Mohamed
Hussein
28
مايو 2015·
طب من غير حلفان
و ما ليكو عليا يمين , وانا صغير كان الراجل اللي بيجيب لي شهادة المدرسه بتاعة أخر
السنه (عم حسن الفراش ) بياخد 2 جنيه ( حلاوه يعني ) , كل سنه كده اعمل حسابي على
2 جنيه و اخد منه الشهاده و اطلع اجري عالبيت .
.
النهارده روحت
اجيب شهادة لوجي من مدرستها , المهم مالقيتشي هناك الفراش اللي بيوزع الشهادات زي زمان
, أصلا ماعندهمشي فراشين عندهم مدرسين بس و شوية بنات مزز منتشرين في كل مكان , قالو
لي الشهادات في الرسيبشن عند البنات , روحت الرسيبشن قامو بصو في كشف كده , قالو لي
لا شهادة لوجي عند المديره , تقريبا و الله اعلم المديره هي الي بتسلم شهادات الأوائل
.
.
طلعت انا للمديره
بقى و هي بتديني الشهاده و بتقولي ألف مبروك و هي مبتسمه كده قمت انا افتكرت عم حسن
و كنت هطلّع من جيبي ال 2 جنيه اياهم و اديهم لها ( هذا ما وجدنا عليه أباؤنا ) , بس
رجعت في كلامي و قلت لنفسي لا ياد بدل ما المديره تطمع فينا بعد كده .
..............................................................................................................................
Mohamed
Hussein
28
مايو 2015·
الحمد لله , لوجي
نجحت ( تانيه ابتدائي ) , طلعت الأولى عالفصل و التالته عالمدرسه , جابت 99% تقريبا
.
.
يارب احفظ بناتي
, هما عصايَ أتوكأُ عليها .
.......................................................................................................................
Mohamed
Hussein
28
مايو 2015·
نضّف الجمجمه و
خلي دماغك xxl عشان تفهم الأخبار دي و تعرف
أم كوكب الأرض ماشي ازاي , لو فهمت مش هتتحمق ولا هتاخد كل حاجه على صدرك .
.
1- بوتين : واشنطن
تتدخل في شئون الفيفا لسحب تنظيم كاس العالم من روسيا .
2- و يكيبيديا
يحذف فضائح لنواب بريطانيين قبل الإنتخابات .
3- أمريكا تضغط
لمنع المقترح المصري بجعل منطقة الشرق الأوسط خاليه من أسلحة الدمار الشامل .
.
و طبعا الأمم المتحده
و الراجل بتاعها اللي وظيفته إنه بيشعر بالقلق رفضو ألف طلب قبل كده لإدانة الكيان
الصهيوني .
.
ركّز بقى و انا
هقولك :
تقولي جوجل تقولي
يوتيوب تقولي ويكيبيديا تقولي مجلس الأمن و الأمم المتحده و الفيفا و الواشنطن بوست
و كل الميديا الغربيه و تكتب جنبهم كلمة fair
هقولك انت خساره فيك صباع الطباشير أبو بريزه اللي اتعلمت بيه .
.
التلاعب بينا و
فينا بيبدأ من أعلى الرأس حتى أخمص القدمين , مفيش حاجه عادله و أم الشعارات اللي بتسمعها
في أمريكا بتاعة الحريه و العداله دي هي عدّة الشغل زيها بالظبط زي الدقن و السبحه
و أغاني تحرير القدس بتوع الإخوانجي .
.
في لحظه معينه
هتلاقي محرك البحث جوجل بيبحث على مزاج أجهزة المخابرات الأمريكيه يعني يديك اللي هما
عايزينك تاخده ( يبقى تاخد وانت ساكت ) , و في لحظه معينه هتلاقي الفيديوهات على يوتيوب
بتوجهك لسكه معينه و في لحظه و هتلاقي ويكيبيديا ( التأريخ ) ناشر لك تقرير عن 30 يونيو
انه انقلاب عسكري و لو بتسمع الكلام يبقى نرزعك تقرير انه ثوره شعبيه ضد نظام فاشي
قمعي , و في لحظه معينه هتلاقي الفيفا و مجلس الأمن و الأمم المتحده و حتى الإتحاد
الأوروبي مجرد عرايس في إيد الخواجه الأمريكي يمنحك خيرهم أو يمنعه .
