Mohamed
Hussein
11
سبتمبر
لاعبي منتخب مصر
النهارده والماتش اللي فات فكروني بالسنه الهباب بتاعة حكم الإخوان , شويه لاعيبه جداد
قعدو يحلمو كذا سنه إنهم يلبسو فالنة المنتخب و يلعبو كوره بإسم المنتخب و لما جت لهم
الفرصه إنهم يلعبو اكتشفو إنهم مش عارفين الكوره بتتشاط إزاي ؟!
مصر محتاجه مدير
فني بخلفيه عسكريه , مدرب كوره برتبة عميد صاعقه , اللاعيبه دي لازم تاكل النجيله و
تزحف على بطنها عشان تعرف يعني إيه فالنة منتخب مصر مش منتخب أوكا و أورتيجا و شريف
مدكور و تامر هجرس .
Mohamed
Hussein
10 سبتمبر
إعمل حركة ضنك
, إعمل عجين الفلاحه أو اعمل حواجبك مش مهم , بس تعالى أقولك الأول يعني إيه مصر ؟
مصر باختصار ,
يعني تدخل سايبر في زقه و حاره من حواريها الساعه ا بالليل زي مانا داخل دلوأتي كده
, تلاقي السايبر بتاع 3 شباب سوريين , اتنين فيهم يقولو للتالت يالله بنقفل , يقول
لهم روحو انتو انا بقعد ساعه واقفل , طب اعطينا مصاري ما معنا مصاري , طب خدو 50 جنيه
أهي وانا بحصلكو .
مصر يعني البلد
اللي لما تكون فقيره أوي بتعرف تحضن العرب و مايخافوش أبدا في حواريها و لا تفرق معاهم
الساعه كام , مصر يعني الأمن ولا عزاء للخرفان والكولجيه , مصر يعني رغيف العيش اللي
بنعرف نقسمه بالنص مع الغريب لما يستجير بينا .
Mohamed
Hussein
9 سبتمبر
يااااااااااه أحمدك
يارب , أخيرا خدت الرخصه بتاعة العربيه و النِمَر من مرور السلام , في ستاشر يوم برخّص
عربيه , في ستتتتتتتاشر يوم ( على رأي السادات ) , وبقى معايا رخصه مصريه سارية المفعول
لمدة سنتين .
و انا كنت بفكر
بجديه أبيع العربيه دي بعد ما أرخصها , إنما بعد اللي شوفته في مرور السلام الإسبوعين
اللي فاتو هبقى أعرضها للبيع بالشكل ده :
.
للبيع , سياره
ماركة كذا ( معاها رخصه سنتين من مرور السلام ) , موديل سنه كذا ( معاها رخصه سنتين
من مرور السلام ) , مواصفات خليجي ( بس الأهم إن معاها رخصه سنتين من مرور السلام
) ...سعر السياره 5 جنيهات فقط لا غير و سعر الرخصه و النمر 135 ألف جنيه ماينقصوش
مليم ( أيوه زي القفص و الفرخه بتوع لينا ) .
Mohamed
Hussein
9 سبتمبر
في شارع كبير أوي
و واسع و مالوش أول من أخر , و كان فيه حمار مربوط في عربيه كارو , الحمار قرر فجأه
إنه يقف في نص الشارع بالعرض و قال إيه عجبته أوي لوحه على محل مكتوب عليها ( المظاهرات
هي الحل و جنبها 52 نجمه ) , اللوحه شكلها زاهي و يشد العين فعلا , الشارع وقف شويه
بسبب الحمار و الناس اللي رايح واللي جاي حالهم اتوقف , كلاكسات من كل ناحيه و الحمار
مش سامع أو مش فاهم , الخروف اللي سايق الحمار كعادته جِبلّه و بارد , فرحان و عاجبه
قفلة الشارع دي , و كل شويه يوطي على ودن الحمار و يوشوشه و يوعده إنهم هيقسمو وجبة
البرسيم سوا بالنص ( مشاركه لا مغالبه ... كالعاده اه و النعمه ) , الحمار يبتسم و
يفرح بتشجيع الخروف له .
أدي كل الحكايه
, ألاف المصريين نزلو و وقفو طوابير و اشترو شهادات الإستثمار بتاعة قناة السويس الجديده
, ناس داخله و ناس طالعه ( وصلنا 20 مليار في 3 أيام ) , و قالك يا سيدي : فلان يعلن
الإضراب عن الطعام تضامنا مع علّان و ترتان اللي أضربو عن الطعام بسبب قانون التظاهر
, و بكره الخبر ينزل على شبكة رصد ( مشاركه لا مغالبه .. يعني البرسيم بالنص ) .
