Mohamed
Hussein
3
مايو 2018·
من غير هبد
.
نظام التعليم الجديد
, ماله و ما عليه , و ماللهوي , و انا مالي يامّه .
.
بص يا مولانا
- عشان تحكم على
أي حاجه لازم تقراها بالتفصيل و بهدوء و من غير انفعال , و لما تكون الحاجه دي بتخص
الكل يبقى لازم كمان تحكم عليها ب ( تجرُّد ) .
.
ايه الجميل ؟
- الطالب لحد تالته
ابتدائي مش هيمتحن , ده مش بس جميل , ده رائع , ليه ؟ عشان اطفالنا يعيشو شويه من طفولتهم
يا مولانا , مايحسوش من سن 5 سنين انهم في أتون معركة حربيه .
.
- المدارس التجريبي
اللغات هتفضل زي ماهي ( مش هتتلغي ) , إنما المناهج العلميه فيها هتتدرس بالعربي ,
و الإنجليزي هيكون ماده أساسيه طبعا , يعني هتبقى زي الحكومي , طب دي حاجه حلوه ؟ أه
حلوه جدا , ليه ؟ عشان احنا مش بريطانيين و لا أمريكان , ولا لغتنا العربيه دي ناقصه
حرف ولا مناخيرها 3 فتحات , ولا هي حاجه تعرّنا , الجيل بتاعنا ده كانت دراسته العلميه
كلها بالعربي لحد الجامعه , و لما دخلنا كليات علميه و لقينا الدراسه بالانجليزي و
صعبه جدا و معقده ماجالناش حب شباب ولا كساح ولا قلعنا ملط في الشوارع , اتعلمنا و
درسنا و فهمنا و بقينا عتاوله , و حتى لما سافرنا كنا أفضل بكتير جدا من زمايلنا من
الدول التانيه .
.
- طب هبسطهالك
بمثل أوضح , بنتي في خامسه ابتدائي في مدرسة لغات ( يارب يلغوها بحق جاه النبي ) ,
بتدرس علوم و رياضيات بالانجليزي , مناهج صعبه جدا على سنها , لولا مامتها بتذاكر معاها
مستحيل هتعرف تذاكر لوحدها , و البديل طبعا دروس خصوصيه , مش ده المهم , ده فيه الأهم
, لما بقعد مع لوجي و هي بتذاكر ( ساينس ) بتفاصيل صعبه و بالانجليزي بكون متعمد اسألها
, تعرفي الكلمه دي يعني ايه بالعربي ؟ تقولي لا , عارفه ال spleen ده اللي هو ايه ؟ لا , يعني باختصار جزء كبير جدا
من تعبهم مش هيعرفو يطبقوه في الواقع و حياتهم اليوميه ( لأننا مش عايشين في لندن
) .
.
- 95 % من اللي
بيدرسو المواد العلميه بالإنجليزي مش هيدخلو طب ولا صيدله ولا هندسه وبالتالي دراستهم
مش هتفيدهم بحاجه , بالعكس لو كانو درسوها بالعربي كانو استفادو منها في حياتهم اليوميه
, كمعلومات عامه .
.
- اه بالمناسبه
, ماعتقدش ان الأشقاء في كوكب اليابان بيهينو لغتهم كده و بيصلو و يصومو للغه الإنجليزيه
, ولا اعرف ان أم أوشين بتبقى ماشيه في مول في طوكيو و كل شويه تقول بنتها , أوشين
نو , اوشين دونت , أوشين ساي ثانك يو , أوشين كَم , زي مابيعمل بعض المخابيل عندنا
.
.
طب ايه اللي مقلق
في النظام الجديد ؟ هو نظام الثانويه العامه التراكمي , محتاج توضيح و ضمانات أن كل
طالب ياخد حقه على قد اجتهاده .
.
طب انا بحلم بإيه
للبلد دي و بمنتهى التجرد , و حتى لو على حساب بناتي
.
1- زياده مرتبات
المدرسين و يكون الحد الأدنى 3 ألاف ( مع بداية التعيين ) , و تجريم الدروس الخصوصيه
( يعني تبقى جريمه ) .
.
2- توحيد السبعتاشر
نوع مدارس في مصر و يبقو نوع واحد , مدارس حكوميه مصريه , مش حكومي و قومي و خاص عربي
و خاص لغات و انترناشونال و نص انترناشونال و تجريبي عربي و تجريبي لغات وتوماتيكي
و نص توماتيكي , ده اسمه هبل .
