مفيش حاجة تستاهل

وايه فيكى يامصر يستاهل.؟؟
غير أرضك وغير نيلك
غير شعبك ومواويلك
غير صبحك وغير ليلك
غير دولا مانيش سائل
مفيش حاجة تستاهل

غير طيبتك وغير صبرك
غير طينك وغير أرضك
فى حبك مانيش عاقل
مفيش حاجة تستاهل

فى نور صبحك انا اتوضى
وب عشقك انا اتحدى
اى عبيط أو جاهل
مفيش حاجة تستاهل

ولو باعوا انا شاريكى
ولو سابوا انا ليكى
انا عنك ماهتشاغل
حبك بس اللى يستاهل
___________________
محمد عبد العزيـــــــــــز

هيبة ولا خيبة

أحدث التبريرات الاخوانية فيما يتعلق بموضوع الحظر:-
بيقولك ياسيدى ان مرسى عمل موضوع الحظر ده عشان قاصد ان الناس تنزل الشارع تهيص وتزيط، فيقلب حالة الحزن اللى عاشتها مدن القناة الى حالة من الفرح والابتهاج،رئيسكم داهية...افلاتكبرون.
الشئ المؤكد أن مرسى ليس بهذا الذكاء،وحتى لو كان قراره يهدف لهذا، فقد نسى هو ومن يبررون، أن قراراتة،قد أسقطت هيبته ليس أمام شعب القناة فقط، ولكن أمام الشعب المصرى،وغالبا سيرجع فى قرار الحظر قريباً،مثلما رجع فى عشرات القرارات قبل ذلك، فتهتز مكانته امام شعبه..وقديما قيل:-اذا اراد الله ان يسقط حاكم اسقط هيبته من القلوب اولا.

محمد عبد العزيز

مش لايق عليه

دايما تحس أن مرسى مش لايق عليه الكلام اللى بيقوله، او التصريحات اللى بيصرح بيها،عامل بالظبط زى الشاب اللى قاعد ع الفيس بوك،وبينقل بوستات ناس تانية كاتبينها، وف آخر كل بوست تلاقيه كاتب:- ملطوشة ، أو مسروقة، أو منقولة من الصديق الرائع "بديع" أو مشاركة من عضو الصفحة الدائم :"خيرت الشاطر"، أو copied from>>> :- الامير حمد بن خليفة، والصديق الوفى باراك حسين اوباما.

 

محمد عبد العزيز

حظر تجول....قصة قصيرة.........محمد عبد العزيز

حظر تجول....قصة قصيرة
__________________________
يحكى أن فيلاً ضخماً كان يعشق النوم بشكل مفرط،وبينما هو مستغرق فى نومه،تسللت أعدادٌ عفيرة من النمل الى زلومته،وانتشرت فى كل أرجاءها،واحتلت كل شبر بها، وهو ما أزعج الفيل، وجعله يستيقظ بشكل مفاجئ،بعدما انتشر دبيب النمل فقضّ عليه مضجعه.
كان عدد النمل يتزايد لحظة تلو أخرى،وكأنهم كانوا يستدعون بعضهم لينعموا بالسكن الجديد والدفء المفقود بعدما قرصهم البرد الطاغى وأبرز لهم أنيابه المخيفه.
وعلى عكس ماتوقع الفيل، فانه كلما هز زلومته بعنف محاولاً طرد النمل منها،كان النمل يُطرب لهذا الفعل، بل واعتبروه مبعثاً للدفء والحميمية.
فلما يأس الفيل من طرد النمل،التجأ الى الثعلب طالباً استشارته،فأشار عليه أن ينفخ الهواء بقوة من زلومته،ففعلها الفيل، لكن النمل استمسك بثنايا الزلومة،واستطاع ان ينجو من زفير الفيل،فأشار عليه الثعلب أن يغمر زلومته بالماء حتى يغرق النمل،فتوجه الفيل الى اقرب بحيرة وغطس خرطومه فى الماء،فلقى العديد من النمل حتفه،لكن الغالبية العظمى،استطاعت الاختباء فى تجاويف لم يصل اليها الماء قط.
فلما فشلت تلك الحيلة،طلب منه الثعلب أن يفرض على النمل حظرا للتجول داخل الزلومة،فألقى عليهم الفيل بيانا حماسياً،يأمرهم بالتزام السكون والصمت وعدم التجوال داخل زلومته،لكن النمل استقبل أمره بالسخرية والاستهزاء،واستمر يسلك الدروب داخل الزلومة،غير عابئ بتحذيرات الفيل المتعطرسة.
ولما باءت كل حيل الثعلب بالفشل، اقترح عليه اقتراحا أخيرا:-أن يبتر زلومته فورا، فيتخلص من ضجيج النمل ، وينعم مرة أخرى بنوم هانئ ودافئ.
فاستجاب له الفيل، وسلم له زلومته طوعاً،فانقض عليها الثعلب وقضمها، فبدأ الفيل يذرف دماً غزيراً،وبلغ به الاعياء مبلغه، فتهاوى جسده الضخم مفترشاً الأرض، وبينما يلفظ أنفاسه الأخيرة مر به جمل نظر اليه فى شفقة ، وقال له بصوت متهدج:- أخطأت ياصديقى الفيل،وعجزت أن تتعايش مع الآخرين، وأغفلت حقيقة تنظم هذا الكون منذ بدء الخليقة:-أن جسدك ليس ملكك وحدك.
_____________________
بقلم:- محمد عبد العزيز
29-1-2013

كتاب جديد

قررت تأليف كتاب
(الورد المقطوف فى تحريم الجدال مع خروف).

محمد عبد العزيز

هذا هو الفارق ياسادة

هذا هو الفارق ياسادة

الفرق بيننا وبينهم هو اننا نشعر بقلب الامهات الثكالى وهو يحترق علي ابنائهن وندمع علي شهدائنا دما ،ونريد القصاص لهم وهم يباركون قتل آباء وامهات الشهداء في جنائزهم.
.الفرق بيننا وبينهم هو اننا نريد ان نعيش في وطن يتسع للجميع وهم يريدون مصر لاهلهم وعشيرتهم وفقط .
.الفرق بيننا وبينهم هو اننا احببنا ثورتنا التي دعينا لها ونريد ان نموت في سبيل نجاحها وهم يريدون الاستمرار في ركوب ثورة عارضوها منذ البداية ويقاتلون من اجل خطفها .
-الفرق أن مبادئنا ظلت ثابتة، لكنهم تغيروا وتلونوا بفعل كراسيهم الجديدة ، فصارت الشرطة ملائكة، وصار قانون الطوارئ لابد منه،وصار الربا حلالا والحفلات الماجنة تنشيط للسياحة.

هذا هو الفارق .


