منوع

إنما جميله أوي حكاية قيادي بارز دي , قيادي بارز , يا خلاصي , هذا وقد صرح القيادي البارز ( ولا مؤاخذه ) في الجماعه الإرهابيه لقناة الجزيره أن عدد شهداء رابعه بلغ 19 مليار والعدد عمال بيزيد لحد النهارده , وفي لقاء له مع قناة الجزيره قال القيادي البارز ( ولا مؤاخذه ) في حزب النحانيح أنه يدين ويشجب !! , إنت شديد أوي مع الموظفين بتوعك يا بارز بيه , مع إن وشبكة العشره دول كلمة بارز دي ينفع تتقال على إليسا و صافيناز , بارز بقى و المثنى بارزين أو بارزتين ( كذكرتين ) .
.
إحنا شعب عجيب يا جدع , شعب صافيناز بطبعه , وبنعرف نخلط الدين بالسياسه بشوربة التنين , ومصر هي البلد الوحيده تقريبا اللي بيتقال فيها كلمة قيادي بارز دي , القيادات عندنا مقاسات زي ( ال *** ات ) , والإعلام دايما بيسلط الضوء على القيادات مقاس 110 وانت طالع !!.
.
ماري منيب : إنتي جايه تشتغلي ايه ؟ قيادي بارز يا هانم , قيادي بارز !!
يا راجل حرام عليك , الكلام ده عيب والله , من حقك تبقى قيادي ومن حقك كمان تبقى بارز ( ولا مؤاخذه ) إنما خليك فاكر إن المثل بيقول ( يموت القيادي ولا ياكولشي من بروزاته !! ) , مش كده ولا ايه يا بتوع الجزيره والرضاعه الطبيعيه ؟!!.

منوع + أشعار

مش بقدر أفهم الحكايه دي ولا استوعبها , عيب خلقي عندي تقريبا , لأني بشوف أغلب الأصدقاء بتمر عليهم عادي جدا وبتفرحهم كمان .
حكاية إنك تقابل راجل قزم في الشارع وتتريأ عليه وتسخر منه , أو تجيبه في فيلم وتستغل حاجته للفلوس وتديله 200 جنيه وتضحك عليه الناس , أو توقفه في الشارع وتديله 20 جنيه وتتصور جنبه عشان توري الصوره لصحابك وتضحكو بقى وتقهقهو , حتى هنا بيعملو عرض أقزام في الملاهي عشان يضحكو الأطفال , في الأفلام بيبقى الإبداع الوحيد عند مولانا المؤلف والمخرج إنه يجيب القزم الكبير الراجل أبو شنب في مشهد وهو لابس بامبرز أو ماسك في بؤه ببرونه !! تصدق مضحكتش , أه والله , أنا أسف إني مقدرتش أضحك .
أسف عشان بعتبره بني أدم وربنا خلقه مش عشان نتريأ عليه أيها الإنسان العظيم الطويل المكتمل النمو , هو مش شمبانزي سيادتك !! .
ديموقراطية ايه يا ساده اللي هنعملها في مجتمع فيه المواطن مش عارف يكون بني أدم !!.

الواحد لما بيفتح إيميل الشركه ( الشغل ) وميلاقيش إيميلات جديده مبعوته من الإداره بيقول الحمد لله ويبوس إيديه وش وضهر , ربنا يجعل كلامنا خفيف عليهم , وعلى رأي خالتي بهانه لما قالت ( نو نيوز إزْ جود نيوز ) !!.

عارف انت الراجل العبيط ده اللي بيبيع بيته أو يرهنه عشان يدخَّل فيه كهربا ؟!
أهو ده بقى اللي بيعمله النحانيح حاليا , بيرهنو البلد عشان يدخلو فيها ديموقراطيه , فيه احتماليه حقيقيه لخراب مصر لو مشينا بالشكل ده ( انظر حولك ) , عشان كده أنا رافض دخول الكهربا حاليا , مش مهم أقعد في الضلمه كام سنه كمان بس في النهايه ألاقي 4 حيطان يستروني , مش هبيع البيت يا كابتن ولا هرهنه , مش هبيع البلد لكلاب السكك ( إرهابيين وإخوان وجماعات وصهاينه ) عشان أدخّل فيها ديموقراطيه , ماهو انت لو بعتها مش هتلاقي حيطه تلزق عليها لوحة الديموقراطيه الجميله دي , الحيطه أهم من اللوحه !!.

حدش معاه جردل مايع ساقع أوي وييجي يصبه على دماغي يا ناس ؟ , واحد مش إخوان خالص والله وقالك الوضع في الجامعات مش هيهدأ إلا بعودة الرئيس المتخب ( ده سيادتك معاه ماجستير ) , وواحد بيقولك إن ماتش غانا الجاي مش هنعمل فيه حاجه لأن العبيد لا يبدعون , وفي وصفه في كلمة عبيد ذكر شيكابالا بالإسم لانه مؤيد للعسكر ( ده معاه بكالوريوس على الأقل و احتمال دكتوراه ) !! , أه يا وجع ضهرك يا مصر , يلعن دين أم علامك يا بلد , اشنقو أخر رجل حاصل على الدكتوراه بأمعاء أخر رجل حاصل على الماجستير , اللهم اضرب المثقفين بالمثقفين وأخرجنا من بينهم سالمين , اللهم دم عليا نعمة الجهل واحفظها من الزوال يارب.

وحشتني مصر بريحتها القديمه الأصليه , ساندوتش طعميه من عند البغل في المنصوره وبعده سجاره كليوباترا وبعد ساعه كوز دره مشوى و دندنه على ضفة النيل في المنصوره , صخرة الملتقى وابراهيم ناجي ( صاحب الأطلال ) ونادي شجرة الدر بتاع العيال الحبيبه , مقدرتشي ساندوتشات الفراخ البانيه والسجاير الإل إم المستورده إنها تعوضني , حتى الدره هنا بيعملوه في كوبيات مع الزبده ( وتاكله بالمعلقه ) , يا ألطاف الله , يا بشر الدره مش بيتاكل بالمعلقه في البيوت , الدره بيتشوى عالفحم ولا على راكية حطب وتاكله وانت ماشي , تمسكه كوز سليم كده ( intact ) وتقرم فيه بقى وانت ماشي , هي دي مصر و هذا ماوجدنا عليه أباؤنا .
وحشني جدا مشهد من فيلم قديم لسمير غانم وسعيد صالح , سمير غانم ( إبراهيم ) داخل على سعيد صالح وهو بيشرب حشيش وقال له أنا طالب القرب منك , رد سعيد صالح ( إنت عايز تتجوزني يابراهيم ؟! ) , قالها كده بتفخيم حرف الراء , يعني راء بتاعة رالي و رانيا مش بتاعة ريهام وريم !!.

عمري ما فهمت فيلم السفاره في العماره إلا في السنتين اللي فاتو دول , شخصية داليا ونادر ودكتور شهدي والرفيقه الداده عطيات شفتهم بعيني , كنت فاكر عادل إمام بيتريأ على المعارضين الثائرين اللي بيثورو أحيانا لمجرد الثوره , كنت فاكره بيتحامل عليهم , أتاريه كان بيجاملهم , أنا أبويا مات في مظاهرة العمال وأمي كمان , أسماء بتحب جيفارا وعلاء بيحب ماركس , وانا كمان صب لي كاس يا أستاذ خالد علي !!.
مصر هتتحرق بمظاهرات الإخوان وتصوير الجزيره وتعاطف النحانيح ( والشيطان الأمريكي قارد جناحاته ومضلل علينا ) , مصر هتولع بجاز ومش هتقوم لها قومه وهنتمنى حتى أيام مبارك نفسها بفسادها وقرفها , ومع ذلك فيها ناس معندهمشي مشكله تخرب البلد من أجل الحفاظ على نقاء وزهد وورع وحكمة وأريحية الدكتور محمد البرادعي , ده حب صوفي يا جدعان , قواعد العشق الأربعون مش محتاج إنك تقراها من روايه 450 صفحه , يكفي إنك تدخل صفحة واحد منهم أو تبص في عنيه وانت تعرفها .

صباح الخير , قانون التظاهر سبه في ضمير البشريه المعذبه ( غريبه زمان قالو قانون الطوارئ نفسه مذكور في القرأن ) , ومصر مفهاش إرهاب ( ياريت النحانيح يبلغو الخبر السعيد ده لغرفة السياحه والوفود السياحيه الأوروبيه ) , الجيش بيقتل عياله ( ودود المش منه فيه ) , الدستور اللي لسه متعرضشي للإستفتاء مرفوض , مش بس كده ده النظام كله مرفوض بسبب الدستور اللي لسه متعرضشي للإستفتاء !! .
طيب لحد النهارده انا شايف إن السيسي عمل حاجتين اتنين , وقف جنب ثورة 30 يونيو زي ما طلبنا وحارب الإرهاب زي ما طلبنا , يعني قلت لمراتك نفسي أكل محشي ورق عنب وبط قامت قالت لك حاضر من عيوني , ولما حطت قدامك طبق المحشي وورك البطه قلت لها ايه القرف ده ؟ مين قالك تعملك كده ؟ محشي وبط كمان ؟ انتي طالق يا هانم .

October 19

من غيرها عايش
بس عايش ليه ؟ لمين ؟
من غيرها شايف
في الحياه
ألوان كتير متلخبطين
أدي الطريق اللي اترسم
وادي النصيب اللي اتقسم
مفهوش جديد
ناكل ونشرب نشتغل
زي العبيد
متكتفين
والعمر من ورق الشجر
قولي كام ورقه
بتهرب من شجرتك
قولي كام ضاعت سنين ؟!
.
.
محمد حسيبن