.
3- لو عايزين نبقى
على وجود مدارس انترناشونال يبقى لازم الدوله تتدخل بأي شكل يضمن دراسة اللغه العربيه
كماده أساسيه و دراسة تاريخ مصر كماده أساسيه من أول ابتدائي , الطالب في المدارس دي
العربي عنده ماده مش أساسيه و بيخلص ثانويه و هو مابيعرفش يكتب إسمه , ولا بيدرس تاريخ
يُذكر , يعني لو سالته عن رمسيس هيقولك محطة قطر في القاهره و لو سألته عن محمد علي
هيقولك بطل الملاكمه .
.
ماهو انا مش عشان
أعلّم حماده بنظام أمريكي أو بريطاني و أظبط له ال ( أكسو ) أقوم أدمر هويته و يطلع
مايعرفش حاجه عن لغة بلده ولا تاريخها , يا سيدي ملعون أبو الأكسو على أبو أمريكا على
أبو بريطانيا , أه وعهد الله .
........................................................................................................
Mohamed
Hussein
3
مايو 2018·
يعني ايه زمن البلاله
؟
.
يعني تبقى راجل
قد الدنيا و عندك موبايل بكاميرا و اشتراك نت و قاعد عالقهوه بتشرب معسل انت و الواد
علي علوكه صاحبك , تقوم تخطر في دماغك فكره عظيمه و جباره ( مع إنك ماتعرفش الألف من
كوز الدره ) , تقوم سايب ( اللي ) بتاع الشيشه على جنب و تعمل فيديو و تهري و تنكت
في حاملات المروحيات و الغواصات النوويه و عيوب الطيارات الرافال اللي الشكمان بتاعها
مخروم و الفتيس بيقفش لوحده .
.
أو تكوني ست (
قد الدنيا برضه ) و عندك موبايل بكاميرا و اشتراك نت ورايحه تنشري الغسيل تقوم تضرب
في دماغك فكره عظيمه , تقومي راكنه سبت الغسيل على جنب و تعملي فيديو تقولي فيه ليه
يلغو المدارس التجريبي , انهم يسحقون الطبقه المتوسطه , يا ويلي شُلّت ذراعي , و ليه
مايلغوش الانترناشونال و ملاعب الجولف , و متشطرين على زراعة الرز بس , طب مانزرع مكرونه
, و ليه يلغو يوم الخميس ؟ طب مايلغو يوم التلات , ده حتى التلات مش بتاعنا و الخميس
بتاعنا , و احنا بقى هنعمل ثوره ( و أم شوشو جارتنا هتنزل معانا ) , و نغير النظام
و نجيب نظام تلاته شعله .
و بدل ما تنشري
الغسيل تقومي ناشره الفيديو و شخرميت ألف بني ادم يقولو لك في نفس واحد , الله , يادين
النبي , ايه الحلاوه دي يا ست ؟ و على رأي سمير غانم في مسرحية المتزوجون لما بص لجورج
سيدهم و مراته وقال لهم بهدوء ( اعملو لنا نوم العازب بقى عشان المدام ) .
.
يعني ايه زمن البلاله
؟ يعني سواق التوكتوك فكره و الفكره لا تموت .
.
احنا الهبد فينا
بس ربنا هادينا .
.............................................................................................................
Mohamed
Hussein
2
مايو 2018·
محمد صلاح كان
بيلعب في روما السنتين اللي فاتو , و اتنقل السنادي لليفربول , حطم كل الأرقام القياسيه
و فاز بكل الجوايز .
.
المهم صلاح حظه
وقّع فريقه الجديد مع فريقه القديم في قبل نهائي أبطال أوروبا , ماتش الذهاب كان في
ليفربول و فازو على روما 5/2 , صلاح جاب جونين و صنع اتنين , أو بمعنى أصح قدمهم هديه
لساديو ماني و فيرمينيو ..يعني يعتبر أحرز 4 أهداف من الخمسه , و رفض الإحتفال بأهدافه
عشان جابها في فريقه القديم .
.
صلاح سافر امبارح
مع ليفربول لروما عشان يلعبو ماتش العوده , تشوف الإستقبال تنبهر , ده استقبال ملوك
, الشرطه الإيطاليه خلّصته من وسط الجمهور الإيطالي و ركبته العربيه بالعافيه , و الأغرب
ان ظباط الجوازات الطليان لما استقبلو ليفربول من على سلم الطياره , قعدو يحضنو في
صلاح و يتصورو معاه سيلفي كأنه ابنهم اللي شغال في بلاد بره و رجع لبلده !! .
