Mohamed Hussein
29 مايو
قراءه في النتايج والأرقام
.
- رئيس مصري ب 23 مليون صوت وفكّه , نتيجه مش هتحصل تاني في تاريخ مصر , محدش هياخد الشعبيه دي في يوم من الأيام ولا حتى السيسي نفسه في 2018 ولا حتى أنا , أه والله ولا حتى أنا !!.
.
- جاري البحث عن قناة الجزيره في صناديق الزباله , في محاولة من النظام القادم لتنظيف شوارع القاهره .
.
- كان فيه مرشح اسمه عبفتاح السيسي ( الإسم ده مش غريب عليا ) المهم عبفتاح قعد مع بتاع 5 دقون من قيادات حزب النور السلفنجي , قالو له احنا معاك يا ريس , كلنا معاك , وبعد كام يوم ظهر عبفتاح وطرقع لحزب النور في التلفزيون , الراجل ده مش سهل وفهم انه لما قعد مع ال 5 دقون وقالو له احنا معاك يبقى كده ضمن 5 أصوات بالكتير !! نفس الحكايه لحمدين اللي قالو له 5 بناطيل سترتش من حزب الدستور احنا معاك يا ريس ففهم حمدين انه ضمن 5 بناطيل قصدي 5 أصوات من الحزب , والأيام أثبتت إن : ( القيادات دي حماده وشبابهم حماده بيلعب عالفيس )
.
وانا رأيي بقى إننا نجوّز رئيس حزب النور لرئيسة حزب الدستور عشان يخلّفو لنا عيال مقاطعين أو عيال مقاطيع , واغلب ظني إنهم هيجيبو 6 إخوان قصدي 6 إخوات وكلهم هيبقو في شهر إبريل !!.
.
كنت أتمنى لو كان عبد الفتاح السيسي فتح شباك بيتهم امبارح وشاف فرحة الناس بيه في الشوارع و ملى عينه منها , عشان دي أخر مره هيشوفها لو فكر يلعب بديله زي اللي قبليه أو هيشوفها بشكل تاني , الشعب ده اتلسع قبل كده بإسم الأمن واتلسع بإسم الدين يعني لا فارقه معاه زبيبة الصلاه ولا فارقه معاه البياده , و يا عبفتاح اسمع كلمتين من اخوك الصغير... المثل بيقول : إمشي عدل يحتار الكولجيه فيك .
.
الإنتخابات والأرقام قالو باختصار إن الإخوان والنحانيحي ناحنيحو نات عباره عن صفر عالشمال , بس للأمانه صفر كبير مش صغير , أه الواحد يقول اللي له واللي عليه
Mohamed Hussein
28 مايو
استحمل سخريه كتير وتريأه من اللي يسوى واللي مايسواش و كمّل طريقه , كان عارف ان نسبة فوزه ضعيفه جدا وقرر انه ينزل و يخوص لحد أخر لحظه , ثورجي بيشد في بنطلونه و يقول له لأ بلاش , كولجي بيشده من دراعه و يقول له انسحب , إنما فيه فرق بين رجاله بتعرف معنى كلمة وطن و مسئوليه سياسيه و بين كتاكيت بلاستيك بتحلم بالطيران .
النهارده بقى تحديدا مصر كسبت اتنين , و أيا ماتكون النسبه اللي هياخدها كل واحد , عايز أقول : ألف مبروك للمناضل البطل الراجل حمدين صباحي و ألف مبروك لرئيسها اللي جاي عبد الفتاح السيسي ..
Mohamed Hussein
28 مايو
هيبدأو الفرز بقى , و فيه ناس عندها ردود جاهزه ( ردّين تحديدا ) , لو نسبة المشاركة طلعت 50 % فما فوق هيكون الرد الجاهز هو ( التزوير حصل , التزوير يا منى , التلاعب في أصوات الناس يا شريف , تزييف إرادة المواطنين يا لميس ) , ولو نسبة المشاركة طلعت اقل من 45 % مثلا هيبقى الرد الجاهز ( مفيش تزوير بس فيه شعبيه زائفه يا محمود , ضحكو عالناس يا يسري , السيسي وحمدين مالهمش وجود في الشارع يا لبنى ) .
....... مممممممممممممممم عزيزي المتابع للفرز , هي دي فعلا مرحلة الفرز !! , و لو كنت حضرتك من اللي جاهز بالردين اللي فوق دول حسب الأحوال و النسبه فاعرف إن انت الكولّجي اللي بكتب عنه من شهور , اللي أي حد معدّي بيركبه ويدلدل رجليه , أنا كده مابقاش ظلمتك والله , دانا لما اقول عليك كولجي أبقى كارمك أخر كرم , واسأل في سوق الرجاله وانت تعرف !!.
Mohamed Hussein
28 مايو
لما تشوف كتابات علاء عبد الفتاح و أمثاله وصفحات 6 ابريل و غيرهم من اللي بيدّعو الثوريه والعمل الثوري تكره اليوم اللي عملنا فيه ثوره ضد نظام فاسد , ولاد الصرمه قاعدين و فاتحين حوار , بيتناقشو تعمل ايه في ابوك وامك اللي هينتخبو السيسي و لا حمدين ؟ , اللي يقول ننبذهم و نمنع زياراتهم واللي يقول نكسر رجليهم واللي يقول امنع عن امي الفلوس لو نزلت وانتخبت , ممممممم أنا بقول كل واحد فينا يحرق أبوه وامه و هما نايمين أو يرميهم تحت عجلة القطر عشان علاء عبد الفتاح يرضى عننا ويبقى اسمنا ثورجيه جامدين ...........يا ريتها كانت اتبطّت عليك قبل ماتخلّفك يا عرّة شباب مصر .
Mohamed Hussein
28 مايو
شهادة حق
.