.
ابقى كلمني عن
منظمات حقوق الإنسان و عن شعارات الشفافيه و النضافه و عن تقارير المنظمات الدوليه
العادله يوم 31 فبراير الجاي ...ده التاريخ الوحيد اللي هسمع فيه كلامك بتركيز و أقولك
صح ....هستناك يوميها بقى .
.......................................................................................................................................
Mohamed
Hussein
27
مايو 2015·
غضب ربنا !!!!
.
.
بالمناسبه يا شباب
, لا الموجه الحاره هي غضب من ربنا ولا شوية المطر اللي ممكن ينزلو مع اي عاصفه رمليه
هما رحمه من ربنا .
.
و ربنا المعبود
دي ظواهر جغرافيه طبيعيه , لها علاقه بدوران الأرض حول الشمس و ارتفاعك و انخفاضك عن
سطح البحر و حركة الرياح و وجود سحاب و ظاهرة البخر و الإحتباس الحراري و معدل نمو
الشعر في صدر تامر حسني و ليله كده ( أنا نفسي بفهمها طشاش ) , حتى إن واحد من أحدث
الأسلحه في العالم حاليا بيعتمد في الأساس على فهم واعي لجغرافية و مناخ الدول و التلاعب
فيها باسلوب علمي .
و لا انتو عايزين
تفهموني ان ربنا بيغضب علينا اوي في الصيف و بيرضى عننا في الشتا لدرجة التكتكه ؟!!
.
.
بالمناسبه كمان
, مش المستشرقين و الكفار و و البوذيين و المنفلوطيين هما أكتر ناس بيهينو الإسلام
و بيتطاولو على رب العزه , إنتو أكتر ناس بتعملو كده , لما تصنفو كل حاجه في الدنيا
بمنتهى السذاجه على إنها غضب ربنا و رضاه .
.
و أكتر حاجه تشلني
يا جدع لما يحصل زلزال في اليابان و صاحبك يقولك ده غضب ربنا و لما نفس الزلزال يحصل
عندنا يبقى ربنا بيختبر ايمانا و صبرنا عشان المؤمن مبتلى هيييييييييييح !!.
.
إلا قولو لي صحيح
هو ربنا راضي أكتر عن العربيه الكورولا ولا الفولكس واجن ؟ أصل الموضوع ده محيرني شويه
, وانا كإنسان مسلم لازم أتحرى رضا ربنا في ماركة العربيات قبل ماشتري , و انت , أيوه
انت , مش ناوي تيجي تتحرّى معايا ولا هتسيبني أتحرى لوحدي كده ؟.
.....................................................................................................................................
Mohamed
Hussein
27
مايو 2015·
نارُ اللهِ الموقده
.
طب درجة الحراره
توصل 50 أوكيه , السما نلاقيها صفره و حمره زي لون البيض في شم النسيم ماشي , رياح
و رمل و أزايز مايه و صفايح سمنه فاضيه و فالنات بتطير مايجراش حاجه , إنما ازاي تمطر
في وقت زي كده بقى ؟ الدنيا مطرت وانا بره لمدة 3 ثواني !! زخّة مطر سريعه جدا , كأن
واحد قاعد فوق سحابه و كان بيستحمى و بعدين دلق طشت المايه اللي كان بيستحمى فيه على
دماغنا مش اكتر من كده ...على العموم نعيما يا سيدي , ماهي كانت ناقصاك .
..................................................................................................................................
Mohamed
Hussein
27
مايو 2015·
قواعد و بروتوكولات
المرور في مدينة نصر
.
و حيث إن أغلب
اللي سايقين عربيات في مدينة نصر هما بنات و ستات فلازم و حتما تتبع قواعد المرور الخاصه
جدا
.
1- سيب مسافه بينك
و بين عربيتها 2 كيلو عالأقل .
.
2- لو هي مديه
إشاره يمين أو شمال ماتاخدشي على كلامها ( يعني ولا كأنك شايف حاجه ) , هي أحيانا بتبقى
مكّاره زي السادات كده , بتدي اشاره يمين و تدخل شمال عادي يعني .
