( محمد حسين - منوع ) ( من 18 سبتمبر - 25 سبتمبر )

Mohamed Hussein

25  سبتمبر

العريس

.

على مسرح الأمم المتحده رؤساء باعو شعوبهم , رؤساء ركعو و سجدو , و رؤساء انكشف عنهم الوجه القبيح , وحده السيسي يغرد منفردا في هذا الحفل .

.

حديث عن ليبيا , سوريا , العراق , الشعوب والأرض و التاريخ و وحدة التراب , صفعات وجهها السيسي لعصابة علي بابا في قلب المغاره .

.............. فخور إنك رئيسي .

Mohamed Hussein

25  سبتمبر

قاعد بتفرج على حفل اختيار ملكة جمال مصر في التلفزيون , اللهم صل عالنبي , هي قنبلة هيروشيما انفجرت في القاعه دي قبل كده ؟! أنا مش شايف ملكات جمال على المسرح , أنا شايف لبشة قصب واكلها السوس .

.

ماهو لما يكون حفل ملكات الجمال بيقدمه شريف مدكور و عضو لجنة التحكيم أمينه شلبايه يبقى لازم ملكة جمال مصر تبقى ( واحد ) من دول .

و قالك الجمهور ممكن يصوت على اختيار ملكة جمال مصر , ماهو فعلا لازم يصوت و يلطم كمان , بس أنا عن نفسي أرشح شريف مدكور للقب ميس إيجيبت ( فيه أنوثه أكتر ) .

Mohamed Hussein

25  سبتمبر

بعد ما شوفت ردود فعل الناس على زيارة السيسي الحاليه للأمم المتحده و بعد نشاطه و خطاباته و مواقفه هناك , يتهيألي لو عملنا إعاده للإنتخابات الرئاسيه اللي فاتت لما السيسي يرجع من أمريكا , فأكيد أكيد حمدين هيعترض عالنتيجه اللي هتطلع و وهينزل يعتصم في التحرير و يطالب بحقه الشرعي والقانوني في ال 3 % بتوع الإنتخابات اللي فاتت !!.

.

الشعبيه اللي فقد منها السيسي شويه بعد قرار زيادة أسعار الوقود ( هو كان عارف إنه هيفقد شويه من شعبيته ) أهي رجعت تاني و بزياده ( واثقُ الخطوةِ يمشي ملكاً ) ............ ماخيّبتش ظني فيك يا عبفتاح .

Mohamed Hussein

24  سبتمبر

حكاية علي بابا و ال 50 دوله

.

و قال المسئول الأمريكي رفيع المستوى إن 50 دوله انضمو للتحالف اللي عملته أمريكا لضرب التنظيمات الإرهابيه اللي زي داعش !! .

.

لو حكينا يا حبيبي نبتدي منين الحكايه ؟ داعش دي هي مجرد فطشه عملتها امريكا على إديها زي ما عملت غيرها من التنظيمات الإرهابيه , و الصح الصح بقى إنك ماتقولش تحالف لضرب داعش في سوريا والعراق , الصح إنك تقول تحالف لضرب سوريا والعراق بداعش !! .

.

و لما المسئول الأمريكي الرفيع سأل عبد الفتاح , إيه رأيك يا عبد الفتاح تنضم لتحالف ال 50 ؟ أنت مع تحالف ال 50 ولا ضده يا عبده ؟ قام الرئيس السيسي قال للمسئول الأمريكي : تشرب شاي ؟!.

.

و هي دي بقى في علم السياسه إسمها الإجابه النموذجيه على الأسئله اللي من النوع ده , ماهو انت لو قلت إنك مع التحالف يبقى هتورط جيشك و قواتك في حرب افتراضيه زي عالم الفيس بوك كده و بعد شويه هتلاقي تنظيمات إرهابيه جديده ( من صنع أمركيا برضه ) بتخرّب في أرضك بحجّة الإنتقام لداعش الأمريكيه !! .

و لو قلت أنا ضد التحالف بتاع محاربة الإرهاب هيقولك أومال بتحارب الإخوان عندك ليه ؟! .......... عشان كده تبقى الإجابه النموذجيه هي دي ( تشرب شاي ) ؟!.

.

و لو حضرتك بقى سألتني عن رأيي في الموقف السعودي والخليجي المؤيد للتحالف , هل أنا مع أم ضد الموقف السعودي ؟ هقولك ممممممممممم تشرب شاي ؟!!.

Mohamed Hussein

24  سبتمبر ·

في قمة المناخ , السيسي قابل هناك هولاند و رئيس وزراء اثيوبيا و رؤساء تشيلي وبلغاريا و كوريا وقبرص و لسه هيقابل أوباما ولو حنّ شويه على بهلول تركيا ممكن يقابله , و مفيش حد من زعماء دول العالم ماعملش اجتماع مع السيسي غير جورج واشنطن و جورباتشوف الله يرحمهم ( الإنقلاب يترنح ) .

.

