Mohamed Hussein
26 يونيو
تراديشنال تراديشنال مفيش كلام
.
- في الطرب بحب سومه , هي القمه ( تقدّست أغانيها ) , بسمع دارت الأيام و مش بسأل بعدها يعني إيه طرب ؟ , ماليش في الغربي ولا الحديث , مصطفى قمر و تامر حسني و محمد عطيه بيحتاجو مني إني أبلع علبة موتيليوم بكرتونتها قبل ماشوفهم أو اسمعهم .
.
- في الأكل بعشق الرز المعمر في الفرن أبو قش و ديك شامورت صغير عالكانون أبو حطب ( الكلام ده عند أمي موجود ) , ماليش في تشيليز و كنتاكي و المطاعم الغربيه بأكلها البلاستيك , الأكل نفسه له زوق و روح و لمّه وابتسامه و إلا يبقى مجرد حقنة فيتامين بتاخدها في العضل عشان تعرف تعيش .
.
- بحب أسمع القرأن مرتل بصوت الطبلاوي , و ببكي لما اسمعه بيقول ( يا أيها النبي اتقى الله ) , مابحبش قُرّاء الخليج , صوتهم حاد , مافهوش متعه و لا بيلمس الروح , بيقرو القرأن صح بس كأنهم بيقرو في جريده .
.
.............. أيون أيوننننننننننننن , فلاح مصري مسلم .
Mohamed Hussein
26 يونيو
السيسي في غينيا لحضور اجتماع القمه الأفريقيه , ماهي أصلها خطوات و مفيش حاجه بتحصل في السياسه بطريقة ( إذْ فجأةً ) , يعني تعمل انتخابات محترمه , نسبة مشاركه محترمه , رئيس فاز بأغلبيه محترمه , تعمل بعدها حفله محترمه تعزم فيها قادة العالم , يقوم الإتحاد الأفريقي فاتح لك الباب .......ده شغل رجاله و لا عزاء للسيدات والمتعاطفين و المتشحتفين .
.
اضرب بقى دماغك في الحيطه لحد ما قرونك تقع وقول ( مرسي راجع ) , او ادفس مناخيرك في علبة كوله و قول ( الإنتخابات كانت مسرحيه ) , يا غشيم في النهايه العالم الخارجي مابتفرقش معاه إذا كنت بتبيض ولا بتولد لأنه لازم يعترف في كل الأحوال بالجنين ( سياسة الأمر الواقع ) .
Mohamed Hussein
25 يونيو
العيال اللي اتقبض عليهم بتهمة التحرش في ميدان التحرير كانو النهارده رافعين المصحف في المحكمه هههههههههههههه !! و الله حركة ممتازه جدا و معبره , يعني هي جت على شوية عيال شمّامين بيتحرشو بالبنات ؟ ما الإخوان بقالهم 80 سنه بيتحرشو بمصر و بالدين و بالغلابه و بالأقباط و برضه كل ما يدخلو السجن يرفعو المصحف !! ... عاصم عبد الماجد قتل أكتر من 100 نفس بشريه مالهاش ذنب وبرضه كل ماحد يكلمه كلمه يقوم رافع المصحف .
.
و أدي أخرة خلط الدين بأي حاجه , تشيل في جيبك اليمين قنبله أو مسدس و في جيبك الشمال مصحف أو تشيل في جيبك اليمين مشرط عشان تهدد بيه البنت و تتحرش بيها و في جيبك الشمال مصحف .
ريا وسكينه الله يرحمهم لو كانو حضرو نشأة الجماعه الإرهابيه كانو رفعو المصاحف ورا القضبان و أكيد أكيد كانو هيلاقو شوية شمامين كوله يتعاطفو معاهم , الحريه للإخوان , كلنا المتحرش فلان , ريا وسكينه عالأسفلت !!.
Mohamed Hussein
25 يونيو
رسميا : الحكومه توافق على مشروع رئيس الجمهوريه للحد الأقصى للأجور , 42 ألف جنيه !!............. شلّوت جديد من عمك الحاج عبفتاح للنشطاء و الكولجيه , على فكره ده كان واحد من أهم أهداف ثورة يناير ( تحت بند العداله الإجتماعيه ) .
.
إنما بالمناسبه و من الأخر كده و عشان مش تتخضو يعني , القرار مش هيفرق تلاته تعريفه مع صاحبك الناشط و الكولجي , عشان 90 % منهم بيرددو شعارات العيش و الحريه والعداله الإجتماعيه كشعارات بس , بيقتاتو عليها , لكن أحلامهم و أمانيهم اللي بيقولوها لحضرتك دي بيتمنو إنها مش تتحقق و إلا هيبقى دورهم انتهى .
.
زمان أنيس منصور قال الشعب الليبي كله بيتكلم عن قضيه لوكيربي , طب لو قضية لوكيربي اتحلت الليبيين و هما قاعدين عالمصاطب هيتكلمو في إيه ؟!
و بنفس الطريقه كده , ممكن حضرتك تقولي لو أهداف الثوره اتحققت ورا بعضها الساده النشطاء السياسيين هيتكلمو في إيه و يعيشو إزاي ؟! أهي كده الحكايه , شعارات الثوره عند البعض عامله زي قضية لوكيربي عند الليبيين زمان , يعني تقدر تقول : وسيله للتسليه و الإحساس بالذات و قتل الوقت والبحث عن دور في الحياه.
Mohamed Hussein
25 يونيو
بطاقتي الشخصيه ( الرقم القومي ) تاريخها انتهى , و جواز سفري عملت له تجديد سنه يعني هيبقى منتهي , و رخصة السواقه اكيد انتهت , و ترخيص مزاولة المهنه منتهى من كذا سنه و كارنيه النقابه العامه و كارنيه النقابه الفرعيه و كارنيه مركز شباب الحبانيه و بطاقة مراتي و جواز سفرها و كارنيهاتها و رخصة السواقه بتاعتها و شهادة ميلاد بنتي مش كمبيوتر , حتى قسيمة الجواز تقريبا بيقولو الشكل القديم ده مابقاش يمشي , يعني أنا و مراتي في عرف الحكومه متجوزين عرفي حاليا !! .
.
ورقة دمغه , فرخ كربون , طابع مهن تعليميه , شهاده من اتنين موظفين راتبهم اكتر من 60 جنيه انك لسه على قيد الحياه , عايزين اتنين ضامنين و حد من الحي يختم هنا , لأ احنا محتاجين ختم النسر , ادفع في الخزنه 3 جنيه و 75 ساغ و تعالى , بالدور يا سيدي , أقف في الطابور , فوت علينا بكره بقى أصل الخزنه قفلت , لأ والله الأستاذ مليجي ماجاش النهارده أصل جوز خالة بنت عمته تعيش انت و هو اللي معاه الختم ؟ مين اللي معاه الختم ؟ أستاذ مليجي ولا جوز خالة بنت عمته ؟!
.
................ هلا والله , أهل بنا في مستنقع البيروقراطيه , لما انزل مصر بقى محدش يتصل بيا لمدة 9 سنين عشان هكون بخلّص أوراق واجدد تراخيص , وأي واحد تشوفوه شايل ملف ورق وماشي في الشارع يتلفت حوالين نفسه والورق يقع من الملف و يطير إعرفه إنه أنا ........... و هو البني أدم مننا إيه غير شوية ورق و كارنيهات و يتلزق عليهم دمغه ببريزه ؟!.
Mohamed Hussein
25 يونيو
تخيّل مثلا مثلا يعني , إن مجموعه من الشباب المسيحي المتدين ( بين قوسين ) في مصر عجبتهم أوي أفكار المقدس الله يرحمه ( جرجس البنا ) و نيافة الأنبا ( سيد ميخائيل ) , و مشيو على نهجه , عملو جماعة الإخوان المسيحيين اللي هدفها إقامة دولة الخلافه المسيحيه و بقو يعملو اجتماعات سريه في الكنايس و يقولو أصلنا معتكفين , و يعملو قايمة اغتيالات و أي حد مش عاجبهم كلامه أو تصرفاته يفجّروه على طول
.
و يجيلهم تمويل بقى من دول أجنبيه مسيحيه و يفتحو كام دار أيتام و يصرفو عليها و يلمو من الناس زكاتهم وصدقاتهم ويشترو بيها سلاح و زيت وسكر ( عشان الإنتخابات ) و يفرّقو عالاطفال الصغيرين بلالين و صليب في الأعياد , و تحصل ثوره ما على نظام فاسد في مصر تقوم جماعة الإخوان المسيحيين و أحفاد جرجس البنا يركبو على ضهر الثوره , ويحاولو يزرعو عناصرهم الإرهابيه في كل مصلحه او هيئه في مصر ( أخونه ) و يحاولو يبلعو مصر بقى في كرشهم , يقوم الشعب والجيش ينزلو ضد أم جماعة الإخوان المسيحيين , و المسيحيين الطيبين الي على حق يقولو للجماعه دي إنتو كرهتونا في المسحيه , أه والمسيح الحي .
.
بعدها تحصل انتخابات و ييجي رئيس و يفضل أحفاد جرجس البنا يحرقو في أم البلد واللي فيها , يا ترى انت بقى كمسلم مالكش ناقه ولا جمل في الليله بتاعة الخلافه المسيحيه دي هيبقى شعورك ايه وانت شايف التفجيرات والحال الواقف ؟ أيوه انت , ماتبصش للسقف و تعمل إنك مش واخد بالك .
Mohamed Hussein
25 يونيو
جدر البطاطا
.
يعني الراجل وزير خارجية أمريكا هزّ طوله وراح حجز تذكره في شركة مصر للطيران عشان ييجي مصر ويقابل السيسي , و وقف في طابور الجوازات الطويل ده في واشنطن و ركب الطياره ييجي تسع ست ساعات , و بعدين لما وصل مطار القاهره الراجل بتاع الجمارك سأله معاك مروحه أو خلاط أو أي حاجه تتجمرك ؟ قام كيري حلف له بالختمه الشريفه و رب الكعبه مامعاه حاجه , و قام مطلع من جيبه حبايتين فياجرا ( عينات مجانيه ) واداهم لموظف الجمارك , الموظف قال له اتفضل يا باشا عدّي , بس انت شكلك مش غريب عليا , أنا شوفتك فين قبل كده ؟ , قام كيري قال له : أه أصل أنا كنت عامل مسلسل في سبتمبر اللي فات !! .
.
يعني عمل كل ده وفي الأخر جاي يقول افرجو عن الصحفيين بتوع الجزيره ؟ الحريه لصحفيين الجزيره ؟ كلنا صحفيين الجزيره ؟ هي إيه الحكاية بالزبط ( على رأي مدبولي ) ؟ أنا كده بدأت أتوغوش , الله يخرب بيتك ياسماعيل بهوأت والاد .
