دنيا غداره

دنيا غداره يا زداحمد والمتغطي بيها عريان ( أو شاطر ) , مبارك اللي كان بيسجنهم طالع براءه في أبريل ومرسي الجاسوس اللي بقى رئيس بيهدد بسجن البرادعي اللي كان بيدافع عن حقهم في الحياه , وعاصم عبد الماجد الإرهابي عايز يطهر الإعلام اللي كان بيستضيفه , عصام سلطان بتاع أمن الدوله عايز يسحب نوبل من البرادعي ومرسي أول رئيس في تاريخ مصر يقول هنضحي بشويه من الشعب عشان الوطن يعيش , ده الشعب اللي عصر لمون على نفسه لحد ماجاتله قرحة معده , ومرسي رايح زياره لقطر ( لأ ده خبر عادي , واحده وراجعه بيت جوزها , خبر لا يستحق النشر ) !!.

.

محمد حسين

الفجر في الخصومه

حضرتك ممكن تختلف مع جارك على حتة أرض , وفجأه تقرر إنك عايز تشهر بيه وتفضحه , ممكن مثلا تقول إنه مبيصليش , أو بيأكل عياله حرام أو بيكذب أحيانا , إنما مينفعش تقول ده بيسرق السجاد بتاع الجامع وبيضرب شيخ الجامع وبيتبول على المصحف في الجامع وبيجيب رقاصات في الجامع وبيضرب مولوتوف في الجامع وأي حاجه في الجامع والمصحف !! , للأسف هو ده الحد اللي وصل له الإخوان في السفاله والخصومه , يرفعو المصاحف , يقولو بيتهجمو علينا في الجامع , بيضربو خرطوش في الجامع , المهم يستفزو مشاعر البسطاء , حقيقي وصلو لحد من السفاله يعجز الشيطان عن ابتلاعه وتفهمه !!.

.

محمد حسين

مصر والجماعه

مرسي اللي راح اجتماع الجامعه العربيه ونام وقدامه علم مكتوب عليه ( جمهورية مصر العربيه ) هو نفسه مرسي اللي حضر 1000 إجتماع في مكتب الإرشاد , وأتحدى أي حد يجيبلي صوره لمرسي وهو نايم في اجتماع لمكتب الإرشاد وقدامه علم مكتوب عليه ( جماعة الإخوان المسلمين )..............هي دي باختصار حكاية مصر تحت حكم الإخوان !!.

.

محمد حسين

وهرتلة عصافير

أنا طير وشفت السما
بالأمر مفتوحه
والدنيا واسعه بَراح
بصيت على رسمتي
مالقيتشي فيها جناح
كأني لسه أسير
حبّة ورق بيطير
وكل شعر اتكتب
صرخه في ساعة غضب
وهرتلة عصافير !!.
.
محمد حسين

البلتاجي والدوده

زمان وانا صغير (6 سنين ) لما كنت بروح في الصيف أشتغل في جمع الدوده ( بتاعة القطن ) , كان أحيانا الخولي بيلاقي الجو حار أوي علينا واحنا عيال صغيرين فكان يقعدنا تحت شجره لحد ميعاد المرواح , بس القاعده دي لها أصولها , والخولي لازم يأمن نفسه , إحتمال المعاون الزراعي بتاع الجمعيه يجيلنا تفتيش فجأه ولا حاجه ويخرب بيت أبو الخولي , فكان الخولي بيطلّع عيل مننا على شجره عاليه يراقب الطريق ( ناضورجي يعني أو بصاص ) , ويتأكد إن مفيش حد جاي , أهو الواد الصغير الناضورجي ده لما كبر عايزين يشغلوه رئيس المخابرات العامه المصريه !! , كل معلومات البلتاجي عن المخابرات والجاسوسيه إنه كان بيراقب الطريق لإجتماعات مكتب الإرشاد السريه عشان الظابط ميجيش فجأه , عشان كده السلطان بديع شايف إنه أحسن واحد يمسك المخابرات العامه المصريه , ولا يمكن عشان البلتاجي شنبه كبير ويخوف ذي الأستاذ يوسف شعبان !!.

.

