Mohamed
Hussein
27
ديسمبر 2018·
يعني ايه دوله
بلا دوله ؟
.
يعني بعد رحيل
صدام حسين الله يرحمه وتفكيك الجيش العراقي يتحول العراق بشكل تدريجي و يركب الحلزونه
تحت إسم الديموقراطيه الأمريكاني , حكومات مواليه لإيران , لا دي مواليه لتركيا , و
الحزب ده موالي لأمريكا و بريطانيا ده موالي لموزمبيق , و قواعد عسكريه لزيد و عبيد
و دخول تركي لشمال العراق وقت مايحب خليفة الشواذ و الحكومه العراقيه تستنكر و تتشحتف
, و جفاف في بعض المدن العراقيه بسبب سدود بتعملها تركيا , و رئيس أمريكا يدخل العراق
و يخرج منها كأنه داخل جُرْن الهبله من غير إحم ولا دستور .
.
بص يا مولانا
, كلمتين حطهم حلقه في ودنك و اشرحهم لإبنك الصغير و بنتك الصغيره عشان مايدخلوش أبدا
في متاهة الغباوه و الخيانه و الهجايص و هم يحسبون أنهم يحسنون صنعا .
.
الكلمتين باختصار
, لو عندك حتة ارض مساحتها فدان اسمها الوطن و عايز تزرعها وتقسمها بقسمة العدل , هتقسمها
ازاي ؟ أقولك انا , قسمها قيراط واحد تزرعه حريه شخصيه و عامه و حقوق و واجبات و ديموقراطيه
و تنميه و خلافه و 23 قيراط تزرعهم سياده و استقلاليه و أمن قومي و حدود و كيان و تاريخ
و جعرافيا و جيش قوي و مؤسسات سياديه و هيبة دوله , لأنك من غير ال 23 قيراط دول مش
هتعرف تزرع القيراط الباقي حتى لو وقفت على شعر راسك , و اوعى في يوم من الأيام تعكس
الأيه ولا تشوف إن ال 1 أكبر من ال 23 , يعني إوعى تبيع بيتك أو ترهنه عشان تشتري نجفه
شكلها حلو و عاجبك , لأنك في النهايه مش هتلاقي مكان تعلق فيه النجفه
..................................................................................................................
Mohamed
Hussein
26
ديسمبر 2018·
لما بنتي تسألني
...............
بابا هو انت ليه
مش غني زي أبهات صاحباتي ؟
- ماعرفش
.
طب ليه مش بتفسحنا
في أماكن كتير زي صاحباتي ؟
- اعفيني من الرد
عالسؤال ده .
.
طب انت عارف أسماء
المولات اللي بيروحوها ؟
- لا معنديش علم
بالأسماء .
.
سمعت عن مول العرب
؟
- لا مسمعتش .
.
طب عارف بيشترو
من هناك ايه ؟
- معنديش معلومات
.
.
طب عارف ان القسط
التاني بتاع المدرسه قرب ؟
- معنديش فكره
.
.
طب هتدفع القسط
يعني ؟
- لا أستطيع الجزم
بذلك
.
بابا هو انت ممكن
تفكر تتجوز على ماما ؟
- أحتاج إذن للرد
, لأن الإجابه سوف تضعني تحت طائلة القانون و نروح في أبونكله .
....................................................................................................................
Mohamed
Hussein
26
ديسمبر 2018·
صلاح سجل هدف و
صنع هدف في فوز ليفربول 4/0 على نيوكاسل .
.
ليفربول بتاع صلاح
لعب 19 مباراه في الدوري السنادي بدون خساره واحده , ولا خساره في 19 مباراه في أقوى
دوري في العالم , والنهارده ليفربول بيحتل قمة الدوري بفارق 6 نقاط عن صاحب المركز
التاني , اللقب اللي مافازوش بيه من اكتر من عشرين سنه نقدر نقول بقى في جيب ليفربول
بنسبة 50 % .
.
اه يابني , صلاح
فخر العرب و فخر أفريقيا وفخر العالم كله , ده اللاعب المصري و العربي الوحيد اللي
ممكن يتكرر بعد ألف سنه جايين , يدينا و يديك طولة العمر بقى , لو مش مصدق الكلام ده
روح اسأل عنه في ماليزيا واليابان و سويسرا و ألمانيا و المغرب و أمريكا و جنوب أفريقيا
و موزمبيق و قبائل الأشانتي و حتى في البرازيل ذات نفسها .