.
و لما تسأل الإداره الأمريكيه عن اللي حصل واللي بيحصل واللي هيحصل في العراق ( بعد ما خربتها مداين ) تقولك أنا ماعرفش حاجه أنا ماعملتش حاجه أنا ماشوفتش حاجه , إمتى بقى الملاديع و الكروديات و بتوع الغرغره السياسيه في الفضائيات هيعرفو إن أمريكا دي عايشه بقالها سنييييييين طويله بدراعين , دراع عسكري اقتصادي بتحتل بيه العالم و دراع النحنحه والسهوكه بتاع حقوق الإنسان والتقارير و منظمات المجتمع ال لا مؤاخذه المدني ؟ واحد هيسألني طب قطر والجزيره تبع أنهي دراع فيهم ؟ لأ يا كابتن , قطر و الجزيره أتفه من كده , بالكتير تبقى تبع دراع البلاي ستيشن ( الأمريكاني برضه ) .
Mohamed Hussein
25 يونيو
الناس اللي زعلانه أوي إن علاء الأسواني هيبطل يكتب مقالات أقطع دراعي من هنا إن أخر مقاله قريوها للأسواني هي المقاله اللي تخيل فيها إنه قابل جمال مبارك و مراته في المطعم , أيوه المقاله اللي كانت أيام فحت البحر دي , إنما العلم نور مفيش كلام , و احنا في لحظه كده بنلاقي نفسنا في مهرجان القراءه للجميع , كلنا مثقفين دوت كوم , قرّاين دوت نت .
.
الأسواني هيكتب يا ولاد , محدش هيقدر يمنعه و لا الجن الأزرق , دي مصر فيها جرايد و مواقع الكترونيه أكتر من عدد سكان قطر , و في أخر كل مقاله هيكتب جملته الشهيره ( الديموقراطيه هي الحل ) , و لو جت فرصه ( لا قدر الله ) لعصر اللمون هيعصر يا باشا , أصلها متعوده دايمااااااااااا , أومال إيه ؟ ماهي الأرض كرويتن تلفُّ حول نفسها على رأي عبد الفتاح القصري الله يرحمه.............. وانت اللي هتغني يا منعم .
.
نامو بقى و انتو متطمنين عالبلد طالما الأسواني هيكتب , حط في بطنك شادر بطيخ صيفي طالما الأسواني هيكتب , بس إوعدني إوعدني إن أول مقاله تقراها لعلاء الأسواني تبقى تعملها حجاب و تحطه تحت المخده , أهو يحرسك من العين برضه و يحمي بلدنا من شر ولاد الحرام و شر كلاب السكك , و اوعدني كمان إن أول مولود يجيلك تسميه اسم مركب كده زي أجدادنا زمااااااان , سمّيه ( مرسي مرشح الثوره ) !!.
Mohamed Hussein
24 June
إرمي بياضك
.
السيسي قرر إنه يتبرع بنص ثروته و نص مرتبه لمصر !! , خطوه حلوه أوي من جهة المبدأ , و الراجل عايز يكون قدوه لشعبه , و جايز هي رساله بتعني البدء في حالة تقشف حكومي , إنما نص ثروتك يا سيسي و نص مرتبك هيعملو بالكتير 15 مليون إذا صحت الأرقام , و قول هنلم شوية تبرعات من المتحمسين من هنا وهناك , 10 جنيه على 7 جنيه على على , ونوصل في النهايه ل 15 مليون و 175 جنيه و تلاتاشر مليم , المبلغ ده حلو أوي و ممكن يجيب فيلا في الرحاب بتطل على بحيرة البط , لكن في اقتصاد مصر المبلغ ده بيساوي بالظبط أجرة الميكروباس !!.
.
جميل أوي إنك تكون قدوه يا ريسنا , و جميل إنك تضحى عشان البلد دي , بس انت عارف كويس الطريق اللي تبني بيه اقتصاد مصر بحق وحقيقي , الطريق اللي هيخليك تضرب مبلغ التبرعات في 100 ألف عالأقل , أه هتضربه في 100 ألف , بس الطريق محتاج إنك ( تضرب ) فعلا , تضرب البيروقراطيه بالمدافع الثقيله , تضرب أصحاب فرخ الكربون و الدرج المفتوح و الدمغه بمدفع رشاش , تضرب رجال الأعمال الفاسدين ( إخوان و فلول ) بالجزمه .
.
يا ريس عبفتاح أنا عارف إنك فارس شجاع و مش بتخاف , و ده وقتك و أوانك , أضرب بقى , إرمي بياضك و ورّينا !!.
Mohamed Hussein
24 June
حريه يا عالم حريه
.
.
و ممكن من باب حرية الرأي والتعبير نعمل رواية ( أولاد حارتنا ) فيلم سينمائي أو مسلسل , هه ؟ موافق يا ناشط ؟ طب إيه رأيك نعمل فيلم تاريخي يتبنى وجهة نظر إن مصر اتهزمت هزيمة ساحقه في 73 ؟ بلاش دي , ماتيجي نعمل مسلسل بشكل درامي محبوك أوي فيه واحد مسلم اسمه مصطفى و واحد مسيحي اسمه مايكل و مصطفى يبقى على علاقه بأخت مايكل و مايكل على علاقه بأم مصطفى , وفي الأخر الإتنين يقتلو بعض , و يطلع المسيحيين يحرقو الجوامع و المسلمين يحرقو الكنايس , ومن وسط النار تطلع لوحة النهايه بشكل درامي مثير the end , حريه يا عالم حريه .
.
بلاش بلاش , فيه ناس في مصر كتير لسه بيعتبرو إن الملك فاروق هو الحاكم الفعلي لمصر و إن ورثته أولى بعرشها و بيعتبرو ثورة 52 إنقلاب , ماتيجو نعمل فيلم عن الكفره ولاد الحرام الخاينين بتوع الظباط الأحرار دول لتوثيق خيانتهم ؟! وكان فيه وجهة نظر مسجله في كتب التاريخ و تنفع فيلم تحفه بتقول إن عمرو بن العاص لما دخل مصر لقى مقاومه شرسه من الأقباط و كان بينهم ما صنع الحداد يعني مش فرشو له السجاده الحمره وقالو له اتفضل معاليك سعادتك ولا حاجه .
.
من كام يوم واحد كتب اننا نستدعي الطريقه البرازيلي ونقتل اطفال الشوارع زي الكلاب , ده كاتب صحفي والمفروض انه حر في رأيه صح ؟ و من كام سنه واحده مصريه طالبت بتعدد الأزواج للمرأه عشان تبقى زي الراجل , رأيها وهي حره فيه , حريه يا عالم حريه .
Mohamed Hussein
24 June
داعش في العراق والشام , الإخوان في مصر , القاعده في أفغانستان , شباب المجاهدين في الصومال , بوكو حرام في نيجيريا , حماس في فلسطين , فلان ده كافر و فلانه عاهره , هنحرق كذا لو ماعملتوش كذا , هنخطف أطفال , نحرق محلات و بيوت , نقطع روس المعارضين , الدوله كافره و أهلها مرتدين , والجيش ابن حرام , والمجاهد الشيخ اسامه بارك الله فيه , اللهم انصر المجاهدين في تورا بورا و مقدشيو والشيخ زويد , الإسلام قادم يا تيت يا ولاد التيت يا شلاليط يا أوباش ............. كل اللي فاتو دول بيدعمو بعض , بالفلوس والسلاح و البشر أو بالدعاء و العقيده .
.
الأزهر الشريف , المحبه و السلام , أحاديث بر الوالدين و تبسّمك في وجة أخيك صدقه إذا قامت القيامه و في يد أحدكم فسيله فليغرسها , المساجد دور العباده وقراءة القرأن مش مكان للإجتماعات السريه و التخطيط و القذف والتكفير , اللهم صل و سلم و بارك على سيدنا محمد , فإذا قُضيت الصلاة فانتشرو في الأرض , تهنئة الأقباط بأعيادهم , و رفض تام لحمل السلاح , مفيش دعوات تكفير ولا وصف لامرأه بالعاهره والزانيه , ترتيل بصوت الطبلاوي وابتهالات دينيه بصوت الشيخ سيد النقشبندي .......... ده الفريق التاني.
.
.
............. فاخترْ لنفسِكَ أيُّ الدارِ تختارُ !!
Mohamed Hussein
23 June
و لما تكون حضرتك متجوز و متودّك في موضوع الجواز و خدت بقى عالرحرحه وكل حاجه جاهزه , وفجأه كده , إذ فجأةً يعني مراتك و ولادك ينزلو مصر قبلك , تخيل بقى المشهد معايا :
فتافيت رز عالسرير , و نص رغيف عيش تحت المخده ( تقريبا عامله حجاب ) , و باكو بسكوت مفتوح عالكوميدينو جنب إيدي و إزازة مايه سخنت لما ورمت , صحيت من النوم لقيت كيس فيه حتة لحمه وشوية رز في التلاجه باقيين من امبارح فطرت بيه و بعد كذا ساعه كده ( مابعدّش يا جيمي ) حسيت اني جعت أوي فلقيت علبة زبادي إتغديت بيها , ربنا كرمني من يومين ولقيت فردتين شراب مش فرده واحده بس طلعو غير بعض , مش مهم , هو يعني حد هيقلّعني الجزمه و يقارن الفردتين ببعض ؟ , المخده بقعد كل مره أدوّر عليها وفي الأخر ألاقيها ملفوفه في قلب الملايه , كمية هدوم عايزه تتغسل في كل حته , خلاص خلاص هغسل بكره ( و ييجي بكره و اقولك بكره ) .
.
يعني باختصار , هما 6 أيام من ساعة مراتي ما سافرت وانا قدرت بفضل الله و بمجهود فردي إني أحوّل الشقه من صوره لشوارع القاهره أيام الملك فاروق ( أيام ماكانو الطليان بيشتغلو جارسونات في مصر ) لشارع من شوارع المرج حاليا ( بعد الإنفتاح ) , عملت الكلام ده كله في 6 أيام , في ستتتتتتتتتتتت أيام على رأي السادات .
Mohamed Hussein
23 June
...... 3 شباب دخلو ورا بعض الصيدليه , هما التلاته كفيلين كده إني أسيب مهنتنا الساميه دي , دانا حتى ممكن أسيب لهم ساميه ذات نفسها .
.
