أخرنا نتفرج على إسكو و السكه الحديد في كاس مصر , دوري أبطال أوروبا و الدوري الإنجليزي اللي بيشاهدهم اتنين تلاته مليار بني أدم في كوكب الأرض , و اللاعب المصري اللي اسمه و اسم بلده بيتنطق ب 50 لغه مختلفه كل يومين تلاته , واللي له عشاق و مشجعين في اليابان و جنوب أفريقيا و البرازيل و القطب المتجمد الشمالي , و أطفال بيلبسو التي شيرت بتاعه في كازاخستان و الأرجنتين و كندا , برضه لازم نشوهه و نجلده و نرجمه .
.
أصل صلاح متصور مع أبو تركيه , وبيقول للمذيع سلم لي على ابو تريكه , مايقول يا أخي ؟ مايقول ؟ أنا يمكن أكون اكتر واحد بيلعن جدود أبو تريكه عشان علاقته بالجماعه الارهابيه , لكن صلاح بيتعامل معاه بحكم زمالة الملعب و بحكم ان أبو زفت ناطط له في كل حته , في حفل الكاف لقاه قدامه , و في مقابلة بين سبورت عارف ان أبو نيله قاعد في ستوديو التحليل .
.
يا بني أدمين كفايه , و خلو السؤال بالنسبالكو كده , صلاح اتأخر مره عن منتخب مصر ؟ صلاح قال مش لاعب الماتش الفلاني و فيه لاعبين كتير محترفين أفارقه أقل منه في المستوى و الأهميه بيرفضو اللعب , عمل كده ؟ صلاح بيلعب مع المنتخب بحماس أقل من حماسه مع ليفربول ؟ طب شوف لحظة مادخل فينا هدف التعادل في ماتش التأهل للمونديال , صلاح لعب كاس العالم و هو مصاب , صلاح بيرفع علم مصر و يطوف بيه ملاعب انجلترا في نهاية كل موسم رياضي و مع كل تكريم , صلاح امبارح رفع علم مصر و هو شايل كاس أبطال أوروبا , صلاح بيتبرع لبلده و مابيبخلش عنها أبدا , ارحمو الواد بقى عشان ربنا يرحمكو و يرحمنا برحمته .
.................................................................................................................
Mohamed Hussein
1 يونيو 2019 ·
أخيرا , ليفربول بطلاً لدوري أبطال أوروبا , البطوله الأغلى و الأشهر في العالم للمره السادسه في تاريخه , بهدفي محمد صلاح و أوريجي , أقطع دراعي من هنا إن الواد محمد صلاح ده بيشتغل في مجموعة جلال بيه .
..............................................................................................................
Mohamed Hussein
1 يونيو 2019 ·
بشاير العيد
.
- من كام يوم المخابرات المصريه تتسلم هشام عشماوي أخطر إرهابي في المنطقه , اللي هو كنز المعلومات و الصندوق الأسود .
.
- أول امبارح , المجلس العسكري الحاكم في السودان بيقفل مكتب قناة الخنزيره و يسحب تراخيص الموظفين و الصيع اللي شغالين فيها .
.
- امبارح السودان بتسحب سفيرها من الكشك القطري للتشاور , و فيه أنباء عن استعداد السودان لتسليم قيادات الإرهابيين اللي هربو للخرطوم أيام عمر البشير .
.
- والنهارده جماعة الإخوان الإرهابيه منزله بيان بخصوص القمه العربيه و الإسلاميه و بتدعو لنبذ الشقاق و رأب الصدع و تجاوز الخلافات العربيه , أه و عهد الله .
.
يابني ماحنا خلاص قولنالك , مصر دلوأتي بتلعب سينجل و الباقي كله نيكست , و غالبا كده المنطقه دي كلها بتشتغل حاليا في مجموعة سيادة اللوا جلال .
................................................................................................................
Mohamed Hussein
1 يونيو 2019 ·
اللي بيحصل في ستاد رادس التونسي ده لو حصل عندنا في مصر كان زمان الخنزيره و البي بي سي و أمريكا و بريطانيا و لجنة حقوق الانسان و المغول و البيزنطيين قالبين الدنيا علينا مع حملة كوميكس بيض من بتوع الخرفان و شمامين الكوله .
.
الترجي التونسي بيلاعب الوداد المغربي ماتش العوده في نهائي أبطال أفريقيا , الترجي جاب جون و الوداد له هدف الحكم ماحسبوش , لاعبي الوداد طلبو من الحكم انه يستخدم تقنية ال var , راح الراجل يستخدمها ياخويا لقاها قال ايه مش شغاله , ماتعرفش بقى شدو الفيشه بتاعة الجهاز ولا حد لعب في التقنيه و بوظها ولا عيل خد الجهاز و جري , الماتش متوقف من نص ساعه تقريبا و غالبا كده بعتو يجيب الواد سرسأ الكهربائي يشوف الحكايه دي .
.
انا مش هستبعد بعد كده ان الفيفا تنزل بيان تقول فيه , عليا الطلاق ماحنا منظمين بطوله في أفريقيا بعد كده .
................................................................................................................
15 يونيو 2019 ·
لما تكون هي رايحه تزور أمها و واخده جوزها معاها , و تتفاجئ إن بنات خالتها موجودين , تمسك إيد جوزها و تضحك أوي عشان تثبت لبنات خالتها انها سعيده أوي في حياتها مع جوزها أبو عيالها , و إنه مش حارمها من أيتها حاجه .
..............................................................................................................
Mohamed Hussein
15 يونيو 2019 ·
النهارده الصبح عبد الفتاح السيسي راح يزور معسكر منتخب مصر اللي بيتدرب في ستاد الدفاع الجوي , بيقول لهم إن حلم البطوله و إسعاد 100 مليون مصري في إيديكو انتو , و بعدين بص عالملاعب و التجهيزات
.
أكتر حاجه عجبتني في الصور و المشهد إن الريس لما حب يسلم عاللاعبين واحد واحد اصطحب معاه كابتن الفريق أحمد المحمدي , مع إن السلام ده ودّي و كان ممكن يخلي محمد صلاح اللي يعمل كده باعتبار ان صلاح في ليفل شهره و نجوميه تاني خالص , بس هو عبد الفتاح السيسي تربية المؤسسه العسكريه اللي ماتعرفش التجاوز , فيه حاجه اسمها قائد كتيبة أو كابتن فريق حتى لو كان صف الجنود اللي قدامه فيهم واحد مرشح بقوة لجايزة أحسن لاعب في العالم .
..............................................................................................................
Mohamed Hussein
14 يونيو 2019 ·
على سبيل الإعتراف
.
