Mohamed Hussein
12 فبراير 2015·
.. تنظيم داعش الإرهابي فرع
ليبيا أعلن مقتل 21 عامل مصري , السرطان الإخوانجي بينتشر في كل دولنا العربيه المتخلفه
, و الإرهاب هو الإرهاب كالجسد الواحد يشد بعضه بعضا .
.
مصر لازم يكون لها وقفه محترمه حتى لو اضطرت
تمنع العمال من السفر لليبيا بالقوه , ان شالله حتى يسجنوهم لو حاولو يسافرو , يا بشر
ليبيا مفهاش دوله عشان تحمي الناس , مفيش دوله عالخريطه حاليا اسمها ليبيا , و الله
يرحمه القذافي بقى فرحنا بقتله , أصله كان سفّاح !! .
..................................................................................................................
Mohamed Hussein
12 فبراير 2015·
حد يقولي
.
يعني ايه حكم بالإعدام و يتلغي و نقض و
استئناف و رد هيئة محكمه , و سنه في حيثيات الحكم و سنتين في الدفاع و 9 سنين في سماع
أقول شهود الإثبات و قرنين لسماع اقوال شهود النفي يكون المظلوم مات هو و المتهم و
نحاكم الورثه , و محضر و جلسه و رول و حرز و اعتراف بس اتلغى و تراجع فلان عن أقواله
و أجلنا النطق لجلسة 32 مارس , و المُحضر مجاش , أصل القاضي واخد أجازته السنويه ,
لا دي دايرة القاضي الفلان و بعد ما نهرتل كام شهر نكتشف ان القضيه مكانشي المفروض
تيجي هنا عشان المحكمه دي غير ذي صفه , أو لعدم الإختصاص , بس الدفاع هيشكك في صحة
أقوال شهود الإثبات و النيابه هتلعن في شهود النفي , وكيل النيابه ده ماله عامل كده
ليه , انا القاضي مش عاجبني و هطلب بتغييره , يااااااااه الحمد لله جت من عند ربنا
, القاضي استشعر الحرج و لا أقولك نستناه لما يأجل الجلسه مرتين تلاته قول تسعه عشان
بعدها هيطلع معاش و هنروح لقاضي تاني و نبدأ القصه بتاعة أبو زيد الهلالي و دياب و
ابو القمصان دي من أول مدح خضرة الشريفه , هات الربابه و استناني !! .
.
حد من الساده الأفاضل المحامين و القضاه
و وكلاء النيابه يقولي : هي المعجنه دي بتحصل في أي مكان في العالم ؟ بتحصل في أي دوله
يعني ؟ طب بتحصل حتى في جبلاية القرود ؟ نحكم في قضيه في 7 سنين ؟ داحنا هنعمل قناة
السويس الجديده في كام شهر , و الألمان بيصنعو العربيه البي ام في 3 دقايق , طب بلاش
الساده اللي فوق يقولو لي , قولي انت يا حاجب : فطرت و لا تيجي تفطر معايا ؟!.
...............................................................................................................................
Mohamed Hussein
11 فبراير 2015·
و بعد ما يأسو تماما من منع المؤتمر الإقتصادي
اللي هيحصل الشهر الجاي , و بعد ما حرقو وفجّرو و قتلو و خرّبو , و بعد ما هددو السياح
و الأجابب و السفارات , و بعد ما حاولو يظهرو الوضع في مصر على انه فوضى و غير أمن
, مالقيوش فايده قامو طلعو بأخر تقليعه , بقو يسمو المؤتمر الإقتصادي اللي بندعي له
كل دول العالم ل ( مؤتمر بيع مصر ) !! , و لا لبيع مصر بقى و كداهون ههههههههههههه
و بعدين اختلفو بينهم و بين بعض , شويه منهم قالو ده مؤتمر لبيع تراب الوطن و شويه
قالو لا ده مؤتمر اقتصادي عادي بس هيفشل بإذن واحد أحد .
.
ما ترسو لكو على بر ياخوانا , هو هيبقى
مؤتمر فاشل وانتو متأكدين من كده باعتبار إن الوحي بيجيلكو من السما أو من فيينا
!! , ولا هو مؤتمر لبيع مصر و انتو خايفين عليها أوي , مصر اللي بتطلعو عالجزيره تلعنو
سلسفيل أبوها ؟! .
.
هتقولي مين دول اللي بيعملو كده ؟ هقولك
هما اتنين مفيش غيرهم , بتوع كل مره , خروف بيركب و حمار بيتركب , لعنَ اللهُ الراكبَ
و المركوب !! .
.........................................................................................................................
Mohamed Hussein
11 فبراير 2015·
زاب ثروت أمير شعراء العصر الحديث , و الذي
خلع عليه شعبان عبد الرحيم بردته , هيطلع في التلفزيون مع خيري رمضان .