واحد داخل يشتري مزيل عرق ب 11 ريال , قالي أنا بجيبه من البقاله ب 8 قلت له هاته من البقاله أرخص أنا عارف , أصر إنه ياخده من عندي ب 8 , يابني ماينفعش , قالي طيب أخره كام ؟! ........... هو انا ببيع فلايات يا جدعان .
.
التاني دخل واللثه عنده ورامه و خده منفوخ طالع فيها بتاعه أد حباية البطاطس وعايز بنادول , قالي بنادول هيفك الورم ده قلت له لأ , لازم تروح لدكتور أسنان عشان هتحتاج تمضاد حيوي و مسكن قوي , قالي يعني البنادول مش هيجيب نتيجه قلت له لأ , قالي بس بنادول بيجيب معايا نتيجه في كل حاجه !! , قلت له معاك حق , خد بنادول أهو و هتبقى زي الفل .
.
والتالت دخل وطلع لا أنا عارف هو عايز إيه ولا هو عارف هو عايز إيه , الواد التالت ده ينفع يشتغل ناشط سياسي في مصر , و الأول والتاني يخدّمو عليه .....................فيلم الموسم و كل موسم ( الغبي و الغتيت و المسطول ) .
Mohamed Hussein
23 June
طب جرّب تسمع خطبة وجدي غنيم الأخيره مره تانيه , وهات ورقه وقلم واكتب ورايا :
- كم مره وجدي غنيم كفّر الناس في الخطبه ( فقد باء بها أحدهما ) ؟.
- كام مره وجدي غنيم شبّه الستات اللي بتنزل تحتفل في التحرير بالعاهرات ( قذف لألاف المحصنات ) .
- كمية التحريض والغل اللي ف الخطبه
- كمية اللبس والجهل للدين والسياسه .
.
لأ لأ , مش كل واحد شيخ بدقن قاعد على منبر في جامع و قدامه شوية ناس يبقى ده مجلس علم بتحفّه الملائكه , و اغلب ظني إن الملايكه سابت الجامع وقت الخطبه دي و طلعت بره و فضلت تستغفر ربها , يارب توب علينا بقى من شياطين الإنس .
Mohamed Hussein
23 June
بتحصل في أحسن العائلات
.
و صلت الشغل , ركنت العربيه و عيني لسه مقفوله بالضبه والمفتاح , نزلت و خدت حاجتي اللي في العربيه , اللاب على كتفي اليمين و شنطه في إيدي اليمين و شنطه بلاستيك في إيدي الشمال و المج كان معايا في العربيه من امبارح مسكت بصوابع ايدي الشمال برضه , صوابع ايدي اليمين مسكت بيها الريموت بتاع العربيه كده تمام أوي , ومسكت مفاتيح الصيدليه في بؤي عشان ماعنديش إيد تالته , وصلت عند باب الصيدليه وقعدت أدوّر عالمفتاح بتاعتها , هو فين المفتاح راح فين ؟ , وانا شايل الحاجات زي مانا , حسّست على جيوبي وانا شايل الشيله لا مش موجوده , مش بتشخشخ يعني و جيوبي فاضيه تقريبا , نزلت اللاب والشنط على سلم الصيدليه و رجعت العربيه أدور جايز اكون نسيتهم جوه , عمّال أدعي واقول يارب , طب انا هروح فين دلوأتي واجيب نسخه تانيه ازاي ؟ الجو حر اوي , و فين و فين بقى على بال ما قررت أشرب سجاره عشان اهدى و اعرف أركز و أفكر انا نسيت المفاتيح فين ؟ , و هنا لقيت المفاتيح الحمد لله !! .
.
لا أنا كويس , كويس أوي كمان , و مصر زي الفل و مش ناقصها غير أكلة سمك ( الله يرحمك يا عم جلال ) .
Mohamed Hussein
22 June
و يفضل أكبر و أهم لغز في ثورة يناير اللي قامت ضد مبارك هو مبارك نفسه , الراجل الفاسد الحرامي اللي جرّف بلده خصوصا في أخر 10 سنين و مع ذلك ماهربش زي ماعمل زين العابدين ( كان يقدر يهرب و يعيش بفلوسه سلطان زمانه ) , و ماعملش زي بشار و قلبها حرب أهليه ( ماهو معاه فلوس وعنده انصار بالملايين ) , و قبل بالمحاكمه و بقاله اكتر من 3 سنين مرمي في السجن و بيتحاكم لا في مره اهان القاضي ولا رفع ايديه بأي علامه ولا عياله الحراميه الصغيرين هلفطو بالكلام قدام الكاميرات .
.
مبارك رغم قايمة بلاويه السوده الطويله لكن المواقف اللي فوق دي تتحسب له , عشان كده انا بتمنى إنهم يعدموه و بعد ما يعدموه يطلع لنا في برنامج توك شو يحكي عن الي حصل في ثورة يناير من وجهة نظره , أو ممكن نختصر الخطوتين في خطوه واحده , بلاش يعدموه , هو يطلع على طول في برنامج توك شو مع ريهام سعيد , ويبقى كده خد فرصته انه يدافع عن نفسه قدام التاريخ و خد جزاءه في نفس الوقت !! .
Mohamed Hussein
22 June
وجدي لامؤاخذه غنيم في أخر خطبه !! .
.
1- بشار الأسد الله يلعن أبوه ( أيوه أصل أبوه مات و تجوز لعنة الميت أما اللي عايش لا تجوز لعنته لأنه ممكن يؤمن قبل مايموت ) !! ..يعني حافظ الأسد كده مات كافر بناء على حكم الشيخ وجدي غنيم و بشار كافر بس ممكن يسلم قبل مايموت عشان كده تجوز لعنة أبوه بس هو لأ !! .
.
2- دولة الخلافه الإسلاميه قادمه واحنا في حالة مخاض !! ............. يعني العالم دلوأتي بيتمخض من أجل ولادة دولة الخلافه الإخوانجيه الإسلاميه برعاية الإخوان و قطر و حماس , و انا اللي كنت فاكر العالم بيبيض مش بيولد !! .
.
3- البنات اللي اتعرضو للتحرش و الإغتصاب في التحرير , أومال انتي كنتي رايحه ليه ياختي ؟ مانتي رايحه عشان حد يغتصبك و يتحرش بيكي و قاعده ترقصي عشان كده
.
4- الرئيس عبد الفتاح السيسي كافر و مرتد عن دينه و السلعوه هتاكله في الأخره .
.................................
.................................
أهو وجدي غنيم ده كنت فاكره زمان عالم و مفكر و شيخ و داعيه و كده يعني وبيفهم في الدين و الطب والفلك والسياسه وفيلسوف لحد مانلاقي فيلسوف , بعدين جت ثورة يناير عشان تقول لنا مصر دي فيها كام ألف قرص جله ماشيين عالأرض و شايلين البطاقه في الجيب الوراني .
Mohamed Hussein
21 June
الشباب النقي نازل يتظاهر ضد قانون التظاهر , حقها و لا مش حقها يا بوكمال ؟ ياعم حقها طبعا أنا قلت حاجه ؟ طب هات مصحف وانا احلف لك اني مصدق إنك نازل تتظاهر عشان قانون التظاهر فعلا , و انك ماخدتش بالك إن القانون ده صدر من سنه تقريبا بس خدت بالك النهارده لما السيسي بقى رئيس و إنك مش بيجيلك نوم طول الليل بسبب قانون التظاهر و مراتك تقولك هنجهّز بنتنا منين يا عوضين ؟ تقول لها يا ستي سيبيني في حالي لما نشوف قانون التظاهر الأول , و مصدق إنك خلّصت إنتاج مصانع فلورا و كلينكس كلها من الشحتفه على علاء عبد الفتاح و انك حاطط صورة احمد دومه تحت المخده !! .
.
و الله الإخوان دول ربنا كارمهم أخر كرم , لسه عايشين و بيتنفّسو , مع إن كل اللي حيلتهم من حطام الدنيا هما بردعتين , بس عايشين بيهم عيشه لوز , بردعه اسمها شعارات الخلافه الإسلاميه و دي بيطلعوها لما يكونو مزنوقين في شوية سلفيين و بردعه اسمها شعارات الثوره المجيده و دي بيطلعوها لما يكونو مزنوقين في الراجل اللي مش عارف هيجّهز بنته منين .
و الإخوانجي القراري لو قابل واحد مقصّر توبه هيقول له ( بارك الله فيك يا أخي الكريم ) ولو قابل واحد مطوّل شعره هيقوله محتاجين حماسكو يا شباب مصر النقي , و يحط البردعه و يركب و أول ما يوصل المكان اللي هو عايزه يدّي شلوت لأخوه الكريم و شلوت للشاب النقي , الغريبه ان أخوه الكريم بيرجع له تاني و تالت و رابع و الشاب النقي كمان , يعني محدش فيهم بيشتكي أبدا من البواسير !! .
Mohamed Hussein
21 June
نصار عبد الله كاتب ( نطع ) بدرجة دكتور , يعني معاه دكتوراه في النطاعه , والمصري اليوم جريده خاصه كبيره بتقلبها دعاره فكريه أحيانا أو غالبا .
.
نصار عبد الله بيقولك أطفال الشوارع في البرازيل في التسعينات كانو بيرتكبو جرايم زي السرقه و الإغتصاب و كتير منهم جاله الإيدز , وكانت تكلفة تأهيلهم باهظه جدا والحكومه مامعهاش و هتجيب فلوس منين يعني , فكان الحل إن الشرطه طاردت أطفال الشوارع واصطادتهم و قتلت منهم ألاف زي ما بتقتل الكلاب الضاله و بكده الحكومه تبقى ارتاحت من مشاكلهم و وجع دماغهم و وفرت قرشين حلوين عشان تلاقي شغل للعواطليه اللي قاعدين عالقهاوي ( اللي هما مش أطفال شوارع ) , و حبذا بقى لو كان عندنا الإراد السياسيه في مصر و طهرنا القاهره من ظاهرة اطفال الشوارع بالطريقه البرازيلي !!.
.
يعني أطفال الشوارع اللي هما ضحية اهمال اسري وتفكك و أهمال مجتمع و دوله , اللي بيباتو في الشارع في درجة حراره 50 أو درجة حراره صفر , اللي اتحرمو من العلاج و التعليم , اللي بيدورو على اكلهم في صفايح الزباله بقو كلاب ضاله والحل إننا نقتلهم ؟؟؟ .
.
مره كنت قاعد انا و لوجي بنتي قدام مطعم , طلبنا الأكل و مستنيين دورنا و المطعم زحمه جدا , واحنا قاعدين بره لوجي شافت قطه ( من قطط الشوارع ) ديلها زي المسلوخ , محروق منه جزء , تقريبا حد رمى عليها مايه مغليه ( أكيد يكون الحاج عبد الله أبو النطع نصار ) , لوجي قالت لي القطه دي عايشه كده ازاي يا بابا ؟ , طب مش المفروض الناس تاخدها و تعالج ديلها ده بدل ما تتألم ؟ مش حرام كده ؟ قلت لها حرام يا لوجي , حرام يا حبيبتي .
