المسلماني

احمد المسلمانى :
لم يحدث في تاريخ مصر أن وقعت معركه بالشوم والسنج داخل الحرم الجامعي إلا في عهد أول رئيس مدني منتخب
.
لم يحدث فى تاريخ مصر ان تم الاعتداء على الازهربواسطه مصريين الا فى عهد اول رئيس مدنى منتخب
لم يحدث فى تاريخ مصر ان تم الاعتداء على الكاتدرائيه الا فى عهد اول رئيس مدنى منتخب

لم يحدث في تاريخ مصر أن رفضت وزارة الأوقاف التعامل مع الكنيسه الإنجيليه المصريه او اى كنيسه إلا في عهد أول رئيس مدني منتخب.

لم يحدث في تاريخ مصر أن تصبح السمه الغالبه لتصريحات المسئولين هي البذاءه والسفاله والتلميحات الجنسية إلا في عهد أول رئيس مدني منتخب .
.
محمد حسين ( مش أحمد المسلماني !! ) 

على قفاهم

قيادي إخوانجي شاب بيقول إنجازات مرسي لن يراها الذين طبع الله على قلوبلهم , واحب أقولك يا برنس إنجازات مرسي دي  يراها فقط الذين طبع المرشد على قفاهم !!

.

محمد حسين 

إنجازات النهضه

صباح الخير , جمعه مباركه عليكي يا مصر , وتاني إنجاز مهم جدا من إنجازات النهضه ( بعد حكاية أتحسس مسدسي ) , إني لما أنزل مصر بإذن الله هحاول أدخل في أي مشروع اقتصادي بسيط , ولو خيروني بين شريك مصري قبطي وشريك إخوانجي , هختار القبطي بدون تردد , ولو سألني الإخوانجي ليه كده ؟ هقول له يا مولانا انتو بتاجرو بكتاب الله وأياته ورسله وبتاجرو بأموال الزكاه يعني بتاكلو مال النبي , مش هتاكلو فلوس محمد حسين ؟!
وفي السكن , لو خيروني بين جار هندي بوذي مقيم في القاهره وبيت جار سلفي , هختار البوذي بدون تردد , أصل أنا سيادتك طلعت من الدنيا دي ببنتين اتنين وكل أملي في الحياه إني أحافظ على نقاء النوع والسلاله , مش عايز بصراحه أضيع نص عمري عالسلالم والترابزين بتناقش في عباية الراس ومضاجعة الموتى وبول الإبل !!.

.

محمد حسين 

شريحتين

مش صحيح أبدا إن المصريين مش بيعرفو يصنعو حاجه غير الطعميه , هل تعلم أن الإخوان والسلفيين سبقو الصين في تنفيذ فكرة الموبايل أبو شريحتين ؟! , وهل تعلم أن أول مواطن في العالم يمتلك هذا الموبايل ويضعه في جيب البنطلون الخلفي  هو مواطن مصري يُدعى خيرت محمد الشاطر ؟!!.

.

محمد حسين 

الحمير

معلومه علميه , الحمير هي أوّل الحيوانات التي تشعر باقتراب الزلزال فتهرب بعيدا , وفي روسيا منظومه علميه معقده لاكتشاف الزلازل , لكن أجهزة الرصد الروسيه فشلت في التنبؤ بالزلزال الذي صاحب زيارة مرسي لروسيا , مثلما فشلت الحمير في مصر في التنبؤ بالزلزال المدمر الذي صاحب وصول مرسي للسلطه !!.

.

محمد حسين 

سواق كلنتون

صباح الخير , مرسي راح يزور قطر ( اللي هي بيتين ونخله ) فقام سمو الأمير حمد أطال الله في عمره وكبر في كرشه بعت له واحد وزير تقريبا يقابله , فكان طبيعي إن مرسي لما يروح يزور روسيا يقوم بوتين يبعت له رئيس مجلس محلي مدينة روسيا البلد ( مش روسيا المحطه ) , أنصح فخامة السيد الدكتور المهندس الفيلسوف الشيخ محمد مرسي إنه ميفكرش في زيارة أمريكا خلال شهر مايو القادم لأن السائق الخاص بتاع سكرتيرة هيلاري كلنتون يتمتع بأجازته السنويه في هذا الوقت من كل عام , بالعربي يعني الراجل مش فاضي !!

.