.
3- لو وصلتو لتقاطع
وقدامكو اختيار شارع من اتنين , سيبها هي تختار شارع وانت ادخل في الشارع التالت
!! .
.
4- لو حصل يعني
و هي فرملت فجأه جدا عشان كان فيه صرصار احتمال يعدي من قدام العربيه و طبعا انت رشقت
فيها من ورا و عربيتك اتدمرت قوم نازل و حاول تبقى هادي و ريلاكس و سيبك من العربيتين
خالص , المهم أوعدها انك هتاخد الصرصار ده و تعالجه نفسيا و تتبناه .
................................................................................................................................
Mohamed
Hussein
26
مايو 2015·
فايزر فايزر يا
يهود
.
من سنين طويله
و شركة فايزر الأمريكيه بتشتغل في مجال الأدويه , معامل أبحاث عالميه و استثمارات تعادل
ميزانية دول , صنعت شركة فايزر أدويه كتيره جدا و سوقتها في كل مكان في العالم , بس
تسأل أي حد مصري أو عربي ( مش صيدلي ولا طبيب ) عن إسم فايزر يقولك يعني ايه يا بيه
؟ اوعى تكون بتشتمني بالإنجليزي ؟
.
لحد ما جه اليوم
و فرخة فايزر باضت لهم بيضه دهب , الأمريكان الفايزريون وصلو لمصباح علاء الدين و
( دعكو ) الفانوس فطلع لهم عقار الفياجرا , و من يوميها يا بيه و اسم فايزر بين العرب
بقى أشهر من إسم اللبّان , أي مواطن عربي تقوله فايزر ؟ يقوم يقولك طبعا عارفها , هو
فيه زي فايزر و جمالها , حتى الناس بطّلت تقول فياجرا , من شويه دخل لي واحد و قالي
عايز حباية فايزر 50 .
.
بعد الصيت اللي
زي الطبل ده يتهيألي شركة فايزر لو عملت دوا جديد للمغص أو حتى للهرش و( الحكه ) و
عايز حضرتك تقنع مريض بالدوا ده ماتقولوش أي حاجه غير ان الدوا ده بتاع فايزر , هتلاقي
وشّه نور كده و زنهر و قالك : طالما فايزر يبقى ( جامد ) !!.
.
طب ليه بقى المصريين
و العرب هما أكتر ناس بيستخدمو الفياجرا و أكتر ناس عملو الحس و الصيت ده للحاج فايزر
الكبير ؟ الحكايه ببساطه اسمها لايف ستايل , مش بس تلوث و لا أكل مش صحى ولا مايه فيها
منجنيز , ده اسلوب حياه سيادتك , من المهد إلى اللحد , تلاقينا شايلين الهم حتى لو
مفيش هم نشيله بنروح نشيل الهم بتاع الجيران , و تلاقي الواحد فينا عايز ينزل من عربيته
أو من الأتوبيس قدام باب الشقه بالظبط , عشان مش بيحب يمشي ( و لا يمشي بيحبه ).
.
و لحد ما يوصل
الشاب العربي و الفتاه العربيه إلى الى قمة منحنى الفشل بتاع اللايف ستايل و ده بيحصل
بعد الجواز باسبوعين , كل واحد يكون اتعبّى من صحابه و الشله و امه و جوز خالته عن
الطريقه المثلى اللي تخنق بيها مراتك , و كل بنت تكون حفظت عن ظهر قلب حكاية ( كيف
تجعلين أوجاع زوجك كسرب حمامٍ من بغداد إلى الصين ) .
.
و بس بقى , هنا
فايزر تدخل بتقلها و تدعك الفانوس , و تبيع و احنا نبلبع , هي تغتني يا مؤمن و احنا
نكمل دورة حياة المواطن العربي النموذجيه .
..................................................................................................................................
Mohamed
Hussein
26
مايو 2015·
بكره درجة الحراره
هتبقى 53 , بيقولك بقى إن درجة الحراره في رمضان هتوصل ل بتاع 75 درجه بالمستريح ,
و إننا هنصوم 45 ساعه في اليوم , كل سنه واحنا طيبين يا رجاله ( يعني الله يرحمنا
) , اللهم بلّغنا شهر شوال !!.