محمد عبد العزيز

حكم الهواة

مش كفاية انك تعين مستشار قانونى،او مستشار للشئون الخارجية، او مستشار للشئون الاقتصادية، لازم كمان تعين مستشار اجتماعى ومستشار نفسى ومستشار تاريخى.
-لو كان لمرسى مستشار اجتماعى لأخبره ان علم الاجتماع يؤكد أن مجتمع القناة مجتمع أبّى دمه حار وعِندى، ولايتقبل فرض الرأى بالقوة.
-لو كان لمرسى مستشار نفسى لأكد له أن أهل القناة يتميزون بعزة النفس، ولاينكسرون بسهولة، بل لديهم قدرة فائقة على استعادة شتات أنفسهم بصورة سريعة.
-لو كان لمرسى مستشار تاريخى، لأخبره كيف صمد الشعب البورسغيدى والسويسى والاسماعيلاوى..على مر تاريخة أمام الغزاة والمحتلين، صمدوا بصدورهم العارية،أمام أرتال الدبابات، والطائرات...فلن يهزهم فرض لطوارئ أو حظر...
لكن دولتنا تدار بواسطة مجموعة من الهواة....وانت اذا اوسدت الامر لغير أهله ، فتوقع الانهيار.

محمد عبد العزيز

السينما والاخوان

فى السينما ، يظهر الممثل القائم بدور الشرير ، بشكل يدعو للإعجاب لدرجة أن المشاهد للفيلم يعجب به لآدائه ولفهلوته ولذكائة ومكره، وأحيانا يصل الأمر الى ان يتماهى المشاهد مع الشرير، فيتقمص دوره.
هكذا أحسست عندما سمعت خطاب مرسى، نفس المفردات ونفس الأسلوب وحتى نفس لغة الجسد واستخدام الأصبع، حتى اننى اكاد اجزم أن الاخوان كانوا يشاهدون مبارك ، ويفتحون أفواههم فى اعجاب ويتمنون لو اتيحت لهم الفرصة للقيام بنفس دوره.حتى أننى لا استبعد ان مرسى استعان ب عبد الله كمال ليكتب له خطاب اليوم.

 

محمد عبد العزيز

فضيحة دوللى شاهين والاخوان

بعد فضيحة دوللى شاهين والاخوان...انتظرو التبريرات الأتي ذكرها
-الحزب لم يكن لديه علم بان دوللى شاهين ستحيى الحفل، لقد كان برنامج الحفل مقتصراً على فرق الانشاد بقيادة عرعور الطابلسى، ولكن متعهد الحفل خدعنا، وفرض علينا دوللى فرضاً.
-شعار الحزب فى الصورة المعروضة فوتوشوب واى مبتدئ هيفقس انه مضروب
-دوللى شاهين اصلا فوتوشوب...شاهد حجم الصدر يا أخى الكريم...هذا ليس حجما طبيعيا بالمرة.
-وبعدين فرضاُ ياأخى الكريم صحة الخبر...هو احنا لما نيجى ننشط السياحة تنتقدونا، ولما نقول عليها حرام تقولوا علينا متطرفين...ألا تستقيمون
______________________
طب والله أنا أنفع اكون فى حزب الحرية والعدالة"قسم التبرير"...بس للأسف أبويا قاللى اوعى تعيش خروف.

محمد عبد العزيز

السامرى كان اخوان على فكرة

لم أعد استغرب الدفاع المستميت الذى يقوم به أرامل مبارك، وممن يسمون أنفسهم "احنا آسفين ياريس"،على الرغم من المرار الطافح الذى أذاقه المخلوع لمصر على مدار 30 سنة، فقد وجد الرجل مريدين يدافعون عنه وعن جرائمه.
-لم أعد أستعجب عندما وجدت دراويشاً لمرسى، يبررون له كل أخطائه ويسبحون بحمده آناء الليل وأطراف النهار،ويخلون مسئوليته من أى كارثة تقع بالبلاد.
ولماذا أستعجب، وأنا أقرأ قصة السامرى الذى فهم عقلية أتباع موسى،وصنع لهم مايريدون، عجلا ذهبيا ذا خوار، سبحوا بحمده وقدسوه، السامرى نجح فى اللعب على مشاعرهم، واستطاع أن يقرأ نفسيتهم.ولا أستبعد أن يكون السامرى من الرعيل الأول للاخوان...او أنه لم يكن اخوانا بس بيحترمهم على فكرة.

محمد عبد العزيز

غراب البين

عااجل:-
الشعب الاثيوبى يرسل برقية شكر للشعب المصرى لأنه تسبب فى إلغاء سفر مرسى لاثيوبيا،ونجاتها من كوارث طبيعية كانت قد تحدث لو وطأت قدماه النحستان أرض الحبشة.

محمد عبد العزيز

خطوات ماقبل القتل

فى كلية الشرطة، وتبعاٌ لمواثيق حقوق الانسان، هناك 14 خطوة لابد ان يتخذها الجندى قبل اقدامه على استخدام مسدسه
التحذير ،الانذار ،شل الحركة، العصى،الماء ،طلقات الصوت ،الغاز المسيل للدموع،الغاز الحارق،-الرش الخفيف،الرش الثقيل،الرصاص بالهواء،الرصاص في الأرض،الرصاص في الاقدام،الاشتباك بالرصاص،دفاع عن النفس ضد الرصاص.
لذلك فالشرطة قاتلة بتعمد، ومرسى "القائد الأعلى للشرطة" قاتل بامتياز، لأنه سلحهم بأحدث الاسلحة لكى يحموا كرسى جماعته.
وأى بنى آدم هيقولك الشرطة دى تركة مبارك، وذنب مرسى ايه،؟ اديله الصرمة المتينة ، والبلوك المعتبر، لأن لايشرفك ان تتحاور مع معدومى الدم.

محمد عبد العزيز

مكملين

حكم بالاعدام قد يرضى ويشفى غليل أمهات 74 شابا من أطهر الشباب،لكن أمهات أخريات مازالت صدورهن تتقد نارا،أمهات شهدائنا فى الثورة،امهات شهداء محمد محمود،امهات شهداء مجلس الوزراء ،امهات شهداء السويس امبارح،ام جيكا،ولاد عماد عفت ومراته
ام مينا دانيال، شباب الحدود،شباب قطر الصعيد،امهات اطفال المدرسه تحت القطر .شكرا للألتراس، عرفتونا ازاى نجيب حقنا، عرفتونا ازاى نضغط بكل الوسائل ، دوركم لسة مستمر، لأنى عارف أن قضية بورسعيد حجر أساس فى القصاص لكل شهداءنا..مش هنسكت .ومكملين معاكم وبيكم.