لو واحده بعتت لي طلب صداقه و دخلت صفحتها لقيتها كاتبه في البايو بتاعها حاجة من الحاجات دي ( دم عروقي كبرياء , أنا امرأه قلما يجود الزمان بمثلها , إحذر من غضب أنثى المعرفشي ايه , ناعمة أنا كالحرير و حادة كالسيف , أبحثُ عن جُرْحٍ دفين بين صبّار القرافه , كل شئٍ حولي عبثٌ ينبعث منه دخان , لا تهمني خطواتي البطيئه فجمالي يسبقني دائما بخطوتين , كبريائي سر أناقتي , إخلع حذائك قبل أن تدخل صفحتي فهنا قُدس الأقداس و عباس ابن فرناس .... إلخ ) , بغمض عيني و أعمل بلوك فوراً أيا مايكون توجهها السياسي , أنا أصلي بقيت بروح لدكتور المراره أكتر ما بستحمى , و كل مره يقولي أهم نصيحة يا محمد , أهم نصيحه , إبعد عن السمك و ( البيض ) .
.................................................................................................................
Mohamed Hussein
13 يونيو 2019 ·
الدراما و السينما لهم دور مهم جدا في تشكيل الوعي بتاع أي شعب في الدنيا , فيلم قوي أفضل من مليون مقال , و مسلسل قوي أفضل من مليون خطبة عصماء و مليون ساعه عالهوا فيها شوية مذيعين و شوية ضيوف بيهرو و يتشألبو .
.
نجاح مسلسل كلبش و فيلم الممر لهم ترجمه واحده بس , ترجمه بتقول إننا حاليا في مرحلة وعي و في طفره وطنيه حقيقية بعد سنين طويله من الغيبوبه و التشويه و طمس الهويه
.
عندي اقتراح بخصوص فيلم الممر تحديدا , أتمنى اقتراحي ده يوصل لحد من المسئولين , بعد نهاية العرض التجاري للفيلم في السينما و بعد مايستكمل مسيرة نجاحه في الصيف الحالي , نبدأ مع الموسم الدراسي الجديد نعمل رحلات مجانيه لطلبة المدارس من أول اولى اعدادي لتالته ثانوي , رحلات مجانيه أو بأجر رمزي , اللي هو التكلفه اللي ممكن تاخدها قاعة العرض , و ياريت لو نقدر كل سنه نعمل فيلم بنفس القوه و الجمال .
.
تاريخنا و انتصاراتنا و صمودنا و حالنا و محتالنا محتاجين ألف فيلم جيد بعيد خالص عن أفلام و مسلسلات شمامين الكوله و خالد يوسف و بعيد تماما عن تمثيل فيفي عبده و هي بتهز رقبتها يمين و شمال عشان أصلها بتلعب دور المعلمه و كده, و بعيد تماما عن خفة دم مي عز الدين اللي يتفات لها بلاد .
..............................................................................................................
Mohamed Hussein
12 يونيو 2019 ·
و إيه يعني لما ابننا صلاح يلبس شورت و يروح يصيف في الغردقه و يبلبط في المايه ويصطاد سمك مشوي و مقلي فتقوم الجرايد العالميه منزله صورته وهو بيصيف و يصطاد و تبقى أكبر حملة دعاية للسياحة في مصر ؟
.
هو لو وطني و بيحب مصر بجد , لو بيحبها من قلبه , كان عزمنا كلنا و خدنا معاه و جاب لكل مواطن مركب و سناره و مزه روسيه و كيلو كباب و إزاتين بيره مشبّرين
..................................................................................................................
Mohamed Hussein
11 يونيو 2019 ·
بالراحه خالص , بهدوء شديد
.
بصو يا جدعان
- من حقنا نقول رأينا , و أيا مايكون رأينا و اتجاهه فهو مفيد للبلد , بس فيه فرق شاسع ما بين الرأي و الهبد .
.....................
بالراحه كده و واحده واحده
1- هو فيه طوفان ضرب المنطقه بتاعتنا دي أخر 10 سنين ؟
- أه طبعا .
.
2- مصر نجت من الطوفان ده ؟
- أه .
.
3- يعني الحرب خلصت و نرمي السلاح و ندلدل رجلنا في ماية البيسين ؟
- لا , عدينا مرحلة الطوفان بس الحرب ماخلصتش , الجزء الصعب خلص , اللي باقي اسمه الجزء الطويل , اللي محتاج نفس طويل .
.
4- طب ليه مصر تجاوزت و نجت من الطوفان و غيرها لا ؟
- بعد كرم ربنا سبحانه و تعالى و حفظه للأرض دي فيه اسباب مهمه , زي الشعب و هنا بقصد الشعب الغير مسيس , يعني الفلاح و العامل و الطالب و ست البيت اللي مشغوله بتربيه عيالها , و الناس اللي مكانشي عندها وقت تهري و تهبد , لو على شعب الفيس بوك و تويتر كان زمانا خربناها مداين.
.
5- و ايه كمان من أهم أسباب النجاه ؟
- الجيش و الشرطه والأزهر و الكنيسه و المؤسسات السياديه , مهمه جدا الحكايه دي , مهمه اوي , و يمكن تكون كلمة الفصل بينا و بين الدول اللي ماقدرتش تنجو من الطوفان .
.
6- طيب الكلام ده معناه ايه ؟
- معناه باختصار انك تحط في بطنك بطيخه صيفي و تصدق بقى إن اللي قدر ينجو بالبلد دي من الطوفان لاهو خاين ولا جاهل , ده و طني و مفتح عنيه , و شرب البحر فمش هيغلب في إنه يشرب بحيره .
.
7- يعني ايه الكلام ده ؟
- يعني يا مولانا أي حاجه تخص الأمن القومي لمصر , لو سمحت , من فضلك ماتهريش و تهبد فيها , لا انت أذكى من مؤسسات البلد دي الأمنيه و السياديه ولا انت اكتر وطنيه منهم ( و ده لا ينتقص من وطنيتك في شئ ) .
.
8- حاجات زي ايه اللي بتخص الأمن القومي دي ؟
- زي السوريين اللي في مصر و عددهم كبير , حتى لو حضرتك متخوف لازم تفهم إنك في دوله مش في طابونه , وفيه حسابات لكل شئ , و الدوله مش بتدار بقاعده مسطبه , ولا بطريقة انتو حلوين تعالو , لا انتو وحشين امشو بقى , امشو يا وحشين
.
9- و زي إيه كمان يخص الأمن القومي ؟
- زي تعديل الدستور , خصوصا المواد المتعلقه بالجيش ومدة الرئاسه و حماية الجيش لديموقراطية الدوله , الحاجات دي حتى لو يبان قدامك انها شغل برلمان فانت لازم تفهم ان البرلمان هنا مجرد واجهه ديموقراطيه مش اكتر , وان كل كلمة في المواد دي أشرف عليها مؤسسات سياديه بما فيها مؤسسه الرئاسه .
.
10- و زي ايه برضه ؟
- زي قانون الجنسيه , ده أمن قومي و ألف خط أحمر , تأكد برضه ان رجالة البلد دي لا بيبيعو جنسيتها لكل من هب ودب , ولا بيخفي عليهم كل الهري اللي بنهريه في الموضوع ده و كل التخوفات , و البرلمان هنا كمان مجرد واجهه .