و الراجل أساسا طالع من هنا وسط تهديدات بمحاولة اغتياله , و في وسط الضغوط و في قلب قلعة الشيطان ذات نفسه و بدل ما يصدر أمر رئاسي بالإفراج عن فلان و علان من بتوع ( معركة العقول الخاويه ) قام أصدر قرار منع التمويل الأجنبي !!.

.

الراجل ده جبار و عهد الله جبار , و كده يبقى جاب جون بكعب رجليه من نص الملعب , و هاتها من الشبكه يا أوباما .

Mohamed Hussein

23  سبتمبر·

ريم ماجد بعد ما أضربت عن الطعام هددت بإنها هتنزل التحرير و تقلع ملط لو الحكومه مأفرجتش عن فلان و علان و ترتان بتوع الامعاء الخاويه و عملت تعديلات على قانون التظاهر ( يعني ممكن تخليه بفيونكه أو بكرانيش مثلا ) , كل ده مش مهم , المهم إن ريم ماجد هتقلع ملط !! , يعني ياربي بدل مايكون عندنا ناشطه سياسيه شبه كيم كارديشان و تكون زعلانه أوي من الحكومه ( بنت الصرمه ) و تنزل التحرير و تقلع ملط يقع حظنا في بيجاما فاضيه ؟!.

.

إحنا جيل اتظلم أوي يا عم إبراهيم , أه و عهد الله , لما كنا صغيرين و نحب نتفرج على مشاهد مثيره كنا بنروح السينما نتفرج على ناديه الجندي و نبيله عبيد !! , و لما كبرنا شويه عملنا ثوره قامو الإخوان ركبوها و ركبونا و ولما بقى عندنا نشطاء سياسيين من النوع اللي لما بيزعل بيقلع كانو من نوعية ريم ماجد و علياء مهدي .

.

الجيل بتاعنا ده باقي له دور كوليرا و زلزال صغير و نسميه شراره أو شحته .

Mohamed Hussein

23  سبتمبر ·

قواعد اللعبه

.

و قررت أمريكا من فتره صغيره إنها تغيّر قواعد اللعبه مع مصر بعد ما يأست من فكرة الصدام المباشر , إحنا دلوأتي بنلعب في فصل السهوكه صفحه رقم 17 , فكر الصهاينه بقى , و الله ما تفهم يا جدع هي أسرائيل دي بنت أمريكا ولا أمريكا هي اللي بنت اسرائيل ؟ عموما هما الإتنين ولاد كلب .

.

و يوم ما قررت أمريكا إنها تلعب معانا في فصل السهوكه أصدرت تعليماتها لتركيا و قطر يلعبو نفس اللعبه , عشان كده هتلاقي قطر بدأت تتخلص من شوية الخرفان ( مؤقتا ) , و الخارجيه التركيه طلبت مقابلة الخارجيه المصريه , طبعا ده كله بالصدفه البحته ومالوش أي علاقه بطلب أوباما إنه يقابل السيسي !! .

.و الحكايه باختصار إن قطر و تركيا هما الخنفستين اللي بيمشو في ديل العقرب , بس العقرب و الخنفستين اللي بيمشو في ديله نسيو إن السيسي ده راجل مخابرات مش بتاع بليله و لا داقق عصافير على دراعه .

Mohamed Hussein

23   سبتمبر  ·

أخر إبداعات الهجّاصين

.

ألاف المصريين اللي نزلو بأعلام مصر في أمريكا لتحية السيسي دول أصلا عساكر أمن مركزي !! , أيوه السيسي من يومين تلاته كده جاب كام ألف عسكري امن مركزي و وقّفهم طابور و خد منهم البطايق و بعت السكرتير بتاعه بالبطايق دي للسفاره الأمريكيه في القاهره عشان يطلّع لهم تأشيرات , قام السفير الأمريكي قال للسكرتير يا مراحب يا مراحب ( مانتو عارفين إن أمريكا بتعشق السيسي و بتموت في دباديب مصر ) , و قام السفير بنفسه و ساب طشت الغسيل اللي كان قاعد عليه و قال للموظفين يقفلو الشبابيك و البيبان و يتفرغو لعمل تأشيرات لعساكر الأمن المركزي عشان يلجقو زيارة السيسي .

.

و على جانب أخر أعلنت شركة مصر للطيران حالة الطوارئ و لغت كل الرحلات عشان توفّر أماكن للكام ألف عسكري أمن مركزي , حتى إن فيه عساكر مالقوش كراسي فاضيه في الطياره ففضلو واقفين و ماسكين في الحديده اللي فوق زي بتاعة مترو الأنفاق .

بالك انت ؟ البت المزه اللي شايله علم مصر دي ؟ أهي دي بقى عسكري أمن مركزي بلدياتي من السنبلاوين و اسمه عبد التواب , وحشتني أوي يا عبد التواب , هات بوسه يا عبده .

.

و من كام يوم , قال إيه إن حجم الشراء في شهادات قناة السويس وصل 64 مليار جنيه , يا كدابييييييييييين , و الحقيقه إن مفيش مصريين كانو واقفين طوابير في البنوك , الحكايه كلها إن السيسي طلّع فلوس الصناديق الخاصه و اشترى بيها الشهادات دي عشان يدراي على فضيحته ( شُغل هنادي بقى و جدر البطاطا و عمو عزيز و الحاجات دي ) .