من بين الملايين من انصار حمدين , اللي كتير منهم خذله في الإنتخابات الحاليه و استجاب لدعوات الإخوان والكولجيه , من بينهم نماذج كتير قابلتها مشرفه , حاجه كده تفرح و تفتح النفس , أفضلهم على الإطلاق هو صديقي الغالي فلان الفلاني , اللي من يوم ما بدأت الحملات الإنتخابيه وهو أعلن تأييده لحمدين واحترامه للسيسي , كان بيحلل لقاءت الإتنين مرشحين بحياديه , ماقبلشي اهانات للسيسي رغم تأييده لحمدين , شاف الموضوع بنظره أكبر وأشمل , شاف بلد على المحك فعلا , وانتخابات لازم تتم بالإتنين , مش مهم مين ينجح , ده تقريبا اللي انا عملته لما اعلنت تأييدي للسيسي واحترامي لحمدين , أصدقائي اتهموني اني ماسك العصايه من النص , .... يارب تكونو فهمتو دلوأتي إن مستقبل الأوطان مش لعبة كوتشينه ولا إسم مرشح
... نختلف أه , و نقطع هدوم بعض بس لما يكون فيه اتنين خوات بيتخانقو في نفس البيت وفجأه يلاقو حرامي بيكسر شباك أوضه عشان يدخل بينسو خلافهم و يقفو في وش الحرامي .............., ألف شكر لصديقي الغالي المؤيد لحمدين صباحي ...محمد المليجي Mohammed A. Elmeligy
Mohamed Hussein
28 مايو
يا مقسّمين الدار
مترين ورا مترين
يا صُحْبة الأشرار
يا خلفة الشياطين
.
حبِّة عيال هلافيت
داخله البلد توهه
حتى حيطان البيت
برضو ماسيبتوها
.
عملت إيه يا عويل
فيها في ساعة غضب ؟
دمك ده مايّة نيل
و لّا نشارة خشب ؟!.
.
.
محمد حسين
Mohamed Hussein
28 مايو
السيناريو الكحلي
.
أنا : هو حضرتك بتشتغل ايه ؟
هو : أنا ثورجي .
.
أنا : طب عايز ايه دلوأتي ؟
هو : عايز حمدين ينسحب
.
أنا : هو حضرتك نزلت وانتخبت حمدين ؟
هو : لأ ..أنا مقاطع
.
أنا : ولما انت مقاطع يعني مش عاجبك السيسي ولا حمدين بتطلب من حمدين ينسحب على أساس ايه ؟
هو : على أساس إن حمدين واحد من الثوار زي حالاتي.
.
أنا : ولما هو واحد من الثور مانزلتش وانتخبته ليه ؟
هو : أنا حر , الإنتخابات دي مسرحيه ومحسومه لشعبية السيسي.
.
أنا : طب ما تسيب المسرحيه تكمل طالما محسومه
هو : بس السيسي مالوش شعبيه والدليل ان اللجان فاضيه .
.
أنا : طب خلاص سيب حمدين يكسب طالما السيسي مالوش شعبيه
هو : لأ.... الإنتخابات هتتزور والدليل انهم مدّو يوم كمان.
.
أنا : وهو اللي عايز يزور بيمد يوم ليه ؟ ما الصناديق هتفضل في حضنهم 8 أيام قبل اعلان النتيجه ؟ وبعدين انت قلت محسومه لشعبية السيسي
هو : ماليش دعوه بس لازم حمدين ينسحب .
.
أنا : ولما حمدين ينسحب هيبقى السيناريو ازاي ؟
هو : السيسي هيفوز بالتزكيه بس هنفضحه قدام العالم .
.
أنا : كويس أوي و هتقول للعالم ايه بقى ؟
هو : هقول للعالم ان الإنتخابات دي كانت مسرحيه واحنا مش معترفين بيها.
.
أنا : تمام كده , وبعدين هتعمل ايه ؟
هو : هنعمل ثوره .
.
أنا : بس احنا عملنا ثورتين والبلد مش مستحمله , ودلوأتي الشارع مش معاك , يعني لا شعب ولا جيش , مين اللي هيثور ؟
هو : خلاص بلاش ثوره نعمل انتخابات جديده وننزل بمرشح ثوري على نضافه.
.
أنا : طب مانت قلت حمدين من الثوار ماعتبرتوش مرشحك الثوري ليه ؟
هو : لا عايزين مرشح ثوري زي البرادعي.
.
أنا : وشعبيته هتجيب 10 % حتى ؟
هو : ماعرفش بقى , المهم حمدين ينسحب ونفضح مصر قدام العالم !!.
.
أنا : يا خساره حظك وحش , أصل حمدين طلع في النهايه راجل مش شمّام كوله .
Mohamed Hussein
28 مايو
الدوله دي محتاجه واحد دكر , و مصر لو هتتحكم من الفيس بوك و تويتر يبقى نقرا عليها الفاتحه وكل واحد يجيب طوبه يحطها جنب قبر مصر , داحنا لما بنبقى اتنين بنتناقش عالفيس بيبقى لنا 3 أراء مختلفه وبنشرح بعض بالموس !! , محدش يجيب في سيرتها بقى ( اذكرو محاسن موتاكم ) , قال انسحب يا حمدين !! , على أساس إن ده دور طاوله عالقهوه و بنلعبه و اللعب كان عالمشاريب قام الواد خيشه قال بسرعه يا بهوات عايزين نقفل القهوه , هنا كده قام واحد مثقف بتاع حقوق انسان كان قاعد على جنب وماسك جرنان مخروم و مالوش في الطور ولا الطحين ولا يعرف مين كان بيلاعب مين وقال انسحب يا حمدين , بعدها على طول الكولجيه قالو ولا الضالين أمين و لا الضالين أمين ولا الضالين أمين , مش قلت لكو الدوله ماتتحكمش بمواقع التواصل الأمريكاني !!.
Mohamed Hussein
27 مايو
عايزك بس تتخيل المشهد معايا , اللي عايز ينزل و يصوت نزل النهارده وامبارح والكل عامل حسابه ان النهارده اخر يوم , معالي معرفشي مين بيه رئيس اللجنه مد يوم زياده , طب اللي عايز ينزل نزل و خلصت الحكايه ..... كويس كده ؟ بكره بقى هتلاقي اللجان فاضيه و بتنش رسمي فهمي نظمي و ده مالوش علاقه بضعف ناخبين ولا بقوة تصويت , ده له علاقه ان المولد اتفض النهارده , وبس كده يا سيدي , اللجان بتنش وصوّري يا جزيره واكتبي يا واشنطن بوست , وانشرو بقى يا إخوان انتو و الكولجيه , دي هتبقى مدعكه , مين اللي شال فيشة العقل من رئيس لجنة الإنتخابات ؟ هي دي حموريه اللي انا شايفها ولا فيه ريحه مش حلوه ؟!!.