لك الله يا مصر !!.
.
أحد أصدقائي المثقفين والغاليين جدا عليا ( من أنصار البرادعي ) كتب على صفحته فيما معناه إن مفيش إرهاب في مصر وإن الإرهاب ده حدوته وهميه اخترعها الجيش عشان يحكمنا ويقول بقى إنه بيحارب الإرهاب !!.
.
صديقي العزيز , أنا اترددت كثير في كتابة البوست ده احتراما وتقديرا لشخصك الكريم ( أرجو أن تغفر لي ) .
.
1- واحنا في الجامعه كانت ظهرت حكاية ( عبدة الشيطان ) , أولاد وبنات من أبناء الطبقه الثريه اللي مش لاقيين حاجه يعملوها بقو يلبسو تي شيرتات لونها اسود وعليها رسمة جمجمه وعضمه ويتجمعو في مكان يمارسو فيه طقوسهم الخايبه ( موسيقى ورقص غريب وخمره وممارسات جنسيه جماعيه ) .
فاكر كويس أوي مشهد من برنامج حديث المدينه أياميها , مفيد فوزي بيسأل ولد منهم ( انتو صحيح بتمارسو جنس جماعي ؟ ) , رد الولد وقال له ( لأ يا باشا احنا بنبقى 4 أو 5 أولاد مع 4 أو 5 بنات وبنمارس الجنس سوا !! ) , وكان رد مفيد فوزي سريع جدا , قال له ماهو ده يابني الجنس الجماعي , أومال انت فاكر الجنس الجماعي بيبقى قبايل مع بعضها ؟!.
.
2- في مرحله معينه من حياتي كنت بعشق مشاهدة أفلام الرعب الأمريكيه وخصوصا أفلام مصاصي الدماء , وأكتر مشهد علق في ذهني من أفلام دراكولا هو مشهد الطفله اللي اتحولت إلى مصاصة الدماء اللي بتدخل على مامتها وبتمشي بهدوء شديد ومامتها بتتوسل لها إنها مش تاكلها , الطفله مش بتستجب لأن عقلها مغيب تماما وبتهجم على مامتها وبتمص دمها .
.
3- في سينا واماكن تانيه من مصر هتلاقي كل يوم كام عسكري مقتولين وطيارات طالعه نازله وارهابيين مقبوض عليهم وسيارات بتنفجر , لو سألت حد من شمال سينا هيقولك إحنا بيحكمنا الجماعات الإرهابيه أصلا , يعني دول مش واحد ولا اتنين دول دوله في شمال سينا , تقدر حضرتك تسأل بنفسك
, وساعتها هتعرف إن اللي بيحصل في مصر ده اسمه إرهاب وإن 5 أولاد مع 5 بنات بيمارسو الجنس بيبقى اسمه جنس جماعي يعني مش شرط قبائل مع بعضها !! .
.
4- منظر أنصار البرادعي وهما ماشيين وراه ولاغيين عقولهم تماما ف وصل تفكيرهم ( مستوى الإنكار ) إلى مستوى إن مفيش إرهاب في مصر هو منظر مرعب جدا بالنسبالي , بيفكرني بمشد الطفله اللي هجمت على أمها في الفيلم إياه .
.
..................... وأخيرا صديقي العزيز اقبل اعتذاري مره ثانيه وانا أسف لأني بحب البلد دي , وبشوف من الغربال !!.

وبعد ما العراق اتقسمت وكل يوم 100 قتيل على الأقل من 10 سنين لحد النهارده وبعد ما السودان اتقسمت وبقت دولتين وبكره هتبقى تسعه , وبعد ما ليبيا اتقسمت ومانت عارف مين اللي بيحكمها ومين اللي بيحفظ الأمن فيها ؟ وبعد ما فلسطين اتقسمت والقضيه الفلسطينيه اتباعت بيع وشرا رسمي , لسه برضه مش مصدق إن الدور عليك ؟ طيب نعملك ايه عشان تصدق ؟ , لو شوفت بعينك مصر متقسمه ربعميت حته وحرب أهليه بتاكل الأخضر واليابس هتفضل برضه قاعد على تلها وبتشرب سجارة الحشيش بتاعتك و تقول ( الديموقراطيه يا منى ) , يا سيدي ملعون أبوها الديموقراطيه, تتأجل شويه , مفيش بني أدم بيموت من الجوع و مفيش دوله بتموت من قلة الديموقراطيه وخصوصا مصر وإلا كانت ماتت من 7 ألاف سنه , اللي يموت بلدك دي فعلا هو الإرهاب والتقسيم , يا غبي افهم , مفيش أبانا الذي في المخابرات ولا زفت , فيه أبانا الذي في واشنطن ( حيٌ يُرزق ) , و فيه جماعته التي في مصر ( حيةٌ تسعى ) !!.

من كتر ما الواحد اتعامل مع السعوديين وعاشرهم بقيت بكسّل أغسل الكوبايه اللي بشرب فيها نسكافيه في الصيدليه , أقول مانا لسه شارب فيها من ساعتين يعني هيكون جرالها ايه ؟ ومن سنه تقريبا ربنا كرمنا بكام عيله سودانيين احتلو العماره اللي انا ساكن فيها والمحلات الي تحت البيت ومن يوميها وانا باجي اطلع بالعربيه من الركنه مبصش ورايا وانا راجع بضهري , يااااه هو انا لسه هعوج رقبتي كده و ابص لورا ؟!.

أجين للمره الألف , أكشن ألف مره , تفجير مبنى للمخابرات المصريه , أكيد السيسي هو اللي عملها كالعاده , ده بتاع مخابرات بقى والحركات دي مبتجيش غير منهم , إنت شكلك مبتفهمشي ف المخابرات , شوف بقى إنت تمشي كده ستريت , أه ستريت وبعدين تاخد أول ريتيرن وتدخل يمين , إنت شكلك كده مبتفهمشي انجليزي !!.
في العدد القادم من مسلسل ( زا ولف أند زا نحنوح ) , نقرأ الخبر ( العثور على عبد الفتاح السيسي مشنوقا داخل فيلته ) , وتقارير شبكة رصد وشبكات النحانيح تشير إلى أن السيسي شنق نفسه عشان يلبسها للإخوان , وعلى رأي ستنا أسماك محفوظ ( يسكت يسكت حكم العسكر )!!.

سؤال بسيط , نفترض مثلا يعني إن السيسي مترشحشي للرئاسه رسمي ومدخلشي الإنتخابات ومصر جالها رئيس مدني اسمه x وإن السيسي استقال بعدها من منصب وزير الدفاع أو أُقيل , يا ترى حضرتك هتقول عن السيسي ايه ؟ مممممممممم أكيد هتقول ده هرب من المسئوليه عشان جبان وخايف يشيل الليله .
ده مجرد افتراض بس أنا عارف والله إن ردك جاهز وكل حاجه بتحطها في صندوق المؤامره الكونيه على مصر .

بعيدا بقى عن السياسه عشان بتجيب لي الخناق والمشاكل ووجع القلب , وبعيدا عن الكلام في الدين والرسالات السماويه عشان بتجيب لي التكفير والذي منه , وبعيدا عن الكلام عن الصيدليه عشان ببقى وقتها خنيق وبشيل الناس مشاكلي وهمومي وهما ذنبهم ايه ؟
.
أسوق إليكم هذه المعلومه من موقع ( عالم ستات وبنات )
..............................................................................
..............................................................................
وصفة الدكتور عادل عبد العال لعلاج النحافة وتسمين الوجه

المكونات ؛ حمص وطحينة

نجيب الحمص ونطحنه الى أن يسير مثل البودرة

و يخلط الحمص المطحون مع الطحينة وكدة تبقى جاهزة الوصفة

وتأخذ أثناء الثلاث اوقات الأفطار والغداء والعشاء مع الأكل ز يها زى طبق السلطة مثلا

وطبعا ما فيش مدة محددة ولكن د /عادل ذكر أن تناول الوصفة لمدة شهر يزود الجسم من 5ك

إلى 6 ك وقال كمان أن أول منطقة يبان عليها زيادة الوزن هى الوجه

يعنى كل ما هتستعملوها أكتر كل ما هتزود وزنكوا أكتر
......................................................................
.......................................................................
حبيب قلبي دكتور عادل عبفتاح , وقالك حمص وطحينه وهنسمن بيهم الوجه .
...............يا سيدي بالحمص والطحينه يحيا البشر , حقا إنك لن تضع قدمك في الحمص والطجينه مرتين !!.

صباح الخير , قبل سيدنا محمد والإسلام كان فيه سيدنا عيسى والمسيحيه وقبلهم سيدنا موسى وأنبياء كتير ورسل ورسالات سماويه , التاريخ بيقول لنا إن كل الأنبياء والرسل تقريبا بُعثو في منطقة الشرق الأوسط وتحديدا في المربع بتاع مصر والشام والحجاز , جايز باعتبار المنطقه دي تحديدا هي مركز الكون , لكن ده ميمنعشي إن البشر كانو بيعمرو الأرض في أماكن بعيده جدا , من أطرافها إلى أطرافها , يعني في بلاد ماء وراء النهر وفي أمريكا الجنوبيه وأوروبا وفي جنوب أفريقيا , أغلب البشر في المناطق دي موصلتشي لهم الرسالات السماويه بحكم إن مكانشي فيه طيران زمان ولا ساتالايت ولا فيس بوك , وسائل النقل والمواصلات كانت تكفي أن يذهب رجل للحج من المدينه إلى مكه فتستغرق رحلته شهرين رايح جاي ( مسافة 400 كيلو ) , طيب ربنا هيحاسب البشر دي إزاي ( وما كنا معذبين حتى نبعث رسول ) ؟! .
.
في مقال رائع لسيدتي المبدعه دائما ( داهيه فرفر ) , تتحدث عن جدلية وجود مخلوقات فضائيه في كواكب أخرى , ورد زميل لها بأنها استحاله لأن سيدنا محمد موصلشي برسالة الإسلام إلى الكواكب الأخرى !!
يا سيدي هل تعلم أن حتى الأن هناك ملايين البشر على سطح كوكب الأرض لم يسمعو عن الإسلام ولا عن المسيحيه ولا عن أي ديانه سماويه , يمارسون أنواع شتى من الوثنيه ( يخترعونها بأنفسهم أحيانا ) , كيف سيحاسبهم الله ؟
أما جدلية وجود مخلوقات في كواكب أخرى فلن ينفيها أبدا أن هذه الكواكب لم تصل إليها رسالات سماويه , نفترض أنها لم تصل ( إيه المشكله ؟ ) , نفترض أن لهم ديانات متلاحقه ورسل متعاقبين من نفس فصيلتهم وأننا لم نسمع بهم من ولا بأنبيائهم .
الخلاصه لصديق سيدتي العزيزه : إنت شاغل بالك ليه بجدلية ( ربنا هيحاسبهم إزاي ؟) , إنت قلقان على ربنا سبحانه وتعالى ( والعياذ بالله ) ؟ , أليس هو خالق الخلق ويُحسن التدبيرَ ؟! .............. ويعفو عن كثير .