Mohamed Hussein

22  سبتمبر·

توكل كرمان فضلت سنتين تلاته تدعم الجماعات الإرهابيه في الوطن العربي ( جايزة نوبل لها شمخه برضه ) و فضلت على كده لحد ما جت اللحظه , اللهم صل عالنبي , الحوثيين دخلو شقتها ( لحد أوضة النوم ) , و اللي حضّر العفريت يصرفه يا خالتي توكل .

الحوثيين زيهم زي داعش و الإخوان هما صناعه أمريكيه صرفه ( made in usa ) , ولو فعلا فيه عداوه حاليا بين توكل كرمان و الحوثيين فده له تفسير و احد بس و هو إن العام سام خلاص اعتبر الست توكل كارت محروق و قرر انه يتخلص منها و يتاويها .

.

في قهوة السياسه العربيه , سخاروف صحي من النوم و قال لعمك الحاج نوبل ( و عهد الله ما يحصل أبدا يا حاج نوبل , سيب الطلعه دي عليا أنا و استريح انت ) و طول ما احنا عندنا عيال برياله مايعرفوش الفرق بين الوطن و بين رجل الكوميدينو هيكونو هما عندهم سخاروف و نوبل .

Mohamed Hussein

22  سبتمبر·

مدارس مدارس

.

ظاهره غريبه جدا في شوارع مدينة نصر , أغلب اللي سايقين العربيات بنات , بنات و ستات يعني ( المرأه بجميع أنواعها ) , و طبعا البنت لما بتكون سايقه عربيه بتحتاج معامله خاصه ( زي طقم الجيلي ) , و ده اللي أنا بعمله بالظبط , يعني حضرتك لو شوفت حد في شوارع مدينة نصر بيقف لكل بنت كاسره عليه عشان تعدّي و يقول لها اتفضلي , أو وسّع طريق تماما لبنت جايه في تقاطع اعرفو إنه أنا , و ده مش ضعف منّي و لا غصب عني و لكن لأني بخاف على مراية العربيه اللي حيلتي أه و عهد الله , و مش عايز أرجع البيت وانا شايل الرفرين على كتفي .

Mohamed Hussein

22  سبتمبر·

أبجديات العمل الإجرامي

.

مع أول يوم دراسي و سفر السيسي لاجتماع الأمم المتحده , انفجار في محيط وزارة الخارجيه , إنفجار قرب حديقه في العاشر من رمضان , انفجارات في الغربيه , عشرات الشهداء و الجرحى , و مرّه جماعة أجناد مصر تعلن مسئوليتها و مره أنصار بيت المقدس .

.

المعلم أبو دومه لما بيحب يتاجر في المخدرات مابيفتحش محل مكتوب عليه من بره ( أبو دومه و شركاؤه لتجارة المخدرات جمله و قطاعي ) , لأ خالص , هو بيفتح محل عطاره لتجارة الحبهان و النشوق و اللبان الدكر , و صبيانه بيسرحو بالمخدرات رايحين جايين عالمحل قُدّام الناس و الحكومه , و الحاج طبعا قاعد عالُدرج بتاع الفلوس , ماسك مفتاح الدرج في إيد و السبحه في الإيد التانيه .

.

دي اسمها أبجديات العمل الإجرامي يعني ألف باء , المعلم حسن البنا و المعلم سيد قطب فتحو محل العطاره ( للتجاره بدين ربنا جمله و قطاعي ) و صبيانهم سارحين بالمخدارات ( السلاح و الإرهاب و القتل و الخراب ) .

.

تبقى عبيط بقى لو دوّرت على جماعة أجناد مصر دي مقرها فين و مين المسئول عنها ؟ , الحكايه سهله خالص , مقرها في المقطم و معروف للجميع , و مش بعيد يكون اسم أجناد مصر هو الفرع الجديد للتنظيم الإرهابي الدولي بعد ما أنصار بيت المقدس فقدت بريقها ( سمعتها انضربت في السوق ) , يعني فتحو فرع جديد للشركة على طريقة ( كُل نفسك قبل ما حد ياكلك ).

.

............. اقطعو راس الأفعى .

Mohamed Hussein

21   سبتمبر·

بعد مداخله الأستاذه الدكتوره غاده والي وزيرة التضامن على الدكتور حسام المساح أمين عام المجلس القومي لشئون الإعاقه في برنامج تلفزيوني ........... , الدكتور حسام قدم استقالته و استقالته اتقبلت !! .

يا عم الحاج ابراهيم محلب مطلوب فورا إقالة الأستاذه الدكتوره ( الشلأ ) اللي ماعندهاش حد أدنى من الذوق , و مطلوب الإعتذار للدكتور حسام ( المعاق ) و إعادته للعمل .

.

يا دكتوره غاده , مكانك مش هنا في الوزاره , إنتي تشتغلي وزيره في مصر المحروسه ليه ؟ ليه تشتغلي وزيره و احنا عندنا أزمة بوابين ؟ .

