Mohamed
Hussein
3
يناير 2019·
بين الثرى و الثريا
.
أحكي لكو عن مطربه
, فنانه , وصلت نجوميتها و شهرتها لكل مكان في العالم , بقت تتعامل في زياراتها الخارجيه
معاملة الملوك و رؤساء الدول , صوتها بيوحد أمه بالكامل , من شرقها لغربها , قالو عنها
كوكب الشرق و قالو الهرم الرابع و يأسو انهم يلاقو تشبيه أو وصف .
.
في يوم من الأيام
الست دي كبرت في السن ( بقت في الستينات ) و حيث انها بدأت حياتها الفنيه من سن 8 سنين
فكانت المفروض تعبت من طول و مشقة الرحله , جت بعد نكسة 67 و قررت حاجتين , إنها هتغني
اغاني وطنيه و تركز عليها مع ان شهرتها الأكبر كانت في الرومانسي ( بس شافت ان الرومانسي
في الفتره دي يبقى عيب ) , و الحاجه التانيه انها هتلف على مدن و محافظات و نجوع مصر
تعمل أغاني لصالح المجهود الحربي , لبلدها اللي في حالة حرب و عندها أرض عايزه تحررها
.
, في الوقت ده
لا كان يلزمها شهره ولا نجوميه ولا فلوس ولا أي حاجه خالص , تركب قطر عدمان و توصل
للمدينه اللي هتغني فيها بعد 10 ساعات مثلا وجسمها يتكسّر , و أجر الحفله تتبرع بيه
و تلم تبرعات من الناس للجيش, طب عليها بايه ؟ ماتقعد في قصرها ملكه معززه مكرمه ,
لا يا سيدي , دي بنت بلد , عرفت ان الخير اللي هي فيه كله من بلدها و ان بلدها لما
تحتاجها لازم تلاقيها و إلا تبقى قليلة الأصل , ثم انها مؤمنه جدا بفنها و بدور الفنان
, الفنان مش ميكروفون و اغنيه تتكتب و لحن يتلحن , الفنان الحقيقي قائد يعني ليدر
, و وقت الجد بيبقى جندي في جيش بلده , جندي بفنه لأن فنه سلاح , لا سمعنا في يوم من
الأيام انها ( منّت ) على مصر باللي عملته , ولا فكرت مجرد تفكير تقول انها خساره في
مصر .
.
وبس يا سيدي ,
ماتت ام كلثوم و مات معاها جيل العظماء ,و وقعنا في جيل الأقزام و الأنصاف و الأرباع
و ولاد الوسخه اللي زي شيرين عبد الوهاب , اللي هي على بعضها كده وبتقديري لفنها و
موهبتها اعتقد ان اخرها كانت تمسك المنديل لام كلثوم قبل ما تطلع على المسرح , تمسك
المنديل و هو مكوي و تقف انتباه من حديد لحد مالست تيجي .
....................................................................................................................
Mohamed
Hussein
2
يناير 2019·
و بس يا سيدي
, قاعدة عالحصيره و لمة العيال و العيله , العشا رز معمر و بط , و الفطار رز معمر و
بط برضه , مرات اخويا لو بتزغطني زي دكر البط اللي كلته مش هتعمل اكتر من كده , بس
هي تربية الغاليه , حاجه من ريحة الحبايب .
.
عموما أديني رجعت
للقاهره تاني , للمكرونه والفراخ البانيه اللي بحبهم جدا جدا زي مابحب أردوغان و تميم
ابن موزه بالظبط .
...............................................................................................................................
Mohamed
Hussein
1
يناير 2019·
دندنه
.
مع أول يوم في
2019 هروح البلد , القريه المصريه اللي اتربيت فيها واتربيت على إيديها , أعبّي صدري
هوا نضيف وأملى عيني بجمال الأرض الخضره , و بدعي ربنا انها تمطر النهارده وانا هناك
, لمّا الشتا يدق البيبان .
.
هبقى أصور لكو
شوية صور , من هاوي و عاشق مش محترف , عشان بس اللي مايعرفش مايقولش عدس , واللي ماشافشي
جمال مصر يشوفه , واللي على عينه غشاوه يشيلها , واللي منبهر جدا بالغرب و الشرق و
بالخواجه و بالغير يقلع توب الإنبهار و يتصدق بيه على الفقراء و المساكين و اللامؤاخذه
المتحضرين أخر فيصل , عُبّاد البلاستيك و الجمال اللي مفهوش روح و الكلام الماسخ و
المصطلحات الأمسخ .
.