.....................................................................................................................................
Mohamed
Hussein
26
مايو 2015·
فورين بوليسي
: الشرق الأوسط بحاجه إلى ديكتاتوريه أو إستعمار جديد !! .
.
تفاصيل الخبر
: وأوضح الكاتب أن دول مثل مصر والمغرب وتونس على عكس دول أخرى فى المنطقة عرفت حضارة
قديمة قدست السلطة المركزية، الأمر الذى حال اليوم دون سقوط مفهوم الدولة بين شعوب
تلك البلدان، عكس دول أخرى وصفها الكاتب بالاصطناعية وغير الحقيقية مثل العراق وسوريا
وليبيا، واليمن الذى رغم قدم حضارته الموغلة فى القدم لم يعرف الاستقرار والحياة أسفل
سلطة مركزية نتيجة لطبيعته الجغرافية ذات التضاريس الوعرة.
.
تحليل الخبر بقى
:
.
1 - الكاتب الهمام
بتاع فورين بوليسي بيروج للإمبراطوريه الفارسيه باعتبارها الغوله أم عين حمره اللي
عشان توقفها عند حدها لازم كل دول المنطقه تبقى ايد واحده و إلا هنروح في شربة مايه
يا ولداه .
.
- لما كاتب يقول
عالعراق و سوريا دول اصطناعيه و ماتعرفشي سلطه مركزيه يبقى فورين بوليسي زيها زي اليوم
السابع و المصري اليوم و جريدة أخبار سوق ستّوته بيشتغل فيها صحفيين بدرجة حمار صحفى
أد الدنيا , يعني مش كل حاجه بتتكتب لكو بالإنجليزي تقروها على أساس ان اللي كاتبها
واد عبقري و مثقف فحت , لا ممكن يبقى حمار أمريكاني عادي يعني دونكي .
.
- كل الحكايه بتاعة
الشرق الأوسط بتختصر في حاجتين , إن الدول اللي اتفككت و اتبهدلت فيها بجانب الديكتاتوريات
مذاهب و طوائف لعبت عليهم أمريكا و ايران على مدار عشرات السنين و مولتهم بالسلاح و
الفكر المتخلف , يعني صنعت البلطجي على إديها .
- الحاجه التانيه
إن مصر كمان فيها تنوع طائفي أوسخ من سوريا و العراق , فيها معقل لتنظيم وثني لا يعرف
دوله ولا حدود ولا تراب ولا علم و لا حرمة دم , بس فيها جيش اسمه جيش مصر , جيش مصر
و الله خير الحافظين ( عندك جُرأه تكتب كده يا حمار الإنجليز و الأمريكان ؟! ).
................................................................................................................................
Mohamed
Hussein
25
مايو 2015·
يوميات مواطن في
مرور السلام .......... سجده للمولى
.
- و سأل أحدهم
مولانا الشيخ و قال له يا شيخنا : فهل ترى أن تجديد رخصه في مرور السلام تعادل في الأجر
و الفضل أجر عُمره في شهر أغسطس ببركاته و نفحاته ؟! قال الشيخ نعم يا بني أينعم .
.
طب تعالو نحسبها
بالورقه و القلم و شوف أعمال الخير اللي هتعملها في مرور السلام لحد ما تطلع بالسلامه
( ده لو طلعت من هناك ) :
.
- أبله سهام الموظفه
هتقولك لك اتحرك كده من قدام الشباك عشان شكلك مش عاجبني و ريحتك مش حلوه ( هي طبعا
الاورجانزا طافحه على جتتها ) , و حضرتك هتتحرك و تصبر و تحتسب و تكتم غيظك , أجر ده
ولا مش اجر ؟
.
- لما تفتح علبة
سجايرك و انت داخل المرور و لما تيجي طالع تلاقيك بتسحب أخر سجاره , يعني شربت علبة
سجاير كامله على لحم بطنك أهو , و غالبا في اللحظه دي هتكره السجاير و اللي صنعها و
هتبطل تدخين , طب فيه خير أكتر من كده ؟!.