Mohamed Hussein

20  سبتمبر

و قالولي إن أيفون عملت أيفون 6 , اللي مطلي بماية الدهب , النهارده عرفت من النت إن الأيفون الدهبي ده بيتباع ب 11 ألف , يا بلاش والله , 11 ألف يجيبو إيه في الزمن المهبب ده ؟ ولا حاجه , واهو الواحد بدل ما يأمّن مستقبل ولاده بقيراطين أرض و لا كام شهاده استثمار يأمّنه بجهازين أيفون و شاحن .

.

أبويا وائل كان قاعد بياكل و كان مزنوق في قرشين , مفهاش حاجه يعني ما كلنا بنتزنق , أبويا وائل بص لأمي سحر كده و قال لها : بيعي الأيفون 6 اللي في صدرك ده يا سحر .

Mohamed Hussein

19  سبتمبر·

الإسكتلنديين صوّتو ضد الإنفصال عن بريطانيا !! , أصحاب العقول بيفكّرو كده , صحيح إن بريطانيا سمعتها الدوليه بقت أزفت من سمعة صافيناز و علاء صادق و صحيح إن كلمة الإستقلال لها رونق و شمخه كده بس العقول اللي بتفكر بتميل دايما للإتحاد و الوحده و التوحد و كل الكلمات اللي فيها حرف الحاء .

مفيش شعوب بتعشق الإنفصال و بتطبّل له و تهلل له و تعتبره إنجاز ( إن جاز ) غير شعوبنا المتخلفه , اسألو السودان و اليمن و فلسطين و كل الدول اللي بتنتهي بحرف النون , الحمد لله إن اسمها اسكتلندا مش اسكتلندن .

Mohamed Hussein

19  سبتمبر·

بعد اسبوعين تلاته من الفرهده و البهدله المستمره من هنا لهنا لهنا جت لي فرصه أرتاح ساعتين تلاته بهدوووووووء من غير تفكير و لا مشاوير , قلت من باب التغيير بقى أتفرج عالتلفزيون كده وابقى ريلاكس خالص , اللهم صل عالنبي , فيلم لمصطفى قمر !! .

تصدقو أنا البهدله و الفرهده وحشوني ؟ فين الموتيليوم ؟ شريط الموتيليوم كان هنا , مصطفى قمر في يوم خميس يا حكومه ؟ يسقط يسقط حكم روتانا سينما .

Mohamed Hussein

19  سبتمبر·

بعد ثورتين و كبشة حكومات ... الحكايه نختصرها في كام سؤال

.

السؤال الأول لمبارك

- اللهم صل عالنبي قدرت بمجهود فردي إنك تجرّف بلد بحالها , بمؤسساتها الحكوميه و شعبها و طرقها و شوارعها و تاريخها الطويل العريض , عملتها إزاي الحكايه دي ؟ والله انت عبقري يا جدع !!.

.

السؤال التاني للبرادعي

- كان عندك فريق كوره بيتكون من عبد المنصف في حراسة المرمى و حماده تسلخات في الدفاع و حسام غالي في النص و أبو شفطوره راس حربه , ليه بقى كنت مُصرّ دايما إنك تعمل خطتك للماتش بالشكل ده : بوفون في حراسة المرمى و روبرتو كارلوس في الدفاع و ميسي راس حربه ؟ ...حتى اسأل الواد اسمه ايه ده حرامي الولاعات , و بعدين يا راجل بقى تنسى حبيب قلبك السابق اللي هو أنا و ماتبعتش ليا تويته بمناسبة إني خلّصت ترخيص العربيه من مرور السلام ؟ ده الإنجاز اللي أنا عملته كان أهم من استقلال ناميبيا اللي خنقتنا بيه , اعتبرني ناميبيا يا أخي .

.

السؤال التالت لعلاء عبد الفتاح

- بعد كذا سنه من ( النضال ) و الجعجعه و الهتافات مش جه الوقت اللي تبطّل تخبّط فيه في الحِلل عالفاضيه و المليانه كأنك عنصر نشط من عناصر الفلزات ؟ انت محتاج تفقد إلكترون يا علاء عشان تهدى شويه و تتهد و تفهم الفرق بين المناضل الثورجي و بين مرتضى منصور ( لازم تفقد ديك أم الإلكترون ده فورا ) .

.

السؤال الرابع لجيش مصر العظيم

- بعد 4 سنين من الثورات و المظاهرات و الهد و المد و الشد والفرهده و دول بتتقسم و جيوش بتبيع القضيه , مخططات و مؤمرات و تهديدات و رشاوي بالمليارات , حدود مفتوحه عالبحري و إرهاب و سلاح و أجهزة مخابرات , إزاي قدرت تحافظ عالبلد دي بالشكل ده ؟ ما بعتش القضيه ليه زيك زي غيرك ؟ دي بركات الجنود و لّا بركاتك يا بهيه ؟ .. والله خير حافظاً و هو أرحم الراحمين .

.

