منوع

الإخوان ناشرين على صفحاتهم مقال بيتكلم عن الفوايد ال 9 لإنقطاع التيار الكهربي , ومنها صلة الرحم وتقوية عضلة السمانه والسيبس والفورسيبس !!
, وانا كمان من باب ( نشر الفائده ) بدعو أصدقائي الإخوان لشرب المزيد من الحشيش عشان إنت لما هتشرب حشيش كتير , بيتكو مش هيتسرق أبدا لأنك هتقعد تكح طول الليل والحرامي هيتخيل إنك صاحي وعايش على قيد الحياه !!.

.

وعندنا في بلدنا يابيه لما جنودنا بيتخطفو ويتقتلو في سينا بنقوم نزود التعزيزات الأمنيه ( في المقطم ) !
, ولما الداخليه بتسحل وتقتل في المتظاهرين السلميين بنقوم شايلين ( وزير الثقافه ) ! .
عشان كده احنا هننزل يوم 30 /6 نطالب بإقالة فاتن حمامه من منصب رئيس الجمهوريه وإعادة منصب نقيب الموسيقيين إلى موسيقار الأجيال محمد البلتاجي !!.

.طيب خدو دي على مسئوليتي الشخصيه ( بس معنديش رابط ولا مقطع فيديو للكلام ده ! )

.
بص يا سيدي , وعزة جلال الله إحنا مش محتاجين مستشرقين ملحدين عشان يكرهونا في الإسلام , مشايخنا قايمين بالواجب وزياده شويتين !!
يعني تقدر تقول : بناكل نفسنا قبل ما حد ياكلنا , وعلى رأي الشاعر ( فالنارُ تأكلُ بعضها ... إن لم تجدْ ما تأكلهُ ).
يابه إنت عشان تنتحر مش محتاج تكلف نفسك وتيجي لحد هنا , إنت بكتيره تقف في البلكونه بالفالنه الحمالات والسر الإلهي هيطلع على طول !!.

.

صباح الخير , زمان ظهرت موضه كده اسمها ( المستشرقين ) , ومشايخنا التمام الهمام فهمونا إن المستشرقين دول هما شوية ملحدين كفره كانو بينامو ويقومو وهما بيفكرو إزاي يكرهونا في الإسلام , تقرا وتسمع بقى عن مناظره بين الشيخ فلان والمستشرق الفلاني , شاهد بالفيديو العلامه فلان الفلاني ( بيفحم ) المستشرق الملحد فلان الفلاني , وهكذا , أي حد بيتكلم كلام مش على هوانا ولا بيجيب سيرتنا ( حتى لو بالطيب ) بنقول عليه مستشرق ملحد , والحقيقه إن معنى كلمة مستشرقين غير كده خالص , الحكايه باختصار إن من أد قرنين تلاته ومن وقت ما ظهرت إمكانيه للتواصل بين القارات ( سواء بالإحتلال أو التجاره أو غيره ) بدأت تظهر مجموعه من الناس في الغرب مهتمين بالشرق ( اللي هو احنا ) , شغوفين بدراسته ودراسة عاداته وتقاليده وحضارته ( الله يرحمها ) , وعدد محدود جدا اللي اشتغل في الليله السوده بتاعة ( محاربة الإسلام ) ,
أحد الملوك الأوروبيين كانو بيطلقو عليه لقب نصف شرقي ( semi oriental ) لأنه كان شغوف ببعض من عاداتنا الشرقيه ( جايز كان بيحب الرز المعمر والفطير المشلتت مثلا )
.
,
المهم يعني إننا حسيت من فتره كده , إني بميل أوي للحضاره والثقافه الغربيه , مع احتفاظي طبعا بجذوري الريفيه الجميله , يعني ممكن تقول كده كنوع من الزِمال ( رد الجميل عى طريقة الفلاحين ) إني واحد من ( المُسْتغرِبين ) , أه المستغربين , ولو انت مستغرب من كلامي تبقى ( مُستغْرِب ) ذي حالاتي , يعني زميل برضه , وعشان حكاية الجذور والرووتس دي يبقى الأصح إني أقول على نفسي نصف مُسْتغرب ( Semi gharbantal ) , أيوه سيمي غربانتال , مانا مش لاقي الترجمه على جوجل ابن الحرام , تاكلو فطير مشلتت ؟!!

.

خوتونا ووجعو دماغنا بقدرات الجيش المصري وإمكانياته , صاعقه و 777 و 999 ومظلات وكلام كبير أوي , لو جيشنا مقدرش يحرر جنوده ويساوي بالخلايا الإرهابيه الأرض يبقى مفيش فرق عندي بين فرقة ال 777 وكولونيا ال 555 !!.

.

واللي يفوته مشهد الجيش وهو بيحرر الجنود المخطوفين ميزعلش , ممكن يشوف الإعاده بعد ساعتين على قناة الجيش +2 !!.

.

.

محمد حسين 

.