Mohamed
Hussein
27
أغسطس 2015·
حتة أفيون
.
بالمناسبه و مع
احترامي التام للعفه و الإلتزام و الحاجاتي دي كلها , بس في الحقيقه لو فكرنا شويه
هنلاقي ان حكاية العبايه السوده اللي بتتلبس من الأكتاف و اللي بتتلبس من الراس و العبايه
اللي بكم و اللي من غير كم و النقاب اللي بيبين العين و اللي لأ , المهم الشاسيه ده
على بعضه كده بسلطاته و بابا غنوجه له علاقه بمواسير البترول اللي طفحت في الخليج و
بالفكر الوهابي مش بالإسلام .
.
ماهي أصلها حاجه
من اتنين , إما ان الحاجات دي مالهاش علاقه بدينا الإسلامي فعلا و إما إننا كنا كفار
لمدة 1400 سنه , يعني قبل اكتشاف البترول في جزيرة اللامؤاخذه العرب و قبل دخول الإسلام
لمصر على يد العائدين من الخليج , أه دخل الإسلام مصر لأول مره سنه 1960م هو و الكاسيت
أبو روحين و المروحه و الجلابيه الزبده .
.
مصر تحديدا اللي
عمرها كذا ألف سنه مرّ عليها كتير و شافت شئ و شويات , لكن فضلت بنكهتها و جيناتها
و طعمها المميز , الإنجليز احتلونا عشرات السنين و سابونا مابنعرفش نقرا كلمتين انجليزي
على بعض و العثمانيين خدو معاهم عدة الأغاوات و هما ماشيين , إنما ليه حكاية العبايه
دي دخلت علينا و استربعت كده ؟ عشان جت عن طريق الدين , و الدين هو أفيون الشعوب ,
يعني باختصار عبايتك السوده و نقابك الإسود يا اختاه هو حتة أفيون و اترمت في حِجْر
مصر من 50 سنه , و أدينا بنشربها !!.
..................................................................................................................................
Mohamed
Hussein
27
أغسطس 2015·
هو البرادعي مش
وراه غير الكلمتين دول ؟ أحلام الشباب و مستقبل الشباب و حرية الشباب و حَب الشباب
؟ يا جدع انت مابتزهقش ؟ بقيت شبه إنعام سالوسه في الفيلم لما كانت بتقول على كل حاجه
( إن شاء الله و ألف ألف مبروك ) .
.
سنين طويله وانت
بتقول نفس البؤين , العالم بيتشال و يتهبد حواليك و هما نفس الكلمتين , خريطة المنطقه
بتتغير و دول بتقع و جيوش بتهرب و جيوش عالجبهه و داعش و حوثيين و مخططات اجنبيه و
خيانه و مشاريع عملاقه و تحالفات و تكتلات جديده و اتفاقات نوويه و الشرق الأوسط هيبقى
فيه خمس ست دول و شوية قبائل كتير حواليهم و هما نفس الكلمتين ؟ يا برادعي ده مش اسمه
ثبات على المبدأ , دي اسمها غيبوبه يا مولانا , غيبوبه يا ست إنعام !! .
.
أقطع دراعي من
هنا إنك ميت من كام سنه و مخبي علينا .
........................................................................................................................
Mohamed
Hussein
27
أغسطس 2015·
قالولي معلش ,
أصل أمناء الشرطه في مصر عددهم كبيرو معاهم سلاح و لو اعلنو اضرابهم و اعتصامهم في
مصر البلد هتروح في شربة مايه فكان لازم ناخدهم في حضننا و نحتويهم !! .
.
قلت لهم الاطباء
لو أضربو كلهم في وقت واحد يومين تلاته بس هتبقى مشكله اكبر و المرضى هيموتو في المستشفيات
( مش مهم يموتو برصاصه ) , و الصيادله نفس الشئ , و عمال النظافه لو أضربو الناس هتموت
من الامراض , و سواقين القطارات لو أضربو البلد حالها هيقف و الفلاحين وسواقين الميكروباصات
و القضاه و طيارين مصر للطيران و موظفين شركة الكهربا و عمال المصانع , حتى بياعين
الدره المشوي .
.
ماهو يا إما عندك
قانون و يتطبق عالجميع يا إماعندكش , و تأييدك للنظام لا يعني تبريرك و تطبيلك , و
محاولة وضع ورقه توت على عورة مسئول من المسئولين زي وزير الداخليه و وزير التعليم
هي محاوله فاشله و مقرفه وعيب , انا مش هعمل كده و لا هوسّخ إيدي , مع اني مؤيد جدا
للسيسي و شايله جميل في رقبتي أد كداهو , ياريت اللي معاه ورقه توت و عايز يغطي عورة
حد من المسئولين يعمل كده من سكات , بعيد عننا , و يحتفظ ب ( المجد ) الشخصي ده لنفسه
, إذا بليتم فاستترو .