لولاش اني بمشي
في طريق شبرا بنها الحر بسرعه 140 كيلو كنت صورت لكو المشهد , و قلت لكو انا بدعي للراجل
عبد الفتاح السيسي ده كام مره طول الطريق , اللي اتعود عالسفر هيعرف ايه حجم الانجاز
في طريق زراعي حر طوله 40 كيلو ومفهوش مطب واحد و يوصلك من الدايري لبنها في 17 دقيقه
بعد ماكانت المسافه دي بتاخد ساعه تقريبا , أتاري مصر كان بيحكمها قبل كده غطا حلّه
!!.
.
انبهاري الوحيد
و الأوحد هو بالبلد دي , زي ماهي كده , جمالها في الريف و النيل و البحر و المدن الساحليه
و أثار عمرها ألاف السنين , جمالها في ضحكة الناس البسيطه و في امن يخليك تسافر على
طرق مقطوعه الساعه 2 بالليل , جمالها في لمة الناس و الدفا , و لو عالفلسفه يا مولانا
مش هتلاقي فيها اكتر من الفلسفه , بالمناسبه مانبهرتش أبدا بفلاسفة الغرب , وبشوية
كلام بلاستيك مترتبين بشكل حلو , و لما بحتاج أملى عقلي بالحكمه و الفلسفه بلاقيها
عند عواجيز البلد دي , الناس الطيبين اللي إيديهم و وشهم مشققين و الزمن خد من جتتهم
راقات , بس ماخدشي الإبتسامه .
.
بصو , اعتبروني
بخرّف , أول تخريفه في 2019 , كل سنه و حضراتكو طيبين .
......................................................................................................................
Mohamed
Hussein
31
ديسمبر 2018·
مالك يابني قالب
سحنتك و شايل طاجن ستك ليه ؟
- زعلان أوي أوي
يا أستاذ
.
زعلان من ايه يا
حبيبي ؟
- من سنة 2018
.
.
ليه بس ؟
- عشان السنه خلصت
و ماعرفتش أحقق أحلامي بتاعة 2018
.
ده على أساس انك
كنت خاربها تحقيق أحلام في السنين اللي قبل كده ؟! .
......................................................................................................
Mohamed
Hussein
31
ديسمبر 2018·
صباح الخير و العدل
و دولة القانون
.
الإرهابي عادل
عسليه بتاع اسكندريه اللي قتل المواطن المصري يوسف لمعي (صاحب المحمصه ) في 2017 اتنفذ
فيه حكم الإعدام شنقا و أهله استلمو جثته المعفنه
.
عايز أقول كلمتين
لكل أصدقائي الأعزاء الأفاضل
مصر دوله بيحكمها
كتاب اسمه كتاب القانون , مش بيحكمها كتب التراث ولا مجلة ميكي ماوس , و القانون يعني
قانون بيتطبق عالكبير و الصغير و الأبيض و الأزرق و الأحمر و المسيحي و المسلم والبوذي
و المنفلوطي .
.
عيب أوي لما وقت
حادثه زي دي ألاقي مجموعه من أصدقائي فعتشو و نكشو و دوّرو و اتشحتفو و قالو مش هيتعدم
عشان احنا بنطبق مبدأ (لا يؤخذ مسلم بذمّي ), وأه يانا يامه يانا يامّه , و منهم محامين
للأسف , والله عيب و ألف علامة استفهام و ألف علامة تعجب ولو فيه علامات للغثيان كنت
حطيتها.
..........................................................................................................
Mohamed
Hussein
30 ديسمبر
2018·
ذكرياتي في
2018
.
من كام شهر كانت
حماتي عامله عمليه و قاعده في مستشفى خاص و انا كنت بروح لها كل يوم , و فيه ممرضه
عمرها بتاع 26 سنه بتتابع حالتها , وانا كل ماروح أدّي للممرضه دي عشرين جنيه مثلا
, فضلت كده يوم و اتنين و تلاته لحد ماجيت في يوم و قررت إني مش هديها فلوس خالص .
.
أكيد مكانتش بتعامل
حماتك كويس ؟
- لا .
.
مش مهتمه بشغلها
؟
- لا
.
كلمتك بشكل مش
حلو ؟
- لا
.
اومال ايه السبب
؟
- أصل انا في يوم
ماروحتش , و سألت عليا
.
طب كويس , فيها
الخير و الله
- لا ماهي حضرتك
لما سألت عليا , قالت لهم ابقو سلّمولي على عمو!!, فانا في اللحظه دي حلفت مانا مديها
فلوس تاني .
