صباح الخير , الإخوان بعد ماعملو كتاب يجمع فشل مرسي وسموه كتاب الإنجازات , بيفكرو يعملو له تمثال في الشرقيه , أه والله تمثال , يا سيدي بقولك تمثال , حاجه كده ذي اللي اتعملت لعبد الناصر وسعد زغلول وأم كلثوم وطه حسين , إنما الشهاده لله تمثال مرسي لازم يكون مصنوع من العجوه ( لزوم العباده لألهتنا العوالي ) وعشان كمان ينفعنا في وقت المجاعه اللي جايه أكيد على إيد الإخوان , أنا عن نفسي أموت من الجوع لو كان البديل هو دراع مرسي مثلا , وجنب التمثال لازم يعملو مقام لسيدنا المبروك , ساعتها هتبقى الزقازيق أكبر مزار سياحي ديني في العالم , زمان قريت تقرير إن عدد المصريين اللي بيحجو لمسجد السيد البدوي في طنطا أكتر من اللي بيحجو للكعبه !! , وشوف حكمة ربنا بقى , أهي الزقازيق هتسحب البساط من تحت رجل طنطا , إنما تخيلي نفسك كده يا ست الحاجه وانتي بتكتبي ورقه وتطبقيها وترميها جوه مقام سيدنا مرسي المبروك عشان بنتك تتجوز ؟ تخيلي كده ؟ بزمتك ده منظر واحد ممكن يحل مشكلة بنتك ؟ إلا ما عملها وهو عايش هيعملها وهو تمثال ومقام ؟!!.
.
محمد حسين
ليست هناك تعليقات:
إرسال تعليق