...............................................................................................................................
Mohamed
Hussein
27
أغسطس 2015·
مكالمة تليفون
.
أستاذ حسن : ألو
, مساء الخير يا باشا .
الباشا : أهلا
يا حسن , عملت لنا ايه في موضوع حماده ابني .
.
أستاذ حسن : الموضوع
صعب شويه يا باشا و هيكلف حضرتك كتير .
الباشا : حسن انا
قلت لك مايهمنيش الفلوس .
.
أستاذ حسن : طب
يا باشا هو حماده بيه ابن سيادتك مايعرفشي يذاكر شويه و يشد حيله و يجيب ولو 90 % و
يدخل جامعه خاصه ؟
الباشا : انت بتقول
ايه يا حسن ؟ الولد أصلا طول السنه مابين الساحل و شرم مع صحابه و الشله , مايعرفش
اسماء المواد اللي عليه , عايزني أقوله ذاكر قبل الإمتحان ب 3 ايام ؟ انت اتجننت يا
حسن ؟ مانا قلت لك تتصرف يا بني أدم .
.
أستاذ حسن : خلاص
يا باشا اعتبر الموضوع منتهى انا اتصرفت خلاص .
الباشا : أومال
سايبني أحرق في دمي ليه , ما تنطق تقول .
.
أستاذ حسن : شوف
يا باشا مفيش غير حل واحد , احنا نشوف طالب يكون متفوق جدا بشهادة المدرسين بتوعه و
نبدل ورقة اجابته بورقة اجابة حماده بيه ابن معاليك و بكده نضمن لحماده بيه الكليه
اللي يشاور عليها و في جامعه حكومي كمان .
الباشا : فكره
هايله يا حسن , بس احنا كده هنظلم الطالب ده ولا ايه ؟
.
أستاذ حسن : يا
باشا ماهو الطالب بالتأكيد هيشتكي و الدوله هتشوف له حل .
الباشا : طب افرض
اكتشفو اللعبه و عرفو يوصلو لورقة حماده ؟
.
أستاذ حسن : دي
مسئوليتي يا باشا ولا الجن الأزرق هيعرف يوصل لها .
الباشا : طب تتوقع
الوزير هيعمل ايه في حاله زي كده ؟
.
أستاذ حسن : الوزير
طبعا هيطلع يقول ان مفيش تزوير في ورقة الإجابه , يا باشا أعداد الطلبه بالملايين هو
الوزير فاضي لكل طالب ؟
الباشا : طب لو
اتعمل تحقيق و الطالب ده اكتشفو ان ورقته مزوره ؟
.
أستاذ حسن : ساعتها
الوزير هيعوضه بأي شكل و يحاول يراضيهم عشان الفضيحه .
الباشا : و لقيت
الطالب المتفوق ده يا حسن ؟
.
أستاذ حسن : أيوه
يا باشا , طالبه في مدرسه في الصعيد شاطره جدا اسمها مريم
الباشا : على خيرة
الله يا حسن , ربنا يقدم اللي فيه الخير , ابقى فوت عالحسابات ماتنساش بقى .
.
استاذ حسن : ربنا
يوفق حماده بيه يا سعادة الباشا , و الله ده كتير , دانا لحم كتافي من خيركو .
الباشا : اه ما
تنساش يا حسن السنه الجايه تعمل نفس الفكره ل ناني هانم بنت اختي عشان هي داخله ثانويه
عامه .
.
أستاذ حسن : بإذن
الله يا باشا
...................................................................................................................................
Mohamed
Hussein
26
أغسطس 2015·
حوار مع زبونه
صوماليه
.
الزبونه : عندي
تساقط بالشعر
أنا : بتاخدي أقراص
منع الحمل ؟
هي : لا , ما ناخد
هاذي الأشياء
أنا : ليه ؟
هي : عندنا ممنوع
, ما ناخدها , احنا نخلف عشره و عشرين و تلاتين
أنا : عشره و عشرين
و تلاتين ؟ هي جواز فراخ ؟ و تربوهم ازاي ؟
هي : بنربيهم و
كل شئ عندنا بالصومال رخيص , زوجي متزوج 4 و مخلف 45 منهم 20 ولد
أنا : و بيعرف
أساميهم من بعض و لا مسميهم كلهم بإسم واحد عشان مايتلخبطش ؟
هي : بتضحك
أنا ( في سري بقى
) : أومال انا مراتي مخلفه اتنين و محسساني انها بترعى قبيلة الأوس و الخزرج ليه ؟
.
.......................................................................................................................................