Mohamed Hussein
27 مايو
حكاية مد الإنتخابات ليوم تالت دي هتفتح مجالات كلام مش هنخلص منها , و ده أكبر دليل إن مفيش مؤامره و لا زفت , ماهو مفيش حد في الكون بيبقى متأمر واهبل !!.
Mohamed Hussein
27 مايو
قررت اني مش هوجع دماغي , كان نفسي في نسبة تصويت عاليه نحطها في عين التخين , إنما التخين ده لو جبت له نسبت تصويت عاليه هيقول تزوير وتسويد بطاقات ولو جبت له نسبة تصويت منخفضه هيقول مفيش تزوير بس ده دليل على ان مفيش اقبال و إن خطة المقاطعه الإخوانجيه الكولجيه المشتركه نجحت , قررت اني مش هوجع دماغي مع التخين ولا أوسّخ صباعي بعينه.... سيبو التخين في حاله .
.
داحنا لسه بنقول يا هادي و بدأت الجرايد البريطانيه و الأمريكيه تروّج لفكرة ضياع الربيع العربي بفوز السيسي !! , قال يعني ولاد الصرمه كانو بيتشحتفو طول الليل عشان ربيعنا العربي يعيش , مانا قلتها من شهور , هما طابورين اتنين مفيش غيرهم , يا تبقى مصري بجد وتنزل تشارك في كل استحقاقات بلدك ( اختار اللي يعجبك ) أو تبقى تبع بريطانيا و أمريكا وكلابهم في المنطقه اللي عملو مناحه على رحيل الإخوان , يعني تبقى أوروبي وشعرك اصفر و عنيك خضره ولّا مصري قمحي و أسمراني , أنا مايشرفنيش أبقى أوروبي , أوريفوار مسيو , جود باي بيبي , مصر للمصريين السمر الشداد .
Mohamed Hussein
27 مايو
و قالك انا مقاطع عشان خاطر دم الشهيد ( قميص عثمان ) !! , مع ان يا مؤمن أهالي الشهداء نفسهم نزلو و انتخبو , يعني أبو الشهيد وأم الشهيد نزلو , منهم اللي انتخب السيسي و منهم اللي انتخب حمدين ( على راسي هما الإتنين ) , بس و عزة جلال الله مافيكي يا مصر حد أوسخ من اللي قتل الشهيد غير اللي عمل اسم الشهيد و دمه لبانه و ماشي يطرقع بيها وقت ما يحب , ملعون ابو كل واحد بيتاجر في دم اللي راح عشانها !!.
Mohamed Hussein
27 مايو
صباح الخير عالمصريين الطيبين و بس , و صباح الطين عالمجاري اللي طفحت في شوارع مصر , بقى الإنتخابات محسومه من الأول والإعلام ابن الحرام كام موجه كله للسيسي , وشعبيه السيسي بقت جارفه في الشوارع , وحمدين دوره كومبارس و الموضوع محسوم من البدايه ( ده كان كلام حضرتك على فكره ) !!.
إنما أبدا ورغم كده قفشنا عسكري بيزور بطاقات لصالح السيسي !! , يابني هو السيسي محتاج تزوير ؟ طب والعسكري صور نفسه وهو بيزور ؟ طب فين وش العسكري مش جايز مهندس ديكور واسمه حماده ولابس زي عسكري , ماهو كل واحد فينا عنده طقم من بتوع الجيش ضرب عليه وخلّاه عنده البيت , ولبس العساكر بيتباع عادي في وسط البلد , طب يعني السيسي اللي هو كان رئيس المخابرات مكانشي عارف يقول للعسكري البس بيجامه ولا قميص وبنطلون ؟! .
.
هتفضل طول عمرك كده حاني ضهرك للإخوان وهما راكبين ومدلدلين رجليهم و هتبقى مشكلتك في المستقبل لما الإخوان يختفو من الوجود إنك مش هتلاقي حد يركبك و يدلدل رجليه , أصل دور الحموريه ده بيبقى مزاج وغيه عند بعض الناس , ارجع بقى لصفحتك وشوف اليافطه بتاعة الكنيسه اللي كانت بتقول اليسوع بيدعم السيسي وارجع لصوره السيسي على بوابة العين السخنه وارجع لصورة الأطفال اللي قتلهم الجيش في فض اعتصام الحرس الجمهوري ... مش هتلاقي الصور دي , هتلاقيها اختفت رغم انك صدقتها , بس انت غاوي بقى والحموريه عندك عشق وهيام .
Mohamed Hussein
26 مايو
ممكن أفهم ان حضرتك قررت تقاطع و رفضت الإختيارات التلاته ( فلان وعلان و إبطال صوتك ) رغم اهميه العدد قدام العالم بس ما علينا , و ممكن أفهم إن الريسيفر بتاعك ولأسباب لا يعلمها إلا ربنا مافهوش ولا قناة غير الجزيره , و ممكن أفهم إنك بتصدقها وقاعد قدامها 24 ساعه من باب ان مفيش غيرها , بس اللي مش قادر أفهمه بجد هو كماية الشماته اللي بشوفها في عنيك وحروفك لما بتصدق إن الإقبال ضعيف !!.
طب انا هقولك حاجتين و سامحني بقى , بكره ولا بعده هتتفاجئي حضرتك بنسبة الحضور وساعتها هتضطر اسفا انك تشتري ريسيفر جديد بيجيب قنوات تانيه , الحاجه التانيه ان الإنتخابات بتتم رسمي لو حضر 3 أصوات انتخابيه اتنين انتخبو فلان و واحد انتخب علان وساعتها رئيس لجنة الإنتخابات بيعلن فوز فلان بأغلبية التلتين !! , يعني بعد كام يوم هيبقى فيه رئيس لمصر منتخب رسمي حسب القانون والدستور .