.........................................................................................................................
Mohamed
Hussein
30
ديسمبر 2018·
عجبني أوي التفاعل
و التعامل بتاعنا مع حادث امبارح , أتارينا كبرنا يا ولاد و عقلنا و فهمنا و اتخلصنا
للأبد من الإسطوانات العبيطه المشروخه ولا بقى فيه حد بيركبنا و يسرح بينا , فشل امني
, السيسي بيقتل السياح , كتب التراث و شيخ الأزهر , الكماين الثابته , اقتلو اللي في
السجون , كبرنا الحمد لله و مابقيناش بريالة زي زمان , نشرنا صور مصر الجميله و فرحنا
و غنينا , وصفنا بهيه و عيون بهيه , حاربنا أعداء الحياه بالحياه ( على طريقة داوني
بالتي كانت هي الداء ) , وحطينا صباعنا في عين كلاب السكك و اللي وراهم واللي مشغلهم
و اللي كان مستني الفرصه .
عرفنا أخيرا إن
مصر دي جبل , و يا جبل ما يهزك ريح .
...............................................................................................................
Mohamed
Hussein
28
ديسمبر 2018·
بيتنا في البلد
, أرضنا الطاهره , مايه و خضرة و نسمة هوا و نور ربنا , مصر العفيه النديه , البحر
ده اللي عمره 10 ألاف سنه و ملهوش أول من أخر ماينجسهوش كلب أبدا , و لا ألف كلب .
.
هنزرع و نصنع و
نبني و نتعلم و نحارب , و طول مافينا الروح هنحب و نغني
.
#مصر_جميله
............................................................................................................................
Mohamed
Hussein
28
ديسمبر 2018·
أبانا الذي في
السماوات , اهدنا فيمن هديت
.
احنا شعب معجزه
بكل المقاييس , كان لنا كتالوج بس ضاع من زمان أوي , و مبقاش لنا كتالوج ولا ماسكه
ولا خط سير .
.
المسلمين بيهنو
بعض كل يوم جمعه و المسيحيين بيحتفلو براس السنه الميلاديه , تقوم يا مؤمن تصحى من
النوم تلاقي كمية تهاني قد كداهو , تهاني بتقولك , كل سنه وانت طيب بمناسبة أخر جمعه
في السنه الميلاديه !! ده اللي هو ازاي يعني ؟ .
.
بصو , احنا باقي
لنا تكّه واحده و بعدها هنعلق جرس فوق كل جامع و نعين شيخ من الأوقاف يأدن جوه كل كنيسه
, و أي ضيف غريب ييجي عندنا يتلخبط و مايعرفش هيصلي فين , و نجيب لكل أعدائنا شلل رباعي
بإذن واحد احد .
.
كل سنه و كل أهل
مصر المسيحيين الطيبين بخير و سعاده , و أخص بالذكر أصدقائي الأعزاء الغاليين مصطفى
و عبد الرحمن وسعديه و فاطنه .
........................................................................................................
Mohamed
Hussein
28
ديسمبر 2018·
الخارجيه المصريه
, المدرسه العريقه بنت الأصول و الحسب و النسب , لعبت واحد من أهم أدوارها على مر التاريخ
, اللي يفتكر مصر في 2013 و احنا تلتين العالم مقاطعنا , و الحلفاء اللي مش حلفاء و
الأشقاء العرب اللي مش أشقاء , و يشوف مصر حاليا اللي بتدخل في ملفات أقليميه و تسحب
أكبر كرسي , في السودان و أثيوبيا و سوريا و ليبيا و منطقة الخليج , هيعرف الناس دول
عملو ايه بالظبط في مرحلة ( المشي عالحبل ) و لو جت فرصه في يوم من الأيام و سألنا
سامح شكري , انتو عملتو ايه في ال 5 سنين دي ؟ هيقولك , فاضي قد تستعاشر سنه عشان أحكي
لك ؟! .
.
رأيي الشخصي اللي
مقتنع بيه تماما , إن أهم تلاته في كتيبة عبد الفتاح السيسي , هما سامح شكري و كامل
الوزير و رئيس المخابرات , و لو غاوي كوره و بتتفرج على ليفربول كتير , هقولك ان التلاته
دول في فريق عبد الفتاح السيسي يعادلو بالظبط الحارس أليسون و المدافع فان دايك , و
النجم العالمي محمد صلاح في كتيبة يورجن كلوب , يعني بيمثلو 90 % من قوة الفريق .
......................................................................................................................
ليست هناك تعليقات:
إرسال تعليق