Mohamed
Hussein
26
أغسطس 2015·
معالي وزير الداخليه
في أزمة أمناء الشرطه قرر انه يتفاوض و يحتوي و يطبطب و خد المعتصمين البلطجيه بالحضن
, حضن مطارات بقى , و الله اعلم أمناء الشرطه دول هيتنفخو و يتحولو للنيابه و المحاكم
ولا هيترقو و مرتاباتهم تزيد و ياخدو نجمة سينا !! .
.
معالي وزير التعليم
لسه لحد دلوأتي بيحقق و يدقق و يمقق في قضية الطالبه مريم , الطالبه المتفوقه اللي
خدت صفر %, و غالبا لما تنتهي التحقيقات تكون الطالبه مريم عمرها 60 سنه و الوزاره
تبقى تقدم اعتذار واجب للأحفاد والورثه .
.
السيسي في روسيا
, بيتكلم عن صفقات اقتصاديه و عسكريه و الأهم هو ترتيب موقف سياسي معين بحضور قادة
دول عربيه تانيين , و شايل هم وضع اقليمي معقد جدا و شديد الخطوره .
.
إرجع بلدك يا ريس
واعرف انك مسنود على حيطه مايله , انت في وسط النار ماشي عالحبل , و الوزراء بتوعك
قاعدين في التكييف بيلعبو كاندي كراش .
.....................................................................................................................................
Mohamed
Hussein
25
أغسطس 2015·
وائل عباس طاح
في البرادعي و وصفه بإنه إحم إحم ( أندر وير ) بلاش الكلمه اللي قالها !! .
.
بتخيل بقى لو كانت
الثوره حكمت (( ماهي الثوره لازم تحكم )) , و البرادعي مثلا بقى رئيس و جاب وائل عباس
عينه وزير أي حاجه ( ماهو لازم يستعين بالشباب الثورجي النكي ) , و بعدين عمل اجتماع
وزاري عشان يناقشو أسباب تأخر نمو الشعر في صدر رشا العزب , و اختلفو جوه الإجتماع
, قام طلع معالي الوزير وائل عباس قدام الكاميرات و قال : عليا الطلاق الرئيس اللي
قاعد جوه ده راجل أندر وير !!
.......................................................................................................................................
Mohamed
Hussein
25
أغسطس 2015·
أي حد اشتغل في
الخليج هيعرف ان الشركات هناك بيبقى لها صاحب اسمه الكفيل , ده صاحب راس المال ( بيسموه
راعي الحلال ) , و فيه مديرين و رؤساء أقسام و موظفين و عمال نضافه و أفراد أمن لو
تطلب الأمر , و طبعا فيه مصدر الدخل الي بيكون غالبا مصنع أو حاجه , و الكفيل في الغالب
الأعم مايعرفشي أي حاجه عن أي حاجه .
.
في دويلة قطر هتلاقي
الحكايه كلها عباره عن شركه بنفس المفهوم الخليجي , فيه أفراد الامن اللي بتحرس الشركه
( قاعده أمريكيه ) و فيها أجانب بيديرو كل حاجه , حتى المنتخبات الي بيلعبو بيها بتلاقيهم
واحد صربي على واحدي مكسيكي على واحد منغولي على أي جنسيه و يسموه منتخب قطر , و القناه
اللي مسنودين عليها من أول الراس الكبيره الفلسطيني عميل المخابرات الامريكيه لأصغر
عامل هناك , و طبعا مصدر الدخل هو ماسورتين الغاز اللي بيطرطشو في كل حته .
.
عشان كده انا بستغرب
والله بجد من حكاية وصف قطر بإنها دوله , دولة إزاي يعني ؟ بستغرب جدا من حكاية الأمير
و الوزير والسفير دي , يابني انتو شركه , هو فيه شركه بيبقى فيها منصب امير و منصب
وزير ؟ .
.......................................................................................................................................
Mohamed
Hussein
25
أغسطس 2015·
البنات ضاغطين
عليا عشان يطلعو مصيف , ولو حتى يومين , أهو يبلّو رجليهم في المايه , و أول ما اقترحو
قالو اسكندريه عشان مش بعيد !! .
.
انا سمعت كلمة
اسكندريه من هنا و تخيلت مشهد لأحمد عيد في فيلم ( إوعى وشك ) لما كان لامم الصعايده
حواليه و بياخد اساميهم عشان يسفرهم ليبيا , واسمك ايه يا عوضين ؟ , تخيلت ان ده هيكون
حالي في اسكندريه في التوقيت ده تحديدا , سواء كنت سايق عالكورنيش أو قاعد على شط
, انا فاكر أخر مره روحت فيها اسكندريه قلت ابعد عن الزحمه واروح المنتزه , قمت دخلت
من البوابه بفلوس و من بوابه تانيه بفلوس ودخلت عالشط بفلوس و جابولي شمسيه بفلوس و
4 كراسي بفلوس , و قلت أشق طريقي وسط جموع المصيفين و انزل أغطس لي غُطّيسه لقيت واحد
تحت المايه بيقولي هات عشين جنيه و انا أطلّعك من الغطس ده ( تقريبا كان أمين شرطه
مكلف بحماية قاع البحر ).