.............. أنا أسف بقى إني جرحت شعورك و قضيت على لحظة السعاده والشماته اللذيذه دي .
بالمناسبه , شباب الإخوان بيمشو في مسيرات دلوأتي , يعني كل 30 نفر بيعملو مسيره كده و بيهتفو بسقوط حكم العسكر , ممكن تنزل تمشي وتهتف معاهم عشان الكبت اللي جواك يطلع , وابقى علق يافطه على صدرك اكتب عليها ( انا مش اخوان والله بس مقاطع زيهم و بسب والعن للجيش زيهم و بقول عودة الفلول زيهم و نازل اهتف معاهم ) !!.
Mohamed Hussein
26 مايو ·
قالو عليك الجدع
قالو عليك البطل
راجل و بزياده
.
قلبو اللجان أفراح
و الرقص بقى عاده
.
و لجل تبقى رئيس
فرشو القلوب يا عريس
من بدري سجاده !!.
.
.
إوعاك تخون الشعب
إوعى تكون معاليك
زي اللي راح قبليك
لانت إله البشر
و لا شعبها مماليك !!.
.
محمد حسين
Mohamed Hussein
26 مايو
يا ترى الحاجه انتصار , سيدة مصر الأولى , طابخه ايه النهارده ؟ المفروض يا حاجه و انتو بيت كرم انكو تعزمو كل اللي ادى صوته للسيسي عالغدا , يا جدعان انتو كلكو معزومين عند الحاجه انتصار , بس هنعمل العزومه دي فين ؟ ستاد القاهره ؟ لأ مش نافع ده يادوب ياخد اصوات شارع مكرم عبيد , طب طريق مصر اسكندريه ؟ لأ مايكفيش , بس بس لقيتها احنا نعمل العزومه في صحراء مصر الغربيه , يعني من نهر النيل كده لحد حدود ليبيا , هي اللي تقدر تستوعب , .............. الله يمسيه بالخير خالد على كان بيعزم أنصاره في المندره بتاعة بيتهم و يفردو رجليهم كمان !!.
Mohamed Hussein
26 مايو
يا زين ما خلّفتي و جبتي يا بديعه !!
دي أخر احصائيه منشوره على صفحه الحريه ولا مؤاخذه والعداله
.
بيقولك يا سيدي , بس اشرب سجارتين حشيش عشان تستوعب اللي جاي ده , بيقولك ايه بقى ؟
.
.. 48 % من اللي هيشاركو في التصويت النهارده مسيحيين , يعني نصاري , ممممممممممم يعني نقول 15 مليون صوت مسيحي يبقى عدد المسيحيين في مصر 40 مليون نسمه عالأقل و بالتالي يبقى هما نص الشعب بالظبط !!..( طبعا دول رايحين للسيسي بكرتونتهم كده ) .
.
.. 32 % من اللي هيشاركو فلول ........ , يبقى انصار مبارك في مصر حوالي 10 مليون صوت انتخابي يعني 30 مليون نسمه , و بالتالي احنا كده ماعملناش ثوره في يناير ولا حاجه , هنثور إزاي ضد نظام حاكم بيأيده 30 مليون من أفراد الشعب ؟!!.( دول برضه رايحين للسيسي بكرتونتهم )
.
.. 2% قبائل غجريه !! ..أيوه عارفهم أنا دول , اللي ساكنين في غابات السافانا وكهوف تنزانيا , صيتك وصل لحد تنزانيا يا سيسي .
.
.. 3% حزب النور , الله بقى ؟ مش كنتو بتقولو حزب النور عنده 25 % من اصوات الناخبين ؟ مش ده اللي كانو واخد تاني كتله برلمانيه في البرلمان اللي فات ؟ يبقى الإخوان 5 % بقى مش 40 ولا حاجه .
.
.. 5 % يساريين وليبراليين ................ مممممممم يعني كده حمدين هياخد 5% بس ؟!
............................
...........................
أصدقائي الأعزاء شباب الإخوان , أبوس إيديكو بقى , بعد البانجو اللي شوفتوه مكتوب فوق ده المفروض مش بس إنكو تلعنو اليوم اللي بقيتو فيه اخوان , لأ دانتو تروحو السجن و تولّعو في بديع وخيرت الشاطر بنفسكو وتحرقو كتب سيد قطب وصور حسن البنا , دي الفرصه الأخيره عشان تبقو بني أدمين ربنا ميّزهم عن باقي المخلوقات بالعقل .
Mohamed Hussein
26 مايو ·
صباحك جميل يا مصر رغم أنف المعيز
.
ده رأي أحمد منصور ( أحد الجواري في بلاط الشيخه موزه ) في انتخابات مصر
.
: الذين سيخرجون اليوم فى مصر للمشاركة فى مسرحية "المجرم والكومبارس "المسماة بالإنتخابات الرئاسية إنما يؤكدون شراكتهم فى كل الجرائم التى ارتكبها عبدالفتاح السيسى فى حق مصر و المصريين ويصيغون مستقبلا مفروشا بالدماء والأشلاء والسجون والمعتقلات والفصل والتشريد من الجامعات لأبنائهم.
.
نفس الرأي ده بالظبط هتلاقيه في صفحات كبار الكولّجيه المقاطعين , و مطلوب مني أصنفهم في خانة معارضه غير بتاعة الإخوان ؟ يعني الإخوان يبقى اسمهم المعارضه والكولجيه يبقى اسمهم المعارضه اللي بتعارض نظام الحكم و بتعارض المعارضه !! ........... دول كده محتاجين كتالوج !!.
.
النهارده فرح مصر , والفرح ده شارك فيه ملايين المصريين , أنصار السيسي وانصار حمدين وحتى اللي نزلو وابطلو صوتهم بس نزلو عشان خاطر حقهم في التصويت و صورة مصر قدام العالم , بعد الإنتخابات هيبقى من حق أنصار المرشح الخسران إنهم يعارضو و يقولو فين حقنا في البلد دي ؟ و حتى اللي ابطل صوته من حقه يعارض ويقول فين حقي لكن اللي قعد في بيته جنب الإخوان والجزيره هيطالب بإيه ؟
.