أهي الحلقه دي بقى بيسمّوها الوجبه المتكامله
, و الوجبه المتكامله يا ولاد بتقول بيضتين في اليوم مش بيضه واحده , أيوه بيضتين
, و كده تبقى خدت حقك كامل من البروتين , البرو (طين ) .
............................................................................................................................
Mohamed Hussein
11 فبراير 2015·
زي النهارده من 4 سنين
.
كنت في السعوديه و فاتح قدامي التلفزيون
عالجزيره و اللاب عالفيس بوك في الشغل , و في البيت نفس الشئ , 24 ساعه تقريبا , و
في العربيه فاتح الراديو على بي بي سي , عشان ماتفوتنيش فتفوته من أحداث الثوره , لسه
فاكر صوت ليليان داوود و هي بتذيع نشرات البي بي سي و برامجها الحواريه اللي بتستقبل
فيها مكالمات الناس .
.
يوم التنحي كنت قفلت الصيدليه و رايح مشوار
وقت العشا , سمعت خبر تنحي مبارك في البي بي سي وانا سايق , فرحت و دموعي نزلت , اتصلت
بكل اللي اعرفهم عشان أهني و ابارك .
.
لا يا افندم , أنا مانمتش في التحرير عشان
كنت بشتغل بره ( لقمة العيش بقى و الغربه تُرْبه ) , أه و ماطلّعتش كارنيه نقابة الثورجيه
للأسف .
.
لو حضرتك لسه مافهمتش إن 80% من اللي كانو
مع ثورة يناير قلبا و قالبا هما حاليا مؤيدين للسيسي , يبقى هقولك ألف ألف مبروك ,
انت دخلت كده في دايرة الإنكار بتاعة الإخوان , إنكار لكل شئ حتى الشمس , و مصيرك هيبقى
زي مصيرهم بالظبط , أيوه هتقف بهدوم قديمه و مقطّعه و معلّق على صدرك صفاره في إشارة
روكسي عشان تنظّم المرور بنفسك .
.........................................................................................................................
Mohamed Hussein
11 فبراير 2015·
كل ما بكتب بوست سياسي ولا اجتماعي ولا
حتى بيزنطي و بعمل بعدها ريفريش للصفحه بلاقي واحد أو اتنين عملولي بلوك , حتى لو كان
البوست عن حبي لأمي أو شكل بيتنا في البلد !! .
طب انا مش عندي مشكله في البلوكات الحمد
لله , قايمة طلبات الصداقه عندي أطول من طريق صلاح سالم .
.
إنما جالي احساس كده إني لو عطست عالصفحه
, مجرد عطسه يعني هلاقي اتنين برضه بيعملولي بلوك ( من نفس النوعيه بتاعة كل مره )
, واحد هيقول في نفسه : أصله استنى ثانيتين قبل ما يقول الحمد لله و ماقالشي مرسي راجع
( بلوك يا فاسق ) , و التاني هيقول : عطسته مش ثورجيه و مش قويه و مش هتجيب حق الشهدا
و لا هترجع فلوس مصر المنهوبه ( بلوك يا معلم ) .
.
الناس دي ما بتقراش ولا هتقرا و لا عندها
استعداد تفكر و لو دقيقه , هو الأولاني رافع اشارة رابعه 24 ساعه لحد ما صوابعه يبّست
و نشفت على كده و التاني لابس الكوتشي بتاع الثورجيه و مابيقلعوش حتى و هو نايم .
.....................................................................................................................................
Mohamed Hussein
11 فبراير 2015·
بعد زيارة بوتين لمصر و الإتفاقيات المصريه
الروسيه
.
أمريكا : علاقتنا بمصر قويه جدا و زي الفل
أه و عهد الله .
.
أمريكا : ليس لدينا مانع من إقامة محطه
روسيه في مصر تعمل بالطاقه النوويه و لو محتاجين أي مساعده احنا في الخدمه .
.
أمريكا : مفيش مشكله من صفقة الأسلحه الروسيه
لمصر , و لله الامر من قبل و من بعد .
.
أمريكا : مفيش مشكله لما مصر و روسيا يتعاملو
بالعمله المحليه بتاعتهم , و علاقة الدولار بالروبل و الجنيه أزليه من أيام خفرع و
منقرع , و دي مرحله و هتعدّي بإذن واحد أحد .
.
أمريكا : أنا برضه نغنوشه و حلوه و ألف
مين يتمناني .
........................................................................................................................
Mohamed Hussein
10 فبراير 2015·
في الطريق و انا راجع من المنصوره من كام
ساعه , هوا شديد جدا و عواصف ترابيه و برد , عمدان نور واقعه و أسلاك مقطوعه , و ربك
اللي بيستر .