..............................................................................................................
Mohamed
Hussein
25
ديسمبر 2018·
ماحبيتش عمر البشير
أبدا ولا احترمته , خصوصا أخر كام سنه و بعد تصرفاته مع مصر
.
كان كل كلامي هو
كل الاحترام للشعب السوداني و لدولة عظيمه اسمها السودان , الدوله اللي عمر البشير
قزّمها و خلّاها مجرد سلسلة مفاتيح في إيد عيل صايع بيحكم كشك على الخليج .
.
الدوله التاريخيه
اللي شغّلها الواد الصايع في دور كومبارس في محاولة بائسه منه إنه ينال من مصر , من
الجبل .
.
عمر البشير أخطأ
في حق مصر في ملف سد النهضه رغم كل محاولاتنا المؤدبه جدا اننا نقوله عيب و أي ضرر
هيصيبنا هيصيبك .
.
و اخطأ في حق مصر
لما سمح للإرهابيين و الهاربين انهم يتواجدو على أرضه و يخططو لعمليات ضد الدوله اللي
إيدها ممدوده له دايما بالخير .
.
أما خطيئه عمر
البشير الكبرى في حق السودان و السودانيين , الخطيئه اللي أكبر من خطيئة تقسيم السودان
و أكبر من خطيئه إفقار و إذلال شعبها , هي السماح للجماعه الإرهابيه بالتوغل في مفاصل
الدوله السودانيه بما فيها المؤسسات السياديه و الجيش و خلافه ( نفس اللي بيحصل في
تونس حاليا ) .
.
البشير تحول لمجرد
خيال مأته , و جماعة الإخوان قولنا مليون مره انها عامله زي الديب , ماتحطش ايدك أبدا
في بؤ الديب و تراهن على ادبه و على انكو واكلين عيش و ملح مع بعض و إنه الديب مبسوط
منك النهارده !! .
.
و مع ذلك فلا يمكن
هتعاطف مع المتظاهرين اللي بيطالبو بإسقاط النظام , حتى لو كان اغلبهم ناس طيبين ضاق
بيهم العيش و الحال , إنما المظاهرات دي كلها مدفوعة الاجر و فيه اللي بيحركها زي باقي
مظاهرات المنطقه .
.
الغرض من المظاهرات
اللي حصلت أخر 10 سنين , و في أي مكان في العالم بيكون حاجه من اتنين , إما محاولة
لاسقاط دوله ما و إضعافها , أو قرصة ودن للنظام الحاكم عشان مايخرجش عن الطريق المرسوم
له ( خصوصا لما يكون مسبقا حط ايده في بؤ ديب و حول بلده لمجرد كومبارس في إيد عيل
صايع ) .
.
و رغم إداراكي
لحالة الكرب اللي وصل لها أشقائنا في السودان بعد اكتر من عشرين سنه من حكم البشير
, لكني مدرك برضه ان نجاح المظاهرات هيعني الخراب التام للسودان , في ظل وجود جماعة
الخراب الإرهابيه و في ظل دعم قناة الخنزيره و الصايع بتاع الكشك , و تبقى الحكايه
أشبه بالمستجير من الرمضاء بالنار .
.
مش خايف على مصر
, ولا جوايا أي قلق من اللي بيحصل في السودان , خالص مطلقا , رجالتنا عاملين حسابهم
كويس اوي لكل الاحتمالات و مصر 2019 بتختلف تماما عن مصر 2013.
.
ربنا يكتب السلامه
للسودان و شعبها الشقيق .
.......................................................................................................................
Mohamed
Hussein
24
ديسمبر 2018·
الأيام هي خير
مُعلّم
.
من ست سبع سنين
بس كان الأسواني ده له دراويش و مريدين بالملايين , يقعدو يستربعو قدامه و يتخيلو انه
جهبذ زمانه و إن عقله ألماظات و عنده أفكار من الحجم الكبير ( يعني الكومبو ) .
.
و تفوت السنين
و تمر السنين و يقع ورق التوت و تنكشف العورات , و الناس تبان على حقيقتها , واللي
كانو فاكرينه عملاق يطلع مجرد قزم تافه اتعمل له فوتوشوب .
.
