الاثنين، 30 أبريل 2012

محبوسين وسط الطريق

محبوسين وسط الطريق
تحت المطر
لابسين جلودنا عريانين
بس اتعاهدنا
نكون بشر
شابكين إيدينا إيد فإيد
عاملين سلاسل من حجر
محبوسين وسط الطريق
تحت المطر
.
الخوف خلعناه من زمان
معرفش فين
بعد الكرامه يبقى إيه
هنخاف عليه؟
هيه الرياح لما بتعصف بالكلاب
متخافش ليه عض الكلاب
هيه الطيور لما تشوف
تحت السحاب غراب وبوم
متخافش ليه
ولٌا تقول حاسه بخطر
محبوسين وسط الطريق
تحت المطر
.
حق الشهيد مزروع
فصوتي وسكوتي
ذيه تمام ذي الضمير
إوعاك يا صاحبي تفتكر
من دمعتي
إني هغير زرعتي
أكرم لي أموت إنسان
أحسن ماعيش خنزير
.
الحلم شايفه من بعيد
راكب حصان اسمه الأمل
ماسك فإيده سيف حديد
مخافش ليه ماللي حصل
واللي اتعمل ؟
.
شايف عنيه مليانه شوق
مليانه نصر
رافع ايديه حبه لفوق
كاتب عليها بالعريض
اسمك يا مصر
.
.
محبوسين وسط الطريق
تحت المطر
.
محمد حسين

مرسلة بواسطة في ليست هناك تعليقات:

الأحد، 29 أبريل 2012

اجمع خيوط الشمس

اجمع خيوط الشمس
واعملها مية شعله
واحرق كهوف اليأس
وابني الأمل يعلى
.
شبٌك إيديك فإديك
واحلم بحلم كبير
حلمك ده فرض عليك
والرب في التدبير


hussein
مرسلة بواسطة في ليست هناك تعليقات:

اسمهم ثوار

نام الشباب في السد
وبسرعه ردمو عليه
.
قالو ده سد بجد
يعجب ويملا عنيه
.
ندهو كده على حد
وقالو له عدي يابيه
.
طلع البعيد سمسار
ماسك فإيده سجار
.
واللي في قلب السد
اللي ضهورهم سد
اسمهم ثوار !
.
.

حسين
مرسلة بواسطة في ليست هناك تعليقات:

نقطة نظام

‎Mohamed Hussein‎
نقطة نظام
.
.
لما الحمام
يرمي السلامْ
يفرد إيديه
مايلاقيش حد
بيسلم عليه
.
لما الطوفان
يجي الطوفان
نجري عشان
نتدارى فيه
.
محتاجين نقطة نظام
.
إمتى نعيش
إمتى نموت
إمتى نقوم
إمتى ننام
محتاجين نقطة نظام
.
إمتى نصرخ
أعلى صوت
إمتى نسكت
ويتمنع الكلام
محتاجين نقظة نظام
.
إمتى نهدا ونشتري
إمتى نبيع
لوكنت شاطر فالتاريخ
إذاي تضيع
حكام زمان
فرعون زمان
حكمونا
بسياسة القطيع
.
محتاجين نقطة نظام

مرسلة بواسطة في ليست هناك تعليقات:

السبت، 28 أبريل 2012

تطاردني

تطاردني بأحلامي
كسرب حمامْ
وتدعو فوق مائدتي
ألوف الطير
كي تحضرْ
.
أنا المنثور في الأرض
أحاول جمع حباتي
فلا أقدرْ


محمد حسين
مرسلة بواسطة في ليست هناك تعليقات:

عاش الملك

‎Mohamed Hussein‎
معتصم على صفحتي
من غير كلام
من غير لايك
.
أنا مش سعادتك
لوح خشب
أو قطه لعبه
بزمبلك
.
هنعيش عساكر أوعدك
طابيه وفيل
يجري الحصان
وسط السبق
من غير دليل
عاش الوزير
عاش الملك
مرسلة بواسطة في ليست هناك تعليقات:

وتيت وتيت

وتيت وتيت
.
أنا قلت تيت
رد العبيط
وقالي تيت
قلت اتكتم
مش طالبه رد
.
وتيت عليكي يابلد
مالكيش أمان
كلك حيطان
مقفوله سد
.
وتيت كبير
للي اعتصم
واللي ابتسم
واللي اتظلم
واللي اتحرم
واللي فيوم
زرعو الهرم
واللي اتسحل
واللي مقيم
بره فزحل
ولأي حد
.
وتيت وتيت
عليت وطيت
أخرك يا صاحبي
أحلى تيت
والله جد
.
شعار بلدنا
تيت وتيت
لما اتولدنا
قلنا تيت
واما اتهبدنا
قلنا تيت
وروح ولادنا
قالو تيت
نايمين فتيت
صاحيين فتيت
واديني جيت
وهغني تيت
ان كان لابد
.
تيتك يا نيل
مالهوش مثيل
مفهوش سمك
صياد عويل
راكب فتيت
وبيرمي تيت
يطلع له تيت
وسط الشبك
احسب وعد
.
محمد حسين
مرسلة بواسطة في ليست هناك تعليقات:

لاتصدق

‎Mohamed Hussein‎
لا تصدق كل من تغنى بعروبته وإسلامه , لو أن كل واحدا منهم ( كح كحه ) وقال( ها......... مين هناك ), كنا حررنا القدس من سنين !.
مرسلة بواسطة في ليست هناك تعليقات:

ياريت تعملو العكس

في البرلمان يناقشون غلق المواقع الإباحيه , وفي الميدان والشارع ومكتب الإرشاد يناقشون حماية الثورة , هكون شاكر جدا جدا لو عملتو العكس !.
مرسلة بواسطة في ليست هناك تعليقات:

شبك إيديك يانيل

‎Mohamed Hussein‎
شٌبك إيديك يانيل
واقفلها بالعافيه
متسبشي حد غريب
يدخل بيناتهم ديب
يتفرقو لاتنين
فرعين عليهم عين
والنيه مش صافيه!
hussein
مرسلة بواسطة في ليست هناك تعليقات:

فض الشراكه

‎Mohamed Hussein‎
فض الشراكه اللي بيناتنا
وادينا أرجوك ثورتنا
ساعات بتعمل فيها شريف
وساعات متسترش بناتنا
فض الشراكه اللي بيناتنا
.
مبقيتش أعرفلك منظر
ولا عارف أخدك فطريقي
مبقيتش قادر أتصور
إنك فيوم تبقى صديقي
ولا حد عايش فحياتنا
فض الشراكه اللي بيناتنا
.
دم الشهيد مش سطر وسطر
مش موجه تركبها ولا قطر
توصل محطه تنام فيها
والاقيك ياصاحبي مقضيها
حواديت ماخلصت حواديتنا
فض الشراكه اللي بيناتنا
.
hussein
مرسلة بواسطة في ليست هناك تعليقات:

أرجع لبستاني

‎Mohamed Hussein‎
لسه الطريق مفرود
مليان أمل وورود
وإديه فيها العود
وفراسي ألحاني
.
أعزف واكون عصفور
على كل باب بيدور
ولٌا ألم الدور
وارجع لبستاني
مرسلة بواسطة في ليست هناك تعليقات:

مصر عايزه ايه

‎Mohamed Hussein‎
في الدول المتحضره , يشغل بال المواطنين دائما سؤال ( إحنا عايزين إيه من بلدنا بالظبط ؟ ) , وعندنا في مصر يشغل بال المواطنين دائما سؤال ( هيه بلدنا عايزه مننا إيه بالظبط ؟!) , يا مصر الشعب مخنوق , شيلي رجلك من على خرطوم الأكسجين!.
مرسلة بواسطة في ليست هناك تعليقات:

الخميس، 26 أبريل 2012

مناجاة فى السحر.....شعر :- محمد عبد العزيز


 نَسَجت السماءُ حبيبتى
نقابا من أشعة القمرِ
وألقتهُ على جسدكِ
كواكبُ الأسحارْ

 فاحت روائحُ النرجسِ
وتمازَجت بأنفاسك الطيبةِ
فوهبتنى وحيا
رائقَ الأشعارْ

 ها أنا ذا حبيبتى
قد سَمعتُ همسَك ِ
وانتزعنى نداءُك ِ
من وراءِ البحارْ

 شَعرتُ بلمسِ جناحيكِ
فانتبهتُ
وتركتُ مخدعى
واتخذتُ القرارْ

 سِرْتُ على الأعشابِ
فتبللتْ قدماىَ
وتمازج دمعُ شوقى اليكى
بالأمطارْ

 وسرَتْ فى الوادى
خيالاتُ العشاقِ الغابرةِ
تُثنى عليكى
وعلّى الاختيارْ *******************
عانق النومُ أرواحَ البشرِ
وظللت متيقظا
من أجلكِ
رافضا سطوعَ النهارْ

 تكّلمى حبيبتى
ناج أملى
لاتضعى حلمى
فوق شفيرٍ هارْ

 تكلّمى
فلا سامعٌ لك غيرى
ولا تخيريننى
بين النور والنارْ

 تكلمى
بل واصرخى
ولاتتركينى فريسةً
لفتنة الافكارْ

محمد عبد العزيز
26-4-2012
مرسلة بواسطة في هناك تعليق واحد:

الأربعاء، 25 أبريل 2012

الإتحاد السوفيتي السكندري

‎Mohamed Hussein‎
أعضاء مجلس الشعب , بعضهم لا يعرف ألف باء سياسه , ربما لم يكن حتى يشاهد نشرة 9 في تليفزيون مصر العقيم بداعي أن المذيعه كاشفه راسها , والله عندي إحساس إن منهم من لا يعرف الفرق بين الإتحاد السوفيتي والإتحاد السكندري!
ياخوانا حد يقول لهم إن جلسات البرلمان غير جلسات الزار والمدد.
مرسلة بواسطة في ليست هناك تعليقات:

مليونيه بالأرانب

‎Mohamed Hussein‎
يعني البرلمان خوتنا وخرم دماغنا بقانون العزل السياسي , وعمل له مليونيه بالشباب وملوخيه بالأرانب , وطلع القانون في النهايه هيتطبق بالكتير على المرحوم أحمد شفيق !
واحد سألني هو المرحوم أحمد شفيق كان هينجح في الإنتخابات ؟
قلت له , عارف انت لما يكون الأهلى هيلاعب الزمالك في نهائي الكاس , ويكون خايف أوي من شيكابالا , يقوم يسلط بلطجيه إنهم يكسرو رجل عمرو الصفتي اللي مش بيلعب في الزمالك أصلا! , أهو الإخوان عملو كده بالظبط !!.
مرسلة بواسطة في ليست هناك تعليقات:

أنا خايف

‎Mohamed Hussein‎
أنا عايز انام ومش عارف
أنا عايز أقوم ومش شايف
أنا اللي كنت بنام ب...نيام
أنا اللي كنت بقوم ب....قيام
أنا... قصر الكلام.......خايف
مرسلة بواسطة في ليست هناك تعليقات:

السياسه كيميا

‎Mohamed Hussein‎
السياسه كيميا وعناصر وفلزات.........الجدول الدوري لمانداليف...أحدث نسخه
.
المجلس العسكري : هو الإلكترونات النشطه السايبه FREE RADICALS...اللي بتأكسد وتحرق وتكسر وتدمر.
.
الإخوان عملو مع السلفيين جزئ من ذرتين , وصلو بيه لمرحلة الثبات والإستقرار , قاعدين في جنب ومش شاغلين بالهم بالليله دي.
.
شباب الثورة : هما العناصر القابله للأكسده والتكسير من المجلس العسكري.
.
مصر : هيه الأكسجين القابل للإشتعال ’ والمجلس بدل ما يتنفسه بيحرقه.
.
حزب الكنبه : هما عنصر الهيليوم الخامل اللي لا بيهش ولا بينش , ومحتاجين ألاف من أجهزة الطرد المركزي عشان نوصل لداخلهم , ونفجر فيهم قنبله ذريه يمكن يحركو صوابعهم.
.
رئيس مصر القادم , لازم يكون مضاد للأكسده , عشان يمنع الحرايق ويحمينا من الإلكترونات السايبه بتاعت العسكر , لازم يكون غني بفيتامين سي , عشان كده أفضل رئيس هو قفص الجوافه أو أفص البرتقان , أو أي أفص والسلام!

مرسلة بواسطة في ليست هناك تعليقات:

تمت العمليه

‎Mohamed Hussein‎
تمت بنجاح والحمد لله , عملية نقل البرنامج الإنتخابي من خيرت الشاطر لمحمد مرسي , في مستشفى محمد بديع الخيري التخصصي , محتاجين بس شباب الإخوان يتبرعو بالدم عشان الإتنين مش يجيلهم أنيميا!
مرسلة بواسطة في ليست هناك تعليقات:

عايشه عالرجيم

‎Mohamed Hussein‎
يامصر بانت خطتك
وكل شئ فيكي اترسم
.
عقلك عقيم
رسمك سخيف
خليكي عايشه عالرجيم
أخرك زتونه وكام رغيف
والحلو لبيسة قلم
.
طلبتي ليه حتة جاتوه
لما انتي منزوعة الدسم ؟!
مرسلة بواسطة في ليست هناك تعليقات:

جوايا حلم

‎Mohamed Hussein‎
جوه قلبي طير بيهتف
مش ينام
عمره ما قطع الكلام
.
جوه قلبي ديك بيدن باشتياق
مش بيدن والسلام
.
جوه قلبي لو تدور
غضن أخضر
نادي
 وبنية حمام
.
جوايا حلم بحققه
حلمي أنا مش هسرقه
.
بحلم بأرض تضمنا
مش أي أرض
نتلم فيها تلمنا
ونحب بعض
.
كل اللي فرقنا كلام
كبير صغير كان كلام
أخره كلام
حبة حروف شابكين في بعض
ممكن فلحظه نحرقه
.
جوايا حلم بحققه
.
محمد حسين
مرسلة بواسطة في ليست هناك تعليقات:

هو الخلاص

يامصر جبتي القسوه منين ؟
أصلك ده طيب
دمعك زمانه كان قريب
أهلك غلابه ومكسروين
.
قولي لي إيه
يرضي غرورك واعمله
هستحمله
علشان أعيش
.
نزلت أهتف في الميدان
وسط الرصاص
وقلت جايز
موتي أنا هو الخلاص
عشان تحني
محنتيش
.
سيبتيني أتغرب سنين
جرت سنين
سيبتيني ليه ؟
علشان أحولك جنيه ؟!
هو رزقي كان جنيه
ومكفكيش
.
شفت فيكي ظلم ياما
غدر ياما
من ولادك ناس كتير
ظلمهم هو العلامه
.
قلت ماشي شئ يهون
لاجل ماعيونك حبيبتي
يوصلو بر السلامه
وانتي ليه مبتوصليش ؟
انتي ليه مبتوصليش
.
أنا كنت عاشقك بالجنون
فوق الجنون
أقوم فنومي أندهك
دلوأتي خايف أكرهك
.
تسمحيلي أكرهك
ولا أقولك
خلى عنك
هكرهك
تسمحي ومتسمحيش
.
محمد حسين
مرسلة بواسطة في ليست هناك تعليقات:

الثلاثاء، 24 أبريل 2012

كلمات متمردة..........شعر:-محمد عبد العزيز

ولَقَدْ رَاودْتُ الكلماتِ عن نفسها
فاستَعصمَتْ وتساءلتْ:
أنّى لِى معصيةُ رّبى
آ الآن تكفرين العشيرَ ولطالما
ازدانت بكِ أوراقى
وأُنير بك دربى
آ الآن تهجرين القوافىَ
وتجحدين المعانىَ
وأنا من كنت آمرك فتُلبّى
عذّبى ماشئتِ من ورقٍ و أقلام ٍ
... ولاتتركينى
فالعيش دونك لايطبِ
قولى مابكِ فإنى لك مطيعٌ
ومُرينى فإنى لأمُركِ
صاغرٌ ملبّى
خلتك عشيقةً لاتهجرُ لى مضجعاَ
أو رفيقةُ
أنهلُ من سحرها العذبِ
ولطالما رقصتِ فوق أوراقى
وجعلتى المدادَ
يسطر حروفاَ من ذهبِ
مشتاقةُ اليكِ سطورُ ملزمتى
باكية فراغها
هذا دأبَها أبداً ودأبى
هل مللتِ أشعارى
هل ضقتِ ذرعاً بأفكارى
...أم بغضتِ مقولاتى وادبى؟
لاتنهكى من اشتعل الشيبُ برأسه ِ
وأذاقته الدنيا
كأس العذاب والتعبِ
وان ضاقت بك أرضى وسمائى
فلاتعذبيننى
دعى وطنى واغتربى


محمد عبد العزيز
24-4-2012
 
مرسلة بواسطة في ليست هناك تعليقات:

مش ده الوطن

‎Mohamed Hussein‎
بعد التبات والنبات
واللي كان وسط الميدان
واقف بيهتف بالساعات
.
بعد الشهيد البلطجي
كان ثورجي
قلنا تاجر
خد وهات
.
بعد ما جنودنا التمام
إدوا التمام
كشفو مستور البنات
.
بعد ما الرجاله طلعت مالفرح
لابسين طرح
ومحزقين وملزقين
ومبينين كل الحاجات
.
بعد ما الدقن الطويله
اتكلمت واتعلمت
تكدب وتسرق بالأيات
.
بعد ما قلناها لأه
ألف لأه
ماتت جوانا اللأت
.
بعد ما عقولنا في لحظه
اتحولت واتبدلت
كده من سكات
.
أهين عليكي يابلد
متقسمه مترسمه
نكته وشوية أهات
.
ياصاحبي عارف سكتي
فين خطوتي
وحذفت ليه جنسيتي ؟
مش ده الوطن
وإن كان وطن
هعتبره مات!
.
محمد حسين

مرسلة بواسطة في ليست هناك تعليقات:

حرق طنطا وحرق الدم

‎Mohamed Hussein‎
الحرائق تشتعل في طنطا وتأكل الأخضر واليابس , وقبل أيام في السويس وبعد بكره في المنيا , والساده الموقرين أعضاء المجلس الموقر في الدوله الموقره مشغولون بالثانويه العامه , فإن لم يكن لديهم العقل والفهم والصلاحيات لمعرفة من وراء هذه الحرائق المتكرره ومحاسبته , أولى بهم إن كل واحد منهم ياخد فإيده طشت بلاستيك كبير ويروح يطفي الحريقه ذي النسوان ! , بدل مايحرقو دمنا بافتكاساتهم اليوميه.
مرسلة بواسطة في ليست هناك تعليقات:

قبل الميدان

‎Mohamed Hussein‎
قبل الميدان
.
قبل الميدان مترين
شفته واقف من بعيد
أحمد فريد
شاب مصري ملتحي
جنب منه واقفه سالي
بنت كاشفه شعرها
معرفش اسمه واسمها
ماسكين فإيدهم دفترين
قربت منه وقلت يا...
معرفش إسمك
قالي ماشي
قولي أنت تحب مين ؟
قلت مصر
قالي عارف
قصدي انت تحب مين
في الدفترين ؟
أكتب اسمك في انصراف
ولا الحضور
ولا في خانة الطيور ؟
قلت أحسن تكتب اسمي
في كشوف المفقودين !
.
قالي اسمك يابن عمي
قلت واحد منكو
من دمكو
سمعت صوتكو في الميدان
قلت لمراتي الأدان
هو الأدان
جهزت حالي وشنطتي
وجاي ماشي من يومين
.
يالله سجل يابن عمي
إكتب اسمي نقطه بيضا
في كشوف المفقودين
.

محمد حسين
مرسلة بواسطة في ليست هناك تعليقات:

صوت الرصاص

صوت الرصاص
بعد الرصاص
سد الودان
خلاني مسمعشي الأدان
.
جنب الميدان
نام الشباب
قام الشباب من لهفته
يهتف وحابس دمعته
مرت ساعات
وقالولنا مات
مرجعشي تاني لفرشته
.
الثورة ليله بتتسرق
حبة لصوص
حبة ورق
سرقو الشباب
سرقو العرق
وقالولنا قال الله كمان
.
باثورة رافضه تتولد
أنا الغريب
صوتي انجلد
ضيعتي ليه من وردنا
أختي الجميله
وكام ولد ؟!