في المسافه من بنها للقاهره ( اسكندريه
الزراعي ) عدّيت على فرع شجره كبير اتكسر و وقع عالرصيف , و اخد حارتين تقريبا , العربيات
كانت بتمشي بسرعه جدا و تيجي عند فرع الشجره و تاخد شمال خالص عشان تعدي بنفس السرعه
و محدش مهتم خالص .
المهم انا وقّفت العربيه و نزلت جرّيت فرع
الشجره ده لحد ما طلعته فوق بعيد عن الطريق , كنت فرحان اوي و انا بعمل كده رغم ان
الحاجات حواليا بتطير تقريبا .
مش بقول الموقف ده عشان ابقى منّان , بس
عايز أقول إني في التصنيف العام و في المجمل و في عيون ناس كتير و ( في البطاقه ) مش
متدين , بس لما عملت حكاية فرع الشجره دي حسيت إنه : هذا هو ديني , لهم دينهم و ليَ
دين .
..................................................................................................................................
Mohamed Hussein
10 فبراير 2015·
حزب الوفد يا حزب الوفد
.
حزب الوفد كان مأجل اعلان موقفه من الإنتخابات
البرلمانيه لحد بكره الأربع , و بعد زيارة بوتين الناجحه جدا لمصر طلع حزب الوفد النهارده
و قال : هنشارك في الإنتخابات و لغينا اجتماع بكره !! .
.
مع ان الرسايل اللي صدرت من اجتماع السيسي
بوتين كانت كلها موجهه لأمريكا و تركيا و دول الغرب , بس عارف انت لما تكون واقف قدام
حمار و جنب منه سحليه صغيره انت مش شايفها , و بعدين تنفعل عالحمار و تقول له : شي
يا حمار ؟ أهو في الوقت ده السحليه بتطلع تجري قبل الحمار , من غير مانت تشوفها برضه
.
.
يا سيد يا بدوي مصر و استقرارها و مستقبلها
السياسي مش ورقة كوتشينه بتشدها عشوائي كده و لو طلعت ولد تبقى هتشارك ولو بنت تبقى
لأ , المشاركه السياسيه يا سيد يا بدوي مش ورده تقطع منها ورقه بورقه و تقول بتحبني
لأ مابتحبنيش , مش بخت و لا يانصيب , يا نصيبنا المايل .
....................................................................................................................................
Mohamed Hussein
9 فبراير 2015·
زيارة بوتين
.
التحالف الروسي المصري , محاوله جاده لكسر
تحالف ( أمريكا بريطانيا تركيا اسرائيل قطر الإخوان الجزيره ) واللي بيسمّوه اختصارا
تحالف ( الربيع العربي ) , اللي له رساله واضحه موجهه لدول الشرق الأوسط اللي خارج
التحالف بتقول ( إحرق نفسك بإيدك و وفّر علينا تكلفة إننا نخربها ) .
.
هي صحيح روسيا مش بتبيع سبح و لا مقطّعه
حُصر الجامع و لها مصالح بتحاول تخدمها إنما المؤكد و الأكيد إن أمريكا هي الشيطان
الأعظم و على كل الأحوال مفيش حد في السياسه الدوليه ( بيبيع سبح ) !! .
.....................................................................................................................
Mohamed Hussein
9 فبراير 2015·
الواحد بقى دموي أوي من فتره كده , مش انسان
خالص و لا مرهف الحس و لا عنده سوشيال بوليتيكال انتيليجينس , مابيتشحتفش عاللي بيموت
و بيقعد يهري و ينكت في المؤامره و الإرهابيين و مصر اللي بتمر بأصعب مرحله طول تاريخها
, بيسيب الشهداء و الشباب اللي زي الورد و يتكلم عن التراب و العلم و النشيد و نكون
أو لا نكون و سينا و حلايب و المليون كيلو متر مربع و حمامات كليوباترا و المشربيه
و الأهرامات و الأرابيسك و قرص الطعميه و طبق العاشوره و زينة رمضان و عروسة المولد
و صوت النقشبندي و موسيقى السنباطي .
.
دموي أوي أنا , دموي مأصّل أبا عن جد ,
سليل عائلة دراكولا بالسنبلاوين , كل يوم الصبح بغير ريقي بكوبايتين دم و اتغدّى بدراع
عيل صغير , أقولك على حاجه ؟ خد مصمص دي , دي عين بت انما كانت ايه ؟ مزه مزه يعني
و عنيها عسليه كمان , على فكره العيون العسليه دي بتبقى طعمها يجنن , بناخدها تسالي
كده زي الفزدق و الفول السوداني , خد جرب و هتدعي لي .
..........................................................................................................................