( محمد حسين - منوع ) ( من 11 سبتمبر - 18 سبتمبر )

Mohamed Hussein

17 سبتمبر·

خناقه و عاركه تحت البيت لرب السما , بيستخدمو الرصاص الحي و الحجاره , كمية الحجاره اللي استخدموها في الخناقه تكفي لبناء هرم كده أد الهرم الأكبر , الراجل ماشي بالمدفع الرشاش في الشارع و سط الناس واللي شايل مسدس كأنه ماشي بكوز دره مشوي , ربنا يمسيك بالخير يا حبيب يا عادلي .

.

سبب الخناقه ايه بقى ؟ ماعرفش والله , احتمال يكون المعلم سنجه الجزّار بيتخانق مع المعلم كوع السباك , أو المعلمه نيللي بتاعة الخضار بتخلّص حقها من الواد فتيس سوّاق الميكروباس , و انا مال أهلي سبب الخناقه إيه ؟ المهم بس يكون سيادة اللواء محمد إبراهيم دهن مرهم الروماتيزم على ركبته قبل ما ينام , و ينام و هو راضي عن الشعب هو و بتوع حقوق الإنسان , ......... الحريه للمعلم سنجه , المعلمه نيللي على الأسفلت ‫#‏مكملين

Mohamed Hussein

17 سبتمبر·

نصيحة أب لإبنته

.

البت لمار بنتي الأوزعه دخلت المدرسه , أول يوم ليها النهارده في كي جي 1 , لبست اليونيفورم المدرسي وشالت الشنطه على ضهرها بمنتهى الحماس و الجديه فشر محمد أبو سويلم في فيلم الأرض

.

شوفي بقى يا لمار , من الأول كده عشان نبقى على نور يعني , لازم تفهمي إنك عشان توصلي لأولى جامعه هتفضلي تروحي المدرسه كل يوم لمدة حداشر قولي اتناشر سنه حسب وزير التعليم وقتها , أصلك مش واخده بالك , إحنا الحكومات عندنا بتروح و تيجي و تيجي و تروح عشان تعمل حاجتين اتنين مفيش غيرهم , تلغي ساتّه ابتدائي أو ترجّعها و تلغي التوقيت الصيفي أو ترجعه , و لو عرفتي كام حكومه عدّت علينا ( زي القطر ) في ال 40 سنه اللي فاتو هتعرفي احنا لغينا و اتلغينا و رجعنا كام مره .

.

معالي وزير التعليم بتاعكو الله يكون في عونه والله , بلد فيها 17 نوع مدارس والراجل يعمل إيه يعني ؟ ايشي حكومي على أزهري على تجريبي على تجريبي لغات على خاصه على خاصه لغات على انترناشونال أمريكي على انترناشونال بريطاني و حاجه كده شبه مغاره على بابا , فالراجل مشكور بيدخل الوزاره سنتين تلاته ولا حتى تسعه يادوب يعرف فيهم أنواع المدارس في مصر عشان لو مذيعه سألته في مؤتمر صحفي و لا حاجه .

.

جايز يكون الحل الجذري والنهائي لو جالنا وزير تعليم من شباب الثوره , وقتها ممكن كل مشاكل التعليم العويصه و المتراكمه دي تتحل , بس الأكيد إن الوزير لو كان من شباب الثوره فاحتمال كبير يخلّي الثانوي قبل ابتدائي , أهي غلاسه كده ( من باب خُلقنا لنعترض ) .

.

و لما ربنا يكرمك و تخلصي الحداشر اتناشر سنه دول هتدخلي الجامعه بقى و تبقى تعزمي صاحبك على نسكافيه في الكافتريا براحتك ( زي مانتي بتحلمي ) , و لما تخلصي الجامعه هتاخدي شهاده حلوه أوي , ابقى فكريني نعلّقها في النجفه , أصل الحكومات عندنا لها وجهة نظر تانيه خالص في الوظايف المرموقه , وانتي لا بنت طاهر القويري و لا بنت أخت فيفي عبده ولا تقربي لشيكابالا.

.

كل اللي من حقي أنا وانتي نطالب بيه الحكومه هو إننا نطلب منها يمنحو شهادات التخرج الجامعيه و في ديل الشهاده من تحت سلسله شكلها شيك ( لسهولة التعليق في النجفه ) .

.

يالله تعالي يا لمار , اقفي هنا عشان أصورك في أول يوم في المعركه الدراسيه صوره للذكرى ... ابتسمي بقى و قولي ( هنحارب ) , قصدي ابتسمي و قولي ( تشيس ) .

Mohamed Hussein

17 سبتمبر·

تاني مره أعمل لنفسي فيها نسكافيه من يوم ما جيت مصر , وفي المرتين بنسى و أحط ملح بدل السكر أه والله , و الصدمه بتبان مع أول شفطه , عايزه مني إيه يا مصر ؟

.

تصدقو بقى ؟ النابغي الذبياني لما شدّ مكتوب لأميمه وقال لها ( كليني لهمٍ يا أميمة ناصبِ ) كان وقتها مش طايق نفسه ولا طايق أميمه ولا طايق القبيله كلها عشان كان بيدوّر على شقه و بيرخّص عربيه في مرور السلام و بيقدم لبنته في المدرسه في نفس الوقت , ده غير إن المؤرخين كلهم أجمعو إن النابغه الذبياني كان زملكاوي .