محمد حسين

جهاد المناكحه

القبض على وزير إيراني مع وزيره إيرانيه في الأسانسير في وضع مخلل بالأداب ! , أفغانستان تحتل المرتبه الأولى في العالم في التحرش الجنسي ومصر الثانيه , دوله إسلاميه كبيره تحتل المرتبه الأولى في البحث عن كلمة سكس على جوجل , القبض على قيادي سلفي في وضع مخل في الطريق الزراعي , القبض على قيادي إخواني في وضع مخل وسط الحقول , هؤلاء هم المجاهدون ............................ عن جهاد المناكحه أتحدث !!.

.

محمد حسين

برافو اللي قال

تصدّق يا خال ؟
برافو اللي قال 
دي ثوره عبيطه 
وهوجة عيال 
نبحنا في صوتنا 
وثورنا وموتنا 
وشيلنا الزكيبه
وجبنا الشوال !!
برافو اللي قال .
.
محمد حسين

ولا أحبك حوع

محتار وحيرتي وَجَعْ
في الأصل مش موجوع
محتار أحبِّك شَبَعْ
ولّا أحبك جوع ؟
خايف أجيلك أنا
فرعون هيمنعني
مع إني مش ممنوع !!.
.
محمد حسين

سلطان والبرادعي

إهداء إلى الأستاذ عصام سلطان ( بتاع كل الأزمان ) !!
.
متتعبش نفسك , الطريقه الوحيده يا برنس لسحب جايزة نوبل من البرادعي وشطب إسمه من كشوف العظماء والمحاضرين في العالم هي إنه يقعد في مؤتمر ويقول ( مصر لن تقع , وقع في ركبكو , وأي صوابع هتلعب في مصر هقطعها , أنا شايف صباعين تلاته داخلين يلعبو في مصر , وبعدين ينام ويشخر قدام كاميرات العالم !! )..............صدقني والله , ساعتها لجنة نوبل هتكتشف إنه حمار وأهبل ولا يستحق الحبر اللي اتكتب اسمه بيه !!.

.

محمد حسين

مبخافشي غير إنسان

ورده ومتفتحه
قبل الأوان بأوان
الحجم حبة كرز
والعطر مية فدان
يا ورد خايف ليه
مني دانا إنسان ؟
ورّاني جرح عليه
وقالي يابن البشر
مبخافشي غير إنسان !!.
.
محمد حسين

زهري

صباح الخير , في الفلكلور المصري والروايات القديمه وجرت العاده عندنا , إن فيه واحده ست شلأ بتجيب زميلاتها الستات الشلأ ويتربصو براجل محترم يعمل أستاذ جامعي مرموق , وعايش في حاله , بيتكلم في محاضراته عن الفاشيه والبروليتاريا والفكر اليساري وإزدواجية المعايير , عمرنا ما سمعنا إن الراجل المحترم وقف في الشارع يرد على الستات الشلأ شتايمهم وإهانتهم وإلا ميبقاش محترم , استمر يا عصام انت وعلاء صادق ووائل قنديل في التربص بالبرادعي , محدش بيختار نوع التربيه اللي بيترباها وهو صغير , وانتو معذورين , هي دي شغلتكو من قديم الازل , على فكره أيام الإحتلال الإنجليزي لمصر كانت شغلانتكو دي مرخصه ومحترمه وكل واحد بيشتغل فيها معاه ترخيص وبياخد جرعة بنسلين شهريا من الحكومه عشان تحميه منsyphilis ............!!.

.

محمد حسين

حقير حقير

بعد فضيحة عصام العريان في نقابة الأطباء واللي كشف عنها الجهاز المركزي للمحاسبات , إنتظرو في اليومين الجايين هجوم كاسح من شبكة رصد وصفحات الخرفان الكبيره على رئيس الجهاز المركزي للمحاسبات اللي اكيد وبلا شك هنكتشف فجأةً إنه كان شاذ جنسيا ومراته ماشيه على حل شعرها وبنتو بتضرب بانجو وابنه الكبير جاسوس اسرائيلي حقير حقير حقير !!.

.