Mohamed
Hussein
7 سبتمبر
اللهم صل عالنبي
, وصلنا ل 14.5 مليار جنيه في شهادات استثمار قناة السويس الجديده ( في يومين ) , هنتجاوز
الرقم المطلوب خلال إسبوع بالكتير , و ده يبقى الدرس التاني من الشعب المصري للكولجي
المثقف العميق بتاع ( الفنكوش و الترماي ) , الدرس الأول كان في الإقبال على التصويت
في الدستور الأخير و انتخابات الرئاسه و النزول للشوارع والميادين و يوميها الكولجي
ماستوعبش الدرس و قال ( جيل عرّه ..شعب عبيد ) .
وفي كل مره و مع
كل درس و قلم يبقى الوضع على ما هو عليه ( الشعب بيتحرك لقدام و بيبني بلده بصبر أيوب
و الخروف أبو دقن بيركب الحمار المثقف و يقول له شي يا حمار و حا .
Mohamed
Hussein
7 سبتمبر
حقيقه أكدتها لنا
ال سنين اللي فاتت , مصر مفهاش حياه حزبيه ولا نيابيه , و أغلب الشعب مايعرفش الفرق
بين دور عضو البرلمان و دور الوزير مثلا أو شيخ الغفر , كتير مننا لسه فاهم ان عضو
البرلمان الناجح هو اللي يعرف يوظّف ابن اخته أو يجيب للقريه الفلانيه معهد ديني أو
ماسورتين صرف صحي , الأغرب إن أعضاء البرلمان نفسهم مش بيبقو عارفين دورهم إيه .
.
و لحد ما يظهر
في مصر جيل مثقف و واعي بجد , جيل لا ينخدع بشعارات الوطنيه ( نتفانى من أجل هذا الوطن
) و لا بشعارات الدين ( الإسلام هو الحل ) هيفضل أي برلمان ييجي لمصر مجرد تكمله للشكل
الإجتماعي , يعني تقدر تقول الفازه اللي بتتحط جنب كرسي الفوتيه أو طقم الكاسات والجيلي
اللي بيتحط في النيش .
و المفروض يكتبو
على بوابة مجلس الشعب من بره (برلمان مصر الموقّر و عقبال عندك يا ست أم فاروق ) .
Mohamed
Hussein
6 سبتمبر
البت لمار بنتي
أم 4 سنين كانت طيبه أوي و وديعه كده و رقيقه زي النسمه و سو كيوت و خجوله جدا و بتخاف
من خيالها , يعني من الأخر كانت فشر عمرو حمزاوي و شريف مدكور ....و بعد شهرين يا مؤمن
في مصر , هما شهرين , قالت لمامتها عايزه أدخل الحمام , مامتها قالت لها بس المايه
قاطعه , لمار رفعت إديها لفوق وقالت : الله يخرب بيت أم المايه عاللي جابو المايه
!!.
يرضيك كده يا عم
الحاج إبراهيم أبو محلب ؟ يرضيكي يا حكومه ؟ بنتي الكيوت الطيبه باقي لها شهر كمان
و تشيل سنجه في جيب البامبرز .
Mohamed
Hussein
6 سبتمبر
يحدث في مصر
.
الحكايه باختصار
لو سيئاتك و ذنوبك
كتير و عايز تكّفر عنها و ترجع كيوم ولدتك أمك هيبقى قدامك طريق من اتنين مفيش غيرهم
إما إنك تجهّز
لك بتاع 30 قول 40 ألف و تركب الناقه و تشرخ على مكه و تحج لبيت الله الحرام
لو مش معاك 30
ألف يبقى مش قدامك غير إنك تروح ترخّص عربيه جديده في مرور السلام , ماتقلقش هما هيكفّرو
سيئاتك و سيئات اللي خلفوك وترجع كيوم ولدتك أمك .
المفروض اللي رايح
المرور ده لما يرجع من هناك ( ده لو رجع يعني ) يلاقي ولاده راسمين له على حيطة البيت
من بره جمل و سفينه و موتوسيكل و يكتبو له حج مبرور يا حاج .
.. أنا كده أبقى
حجيت مرتين اللهم لك الحمد , مره في مكه و مره في مرور السلام !! .
Mohamed
Hussein
5 سبتمبر
و انا مغمض عيني
كده و من غير ماشوف ولا أتابع هبقى برضه متأكد إن الجزيره عامله مناحه على مشروع قناة
السويس الجديده و أكيد تكون جايبه خبراء استراتيجيين ولا مؤاخذه يثبتو بالدليل القاطع
إن المشروع فاشل و إن مصر مفهاش قناة سويس قديمه عشان يبقى فيها قناه جديده , واحتمال
يقولو مصر فيها قناة سويس قديمه بس اللي حفرها مش المصريين , دول كانو مخلوقات فضائيه
أو حفرها بنو إسرائيل.