October 18

حالنا بقى كده للأسف , اختلفنا في السياسه وبعد شويه زاد الإختلاف أوي , فبقينا مش طايقين بعض , حاليا لو اتكلمنا في حال الناس هنختلف , لو اتكلمنا في أفضل أنواع العربيات هنختلف ( عن عمد ) , لو واحد زي حالاتي قال إن الحب أهم شرط للجواز هتلاقي واحد من الناس التانيين يقولك لأ أبدا أنا أعترض , والناس التالتين هيقولو عيب عليك اللي انت بتقوله ده , ولو عزمنا بعض في كافتيريا وطلبت نسكافيه هيطلب التاني شاي مع إنه مبيشربشي شاي والتالت هيطلب سحلب , فكرة إننا هنشرب نفس المشروب دي بترهق البعض , لو رايحين نفس المكان عشان نتقابل هناك هقول انا هركب اتوبيس والتاني هيقول قطر والتالت تاكسي , هيبقى اختلاف عن عمد ( خُلقنا لنختلف ) , جايز كارهين الصحبه لنقطة الإلتقاء , طيب هنتقابل في نقطة الإلتقاء دي إزاي ؟ ونتقابل ليه ؟! .
رايحه بينا على فين يا ثوره ؟ , بدأت مؤخرا أقتنع إننا ولا شئ , لم نكن شيئا في يوم من الأيام حتى نرغب في أن نكون !!.
كلنا ضحايا لتعليم غبي وثقافه رجعيه ومجتمع قبلي أبوي ذكوري متخلف بطبعه

في البيت 3 كنبات , كنبه جنبها فازرة زرع أخضر , وكنبه فوقها لوحه مرسوم عليها ( عضمتين وجمجمه ) , محدش عارف مين اللي جاب فازة الزرع دي ولا مين اللي جاب اللوحه المخيفه ؟ , بس إحنا وعينا عالدنيا لقيناهم موجودين , وفيه كركبه كتير أوي جوه البيت وصويت وخناقات , أما البلكونه هتلاقي فيها كنبه صغيره والمنظر بره من البلكونه تحفه بصراحه , هتشوف جناين وحمامات سباحه وبيوت نضيفه وشمس ونور , والبيت ده فيه 3 خوات , كل واحد فيهم بيحاول ويصر إن خواته يقعدو معاه على نفس الكنبه ( بالزوق ولا بالعافيه ) , أخ منهم قاعد تحت اللوحه والتاني قاعد جنب الزرعه والتالت زهق من مشاكل البيت وقاعد في البلكونه , ومع جمال المنظر بره نسي شكل البيت من جوه ايه , ولما عينه وقعت على بيوت كتير مليانه بالحب والنور تخيل إن بيته ممكن يبقى كده من جوه , بس هو مش عايز يدخل من البلكونه ومستني المدد الإلهي أو الساحره الطيبه اللي هتحوّل البيت اللي جوه بعصايتها السحريه !!

مساء الخير , فكره غريبه جت في بالي , هو البرادعي لما قال نعمل مصالحه والإخوان فصيل وطني , ليه كلنا وقتها وافقنا على المبدأ وبعضنا اعترض ( وانا منهم ) على فكرة إن الإخوان مش فصيل وطني ولا يستحق المصالحه , لكن محدش مننا ( العقلاء على الأقل ) قال البرادعي خاين ولا قال إن المصالحه اللي يقصدها بتعني صفقه مع الإخوان ؟!
طيب لمجرد توقعات إن فيه اتجاه لمصالحه من السيسي مع الإخوان , ودي توقعات مش حقيقيه , ومع ذلك نفس الأشخاص اللي قبلو ورحبو بمصالحة البرادعي شافو إن السيسي لو عملها تبقى صفقه ؟!
هبسطهالك , هي المصالحه مع الإخوان تبقى عمل نبيل وشريف أوي لو نادى بيها البرادعي وتبقى حاجه قذره شيطانيه لو نادى بيها السيسي ؟!
.
فكرة تأليه شخص زي البرادعي واعتبار كل أفكاره ورؤاه من النوع الملائكي النقي وشيطنة شخص زي السيسي واعتبار ما يُحتمل أن يقوم به هو عمل شيطاني خبيث !!
.
أنا شخصيا لا أدعي العلم المطلق ولا الفهم , ولا أدعي أنني شققت عن صدر هذا وذاك , وكل الحكايه إني بحط دايما علامة استفهام , دعوه بسيطه للتفكير .

October 17

مش ملاحظين حاجه غريبه !!
........طيب ركزو كده في ال كام نقطه دول وانتو تلاحظو
.
1- منتخبنا اتغلب من غانا 6/1 ودي عمرها ما حصلت ...ماحنا طول عمرنا بنلاعب غانا وعمرنا ماتغلبنا بسكور كده ؟!!
.
2- وانا راجع من مصر عملت حادثه بالعربيه في العين السخنه , طيب الطريق ده أنا مشيت فيه 100 مره قبل كده ..إشمعنى المره دي بعمل حادثه ؟!
.
3- لمار بنتي كانت كل يوم تقولي احكي لي حكاية القطه طاطا اللي لونها مشمشي , ومن كام يوم لقيتها بتقولي احكي لي حكاية القطه الروز , وهو فيه قطه لونها روز يا جدعان ؟! .......أكيد ده سيم !!.
.
4- روحنا قبل العيد بيومين نشتري لحمة العيد من كارفور مالقيناش عنده ( رقبه ضاني ) , مش معقول , مش ممكن , إزاي كده واحنا في دخلة عيد ؟!
.
......... لو ركزتو في الكلام ده هتعرفو وتتأكدو إن نظام مبارك راجع تاني , وإن مبارك ( الله يرحمه ) هو رئيس مصر القادم وهيشكل وزاره برئاسة سعد زغلول !!.............. يالله ننزل بقى ونتظاهر , نادولي على عرابي باشا ( الإستقلال التام أو الموت الزؤام ) !!

واحده ست زعلت أوي من جوزها , بيعاملها وحش وبيهينها ويضربها , في لحظه كده قررت إنها تهرب من البيت , وفعلا هربت وطلعت في الشارع قابلها واحد بلطجي ( بدقن ) وقطّع هدومها وفضل يغتصبها ونادى على صحابه الأجانب عشان يغتصبوها معاه , وبعد شويه قدرت تقوم من وسطهم ورجعت بيتها وهي عارفه ومتأكده إن البلطجي وصحابه لسه موجودين في الشارع .
طيب تعمل ايه بقى ؟ تهرب تاني وتقابل نفس المصير مع البلطجي ولا تاخد نفسها وتشرب بؤ مايه وتشوف حل مع جوزها وقبل ماتفكر في الهروب تبقى واثقه إن فيه اللي هيحميها من البلطجي وعارفه طريقها وسكتها وحلمها ؟!.
.
من الأخر بس عشان الصداع والمراره , أنا موافق يحكم مصر نظام فاسد ( مش حابب كده بس قابل ) لحد ماخد نفسي واشرب بؤ مايه واعرف طريقي منين لمانزل أتظاهر , لكن مش هسلمها للبلطجي تاني , فهمت يا عمو ؟!.
.
يوم ما نبقى قوه حقيقيه ( متماسكين ) وعارفين طريقنا وخطوتنا الجايه ايه؟ وحلمنا هيودينا لفين والثوره دي يبقى لها قائد عايش في وسطينا هتلاقيني أول واحد بتظاهر معاك , غير كده يبقى نبلع أي فساد ونحاول نعدّله على استحياء , أنا مش هكرر نفس المهزله اللي عشاتها مصر تاني .

أيوه يا سيدي مرسي راجع للرئاسه والبرادعي هينزل في أرضنا اللي في السنبلاوين ويعزأها بالفاس وابو الفتوح بيكره الإخوان عمى و أمي اسمها نرمين ....عندك اعتراض ؟!.

أصعب حاجه هنا إن المطر بنستناه بال 10 شهور على بال ما بيججي تاني , شحيح أوي علينا وبخيل , ورأيي الشخصي إن المطر هو أعظم وأجمل مخلوقات الله ( بعد عيون حبيبتي ) !!.

هو انا عشان قلت لها بحب اللفت اللي انتي مخللاه ده تقوم تحطهولي في كل الساندوتشات ؟ الحمد لله نسيت تحطه في ساندوتش المربى , دي ساندوتشات لفت وجنبها حاجه تانيه يا لينا !!.
بس هاكلها , مانا جعان وهاكلها .......... , يالله بقى ما علينا , تسلم الأيادي تسلم يا جيش بلادي !!.

وعلى موقع الإتحاد الدولي لكرة القدم ( الفيفا ) ورد خبر أن التحليلات بعد المباراه أثبتت تعاطي 3 من لاعبي غانا للمنشطات !!.
ممممممممم هو عشان الموقع ده محترم والعيبه مش بتطلع من بؤه وعنده بنات كتير في الأصدقاء مرضيش يقول لنا نوع المنشطات دي إيه ؟!.
والنبي يا فيفا تستري على ولايانا !!.

بص يا سيدي كان فيه شاب جميل ووسيم أوي ( شبهي كده ) , وقال ايه ضربت في دماغه إنه يعدي للشط التاني من النهر , ليه بقى ؟ لأن الجهه اللي عايش فيها دي فيها جدب وقحط وفساد وهو شايف بعنيه في الناحيه التانيه خير وعدل ورفاهيه ومغارة على بابا , بس الشاب الوسيم ده مش بيعرف يعوم لكن حماسه خلاه ينط في النهر وطبعا كان هيغرق لولا ستر ربنا ولحقوه خفر السواحل في اللحظه الأخيره , طلعوه وهو مش قادر يتنفس وقلبه تقريبا مش بينبض , وعملو له تنفس صناعي وأول مافاق قام شتمهم ونط في المايه تاني , قامو نزلو خفر السواحل ولحقوه تاني قبل مايغرق ويموت وكالعاده لما فاق شتمهم !!.
............. يا كاباتن يا حبيبي , يا نور عيني , يا ضنايا , شئ جميل إنك بتحلم بحياه أنضف وأرقي , بس لازم تتعلم من أخطائك , أولها إنك لو حبيت تعدي النهر لازم تتعلم العوم الأول , وتتأكد من طبيعة الناس اللي هيقابلوك في الجهه التانيه ويشدو إيديك , مش أي حد يشاورلك من عالبر التاني تنط وتغرق نفسك عشانه , حاجه مهمه كمان , احتفظ ببعض الإحترام لخفر السواحل عشان لو فشلت تاني وانا متأكد إنك هتفشل ( بسبب الصربعه والحماس اللي بيسبق العقل ) تلاقي حد ينقذك !!.

أحتاج فورا إلى 9 سجاير حشيش ( عمري ماشربته ) و باكيتة ويسكي ( ولا عمري دوقته والله ) وساندوتش جبنه رومي من أجل الإستمرار في بعض المناقشات السياسيه , أنا حاسس إن ساندوتش الجبنه الرومي ده هو اللي هيقضي على صحتي !!.

يا حميده صدقيني ده أنا مواطن شريف , ..... الوداع يا مواطن , جود باي يا شريف !!.
مشهد عبقري من فيلم ابن حميدو , عمالقة الكوميديا ( إسماعيل ياسين / زينات صدقي ) , رحمة ربي عليهما .

صباح الخير , من كام يوم كنت قاعد بتناقش مع مراتي في موضوع وجدلية ( هل نتعلم التاريخ العربي والإسلامي بنفس الطريقه العقيمه المزيفه التي نعرفها أم يجب علينا أن نقرأه بصوره صحيحه بما له وما عليه , مع ضرب أمثله كثيره ) , المهم بقى اندمجت في الشرح و التوضيح و خادتني الجلاله على راي يوسف بك وهبي , وبعدين بصيت كده لقيت مراتي نامت وفي سابع نومه !!.
يبدو إن الواحد في ال 3 سنين دول أدمن الخطابه والكلام المقعر والتحليل والتفصيص وشكلي كده سوف أعيد افتتاح الإتحاد الإشتراكي مره أخرى .............. أيتها السماء صبي علينا لعنة الألهه , أه صبي لي شويه هنا !!.

