منوع حتى 10 نوفمبر

October 30

صباح الخير , العريان في اللومان ( ينفع اسم فيلم ) , كده العدد كمل , ولع بقى يا عمنا , مش هنسى أبدا إن الإخوان دول كان قدامهم فرصه تاريخيه يوم 25 يناير , فرصه بتيجي مره واحده في التاريخ , كلمتين حلوين للشعب ويلمو الناس بدل ما يفرقوهم ويكفروهم , واحنا شعب نحنوح بطبعه وبيسامح بسرعه , رؤساء مصر السابقين كان فيهم فساد كتير بس موقعوش في الخطيئه الأكبر , اللي هي انك تلعب في دين المصريين وتكفرهم , كده انت بتلعب في عداد عمرك , فرصه جت على طبق من دهب إنما نقول ايه بقى ؟ ربنا سبحانه وتعالى بيسلط على الإخوان غبائهم كل مره , إوعى حد يضحك عليك ويقول لك ده شغل مخابرات , هي مخابراتنا المصريه جامده صحيح لكن مش لدرجة إنها تزرع في عقول الإخوان فدان غباوه وترويه وترعاه لمدة 80 سنه , دي حاجه كده بتبقى إبداع شخصي من عند الشخص نفسه , إبداع وتألق في الغباوه , دي جينات وعلم كبير اسمه ( عبقرية التخلف العقلي ) !!.

إنما سؤال عدم اللا مؤاخذه , هو ليه كل واحد من قيادات الإخوان لما بيتقبض عليه بيلاقوه لابس لبس البوابين السودانيين ؟ جلابيه بيضا مرهرطه , وشعر منكوش وشبشب من ابو صباع ؟ ليه كده يا عثمان ؟ مفيش مره مثلا تدخل الشرطه علي حد منكو وتلاقيه لابس ترينينج أديداس ولو صيني حتى ؟ أو بنطلون برمودا وتي شيرت نوكيا وسابوه كده يكون لايق عالطقم ؟ واحد هيقولك أصلنا ناس بتوع ربنا وقياداتنا دول جامعي حسنات هااااااحححح( من أقوال محمد بديع ) !! , أه يا سيدي مانا عارف إن قيادتكو جامعي حسنات , حتى بالأماره خيرت الشاطر عنده 14 مليار دولار ( و حسنتين ) في بنوك سويسر , إنما نرجع مرجوعنا لعم عثمان البواب , قصدي عم عصام العريان , ما الخيبه لا تكون فاكر إنك بلبسك ده تبقى متنكر ؟! , يا حمار يا بهيم , هو ده الستايل بتاعكو اللي معروف للناس أصلا , لبس الدراويش والبهاليل عشان تصعبو عالغلابه والمتخلفين , بالك انت يا عثمان لما كنت في السلطه وكنت بتلبس بدله وكرافته أهو ده بقى يبقى التنكر بتاعك , وتلاقيك كنت بترجع من التصوير ( في الجزيره ) , وترن الجرس على مراتك ولما تفتح لك الباب وشها يحمر ويسمر وتقول لك ( انت عايز مين يا بيه ؟ الله لا يسيئك جوزي مش موجود , عنده تصوير في التالافازيون ) !!.

ولما يجيلك طلب صداقه من واحد متعرفوش وتلاقي بينكو 1800 صديق مشترك !! , يا سنه سوخه ؟ 1800 صديق مشترك ؟ بالحضن يا جدع , دانت مش بعيد تطلع أخويا , أو عمي الغني أوي اللي عايش في البرازيل و هيموت بعد كام يوم واورث عنه المزرعه والمصنع وتلتين ريودي جانيرو !!.

أشفق تماما على كل شخص فاهم إن الرومانسيه هي القاعده مع حبيبته عالبيسين بتاع هيلتون رمسيس أو السهر في كافيتريا الماريوت , أو تعزمها على عشا فاخر في سيتي ستارز أو ديسكو معرفشي فين ؟!! ......... بتصعبو عليا والله ( واللي مايعرفش بيقول بابي ومامي !! ).
الرومانسيه يا مولانا هي خيمه صغيره في الصحرا وقُلة مايه ونسمة هوا ساعه عصاري , سما مفتوحه على مدد الشوف , الرومانسيه هي التسكُّع في عيون مَنْ تحُب !!.

سي فيهات بقى ( جمع سي في ) , سي فيهات مصري أم الأجنبي !!
.
1-

الإسم : فلان الفلاني
.
الجنسيه : رابعاوي
.
الديانه : إخوانجي
.
النوع : حسب ما يقول المرشد
.
المهنه : نجار نابلويا أد الدنيا
.
الهوايات : الشحتفه على قناة الجزيره ( ضربونا بالنابالم والمنجانيق واحنا بنصلي في الكعبه يا بيه ) !!.
.
أشهر الكلمات المستخدمه : الشرعيه , النهضه , الشرعيه , بتوع ربنا , الشرعيه , المشروع الإسلامي
.
2-

الإسم : فلان الفلاني
.
الجنسيه : نحنوح
.
الديانه : أوبن بوفيه
.
النوع : تتح ( حبه فوق وحبه تحت )
.
المهنه : ناشط سياسي وعاطل عن العمل وقاعد على القهوه وصايع لحد ما نلاقي صايع , عنده قطه شيرازي في البيت وامه بتصرف عليه هو والقطه !!
.
الهوايات : الإعتصام من تسعه لسته وبعد كده النحنحه والغرغره على القنوات الفضائيه ( في الواقع أأأأأأأأأأأأ ) !!.
.
أشهر الكلمات المستخدمه : حق الشهدا , القصاص , يسكت يسكت حكم العسكي , عيش وحريه ومزه على القناه الفضائيه !!.
.
3-
.
الإسم : م . ح !!
.
الجنسيه : مصري أوي ( واختصارها مصراوي ) .
.
الديانه : مصري قبطي مسلم
.
النوع :ذكر جدا ( والجمع ذكران ) !!.
.
المهنه : ببيع نوفالجين فاصوليا وفوار فواكه وقاعد عالفيس ماسك الشبشب في إيدي ...... ( ورد في الأثر أن الشبشب هو الطريقه المثلي للقضاء على الصراصير والفئران والعلوج )
.
الهوايات : الشعر وسومه وسلخ الخرفان !!
.
أشهر الكلمات المستخدمه : أنا إنْ قدّرَ الإلهُ مماتي ..... لا ترى الشرقَ يرفعُ الرأسَ بعدي !!.

ده اسمه هبل وهطل , المخابيل اللي نازلين يمنعو تصوير برنامج باسم يوسف , كل واحد في أم البلد دي ماشي بدماغه , اللي مراته مزعلاه بينزل يعتصم ضد الحكومه , والعاطل عن العمل بينزل يعتصم ضد باسم , خروف إخوانجي الصبح وخروف سياساوي بعد المغرب وخروف برادعاوي حتى مطلع الفجر , خدمة الخرفان عندنا بقت 24 ساعه , والخرفان كتير وبقى عليهم عرض زي البيتزا , تشتري خروفين وتاخد عليهم خروف مجانا

October 31 · Edited

صباح الخير , إمبارح بالليل وبالصدفه كده اتفرجت على قناه اسمها ( القدس ) لمدة 10 دقايق , سمعت فيها كلمة انقلاب ييجي 50 مره , خبر عاجل ( قوات أمن الإنقلابيين تتصدي لمظاهرين سلميين في جامعة الأزهر من مؤيدي الشرعيه ) , جيش الإنقلابيين يستمر في حملته في سيناء , وزير خارجية الإنقلابيين معرفشي راح فين , عامل سنافور في حكومة الإنقلابيين ضرب ابنه بالقلم عشان صحاه من النوم , مرات واحد من مؤيدي الشرعيه رافعه قضيه عشان غسيل ست ام شوشو الإنقلابيه بينقط على غسيلها , مظاهرات حاشده في كافة المدن المصريه ضد الإنقلاب العسكري ( الصوره جابت بالظبط 37 متظاهر باينين في الكادر !! ) , ومعنا من لندن الشيخ فلان للحديث عن الإنقلابيبين في مصر ؟ شيخ فلان ممكن تقول لنا ايه رأيك في الإنقلابيين ولاد الكلب ؟ الشيخ : دول انقلابيين ولاد كلب !!.
.......................................................................
هي مش قناة القدس دي فلسطينيه وهتحرر المسجد الأقصى هي وخالد مشعل ؟ طيب شاغله بالها بينا احنا الإنقلابيين ليه ؟ .
.......................................................................
وبعد 10 دقايق من الفرجه على قناة القدس , وصلت لقناعه شخصيه ( يعني قناعتي انا ) , أنا هحط في بؤي بياده واسكت ( مش جزمه لأ بياده ومقصوده على فكره ) .
مطلوب من عبد الفتاح السيسي ( زعيم الإنقلابيين ) إنه يضرب بحزم , يضرب بالجزمه ( النحانيح قبل الإخوان ) , وبطّل نحنحه وسهوكه في الكلام يا سيسي , بلا نور عنينا بلا زفت , لو عايز تبقى زعيم فعلا , فانا معرفشي إن مصر بتجيب زعيم نحنوح , لو عايز تتسهولك وتتنحنح يبقى مكانك مش هنا , البنك الأهلى هيوفرلك فيلا وبيسين في فيينا !!.

محمد الجوادي بيقولك السيسي هيحتل كل الدول العربيه اللي ساعدته في الإنقلاب ( ولا مؤاخذه ) !! , عرفتو بقى مين في مصر يبقى هو ( إله ) ال (هااااححححححححح ) ؟!!.

أتدرين ما هي الديموقراطيه يا صفيه ؟!
.
الديموقراطيه هي ان طلاب الإخوان ينزلو يخربو ويكسرو في جامعة الأزهر والنحانيح يقولو هي وزارة الداخليه دخلت تتعامل معاهم ليه ؟ لأ مالهاش حق , المفروض نبعت لهم مندوب من وزارة البيئه !!.
.
الديموقراطيه هي ان بلد بقالها 3 شهور بتحارب في أم الإرهاب الإخوانجي وحالها واقف , وتلاقي النحانيح بيقولو لك ( بقالنا 3 شهور و معملناش دستور ولا انتخابات رئاسيه ولا حد أدنى واقصى للأجور ولا عالجنا مشكلة الزباله ومحينا أمية 40 مليون ولا رصفنا الطرق ولا طلعنا القمر ولا صنعنا مركب فضائي من شواشي الدره ) !!.
.
الديموقراطيه هي إنك تشتري بطيخه وتفتحها تلاقي فيها بذر فتقرف أوي وتنزل تعتصم في الشارع وتطالب بحق كل مواطن في بطيخه من غير بذر !!
.
الديموقراطيه هي إنك تقعد في القريه السياحيه وجنب منك المزه وفي إيدك إزازة البيره وفي بؤك سجارة الحشيش وتقول ( فين حق الغلابه في البلد دي ) !!.
............. هي دي بقى الديموقراطيه ولا مؤاخذه يا صفيه , ديموقراطية الزندوق , ديموقراطية بوس الواوا !!.