محمد حسين 

التسول

إذا كان مرسي ناوي ومصرّ إنه يقضيها تسول في تسول وعاجبه الدور ده فلازم يفهم إن التسول ده علم وله أصوله , وحتما ولابد يستعين بخبرات الرفيقه نعيمه الصغير ( الكاتعه ) , وياخد معاه الواد سقراط ( علاء صادق ) , والبت الجميله البريئه دي ( أم أيمن ) , والإتنين دول شغالين كده وجاهزين على طول مش محتاجين كهربا ولا حرق بالسيخ المحمي ولا قطع ودن عشان يصعبو عالكافر !!.

.

محمد حسين 

الحنكه

وقالك لن أزور أي دوله تدعم النظام السوري , على فكره والله بجد , الدول التلاته الكبرى الوحيده اللي بتدعم النظام السوري هي الصين وإيران وروسيا ! , شوف الحظ يا جدع , سامعك يا خروف وانت بتقول دي حنكه سياسيه , بس أنا راضي زمتك ودينك وضميرك, بص كده في سحنة مرسي وتأملها بعمق , ده منظر واحد عنده حنكه سياسيه ؟! , لو مرسي عنده حنكه سياسيه يبقى أكيد أكيد أم أيمن هي ملكة جمال الساحل الشمالي بس مدكّنه !!.

.

محمد حسين 

مشروع النهضه التسولي

صباح الخير , إيمانا مني بمشروع النهضه التسوّلي الجبار , وحفظا لماء وجه مصر التاريخي والحضاري ( سابقا ) , أقترح على فخامة الرئيس محمد مرسي أن يصطحب معه في زياراته الخارجيه ( كارتونة مناديل من أم نص جنيه للعلبه ) , الناس هناك فاهمين كل حاجه يا ريس , وهتلاقي اللي بياخد علبة مناديل وبيديك ألف دولار ويقولك خلي الباقي عشان مصر !.
ممكن كمان تاخد معاك روشته من أي دكتور مكتوبه بخط ملعبك عشان محدش يعرف يقراها وتقول للناس هناك الواد عمر ابني عنده بلهاريسيا في عقله ومحتاج علاج 9 سنين , وممكن تتقمص دور الفنان جميل راتب في أخر 9 أفلام عملها , وتمشي وانت ماسك في إيدك أستره واصله بخرطوم لجنبك اليمين ولو تحب تطوّر الفكره ممكن تمسك في إيدك حقنه شرجيه واصله بخرطوم ل...... , الساده الأفاضل القائمين على الكتاب , متنسوش والنبي تسجلو موضوع كرتونة المناديل والروشته والأستره والحقنه الشرجيه في كتاب إن(جاز)ات السيد الرئيس !!.
.
محمد حسين

ذكر النحل

أحمد مكي ذي أخوه محمود مكي وكل أبناء عائلة ( إبو ) بالإسكندريه بيلعبو دور ( ذكر النحل ) , مهمته في الحياه هي تخصيب الملكه وتستيف القوانين لجناب اللي خلفوها , وبعدما ينتهي ذكر النحل من دوره يموت فجأه ( من الفرهده تقريبا ) أو تقتله الملكه بنفسها , هذه هي حكمة الله في خلق بعض الحشرات !!.

.

محمد حسين 

حب الشباب

بعد فتوى جهاد المناكحه وذهاب التونسيات إلى سوريا من أجل الترويح عن الشباب السوري المجاهد , تقرير يفيد بإصابة 37 فتاه تونسيه بالإيدز !! , طيب ماهو ده العادي يا ستنا ولّا انتي فاكره بعد ما تجاهدي بالمناكحه هتُصابي ب( حَبْ الشباب )؟!!.

.

محمد حسين 

دولة الإهمال

في دولة الإهمال وال sorry
.
طبيب مقيم في قسم الحضانات , إنشغل لبعض الوقت في مداعبة إحداهن أو متابعة مباراه لمنتخب مصر , مات 3 أطفال حديثي الولاده وخرج إلينا الطبيب ليقول أسف Sorry !!.
مهندس ترك البناء للمقاول وذهب أجازه أسبوعين إلى شرم الشيخ للإستجمام , وبعد عامين سقط المبنى على رأس من فيه , عشرات القتلى والجرحى , وخرج لنا المهندس ليقول أسف sorry.
.
سائق قطار تناول زجاجه من دواء الكحه المخدر قبل انطلاق رحلته وكانت النتيجه اصطدام بأتوبيس مدرسه وقتل جميع من فيه , وخرج لنا السائق ليقول أسف Sorry.
.
نائب رئيس ( قاضي سابق ) أشرف بنفسه على إنهيار دولة القانون وفي عهده وضع الرئيس إعلانه الدستوري الديكتاتوري الشهير , ثم خرج لنا نائب الرئيس بعدها ليقول أسف sorry.
.
وزير عدل , رحّب بحصار المحاكم وتعيين النائب العام وتهديد القضاه ثم خرج لنا في النهايه ليقول أسف sorry.
.
لهؤلاء جميعا أقول , أنتم أحقر وأعفن وأسوأ وأقذر وألعن من الكلاب الضاله , ولو كان الأمر بيدي لقتلتكم على أفعالكم ثم كتبت على قبوركم (أسف Sorry ) !!.