...........................
يارب تكون رسالتي وصلت بطريقه واضحه , مع كل و كامل احترامي للجميع .
...................................................................................................................
Mohamed Hussein
11 يونيو 2019 ·
عارفين بقى ؟ تلتين مشاكلنا و تلتين الهري اللي داير اليومين دول سببهم الحقيقي إن الموسم الدراسي خلص في أغلب البيوت المصريه ,فحصل بعدها هجوم من جروبات الماميز, و بعد ماكانو مشغولين بالإمتحانات و البوكلت و التابلت و حوت الكيميا و ديناصور الأحياء هجمو علينا و بقو بيتكلمو و يهبدو في تأمين الكماين و العلاقات بين الدول و الشعوب و قانون الجنسيه و يسألو فين دور المؤسسات السياديه ؟!.
.
لسه من شويه شايف واحده من جروبات الماميز بتقول ان الجنسيه المصريه هياخدها اي عيل معدّي في الشارع و مصر هتتملي اسرائيليين و فلسطينيين و هندوس و دروز ومنفلوطيين و بيزنطيين و البلد هنبيعها بالشبر و الكيلو و الحته ( افتكرت مشهد لعادل امام في مدرسة المشاغبين و المدرسه بتقول له , بكره تكبرو و كل واحد فيكو يمسك حته في البلد , قال لها انا همسك حته قد كده ) , المهم ردت عليها واحده صاحبتها من جروبات الماميز برضه و قالت لها معاكي حق يا حبيبتي , يا حبيبتشي , قامت ست أم شوشو ماكدّبتش خبر و ركنت سبت الغسيل على جنب و دخلت هي كمان و قالت , احنا شكلنا انضحك علينا , البلد بتضيع من إيدينا و الإخوان كان معاهم حق .
.................................
.................................
يا معالي وزير التعليم , لو سمحت , من فضلك , خلي الموسم الدراسي 12 شهر في السنه , و لو قدرت تخليه 13 شهر يبقى قشطه .
.
يا معالي وزير الإتصالات , لو بتحب مصر , لو بتحبها من قلبك , اقطع النت عن جروبات الماميز .
.
يا سيادة الريس , أنا مستغرب لك يا أخي , مستغرب لك والله , انت بتجيب صبرك و قوة احتمالك دي منين ؟ و ليه لحد دلوأتي ماحطتلناش مفتاح قصر الرئاسه تحت الدواسه اللي قدام الباب ؟! .
.......................................................................................................................
Mohamed Hussein
11يونيو 2019·
مصر و سوريا , هنا دمشق من القاهره .
.
عيشت و اتعاملت مع سوريين كتير , خصوصا في السعوديه , و لقيت ان فيهم ميزه و عيب , هي ميزه و عيب في نفس الوقت , إنهم بيعرفو يعيشو في أي دوله و أي مجتمع و يتعايشو و مايحسوش بأي غربه , خصوصا البنت أو المرأه السوريه , ممكن تتجوز مصري أو خليجي او تونسي و تعيش في دولة جوزها و كل فين و فين لما ترجع تشوف أهلها .
.
طبعا ماتوقعتش زي كل الناس إنه ييجي علينا يوم و تكون مصر فيها مليون سوري مثلا , و ييجو كلهم مع بعض في ظرف سنه ولا اتنين , تشوفهم في كل مكان , الراقي و الشعبي , في المولات و الشوارع , أصحاب محلات و عمال , يعني الغني جه و الفقير برضه جه .
.
فيه مشهد بيوجعني جدا و بشوفه يوميا و مش بعرف أنساه , مشهد الست السوريه اللي ممكن تشوفها قدام مول أو شارع رئيسي عامله أكل بيتي و بتبيعه , أو عفوا بتتسول بأي طريقه و تقولك ( من شان الله ) , الحقيقه أنا مش عصفوره و لا قلبي قلب خسايه ولا بتاع سوسوسو , إنما برضه مش حجر ولا حديد مسلح , كل الحكايه إني في اللحظه دي بحط مراتي و أختي و مرات حضرتك في مشهد مماثل , بعكس الأيه , ست بيت معززه مكرمه في بيتها , عندها شقه و مصدر دخل و أولاد ملمومين حواليها , فجأه لظروف ما , بسبب جيش مش متماسك مثلا او حرب أهليه أو مؤسسات ماعرفتش تتعامل مع الحدث أو شعب عزيمته مش زي عزيمتنا , فجأه مراتي و مراتك لقو نفسهم واخدين العيال في ايديهم و مستنيين على منطقه حدوديه و يروحو دوله تانيه يعملو اكل بيتي يبيعوه في الشوارع أو يقفو و يقولو ( حاجه لله ).
.
عارف ان ده مش طبع فينا و إننا مش بنسيب أرضنا , ولا كوليرا ولا طاعون ولا قنبله نوويه ممكن تخلينا نسيبها بالسهوله دي , إنما برضه بقولك مثلا مثلا , فيه كام ست سوريه بقى بالوصف ده ؟ عشرات الألاف اعتقد , فيه كام شاب فقير جه من غير فلوسه و بيدور على حياه كريمه ؟ مئات الألاف .
.
طب نعمل ايه ؟ ولا حاجه يا مولانا , فيه منهم حمار و خروف كده في نفسه و عقله ضاني و بيحب مرسي و أردوغان ؟ أه فيه منهم كتير اوي , زي ماعندنا كتير , طب دول نعمل فيهم ايه ؟ هي يعني المشرحه كانت ناقصه قُتله ؟ لا مش هنعمل حاجه , احنا شعب يابني و كل واحد فينا بيحمل لقب مواطن مش رئيس دوله , يعني ايه ؟ يعني حضرتك السوريين و كل الأجانب في مصر بيتعمل لهم تصريح أقامه يتجدد كل كام شهر ولا كل سنه , والله صاحبنا ده بيهلفط في الكلام و يعبر عن حموريته و بس ؟خليه مرمي , اهو بكره يفهم أو يموت , طب تخطى مرحلة الهلفطه شويه ؟ تصريحه بيتلغى و بيترحل و يبقى لاجئ في أي خيمه في أوروبا ولا تركيا و أردوغان حبيبه يبيع و يشتري فيه , زود اكتر وبقى يحرض ضد الدوله بيتحاكم و يتحبس , زود شويه كمان ؟ بيتعدم , احنا دوله مش طابونه .
.
باختصار عايز أقول , إرحمو عزيز قوم ذل , و مش هناخد الكل بذنب شوية معاتيه و خرفان , ثقو في مؤسساتنا الأمنيه و السياديه و اسمعو كلام الريس عشان بيخاف عالبلد دي أكتر من أي حد فينا , و كفايه هبد يرحمنا و يرحمكم الله .