.
- بعد ما تجدد
رخصتك و تطلع تقعد في العربيه دقيقتين و تسترجع شريط اليوم من أوله و تفتكر انك هتتعك
العكه دي كل سنه ولا اتنين غالبا هتاخد قرار بانك تبيع العربيه و ترجع تتشعلق في الأتوبيسات
و تعيش معاناة المواطن الغلبان , و تبقى بتنفذ حديث سيدنا النبي ( اخشوشنو فإن النعمة
لا تدوم ) .
.
- كل ما هتخلص
من شباك جوه المرور هتحس إنك اتكتب لك عمر جديد أو جبت جون زي بتاع مجدي عبد الغني
في كاس العالم , و لا اراديا كده هتلاقي نفسك بتسجد سجده للمولى , و شوف بقى هتسجد
كام مره في اليوم ده ( ما تنساش تاخد السجّاده معاك ) .
.
- و لما تحط في
إيد كل موظف عشره قول عشرين جنيه و ترسم ابتسامه حانيه على شفاه الموظفين و ذويهم
, يا سيدي اعتبرها زكاه عن صحتك و عافيتك , و على فكره بقى لو بترخّص عربيه جديده في
مرور السلام تحديدا هتلاقي نفسك لا إراديا بتزكّي عن صحتك لمدة 75 سنه جايين .
....................................................................................................................................
Mohamed
Hussein
25
مايو 2015·
كنت هكتب بوست
ساخر من نوع ( خِنْجرٌ أنتَ في الضلوع ) عن وحدة مرور السلام , كنت هكتبه و السلام
, بس الحقيقه استوقفني بوست عند أحد الأصدقاء هو عباره عن سؤال : ماذا سيفعل الجيش
المصري لو قامت اسرائيل بهدم المسجد الأقصى ؟!! .
........... خلص
البوست بتاع صديقي
و هو يبدو في الشكل
بوست عميق و مكار و مثقف و جوّاني مع إن اجابته النموذجيه اللي مستنيها صاحب البوست
هي دي : هيعمل ملوخيه ( ضحكات رقيعه ) , هيعمل حواجبه نياهاهاها , هيعمل من بنها إهئ
إهئ إهي ...ممممممم و كده يعني , أهو بوست و ردوده النموذجيه زي سلامو عليكو عليكو
السلام !! .
.
و ربما يشعر صاحب
البوست بالفخر و الفخار و الإنفخار و الفخرره من بوسته العميق و ربما يشعر أصحابه بإنهم
مثقفين فحت و دمهم خفيف من ردودهم اللي تفطس من الضحك , مش قادر يا ناس هموت من الضحك
, أنا هقع و مسخسخ الحقوني و كده يعني .
و شوية تعليقات
ساذجه من اللي بتنتزع الأهات من نوعية : أنا بس عايز اقول هي القدس هانت علينا للدرجادي
؟ هيييييييييييييح .
.
مع إن الإجابه
اللي مش هتعجب صاحبي بتقول باختصار : ان مفيش جيش عربي حارب عشان خاطر أم القضيه الفلسطينيه
و قدم ألاف الشهداء غير جيش مصر ولا فيه جيش هيحارب عشان خاطر أم نفس القضيه غير جيش
مصر برضه .
.
و لو أنا رئيس
مصر مش هدخل حرب و احارب امريكا و الصهاينه قبل ماعرف الإجابه عن السؤالين دول : هما
الفلسطينيين وبتوع حماس هيحاربو الصهاينه لو هدمو المسجد الأقصى ؟ و لو مصر دخلت الحرب
دي حماس هتحارب مع مين ضد مين ؟!!.
.
و لصديقي الغالي
اتمنى تقرا البوست ده قبل ماعمل لمعاليك بلوك , مع خالص تمنياتي بمزيد من العمق الفلسفي
الأقحواني و الصعبانيات و الكربلائيات , هتوحشني يا غالي و ابقى سلم لي على قدس أم
القضيه الفلسطينيه .
......................................................................................................................................
Mohamed
Hussein
25
مايو 2015·
داعش تبيع الأثار
المنهوبه من سوريا و العراق لإسرائيل !! .