محمد عبد العزيز

من هم البلطجية

لو أنت شايف الثوار بلطجية، وبيدمروا البلد:-
- فالحكومة اللى بتتصالح مع الفاسدين المجرمين بلطجية بردو...وبتدمر البلد
- والحكومة اللى تطعن في أحكام تعيد آلاف العمال المشردين إلى أعمالهم بلطجية برضو...وبتدمر البلد
-وال حكومة اللى تطعن في حكم منجم السكري اللي يدخل لمصر أكتر من قناة السويس بلطجية وبتدمر البلد.
- حكومة - تغرق الجنيه وتغرقنا بالديون الخارجية وتخصم من مرتبات المواطنين "بدلاً من زيادتها" وتعد علينا البنزين و العيش الحاف ...بلطجية وبتدمر البلد
- حكومة تتصالح بالخسارة مع رموز نظام مبارك الفاسدين وتعطيهم البراءة وتلاحق معارضي سياساتها ...بلطجية وبتدمر البلد ...

محمد عبد العزيز

وهم السلمية

لسه فيه ناس متخيلة أن ثورة 25 يناير الأولى المجيدة،كانت مضرب المثل فى السلمية، وانها كانت منقوعة فى بحر اللبن والعسل، ولم يشبها شائبة،لكنه بالتأكيد لم يرنا ونحن نشتم مبارك ونقول له:-ارحل ارحل يابن الجزمة، ولم يرنا ونحن ندافع عن انفسنا ونلقى الطوب أمام طلقات الخرطوش ، ولم ير مقرات الحزب الوطنى تحترق بايدينا فى كل انحاء الجمهورية، ولم ير مقرات امن الدولة تقتحم وتكسر،فان كنت تعتقد ان هذه الافعال كانت سلمية، فلاتلم من يقومون بها الآن، وان كنت تنفى قيام هذه الافعال اصلا ومازلت مصراً أن الثورة كانت سلمية،فأنت بالتأكيد من أصحاب المؤخرات الغليظة الذين لم يشاركون يوما فى الثورة، ولم تبرح مؤخرتك كنبتك الوثيرة، مشاهداً للثورة الافلاطونية فى خيالك.....خيالك فقط.


محمد عبد العزيز

زعلان؟؟؟

زعلان انى مسكت طوبة حدفتها.؟؟؟
امال فرحان ليه بروح اهلك وبتهلل للجيش الحر اللى ماسك سلاح بجد؟؟؟وماتقولش الوضع مختلف، فلأن تهدم الكعبة حجراً حجراً أهون على لله من أن يراق دم امرئ مسلم.
والدم اللى سال امبارح ده مش دم حرام برضو، ولا عشان هو مرسى اللى من عهد الصحاابة؟
امال فرحت ليه لما ليبيا مسكت سلاح وقتلت القذافى، وماقلتش عليهم بلطجية.
امال فرحت ليه لما كلاب الاخوان راحوا يضربوا المعتصمين عند الاتحادية، ومقلتش عليهم مأجورين؟
لسه زعلان ؟؟؟؟....اتفلق

محمد عبد العزيز

حرامى الحلة.....قصة قصيرة---محمد عبد العزيز

حرامى الحلة.....قصة قصيرة
_________________________
ضجّ النمل الصغير بتصرفات ملكته المستبدة،التى ضاعفت لهم أشغالهم،وألقت على عواتقهم مالايتحملونه،وامتلأت الغرفة الخاصة بعلاج النمل ،بمئات من نمل مصاب،هذه قُطعت ساقها والأخرى بُتر نصفها السفلى،ولم يملك النمل المعالج سوى أن يلصق الأجزاء المبتورة بلعابه الصمغى،بينما امتلأ مخزن الأغذية بطعام قد أحضره النمل المسكين طوال فصل الصيف،امتلأ المخزن بفتات قابل للتخزين من بقايا الحبوب كالقمح والفول وبقايا الخيز،وبقايا أجنحة الحشرات الميتة.
استأثرت الملكة وحاشيتها المقربة،بأجود الاطعمة المخزنة، تاركة الفتات للنمل الصغير،الذى استبد به الغضب،وكان من المألوف أن ترى نملتين وقد تلاقت رأسهما يبدوان للعيان وكأنهما يتبادلان الطعام، الا انهما كانا يبثان شحنات لاتنتهى من حنق وحزن وغضب،وتعالت أحاديث النمل الجانبية، حتى كان اليوم المشهود الذى تجمع فيه آلاف منهم امام حجرة الملكة الأم.
كان مشهداً مهيباً ألقى الرعب فى نفس الملكة، التى حاولت أن تقنعهم بالعودة إلى مخابئهم ،مع وعد منها بالنظر فى طلباتهم.
لكن السيل قد بلغ الزبى، وبلغ قلبٌ الملكة حنجرتَها،ثم زاد عدد النمل المحتشد بعد انضمام النمل( حرامى الحلة)، والذى اعتبرتهم الملكة طوق النجاة الوحيد لها.
اجتمعت الملكة بالنمل حرامى الحلة،ابرمت معهم اتفاقا بأن يضمنوا لها رحيلاً يليق بها وبمكانتها ، فى مقابل أن يجلسوا هم فوق العرش..
وحدث الاتفاق بحذافيره، وانطلق النمل الصغير فى أرجاء المملكة مزهواً بانتصاره على الاستبداد والظلم
___________________________
لكنّ الملك الجديد وحاشيته الجديدة، ركنوا الى الكسل، تضخمت بطونهم نتيجة لافراطهم فى الاكل، فنقصت المخازن بشكل مضطرد،وباتت المملكة على حافة مجاعة مهلكة.
سقطت الأمطار بغزارة، فوق عش النمل،لم يكن الحاكم(حرامى الحلة)، قد استعد لفصل الشتاء،ولم يجهز المؤن اللازمة لحماية المملكة من خطر الامطار ،فبدأت المياه المنهمرة تتسرب داخل مملكة النمل، تملا الشقوق وتكتسح كل مايقابلها.
وبينما يملأ الذعر جنبات المملكة، انضم النمل الصغير الى بعضه، وشكلوا ما اشبه بالسلسلة،وانتقلت مجموعة منهم ، الى غرفة العلاج لتحمل فوق ظهورها، النمل المصاب،
، ثم انضموا بعد ذلك لسرب النمل الطويل الذى يكافح من أجل البقاء،كانت المياة قد أوشكت على اغراق المملكة،حينما لاح لسرب النمل، طاقةٌ من النور تنبعث من الجدار المقابل، لكن منسوب الماء واصل ارتفاعه بشكل جنونى،وأصبح الامل فى النجاة أمراً اشبه بالمستحيل.
___________________________
لكن المعجزة حدثت...
كان النمل (حرامى الحلة) عاجزاً عن اللحاق بسرب النمل الصغير، نتيجة لتضخم أحجامهم وبطء حركتهم،فغمرتهم المياة ، وتحولوا الى جثث طافية ، جرفتها المياة الى حيث يكافح النمل الصغير، فامتطوا ظهور الجثث الطافية، وصنعوا منها جسرا نحو الطاقة التى ينبعث منها النور فى الجدار المقابل..
وتشبث قائد السرب بعشب اخضر يتدلى من الجدار المقابل، ساحبا باقى السرب ، الذى توالى اندفاعه، ليسكنوا الجحر الجديد...
التقط النمل انفاسه ، وبدأ ينتشر فى ربوع مملكته الجديدة، التى تنسم بها هواء لم يتحسسه من قبل...تنسم "هواء الحريـــــــــــــــــــــــة"
__________________________
محمد عبد العزيز
24-1-2013