Mohamed Hussein
9 فبراير 2015·
الحل هو : نلغي الدوري و نلغي مطار القاهره
!! .
.
عشان مش عارفين نأمّن ماتش كوره , و بنتعامل
بغشم مع أي أحداث فيبقى أبو قرش بجنيه و ابو جنيه بألف , و اللي مايشتري يتفرج , إحنا
نلغي الدوري و نوصل رساله زي الهباب لكل دول العالم , امريكا و البرازيل و فرنسا و
الهند و يشمت فينا النيبالي و السويدي وابن اخوه السويسري , و مصر بلد الفراعنه و الحضاره
و الأنبياء و الرسل و الأمن و الأمان مش عارفه تأمن ماتش كوره , يبقى الراجل بوتين
ده برياله و اللي يجي المؤتمر الأقتصادي أهبل , و النبي ياخويا أهبل .
.
من يومين روحت أجيب اختي من مطار القاهره
, و دي كانت أول مره ادخل فيها المطار من سنين ( أنا اساسا مادخلتش ) , كنا الساعه
3 بالليل معاد وصول الطياره , فوجئت بإيه بقى ؟ قالك ممنوع يا سيد , هو ايه ده اللي
ممنوع ؟ ممنوع تدخلو جوه المطار , ليه يا عم هو احنا صوماليين ؟ لا ممنوع الدخول ,
و اللي جاي يستقبل حد يستناه برّه في الشارع يعني ( في الصحرا من الأخر ) , الجو كان
برد جدا , درجة الحراره ماتزدش عن 6 , و لقيت ناس كتير واقفه بره , ستات و أطفال زي
حالاتي اترمو رمية ال ممممممممممم البني أدمين يعني , و لما سألنا و اتطقسنا عرفنا
السبب , ماهو أصلهم لقو قنبلتين تقريبا جوه حرم المطار فقامو منعو الناس من دخول المطار
بتاتا و نهائيا عشان يعرفو يأمنو المطار بقى !! .
.
ما علينا ان مفيش كراسي تقعّد عليها الناس
بره و لا كشك تشتري منه ازازة مايه و لا فيه حصيره حتى و زير و كوز للناس تشرب , بس
ايه رأيك في الفكره دي ؟ عجبتني أوي , احنا نمنع الناس من دخول المطار عشان نعرف نأمّنه
, طب ما نمنع الطيارات بالمرّه و اهو ساعتها نأمنه بدرجة امتياز و نغير اللوحه بتاعته
بقى و نسميه ( مش مطار القاهره ) !! .
.
هو انا عارف ان الحمل كبير على محمد ابراهيم
و ان الإرهاب مرشق في كل مكان و المجهود اللي بتبذله الشرطه هو 10 أضعاف مجهودهم في
الظروف العاديه , بس برضه عارف و متأكد إن اللي مايعرفشي يأمّن مطار و ماتش كوره يبقى
لوزر يعني فاشل .
...............................................................................................................
Mohamed Hussein
9 فبراير 2015·
عن ظلم الإنسان لابن خالته الإنسان !!
.
.
- بص في الصور كويس , اقرا التقارير , ماتش
كوره عادي مش نهائي البوندزليجا , مشجعين بيقتحمو , مش معاهم تذاكر , عربيات شرطه محروقه
, شغب و قلق في ظروف ما يعلم بيها إلا ربنا .
.
طيب , المشجع اشترى تذكره و راح قعد في
مكانه و دخل من البوابه المخصصه لكده و ماقتحمشي حاجه قام العسكري مطلّع البندقيه و
مفرغها فيه , ايه رأيك في الفيلم ده حلو صح ؟ و حبسوهم في سور حديدي 4 م في 4 متر و
ضربوهم بالمنجانيق .
.
ما تيجي نتكلم عن الإنسانيه ؟ , أأنتَ شققتَ
عن صدري ؟ دم الإنسان حرام , هي كيميا و انت عبقري و عرفت المعادله لوحدك ؟ أيوه دم
الإنسان حرام , الفاتحه لروح اللي ماتو ربنا يرحمهم و يرحمنا برحمته : بسم الله الرحمن
الرحيم الحمد لله رب العالمين الرحمن الرحيم مالك يوم الدين إياك نعبد و إياك نستعين
اهدنا الصراط المستقيم صراط الذين أنعمت عليهم غير المغضوب عليهم ولا الضالين
........... أمين .
.
تعالى بقى و هات انسانيتك معاك عشان هسألك
انت و هي سؤالين : السؤال الأول للإنسان المتوغل في قواعد الإنسانيه و لإنسانيته المرهفه
س1 : انت لما عرفت ان فيه شغب كنت بتتمنى يكون فيه قتلى ولا كنت بتقول يارب الموضوع
يبقى بسيط ؟!!
.
