طيب نقول تاني , ثورتنا بيضا وذي الفل , والبركه في الشباب فعلا , إنما مبارك مكانش هيرحل إلا بعد ما الجيش تخلى عنه , قادة المجلس العسكري بقى حلوين ولا ولاد وسخه مش مهم , هي دي الحقيقه , كان ممكن مصر تقلب ذي سوريا ومنعرفش بعدها أي معالم للثوره ولا نعرف مين مع مين بيضرب في مين ؟, وكان زمانا لاجئين في ليبيا ولا السودان ومشايخهم بيبيعو ويشترو في بناتنا تحت اسم الشريعه والستره , تخيل كده إن بنتك الحيله اتجوزت واحد سوداني عنده 70 سنه ب 200 جنيه سوداني!! , ما علينا , أنا من الناس اللي مؤمنه تماما بضرورة نزول الجيش لدعم المتظاهرين والثوار وإلا نظام الإخوان بميليشياتهم مش هيرحل عن مصر ولا بعد ألف سنه , الجيش اتعلم الدرس , متورط في قتل صحيح لكن مصيبته الكبرى كانت الجهل بالسياسه , عشان كده الإخوان لعبو بيهم وفيهم , واحنا كمان اتعلمنا الدرس , مش عايزين الجيش يحكم إنما يشارك في الحكم كمرحله مؤقته لمده سنه , نعمل فيها مجلس رئاسي مدني ودستور محترم ونحط قواعد للديموقراطيه محترمه ذي الدول الكافره ولاد الحرام اللي اخترعو الديموقراطيه , أصدقائي الأعزاء اللي بيعزفو بالربابه على رومانسية الثوره وبيقولو الجيش وحش وكخه , سؤالي : حضرتك عندك حل تاني ؟, وهل تعتقد إن الثوار لوحدهم هيواجهو ميليشيات الإخوان وكلاب الشرطه والدعم الأمريكي الإسرائيلي القطري ؟!!, يا مولانا إنت بتحارب نص الكره الأرضيه تقريبا , كل الخليج ضدك وأمريكا ضدك هتعمل إيه ؟!
.
محمد حسين
ليست هناك تعليقات:
إرسال تعليق