.

محمد حسين 

بلا شفتين

وطني المسجونُ
بلا شفتينِ
يحاولُ جداً أن يصرخْ
لا أفهمُ
صرخاتِ بلادي
.
عن بقعة أرضٍ تسألني؟
أم لحظة مجدٍ تذكرها
أم أنك يا وطني
عبثاً
تشتاقُ لسيرةِ
أجدادي ؟!
.
محمد حسين

فلان الفلاني

إضحك مع الإخوان والسلفيين
.
صديقي العزيز فلان الفلاني هو إخوانجي سلفنجي من ولاد أبو اسماعيل , يعني ممكن تقول له أمك مشيها بطّال يقولك ماشي إنما تقول له أبواسماعيل كداب ولا بديع نصاب ينسى العيش والملح اللي بينكو ويسبلك بالدين , صديقي من هواة تشيير الأخبار من رصد وخلافه عن الإستثمارات المتدفقه من كل حدب وصوب إلى مصر في عهد فخامة المبجل الرئيس مرسي , وطبعا كل خبر مصحوب بجملة ( إنشرها واحرق دم جبهة الخراب , إنشرها بالعند في النمساوي....... وهكذا ) , والراجل واثق ومتأكد وحاطط إيده في المايه البارده , وماسك الأله الحاسبه 50 مليار من الصين ومعاهم 200 مليار من قطر على دشيليون من ألمانيا و 150 جنيه من السودان وهكذا , هتلعب معانا يا معلم وأقل واحد في مصر هيركب فيراري , المهم احنا نازلين سوا أجازه بعد شهرين , قلت له ماتيجي نشتري حتة أرض في العبور ونبقى في المستقبل نبني فيها , قالي ( إنت اتجننت , هو فيه حد بيشتري ولا بيبيع في مصر دلوأتي , البلد خربانه يا محمد ومفيهاش أمان , لو معاك قرشين حافظ عليهم بدل ما يطيرو منك ) !! ........هنا كده خلص الكلام !!.

.

محمد حسين 

النقطه الحرجه

صباح الخير , ماذا تريد الولايات المتحده الأمريكيه من الدول العربيه الكبرى تحديدا ( مصر , سوريا , العراق , السعوديه ) ؟
أمريكا هي الشيطان الأعظم الذي يدافع دائما عن مصالحه الإقتصاديه والسياسيه والإستراتجيه , ليس صحيحا أنها تحب فلان وتكره فلان , لا يوجد في السياسه حب ( وجوابات غراميه ) , ومن مصالح أمريكا الإستراتجيه حماية دولة إسرائيل , وباختصار شديد تأكدو انها لن تدعم أي تحول ديموقراطي أو حضاري في الدول العربيه الكبرى وفي نفس الوقت لن تسمح لهذه الدول بالوصول إلى نقطة ( اللا دوله ) , لأن الكارثتين الأكبر بالنسبه لإسرائيل أن تكون إحدى هذه الدول الأربعه دوله قويه متقدمه ديموقراطيه أو أن تصل إحداها إلى مرحلة العصابات والميليشيات , كلا الحالتين يتعارضان مع أمن دولة الصهاينه , لذلك أتوقع أن تدعم الولايات المتحده حكم الإخوان حتى نقطه معينه من الإنهيار ( النقطه الحرجه CRITICAL POINT ) , عندها سوف ترفع أمريكا يديها عن الإخوان وتدعم إنقلاب عسكري عليهم , وهكذا تستمر أمريكا في أداء دورها بنفس الطريقه مع كل نظام حكم عربي , وقدرنا أن نبقى هكذا في منتصف الطريق بين الدوله واللا دوله !!..

.