.
محمد حسين
مرسلة بواسطة في ليست هناك تعليقات:

العزل السياسي

‎Mohamed Hussein‎
يعني البرلمان خوتنا وخرم دماغنا بقانون العزل السياسي , وعمل له مليونيه بالشباب وملوخيه بالأرانب , وطلع القانون في النهايه هيتطبق بالكتير على المرحوم أحمد شفيق !
واحد سألني هو المرحوم أحمد شفيق كان هينجح في الإنتخابات ؟
قلت له , عارف انت لما يكون الأهلى هيلاعب الزمالك في نهائي الكاس , ويكون خايف أوي من شيكابالا , يقوم يسلط بلطجيه إنهم يكسرو رجل عمرو الصفتي اللي مش بيلعب في الزمالك أصلا! , أهو الإخوان عملو كده بالظبط !!.
مرسلة بواسطة في ليست هناك تعليقات:

الأحد، 22 أبريل 2012

سببا لرحيلي

لا أعرف سببا لرحيلي
وكأني أرحل كي أسخرْ
أسخر من سفري وهروبي
بحثا عن حلم يتبخرْ
.
من صورة وجهي في المرأه
من هذا المشهد والمنظرْ
سنوات العمر تعاديني
تغتال اليابس والأخضر
.
في بلدي خبز وشعير
ويعيش فقير لا يقدر
والشمش ستشرق لايوما
ناديت الشمش ولم تحضر
.
للسفر فؤائده السبعه
ومئات عيوب لم تذكرْ
.
محمد حسين
مرسلة بواسطة في ليست هناك تعليقات:

بعد الفراق

بعد الفراق برتاح
وانام ومحلمشي
وافرد لقلبي جناح
واقول له طير...إمشي
.
أصل البنات بستان
مليان زهور ألوان
قرب ومتخافشي
.
زهور تشد عنيك
من غير ما تجرحها
وزهور تهف عليك
من طيب روايحها
وزهور تنام وتقوم
وهيه مطرحها
.
إوعاك في واحده تدوب
وتقول هوى ومكتوب
عشان متندمشي
.
الحب بحر صعيب
عاللي اتكتب له حبيب
يرمي إديه ويعوم
وفلحظه ميعومش
.
.
محمد حسين
مرسلة بواسطة في ليست هناك تعليقات:

برلمان بديع

برلمانا بديع.........بدييييييييييييع
.
في الوقت الذي تحترق فيه مدينة السويس وتكاد بورسعيد تعلن الإستقلال التام , ولا نعرف مصيرا للدستور ولا لمحاكمة الفاسدين ولا موعدا حقيقيا للإنتخابات الرئاسيه , في نفس الوقت يناقش البرلمان مشروع تعديل الثانويه العامه إلى سنه واحده , كأنك تصرخ في رجل وتقول له بيتك بيقع , بيتك بيتحرق , فيقول لك بكل برود , حسنا أخي الكريم سأغير نوع الجبنه الموجوده فالتلاجه!.
فهل البرلمان لا يدرك مايحدث حوله , أم أنه يدرك ولكن ليس له صلاحيات إلا صلاحية تغيير نوع الجبنه المنتهي الصلاحيه ؟!
مرسلة بواسطة في ليست هناك تعليقات:

دولة الظلم

في دولة الظلم انتهينا
ليتها كانت قدرْ
وارتمينا كالعرايا
تحت أقدام المطرْ
.
أحلامنا
مثل الطفولة ترتوي
نهر يجف ويحتضرْ
واليأس يطرق
كل يوم بابنا
لا تسأليني
من حضر ؟
.
مالي أرى
كل القلوب تحجرتْ
والشمس تبكي والقمرْ
والطير يصرخ يائسا
تبا وتبا للبشرْ
ياليتني
عند الحضور مدينتي
لم أدعي أني بشرْ
.
في دولة الظلم انتهينا
ليتها كنت قدرْ
مصر الجميله نائمه
مثل العجوز المنكسرْ
.
قبلتها ألفا وألفا
لم أجد
للنبض صوت أو أثرْ
وصرخت في أذانها
لاترحلي
إني لأجلك عائد
لكنها لم تنتظرْ
.
يامصر عودي واشهدي
لا زال في قلبي وترْ
إني أحبك مؤمنا
من لا يحبك قد كفرْ
.
محمد حسين
17/04/2012
مرسلة بواسطة في ليست هناك تعليقات:

فترة الصمت

فترة الصمت
.
في الأيام والشهور الماضيه تجاوزنا كل المراحل والخطوط الحمراء , تجاوزنا مرحلة الصبر والهدوء ومرحلة العصبيه والإنفعال ووصلنا إلى مرحله ثالثه ضبابيه لا أعرف لها إسما, أصبحنا في أمس الحاجه للصمت , ليس من أجل أن نفكر ولكن من أجل أن نحيا ونتنفس.
.
سقطت كل الأقنعه , في الدين والسياسه والوطنيه والإعلام الحر , وأصبح السؤال الملح على لسان كل منا هو.......... بمن نثق ؟
.
أدركت الأن أن الشعوب لكي تحيا وتحلم, يجب أن يحتفظ بعضا من رموزها بأقنعتهم وأسرارهم وشخصياتهم الحقيقيه.
مرسلة بواسطة في ليست هناك تعليقات:

أبحث عن وطن

أبحث عن شئ يسرقني
يحملني من فوق سريري
أبحث عن درب عن أحدٍ
يدفعني نحو التحريرِ
.
أدمنت النوم على ظهري
أنتظر قدوم التغيير
أبحث عن حلم عن أملٍ
أبحث عن وطن لضميري

hussein
مرسلة بواسطة في ليست هناك تعليقات:

لا تنكسر

لاتنكسرْ
.
.
قف شامخا لاتنكسر
لملم بقايا أدمعكْ
إني معك
صوتي معك
كل الحرائر تسمعكْ
.
ياصاحبي
ماعاد يؤلم مقلتي
إلا الذي قد اوجعكْ
.
درب الرجولة من هنا
لو ضاع دربك ضيعكْ
.
إمضي إذا
واصرخ فصوتك فارس
لن يخدعك
.
واحمل بقلبك دائما
أحلام طفل ودعكْ
.
أنت البراءة والأملْ
دعني أقبل جبهتك
وبذات دربك أتبعكْ
.
لاتنكسر
إني معكْ
.
محمد حسين
مرسلة بواسطة في ليست هناك تعليقات:

مليونية هد الحيل !

