-علاقة
المصريين بالمخ والدماغ علاقة غريبة،يعنى هاتلى واحد فى العالم بيقول على
المخ (طاسة)..او واحد ينصحك فيقولك:-ياعم كبر الجمجمة..النصيحة اللى اتحولت
فى شكلها المودرن ل:- كبر ال (جى) ، وليط ال(دى).
-طب بذمتك شفت شعب بيقولك:- ياعم اشترى دماغك..اللى هى أصلاً بتاعتك ومش محتاج تشتريها.
-ولما حد يشتم دماغ واحد تانى ، تلاقيه دايما بيرمط بين الدماغ والقدم:-يعنى دايما تلاقى الشتيمة..:- الواد ده دماغه جزمة..او صرمة قديمة
-وفى روايات اخرى:- الواد ده دماغه متربسة...دماغه والف سيف(برضو مش عارف العلاقة بين السيف والدماغ..وليه الف تحديداً)
-ولما حد بيصيع على التانى بيوصفوا العلاقة دى بجملة:- الواد كل بعقله (حلاوة)..
-وفى مدح الدماغ ستجد عبارات من نوع:- الواد ده دماغه زى الالماظ...الواد دماغة توزن بلد...دماغه متكلفة بصحيح.
-
مما سبق..تقدر تستنج ان احنا كمصريين بنتكلم عن الدماغ اكثر مما
نستخدمها،وزى ماقال عمنا جلال عامر قبل كده:-..المصرى مابيستخدمش المخ الا
فى السندويتشات
محمد عبد العزيز
ليست هناك تعليقات:
إرسال تعليق