محمد حسين 

وانطق حروفك غير

أنا ليه بحب اكتبك
وانطق حروفك غير
وليه بحب اوصفك
مازهقت م التعبير
.
حالك يا ست البلد
نسّاني عنواني
مسجونه طالبه المدد
ولّا انتي سجناني ؟
مين اللي فينا اتظلم
مين اللي فينا أسير ؟
أنا ليه بحب اكتبك
وانطق حروفك غير ؟!
.
محمد حسين

المفاعل النووي

عن المفاعل النووي !
.
حاجتين مهمين جدا في حكم مصر لأي ديكتاتور , تقدر تقول ألف باء يعني , بيسجّدو الشعب ويعملو له تنويم طغطاطيسي , أولا كل ما تتزنق قول إكتشفنا أبار بترول ودهب وياقوت ومرجان ولقينا علي بابا كمان , وده معناه إن العز جاي وجايب معاه أسياخ الحديد , ثانيا كل ماتفقد هيبتك قول صنعنا صواريخ عابره للقارات وطيارات بتطير بدون طيار ولا أجنحه حتى وبنبني مفاعل نووي , هتلاقي المواطن البسيط من فرحته وإحساسه بالأمان نايم وسايب باب شقته مفتوح , هيخاف من إيه بقى ؟ داحنا عندنا مفاعل نووي يابه , إوعى وشك كده , من 6 سنين تقريبا حس مبارك إن شعبيته في الحضيض وزهق من حكاية أكتشاف الأبار وكانت علاقته وحشه بعلي بابا , فقال نلعب بالكارت التاني , وسائل الإعلام نشرت خبر إنشاء محطة الضبعه النوويه وخطه مباركيه لإمتلاك مصر للسلاح النووي اللي بننام ونقوم نحلم بيه , تكبير تكبير الله أكبر , السلام الوطني بيعزف في ودن كل مواطن , يومها جالي مواطن فرحان وطاير ووشه أحمر ومزنهر قالي هنمتلك قنابل نوويه , وكان ردي الساخر التلقائي جدا , أه هنمتلك قنابل نوويه من الحجم الكبير كمان , أد كداهو ( شاورت له بدراعي بإشاره قد تبدو للبعض أنها بذيئه ) !!.
بالمناسبه , بعد مرور 6 سنين من إنشاء محطة الضبعه النوويه , طلع أبو دومه والدفاس عشان يسرقوها واحنا قلوبنا وقفت لاحسن يكون فيه تسرب لإشعاع نووي ولا حاجه , الراجل أبو دومه بعدها حلف بأيمانات المسلمين وطلاق بالتلاته ما كان فيها غير شوية كراسي بلاستيك وطرابيزة شاي وطقم جيلي وكنبة أنتريه عشان لو حد من العلماء حب إنه يفرد رجله ولا حاجه !!
............ قلتها قبل كده وهكررها تاني , إحنا شعب لُقطه بالنسبه لأي حاكم , حتى لو كان الحاكم ده عنده نص عقل أو نص لبه , ......هذا الشعب يستحق بجداره هذا الحاكم !!.

.

محمد حسين 

مرفوع من الخدمه

عفوا يا وطني , هذا الشعب مرفوع مؤقتا من الخدمه , برجاء الإتصال في وقت لاحق , أو اترك رسالتك هنا بعد سماع صوت ( تفجير الكنيسه ) !!.

.

محمد حسين 

حكومة المعارضه

إحنا الدوله الوحيده في العالم اللي بيتم فيها انتقاد المعارضه.... أه والله ! , ويقولك مثلا هو حمدين والبرادعي عملو ايه للبلد ؟, ياريتهم ينزلو الشارع ويحلو مشاكل البلد بدل من معارضتهم عالفاضيه والمليانه ! , حاضر يا سيدي الخروف , هحقق لك حلمك :
هذا وقد وافق الدكتور محمد البرادعي رئيس المعارضه على قانون الحد الأدنى للأجور وأعطي تعليماته إلى السيد حمدين صباحي رئيس وزراء المعارضه بتنفيذ القانون , وفي السياق ذاته قام السيد عمرو حمزاوي وزير النقل في حكومة المعارضه بتفقد حركة سير القطارات والمزلقانات , بينما اجتمع مجلس الشورى بتاع المعارضه وطالب السيد محمد البرادعي رئيس المعارضه بمواصلة جهوده الحثيثه للكشف عن المتورطين في قتل الجنود في سيناء , ومن أخبارنا المحليه , قام السيد مصطفى النجار محافظ اسكندريه بتاع المعارضه بمتابعة حركة الإصلاحات في منطقة الكورنيش !!.

.