وانا في الجامعه أيام الحماس والغباوه , كنت بشارك في كل المظاهرات اللي بتنظمها أسر الإخوان وكلها كانت لأسباب لها علاقه بيهم هما , يعني مفيش مظاهره ضد الفساد ولا ضد الغلاء ولا ضد الجهل والفقر والمرض , إنما مظاهرات لمنع المحاكمه العسكريه لمجرميهم , مظاهرات للإفراج عن زمايلنا المعتقلين , مظاهرات لتحرير القدس ( حلوه تحرير القدس دي ؟ حلوه يا حاج محمد ؟) , وانا اطلع بقى وراهم زي المخبول ( مش بقول لكو أيام الحماس والغباوه والغشم ) , المهم في الوقت ده كنت بلاقي ميكروفونات كبيره جوه الجامعه سألت واحد اخوانجي زميلي إنت بتدخلو الميكروفونات دي إزاي ؟ قالي أساتذتنا بتوع الإخوان بيدخلوها في شنطة العربيه لأنهم مش بيتفتشو !!.
والحمد لله لسه أساتذة الإخوان اللي في الجامعه بيهربو ميكروفونات ودلوأتي ممكن مطاوي وسنج ومولوتوف أو حتى أسلحه .... وأكيد لما يتزنقو هينظمو مظاهره لتحرير القدس ...المظاهره رقم 56734 !!.
أنا أطالب عبد الفتاح السيسي بتأمين بوابات الجامعات بعناصر من الجيش وتفتيش كل سيارات الدكاتره والمعيدين والطلبه تفتيش كامل , مصلحة مصر وحرمة الدم أهم من التعليم , ...... بلا حرم جامعي بلا حرم المرحوم !!.

November 1

مساء الخير , صباحيه مباركه على كل الحلوين في يوم الهالوين , كلٌ يبكي على ليلاه , قمة الرعب بالنسبالي مش إني أشوف عيل لابس ماسك عفريت أو أشوف شكل أم أيمن , لأ , يكفيني جدا إني أسمع تامر حسني وهو بيغني وحبذا لو كانت أغنيه فيديو كليب رومانسيه متصوره , يعني بشوفه وبسمعه في نفس ذات الوقت , يا خفي الألطاف نجنا مما نخاف , المشهد ده مرعب جدا يا سعادة البيه , أصعب من مشاهد دراكولا , وعقلي بيخرجه بطريقه أبشع من ( هتشكوك ) بجلالة قدره .
بترعب لما بسمع بنت أو ست تقول إنها بتحب شريف مدكور !! , مراتي معجبه بيه و بتقول لي إنه راجل بيس كده وسو كيوت !! ( وكل مره أقول لها بس متقوليش راجل !! ), عشان كده تقدر تقول إن الهالوين عايش معايا وجوايا , هالوين من يومنا والله !! .
و فيه كلمات وجمل بشوفها مرعبه جدا , زي ( الإخوان بتوع ربنا , والبرادعي سابقنا بمليون سنه ضوئيه , أو لما بسمع عبود الزمر وهو بيقول الثوار دول إرهابيين !! ) , أصلا أصلا الخوف والرعب والفزع دول لهم مركز محدد في مخ الإنسان , وهو اللي بيصيغ المشهد بالطريقه اللي تعجبه , المركز ده شبه مركز ( ديروط ) كده , عارفه يا حاج محمد ؟ طيب ابقى اسأل عليه , والمثل بيقولك ( إسأل إرهابي ولا تسأل نحنوح ) !!.

يقول المثل البرازيلي الشهير : ( كوني له أحمد موسى يكن لكي عبد الفتاح السيسي !! ) .
والترجمه العربي يعني حبيه من قلبك و كل ما يتكلم كلمه تقولي ( ههاحححح ) , هتلاقيه على طول بيقولك ( إنتي مش عارفه إنك نور عنيا ولا ايه ؟! ) .
في مصر وصلنا لمرحله متقدمه جدا , صناعة الألهه بقت عندنا أوبن بوفيه , يعني حضرتك ممكن تشيل صنيه على إيدك كده وتدخل المعبد المصري , وتعبي بقى ما لذ وطاب , خدلك حته من كتف الإله برادعي , لأ لأ خليه بعد الأكل ده عشان تحلي بيه , إبدا بدراع الإله خيرت الشاطر وخدلك زلموكه من الإله ابو الفتوح , طيب جرب دي بقى وادعيلي , حته من رقبة الإله السيسي !!.

ماهو طول ما حضرتك لسه فاكر إن قطر والجزيره وحماس والإخوان بتوع مشروع إسلامي وعايزين يحررو القدس ( ولا مؤاخذه ) يبقى مش من حقك تفتح بؤك لما أقولك إن مصر قدرت في اليومين وكام ساعه اللي فاتو إنها تصنع مركب فضائي من شواشي الدره ( اللي كنا بنعملها سجاير واحنا عيال صغيرين ) !! ... وإن المركب الفضائي ده هينطلق في إحتفاليه تاريخيه بعد بكره الساعه 5 من قاعدته في ( جُرن الهبله ) , ومتتكلمش خالص لما أقولك إن عادل عبد العال لقى عشبه كده تحت السرير بتعالج الإيدز والضعف الجنسي وتساقط الشعر والفشل الكلوي وتسوس الأسنان وحب الشباب !!.
.
أنا مش صعبان عليا في عقول الناس غير المصاريف اللي اتصرفت عليهم والله , وسنين العمر اللي ضيعوها هدر , رايحين المدرسه و جايين من المدرسه , طباشير بقى وسبورات وتُخت , وكراسي , ومدرسين وموجهين وحضرة الناظر ولوح حائط وجرس وفراش وشهادات وورق خرائيط , ودورة كربس والحمله الفرنسه والأنثى بيكون عندها مبيضين , وأثر المناخ على ساندوتشات الحلاوه بالقشطه , وساندوتشات بتعملهاله أمه كل يوم ومعسكر مغلق في الثانويه العامه , وابني الأستاذ رايح المدرسه وبنتي الدكتوره راجعه من الكليه , واخويا المهندس ماشي بمسطره حرف تي , 12 سنه علام لأ 15 لأ 17 عليا ب 19 , مش كنا نوفر على البلد المصاريف دي ونتعلم لنا صنعه أحسن ؟ طيب والله الصنايعي بيبقى راجل كسيب ويفتح بيت واتنين !!.

و اسمع يابن الناس , لما تلاقي نفسك متضايق أوي أو مخنوق وبدل ما ترتكب جنايه ولا تقعد تعمل بلوك لأصحابك هقولك نصيحه , إنت في الوقت ده تضرب لك 5 أقراص باركينول , هيبقى مزاجك عنب وتلاقي نفسك ماشي عالحيطه زي الصراصير , بس بقولك ايه ؟ الباركينول تشتريه من صيدليه محترمه يكون فيها تكييف عشان التخزين يبقى كويس وإلا هتلاقي نفسك وقعت من عالحيطه , وراسك من ورا اتخبطت في السيراميك , أه في الحته دي بالظبط , ليه بقى ؟ عشان مفعول الباركينول هيخلص منك في نص الطريق !!.

November 2

صباح الخير , منعو برنامج باسم يوسف !! , طيب مين اللي منعه ومنعه ليه ؟ الله أعلم , قنوات cbc إعتذرت , طيب أنا هفترض إن فيه كام ألف من محبي السيسي وصلو لدرجة الخرفنه ورافضين إن إسم مولانا المعظم يتذكر كده في برنامج كوميدي ولو من بعيد ( مع إن وعزة جلال الله الحلقه اللي فاتت كانت أحلى دعايه مجانيه للسيسي لو كانو يفقهون ) , طيب هفترض إن صاحب القناه هو كمان حمار وقال نبعد عن المشاكل ؟ طيب مساعدين السيسي حمير وفهمو إن اللي بيعملوه كده صح وقالو نبعد عن المشاكل ؟!.
.......................................................................
إلى عم الحاج عبد الفتاح السيسي , بعد التحيه , يوم 30 يونيو وبعدها بشهر واتنين كانت شعبيتك في السما , ولو اترشحت رئاسه تفوز دور أول بنسبه مش أقل من 65 % وانت مدلدل رجليك في ماية البيسين , دي حقيقه , وبعدين يا مولانا شعبيتك عماله بتقل بسبب الشريحه المتخلفه من أنصارك , و كلمتين هقولهم لك لو عايز تبقى رئيس مصر أو حتى زعيم من غير رئاسه , إمنع الأشكال الوسخه زي عكاشه وموسى ومرتضى منصور وبقية الطبالين وإدي أوامر بعودة برنامج البرنامج بدون قيود , الأخير مش هيضرك في حاجه واللي في الأول بيمثلو أكبر دعايه سلبيه لك , وإلا هتبقى حمار زي اللي قبلك , ماهو كمان كان فاكر شعبيته بتيجي على إيد عبود الزمر وعاصم عبد الماجد وأم أيمن وبعدين لبسوه في الحيطه , ......... إبقى افتكر كلامي ده يا عبقتاح

فرح العمده بقى وحفلة طهور وصاجات ودانس على صفحات أصدقائي البرادعاويه , وكلمات من نوعية ( دولة السيسي ...تسقط الفاشيه ... ده اللي قولنا لكو عليه , البرادعي سابقنا بمليون سنه , السيسي أوسخ من مرسي ...) .!!.
عندي اعتقاد إن البرنامج هيتذاع النهارده , وساعتها الشماته اللي في عين البرادعاويه هتتقلب عليهم و هيبقى الفرح والصاجات على صفحات السيساويه , إنقل يابني الكهارب من هنا .
الحكايه باختصار إن كلكو شوية خرفان , خرفان اخوان خرفان سيسي خرفان برادعي , ولو مولانا البرادعي بقى رئيس مصر إنت أيوه إنت هتبقى أوسخ من أحمد موسى !! .
مصر كأرض ووطن هي الأنضف والأرقى بين دول العالم , وشعبها هو الأوسخ على الإطلاق , هي دي الحكايه لا نافع معانا ثورات ولا يحزنون .
.
إحنا عايشين في شم النسيم بقالنا 3 سنين , و في شم النسيم كنا بندهن الخرفان الي عندنا في الزريبه بألوان مختلفه , واحد أخضر , واحد أصفر , واحد أحمر .... بس مكنتش بشوف خروف أصفر بيتريأ عالخروف الأحمر ولا العكس .
...........كل خروف يلزم لونه ويبص في المرايا ويشوف قرونه وميتريأشي على الخروف التاني , و محدش يقولي لي ثوره ولا حق شهدا ولا زفت , كل واحد عايز إلهه الأعظم يمسك البلد و ياكشي يخربها مداين .

سجارة حشيش !!
.
إمسك عفّر دي , وتعالى هقولك , بتحب مصر يا ميمي .؟ من قلبك , بتحبها من قلبك ؟ طيب ايه رأيك بقى إن عبد الفتاح السيسي المفروض يكون رئيس مصر الجاي ؟ استنى بقى مش تتنفض كده , إشرب لك نفسين كمان وراجعلك , هه ؟ هديت كده ؟ طيب هقولك ليه , لو جبت أعظم مركز لاستطلاعات الرأي في الكون ونزلته مصر يعمل استطلاع لرأي الناس هتلاقي إن الوحيد اللي ممكن يحظى بشعبيه معقوله هو السيسي , طيب يعني ايه الكلام ده ؟ اشرب لك نفس كمان , يعني هو الوحيد اللي ممكن يحظي بتأييد تلتين الشعب ده على الأقل , طيب يا سيدي احنا محتاجين 50 % + 1 لأي رئيس هييجي , لأ غلط , إشرب نفس , في الأيام دي محتاجين نسبه أكبر عشان البلد تهدى , محتاجين توافق وطني على أي شخص سواء كان اسمه السيسي ولا البرادعي ولا صباحي ولا غيره , مركز استطلاع الرأي هيعمل في الرسم البياني ( الشارت ) عمود طويل كده للسيسي وعمدان صغيره للباقيين , ومتبقاش دماغك وحشه وتقول ماحنا هنلبس العمود ده في الأخر , لأ مش شرط , يعني هو انت لما تلبس عمود صغير هتبقى كده عذراء وخضره الشريفه ؟ .
الحكايه يا ميمي إن مصر تعبت أوي أوي , بتنهج , بتزعق وتقول جاي , لو عليا أنا وبحكم إني بني أدم مدني العقل والنزعه والهوى فانا عايز البرادعي بس يسترجل شويه أو حمدين , إنما عايز الحق اللي دايما بيزعل , إحنا محتاجين حد نتفق عليه بنسبه كبيره عشان مصر محتاجه تستقر فعلا وتاخد نفسها وتشرب بؤ مايه , وبعدها نكمل براحتنا .........هات نفس بقى عشان انا زهقت مني يا ميمي

أنا أؤمن تماما بدولة التخصصات , أتدرين ماهي التخصصات يا صفيه ؟ , يعني الطبيب في عيادته لابس البالطو الأبيض كده ومعلّق السماعه في رقبته ومالي مركزه , والمهندس في موقفه لابس الخوزه ومالي مركزه , والمدرس في فصله واقف زي الأسد ماسك الطباشيره ومالي مركزه , وال ....... في قصر الرئاسه قاعد عالكرسي كده ومالي مركزه , وائل قنديل في الجريده ماسك الصاجات كده و مالي مركزه , والبرادعي في فيينا مدلدل رجليه في ماية البسيسين كده ولابس المايوه الكاروهات ومالي مركزه , كل واحد بيختار مهنته وتخصصه بنفسه ومحدش بيضرب حد على إديه....التخصصات يا صفيه.......... التخصصاااااااااااااااااات !!.

