( محمد حسين - منوع ) ( 18 مايو 2018 - 25 مايو 2018 )

Mohamed Hussein

24 مايو 2018·

يُحكى أن 3 مصريين دخلو مغاره , و بعدين وقعت صخره ضخمه قفلت باب المغاره تماما , و بعد الهرج و المرج و الولوله و الشحتفه قالو نفكر بهدوء و نشوف حل أو حاجه تساعدنا في الخروج , من هنا ل هنا لقيو ورقه قديمه متطبقه و مزنوقه تحت حجر , الورقه مكتوب فيها , عشان تخرجو من المغاره و الصخره تتشال لازم كل واحد يحكي عن موقف بطولي و نضالي مرّ بيه في حياته .

.

وقف الأول قدام الصخره وقال يارب أنا حاربت في 73 و خدت طلقه في ايدي اليمين و مسكت البندقيه بإيدي الشمال و كملت الحرب لحد مانتصرنا و حررنا أرضنا , قامت الصخره اتحركت مسافة 10 سم و المدخل اتفتح سنّه .

.

وقف التاني قدام الصخره وقال يارب أنا أمي كانت بتعاني من فشل كلوي و الدكاتره قالو لازم حد يتبرع لها بكليته , فاتبرعت بكليتي من غير ما أفكّر ولا لحظة واحده , قامت الصخره اتحركت مسافة 10 سم كمان و المدخل اتفتح أكتر .

.

وقف التالت قدام الصخره وقال يارب , يارب أنا متجوز ست مصريه و في يوم من الأيام قالت لي يا حبيبي عايزه أشتري طقمين لبس جداد تعالى معايا , انا ماكدبتش خبر و قلت حاضر , نزلنا يارب عالساعه 9 الصبح نلف على محلات عباس العقاد اللي في مدينة نصر , و عالمغرب كنا بنلف في ميدان الجامع اللي في مصر الجديده , و الساعه 10 بالليل رجعنا و كل اللي اشتريناه طرحه من محل لسه فاتح جديد في المعادي !! .

.

رجعت يارب وانا رجلي كأن فيه سكاكين بتقطع فيها , جبت طشت بلاستيك و حطيت فيه مايه و ملح و قبل ماحط رجلي في المايه لقيت مراتي جايه بتقولي , حبيبي انت فاكر المحل اللي اشترينا منه الطرحه ؟ أه ليه ؟ , طب يالله عشان ننزل نرجعها لأنها مش لايقه عالسابو .

.

في اللحظه دي طارت الصخره الضخمه كأنها عصفوره , و بعد الفرح و التهليل و التكبير و الحمد , راح الإتنين الأولانيين لصاحبهم التالت بتاع الطرحه و السابو و حضنوه و طبطبو عليه و قالو له , معلش , معلش والله .

.............................................................................................................

Mohamed Hussein

23 مايو 2018·

المايله بتتعدل

.

و الحاجات بترجع لأصلها , اللهم لك الحمد , هي دي بقى طبيعة الأشياء , ماهو الأصل في الأشياء الخير مش الشر , الصح مش الغلط , الحق مش الباطل , العقل مش الجهل , المنطق مش البلاله .

.

الناس حتى بقت تتشد بشغف للمسلسلات اللي أبطالها ظباط شرطه و جيش , الأبطال الحقيقين , بعد سنين طويله من العته و التخلف العقلي و صناعة أبطال من العربجيه و الصيع و الخونه .

.

ممكن حضرتك تشوف أو تعرف إن ظابط شرطه بيتاجر في المخدرات , او عذب متهم في قضية عاديه لحد الموت , تقوم تلعن جدود أبو الظابط ده و تطالب بمحاكمته و انه يتنفخ , دي لغة العقل و المنطق , لكن اللي مش من العقل ولا المنطق إنك تاخد قطاع بالكامل فيه عشرات الألاف شايلين روحهم على كفهم عشان يحمونا , تاخدهم بذنب واحد ولا اتنين ولا عشره , و تقوم تتشألب في إزازتين بيره و تشتم في الداخليه والجيش , مع إن أبسط قواعد العقل بتقول , ظابط فاسد زي طبيب فاسد زي صيدلي فاسد زي مدرس فاسد , و الغريبه إنك لما بتشوف حد فاسد من دول مش بتشتم في وزارة التعليم ولا وزارة الصحه .

.

شخصيا و بعد كام سنه من المتابعه الدقيقه جدا و اليوميه لكل حاجه بتحصل حوالينا , أقدر اقول إن أداء الشرطه اتطور وبقى أفضل جدا , طبعا ماوصلناش لدرجة الكمال ولا هنوصل لها ولا حد بيوصل لها في العالم .

.

في السنين دي قابلت و عرفت ظباط كتير , و اكتشفت يا مؤمن ان 95 % من القصص اللي كنا بنرددها كانت بلح , فستك , حد بيزقنا في سكه معينه بتخطيط و احتراف , و احنا بنتزق يا سعادة البيه , مش عيب بقى نقول اننا كنا غلطانين , لا ظابط الجيش والشرطه بيقبض شخرميت ألف جنيه ولا مرتبه بيزيد كل يوم تلات , و لا هما بيعضّو و يمشو في الشارع يخانقو دبان وشهم , دي ناس زي حالاتنا والله , حتى غلاء الأسعار طايلهم , و بيقعدو كل يوم يراجعو حساباتهم و مصاريفهم 100 مره , و لا ظابط الشرطه بيقف في كمين و معاه دبابات و مدافع أر بي جي واللي بيلاقي رخصته منتهيه بيدوس عليه بالدبابه , يا جدع انا مشيت برخصة السواقه منتهيه لمدة سنه ومحدش وقفني ..و لما جددتها من شهر بقيت أفوت عالكماين وابقى هاين عليا انادي عالظابط اقوله تعالى شوف أم الرخصه اللي انا جددتها دي , يا عم تعالي شوفها , اومال انا جددتها ليه .

.

حاجه اخيره عايز أقولها بنفس راضيه مطمئنه , هكتبها وانا متأكد اني برضي ربنا سبحانه وتعالى وانا بكتبها , بص يا مولانا , انا موافق تماما , موافق جدا , موافق للغايه , إن أي متهم في قضايا تخص الأمن القومي , يعني متهم بالانتماء لجماعه ارهابيه , أو بالتخطيط لعمل ارهابي , أو بمحاولة حرق البلد , موافق تماما انه يتم تعذيبه بكل الطرق عشان ينتزعو منه اعتراف , و يوصلو لخيوط و عصابات و يحمو بلدنا من شرهم , بالمناسبه الكلام ده موجود في كل دول العالم بس الفرق انه في الدول الأوروبيه بيتعمل بشكل شيك , بتتعذب و تتمنى الموت من غير مايعملو في جسمك خدش واحد .