بص يابه أنا هبسطهالك خالص , احنا من سنه وزياده زرعنا شجره , حفرنا شويه في الرمل وجبنا شتلة تفاح وغرسناها , ومن يوميها واحنا بنروي شجرة التفاح دي و بنحاوط عليها عشان المعيز ماتجيش تاكلها , وانت سيادتك مش موجود , كنت واقف على جنب وعمّال تتريأ عالناس اللي بتزرع و تروي و تحمي , ماينفعش بقى لما الشجره دي تكبر وتبدأ تطرح تيجي حضرتك تقول عايز حقي في التفاح , حقك ازاي وانت ماحضرتش زراعتها ولا السهر عليها ؟ طب خلّي في عينك حصوة ملح , الشجره دي من حق اللي نزل وشارك و بس , ........ و ربنا يكفينا ويكفيها شر المعيز !!.
Mohamed Hussein
25 مايو
قلبين في ساعة قدر
نصب الهوى شبكه
يا قلب كان صيّاد
ماعرفشي إيه شبكه ؟!
.
هي اللي فوق مركبي
و انا وحدي في المايه
قال جيت اصيد السمك
صادتني بلطيه !!.
.
.
محمد حسين
Mohamed Hussein
25 مايو
الناس في مصر دايما يحققو المعجزات , ماستنّوش لما العيد ييجي لحد عندهم بكره قامو نزلو النهارده عشان يقابلوه أو يروحو له لحد عنده , الإحتفالات بدأت في الشوارع من دلوأتي , فعلا الإنقلاب بيترنّح , لأ لأ ده كده الإنقلاب بيرقص على واحده ونص , تحكٌّم عجيب في عضلات الإنقلاب ( رقصة العصايا ) , ولا عزاء لأشقائنا من دويلة قطر المقيمين في مصر ( مؤقتا ) تحت إسم جماعة الإخوان المسلمين و شركائها سوسو و توتو و طنط ماهيتاب !! .
Mohamed Hussein
25 مايو
و على فكره لو لك واسطه أو معرفه أو أمين شرطه و لا حاجه في قناة الجزيره ممكن يجيب لك من دلوأتي تقارير عن تزوير الإنتخابات في مصر اللي هتبدأ بكره ( من الكنترول يعني )!! , التقارير جاهزه و متستفه و اللقاءات التلفزيونيه معموله كمان و من أمام مقر اللجان الإنتخابيه , وطبعا زي ما حضراتكو شايفين إن الناس استجابت لفتاوى تحريم التصويت والشعب المصري كله رافض للإنقلاب !!.
.
أما بقى لو لك واسطه عميد زي المحلل العسكري والإستراتيجي المصري اللي ساكن فوق الجزيره من يوم الغزو الأمريكي للعراق واللي كان بيحلل هجوم قوى الخير ( المارينز ) على العراقيين ولاد الحرام , مش فاكر اسمه , المهم العميد ده لو علاقته بيه كويسه ممكن يجيب لك النهارده تقارير قناة الجزيره المصوره عن تزوير انتخابات 2018 في مصر !!.
.
أومال حضرتك فاهم المليارات اللي بتتصرف عالجزيره دي بتتصرف ليه ؟ طب فاكر الإعلام اللي زي الجزيره ده يعني ايه ؟ عارف انت ريري سيلان ؟ أهي ريري سيلان دي بالنسبه للجزيره واللي شغالين فيها تبقى ولي من أولياء الله الصالحين !!.
Mohamed Hussein
25 مايو
فيه أحزاب و شريحه معينه من ( المثقفين ) في مصر لما بيطلعو مترين بس بره مقر الحزب بتاعهم بيغرقو في شبر مايه , يعني بيمارسو السياسه على طريقة العروسه الجديده اللي بتقول ( مابعرفشي أطبخ غير في فرن أمي ) , عشان كده الحزب ده ( اللي هو العروسه ) بيوصل بسرعه جدا مع الناس والشارع لأبغض الحلال !!.
.
يا عروسه , الحياه الزوجيه والحياه السياسيه يلزمهم إنك تشيلي المونيكير اللي على ضوافرك وتقلعي الفستان ده والجزمه ام كعب عالي وتلبسي بيجاما قطن وسابوه و تدخلي المطبخ الجديد بطريقه يا قاتل يا مقتول ( يعني تحدّي ) , صدقيني أمك مش هتنفعك لما ترجعي لها بشنطة هدومك في نصاص الليالي !!.
Mohamed Hussein
25 مايو
عايز تنتخب السيسي إنزل بكره وانتخبه , هتنتخب حمدين انزل وانتخبه , مش عاجبك ده ولا ده وعايز تنتخب البرادعي أو خالد على إنزل واشطب على صورة السيسي و صورة حمدين وارسم صوره للبرادعي بالنضاره و اكتب البرادعي رئيسي أو حتى محمد حسين رئيسي (و ارسم صورة سمكه ) مش مشكله , صوتك هيبقى باطل بس محسوب , أهم حاجه انك تنزل لو خايف عالبلد دي فعلا مش ثورجية بؤ و فنجرية لسان , كتير من أصدقائي البرادعاويه عملو كده في تصويت الخارج , انتخبو حمدين أو أبطلو صوتهم , يعني قدامك 3 اختيارات تعبر بيها عن حب البلد دي وخوفك عليها وعلى صورتها قدام العالم ( انتخب حمدين , انتخب السيسي , ابطل صوتك ) , في كل الأحوال تبقى على راس ابويا من فوق , الإختيار الرابع برضه موجود و هو إنك تقاطع و ساعتها المفروض تقعد قدام الجزيره وتدعي ربنا إنه يبعت أي تفجير على إيد الجماعه الإرهابيه ( قصدي الفصيل الوطني ) و تبقى واحد منهم , انما ماتعملش فيها ثورجي بعد كده , ثورة يناير لها مرشح في الإنتخابات دي وثورة يونيو لها مرشح , يعني عندك مرشح ( صيفي ) ومرشح ( شتوي ) ده لو كنت بتؤمن ب ( الربيع ) العربي .