نفس الحروف-محمد عبد العزيـــــــــــز

نفس الحروف
بس ف كلمتين
"الألم" و "الأمل"
نصيب العاشقين

بدّلْ حرف
وعيش المعنى
قول لليأس
خلاص.. ودعنا
والألم مسيره هيغور
و الأمل
لابد يساعنا
____________
محمد عبد العزيـــــــــــز

أترى؟؟ محمد عبد العزيز

أترى؟؟
لوقتلت ابنك، واعتذرت لك فى تويتة،
 هل ترى..؟؟
أهو عملها مرسى ابن المرة
الاحساس نعمة...لاتُشترى.
___________
محمد عبد العزيز 

فكرة وذكرى وحلم..........محمد عبد العزيز

انت لست وجه وجسد وأطراف فقط.
أنت فكرة وذكرى وحلم.
-أنت فكرة، تبقى طويلاً فى أذهان الناس، حتى لو غاب جسدك،فاحرص على خلود فكرتك،لتنتقل عبر الزمن ، لتسرى فى عقولهم، لتظل هى مبعوثا لك طوال الوقت.
-أنت ذكرى، تداعب خيال من أحبك وتقضُّ مضجع من كرهك،أنت من تستدعيك أذهانهم، حتى ولو لم تكن موجوداً،فكن طيفا رائقاً، يعبر خيال البشر،يحتل ثنيات عقولهم،فيُكتَب لك الخلود.
-أنت حُلم ، يعبر أبعاد الزمن، ويلاقى مخيلات من تزورهم أثناء نومهم،فبإمكانك أن تكون لهم بمثابة حلم سعيد يبعث الأمل فى أوصالهم،أو كابوس مريع يبث فى نفوسهم الرعب والجزع.
-أنت موجود فى كل وقت وفى كل مكان، روحك تحتل جنبات العالم الفسيح، قدر نفسك وروحك،واجعلهما يحملان رسالتك وكلمتك.....حتى ولو لم تكن حاضراً.
____________________
محمد عبد العزيز

فلتر الثورة

-"فلتر الثورة"، هو أهم مكاسبها، هو الذى فصل الغثّ عن الثمين، هو الذى فضح وكشف وعرّى،كل متاجرى الوطنية والدين والشرف، مازال الفلتر يطرد كل انتهازى ومنتفع وكاذب، ويكشف عن وجهه القبيح أمام الناس.
-فى الكيمياء، وحتى تفصل خليطا(غير متجانس)...مثل الرمل والملح،فينبغى ان تضعهما سويا بالماء(الثورة)، يذوب الملح(الثوار) فى الماء، ويتبقى الرمل( الاخوان والانتهازيون)...عالقا ، ويمكنك بسهولة فصل الرمل عن طريق فلتر الترشيح، والملح الذى ظن الناس انه اختفى وسط الماء ،يعود مجددا عند تبخير الماء...
-ولذلك، فالألتراس هم ضمير الثورة الحى، وهم من ذابوا عشقا فى ثورتهم،يظنهم الناس قد اختفوا عن المشهد، ولكنهم دوما باقون،ثائرون،مدافعون عن قضيتهم، ينئون بانفسهم عن اى مصالح حزبية، او مطامع سياسية، يطلبون القصاص العادل،لذلك هم أصدق فصيل فى مصر..
-عاش الاولتراس، وعاش "فلتر الثورة".
______________________
محمد عبد العزيز

شجرة السعاده........محمد عبد العزيز

تُولد أنت صغيراً،وتولد معك السعادة كشجرةٍ كبيرةٍ وارفة الظلال ،تمتد أوراقها فى جنبات حياتك الصغيرة آنذاك،وتلامس أغصانها أوتارَ قلبك الصغير، فتسرى فى عروقك الفرحة النقية التى لم تدنسها أحداثُ الزمن.
تستقل قطارَ العمر،تهتز بك عرباته المتهالكة،وكلما استقر فى أحد محطاته المتتالية، كلما وقعت ورقة من شجرة السعادة التى تحيط بك،ويتوغل القطار أكثر فأكثر ، يعبر أنفاقاٌ مظلمة، فتستحيل الأوراق الخضراء الى أوراق صفراء يابسة، تتهاوى أمام رياح عادية، ويَسرى الوهن ُوالعجزُ فى جذورِ شجرتك، وتفقد ساقها القدرة على الشموخ .
تصل أنت لنهاية رحلتك، وبينما تعبر ساقيك بابَ القطار، تسقط آخر أوراق الشجرة..
تنتهيان معا فى نفس الوقت..... الفارق أنك ولدت صغيرا، وهى بدأت معك الحياةَ كبيرة.
________________________
محمد عبد العزيز

من عيوني

كلموني تاني عنِك 
فكروني
قالو إنك طالبه روحي
قلت 
حاضر من عيوني
قالو دمك محتاجينه
قلت حاضر تؤمروني
قالو مش خايف ياخال ؟
هي فرصه ومش  بإيدنا
مش أكيد تكبر بلدنا
قلت يكفينا احتمال !.
.
محمد حسين

شاطر

لا يجوز أن ينفرد رئيس بحكم مصر بدون وجود محرم.................... لأن الشيطان ( شاطر ) !!.

.