.
قلت يا بنات مالها
العين السخنه ؟ تضرب عنيك على مدد الشوف ماتلاقيش حد , تركن عربيتك في أي حته, أو حتى
تاخدها جنبك عالسرير , دانا فاكر حتى في ركنة العربيه في اسكندريه لما كنت بدخل شارع
جانبي كنت بحس إني داخل ماسوره هي بكل المقاييس أضيق من فتحة مناخير توفيق عكاشه (
يعني الواحد يركن في مناخير توفيق عكاشه أرحم ) , و تقريبا الإسكندر الأكبر و هو بيصمم
اسكندريه كان مصصم ان كل الشعب يمشي على رجليه أو يركب حصان و هو يبقى الوحيد اللي
راكب عربيه ألماني 6 سلندر .
...................................................................................................................................
Mohamed
Hussein
25
أغسطس 2015·
يمكن في يوم من
الأيام نفهم , بعد سنه ولا اتنين ولا عشره , و كتاب التاريخ يقول ( و بخط إيد الاجانب
) إن مصر بعد 2011 قدرت تصد عن أراضيها عدوان أخطر من عدوان المغول و الهكسوس و نجت
من وباء كان أسوأ ألف مره من الكوليرا و الطاعون , جايز وقتها بس نعرف ننحنى إحتراما
و أدباً للبطل !! .
.
#هَلكَ_المتنطعون
.
.....................................................................................................................................
Mohamed
Hussein
24
أغسطس 2015·
مين قال ان الفيس
ده عالم افتراضي , ماحنا فيه بنعرف نضحك من قلبنا و نتصاحب و نحب , و بنعرف نتوجع كمان
لناس حتى ماشوفنهاش .
.
هو مكانشي رئيس
دوله ولا وزير و لا ممثل مشهور ولا حتى لاعب كوره , اكتشفت وجوده في الأصدقاء بالصدفه
, و لقيته فنان عظيم بس مش ده المهم أو مش ده اللي لفت انتباهي , الراجل ده كنت بعدّي
على بوستاته مابقدرش أقراها , بحس معاها اني ولا حاجه .
.
لما كان بييجي
و يكتب عن معاناته المستمره من فتره طويله مع السرطان ( ربنا يعافينا ) و يحكي بأدق
التفاصيل , و يتكلم عن الأمراض التانيه اللي جت له بعد كده عشان تكمّل عليه ( كل مرض
فيها يهد جبل ) و عن اعراض الادويه و يوصف حالته و ممكن يبتسم و يقول يا ناس بحبكو,
و انا كنت لما بشوف بوست له اجري بسرعه و اقول مش عايز أقرا .
.
إيه القوه دي يا
سيدي ؟ منين جبتها يا فرعون ؟ أحسدك عليها ولا ايه ؟ الله يرحمك يا صديقنا الغالي بحق
كل لحظة ألم عشتها , و يجعل مثواك الجنه و يصبر أهلك و أصدقائك و كل حبايبك Hani El-Masri
.......................................................................................................................................
Mohamed
Hussein
24
أغسطس 2015·
ذكريات من أيام
الهري و المعجنه .
.
و كنا يا لوجي
يا بنتي بنقعد قدام برامج التوك شو نتفرج على مذيع لابس بدله و كرافته و جزمه بتلمع
و 3 ضيوف كل واحد فيهم لابس بدله و كرافته و جزمه بتلمع , يتكلمو ييجي 9 ساعات عن أفضل
الأنظمه لحكم مصر , واحد في الضيوف يقول النظام الرئاسي و نبقى زي أمريكا كده و التاني
يقول النظام البرلماني و نبقى زي تركيا و التالت بقى يلاقي نفسه مزنوق في خانة اليك
و لازم يهري و يدلي بدلوه, فيقوم يفكر شويه و يقول انا بفضل النظام المختلط , نصف رئاسي
و نصف برلماني , و في النهايه جابولنا محمد مرسي بتاع المانجه !! يعني بقى نظام الحكم
في مصر مختلط فعلا , نص عويسي و نص منجاوي .
.
عارفه الضيف التالت
ده يا لوجي ؟ أهو ده اللي ممكن تشوفيه واقف قدام بتاع الزلابيه اللي في السراج مول
و العامل يسأله عايز الزلابيه بالعسل ولا بالسكر ؟ يبص على يمينه يلاقي واحد اختارها
بالعسل و يبص شماله يلاقي مدام اختارتها بالسكر , فيقوم يفكر برضه ويقرر انه يكون مختلف
و متميز ف يقوله عايزها مختلط , نص عسل و نص سكر , و بكده يبقى واحد من النخبه .