..........................................................................................................
Mohamed Hussein
11 يونيو 2019 ·
زمان كان عندنا مثل في البلد بيقول ( زي ضرب الغازيه في حمارها ) , و لما دوّرنا على أصل المثل ده لقينا إن الغازيه ( الرقاصه بتاعة زمان ) كان دايما بيكون عندها حمار تروح تحضر بيه الأفراح و الموالد ( قبل مايخترعو العربيات ال BMW و قبل مايبقى اسمها الفنانه الاستعراضيه ) , و دايما معاها عصايه صغيره أوي بتضرب بيها الحمار برقه و سهوكه و تقول له حا , حا يا حمار .
.
أهي ليليان داوود دي بتفكرني بالغوازي بتوع زمان , بتلف بين البلاد و القرى و النجوع , من الثوره المصريه للتونسيه لليبيه للسوريه للسودانيه , غازيه بقى و راكبه حمارها و كل يوم في فرح و مولد شكل , بتتعب و تعرق صحيح بس بتكسب فلوس كتير , المشكله يا أخي في الحمار اللي هي راكباه و متبهدل معاها من 8 سنين و بتستخسر فيه حتى شوية العلف , و برضه بتضربه بالعصايه بمنتهى السهوكه و الرقه و منتهى الديموقراطيه و الربيع العربي , و تقول له حا , حا يا حمار .
Mohamed Hussein
10 يونيو 2019 ·
يا أستاذ يا أستاذ ؟
- نعم يافندم
.
هو حضرتك خلصت هبد في الشعراوي و نحلت وبره و أدليت بدلوك في علوم الدين و فسرت اللي ورا الكلام واللي تحت الكلام ولا لسه ؟
- اه حصل .
.
تمام , و تقمصت شخصية أبو الأسود الدؤلي على شوية سيبويه و قعدت تفنط في حروف التويته بتاعة محمد صلاح و التشكيل و الإعراب عشان تعرف يقصد مين بالشهدا ولا لسه ؟
- اه تقمصت و زي الفل .
.
و لبست بدلة رئيس الجمهوريه و خدت مفتاح قصر الرئاسه وقعدت تنظر عالشعب السوري و تجيب شعوب على مزاجك و تمشيها على مزاجك ؟
- أه طبعا .
.
و قلت بؤين في موضوع قانون الجنسيه اللي بينط في حجرك كل كام شهر و قعدت تقول انا لا أقبل , لا أقبل ولن أتزحزح و شوّحت بإيدك كداهو ؟
- اه عرفت إزاي ؟
.
و بقيت في لحظه خبير أنفاق و في لحظه خبير كماين ثابته و متحركه و خطط و تأمين و في لحظة خبير اقتصاد و هريت و اتشألبت في التسليح و العلاقات الدوليه و القنبله الذريه و دورة كربس و الإنقسام الميتوزي و أسباب انهيار الإتحاد السوفيتي و بقيت خبير نظم تعليم و انظمه تربويه و شعب مرجانيه و أوزون و سمسار مراكب و قباني ولا لسه ؟
- أيوه عملت كل ده .
.
طب تمام أوي , ده شئ عظيم و هايل , ممكن بقى لو سمحت , لو فيها قلة ذوق مني يعني , تمسك اللمبه دي و تطلع عالكرسي ده و تركبها في الدوايه اللي فوق في السقف دي لأنك أطول مني ؟
- لا حضرتك لمبة ايه اللي أركبها؟ اللمبه دي محتاجه كهربائي ,يعني حد متخصص .
...........................................................................................................................
Mohamed Hussein
10 يونيو 2019 ·
المطيه و ناس بتحرق صوابعها بإيديها .
.
المطيه يعني الركوبه , يعني الحمار لما يتحط على ضهره بردعه و اللي رايح واللي جاي يركبه و يسرح بيه , يسرح بيه لأي حته هو عايزها بقى .
.
غريبه أوي , اجازة العيد خلصت و مع ذلك محمد صلاح لسه ماجاش زرانا ولا إدّى للبنات عيديه , الغرور ركبه باين , و ايه يعني يا جدع لما يفوت على 100 مليون مصري يعيد عليهم ولا هو يعني هيتكبر على أهله وناسه ؟! شكله هيتكبر , يبقى لازم و حتما ولابد ننحت في وبره عشان يرتدع و مايعملش كده تاني .
.
و الشعراوي ياخويا , اه الشعراوي , ايه الكلام الغريب اللي بيقوله ده ؟ بقى فيه حد عاقل يقول الكلام ده ؟ يالله بينا يا رجاله ننحت وبر الشعراوي كمان , و ديني مانا سايبه إلا لما يقول حقي برقبتي !!.
..................
بصو يا بني أدمين , ماحنا هنفهم يعني هنفهم , مبقاش عندنا حتى رفاهية الجهل , لأن الحكمه بتقول , ليس ضروري أن تكون خائنا لتخدم عدوك , يكفي جدإ إنك تكون حمار أو مطيه .
....................
هقول لكو أسماء و كيانات و قولو لي ايه العامل المشترك اللي بينها , محمد صلاح , الشعراوي , مجدي يعقوب , ام كلثوم , جمال عبد الناصر , أمناء الشرطه و ظباط الشرطه و الجيش , القضاه , الأزهر الشريف .
.
فكّرو كده يمكن تلاقو عامل مشترك , أيوه بالظبط هو ده , كلهم في فتره من الفترات و في توقيتات معينه اتعرضو لحملات تشويه ممنهجه و مكثقه , الواد يا اخي بتاع السوشيال ميديا اللي شغال مع أكرم صفوان شايف شغله كويس أوي , أو يمكن و جايز احنا اللي بنديله فرصه للنجاح لأننا بنجيد لعب دور ( المطيه ) .
.
الشعراوي مات من 20 سنه و حملة التشويه طلعت فجأه , عبد الناصر مات من 50 سنه و حملات التشويه بتطلع فجأه , أم كلثوم بيرمو لها حمله تشويه كل شويه , الأزهر و تشويهه مستمر , الجيش و الشرطه و أمناء الشرطه , تصدق يا مؤمن من سنتين تلاته كده الواد بتاع اكرم صفوان ركز على امناء الشرطه , و هووووب تلاقي في ظرف 24 ساعه 75 حادثه بطلها أمين شرطه , اللي قال للسواق وريني رخصك فاتأخر في تطليع المحفظه قام ضاربه بالنار, و اللي اتخانق مع جاره عشان الغسيل بينقط قام ضربه بالنار , واللي مراته طبخت له الأكل أورديحي فقام دايس عليها بدبابه و هكذا , و فجأه وقفت الحمله و الواد بتاع اكرم صفوان شال ايده من عالزرار , من وقتها ماسمعناش عن حادثه واحده لأمناء الشرطه , ممممممممممممم أكيد تابو توبه جماعيه , اه تلاقيهم تابو , هي تابو مفيش كلام .