علاء الأسواني
لازم يحشر اسم مصر و السيسي و الجيش و المخابرات في أي جمله و أي خبر حتى لو كان الخبر
عن ( مشاجره في نيكاراجوا ) , و لازم يلمح لك انهم هيعملو ثوره كل يوم تلات مع إنه
لو البواب طلع رن الجرس عليه و ضغط عالزرار جامد شويه الأسواني هيترعب في مكانه من
الخضه .
.
المهم ان صاحبنا
وصل للحاله البائسه بتاعة التويته دي , حاله بشوفه فيها أشبه بالظبط بالظبط بواحده
بتشتغل في الدعاره بس عجزت و الزباين قرفت من شكلها من كتر ما حفظوها بس هي مصره تشتغل
نفس المهنه فبقت تنزل الشارع و تركن على عمود نور و ترمي جتتها على أي عربيه فايته
, و على فكره هي موافقه على أي حاجه حضرتك , حتى لو قلت لها هناخدك في عشة فراخ و نعمل
عليكي حفله بعشره جنيه مقطعه .
.................................................................................................................................
Mohamed
Hussein
24
ديسمبر 2018·
مصر على نضافه
.
صباح الخير
- الحكومه بتدرس
حاليا عمل تسهيلات كبيره جدا للمواطنين و المستثمرين لتعمير شمال سيناء , تسهيلات و
اعفاءات جمركيه و ضريبيه و تخفيضات في المصاريف و الرسوم و خلافه .
.
- مصر الحديثه
اللي بيبنيها عبد الفتاح السيسي عملت ايه بالظبط ؟ هقولك أنا :
.
- تل العقارب بقت
روضة السيده , من منطقه خطر لا تصلح إلا للفيران و التعابين إلى منطقه سكنيه محترمه
لا تصلح إلا للبني أدمين .
.
- زي تل العقارب
عشرات من المناطق الخطر و المناطق العشوائيه اتحولت بقدرة قادر و في ظرف سنتين تلاته
لمساكن بني ادمين .
.
- شمال سينا كانت
مهمله تماما , مهمشه , كأنها مش تبع مصر , و لما تسيب منطقه بحجم دولتين تلاته بالتهميش
ده لازم تتحول بشكل تدريجي لأوكار للإرهابيين و تجار السلاح و تجار المخدرات , و بدل
مايجيلنا خيرها يقتلنا شرها .
.
- اللي عمله السيسي
في المناطق العشوائيه و الخطره هو نفس اللي عمله و بيعمله في شمال سينا , و الغرض مش
بس توفير حياه أدميه , ده الغرض امني كمان , امني من الدرجه الأولى , التنميه هنا بتبقى
حائط الصد الأول ضد الإرهاب و ضد الجريمه بكل أشكالها .
.
- تعمير شمال سينا
كلفنا لحد دلوأتي 300 مليار جنيه , و تطوير العشوائيات كلفنا كام مليار ؟ اضرب رقم
كده .
.
- كل ده ليه ؟
عشان حضرتك دي أبجديات و قواعد , ماينفعش تعمل مصانع و جنبها مناطق موبؤه و خطره ,
خطره على اللي فيها و خطره على اللي جنبها .
.
- تعمير سينا زي
تطوير العشوائيات بالظبط , و هنا التعمير يلزمه بنيه تحتيه و محطات كهربا و طرق و مدارس
و مستشفيات و أرض زراعيه و مصانع و الأهم بني أدمين يروحو يعيشو و يكونو مجتمعات جديده
نضيفه , و ده اللي بيعمله السيسي و الحكومه .
.
- يابني حاول تصدق
, أنا مش متحامل على حد , مبارك لا كان جوز أمي ولا السيسي يبقى خالي , كل الحكايه
معادله بسيطه , 1+1 = 2 , اللي بنصرف عليه 10 جنيه النهارده كان يتحل ب 10 قروش من
عشرين تلاتين سنه , ليه ماتحلّش و راحو فين ال 10 قروش ؟ هو ده السؤال المنطقي .
.
- إجمالا , مفيش
وجه مقارنه بين السيسي و اي رئيس سابق , الكلام ده بكتبه والله لأول مره , يمكن واخد
شويه من ناصر على شوية من السادات , لكنه في النهايه شخصيه مختلفه متفرده , هدية ربنا
للبلد دي .
.