محمد حسين

البرادعي

صباح الخير , بعد ما قالو البرادعي هرب للإمارات وهيشتغل مستشار للرئيس الإماراتي ! , رجع الراجل عادي خالص وكان بيحضر مؤتمر دولي كشخصيه دوليه محترمه حائزه على جايزه نويل , إنما خيرت الشاطر وصبيانه مسكتوش الصراحه ولا اتكسفو على دمهم , قالك البرادعي رجع ومعاه 4 مليار من الإمارات !! ده بقى بيسموه في علم الجريمه ( الكذب المركب ) , يعني تكدب وتصلح كدبتك بكدبه وتصلح الكدبه التانيه بكدبه تالته وهكذا لدرجة إنك بتنسى بعدها هي الكدبه الأولانيه كانت إيه ؟! , وفي الشريعه الإسلاميه بيسموه (كذَابا ) مش كاذب , ( يتحرى الكذب حتى يكتب عند الله كذابا !!)., في الحقيقه البرادعي مش وزير ولا شخص مسئول في مصر , وعلى حد علمي الفلوس بتتحول على حسابات بنكيه ومعدش حد بيشيل فلوس في شكاير وزكايب ذي زمان ( أيام على بابا وال 40 إخواني ) , الحقيقه التانيه إن البرادعي هيتفتش في المطار ذي أي مواطن عادي ولا يحق له إنه يشيل أكتر من 10 ألاف دولار , الحقيقه التالته إن الفلوس لو بتتحول بمبالغ كبيره بيبقى عليها رقابه , والحقيقه الرابعه والمهمه جدا إن الشخص ده إسمه محمد البرادعي مش خيرت الشاطر وكان مسافر للإمارات مش قطر ولا أمريكا !! , الحقيقه الخامسه والأهم جدا جدا , كل يوم بحترم نفسي وذاتي أكتر من اليوم اللي قبله , ....................أنا سعيد أوي إني مش خروف !!.

.

محمد حسين

الثوره الجنسيه

بنات تونس ( المزز ) رايحين سوريا عشان يطبقو فتوى ( جهاد المناكحه ) , يعني من الأخر يطرّو شوية على المقاتلين بتوع الجيش الحر , خصوصا بعد ما الثوره السوريه طولت واتحولت لحرب أهليه , هنا بيجي على بالي سؤالين :
.
أولا : هي الثوره السوريه قامت عشان بناتها وستاتها يتهجرو من بلدهم ونتجوزهم احنا في مصر (ذي الجواري ) ونبعت لرجالتهم هناك بنات من تونس ؟ يعني هي ثوره جنسيه أصلا ؟ يعني مشكله سوريا كانت إن رجالتها مش طايقين بناتها فقالو نعمل ثوره و نبعت البنات لرجالة مصر ونجيب لرجالتنا بنات من تونس ؟!!
.
ثانيا : طالما الموضوع لذيذ وممتع كده وبيجيب مزز , إحنا خايفين ليه بقى من الحرب الأهليه في مصر ؟!!.................
.
......................الحقيقه أسوأ حاجه ربنا ابتلى بيها العرب , أسوأ من الإستعمار والكوليرا والطاعون , أسوأ من الفيضانات والزلازل والإنحباس الحراري , أسوأ من الإيدز والسارس والإسهال هما المشايخ ( أغلبهم ) , والجماعات الإسلاميه ( كلهم وليس جميعهم ) !!.

.

محمد حسين

وقولي أنا إنسان

إكتم في صوت ضحكتك
لا يبان عليك فرحان
وخبّي نار لوعتك
لا يقولو طير هيمان
.
كمّل بقى كدبتك
وقولي أنا إنسان !!.
.
محمد حسين

حمدي قنديل

حازم أبو اسماعيل وعاصم عبد الماجد بيحضرو ندوه لوزير الإعلام الإخوانجي عن تطوير الإعلام في مصر , وبكره بعد صلاة العصر بإذن الله حمدي قنديل وعلاء الأسواني هيروحو يفجرو معبد أبو سنبل بالسياح اللي فيه عشان قنديل والأسواني إرهابيين !! , يا إرهابيين يا بتوع أفغانستان والحشيش والهيروين !.
.
محمد حسين