October 16

وقال أصدقائي المؤيدين للنظام الحالي إن مصر خسرت امبارح لأن لعيبة المنتخب فيهم إخوان وكانو متواطئين !! , ..... بينما أعزى أصدقائي الإخوان سبب الهزيمه إن جمهور غانا كان رافع شعار رابعه وإن لاعبي غانا كان فيهم 7 مسلمين !!.
........... يارب طيب دي بلد ينفع نعيش فيها , يارب بقى كده كتير والله !!

عارفين إيه اللي بيعملوه الإخوان ونحانيحهم الأيام دي ؟ هما عارفين إن مرسي مش راجع وان اللي راح عند الحكومه مبيرجعشي تاني , كل مظاهراتهم وهرتلتهم والكلام عن الشهدا والديموقراطيه ولا مؤاخذه هو مجرد ( هد لحيل البلد ) , أيوه بالظبط كده هيفضلو سنين جايه يهدو في حيل البلد دي مش أكتر , عارف إنت الدبان اللي بيقعد يلف ويدور حوالين لقمتك ؟ أهو ده , لا بياكل ويمشي عشان تخلص ولا بيسيبك تاكل , هو بيقرفك وبيكرهك في لقمتك وبلدك وعيشتك مش أكتر .

إمبارح كتبت عن شماتة الإخوان في مصر بعد ماتش غانا , يعلم ربي إنه كان مجرد توقع مش متأكد منه , النهارده اتأكدت وزياده عن اللزوم كمان , طول عمرهم الإخوان مش بيخذلوني في توقعي لدرجة وساختهم , وهنا بقى عندي سؤالين جادين والله , السؤال الأول لشباب الإخوان : إنتو بجد لو مصر دخلت حرب بكره الصبح هتعملو إيه ؟ هتحاربو مع مين ؟ هتدافعو عن الأرض والتاريخ والتراب والعرض ولا إيه ؟!.
السؤال التاني للبرادعي وهو نفس السؤال , إنت عايز مننا إيه يا دكتور بالظبط ؟ طيب مطلوب يحصل إيه من الإخوان عشان تفهم إنهم مش مننا ولا لهم علاقه بالبلد دي ؟!.
أنا واحد مغترب وربي أعلم بفكر في النزول النهائي عشان تعبت , مش بيقلقني حال مصر الأمني ولا الشوارع والمطبات والحفر ولا الزباله ولا الفساد ولا ولا ولا , إنما أكتر حاجه بتكسرني إني أبقى متأكد إن البيوت المصريه فيها قلوب بسواد قلوب الإخوان , هنعيش إزاي يا مولانا مع بعض ؟!.

كنت جعان أوي من ساعة ما صحيت , وبعدين مراتي عملت لي ساندوتش كبده كان باقي في التلاجه من يومين أو 3 أسابيع مش فاكر , أنا كلت الساندوتش وبدأت أمخمخ , ولقيت الحل !!.
السؤال ... هو ممكن ؟ أه ممكن ؟ لأ ممكن جدا كمان .
طيب إزاي ؟!
بص يا مولانا , الماتش الجاي مش هيبقى كوره عشان تبقى فاهم , هو هيبقى 3 حاجات , علم نفس وبعدين وطنيه وبعدين كوره
.
في علم النفس , لازم تغيير المدرب مش لاسباب فنيه ولكن لأسباب نفسيه ( بنفتح صفحه جديده بدم جديد ) , محتاجين حماس حسن شحاته تحديدا .
لازم نفهم اللاعيبه إنك مش محتاج تفوز 5 عشان توصل , لا دي حسبه غلط , والصح زي ما قالي أحد الأصدقاء الحاصل على دكتوراه في التنميه البشريه ( جزأ المشكله وهي تتحل ) , يعني هنعتبر يوم المباراه إن عندنا 5 ماتشات متتاليه , كل ماتش مدته 20 دقيقه ومحتاجين هدف في كل ماتش , ممكن ؟ ممكن جدا .
.
في الوطنيه بقصد الجماهير , يمنع تماما دخول جماهير الألتراس وأبناء خيرت الشاطر ! , ورأيي الشخصي أن يسمح للدخول فقط لمن هم أكبر من 35 سنه والعائلات ونكمل العدد بعساكر أمن مركزي وجيش ..التفتيش مهم جدا كمان .
.
وفي الكوره , إسمحولي أقول لكو رأيي المتواضع إن فريق غانا فريق تعبان مُلِّه , واحنا اللي كنا صفر عشان كده ظهر على قفانا , محتاجين كثافه هجوميه وتنويع في طرق الهجوم , لازم نجهز عمرو ذكي وجدو في الفتره دي , هنبدأ براس حربه أساسي على الأقل ووراه أبو تريكه وصلاح , احتياطي لهم راس الحرب التاني وشيكابالا ومحمد ابراهيم ...هي دي القوه الهجوميه .
في الدفاع محتاجين حد عنده خبره بدل محمد نجيب وباك شمال غير قناوي , في الوسط لازم نستغنى عن حسام غالي وحسام عاشور لأن أخطائهم قاتله , أقترح تحديدا أسماء أحمد حسن وحسني عبد ربه ( عشان مش بيخافو وعندهم خبره ).
.
هو ممكن ؟ ممكن جدا , ونفوز ونوصل كاس عالم ....أه والله يا سيدي , يا إما يكون ساندوتش الكبده مضروب وانا بهزي الهزيان الأخير !!

October 15

عايز أقول لكل خروف شمتان فينا دلوأتي إن معدنك ( المصدِّي والقذر ) بيبان في الأوقات اللي زي دي , شمتو فينا في هزيمة 5 يونيو 67 وبتشمتو فينا أهو في هزيمة 15 أكتوبر 2013 ..... بس احنا مش هنيأس وهنحارب هنحارب هنحارب
أ*ا ...أ*ا .... يا برادلي لا تتنحى !!.

حفله بسلطاتها وبابا غنوجها ........ أول مره من يوم ماوعيت عالدنيا ألاقي منتخب مصر بيتعمل عليه حفله .

كل سنه و حضراتكو طيبين , وانا كمواطن زملكاوي صميم بتمنى الفوز لمنتخب الأهلى اللي هيلاعب غانا بعد شويه , يالله أهو كله يهون من أجل عيون الشقيقه الكبرى مصر .

October 14

بكره العيد يا بشر , كل سنه وانتو طيبين , واحنا صغيرين كنا بنسمع أغنية صفاء أبو السعود ييجي ألف مره في يوم العيد ده ( كانت هي المقرر بتاعنا ) , ونفهم كلامها على إنها بتقول ( سعد نبيهه ) و كل مره أقول في نفسي مين سعد نبيهه ده اللي صفاء بتغني له ؟ يكونشي خالها أو يكون الراجل صاحب مصنع البلالين اللي بنلعب بيها ؟ بعد شويه عرفت إن مش أنا لوحدي اللي فهمت كده , تقريبا كل أطفال مصر فهمومها زيي , وفين وفين بقى لما كبرت وفهمت عرفت الحقيقه , إن سعد نبيهه مش يقرب لصفاء خالص ولا عنده مصنع بلالين !!.

وبما إني شغال النهارده وشغال بكره وشغال إمبارح وشغال 367 يوم في السنه فكل انطباعي عن يوم غد الثلاثاء 15 أكتوبر إنه هيبقى فيه ماتش مصر وغانا وأتمنى من كل قلبي النصر للشقيقه الكبرى مصر , إنما واحد يقول لي عيد ويجيب لي صور بلالين وخرفان وتهانئ والجبالي وكروت معايده وشموع قايده , الكلام ده معرفوش يا بيه , يعني إيه أجازه يا هاني ؟ يعني إيه عيد ياباشا ؟!.

والجزيره بتقول إن فيه مليوني متظاهر على عرفات ينددون بالإنقلاب !! , ماهي العاهره لما بتتوب أو تعجّز بتشتغل فتّاحه !!.
طيب هو الحج على بعضه بيبقى فيه مليون ونص من 200 دوله مختلفه , مكه نفسها متشيلش أكتر من كده , وما علينا من إن حصة مصر مش بتزيد عن 300 ألف في أحسن الحالات .
إنما جه في بالي سؤال لمخنثي الجزيره , فيه 2 مليون حاج مؤيدين للخروف أبو رياله على عرفات وبينددو بالإنكلاب ماشي , طيب معروف إن أغلب أنصار الخروف من القرى والأقاليم والعشوائيات , ناس غلابه وتعليمهم منخفض غالبا , وتكلفة الحج للشخص الواحد بتكون في المتوسط 40 ألف جنيه , إنتي يا جزيره تقصدي إن فقراء الإخوان يملكون 80 مليار جنيه ؟!!.

الإخوان رايحين مكه عشان يدعو علينا احنا والسيسي في موسم الحج , في المناسك وعلى عرفات , طيب يا سيدي , ماهما اللي اشتغلو فتره في حكاية إن الشرطه لما يهجمو عليهم يعملو نفسهم بيصلو ( يعني تاجرو بصلاتهم ) , وشوية يقولك دانا اتقبض عليا وانا صايم ( يعني تاجرو بصيامهم ) , وأخيرا نزلت فتوى اخوانجيه بتحريم الزكاه لغير فقراء الإخوان ( يعني تاجرو بالزكاه ) , وقبل كده قال كبيرهم اللهم أمتني على الإخوان ( يعني تاجر بالشهاده والوحدانيه والربوبيه ) , فمش باقي من أركان الإسلام الخمسه غير الحج واهو الناس مقصروش وبيتاجرو برضه ...اليوم أتممت لكم جهلكم وشرككم ورضيت لكم الإخوان دين !!.

في لحظه كده وفي دخلة العيد افتكرت الشهدا بتوعنا بالرحمه , ربي يرحمهم جميعا , جيكا وكرستي وعماد ومينا وسالي , وكل واحد نزل عشان خاطر بلده مش عشان خاطر جماعه ولا حزب , ومع ذلك ربنا يرحم شهداء الإخوان , لو حد متابع صفحتي هيلاقيني مش بجيب سيرة الشهدا كتير لسببين , أولا بتعب جدا لما بفتكرهم ( مش مهم حضرتك تصدق ) , ثانيا مش بتاجر بأسماءهم ولا بصورهم ( مش مهم تصدق برضه ) , بعد سنه واتنين وتلاته من موتهم عايز أقول لحضراتكو كلمتين :
أولا : مش كل واحد ييجي يقولك أنا هجيب لكو حق الشهدا تجرو وراه , الإخوان قالوها ألف مره وكل نصاب هيقولك كده , والحكايه باختصار وقلتها من سنتين إن حق الشهدا اندفن معاهم , كل الأدله اختفت واتفرمت والقاضي قدامه ورق أبيض ساده , أعظم قاضي في الكون ميقدرشي يصدر حكم بالإدانه على ورق أبيض !!.
ثانيا : مش كل واحد حاطط صورة الشهيد يبقى ثورجي وبينام ويصحى يحلم بحقه يرجع , صدقني المره دي كمان , كتير منهم الموضوع بالنسباله سبوبه مش أكتر , ومش شرط السبوبه تكون فلوس , يكفي جدا إنها تكون سناره والشهيد هو مجرد طعم بيصطاد بيه البنات أو بتصطاد بيه الأولاد !!.