.
مرتبات القضاه كانو بيزودوها كل يوم تلات ,انما من سنتين تلاته بطلو يزودوها , والازهر هو السبب في الإرهاب اللي ضرب الشرق الأوسط و باريس و بروكسل و كوم الشقافه , إيوه اومال ايه ؟ الدنيا كلها بتمشي بحسب رغبة الواد الصايع اللي شغال مع أكرم صفوان .
.
الحقيقه انه مفيش حاجه بتتم صدفه , كلها لعبه بتاعة مخرج العرايس , ضرب في مؤسسات الدوله و تشكيك و تشويه , وضرب في الرموز الوطنيه بتاعة الشباب , و الرموز التاريخيه عشان في النهايه نبقى بلا مؤسسات ولا رموز ولا تاريخ ( ده مايمنعش ان كل مؤسسه لها اخطاء و كل رمز حالي أو تاريخي مابيبقاش معصوم من الخطأ ) , و احنا نلايك و نشير بعنف و نتركب و نحرق صوابع إيدينا بإيدينا , و الواد بتاع أكرم صفوان يسّأف لنا و الجزيره تبقى مبسوطه منكو و مخرج العرايس يقول لكو great , يعني هايلين بس بالإنجليزي .
.......................................................................................................
Mohamed Hussein
·9 يونيو 2019
تعبنا ماراحشي عالفاضي
.
البت لوجي بنتي دخلت في السن الرخم , اللي هو بتاع 12 و 13 سنه , في اللبس مثلا مانلاقيش لبسها في الأطفال عشان كبرت ولا في الحريمي عشان لسه صغيره !!.
.
السن بتاع التمرد و الرخامه و التاتو و الباديكير و المانيكير و الإنبهار بالماركات العالميه و الأفلام و الأغاني الأجنبي مش العربي و ديسباسيتو مش أم كلثوم , السن اللي مابيعجبوش العجب ولا بيعجبه حاجه في البلد , السن اللي بيحسسوك فيه إن الواحد منهم بمقام ألف و عقله ألماظات و جبار وبيمشي عالحيط و ممكن يحكم كوكب الأرض والمجموعه الشمسيه بصباع رجله الصغير, و تيجي تكلمهم فيه عن الوطنيه و الإنتماء و التاريخ يحسسوك إنك دقه قديمه و تراديشنال كده في نفسك , و تريأة و ألش و كومكس , ماهو جبار بقى وبيمشي عالحيط .
.
النهارده لوجئ فاجئتني بصراحه , بابا أنا عايزه أروح سينما , بس احنا يا لوجي خلصنا أجازة العيد و انتو اتفسحتو فسحتين 9تلاته و خلاص , لا بس ماروحناش سينما , طيب اللهم طولك يا روح , عايزه تدخلي فيلم إيه ؟ عايزه أدخل فيلم الممر , فيلم الممر يا لوجي ؟! اه فيلم الممر , بس ده فيلم بيتكلم عن حرب الإستنزاف وبطولات الجيش المصري في الفتره دي , مانا عشان كده عايزه أدخله , طيب لو ماكنتيش تحلفي , يوم الخميس ولا الجمعه هدخلك فيلم الممر .
.
ممممممممم طب والله من فرحتي نسيت إني هتعوّر في 240 جنيه ( 4 تذاكر ) غير قرطاسين فيشار من الحجم الكبير , يبقى المجموع 300 مقفوله , مفيش مشكله خالص , كله يهون عشان خاطر مصر , مصر دي أمي , مفيش نفحه بقى من ست الحبايب ؟! .
........................................................................................................
Mohamed Hussein
8 يونيو 2019 ·
هما مابيلعبوش سيادتك , الجزيره و قنوات الخرفان و صفحاتهم و وسائل الإعلام العالميه و مراكز حقوق اللامؤاخذه الإنسان مابيلعبوش , بينفذو التعليمات بالحرف , اه مجرد أدوات تنفيذ حقيره , هما أتفه من إنهم يكونو بيخططو او يدبرو أو حتى يفكرو , اللي بيخطط و يفكر فوق منهم بكتير و مش هتشوفه في الصوره أبدا .
.
اللي خطط لليله بتاعة الشرق الأوسط دي مكانشي أقصى أمانيه شوية إرهابيين و مرتزقه يجيبهم يحاربو بالسلاح و يرمي لهم شوية دولارات و حشيش , دي الصوره المصغره اوي , الصوره الأكبر و الأشمل بتبقى جوه العقول , اللعبه الأخطر لعبة عقول .
.
هتلاقيهم مثلا بعد كل حادث إرهابي يروجو للتالي , اللي استشهدو في سينا دول ماتو أساسا في ليبيا , تقوم تفهم من كلامهم ان جيشنا بيحارب عالأرض في ليبيا و يقدم شهدا مع ان ده مش حقيقي و هما عارفين انه مش حقيقي , و تفهم من كلامهم برضه ان كده المتحدث العسكري و المتحدث باسم وزارة الداخليه بيضحكو علينا , و ده برضه مش حقيقي .
.
و هتلاقيهم بيروجو في نفس الوقت لإن ده مش إرهاب ولا دول إرهابيين , دول ناس شايلين سلاح بيحاربو جيش و شرطه شايلين سلاح واحنا ناس مدنيين بقى فملناش دعوه بالقصه دي , شوفت اللعبه بتتلعب ازاي ؟ .
.
و يروجو كمان لأن الإرهابيين اللي هما مش إرهابيين عباره عن ناس اتظلمت من اهل سينا و اتهجرو من بيوتهم فبينتقمو و كده , أه الإرهابيين اللي بنلاقيهم من تشاد و النيجر و فلسطين و كازاخستان و السودان و أفغانستان و السنبلاوين و مغاغه و ديروط اسمهم أهالي سينا اللي اتهجرو من بيوتهم !! .
.
فهمت يا مولانا ولا لسه ؟ فهمت يعني ايه إدارة العمليات الإرهابيه ؟ إزاي تدير الحدث و تلعب في عقول ( المرجفين ) و تلففهم حوالين نفسهم يقومو يفقدو الثقه في كل شئ و يشكو حتى في صوابع ايديهم .
.
طب انت شوفت صفحات بتهبد الهبد اللي فوق ده , تفكر في هبدهم أو تخاف ؟ لأ طبعا , الخوف هزيمه و الجهل كمان هزيمه , أيوه تعمل ايه يعني ؟ ولا حاجه يا مولانا , تدخل صفحتهم دي و تكتب لهم كلمتين اتنين بس وانت مبتسم , بس يا خو* , سواء كان موقع قناه او مركز حقوقي او جريده اجنبيه أو صفحة حد من الخرفان و الشمامين , و على فكره لما تقوله يا خو* هتبقى كرمته أخر كرم .
.......................................................................................................
Mohamed Hussein
8 يونيو 2019 ·
النطاعه و العبط .