.

زمن البلاله و الهطل و ترديد شعارات عبيطه و اننا نتركب زي الحمير و نتساق , الزمن ده خلاص ولّى بلا رجعه , و أمن الوطن مش جمله رومانسيه ولا بيت شعر جايبينه من كتب الشعر المنسيه , امن الوطن يعني أمن بلدك , يعني شوارعك و حواريك و ترابك , يعني مدرستك و مولك و جنينتك ومسجدك و كنيستك , يعني ابني و ابنك و بنتي و بنتك , يبقى اللي يحاول يقرب منهم تتصور سيلفي جنبه و هو متعلق على عمود نور و تكون مبتسم في الصوره .

...............................................................................................................

Mohamed Hussein

22 مايو 2018·

من 2012 تقريبا و انا بصرخ و بحذر لحد ماصوتي اتنبح , من حكاية التجاره بدين ربنا و أياته , من استخدام الدين ك ( مطيه ) و العياذ بالله لتحقيق أهداف شيطانيه .

.

من أول ما لقينا منابرنا و جوامعنا بيتم استخدامها للترويج لفكر جماعه ارهابيه منحرفه , من أول غزوة الصناديق و قالت الصناديق للدين نعم , من أول طابور مرسي بتاع الجنه و طابور المنافسين بتاع النار , من أول ما شافو جبريل في رابعه و شافو مرسي و هو بيصلي إمام بالأنبيا .

.

الحقيقه عمرو خالد مش حاله نادره ولا مجرد نبت شيطاني طالع غلط , دي مدرسه يا محترم , جامعه قذره عمرها 90 سنه , قتلونا و احنا بنصلي , ضربونا و احنا ساجدين , اعتقلونا و احنا صايمين , ده حافظ كتاب الله , ده حج بيت الله 400 مره , ده زبيبة الصلاه في وشة قد غطا الحله , و دي فراخ بترتقي بالروح والوجدان .

.

عمرو خالد وفراخه اللي بترتقي بالروح و تخليك بتصلي التراويح وانت مرتقي بروحك و مرفرف بجناحاتك و ( بتبيض كل يوم بيضة التقوى ) , ده مجرد تلميذ في المدرسه القذره , نفس فكر الجماعه اللي أنشأتها المخابرات البريطانيه من 90 سنه , اللعب على وتر الدين و اللعب بالدين , عشان كده ماينفعش نتفاجئ خالص , ماينفعش نحط نفس المعطيات ألف مره و ننتظر في المره الألف نتيجة مختلفه .

.

الذنوب في حياتنا كتير , بس ماعتقدش فيه ذنب أعظم و لا أجلّ من إنك تتاجر بأيات الله و بدينه , و محدش بيرتكب الكبيره دي أبدا بطريق الخطأ ( ولا سهوا ) , فاقتلوهم حيث ثقفتموهم , اقتلوهم هنا بمعنى دوسو عليهم بأوسخ جزمه , شاورو عليهم وقولو يا نصابين يا ولاد الوسخه , ماتقبلوش للي بيتاجر بدين ربنا توبه ولا اعتذار.

.

فيه بلاد حوالينا اتحرقت و شعوب اتشردت و ملايين اتقتلو , و ألاف الشباب انضحك عليهم و رمو نفسهم في التهلكه , بسبب النوعيه دي من التجار , تجار الدين اللي هما وقت الضروره بيكونو تجار الدم و تجار الخراب .

.....................................................................................................

Mohamed Hussein

21 مايو 2018·

البت بنتي الصغيره عمرها 7 سنين و بتصوم , اليوم طويل أوي عليها , كل يوم تجيلي مع ادان المغرب و توشوشني في ودني بالراحه و تقولي بابا أنا نسيت وأكلت معلقتين زبادي عالعصر كده , و انا اقول لها مفيش مشكله يا حبيبتي , طالما ناسيه يبقى صومك مقبول .

.

طبعا هي بتستعبط وانا عارف , بس عاذرها , و أصلا لو ضغطت عليا شويه هقول لها الزبادي مابيفطرش حتى لو ماكنتيش ناسيه .

..............................................................................................................

Mohamed Hussein

20 مايو 2018·

أشرف السعد عمل فيديو و جاب فراخ اسمها السعديه ( على اسمه ) , حاطط عليها ورقه بالإسم , فراخ حجمها صغير بتاع نص كيلو , و قال ان الفراخ دي من يوم ما تتولد بنسمّعها قرأن , متربيه على أيات الله , فراخ إسلاميه أفضل بكتير من الفراخ بتاعة عمرو خالد , و بالتالي هترتقي بالروح اكتر .

.

قال كمان انه زارع نبات العود جنب بيته , و بيعمل منه عطور , عطور أشرف القرشي , و ريحتها بتفضل في الهدوم 6 شهور ماتطلعش , ريحة إسلاميه مفيش بعد كده .

.

فيه ناس كتير من اللي شافو الفيديو شتمو أشرف السعد بأوسخ الألفاظ قبل مايكمّلوه , بس انا من أول لقطه و عارف انه ( بيحط ) على عمرو خالد , مانا ماتوهشي أبدا عن الأسلوب الساخر , هو الحقيقه ماحطش على عمرو خالد , ده فرّج عليه أمة لا إله إلا الله , شامي و مغربي و شافعي و حنبلي , يعني بطريقة إسلاميه برضه .

...........................................................................................................................

Mohamed Hussein

20 مايو 2018·

العيشه صعبه , و الحل ايه ؟ ضربه بالمرزبه , و 5 عصافير مع بعض .

.

هي العيشه بقت صعبه عالناس بعد قرارات الأصلاح الاقتصادي ؟ أه جدا , حتى الطبقه المتوسطه اللي المفروض انا منها , بقينا كلنا بنكح تراب .

.

طب هي القرارات دي كانت ضروره ولا الحكومه بتكرهنا و تنتقم مننا ؟ لا كانت ضروره عاجله لو عايز تبني بلد بشكل حقيقي بعيد عن سياسة ( دلّع الزبون ولبسه في الحيطه بعد كده ) .

.