Mohamed Hussein
24 مايو
فينا حاجه غلط , أيوه هو أنا شاكك فيه , هو الإلكترون النشط اللي ماشي على حلّ شعره اللي اسمه FREE RADICAL , تلاقيه طايح جوّانا كده ومحدش قادر عليه , مره يخبط في الكبد مره في الطحال مره في سقف النافوخ , عامل زي الناموسه الغلسه اللي مش بتتهد أبدا , حالة اكتئاب وصدرك ضيق ومخنوق , خايف من بكره ومن النهارده وحتى من امبارح , مش كده ؟ مفيش حل غير إنك تمد إيدك بنفسك وتشيل الإلكترون الغتيت ده وترميه بعيد .
أنا عن نفسي عارف دوايا فين ؟ , هي قاعده في بلكونة بيتنا في البلد , هناك مفيش لا فيس بوك ولا نت ولا أي حاجه من المدنيه الحديثه اللي فرمتنا دي ولا حتى قطّاعة الخيار والجزر , اللهم إلا شجرتين ورد ( واحده بيضا وواحده حمره ) طالعين لبلكونة شقتي و نسمة هوا بالليل .... و بس كده , و ابقى سلّم لي على الكترونك يا اسماعيل بيه .
Mohamed Hussein
24 مايو
نخبة تجيب للواحد شلل أطفال
.
علاء الأسواني : عندما أرى الثوار بالسجون والفلول بالإعلام يبقى لازم أدعم صباحي !! .
أولا يا دكتور علاء من حقك تنتخب أي حد بس مش شرط تحشر أم كلمة الثوار في جمله مفيده , ثانيا لا السيسي اللي سجن الثوار ( بين قوسين ) ولا حمدين الي هيطلعهم براءه , ثالثا هما الفلول دول اللي حضرتك بتطلع في برامجهم من 5 سنين , ويا أستاذ محمود , يا أستاذه لميس , يا أستاذ وائل ....ف يعني برضه بلاش تحشر أم كلمة فلول في جمله مفيده .
رابعا وده الأهم : إذا كنت هتنتخب حمدين عشان شوفت الثوار ( بين قوسين ) في السجون , والفلول ( بين قوسين ) في الإعلام , طب تقدر حضرتك تقولي إنت كنت شوفت إيه يوم مانتخبت مرسي ( تقريبا كنت شايفه مرشح الثوره مش كده ؟), لأ قول للناس مش ليا أنا , الميكروفون مع حضرتك ......................... الحشيش الأفغاني هو الحل !!.
.
عمرو واكد : المصريين في الخارج صوّتو للسيسي عشان هما عايشين في الخارج !! ......هاحححح المفروض أضحك صح ؟ ده على أساس إن 90% من المصريين في الخارج مش شغالين في الخليج بنظام السُخره بتاع زمان ؟ و الشاب من دول بيسيب بلده وأهله وبيسافر عشان يجوّز نفسه أو يجوز خواته البنات بدل ما يبقى قاعد عواطلي عالقهوه , وعلى حد علمي إنك مش بتنام عالرصيف في مصر ولا بتاكل من صفايح الزباله صح ؟
عموما يا أستاذ عمرو , حاول تتدارى اليومين الجايين عشان بالتأكيد مش هتلاقي حاجه تقولها لما تشوف نتيجة تصويت المصريين في الداخل !!.
.
من حق أي حد ينتخب حمدين ومن حق أي حد ينتخب السيسي ...بس أبوس إيديكو أبوس إيديكو بلاش تجاره في أم الشعارات عشان بتجيب لي غثيان .
Mohamed Hussein
24 مايو
توقعي للإنتخابات في مصر , الناس هتنزل بأعداد مخيفه , هتبقى اكتر بكتير من انتخابات 2012 , هنعدّي ال 30 ميلون , وهيبقى فيه أفراح في الشوارع كأنه كارنافال , الحكايه تقريبا اتحولت لفولكلور , و مفيش أبدا أي حاجه تمنع إننا نعلّم العالم إن صناديق الإنتخابات ممكن تكون وقت مناسب جدا للسعاده .... إنتخب اللي يعجبك انت ولما تفرح أوي ارقص واعمل اللي يعجبك انت برضه .مش مهم هتعجب مين وماتعجبش مين ؟ لا اختيارك في الصندوق هيعجب الكل ولا طريقتك في التعبير عن فرحتك هتعجب الكل ..... هما 3 خطوات , إنتخب , إفرح , ارقص .....بس خليك جنب حيطه صلبه و قويه واللي مايعجبوش خطواتك التلاته شاور له عالحيطه وهو هيفهم !!.
Mohamed Hussein
24 مايو
حاجز مده ولا مدتين ولا قاعد بطريقة( أوبن بوفيه )؟!
.
صديقتي الغاليه رانيا بدران Ranya Badran , كتبت على صفحتها تسأل : هو السيسي قاعد لإمتى ؟ على اعتبار إن مبارك صاحب أول ضربه جويه قعد 30 سنه , طب اللي ضرب معانا الإخوان وجاب أجلهم هيقعد لإمتى ؟!
.
سؤال حلو يا رانيا , ورأيي أنا الشخصي إن السيسي اللي هيبقى رئيس مصر أو بمعنى أصح بقى رئيس مصر قاعد 4 سنين ب ( حكم الدستور ) , إنما بالشكل البائس للمعارضه ده نقدر نقول إنه ضمن في جيبه 8 سنين مش أربعه ( بحكم الدستور برضه ) ............. يعني كله بالحلال .
.
تخوفنا من تكرار تجربة مبارك مالهوش منطق أبدا لسببين :
.
أولا : ثورة يناير وبعدها ثورة يونيو عملو هزه كبيره جدا في مصر والعالم , وشبح الثوره هيفضل يطارد أي رئيس جاي لمدة 100 سنه عالأقل , إحنا خلعنا رئيسين ورميناهم في السجون في ظرف سنتين تلاته , لا العسكري قدر علينا ولا الشيخ أبو دقن .