- و برضه مش معناها
إن الحكايه شيك على بياض و تأييد مسبق و إنه ملوش اخطاء , إنما كله بأوان ( اللي مايشوفشي
من الغربال يبقى أعمى ) , و قريب أوي لما الدنيا تستقر أكتر هنبدأ نشاور للريس عالمشاكل
الكبيره اللي باقيه و العيوب , نشاور ونطلب و نأمل و نؤمر أحيانا , بس بأدب , والأهم
بعقل و دراسه و معرفة للقماشه المتاحه و التفريق بين الحلم و الواقع , يعني مش بطريقة
اللي مدلدل رجليه في ماية الترعه بيمص قصب و يهبد تويتات و يقيمُ الكونَ و يقعدهُ
.
................................................................................................................
Mohamed
Hussein
24
ديسمبر 2018·
على سيرة اللي
بيقولو له احنا أسفين
.
المسافه من قريتنا
لمدينة السنبلاوين 8 كيلو بالظبط , كنت بروح السنبلاوين يوميا, خصوصا لما دخلت ثانوي
و جامعه , الطريق ترابه و كله حفر و مطبات مع انه بيخدم أكتر من 20 قريه و بيسافر عليه
ألاف الطلبه و الموظفين , أنا وعيت عالدنيا و لقيت الطريق كده , ترابه في ترابه , ترجع
من أي مشوار تلاقيك حمّلت شوية تراب على هدومك و شعرك ( و جوه صدرك ) يبنو بيت دورين
, ده غير قلقلة البطن .
.
المهم وانا في
الجامعه لقيت خير اللهم اجعله خير , شركه جايه ترصف الطريق , و لوادر بقى و أسفلت و
ليله , الفرحه كانت لا توصف , من فرحتي وقفت مع المهندس اللي ماسك الطريق و اتشجعت
و قلت له بكل سعاده : ياااه اخيرا الطريق ده هيترصف بقى يا باشمهندس ؟
المهندس ابتسم
و قالي , الطريق ده بنعمله دلوأتي إعادة رصف للمره الرابعه , لأنه على الورق اترصف
3 مرات قبل كده .
....................................................................................................................
Mohamed
Hussein
23
ديسمبر 2018·
كنت قاعده في بيتي
لوحدي لابسه عباية بيت عاديه و حاطه طرحه على شعري , بابا و ماما كانو بره , وانا نسيت
البوتاجاز والع و انشغلت في قراية القرأن و صلاة القيام , و فجأه شميت ريحة غاز رهيبة
, مارضيتش أقطع صلاتي , و كملت صلاه عادي , ولما خلصت و قلت السلام عليكم و رحمة الله
لقيت البيت كله مولع حواليا , ماعرفتش اوصل لمفتاح الشقه من كتر الدخانه و النار اللي
في كل حته , الجيران شافو النار و الدخانه و اتلمو و كسرو الباب بالعافيه
.
و دخل منهم شاب
مبتسم أحسبه على خلق , معرفشي قدر يمشي إزاي وسط النار دي كلها , قرّب مني و قالي و
هو وشه في الأرض , لو سمحتي يا أختي انا جاي أساعدك لأنك هتتخنقي من الدخانه , إدّيني
إيدك هشيلك و أخرجك بره الشقه , قلت له لا ايدي مايلمسهاش غريب و أجنبي , طب يا ستي
النار هتاكلنا احنا الإتنين و ده وضع طارئ و ربنا سبحانه و تعالى أعلم بحالنا , قلت
له مستحيل , اموت و أتخنق ولا تلمسشي إيدي , قالي طب خلاص ياكشي تتحرقي بجاز , و سابني
و مشي لانه كان بدأ يتخنق من الدخانه و يكح و عنيه تدمع.
.
وانا اتحرقت فعلا
و موتت و اتفحمت بس بعد كده الشاب ده جه اتقدم لي و اتجوزنا و خلفنا ولدين و بنت ,
حوكشه و عكروت , و البت عجوه الصغيره دي .
....................
....................
ستووووب , كت
, هايل يا فنانه , اللي بعده
جاهزه يا استاذه
بمشهد الغرق و الغواص اللي حاول ينقذك و انتي رفضتي و في الأخر اتجوزتو في بطن الحوت
و قضيتو شهر العسل وسط الشعب المرجانيه ؟! .
....................................................................................................................
Mohamed
Hussein
23
ديسمبر 2018·
السياسات الغربيه.....
و الراجل الطيب الجميل النصاب !!
.