.
يا جدعان الواد
ده نفخكو في الماتش الأولاني و هينفخكو النهارده كمان بإذن واحد أحد , يقولك مش مهم
, برضه بنحبه , و لو حكمت ممكن نغنّي له النهارده في المدرجات نفس الأغنيه اللي بتغنيهاله
جماهير ليفربول ( مو صلاح زا ايجيبشن كينج ) .
.
اللي بيعمله محمد
صلاح في ملاعب أوروبا و في الجماهير الأوروبيه مش قصة موهبه و حرفنه و مجهود و تدريب
و حلم و هدف و عزيمه , اللي بيعمله أكتر بكتير , المحبه دي فوق الوصف و فوق الخيال
و فوق حدود العقل , حاجه كده ملهاش كتالوج .
.
ربنا يحفظك يابني
من شر العيون و من شر ولاد الحرام .
.............................................................................................................
Mohamed
Hussein
1
مايو 2018·
محمود عباس أبو
مازن : رفضنا عرضا من مرسي بالحصول على قطعة من سيناء !! .
.
شوف يابني
- أبو مازن ده
تحبه أو ماتحبهوش اسمه رئيس دوله , يعني ايه رئيس دوله ؟ يعني الكلمه بحساب و التصريح
بحساب , كل حرف بيقوله رئيس أي دوله بيكون محسوب عليه , ده مش بياع بليله فارش على
ناصيه في شارع من شوارع رام الله .
- التصريح كمان
بيتكلم عن مرسي و جماعته اللي لسه موجودين و على قيد الحياه , مش كائنات منقرضه , مش
بيدّعي على الديناصورات و طائر الرخ , و بالتالي تصريح زي ده مايتقالش إلا لو كان حقيقي
مليون في الميه .
.
دلوأتي حضرتك ممكن
ببساطه شديده تسأل نفسك , مين بالظبط اللي كان عايز يبيع سينا ؟ اللي وعد أبو مازن
بقطعه منها و جاب ألاف الغزاويه و عمل لهم بطاقات رقم قومي بجنسيه مصريه ؟ و لّا اللي
بقاله أربع سنين بيعمّرها و يصرف عليها 250 مليار جنيه , و بيحارب الإرهاب فيها عشان
ينضفها و مستعد لأي تضحيه في مقابل إن الإرهابيين مايرفعوش علمهم على متر من ترابها
؟ .
.......................................................................................................
Mohamed
Hussein
30
أبريل 2018·
رسالة لإبننا محمد
صلاح , أتمنى انها توصل له و يقراها .
.
يا محمد
- إمبارح كان يوم
عجيب و الحمد لله المشكله اتحلت و الموضوع خلص , بس فكرة إن هاشتاج لدعمك يحتل صدارة
تريندات تويتر على مستوى العالم في ساعة زمن بتقول ان شعبيتك ماحصلتش , و دي حقيقه
, الشعبيه و النجوميه دي محدش وصل لها في العالم غير ميسي و رونالدو و يمكن خمسه سته
غيرهم في اخر عشرين سنه .
.
- يا أخي الهاشتاج
بتاعك شارك فيه ناس من بريطانيا و ألمانيا و البرازيل و ماليزيا و روسيا و جزر القمر
و قبائل الكوتوموتو الأفريقيه , ناس مايعرفوش عربي ولا يعرفو المشكله ايه , انما مجرد
ماحسو ان محمد صلاح متضايق قالو من غير تفكير ( ندعم محمد صلاح ) .
.
و من شوية قريت
خبر بيقول إن مواطن ياباني جه من طوكيو لقريتك ( نجريج ) عشان يعرف و يبحث في سر موهبتك
و نجوميتك , من طوكيو لنجريج !! , داحنا مش بعيد نضطر نعمل لك مطار دولي صغير جنب القريه
لاستقبال الباحثين و العشاق و المريدين اللي عايزين ييجو من كل مكان في العالم , أه
و عهد الله .
.
أقولك على حاجه
أغرب , ملايين من البنات و الستات في مصر من سنه واحده بس مكانوش يعرفو حاجه عن الكوره
ولا يعرفو الفاول من الأوفسايد , و تسألها انتي اهلاويه ولا زملكاويه تقولك يعني ايه
؟ بس النهارده بقو خبراء كوره بسببك , حافظين أسماء لاعبي ليفربول عشانك و حافظين مواعيد
الماتشات .