Mohamed Hussein

16 سبتمبر·

بقالي أكتر من شهر بدوّر على شقه في مدينة نصر عشان أشتريها , وانا أساسا عندي فوبيا من الأماكن المرتفعه و الأدوار العاليه , يعني مثلا لما بقف في بلكونة الدور السادس أو السابع أو أكتر بحس إن البلكونه هتقع بيا , ولو ركزّت شويه في الشارع وانا فوق كده بدوخ , طبعا مراتي عارفه الحكايه دي , و عشان كده اللهم صل عالنبي من بين 70 شقه اتفرجنا عليهم , مراتي كانت دايما بتختار أدوار من التامن وانت طالع !!.

و عشان أحل المشكله دي , يبقى قدامي حل من اتنين مفيش غيرهم , الأول صعب أوي و هو إني أقنع مراتي إني بدوخ فعلا ومش بمثل و لا بتدلع , والتاني حل سهل خالص و هو إني أغيب يومين ( في البلد مثلا ) وارجع أقول لها إني روحت لدكتور ( أه دكتور بتاع فوبيا ) و اتعالجت من المشكله اللي عندي والموضوع قلب معايا عكسي تماما , يعني بقيت بعشق الأدوار العاليه ونفسي أسكن فوق برج الجزيره , ساعتها مراتي هتعجبها شقه أوّل بلكونه , وابقى عملت اللي انا عايزه و كفى الله المؤمنين شر القتال .

.

على الطرق السريعه والطرق اللي بين المحافظات هتلاقي لوحه مروريه كل 100 متر مكتوب عليها ( النقل التقيل يلزم اليمين ) , و عشان كده هتلاقي كل سواقين النقل التقيل والتريللات ماسكين الحاره الشمال !! .

.

و الحل بنفس الطريقه , إما إنك توقّف سواقين التريلات و تسحب منهم الرخصه و تصادر العربيه و تدخّل السواق السجن و تحط السيخ المحمي في صرصور ودنه بس ده حل صعب أوي , أما الحل السهل هو إنك تجيب 20 واحد خطّاط و تخليهم يلفو على اللوح المروريه في الطرق المصريه و يكتبوها كده ( النقل التقيل يلزم الشمال ) , وقتها سواق التريله هيشوف اللوحه و يحب إنه يخالف كعادته , وهيمسك الحاره اليمين , و نبقى عملنا اللي احنا عايزينه بمنتهى السهوله .

.

أصلك مش واخد بالك , الزوجه المصريه و سواقين التريلات بيحتاجو معامله خاصه .

Mohamed Hussein

15 سبتمبر·

بالنسبالي الرمز بيكون في الأدب والفن , في الإبداع بصفه عامه , يعني يبقى مثلك الأعلى جلال عامر أو نجيب محفوظ , يبقى رمزك و قدوتك الأدبيه أو الفنيه فلان .

لكن في السياسه مفيش رمز , فيه أشخاص مواقفها ممكن تصيب أو تخطئ , وانت نفسك مش صغير أوي للدرجادي , لك عقل و نظره للوضع السياسي فيها شوية مرونه عشان المتغيرات و الخبرات المكتسبه .

عشان كده بزعل من أصحابي ( الكبار أوي ) اللي بيصغرو نفسهم أوي و يتعلقو في بنطلون واحد زي علاء عبد الفتاح , كأن بنطلونه هو ستاير الكعبه !!.

................... بحس وقتها إن أدئهم FAKE , زي الستات اللي كانو بييجو عندنا في المياتم في الريف زمان , و تلاقي الست بتعيط أوي وتتشحتف و تصوت , ولو سألتها الميت إسمه إيه ؟ هتقولك والنبي ياخويا ماعرف .

.............. , و لما حد يقولك علاء عالأسفلت قول له باختصار : مممممممممم طيب ألف بركه ياخويا , استنى هتحزّم و اجيلك , إحنا زارنا النبي يا عم الحاج .

Mohamed Hussein

15 سبتمبر·

سهله أوي الحكايه , واحد يكون عاطل عن العمل , يقعد عالقهوه شويتين , ببدأ يزهق و يتخنق , يتحول تدريجي لواحد ناقم عالحياه , يسيب دقنه تطول عشان مكسّل يحلقها , يسيبها كمان شويه , فجأه يبص لنفسه في المرايا ( لأول مره من اسبوعين تلاته ) , اللهم صل عالنبي أنا دقني بقت كبيره أوي , أشتغل إمام جامع بقى أو شيخ زاويه , هوبااااا , خطبه في التانيه , المجتمع ده كافر و ابن حرام , انا مش لاقي حاجه اعملها في دنيتي أعمل لأخرتي بقى , يا سلام لو أموت شهيد , طب أموت شهيد إزاي ؟ تموت شهيد ازاي يا شيخ ؟ ممممممممم , أه لقيتها , أنا أروح أقتل عساكر الجيش المصري في الكماين في سينا أو عالحدود , و لما أبقى شهيد هدخل الفردوس الأعلى في الجنه ( أحسن ماقعد عالقهوه في الدنيا ) و هلاقي حور العين واقفين طوابير و كلهم ملكي ( بدل ما كان أخري أبص عالرايحه والجايه ) , و أكل و شرب ببلاش و زي الفل ( وفاكهةٌ مما يتخيرون ) .