‎Mohamed Hussein‎
مليونية هد الحيل
.
أراها هكذا , ليس للأمر علاقه بالتفاؤل وحسن الظن , فقديما قالو ( اللي ميشوفش من الغربال يبقى أعمى )!.
سوف ينقسم الميدان إلى ثلاثه أقسام متنافره متناحره , الإخوان ( أنصار الشاطر) , السلفيين ( أولاد أبو اسماعيل ) , وشباب الثورة الحقيقي ( ما تبقى منهم ).
الكل سيرفع شعار يسقط حكم العسكر , ولكن تخيل معي لو أن جهة سياديه أوقضائيه ما أصدرت حكما نهائيا الأن بعودة أبواسماعيل إلى سباق الرئاسه , ماذا سيحدث ؟...سينسحب أولاد أبواسماعيل من الميدان , وأثناء عودتهم إلى منازلهم لن يهتف أحدهم (يسقط حكم العسكر).
نفس الأمر ينطبق على الإخوان لو عاد الشاطر للسباق , وسيبقى في الميدان الشباب الثائر الحقيقي , الذي لم يغير مواقفه وثوابته من أجل شخص أو حزب أو جماعه.
مرسلة بواسطة في ليست هناك تعليقات:

العتبه الخضره

العتبه الخضره
.
مليونية الأمس أكدت للجميع , أن الإخوان والسلفيين اشتروا من المجلس العسكري أرض ميدان التحرير ليتظاهروا فيه, بيع وشرا نهائي , تسليم مفتاح , وأنهم اختارو الأستاذ مصطفي بكري ليتولى عملية تقسيم الميدان بين الفريقين بما لا يخالف شرع الله , وقامو بوضع لافتاتهم وشعارتهم لتصبح ثابته في أرض الميدان , وبذلك تكون هذه الشعارات هي الشي الوحيد الثابت في حياتهم , أما شباب الثورة الحقيقي فقد اشترو من المجلس العسكري العتبه الخضره والترماي !.

hussein
مرسلة بواسطة في ليست هناك تعليقات:

طشت نحاس

سريعا جدا نسي شباب الإخوان المهندس خيرت الشاطر , وأصبحو يتداولون الأن السيره الذاتيه الجباره للدكتور محمد مرسي , يقولون أنه عالم وخبير كبير متخصص في علاج أسطح المعادن , وبذلك يكون محمد مرسي هو أفضل من يحكم مصر , ده على أساس إن مصر دي عباره عن طشت نحاس كبير ؟!!!!!!!!!!!!!!!!!!!!
.
hussein
مرسلة بواسطة في ليست هناك تعليقات:

رسالة ناخب

‎Mohamed Hussein‎
أنتخبك ولكن !
.
عزيزي الدكتور / عبد المنعم أبو الفتوح
.
أؤيدك وأنتخبك رئيسا لمصر , لأنك الأفضل والأكثر خبره سياسيه , ومواقفك ثابته , وإحساسك بالفقراء لم ينقطع يوما ما ,......ولكن :
لن أضع صورتك على صدري ولا على صفحتي الشخصيه ولا على باب شقتي , ولن أصنع منك إلها أو قديسا , إذا فزت في الإنتخابات لن تكون سوى موظف حكومي بدرجة رئيس , فإن أحسنت وعدلت وأعطيت للفقراء حقهم فلا شئ لك عندي ( لأن الديموقراطيه لا تعرف مظاهرات التأييد وهتاف بالروح والدم !) , وإن أسأت وانحرفت , وقفت لك في الميدان منددا معارضا , أقتلك أو تقتلني , نعم أنا ناخبك ولكنك لست أغلى عندي من بلدي , فاقبلني ناخبا أقبلك رئيسا.
.
محمد حسين
مرسلة بواسطة في ليست هناك تعليقات:

أحرف لاعب

‎Mohamed Hussein‎
جاهل وساذج ومبيفهمش حاجه في الكوره من يعتقد أن أحرف لاعب في مصر هو اللاعب محمد محمد أبو تريكه
شاهد واستمتع بأداء وحرفنة ومهارة اللاعب محمد محمد بديع وهو يلعب الكره , يخدع دفاع الفريق المنافس وحارس المرمى والحكم والمعلق وفريق التحليل والجمهور قبل أن يحرز الهدف بكعب رجله من نص الملعب.
محمد بديع هو أملنا الوحيد في الوصول إلى كأس العالم والوصول إلى دولة الخلافه الإسلاميه الكرويه المدورة.
هو اللاعب الوحيد في العالم الذي ( يشوط ) الكره بحذائه بمنتهي القوه فترتد إليه مرة ثانيه دون أن يلمسها أحد , وكأنه رابط الكوره بأستيك وماسك طرف الأستيك في يده , سبحانك يا رب , لا سحر ولا شعوذه !
مرسلة بواسطة في ليست هناك تعليقات:

دستور واحد

عندما فاز برلسكوني في الإنتخابات , وأصبح رئيس وزراء إيطاليا , قال مداعبا ( كيف أحكم شعبا يأكل 600 نوع محتلف من الجبنه!) , فمن هذا الرجل الجبار الشمشون الذي يستطيع أن يحكم شعبا يأكل نوع واحد من الجبنه ولكن ب 600 طريقه وافتكاسه مختلفه !.
.
في إيطاليا يوجد 600 ديانه وملة يجمعهم دستور واحد وطريق واحد , ولدينا في مصر ديانه ومله واحده ونحتاج ل 600 دستور مختلف .

hussein
مرسلة بواسطة في ليست هناك تعليقات:

***جرين كارد**** (الحقيقه وراء ابو اسماعيل)......قصة:- محمد عبد العزيز


-اخيرا وجدته
هكذا صاح (حازم ابو اسماعيل) عندما عثر على الجرين كارد الخاص بوالدته بعد عناء دام شهر كامل ...بحث عنه فى كل مكان محتمل وقلب المنزل رأسا على عقب حتى وجده باحد الادراج مندسا وسط اوراق يبدو عليها القدم...
كان عثوره عليه بمثابة طوق النجاة الذى جاء لينتشله من طوفان الاتهامات التى وجهت اليه وكادت تحرمه من حلم طال انتظاره......ان يصبح رئيسا لمصر
عثوره على هذه البطاقة...يعنى الكثير ...ينفى اكتساب والدته الجنسية الامريكية ويعزز من موقفه فى الترشح لرئاسه الجمهورية...ويحقق حلم الدولة الاسلاميه الذى طالما راوده..
عقد العزم على الذهاب فورا الى لجنة الانتخابات الرئاسية ليقدم له دليل صدقه..ويثبت للعالم كله انه على حق..
كانت الدموع تترقرق فى عينيه ,وقلبه يكاد يتوقف من فرط الفرحة ونظر الى السماء نظرة تملؤها الامتنان لرب الارض والسماء...شكر الله كثيرا على نعمته الواسعة وفضله الكبير.
وبينما يرتدى ملابسه استعدادا للخروج...رن هاتفه المحمول ...نظر الى الرقم فوجده رقم اخته السيدة(حنان) المقيمة بامريكا
جاءه صوت اخته هلوعا:- الحقنى ياحازم بنتى (اسماء) اتخطفت
***********
نزل الخبر كصاعقة كهربية على حازم...قال لها فى لهفة:- ازاى ومين وامتى.؟
اجابته والدموع تكاد تخنقها:- النهارده مرجعتش من المدرسة...اتصلوا بيا الخاطفين وقالولى احنا مش عايزين فدية...احنا عاوزين اخوكى حازم..وحذار من الاتصال بالشرطة
حاول حازم يائسا تهدئه اخته بقوله:- طب اهدى دلوقتى وربنا وحده هيحلها
تصارعت الافكار فى رأسه...من يقوم بهذا العمل وماهدفه وماذا يريد منى؟؟ انتزعته رنه هاتفه من افكاره المتصارعة...جاءه صوت غليظ عبر اثير الهاتف:-
ايوه يا شيخ حازم...احنا خطفنا بنت اختك ولو عاوز تشوفها وهى لسه على قيد الحياة ...تسلمنا الجرين كارد بتاع والدتك
رد حازم:-ولكن هذا دليل براءتى الوحيد...وهو الذى سيؤ..
قاطعه الصوت الاجش قائلا:-هذا هو شرطنا ...لاتجادل كثيرا والا انهينا حياة الطفله البريئه...سيأتيك احد رجالنا تسلمه الكارد..وبعدها بساعة واحده ستسمع صوت الفتاه وهى فى منزل اهلها..
انهى الرجل المكالمة...وترك حازم لعواصف الحزن والالم والتعجب...كان عقله يحاول ان يستوعب الموقف ولكن قلبه كان قد تركه وسافر الى حيث توجد بنت اخته...
-معنى هذا اننى لن استطيع ان اثبت صدقى للعالم اجمع...هكذا خاطب نفسه ثم اردف:-وماذا افعل فى انصارى المنتظرين بتلهف وصولى للجنه الرئاسية؟؟
لو نبس فمى ببنت شفة سيكون مصير الفتاة هو القتل...القتل وحده
*************
انطلق حازم صوب اللجنة الرئاسية بدا على وجهه علامات التوتر والارهاق...علامات انزعج لها انصاره الا انه بدأ يرسم ابتسامة خفيفه عله يشعرهم بالامان...
بادره مدير حملته الانتخابية بقوله:- الم تعثر ياشيخنا على الجرين كارد؟؟
هز رأسه نفيا وقال:- للاسف ..ساحاول ان اطعن فى مستندات الخارجية...فهى بالتاكيد مزورة...
بلغ الصراع اوجه داخل نفس حازم...فداخل جيبه تقبع ورقه تحسم هذا الموضوع تماما...وفى امريكا فتاه بريئه لاذنب لها سوى انها بنت اخت(حازم صلاح ابو اسماعيل)
طالعته ابتسامات اعضاء اللجنه الصفراء..واعينهم المليئة بالشماتة والتحدى...اطلع على اوراق الخارجية...واصر على انها مزورة
خاطبه احد اعضاء اللجنة:- ياشيخ حازم الاوراق سليمة...وانت لم تقدم لنا من طرفك مايثبت صحه موقفك..
تصبب العرق من وجهه...وتسارعت دقات قلبه...تحسس البطاقة القابعة فى جيبه ..الا ان يده كمن مسه التيار الكهربائى تراجعت بسرعه وحدة...
خرج حازم من مقر اللجنة شاحب الوجه عاقد الحاجبين....انتظر انصاره ان يطمئنهم ...فلم تخرج منه سوى جملة:-حسبى الله ونعم الوكيل
**************
فى المساء اتى رجل يرتدى زى عمال الغاز الطبيعى...طلب مقابلة حازم صلاح..
انفرد به جانبا واخبره انه مرسل من قبل الخاطفين وانه يريد الجرين كارد فورا...
اخرج حازم الجرين كارد من جيبه واعطاه للرجل الذى اخبره ان الفتاة الان فى طريقها لبيت والديها..وبعد ساعة سيستطيع سماع صوتها..
********
مرت ساعة ولم يرن هاتفه...حاول ان يقنع نفسه بالانتظار قليلا لعل المانع خير...مرت نصف ساعة اخرى دون ان يرن الهاتف مما جعل القلق يستبد به...
امتدت يده لهاتفه ...ثم اتصل برقم اخته التى بادرته بقولها:-
ازيك ياحازم ,,انت مبتتصلش بينا من زمان ليه ...ربنا يكون فى عونك مشاغلك كتير انا عارفه..
قال حازم:- البنت رجعت ياحنان؟
ردت عليه قائلة:-بنت مين اللى رجعت؟؟قصدك اسماء؟ هى اصلا تعبانه وماراحتش المدرسة النهاردة
*********
لم يكن يعلم ان هذه عمليه مخابراتيه على اعلى مستوى
الاتصال الاول الذى تلقاه ...لم يكن من اخته...بل تم تركيب الصوت فى احدث معامل الصوتيات بحيث يبدو و كأنه طبق الاصل
سلم حازم بيده ورقه تحمل مستقبله
وضاع حلمه الى الابد.
حلم الرئاسة
************
محمد عبد العزيز
19-4-2012
مرسلة بواسطة في ليست هناك تعليقات:

لقاء محتوم ....قصة قصيرة:-محمد عبد العزيز


 عندما انهى الدكتور(احمد فريد) فحصه للطفل الصغير المصاب بالحمى..شرع فى كتابة التذكرة الطبية..فعاودته مشاعره المضطربة مرة اخرى...وتصبب العرق من وجهة....واندفعت الذكريات الاليمة تتوهج داخل عقله بجنون..
كان احمد وبشهادة اقرانه طبيبا نابها...الكل توقع له مستقبلا باهرا...اختار لنفسه طب الاطفال تخصصا...وبدا اسمه فى الذيوع .,وتناقل الناس اخباره واثنوا كثيرا على براعته,,الى ان حدثت... الكارثة التى زلزلت كيانه
كان ذلك منذ عشر سنوات...حينما اتى اليه والدا طفل صغير لم يتعد الخامسه من عمره...كان محموما ويهذى بكلام غير مفهوم...فحصه احمد الذى كان متعجلا لارتباطه بموعد مع خطيبته...فكتب له فى التذكره نوعا من الحقن اسمه(اسبيجيك) ...ونوعا اخر خافضا للحراره...ومضادا حيويا
اليوم التالى اتاه الوالدان ينتحبان...فقد فقدا فلذة كبدهما..وقره عينيهما..مات الصغير...وادرك احمد انه السبب
ادرك انه اخطا عندما قام بوصف الاسبيجيك....فهذا النوع قد يقتل الاطفال دون العاشرة...وعلى عكس ماتوقع.. لم يوجه أحد اللوم له يومها ..فالابوان كانا مؤمنين ان هذا قدر الله واجب النفاذ... وكلاهما أجمعا على أن الحادث كان شيئا لا يمكن تجنبه...حاول احمد بعدها مساعدتهما...تكفيرا لذنبه الا انهما لم يقبلا منه اى شئ...مما زاده ذلك ألما كان يعتصر نفسه يوميا
انتزعه نداء الممرضه انتزاعا من ذكرياته المؤلمة...اخبرته أن هذا الكشف هو الاخير هذا اليوم
ارتدى بدلته ثم نزل واستقل سيارته...كان قبل ان يذهب عائدا الى منزله يسلك يوميا طريقا نحو بيت هذا الطفل الذى تسبب بموته...كان يعتقد ان هذا بمثابة نوع من التخليد لذكرى الطفل
وبينما يقود سيارته اذ برجل تخطى السبعين من عمره يتكئ على عصا خشبية..يشير اليه بيده ...فتوقف احمد للرجل وفتح له باب السيارة
كان الرجل يعانى من ضيق بالتنفس ...فكانت الكلمات تخرج منه بصعوبة..ثم اخرج من جيب بدلته بخاخا قام بوضعه فى فمه..وقام باستنشاق الرذاذ المنبعث منه..فارتسمت على وجههه علامات الارتياح
قال احمد:- الف سلامه عليك ياحاج
-الله يسلمك ياابنى
-على فين ال....
لم يكمل احمد جملته ..فقد ابصر اطفالا يلعبون الكرة فى شارع جانبى...شارع قريب من الطفل الذى تسبب بموته..ولولا وقوع الحادث لكان ذلك الطفل يلعب الآن مع الأطفال الآخرين
اكمل احمد جملته بعد برهة..فقال:-على فين العزم ان شاء الله ياحاج
-ياريت يا ابنى توصلنى المقابر اللى على اول الطريق الصحراوى
اختلس احمد النظر الى وجه الرجل العجوز....فتيقن انه هو..
هو جد الطفل الذى تسبب فى موته..لقد قابله فى العزاء...صحيح ان التجاعيد كست وجهه الا انه اقسم انه هو
انطلق مسرعا بالسيارة حتى وصلا المقابر...هناك اندفع العجوز نحو لحد صغير ووضع عصاه جانبا وبدا فى التحدث بصوت خفيض
كان حارس المقابر يقف على مقربة منهما فذهب اليه احمد ...سأله عن العجوز فاخبره انه يزور حفيده المتوفى منذ عشر سنوات...توفى بسبب خطا دكتور اطفال
سأله احمد عن والدى الطفل
اجابه ان الاب توفى بعد موت طفله بعام واحد...ومالبثت أن لحقت بهما الأم كمدا وحزنا
تدلى فك احمد السفلى وأحس بالدم يهرب من وجهه...فمايقوله هذا الرجل يعنى أن الجد عاش وحيدا طوال هذة السنوات...
-انى احترم هذا الرجل جدا..قالها الحارس ثم استطرد:-لقد وعد ان يزور حفيده يوميا منذ ان توفى
ولم يخلف وعده قط
انهى الجد زيارة قبر حفيده...ثم ركب بجوار احمد وقال له اسف يا ابنى عطلتك
بس ده وعد انا قطعته على نفسى لان حبيبى قبل مايموت كان بيقولى:- اوعدنى ياجدو تيجى كل يوم البيت تشوفنى
قطع احمد مسافة بالسيارة قبل ان يقول:- سيدى ان الامر محرج..لكن انا الطبيب الذى تسبب فى وفاة حفيدك..وانا لا انام من وقتها
انتظر احمد الرد من العجوز...انتظر طويلا ولكن لم يكن هناك رد
توقف احمد عند حافة الطريق واستدار باتجاه الجد
لم يتحرك العجوز ...كانت عيناه مغمضتين..وعلى وجهه ارتسمت ابتسامه خفيفه..
لقد اوفى بوعده لحفيده..وهو الان فى طريقه اليه
....فى طريقه الى الجنة

محمد عبد العزيز
12-4-2012
مرسلة بواسطة في ليست هناك تعليقات:

حلمنتيشى.........محمد عبد العزيز

حبيبتي
اعشقك كما يعشق الاخوان الكرسى
سأضحى بكل شئ
مثلما ضحى الشاطر من اجل المرسى
ساتغاضي عن اخطائك
مثلما يتغاضى السلفى
عن اخطاء المجلس..كلما يصبح ويمسى
ستكونين لى مثل المرشد
سمعا وطاعة لك..
... فى سكوتى او كلامى
او حتى همسى
مرسلة بواسطة في ليست هناك تعليقات:

الجمعة، 20 أبريل 2012

3 خرفان


3 خرفان
.
عندي 3 أسئله بيحيروني , عشان أنا مصري زياده عن اللزوم , بينطحوني قبل مانام...3 خرفان .
.
لو خيرت الشاطر بقى شاطر فعلا وفاز في الإنتخابات لا قدر الله , ماهو المسمى الوظيفي والمنصب الذي سيشغله ؟ هل يشغل منصب رئيس دوله مصر أم السفير والقنصل العام لدولة الأخوان المسلمين في دولة أجنبيه اسمها مصر ؟ !
.
وبناء عليه , هل يرعي مصالح شعب مصر الأجنبي أم فقط يرعى مصالح الجاليه الإخوانيه ( الكبيره ) في مصر ؟!
.
إذا حدث خلاف سياسي أو نزاع بين دولة الإخوان ودولة مصر الأجنبيه , هل يقوم المرشد العام لدولة الإخوان بسحب السفير , أم يعلن الحرب على مصر ويحشد الجاليه الإخوانيه بها لدك الحصون تحت نفس الشعار ( اللي ما بيخيبش أبدا ) إقامة الشريعه الإسلاميه في دولة مصر الكافره ؟!
مرسلة بواسطة في ليست هناك تعليقات:

براطيش


براطيش
.
مصر الجميله الولاده
من كام سنه يجي زياده
صبحت عاده
بتجيب براطيش
.
براطيش بتفتي وبتهبل
وناس عبيطه بتتقبل
لكلام دراويش
.
يامصر طالعه من جوعه
فدان غباوه ومزروعه
كل الحاجات الممنوعه
وفساد وحشيش
.
براطيش بتقتل فشبابنا
واما عاتبنا
يقولو لنا الجيش !
.
اضرب كمان بالبرطوشه
وافقع عيوني بخرطوشه
وتقولي مفيش
نشن ياشاويش
.
احنا اللي كنا الرجاله
وكل يوم نثبت حاله
بقينا رجاله قواله
افعالنا مفيش
.
كان حلمي فيكي يابلادي
حلمي العادي
كان حلمي أعيش
.
أنا اللي بدلت حرامي
من قدامي
باتنين دراويش
مرسلة بواسطة في ليست هناك تعليقات:

لماذا ننكسر

في لحظة ما , أري مصر كأنها مستشفى كبير لأمراض الذكوره والرجوله , ملحق بها دار للمسنين والعجزه وغرفه صغيره ضيقه للأطفال الأيتام ...............لماذا تنكسر ؟!
مرسلة بواسطة في ليست هناك تعليقات:

صباح الخير ياولاد أبو اسماعيل

صباح الخبر والقطن الحرايري على ولاد أبو اسماعيل , ألف قنطار مبروك على الحكم في القضيه , وإن كان الحكم معلقا وهايش ولا يعني انتهاء القضيه , في انتظار ما يفعله ( المنجد ) في الأيام التاليه.
بعيدا عن التصفيق والصياح , وبشوية هدوء , الموضوع هو لعبه في يد النظام الحاكم , يستطيع النظام والخارجيه أن تعطيك بعد ساعه جواز سفر لأم الشيخ حازم يفيد بأنها أمريكيه من أصل ياباني , بوثيقه سليمه غير مزوره , وتستطيع أيضا أن تثبت أن حازم صلاح اسمه الحقيقي كيم لي يوكوهاما بوثيقه سليمه , هذه هي امكانيات الدول وأجهزه المخابرات , الورق والختم والقطن والمخراز كله عندها في الدرج.
.
أغلب ظني , وبعض الظن مش إثم , أنهم يدرسون الموقف من زاويه مختلفه تماما , هل تكملة أبو اسماعيل لسباق الرئاسه تصب في مصلحة عمر سليمان وعمرو موسى أم لا , وهي بالطبع في مصلحتهم , فوجود أبو اسماعيل في الصورة يفتت أصوات الإسلاميين , ومع قليل من التزوير وتنجيد الإنتخابات , سنحصل على مرتبه مريحه جدا اسمها عمرو موسى.
.
أحلام سعيده يا ولاد أبو اسماعيل .
مرسلة بواسطة في ليست هناك تعليقات:

النمله رئيسا

النمله رئيسا
.
البعض يؤيد عمر سليمان لأنه سيعيد الأمن والإستقرار وعجلة الإنتاج التايهه ويجيب الديب من ديله............ وأنا أصدق.
والبعض يؤيد مرشح الأخوان لأن لديهم مشروع حضاري تقدمي وينوون إقامة دولة العدل والمشاركه لا المغالبه............وانا أصدق.
وقبل أن تعتزل الرقص , قالت الفنانه فيفي عبده في أحد البرامج , أنها اعتادت قراءة القرأن قبل كل رقصه عشان ربنا يوفقها............وانا أصدق.
.هكذا خلقنا لنصدق , أصبحنا مخلوقات غريبة الشكل , تضخمت الأذن لدينا فأصبحت تسمع دبة النمله , وضمر العقل تماما فأصبحنا نصدق أن السمنه والزيت وانابيب الغاز تأتي من بطن النمله أو بطن الزير !.
فلماذا لا نختصر الوقت والمجهود ونوحد صفوفنا وندعم النمله ذات نفسها رئسا لمصر , على الأقل نسمع دبتها وناكل سمنتها !............فاهم يا..................
مرسلة بواسطة في ليست هناك تعليقات:

السعاده

‎Mohamed Hussein‎
ربي أطعتك ساعة
فاكتب جزائي أنني
أحيا وظهري شامخ
لا ينحني
واكتب لمصر سعادة
كيف السعادة ؟
دُلني
مرسلة بواسطة في ليست هناك تعليقات:

شبورة

شبورة جامده
ومش شايف
حد يقول لي
السكه منين ؟
من كتر خوفي
بقيت خايف
ألف نفس
اللفه سنين
.
عربيه جايه وبتنور
يا نهار أخضر
يمكن مرور
يمكن لجنه
جايبه الدستور ؟
.
أهلا وسهلا مولانا
يسعد قلبك
جبت الخريطه
اللي تنور
دربي ودربك
.
لأه الخريطه بيكتبها
مولانا الشيخ
وبتاع البط
لسه هيتعلم
وهيقرا
ويفك الخط !
.
بس انت كمل
متخافشي
إيه هيصيبك ؟
لو يوم هترشق
فالحيطه
يبقى نصيبك !
مرسلة بواسطة في ليست هناك تعليقات:

علامة الإستفهام

بعد أن أعلنت المحكمه الإداريه العليا ببطلان لجنة تشكيل الدستور , أعلن الدكتور الكتاتني أنه سيؤجل جلسة اللجنه غدا احتراما لقرار القضاء....هل هكذا نحترم أحكام القضاء..بالتأجيل أم بوقف العمل بها حتى صدور القرار النهائي....أصبحت أفتش عن علامة الإستفهام وعلامة التعجب في لوحة المفاتيح عندي فلا أجدها....أظنها اختفت ولم يعد لها داعي.
مرسلة بواسطة في ليست هناك تعليقات:

لاتسأليني من أكون

لا تسأليني إنني
وشمٌ على صدر الجنونْ
في كلِ يومٍ أختلفْ
لا تعجبي من مشيتي
من خطوتي
من نظرتي
من لمستي
عندَ الحضورِ حبيبتي
لي ألفُ شخص يحضرونْ
.
لا تسأليني من أكونْ
.
محمد حسين
مرسلة بواسطة في ليست هناك تعليقات:

ابتسم

‎Mohamed Hussein‎
ابتسمْ
.
يجرى إيه لو كنت حاضر
بس حظك مره غايب
أوعي تيأس
أو تكشر
دا الأمل موجود زكايب
بس دور
.
ابتسم حرك شفايفك
ولا تبقى مالها عوزه
هيه طفله تحب تلعب
مش بتتعب
أوعى ترسم فوق شفايفك
صورة الطفله العجوزه
.
الطريق مزروع مداين
وانت شايف
والأمل مفروش جناين
فوق سنين اليأس واقف
يالله اجري
ولا خايف!
.
قول يارب
تلقى ربك بيناديك
ابتسم
وافرد جناحك للأمل
ذي صياد السمك
ارمي الشبك
دانت رزقك بين إيديك
مش لغيرك
توب ومتفصل عليك.

hussein
· · · 13 أبريل في 02:31 مساءً‏ ·
مرسلة بواسطة في ليست هناك تعليقات:
الاشتراك في: الرسائل (Atom)