.
يا محمد يا محمد
, ركز في الكلمتين الجايين و النبي :
- الشعبيه و النجوميه
الجارفه دي محدش وصل لها في مصر , انت بقيت رمز و قدوه لملايين الشباب في مصر والوطن
العربي و العالم .
.
- طب كويس , النجوميه
دي على قد ماهي حاجه رائعه إنما تقلق , لأن بلدك في حالة حرب و المتربصين بيها كتير
جدا , و الخونه و الصيع اللي مستنيين فرصه ينهشو في لحمها ( زي ماحصل من بعضهم امبارح
) .
.
- فكرة انك تكون
رمز و أيقونه محترمه للشباب بتقلق جدا ولاد الوسخه , اللي هما عباره عن دول و دويلات
و أكشاك و جماعات ارهابيه , ولا استبعد ابدا انه تكون فيه محاولات حاليا لاغتيالك ولو
بشكل معنوي , أو محاولات لتشويهك أو لتدمير الرمز و القدوه , سكك الأوساخ و دهاليزهم
مابتخلصش .
.
- طب تعمل ايه
بقى ؟ باختصار شديد و بمنتهى الحب و الأمانه هقولك الكلام اللي مش هيقولهولك مدير اعمالك
:
- ركز ثم ركز ثم
ركز في تدريباتك و ماتشاتك و حلمك و حلمنا اللي عايزينك تحققه
- ابعد كل البعد
عن تويتر و سكة الهاشتاجات و التريندات لانها ندّاهه يابني هتاخدك في سكة اللي يروح
مايرجعش .
- خليك حذر جدا
في تعاملاتك و علاقاتك و تصريحاتك و عقودك واعرف ان مش كل حاجه شايفها من بره خير هيكون
جواها خير !! .
......................
هقول لك تاني
, اتدرب و كل النجيله و انحت في الصخر , ابعد عن سكّة ( الندّاهه ) , اسجد لله بعد
كل هدف , إفخر بكل جايزه تاخدها بس خلّي فخرك الأول و الأكبر و الأهم هو محبة و احترام
و دعاء المصريين , المصريين اللي بجد يا محمد , اللي بيقولو تحيا مصر و بيحطو صورتك
جنب صورة علم بلدهم .
...........................................................................................................
Mohamed
Hussein
29
أبريل 2018·
محمد صلاح موقع
عقد للدعايه مع شركة فودافون , و الأشاوس بتوع اتحاد الكوره نزّلو صورة صلاح على طيارة
المنتخب و جنبها اعلان لشركة we .
.
وكيل محمد صلاح
خاطب بتوع اتحاد الكوره وان كده ماينفعش و شركة فودافون ممكن تفسخ تعاقدها مع صلاح
و تطالبه بغرامه ملايين متلتله .
.
قام اتحاد الكوره
رد بخطاب سفسطائي بظرميطي عبيط , وإننا بنعظم موارد اتحاد الكوره عشان يبقى عندنا نجوم
كتير زي صلاح , و اننا وطنييين اخر فيصل و غرضنا كان شريف و صلاح ده ابننا و ده مصري
و أكيد بيحب بلده , و أي كلام عاطفي لا له علاقه بقوانين ولا باحتراف .
.......................
أعزائي بتوع الجبلايه
, و النبي لايقه عليكو حكاية الجبلايه دي , بصو يا بني أدمين :
.
1- المثل بيقول
عدوٌ عاقل خيرٌ من صديق جاهل ( و زلنطحي ) .
2- حكاية اللعب
على وتر وطنية صلاح و في المقابل تخسروه عشرات الملايين , تبقو ولاد التيت و الحكايه
بالنسبالكو كانت سبوبه ,
.
3- للأسف تصرفاتكو
محسوبه على الدوله , مش عارف محسوبه ليه , بس اهي محسوبه .
.
4- تقدرو تلاقو
50 طريقه ل ( تعظيم ) موارد اتحاد الكوره من غير شغل الدروشه ده .
.
5 - صلاح لاعب
خلوق جدا و مش بتاع مشاكل و كان ممكن يرفع عليكو قضيه , لكن اخلاقه و حبه لبلده منعه
من كده .
.
6 - الريس مش فاضي
و الله و مش المفترض انه يعمل كل حاجه بنفسه بما فيها حل مشكلة اعلان دعائي .