طب ايه هي العلاقه بين الشعب و الحكومه ؟ مشكلتنا في مصر هي اعتقاد البعض إن الحكومه دي هي الأب اللي المفروض نقوله عايزين كذا و كذا , و نطلب نطلب من غير مانسأل هيجيب منين ولا هيقدر يجيب ولا لا , مش انت ابونا اللي خلفتنا ؟ اتصرف بقى , و مشكلة البعض التاني هي اعتقاده ان الحكومه بتلعب دور مرات الأب , اللي حاطه نقرها من نقرنا و عايزه تغلس و ترازينا في الرايحه و الجايه .

.

و الحقيقه ان أي حكومه محترمه في العالم لا بتلعب دور الأب و لا دور مرات الأب , المثل الوحيد اللي ينفع ينطبق على الحكومات هو ( يا جاريه اطبخي , يا سيدي كلّف ) .

.

طيب برضه الكلام اللي فوق ده جميل اوي بس ينفع في برنامج همسة عتاب , يعني لا يسمن ولا يغني من جوع , هل فيه حلول ؟ أه فيه حلول, مع الأبقاء على سياسة الهيكله و اصلاح الاقتصاد المصري .

.

زي ايه الحلول دي ؟ هقولك حل سريع و فعال للغايه , و مش بس هنبقى بنحل أزمة غلاء معيشه , لا داحنا هنبقى ضربنا خمس ست عصافير بحجر واحد , مشكلة الحل ده انه اقتحام لحقل ألغام جديد , ده قدر السيسي , و دي التركة الهباب اللي سابهالنا مولانا .

.

الحل يا سيدي , هو قرار رئاسي واجب النفاذ فورا , بتجريم الدروس الخصوصيه , يعني تبقى جريمه زيها زي تجارة المخدرات , و لها عقوبه بالسجن مش بالفصل من المدرسه .

.

طب ازاي ده يكون حل ؟ بص يا مولانا , في مصر 20 مليون طالب , بيدفعو في الدروس الخصوصيه سنويا مش أقل من 100 مليار جنيه , 100 مليار جنيه بيطلعو في افتكاسه عبيطه اسمها الدروس الخصوصيه .

.

على مستوى الأسره الواحده , مفيش بيت في مصر مش بيطلع ألف و اتنين و تلاته للدروس شهريا , بعض البيوت بتبقى مصاريف الدروس فيها أكبر من مصاريف الأكل و الشرب , القرار هيقول لكل رب أسره , عندك ألفين جنيه بتصرفهم عالدروس خليهم في جيبك و اصرفهم على الأكل و الشرب هتلاقي الأزمه الاقتصاديه اختفت تماما .

.

طب المدرسين ؟ , هنزود مرتب المدرس بواقع ألفين جنيه , يعني يبقى اول تعيينه 3500 مثلا و بعد كام سنه يبقى 5 الاف و 7 الاف , و عزة جلال الله انا موافق اشتغل مدرس لمدة 7 ساعات يوميا ب 5 الاف , و ابقى اجازه يومين في الاسبوع , و عزة جلال الله موافق , و لو مرتبي مش هيكفي بيتي هشتغل شغلانه تانيه محترمه بعد الضهر ( كلنا بنشتعل 15 ساعه يوميا عشان نعرف نعيش ) .

.

الزياده دي هتكلف ميزانية الدوله حوالي 10 مليار جنيه في السنه , مبلغ مش كبير ( 1 % من الميزانيه ) و سهل جدا يتدبر .

.

طب الطلبه اللي مش هيفهمو من مدرس المدرسه ؟ برضه سهله , عندنا قنوات في ماسبيرو نخصص منهم كذا قناه للتعليم , و نجيب بقى حوت الكيميا و اخطبوط الفيزيا يشرحو للتلامذه حصه بحصه في التلفزيون , يعني مش فاهم من المدرس هتلاقي اللي بيفهمك في التليفزيون و ماشي معاك المنهج حصه بحصه .

.

ده حل و ضروره حتميه , احنا مش هنعيد اختراع العجله , لوجي بنتي و حماده و كوكي و سعيد هيتنافسو من خلال مدرس المدرسه و مدرس التليفزيون , يبقى مجهودهم الشخصي و اجتهادهم هما اللي يفرقو معاهم .

.

كده تحل أزمة غلاء المعيشه ياريس و تحطم تابوت عبيط خرب بيوتنا سنين طويله , اه حقل ألغام بس جمّد قلبك و سمّي الله و دوس , طالما بتعمل اللي بيرضي ربنا .

.........................................................................................................

Mohamed Hussein

19 مايو 2019·

أحلى حاجه في مسلسلات رمضان لحد دلوأتي على الإطلاق على الإطلاق , إن وفاء عامر لسه حلوه زي ماهي , اه و عهد الله .

.

يابني اسكت , اسكت خالص , دانا شوفت عادل امام في المسلسل بتاعه و حسن حسني في المسلسل بتاع ياسر جلال حسيت إني المفروض اشوف لي حته اندفن فيها و اجيب صبّارتين أزرعهم من دلوأتي , إنما لما شوفت وفاء عامر رميت الصبارتين , و قلت لا , داحنا نعيش بقى .

.

عارف يا شيخ عمرو ؟ و مالك عليا يمين , الواحد لما بيشوف وفاء عامر بيحس إنه روحه بترتقي من جوه , مش تقولي فراخ بيضا مجمده , اتعلمو ترتقو صح بقى , جتكو القرف مليتو البلد .

...............................................................................................................

Mohamed Hussein

18 مايو 2018·

عيشت سنين طويله في السعوديه , و اكلت أطنان من دجاج الوطنيه , و كنت كل مابروح مطعم مندي و أكل نص فرخه من بتوع الوطنيه أستنى بعدها إن روحي ترتقي ألاقيها مابترتقيش , يابنت الحلال استهدي بالله و قومي ارتقي ؟ تقولي لأ , على جثتي , اقوم رايح قاعد جنب اليمني صاحب المطعم و اشرب بيبسي و اقول جايز مش بترتقي إلا بالبيبسي , إنما برضه لأ .

.

تفوت سنين و بعدها سنين و اكتشف الحقيقه المره , الحقيقه انا روحي مش بترتقي إلا لما باكل فرخه بلدي او ديك شمورت من اللي بيربوهم عندنا في البلد .

.

