في
سينا عساكر وظباط بيموتو كل يوم , عمليات وتفجيرات انتحاريه , تهديدات
مستمره بحرق مصر , كل جمعه مظاهرات للإخوان ( السلميين !! ) , حماس فجأه
كده حست إن لها أي تلاتين لزمه وبقت تعمل حشود عسكريه لتهديد مصر , محاوله
لإغتيال وزير الداخليه , جيشنا طالع عينه في تأمين الداخل والحدود وتقولي
حضرتك هما بيمدّو حالة الطوارئ ليه ؟ تصدق مالهمشي حق , إخص عليهم إخص ,
انا بكرهك يا سيسي بكرهك يا قاسي , كان المفروض بدل ما تمد حالة الطوارئ
تعمل لنا حفلة دانسيج ولا ديفيليه ولا معرض الفن التشكيلي , المفروض كمان
بدل الطوارئ كنا نجمّع النشطاء والنحانيح و نرسم لهم تاتو على صدرهم جنب
السلسله !!.
.
.
في
فيلم قديم لعادل إمام تقريبا كان طلب من عيل عواطلي صايع كده إنه يعمل له
خدمه وبعد ما الواد العاطل ده عمل الخدمه لعادل إمام راح له المكتب , عادل
إمام قال له هه ؟ تطلب ايه ؟ العاطل قال له أنا عايز شقه وعربيه وأمي تطلع
تحج , المهم عادل إمام قال له طيب خد ال 20 جنيه وروّح انت بقى !!
........الراجل خد ال 20 جنيه وفرح أوي ..... هو ده اللي بيعمله الإخوان
دلوأتي ...في الأول قالو شقه وعربيه وعوده الشرعيه ودلوأتي بيتفاوضو على ال
20 جنيه ....هيفرحو بيها أوي صدقني ...العواطليه كلهم طينه واحده !!
.الواحد
بيشرب نص علبة سجاير ومَج نسكافيه 9 لتر عشان يعرف يفتح عينه اليمين
ويدّور بيها على عينه الشمال , أنا مش عارف الناس اللي لا بتشرب سجاير ولا
نسكافيه بتفوق إزاي ؟ هل ممكن مثلا يكونو بيشربو بؤ مايه كده يقومو فايقين
على طول ؟ يعني بؤ مايه ينقلك فورا من حالة النوم ( الموت المؤقت ) , إلى
حالة اليقظه ( الموت الإكلينيكي ) ؟!...طيب بلاش دي , لا بتشربو سجاير ولا
نسكافيه أومال بتضيعو صحتكو في إيه طيب ؟!!.
.
.صباح
الخير , ولما تسيب صاحبك الإخوانجي مدة سنه كامله متكلمهوش في السياسه
حفاظا على شعرة معاويه بينكو , وبعد سنه تتناقش معاه تلاقيه بيقولك ( أيوه
السيسي هو اللي خطط لقتل محمد إبراهيم , والجيش حرق جثث الناس في رابعه
وقتل الأطفال في الحرس الجمهوري والإخوان دول ناس مسالمين بتوع ربنا
وميعرفوش يعني ايه سلاح , وحماس هتحرر القدس ومحمد دحلان هو اللي ورا قتل
الجنود في سينا والكتكوت أبو 7 رجول هو اللي فجّر خط الغاز 17 مره , واللي
حصل من يوم 25 يناير لحد النهارده هو خطه من مبارك ) , ساعتها هتحس
ممممممممم هو معاويه ده كان جوز خالتي عشان أحافظ على شعرته دي ؟!!.
.
.في
ذكرى 11 سبتمبر , قدر المجاهد البطل أسامه بن لادن يدبر لتفجيرات مركز
التجاره العالمي , ألاف من القتلى ولاد الحرام ( نساء وأطفال ومدنيين ) ,
قام رد عليه المجاهد البطل جورش بوش الإبن بملايين من القتلى ولاد الحرام (
نساء وأطفال ومدنيين ) في بلاد العرب والمسلمين , و بعدين لما انتهى دور
المجاهد الصغير قتله المجاهد الكبير , وكذلك يفعل المجاهدون !!.
إنما
الحمد لله , المجاهد الصغير بن لادن مماتش قبل ما يسيب لنا أولاده وأحفاده (
موجودين حاليا في سينا ودمشق وكابول وإسلام أباد وطرابلس وغيرها ) ,
والمجاهد الكبير مسابشي الحكم إلا لما ساب وراه ولاده ( أوباما وكيري
وغيرهم ) , حلقه جديده من صراع المجاهدين , وملايين جديده من الضحايا
الأطفال والنساء والمدنيين ولاد الحرام !!.
.
.
محمد حسين
.
ليست هناك تعليقات:
إرسال تعليق