.
و تفوت أيام و
سنين و نكتشف ان الضيوف التلاته اللي صدعو دماغنا لا عارفين يعني ايه نظام رئاسي ولا
يعني ايه برلماني و لا يعني ايه دولة من أساسه , يعني التلاته كانو بتوع زلابيه .
.
و ده كان مجرد
فصل من ذكرياتنا مع ( الجزم اللي بتلمع ).
....................................................................................................................................
Mohamed
Hussein
24
أغسطس 2015·
قيادات الألتراس
في الأهلي و الزمالك , الشباب الطيب الطاهر النقي البيور الشفاف اللي قلبه قلب خسايه
, الشباب اللي نسي شكله الكوره و نسي ضربة الجزاء و بقى يعرف شكل المولوتوف و ضربة
الشومه .
.
الشباب اللي مابيخليش
أي مناسبه لها علاقه بالكوره أو حتى مالهاش , جوه مصر أو برّاها , و يطلع يهرتل و يهبل
و يجبر الناس عالسؤال ده : انتو مين و عايزين ايه بالظبط ؟!
.
أهو الشباب ده
محتاج معامله خاصه جدا , خليط من الحنان و الحنيه , لازم نحتويهم و نضمهم و نجمعهم
و بعدين نغسلهم و ننشرهم و نكويهم و نطبقهم و نرميهم في أوسخ دولاب و نقفل عليهم ,
عشان هما شباب نقي أوي و مش معقول نسيبهم كده يعيشو وسطنا و يتلوثو وسط عالم الأشرار
الشريرين اللي كلهم شر اللي هما احنا يعني .
.......................................................................................................................................
Mohamed
Hussein
24
أغسطس 2015·
مفيش اعتصام اتفض
بالقوه و لا حاجه , و غالبا كده احنا هنمشيها مفاوضات يا مصيلحي , نطبطب و ندلع , الطريقه
المثلى في التعامل لحكومة نانسي عجرم .
.
بكره الصبح هتبقى
اضرابات و اعتصامات الداخليه زي الخبز اليومي كده و اللي مش عاجبه حاله يقتحم مديرية
الأمن أو حتى وزارة الداخليه و قصر الرئاسه , و ننقل حكاية الحسم و الإنضباط دي لوزارة
الري , انا عايز الموظفين بتوعك يا معالي وزير الري يكونو مثال يحتذى بيه في الإنضباط
العسكري , أه انت و معالي وزير البيئه !! .
....................................................................................................................................
Mohamed
Hussein
23
أغسطس 2015·
أمناء الشرطه في
الشرقيه بعد ما عملو اضراب و اعتصام و بلطجه و اقتحمو مديرية الامن , انا شايف إن الحل
هو التفاوض , أه التفاوض مفيش حل غير كده , طب هنتفاوض ازاي ؟ أنا أقولك :
.
احنا نبعت لهم
قوات تنفخهم نفخه معتبره , و بعدين يترمو في السجن كام يوم و بعدين نعلقهم من رجليهم
في سقف العنبر بتاع السجن , و نقعد احنا بقى نتفاوض على نوع و لون الحبل اللي هنعلقهم
بيه , و ممكن واحنا بنتفاوض نعمل حوار مجتمعي كمان في الموضوع ده عشان جميله اسماعيل
ماتزعلش
.......................................................................................................................................
Mohamed
Hussein
23
أغسطس 2015·
الشرقيه تترنح
.
محافظة الشرقيه
هي المحافظه الوحيده في مصر اللي فيها حالة من الانفلات و الهطل الأمني , من أول تفجير
أبراج الكهربا لحد معاقل الإرهابيين و أخيرا اضراب و اعتصام أمناء الشرطه .
السيد المحافظ
مشغول بمشروع ماعرفشي ايه و بيشجع الشباب و مدام شوشو على افتتاح البيوتي سينتر , و
أكيد السيد مدير الأمن هو كمان جاب مقص و بيفتتح عربيات الكبده عشان يشجع الشباب برضه
, صحيح هو زكي بدر مات إمتى ؟ الله يرحمه بقى
.
يا ريس انت اللي
بتشيل الليله في الأخر , مطلوب إقالة مدير أمن الشرقيه و التحقيق معاه عن كوارث سنه
فاتت , أما السيد المحافظ الكيوت فرأيي إنه يمسك برنامج همسة عتاب أو يشتغل في الاستوديو
التحليلي مع مدحت شلبي و يغنّو قصاد بعض , و الساده أمناء الشرطه سهل جدا تفضو اعتصامهم
, قولو لهم بس ان العربيات الجمارك مسافره راجعه الخليج و عايزينكو تقفو في كماين على
طول البحر الأحمر من السويس لسفاجا و تسترزقو !! .