النهارده وقفة العيد كل سنه وانتو طيبين , في شغلانتنا دي يوم الوقفه وقبل منه بيومين تلاته كمان بنشتغل كوزموتيك وبس يعني مستحضرات تجميل وكداهون , ممكن نشيل الأدويه في كرتونتين ونرميهم في المعمل , وانا ماليش في الكوزموتيك يا مولانا أه وعهد الله , يعني مش بعرف ماكينة براون بتشتغل إزاي ؟ ابقى اقري الكتالوج يا ستي , أصلي كنت غايب في المحاضره دي , وعلى سيرة الكوزموتيك فانا بتفهم شوية حاجات كده في ليلة العيد , يعني مثلا السويت وكريمات إزالة الشعر بقول ماشي , صبغة شعر أشقر فاتح على واحده ست تخينه وبكرش بقول مايضرش , شامبوهات وشاور جيل ومعجون سنان بقول ( حُمّاية ) العيد مايجراش حاجه , إنما اللي مش بقدر أفهمه في مبيعاتنا ليلة العيد هما حاجتين , حبوب التخسيس وكريمات تفتيح البشره , يعني حضرتك ( بكسر التاء ) هتاخدي أقراص التخسيس دي باليل وتصحي الصبح مانيكان ؟ يعني هتنامي وانتي بجسم عبد الفتاح القصري تصحي تلاقيكي بجسم هيفاء وهبي ؟ طيب بشرة إيه اللي هتفتحيها في كام ساعه دي؟ هي بشره ولا علبة سلامون ؟!

صباح الخير , من سنه كده قول سنتين وانا صوتي اتنبح , غلبت أقول إن قيادات الألتراس وقيادات 6 إبريل بيبيعو أعضائهم عشان يحسنو دخلهم , والمشتري موجود , أكبر تاجر ( أمخاخ ) في الشرق الأوسط , فلوس زارا بقى يامولانا والتوحيد والنور وسيناكولا وتجارة العمله والمخدرات , هقول تاني , لاهو انت فاكر إن المليارات اللي بيصرفها الإخوان في كل انتخابات جايه من محل العطاره بتاع المرحوم حسن البنا ؟!
شوفو اللي حصل من الألتراس امبارح وانتو تعرفو , فريق يد ايه اللي انتو رايحين تستقبلوه في المطار بالشماريخ ؟ ده فريق القدم في الأهلى ماشاء الله بقى من كتر ماخاد بطولات بياخد بطولة أفريقيا من هنا واللاعيبه تنزل من المطار على ملعب التدريب عشان يستعدو للماتش الجاي ولا حد بيقول لهم فين الكاس اللي معاكو !!.
لما بتكلم عن الألتراس ( أهلاوي وزملكاوي ) وعن 6 إبريل بتكلم عن قيادات , أما حضرتك كواحد من المريدين والتابعين فانا معنديش شك إنك غلبان في عقلك ومتحمس لنادي وفكره مش أكتر , يعني لا بتاخد أبيض ولا أسود , بس بتتحشد يا مولانا , ولعلمك الشديد أنا مش زعلان من القيادات بتاعتكو وغالبا لو كنت مكانهم كنت بعت يا باشا , ماهو احنا بشر و انا لا يمكن أبيع مبادئي بألف دولار في الشهر , لو 5 ألاف يبقى هفكر , إنما لو 10 ألاف دولار هقولك إلحقني بمرتب أول شهر , مصاريف مدارس بقى وعربيه وقسط شقه كلهم هييجو في ذهني ويعمو عيني , فاكر ابراهيم يسري في فيلم مرجان أحمد مرجان ؟ أهو كده بالظبط , إنت إزاي تسمح لنفسك انك تقولي عايز جيهان ؟ طيب يابراهيم أنا هديك مرتب 20 ألف دولار في الشهر , ممممممممم طيب والنبي ابقى وصّل الدبله بتاعة جيهان لها .
المشكله بقى حضرتك إنك إنت ولا مؤاخذه تبقى جيهان !!.

محمد حسين 

منوع

مش بقدر أفهم الحكايه دي ولا استوعبها , عيب خلقي عندي تقريبا , لأني بشوف أغلب الأصدقاء بتمر عليهم عادي جدا وبتفرحهم كمان .
حكاية إنك تقابل راجل قزم في الشارع وتتريأ عليه وتسخر منه , أو تجيبه في فيلم وتستغل حاجته للفلوس وتديله 200 جنيه وتضحك عليه الناس , أو توقفه في الشارع وتديله 20 جنيه وتتصور جنبه عشان توري الصوره لصحابك وتضحكو بقى وتقهقهو , حتى هنا بيعملو عرض أقزام في الملاهي عشان يضحكو الأطفال , في الأفلام بيبقى الإبداع الوحيد عند مولانا المؤلف والمخرج إنه يجيب القزم الكبير الراجل أبو شنب في مشهد وهو لابس بامبرز أو ماسك في بؤه ببرونه !! تصدق مضحكتش , أه والله , أنا أسف إني مقدرتش أضحك .
أسف عشان بعتبره بني أدم وربنا خلقه مش عشان نتريأ عليه أيها الإنسان العظيم الطويل المكتمل النمو , هو مش شمبانزي سيادتك !! .
ديموقراطية ايه يا ساده اللي هنعملها في مجتمع فيه المواطن مش عارف يكون بني أدم !!.

.

.

لك الله يا مصر !!

.
أحد أصدقائي المثقفين والغاليين جدا عليا ( من أنصار البرادعي ) كتب على صفحته فيما معناه إن مفيش إرهاب في مصر وإن الإرهاب ده حدوته وهميه اخترعها الجيش عشان يحكمنا ويقول بقى إنه بيحارب الإرهاب !!.
.
صديقي العزيز , أنا اترددت كثير في كتابة البوست ده احتراما وتقديرا لشخصك الكريم ( أرجو أن تغفر لي ) .
.
1- واحنا في الجامعه كانت ظهرت حكاية ( عبدة الشيطان ) , أولاد وبنات من أبناء الطبقه الثريه اللي مش لاقيين حاجه يعملوها بقو يلبسو تي شيرتات لونها اسود وعليها رسمة جمجمه وعضمه ويتجمعو في مكان يمارسو فيه طقوسهم الخايبه ( موسيقى ورقص غريب وخمره وممارسات جنسيه جماعيه ) .
فاكر كويس أوي مشهد من برنامج حديث المدينه أياميها , مفيد فوزي بيسأل ولد منهم ( انتو صحيح بتمارسو جنس جماعي ؟ ) , رد الولد وقال له ( لأ يا باشا احنا بنبقى 4 أو 5 أولاد مع 4 أو 5 بنات وبنمارس الجنس سوا !! ) , وكان رد مفيد فوزي سريع جدا , قال له ماهو ده يابني الجنس الجماعي , أومال انت فاكر الجنس الجماعي بيبقى قبايل مع بعضها ؟!.
.
2- في مرحله معينه من حياتي كنت بعشق مشاهدة أفلام الرعب الأمريكيه وخصوصا أفلام مصاصي الدماء , وأكتر مشهد علق في ذهني من أفلام دراكولا هو مشهد الطفله اللي اتحولت إلى مصاصة الدماء اللي بتدخل على مامتها وبتمشي بهدوء شديد ومامتها بتتوسل لها إنها مش تاكلها , الطفله مش بتستجب لأن عقلها مغيب تماما وبتهجم على مامتها وبتمص دمها .
.
3- في سينا واماكن تانيه من مصر هتلاقي كل يوم كام عسكري مقتولين وطيارات طالعه نازله وارهابيين مقبوض عليهم وسيارات بتنفجر , لو سألت حد من شمال سينا هيقولك إحنا بيحكمنا الجماعات الإرهابيه أصلا , يعني دول مش واحد ولا اتنين دول دوله في شمال سينا , تقدر حضرتك تسأل بنفسك
, وساعتها هتعرف إن اللي بيحصل في مصر ده اسمه إرهاب وإن 5 أولاد مع 5 بنات بيمارسو الجنس بيبقى اسمه جنس جماعي يعني مش شرط قبائل مع بعضها !! .
.
4- منظر أنصار البرادعي وهما ماشيين وراه ولاغيين عقولهم تماما ف وصل تفكيرهم ( مستوى الإنكار ) إلى مستوى إن مفيش إرهاب في مصر هو منظر مرعب جدا بالنسبالي , بيفكرني بمشد الطفله اللي هجمت على أمها في الفيلم إياه .
.
..................... وأخيرا صديقي العزيز اقبل اعتذاري مره ثانيه وانا أسف لأني بحب البلد دي , وبشوف من الغربال !!.

.

محمد حسين 

كبريائي

كبريائي مش مانعني
إني أصرخ م الوجع
الحكايه مش قلوب
فاضيه و رياء
لو تكون عاشق ترابها
يبقى ليه الكبرياء ؟! .
.
.
محمد حسين

منوع

طريقة تحضير وجبة الغدا لصيدلي عازب مغترب !!.
.
1- الإعداد
........ اسحب لك أي صينية شاي من المطبقيه تكون مغسوله
.
2- التحضير
........ إمسك الصينيه بإيدك الشمال وافتح باب الفريزر هتلاقي كيس عيش أكيد , شدلك منه رغيفين , إيه ؟ متجمد ؟ وإيه يعني ...سيبه 5 دقايق هتلاقيه فك وبقى زي الفل .
افتح بقى باب التلاجه , عندك جبنه في علب ؟ طَبْ كويس , خدلك حته جبنه من العلبه ...إيه ؟ معلقة إيه يا حاج ؟ اقطع لقمة عيش من الرغيف اللي عالصينيه واعملها ودن قطه واستخدمها كمعلقه .
عندك جبنه رومي ؟ طب كويس ...خدلك شريحه وحطها عالصينيه .
عندك لانشون ؟ طب كويس ...شريحه عالصينيه ....عندك خيار ؟ طب كويس ...اسحب لك خياره يا معلم , ارمي لك كمان حتتين مخلل من اللي قدامك دول .
عندك ناشينكاح ؟!
.
3- الأكل
......... خد الصينيه باللي عليها واقعد على كنبة الأنتريه , امسك الريموت وافتح التلفزيون على بانوراما أكشن أو أي قناه بتجيب أفلام رعب ( من بتوع مصاصي الدماء ) وحط صينية الأكل على حجرك وانت قاعد , خلي عينك عالفيلم وايدك بتأكّل بؤك , متقلقش هي عارفه الطريق .
بعد مشهدين تلاته في الفيلم هتلاقي الأكل اللي في الصينيه خلص , متسألشي إزاي ؟.... إقفل التلفزيون بقى ...كده إنت أتميت المهمه بنجاح
.
4- ما بعد الأكل
....... هتلاقي بواقي عيش وجبنه ولانشون عالصينيه , فتافيت يعني , شيل الصينيه زي ما هي وروح ارميها في حوض المطبخ بشويش .......ايه ؟ هتغسل بؤك ؟ ليه يا عم هو انت واكل سمك ؟!.... لما تصحى هتتوضى عشان تصلي في كل الأحوال ابقى اغسل بؤك
.
5- النوم
........ يالله بقى عشان تلحق تناملك ساعه عشان عندك شغل الساعه 4 , افتح باب الأوضه بشويش , بشويش , وامشي على طراطيف صوابعه عشان مش تصحّي مراتك وعيالك !!.