.
شوفتو بقى دولة
الخلافه و جمالها ؟ إحنا ندمر أثار و حضاره عمرها ألاف السنين و نحرم بلادنا و أجيال
جايه من بعدنا من عشرات المليارات هيدفعها السياح , و ناخد اللي نعرف ناخده من الأثار
اللي هي رجس من عمل الشيطان دي و نبيعها للصهاينه الكفره ولاد الحرام و نجيب من الصهاينه
الفلوس و نشتري بيها سلاح من أمريكا بنت الحرام ( و ناخد بالباقي حشيش ) , و ناخد الأسلحه
نقتل بيها أهلنا المسالمين و الحشيش نشربه , و كده نبقى رفعنا راية الجهاد و أقمنا
دولة الخلافه و نجيب بقى واحد كده يكون صايع أو عاطل عن العمل أو صبي مكوجي و نعلنه
الخليفه .
.
خد ياض انت تعالى
هنا , انت بتشتغل ايه ياض ؟ و رايح فين بالبتاعه دي ؟ شكلك مش غريب عليا , مش انت ياض
اللي كنت بتيجي تلم المكوه من العماره عندنا ؟ أيوه يا باشا بس ده كان زمان , أنا دلوأتي
بشتغل خليفة المسلمين و رايح ابيع حتة الرجس دي للصهاينه ولاد الحرام , بقولك ايه يا
باشا : ما تشتري منِّي حتة رجس شيطاني بس رجس أصلي و الله , حد الله بينا و بين التقليد
و الغش .
.................................................................................................................................
Mohamed
Hussein
24
مايو 2015·
مش مهم تكون دكتور
بيطري عشان تفهم اللي بيحصل في مصر من 4 سنين , تعالو نتكلم كفنيين و أحكي لكو الحكايه
:
.
- كان فيه مره
شاب حمار ( له ديل ) و شاب خروف ( له دقن ) اتصاحبو على بعض , شويه شويه و اتوطدت العلاقه
بين الحمار أبو ديل و الخروف أبو دقن لحد ما وصلو ل (حَجَر ) كبير , الخروف وقف و قال
للحمار : بقولك ايه يا صاحبي , ما تيجي تقف جنب الحجر ده , الحمار قال له ليه يا خروف
يا صاحبي ؟ الخروف قال له تعالى بس واحنا من امتى بينا الأسئله دي ؟ الحمار ( فكّر
) شويه كده وقال صحيح , و احنا من امتى بنسأل الأسئله دي , الحمار وقف جنب الحجر و
الخروف طلع عالحجر و نط على ضهر الحمار , الحمار في الأول هاج و ماج و إزاي يا خروف
تعمل كده ؟ هو عشان انا صاحبك تركبني يا جدع ؟ ما يصحش كده , بس عموما أنا مش هزعلك
, هو انا يعني هرّكب على ضهري اللي أعز منك ؟! الخروف همس في ودن الحمار و قال له
: هو ده العشم برضه يا رفيق الميدان .
.
- قام ربنا بعت
لمصر شوية شباب عندهم عقل , و قدرو بصعوبه يقنعو الحمار إنه ينزّل الخروف من على ضهره
و إن كده عيب و مايصحش , و الخروف اللي هيطلع عالحجر النهارده عشان يركب على ضهرك بكره
يطلع عالحجر و يعمل حاجه تانيه .
.
- الحمار اقتنع
و قال للخروف انزل بقى , معلش يا صاحبي انزل و حقك عليا , و فاتت أيام و شهور و سنين
وراح الحمار أبو ديل لحمار تاني بديل زيه بالظبط و قال له : شور عليا يا صاحبي , الجو
بقى حر أوي و ضهري بياكلني , انا بفكّر أشتري هرّاشه لأيام الصيف اللي داخله علينا
دي .
.
- الحمار التاني
( فكر ) شويه و بص للحمار الأولاني و قال له : و ليه تشتري هراشه و تكلف نفسك , فاكر
صاحبنا الخروف اللي كان راكب على ضهرك من كام سنه ؟ طب بذمتك وقتها حسيت ان ضهرك بياكلك
و محتاج هرّاشه ؟ الحمار الأولاني قالو : للأمانه لأ , ماحسيتش .