شكلنا ولاد كلب يا لوجي أنا وانتي , جينا في زمن غلط , زمن غرقان في النطاعه .
Mohamed Hussein
21 June ·
إيده في إيد البلد
يبقى الأمل تالت
و لولا دعوة نبي
مركبها كت مالت
.
افتح عنيك يا غشيم
ده الكلب كان مسعور
لاعب علينا الدور
و أه عليك يا وطن
من لعبه لو خالت !!.
.
.
محمد حسين
Mohamed Hussein
20 June
أطبطب و أدلّع .
.
في التوقيت اللي حكم فيه السيسي مصر كان قدامه طريق من اتنين مفيش تالت , أي حد مكانه كان هيقع بين نفس الإختيارين .
.
الأول : إنه يعمل ألف حساب لزيد و عبيد و الشيخ زيد والشيخ عبيد و الناشط زيد و الناشط عبيد
.
يعني بلاش قانون التظاهر عشان كده هتزعل الثورجيه منك , حاول تلغيه بقى و تكسب الكام ألف ثورجي اللي باقيين في صفك وحبذل لو تدخّلت بنفسك للإفراج عن علاعبد الفتاح , و كمان حاول ترفع اسم جماعة الإخوان من القايمه الإرهابيه و تسمح لهم بممارسة الحياه السياسيه عشان تكسب كام ألف إخوانجي في صفك , و ياريت بقى لو تسمح لبهاليل السلفيين بالخطابه في المساجد و أي واحد مربي دقنه و مقصّر توبه يطلع يتغرغر عالمنبر عادي عشان ماتزعلش كام ألف سلفي منك وتاخدهم في صفك
.
ويا سيدي لما تلاقي واحد من فلول مبارك بنى برج علو كده عالنيل مخالف سيبه يسترزق مايجراش حاجه و حاول تشوف أي طريقه تطلع بيها مبارك من السجن عشان تكسب الفلول كلهم في صفك , و البياعين الغلابه اللي فارشين ببضاعتهم في الشارع و قافلينه و معطلين المرور يا أخي سيبهم يسترزقو على الأقل ما تسمعشي كلمتين مالهمشي لازمه من بتوع حقوق الإنسان و الكولجيه ................. باختصار ده كان اختيار ( أطبطب و أدلّع ) , و ملعون أبو الدوله و أبو القانون , إحنا نمشيها بالمحبه كده يا مصيلحي .
.
الطريق التاني هو المواجهه و الحسم و الفرم إذا تطلب الأمر , رأيكو السيسي اختار أنهي طريق ؟ طب مش كان يطبطب و يدلّع أسهل له و اهو ياخد الكل على حجره ؟!.
Mohamed Hussein
20 June
ممممممممم الملك عبدالله هيوصل القاهره بعد ساعة ونص بإذن الله , ترانزيت و هو راجع من المغرب للسعوديه , و بس كده , بكره الصبح الدولار هيبقى بشلن في مصر , يا بختك المايل يا محمد ياللي هو أنا .
مانا كنت عشمان أخد مكافة نهاية الخدمه و احولها لمصر و يكون الدولار وصل ل 120 جنيه مثلا , ضاعت فلوسك يا صابر
Mohamed Hussein
20 June
أوباما مبسوط أوي بالتجربه اليمنيه , بيقول إنه دعم الحكومه اليمنيه في الحرب ضد الإرهاب ( اللي هو بيعلفه بإيده ) , و بيتطلّع لتكرار النموذج اليمني في العراق وسوريا !! ههههههههههه قشطه , كده فيه اتنين ستات في العراق وسوريا هياخدو جايزة نوبل لامؤاخذه للسلام السنه الجايه , و العراق و سوريا نعملهم كونفدراليات بقى , يعني نقسمهم كده و نخططهم , تحبّو نقسم سوريا بالطول ولا نعملها سامبوكسات ؟ طب حد لسه عايز حاجه من باترينة الديموقراطيه الأمريكاني قبل مانقفل الكباريه ؟!
يا بيه أنا عملت في حياتي كل حاجه غلط ممكن تتخيلها إلّا إني أخد جايزة نوبل للسلام !!.
Mohamed Hussein
20 June
عاصم عبد الماجد الإرهابي اللي عايش ضمن جواري موزه و محظياتها لما سمع خبر إحالة أوراقه للمفتي شال يافطه مكتوب عليها ( فزت ورب الكعبه و لاتنسو الصلاه على النبي ) !! .... , يعني حضرتك عايز تنال الشهاده من فنادق قطر ؟ يعني تطلع من قطر و الجزيره على الفردوس الأعلى على طول ؟ يعني تبقى عايش ولا مؤاخذه و بتعمل لا مؤاخذه و فجأه تلاقي نفسك في الجنه و حور العين بيعملولك مساج ؟!
طب ايه حكاية فزت ورب الكعبه و علاقتها بالصلاه عالنبي اللي بقت لوجو بعد ما كانت إحساس ؟ فكرتني بنكتة اليهودي البخيل اللي ابنه مات وراح يعمل له نعي في الجريده , قالهم اكتبو ( كوهين ينعي ولده ) قالوله ماشي بس دول 3 كلمات ب 5 جنيه وعندنا عرض أن ال 5 كلمات ب 5 جنيه برضه , ممكن تخليهم 5 كلمات , قالهم خلاص اكتبو ( كوهين ينعي ولده و يصلّح راديوهات ) !! , عاصم عبد الماجد : ( فزت ورب الكعبه و ماتنسوش اللوجو بقى )......... كوهين ينعي ولده ويصلح راديوهات .
Mohamed Hussein
20 June
مراتي نزلت مصر قبلي وسابت لي مسئولية إني المّ الرفايع و الكراكيب اللي في الشقه , لقيت كمية جراكل مايه فاضيه غير عاديه , دي لو عندي في مصر كنت عبيتها كلها بنزيم , أه عشان البنزيم بيغلى ويشح من السوق أحيانا , بس الشقه دي مش محتاجه نضافه الشقه دي محتاجه نضافه , يارب مانسى قبل ماسيبها إني أشد سكينة الكهربا , إنما التجربه المريره دي أكدت لي اننا من غير الستات ولا نسوى أه والله , عشان كده عايز أوجه رسالة امتنان و عرفان للمرأه بجميع أنواعها !!.
Mohamed Hussein
19 June
و تلاقي ناس ربنا خلقهم عشان يتعاطفو , كل يوم يصحو من النوم و يدوّرو على أي حاجه يتعاطفو معاها , لحد ما بقى عندهم تعاطف لا إرادي , و لما الحكومه قررت مصادرة محلات زاد و سعودي يقولك طب وال 2000 شاب اللي شغالين في المحلات دي يشتغلو فين ؟ هههههههههه كأن مصر انقطع فيها الشغل من بعد قفل المحلين , أو جايز الشاب اللي اتقطع عيشه واخد بكالوريوس في محلات زاد أو المعهد العالي للتوحيد والنور !! .
.
و بنفس الطريقه دي ممكن حضرتك تتعاطف كمان مع الشباب اللي كانو شغالين في المطعم اللي بيبيع لحمة حمير , ماهو المطعم لما اتقفل اكيد الشباب ده حاله وقف , بتقفلو المطعم اللي بيبيع لحمة حمير ليه يا كفره ؟ انتو كده بتكرّهو الشباب في الحكومه يا أغبيا , الحريه لشباب مطعم الحمير !!.
و مش المفروض كمان نحكم على تاجر المخدرات بأي سجن عشان لما يتسجن اكيد مراته وولاده هيتشردو و هما ذنبهم ايه ؟ , و لا يوم من أيامك يا معلم , الحريه لولاد تاجر المخدرات !!.
.
أهي النوعيه دي من الناس المتعاطفه أوي هما أكبر دليل على إن مصر ولّاده فعلا بس أحيانا بتبيض !!.
Mohamed Hussein
19 June
عمِّه قديمه أوي و متهالكه ( ممكن تكون من 100 سنه مثلا ) وقام واحد مصورها و منزلها عالفيس و إلهي تتشك في نظرك و معاميك ياللي تشوف عمامة سيدنا رسول الله و ماتدوسشي لايك !!.
.
شبشب خشب شبه القبقاب قديم أوي , و إلهي الغوله تاكلك ياللي ماتعمل شير لحذاء سيدنا رسول الله ..
( بالمناسبه , صدّق أو لا تصدّق , انا لا عمري عملت لايك ولا شير للعمه و لا الحذاء و مفيش سلعوه جاتلي بالليل و انا نايم لحد دلوأتي أه والله ) .
.
محمد كان مستني البت تفيده ( المزه بتاعته ) تحت شجره , لقى مسمار واقع عالأرض مسكه بإيده و نحت على جسم الشجره ( كعادة المصريين يعني ) , كان عايز يكتب محمد و بعدين يرسم جنبه قلب و بعدين يكتب تفيده , يعني محمد بيحب تفيده , المهم صاحبنا كتب محمد بالمسمار و فجأه وقف ميكروباس و نزلت تفيده لابسه الحته الدبلان اللي عالحبل , محمد انبهر بتفيده و دبلانها و رمى المسمار من ايده بسرعه و طلعو مع بعض عالجنيه ( الجونينه ) , بعد سنه واتنين وتلاته الشجره كبرت واللحاء بتاعها غلّف الإسم المكتوب بالمسمار ( محمد ) , و بقى يبان على انه جزء من الشجره , واحد شاب سلفي وقف في نفس المكان مستني الميكروباس برضه لمح اسم محمد مكتوب عالشجره , نزلت الدموع من عنيه كأنها حنفية مايه مفتوحه في الدور الأرضي والماتور شغال , طلّع الموبايل وصورها و اتصل بكل اصحابه واهل حتته عشان ييجو يشوفو المعجزه الإلهيه ( إسم سيدنا النبي مكتوب عالشجره ) .
.
الشيطان بقى كان قاعد يشرب له كاسين بالليل في خمارة ميشيل وعمّال يضحك و يضحك و يضحك , الخواجه ميشيل قاله مالك بتضحك ليه يا شوشو ؟ قال له تصدق بالله يا خواجه ميشيل ؟ فيه شويه عرب ومسلمين بيخلّوني اقعد مع نفسي واقول هو انا ربنا خلقني ليه من غير شغله ولا مشغله كده ؟!.