بالك انت يا شيخ عمرو , و شبكة العشره دول , الأوناصه بتاعة الديك البلدي لما باكلها بحس انها بتغسلني من جوه و تطهرني , و روحي ترتقي ساعتها كأني لسه راجع من الحجاز , و ألاقيني فجأه بطير وسط الزرع و الخضره وفوق البيوت , و أمي الله يرحمها تنادي و تقولي رايح فين يابني ؟ اقول لها مش بايدي يامه , انتي مش شايفه جناحات الملايكه اللي طلعت لي ؟ عموما انا مش هتأخر . هروح أرتقى شويه و ارجع على طول , تقولي طب والنبي هات لنا بنص جنيه خميره وانت جاي عشان عايزين نخبز .

...........................................................................................................

Mohamed Hussein

18 مايو 2018·

لو سمحت لو سمحت

- نعم يا حبيبي

.

هو حضرتك فطرت ايه ؟

- امبارح ؟ امبارح يا سيدي فطرت بط و محشي و رز و ملوخيه

.

لا النهارده , انا بسأل عن النهارده

- يابني بقولك امبارح فطرت بط و محشي و رز و ملوخيه .

.

النهارده يا استاذ , بقولك النهارده فطرت ايه ؟

- ياض انت عبيط ولا اهبل ؟ ماهي واضحه زي الشمس اهي , طالما فطرت كده امبارح يبقى النهارده بقية المحشي و الملوخيه , و باقي كام صباع محشي هنفطر بيهم بكره و بعده , و بعدين نقعد اسبوع نفطر مكرونه مسلوقه و فراخ بانيه .

.

طب ليه كده ؟

- ده سلو بلدنا يا حبيبي , انت هتكفر ولا ايه ؟! .

.........................................................................................................

( محمد حسين - منوع ) ( 11 مايو 2018 - 18 مايو 2018 )

Mohamed Hussein

17 مايو 2018·

الحذاء بتاع محمد صلاح حطّوه في المتحف البريطاني في لندن , قسم الحضاره المصريه القديمه , اتعاملو مع الحذاء بمنتهى الاحترام و الحذر كأنه قطعه أثريه نادره .

.

الواد ده لو ربنا كرمه و فازو على ريال مدريد في نهائي أبطال أوروبا جماهير ليفربول هتعمله مقام في مدخل المدينه , و أي ست بريطانيه مابتخلفش تروح تطوف حوالين المقام ده و تقول شللاه يابو مكه .

........................................................................................................................

Mohamed Hussein

17 مايو 2018·

لغتنا العربيه ( اللي مش لقيطه )

.

الإبتهال الرائع و الأشهر ( مولاي إني ببابك , قد بسطت يدي ) غناه المنشد العظيم سيد النقشبندي , ألحان بليغ حمدي , و بتوصيه خاصه من الرئيس الراحل أنور السادات .

.

عندما يجتمع رجل الدين المنشد مع الملحن العبقري مع رجل السياسه , مين اللي قال إن الفن مش جزء مهم جدا من قوة مصر الناعمه ؟ و مين اللي قال ان لغتنا العربيه عقيمه ؟

.

في القرأن الكريم , و في بلاغة الألفاظ , بيقول رب العزه ( فاصدع بما تؤمر ) , وبيقول سبحانه و تعالى ( فسيكفيكهم الله ), أتحدى أي لغه في العالم تجيب نفس المعنى و البلاغه و عظمة المصطلحات دي في كلمتين أو سطرين أو حتى صفحتين .

.

في لغتنا الفصحى بيقول أحمد شوقي , وطني لو شغلت بالخلد عنه , نازعتني إليه في الخلد نفسي .

و بيقول عبد الله الفيصل ,يا فاتنا لولاه ما هزني وجدٌ , ولا طعم الهوى طاب لي , هذا فؤادي فامتلك امرهُ , و اظلمهُ إنْ أحببتَ أو فاعدلِ .

.

و في العاميه المصريه بيقول مولانا بيرم التونسى , هو صحيح الهوى غلّاب ؟ ماعرفش انا , و الهجر قالو مرار وعذاب و اليوم بسنه !! .

و بيقول الأبنودي , هاجي يا عمه , و جيت , لا لقيت يامنه ولا البيت .

........................................

في المقابل , و بعد طمس الهويه المصريه ظهرت علينا مجموعه بديعة من الرخويات اللزجه , لا يعرفو يعني إيه لغه عربيه ثريه ولا يعني ايه عاميه مصريه مبدعه و كأننا دوله بنت امبارح لا لها طعم ولا لون و لا نكهه ولا هويه , مجموعه عوجت لسانها بداعي و من غير داعي , و الطعميه بقى اسمها جرين برجر و الكنافه بيبي هير , و في المول تلاقيها بتقول لابنها حماده جو حماده نو حماده دونت .

...........................................

أصدقائي الغاليين , الكلمتين اللي فوق دول مش ألغاز و طلاسم , عوجه اللسان مابتبنيش أوطان ولا بتخلق انسان , علمو ولادكو الإنجليزي كلغه عالميه مهمه جدا , بس بعد ما تعلموهم لغة بلدهم العربيه و العاميه , خليهم يقرو عن شكسبير و فيكتور هوجو بس بعد مايحفضو المعلقات و يعرفو امرؤ القيس و المتنبي و عنتره و حافظ ابراهيم و الأبنودي و بيرم .

.

لغتنا العربيه مش لغه هايفه ولا سمعتها سيئه ولا مناخيرها 3 فتحات , و ب( الجرين برجر و حماده جو ) مش هشوفك متفتح و مثقف و هاي كلاس ولا بطيخ , هشوفك كائن لزج , مثير للشفقه و الإشمئزاز .

..............................................................................................................

Mohamed Hussein

16 مايو 2018·

وحوي يا وحوي

.

- فوانيس و زينه و كهارب , مدفع الإفطار إضرررب , تواشيح النقشبندي , مولاي إني ببابك قد بسطتُ يدي , دعوة الشعراوي بعد الأدان , كنافه و قطايف , عزايم و ولايم , ناس بتصالح و تسامح , جرجس بيعزم محمود جاره عالفطار , و ريتا متعوده كل سنه تعمل وليمه لصاحباتها , و عيال زي الورد يقفو عالطريق ببلح و مايه , يوقفو العربيات و يفطروهم , هتفطر يعني هتفطر , بالذوق بالعافيه هتفطر .

.

المصريين سافرو كل بلاد العالم , مفيش شبر في الكره الأرضيه ماداسشي فيه واحد مصري , و لو سألتهم كلهم هتلاقي نفس الإجابه , رمضان في مصر مش بس شهر للصوم و العباده , ده كارنافال كامل متكامل , فقط و حصريا على أرض المحروسه .