س 2 : لما عرفت ان فيه 5 قتلى قلت يارب
يبقو 20 و لا قلت يارب تطلع اشاعات مغرضه و مايكونشي حد مات ؟!! .
.
صدقني لما أقولك إن الشرطه فاشله و اني
بتمنى إقالة وزير الداخليه محمد ابراهيم , و صدقني برضه لما أقولك إنك لو وقفت قدام
مرايه و جاوبت على السؤالين دول بصدق هتبص لوشك في المرايه و تغرّقه تفافه , عشان انت
مش انسان مرهف ولا حاجه انت تاجر دم مش أكتر .
...................................................................................................................
Mohamed Hussein
9 فبراير 2015·
أشفق على عبد الفتاح السياسي من أصحابه
و رجالته الفاشلين أكتر ما أشفق عليه من أعداؤه .
اللهم قنا شر رجالة السيسي الفاشلين , أما
أعداؤه فهو كفيلٌ بهم !!.
.............................................................................................................................
Mohamed Hussein
9 فبراير 2015·
قصة عنب ديبو
.
- من سنتين تلاته وانا بحذر من 3 جهات مشبوهه
تماما ( غير الجماعه الإرهابيه الرسميه ) , و هما التراس اهلاوي ( بتاع خيرت الشاطر
) و وايت نايتس ( بتاعة ابو زفت اسماعيل ) و 6 زفت ابريل .
.
- أي تنظيم له قياده محدده ممكن تدي تعليمات
أو توجيهات للي تحتها يبقى سهل جدا السيطره عليه .
.
- الحكايه مش محتاجه 17 قلم على سهوه عشان
تعرف ان القيادات دي متباعه زي أي جوز جزمه بتشتريه من الفاترينه بفلوسك .
.
- السيناريو متكرر و اتكرر و هيتكرر , تسخين
من القيادات و شباب متحمس يلبس يا معلم , في الوقت ده بتبقى القيادات دي فص ملح و داب
, هي بتسخن بس و بتبدأ النار و بعد كده تنسحبو طبعا شعاراتها وبوستاتها و بياناتها
اللي هتقولها بتبقى جاهزه من قبل الماتش باسبوعين تلاته .
.
- الشرطه رغم غشمها و عشان مفهاش عقل بيفكر
بتقع في نفس الفخ , و في المره دي تحديدا هقول رأيي والأرزاق بالله , الشرطه الغشميه
بريئه من دم الشباب ده .
.
- الحل استمرار مسابقة الدوري و بمشاركة
الجماهير كمان مع تأمين زي مخاليق ربنا من ناس بتفهم مش غشيمه , أي قرار بوقف المسابقه
او إلغائها هتبقى حققت لجوز الجزمه اللي هما عايزينه , تصدير صوره سلبيه جديده .
.
- فيه مؤتمر اقتصادي جاي , و المطلوب من
الجماعه الإرهابيه و جزمها انهم يطلّعو مصر بشكل سلبي تماما في الأمن , الإقتصاد يعني
الإستثمار , والإستثمار عدو الإنفلات الأمني , يعني في المؤتمر ده وبالصوره الأمنيه
الحاليه بالكتير نبقى نعمله حاجه عالضيق كده و نتكلم فيه عن مشروع أكشاك سجاير لشباب
الخريجين .
.
- أنا نسيت حاجه اخيره , أيوه افتكرت ,
الفاتحه لروح اللي ماتو يا رجاله , هات يابني السبحه من جنبك , و نسيت ايه كمان ؟ أه
صح , و هات الكوفيه الفلسطيني و الكوتشي : تسقط الفاشيه و المجد للثوره و عاش جيفارا
محرر الأوطان !!
.................................................................................................................................
Mohamed Hussein
8 فبراير 2015·
أحمد عز أعلن بصفه رسميه ترشحه للبرلمان
!! , حقها و لا مش حقها يابو كمال ؟ ماهو طالما الشباب مقضيّنها بوستات و تويتات و
كوتشي و كوفيه فلسطيني و مظاهرات و فردتين كاوتش محروقين تبقى الكراسي فضيت و من حق
أي كلب يدخل و ينجح .
.
طب ترشح أحمد عز في رأيي انا هو أكبر دليل
إن مفيش أي صفقه أو حتى علاقه بين السيسي و بين فلول الحزب الوطني , عشان العقل بيقول
باختصار إن أحمد عز كان واحد من أشهر رموز مبارك الفاسدين و هو مايلزموش كرسي البرلمان
ده يعني ما يلزموش الترشّح , و لو كان يهمه موقف السيسي و شعبية السيسي مكانشي اترشح
.
.