محمد حسين 

تبا لها

تباً لها
بلدي العظيمةُ
مثل أجنحةِ الطيورْ
بلدي الرخيصةُ
مثل أجنحةِ الطيور !!.
.
محمد حسين

جبهة الضمير

صباح الخير , الريس مرسي ( أنعم وأكرم ) , بيشيد بجبهة الضمير ( بتاعة عصام سلطان ! ) , وبيقول إنها بتمثل المعارضه الوطنيه ! , مع تلقيح بعض الكلمات عن جبهة الإنقاذ ( شغل نسوان يعني ) , في الحقيقه ياريس مرسي إنت بقيت عامل ذي الراجل العبيط الأقرع اللي شرّح راسه بالموس عشان متنفعش طبله ولا طار !! , وبعد الكلمتين دول تبقى مش بس فقدت شرعيتك دانت كمان فقدت عذريتك ! , وبعد زيارتك الأخيره لروسيا اللي عاملوك فيها على إنك عم عثمان الجنايني الجديد بتاع ( جنينة الكرملين ) تبقي كده فقدت كلْيتك اليمين , أه ماهو سيادتك من النوع اللي بيبيع أعضاؤه عشان يحسن دخل الجماعه أو يجمّل شكلها القبيح , باقي لك 4 زيارات خارجيه ياريس وخطبتين وتوصل لمستوى الراجل اللي كان في مسلسل الكبير أوي وتقول ( خدوني معاكو , أنا مش هكلفكو حاجه غير لقمتي وكوباية الشاي وباكو المعسل ) !!.

.

محمد حسين 

باسم عوده

سيدنا باسم عوده !.
.
البرادعي , الراجل الطيب ده مشكلته إنه مبيغيرش كلامه ولا بيحوّر في أي هاتش ذي طبيعة المصريين , ومن شهور طويله وهو بيقول شروط الجبهه لخوض الإنتخابات ومنها إقالة الحكومه بالكامل وتشكيل حكومه محايده مهمته الإشراف على العمليه الإنتخابيه , إنما الإخوان كعادتهم نشرو الخبر على إن البرادعي عايز يقيل باسم عوده , الحقو يا عيال البرادعي مش عاجبه باسم عوده ؟ شوفت الخبر قال ياسيدي البرادعي بينتقض باسم عوده !! , طيب أقولك إيه وانت فيك كل العبر ؟ , متخافشي يا خروف على سيدنا باسم عوده ( عليه السلام ) , ممكن يكون موجود في الحكومه الجديده لأن وزارته مش متداخله بصوره مباشره مع العمليه الإنتخابيه , إلا إذا المعارضه شافت ( وده من حقها ) إنه هيستغل شغله للترويج للحزب ( وده هيحصل أكيد ) , يعني مش بعيد نلاقي رغيف العيش مطبوع عليه شعار الحريه والعداله , أقولكش على حاجه عشان انت خنقتني انت وسيدنا باسم عوده بتاعك , إيه قولك بقى إننا ك ( محمد حسين ) مش هشارك في العمليه الإنتخابيه دي إلا بعد أقالة باسم عوده وحده , أرفض إقالة الحكومه وإقالة النائب العام وأطالب بإقالة سيدنا باسم عوده عليه السلام , يا راجل دانا حاسس إن باسم زفت ده لو فضل في الوزاره كمان شهرين هنعمل له مولد ومقام , واحتمال نعبده ذي العجل أبيس !!.

.

محمد حسين

فاروق جويده

رساله من الشاعر الكبير فاروق جويده إلى الأنسه أم أيمن !.
.
ولو أنَّ إبليسَ رأكِ.... لقبّلَ إيديه وش وضهر على النعمه اللي هو فيها !

بلدي وبنوته

وصحيت على نبضين
غنوه.... وحدوته
واحترت أقرا منين
كل اللي في النوته
أصلي بحب اتنين
بلدي........ وبنّوته !!.
.
محمد حسين

انجازات مرسي

وعلى كده بقى ممكن نقول ( أهم إنجاز في فترة حكم مرسي هو باسم عوده ! ) , بالظبط ذي مانقول إن أحلى حاجه في البت نها هي عيون سهام جارتهم !!.

.

محمد حسين 

المعامله بالمثل

مفيش أغلى من الكرامه , وياريس مرسي لازم معاملتنا مع روسيا الشيوعيه الملحده تبقى معامله بالمثل . وذي ما الروس ولاد الحرام بعتولك عمدة مدينه صغيره يقابلك في المطار إنت كمان لما يجي عمدة المدينه ده يزور مصر لازم إنت اللي تقابله في المطار وبكده نبقى خدنا حقنا وخالصين ومفيش حد أحسن من حد !!