.................................................................................................................

Mohamed Hussein

15 مايو 2018·

بالنسبه لأصدقائي و صديقاتي بتوع القهوه و النسكافيه و السجاير , اللي مابيعرفوش يفتحو عنيهم من غير الحاجات دي ولا يعرفو ايدهم اليمين من الشمال وقتها , اللي زي حالاتي يعني , عايز أقول لكو , ماتقلقوش , باقي 32 يوم على شوال , هانت خالص , و بعدين احنا هنصوم 17 ساعه في اليوم بس , يعني الحسبه كلها حسبة 510 ساعه صوم , دي فركة كعب , أه نسيت اقول لكو حاجه , درجة الحراره هتبقى 74 او 93 , في الحدود دي , يعني في مستوى الطالب المتوسط .

.

حاجه اخيره كمان و نصيحة مهمه جدا , في حالة عدم التركيز و التوهان و فتحة البؤ بتاعة زينهم السلحدار في مسرحية ( الواد سيد الشغال ) , نصيحتي الوحيده المهمه للغايه , اوعى تنادي على مراتك بإسمها , ماتحاولش تناديها بإسمها , اوعى يابني , لأنك هتتلخبط في الإسم غالبا , قول لها يا حبيبتي , طول الشهر قول يا حبيبتي , في الرايحه و الجايه قول يا حبيبتي , عشان ربنا يكرمك و تعدّي الشهر الفضيل على خير و تطلع منه كامل مكمل , بعدد 2 دراع و 2 رجل و اتنين كليه و واحد بنكرياس بحالة جيده .

.......................................................................................................

Mohamed Hussein

14 مايو 2018·

اكتر من 50 شهيد فلسطيني برصاص قوات الإحتلال في قطاع غزه .

حركة حماس تشجب و تستنكر و تتعهد بالتصعيد , أه و عهد الله .

.

شوف يابني :

لو عايز حد يبيع لك الوهم و الشعارات الرنانه و فين الجيوش العربيه و فين الأستاذ عيسى العوام و الأستاذ مليجي , فأكيد مش هتلاقيه هنا , لو عايز عقل و منطق, تعالى هقولك :

.

1- جيوش المنطقه بح , كل سنه وانت طيب , بسبب ايه ؟ بسبب مؤامره و طوفان شارك فيه أبناء الوطن , وشارك فيه الأشقاء العرب بفلوسهم ( أصلهم أصحاب واجب ) .

.

2- مش باقي في الجيوش العربيه القويه غير مصر , واحنا والله مشغولين جدا زي ما معاليك شايف كده , جبهة غربيه بطول 1200 كيلو بنأمنها من جهه واحده , و شبكة أنفاق عملها ( أشاوس حماس ) لتهريب الإرهابيين و الأسلحه ( أصلهم برضه أصحاب واجب ) و عموما ,واجمالا احنا اكتر جيش حارب و قدم تضحيات عشان فلسطين و مع ذلك بنتشتم 7 مرات يوميا من كتير جدا من أشقائنا .

.

3- فلسطين مش هتتحرر بحرب نظاميه لأن الكيان الصهيوني يعني أمريكا و بريطانيا , ده منذ نشأة الكيان المغتصب على فكره , مش أول امبارح بالليل .

.

4- فلسطين تتحرر بمقاومة شعبيه و حرب عصابات , مقاومه يشارك فيها الشعب الفلسطيني ك ( جسد واحد ) , و أول خطوه في خطواتها هي التخلص من حركة حماس , الحركه اللي من سنين طويله اتحولت لمجرد شوية مرتزقه لا في دماغهم قضيه ولا بطيخ , و أكبر ضربه في مقتل للقضيه الفلسطينيه كانت يوم ما سيطرو على قطاع غزه وقسّمو فلسطين لدويلتين !!

.

5- لو المجهود اللي بذلته حركة حماس السنين اللي فاتت في حفر الأنفاق و تهريب الأسلحه و الإرهابيين لقتال الجيش المصري , لو كانو بذلو نصه مع الكيان الصهيوني كان زمانهم حررو بلدهم من بدري .

.

6- الإخوان و الجماعات الجهاديه و المنفلوطيه و الإرهابيين بتوعهم , اللي بقالهم سنين بيحاربو جيوش بلادهم و يخربوها , لو كانو وجهو حربهم ضد الصهاينه , كان زمانهم رفعو علم فلسطين فوق واشنطن ذات نفسها ( بس إزاي يعملو كده و هما أصلا صنيعة الصهاينه و الأمريكان ؟! ) .

.

7 - فكرة إن أمريكا تنقل سفارتها للقدس , القرار ده له معنى عند بتوع السياسه و الدبلوماسيه بس , له دلاله عندهم تستوجب الرفض , إنما إنت كمواطن فلسطيني مش هيفرق معاك خالص , ليه بقى ؟ لأن ببساطه شديده أرضك مش هتتحرر بالدبلوماسيه , هتتحرر بدراعك , و يوم ماتحرر أرضك مش هيبقى فيه حاجه اسمها اسرائيل و بالتالي مش هيبقى فيه مبنى اسمه سفارة أمريكا في اسرائيل سواء كانت في تل أبيب أو في القدس أو في رام الله , ممكن المبني ده وقتها تحوله لمتحف أو تعمله مول تجاري كبير , ياكشي حتى تربي فيه فراخ .

.

ربنا يرحم الشهداء و ينصر الفلسطينيين على الصهاينه و على المرتزقه اللي بيتاجرو بيهم و بقضيتهم و بدمهم .

...............................................................................................................

Mohamed Hussein

14 مايو 2018·

و انا عيل صغير في ابتدائي , يعني قد كداهو , كان فيا عاده غريبه زي كتير أوي من أبناء القريه , العاده الغريبه هي العوم في الترعه , نستنى يا مولانا لما الترعه تكون مليانه مايه و المايه بتجري فيها , و نروح مكان جنب القريه نقلع سالبوته و ننط في الترعه و نغطس غطسين تلاته , فشر رانيا علواني في زمانها .

.