مطار العاصمه

إتأكدت من الخبر , حكومة قنديل وافقت على رجوع المصريات للعمل كخادمات في الخليج , عموما عادي طالما إن مصر البلد الام بجلالة قدرها بقت شغاله هي نفسها خدامه في قصر حمد وموزه , كمان حكومة قنديل هتقطع الكهربا عن مطار القاهره 4 ساعات يوميا في الصيف توفيرا للطاقه , قولي بقى أي مصيبه سوده حلت على دماغنا ودماغ اللي خلفونا , لما بلد بتصدر كهربا لدول تانيه مش عارفه تنور مطار العاصمه ؟ قولي بالله عليك احنا رايحين على فين ؟ طيب ممكن مثلا نحل المشكله بطريقه تانيه , يعني رئيس مطار القاهره يجيب شوية خشب وفحم ويعمل راكية نار كبيره تنور للطيارات والركاب أو نمشيها شموع وجو رومانسي , أو ممكن الطيارات تقف صف واحد وتولّع الكشافات بتاعتها عشان تنور المطار , ولا لأ كده البطاريه بتاعة الطياره هتنام , يادي أم الوكسه اللي اتوكسنا بيها , مطار العاصمه مش لاقيين كهربا تنوره , أقولك على حاجه يا سيد خروف قنديل , مطار العاصمه تحديدا بتبقى أهميته استراتجيه وأمن قومي مش تجاريه بس , يعني مثلا , بغداد سقطت بمجرد ما الأمريكان احتلو مطار بغداد !! , استنى افتكرت حل كويس , إحنا ممكن نأجر مطار القاهره للشقيقه الكبرى قطر بموجب قانون الصكوك الإسلاميه !!.

.

محمد حسين

حمدين

بعد حكاية المصريات اللي هيشتغلو خدامات في بيوت العرب , وبعد حكاية صكوك بيع مصر للعرب , وبعد حكاية تأجير الأثار وقناة السويس للعرب , وبعد حكاية حماس والإرهابيين اللي بيقتلو جنودنا في سينا , وبعد حكاية الدستور اللي اتحط عشان قطر ترضى عننا , وبعد حكاية مطار القاهره اللي هيقطعو عنه الكهربا وتقريبا محصلتش من يوم ماتم إنشاؤه , وبعد وبعد وبعد , أصبحت على يقين إن مصر محتاجه عبد الناصر , أو حد من ريحته , حد إيده ناشفه وبتعرف تضرب , إحنا كده بنلعب في الكرامه والمواطنه وتاريخ مصر , محمد البرادعي طير إنت , إنت لو وصلت للحكم هتتكلم بالشوكه والسكينه وهتدي للإرهابيين الحق في ممارسة السياسه تاني , إحنا محتاجين حمدين صباحي !!.

.

محمد حسين

لحد مانلاقي رئيس

النائب العام لو جمع غرامه من كل واحد بيسب مرسي ويتريأ عليه قدرها 15 ألف جنيه , مصر هتبقى أغنى من أمريكا في ظرف شهرين , وتقريبا بقى هو ده مشروع النهضه وال 200 مليار اللي كان مرسي بيقول عنهم , يعني لو قسمنا 200 مليار على 15 ألف هيبقى فيه 13 مليون شخص بيلعنو جدود أبو اللي خلفو مرسي , يعني يا مرسي بتبني اقتصاد مصر بالإهانه الشخصيه ؟ كم أنت عظيم أيها الرئيس لحد مانلاقي رئيس !!.

.

محمد حسين

العميل 13

تقرير للمخابرات الفرنسيه بيقول إن مرسي شغال عميل للمخابرات الأمريكيه من 20 سنه ! , وتقرير تاني طويل عريض فيه اتهام لمرسي إنه باع عالم مصري في امريكا لصالح المخابرات الأمريكيه ! , عموما انا مش مصدق الكلام ده , مرسي شكله ميجبش خالص وقواه العقليه مستحملش , على الأقل كان الأمريكان علموه يقول جمله واحده بالإنجليزي بشكل صحيح , إلا بقى إذا كان مرسي عارف كل حاجه ومدكن وبيطلع هيلفط بالكلام بتاعه ده كحركة تمويه يعني , ونكتشف إحنا في نهاية فيلم الثوره إن مرسي هو هو عم مغاوري الجنايني في فيلم العميل 13 !!.