محمد حسين

ايه هو المشروع ؟

ايه هو المشروع وايه هي الحكايه ؟
.
صورة الولد الصيني اللي بنحطها وهو بيضحك في ألشاتنا وإيفيهاتنا عملو لها دقن في صفحاتهم لكن معندهمش إيفيهات ولا ألشات , المهم إنهم عملو له دقن !.
.
صفحة خالد سعيد , عملو منها نسخه إسلاميه ( نسخه بدقن يعني ) ومعرفش هيحطو صوره لخالد سعيد وهو بدقن ولا ل خالد ( عبد الله ) على أساس إنه الشهيد الحي !.
.
عايزين نبطل نشرب كوكاكولا ونعمل حاجه ذيها إسمها مكه كولا , أو طنطا كولا !., هناخد نفس الماده بتاعة كوكاكولا ونغير الإسم بس !.
.
عروسة المولد هنسيبها ونغطي شعرها وعريس المولد هنعمل له دقن ونسميه عريس المولد الإسلامي !.
.
محرك البحث جوجل هنسميه ( الحاج جوجل ) عشان يبقى حلال وابن حلال مصفي ذيهم بالظبط !.
.
في الحقيقه وباختصار , التيارات الدينيه الحاكمه في مصر هي تيارات مفلسه دينيا وثقافيا وسياسيا , وعندما تفلس ابحث عن المظهر والشكل الخارجي , لبّس أي حاجه تقابلها دقن لو كانت دكر ( صرصار حتى ) ولبسها نقاب لو كانت أنثى ( نمله مثلا ) , دينكو فالصو يا إخوان , عقيدتكو دهب قشره يا سلفيين .
.
فيه مشهد من مسلسل ( يتربى في عزو ) , مشهد عبقري لمؤلف عبقري , إبراهيم ابن حماده عزو بعد مانضم للجماعه بيكلم أمه وبيقول لها ( أنا خايف عليكي من نار جهنم ! ) , قالت له ( ليه يا إيراهيم ؟ , هروح النار ليه , دانا ضيعت عمري عشانك , بصلي وبصوم وبذكي ومش قادره أحج ) , قال لها ( عشان تتجنبي نار جهنم لازم تتنقبي !! )...............ياخي أحه يا إيراهيم , أحه إسلاميه بدقن!.
.
إمبارح أحد الشباب السلفيين راح يخطب بنت , بعت أهله , وكان طلبه الأول إنها تتنقب عشان عذاب ربنا , ياخي أحه ياعريس , أحا إسلاميه بدقن !!.
.
الليله اللي انتشرت جدا في مصر الأيام اللي فاتت بتفرح جدا أصدقائكو في إسرائيل , هما هيلاقو عدو أتفه من كده ولا عريس أهيف من كده ؟!.
.
لما الكدب يبقى داء فينا وقذف المحصنات عادي والقتل شئ لذيذ والعدل موضه بطلت وشهادة الزور مباحه والفتنه جميله والصفقات على دم الشهدا عمل محترم .....بس عندنا دقن ونقاب يبقى صباح البلاله عليكي يا بلد .
.
محمد حسين

كيف

قتل الغلابه ده كيف

ذي الحشيش في الدم

فرعون وشايل سيف

وعمره ما يتلم
.
.

محمد حسين

يرضيكي ؟

يا صرخة الموجوع

طال الأمد بيكي

أكَلَ الغلابه الجوع

ومش بلاقيكي

وناس شرابها دموع

وراضيه يرضيكي ?!.
.
.

محمد حسين

مكتوم

صوت الأمل مكتوم

طلقه ومش طالعه

واليأس زاحف عوم

طول ما البلد والعه

من فين يجينا الخير

من قتل ومصارعه ؟!.
.
.

محمد حسين

ولا الجبان احنا

يا زرع مين علّمك

تطلع على سطوحنا

وتعدي دور واتنين

نضحك على روحنا

جرئ وطبعك كده

ولّا الجبان احنا ؟!.
.

.
محمد حسين

نفس عميق

خد نفس عميق , وخد وقتك في التفكير , وخد دي حطها تحت لسانك
وبعد كده خد بالك من نفسك بقى , بيقولك يا سيدي إن من أهم معالم الإسلام الإخوانجي السلفي الجهادي اللي دخل مصر من كام شهر على إيد الخليفه المعصوم بن المعصوم ( محمد بن مرسي ) إن كباريهات شارع الهرم عادي بس هنغطي شعر عروسة المولد , وإن رقص دولي شاهين مباح بس وش أبو الهول عوره !!..........يبقى الشهاده لله ولا مش الشهاده لله ؟!.

.

محمد حسين

دوله ولا طابونه

دولة ولا طابونه ؟!

.
لو حضرتك عملت زياره تفقديه مفاجأه لطابونة (عم سعيد ) , هتكتشف إن عم سعيد شخصيا بيعجن بإديه والأسطى برعي واقف قدام الفرن بيخبز , والواد فينو الصغير بيلم ( المطارح ) ويغسلها , وهتلاقي كمان الست شوشو جارتكو وصلت قبلك عشان تشتري كام رغيف ولقتهم ملبوخين فدخلت تساعد , إيد على إيد بتساعد , وممكن عم سعيد يقولك والنبي يا أستاذ إيدك معانا ننزل الدقيق من عالعربيه !..............يعني كلنا ( أسره مع بعضينا ).
.
ولو حضرتك عملت زياره تفقديه مفاجأه لدولة ( عم بديع ) , هتكتشف إن عم بديع شخصيا بيعجن , والأسطى خيرت الشاطر واقف قدام الفرن بيخبز , والواد مرسي بيلم ( المطارح ) ويغسلها , وهتلاقي كمان الست موزه جارتهم وصلت قبلك ودخلت تساعد ! , والأستاذ صبحي صالح بينزل الدقيق وأنابيب الغاز من على العربيه !.
.
يبقى احنا عايشين في دوله ولا طابونه ؟!!.

.

محمد حسين

وفاض الكيل

وفاض الكيل
من الأخر
وبتكلم
عن العيشه
وعايشنها
.
وعن أحلام
بنكتبها
مابين اتنين
وراسمينها
.
وعن بلدي
إذا وفقت
لقرد وقرد
حاكمينها
.
وعن إسلام
بلاد غيرنا
وعن دينهم
وعن دينها !!.
.
محمد حسين

جبهة الإنقاذ

رسالتي الأخيره إلى جبهة الإنقاذ .
بلاش سياسة لا بحبك ولا بقدر على بعدك , إما إن حضراتكو تكونو مقتنعين إن فيه أمل في الإخوان وإن الحوار هيجيب نتيجه وبالتالي , فاوضوهم وتحاورو معاهم واحقنو دماء الشباب , أو إنكو متأكدين إن الإخوان بتبيع البلد وتخربها فعلا وبالتالي إنزلو واعتصمو قبل الشباب واهتفو برحيل النظام .
أستاذ حمدين صباحي , طلبك بتغيير وزير الداخليه هقولك عامل ذي إيه ومتزعلش , ذي واحده دخلت البيت ولقت جوزها بيخونها في الأنتريه فقررت إنها تحرق الأنتريه أو تبيعه ! , أستاذي العزيز , وزارة الداخليه والحكومه هما الأنتريه وغرقة النوم للأنظمه الفاشيه ( يعني المكان المفضل للخيانه ) ليس إلا !.

.

محمد حسين

شغلتنا

في شغلتنا دي , الواحد مضطر يسمع للزبون اللكاك أوي , ويشد الكلام بطلوع الروح من الزبون اللي قافل بؤه عشان يعرف طلبه , ويفك ألغاز وطلاسم المكتوب في الروشتات أو في الورقة المطبقه اللي كاتباها أم حمد للشغاله , ويعرف شوية بنغالي وشويه هندي على 3 كلمات عربي و 7 كلمات إنجليزي ويضربهم في الخلاط وتبقى هي دي اللغه المعتمده , إنما أكتر حد بيتعبني أوي هما المتقاعدين ( اللي طلعو معاش ) , يا ربنا , أهلاوي ولا زملكاوي والوضع في مصر وأسعار الخضار هنا والعريفي والحريم والزواج , وماركة العربيه وبكام , وشرم الشيخ وجمالها ودكاترة السنان في سوريا , .........كل ده وانا قاعد مستني أعرف هو جاي ليه ؟!
المفروض رواتبنا يكون فيها بدل سكن وبدل انتقال ( للمواصلات ) , وبدل انتقال ( للرفيق الأعلى ) بعد فقع المراره.