.
أصدقائي الاعزاء
, بعيد عن كلام الإنشا الجميل , فيه مثل عند العرب بيقول ( البعره تدل على البعير
) , و البعره اللي انا شايفها في الشرقيه ( ال product ) بتقول ان البعير هناك تعبان مُلّه , خلاص ما
تزعلوش , حقكو عليا , المحافظ زي الفل و مدير الامن جامد تنين و أمي هي السبب في حالة
الهطل الامني اللي في الشرقيه , الله يسامحك يامّه , انا اطالب بإقالة أمي من منصبها
و التحقيق معاها .
...............................................................................................................................
Mohamed
Hussein
23
أغسطس 2015·
معلومه تهمك
.
عايز تعمل كرتونة
بيض و مش عارف تعملها ازاي ؟.
.
بسيطه خالص , هات
بيضه و بيضه و بيضه و بيضه و حطهم جنب بعض في كرتونه فاضيه هيعملولك كرتونة بيض .
.
أو
.
هات أحمد موسى
و توفيق عكاشه ومرتضى منصور وسيد علي و حطهم جنب بعض في برنامج فاضي برضه هيعملولك
كرتونة بيض .
.......................................................................................................................................
Mohamed
Hussein
22
أغسطس 2015·
أعضاء حزب النور
في النيو لوك الجديد بعد ما قلعو الجلابيه , لبسو البدل بتاعة ايطاليا و الساعات بتاعة
سويسرا و حطو البارفانات بتاعة فرنسا و شالو التابلت بتاع كوريا , يا ترى هيقفو بعد
كده في السلام الوطني بتاع مصر ولّا ده بدعه ؟!! .
.......................................................................................................................................
Mohamed
Hussein
22
أغسطس 2015·
حدوته من حواديت
السلفيين اللي بتفقع لي مممممممممممم المرارتين ( اه هما الإتنين ) , الحدوته من تأليفي
:
.
أنا شاب سلفي متدين
و لله الحمد , أقوم الليل أو اغلبه و بصوم اتنين و خميس طول العام و حجيت ييجي 400
مره , عندما بلغت سن التلاتين بدأت افكر جديا في الزواج
.
وفي أحد الأيام
كنت اجلس في حلقة علم لأستاذي الشيخ البحبحاني , بارك الله فيه و في علمه و خلف ستار
في نفس المسجد جلست فتاه منقبه تستمع الى حديث الشيخ , لاحظت ان الفتاه تحضر كل جلسات
العلم لشيخنا الجليل , و في هذا اليوم مالت رأسي ألى اليمين قليلا فوقعت عيني عليها
, فأشاحت الفتاه برأسها الى الجهه الأخري من الخجل .
.
عندما خرجنا من
الدرس أخبرت أخ كريم من زملائي طلاب الشيخ البحبحاني عن الفتاه فقال لا يعرفها و لكنه
سوف يخبر أخته و سوف يحضرها معه في الدرس القادم .
.
و بالفعل حضرت
اخت زميلي و جلست بجوار الفتاه , و بعد الدرس أخبرني أخي الكريم بالبشاره , و قال لي
أن الفتاه التي أرغب بها تبلغ من العمر 22 سنه , طولها 165 سم و وزنها 72 كيلو , غير
متزوجه و غير مخطوبه و هي من أسره متدينه و ميسورة الحال .
.
بعد يومين استخرت
الله و قررت ان اتزوج الفتاه .
.
دخلت البيت الطيب
المبارك و قابلت والد الفتاه , كان رجلا بشوشا ملتحيا احسبه على خير , و قلت له انا
لا اعمل و ليس عندي شقه و طلعت من تانيه اعدادي من المدرسه , فابتسم الرجل و قال لي
و لكنك تحفظ ما تيسر من كتاب الله ؟ قلت له نعم فقال إذا على بركة الله , نقرا الفاتحه
.
.
و بالفعل تمت الخطوبه
و كنت أذهب الى بيت خطيبتي و في كل مره أحضر لها مصاصه و بلالين فقد علمت من اخيها
الصغير انها بتحب المصاصات و البلالين و قلت لا بأس ربما كانت المصاصه المغطاه تذكرها
بحجاب المرأه , و في مره من المرات أردت ان اختبر تدين و أخلاق خطيبتي فأحضرت معي صورة
لعمرو دياب و تمنيت ألا تتعرف عليها , وضعت الصوره في كيس المصاصات و البلالين و ارسلتهم
لخطيبتي مع اخوها الصغير , فعاد الطفل بالصوره و قال لي : أختي بتقولك انها مابتتفرجش
على أغاني !! , فرحت جدا و حمدت الله و تزوجنا .