.

محمد حسين

أنا حاجه عالهامش

واموت في أرضَك ليه ؟
مانا كنت مش عايش
وكان عذابي غطا
للبرد مش حايش
خايف عليّ يا بيه ؟
م الغربه والغربان
تقولشي أنا إنسان
أنا حاجه عالهامش !!.
.
محمد حسين

نساوي الحياه

يا صاحبي اللي ماشي 
وفايت دواه
يا صاحبي اللي داخل 
مغاره وتاه
يا لحني وعودي
وضهري وعودي
وطوق النجاه 
بدونك مانسوى 
في عيشه ماتسوى 
وتكتر جروحنا 
ماهو انت وإحنا
نساوي الحياه !!
.
محمد حسين

يأكل النار

ومن يدنو 
إلى عينيكِ أحسبهُ
كحاوٍ
يأكلُ النارَ !!
.
محمد حسين

لمحتني عصفوره

طايرين 
وفوق الشجر
لمحتني عصفوره 
قالت لي إنزل هنا
قلت لها مش قادر 
في جناحي حمل كبير
وحلم بالتغيير !!

محمد حسين

مهراجه

بعد ما مرسي حصل على لقب مهراجه من الهند , هيبقى اسمه كده , الأستاذ الدكتور المهندس ( خد نفس ) الشيخ الفيلسوف المهراجه محمد مرسي , وزمان كان السادات بيتريأ على الإسم الرسمي لليبيا ويقول : الجماهيريه العربيه ( خد نفس ) الإتحاديه الإشتراكيه الأفريقيه الليبيه , ومرسي ميختلفش كتير عن ليبيا , هو عايز يعمل مشروع استزراع زراعي وفي ليبيا واحد وقف وقال للقذافي عايزين نزرع مكرونه ذي مصر يا فخامة العقيد !!.

.

محمد حسين

يا بحر موجك هدي

يا بحر موجك هِدِي
وانت اللي كان شمشون
لا شط يوم وقّفك
ولا مركب الفرعون
تكونشي بحر اتكسر
وشبت ذي البشر
خايف تثور وتكون ؟!!
.
محمد حسين

أنظمة الحكم ال 3

أنظمة الحكم التلاته في العالم
.
1- دوله بيكون فيها الرئيس عنده كل الصلاحيات الكبيره ( دوله رئاسيه ) ومن أمثلتها فرنسا , أمريكا , ومصر ( 5000 ق.م إلى 2012 م )
.
2- دوله بيكون فيها رئيس الوزراء عنده كل الصلاحيات الكبيره ( دوله برلمانيه ) ومن أمثلتها تركيا , إسرائيل , بريطانيا .
.
3- دوله بيكون فيها الرئيس ورئيس الوزراء مالهمش أي تلاتين لزمه ( دوله إخوانجيه ) ومن أمثلتها مصر ( 2012 إلى 2013 ) وكفايه عليهم كده بصراحه !!.

.

محمد حسين

شغل المراكبيه

يا خير
وطاير في السما
وجيوبنا مقطوعه
فقير وشاف
نفس العمى
والفقر مش جوعه
الفقر لما تحبها
وتعيش لها
وتموت لها
ويقولو ممنوعه !!
.
أنا كل سطر اتمسح
في كتاب وأغنيه
أنا كل نوبة فرح
دي لغيري مش ليه
أنا كل موجة أمل
ترمي لي لقمة عيش
أروح لها مالاقيش
يادنيا ما تبطّلي
شغل المراكبيه !!
.
محمد حسين