في أوروبا والدول المتقدمه بيعملو مسابقه كده أو جايزه ل ( أسوأ حاجه ) , يعني أسوأ فيلم , أسوأ مسلسل , أسوأ ممثل , أسوأ لاعب كره , أسوأ سياسي , واللي بيفوز بيروح يستلم الجايزه دي ويبتسم للكاميرا لأنه أسوأ واحد !! ,....... هو احنا ليه منعملشي مسابقة زي دي عندنا ؟!
في رأيي الشخصي
أسوأ ممثل : تامر هجرس
أسوأ مقدم برامج اجتماعيه : شريف مدكور
أسوأ مقدم برامج سياسيه : مناصفة بين تامر أمين وخميس بتاع مصر 25
أسوأ سياسي : محمد مرسي بجداره
أسوأ مطرب : مناصفة بين تامر حسنى ومصطفى قمر .
أسوأ 3 جمل : الإخوان بتوع ربنا ...المصالحه الوطنيه ... البرادعي سابقنا ب 18 فدان تقريبا .
أسوأ مخرج من عالدائري : هو مخرج المرج
أسوأ مطلع عالدائري : أكيد هو مطلع المرج برضه.
أسوأ اختراع في القرن ال 21 : التكاتك
أسوأ واحد بيعمل فطير في القاهره : الفيومي اللي في جسر السويس .
أسوأ لاعب كره : كلهم وليس جميعهم
أسوأ صحفي : مناصفة بين وائل قنديل واسم ايه ده بتاع طشة الملوخيه ( ممتاز القط تقريبا ).

مبارك حكم مصر 30 سنه , عمل فيها مؤسسات كامله من الفساد , عدد المنتفعين من فساد مبارك كان عشرات الألاف , ويفترض إنه حرامي كبير أوي وعنده مليارات وأسلحه ويقدر يشتري طيارات وصواريخ وقنابل ذريه لو يحب .... ومع ذلك أثناء محاكمة مبارك الملياردير الفاسد كان أقصى حاجه ممكن تحصل قدام قاعة المحكمه إنه يتجمع متين تلتميت واحد من أنصاره يشيلو صورته ويهتفو ضد الثوره ويحدفو الناس بالطوب !! , بعد بكره محاكمة محمد مرسي اللي قضى سنه واحده في الحكم واللي بيفترض إنه محيلتوش حاجه لا هو ولا جماعته ( ناس بتوع ربنا وجامعي حسنات !! ) , والمفروض إنه ملحقشي يكون مؤسسات فساد له ومع ذلك ابقى شوف بعنيك وتابع المشهد ...ساعتها هتدور على مبارك في كل مكان وتروح تبوس رجليها وتقول له ( هو انت كنت عظيم أوي كده ومصري للدرجادي واحنا منعرفش ؟) !!.

كلمة السر بتاعة المخابرت المصريه هتتغير في الفتره الجايه من ( خالتي بتسلم عليكي ) , إلى ( إبن خالتي عايز يتجوزني ) !!.

November 3

صباح الخير , جمله سمعتها كتير أوي وحققت بيها ( الثلاثيه المعجزه ) , من سنتين كانو الإخوان بيردو على رأيي ويقولو ( إنت خيالك مريض وكاره تطبيق شرع الله...........1 ) ومن كام شهر بقيت أسمعها من بعض البرادعاويه ( إنت خيالك مريض وكاره تعيش في نضافه.........2 ) وإمبارح سمعتها من السيساويه ( إنت خيالك مريض ومتعرفشي السيسي عمل ايه لمصر........3 ) ............ المشترك في الثلاثيه المعجزه دي هو خيالي المريض , طب والله أنا عندي جلدة الحنفيه بتسرب مايه في الحمام , بقيت خايف أنتقدها ألاقي ( الشفاط ) بينطق ويقولي ( انت خيالك مريض ومش مقدر دور جلدة الحنفيه ) , إنما احنا شعب مثقف أوي وتركيبة الجمله دي ( خيالك مريض ) بتعني إننا وصلنا في الثقافه إلى أبعد نقطه , خيالك مريض مش طحالك مريض ولا قلبك مريض ولا عقلك مريض ولا ابن خالتك مريض ....لأ لأ خيالك هو مريض , طيب والخيال المريض ده الواحد يعالجه فين ؟ أيوه يعني دكتور تخصصه إيه اللي بيفهم في الحكايه دي ؟ دكتور خيال وتهيؤات ؟

November 3

من الأخر عشان الخنقه و كداهون !!
.
البرادعي ممكن يكتب تويته عشان برنامج اتوقف ويتكلم عن حربة التعبير والرأي لكن ميكتبشي تويته لما تتفجر كنيسه أو يتقتل جنود , حرية الرأي والتعبير أهم عنده من حرمة الدم !!
النحنحه هي دين البرادعاويه وشريعتهم .
من كام سنه وأيام الهجوم الصهيوني على جنوب لبنان , كان فيه ممثله أمريكيه شهيره بتشتغل سفيره (للنوايا ولا مؤاخذه الحسنه ) , أياميها زارت جنوب لبنان والدم كان هناك للركب والقتلى بالألاف , بس هي علقت على حاجه تانيه خالص , قالت إن الصواريخ الإسرائيليه أصابت الطيور في جنوب لبنان بالإنزعاج و إنها تخشى من حاله نفسيه سيئه للطيور ربما تدفعهم للهجره !!.
البرادعي أخره يشتغل سفير ( للنويا ولا مؤاخذه الحسنه ) ويتكلم عن الحاله النفسيه للعصافير !!.

يا رب حته جيب شيروكي سوده 2014 زيرو , وشقه في الرحاب 175 متر , و 3 مليون في البنك ( لأ جنيه مش دولار ) , والمصريين يفهمو إن نقاشة البيت بتبقى بعد عمل العمدان والخرسانه مش قبل كده !!.

خبر لن تقرأه على صفحات الأهلاويه , الزمالك فاز النهارده ووصل لنهائي كاس مصر , وباقي له ماتشين اتنين وصورته تنزل عالجنيه , إمنعو الضحك ... زملكاوي مفقوع.

إنما أجمل حاجه في أم الليله بتاعة الثوره دي اللي عايشين فيها من 3 سنين إن شباب الإخوان , واخدلي بالك انت ؟ شباب الإخوان ( بلاش الكلمه التانيه عشان أنا مؤدب ) , بعدا ماتنفخو نفخا مبينا في 30 يونيو , هتلاقيهم دلوأتي بيقولو علينا عبيد !! أه والله عبيد و ضد الديموقراطيه والتحرر !! , حاجه كده تخلي الشيطان يجيله حول وتساقط في الشعر وحَب شباب فجائي , وتخلي النجوم والمجرات والنيازك تخبّط في بعضها من كتر الضحك والقهقه !!.

November 4

صباح الخير , النهارده محاكمة مرسي البهلول , وبجد والله أنا خايف على مصر أوي في الأيام الجايه , والمثل بيقولك ( لا تحاكم الإرهابي ولا تخلي الإرهابي يحاكمك !! ) , فيه لقطه مصوره بيقول فيها الإرهابيين إن مرحلة التصفيات الجسديه لسه مبدأتش !!.
حاكمنا مبارك اللي حكم 30 سنه ومكنتش خايف ...قيادات نظام مبارك كلهم اترمو في السجن ومحصلش تصفيات جسديه , هي دي كل الحكايه , الأول كان فاسد وحرامي والتاني فاسد وحرامي وإرهابي ...سيبك من الكلمتين الأولانيين في التعريف وركز في التالته , التالته تابته , مصر بتحتمل إن يكون فيها فصيل حرامي أو فصيل فاسد , لكن لا مصر ولا أي دوله في العالم تحتمل وجود فصيل إرهابي .
أصدقائي الأعزاء بتوع المصالحه والفصيل الوطني , عايز أقول لكو في عيد الحب ( كل سنه وانتو طيبين ....دباديب وقلوب بقى ) وبخصوص قضيتكو العظيمه بتاعة ( قوم نتصالح ) إسمحو لي أقول لحضراتكو إنها هانت خالص , هتشوفو بعنيكو ...... وزي ما بيقول الإنجليز ولاد الحرام wait and see !!.

أتمنى من لجنة تعديل الدستور الحاليه أن تضع ماده رئيسيه في الدستور المصري الجديد تنص على أنه لا يجوز للأغبياء أن يترشحو للرئاسه , الحكايه بسيطه خالص , كشف طبي وتحديد مستوى الذكاء , لو كان مستوى ذكاء المرشح يصل إلى درجة أحمق idiot ...يبقى لا يصلح ترشيحه , مصر مش هتحتمل إن يحكمها غبي أو أحمق تاني .

نياهاهاهاهاهاها , توكل كرمان بتقول عن محاكمة مرسي ( أنتم على موعد مع زعيم الثوره المصريه ) !! , أه ياني يامه , يا مُرك يا مهجه , بس الست توكل لا مؤاخذه كرمان مقالتشي أنهي ثوره ؟ ثورة يناير ولا ثورة يونيو ولا ثورة عرابي ...والنبي حلوه ثورة عرابي دي ....ويكتبوها كده في كتاب التاريخ ( هذا ومن المعروف أن محمد مرسي هو قائد ثورة عرابي وأن إبراهيم عبد الغني هو قائد ثورة سعد زغلول ) !!.
داهيه تاخد بتوع اللمون اللي اخترعو في جولة الإعاده حكاية إن مرسي مرشح الثوره دي , أهو الموضوع اتطور وبقى هو زعيم الثوره مش مرشحها بس , ولو ضغطت على توكل كرمان شويه في قناة الجزيره هتقولك إن محمد مرسي هو مينا موحد القطرين وهو اللي بنى السد العالي بتاع عبد الناصر وهو اللي جاب البلن في كاس العالم بتاع مجدي عبد الغني !!.