.
و بعد عدة أعوام
من الزواج , كنا قد رزقنا ب مصعب و حمزه , و في ليلة دافئه قلت لها يا حبيبتي بارك
الله فيكي , أريد قبله فليس من المعقول ان نكون قد تزوجنا منذ سنوات و رزقنا بطفلين
و لسه مابوستكيش لحد دلوأتي , فوضعت رأسها في الأرض خجلا , قلت في نفسي الحمد لله على
عفة هذه المرأه , ثم نمنا بعدها و جبنا الواد التالت
.......................................................................................................................................
Mohamed
Hussein
22
أغسطس 2015·
ردود فعل وائل
عباس و شلة الأرزقجيه شمامين الشرابات على تويتة خالد الصاوي بتقول باختصار ان لقب
شمامين الكوله والشرابات يليق بيهم .
.
انك تتكلم في السياسه
و تنسى مواقف الفنان السياسيه على الأرض و تتكلم عن فيلم أدى فيه دور معين دي قمة السفاله
و الإنحطاط , و يعني افهم من كده ان خالد الصاوي مش مهم يكون ثورجي عالأرض المهم انه
يمثل دور ثورجي أو شيخ جامع في فيلم ؟ يعني الحكايه تمثيل في تمثيل و أخرها فيلم ؟
و طبعا لو خالد الصاوي جسّد شخصية البرادعي في مسلسل يبقى وائل عباس هيعمل له مقام
و يسجد له .
.
بالمناسبه و لدراويش
و مريدين وائل عباس , تخيل مثلا مثلا يعني إن أحمد موسى جسد شخصية جيفارا في فيلم سينمائي
و كان جنب منه مصطفى بكري في شخصية نيلسون ماديلا في نفس الفيلم , ما رأيكم دام جهلكم
و شمّكم ؟!! .
.
كنتو عايزين تحكمو
بلد بحجم مصر ازاي ؟ و امتى هتفهمو ان عقل ألهتكم العوالي دول يادوب يأهلهم للعب دور
الحمار اللي كان بيركبه العمده في فيلم الزوجه التانيه ؟! .
..................................................................................................................................
Mohamed
Hussein
21
أغسطس 2015·
يا شباب , يا بنات
, ادعمو السيسي بكلمة حق , شاورو له عالمقصر و المتخاذل و اللي ماشي غلط و قولو أهو
, ماتتعبوش نفسكو في البحث عن مبررات لكل مسئول خصوصا لو كان العقل مش قابلها .
.
مش بالضروره كل
حاجه يعملها الوزير ولّا المحافظ نقول عليها صح , صدقوني و الله البلد دي عمرها ما
هتتبني على كتاف أحمد موسى ولا مصطفى بكري .
.................................................................................................................................
Mohamed
Hussein
21
اغسطس 2015·
محافظة الشرقيه
هي تقريبا المحافظه الوحيده في مصر اللي بيحصل فيها تفجير لأبراج الكهربا , بمعدل تفجير
كل يومين , لدرجة انهم هناك بيعملو تحقيق مع برج الكهربا اللي مانفجرش !! .
.
المهم السيد الأستاذ
الدكتور محافظ الشرقيه بدأ يستشعر القلق , وقال مابدهاش بقى , بص على مكتبه لقى دعوه
لحضور افتتاح بيوتي سينتر ( صالون حلاقه حريمي ) , قعد يفكر و يفكر , ثم ظل يفكر و
يفكر , ثم عاد يفكر و يفكر , يا ترى ينزل يشوف الإرهاب اللي في محافظته و يتطمن على
ابراج الكهربا و لا يروح يبارك لمدام شوشو الكوافيره و يقص الشريط ؟ قام مرّ خيال الفنانه
يسرا قدام عنيه و ضحكت له ضحكتها المميزه و قالت له ( ياختي كده ينفع و كده ينفع )
.
......................................................................................................................................
Mohamed
Hussein
21
أغسطس 2015·
إنت , أيوه إنت
, عايز صفحتك تبقى كبيره عالفيس أو تبقى كاتب وإعلامي مشهور و الناس عارفينك صح ؟
.
طب عندك موهبه
زي بتاعة توفيق عكاشه و تعرف تتكلم عن مخطط الأجرام السماويه اللي بيعوق تقدُّم حياة
الدرديري و هي نازلة تجيب الخضار من سوق ستوته ؟ لأ ؟.
.
طب عندك كاريزمة
أحمد موسى و طبلته و تعرف تتغزل في الطريقه اللي السيسي ربط بيها جزمته و أثر الربطه
دي على حركة التجاره في دول الكومنولث و علاقتها بحركة الملاحه في قناة بنما ؟! لا
؟
.