القرضاوي وحسان

صباح الخير , القرضاوي جاب أخره , بيتكلم عن فلول ومأجورين وعملاء ومخربين وحلاوه ومربة تين , القرضاوي وقف في نفس الطابور بتاع محمد حسان , حسان لم فلوس المعونه ومنعرفش راحت فين؟ , القرضاوي قال 20 مليار دولار من قطر بعد نعم للدستور ومنعرفش راحت فين ؟, حسان وهابي سعودي والقرضاوي قطري حتى النخاع , ومصر زمان كان بيتصارع عليها السوفيت والأمريكان أو الفرس والروم , ودلوأتي بيتصارع عليها السعوديه وقطر , المره الجايه هيبقى الصومال وجيبوتي , مصر حالها مش عاجبني يام مصر !! , عموما العرب أولى برضه , وجحا أولى بلحم طوره , والإخوان عشان يخرجو من مأزق الصراع الحساني القرضاوي على مشيخة الازهر يعملو المنصب ذي جوايز السيما كده مناصفة بين حسان والقرضاوي , واحد حد وتلات وخميس والتاني سبت واتنين واربع والجمعه عبود الزمر مش مشكله ماهو له أهله وعشيرته في الصعيد وسينا ,صباح الخير يا بواقي مصر !!.

.

محمد حسين

اسرائيل وحماس

على فكره اسرائيل على مدار ال 50 سنه اللي فاتو كانو لما يحبو يهددو مصر يقولو هنضرب السد العالي , وحماس النهارده بتهدد بضرب السد العالي , وهنا يجي السؤال , اللي هيجاوبه هياخد تذكره لدخول الجنه من حماس أو عضويه دائمه في شعب الله المختار من اسرائيل , السؤال بقى : هي حماس اللي رضعت من إسرائيل ولا إسرائيل اللي رضعت من حماس ؟! , يعني امبارح تحديدا مين فيهم اللي كان بيقول للتاني كل سنه وانتي طيبه يا ماما ؟!!.

.

محمد حسين

تسافر تسافر

تسافر تسافر
وتترك حبيب
وترمي قلوعك
وحاجتك وجوعك
في أرض الغريب
ولما بتشبع
تقرّر هترجع
لأهل وصديق
تدوّر تدوّر
وتفضل تدوّر
ما تلقى الطريق !!
.
حبايبك في بلدك
يا شابو يا ماتو
تقول بس هنزل
وأعزّي في صديقي
وصاحبي اللي بعده
هشوفه يشوفني
وهسمع سكاته !!
.
ساعتها هتعرف
في لحظة بكاء
وتحبس دموعك
وتلعن في جوعك
لأن المجاعه
مجاعة فراق !!
.
محمد حسين

العيش وخبازه

للأسف صدقت فينا المقوله ( إدي العيش لخبازه ولو كال نصه ) , الفرق بين مبارك ومرسي إن مبارك كان خباز بس حرامي فأكل نص العيش , ومرسي عجلاتي وحرامي أكل نص العجين ومش عارف يخبز الباقي لأنه عجلاتي !!.

.

محمد حسين

إمارة سوهاج

صباح الخير , من فتره كده وأنا مؤمن تماما إن حكم الإسلاميين لمصر هيقودنا على الأرض للنموذج اللبناني , شيعه ودروز وسنه ومسيحيين وعلويين وترباتاتو , ابن الحريري عنده الجيش بتاعه في بيروت ونصر الله عنده جيشه في الجنوب وكل فصيل عنده جيشه ولما تدخل لبنان وعايز تكلم الكبير متعرفش تكلم مين ؟ , مصر هتتقسم تحت حكم الإخوان تقسيم طائفي عرقي , والتشيع هيظهر والبهائيه هتتألق , والإخوان عندهم جيشهم والجهاديين عندهم جيش و بتوع القاعده والسلفيين كمان واحتمال المسيحيين يعملو جيش صغير كده على قدهم , الجيش المصري اللي أسسه محمد على كجيش نظامي واللي عمره قبل كده بألاف السنين هيكتفي بتصنيع المراوح والخلاطات , سيادتك احنا مش هنحارب اسرائيل أيها الجحش المتدين , اسرائيل مش هتوسخ إيديها بدمنا , وجنودها هيدخلو القاهره بعربيات مرسيدس مكيفه وهما لابسين البدله والنضاره الريبان , قلت كمان إن أعظم هديه أهداها المسلمين للصهاينه كانت من طرف أخوك ( حماس ) لما قسم فلسطين وتاني أعظم هديه جايه من طرف أخوك ( الإخوان ) اللي هيقسم مصر , اسرائيل تقدر النهارده بس تحقق حلمها ( من النيل للفرات ) , وبعد كام سنه الصهاينه هيسيبو للإخوان حكم إمارة سوهاج !!.