الحكايه دي كان لها متعه عجيبه , بيسين ربّاني , بس اللي كان بيحصل إن أبويا الله يرحمه أو أي حد من أعمامي لو شافونا بيجرو ورانا بعصايه أو فرع شجره و ينزلو ضرب فينا ( و احنا سلبوته ) عشان مانعملش كده تاني , في الوقت ده كنا بنطلع نجري و احنا خايفين , و نتضايق , إزاي يسلبونا حقنا الدستوري في العوم في الترعه ؟ داحنا بنبقى مبسوطين أوي لما بنعمل كده , ليه يسرقو سعادتنا ؟ .

.

و لما كبرت و اتجوزت و خلفت , فهمت و عرفت السبب , كانو بيجرو ورانا بالعصايه و يلسوعونا عشان خايفين علينا , خايفين نغرق و نموت , مش كارهين سعادتنا ولا حاجه .

.

الحقيقه موضوع ( شم الكوله) له بالظبط بالظبط نفس متعة العوم في الترعه , شعور جميل اوي انك تقول *سم فلان و فلان عر* و تشتم الكل و تقول هنعمل ثوره كل يوم تلات و تفتح زراير القميص و تلعن بلدك و تاريخها و تقول الواحد مننا لو سافر فرنسا هيقابله الرئيس الفرنسي في المطار و يعينه فورا في منصب عمدة مارسيليا , شعور رائع انك تقول أجيال عبيد بياده و طبالين , و تحس في نفسك و ذاتك بالفخر و الفخار لأنك مناضل و بطل و قيمته بقيمة مليون واحد ( من الطبالين والعبيد ) , انا جربت الشعور ده سنه و عارفه , متعه ما بعدها متعه .

.

طب ايه اللي بنعمله حاليا و من 5 سنين ؟ الله بنعمله مع شمامين الكوله ( الكبار و الصغار ) هو اننا بنجري وراهم بالعصايه ( الكتابه الساخره ) و نلسوعهم عشان يفوقو و يبطلو ( عوم في الترعه ) , لأنهم ببساطه شديده ممكن يغرقو , بكره لما عقولهم تكبر هيعرفو اننا خايفين عليهم من الغرق , و إن خوفنا مبالغ فيه شويه عشان الحكايه مش هتبقى ( عيل و غرق ) , الحكايه بتبقى ( وطن و غرق ) .

.

الحقيقه إن البلاد اللي وقعت ( و غرقت ) حوالينا مكانشي اكبر مشاكلها جيوش ضعيفه ولا اقتصاد ضعيف و لا و لا ولا , السبب الأهم في الغرق هو شعوب أغلبها ندهته النداهه و بقى يعوم في الترعه , و ينبهر بتوكل كرمان و بالحريه الأمريكاني و يسمّي المرتزقه الإرهابيين اللي جايين من اخر بلاد الله ( جيش حر ) و كل يوم ياخد له غطسين تلاته في جمال و نزاهة و رقة الميديا الغربيه و مراكز حقوق الإنسان , و يطلع من الغطس يا مولانا يبص حواليه يلاقي وطنه بح , مفيش وطن , مممممممم مانت اللي طوّلت في الغطس يا جدع .

.......................................................................................................................

Mohamed Hussein

13 مايو 2018·

حدوته مصريه على أرض الإنجليز .

.

دي بنت مصريه زي العسل اسمها مكه , و دي أم مصريه عظيمه اسمها ماجي , وده الشاب المصري اللي هيكون بإذن الله أحسن لاعب في العالم اسمه محمد , و ده علم مصر( أعظم بلد في الكون ) , مكه و ماجي و محمد و مصر !! , امبراطورية ميم .

.

طب ليه علم مصر في ملعب أنفيلد و في ماتش في الدوري الإنجليزي و في جايزة اسمها الحذاء الذهبي لهداف الدوري الإنجليزي ؟ عشان الواد ده و عيلته مصريين أوي , مصريين للنخاع , مصريين حتى الثماله .

.........................................................................................................................

Mohamed Hussein

13 مايو 2018·

رسميا , ابننا محمد صلاح يفوز بجايزة هداف الدوري الإنجليزي للموسم 2017\2018 برصيد 32 هدف متفوقا عالواد هاري كين بتاع توتنهام ( 30 هدف ) اللي محتكر الجايزة بقاله سنتين .

.

و رسميا برضه صلاح يصبح الهداف التاريخي للدوري الانجليزي ( في نسخة ال 20 فريق ) , يعني الهداف التاريخي للدوري الانجليزي من سنة 92 لحد النهارده ( من ربع قرن ) بعد ما كسر الرقم القياسي بتاع ألان شيرر و سواريز و كرستيانو رونالدو ( 31 هدف )

.

صلاح السنادي فاز بجايزة احسن لاعب في أفريقيا ( من ال BBC و من الاتحاد الأفريقي ) و أحسن لاعب في الدوري الإنجليزي ( من الاتحاد الانجليزي و من النقاد الرياضيين الانجليز و من الشركه الراعيه ) .

.

صلاح خسر الصراع على جايزة الحذاء الذهبي السنادي ( لهداف دوريات أوروبا بالكامل ) , خسره لصالح ليونيل ميسي بفارق هدفين ( و ميسي لسه له ماتشين ) , بس انا مش زعلان , بالعكس مبسوط , ليه بقى ؟ عشان ماينفعش يا صلاح تفوز بكل الجوايز و تحطم كل الأرقام القياسيه مره واحده وفي سنه واحده , انت السنادي حققت 80 % من الجوايز و حطمت 80 % من الأرقام القياسيه , خلّي حاجه للسنه الجايه عشان يفضل عندك طموح .

.

و إجمالا مفيش غير جايزيتين اتنين مافوزتش بيهم لحد دلوأتي , الحذاء الذهبي ( و دي تتعوض السنه الجايه بإذن الله ) و أحسن لاعب في العالم و دي انت مرشح لها بقوه , خصوصا لو كسبتو نهائي دوري أبطال أوروبا قدام ريال مدريد و صعدت مع منتخب مصر لدور ال 16 في كاس العالم .

.....................................................................................................................

Mohamed Hussein

13 مايو 2018·

من خمس سنين و انا لما بفتح ملف الرسايل بتاع الأوزرس , الناس اللي مش في الأصدقاء , بلاقي نوعين اتنين بس من الرسايل , ده طبعا بعد استبعاد رسايل الشير و جمعه مباركه و التلات بتاع حمدين و ماتقبلش صداقة شيتوس و شاهد قبل الحذف و ابعتها لسبعتاشر من اصحابك و كل الهري ده , انا بقصد الرسايل اللي بتتكتب بالإيد .

.