.

.مدارس مدارس !!.

.
في إطار حمله شرسه ومضنيه نقوم بها أنا و ( موراتي ) للبحث عن المدارس في مصر , قلبنا جوجل رأسا على عقب ومفيش فايده , قلناله ياعم جوجل أمي بتسلم عليك وبتقول لك والنبي ياخويا شوف لنا مدرسه تكون إنترناشونال وب 7 ألاف في السنه , أخري 7250 جنيه , ولولا إن عم جوجل راجل محترم وكُبّاره كان قال لنا لفظ مش تمام !!.
.
أسفرت الحمله والتحريات عن إن المدارس الدوليه في مصر بتبدأ من 100 ألف جنيه في السنه وانت نازل , يا قوة الله , مدرسة كذا بتاخد من التلموذ في كي جي 1 مبلغ 100 ألف جنيه غير نثريات ب 15 ألف جنيه ( بقشيش يعني ) , وقالك أصل احنا عندنا حمام سباحه وملعب فروسيه وسبورات الكترونيه واللي بينضف الحمامات عندنا معاه ماجستير من السوربون !!.
.
طيب يا جدعان مفيش مدرسه تكون ب 7 ألاف ؟ وتعمل خصم 10 % للصيادله والفقراء والعاملين عليها وفي الرقاب والغارمين ؟! قالك لأ .
قلت خلاص أنا لما هفتح صيدليه في مصر هشتغل بقى في الترامادول و الزاناكس وابو صليبه , مممممممم وبعدين فكرت شويه كده لقيت إن جدول المخدرات كله مش هيكسبني فلوس تنفع تدخل بنتي المدرسه دي !! , وافتكرت مشهد عبقري لشيرين في فيلم ( بخيت وعديله ) لما دخل عليها خطيبها أحمد راتب ولقى معاها فلوس فقال لها ( بعتي شرفك يا عديله ) , قالت له ( إخرس يا حيوان ...هو انا لو بعت شرفي هيجيب فلوس أد دي ؟! )
.
طيب مين بيدخل عياله هناك ؟ يتهيألي يكون واحد من تلاته , إما تاجر سلاح أو تاجر دين أو ناشط ولا مؤاخذه سياسي !!.

.

.

.

في تركيا , عملو حديقه بإسم أسماء البلتاجي ( الله يرحمها )!! , طيب مفيش خالد سعيد ؟ مفيش عماد عفت ؟ مفيش مينا دانيال ؟ مفيش كرستي ؟ قالك لأ .
وفي تركيا كمان فتحو متجر للجنس الحلال , أيوه اللي هو إزاي يعني ؟ قالك قنوات لبيع المنتجات الجنسيه بس بطريقه حلال , الشاشه مقسومه نصين نص للرجاله ونص للستات , والست اللي بتعرض المنتجات الجنسيه محجبه يا مولانا , أه وعهد الله محجبه , مع إن الجنس عندهم في الشوارع عادي , والمريدين عارفين إنك بتطلع من باب المطار في تركيا تلاقيهم بنات الدعاره في استقبالك ( مش محجبات على فكره ) !!.
فكرة متجر للجنس الحلال عامله زي فكره فندق لا يقدم الخمور في مصر أيام الموكوس , ويوميها قالك احنا مش هنقدم للزبون خمره بس لو هو جاب الخمره بتاعته معاه يبقى عداه العيب وأزح !! .
وفكرة حديقه بإسم أسماء محفوظ قصدي أسماء البلتاجي في تركيا متفرقشي عندي عن خبر تسميه شاره في إيران بإسم خالد الإسلامبولي
.......... يا عزيزي كلهم تجار دين , ( تركيا...إيران ... إخوان .... جنس حلال ...كباربه يعرف ربنا ...فندق مفهوش خمره , بيت دعاره حاجج بيت الله 300 مره .... مذيعه محجبه تبيع الواقي الذكري وال .... الصناعي ) !!.

.

.

الفرق بين 25 يناير و 30 يونيو ......... حاول تفكر أرجوك !!
.
الإتنين ثورتين لشعب محترم جدا ضد الفساد والسكه الغلط , طيب ايه الفرق ؟
.
الفرق باختصار أهو

* .. بعد ثورة 25 يناير العظيمه , قلنا نستمر في الثوره , فكنا بنلعب ماتش كوره مع النظام الفاسد على كاس دهب ومش هنخسر كتير لو مكسبناش الكاس .
.
* .. بعد ثورة 30 يونيو العظيمه , لو قلنا هنستمر في الثوره فلازم نفهم إننا دلوأتي بنلعب دور قمار مش ماتش كوره والجايزه هي ( مصر ) , يعني بنلعب على حيطان البيت سعادتك .... ممكن نكسب الماتش ونكسب كل حاجه أو نخسر الحيطان والبيت .
.
.
الفرق الوحيد بيني وبين حضراتكو إني رافض من أساسه إني أشترك في لعبة قمار بنلعب فيها ع ( مصر ) , المسأله هنا مسألة مبدا , محدش بيلعب دورين قمار على والدته !!.
.
الفرق التاني إني شايف إننا هنخسر كل حاجه لو نزلنا للشارع تاني وهنسلم مصر للإرهابيين من جديد , وانت شايف إننا هنكسب كل حاجه لو نزلنا , مش عشان انت متفائل وانا متشائم لأ , انا وانت بنحب مصر بس انت بتحلم و مغمي عينك وانا بحلم وعيني مفتوحه 

.

.

هحكي لكو حكايه صغيره
.
كان فيه شاب اسمه يوسف , طيب وابن حلال بس فقير مش لاقي اللضا و مظلوم في دنيته , قام الشاب ده دعى ربنا انه يفرج كربه , و في يوم صحي يوسف من النوم وجاتله رؤيا إن مفيش حل غير انه يدخل يلعب ماتش مع اللي ظالمينه وسارقين حريته وقوته , وفعلا نزل الشارع وواجه الفاسد واللعب كان على جوهره ثمينه اسمها ( الديموقراطيه والعداله ) لو فاز تبقى الجوهره هتحل كل مشاكله ولو خسر هيبقى مخسرشي كتير ويرجع زي الأول , دخل يوسف المباراه بقلب جامد , وفاز , وراح عشان ياخد الجايزه من بيت مهجور , دخل البيت ومسك الجوهره بإيديه , ويادوب لسه بيقول أحمدك يارب لقى ناس ولاد حرام ولعو في البيت وهو جواه مش عارف يطلع بالجوهره , النار دي فضلت شغاله ييجي سنتين , ويوسف محبوس جوه , قال خلاص أنا عايز أفلت بعمري من النار مش مهم الجوهره , المشكله ان ولاد الحرام محاصرين البيت ومسيطرين عليه , قام ابراهيم أخوه لما فاض بيه راح جاب عسكري من إيده وقال له تعالى ننقذ يوسف أخويا من وسط النار , وفعلا دخلو هما الإتنين وقدرو على ولاد الحرام اللي بره وطلعو يوسف ومعاه الجوهره !!.
طيب يوسف طلع من النار الحمد لله واتكتب له عمر جديد , والجوهره بقت موجوده بره بيت الناس ولاد الحرام , هل حضرتك شايف إن ده وقته للخناق بين يوسف واخوه والعسكري ؟!.
الإحتمالات ايه ؟ الأسوأ إن العسكري يطمع في الجوهره كلها له ؟ طيب مش انت كنت بتدعي ربنا انك تطلع منها صاغ سليم ؟ وفيه احتمال يقسم الجوهره معاك ؟ واحتمال يديهالك , في كل الأحوال احمد ربنا يا يوسف إنك بره بيت النار , وموضوع الجوهره بينك وبين العسكري تقدر تتفاوض عليه بعدين , بس متنساش إن اللي حرقو البيت وانت جواه لسه موجودين , ومش ساكتين , والمره الجايه هيحرقوك انت شخصيا انت وابراهيم والعسكري .

.

.من كام شهر قال شيخ مؤيد للإخوان هنحرق البلد وسيارات مفخخه وهنفجر كنايس إلخ , والغضب جوه صدور الإخوان مش محتاج تلسكوب عشان تشوفه , وصل بيهم الحال انهم مش بيعيدو على قرايبهم ( اللي مش إخوان ) , والكلام عن حرق مصر على لسان قادة الإخوان يتعمل مجلدات , ومع ذلك في كل مرة تفجير لسياره أو حرق كنيسه بنقول الشرطه والمخابرات عاملينها !! , بنحب احنا أوي نفكر بطريقة ( ودنك منين يا جحا ) !!.

تعالى بقى وانا أوريك أعجب حاجه في المواطن المصري المثقف النحنوح بس ركز معايا كده , في الوضع السياسي هيقولك مفيش حل غير المصالحه مع الإخوان وإلا هيحرقو مصر , و في الوضع الأمني تقول له مصر بتتحرق , يقولك لأ مش الإخوان اللي بيعملو كده !!.

.

.وعندنا في بلدنا يا بيه هتلاقينا كل ما بنزهق ونحس بالفراغ بنعمل حاجه من اتنين , يا إما بنلعب المزرعه ( السعيده ) عالنت أو بنروح نفجّر لنا كنيسه !!.

أهو تقدر تقول سِلو بلدنا كده , دي عادات وتقاليد بقى وفولكلور جميل , وفي كل مره بتنفجر فيها كنيسه بننسى المسحيين اللي ماتو وأهاليهم اللي اتشردو وملايين الأقباط اللي عايشين في رعب لمجرد إنهم فكرو بس إنهم يروحو يصلو , وتلاقينا بنفكر في السؤال الحلزوني اللولبي العميق ( هو مين اللي عمل كده ؟ ) , يا ترى وزارة الداخليه ولا وزارة الدفاع ؟!! ............ الأغبيا الحمير مش فاهمين إن اللي بيعمل كده كل مره هي وزارة الري !!.
وعلى أي حال لما بنزهق من السؤال ومش بنلاقي اجابه بنرجع تاني نلعب المزرعه ( السعيده ) !!.