صباح الخير
- بيقولك يا سيدي
, في قرية من القرى اتجمع الأهالي و لمو تبرعات من بعض عشان يبنو جامع , واحد نصاب
من بلد بعيده سمع بالخبر و راح لهم لابس جلابيه بيضا و في أيده سبحه , قال لهم انا
سمعت انكو بتلمو تبرعات عشان تبنو جامع , جمعتو قد ايه ؟ قالو له 50 ألف , قال لهم
طيب و أدي 50 ألف مني تبرع للجامع بتاعكو و هاجي بعد اسبوعين اشوفكو عملتو ايه بس شدو
حيلكو شويه في التبرعات , الناس شكرته جدا و تقريبا باسو ايديه , واتحمسو فعلا و جمعو
100 ألف كمان , راح لهم الراجل الطيب فاعل الخير بعد اسبوعين و سألهم جمعتو كام , قالو
له كده معانا 200 ألف , قال لهم معقوله يا جماعه ؟ 200 الف بس ؟ هو فيه جامع هيتبني
ب 200 ألف ؟ أقول لكو حاجه , هاتو الفلوس دي وانا هبني لكو الجامع على حسابي و يتكلف
زي ما يتكلف , الناس ادوله الفلوس بمنتهى السعاده وباسو ايديه برضه و النصاب خد الفلوس
و هرب !! .
.
- في الحدوته دي
نقطه مهمه جدا بتختصر مشاهد كتير حوالينا , النصاب عشان ينصب عليك لازم ينال ثقتك الأول
( لما دفع لهم 50 ألف من غير وصل ولا حاجه ) , بعد ما ينال ثقتك بتبقى معاليك بالمعنى
الحرفي قعدت على حجره , ويعمل فيك اللي هو عايزه بقى .
.
- السياسات الغربيه
بتاعة القوى الإستعماريه تحديدا بتشتغل بنفس الطريقه , عايز أكتسب ثقة شعوب العالم
التالت , أكتسبها بإيه ؟ بتجميل الوجه القبيح , و ده أعمله ازاي ؟ بشوية تصريحات عن
حقوق الانسان و شوية شحتفه , و شوية أفلام من بتوع هوليود و ازاي اننا بننقذ كوكب الأرض
من المخلوقات الفضائيه و إزاي بنحارب داعش ( اللي احنا عاملينها على ايدينا ) و إعلام
و جرايد و قنوات و حبشتكانات , و شوية مجالس حقوقيه و تقارير و شعارات عن الديموقراطيه
و كيف أننا سوف ندرس ثورة المصريين في يناير لطلاب مدارسنا هع هع هع .
.
- و بعد ما يكتسبو
ثقتك يا معلم يحركوك بصباع رجليهم الصغير , احرق بلدك يا حماده عشان أقول عليك ثورجي
مناضل , حاضر , اقتل جنود بلدك يا حماده عشان أقول عليك بطل , حاضر , و ماتقلقش خالص
, احنا هنلمعك في قنواتنا و جرايدنا و مش بعيد تاخد جايزة نوبل لامؤاخذه للسلام , الورق
ورقنا و القنوات بتاعتنا و الجايزه جايزتنا .
.
- وبس يا سيدي
, بعد ما تخلص الليله و الحدوته و يعملو اللي هما عايزينه ممكن يعترفو انهم نصبو عليك
عادي , مثلا بعد سنين طويله من خراب العراق و تدميره بحجة أسلحة الدمار الشامل طلع
توني بلير رئيس وزراء بريطانيا وقال احنا أسفين يا جماعه , تقاريرنا مكانتش مظبوطه
, وي أر سوري و الله ( لا ماتقولش على نفسك كده دانت حد جميل )
.
- و بعد 7 سنين
من خراب المنطقه اكتشفت ديرشبيجل الألمانيه ( بالصدفه البحته طبعا زي مانتو عارفين
) إن أحد محرريها الكبار واللي فاز بجوايز عالميه من CNN
و غيرها , انه كان بيفبرك تقارير عن سوريا , تقارير بتقول ان بشار
بيقتل شعبه و بياكل دراع العيال الصغيره , و انهم اكتشفو الحكايه دي فجأه فتعبت من
المفاجأه و نزلت دمعتي .
......................................................................................................................