.

محمد حسين 

خزاعه

أنا نويت والنيه لله إن ربنا لو رزقني بولد هسميه باسم عوده ولو بنت هسميها أم باسم عوده ( ذي أم أيمن كده ) , وانا عارف إن المحيط الهادي كان شقي جدا وهو صغير وربنا هداه على إيد باسم عوده , وابو الهول اتسخط كده لما شاف باسم عوده معدّي , اسرائيل مش هتقدر تضربنا بالنووي عشان باسم عوده موجود , ومشكلة الزباله اختفت والفضل يرجع لباسم عوده وأول واحد عبر المانش ولا اتبلّش هو باسم عوده وأول واحد طاف بالكعبه هو باسم عوده وأول شهيد في ثورة يناير هو باسم عوده , وأحرف لاعب في مصر باسم عوده وأفضل مطرب باسم عوده والسد العالي معليش إلا على إيد باسم عوده , واللي اخترع الكهرباء ومشابك الغسيل هو باسم عوده , خزاعه , خزاعه , خزاعه , خزاعه , خزاعه !!.

.

محمد حسين 

تاريخك يا مصر

تاريخك يا مصر !
.
قال بيقولك يا سيدي , بلدنا دي عمرها يجي 7 ألاف سنه ( يعني أكبر من صباح ) , يا نهار أبيض 7 ألاف سنه ؟ دي مسافات , طيب لو واحد عاشق لأم البلد دي وحابب إنه يعرف تاريخها كله يعمل ايه ؟ لو قلنا إن كل سنه في تاريخ مصر هتتكتب في صفحتين بس يبقى عندنا 14 ألف صفحه يعني 28 مجلد بالصلاة على النبي ( على فكره تاريخ قطر بيتكتب في نوتة التليفونات اللي بتدخل في المحفظه دي ) , عشان كده أمنية حياتي بقى إننا نلاقي 3 أو 4 رجاله من اللي هما بيبقو دودة قرايه دول , العيال المدحّ دي , يقرو التاريخ والليله دي ويختصروه لنا في 50 أو 60 ورقه بالكتير , أصل أنا سيادتك واحد من ضحايا مجانية التعليم , وبموت في الملخصات والبورشام والبلابيع , أه 50 ورقه كفايه أوي , يكتبو الحاجه المهمه بس , يعني فترة حكم كل رئيس أو ملك في سطر ولا اتنين , مثلا يكتبو , قنصوه الغوري حكم مصر من سنة كام لسنة كام وكان بشنب ولا لأ ؟ , حتشبثوت حكمت كام سنه وكانت بتسشور شعرها فين ؟ , ونابليون بونابرت لما دخل مصر دخل برجله اليمين ولا الشمال وكان أهلاوي ولا زملكاوي !!.

.

محمد حسين 

مذكرات فيفي عبده

صباح الخير , الدوله اللي فيها رقاصه ذي فيفي عبده بتكتب مذكراتها لازم يجيلها رئيس ذي مرسي ويكتب إنجازاته !
محمد علي مؤسس مصر الحديثه مكتبش إنجازاته وهو عايش ولا عبد الناصر الزعيم ولا السادات بطل الحرب , إنما السبب بسيط جدا , إيام محمد على وناصر والسادات مكانش فيه رقاصه اسمها فيفي عبده بتكتب مذكراتها !!.
بعد مرور سنه على مصر تحت حكم مرسي والإخوان أو بمعنى أصح تحت حكم الإخوان ومرسي أو بمعنى أصح جدا تحت حكم الإخوان , شهدت مصر ربما أسوأ سنه في حياتها , ربما أسوأ من سنوات النكسه والإستعمار والطاعون , إنهيار اقتصادي واجتماعي وديني كامل وانهيار أمني وانهيار لدوة القانون , فإذا كنت حضرتك واحد من هؤلاء الذي يعتقدون أن هذا الوضع المتردي هو انجازات يجب تدوينها وأن النهضه قادمه على يد الإخوان فأنت حتما واحد من الذين يعتقدون أن أعشاب عادل عبد العال ( اللي اكتشفها تحت السرير ) بتعالج الإيدز والسرطان وضعف الإنتصاب وفيروس سي والطحال والفشه والكلاوي, ونفس الأعشان بتحل أزمة المرور والزباله والبطاله والعنوسه وأزمة ساره , كل ده طبعا بالتعاون مع الوزير اللي مجبتهوش ولاده باسم عوده !!.