November 4

عارف يعني ايه خنقه ؟
.
يعني المحصل بتاع الشركه ييجي عشان ياخد الإيراد , تديله الإيراد والمفروض يمشي بقى , تلاقيه شد كرسي وقعد جنبك , لازق في الكمبيوتر ده ( أيوه ده ) , ويقولك هات الأله الحاسبه عايز أحسب كل الفلوس اللي حصلتها من ال 20 صيدليه !! , تدي له الأله الحاسبه يقعد يعد ويجمع الفواتير ويعد تاني ويجمع ويرجع يعد وبعدين يقولك خد عد الفلوس دي يا دكتور كده , أفتكرت اللمبي لما كان بيعد فلوس النقطه في المطبخ بتاع الكباريه , وانت معاك كام ؟ وانت ياللي لابس بالطو أبيض معاك كام ؟! , المهم أدينا عالحال ده بقالنا ييجي ساعه , اللي فقعني بقى إن الضهر أدن والمحصل مشترك في خدمة الأدان على موبايله وسمعت الأدان بقى ( أشهد أن محمدا رسول الله ...أشهد أن عليا ولي الله ) !! , يا سنه سوخه , هو انت طلعت منهم كمان ؟ وديني بكره هتيجي تلاقيني راشش مايه في الحته اللي انت بتقعد فيها دي أو كاسر فيها إزازة دوا تكون رخيصه و الكرسي ده هخفيه من الصيدليه نوهائي

يخرب بيت كده ...ده مرسي هيجيب شلل للقاضي من أولها , يابني البس الترنينج الأبيض الله لا يسيئك داحنا لسه بنقول يا هادي , يا فتاح يا عليم يا رزاق يا كريم , إلبس يا مرسي , طيب أقولك إلبس البتاع ده وانا هقول عليك رئيس شرعي وهجوزك هنومه !!.

مبارك كان بيقول على ثورة يناير عشرين خمسه وعشرين واحد مأجورين والنهارده مرسي بيوصف ثورة 30 يونيو بإنها إنقلاب !! , واحد فيهم كان بيتفرج على النايل تي في 24 ساعه والتاني بينام ويقوم قدام الجزيره , مصر محتاجه رئيس يكون في إيده ريموت كنترول و بيعرف يقلّب في القنوات !!.

مرسي لما كان رئيس : أهلي وعشيرتي , أبلج ولجلج , دونت ميكس , سكينة الكهربا , الدرايفنج مينفعشي يكون درانك , نشكر باكستان على دورها في حرب اكتوبر , 56734 في حاره مزنوقه , أنا اشتغلت في ناسا بس عمري ماشتغلت فيها !!.
.
مرسي في أول يوم محاكمه : أنا الرئيس الشرعي , 30 يونيو دي إنقلاب , المحاكمه باطله , مش هلبس الترنج , قررت عزل السيسي ومحمد إبراهيم !!
.
................. أه هو بعينه وغباوته , والله يا أخي إنت سرك عجيب , لا قدرت تخليني أتعاطف معاك في رئاسه ولا في محاكمه !!

حزمتين برسيم وطوّاله وخروف بقرنين و شوال تبن وجردل مليان مايه و 4 حيطان فيهم فتحات شبابيك صغيره أوي , وبوابه قديمه عليها ترباس مصدي و جو خنيق , ............ مممممممم هي دي الأدوات المتاحه معاك يا فنان , تقدر تعملي منهم قرية سياحيه ؟! ....... طبعا متقدرش , فيه غيرك يقدر , أصل معاه دكتوراه في الفن التجريدي ولا مؤاخذه !!.
............... كلمات في فن المصالحه .

هو تقريبا كده حد من قيادات الجماعه المحظوره فهِّم مرسي قبل المحاكمه إنه يعيش دور الرئيس تماما , عشان كده جه لابس البدله وأصر إنه ميقلعهاش ( هو فيه رئيس من غير بدله ؟ ) , وأقال السيسي ومحمد إبراهيم وطلب من القاضي إنه يفرج عنه عشان يروح يباشر مهام عمله كرئيس ورد على كل الأسئله بجملة أنا الرئيس الشرعي , يعني حبك الدور زي ماتشرح له بالظبط بس حبّ في أخر اليوم إن هو يحط التاتش بتاعه فطلب إنه يتعشى سمك وجمبري !! .
بالمناسبه يا حاج مرسي , الرؤساء مش بيتعشو سمك وجمبري , بعيد عنك وعن السامعين بيتعشو جبنه ومربى وزبادي وزتون , الجمبري ده بيبقى في الغدا ......... المره الجايه والنبي بلاش تحط التاتش بتاعك .

November 5 · Edited

صباح الخير , إنت كافر ولا فلول ولا عبد للبياده ؟! , الإجابه هتلاقيها عند اللي بيسألك ( صديقك الإخوانجي ) , عنده السؤال والإجابه حاضره , و وراه النحانيح بيقولو أمين .
أيام ماكان الإخوان محتاجين أصوات السلفيين والجهاديين قالو شريعه وغيرهم كافر ( اللي هو حضرتك ) .
وأيام ما كانو محتاجين الثوريين قالو مرسي مرشح الثوره قدام شفيق , و غيرهم فلول ( اللي هو حضرتك ) .
ودلوأتي بيقولو إحنا المدنيه ضد حكم العسكر , لو مش معاهم تبقى عبد للبياده ( اللي هو حضرتك ) .
.
مش ملاحظ إنك من أول يوم وانت مجرد كوره شراب في رجل خيرت الشاطر ؟ خايف من ربنا وروحت انتخبت أبو الفتوح عشان إسلامي ولا مؤاخذه معتدل ومش إخوان !! , وخايف على حق الشهيد وروحت انتخبت ولا مؤاخذه مرسي عشان مرشح الثوره !! , وخايف على حلم الحياه المدنيه و بتقول يسقط حكم العسكر !!.
.
يا مولانا إنت عايش حياتك بتردد ورا خروف كبير مش أكتر , ماشي وراه وبتقول أمين , ولما يسوقك خروف متحاولشي تقنع نفسك إنك عالم ذره أو واد فتك في علم السياسه .
.
هه ؟ قولي بقى هتنزل إمتى تتظاهر ضد العسكر ( اللي هما مش بيحكمو أساسا ) كتفا إلى كتف جنب صديقك الإخوانجي ؟ إوعى تفرط يا ميمي في حق الشهدا , ومتنساش إن أمال مصر وأحلام الشهيد ومستقبلنا في كاس العالم كلها متوقفه على عودة أبو اسماعيل ( المرشح المدني ضد العسكر )!!.

وقلت لها يا مصر يا بنت الناس راجعي نفسك مانتيش حمل بهدله وشعبطه في القطورات .
قالت لي " مش طايقه يا محمد , مبقيتشي طايقاه الراجل ده ولازم أهج من البيت .
.
طيب يا ستي خدي نفسك كده وفكري الأول إنتي هتهربي وتروحي فين ؟
.
قالت لي : مش مهم أروح فين , أي مكان أرحم من هنا .
.
........ وفعلا خدت بؤجتها وراحت سطّحت على ضهر القطر اللي لاقته واقف وجاهز في المحطه , القطر اتحرك وهي فوق منه فاردة جناحاتها للهوا , ومستنيه المحطه اللي بتحلم بيها , بعد محطه واتنين وتلاته لقت إن الدنيا بتضلّم أكتر مع إننا لسه في أول النهار , بصت على اللّوح اكتشفت إن السواق واخدها في طريق تاني خالص , فضلت تنادي عليه وتقول له يا عم والنبي يا عم نزلني هنا , وكل ما السواق يسمعها بتنادي وتصرخ يزوّد السرعه أكتر .
مصر ضمت إيديها اللي كانت فارداها بعد ما كتشفت إن مفيش هوا بيلعب في جناحاتها وفكرت تعمل ايه ؟ , قالت مفيش حل غير إني هنط من عالقطر , واستنت لما السواق يهدّي شويه في أي مزلقان ونطت فعلا , شوية كسور ورضوض بسيطه , هي دلوأتي في المستشفى وبتتعافى بإذن الله , بيتها اللي هربت منه مش راجعاله تاني بس ربنا يتوب عليها ويحفظها من السواق وجماعته , ومن الواد الغتيت إياه , اللي كل شويه يروح لها المستشفى ويبغتت فيها ويقول لها ( مش إنتي اخترتي القطر والسواق بنفسك , كان لازم تكملي الطريق يا مصر !! ).
.
يا رب تدخل ممرضه عالوادالغتيت ده وتديله حقنة هوا وتريحنا منه !!

جماهيريات !! .
.
وعلى فكره , أنثى الضفدع لو سابت ذكر الضفدع في موسم التزاوج وهربت منه عشان حبّت مشبك غسيل كان واقف في البلكونه وكانت مفكراه برص أد الدنيا , وجيت حضرتك سألتها إنتي سيبتي جوزك وهربتي ليه يا هانم ؟ ... هترد برضه بنفس الرد وتقولك ( أخاف ألا أقيم حدود الله ) !!.
.
يا بنت الناس دانتو كنتو داخلين على موسم تزاوج وكان كلها ساعتين تلاته ونسمع ( النقيق ) بتاعكو جايب لأخر الشارع , وبعدين إنتي سبتيه عشان مشبك غسيل ؟! تقولك : بس متقولشي عليه مشبك غسيل , أنا مسمحلكش , أنا حبيبي برص أد الدنيا يا محمد , بس هو ساكت كده ومش بيتكلم عشان مكسوف مني , أصله ابن ناس وحساس !!
.
.
................. وقالك بقى , مصر رافضه عريسها اللي جاي وبتفكر إنها تهرب مع مشبك الغسيل الحساس !!

واضح جدا إننا كشعوب عربيه مالناش علاقه بالإختراع الغربي الكافر اللي اسمه الديموقراطيه ده , واضح كمان إن فيه إجماع على كده , فلماذا الهري إذا يا سيدي الشنقيط ؟! .
.
.....3 سنين كانت كافيه إننا نعمل مشروع زراعة المكرونه السباكيتي على شواطئ درب التبانه ونصدرها لبقية المجرّات , بس 3 سنين مكانتشي كافيه إننا نفهم يعني إيه ديموقراطيه ؟ , معنى الكلمه بس مانعرفوش , لأننا باختصار ما زلنا شعوب قبليه عنصريه أبويه ذكوريه متخلفه بطبعها .
.
محاولة تحميل مفهوم الديموقراطيه في عقل المواطن العربي تشبه تماما محاوله تحميل تريله كبيره محمله رمل و زلط على ضهر توكتوك !! ..... يبقى نلم الليله دي و ندعي ربنا بقى إنه يرزقنا بديكتاتور عادل , أيوه ديكتاتور عادل ويكون أول حرف من إسمه عين ( عيني عبعال ) , أو حاء ( حماده , حموده , حمدان , حمدي , حمدي...... ) !!.
............. و ارحمو الشاسيه بتاع التوكتوك عشان مبقاش مستحمل ضغط أكتر من كده .

يعني أفهم من الكلام ده إن مولانا طويل العمر باراك حسين أوباما بيتجسس على كل مكالمات البشريه بما فيها المصرييين ؟ و الرسايل ال إس م إس ورسايل الفيس ؟ .... ومكالمات الواتس أب والياهو عنده في كتاب .؟!
ممممممممممم أنا بقول إحنا المصريين الرجاله ننزل في ملياربه بكره في ميدان التحرير ونعلن دعم أوباما رئيسا لأمريكا ( ومصر ) مدى الحياه وخليفه للمسلمين كمان ( الإيد اللي متقدرشي عليها بوسها يا عمنا ) .
يا سنه سوخه , على كده أوباما لو عايز يدمر مصر ويحرقها في ساعتين زمن لا يلزمه قنابل ذريه ولا طيارات شبح , هو بس يطلع الرسايل اللي تحت إيده و................ وبس خلاص !!.