.
ثانيا : جينات الثوره و ( لياقتها ) لسه موجوده جوه الناس , رئيس مصر لازم يمشي في طريق معين بحركه سريعه أو بطيئه مش مشكله , المهم مايمشيش في سكة الإتنين اللي قبله وإلا هيبقى تالتهم في السجن , أنا براهن عالشعب اللي عمل الطوفان مره واتنين إنه يقدر يعمل التالته بمنتهى السهوله .
.
مش دورنا احنا بقى كشعب إننا نمسك الساعه ونقعد نعدّ الدقايق والأيام والسنين ونقرا الفنجان ونوشوش الدكر عشان نعرف هيمشي إمتى ؟ , إنما المعارضه لازم تجهّز لنفسها مرشح واتنين وتلاته و تتكاتف بدل ماهما مختلفين على شكل الكرافته زي الأيام دي , .....
.............حاجه أخيره , المعارضه يعني المعارضه مش الإخوان ولو فكرت المعارضه تتحالف مع الإخوان يبقى السيسي هيقعد 400 سنه وأنا أول واحد هطالب بكده !!.
Mohamed Hussein
23 مايو
نكته عجبتني
.
بيقولك اتنين صحاب كانو ماشيين في الشارع واحد منهم رخم و غتيت أوي ( شبه البلتاجي كده ) و واحد طيب أوي ( أه زي حالاتي كده ) , المهم الإتنين لقو مصباح علاء الدين أو جمال الدين مش فاكر , دعكو المصباح وطلع لهم الجن ( اللي هو العفريت بالعربي ) , وقال لهم كل واحد يطلب طلب واحد , قام الطيب اللي هو أنا قال للجن أنا عايز أشوف أبويا الله يرحمه , الجن قال للغتيت وانت طلبك ايه ؟ الغتيت قال له طلبي إن محمد مايشوفشي أبوه الله يرحمه !!.
.
عارف إنت الرخم الغتيت ده بقى ؟ لما كبر بقى عنده أكاونت عالفيس بوك , و حط حبهانه تحت ضرسه وكل شويه يدخل يكتب بوست ويقول : هي الناس والستات والرجاله في مصر بيشغلو أغنية ( بشرة خير ) ويرقصو ويغنو ليه ؟ ايه الإنحلال والتردّي الأخلاقي ده ؟!.
و بما إني أنا الطيب اللي في النكته فعايز أقول للغتيت اللي اتخنقت منه من أيام مصباح علاء وأخوه : وانت مال أهلك يا جدع ؟ مال أهلك انت ؟ الناس عايزه تفرح , و بتنكش عالفرحه بملقاط , إيه يضايقك إنت يا غتيت ؟ يا بلتاجي ؟!.
Mohamed Hussein
23 مايو
معجون بطينة أمل
فايت لريحه جناح
يا صبر مين علّمك
تشفي قلوب و جراح ؟
و ساعات تلمّ دموع
م الأرض زي الطير
يتشقلب الموضوع
تطرح جناين خير
ترقص و تتعاجب
يا صبر إنت السِيد
عالعين و ع الحاجب
.
.
محمد حسين
Mohamed Hussein
23 مايو
حدوتة كل يوم
.
مرّه كنت بشتري شقه في مصر , قام ربنا وعدني بواحد سلفي معتبر عنده عماره و بيبيع شقه فيها , قالي لي العماره اللي فيها الشقه تحتها جامع قلت في نفسي كويس عشان مش أبقى أكسل واصلي في البيت , ولما شوفت صور الشقه عجبتني , جينا نتكلم في السعر قالي أنا جالي واحد وعرض اكتر من تمنها بس انا مارضتش عشان كان مسيحي و العماره فيها جامع وخواتي ساكنين فيها !!.
.
المهم إن الشقه طارت , وانا حمدت ربنا إني ماسكنتش وسط الناس دي
العقل بيقول في قصة الشقه 3 حاجات :
.
أولا : إن ( الشيخ ) صاحب الشقه كداب ولو كان جاله مشتري هندوسي وعرض جنيه زياده كان باع له .
.
ثانيها : إنه حمار عشان فهم ان حكاية جالي مشتري مسيحي وانا رفضت دي بتفرق معايا , ولو كان جالها مشتري مسيحي و رفض يبقى حمارين عشان سيدنا رسول الله كان جاره كافر يعني بيعبد تمثال عجوه الصبح و ياكل دراع الإله ده بالليل .
.
ثالثا : انه بالتأكيد بنى الجامع تحت البيت عشان يطلع بعدها بكام دور و مايخودش مخالفة مباني , يعني بيتاجر بدين ربنا زيه زي غيره من دقون الإخوان والسلفيين !!.
.
.................. الحمد لله على نعمتيّ الإسلام و العقل .
Mohamed Hussein
23 مايو
المناضله السياسيه توكّل ولا مؤاخذه كرمان في ضيافة المناضله الحقوقيه هيلاري ولا مؤاخذه كلينتون , إيد في إيد وابتسامتهم من الودن للودن , إنما السيسي هو عميل أمريكا !! , وتوكل كرمان بتجاهد مع الإخوان ضد الغرب الكافر الصبح و تروح تبات عند الكفره دول بالليل , ماتفرقش كتير عن المجاهد يوسف و لامؤاخذه القرضاوي , مفتي الناتو و المارينز , اللي بيدعو أمريكا والغرب لضرب ليبيا وسوريا و مصر لوجه الله !! , و زيهم قيادات الإخوان وقيادات تنظيم القاعده , السيناريو بسيط خالص بس انت اللي مش فاهم :
..............إنت تجاهد ضد الكفره بتوع الغرب الصبح و تروح تبات عندهم بالليل ( عالسرير ) تصحى من النوم تلاقي الشيك تحت المخده و معاه ورده حمره و جواب غرامي متبرفن بيشكرك عالسهره بتاعة ليلة امبارح , تاخد الشيك والورده و الجواب وتروح تجاهد من تاني وهكذا , و انت بتجاهد تقول ايه ؟ أيوه بالظبط كده ( يا سيسي يا جبان يا عميل الأمريكان ) !! .