هو عارف انه كارت مكروه من الناس و نزوله
هيتحسب عالسيسي بالسلب , الناس هتقول فلول مبارك راجعين في عهد السيسي , يبقى لمصلحة
مين بقى الحركه المستفزه دي ؟!! .................حاول تفكّر .
...................................................................................................................................
Mohamed Hussein
7 فبراير 2015·
من ساعة ما أعلنو عن اسم محافظ الإسكندريه
الجديد هاني المسيري و بدأت المعركه .
.
مفيش ساعتين زمن كانو البنات حضّرو رسايل
ماجستير و دكتوراه في أدق تفاصيل هاني المسيري ( من غير ما يراعو شعورنا و الله )
, و اللي تقولك راسم على دراعه تاتو , ترد صاحبتها , لأ ده مش تاتو ده رقمه في سباق
الدراجات يا جاهله , و إيشي كلام عن الغمازات و أرنوبة مناخيره و كده يعني .
.
ساعتين كمان وكانت العاركه لرب السما بين
بنات القاهره و بنات اسكندريه , بنات أليكس ينشرو صورة الواد المز و هو في كل حته و
بنات القاهره يتفرسو بقى و يغيرو و يولّعو .
.
النهارده الصبح طلعت مرات هاني و نشرت صورتها
معاه و هي قاعده على حجره على ترابيزة السفره هييييييييييييييييييييييييح داحنا هنضحك
ضوحك .
.
طب هقول لكو حاجه و تصدقوني , عندي اعتقاد
ان تعيين هاني المسيري ده كانت حركة من المخابرات , السيسي قالّك نجيب محافظ مز أوي
و نشبّط القوتين العظميين في بعض ( اللي هما بنات القاهره و بنات اسكندريه ) , و نعمل
لهم خطة إشغال و بكده أضمن حكم مصر لمدة 4 ألاف سنه جايين .
....................................................................................................................................
Mohamed Hussein
7 فبراير 2015·
حزب الدستور يعلن عدم مشاركته في الإنتخابات
البرلمانيه القادمه , و ذلك بسبب #$%^#@*^))0@# , مممممممممممم طب و الله انا شايفها
أسباب منطقيه للإنسحاب و خصوصا السبب ده #%$ و لا انتو ايه رأيكو يا شباب ؟
و لو سمحتو محدش يسألني : هو فيه حزب اسمه
الدستور ؟ عشان السؤال ده عيب و حرام , أيوه فيه حزب اسمه الدستور و شعبيته في الشارع
جارفه ( زي مليونيات الإخوان كده ) بس لا يراها إلّا الكولجيه .
...........................................................................................................
Mohamed Hussein
7 فبراير 2015·
هروح معرض الكتاب , جايز بقى احتمال يعني
أقابل زاب ثروت هناك بشخصه كده , بشحمه و لحمه , معقوله ممكن ؟ و ليه لأ ؟ , مفيش حاجه
كتيره على ربنا , و يوقع لي على اوتوجراف كمان أو باراجراف أو حتى الفالنه و الشراب
, أنا أصلي بحلم ب 3 حاجات في حياتي , أقابل زاب ثروت و أسلّم على تامر هجرس .
و اركب حمار عجوز و معايا علبة سمنه فاضيه
و عصاية و اخبّط عليها زي الناس زمان و ألفّ شوارع مصر و أقول : يا أهل مصر المحروسه
و الحاضر يعلم الغايب , فرح أميرنا شريف مدكور على الأميره ريهام سعيد يوم الخميس
, و الكل مدعو لتقديم الهدايا و العطايا , و اللي مش هييجي هنبعت له الأميره و الأمير
لحد البيت و قد أعذر مَنْ أنذر , يا أهل مصر المحروسه ................... .
............................................................................................................................
Mohamed Hussein
7 فبراير 2015·
المختصر المفيد في وصف اليمن السعيد
.
- عبد ربه منصور زعل لما الحوثيين اقتحمو
عليه خلوته في قصر الرئاسه و حلف بأيمانات المسلمين ما يبات في القصر ده تاني , واستقال
بقى هو و الحكومه , بس ماسابشي حُكم البلاد لحد , هو زعل كده و خد على خاطره و رمى
المفاتيح و خد شنطة هدومه و مشي و خلاص .
.
- الحوثيين بقى بعد ما كانو خدو واجبهم
المره اللي فاتت و انسحبو , رجعو تاني لقصر الرئاسه و جابو معاهم وزير الداخليه و وزير
الدفاع و أصدرو إعلان دستوري فيه مجلس رئاسي من 5 افراد و حل البرلمان و توفير مخزون
من القات يكفي البلاد و العباد و قالو اليمن تحكمها اللجان الثوريه ( اللي بيبقو لابسين
شبشب بصباع دول ) .
.