26 يونيو
تراديشنال تراديشنال مفيش كلام
.
- في الطرب بحب سومه , هي القمه ( تقدّست أغانيها ) , بسمع دارت الأيام و مش بسأل بعدها يعني إيه طرب ؟ , ماليش في الغربي ولا الحديث , مصطفى قمر و تامر حسني و محمد عطيه بيحتاجو مني إني أبلع علبة موتيليوم بكرتونتها قبل ماشوفهم أو اسمعهم .
.
- في الأكل بعشق الرز المعمر في الفرن أبو قش و ديك شامورت صغير عالكانون أبو حطب ( الكلام ده عند أمي موجود ) , ماليش في تشيليز و كنتاكي و المطاعم الغربيه بأكلها البلاستيك , الأكل نفسه له زوق و روح و لمّه وابتسامه و إلا يبقى مجرد حقنة فيتامين بتاخدها في العضل عشان تعرف تعيش .
.
- بحب أسمع القرأن مرتل بصوت الطبلاوي , و ببكي لما اسمعه بيقول ( يا أيها النبي اتقى الله ) , مابحبش قُرّاء الخليج , صوتهم حاد , مافهوش متعه و لا بيلمس الروح , بيقرو القرأن صح بس كأنهم بيقرو في جريده .
.
.............. أيون أيوننننننننننننن , فلاح مصري مسلم .
Mohamed Hussein
26 يونيو
السيسي في غينيا لحضور اجتماع القمه الأفريقيه , ماهي أصلها خطوات و مفيش حاجه بتحصل في السياسه بطريقة ( إذْ فجأةً ) , يعني تعمل انتخابات محترمه , نسبة مشاركه محترمه , رئيس فاز بأغلبيه محترمه , تعمل بعدها حفله محترمه تعزم فيها قادة العالم , يقوم الإتحاد الأفريقي فاتح لك الباب .......ده شغل رجاله و لا عزاء للسيدات والمتعاطفين و المتشحتفين .
.
اضرب بقى دماغك في الحيطه لحد ما قرونك تقع وقول ( مرسي راجع ) , او ادفس مناخيرك في علبة كوله و قول ( الإنتخابات كانت مسرحيه ) , يا غشيم في النهايه العالم الخارجي مابتفرقش معاه إذا كنت بتبيض ولا بتولد لأنه لازم يعترف في كل الأحوال بالجنين ( سياسة الأمر الواقع ) .
Mohamed Hussein
25 يونيو
العيال اللي اتقبض عليهم بتهمة التحرش في ميدان التحرير كانو النهارده رافعين المصحف في المحكمه هههههههههههههه !! و الله حركة ممتازه جدا و معبره , يعني هي جت على شوية عيال شمّامين بيتحرشو بالبنات ؟ ما الإخوان بقالهم 80 سنه بيتحرشو بمصر و بالدين و بالغلابه و بالأقباط و برضه كل ما يدخلو السجن يرفعو المصحف !! ... عاصم عبد الماجد قتل أكتر من 100 نفس بشريه مالهاش ذنب وبرضه كل ماحد يكلمه كلمه يقوم رافع المصحف .
.
و أدي أخرة خلط الدين بأي حاجه , تشيل في جيبك اليمين قنبله أو مسدس و في جيبك الشمال مصحف أو تشيل في جيبك اليمين مشرط عشان تهدد بيه البنت و تتحرش بيها و في جيبك الشمال مصحف .
ريا وسكينه الله يرحمهم لو كانو حضرو نشأة الجماعه الإرهابيه كانو رفعو المصاحف ورا القضبان و أكيد أكيد كانو هيلاقو شوية شمامين كوله يتعاطفو معاهم , الحريه للإخوان , كلنا المتحرش فلان , ريا وسكينه عالأسفلت !!.
Mohamed Hussein
25 يونيو
رسميا : الحكومه توافق على مشروع رئيس الجمهوريه للحد الأقصى للأجور , 42 ألف جنيه !!............. شلّوت جديد من عمك الحاج عبفتاح للنشطاء و الكولجيه , على فكره ده كان واحد من أهم أهداف ثورة يناير ( تحت بند العداله الإجتماعيه ) .
.
إنما بالمناسبه و من الأخر كده و عشان مش تتخضو يعني , القرار مش هيفرق تلاته تعريفه مع صاحبك الناشط و الكولجي , عشان 90 % منهم بيرددو شعارات العيش و الحريه والعداله الإجتماعيه كشعارات بس , بيقتاتو عليها , لكن أحلامهم و أمانيهم اللي بيقولوها لحضرتك دي بيتمنو إنها مش تتحقق و إلا هيبقى دورهم انتهى .
.
زمان أنيس منصور قال الشعب الليبي كله بيتكلم عن قضيه لوكيربي , طب لو قضية لوكيربي اتحلت الليبيين و هما قاعدين عالمصاطب هيتكلمو في إيه ؟!
و بنفس الطريقه كده , ممكن حضرتك تقولي لو أهداف الثوره اتحققت ورا بعضها الساده النشطاء السياسيين هيتكلمو في إيه و يعيشو إزاي ؟! أهي كده الحكايه , شعارات الثوره عند البعض عامله زي قضية لوكيربي عند الليبيين زمان , يعني تقدر تقول : وسيله للتسليه و الإحساس بالذات و قتل الوقت والبحث عن دور في الحياه.
Mohamed Hussein
25 يونيو
بطاقتي الشخصيه ( الرقم القومي ) تاريخها انتهى , و جواز سفري عملت له تجديد سنه يعني هيبقى منتهي , و رخصة السواقه اكيد انتهت , و ترخيص مزاولة المهنه منتهى من كذا سنه و كارنيه النقابه العامه و كارنيه النقابه الفرعيه و كارنيه مركز شباب الحبانيه و بطاقة مراتي و جواز سفرها و كارنيهاتها و رخصة السواقه بتاعتها و شهادة ميلاد بنتي مش كمبيوتر , حتى قسيمة الجواز تقريبا بيقولو الشكل القديم ده مابقاش يمشي , يعني أنا و مراتي في عرف الحكومه متجوزين عرفي حاليا !! .
.
ورقة دمغه , فرخ كربون , طابع مهن تعليميه , شهاده من اتنين موظفين راتبهم اكتر من 60 جنيه انك لسه على قيد الحياه , عايزين اتنين ضامنين و حد من الحي يختم هنا , لأ احنا محتاجين ختم النسر , ادفع في الخزنه 3 جنيه و 75 ساغ و تعالى , بالدور يا سيدي , أقف في الطابور , فوت علينا بكره بقى أصل الخزنه قفلت , لأ والله الأستاذ مليجي ماجاش النهارده أصل جوز خالة بنت عمته تعيش انت و هو اللي معاه الختم ؟ مين اللي معاه الختم ؟ أستاذ مليجي ولا جوز خالة بنت عمته ؟!
.
................ هلا والله , أهل بنا في مستنقع البيروقراطيه , لما انزل مصر بقى محدش يتصل بيا لمدة 9 سنين عشان هكون بخلّص أوراق واجدد تراخيص , وأي واحد تشوفوه شايل ملف ورق وماشي في الشارع يتلفت حوالين نفسه والورق يقع من الملف و يطير إعرفه إنه أنا ........... و هو البني أدم مننا إيه غير شوية ورق و كارنيهات و يتلزق عليهم دمغه ببريزه ؟!.
Mohamed Hussein
25 يونيو
تخيّل مثلا مثلا يعني , إن مجموعه من الشباب المسيحي المتدين ( بين قوسين ) في مصر عجبتهم أوي أفكار المقدس الله يرحمه ( جرجس البنا ) و نيافة الأنبا ( سيد ميخائيل ) , و مشيو على نهجه , عملو جماعة الإخوان المسيحيين اللي هدفها إقامة دولة الخلافه المسيحيه و بقو يعملو اجتماعات سريه في الكنايس و يقولو أصلنا معتكفين , و يعملو قايمة اغتيالات و أي حد مش عاجبهم كلامه أو تصرفاته يفجّروه على طول
.
و يجيلهم تمويل بقى من دول أجنبيه مسيحيه و يفتحو كام دار أيتام و يصرفو عليها و يلمو من الناس زكاتهم وصدقاتهم ويشترو بيها سلاح و زيت وسكر ( عشان الإنتخابات ) و يفرّقو عالاطفال الصغيرين بلالين و صليب في الأعياد , و تحصل ثوره ما على نظام فاسد في مصر تقوم جماعة الإخوان المسيحيين و أحفاد جرجس البنا يركبو على ضهر الثوره , ويحاولو يزرعو عناصرهم الإرهابيه في كل مصلحه او هيئه في مصر ( أخونه ) و يحاولو يبلعو مصر بقى في كرشهم , يقوم الشعب والجيش ينزلو ضد أم جماعة الإخوان المسيحيين , و المسيحيين الطيبين الي على حق يقولو للجماعه دي إنتو كرهتونا في المسحيه , أه والمسيح الحي .
.
بعدها تحصل انتخابات و ييجي رئيس و يفضل أحفاد جرجس البنا يحرقو في أم البلد واللي فيها , يا ترى انت بقى كمسلم مالكش ناقه ولا جمل في الليله بتاعة الخلافه المسيحيه دي هيبقى شعورك ايه وانت شايف التفجيرات والحال الواقف ؟ أيوه انت , ماتبصش للسقف و تعمل إنك مش واخد بالك .
Mohamed Hussein
25 يونيو
جدر البطاطا
.
يعني الراجل وزير خارجية أمريكا هزّ طوله وراح حجز تذكره في شركة مصر للطيران عشان ييجي مصر ويقابل السيسي , و وقف في طابور الجوازات الطويل ده في واشنطن و ركب الطياره ييجي تسع ست ساعات , و بعدين لما وصل مطار القاهره الراجل بتاع الجمارك سأله معاك مروحه أو خلاط أو أي حاجه تتجمرك ؟ قام كيري حلف له بالختمه الشريفه و رب الكعبه مامعاه حاجه , و قام مطلع من جيبه حبايتين فياجرا ( عينات مجانيه ) واداهم لموظف الجمارك , الموظف قال له اتفضل يا باشا عدّي , بس انت شكلك مش غريب عليا , أنا شوفتك فين قبل كده ؟ , قام كيري قال له : أه أصل أنا كنت عامل مسلسل في سبتمبر اللي فات !! .
.
يعني عمل كل ده وفي الأخر جاي يقول افرجو عن الصحفيين بتوع الجزيره ؟ الحريه لصحفيين الجزيره ؟ كلنا صحفيين الجزيره ؟ هي إيه الحكاية بالزبط ( على رأي مدبولي ) ؟ أنا كده بدأت أتوغوش , الله يخرب بيتك ياسماعيل بهوأت والاد .