........................................................

مع إن الليله دي كلها كانت تخلص بموس حلاقه بشلن , نداء عاجل : مطلوب من الحكومه توفير موس حلاقه لكل عاطل على كل قهوه , عشان الفردوس الأعلى مابقاش فيه مكان فاضي للشهداء العواطليه .

Mohamed Hussein

15 سبتمبر·

مسموح بالتحرش

.

في مصر أرض الكنانه مسموح بالتحرش , ماهو التحرش حضرتك مش بس معناه إن شاب صايع يخلّي بنت مزه معديه و يقول لها كلمتين مالهمش أي تلاتين لزمه بس على أد علامه و تربيته , و لا معناه شاب ضارب تلتين جدول المخدرات بتاع الصيدليه و يقرب من بنت و يلمسها من مكان حساس .

.

حاول تركّز , الموظف الحكومي المرتشي اللي فاتح الدرج بتاعه طول النهار ده بيتحرش بجيبك , و المسئول اللي سايب الشارع الفلاني و فيه بلاعه أد كده ممكن تكسر عربيه أو يقع فيها طفل صغير ده بيتحرش بعمرك و فلوسك و أطفالك , و المواطن اللي قرر إنه يفتح سوبر ماركت و اشترى المحل و خد معاه فوق البيعه نص الشارع عشان يحط تلاجته و كراتينه ده بيتحرش بالدوله و حق الطريق و بالناس و بالحكومه .

.

بالك إنت , سواق الميكروباس اللي بيقف بعربيته على مخرج الدايري و يقفل الطريق عشان يحمّل قدام الظابط و أمناء الشرطه ده مش بس بيتحرش بالحكومه , ده بيمسكها من مكان حساس .

.

سيادة الرئيس عبد الفتاح السيسي , أبصم لك بالعشره لو تحب , بس ياريس و انت مش عليك فواتير لحد يبقى مطلوب الفرم فورا , راس الموظف المرتشي و المسئول المهمل و سواق الميكروباس البلطجي لازم تتعلق على باب قصر الإتحاديه , و إلا نقفل مصر من كل المعابر و المنافذ و نعلنها ( محميه طبيعيه للمتحرشين ).

Mohamed Hussein

15 سبتمبر·

في مسرحية سكة السلامه 2000 للرائع محمد صبحي , الإتوبيس بتاع الرحله تاه و السواق اكتشف إن الركاب هما اللي نحسو الأتوبيس , الواد اللي مش على بعضه و الراجل اللي رايح يخون بلده و البنت اللي رايحه تبيع نفسها بأي تمن و الواد قرني , و الراجل اللي مسافر مع مرات صاحبه

أهو اتوبيسنا بتاع الزمالك تايه لنفس السبب , فريق بيدربه ميدو و بعدين حسام حسن و بيديره واحد سافل زي مرتضى منصور و بتحكمه أخلاق العوالم و مش بعيد تلاقي قرني ده عضو مجلس إدارة النادي , الإتوبيس ده لازم يتوه في الصحرا , منحوسين و ‫#‏مكملين .

Mohamed Hussein

14 سبتمبر·

يوسف القرضاوي : لا أقبل بمحاربة داعش فمن الخيبه أن يعادي الإنسان صديقه !!.

....

اللهم صل عالنبي , لا سحر ولا شعوذه , داعش صديقة يوسف القرضاوي ( زيزي صديقة الطلبه ) و بالتالي داعش صديقة قطر و الإخوان و من كام شهر طلب القرضاوي من أمريكا إنها تشن هجمات عسكريه ضد سوريا و مصر و ليبيا ( لوجه الله تعالى ) , يبقى كده حبل الصداقه بدأ بداعش و انتهى بأمريكا و طبعا الصهاينه ( الصديق الوفي ) , والعدو الوحيد ليوسف القرضاوي و أمثاله من أصحاب الدقون التايواني المضروبه هو الجيش المصري , أدي كل الحكايه باختصار من غير فزلكه كتير

, واللي مايشوفش من الغربال يبقى أعمى , و انت ؟ أيوه انت , هل دعيت بالخراب والدمار على جيش بلدك اليوم ؟!!.... ‫#‏غزوة ‫#‏المهابيل

Mohamed Hussein

13 سبتمبر·

مش صعبان عليا في الليله دي كلها إلا مرات وجدي غنيم ( ده لو كانت لسه عايشه ) , متشحططه وراه يا ولداه من مصر للسودان للبحرين للبنان لقطر لتركيا , و طبعا هي فاكره نفسها مرات أبو ذر الغفاري , و مش بعيد تكون فاكره وجدي غنيم ده نبي من أنبياء الله بس اتظلم و اسمه اتنسى في الكتب السماويه , و تلاميذ وجدي غنيم و بهاليله بيلفو وراه من هنا لهنا , و يوم ما مولاهم الشيخ وجدي يروح تل أبيب نفسها بتأشيره من الصهاينه و شقه و عربيه هيقعد في أي ساحه هناك و يخطب عن تحرير القدس من إيد الصهاينه و البهاليل هيهللو و يكبرو ( الللللللللللللللله أكبر ) .