لما تكون تعبان أوي ومخنوق , وحاسس إن الدنيا قلبت على كحلي فجأه , إسمع دي , غمض عينيك وركز في الكلمه واللحن والصوت , يا الله , ده لقاء الملايكه يا مولانا , مأمون الشناوي , عبد الوهاب , سومه ........... مين الواد ابن التيت اللي قال موسيقى عبد الوهاب وصوت سومه حرام ؟! ......... يبقى مفيش حاجه في الدنيا حلال ولا تستاهل !!.
.
http://www.youtube.com/watch?v=v6u8SEWNrMc

November 5

November 6

صباح الخير , بعد مناقشه ثريه مع صديقي العزيز على غيار الريق كداهون , وصلنا لسؤال جميل ...مصر رايحه على فين ؟ أنهي نموذج سيادتك ؟!.
.
في الواقع ( حلوه في الواقع دي ؟ ...أهو أنا أنفع كده اشتغل ناشط سياسي طالما بدأت كلامي بالجمله دي ) , في الواقع إني قبل ثورة يناير كنت بحلم بالنموذج الفرنسي وبعد الثوره قلت النموذج التركي شغال , وبعد شويه قلت مش مشكله , ماله البرازيلي ولا الهندي ولا حتى الجنوب أفريقي ؟! إنما اللي حصل غير كده خالص , وتأتي الرياح بما لا تشتهي السفن ( حلوه دي ؟..برضه ممكن أبقى أقولها مع منى الشاذلي بما إني ناشط سياسي ) .
.
اللي حصل إن السواق خدنا في سكة النموذج السوداني والأفغاني !!........ عشان كده الشعب , أيوه الشعب يا روح أمك ( لأ دي متنفعشي تتقال في التلفزيون عشان احنا شعب متدين بطبعه ) , الشعب نزل في 30 يونيو عشان مش عايز البلد تتحرق ولا تتقسم ولا تبيع حشيش وتشتري بتمنه سبح وسجاجيد صلاه !!.
.
طيب لسه السؤال زي ما هو , مصر رايحه على فين ؟ يا صديقي العزيز مصر مش رايحه في حته , مصر راجعه المحطه , راجعين ليوم 24 يناير , لأ استنى استنى , مش هنعمل ثوره متفرحشي أوي كده , المعنى إننا راجعين لنقطة الصفر , لأ برضه مش هنعمل ثوره , يا مولانا مفيش شعب بيثور حد وتلات وخميس , الثورات ليها فواتير باهظه , واحنا دفعنا فاتورتين كل واحده فيهم كانت فاتوره ( مشلتته ) .
.
طيب كسبنا ايه بقى لماحنا راجعين للمحطه ؟ أقولك أنا , كسبت مسافة 800 كيلو في طريقك للديموقراطيه اللي هو 1000 كيلو , إزاي بقى ؟!
.
احنا كنا واقفين في المحطه في عبود , ركبنا ميكروباس وقلنا للسواق وصلنا اسكندريه ياسطى ( الديموقراطيه الأوروبيه ) , الراجل نصب علينا وخدنا في طريق اسوان ( الخراب السوداني ) , طيب نعمل ايه ؟ ضربنا السواق بالجزمه وخدنا العربيه ورجعنا للمحطه ...المسافه اللي رجعناها دي 800 كيلو وباقي 200 بس على اسكندريه , هي بتتحسب كده ...فهمت يا حاج ؟!!.
.
هنعمل دستور وانتخابات ونصبر لحد مانشوق اللي جاي ( بالصناديق ) , والله مشي بما يرضي الله يبقى خير وبركه , ممشيش نبقى نفكر في ثوره تانيه , مفهاش نشطاء السبوبه ولا فيها ثوار بيطلعو في برامج التوك شو , وقبل ما نعملها نبقى عارفين ومحددين كويس أوي مين اللي هيسوق الحنطور لما تنجح ثورتنا ( بالمناسبه , البرادعي يعرف يعمل ثوره بس مبيعرفشي يسوق الحنطور ...صدِّق أو لا تصدق إتس أب تو يو ) !!

November 6

وبس يا سيدي , و إذ فجأة تلاقي إن عبد الفتاح السيسي اللي كان وزير الدفاع المؤمن التقي الثورجي المناضل البطل بقى عبد الفتاح السيسي الكافر الصهيوني اللي أمه يهوديه و هارب من التجنيد !!.
.
و إذ فجأة برضه تكتشف إن كل حاجه في مصر بقت اسرائيليه من أول الطماطم المسرطنه لحد الشركه اللي بتأمن المجرى الملاحي لقناة السويس , التقارير موجوده وكله في الدرج !!.
.
طب خد عندك دي بقى , هل تعلم أن شيخ الأزهر أحمد الطيب هو مواطن صهيوني متنكر واسمه ليشع بن سمعان ؟! و قد ذكر تقرير لمجة فورن بوديز التي تصدر من مدينة بوهرينا ( البريطانيه ) في عددها الصادر بتاريخ 1 نوفمبر وثيقة ميلاد لأحمد الطيب بإسم ليشع بن سمعان وقد وُلد لأب يهودي روسي يدعى كلاشنكوف وأم بوذيه نيباليه اسمها نعيمه ( نعمين ) !!.
.
إبحث مع الشرطه عما يلي ( مجله باسم فورن بوديز ...مدينة بإسم بوهريما ...مواطن روسي يدعى كلاشنكوف , سيده بوذيه اسمها نعيمه ) !!
.
اللي فوق دي كانت فطشه مني مش أكتر , بس لو يلزمك إني أحبكهالك واجيبلك تقارير مطبوعه ومتصوره ومختومه كمان يبقى من عيوني , إيدك على 500 دولار واديني ساعتين زمن وتلاقي طلبك جاهز .
.
إنما اللي حقيقي بقى فعلا ومش فطشه هو إن عم مصطفى بتاع الجراش اللي في عين شمس صهيوني من يهود الفلاشا , ليه بقى وعرفت إزاي ؟ أصلي كل ماطلع بالعربيه من عنده يجيب فوطه قديمه ويعمل إنه بيمسح لي الإزاز عشان يخبط ال 5 جنيه ...يبقى يهودي ولا مش يهودي ؟ فلاشه ولا مش فلاشا ؟! .
.
اللي بينقطني بقى ويجيب لي تقلصات في الحاجب الشمال إن اللي بيشيّر الأخبار دي من صفحات الخرفان هما حبايبنا النحانيح , أبناء البرادعي , والشهاده لله ومحدش ينكر إن أنصار البرادعي هما الشريحه الأكثر تعليما وثقافة في المجتمع , يعني البرادعي مالوش سيادتك في الطبقه الكادحه ولا المتوسطه ولا الأميين , وممكن أعدلك عدد الأصوات الإنتخابيه للبرادعي في حالة دخوله انتخابات وانا قاعد هنا عالفيس ...بره الفيس وتويتر مفيش برادعي .
.
طيب إذا كانت دي الطبقه المثقفه بتاعتنا يبقى ديموقراطية إيه اللي هنعملها والنبي ؟! ......... معاك حاجه تاخد فيها الديموقراطيه يا حاج ؟!.

أيام ثورة يناير كنت بتفرج عالجزيره ( كنتُ مغفلٌ ...كنتُ حمارن ) , وفاكر قبل تنحي مبارك بيومين تلاته اجتمع المجلس العسكري بتاع طنطاوي من غير مبارك ( عيني رغرغت كده م الفرحه أه والله ) , حلوه رغرغت دي يا حاج محمد ؟! , المهم الجزيره جابت لنا كالعاده المفكر العربي عزمي بشاره ( حلوه برضه حكاية المفكر العربي دي ) , وتقريبا عزمي بشاره كانو مسكنينه في أوضه كده فوق سطوح الجزيره .
المهم الراجل يومها مقصرش في تحليل المشهد وقال قصايد شعر في الجيش المصري وإن كده مبارك بخ !! , مفيش ربعايه ولقيت الجزيره جايبه تقرير مصور كامل عن الجيش المصري البطل المخلص الوطني الشريف و بالأرقام والفيديوهات , أكبر سلاح مشاه في أفريقيا , أكبر سلاح بحري في الشرق الأوسط , أكبر سلاح دفاع جوي , عاشر أكبر وأقوى جيش في العالم , في الحظه دي بقى نزلت دموعي زي السيل من الفرحه وبهدلت كنبة الأنتريه !! .
وسبحان الله يا جدع , إتفرج عالجزيره دلوأتي تلاقيها بتقول جيش الإنقلابيين الخاين الضعيف المهترئ , لدرجة إن جيشنا مش عارف يأمن قناة السويس بتاعتنا فاستعان بشركة تأمين صهيونيه بحسب أحدث تقرير للجزيره نقله عنها أصدقائي النحانيححححححححححح !!.
عارف إنت الجزيره دي بقى هي تقدر تختصرها في كلمتين ( الجزيره .... عندما تفقد الهاااااااااااححححح معناها ) !!.
والمفروض كل اللي شغالين فيها رجاله وستات ينصرف لهم جرعة بنسلين شهريه زي اللي كانت بتتصرف للعاهرات أيام انتشار مرض الزُهري syphilis .......أنا بس خايف عليهم من العدوى والله !!.

November 6

November 7

سترس stress .
.
صباح الخير , بصحى من النوم بطريقة ( النط من ع السرير ) , بغسل وشي في دقيقتين , والبس في 3 دقايق , اخترعت انا حكاية إنك تزرر من القميص زرار و زرار عشان تكسب وقت ( يعني واحد أه و واحد لا ) , وابقى كمل الزراير بعدين , لو لابس كاجوال خد الحزام في إديك ما يجراش حاجه والبسه في أول إشاره تقفل عليك .
.
إجري بسرعه عشان متتأخرشي على شغلك بقى , وصلت الشغل افتح الفيس ونبدأ الخناق , مصر رايحه على فين ؟ طيب مين قال ايه ؟ بجد ولا اشاعه , لأ مش معقول , مين اتقتل ؟ بتقول مين ؟ خلصت شغلي كده , أروح بقى المدرسه أجيب بنتي و ارجع البيت , يا الله الساعه بقت 2 الضهر مش هلحق أنام ساعه , عندي شغل 4 خليني قاعد بقى .
.
إيه ؟ الأنبوبه خلصت ؟ طيب حاضر هغيرها , ماشي وكيس الزباله هاخده في إيدي وانا نازل , مالها المدارس في مصر , فتحو مدرسه لغات جديده في مدينة نصر ؟ بكام دي ؟ يعني 8 في 2 يبقو 16 في السنه , مممم طيب ربنا يسهل , خير يا لوجي ؟ التيتشر عايزه ايه ؟ حاضر هروح لها وهنبه عليها , يا ستي عارف إن التلاجه بتعمل تلج والله هبقى أشوف حد يصلحها , يالله هقوم البس واصلي العصر بقى عشان أنزل الشغل تاني سلامو عليكو .
.
أفتح الفيس , يا نهار أبيض هو توفيق عكاشه مش هينقطنا بسكاته بقى ؟ صحابي التانيين مركزين معاه أوي كأنه زعيم كده ليه ؟ ما علينا , مين اللي ضرب الست بالقلم ده , عملو ايه في مادة الحريات في الدستور , حاضر يا دكتور هخلص فواتير الكريديت بتاعة الشهر اللي فات , عندي أوردرين لسه مترصوش , مفيش عامل عشان موضوع الكفالات , هقوم أرصهم أهو .
.
فلانه راحت تشتري الديوان وملقتهوش موجود في المكتبه , وإيه يعني كل اللي بيروح مش بيلاقيه , طيب أكلم صاحبة دار النشر ولا ايه ؟ مانا كلمتها كتير , مش مهم بقى بعدين , النسكافيه خلص , هروح أجيب نسكافيه الأول واجيب كارت موبايل بالمره , ياااه دانا أمي رنت عليا الصبح ومكلمتهاش , كويس إني افتكرت ..........وبس كده !!.
......................................
وانا صغير كان عندي وقت كبير جدا أمشي فيه وسط الزراعات واذاكر أو أقعد قدام البيت ساعة عصاري ساعه واتنين وتلاته بدون ما ييجي في ذهني أي شئ , هدوء بقى , ريلاكسيشن , تدليك لتجاعيد العقل المنهكه بأحداث اليوم , مفيش فيس ’ مفيش ثوره , مفيش أنبوبه مفيش مدارس , مفيش شغل , مفيش زراير قميص , فيه هدوء وبس .... كنت وقتها شكل العبيط , اللي ممكن يختفي بين الأراضي والحقول بال 5 ساعات من غير ماحد يسأل عليه , معنديش ساعه حضرتك , ومش بحسب الوقت ... أهو العبيط ده وحشني جدا !!.