.

محمد حسين

احمد حراره

إلى كل أنصار مرسي الظاهرين ( إخوان وسلفيين...الخ ) وإلى كل أنصار مرسي المتنكرين في صورة راجل ( مصر القويه والوسط ) , أحد المسيرات نازله النهارده تهتف ضد نظام مرسي , فيها شاب اسمه أحمد حراره , فقد عينه اليمين في الثوره الأولى وعينه الشمال في محمد محمود , وخطب من كام يوم ولسبب ما مش هيقدر يشوف خطيبته ! , تفتكرو أحمد حراره نازل ليه ؟ , لو فيه بصيص أمل في حكم مرسي مكانش نزل وكفايه اللي حصل له , هو بالتأكيدمش بلطجي ولو معاه سلاح مش هيعرف يستخدمه عشان مش هيشوف , هو مش نازل يتحرش بالبنات عشان مش شايفهم , هو مش صايع لأنه دكتور أسنان , تفتكرو نازل ليه ؟ طيب تاخد انت كام واقلع لك عينك اليمين ؟ , يا ترى بيخدعوكو بإيه تاني ؟!.............فوقو بقى.

.

محمد حسين

يا ميمي

مرسي بدأ اجتماعه مع المعارضه , الإجتماع رقم 56734 مع نفس الأشخاص في الحاره الزنقه , أيمن نور وسليم العوا هههههههههههههههه ووزير الأوقاف !! , يا دين النبي يا جدعان , التلاته دول ول اترشحو النهارده مش هياخدو مع بعض كده 17 صوت , مرات سليم العوا نفسها ممكن متنتخبوش , إنما أيمن نور أحسن واحد يلعب دور الكومبارس بتاع المعارضه , يعني لما تكون المعارضه مش موجوده يجيبوه , بالظبط كده ذي عادل إمام في الفيلم الأبيض واسود لما كان بيمثل دور كومبارس , الفرق الوحيد إن عادل إمام كان بيروح ينضرب ويقول ( عايز أبوس ....أنا عايز أبوس ) , إنما أيمن نور بيروح هناك ويبوس على طول , نعيما يا أيمن , صباحيه مباركه يا ميمي !!.

.

محمد حسين

نادر بكارررررررررررررررر

نادر بكار , عضو مجلس الشعب السابق وعضو مجلس الشورى وعضو المجلس الأعلى للصحافه وعضو جمعية الأعضاء ورئيس جمعية الرؤساء والمتحرش الرسمي لحزب النور والفقيه الدستوري وعضو لجنة صياغة الدستور والخبير السياسي المحنك والضليع في قواعد اللغه العربيه والعارف بأمر الله والمكشوف عنه الحجاب وقائد جيوش المسلمين في غزوة الخندق وغزوة الصناديق وعميل أمن الدوله سابقا ولاحقا.............بيقول إن الإخوان يسعون إلى أخونة الدوله !! ياخي أمك على أم اللي خلفوك على أم اللي رموكو علينا .

.

محمد حسين

النمله والجمل

أتخن مخرج هندي , وأشطر واحد في المشاهد والخزعبلات الهنديه , اللي ممكن يعملك مشهد للفيل وهو راكب عالسحابه وبيجدف في الهوا بمجدافين عشان يجيب علبة سجاير كليوباتر من على ناصية الشارع , اللي ممكن يجيبلك مشهد لأميتاب بتشان وهو بيقابل أسد في الصحرا فقام ماسك إيد الأسد مسلك بيها سنانه الأول قبل ما يدبح الأسد ويشويه عالفحم ذي أبو اسماعيل كده , المخرج ده لا يجرؤ إنه يعمل مشهد لجمل واقف عالرصيف وجاله شد عضلي فمش قادر يعدي الطريق وفجاه تيجي نمله حقيره تشيل الجمل وتعديه , لا لا المشهد كده هيبقى أوفر أوي , هو بالكتير هيخلي النمله تقرب من الجمل وهو بارك كده وتستخبى في أي فتحه من فتحات الجمل ! , يبقى مين الجحش بقى اللي متخيل إن قطر هتنتع مصر من أزمتها الإقتصاديه؟!....هي قطر هتنتع ولا هتستخبى في أي فتحه ؟!.

.

محمد حسين

حزب النور

حزب النور بعد ماتليف تمام بصابونة الإخوان ورجع من ورا مصنع الكراسي , طالع ينتقد فيهم وعامل نفسه ثورجي ! , هو احنا يا ربي مكتوب علينا نبقى ملجأ للأرامل والمطلقات ولكل واحده غضبانه من جوزها شويه ؟! , إرجعي ياست انتي بيت جوزك واخزي الشيطان عيب, وبعدين أحنا ممكن نقبل أي واحده إلا واحده خانتنا مع سكان القاهره الكبرى وضواحيها , دانتو أمنجيه من قبل مايخترعو أمن الدوله أصلا , يا بتوزع ( إي وربي ) وهنجمع المعونه , والجيش عصب الأمه وإذا انكسر الجيش انكسرت العسليه !!.

.

محمد حسين

بنشتري راجل

وقال لي ( يا إبني إحنا بنشتري راجل , متدين وعارف ربنا وكفايه إنك بتصلي الفجر جماعه ) , قمت فرحت أنا وقلت له ( طيب ممكن ياعمي لو سمحت أعاين البضاعه ؟! ) , قالي ( أوي أوي , اتفضل ) , ودخلت عالبضاعه في أوضتها وفضلت أعاين وأقلبها يمين وشمال , وكل شويه أبص عالباب لايكون أبو البنت جاي ولا حاجه ؟ مفيش , ولا الهوا , اتشجعت أكتر واتصلت بخواتي وصحابي وقلت لهم ( تعالو عاينو معايا , شوية بضاعه لوز وعنب ) , وبعد شويه اتشجعت أكتر واتصلت بصاحبي الخليجي وقلت له ( عندي لك مفاجأه كانت عينك هتطلع عليها , عارف انت البت اللي كانت بتذل أنفاسك دي ؟ , أهي معايا دلوأتي وتحت إيدي , تحب تيجي تعاين بنفسك ؟ ) وفعلا جه صاحبي الخليجي وابو البنت فتح له الباب , صاحبي قال ل ( الراجل ! ) ممكن أدخل وأعاين جوه ؟ قالو اتفضل ياسلام , يا أهلا بأشقائنا العرب.........................ناس طيبين أوي أوي ياخال !!.