.

صحيت من النوم لقيت صوره للقاء الخميسي ( عالريق كده ) , لابسه فستان القماش بتاعه مكفّاش حاجه قام الترزي كشف ضهرها كله , ويا عيني بقى عاللحم المعزاوي لما يتحرق في الشمسه , و من قدام الراجل النقّاش ضرب في وشها صفحتين جوتين , وعهد الله النقاش ده مابيفهم حاجه في الدوكو , و كده تبقى لقاء باقي لها سقف ساقط و شوية سبوتات و ماسورتين للتكييف و تبقى تشطيب لوكس , تصدقي إنك لما كنتي نص تشطيب ( يعني محاره و حلوق ) كنتي أحلى من كده .

.

الحل بقى إننا نجوّز لقاء الخميسي لوجدي غنيم ( عبد المنصف مش هيقول لأ ) , و تتشحطط وراه كده و نبقى ضربنا عصفورين بالجزمه .

Mohamed Hussein

13 سبتمبر·

مش مهتم أوي بحكاية طرد قيادات الإرهابيه من قطر , كل الحكايه إن أمريكا قررت تلمّ تعابينها مؤقتا عشان الحاوي اللي كان هيرقّص التعابين دي ( فشر الست سهير ) موجود عالساحه واسمه عبد الفتاح السيسي , أمريكا مش بسهوله هتضحي بشوية التعابين اللي بتاكل من وراهم عيش , هترميهم في أي جحر تاني و تسيبهم يبيضو و يفقسو حتى إشعار أخر ( إنسحاب تكتيكي ).

Mohamed Hussein

13 سبتمبر·

حتى إذا ضاقت عليكم الأرض بما رحبت

.

قطر تعلن ترحيل قيادات الإخوان من أراضيها , وجدي غنيم يغادر الأراضي القطريه و يعلن ( أرض الله واسعه ) !!

.

و هتفضلو كده , مشردين من أرض لأرض , النهارده في قطر و بكره في أمريكا و بعده في لندن , لحد ما ييجي عليكو يوم و ماتلاقوش بلد تلمكو غير الكيان الصهيوني نفسه , بس يارب ساعتها شباب الإخوان يبطّل أكل برسيم و يفهم أصول اللعبه و الكولجيه يطلعو مناخيرهم من كيس الكوله و يشمو هوا ربنا النضيف و مايقولوش فصيل وطني تاني .

........... انتهى الدرس يا غبي .

Mohamed Hussein

12 سبتمبر·

و هناك بقى هتلاقي الواد موس والواد سوسته و الواد سعيد ثبّتها , و كل الساده الأفاضل أعضاء مافيا مرور السلام , اللي بيقابلوك من أول الشارع و بأشكال مختلفه , من أول اللي بيبيع نماذج المرور لبتاع المناديل والمايه الساقعه للسماسره اللي بيترمو على عربيتك , وعالشباك بقى هتلاقي أستاذه سعاد , اللي رجّعت لي الملف مره عشان أكتب إقرار إني سلمت النمر في سفاجا مع إن الملف فيه شهادة بيانات من سفاجا بتقول كده , و مره رجعت لي الملف عشان قال إيه مفيش نمر في المرور !! , هو أنا برخّص العربيه في سيتي ستارز ؟ طب ممكن أروح أسأل عالنمر دي في التوحيد و النور ؟!.

بالك إنت , مدام سعاد دي لو حبستها في أوضه ضلمه هي والبيروقراطيه بس و كان الأوضه دي فيها كرسي واحد , وطبعا من باب الأدب والزوق هتقول حضرتك للبيروقراطيه إنها تقعد عالكرسي باعتبارها الأكبر في السن , روح انت مشوار بقى واشرب لك حجرين معسل عالقهوه اللي جنب المرور هترجع تلاقي مدام سعاد هي اللي قاعده عالكرسي , عشان هي من النوع اللي يقول للبيروقراطيه قومي وانا أقعد مكانك .

و في شأن صراع الأديان وصراع الحضارات وصراع في الوادي وصراع في الزريبه , اعتقادي أنا الشخصي إن العمليه بالنسبه لنا احنا المصريين عمليه تنظيميه مش أكتر , عشان لما نموت يبقى فيه عنبر للمصريين المسلمين المفحوتين و عنبر للمصريين المسيحيين المفحوتين و عنبر للمنايفه , وفي الأخر كل العنابر دي هتدخل الجنه , و محدش هيدخل النار غير الواد سوسته و الواد موس وسعيد ثبّتها , و طبعا مدام سعاد هتدخل جهنم من باب كبار الزوار , مع فرعون و هامان و البلتاجي و تامر هجرس و شوقي غريب .