- المجتمع الدولي أغلبه رفض الإعلان الدستوري
ده على اساس انه مش صادر عن جهه ذات صفه رسميه , يعني باختصار , المجتمع الدولي وجه
رساله للحوثيين و قال لهم : انتو مين اساسا عشان تعملو اعلان دستوري في اليمن ياض انت
و هو ياض انت ياض ؟
.
- قام الحوثيين بعتو رساله للمجتمع الدولي
و قالو لهم : احنا مين ؟ بقى يهون عليكو العيش و القات و البارود اللي واكلينه سوا
يا كفره يا ولاد الحرام ؟! .
.
في هذه الأثناء , أشادت قناة الجزيره و
توكل كرمان الحاصله على نوبل للسلام و وكالة الأناضول و الرئيس أردغ و جماعة الإخوان
و الكولجيه و طارق سويدان و أيمن نور بنجاح الثوره اليمنيه .
......................................................................................................................................
Mohamed Hussein
6 فبراير 2015·
هاني المسيري محافظ الإسكندريه الجديد
, 42 سنه , عنده خبره رائعه في مجال الصناعه و البنوك و عنده خبره في الإستثمار و التخطيط
و إدارة العمال ( محليا و دوليا ) و عنده خبره في العمل الميداني و الجماهيري , و عنده
غمّازات .
.......................................................................................................................................
Mohamed Hussein
6 فبراير 2015·
هلفطه
.
مرّه و انا في السعوديه دخلت انا و مراتي
محل بتاع نجف و كريستالات , كنا لسه متجوزين و بنلفّ بقى و ندخل المحلات على طريقة
( عَمْ نتفرّج ) , المهم لما دخلنا المحل لقينا الأسعار حلوه أوي , و عجبتنا نجفتين
صغيرين الواحده ب 150 , و اختلفنا انا و مراتي نشتري واحده بس و لا نشتري الإتنين
, المهم قلت لها خلاص هشتري الإتنين و نشيلهم لمصر , و قمت انا مطلّع من جيبي ورقه
ب 500 ريال و قلت للموظف انا عايز الإتنين دول و استنيت عشان يرجّع لي الباقي !! .
.
الراجل بص لي من فوق لتحت كده و قالي بمنتهى
القرف , النجفه الواحده حضرتك ب 150 ألف ريال يبقى الإتنين ب 300 ألف .
طبعا انا طلعت من المحل و انا وشي جايب
ألوان و مبلول فشر مرسي يوم 30 يونيو لما قالوله يالله يابه شطّبنا خلاص , و قعدت اهلفط
بكلام كتير مش فاكره , غالبا كنت بقول أنا الرئيس الشرعي , أنا الرئيس المنتخب , أنا
عتريس , أنا بلوه مسيّحه .
.......................................................................................................................
Mohamed Hussein
6 فبراير 2015·
حجم المشكله , و الحل أهو : أكلة سمك
!! .
.
- في مصر , العيال بينزلو يتظاهرو عشان
حقهم في قانون التظاهر !! , يعني بالظبط كأنك بتبيض عشان تمارس حقك في إنك تبيض .
- و الإرهابيين بيحرقو عشان حقهم في الحرق
و التخريب بموجب نصوص مولانا سيد قطب و المرشدين و التابعين ( الوطن حفنه من تراب عفن
) .
- و الهربانين بيحرّضو طوب الأرض على بلدهم
و بيفبركو و يهددو و يسخّنو و يحرضو من أعالي البحار عادي يعني .
- و الحكومه بتستشعر الحرج و مش عارفه تسقط
الجنسيه عن الهربانين المحرضين على خراب مصر و لا عارفه تنفذ حكم الإعدام في اللي بيحرق
و يقتل .
.
- و الإعلاميين اللي من النوع الفشيخ لسه
فيهم ناس لما السيسي بيهرش في مناخيره عفويا بيكتبو مقالات و كتب و مجلدت حوالين المعنى
و المغزى من الهرشه دي , و أثر هرشة السيسي في ارتفاع سعر النفط و انهيار بورصة طوكيو
و تفكك الإتحاد السوفيتي , لسه عندهم نفس المشكله في تقبّل فكرة إن السيسي بني أدم
زيه زينا بيمشي في الأسواق و يأكل الطعام و بيهرش أحيانا و يعمل بيبي عادي يعني من
غير أي معنى أو مغزى , هما باختصار امتداد للكاتب الفشيخ ممتاز القط اللي كتب مقال
لمبارك بعنوان : طشة الملوخيه .
.
و هي دي بقى التركه اللي اترمت في حِجر
السيسي , الأولاني عايز يتظاهر وياكشي تولع و التاني يحرق و ياكشي تولع و التالت يحرّض
وياكشي تولع و الحكومه تهوّي عالفحم و ياكشي تولع .
.