.

محمد حسين

هاارتس

غريبه أوي إن صحيفة هاارتس الإسرائيليه يكون رأيها إن جبهة الإنقاذ في مصر (ليس لديها مشروع وهدفها إسقاط مرسي ) , وهو ده نفس رأي مكتب الإرشاد والحكومه القطريه !!.

.

محمد حسين

يا صرخة الموجوع

يا صرخة الموجوع
طال الأمد بيكي
أكلَ الغلابه الجوع
ومش بلاقيكي
وناس شرابها دموع
وراضيه يرضيكي ؟!
.
محمد حسين

هتاخده محبه

رايح يَمه خلاص 
عالجيش
جايز اموت
أو يمكن أعيش
لو على عمري 
هتاخده محبه.
.
رحت الجيش
ولاقيت رجاله
قالو يا سالم
مش معقول
قفل الصول
كمّل أكلك 
عيش على فول
ومعدش مربى
قلت وماله
هي البطن 
هتكفر يعني
لو مكالتش 
فطقه مربى ؟!
.
كلت الفول 
أبو سوس بطعامه
بقسم ويا الجندي
سلامه
طلع القائد
قال لنا نجمع
عندنا إخلا
رحت يا أمي
وعيني بتدمع 
جبت المخله
.
خايف يمه
أموت مش ألاقي
مصر بلدنا
بتكبر حبّه
لو على عمري
هتاخده محبه 
.
محمد حسين

السلعوه

هروب 4 ضباع من حديقة الحيوان !...السلعوه هربت يا شريف , قولي هي السلعوه لما بتحكم مصر بيبقى شكلها عامل إزاي ؟ طيب استنى هكلمك بعدين !!.
.
محمد حسين

يوميات حمامه

يوميات حمامه في كوكب القرود !................المشهد الأول
.
وقف القرد الكبير ( شمبانزي ) وقال للقرد الصغير ( نسناس ) , تراهني ياد يابو النسانيس إني أقدر أطلع النخله دي وأجيب لك سباطه موز بإيد واحده ؟ , رد أبو النسانيس وقال له , قدها وقدود يا كبيرنا بارك الله فيك , طلع الشمبانزي خطوتين عالنخله وبعدي قال ( أأأه...أي ) , جالي شد في العضله الخلفيه ( كرامب يعني ) , ونزل شمبانزي قال للنسناس , على فكره اللي حصل لي ده إشاره من ربنا وأكيد أن سباطة الموز دي مسمومه, هنا هتف النسناس وقال ( الله أكبر يا زعيم الأمه , شفت ربنا بيحبك أد إيه ؟! ).
.
محمد حسين

مصطفى بكري

مصطفى بكري بتاع مبارك وطنطاوي ومرسي , هو الصحفي الوحيد في مصر اللي عرف كل أسرار وخبايا الحكام والرؤساء المصريين , مش بس كده , هو الوحيد اللي قدر يعرف مقاسات وألون ملابسهم الداخليه !! , صحفي مهم مفيش كلام وأهميته بالنسبه للصحافه المصريه هي بالظبط ذي أهمية الربع جنيه ( المخروم ) بالنسبه للبنك المركزي !!.
.
محمد حسين

قصريتين زرع

يا سبحان الله , فجأه كده وإذ فجأةً اكتشفنا إن مصر فيها إسعاف طاير وإسعاف عايم ! قبل يوم 25 يناير بساعتين , مع إنك والله لو دخلت مستشفى حكومي هتلاقي فيها الإسعاف نايم , إنما حكاية الهليكوبتر واللانش بتاع الإسعاف دي عامله كده ذي فازات الزرع والشجر اللي بيجيبوه ويرتبوه قبل زيارة السيد المسئول ويتلم بعد كده ويرجع المخازن , قال يعني الدنيا حلوه والرفاهيه وصلت للركب , لعبتكو مفضوحه يا إخوان , عشان المسئول المره دي اللي عايزين تضحكو عليه بقصريتين زرع اسمه الشباب والشعب وده مسئول الرصيف أخد من جتته راقات , وميخلش عليه لعب الخوا....الخواجات !!.
.
محمد حسين

بتميلي الدفه

يا أرض
شايله القمر
دايما على جبينك
والشمس
في كفوفك
طالعه من الزفه
.
إحنا ولادك حق
واحنا اللي عاشقينك
بس إنتي
ليكي ساعات
بتميّلي الدفّه !!.
.
محمد حسين

عن نفسي

عاجل جدا , العثور على مواطن مصري مغترب في منطقه نائيه لا زال يعرف قيمة مصر ومكانتها , , جاري تحنيطه الأن و سوف تُدرس قصة حياته في علم الحفريات !!...............................عن نفسي اتحدث.

.

محمد حسين

مش فاكر

محمد حسنين هيكل يتهيألي كده إنه عايش من أيام الحمله الفرنسيه على مصر , واحتمال نلاقي في الألبوم بتاعه صور له مع الملك لويس التاسع , ولو سألته هيقولك ( إن لويس التاسع ده لما دخل المنصوره دخل برجله الشمال وعطس 7 عطسات والكلام ده كان بعد صلاة العصر مباشرة ) ........اللهم لا حسد , وانا مراتي بتكلمني وانا بقفل الصيدليه عشان تفكرني بحاجه أشتريها وتكلمني تاني قبل ماوصل البيت عشان تفكرني بنفس الحاجه مع إن المسافه بين البيت والصيدليه مش فاكر أد إيه !!.

العبايه والعقال

مرسي لبس العبايه الخليجي قدام الكاميرات , ومصر بتتجلد ب( العقال ) الخليجي من خلف الستار !!.

.

محمد حسين

بيتاجر

الكتاتني بيقول : صباحي من سنه 95 وهو بيتاجر بأحلام الفقراء والضعفاء !! , طيب يا كتاتني مانتو من سنه 40 بتاجرو بدين المسلمين ودين أمك ودين أمي ودين أي حد تعرفوه ! , في المره الجايه متبقاش تمسك الميكروفون لصباحي بقى... متنساش يا قمر.

.

محمد حسين

سفير من منازلهم

هام جدا
.
جاتني رساله عالموبايل , دعوه من رابطة المصريين بالسعوديه لإجتماع يوم 25 يناير _ يوم الجمعه , تحت عنوان ( في حب مصر ) !!.
في الحقيقه عندي كام سؤال :
.
1- طبعا الرابطه ماسكها إخوان , فمش هسأل السؤال الأول اللي بيقول يعني إيه في حب مصر ؟ لأن الإجابه أكيد هتكون يعني الأمن والأمان والرئيس المنتخب والكنافه الشعر ! ).
.