.
7 - حاولو تتصرفو
بسرعه بدل ما تتنفخو , و مش ضروري تأكّدو لنا كل شويه انكو عايشين فعلا ( في الجبلايه
) .
.
8- حاجه اخيره
بقى ياريت تفهموها , صلاح وصل لمستوى من النجوميه مايقلش عن مستوى رونالدو و ميسي
, الإتنين دول تحديدا لهم معامله شديدة الخصوصيه في انديتهم و بلادهم , بيتعاملو معاملة
الملوك , لو طلبو لبن العصفور هيوفروه لهم , بيتدخلو في كل حاجه بما فيها التشكيل و
الصفقات الجديده , هي دي طبيعة السوبرستارز في العالم , و انا عارف ان صلاح مستحيل
هيطلب طلبات مش من حقه ولا يمارس دور ( الملوك و السوبر ستارز ) إنما عالأقل ياخد حقه
بس , عشان تركيزه و حالته النفسيه مهمين جدا في مشواره ناحية ( الكره الذهبيه ) مع
ناديه و مع المنتخب .
................................................................................................................
Mohamed
Hussein
29
أبريل 2018·
كمال الهلباوي
بيدعو للمصالحه مع الجماعه الإرهابيه !! .
.
بصو , مش مهم إننا
نقول و نفكر الناس بألاف الشهداء و بلد كانو عايزين يحرقوها , مش مهم نقول كام ألف
ساعة اعلاميه اتعملت في قنوات تركيا و الخنزيره و كام ألف مقال اتكتبو في الميديا البريطانيه
و الأمريكيه لتشويه مصر و جيشها , مش مهم نقول كام مليون بوست اتكتبو عباره عن تدليس
و تزييف و دعم للإرهاب .
.
كل ده مش مهم نقوله
لأن المبدأ نفسه مرفوض و القضيه منتهيه لا رجعه فيها , مفيش مصالحه مع إرهابي قتل و
حرق و خرّب و شوّه و تحالف مع كل أعداء الوطن و كل اهل الشر , و كان بيستهدف تدمير
بلد بالكامل و إسقاط جيشها .
.
فيه نقطه أهم لازم
الناس تعرفها , مهمه للغايه , و ده رأيي من سنين طويله , مفيش حاجه إسمها اخوانجي منشق
أو إخوانجي تائب أو إخوانجي عمل مراجعات فكريه , فكريه ذات نفسها ممكن تحلف لك بالطلاق
انهم لا بيتوبو ولا بينشقو .
.
أنا ممكن أصدق
ان فيه متعاطف مع الإخوان يتوب و يتراجع في أفكاره لما يشوف قدامه الوجه القبيح , زي
كتير أوي مننا كانو متعاطفين معاهم قبل 2012 و حاسين انهم مظلومين , ممكن أصدق إن فيه
حرامي أو هجّام يتوب , ممكن أصدق إن رقاصه تتحجب و تعتزل الرقص فجأه , كل ده ممكن أصدقه
, و كل ده وارد جدا .
.
لكن تجيب لي واحد
يتولد في بيت اخوانجي , يرضع فكرهم من أول مايتولد , يتربى على التزييف و التزوير
, يتعلم الكدب قبل ما يتعلم المشي أو حتى قبل مايتعلم ينطق , ياكل و يشرب من كتب سيد
قطب , يعبي دماغه سباخ و تكفير للغير , يتعلم انهم الفصيل الناجي ( و شعب الله المختار
) , يكبر مفهوم الجماعه جواه لحد مايتحول من مجرد جماعه بينتمي لها إلى كيان و دوله
و هويه و ديانه !! , يعيش على كده خمسين ستين سنه , و بعدين يقولك انا انشقيت و توبت
؟!! ده من تاسع المستحيلات .
.
أومال ايه اللي
بيحصل بالظبط ؟ بص يا حبيبي , الجماعه دي أنشأتها المخابرات البريطانيه من 90 سنه
, و بالتالي بتمشي بنفس تفكير البريطانيين و الصهاينه , اللي من ضمن أدواتهم إنك تخلق
معارضتك بنفسك , تعملها على إيدك , عندك 100 قيادي , عدد كبير , خلّي 5 منهم ينشقو
, لو سمحتو انشقو يا اخوانا بارك الله فيكم , و اشتمونا في الصحف و القنوات , اشتمونا
جامد , عشان تبقى لكو شوية مصداقيه عند الناس , طب ليه كده ؟ توزيع أدوار يا مولانا
, الإبقاء على أبواب خلفيه , هيحتاجوهم في يوم من الأيام , حتى لما قررو انهم يلعبو
سياسه استخدمو نفس المبدأ , و خلقو أحزاب بديله ( حزب أبو الفتوح و حزب الوسط ) اللي
هما مش تبع الإخوان طبعا زي مانتو عارفين .