November 7

شوف الترتيب كده .
على شبكة رصد أو قناة الجزيره متفرقشي كتير , هتلاقي خبر , إلحقو يا جماعه رئيس مصر القادم هو سامي عنان , بعد يومين معرفتوش الخبر ؟ مش رئيس مصر القادم هو زكريا عزمي ؟ يومين تلاته كمان وهتلاقي الخبر مفاجأه من العيار الثقيل , بالمستندات رئيس مصر القادم هو أحمد شوبير , وجون وجون وجون !!
يا مولانا , هذا الخروف الأعظم القابع خلف اسوار السجون عايز يقنعك إن نظام مبارك راجع , بيقولهالك بألف طريقه عشان تصدق , الغريبه بقى إنك بتصدق ومش محتاج الألف طريقه !!
لو عايز تفهم حاجه في دنيتك قبل ماتموت وتقابل رب كريم فلازم تعرف إن مبارك مات وزكريا عزمي مات واحمد شفيق مات والبرادعي مات وبيتحاسبو كمان !! .
أما النظام الفاشي الديكتاتوري والدوله العميقه اللي راجعه بعد إنقلاب 30 يونيو ( حلوه الجمله دي ؟! ) , فالعقل بيقول إن الأنظمه الفاشيه بتحتفظ بشوية عقل عشان تعرف تعيش , والمنطق بيقول إن زكريا عزمي لو نزل انتخابات هياخد 3 أصوات , صوته وصوت مراته وصوت عم عثمان البواب , ولو دولة مبارك راجعه فأولى بيها ترشح شفيق , على الأقل ده بياخد ال 11 مليون وهو حاطط رجل على رجل , ولو 30 يونيو انقلاب فعلى الأقل يرشح السيسي , ده هيقفِّل العداد وهو حاطط رجل على رجل !! .
.
مبقاش يصعب عليا الخروف عشان هو خروف وأهله عارفين كده وموافقين , إنما بيصعب عليا المثقف والناشط السياسي اللي بيسوقه خروف !!.

أبويا الله يرحمه مات من 20 سنه وكان شغال موظف بسيط جدا في دولة مبارك ( فلول يعني ) , مش هتفاجئ لو قريت خبر على صفحات أصدقائي النحانيح ناقلينه من شبكة رصد , بيقول إن رئيس مصر القادم وبالمستندات هو الحاج أحمد أبو حسين ( الله يرحمه ) !!

أسوأ زباين عندي هما زباين يوم الخميس , أه والله , ليه بقى ؟ عشان المنطقه اللي انا شغال فيها منطقه سكنيه مفهاش محلات تجاريه خالص , والأهالي هنا بيطلعو كلهم يوم الخميس من بعد المغرب على بره , يشترو حاجات البيت من الهايبر ماركتات أو يتعشو بره عالكورنيش أو يتفحسو و يبسطو العيال , مش بيفضل لنا هنا غير الواقعين أوي , الرديف والفرز التاسع , النطيحه والمترديه وما أكل السبع , وبييجو يقضو سهرتهم عندي في الصيدليه بقى , أهي منها سوبرماركت ومنها مطعم ومنها فسحه للعيال وكله بيدخل ويخرج من غير ما يشتري حاجه , بطريقة الراجل اللي دخل الكارافان على عادل إمام ويسرا في فيلم كراكون في الشارع ( عَمْ نتفرَّجْ ) !!.

November 8

حلوه أوي حملة ( البرادعاويه بيتجوزو بعض ) , بتخيل واحد برادعاوي اتجوز واحده برادعاويه , والزوجه بقت حامل وبعد 9 شهور ونص الجنين رفض انه يتولد واعترض لأن الوسط الخارجي غير مؤهل نفسيا وسيكوباتيا و ديموقراطيا لاستقبال مولود جديد , و اعترض تماما على طريقة الولاده القيصريه لأن فيها دم حتى لو كانت النتيجه إنه يموت مخنوق جوه , المهم أخر ما غلبو فيه سألوه طيب تحب تتولد إزاي يا حضرة الجنين ؟ قال لهم شغّلو لي موسيقى كلاسيك وانا هنزل لوحدي !!.

خالتي سنيه
.
في أجازة الصيف اللي فاتت روحت بيتنا اللي في البلد عند أمي , دخلت البيت لقيت خالي محمد ( خالي الكبير ) قاعد على الكنبه الفلاحي في الصالون ( المندره ) , قابلني بابتسامته المعتاده , وعلى الحصيره ( الأرض ) كانت قاعدة خالتي سنيه ( خالتي الكبيره ) عشان رجليها فيها كسر قديم وبترتاح اكتر في قاعدة الأرض , سلمت عليهم وحبّيت على إيد خالتي زي مانا متعود , وقعدت جنبها عالحصيره , بدأت تحكي لي عن حكاية رجليها المكسوره , قالت لي أول مره وقعت على نفس الرجل دي كنت لسه عروسه عمري 15 سنه , الكلام ده له زمن وشويات يا محمد , من ييجي 60 سنه وأكتر , بصيت لها وقلت لها ( إنتي بتسرحي بيا يا خاله ...60 سنه ايه ؟ ) , قالت لي أومال انت فاكر ايه مانا عمري 76 سنه وخالك اللي قاعد ده داخل على 80 , بصيت على خالي لقيته بيضحك و تحت الطاقيه الفلاحي بتاعته لمحت كام شعرايه , ما شاء الله , اللهم لا حسد , مفيش شعرايه بيضا !!.
.
الحكايه إن خالي وخالتي فلاحين أوي , بيصلّو العشا وينامو ويصحو بعد الفجر , يخلصو شغلهم في الأرض أو في البيت ويكملو اليوم قاعدة قدام الدار , منظر الزرعه والشجر والهوا الصابح , متطلبات الحياه بالنسبالهم بسيطه وضغوطها صفر , خالي عمره ما أكل كاتشب ولا مايونيز ولا وجبات من كنتاكي ولا شال موبايل وخالتي متعرفشي حاجه عن ثورة يناير ولا انهيار الإتحاد السوفيتي !!
معلوماتهم عن النت والتكنولوجيا زي معلومات توفيق عكاشه عن القنبله الذريه ومعلومات وجدي غنيم عن الدعوه إلى الله ومعلومات البرادعي عن مصر !!.
وإذ ربما يكونو سمعو عن ثورة يناير سمع خير على إنها , على رأي الصبي بتاع محمد رضا كده ( مشاجرةٌ في نيكاراجوا )... ويقولك بقى مالنا احنا ومال مشاراجوا دي !!.
.
أنا عمري 37 سنه وعايز أعيش !! , اللون الأبيض بدأ يضرب في شعري مع تباشير ثورة يناير ( بنتي بتقولي شعرك فيه دقيق يا بابا !! ) , الجيل بتاعنا جيل التلاتين سنه واربعين والأصغر شويه , الجيل اللي عمل الثوره ومات منه ألاف , الجيل اللي كان بيحلم بحياه نضيفه وفجأه اكتشف إن كبارات البلد دي كبيرهم يصلّحو ولاعات مش يحكمو بلد اسمها مصر , عشان كده وصلنا للمرحله دي , مرحلة اللاسلم واللا حرب , اللا ثوره واللا استقرار , مرحلة الجمود الإسترا.... تيتي !!.
في جيلنا الجميل الحبوب ده اللي حرق دمه في الشارع وعالفيس , اللي هيوصل مننا 50 سنه يبقى عمل إنجاز , واللي هيحتفل بعيد ميلاده الستين يبقى ابو زيد خاله , وصورته هتنزل في الجرانين ويكتبو تحتها ( واحد من المعمِّرين ) !!.

November 9

ديموقراطية الصندوق !!.
.
صباح الخير , عزيزي المواطن خدعوك فقالو أن الديموقراطيه هي صندوق الإنتخابات وإن الراجل أوِّل ما يبوس مراته بوسه طويله بتبقى حامل على طول !!.
لأ يا صاحبي , لو كانت الديموقراطيه بالصندوق والبوس بيجوب عيال مكانشي حد غلب , وكانت مشاكل العرب كلها اتحلت بصندوقين تلاته وفيلم للسبكي !!.
.
لو السيسي نزل انتخابات رئاسه هينجح دور أول ويقفِّل العداد وبدون تزوير في الصندوق , إنت عارف كده كويس عشان كده عمّال بتحرك وتفرك زي الست اللي لسه متطلقه يادوب من ساعتين زمن , وعشان كده برضه بتهتف بسقوط حكم العسكر ( اللي هو مش موجود ) , وده بيسموه في علم البلاغه مجاز مرسل باعتبار ما سيكون , يعني هتافك بليغ أوي يا صاحبي وجواك فنان , و إنت اللي هتغني يا منعم !!.
.
عايز تفهم بقى وتشتغل على نضافه ممكن أقولك , ومش شرط يعني أكون عايش في فيينا وحاصل على جايزة نوبل أو عندي حساب في تويتر وجاكوزي في الحمام .
لما يكون عندك نسبة أميه بتوصل ل 40% يبقى مش هتعمل ديموقراطيه , لما يكون نُص الشعب تحت خط الفقر يبقى مش هتعمل ديموقرايطه , لما تكون جوامعك وكنايسك مفتوحين للترويج لمرشح ما وتكفير الباقي تبقى انت بتهبِّل , حبيبك الذي يأتيك صوته من أعالي البحار لو بس طلع في البلكونه وبص على أي انتخابات حواليه هيعرف إن مفهاش المكفرات دي , مكفرات الديموقراطيه ( الفقر والجهل واستخدام الدين في الدعايه ) .
.
عشان كده كمان مفيش ديموقراطيه في ظل وجود جماعة الإخوان ( اللي بتعتمد بشكل أساسي في حياتها على الفقر والجهل وبتستخدم دور العباده , ومفيش ديموقراطيه وانت عندك أحزاب قايمه على أساس ديني , ده الكلام الصح والديموقراطيه زي ما بيقول الكتاب ( يا ريت حد يبعت نسخه من الكتاب ده للبوب ) !!.
.......... إنما نقول إيه بقى , بلد بتاعة جايزة نوبل صحيح !!.
.
وبما إني جبت سيرة البرادعي دلوأتي بالتصريح والتلميح فانا عارف إن أصدقائي البرادعاويه هينسحبو هنا كده في النقطه دي ( . ) , إنما هكمل فكرتي والأرزاق بالله .
.
مطلوب من رئيس مصر القادم برنامج إنتخابي من ورقتين اتنين مفهمشي كلمة ( صندوق ) , ورقتين وفتره رئاسيه يكون دوره فيها هو الإعداد للديموقراطيه , ورقتين بس واحده فيهم بتقول هنقضي على الأميه في خلال 4 سنوات ( فترة حكمه ) , والتانيه بتقول هنعمل حد أدنى وأقصى للأجور وهنقضي على العشوائيات والفقر في نفس المده الزمنيه , مش مطلوب منه إننا نصنع مكوك فضائي ولا تابلت ولا نزرع مكرونه سباكتي على شواطئ درب التبانه .
لما توصل حضرتك لنسبة أميه تساوي صفر أو 5 % بالكتير , ونسبة مواطنين تحت خط الفقر لا تزيد على 10 % يبقى أبشر بعمليه ديموقراطيه نضيفه .
.
بالمناسبه , وصدق أو لا تصدق , أول ناس هتحارب مشروع القضاء على الأميه والفقر هما جماعة الإخوان المسلمين .... ( المصالحه يا بوب ) !!