.
99.9 % من اللي بيهرو و يهبدو بعد أي حادث إرهابي بتكون علاقتهم بالتأمين و التسليح و الخطط العسكريه زي علاقة خرفان الجماعه الإرهابيه بالوطنيه و زي علاقة مذيعين الجزيره بالشرف , يعني بينهم و بين بعض مسافات و سفر بلاد .
.
النطاعه هي إنك تقعد تنظّر عالناس في شغلهم و تفتكس و انت بالكتير تعرف الفرق بين الطياره و الدبابه , ده أخرك يعني .
.
طب لما تكون مواطن مصري و مهتم بحال بلدك و أمنها و استقرارها تعمل ايه في موقف زي ده ؟ هنقول تاني و عاشر :
.
- تترحم على شهدائنا و أولادنا و اخواتنا رجالة الجيش و الشرطه اللي بيحمو أرضنا و عرضنا .
.
- ماتهريش كتير حتى ولو من باب المحبه و الاهتمام , ماتبقاش زي الدبه اللي قتلت صاحبها , اهل مكه أدرى بشعابها .
.
- ماتنشرش أي خبر أو تقرير أو أو إلا من الصفحات الرسميه المعتمده .
.
- تفهم إن دم ولادنا اللي بيستشهدو مش سلعه تجيب بيها لايكات و لا موسم بنبيع فيه وطنيه , و إلا تبقى مجرد نطع.
.
- مانروّجش للحادث بشكل كبير و مانكتبش عنه كتير , و إلا هنبقى بنحقق للإرهابيين و اللي وراهم اللي هما عايزينه , هما بيعملو العمليه الارهابيه و أقصى أمانيهم انه يتم الترويج لها بشكل كبير , و نلاقي نفسنا في حالة قلق و خوف و حداد , لأ , احنا بنعيد و بنلعب مع عيالنا , و بنتعلم و بنشتغل و ولادنا بيحمونا , احنا أُمّه بتعرف تعيش و تضحك و تشتغل و تحب حتى و هي بتحارب .
.
- نقطه مهمه للي محتاج توضيح , للوطني اللي بس مش فاهم , او بيتخض بسرعه , حرب يعني حرب , حرب يعني خساير , و بتتحسب إزاي ؟ بتتحسب بنسبه و عدد و مقارنة سنه بالتانيه , يعني كام عملية ارهابيه في ال2014 و كام عمليه ارهابيه في 2019 , عدد الشهدا هنا كام و هنا كام , ده كمان مقياس النجاح , و بلد أمنه مش معناها انها زيرو في العمليات الإرهابيه , ولا معناها انها زيرو في الجريمه .
.
- نقول أكتر , الأجهزه الأمنيه في أي دوله لما تكون صاحيه اوي و متدربه كويس و متطوره جدا , بتواجهها مثلا ألف عملية تهريب مخدرات من عالحدود في السنه , تنجح في إحباط 700 عمليه منهم و 300 لأ ( ده نجاح كبير جدا ) , و ال 300 اللي ماتنجحش فيهم يتوزع فيها مخدرات من التجار عالشباب , تنجح تاني في القبض على 200 تاجر و 100 لأ , و هكذا , يعني الحكايه مستحيل تكون صفر في أي بلد في الكون , دي طبيعة الأشياء .
.
- فاحنا كمصر بنواجه إرهاب مدعوم من دول عظمي و دويلات و أكشاك , و إرهابيين و مرتزقه من جنسيات مختلفه بيتصرف عليهم عشرات المليارات و بيتخطط لهم على اعلى مستوى في منطقه صحراويه مساحتها تعادل مساحة خمس ست دول ( ده اسمه حجم التحدي ) , تبقى ناجح امتى بقى ؟ لما تقدر تحبط أغلب العمليات في وقت التخطيط لها , و لما تقدر تتصدى لأغلب العمليات اللي ماقدرتش تحبطها من البدايه , اغلب العمليات مش كلها , لانك مستحيل تتصدى ل كلها , حتى لو كان اسمك الولايات المتحده الأمريكيه أو اليابان .
.
- باختصار , النطاعه انك تنظّر عالناس في شغلهم بجهل , و إنك تروج للحادث من مصادر بير السلم و إنك تستغل الحادث في جمع شوية لايكات و شهره وهميه , و العبط إنك ماتبقاش فاهم فتقوم تتخض أوي , ماتبقاش فاهم يعني ايه إرهاب و يعني إيه جريمه و يعني إيه حرب .
....................................................................................................
Mohamed Hussein
7 يونيو 2019 ·
البت لوجي بنتي جمّعت عيديات 700 جنيه و لمار 700 زيها , يبقى المجموع 1400 , مبلغ كبير و مغري .
طب أقول لهم هاتو الفلوس دي أحوّشهالكو ؟
ولا أقول لهم نستثمرها في مشروع صغار المستثمرين ؟
و لّا احط لهم حتة حشيش في شنطة المدرسه و أبلغ عنهم ؟
ولا أقول إنهم على صلة بالجماعات الإرهابيه ؟
و لّأ أقول إنهم لما بتيجي سيرة الريس بيقولو كلام مش حلو و يعملو بإيديهم كداهو ؟
..........................................................................................................
Mohamed Hussein
4 يونيو 2019 ·
كل سنه و حضراتكو طيبين و كل حبايبكو بخير و سعاده و مصر دايما مرفوعه راسها بأهلها و ناسها
.
كلمتين عايز أقولهم لأصدقائي من باب المحبه
- حكاية المعايدات اللي بتتبعت في رساله للكل , تهاني و مباركات , احيانا بينطبع عليها اسم الشخص كأنها صوره يعني , و دوسة زرار تروح للكل , الأصدقاء و الفولورز و المغول و المماليك , الحكايه دي في الواقع بتفكرني بأعضاء مجلس الشعب زمان اللي كانو قبل كل مناسبه يعلقو يافطه قماش بعرض الشارع , السيد فلان الفلاني عضو مجلس الشعب يهنئ أهالي الدائره الكرام بمناسبة كذا , و الحقيقه كنت لما بشوف اليافطه دي مش ببقى عارف المطلوب ايه ؟ نجيب سلالم مثلا و نطلع كلنا نرد التهنئه على نفس اليافطه , و نقوله ومعاليك طيب و بخير ؟ ولا نعمل اننا مش واخدين بالنا و لا نعمل ايه بالظبط ؟ و الحقيقه ممكن بشكل ما تكون مقبوله عضو برلمان بيعمل دعايه لنفسه و يفكر الناس بإسمه , مقبول ماشي .
.