طب عندك كوتشي
و شراب معفن و كوفيه فلسطيني و بطّلت تستحمى من 2009 و بتعرف تقول : الحريه لزيزي و
ريري فيري و ميري و ابو دومه و الدفاس , و تقول كمان : عملو معرفشي ايه كده لما سمعو
صوت الحق في الودان ؟! لأ ؟
.
طب عندك وش 7 ألوان
و كل يوم بتغير لون حسب الظروف زي الأستاذ الدكتور الطيار المهندس مقاول الأنفار و
المحلل السياسي مصطفى بكري ؟ لأ ؟
.
طب عندك دقن صغيره
و تعرف تحكي عن حلمك بالرئيس الشرعي محمد مرسي لما حلمت بيه و هو بيبني الكعبه جنب
مكتب الإرشاد في المقطم و سيدنا سليمان واقف وراه بيناوله طوب و سيدنا أيوب بيعمل المونه
؟! لأ ؟
.
طب عندك دقن كبيره
شويه ولبست جلابيه بيضا قصيره و كتبت في يوم من الأيام عن شجرة التوت اللي اكتشفوها
في سكتلندا و مكتوب عليها ( الله , محمد , نرمين ) ؟ لأ ؟
.
طب بلاش خالص
, عندك غمازات و عيون زرقا و بتعرف تدخل على صفحتك و تكتب : يشعر بالملل , يشعر بالوحده
و الفراغ , ادعولي يا جماعه عشان شعر صدري اتأخر في الظهور و رمش من رموش عنيا وقع
وانا نايم ؟! لأ؟.
.
هههههههههههههههههههههه
اومال عايز تبقى مشهور في مصر ازاي ؟! .
.......................................................................................................................................
Mohamed
Hussein
21
أغسطس 2015·
خبر : جمارك سفاجا
تمنع تهريب هواتف محموله و عصافير محظور استيرادها !! .
.
و حيث إني واحد
من اللي عاشو أيام و ليالي في ميناء سفاجا ده , و خد من جتتي راقات , دانا حتى صاحبت
الكلاب اللي بتملى المينا بالليل و حضرت خناقه كبيره بين مجموعتين من الكلاب اللي بينتشرو
في المينا , كان صوتهم جايب لحد الغردقه .
.
معالى الوزير المسئول
عن المواني , في ميناء سفاجا يا مولانا و من واقع خبرتي و العك اللي شوفته بعيني و
شغل فرخ الكربون و الورقه الفلوسكاب و التقدير العقيم للجمارك و التفتيش و الفيش و
الأفيش و المفيش أحب أقول لمعاليك إنك سهل جدا جدا جدا تهرّب حشيش لكن ماتعرفشي تهرب
ياميش .
.
سهل تهرب مخدرات
و سلاح و متفجرات و حتى صواريخ باتريوت , لكن مستحيل هتعرف تعدي بتلاجه 22 قدم أو مروحه
أو عصافير محظور استيرادها , حلوه حكاية عصافير محظور استيرادها دي , إنما محظور استيرادها
ليه ؟ تكونشي عصافير مفخخه ؟ أو عصافير ماسونيه من المخطط الماسوني اللي بيقول عليه
توفيق عكاشه ؟
.
في المينا يا معالي
الوزير مش هتلاقي بؤ مايه تشربه و لا كرسي تقعد عليه , اللهم إلا شوية دكك خشب كده
و اكوام زباله و مزرعة كلاب بعد المغرب , و المينا زيه زي المطار , واجهة مصر الحضاريه
و شكلها الحضاري , حلوه الحضاري دي و انا طبعا مش ( حضاري ) عليك يعني عشان مؤيد للحكومه
.
.
تطوير المواني
معاليك مش محتاج خبراء ألمان و كائنات فضائيه و لا محتاج حتى ميزانيه , كل الحكايه
كام جهاز كمبيوتر و كام شاب من اللي قاعدين عالفيس , و تلم الموظفين بتوع فرخ الكربون
تبعتهم في جلسة صلح بين الكلاب اللي بتتخانق بالليل , و كام عامل نضافه و كام كرسي
, و بدل ما اللي نازل بعربيته يقعد 5 ساعات يخلص في اوراق مالهاش اي لازمه ممكن يخلصها
في 10 د و تاخد حضرتك 50 ج زياده على كل عربيه , و 10 ج زياده على كل مسافر , و في
خلال شهر حضرتك هتجمع تمن الكمبيوترات والكراسي و المراوح و بؤ المايه و مرتبات الشباب
و عمال النضافه , عشان نرجع لحكاية الشكل الحضاري دي .
.
اه نسيت أقول
, ألف مبروك للساده المسئولين في جمرك سفاجا على احباطهم لتهريب العصافير صوصوصو .
.....................................................................................................................................