.
و لما تسأل الإداره الأمريكيه عن اللي حصل واللي بيحصل واللي هيحصل في العراق ( بعد ما خربتها مداين ) تقولك أنا ماعرفش حاجه أنا ماعملتش حاجه أنا ماشوفتش حاجه , إمتى بقى الملاديع و الكروديات و بتوع الغرغره السياسيه في الفضائيات هيعرفو إن أمريكا دي عايشه بقالها سنييييييين طويله بدراعين , دراع عسكري اقتصادي بتحتل بيه العالم و دراع النحنحه والسهوكه بتاع حقوق الإنسان والتقارير و منظمات المجتمع ال لا مؤاخذه المدني ؟ واحد هيسألني طب قطر والجزيره تبع أنهي دراع فيهم ؟ لأ يا كابتن , قطر و الجزيره أتفه من كده , بالكتير تبقى تبع دراع البلاي ستيشن ( الأمريكاني برضه ) .
Mohamed Hussein
25 يونيو
الناس اللي زعلانه أوي إن علاء الأسواني هيبطل يكتب مقالات أقطع دراعي من هنا إن أخر مقاله قريوها للأسواني هي المقاله اللي تخيل فيها إنه قابل جمال مبارك و مراته في المطعم , أيوه المقاله اللي كانت أيام فحت البحر دي , إنما العلم نور مفيش كلام , و احنا في لحظه كده بنلاقي نفسنا في مهرجان القراءه للجميع , كلنا مثقفين دوت كوم , قرّاين دوت نت .
.
الأسواني هيكتب يا ولاد , محدش هيقدر يمنعه و لا الجن الأزرق , دي مصر فيها جرايد و مواقع الكترونيه أكتر من عدد سكان قطر , و في أخر كل مقاله هيكتب جملته الشهيره ( الديموقراطيه هي الحل ) , و لو جت فرصه ( لا قدر الله ) لعصر اللمون هيعصر يا باشا , أصلها متعوده دايمااااااااااا , أومال إيه ؟ ماهي الأرض كرويتن تلفُّ حول نفسها على رأي عبد الفتاح القصري الله يرحمه.............. وانت اللي هتغني يا منعم .
.
نامو بقى و انتو متطمنين عالبلد طالما الأسواني هيكتب , حط في بطنك شادر بطيخ صيفي طالما الأسواني هيكتب , بس إوعدني إوعدني إن أول مقاله تقراها لعلاء الأسواني تبقى تعملها حجاب و تحطه تحت المخده , أهو يحرسك من العين برضه و يحمي بلدنا من شر ولاد الحرام و شر كلاب السكك , و اوعدني كمان إن أول مولود يجيلك تسميه اسم مركب كده زي أجدادنا زمااااااان , سمّيه ( مرسي مرشح الثوره ) !!.
Mohamed Hussein
24 June
إرمي بياضك
.
السيسي قرر إنه يتبرع بنص ثروته و نص مرتبه لمصر !! , خطوه حلوه أوي من جهة المبدأ , و الراجل عايز يكون قدوه لشعبه , و جايز هي رساله بتعني البدء في حالة تقشف حكومي , إنما نص ثروتك يا سيسي و نص مرتبك هيعملو بالكتير 15 مليون إذا صحت الأرقام , و قول هنلم شوية تبرعات من المتحمسين من هنا وهناك , 10 جنيه على 7 جنيه على على , ونوصل في النهايه ل 15 مليون و 175 جنيه و تلاتاشر مليم , المبلغ ده حلو أوي و ممكن يجيب فيلا في الرحاب بتطل على بحيرة البط , لكن في اقتصاد مصر المبلغ ده بيساوي بالظبط أجرة الميكروباس !!.
.
جميل أوي إنك تكون قدوه يا ريسنا , و جميل إنك تضحى عشان البلد دي , بس انت عارف كويس الطريق اللي تبني بيه اقتصاد مصر بحق وحقيقي , الطريق اللي هيخليك تضرب مبلغ التبرعات في 100 ألف عالأقل , أه هتضربه في 100 ألف , بس الطريق محتاج إنك ( تضرب ) فعلا , تضرب البيروقراطيه بالمدافع الثقيله , تضرب أصحاب فرخ الكربون و الدرج المفتوح و الدمغه بمدفع رشاش , تضرب رجال الأعمال الفاسدين ( إخوان و فلول ) بالجزمه .
.
يا ريس عبفتاح أنا عارف إنك فارس شجاع و مش بتخاف , و ده وقتك و أوانك , أضرب بقى , إرمي بياضك و ورّينا !!.
Mohamed Hussein
24 June
حريه يا عالم حريه
.
.
و ممكن من باب حرية الرأي والتعبير نعمل رواية ( أولاد حارتنا ) فيلم سينمائي أو مسلسل , هه ؟ موافق يا ناشط ؟ طب إيه رأيك نعمل فيلم تاريخي يتبنى وجهة نظر إن مصر اتهزمت هزيمة ساحقه في 73 ؟ بلاش دي , ماتيجي نعمل مسلسل بشكل درامي محبوك أوي فيه واحد مسلم اسمه مصطفى و واحد مسيحي اسمه مايكل و مصطفى يبقى على علاقه بأخت مايكل و مايكل على علاقه بأم مصطفى , وفي الأخر الإتنين يقتلو بعض , و يطلع المسيحيين يحرقو الجوامع و المسلمين يحرقو الكنايس , ومن وسط النار تطلع لوحة النهايه بشكل درامي مثير the end , حريه يا عالم حريه .
.
بلاش بلاش , فيه ناس في مصر كتير لسه بيعتبرو إن الملك فاروق هو الحاكم الفعلي لمصر و إن ورثته أولى بعرشها و بيعتبرو ثورة 52 إنقلاب , ماتيجو نعمل فيلم عن الكفره ولاد الحرام الخاينين بتوع الظباط الأحرار دول لتوثيق خيانتهم ؟! وكان فيه وجهة نظر مسجله في كتب التاريخ و تنفع فيلم تحفه بتقول إن عمرو بن العاص لما دخل مصر لقى مقاومه شرسه من الأقباط و كان بينهم ما صنع الحداد يعني مش فرشو له السجاده الحمره وقالو له اتفضل معاليك سعادتك ولا حاجه .
.
من كام يوم واحد كتب اننا نستدعي الطريقه البرازيلي ونقتل اطفال الشوارع زي الكلاب , ده كاتب صحفي والمفروض انه حر في رأيه صح ؟ و من كام سنه واحده مصريه طالبت بتعدد الأزواج للمرأه عشان تبقى زي الراجل , رأيها وهي حره فيه , حريه يا عالم حريه .
Mohamed Hussein
24 June
داعش في العراق والشام , الإخوان في مصر , القاعده في أفغانستان , شباب المجاهدين في الصومال , بوكو حرام في نيجيريا , حماس في فلسطين , فلان ده كافر و فلانه عاهره , هنحرق كذا لو ماعملتوش كذا , هنخطف أطفال , نحرق محلات و بيوت , نقطع روس المعارضين , الدوله كافره و أهلها مرتدين , والجيش ابن حرام , والمجاهد الشيخ اسامه بارك الله فيه , اللهم انصر المجاهدين في تورا بورا و مقدشيو والشيخ زويد , الإسلام قادم يا تيت يا ولاد التيت يا شلاليط يا أوباش ............. كل اللي فاتو دول بيدعمو بعض , بالفلوس والسلاح و البشر أو بالدعاء و العقيده .
.
الأزهر الشريف , المحبه و السلام , أحاديث بر الوالدين و تبسّمك في وجة أخيك صدقه إذا قامت القيامه و في يد أحدكم فسيله فليغرسها , المساجد دور العباده وقراءة القرأن مش مكان للإجتماعات السريه و التخطيط و القذف والتكفير , اللهم صل و سلم و بارك على سيدنا محمد , فإذا قُضيت الصلاة فانتشرو في الأرض , تهنئة الأقباط بأعيادهم , و رفض تام لحمل السلاح , مفيش دعوات تكفير ولا وصف لامرأه بالعاهره والزانيه , ترتيل بصوت الطبلاوي وابتهالات دينيه بصوت الشيخ سيد النقشبندي .......... ده الفريق التاني.
.
.
............. فاخترْ لنفسِكَ أيُّ الدارِ تختارُ !!
Mohamed Hussein
23 June
و لما تكون حضرتك متجوز و متودّك في موضوع الجواز و خدت بقى عالرحرحه وكل حاجه جاهزه , وفجأه كده , إذ فجأةً يعني مراتك و ولادك ينزلو مصر قبلك , تخيل بقى المشهد معايا :
فتافيت رز عالسرير , و نص رغيف عيش تحت المخده ( تقريبا عامله حجاب ) , و باكو بسكوت مفتوح عالكوميدينو جنب إيدي و إزازة مايه سخنت لما ورمت , صحيت من النوم لقيت كيس فيه حتة لحمه وشوية رز في التلاجه باقيين من امبارح فطرت بيه و بعد كذا ساعه كده ( مابعدّش يا جيمي ) حسيت اني جعت أوي فلقيت علبة زبادي إتغديت بيها , ربنا كرمني من يومين ولقيت فردتين شراب مش فرده واحده بس طلعو غير بعض , مش مهم , هو يعني حد هيقلّعني الجزمه و يقارن الفردتين ببعض ؟ , المخده بقعد كل مره أدوّر عليها وفي الأخر ألاقيها ملفوفه في قلب الملايه , كمية هدوم عايزه تتغسل في كل حته , خلاص خلاص هغسل بكره ( و ييجي بكره و اقولك بكره ) .
.
يعني باختصار , هما 6 أيام من ساعة مراتي ما سافرت وانا قدرت بفضل الله و بمجهود فردي إني أحوّل الشقه من صوره لشوارع القاهره أيام الملك فاروق ( أيام ماكانو الطليان بيشتغلو جارسونات في مصر ) لشارع من شوارع المرج حاليا ( بعد الإنفتاح ) , عملت الكلام ده كله في 6 أيام , في ستتتتتتتتتتتت أيام على رأي السادات .
Mohamed Hussein
23 June
...... 3 شباب دخلو ورا بعض الصيدليه , هما التلاته كفيلين كده إني أسيب مهنتنا الساميه دي , دانا حتى ممكن أسيب لهم ساميه ذات نفسها .
.