- لكن أصدقائي بيستفيدو ايه لما يعملو الحكايه دي عالفيس بوك ؟ بتحسو بايه يعني ؟ خلاص كده عملتو اللي عليكو وبعتو التهنئه للناس , و كل ثانيه تيجي رساله بتهنئه من حد مايعرفنيش اساسا ولا انا في دماغه بس هو بيبعت للكل ؟ طب المفروض نرد ولا نعمل لوحه مماثله و ندوس على زرار مماثل و نبعت للكل و اللي يفتح الماسينجر عنده يتفاجئ اننا قاعدين في الأنتريه من غير احم ولا دستور , معالي الأستاذ الدكتور محمد حسين يهنئكم بعيد الفطر المبارك .
.
- بصو هو الكلام مش مترتب او انا مش عارف اقول وجهة نظري , هقولها بشكل تاني و احترامي للجميع , عشان نبقى بني أدمين فاحنا مش ضروري نكون اعضاء مجلس شعب , كفايه اوي نبقى بني أدمين , أيوه نعملها ازاي دي بقى ؟ كل واحد يكتب على صفحته بوست تهنئه , على صفحته هو , مش على حيطان الناس ولا يعلق صورته في أنتريهاتهم فجأه , ولما يكتب تهنئه على صفحته تقوم الناس تقوله و انت طيب , طب هو له اصدقاء غاليين اوي مش زي بقية الناس يعمل ايه ؟ يبعت لهم رساله من سطرين , كل سنه وانت طيب يا فلان , عيد مبارك عليك و على اسرتك , رساله فيها اسم الشخص الغالي عليك , حتى لو كانو عشرين شخص فالحكايه مش هتاخد 10 دقايق , انما فيها أدميه بما يكفي .
.
- برضه هو انا عايز أقول ايه ؟ عايز اقول ان اللي بيحصل ده اسمه مسخ , حاجه كده بلاستيك , و شويه بشويه بنفقد أدميتنا و بنتحول لكيانات الكترونيه ملهاش أي صفه ولا طعم , و زراير بتدوس عليها تبعت للكل , بنتخلى عن أدميتنا لأن فيه برامج معموله مخصوص عشان تحولنا لعرايس ممسوخه , و ييجي عليك يوم تفتكر إن أخر مره سلمت فيها على حد بالإيد و سلام حار كانت من عشرين تلاتين سنه !! .
.
- اخر حاجه عايز اقولها لأصدقائي الأفاضل اللي عندهم اجازة الصيف 4 شهور بس مابيحلاش لهم المصايف إلا في ال 3 أيام بتوع العيد , وتلاقي استاذ حسن خد مراته و عياله و راحو شرم , واخته مدام نرمين راحت مع جوزها الساحل , و امهم قاعده في مدينة نصر , واخوهم في طنطا , بيعيدو على بعض ازاي و بيعيدو على امهم ازاي ؟ برسالة عالواتس و وراها قلب و دبدوب و وش مكسوف و يشعر بالبهجه؟ يعني مش هيتقابلو و يعيدو على بعض و يبوسو ايد امهم وياكلو مع بعض لقمه أو يشربو كوباية شاي ؟ ده حتى كلمة عيد من عاد يعود , يعني ناس بتود بعض , لا هو كده حلو اوي , عشان احنا لازم نتطور و نساير العصر و نتحول من لحم و دم ومشاعر و صلة أرحام لكائنات بلاستيك وبرامج و إيموشنات مصطنعه و مسخ جميل .
................................................................................................................
Mohamed Hussein
3 يونيو 2019·
دار الإفتاء تعلن : احنا عارفين إن عندكو 3 علب زبادي لسه موجودين في باب التلاجه و مهانشي علينا يبقو إكسبايرد و يترمو .
.......................................................................................................................
Mohamed Hussein
3 يونيو 2019 ·
خلاصة الكلام
.
صورة صلاح مع أبو هبابه و أي سيره لأبو هبابه على لسان صلاح بتنرفز و تستفز الناس و انا منهم , صلاح ممكن يكون بيتعامل بحسن نيه و بطيبة الفلاحين اللي زي حالاتي , و ممكن يكون انشغاله بعالم الاحتراف بكل تفاصيله بييخليه مش مستوعب الفكره اللي بنتكلم فيها و ممكن و ممكن و ممكن .
.
طب يعتذر مثلا ؟ لأ , انا شايف إن الاعتذار ملوش لازمه , و تقييمي للموقف كله ان حركة أبو هبابه و تلزيقه في صلاح في كل مناسبه وراها إن و كان و كل علامات الإستفهام لأنها زادت أوي عن الحد و بيتم الترويج لها بشكل مريب
.
أه وارد جدا تكون الجماعه الإرهابيه بتحاول تحرق حد بنجومية صلاح و تدمر قدوه عايش و هيعيش عليها شبابنا و أطفالنا أو بيحاولو يستقطبوه ناحيتهم , أه انا مؤمن تماما إن شهرة صلاح و نجوميته تخطت كل الحدود و الحواجز و هنا مايبقاش مجرد شخص عادي يٌقبل منه اللي بيُقبل من غيره , و المعنى الكامل لأهمية صلاح في حياتنا و حياة الأجيال الجايه بتتطلب تدخل من الدوله و بيتطلب إدارة , إداره ماتتعارضش مع حيثيات الإحتراف اللي عايشها صلاح , يعني يكسب زي ماهو عايز و يعمل اعلانات و خلافه و يلعب في الفريق اللي يحبه , ربنا يزيده , إدرة تتعامل باحترافيه و حذر مع كيان اسمه محمد صلاح , ممكن الكيان ده يكون خير كبير للشباب و لمعنى الطموح في كل المجالات , و ممكن لا قدر الله تنقلب الحكايه لصدمة العمر و لإحباط جيل بحاله .
.
إداره هنا بقصد بيها مؤسسه سياديه و جهه بتجيد التعامل و الشرح و التوضيح و الرعايه و الحمايه و كل شئ , إدارة هنا بقصد بيها رجالة البلد دي اللي شالوها و بيشيلوها دايما , إدارة هنا ماقصدش بيها أبدا شوية الأرزقجيه و السببوبجيه بتوع اتحاد الكوره , لأن الموضوع أكبر منهم و أنضف بكتير .
.
لو سمحتو يا ساده يا أفاضل , ماتسيبوش الولد ده لأي جهه قذره تشوهه و تستغله و في النهايه تهدمه أو تبعده عن حبه لبلده , احنا أولى بإبننا .
.
أما أصدقائي الأفاضل اللي مستحيل أشكك أبدا في وطنيتهم و حبهم للبلد دي , عايز أقول لهم , اللوم مطلوب و العتاب واجب من غير تشويه ولا دبح , و عايز أقول لهم كمان ياريت عشان خاطر ربنا ماتمشوش توزعو صكوك وطنيه عالناس و تصنفهوهم في لحظة غضب , وياريت تفهمو إن دم الشهيد مش لعبه عشان نلف و ندور بيه عالبوستات و نحطه في رقبة الناس اللي بتحب البلد دي بجد , يعني باختصار ياريت تهدو شويه , و للجميع كل الاحترام .
...........................................................................................................