النوع الأول من الرسايل كلام مدح و إشاده و ناس مشكورين بيبقو عايزين يبعتو طلب صداقه , و النوع التاني هو العكس تماما , شتايم بالأب و الأم , كلها شتايم +18 , بالكام كلمه المعروفين و المتداولين في أي قاعدة 3 عيال صيع مع بعض , اللي هو نظام عر* و أمك و يابن الكذا .

.

النوع التاني ده بيبعتوه الخرفان و شمامين الكوله من سنين , و الطريقه هي هي , أكاونت جديد يتعمل من ساعتين , يبعت الرساله و يقول الكلمتين اللي واقفين في زوره و يقفل الأكاونت و يطلع يجري , الناس دي بتصعب عليا و الله , و دايما بشوفهم في صورة عيل صغير برياله ماشي ملط في الشارع و كل شويه يمسك طوبه و يحدفها على عربيه ماشيه و بعدين يطلع يجري يستخبى في أي خرابه , بيصعب عليا أكتر لما اتخيل الواد الصغير أبو رياله اللي بيحدف طوبه و يجري و أفكر في حقيقته و ألاقي انه احتمال يكون بيه لابس بدله و كرافته و متجوز و مخلف أو هانم من هوانم الكعب العالي , لكن الخرفنه و الكوله لحست دماغهم فبقو يحبو يلعبو دور الواد السلبوته اللي في ايده طوبه .

.

المهم و الجديد , ان قايمة العيال السلبوته انضم لها مين بقى ؟ أبناء مبارك , و بقو يبعتو نفس الرسايل , بنفس المصطلحات , لا يقلو كلمه و لا يزيدو كلمه , ماشاء الله عليهم موهوبين و بيذاكرو من نفس كتاب الوساخه .

.

بص يا حبيبي , هات ورقة نتيجة صغيره كده عشان أكتب لك فيها مميزات مبارك , ف سطرين تلاته , بطل من أبطال حرب اكتوبر , كان كويس أول عشر سنين في حكمه , ماحاولش يلعب في عقيدة الجيش المصري ولا يعين فيه قيادات من قرايبه و محاسيبه ( و إلا جيشنا ده كان وقع في يومين زي الجيش العراقي و السوري ) , استجاب للمحاكمه و اتحاكم 5 سنين هو و عياله , ماستغلوش معارفهم و شعبيتهم و ( فلوسهم المتلتله ) في إنهم يخربو البلد ويولعوها ( كانو يقدرو يعملو كده ) , و عمل كمان شوية مشاريع ماننكرش ( المشاريع اللي عملها مبارك في تلاتين سنه السيسي عمل اكتر منها في سنتين ) .

.

هات بقى اجنده من حجم A4 فيها 300 ورقه عشان اكتب لك عيوب مبارك و مصايبه و بلاويه , من أول 6 مليون موظف حكومي , لحد البيروقراطيه لحد دولة الفساد , لحد اهمال الصناعه , لحد تدمير زراعة القطن المصري لحد سياسة الدعم لحد اهمال البلد و الزباله و العشوائيات لحد شلة المنتفعين و الصيع , لحد السماح للإخوان بالتوغل في مفاصل الدوله و تكوين امبراطورية اقتصاديه , لحد طمس الهويه لما ساب البلد مرتع للفكر الوهابي لحد لحد لحد .

.

الكلام اللي فوق ده اسمه الإنصاف , اسمه العقل , تفكّر بتجرد , لا مبارك كان جوز أمي و بحقد عليه و لا السيسي يبقى خالي و مربيني في بيته .

.

و إجمالا عايز أقول حاجه مهمه لكل الأصدقاء و المتابعين , أبويا الله يرحمه لو طلع من قبره و قال و النبي يا محمد يابني تكتب اللي الناس عايزاه حتى لو مش مقتنع بيه هقوله لأ , و دي هتكون أول مره في حياتي أقول لأبويا لأ .

..................................................................................................................

Mohamed Hussein

12 مايو 2018·

ولا يوم من أيامك يا مبارك

.

يا عم كانت تذكرة المترو بجنيه , و تذكرة القطر بنص جنيه , و الكهربا رخيصه و البنزين رخيص و الجاز ببلاش , و كان رغيف العيش قطره نص متر , و الفرخه بتبيض 3 مرات في اليوم ............. ممممممممم ستوب كت هايل يا فنان .

..

بص يا حبيبي

- مبارك أبو تذكره بجنيه وفرخه بتبيض 3 مرات في اليوم , كانت له سياسه جميله اوي , اسمها سياسة ( دلّع الزبون ) , يعني ايه دلع الزبون ؟ يعني خليه مبسوط و فاتح بؤه و سعيد بثبات الأسعار وهو مش عارف الكارثه اللي مستنياه , طب ليه تدلع الزبون ؟ عشان تحافظ على شعبيتك و تبقى رئيس خمسين ستين سنه وابنك يورث العزبه من بعدك .

.

- طب ايه مشكلة سياسة دلع الزبون ؟ مشكلتها انها مابتبنيش بلد ولا بتحل مشاكلها , بالعكس , مشكلتها انها بتهد بلد و بتخلي خبر انهيارها مسألة وقت مش أكتر .

.

الباشا كان بيرمي من على كتفه , و عايش بطريقة اللي ييجي بعدي يحلها , تذكرة المترو بجنيه و المترو بيخسر و عايز دعم من ميزانية الدوله مش مهم , تذكرة القطر بكذا و السكه الحديد بتخسر و مش عارفه تعمل صيانه ولا خطوط جديده مش مهم , الكهربا بتخسر و بتاخد دعم من ميزانية الدوله مش مهم , البنزين و الجاز بياخدو دعم من الدوله مش مهم .

.

و تبقى النتيجه ايه ؟ النتيجه ان كلمة (دعم ) بتمثل ربع ميزانية مصر , و ربع كمان رايح في تسديد فوايد الديون , يبقى نص الميزانيه طاير , و النص التاني يادوب مرتبات لخمسه سته مليون موظف حكومي في بلد مش محتاجه اكتر من مليون ( دي برضه كانت من سياسة دلع الزبون ) .

.

المهم يا سيدي , تعمل مشاريع و بنية تحتيه منين ؟ و تحل مشاكل من جذورها ازاي ؟ يابني مانا لسه قايلك اهو , الميزانيه بح , الميزانيه مش باقي فيها ولا مليم , طارت في الدعم و فوايد الديون و المرتبات , و كل عام و انتم بخير ( بصوت مدحت شلبي ) .