.

محمد حسين

هنومه

بقت ممله أوي حكاية مرسي بيصلي الفجر وعارف ربنا وراجل مبروك , ماحنا عندنا في مصر أي حد مختل عقليا وبيمشي ( يريّل ) في الشارع بنقول عليه راجل مبروك وبتاع ربنا , أحمد بدير في المسلسل زمان لما كان بيقول ( الله حي ... هرّاس جاي ) كنا بنقول عليه راجل مبروك , ويوسف شاهين في باب الحديد ( قناوي ) , كانو بيقولو عليه راجل مبروك , صحيح إحنا شعب طيب أوي ( وعاتفي ) , ومتدين بطبعه ! , إنما بقى الراجل المختل عقليا المبروك ده ممكن نكرمه يعني بإننا نشتري له ( جزمه ) أو نجوزه ( هنومه ) مش أكتر من كده !!.

.

محمد حسين

ال إف 16

معلومات سهلة الهضم عن طائرات ال (f 16) ....... وكتاكيت الحدايه !!
.
لما تسمع خبر إن أمريكا هتبعت لمصر صفقة طائرات إف 16 وحضرتك عارف مسبقا إن الحدايه مش بترمي كتاكيت يبقى لازم تتأكد من الكلام ده :
.
أولا : أمريكا بتديك المعونه العسكريه بالعافيه والدراع عشان تجبرك متشتريش من مكان تاني , وبالتالي خريطة تسليحك بالكامل تكون عندها وعند الكتكوته الصغيره اسرائيل .
.
ثانيا : يوم ما أمريكا تبعت لك إف 16 فتأكد تماما إنها بعتت للكتكوته إف 36 !! , ومنظومة الصواريخ القادره على اسقاط ال إف 16 وهي مغمضه عنيها , وبيان بشرح عيوب ال إف 16 ( الشحنه المصريه تحديدا ) !!.
.
ثالثا : كل الطائرات العسكريه الأمريكيه مبرمجه بببرامج كمبيوتر أمريكيه , وسهل جدا التحكم فيها من المصدر , يعني سيادتك يوم ما تعلن الحرب على الكتكوته ( وده مش هيحصل تحت حكم الإخوان ) , ساعتها أصغر عيل شغال عند ( بيل جيتس ) ولا حتى عم مغاوري اللي بيعمل له الشاي هيدخل على أوسخ كمبيوتر في الشركه عندهم ويضربلك برنامج التشغيل بتاع طياراتك , واحتمال عم مغاوري يكرمك شويه ويخلي طياراتك تطير في الإتجاه العكسي وتلاقي نفسك بتضرب في الخرطوم !!.
.
رابعا : لما أمريكا تبعت لك إف 16 يبقى تأكد إن خلال شهور الطيارات دي هتتكهن عندهم وهيحولوها لعربيات بطاطا لإسعاد الحبيبه على كورنيش المسيسيبي !!.
.
محمد حسين

السكر والندم

بعد ما شاركو الإخوان في خراب مصر وجابو ضلافها , الدعوه السلفيه تعلن ندمها على دعم الإخوان للوصول للسلطه وتقول ( لو عاد بنا الزمن للوراء لساندنا أحمد شفيق !! ) , والحقيقه بقى أنا كل ماشوف شيخ من بتوع الدعوه السلفيه دول أفتكر الممثل الكويتي في فيلم كباريه وهو بيقول لبنت سمير غانم ( تدرين ليش أنا أجي مصر ؟ أجي مصر عشان أخون زوجتي , وبعدها أفضل أسكر وأندم , وبعدين أخونها تاني وأسكر وأندم !) , فمتقلقوش يا شباب , الدعوه السلفيه دلوأتي في مرحلة السُكر والندم الأولى !!.

.

