بني أدم

طيب إيه اللي يبسطكو ؟ وإيه اللي يرضيكو وانا أعمله ؟ إني أقول المسيحيين كفار وولاد مره ؟ ماشي على عيني , أقول إنهم بيعملو حاجات وحشه في الكنيسه ومخبيين فيها سلاح ودبابات وقنابل ذريه ؟ حاضر...أقول إنهم بياكلو العيال الصغيره وعشان كده مش هسلم عليهم ؟ من عينيه!!.......مانا كنت بقول كده وبعمل كده والله لما كان عمري 15 سنه ,وكنت بحس بسعاده غريبه وجسمي بيأشعر كمان.. , وفي نفس الوقت ده كنت بحس بنفس السعا

ده لما أسمع إن طفل اتولد وايديه مقفوله ومحدش قدر يفتحها إلا الشيخ الشعراوي ولقى مكتوب فيها ( لا إله إلا الله محمد رسول الله ) سبحانك يارب , وإن بيت بيتحرق ويولع كل يوم من غير سبب لحد مالشعراوي دخله وقري فيه قرأن , وإن فيه غابه في ألمانيا أشجاره واخده شكل لا إله إلا الله.......وبعد شويه بدأت أكبر وأفكر وأفهم , بدأت أتخلص تدريجيا من مخزون الخرافات اللي ف عقلي , بدأت أحس إن إسلامي أعظم من أن يُبنى على تحقير الغير أو على الخرافات , هو في حد ذاته عظيم , أنا مش محتاج دليل كل كام شهر ألاقيه على شجره ولا بطيخه يؤكد على وجود الله , يكفي إني أبص للشمش والقمر ولطفل بيتولد وشيخ بيموت عشان أتأكد , ...بدأت أعيش بمبدأ ( لكم دينكم ولي دين ) , بدأت أستوعب الناس وعقلي يتفتح , بدأت أتحول تدريجيا من مراهق فكري إلى بني أدم....هي مشكله إن الواحد يبقى بني أدم , جريمه إني أبقى بني أدم ؟!.