Mohamed Hussein
2 يونيو 2019 ·
بنجيد احنا و نتنفنن في تقطيع الرموز في كل المجالات , مايجيلناش نوم يا أخي لو ماقطعناش فيهم و شوهناهم , و كل رمز في كل مجال عايزينه نسخه طبق الأصل من كل واحد فينا , ماعرفش إزاي .
.
أحمد زويل العالم الحاصل على جائزة نوبل واللي عرض على مصر كل علمه و أبحاثه و قال للبلد انا تحت أمرك , قطعناه برضه , أصله كان مستشار للرئيس الأمريكي , أصله مابيحبش المحشي وانا بحب المحشي , و أي هبل في الجبل .
.
فاروق الباز نفس الشئ , جه وجايب معاه مشروع عظيم لمصر , يا ترى جايبه ليه ؟ مش يمكن وراه إن و أخواتها ؟ ده عايش في أمريكا يا عم الحاج و هي أمريكا هيجيلنا من وراها خير ؟
.
أم كلثوم عملت اللي محدش عمله ولا حد هيعمله لا في الفن ولا في حبها لبلدها , و مع ذلك , يا عم ام كلثوم غنّت أيام الملك و الملكيه , نرجمها بقى ونشوهها .
.
محمد صلاح , اللاعب المصري و العربي اللي مجاش ولا هييجي زيه , بالأرقام و الحسابات , هداف الدوري الإنجليزي الأقوى في العالم لموسمين متتاليين , اللاعب اللي لعب اتنين نهائي دوري أبطال أوروبا سنتين ورا بعض ولولا اصابته المتعمده في النهائي الأول كان هيبقى فيه كلام تاني , دوري أبطال أوروبا اللي بقينا نشوفه و نتفرج عليه و يتقال فيه اللاعب المصري فلان الفلاني بعد ما كان أخرنا نتفرج على إسكو و السكه الحديد في كاس مصر , دوري أبطال أوروبا و الدوري الإنجليزي اللي بيشاهدهم اتنين تلاته مليار بني أدم في كوكب الأرض , و اللاعب المصري اللي اسمه و اسم بلده بيتنطق ب 50 لغه مختلفه كل يومين تلاته , واللي له عشاق و مشجعين في اليابان و جنوب أفريقيا و البرازيل و القطب المتجمد الشمالي , و أطفال بيلبسو التي شيرت بتاعه في كازاخستان و الأرجنتين و كندا , برضه لازم نشوهه و نجلده و نرجمه .
.
أصل صلاح متصور مع أبو تركيه , وبيقول للمذيع سلم لي على ابو تريكه , مايقول يا أخي ؟ مايقول ؟ أنا يمكن أكون اكتر واحد بيلعن جدود أبو تريكه عشان علاقته بالجماعه الارهابيه , لكن صلاح بيتعامل معاه بحكم زمالة الملعب و بحكم ان أبو زفت ناطط له في كل حته , في حفل الكاف لقاه قدامه , و في مقابلة بين سبورت عارف ان أبو نيله قاعد في ستوديو التحليل .
.
يا بني أدمين كفايه , و خلو السؤال بالنسبالكو كده , صلاح اتأخر مره عن منتخب مصر ؟ صلاح قال مش لاعب الماتش الفلاني و فيه لاعبين كتير محترفين أفارقه أقل منه في المستوى و الأهميه بيرفضو اللعب , عمل كده ؟ صلاح بيلعب مع المنتخب بحماس أقل من حماسه مع ليفربول ؟ طب شوف لحظة مادخل فينا هدف التعادل في ماتش التأهل للمونديال , صلاح لعب كاس العالم و هو مصاب , صلاح بيرفع علم مصر و يطوف بيه ملاعب انجلترا في نهاية كل موسم رياضي و مع كل تكريم , صلاح امبارح رفع علم مصر و هو شايل كاس أبطال أوروبا , صلاح بيتبرع لبلده و مابيبخلش عنها أبدا , ارحمو الواد بقى عشان ربنا يرحمكو و يرحمنا برحمته .
.................................................................................................................
Mohamed Hussein
1 يونيو 2019 ·
أخيرا , ليفربول بطلاً لدوري أبطال أوروبا , البطوله الأغلى و الأشهر في العالم للمره السادسه في تاريخه , بهدفي محمد صلاح و أوريجي , أقطع دراعي من هنا إن الواد محمد صلاح ده بيشتغل في مجموعة جلال بيه .
..............................................................................................................
Mohamed Hussein
1 يونيو 2019 ·
بشاير العيد
.
- من كام يوم المخابرات المصريه تتسلم هشام عشماوي أخطر إرهابي في المنطقه , اللي هو كنز المعلومات و الصندوق الأسود .
.
- أول امبارح , المجلس العسكري الحاكم في السودان بيقفل مكتب قناة الخنزيره و يسحب تراخيص الموظفين و الصيع اللي شغالين فيها .
.
- امبارح السودان بتسحب سفيرها من الكشك القطري للتشاور , و فيه أنباء عن استعداد السودان لتسليم قيادات الإرهابيين اللي هربو للخرطوم أيام عمر البشير .
.
- والنهارده جماعة الإخوان الإرهابيه منزله بيان بخصوص القمه العربيه و الإسلاميه و بتدعو لنبذ الشقاق و رأب الصدع و تجاوز الخلافات العربيه , أه و عهد الله .
.
يابني ماحنا خلاص قولنالك , مصر دلوأتي بتلعب سينجل و الباقي كله نيكست , و غالبا كده المنطقه دي كلها بتشتغل حاليا في مجموعة سيادة اللوا جلال .
................................................................................................................
Mohamed Hussein
1 يونيو 2019 ·
اللي بيحصل في ستاد رادس التونسي ده لو حصل عندنا في مصر كان زمان الخنزيره و البي بي سي و أمريكا و بريطانيا و لجنة حقوق الانسان و المغول و البيزنطيين قالبين الدنيا علينا مع حملة كوميكس بيض من بتوع الخرفان و شمامين الكوله .
.
الترجي التونسي بيلاعب الوداد المغربي ماتش العوده في نهائي أبطال أفريقيا , الترجي جاب جون و الوداد له هدف الحكم ماحسبوش , لاعبي الوداد طلبو من الحكم انه يستخدم تقنية ال var , راح الراجل يستخدمها ياخويا لقاها قال ايه مش شغاله , ماتعرفش بقى شدو الفيشه بتاعة الجهاز ولا حد لعب في التقنيه و بوظها ولا عيل خد الجهاز و جري , الماتش متوقف من نص ساعه تقريبا و غالبا كده بعتو يجيب الواد سرسأ الكهربائي يشوف الحكايه دي .
.
انا مش هستبعد بعد كده ان الفيفا تنزل بيان تقول فيه , عليا الطلاق ماحنا منظمين بطوله في أفريقيا بعد كده .
................................................................................................................