Mohamed
Hussein
22
ديسمبر 2018·
هذا و قد ورد في
تقرير نشرتة مجلة ( علمني العوم و النبي ياحمد ) العلميه المتخصصه في شئون الصوب الزراعيه
و المحاصيل أن الإستمرار في تناول الفاكهه و الخضروات الأورجانيك يسبب العديد من الأمراض
المزمنه منها الضغط و السكري و البواسير و حب الشباب و الأنكلستوما و الإيدز و السيلان
و ذلك لاحتواء المنتجات الأورجانيك على مادة اليورانيوم المشع و الخشمونيوم و خامس
بوتاس الفاسيوم .
.
يُذكر ان عبد الفتاح
السيسي قائد انقلاب 30 يونيو و الذي أودى بحياة 750 مليون مواطن سلمي أغلبهم من النساء
و الأطفال و حديثي الولاده و المبتسرين , يذكر أنه قد أعلن عن نيته التوسع في انتاج
الفاكهه و الخضروات الأورجانيك
.
و معنا للتعليق
على هذا الخبر الأستاذ دبور أبو بربور الناشط السياسي و الحقوقي و المتخصص في مجال
حقوق الإنسان و البط المسكوفي و الخبير أيضا في الزراعات العضويه و الغير عضويه , المشويه
منها و المقليه
.
سيد أبو بربور,
كيف ترى هذا المشهد في ظل نظام فاشي ديكتاتوري انقلب على الرئيس الشرعي المنتخب ؟
- بالفعل زي ماحضرتك
ذكرت , و لكن ما الذي نتوقعه من نظام قمعي يخفي معارضيه قسريا و يكمم الأفواه و يقصف
القلم و يسرق البرايه ؟ أما بخصوص الزراعات العضويه فأحب أضيف على كل الأمراض الوارده
في التقرير إن تناولها بيسبب الضعف الجنسي , مش بس تناولها ده مجرد انك تشوفها على
بعد 5 متر بيجيلك ضعف جنسي على طول , و انا ليا صديق شغال في احدى المزارع العضويه
و قالي انه اصيب بضعف جنسي نتيجة شغله و قربه من الحاصلات دي , و انا اتأكدت انه جاله
ضعف جنسي فعلا .
.
سيد أبو بربور
و لكن كيف تأكدت من مسألة الضعف الجنسي؟
- ماهو انا حضرتك
بقعد مع صديقي ده كتير لوحدنا عشان ندرس و نتباحث في أوضاع المنطقه .
.
مممممم لا طالما
بتقعدو مع بعض و بتدرسو الأوضاع ( بتاعة المنطقه ) يبقى كلامك مؤكد طبعا .
.................................................................................................................
Mohamed
Hussein
22
ديسمبر 2018·
إنبهار
.
أكتر حاجه أبهرتني
في فيديو الشركه الوطنيه اللي بتعمل صوب زراعيه مش اني أصلا اتفاجئت إننا عملنا ألاف
الصوب في ظرف سنه ونص من غير ماحد يحس و مش إننا كنا عاملين حسابنا على كل حاجه بما
فيها مصدر الكهربا منين و مصدر المايه منين و المواني القريبه ايه ( يعني مش شغل عشوائي
) .
.
أكتر حاجه أبهرتني
شوفتها في أول الفيديو , اختيار قاعدة محمد نجيب العسكريه كواحده من خمس ست مناطق اتوزع
عليها مشروع الصوب الزراعيه .
.
من أول ماتم افتتاح
القاعده وانا بقول المساحه ضخمه اوي , حجم التسليح فيها يعادل تسليح دوله , طب ماحنا
ممكن كمان نستغل المساحه دي و القوه البشريه الهايله و قربها من المواني و من الطرق
السريعه , و قد كان .
.
عبد الفتاح السيسي
بينفذ حرفيا اللي الواحد ممكن يفكر فيه او يتخيله , مابيسيبش خرم إبره ممكن يكون منه
فايده الا و بيستخدمه , هتحتاج عمال للصوب الزراعيه هناك ؟ ده أكيد , و ممكن جدا تعتمد
على بعض جنود القاعده والمهندسين الزراعيين اللي بيقضو خدمتهم العسكريه , اللي دخل
جيش مصر يعرف القوه المخيفه و الطاقه اللي عند جنودنا , يتدربو عالرمايه و التسليح
و خطط الحرب و ممكن بعدها بساعتين زمن يبني لك بيت أو يزرع لك صوبه زجاجيه , و اللي
عايز يفهم اكتر لازم يعرف ان محاولة تحقيق الاكتفاء الذاتي من سلع غذائيه معينه ده
كمان تسليح , و جزء مهم جدا من معركتك .