.
فلما حد يقولك
انا قيادي اخوانجي تائب أو منشق ؟ طبطب على كتفه و قوله العلم اتقدم اوي , بس لحد النهارده
مفيش عالم في الكون قدر يحوّل صفيحة زباله لشجرة تفاح .
........................................................................................................
Mohamed
Hussein
28
أبريل 2018·
أنا و بناتي
.
إمبارح كالعاده
البنات قالو يا بابا احكي لنا حدوته عشان نعرف ننام , قلت ماشي , و كان الحوار كالتالي
:
.
لوجي : بابا بقولك
ايه , احكي لنا حدوته مختلفه عن نوعية الحواديت اياها , بلاش بقى نظام صياد عايش يوم
بيومه و بيطلع يصطاد و مراته بتبيع خضار , ولا حكاية غزاله اتصاحبت على بطه في الغابه
, ولا العيال اللي ابوهم اتوفى فبقو ينزلو يشتغلو بعد المدرسه .
.
لمار : ايوه يا
بابا , و النبي ماتحكي لنا عن الشاب اللي كان بيشتغل جارسون بعد الكليه عشان يساعد
اهله و بعدين فجأه البنت اللي بيحبها كانت مع باباها الباشا اللي عنده مصنع , فجأه
جم قعدو في الكافتريا اللي هو شغال فيها و شافوه , و سابو كل كافتريهات الدنيا .
.
لوجي : بص , أنا
عارفه انك في كل حكايه بتحاول تزرع شوية قيم و حاجات كده , بس انت زرعت جامد واحنا
قربنا نتخنق بصراحه , احكي لنا حاجه في الفسكونيا , وقول مصطلحات زي روش طحن و فاكِس
, و الحاجات الحلوه دي , وبلاش قيم و مبادئ النهارده .
.
أنا : اه فهمت
فهمت , طب خلاص هحكي لك حدوته هتعجبك اوي , كان فيه شاب اسمه شريف في سنه تانيه كليه
و باباه اتوفى , مامته اسمها عفاف , و لما خلصو العزا , قعدت أبله عفاف مع ابنها و
قالت له يا شريف دلوأتي احنا هنعيش منين ؟ البيت مفهوش ولا ساغ , شريف بص لمامته وقال
لها : وانا مالي و مال الكلام ده ؟ لما انتو مش عارفين تصرفو علينا بتخلفونا ليه ؟
بطّلو بقى حوارات و كلام فاكِس .
.
لوجي ( بتضحك
) : أيوه كمل كمل .
أنا : أبله عفاف
قالت طب أعمل ايه ؟ انزل اشتغل ؟ انا ست كبيره و هشتغل ايه ؟ , شريف قال لها اشتغلي
اي حاجه ياكشي تشتغلي رقاصه , قالت له حاضر يا شريف هروح اشتغل رقاصه و اجيب لك فلوس
كتير عشان تشرب مخدرات مع اصحابك , قال لها : أيوه كده , و على فكره شكلك هيبقى روش
طحن وانتي بترقصي .
.
لوجي : قشطه الحكايه
دي , كمل يا بابا .
أنا : و بعدين
يا ستي نامو هما الاتنين و اتفقو خلاص ان ابله عفاف هتشتغل رقاصه و شريف ياخد الفلوس
و يضرب بانجو مع أصحابه , و تاني يوم صحي شريف لقى مامته واقفه في المطبخ بتجهز الفطار
ودموعها نازله بسبب جوزها اللي اتوفى و ابنها اللي ماعرفتش تربيه , قام موطي على رجلها
بايسها و قال لها أنا أسف يا أمي , انا راجل و هخرج بعد الكليه ادور على شغل.
.
لمار ( بتضحك
) ههههههههههههه .
لوجي : بابا
!! واضح إن مفيش فايده , أنا هنام , تصبح على خير .
.........................................................................................................
Mohamed
Hussein
28
أبريل 2018·
حوار افتراضي تخيلي
.