.

محمد حسين

كباريه يوتيوب

وبعد ما الثوار بدأو يتظاهرو قدام مكتب الإرشاد قرر الإسلاميين إنهم يثورو قدام مدينة الإنتاج الإعلامي ويقتحمو الأستوديوهات !! , ديم علينا نعمة الحشيش يارب , طيب الشباب كان بيثور قدام الإتحاديه وبعد فتره عرف واتأكد إن مصر بتتحكم من المقطم فراح يتظاهر قدام الحاكم الفعلي , يتهيألي ده منطقي جدا , حضرتك القنوات الفضائيه دي قطاع خاص , والقطاع الخاص لا بيحكم ولا بيتنيل , يعني ملكية خاصه ذي عربيتك ومصنعك وعيادتك وشنبك , ينفع تثور قدام شنبك ؟! , على فكره التاريخ قرّب خلاص إنه يعمل بيبي علينا , بيقولك إحنا أول دوله وقبيله في التاريخ البشري بيتظاهر فيها أنصار الحزب الحاكم !!. , طيب أصل الإعلام محرض ضد الرئيس , ماشي يا سيدي روح تظاهر كمان قدام الجرايد اللي فيها مقالات علاء الأسواني وابراهيم عيسى وقدام كشك الشجاير لأن فيه دواوين للأبنودي ونجم , وثور قدام جوجل لأنه فاضحكو في كل كتاب وبحث , وقدام إدارة الفيس بوك في أمريكا لأن فيها ملايين البشر بينتقدو العجل المقدس بتاعكو , ومتنساش تبعت كام جحش من عندك يقفلو كباريه اليوتيوب !!.

.

محمد حسين

ريا وسكينه

يعني يا ولاد المره , جمال صابر مطلق مراته وراميها من غير نفقه وبيحرض على حرب طائفيه واخوه هربان من السجن في قضية تجارة مخدرات وابنه قاتل وبلطجي وماشي بالسنجه في الشارع , والمشايخ أمهات دقون تايواني بلاستيك بيقولك ( ليه مغميين عينيه ؟) , يا راجل دي عيلة ريا وسكينه مكانتش بالفُجر ده , وعلى فكره ريا وسكينه عملو كل حاجه غلط ممكن تتخيلها إلا إنهم مقالوش لنسوان زنقة الستات في اسكندريه ( تعالي معانا يا شابه عشان نطبق الشريعه الإسلاميه !! ) .

.

محمد حسين

مش لسه فيها طيور ؟

مش لسه فيها طيور
وصُبح بيشقشق ؟
مش لسه كام عصفور
طاير و بيزقزق ؟
مش لسه فيه فلاح
متحني بترابها
وحلم عمره ماراح
واقف على بابها ؟
مش لسه فيها شباب
بيكسّر الزنازين
رافض يعيش مكسور
وبنت لما تبتسم
ترمي لنا طاقة نور
مش لسه فيها طيور ؟!
.
بلدي وطول عمرها
شقيانه تعبانه
في الوصف أرض وسما
والصح إنسانه
بلدي وطول عمرها
شقيانه تعبانه
من عهد حتشبسوت
وكل ندل وملك
يضربها بالكرباج
هما اللي ماتو نعاج
وهي مش بتموت
ميجيش عليها الدور
مش لسه فيها طيور ؟!!
.
محمد حسين

يا شيخ يابن الشيخ

هو الشيخ الحويني الصغير ابن الشيخ الحويني الكبير يقرب لعصام سلطان ؟ أصله باعت رساله لمرسي بيقوله إنت حنين أوي مع الشعب بتاعك يا سيد بيه !! ولازم تدوس عليهم بالجزمه وتضربهم بالكرباج وكلام بقى عن العملاء والفلول والخونه ألخ ألخ , طيب يا شيخ يابن الشيخ محدش سمع صوتك أيام مبارك ولا أيام العسكر لاانت ولا ابوك , إنت عارف , وعلى رأي أحمد حلمي you know إحنا قريب جدا هيجي علينا اليوم اللي هتكون فيه أسفل شتيمه وأكثرها وقاحه وبذاءه وخدش للشعور والحياء العام هي إن واحد يشتم واحد ويقول له ( يا شيخ يابن الشيخ !! ).