.

.اختصار الكلام !!

.
يُحكى أن فيلسوفا التقى درويشا زاهدا , وبعد حوار مطول بينهما انصرفا , ثم سأل الناس الفيلسوف ماذا حدث في المقابله بينكما ؟ قال لهم باختصار ( هذا الدرويش يرى كل ما أعلمه ) !!.
والمعنى والمقصود أنني أنا الفيلسوف لدي العلم والحقيقه الكامله ( أعلم !! ) وأن هذا الدرويش يرى بعينيه هذه الحقيقه ( يرى !! ) .
هكذا هو حالنا في مصر , ننقسم ما بين درويش ( مكشوف عنه الحجاب ) وفيلسوف ( عارف القرد مخبي ابنه فين ) !!.
وما بين الفيلسوف والدرويش ضاعت القضيه وضاعت مصر في ال بينَ بينْ !!.

.

.

.

محمد حسين  .

العيون

العيون اللي بتسهر
بالسواعي
لجل ما تحميك سعادتك
مش هَفيّه
مش عيون بايعه
القضيه
.
جندي واقف
للرصاص اللي بيطلع
م الديابه
كل ديب و الطبع غدره
الرصاصه جت في صدره
مش في صدرك
ولّا فيا !!.
.
.
محمد حسين

منوع

قوم نتصالح !! .
....... نتصالح ؟ مصالحه .؟ صلح ؟ حوار .؟ كلمات غريبه أوي علينا دي , طيب تعالو نعمل تجربه صغيره , وانا هبقى الحكم اللي معاه الصفاره .
...........................................................................
احنا نجمع الخمسه الأعداء الموجودين في مصر حاليا , ونعمل جلسة صلح بينهم في البيت عندنا في البلد , كويس كده ؟
بس فيه شروط للصلح ( هي أبجديات مفهاش نقاس لأنه مينفعشي فيها النقاش ) .
.
.... الخمسه هما ( واحد إخوانجي , واحد سلفنجي , واحد برادعاوي , واحد فلول , واحد غلبان ).
.
............ أول شرط أو طلب هطلبه من المتصالحين إننا لازم كلنا نعرف إن مصر دي لها حدود جغرافيه واضحه لا يجوز تخطيها , وتاريخ كبير وتركيبه سكانيه معينه ... كويس ؟ الكلام ده فيه عيب ؟ طيب فيه واحد من الخمسه زعل وقام !!.
.
........... تاني شرط للصلح إنه ( لا يجوز بأي حال إنك متقفشي للسلام الوطني ولا أثناء تحية العالم وإلا إزاي هتبقى مواطن منتمي للدوله دي ؟ ممممممممممم واحد تاني قام زعلان !!.
.
............. تالت شرط إن أي حد مسئول أفسد الحياه السياسيه ونهب البلد في الفتره اللي فاتت مينفعشي يشارك في حكم مصر تاني و كده نبقى كارمينه أخر كرم وكفايه انه متعدمش ولا اتسجن .........واحد تالت قام زعلان !!.
.
............. رابع شرط إن الدين والإنسانيه والعقل والمنطق بيقولو إن الديب لو فضلت تعلمه فرنساوي وتعلمه الإتيكيت وتدربه على أكل الخس والكافيار وتعلمه المحبه وتفهمه إنه ميغدرش هيفضل ديب برضه وهوايته المفضله هي شرب دماء البشر..... واحد رابع زعل أوي وقام .
.
شوفتو الشروط مش مجحفه إزاي ؟ دي بسيطه خالص
.......................أهو الخامس ده بقى هو مصر , مصر اللي بحلم بيها !!.

.

.

أول ما تلاقي الإخوان بدأو في السهوكه والنحنحه ونزلو ببوستات المصالحه , والحب الحب , وبدأو يتعاملو معاك زي الحلاق اللي بيصالح زبون بعد ما قطع له ودنه , اعرف إنهم في النزع الأخير وبيدبرو لكارثه معتبره , لو قريت تاريخ اليهود والصهاينه كويس هتعرف أنا قصدي ايه ؟!.

.

.

محمد حسين 

كدابين

كدابين
.
كلُّهم قبضو التمن
اللي باعك واللي خانك
واللي قال عايش عشانك
كدابين !!.
حتى إسمك يا بهيه
مرّغوه في تراب وطين
.
اللي شال أعلام غريبه
واللي رافض
قال وقوفه للسلام
واللي من أوِّل ما يصحى
يبتدي يبيع الكلام
واللي ناشط أمريكاني
واللي كاني واللي ماني
واللي عامل معجباني
عنده أوفِّة معجبين
كلهم كده كدابين
.
مش باقيلك بالمناسبه
غير شهيدك
والغلابه الطيبين
.
اللي عاشقين بالوراثه
اللي مالهم في السياسه
اللي توبهم لجل حظك
لسه خالي م النجاسه
اللي ما بيعرف سعادتك
مين بينزل ضد مين ؟
.
اللي إيدهم شققت
لجل ما ياكلو العيال
واللي حالفين يسقو أرضك
حتى لو كانت رمال
واللي ماتو هناك يا خال
واللي باقي من ولادك
دول شمال
والشمال قالو جدودنا
الشمال غير اليمين !!.
.
و البقيه في حياتك يا بهيه
في اللي بايع للقضيه
اللي باع تركة سنين !!.
.
.
محمد حسين

منوع

انوع الذكاء !! .
.
العلماء قسمو الذكاء ل 3 أنواع
.
........ ذكاء عملي practical intelligence وده بيبقى الذكاء في التعامل مع الماده والأله , أكتر ناس مشهورين بيه هما المخترعين والمهندسين والفنيين .
.
........ ذكاء إجتماعي social intelligence وده بيبقى الذكاء في التعامل مع الأشخاص ( البشر ) , أكتر ناس مشهورين بيه هما بتوع التنميه البشريه ورجال الأعمال وبتوع الكاستومر سيرفيس .
.
........ ذكاء مطلق , وده له علاقه بالتفكير بعمق في الكلمه والمعنى و الفكره , مشهور بيه الفلاسفه والشعراء والأدباء والمبدعين .
.............................................................................................
حاول تعرف وتحدد نوع ذكائك , مفيش حد عنده نوع منهم بنسبة 100 % والباقي صفر , لأ , دايما بيبقى عند نفس الشخص نسبه من كل نوع , يعني مثلا أنا يتهيألي لو قيمت نفسي هلاقيني كده , 2 % ذكاء اجتماعي , 5 % ذكاء عملي , و 18 % ذكاء مطلق ..... المهم اني فاشل كده في العلملي والأجتماعي .
...........................................................................................
عشان كده هتلاقيني أمارس الفشل في مهنتي بنجاح كبير !! , التعامل مع البشر مهمه شاقه جدا على أمثالي , بحسد المهندسين اللي بيتعاملو مع الأله , الأله فقط , وبحسد الشعراء والفلاسفه اللي بيتعاملو مع الفكره والكلمه فقط .
في وطنا العربي , عشان تتعامل مع البشر فانت مش محتاج دروس خصوصيه في التنميه البشريه والكاستومر سيرفيس والذكاء الإجتماعي , لأ خالص , إنت محتاج واحد رفاعي يلم التعابين اللي في ألسنة الناس وعقولهم !!.

.

.

صباح الخير , حلقة باسم يوسف إمبارح كانت تحفه فنيه , هتسمّع جامد أوي وهتطرطش في كل مكان , عوضت الناس عن غيابه شهور طويله , أتوقع نسبة مشاهده خياليه لفيديوهات الحلقه , الأغنيه كانت روعه , وسبب نجاح باسم هو باختصار حاجتين , بيشتغل بفريق عمل وبيتقن عمله , يعني مجهود كبير أوي وشاق عشان يطلع بالساعه دي, إنما اللي كان بيهمني في الحلقه كله هو تعريف كلمة ( الحياد ) !! 

مفيش حاجه في الصحفي أو الإعلامي أو الفنان اسمها حياد , وده اللي عمله باسم , فيه إنصاف جايز , لكن الفنان لو بقى محايد هيتحول ل ( مسخ ) !!.

.

.

.

محمد حسين 

وهو حبيبي مش داري

أنا اللي بشوف
في عين الناس
رسايلهم
وبقراها كتاب مفتوح
بشوف في عنيكي
سطر وسطر
كلام واضح
ونُص كلامها متداري
.
وبتقلِّب على دا الحال
في كام مرسال
ما بين سطرين
ونظرة عين
أنا العاشق وهو حبيبي
مش داري !!.
.
.
محمد حسين

منوع

لكل شاب بيفكر في الجواز !!.
.
حزمتين بقدونس وكرنبه تكون خفيفه و مسطحه كده ( قشطه شكلنا هناكل محشي قبل نهاية السنه الماليه دي !!
.
... 3 جراكن مايه نستله من الكبار .......... شغل العتالين هيبتدي !!
.
, 6 أكياس عيش فينو , شوية لفت صغيرين وبنجرايه ( ده المخلل أكيد ) هذا المخلل أحبه .
.
............. يارب مانسى حاجه منهم بقى .
.
المهم سألتها هو انا أعرف البقدونس إزاي ؟ قالت لي البقدونس اللي هو مش الكسبره !! .................... نياهاهاهاها والنبي انتي نورتي المحكمه يا مراتي .

.