.
هنبدأ بشكل تدريجي
ناكل فاكهه و خضار أورجانيك , الأورجانيك بعد فتره مش هيكون للأغنيا بس ( عشان الحكايه
عرض و طلب ) , و طبعا طبعا أنا في انتظار عيل صايع هريجي يسمي نفسه خبير زراعي و يطلع
يشرح لنا أضرار و اخطار الفاكهه و الخضروات الأورجانيك على صحة الإنسان و إزاي انهم
بيسببو البواسير و الإيدز و الأنكلستوما , و إزاي ان الشعوب الفقيره بس هي اللي بتاكل
أورجانيك , احنا هناكل أورجانيك عشان احنا فقرا أوي يا مسعودي ( بصوت لينا ) , مستنيه
والله و ماسك الشبشب في إيدي .
.............................................................................................................
Mohamed
Hussein
21
ديسمبر 2018·
شخبطه
.
امبارح كان فيه
مشهدين أبشع من بعض , المشهد الأولاني هو اغتصاب و ذبح بنتين من الدنمارك و النرويج
في دولة المغرب على ايد أربعه من الارهابيين الصيع و تصويرهم فيديو , المشهد ده صعب
جدا و ممكن يكون أكتر صعوبه مثلا من مشهد اسقاط طائره روسيه في سينا من كام سنه واللي
راح ضحيته اكتر من 200 بني ادم مالهمش ذنب .
.
أما المشهد التاني
فهو حالة الهري و الفرهده اللي شوفتها على التايم لاين , ناس تاخد المشهد البشع من
مراكش في المغرب و تمشي بيه , بلاد تشيلها و بلاد تحطها لحد ماتوصل للقاهره و تحط ذنب
البنتين في رقبة الازهر و شيخ الأزهر
.
ناس مشيت اكتر
و حطت ذنب البنتين في رقبة الدين نفسه , الإسلام و في رقبة سيدنا النبي , الدين ده
بقى اكتشفو اول امبارح بالليل انه بيقول لنا لو جالكو سياح من اوروبا اغتصبوهم و ادبحوهم
, طب حاضر انا هخلص كتابة البوست بس واروح اشوف لي اي واحده اجنبيه اغتصبها و ادبحها
و اجيلكو على طول .
.
ناس مشيت اكتر
بكتير و حطت ذنب البنتين في رقبة ربنا سبحانه و تعالى , أو بمعنى أصح , كده يبقى مفيش
رب ولا اله و لا ديانات , احنا خلقنا نفسنا بنفسنا من شواشي الدره و حجارة المعسل
.
................
الساده الهرايين
, أما بعد , و سامحوني على الإطاله
- العبد لله اللي
هو انا , لا أزهري ولا مقطع حصر الجامع , بني أدم أقل من العادي , يصيب و يخطئ و بيخطئ
أكتر مابيصيب , و خير الخطائين التوابون .
.
- كل الحدوته اني
بعرف أسمّي الحاجات بمسمياتها , محدش راكبني وسارح بيا , لا الشيخ الفلاني ولا الكتاب
العلاني ولا الفيلسوف الترتاني .
.
- ماعمريش صدقت
مثلا ان الحملات الصليبيه خرجت من اوربا انتصارا للمسيحيه , لا , ده غطاء بيقولوه حكام
اوروبا لهجماتهم الاستعماريه و نهب ثروات الشعوب , يعني معنديش من الحماقه اني اتهم
ديانه بكده .
.
- مابقولش الدول
المسيحيه خططت و أشرفت على خراب الشرق الأوسط اللي حصل اخر 10 سنين , مع اني على يقين
تام ان المخطط و المدبر هما نفس اهل الشر , بريطانيا و أمريكا , بس بعرف اسمي الأشياء
بمسمياتها , دول استعماريه بلطجيه , و المسيحيه بريئه من أفعالهم .
.
- بحترم كل الديانات
يا مولانا و المعتقدات حتى الوضعيه , و بعرف أفصل كويس , أبو قرش عن أبو قرشين .
.
- اه حاول تصدق
, التصرف البشع بتاع امبارح ملوش علاقه بالاسلام ( حتى لو اللي عملوه أوهموك بكده
), الدين اللي بدين بيه انا و مليار بني ادم غيري , ولا له علاقه باخلاق سيدنا النبي
, وانا اضعف بكتير و أقل شأنا من إني اتولى الدفاع عن دين سماوي و رسول اصطفاه ربنا
سبحانه و تعالى .