و معنا للتعليق
و التحليل الأستاذ الدكتور المهندس العجلاتي سابقا سيد أبو شفطوره , شف طووووووره
!!..
.الغريبه بقى بس
مش غريبه أوي بالنسبالي إنك هتلاقي صاحبك المثقف العميق ( العمييييييييييق ) بتاع
#عبث و #تخرصات بيكرر نفس كلام الجزيره ,مش متفاجئ من رأي أصدقائي المثقفين الجامدين
المُقعرين , مانا ياما حذرت من انتشار ظاهرة المثقف الحمار في مصر ( كمثلِ الحمارِ
يحملُ أسفارا ) .
Mohamed
Hussein
5 سبتمبر
من سنه تقريبا
كتبت بوست عن استغلال مدخرات المصريين في بناء مصر من جديد , بس مش استغلال من باب
تبرعو لبناء مصر ولا هي شحاته و لمّ معونات , قلت إن بناء مصر بأموال المصريين له أصوله
, و كانت فكرتي بتقول الدوله تبيع قطع أراضي كبيره من الصحراء المصريه للشعب المصري
( بغرض الزراعه ) وقطع أراضي في مدن جديده بغرض ( البناء ) و تاخد الدوله كل ضماناتها
بإتمام الزراعه والبناء و يبقى موعد التسليم بعد سنتين تلاته لكن المواطن هياخد صك
ملكيه من دلوأتي .
.
كانت فكره لاستثمار
أموال و مدخرات المصريين بطريقه محترمه , ومدخراتنا كشعب كبيره أوي ( اعتقادي أكتر
من تريليون جنيه بكتير ) .
عشان كده رفضت
فكرت و مبدأ ( تبرّعو ) و قلت إنها فكره فاشله و مش هتبني كشك سجاير ( مش دوله بحجم
مصر ) , و موافق جدا على مشروع قناة السويس , شهادات استثمار و بتاخد من الناس مدخراتها
بأصول و فايده مشتركه بين الشعب والوطن .
.
.. 3.5 مليار جنيه
مبيعات شهادات الإستثمار في أول يوم , الشعب هيغطّي تماما تكلفه المشروع خلال أيام
, و لا الحوجه لولاد الكلب ( هما عارفين نفسهم ).
Mohamed
Hussein
5 سبتمبر
مصر الطيبه
.
غُلبت أصالح في
روحي , على رأي الست أم كلثوم , و أطبطب على نفسي و أقول لها معلش استحملي , إيه يعني
مشوار أد كده عشان أسلّم لوح العربيه ؟ , ايه يعني يومين في الطريق عشان أجيب حتة ورقه
مالهاش أي تلاتين لزمه ؟ , وكل مره ألاقي نفسي بتقولي : لا يا محمد , ده كتير أوي
, كده كتير بجد , مع إني سافرت في سوبرجيت مكيف و رجعت في عربيه ملاكي مع صديق عزيز
.
بس و لو , طول
الطريق وانا راجع عمّال ألعن في البلد و الظروف و البيروقراطيه و اللي و اللي , مش
ممكن أبدا , دي عيشه دي ؟ حر و زحمه و خنقه و قرف , دانا حتى عمري ما لقيت ركنه للعربيه
قدام سيتي ستارز .
.
و في لحظه كده
و انا ماشي في الطريق دخلنا على محجر أنا و صاحبي , و هناك شوفت العمال بتوع المحاجر
عايشين إزاي في الصحرا , ولاد مصر الشداد اللي إديهم خشنه و أدواتهم الشاكوش والدريل
و الحفّار و الأجنه , مش الفيس بوك و ريموت التكييف و الجالاكسي , أكيد أكيد العُمّال
دول مش بيشتكو من قطع الكهربا عشان مفيش بيت ولا 4 حيطان ملمومين جواهم و لا لمبة نور
حتى , و من المؤكد إن قطع المايه مالوش أي تأثير عشان مفيش حمّام , العامل ابتسم لي
وسألني ( معاك سجاير ؟ ) , إديت له سجاير وانا بحقد عليه عشان شايفه فرحان أوي و مبتسم
, إبن الذين ده مبتسم و متفائل كده ليه ؟ تلاقيه بيعرف يلاقي ركنه لعربيته بسهوله قدام
سيتي ستارز !!.
ليست هناك تعليقات:
إرسال تعليق