التوقيت ( سنة
2000 ) , المكان , غرفه مغلقه في إحدى ضواحي لندن .
الأبطال , رئيس
جهاز المخابرات البريطانيه ( اسمه الإفتراضي X
) , رئيس جهاز المخابرات الأمريكيه ( اسمه Y
) , رئيس جهاز الموساد ( اسمه Z
) .
.
في المشهد , X و Y
قاعدين على ترابيزه مستطيله في وش بعض , و z قاعد على طرف الترابيزه بيقرا في جورنان و معاه قلم
بيشخبط بيه , بس ودنه و كل تركيزه مع X
و Y.
.........................
السيد Y : هنلعبها إزاي يا X
؟
السيد X : هنلعبها صح يا صديقي .
.
ايه الهدف و التارجت
بتاعنا ؟
- حاجات كتير
, احكام السيطره على العالم , تدمير جيوش و دول الشرق الأوسط المحيطه باسرائيل , تفتيت
الدول الكبيره إلى دويلات , السيطره و التحكم في مصادر الطاقه ( الغاز و البترول )
, هنبيع كميات كبيره من الأسلحه , هننعش خزائنا بمئات المليارات , و خسايرنا المتوقعه
تساوي صفر .
.
طب ادواتنا و خطتنا
هتكون ازاي ؟
- أدواتنا هي
, الميديا بتاعتنا اللي لها تأثير كبير جدا في شعوب المنطقه و معاها قناة الجزيره اللي
عملناها من 15 سنه , و عندنا مراكز حقوق انسان و تقاريرها اللي هتساعدنا , و عندنا
جماعه دوليه منتشره في المنطقه , صنعناها على ايدينا من 80 سنه , مستعدين يعملو أي
شئ , و معانا حكام في المنطقه ( بتوعنا ), و عندنا كمان بعبع وهمي خلقناه اسمه إيران
.
.
بس كده ؟
- لا , فيه تفاصيل
كتير جدا , كلها مدروسه بعنايه , أحلام الشباب في الحريه , ثورات ضد الأنظمه ( الفاشيه
) , هنلعب كمان بورقة امتلاك اسلحة دمار شامل ( وكالة الطاقه الذريه بتاعتنا ) و بعدين
نبقى نقول سوري , احنا أسفين.
.
البدايه هتكون
منين يا صديقي X ؟
- البدايه من العراق
, بلعبة أسلحة الدمار الشامل , بعد كده هندعم ثورات التحرر لشعوب المنطقه خصوصا الدول
الكبيره المحيطه باسرائيل , الفاشيه تطل برأسها , احنا الصوت لما يلاقو الدنيا سكوت
.
.
فيه خطط بديله
و عوامل مساعده ؟
- أكيد فيه , اللعب
على الطائفيه في مصر , مبارك مشغول في توريث ابنه , هنقوله موافقين بس خلي جماعة الإخوان
ترضى عنك و اشركهم في الحياه السياسيه و سيبهم يعملو امبراطورية اقتصاديه عشان يبقو
يساعدوك في مرحلة التوريث ( و دي أهم نقطه بالنسبالنا ) , و في سوريا هنلعب على الصراع
المذهبي , و إجمالا شعوب الشرق الأوسط متأثره حاليا بالفكر الوهابي اللي دعمناه بشده
, و الناس ملهيه في كعب المرأه و مناخير المرأه و الحيض و البيض و حكم الدين في نكاح
المخلوقات الفضائيه .
.
رائع , بس فيه
مشكله , هنقول ايه لشعوبنا و نجمّل صورتنا ازاي بعد الخراب اللي هنعمله ؟
- احنا عاملين
حسابنا , الميديا بتاعتنا هتتصرف , و المواطن عندنا ملهي في حياته و ضرايبه , هنبقى
نعمل لهم شوية فيديوهات عن دورنا في حقوق الإنسان و العصافير الكناريا و نكتب قصص عن
سيده امريكيه انقذت صرصار من براثن سحليه لعينه و راحت جابت له لبن أطفال من الصيدليه
, وانتو في هوليود كتّرو من الأفلام بتاعة انقاذ كوكب الأرض من الغزاه و المخلوقات
الشريره .
.
ايه اخر حاجه ممكن
نعملها تكون غريبه و عجيبه ولا تصدق ؟
- ممممممم احنا
هنقود التحالف السني لمحارية الشيعه الكفار في سوريا .
.