2- الرابطه عرفت رقم موبايلي منين ؟! أنا عمري مارحتها ولا اشتركت فيها.
.
3- لما رحت السفاره أخلص أوراق العربيه لقيت اتنين من اللي ماسكين الرابطه حاليا ( واحد إخوانجي وواحد سلفي ) موجودين مع موظفين السفاره والقنصل , لابسين بدل وحاطين باتش علم مصر عالبدله ( وده خاص بموظفي السفاره ) وهنا بسأل : بأي حق إنتو موجودين مع موظفين السفاره اللي بيجددو جوازات وبيختمو بختم النسر ؟! , وبأي حق حاطين باتش السفاره وانتو مالكوش أي صفه رسميه ؟!
4- إيش معنى اختياركو ليوم الجمعه 25 تحديدا عشان تعملو بارتيتة ( في حب مصر ) دي , أنا بقالي 11 سنه في السعوديه ومشفتش منكو رساله ولا دعوه ؟! , ولا اكتشفتو فجأه إنكو بتحبو مصر ؟!.
.
والسؤال الأهم جدا جدا جدا : حضراتهم بيروحو السفاره يومين كاملين موجودين باستمرار , يعني معندهمش شغل ( مفيش كفيل بيسمح بكده ) :........انتو بقى بتقبضو منين ؟ وفيه منكو كام ألف موجودين في الدول ؟ مرتباتهم الفخمه بتيجي منين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
.
هو ممكن بعد كام شهر ألاقي الطحش بتاع الإخوان بقى سفير مصر في السعوديه وهو كل علاقته بالعمل الدبلوماسي إنه كان بيحضر معاهم وهما بيجددو جوازات السفر ؟!.........مصر بتتباع للخرفان , اللهم ألطف بها يا أكرم الأكرمين.
.
محمد حسين

لناس يبيعو المرض

صبح القلم مهزوم
والحبر ناشف فيه
بنّيه جمعت بوم
بدل الحمام تلاغيه
بصيت لقلمي ساعات
ساكت كما الأموات
قلت اكتب المعلوم
قالي وهكتب إيه ؟!
كتب القلم نقطه
وجنبها نقطه
ونقطه واستفهام
( معدش بينا كلام )
قالها بطرف عنيه !
.
هي الحياه كام لون
ولون غميق اتفرض
فيها اللي قلبه جميل
كأنه طير انقرض
وبيّاعين الشفا
فاتو أماكنهم
لناس تبيع المرض !!.
.
محمد حسين

مش مهم تنزل

مش مهم تنزل يوم الجمعه تهتف بسقوظ النظام عشان الإهمال اللي بيقتل أطفالنا , مش مهم تنزل عشان مشايخ الجهل اللي بيكفرو فينا , مش مهم تنزل عشان الازهر العظيم اللي اتحول على إيد الإخوان ل( عشة فراخ ) , مش مهم تنزل عشان دم الشهدا , مش مهم تنزل عشان مهرجان البراءه للجميع والنياشين للجميع , مش مهم تنزل عشان هيغطو عروسة المولد ويسيبو كباريهات شارع الهرم , مش مهم تنزل عشان الصكوك والبلد اللي بتتباع , مش مهمتنزل عشان القروض والديون والصخره الزياده اللي شيلناها على ضهرنا , مش مهم تنزل عشان انتخبت رئيس وفجاه لقيت اللي بيحكم مصر واحد تاني , مش مهم تنزل عشان البلد اتقسمت نصين على إيد الإخوان , مش مهم تنزل عشان تزوير الإستفتاء على الدستور وطبخه في يوم وليله , مش مهم تنزل عشان القتالين والبلطجيه بقو رؤساء أحزاب ونجوم مجتمع , مش مهم تنزل عشان العيش بقى بكوبونات , مش مهم تنزل عشان أنبوبة الغاز اللي مبقتش تظهر إلا قبل الإنتخابات في عربيات الإخوان , مش مهم تنزل عشان القضاء والمحكمه الدستوريه ودولة القانون , مش مهم تنزل عشان قناة السويس اللي هنرجعها للإستعمار تاني , مش مهم مش مهم مش مهم...............لكن إنزل أرجوك عشان لما رئيس مصر بجلالة قدرها يقعد مع أمير دويلة قطر ( اللي هي بيتين ونخله ) ميقعدش القاعده دي !!.
.
محمد حسين

بصره يا معلم

بصره يا معلم !!
.
أبو اسماعيل قال إن رأيه في الدستور الجديد إنه فيه مواد سيئه كتير بس هيصوت ب(نعم ) بالعند في المعارضه ..........غتاته يعني..
والحقيقه أنا واحد من الناس اللي شايفه إن حكم الإخوان فيه حاجات جميله خالص بس هثور ضدهم ( بالعند في الوهابيين ).....غتاته برضه !.
النائب العام بتاع مرسي أمر بتحويل بلاغ محاصرة البورصه لمحكمه وسط القاهره ( لأن البورصه مستقله طبعا ذي القضاء والمحكمه الدستوريه ومدينة الإنتاج !! ) , عموما مش مهم , بس أغلب ظني أن محكمة وسط القاهره هي اللي ماسكها النائب العام بتاع مبارك حاليا ! , يعني النائب بتاع مرسي باعت للنائب بتاع مبارك .......ومدبولي في النص , يكورله والقط , وغالبا مدبولي هيموت بحته البسبوسه في الأخر.............ألا تكبرون !!.
.
محمد حسين

ياخي تتح

ياخي تتح !.
.
في مقال إخوانجي مؤثر , بعنوان (اتقو الله في مصر) , يحكي عن زيارة مولانا المفدى محمد مرسي للسعوديه , وكيف أنه فعل في هذه الزياره ( مالم يأتهِ الأوا ئلُ ! ) , يحكي الكاتب ( اللي مش إخوان على فكره ) أن المواطنين السعوديين تعرفو على الأستاذ المناضل مصطفى بكري ! وقالو له بالحرف الواحد ( اتقو الله في مصر ! )..ممممممم تراني أبكي هالحين ......يا خي تتح تتح تتح.
وبعد ما عصرت على نفسي ( مشنة لمون) قررت إني كتب رأيي في المعنى والمضمون :...بص يا برنس الليالي
1- المواطنين السعوديين بلا استثناء رأيهم الأن ضد الثوره في مصر ومؤيد لنظام الحكم الإخوانجي , ونفس المواطنين السعوديين بلا استثاء ( وبالإسم نفر نفر ) كان رأيهم في الثوره الإولى إنهم ضد الثوره وبيدعمو نظام مبارك وبيقول ( رجال شيبه حرام ) !........فهمت حاجه يا ياشمهندز ؟!.
.
2- الأستاذ المناضل مصطفى بكري ( مش قادر انطق اسمه بيجيبلي غثيان ) كان بيحضر كل زيارات مبارك ودلوأتي بيحضر زيارات مرسي !! .........فهمت حاجه يا هندزه ؟!!
.
محمد حسين