.

عبد الفتاح السيسي هو عكس مبارك تماما , هو الراجل اللي شال السجاده و ورانا التراب المتراكم تحتها من تلاتين سنه , هو الراجل اللي قال عشان نبني البلد دي لازم نعمل كذا و كذا , هو الراجل اللي مش بتاع ( دلع الزبون ) و لا في دماغه حكاية الشعبيه , هو الراجل اللي قال مش هعمل زي اللي قبلي ولا هسيب مشاكل كبيره و ملفات هباب للي هييجي من بعدي .

.

أه الجيل بتاعنا ده حظه نيله , جيل لقى نفسه فجأه في حرب مع الإرهاب و مؤامره بنت وسخه , جيل بقاله سنين بيناهد و يهاتي و يستحمل سخافات متواصله عشان يحافظ على بلده و يحميها , جيل كمان لقى نفسه مضطر يدفع فاتوره جيلين تلاته قبله .

.

اه الوضع صعب عالكل , مش بس البسطاء , حتى الطبقه المتوسطه اللي انا منها بقينا بنكح تراب , و عهد الله بنكح تراب و بتمشي بالزق , لكن ماقدمناش طريق تاني , احنا مشينا في طريق الإصلاح و الهيكله و نبني بلد زي مخاليق ربنا , لو وقفنا في نص الطريق و قررنا نرجع ( للدعم و الهشتكه ) هتبقى الحكايه انتحار .

.

مطلوب من الحكومه و مجموعتها الإقتصاديه التفكير في شوية حلول جنب ( خطة الأصلاح و الهيكله ) , حاجات لتخفيف العبء عن الناس , الأرض بنزرعها و بنحرتها و بنعرق فيها و تعبنا , و لسه شويه لحد مالمحصول يكبر و نجني ثماره , مطلوب بؤ مايه نشربه عشان نعرف نكمل , بؤ مايه للناس التعبانه , و ليا أنا شخصيا .

.

حاجه اخيره عايز أقولها , لو عايز تعرف سياسة دلع الزبون نتيجتها الحتميه ايه ؟ مش هقولك غير كلمه واحده , فنزويلا , والسلام عليكم و رحمة الله و بركاته .

........................................................................................................................

.

Mohamed Hussein

11 مايو 2018·

المسطره

.

تخيل انك قاعد على كرسي و قدامك مكتب , و على المكتب ده مسطره طولها 20 سم , و فكرت شوية في حال أصدقائك و المجتمع و الناس , فكرت في العقول و القناعات , هتوصل لإيه ؟

.

الرقم المطلوب التواجد عليه في المسطره هو رقم 10 , الوسطيه في التفكير , الإتزان , العقول لما بتعرف تفكر و تقارن و تعطي ما لكسرى لكسرى و ما لقيصر لقيصر .

.

أغلب الأصدقاء بشوفهم بعيد جدا عن رقم 10 , إما إنهم عند رقم 0 أو عند رقم 20 , أقصى الشرق أو أقصى الغرب , الإفراط أو التفريط , الغريبه ان كل واحد متشبث بمكانه , متشعلق في الرقم ( الشاذ ) بتاعه و متبت فيه بإيديه و سنانه , الأغرب إنه مقتنع تماما ان ده افضل مكان عالمسطره و إن بقية مخاليق ربنا لازم تروح و تتكربس عند النقطه اللي هو واقف فيها .

.

- صديقي الناصري اللي بيلغي من عقله 50 سنه فاتو بحلوهم و مرهم , بيلغي الصوره اللي بقت واضحه للأعمى , بيلغي حال العرب و الدول حواليه , و عايز يعيش بنفس فكر عبد الناصر اللي كان من نص قرن , يابني صدقني , عبد الناصر نفسه لو طلع من قبره و شاف أفكارك و خزعبلاتك الحاليه دي هيضربك بالنار و يرجع قبره تاني .....

.

- صديقي العلماني اللي عاش شويه في أوروبا و انبهر فقال بس , الحل اننا نلغي كل ماهو ديني في مصر , و نلغي الأزهر و المنابر و الكنيسه , و نعمل مكانهم فاسقيه , و كأن الكرافته ممكن تتلبس على جلابيه , و موتور المرسيدس يركب على جيب شيروكي , و كأن مصر دوله بنت امبارح أو حتة عجينه نشكلها بإيدينا زي مالخواجات عايزين .

.

- صديقي الإسلامجي اللي بقاله سنين طويله متشعلق في توب الوهابيين و البهاليل و كعب المرأه و مناخير المرأه , و يوم ما فكر انه يجاهد راح يجاهد ضد جيش دولته !! عشان في الأخره يبقى يقابل حور العين ( المرأه برضه ) .

.

صديقي اللي فاهم ان انتقاد ايران بيعني مدح في الصهاينه , يابني اقرا دين ام التاريخ و ماتقرفناش , إيران دوله استعماريه اسمها دولة الفرس , و الصهاينه كيان استعماري مغتصب , و تركيا دوله استعماريه ( العثمانيين ) , و أمريكا و بريطانيا دول استعماريه هتعمل أوسخ من اللي بيعمله الشيطان عشان تحافظ على سيطرتها على العالم , و روسيا لها مصالح و بتحاول ترجع و تستعيد دورها , يعني محدش بيموت في دباديب اللي خلفونا , كلهم كلاب السكك , و يوم ماتجيب كلب منهم في بيتك هيجيب بقية الكلاب وراه و بيتك يتحول لفريسه و الكلاب يقسموها مابينهم .

.

صديقي اللي لسه لحد النهارده متشعلق في توب الديموقراطيه الأمريكاني و مراكز حقوق الانسان و العصافير الكناريا , و لسه فاهم ان المراكز دي و قناة الخنزيره و الميديا الغربيه بيبيعو سبح و حجو بيت الله 300 مره , لا انت كده ماتبقاش قاعد على طرف من طرفي المسطره , انت قاعد على حاجه تانيه .

.

أصدقائي الغاليين , في المجمل , انا مصري , لا يلزمني ( حْدف ) الشرق ولا ( نتر) الغرب , احنا مركز الكون و اعظم دوله في التاريخ , لنا شكل و طعم و هويه و جينات , نعمل علاقات كويسه مع زيد و عبيد ماشي , نستفيد من تجربة فلان أو علان ماشي , لكن مش على حساب اننا نلغي العقل أو نلغي الهويه .

.

اعتذاري للجميع .

.....................................................................................................................