معلومه علميه قريتها في كتاب مالهوش اسم إسمه ( كيف تصنع مركبا فضائيا من شواشي الدره ) , بيقولك يا سيدي أن الزواج من إمرأه عربيه هو شئ في منتهى التعقيد والكومبليكسيسيتي ( حلوه الكومبليكسيستي دي يا حاج محمد ؟! ) , وأن 190% من الرجال العرب ينكرون هذه المعلومه بعد الزواج , على طريقة نجاح الموجي ( أه كان معايا حشيش بس هنكر ) !!.

هو ابن مرتضى منصور بيعمل إيه في المقصوره الرئيسيه للإستاد ؟ هو عضو مجلس إدارة الزمالك ؟ وانشراح عارفه كده وساكته ؟ هو أبوه ماسك سيديهات عالزمالك ولا ايه ؟ طيب اللبانه اللي في بؤ ابن مرتضى منصور بتعمل ايه هي كمان في المقصوره ؟!!.......أدي الخلاصه بقى , يعوض علينا ربنا عوض الصابرين .... الزمالك والنضافه دونت ميكس !!.

والله وعملوها الرجاله ورفعو راس الزمالك بلدنا , ...مش الإنجاز إنك تاخد الكاس في ستاد مش بتلعب فيه , ومش إنجاز إنك تفوز 3 صفر , الإنجاز الحقيقي للاعبي الزمالك النهارده هو إنهم قدرو يفوزو رغم وجود المشجعات الزمالكاويه ( المزز ) في المدرجات !!.

يادي الكسوف والله , أصحابي وأبناء جلدتي الزملكاويه عاملين احتفالات بمناسبة فوزنا بكاس مصر , ده الأهلى ابن التيت بيبقى راجع ببطولة أفريقيا واللاعيبه تنزل من المطار عالنادي يكمِّلو عزق وترحيل و أكل في النجيله عشان يوميتهم تمشي ويتدربو بالمره للماتش الجاي , لاعيبة الزمالك زمانهم هايصين في الغردقه دلوأتي وقالبينها أردغانه , يتهيألي نص الفريق مش راجع في الطياره , أحمد عيد هيقول لحلمي طولان معلش يا كابتن بقى هفضل هنا عشان خالتي بتخبز !!.

اللي حصل النهارده والحماسه اللي دبّت في الواحد فجأه بعد ماتش الزمالك والفوز بكاس مصر بتفكرني بأول مره اتفرجت فيها على فيلم ( الطريق إلى إيلات ) , وتحديدا اللقطه اللي نبيل الحلفاوي خرم فيها العسليه , أحسن وحوش !!.
الخطه هتبقى كالتالي , كل واحد من لاعبي الزمالك ياخد المزه بتاعته في اللانش وينزل البحر , عبد الشافي إنت طيب وغلبان انت اللي هتشوف لهم الطريق , لو حصل أي حاجه يا رجاله واتقفشتو سلمو نفسكو لحرس السواحل الأردني , وقولو لهم إحنا ضفادع زملكاويه وطيارة مصر للطيران نزلتنا هنا !!.

November 9

ذ

November 10

لازم نطهّر جهاز الشرطه !!
.
صباح الخير , إنما لو عايز الحق والمستحق والمستنيل على عينه فلازم تعرف وتتأكد إن العيب فينا إحنا , من 3 سنين نزل الشباب في ثورة جميله والهدف الرئيسي من نزولهم كان تطهير جهاز الشرطه ( الداخليه ) , ومرِّت السنين التلاته على مصر كأنها كابوس مع إن الغايه كانت نبيله والهدف سامي , وتقريبا نبيله وسامي هربو في مركب ( فالوكه ) من أول يومين في الثوره , 3 سنين اتفركت فيهم مصر واندعكت واتفرمت كأن داس عليها قطر .
.
مجلس طنطاوي وإخوان , صفقات مشبوهه وتلاعب بمقدرات الشعوب ودم الشهدا , دخل الأشاوس من حماس وإيران وقطر في اللعبه , أمريكا واسرائيل موجودين ( دول أصحاب بيت يا راجل ) , 3 سنين كأن التاريخ بيعيد نفسه و مصر اتعرضت لغزو مغولي هكسوسي مشترك , الإخوان عينو واحد كده معرفشي اسمه (ولا هو تقريبا يعرف إسمه ) وقالو إن ده بقى يمسك دار الكتب ( تفرق ايه عن حكاية إن المغول رمو الكتب بتاعة مكتبة بغداد في النهر ؟) , في رأيي الشخصي مفيش فرق , السلفيين قالو هنغطي التماثيل أصلها حرام وبدأو فعلا في تنفيذ هبلهم المتدين أو تدينهم الأهبل ده , مرسي قالك الشرطه شاركت في ثورة يناير وباكستان شاركت في حرب اكتوبر !!.
.
طيب نعمل ايه بس ؟ في الحقيقه إحنا اتكشفنا واتعرينا قدام نفسنا في السنين التلاته , لا احنا أفضل شعوب الكون ولا الطيار المصري أعظم طيار في العالم ولا الطفل المصري أذكى طفل في العالم ( إنما الشهاده لله الراجل المصري لما بيروح أي دوله تلاقي الستات بتترمي في حضنه على طول !! ) , إتعرينا أوي واكتشفنا إن معندناش حاجه اسمها قيادات وطنيه , وكبارات البلد دي زي صغاراتها وجايز أسوأ .
.
اللي يجننك بقى ويخليك تقول جاي فعلا , إن فينا ناس مرّت عليهم السنين التلاته وكأن شيئا لم يكن ( وبراءة الأطفال في عينيه ) , واللي على لسانه ( نطهر جهاز الشرطه !! ) , طيب أقولك إيه وانتي فيك كل العبر؟!.
.
في التعليم هتكتشف إن مصر بقدرة قادر فيها 17 نوع مدارس تقريبا , حكومي وتجريبي وتجريبي لغات وخاص وخاص لغات ونص انترناشونال وانترناشونال وألماني وفرنسي وصيني .....!! , هو فيه كده ؟ فيه دوله في العالم بتعجن بالشكل ده ؟ , سويسرا ذات نفسها مفهاش طفل بيدخل ( كي جي 1 ) بما يعادل 100 ألف جنيه مصر ( احنا عندنا ).... بس لازم نطهر جهاز الشرطه !! .
في الطب , لنا سنتين في خناقات بين الصيادله والأطباء على كتابة الوصفات الطبيه بالإسم العلمي , كل فريق بيدور على مصلحته أو بمعنى أصح على السبوبه والمصلحه , ويتحرق المريض بجاز , بالمناسبه لو حصل اجتماع مشترك بين نقيبي الأطباء والصيادله كل واحد فيهم هيطلع يقول أول جمله في كلمته دي ( صحة المريض هي مهمتنا الأولى ... ومهنتنا إنسانيه في المفام الأول ) .......... بس لازم نطهر جهاز الشرطه !!.
.
في الصحافه والأدب ( اللي فضّلوه عن اللحمه ) كتب الصحفي زمان إن مبارك محروم يا ولده من ( طشة الملوخيه ) وكتب الشاعر من كام يوم عن السيسي ( نساؤنا حبلى بنجمك ) , وما بين الصحفي والشاعر تحدث مثقفي الإخوان وأشاوسهم أن مرسي هو حفيد عمر بن الخطاب وعمر بن عبد العزيز وعمر الشريف و عمر وسلمي.....بس لازم نطهر جهاز الشرطه !!.
.
وفي المحاماه ممكن تبقى حرامي غسيل وتاخد إعدام أو تبقى قاتل أد الدنيا وتاخد جايزه وتعويض , الرك عالمحامي الشاطر , والقانون فيه ثغرات أكتر من بذر البطيخ .....إنما لازم نطهر جهاز الشرطه !!
.

نهايته , الكلام مبقاش منه فايده , مانا بقى خايف أضربك يا صاحبي على دماغك عشان تفوق , إنت أصلك مش ناقص ودماغك مش مستحمله , ومتقلقش خالص ......... ( هنطهر جهاز الشرطه ) !!.

أيوه كده يا وديع !!.
.
على الريق كده و أول ما فتحت الأكاونت لقيت واحد باعتلي رساله فيها أكاونت فيس بوكي وبيقول الأكاونت ده لبنت ملحده بتسب الأديان والإسلام تحديدا .... طبعا دفعني الفضول لفتح الأكاونت عشان أولا أشوف بنت التيت الملحده دي , يا خساره , مش حاطه صوره عريانه لها عالصفحه , يعني ملحده من غير صوره عريانه ؟ مانتي كده كده داخله جهنم يا حاجه جت عالصوره يعني ؟!.... وبعدين كاتبه على صفحتها أنا ملحده وأفتخر !! مممممممممم وأنا زملكاوي وأفتخر !!.
.
البنت فعلا كاتبه كلام زي الهباب ( وملحده من غير صوره عريانه ) , ما علينا , بس لو عايز تعرف مصر فيها كام وجدي غنيم تعالى وانا أقولك :
.
1- دخل كتير من الأصدقاء على صفحتها ونشرو بوستاتهم لهداية البنيه ودعوتها إلى الله , طبعا الدخول ده بدون إستئذان , وصفحة الفيس زي بيت الإنسان لازم تستاذن ( لا تدخلو بيوتو غير بيوتكم..... صدق الله العظيم ) , كنت تقدر تكتب رأيك في تعليق على بوستاتها يا حاج !!.
.
2- أحد الأصدقاء دخل يكتب على صفحتها ( وانتي يا بنت الم**** ) , أمك نامت مع عمك وخالك ونامت معايا ............ ده قذف محصنات يا حاج وبذاءه , وابوها وامها مالهمشي ذنب سيادتك , البنت دي لو كانت ملحده بنسة 100 % قبل بوستات الناس هتبقى ملحده بنسبة 300 % بعد كده , ومش بعيد بقى تحط صوره عريانه !!.
.
على أي حال , رأيي الشخصي إن في حالة زي دي , ممكن التعليق عندها بأسلوب مهذب وتفنيد كلامها , أو إرسال رساله شخصيه لها أو حذفها , لكن في النهايه صفحتها الشخصيه زي بيتها وهي حره فيه , ممكن تعلّق في بيتها صورة أية الكرسي أو أسماء الله الحسنى أو صورة جيفار أو حتى صورة عريانه , لو معجبكشي منظر البيت من جوه متدخلوش تاني , وكلمها في الصوره اللي هي معلقاها ( بالتي هي أحسن ) !!.
.
البنت هعمل لها بلوك دلوأتي لأني مش فاضي لهدايتها للإسلام أو لأنها مش حاطه صورة عريانه !!.