Mohamed Hussein
23 مايو
خطأ الإخوان وخطيئة حمدين و كنبة البرادعي
.
خطأ الإخوان كان باختصار في الوهم اللي عاشوه واعتقادهم الحلزوني الوهمي , اعتقدو في يوم من الأيام إن جماعه عمرها 80 سنه هتبلع دوله عمرها 7 الاف سنه وإن 500 ألف عضو في تنظيم ارهابي دولي هيبلعو 80 مليون مصري , وان مكتب الإرشاد وكام خُنّ تحت الأرض هيبلعو مصر بشوارعها وحواريها , يعني صرصار عايز يبلع فيل , و الصرصار ده قال لنفسه أن لما هكبر وهكبر وهكبر وهكبر أكيد هييجي اليوم اللي أعرف فيه أبلع الفيل !!.
.
خطيئة حمدين إنه مافهمشي كويس إن ثوار يناير هما هما ثور يونيو وزاد عليهم شويه , وإن أغلب ثوار يناير اللي هما ثوار يونيو خافو على بلدهم أكتر من خوفهم على ثورتهم , وقالو الثوره يوم ما تحيد شويه عن طريقها هنعرف نعدلها , أهم حاجه دلوأتي ان يكون عندك بلد , يعني 4 حيطان تتّاوى فيهم , وأصرار حمدين على خطابه الثورجي واحتكار العمل الثوري له و أنصاره هو اللي خلّى أصواته بالشكل ده .
.
في يوم من الأيام كان فيه مجموعة أصحاب اسمهم حمدين والبرادعي و فلان و علان وترتان , كان عندهم حتة ارض مباني معتبره ومعاها الرخصه كمان , قالو هنبني عليها فيلا ونعيش و نقب على وش الدنيا , وهما بيعملو تصميم الفيلا اختلفو على الأباليك والكرانيش والستيللو , والخلاف زاد بينهم قالو خلاص يبقى مفيش غير اننا نقسم الأرض بينا وكل واحد يعمل في حتته اللي هو عايزه , طلع نصيب كل واحد فيهم حتة أرض مترين في تلاته متر , ولسبب ما لا يعلمه غير ربنا فضل كل واحد فيهم معتقد إنه بحتة الأرض ال 6 متر دي هيعرف يبني فيلا ......... يا مولانا أرض مترين في تلاته متر بكتيره تعرف تحط عليه الكنبه بتاعة عثمان البواب وتقعد قدام الفيلا اللي هي مش بتاعتك !!.
.
بصفه شخصيه , ليا عدو واحد في مصر اللي هو عدو بلدي أساسا , اللي هي الجماعه الإرهابيه , ولا اعتقد إن السلفيين بتوع سياسه ولا حتى بتوع دين , لسه جوايه شوية احترام للبرادعي صغيرين وشويه احترام لحمدين كبار عشان كده من حقي أقول لهم من شوية العشم اللي باقي ( انتو اتعميتو في نظركو ....قبر يلمّ العِفش ) !!.
Mohamed Hussein
22 مايو
حقك عليا يا حمدين , هات راسك أحبّ عليها , عندي صداع هيفرتك دماغي , ارجع لطابور المعارضه , اقف في الصف , بس الفتره الجايه هيبقى فيه طابورين معارضه عاملين زي رقم 10 بالعربي ...طابور طويل شويه فيه الإخوان والسلفيين الشباب و معاهم الجزيره و طابور صغير فيه اللي باقي من ثورجيه يناير اللي مش مقتنع أن فيه ثوره تانيه قامت , يعني طابور عامل زي ال ( 1 ) وطابور عامل زي ال ( . ) , وكان لزاما على أحد الطابورين أن يبتلع الأخر , وانت ابن سوق وفاهم !! .
.
الصداع زاد في دماغي , طب انت عارف ليه انا بحترم عمرو موسى ؟ عشان كان سياسي كبير له شنه ورنه بس في لحظه فهم إن قواعد اللعبه اتغيرت , ماهي السياسه زي لعبت الشطرنج , و الفيل بيبقى مهم أوي فيها لكن ممكن يتزنق زنقه ما يعلم بيها إلا ربنا , عمرو موسى قرر انه يمد ايده ويساعد وعرف عدوه فين .
.
بالمناسبه , انا احترمت جدا ترشحك و عمرك ما نزلت من نظري , دانا كمان كنت متوقع لك 30 % عالأقل و قلت مش قيمتك ابدا حكاية ال 6 % دي , بس عارف ؟ انت مش هتجيب اكتر من 10 ولا 15 % بالكتير في النهايه , لو عايز تعرف السبب ابقى تعالى بجد وانا اقولك , عايز قرصين بنادول و جردل قهوه بقى عشان استوعب الشعارات اللي هتيجي دلوأتي .
Mohamed Hussein
22 مايو
مش بعرف أفهم حكاية إن واحد يقول أنا لو مانجحتش برفض تولي أي منصب رسمي و هرجع لصفوف المعارضه !! , اللي عايز يخدم بلده ويقف جنبها في محنه و يتكاتف مع ناسها بيقبل و يمد إديه يساعد , مصر مش واقفه عليك يا حمدين ولا هتقعد تعيط و تتشحتف طول الليل عشان انت مش قابل تمد إيدك , مصيبه سوده لما يبقى شخصيه محترمه زيك كده فاهم إن المعارضه دي وظيفه أو مهنه زي الدكتور والمهندس و السباك و السواق , وانتي جايه تشتغلي إيه ؟ معارض يا هانم , جايه اشتغل معارض .
مصر منكوبه في ولادها , و كده معاهم حق الشباب يفكرو إن كلمة ثائر دي وظيفه و روتين يومي برضه , إنت نازل فين يابني النهارده ؟ نازل أثور , أعمل ثوره , مش النهارده التلات ؟ طيب مانا بعمل ثوره كل حد و تلات .