واحد داخل يشتري مزيل عرق ب 11 ريال , قالي أنا بجيبه من البقاله ب 8 قلت له هاته من البقاله أرخص أنا عارف , أصر إنه ياخده من عندي ب 8 , يابني ماينفعش , قالي طيب أخره كام ؟! ........... هو انا ببيع فلايات يا جدعان .
.
التاني دخل واللثه عنده ورامه و خده منفوخ طالع فيها بتاعه أد حباية البطاطس وعايز بنادول , قالي بنادول هيفك الورم ده قلت له لأ , لازم تروح لدكتور أسنان عشان هتحتاج تمضاد حيوي و مسكن قوي , قالي يعني البنادول مش هيجيب نتيجه قلت له لأ , قالي بس بنادول بيجيب معايا نتيجه في كل حاجه !! , قلت له معاك حق , خد بنادول أهو و هتبقى زي الفل .
.
والتالت دخل وطلع لا أنا عارف هو عايز إيه ولا هو عارف هو عايز إيه , الواد التالت ده ينفع يشتغل ناشط سياسي في مصر , و الأول والتاني يخدّمو عليه .....................فيلم الموسم و كل موسم ( الغبي و الغتيت و المسطول ) .
Mohamed Hussein
23 June
طب جرّب تسمع خطبة وجدي غنيم الأخيره مره تانيه , وهات ورقه وقلم واكتب ورايا :
- كم مره وجدي غنيم كفّر الناس في الخطبه ( فقد باء بها أحدهما ) ؟.
- كام مره وجدي غنيم شبّه الستات اللي بتنزل تحتفل في التحرير بالعاهرات ( قذف لألاف المحصنات ) .
- كمية التحريض والغل اللي ف الخطبه
- كمية اللبس والجهل للدين والسياسه .
.
لأ لأ , مش كل واحد شيخ بدقن قاعد على منبر في جامع و قدامه شوية ناس يبقى ده مجلس علم بتحفّه الملائكه , و اغلب ظني إن الملايكه سابت الجامع وقت الخطبه دي و طلعت بره و فضلت تستغفر ربها , يارب توب علينا بقى من شياطين الإنس .
Mohamed Hussein
23 June
بتحصل في أحسن العائلات
.
و صلت الشغل , ركنت العربيه و عيني لسه مقفوله بالضبه والمفتاح , نزلت و خدت حاجتي اللي في العربيه , اللاب على كتفي اليمين و شنطه في إيدي اليمين و شنطه بلاستيك في إيدي الشمال و المج كان معايا في العربيه من امبارح مسكت بصوابع ايدي الشمال برضه , صوابع ايدي اليمين مسكت بيها الريموت بتاع العربيه كده تمام أوي , ومسكت مفاتيح الصيدليه في بؤي عشان ماعنديش إيد تالته , وصلت عند باب الصيدليه وقعدت أدوّر عالمفتاح بتاعتها , هو فين المفتاح راح فين ؟ , وانا شايل الحاجات زي مانا , حسّست على جيوبي وانا شايل الشيله لا مش موجوده , مش بتشخشخ يعني و جيوبي فاضيه تقريبا , نزلت اللاب والشنط على سلم الصيدليه و رجعت العربيه أدور جايز اكون نسيتهم جوه , عمّال أدعي واقول يارب , طب انا هروح فين دلوأتي واجيب نسخه تانيه ازاي ؟ الجو حر اوي , و فين و فين بقى على بال ما قررت أشرب سجاره عشان اهدى و اعرف أركز و أفكر انا نسيت المفاتيح فين ؟ , و هنا لقيت المفاتيح الحمد لله !! .
.
لا أنا كويس , كويس أوي كمان , و مصر زي الفل و مش ناقصها غير أكلة سمك ( الله يرحمك يا عم جلال ) .
Mohamed Hussein
22 June
و يفضل أكبر و أهم لغز في ثورة يناير اللي قامت ضد مبارك هو مبارك نفسه , الراجل الفاسد الحرامي اللي جرّف بلده خصوصا في أخر 10 سنين و مع ذلك ماهربش زي ماعمل زين العابدين ( كان يقدر يهرب و يعيش بفلوسه سلطان زمانه ) , و ماعملش زي بشار و قلبها حرب أهليه ( ماهو معاه فلوس وعنده انصار بالملايين ) , و قبل بالمحاكمه و بقاله اكتر من 3 سنين مرمي في السجن و بيتحاكم لا في مره اهان القاضي ولا رفع ايديه بأي علامه ولا عياله الحراميه الصغيرين هلفطو بالكلام قدام الكاميرات .
.
مبارك رغم قايمة بلاويه السوده الطويله لكن المواقف اللي فوق دي تتحسب له , عشان كده انا بتمنى إنهم يعدموه و بعد ما يعدموه يطلع لنا في برنامج توك شو يحكي عن الي حصل في ثورة يناير من وجهة نظره , أو ممكن نختصر الخطوتين في خطوه واحده , بلاش يعدموه , هو يطلع على طول في برنامج توك شو مع ريهام سعيد , ويبقى كده خد فرصته انه يدافع عن نفسه قدام التاريخ و خد جزاءه في نفس الوقت !! .
Mohamed Hussein
22 June
وجدي لامؤاخذه غنيم في أخر خطبه !! .
.
1- بشار الأسد الله يلعن أبوه ( أيوه أصل أبوه مات و تجوز لعنة الميت أما اللي عايش لا تجوز لعنته لأنه ممكن يؤمن قبل مايموت ) !! ..يعني حافظ الأسد كده مات كافر بناء على حكم الشيخ وجدي غنيم و بشار كافر بس ممكن يسلم قبل مايموت عشان كده تجوز لعنة أبوه بس هو لأ !! .
.
2- دولة الخلافه الإسلاميه قادمه واحنا في حالة مخاض !! ............. يعني العالم دلوأتي بيتمخض من أجل ولادة دولة الخلافه الإخوانجيه الإسلاميه برعاية الإخوان و قطر و حماس , و انا اللي كنت فاكر العالم بيبيض مش بيولد !! .
.
3- البنات اللي اتعرضو للتحرش و الإغتصاب في التحرير , أومال انتي كنتي رايحه ليه ياختي ؟ مانتي رايحه عشان حد يغتصبك و يتحرش بيكي و قاعده ترقصي عشان كده
.
4- الرئيس عبد الفتاح السيسي كافر و مرتد عن دينه و السلعوه هتاكله في الأخره .
.................................
.................................
أهو وجدي غنيم ده كنت فاكره زمان عالم و مفكر و شيخ و داعيه و كده يعني وبيفهم في الدين و الطب والفلك والسياسه وفيلسوف لحد مانلاقي فيلسوف , بعدين جت ثورة يناير عشان تقول لنا مصر دي فيها كام ألف قرص جله ماشيين عالأرض و شايلين البطاقه في الجيب الوراني .
Mohamed Hussein
21 June
الشباب النقي نازل يتظاهر ضد قانون التظاهر , حقها و لا مش حقها يا بوكمال ؟ ياعم حقها طبعا أنا قلت حاجه ؟ طب هات مصحف وانا احلف لك اني مصدق إنك نازل تتظاهر عشان قانون التظاهر فعلا , و انك ماخدتش بالك إن القانون ده صدر من سنه تقريبا بس خدت بالك النهارده لما السيسي بقى رئيس و إنك مش بيجيلك نوم طول الليل بسبب قانون التظاهر و مراتك تقولك هنجهّز بنتنا منين يا عوضين ؟ تقول لها يا ستي سيبيني في حالي لما نشوف قانون التظاهر الأول , و مصدق إنك خلّصت إنتاج مصانع فلورا و كلينكس كلها من الشحتفه على علاء عبد الفتاح و انك حاطط صورة احمد دومه تحت المخده !! .
.
و الله الإخوان دول ربنا كارمهم أخر كرم , لسه عايشين و بيتنفّسو , مع إن كل اللي حيلتهم من حطام الدنيا هما بردعتين , بس عايشين بيهم عيشه لوز , بردعه اسمها شعارات الخلافه الإسلاميه و دي بيطلعوها لما يكونو مزنوقين في شوية سلفيين و بردعه اسمها شعارات الثوره المجيده و دي بيطلعوها لما يكونو مزنوقين في الراجل اللي مش عارف هيجّهز بنته منين .
و الإخوانجي القراري لو قابل واحد مقصّر توبه هيقول له ( بارك الله فيك يا أخي الكريم ) ولو قابل واحد مطوّل شعره هيقوله محتاجين حماسكو يا شباب مصر النقي , و يحط البردعه و يركب و أول ما يوصل المكان اللي هو عايزه يدّي شلوت لأخوه الكريم و شلوت للشاب النقي , الغريبه ان أخوه الكريم بيرجع له تاني و تالت و رابع و الشاب النقي كمان , يعني محدش فيهم بيشتكي أبدا من البواسير !! .
Mohamed Hussein
21 June
نصار عبد الله كاتب ( نطع ) بدرجة دكتور , يعني معاه دكتوراه في النطاعه , والمصري اليوم جريده خاصه كبيره بتقلبها دعاره فكريه أحيانا أو غالبا .
.
نصار عبد الله بيقولك أطفال الشوارع في البرازيل في التسعينات كانو بيرتكبو جرايم زي السرقه و الإغتصاب و كتير منهم جاله الإيدز , وكانت تكلفة تأهيلهم باهظه جدا والحكومه مامعهاش و هتجيب فلوس منين يعني , فكان الحل إن الشرطه طاردت أطفال الشوارع واصطادتهم و قتلت منهم ألاف زي ما بتقتل الكلاب الضاله و بكده الحكومه تبقى ارتاحت من مشاكلهم و وجع دماغهم و وفرت قرشين حلوين عشان تلاقي شغل للعواطليه اللي قاعدين عالقهاوي ( اللي هما مش أطفال شوارع ) , و حبذا بقى لو كان عندنا الإراد السياسيه في مصر و طهرنا القاهره من ظاهرة اطفال الشوارع بالطريقه البرازيلي !!.
.
يعني أطفال الشوارع اللي هما ضحية اهمال اسري وتفكك و أهمال مجتمع و دوله , اللي بيباتو في الشارع في درجة حراره 50 أو درجة حراره صفر , اللي اتحرمو من العلاج و التعليم , اللي بيدورو على اكلهم في صفايح الزباله بقو كلاب ضاله والحل إننا نقتلهم ؟؟؟ .
.
مره كنت قاعد انا و لوجي بنتي قدام مطعم , طلبنا الأكل و مستنيين دورنا و المطعم زحمه جدا , واحنا قاعدين بره لوجي شافت قطه ( من قطط الشوارع ) ديلها زي المسلوخ , محروق منه جزء , تقريبا حد رمى عليها مايه مغليه ( أكيد يكون الحاج عبد الله أبو النطع نصار ) , لوجي قالت لي القطه دي عايشه كده ازاي يا بابا ؟ , طب مش المفروض الناس تاخدها و تعالج ديلها ده بدل ما تتألم ؟ مش حرام كده ؟ قلت لها حرام يا لوجي , حرام يا حبيبتي .