هي دي باختصار المشكله و حجمها بس لو حضرتك
عايزني أبقى بهلول و سألتني حجم المشكله في مصر و علاجها ايه ؟ هقولك مصر مفهاش مشكله
و كل اللي محتاجاه هو راجل مبروك بمبخره كده ويبخّرها 7 مرات عشان الحسد و العين اللي
فلقت الحجر , أو على رأي عم جلال الله يرحمه , مصر زي الفل و مش ناقصها غير أكلة سمك
.
....................................................................................................................................
Mohamed Hussein
6 فبراير 2015·
خبر في اليوم السابع : مقتل 35 من عناصر
داعش في غارات أردنيه على الموصل !! .
.
على فكره الموصل دي في العراق , و العراق
غير الأردن , دولتين يعني ( أيام ما كانت العراق دوله ) , بس العراق من عشره خمستاشر
سنه بتنعم بالديموقراطيه الأمريكاني ( اسأل كارتر كده عن العراق ؟ ) , و الحكومات العراقيه
المتلاحقه من يوم مفتل صدام حسين ( السفّاح عشان تبقى مرضي و كده ) و هما بيلعبو دور
الواد اللي في فيلم التجربه الدنماركيه , أيوه الواد ده اللي متجوز البت اللي قاعدتها
مش قاعدة أول دُخله !! .
و من يوميها و العراق أي عيل صايع بياخدها
من جوزها و يطلع بيها مشوار , يعني العراق بعد الديموقراطيه الأمريكاني بقت بتتأجّر
بالساعه زي ريري سيلان بمباركة ( راجل ) البيت .
.
الله يرحم بغداد و مجد بغداد , و يرحم البابليين
و الأشوريين و يرحم الدوله العباسيه اللي حكمت نصف الكره الأرضيه و يرحم فطاحل الشعراء
العرب و مكتبة بغداد و دجله و الفرات و يرحم تاني أقوى الجيوش العربيه في العصر الحديث
.
...............................................................................................................................
Mohamed Hussein
6 فبراير 2015·
كتب التاريخ حكايات
عنِّك و ما توفِّي
لو ألف شاعر نطق
بالإسم هيكفِّي
.
أنا مرَّه كنت زمان
مطلوب في أغنيه
و مسكت ورقه وقلم
فكّرت مش عارف
جايز عشان مبتدئ
جايز أكون خايف
و نصحني أهل الهوى
بنصيحة جَتْ لُقطه
قالو لي اكتب مصر
و بعدها نُقطه !! .
.
ماهو انتي فيكي العَجَب
حتى العجب عاجب
و فيكي غُلْب اتكتب
بس الرضا غالب
على راسي لو تعدلي
و عارفه لو تظلمي ؟
عالعين و عالحاجب
.
أمشي الطريق سوّاح
درويش و بيغنّي
و بعدّ فيكي جراح
ما خيّبت ظني
و تعيشي يا مؤمنه
هتعيشي يا مؤمنه
لو كان عشقتك أنا
من قلبي أو عنّي !! .
...................................................................................................................................
Mohamed Hussein
6 فبراير 2015·
ده باينه مرار طافح
.
العيال المثقفين التنين بتعرفهم عالفيس
بوك بسهوله أوي , تلاقيه كل كام يوم كده و في ساعة عصاري يكتب عالفيس #يشرب #القهوه
, #يقرأ #لأحمد #مراد , #يستمع #لفيروز .
لدرجة انه والمصحف الحكايه بقت ستامبه كده
محفوظه مكرره , يشرب القهوه يستمع لفيروز يقرأ لأحمد مراد .
و العيال بتوع العصير بقو يسمو العصير بتاعهم
بأسماء غريبه , يعني تلاقي مثلا عصير اسمه ( عيّل نُص لبه ) , عصير ( أباتشي ) و كده
يعني .
.
بعد عشره قول خمستاشر سنه هتعرف المثقفين
التنين عالفيس بسهوله برضه , هتلاقيهم بيكتبو كل كام يوم في ساعة عصاري #يشرب #عيل
#نص #لبه , #يستمع #لأورتيجا , #يقرأ #لزاب #ثروت ........ و هيبقى ده زمن
الفن الأصيل , كامل الخلعي و حسن أبو لغد .
......................
.....................
عارفه يا مصر و ما ليكي عليا يمين , لولاش
غلاوتك عندي و معزّتك كنت خدتك في ركن كده في أوضة مقفوله علينا و سبّيت لك 100مله
و دين , و هبقى بدعي على ولدي و اكره اللي يقول أمين .
.
قريبا في الأسواق , ديوان زاب ثروت الجديد
: ( حبيبي هرش لي في قفايا و محدش كان معايا ) .
..........................................................................................................................
ليست هناك تعليقات:
إرسال تعليق