.

محمد حسين

من نوادر العرب

صباح الخير .................من نوادر العرب ( حكاية الأستاذ عبد العاطي )
.
أستاذ عبد العاطي هو راجل بلدياتي خفيف الظل , اتخرج من كلية العلوم قسم الجيولوجيا سنة 1980 , وبعد صراع طويل مع البطاله وقاعده ممله وسخيفه على قهوة العاطلين وبعد ماخبّط في الدنيا والدنيا خبطت فيه , ربنا رزقه بعقد عمل في الجزاير سنة 89 , الحاجّه ( أم عبعاطي ) جهزت لابنها الشنطه وعملت له فرخه محمره ياكلها في الطريق, وركب عبعاطي الطياره من مطار القاهره , بس لجل حظه المنيل بستين نيله وعلى رأي المثل ( إحنا اللي بتقع علينا البلكونه في الصحرا ) , عبد العاطي وقفوه في مطار الجزاير لأن اليوم ده كان يوم ماتش مصر والجزاير اللي مصر وصلت فيه لكاس العالم بالجون بتاع حسام حسن , السلطات الجزائريه رجعته من المطار لأسباب أمنيه طبعا , وربنا ما يوريكو رجعة المكسور المكسوف, وصل بيتهم قبل الفجر بساعه , أبوه فتح الباب واتفزع قال له (فيه إيه يا عبعاطي يابني ؟ ), أستاذ عبد العاطي بص لأبوه بحسره وقال ( حسام حسن جاب الجون فينا احنا يابه !! ).
الحقيقه ثورتنا دي عامله ذي حكاية بلدياتي ده , جون جميل وهذف قاتل , فرحنا كلنا وطلعنا في الشوارع شايلين علم مصر , وبعد شويه اكتشفنا إن الثوره جابت الجون فينا احنا يابه !!.

.

محمد حسين

محمد يسري سلامه

لو كان الشاب محمد يسري سلامه فضل في حزب النور ذي ماهو وتاجر معاهم بدين ربنا وتنازل عن ثوابت عقيدته وثورته ووطنيته من أجل مصالح ومكاسب سياسيه كان زمانه بقى عضو مجلس الشعب وعضو لجنة الدستور وعضو المجلس الأعلى للثقافه ومستشار للرئيس وتتهافت عليه القنوات الفضائيه لأنه باختصار جزمته برقبة نادر بكار , بس هو اختار دينه وبلده ومتاجرش بيهم, وكان زمانه في مرضه الأخير بيتعالج في ألمانيا ذي الشيخ الحويني أو أي شيخ عنده ملايين , إنما هو اختار يعيش شريف ويموت شريف , اللي بيترحمو عليه دلوأتي مفهمش اتنين يعرفو بعض واللي حضرو جنازته ميعرفوش بعض ولا لهم قيادات بتشحنهم , ناس طيبين بيدعو من القلب دعوه مخلصه لأنسان عمرهم ماشافوه يمكن , الله يرحمك يا مصري.

.

محمد حسين

يا جرح

يا جرح مالك كده
مفتوح على الجانبين
لا حد عارف أوّلك
ولا حتى رايح فين ؟
.
هو احنا يا صاحبي الجدع
غلابه وحّدنا الوجع
ولا احنا لسه اتنين ؟!!
.
.
محمد حسين

قال الفيلسوف

قال الفيلسوف
.
فيه صباعين تلاته بيلعبو جوه مصر , والصباع اللي بيلعب جوه مصر هقطعه , واحنا في منحدر للصعود !!.............فلسفه دي ولا مش فلسفه يا متعلمين ؟
طيب يامرسي بالنسبه للصباع القطري هتعمل فيه إيه ؟ وده قرّب يوصل للحجاب الحاجز ؟!.

.

محمد حسين