.
- كتب التراث محتاجه
تنقيح و شغل كتير فعلا و بعضها محتاج الحرق , تركة خمسين ستين سنه هتاخد شويه وقت لما
نخلص منها , واعتقد عملية التنقيح بدأت بالفعل من مختصين في غرف مغلقه .
.
أصدقائي الغاليين
, كل المطلوب من حضراتكو , ووشي منكو في الأرض والله , تحترمو ديني و تسمو الأشياء
بمسمياتها بدون افوره , زي مانا بعمل بالظبط , اقول لكو حاجه , اعتبروني بوذي و احترمو
ديانتي البوذيه دي وانا هقول لكو ميرسي خالص .
.
يوووه نسيت حاجه
, سيدنا الحسين سيد شباب أهل الجنه و حفيد سيدنا النبي اتقتل و اندبح على ايد ناس بيقولو
على نفسهم مسلمين , و وقتها لا كان فيه أزهر ولا كتب تراث .
.
ممكن بقى تشربو
بؤ مايه و تدعو للبنتين بالرحمه و لأهلهم و أصحابهم بالصبر و للإرهابيين بالحرق و القتل
أينما ثٌقفو و أيا ماتكون ديانتهم ؟ ممكن تهدو شويه ؟
.....................................................................................................................
Mohamed
Hussein
21
ديسمبر 2018·
اللي حصل في الشرق
الاوسط في الكام يوم اللي فاتو , انسحاب القوات الأمريكيه من سوريا , و تصريحات من
هنا و هناك , و تهديد و شألباظات , و مظاهرات في السودان بعد زيارة البشير لسوريا
( و كأن السودانيين اكتشفو فجأه و بالصدفه البحته ان حياتهم كرب بعد تلاتين اربعين
سنه من حكم البشير !! ) , و بغض النظر عن مين مع مين و مين هيعمل ايه في مين و بكره
شكله عامل إزاي
.
إنما انا شوفت
المشهد كله بشكل مختلف , الأسد انقض على فريسه في لحظة ضعفها , أكل لحد ماشبع و عمل
اللي هو عايزه و بعد كده ساب اللي باقي للضباع و كلاب السكك و حتى القرد ابو بتاعه
حمره , طب حضرتك والربيع العربي و ثورات تحرر الشعوب و الحريه ؟ بس ياهبل يابن الهبله
.
المهم يعنيني في
المشهد ده جمله من 3 كلمات ( مصر الأقوى و الأنضف ) , جمله كتبتها كتير لاختصار سنين
طويله من الهري و الفرهده , مصر كانت أقوى من انها تكون فريسه و أنضف من انها تكون
مع كلاب السكك , دفعنا تمن كبير اوي عشان مانلعبش دور الفريسه , ألاف الشهدا من جيش
و شرطه و مدنيين , الورد الحقيقي اللي فتح في شوارع مصر , و ربطنا الحزام على بطننا
و قولنا ظروف بلدنا و هنتحملها , و رفضنا تمن كبير اوي كنا هناخده لو كنا شاركنا مع
الضباع .
.
تخيل حضرتك انك
تكون قاعد النهارده ( لاجئ في بلد تانيه طبعا ) و بتتفرج على تليفزيون و بتضرب أخماس
في أسداس و مستني كلب و قرد و فار و شوية صراصير يحددو مستقبل بلدك , و بالمره يكتبو
لك الدستور و هما قاعدين !!
.
اللي عنده جيش
زي جيش مصر , و اللي ثقافته و عقيدته على مستوى الأسره و الدوله بتقول أنا مش هدخل
جيبي فلوس حرام , حتى تحت بند البراجماتيه ( اللي هي اسم الدلع بتاع البلطجيه و السفاحين
و مصاصي الدماء ) , اللي عقيدته كده محدش هيقدر عليه و لا هتلاقي له دراع عشان تلويه
.
.
ربنا ينصر سوريا
و جيشها و شعبها و أهلها الطيبين على الضباع و القرود والصراصير , و يحفظ لمصر شعبها
و جيشها , التوأم السيامي الملتصق منذ بدء الخليقه .
..........................................................................................................................
ليست هناك تعليقات:
إرسال تعليق