محمد حسين

خراشوف

صباح الخير , على الريق كده ومن غير مقدمات , حبايبنا الإخوان اللي بيمشو عالحيط كاتبين إن أمريكا ركعت يا ولاد , أمريكا ركعت يا رجاله قدام جبروت مرسي , أه والنعمه ذي ما بقولك كده , بعد بقى ما مرسي عمل صفقات أسلحه ويورانيوم مع روسيا في ال 10 دقايق اللي بوتين قابله فيهم , خليني كده أتخيل الحوار كان إزاي بين بوتين ومرسي , ( حوار ال 10 دقايق ومعاملة البوابين !! )
بوتين : دخلو مرسي عشان نخلص من أمه قبل الشوط التاني ما يبدأ , أنا مش ناقص عكننه
مرسي : السلام عليكم سيد بوتين
بوتين : عليكم السلام مرسي , إقعد هنا قدامي عالسجاده
مرسي : أنا مش جاي أقعد , أنا مش فاضي , أنا حامي , أنا دينامو
بوتين : يعني عايز إيه بخلقة أهلك العفشه دي ؟
مرسي : الله يسامحك , بس إخلص بقى ووقعلي على الكام ورقه دول
بوتين : ورق إيه ده , إستنى أقراه
مرسي : إنت هتقرا ورايا يا بوتين ؟ دي تبقى هذلت , إنت مفكر نفسك سماحة المرشد , دانت حيالله رئيس روسيا !!
بوتين : يا متخلف لازم أقرا أي حاجه قبل ما وقع عليها
مرسي : خلاص أنا هقولك ورق ايه عشان نختصر الوقت , دي ورقه للتنقيب عن اليورانيوم , وورقه تانيه لإنشاء محطه نوويه , وورقه تالته تسلفونا 19 قنبله ذريه لحد ما ربنا يفرجها والمحطه تنتج وتطلع قماش , وورقه خمسه بقرض كام مليار (جزيه مستحقه عليكو ) , وورقه سادسه بشوية أسلحه وصواريخ بالستيه على كام دبابه , والورق الأخيره دي تحذير إنك لو مبطلتش تدعم النظام السوري هنيجي نخرب بيت اللي خلفوكو وأنصارنا هيهدو روسيا على دماغ اللي فيها , إمضي يالله واخلص مش فاضيلك
.
بوتين : بس كده حبيبي ؟ إنت تؤمر يابو الأمراس , دانا عنيه ليك
يا حراس ...يا حارس...يا خراشوف , تعالى شيل الحيوان ده ارميه بره عشان الشوط التاني هيبتدي !!.

.

محمد حسين 

شعب ذكوري أبوي متدين

يعني إيه شعب ذكوري أبوي ( متدين ) بطبعه ؟!!.......... تعالى وانا أقولك !! :
.
يعني أرجع البيت ألاقي بنتي ( 6 سنين ) بتقولي غمّض عينيك يا بابا عشان عاملالك مفاجأه , وبعدين تقولي فتّح بقى , أشوف المفاجأه ألاقيها ورقه صغيره متطبقه ومكتوب فيها i love you my dad , i love my friends , i have so many friends , قوم أنا بقى ولأسباب غير معلومه مخدتش بالي إن بنتي بتقولي بحبك يا بابا وبحب أصحابي وخدت بالي من حاجتين تانيين خالص , أولا راجعت الحروف حرف حرف وال Spelling لا تكون غلطانه ولا حاجه , مع إنه عادي جدا والله إنها تكون غلطانه , ثانيا شدتني جملة so many friend !! يا نهار مش باين له ملامح , سو ميني فريندز , مين دول يا بت ؟ ولاد ولا بنات ؟ إنطقي بقولك !!.

.

محمد حسين

هقولك ايه ؟

هقولك إيه وانا شايفك
قمر مسجون ؟
وحتى الورد في شفايفك
مغيّر لون
هغني لك
والاقي الناس بتسمعني
وإيه يعني ؟
ما دام صوتي
ماهوش واصل لسجّانك
وهبكي في الغُنا أوقات
ساعات وساعات
ياريت دمعي
يدواي شوية أحزانك !!
.
.
محمد حسين

كوريا

من إسبوعين تلاته رئيس كوريا الشماليه هدد بضرب أمريكا ( الشيطان الأعظم ), وبعدين محصلش , طلع مبيعرفش , المشكله اللي حصلت ايه بقى ؟ إن الصواريخ الكوريه متبرمجه على نسخة ويندوز 98 , والنسخه دي سقطّت من كيم من كتر مابيلعب solitaire , فقام بعت لمقر الشركه في أمريكا وقال لهم ابعتو لنا حد يصلح المخروب ده عشان نلحق نضربكو قبل ما ننسى , ردت عليه الشركه وقالت له الويندوز 98 متكهن عندنا من 8 سنين وأخر واحد بيفهم فيه مات من إسبوعين عن عمر يناهز 106 سنه , لو تحب ياريس ( كيم) نعمل لك نسخه ويندوز جديده للصواريخ معندناش مانع ولو عايز نبعتلك معاها الصواريخ وتبقى جاهزه بالضمان مفيش مشكله , حسابك هيبقى 56734562 دولار أمريكي !!.

.

محمد حسين