.
الحمار التاني
قاله : خلاص يبقى تاهت ولقيناها , إحنا نشوف أي حجر عالي كده و حلو و نتحايل عالخروف
يطلع و يركب و يهرش لك بالمره , بس بقولك ايه يا حمار ؟ اوعى الخروف يعرف خطتنا دي
و إننا هنركّبه على ضهرنا عشان نوفر تمن الهراشه , أصل ممكن يحرن و مايوافقش , أيوه
خليك ذكي يا صاحبك , هو أنا هفضل أعلّم فيك لحد إمتى ؟!.
.....................................................................................................................................
Mohamed
Hussein
24
مايو 2015·
إكتبي يا عايده
.
حركة بدايه تعلن
أنها ستقوم بحشد المواطنين ضد الثيثي في 30 يونيو المقبل , السيسي بالسين يا عايده
مش بالثاء , أيوه صلحيها بقى , ضد السيسي , أيوه كده .
كمّلي يا عايده
و من المتوقع أن
يشارك في هذا الحشد شباب الإخوان الكبوت , الكيوت بالياء يا عايده مش الباء , كبّوت
ايه بس ؟ اسمهم الشباب الكيوت و الفصيل الوطني , صلحيها , و يستثنى , أيوه صح يستثنى
كده , و يستثنى من الحشد في هذا الوقت شباب الإخوان المسئولين عن التفجيرات و الحرق
لأنهم يقومون بمهمه قوميه لا تقل أهميه عن حشدهم في الشوارع , اعملي العلامه دي بقى
يا عايده بتاعة الشباك و اكتبي بعدها شعارنا في حملة بدايه : #يد_تحرق_ويد_ترفع_الشعار
.
...........................................................................................................................
Mohamed
Hussein
24
مايو 2015·
من قدام الصيدليه
بيفوت راجل كل يوم , جارر وراه عربيه كارو عليها بتاع 7سبايط موز , الراجل بيفوت على
10 الصبح و يرجع بالليل عالساعه 9 و العربيه فاضيه , ابتسامة الرضا و الحمد على وشه
, أهو شغال رزق يومه بيومه , مافكرشي في لحظة إنه بيجر عربيه كارو مكان الحمار أو الحصان
و بيشدها كده لمسافة أكتر من 2 كيلو رايح جاي يوماتي .
الراجل ده بالتأكيد
لا بيسب للحياه و لا بيلعن في العيشه و اللي عايشينها , و هما دول بقى ملح الأرض و
أهلها الطيبين .
.
لو توكلتم على
الله حق توكله , لرزقكم كما يرزق الطير , تغدو خماصا و تعود بطانا .
..................................................................................................................................
Mohamed
Hussein
22
مايو 2015·
كتبت بوست امبارح
عن النفسيه و نص البطه , النهارده الصبح لقيت امي بتتصل بيا صحتني من النوم , خير يامه
؟ قالت لي كنت حاطه دكرين بط و 6 جواز حمام و 4 ديوك بلدي في فريزر التلاجه بتاعتك
اللي فوق لحد ما تيجي انت و خواتك , و طلعت مرات اخوك النهارده لقت الكهربا مفصوله
عن التلاجه من يومين و محدش خد باله , و الحاجات كلها باظت و رميناها !!
.
مممممممممممم فيه
حد عندي في الأصدقاء سره باتع , ضرب العين هي العين ( نشّنتي يا حوريه ؟ ) , أنا لازم
أبخّر صفحتي , و من شر حاسدٍ إذا حسد .
.......................................................................................................................................
Mohamed
Hussein
22
مايو 2015·
إنفجار في مسجد
للشيعه في مدينة القطيف بالسعوديه , 30 قتيل على الأقل !!.
أهو كاس و داير
و خد دورته لحد ما وصل للسعوديه , قول بقى صراع سني شيعي , أو صراع موزمبيقي منفلوطي
مش مهم .
.
المهم المهم ,
إن أكتر مدينتين بينعمو بالأمن في المنطقه هما طهران و تل أبيب , مخرج العرايس عايز
كده .
.......................................................................................................................................