.تخاريف بقى واستحملوني 

.
الحكايه مش تناكه ولا بغدده عالفاضي , من يومين دخل مريض ومعاه روشتة أسنان , ده ايه ؟ ده مضاد ..., وده ايه ؟ ده مسكن ...., وده ايه ؟ دي مضمه سيادتك .
طيب أنا هاخد المضمه بس , أوكيه زي ما تحب , حسابك 18 ريال , لحد كده كويس أوي .
المريض فتح إزازة المضمضه وقام واخد شويه في الغطا وحطهم في بؤه عشان يتمضمض !! , غريبه دي , أنا جربت مريض ياخد دوا شراب في الصيدليه وهو واقف أو يبلع له حبيتين حبوب قبل ما يطلع وبقول مش مشكله جايز تعبان أوي أو جايز مفكر إن أخدان الدوا في الصيدليه بيجيب نتيجه أفضل باعتباره يعني مكان معقم بالأشعه فوق المحشيه وكداهون .
.
إنما حكاية المضمضه في الصيدليه دي جديده , في الأول حمدت ربنا إن ده مش مريض داخل بروشتة بواسير !! .
تصدقو بالله ؟ أنا قلت يارب ما يتف المضمضه اللي في بؤه في وشي أو على الكاونتر قدامي , طيب ليه ؟ أولا عشان شكلي قدام نفسي , ثانيا عشان أقدر أكمل السنين الجايه في مهنة الصيدليه , المهنه الإنسانيه الساميه ( واخدلي بالك من موضوع ساميه ده ؟ ).
.
المريض بعد ما تغرغر شويه حلوين وهو واقف بيديني الفلوس طلع ابن حلال وراح تف المضمه على باب الصيدليه ومشي !!.
.
واحد هيقولي يا كباتن لطيف طيب انت ليه مندهتش عليه وسمعته كلمتين وسخين ؟ مممممم بص يا صاحبي أنا عندي قاموس أباحه + 18 يكفي شارع فيصل , بس في المواقف اللي زي دي لو عملت خناقه مع زبون هيبقى قدامك احتمال من اتنين , إما الشرطه هتيجي والمريض هيقول للشرطه ده سب الملك والحكومه وكده تبقى لبست رسمي , أو هيتصل بمديرك وهييجي المدير يعتذر للمريض ويحب على خشمه !!
.
الحل الأمثل والنموذجي في المواقف دي إنك تاخد الموقف وتحطه تحت لسانك وتشرب وراه بؤ مايه أو تبلعه كأنه حتة حشيش , وبعدين تدخل عالفيس بسرعه وتكتب بوست زي كده وتفضل تضحك مع صحابك بقى بدل ما تطق وتطرشأ .
.
وييجي بقى أسيادنا الأشاوش بتوع التنميه ولا مؤاخذه البشريه يقولك درس في ( الكاستومر ولا مؤاخذه سيرفيس ) فيقولك ايه بقى ؟ ( انت تبتسم للمريض وتنحني له وانت بتكلمه بزاويه 30 درجه عكس اتجاه عقارب الساعه ) !! .
......ياخي قحه , وقحتين تلاته على رأي محمد منير ( و أربع خمس قحات ) !!
مش لما تعلم الزبون يا مولانا الأول إنه يدخل يقول لو سمحت أو يقول شكرا أو على الأقل تعلمه الفرق بين الصيدليه وبين حمامات رمسيس ( مش ميضه هي ) !!.
.
سامعك ياض ياللي بتقول لو مش عاجباك الشغلانه سيبها !! , تصدق إنك عيل جلنف , والنت اللي انت داخل عليه ده أمك اللي شاريهولك , ماهو لو كل واحد قفل صيدليته عشان زبونين تلاته عشره زي كده يبقى كلنا هنقعد في بيوتنا وحضرتك مش هتلاقي مكان تشتري منه نوفالجين فاصوليا وفوار فواكه , أو بمعنى أصح مش هتلاقي مكان تقل أدبك فيه !!.
.
وبعدين أسيب الشغلانه واروح اشتغل ايه ؟ انت عايزني أرجع اتعلم من الأول وادخل جامعه واتشعبط في القطر وانزل في المحطه والقطر ماشي واموت ؟ إنت عايزاني أموت يا سوسن ؟! ( رامي قشوع )
نصيحه لكل أصدقائي , متدخلشي ولادك صيدله , الصيدله مش مهنه بنعيش فيها , الصيدله مهنه بنلبسها !! , وتلاقينا بعد كام سنه خبره عاملين كداهو ( هاااااحححححح ) , أيوه زي أحمد موسى كده .
.
وكله يهون عشان خاطر عيون ساميه !!.

.

.

والبرادعي قالك ( تخرصات ) !! , هي حصلت تخرصات يا برادعي ؟ يعني مش تخروصه واحده ولا تخروصتين ؟ أو جوان خفيف عالريق كده ؟.
البرادعي لو حكم مصر هيخلي معلقة امرؤ القيس ( قفا نبك من ذكرى حبيبٍ ومنزلِ....بسقط اللوى بين الدخول فحوْملِ ) هي النشيد الوطني لمصر !!.
............ وبعدها بقى الشعب ينشغل ويتلهي ويتقسم لفريقين , فريق بيسأل ( يعني ايه سقط اللوى دي يا جناب العمده ؟ هل اسم بلد مثلا زي بركة السبع كده ؟) , والفريق التاني هيرفض وجود كلمة ( فحومل ) في النشدي الوطني لأنها عيب يا بيه وتدعو للرذيله !!.

.

.الجيش في مصر بيتكون من كذا سلاح ( زي المشاه والمدفعيه والدفاع الجوي وحرس الحدود وخلافه ) 

وبيشتكل في صورة فرق ( زي الفرقه التانيه والتالته ....... تقريبا 30 فرقه ) , كل فرقه بتتكون من لواءات , وكل لوا بيتكون من كتايب وكل كتيبه بتتكون من سرايا , كل سريه عناصرها هما الجنود والظباط !!
............. سؤالي باختصار للساده الأفاضل الإخوان والنحانيح
هل فيه سريه أو كتيبه أو لوا أو فرقه أو سلاح في مصر فيها جندي اسمه الهام شاهين ؟ هل حضرتك تعرف ظابط في الدفاع الجوي اسمه غاده عبد الرازق ؟ هل توفيق عكاشه هو لوا في حرس الحدود ؟ هل سامح سيف اليزل هو المتحدث العسكري لجيش مصر ؟!
...........كلموني عن جيش مصر لو سمحتو
...................... لمّ تعابينك يا برادعي !!.

.

.

في العشق الممنوع !! .
.
إيه علاقة جنود الجيش في مصر بممثله بتشكر في السيسي ولا بتسبّله حتى؟!
ايه علاقة السيسي نفسه بواحد شاذ جنسيا مثلا لبس تي شيرت عليه صورة السيسي ؟
ايه علاقة الجيش بصوره ( فوتو شوب ) اتعلقت على مدخل طريق العين السخنه للسيسي ؟
ايه علاقة خير أجناد الأرض بإن الأوبريت الغنائي حضرته الهام شاهين ولا كيم كارديشان حتى ؟
لو واحد مختل عقليا ووقف في اشارة مرور وفضل يمدح في حضرتك هل ده يعيب حضرتك ؟ يعني هقول إنك بقيت أكيد مختل عقليا زيه ؟ أو هقول إنك انت اللي مسرحه ؟!.
........................................................................................
هي الناس جرالها ايه ؟ ياولاد ال*** , مبقاش فاضل في مصر غير جيشها , هو عمود الخيمه اللي الباقي , والناس في الجيش طافحاه , ارحمو مصر بقى
ملعون أبو السياسه على الثوره على السيسي على البرادعي على الإخوان .... مصر لأ يا بهايم , جيشها لأ يا بقر .

.

.

محمد حسين 

منوع

صباح الخير , فيه ناس واخداها الجلاله ومفكرين إن الثائر ده المفروض يقوم من النوم ويغسل وشه وينزل الشارع يثور ( وأحيانا مايغسلشي وشه ), وبعدين يبقى يسأل أي حد هو نازل يثور ليه ؟ أغبى حاجه وأخطرها عالشعوب إن كلمة ( الثائر ) تتحول لمهنه زي المهندس والطبيب والحلاق وتبقى روتين يومي , ننزل الأول وبعدين نشوف سبب وجيه للنزول , ولو ملقيناش مش مهم , المهم إننا ننزل ( ونثبت ) حضور !!.
هقول لكو نكته عاجباني , كان فيه مره 3 رجاله بيركبو كابلات , واحد فيهم بيحفر في الأرض والتاني بيركب الكابلات والتالت بيردم بعدها , قام الراجل اللي بيركب الكابلات ده تعب وغاب , فالاتنين اللي باقيين قالو إحنا هنقعد كده يعني ؟ قوم يا عوضين نشتغل , فقام عوضين يحفر ومحمدين يردم وراه , واحد يحفر والتاني يردم وهكذا طول النهار من غير تركيب كابلات !!.
.
نظرتي المحدوده جدا للأمور بتقول باختصار , إننا من يوم 30 يونيو للنهارده طلبنا من الجيش حاجتين اتنين وبيعملهم ( على أد ما بيقدر ) , الملايين في الشارع قالت مش عايزين مرسي الجيش قالهم ( سمعا وطاعه ) , وبعدين فيه إرهاب نحارب الإرهاب يا شعب ؟ قلناله حارب ..... هل حضرتك تعرف حاجه تانيه بيعملها الجيش من ورانا ؟ ..... طيب شاورلي عالكارثه الحقيقيه اللي عملها النظام الحالي في الحكم عشان أنزل أتظاهر معاك ؟ طيب قولي ليه كل ما بتناقش معاك أو بدخل صفحتك بحس إنك عمّال تحرك وتفرك زي المتطلقه ؟!.
.................................. يا سيدي ولا تزعل , هسيبلك كام سطر تكتب فيهم المصايب والكوارث اللي بتحصل من الحكومه المصريه حاليا وتستاهل نزولك واعتراضك الشنيع , بس الله لا يسيئك متكتبشي فيها توفيق عكاشه ومرتضى منصور والهام شاهين والسبكي ولا تكتب إن حرامي غسيل سرق البرمودا بتاعتك من عالحبل .... إحترم عقلي شويه , أو احترم الإجرام اللي احنا فيه يابو موته .
الأسباب الفظيعه لغضب المصريين الأن :
1- ..................................................................
2- ..................................................................
3- ..................................................................
4- ..................................................................
5- ..............................

.

.قصه قصيره أوي .

.
جلست ساره بجوار النافذه كعادتها , وانتظرت أن يأتي النادل بوجبة العشاء التي طلبتها ( الحساء فقط ) , كانت الأمطار تتساقط بغزاره على الزجاج الخارجي للنافذه , بعد ثواني معدوده حال بخار الماء بين ساره وبين رؤية الشارع , تركت لأذنها شغف الإستماع إلى صوت قطرات المطر وهي تتساقط على الزجاج بوتيره ثابته تقريبا تزداد أحيانا ما يوحي بأن المطر قد زادت حدته وأحيانا يحدث العكس , ثم أطلقت العنان لخيالها في هذه اللحظه الشاعريه وتذكرت حبها الأول والوحيد , ( زياد ) , كيف التقت به ؟ كيف وقع هو في غرامها منذ اللحظه الأولى ثم كيف اختفى فجأه كأنه حلم قصير جدا أو كأنه ومضة برق أنارت لها الطريق للحظات قليله ثم اختفت .
لم يقطع على ساره شرودها ولحظاتها الرومانسيه سوى صوت قوي جهوري يأتي من مكان قريب , كان الصوت للكمسري وهو ينادي ( المحطه الجايه المرج , حد نازل المرج يافنديه ؟ بعد كده الأتوبيس هيجرّش في الجراش )
انتبهت ساره ولملمت أشلاء ذاكرتها وعادت بسرعه إلى وعيها وأشارت إلى الكمثري بما يوحي أنها ترغب في النزول .
ثم نظرت إلى شاب جميل كان يجلس بالكرسي المجاور لها وقالت له ( والنبي يابني تنتع علي راسي السَبَت ده الله لا يسيئك ) !!.
.............. مقطع محذوف من رواية ( الحب في زمن البيتزا ) !!.

.

.

محمد حسين