شكلنا ولاد كلب يا لوجي أنا وانتي , جينا في زمن غلط , زمن غرقان في النطاعه .
Mohamed Hussein
21 June ·
إيده في إيد البلد
يبقى الأمل تالت
و لولا دعوة نبي
مركبها كت مالت
.
افتح عنيك يا غشيم
ده الكلب كان مسعور
لاعب علينا الدور
و أه عليك يا وطن
من لعبه لو خالت !!.
.
.
محمد حسين
Mohamed Hussein
20 June
أطبطب و أدلّع .
.
في التوقيت اللي حكم فيه السيسي مصر كان قدامه طريق من اتنين مفيش تالت , أي حد مكانه كان هيقع بين نفس الإختيارين .
.
الأول : إنه يعمل ألف حساب لزيد و عبيد و الشيخ زيد والشيخ عبيد و الناشط زيد و الناشط عبيد
.
يعني بلاش قانون التظاهر عشان كده هتزعل الثورجيه منك , حاول تلغيه بقى و تكسب الكام ألف ثورجي اللي باقيين في صفك وحبذل لو تدخّلت بنفسك للإفراج عن علاعبد الفتاح , و كمان حاول ترفع اسم جماعة الإخوان من القايمه الإرهابيه و تسمح لهم بممارسة الحياه السياسيه عشان تكسب كام ألف إخوانجي في صفك , و ياريت بقى لو تسمح لبهاليل السلفيين بالخطابه في المساجد و أي واحد مربي دقنه و مقصّر توبه يطلع يتغرغر عالمنبر عادي عشان ماتزعلش كام ألف سلفي منك وتاخدهم في صفك
.
ويا سيدي لما تلاقي واحد من فلول مبارك بنى برج علو كده عالنيل مخالف سيبه يسترزق مايجراش حاجه و حاول تشوف أي طريقه تطلع بيها مبارك من السجن عشان تكسب الفلول كلهم في صفك , و البياعين الغلابه اللي فارشين ببضاعتهم في الشارع و قافلينه و معطلين المرور يا أخي سيبهم يسترزقو على الأقل ما تسمعشي كلمتين مالهمشي لازمه من بتوع حقوق الإنسان و الكولجيه ................. باختصار ده كان اختيار ( أطبطب و أدلّع ) , و ملعون أبو الدوله و أبو القانون , إحنا نمشيها بالمحبه كده يا مصيلحي .
.
الطريق التاني هو المواجهه و الحسم و الفرم إذا تطلب الأمر , رأيكو السيسي اختار أنهي طريق ؟ طب مش كان يطبطب و يدلّع أسهل له و اهو ياخد الكل على حجره ؟!.
Mohamed Hussein
20 June
ممممممممم الملك عبدالله هيوصل القاهره بعد ساعة ونص بإذن الله , ترانزيت و هو راجع من المغرب للسعوديه , و بس كده , بكره الصبح الدولار هيبقى بشلن في مصر , يا بختك المايل يا محمد ياللي هو أنا .
مانا كنت عشمان أخد مكافة نهاية الخدمه و احولها لمصر و يكون الدولار وصل ل 120 جنيه مثلا , ضاعت فلوسك يا صابر
Mohamed Hussein
20 June
أوباما مبسوط أوي بالتجربه اليمنيه , بيقول إنه دعم الحكومه اليمنيه في الحرب ضد الإرهاب ( اللي هو بيعلفه بإيده ) , و بيتطلّع لتكرار النموذج اليمني في العراق وسوريا !! ههههههههههه قشطه , كده فيه اتنين ستات في العراق وسوريا هياخدو جايزة نوبل لامؤاخذه للسلام السنه الجايه , و العراق و سوريا نعملهم كونفدراليات بقى , يعني نقسمهم كده و نخططهم , تحبّو نقسم سوريا بالطول ولا نعملها سامبوكسات ؟ طب حد لسه عايز حاجه من باترينة الديموقراطيه الأمريكاني قبل مانقفل الكباريه ؟!
يا بيه أنا عملت في حياتي كل حاجه غلط ممكن تتخيلها إلّا إني أخد جايزة نوبل للسلام !!.
Mohamed Hussein
20 June
عاصم عبد الماجد الإرهابي اللي عايش ضمن جواري موزه و محظياتها لما سمع خبر إحالة أوراقه للمفتي شال يافطه مكتوب عليها ( فزت ورب الكعبه و لاتنسو الصلاه على النبي ) !! .... , يعني حضرتك عايز تنال الشهاده من فنادق قطر ؟ يعني تطلع من قطر و الجزيره على الفردوس الأعلى على طول ؟ يعني تبقى عايش ولا مؤاخذه و بتعمل لا مؤاخذه و فجأه تلاقي نفسك في الجنه و حور العين بيعملولك مساج ؟!
طب ايه حكاية فزت ورب الكعبه و علاقتها بالصلاه عالنبي اللي بقت لوجو بعد ما كانت إحساس ؟ فكرتني بنكتة اليهودي البخيل اللي ابنه مات وراح يعمل له نعي في الجريده , قالهم اكتبو ( كوهين ينعي ولده ) قالوله ماشي بس دول 3 كلمات ب 5 جنيه وعندنا عرض أن ال 5 كلمات ب 5 جنيه برضه , ممكن تخليهم 5 كلمات , قالهم خلاص اكتبو ( كوهين ينعي ولده و يصلّح راديوهات ) !! , عاصم عبد الماجد : ( فزت ورب الكعبه و ماتنسوش اللوجو بقى )......... كوهين ينعي ولده ويصلح راديوهات .
Mohamed Hussein
20 June
مراتي نزلت مصر قبلي وسابت لي مسئولية إني المّ الرفايع و الكراكيب اللي في الشقه , لقيت كمية جراكل مايه فاضيه غير عاديه , دي لو عندي في مصر كنت عبيتها كلها بنزيم , أه عشان البنزيم بيغلى ويشح من السوق أحيانا , بس الشقه دي مش محتاجه نضافه الشقه دي محتاجه نضافه , يارب مانسى قبل ماسيبها إني أشد سكينة الكهربا , إنما التجربه المريره دي أكدت لي اننا من غير الستات ولا نسوى أه والله , عشان كده عايز أوجه رسالة امتنان و عرفان للمرأه بجميع أنواعها !!.
Mohamed Hussein
19 June
و تلاقي ناس ربنا خلقهم عشان يتعاطفو , كل يوم يصحو من النوم و يدوّرو على أي حاجه يتعاطفو معاها , لحد ما بقى عندهم تعاطف لا إرادي , و لما الحكومه قررت مصادرة محلات زاد و سعودي يقولك طب وال 2000 شاب اللي شغالين في المحلات دي يشتغلو فين ؟ هههههههههه كأن مصر انقطع فيها الشغل من بعد قفل المحلين , أو جايز الشاب اللي اتقطع عيشه واخد بكالوريوس في محلات زاد أو المعهد العالي للتوحيد والنور !! .
.
و بنفس الطريقه دي ممكن حضرتك تتعاطف كمان مع الشباب اللي كانو شغالين في المطعم اللي بيبيع لحمة حمير , ماهو المطعم لما اتقفل اكيد الشباب ده حاله وقف , بتقفلو المطعم اللي بيبيع لحمة حمير ليه يا كفره ؟ انتو كده بتكرّهو الشباب في الحكومه يا أغبيا , الحريه لشباب مطعم الحمير !!.
و مش المفروض كمان نحكم على تاجر المخدرات بأي سجن عشان لما يتسجن اكيد مراته وولاده هيتشردو و هما ذنبهم ايه ؟ , و لا يوم من أيامك يا معلم , الحريه لولاد تاجر المخدرات !!.
.
أهي النوعيه دي من الناس المتعاطفه أوي هما أكبر دليل على إن مصر ولّاده فعلا بس أحيانا بتبيض !!.
Mohamed Hussein
19 June
عمِّه قديمه أوي و متهالكه ( ممكن تكون من 100 سنه مثلا ) وقام واحد مصورها و منزلها عالفيس و إلهي تتشك في نظرك و معاميك ياللي تشوف عمامة سيدنا رسول الله و ماتدوسشي لايك !!.
.
شبشب خشب شبه القبقاب قديم أوي , و إلهي الغوله تاكلك ياللي ماتعمل شير لحذاء سيدنا رسول الله ..
( بالمناسبه , صدّق أو لا تصدّق , انا لا عمري عملت لايك ولا شير للعمه و لا الحذاء و مفيش سلعوه جاتلي بالليل و انا نايم لحد دلوأتي أه والله ) .
.
محمد كان مستني البت تفيده ( المزه بتاعته ) تحت شجره , لقى مسمار واقع عالأرض مسكه بإيده و نحت على جسم الشجره ( كعادة المصريين يعني ) , كان عايز يكتب محمد و بعدين يرسم جنبه قلب و بعدين يكتب تفيده , يعني محمد بيحب تفيده , المهم صاحبنا كتب محمد بالمسمار و فجأه وقف ميكروباس و نزلت تفيده لابسه الحته الدبلان اللي عالحبل , محمد انبهر بتفيده و دبلانها و رمى المسمار من ايده بسرعه و طلعو مع بعض عالجنيه ( الجونينه ) , بعد سنه واتنين وتلاته الشجره كبرت واللحاء بتاعها غلّف الإسم المكتوب بالمسمار ( محمد ) , و بقى يبان على انه جزء من الشجره , واحد شاب سلفي وقف في نفس المكان مستني الميكروباس برضه لمح اسم محمد مكتوب عالشجره , نزلت الدموع من عنيه كأنها حنفية مايه مفتوحه في الدور الأرضي والماتور شغال , طلّع الموبايل وصورها و اتصل بكل اصحابه واهل حتته عشان ييجو يشوفو المعجزه الإلهيه ( إسم سيدنا النبي مكتوب عالشجره ) .
.
الشيطان بقى كان قاعد يشرب له كاسين بالليل في خمارة ميشيل وعمّال يضحك و يضحك و يضحك , الخواجه ميشيل قاله مالك بتضحك ليه يا شوشو ؟ قال له تصدق بالله يا خواجه ميشيل ؟ فيه شويه عرب ومسلمين بيخلّوني اقعد مع نفسي واقول هو انا ربنا خلقني ليه من غير شغله ولا مشغله كده ؟!.