حقيقه علميه :
.
..... في حكم مبارك والحزب ( الوطني ), زادت جدا نسبة الخونه والكافرين بكلمة ( الوطن ) , بعد ما شافو فساد الحزب وكدبه وتدليسه .
.
..... في حكم مرسي و جماعة الدعوه إلى ( الله ) زادت جدا نسبة الملحدين والكافرين بوجود ( الله ) , لنفس السبب السابق !!.
.
إنما اللي يصعب عليك بقى بجد إن المواضيع دي بتتحول لموضه بمرور الوقت , يعني الموضه زمان كانت الخيانه والموضه دلوأتي الإلحاد , كل عيل مالوش أي تلاتين لزمه يقولك أنا ملحد , وجايز إنهم بيفهمو كلمة الإلحاد على إنها المرادف الموضوعي لكلمة أنا ( مثقف جدا ) أو أنا ( مفكِّر جامد تنين ) .
الإلحاد لم أوي يا رجاله , هيييه بقى فين أيام ماكن الملحد من دول ملحد صحيح ومالي مركزه كده !!.
.
ماهو مش كل عيّل نكش شعره ولبس فالنه مقطعه وشبشب فرده وفرده يقولك أنا بوهيمي .
.
ومش كل عيل لبس سلسله في رقبته و حظاظه في إيده و قطع علاقته بالحلاق يقولك أنا يساري معارض .
.
ومش كل عيل طلع في التلفزيون بدأ كلامه بجملة ( في الواقع ) وبعد كده كمل غرغره يقولك أنا ناشط حقوقي .
.
ومش كل عيل رسم رسمه زي الزفت وقام مكملها شخبطه يقولك ده فن تجريدي يا جاهل .
.
ومش كل عيل أمه بتصرف عليه وبيكسل يصلي يقولك أنا ملحد , لا والأكاده بقى لما تتعرف عليه يقولك مثلا ( أنا زياد من الملحدين ) ...هه , وأنا محمد من السنبلاوين !!.

من زملكاوي منتشي بالفوز بكاس مصر الى الأهلاويه أصحابي اللي بيلعبو على كاس أفريقيا , أتمنى لكم التوفيق والفوز بإذن الله ( وكله عشان مصر يا عبله ) , هو صحيح كاس مصر غير كاس أفريقيا , وكفر الشيخ غير شرم الشيخ إنما ولا يهمنا ...الزمالك قادم , أولُ الغيثِ قطرٌ ثم ينهمرُ , وأدينا خدنا ( القطر ) وباقي لنا بس ( ينهمرُ ) !!.

ألف مبروك يا أهلاويه كاس أفريقيا , أديكو خدتو بطوله أهو عشان متزعلوش , إحنا بنحب نشجع الفرق المكافحه الصاعده اللي زي الأهلي كده نياهاهاهاها !!.

أحمد عبد الظاهر رفع إشارة رابعه , أحمد عبد الظاهر مرفعشي إشارة رابعه , ياكشي يتحرق أحمد عبد الظاهر على إشارة رابعه , اللاعب بيمثل نادي مش منتخب , والنادي يعاقبه بلوايحه أو ميعاقبوش هو حر , زي اللاعب اللي بيرمي تي شيرت النادي بتاعه في الأرض مثلا , النادي هو اللي بيعاقبه مش وزارة الخارجيه !!.
لاعب الكونغو فو كان بيمثل مصر اللي هي أشرف من الأهلي والزمالك والبرادعي والنحانيح وعبد الظاهر وشيكابالا والسيسي , يرفع علمها بس ويلبس فالنتها بس ويحلم باليوم ده , علم مصر هو سجادة الصلاه التانيه بتاعتنا , عايز تعيش حمار وتموت حمار انت حر .
واحد هيسألني والبرادعي ماله بالكلام ده وليه جبت اسمه ؟ والله اسأل نحانيحه , ماهو العيل العار بيجيب لابوه الكافيه !!

11/10

حَدْف الخليج !!
.
.
صباح الخير , أنا واحد من جيل اتربى واتعلم في المدارس وهو صغير حاجتين اتنين في الدين , أولا إن التصوير حرام , وقالك أصله لو فوتوغرافي معرفشي إيه ولو رسمه مرسومه أبصر إيه ؟, وهتيجي بقى يوم القيامه وربنا يقولك إنفخ الروح في الصوره دي !! , إلهي تتنفخ يا بعيد نفخ البلالين في يوم العيد .
.
والحاجه التانيه هي صوت المرأه , كان ليا زميله في إعدادي كل ما يدخل مدرس جديد تسأله ( يا أستاذ يا أستاذ هو صوت المرأه عوره ؟ ) , حتى لو كان المدرس ده بتاع جغرافيا أو فرنساوي .
.
الحكايه كلها إن مصر اتحدف عليها كام ألف عاطل من اللي سافرو الخليج واشتغلو مقاولين أنفار أو في مكتب عقاري , ورجعو من هناك بتوب قصير ودقن طويله , ويبقى مولانا اللي سافر وهو عاطل عن العمل رجعبحاجتين , بنى له بيت بالطوب الأحمر واشتغل شيخ وداعيه ومفتي لحد مانلاقي مفتي , بسميهم مشايخ ( حدف الخليج ) .
وبعد عشره قول عشرين سنه يا مؤمن تلاقي نفس الشيخ اللي كان فاحت نفسه في قضية التصوير حرام .... مبقاش يقوم من قدام الكاميرا , وبقى التصوير حلال والرسم حلال , مش بس كده , الفوتو شوب لتزييف الحقايق بقى حلال , حلال أوي , حلال جدا ....حتى اسأل الدقون في شبكة رصد !!.
و بعد عشره قول عشرين سنه برضه تطلع لك واحده ست من بتوع صوت المرأه عوره ولا لأ , وتتكلم وتخطب والأهم إنها بتسب وتكذب وتقذف المحصنات .....حتى اسألو أم أيمن !!.
.
الإلحاد هو نتاج لمشايخ الجهل ومقاولين الأنفار , هو أبسط الطرق على الإنسان للتخلي عن التزاماته في الحياه , سهله الحكايه أوي , مش هصلي مش هصوم , هشرب خمره واكذب والعن الأديان ..ألف مبروك يابني إنت بقيت ملحد أد الدنيا , عقبال ماتتجوز بقى وتخلف لنا ملحدين وملحدات يتنططو حوالينا !!.
.
والإلحاد بيحصل لأتفه الأسباب , شيطانك قاعد وموجود ومعاه النوته وبيسجل , حضرتك فتحت فيديو لقيت شيخ ( من بتوع حدف الخليج ) , بيقولك إن الرجل المسلم يجب عليه أن يعاشر زوجته المسيحيه كأنه يغتصبها , وأن يبغضها في الله , انتهت فتوى الشيخ وده قيادي سلفي بالمناسبه , طيب حضرتك هتسمع الفتوى مره تانيه وتالته وهتفكر فيها بالشكل ده , معقوله كده ؟ يعني ربنا منزل دين بيطالب باحتقار وازدراء الأخر ؟ حتى لو كان الأخر ده هو الزوجه اللي خدتها من بيت أهلها بميثاق الله ؟ معقوله الإسلام بيحتقر المرأه للدرجه دي ؟ ده يبقى كده دين تعبان مله !!... غلط يا صاحبي , الحكايه إن شيخك هو اللي مقاول أنفار بس انت اللي مش واخد بالك .
.
جرّب كده بس وخليه بيخطب على المنبر وقوم إنت في وسط المصلين وقول بصوت عالي , ياخوانا أنا عندي فيلا بشطبها محتاج مقاول أنفار يجيب لي الصنايعيه وهديله اللي هو عايزه , هتلاقيه نط من عالمنبر وقالك ( سَمْ يا طويل العمر ) !!.

هذا المكتوبُ
على شفتيكِ يجاهرُ
أبداً بالحسنِ
وجمالُكِ شرعٌ
للعشّاقِِ ومَنْ يعبُدْ
.
فدعيني
أتوضأُ خمساً
من نهرٍ
يسبحُ بعيونكْ.
.
.
محمد حسين

واحمد عبد الظاهر في لقاء مع أحد المواقع قال إنه رفع فعلا إشارة رابعه وكان يقصد الترحم على شهداء الإخوان والشرطه !! , هع هع الإخوان والشرطه ؟ الإتنين يا عبظاهر ؟ الإتنين يا وله ؟ , وانا اللي ظلمتك وقلت إنت تبع مرسي أتاريك تبع أبو الفتوح , يعني ألعن وأضل سبيل !! .
.
الحكايه هتزيط وتحلو أوي , في ثورة يناير مات 5 أضعاف اللي ماتو في رابعه محتاجين بقى إشاره لشهداء يناير , وفي ماسبيرو مات كتير لازم إشاره لشهداء ماسبيرو وإشاره لشهداء محمد محمود .
.
والشهاده لله أكتر ناس محتاجين نعمل لهم إشاره ونفتكرهم ونترحم عليهم هما شهداء عبارة السلام 98 ( أظن سهله نعمل بإيدينا إشارة 98 ) , كانو 3 أضعاف شهداء رابعه , بس يا خساره الجزيره وشبكت رصد وفلوس خيرت الشاطر ماصلتتش الأضواء عليهم , أهم ماتو في البحر بقى والسمك كلهم , هو احنا لقينا لهم جثث أساسا ؟!
.
وهكذا كل ما يموت كام واحد نعمل له اشاره للتعاطف , وينزل اللعيبه أرض الملعب , اللي يجيب جون منهم يرفع إشاره يكون متعاطف مع شهدائها .
.
داحنا هنلعب ألعاب بحق ربنا وهنبقى أول فريق يوصل لكاس العالم في لعبة الإشارات , واحتمال ناخد فيها ميداليه أوليمبيه !!

أخر مهازلك يا مصر .
.
وقال وزير التربيه والتعليم المصري ( معرفشي إسمه ) أن هناك عشرات المدارس في مصر تتبع جماعة الإخوان المسلمين وتدرس في مناهجها سيرة حسن البنا وسيد قطب وتردد نشيد ( جهادي جهادي ) بدلا من بلادي بلادي !! .
عايز مصالحه تانيه يا بوب ؟ قول بس وانا تحت أمرك ؟ فصيل وطني أهو , إحنا ندرس سعد زغلول واحمد عرابي و أسر لويس التاسع وهما يدرسو حسن البنا وأم أيمن وفض اعتصام رابعه , إحنا نقول بلادي بلادي وهما يقولو جهادي جهادي , إحنا نرفع علم مصر وهما يرفعو إشارة رابعه , قول يا بوب , بند الحريات العامه والخاصه يمنحك الحق أن تقول ما تريد وقتما تريد في أي حته تريد , قول يا برادعي والنبي , الدستور والقانون بيدوك الحق إنك تقول يا جدع , عايز مصالحه كمان ؟ طيب يا ترى لما نتصالح برعاية الست ( ناديه مصطفى ) هتعرف تعلم الإخوان إن فيه حاجه اسمها علم مصر وحاجه اسمها نشيد وطني لمصر وفيه حاجه اسمها تاريخ مصر ؟ طيب احلف كده إنك هتقدر ؟ قول وحياتك يادي التابلت هقدر , قول وحياة البيسين والجاكوزي أوعدك ؟ إحلف بس والنبي إنهم فصيل وطني ؟!.

حشد غريب بيعملوه الثوار والنحانيح للنزول في ذكرى محمد محمود والأغرب هو حشد الإخوان لنفس الذكرى !! , شوف الصدفه السعيده يا جدع ؟ و رُبَّ صُدفةٍ خيرٌ من ألف دولار , ما علينا بقى , وقالك هننزل نجيب حق الشهدا بتوع محمد محمود , وماله يا خويا مش عيب , الثوار والنحانيح جنبا إلى جنب مع الإخوان أكشن تاسع مره , بس يا ريت متنسوش تاخدو معاكو ( البردعه ) عشان الركوبه تبقى مريحه !!.... وعلى رأي الأغنيه ( وحياتك لافضل أغيّر فيكي لحد ما يبان لك صاحب ) !!.