هههههههههههه هنقود
التحالف السني ؟ بتتكلم جد يا X
؟.
- بكل تأكيد .
.
المشهد قبل الأخير
, Z يقفل الجرنان , يبتسم و يبص لأصدقاؤه و يقول لهم
, طالما هتقودو التحالف السني , لازم تبقو فاهمين إن صلاة العصر 4 ركعات و صلاه سريه
مش جهريه , التفاصيل دي مهمه جدا , بارك الله فيكم .
...............
المشهد الأخير
, التوقيت ( يونيو 2013 ) , المكان ( شوارع مصر و حواريها ) الحدث : رساله من المصريين
( شعب و جيش ) إلى X و Y و Z
, رساله بتقول ( المشهد بتاعكو اللي من 13 سنه ده اتصور , لو عايزنا نذيع هنذيع )
.
...................................................................................................................
Mohamed
Hussein
28
ل· أبريل 2018
ترامب : دول الشرق
الأوسط عليها أن تدفع مقابل مشاركة امريكا في الحرب على داعش !! .
.
طب و الله عاجباني
أوي أمريكا و بريطانيا , ماهو الواحد كمان لازم يشجع اللعبه الحلوه , و دي مش لعبه
حلوه بعقل , دي حاجه تمخول من جمالها .
.
أمريكا و بريطانيا
و الصهيونيه العالميه يخترعو اسم ( داعش ) , مجرد عبايه وهميه يلمو تحتها كل الارهابيين
و المرتزقه من البلاد المتخلفه , و يوفرو لهم الدعم و الحمايه و التسليح , عشان يخربو
دول الشرق الأوسط و يهدو جيوشها و يدمرو بنيتها التحتيه , و الفاتوره و التكلفه تدفعها
دول ( من الشرق الأوسط برضه ) .
.
و بعدين يستخدمو
نفس الإسم الوهمي لابتزاز نفس الدول اللي دفعت فاتورة و تكلفة الحرب و الخراب .
.
يعني أمريكا و
بريطانيا صنعو كيان على إيديهم و استخدموه مرتين , مره لخراب دول الشرق الأوسط بفلوس
دول معينه , و مره لابتزاز و مساومة الدول المعينه دي , هتدفع فلوس تاني عشان نخرّج
العفريت ( اللي حضرّناه ) من المنطقه , ولا نسلّط عليك نفس العفريت ؟ .
.
الحقيقه المستعمرين
الأجانب مش شاطرين أوي ولا عباقره و بيمشو عالحيط , إنما احنا اللي زبون لُقطه .
...........................................................................................................................
Mohamed
Hussein
27
أبريل 2018·
في الزريبه .
.
في الزريبه خرفان
و جديان و تيران بتنطح في البني أدمين .
.
و لو الأكل و العلف
اتقطع عن الزريبه يومين تلاته و الخرفان و التيران جاعو أوي و مالقيوش بني أدمين ينطحوهم
هينطحو في بعض .
.
و ده بالظبط اللي
حصل في زريبة ( قناة الشرق ) اللي عند خليفة الشواذ , سنين و الخرفان و التيران بينطحو
فينا ( في البني أدمين ) و لما التمويل قل و العلف اختفى بدأو ينطحو في بعض .
.
أخر نطحه يا سيدي
من خروف لتور , كانت من العاملين في الزريبه لمعتز مطر , معتز مطر في الفتره اللي فاتت
حب يلعب نفس دور الخرفان بتاع الكربلائيات و الظلم و الدوله الفاشيه فقال إن أخوه معتقل
في مصر بسبب مواقف سياسيه , و أه يانا يامه يانا يامه , و النبي قلبي الصغير لا يحتمل
.
.
قامو الخرفان لما
اختلفو مع التور , فضحوه و نطحوه , و قالو له انت كداب يا تور , و أخوك مسجون في مصر
بسبب قضية نصب , شيكات عليه مادفعهاش و اتقدمت للنيابه , بس انت ابن حرام و اعتبرته
مسجون سياسي و معتقل .
.
و بس يا سيدي
, المختفين قسريا اكتشفنا انهم هربانين من اهاليهم و راحو انضمو لداعش و بقو ارهابيين
قد الدنيا أو سافرو الغردقه و قفلو موبايلاتهم و شقطو مزز , و أخو التور فخامة المعتقل
السياسي في الدوله الفاشيه طلع نصاب و عليه شيكات .
..................................................................................................
ليست هناك تعليقات:
إرسال تعليق