منوع 4 و 5 مايو

بيقولك واحده ست كان عندها طفل رضيع , و الطفل ده اتخطف في غفله منها , قلبت الدنيا عليه , وفي الأخر اتصلت بالشرطه , الشرطه بحثت ولفت ودارت لحد ما لقت طفلين , الست دي بالمناسبه كانت بيضا وجوزها أبيض ( أو بيضه هو كمان ) , الشرطه جابت الطفلين للست عشان تتعرف على إبنها , لقت فيهم طفل أبيض في اللفه وطفل تاني أسود فحمه جاي في صندوق , اختارت الأسود , قالو لها يا ستي ده لا يشبهك ولا يشبه أبوه ولا يشبه حد أبدا , قالت لهم مش مشكله , هربيه وهديله فرصته لأنه جالي بالصندوق !!.

.

عارف إنت يعني إيه شعب متدين بطبعه ؟!
.
يعني خمره ( بيشرب ) , حشيش ( مفيش مانع ) , سرقه ( أوكيه ) , كدب (عادي جدا ) , زنا ( ولا الهوا ) , قذف محصنات ( ذي سلامو عليكو ) , غيبه ( مايضرش ) , قتل ( ايه المشكله ؟ ) , إنما تلاقيه متدين أوي وعشان كده رافض تلوين البيض في شم النسيم !.

.

.في عهد محمد مرسي شيخ الصيادين , أصبحت غير مهتم بوضع قانون للحد الأقصى ( للأجور ), وكل ما يعنيني الأن هو وضع قانون للحد الأقصى ( للفجور ) !!.

.

عايز تعرف الخروف بسهوله ؟
اسأله : إنت بتدعم إسرائيل في ضربها لسوريا ؟ هيقولك نعم يا أخي الكريم .
قول له طيب إنت هتحارب إسرائيل عشان تحرر القدس ؟ هيقولك نعم يا أخي الكريم !!................ الخروف باختصار هتلاقيه مقتنع تماما إن إسرائيل هي الصديق الوفي والعدو اللدود !!.

.

.

صباح الخير , الجيش الصهيوني الشقيق بيضرب عدونا في سوريا بمباركة إخوان سوريا ويوسف القرضاوي قطر , لا تخرج قبل أن تقول ( جوزك شرب حشيش يا سعاد ) , الإخوان في سوريا مرحبين بالقصف الصهيوني , أه والله , والقرضاوي بيكبر ويهلل , وإخوان مصر كانو شمتانين أوي فينا بعد هزيمة 67 والعدوان الثلاثي في 56 وبيعتبرو ده غضب من ربنا , قصدي غضب من الشيطان الأعظم بتاعهم , وحشيش بحشيش بقى , خلوني أقول , بشار الأسد هو مجرد سفاح وطني , أه الوصف ده عاجبني , سفاح وطني ذيه ذي صدام حسين , وذي المعلم في فيلم صايع بحر اللي كان ( تاجر حشيش وطني ) لأنه اتمسك بالحشيش اللي ورثناه أبا عن جدا , طيب نعمل إيه في الليله السوده و المحششه دي ؟ نحارب الصهاينه ولا نحارب بشار ولا نحارب الإخوان في سوريا والإخوان في مصر , ندعي على مين لصالح مين ؟ , يا راجل حتى المشايخ قسمو الملايكه نصين , مش بقولك قاعدة حشيش , الشيخ العريفي قال ( إن الملائكه تحارب مع الجيش الحر ) , والشيخ السوري اللي مات قال ( إن الملائكه تحارب مع الأسد ) , علامات التعجب اختفت من الكي بورد ومش لاقيها , يعني الملايكه اتفسمو نصين وبيحاربو بعض في سوريا حاليا , أقولكش حاجه يامولانا انت وملانا , ربنا يحرقو بجاز وسخ , مفيش ملايكه بتحارب في سوريا لأن الملايكه لا هتنصر السفاح الوطني ولا هتنصر العدو الصهيوني والإخوان , سيبو الملايكه في حالها ياولاد الصرمه , يارببببببببببب لطفك بعبيدك في سوريا يارب , اللي مش هيموت على إيد بشار هيموت على إيد الجيش الحر والصهاينه , وولاد الكلب الدقون عندنا كل اللي يهمهم حاليا إنهم يتجوز بنات سوريا المشردات في سوق النخاسه , بيع واشتري يا مولانا , حاجه حلوه كده وببلاش , الله يرحمك يا عبد الناصر , وعلى رأي الشاعر : في سوريا الأن , مَنْ لم يمت بالحب ( السفاح الوطني ) مات بغيره ( الصهاينه والإخوان ) !!.

.

.

النهارده عيد ميلاد مبارك , والنهارده كمان عيد ميلاد خيرت الشاطر ! , شوفت حكمة ربنا وتصاريفه ؟ الرئيس السابق والرئيس الحالي في نفس اليوم , ولو حد شاطر في التاريخ ممكن يلاقي إن اليوم اللي اتولد فيه أبو لهب هو نفس اليوم اللي اتولد فيه حنظله , والله احتمال كبير , والله يرحمه أنيس منصور كان عنده اعتقاد إن العظماء في الكون بيتولدو في أيام محدده بتتكرر بس مقالشي إن البلطجيه كمان بيتولدو في أيام محدده معبعض , يتهيألي بإذن الله لما ثورتنا دي تنجح وربنا ينتعها بالسلامه ( معرفش إزاي ) نبقى نعمل اليوم ده 4 مايو يوم النحس المصري , نعمله أجازه والناس تلبس فيه أسود وننكس الأعلام ( ذي هولندا كده ) , إنما عشان بس أنا أهلي علموني الزوق والإتيكيت ميمنعش يعني في مناسبه ذي دي ( عيد ميلاد مبارك والشاطر ) إني أقول كل سنه وانت طيب يا برادعي !!.

.

حدث بالفعل
.
دخل زبون عايز يشتري صابونه , أه والله صابونه عادي يعني , المهم بقى قالي عايز حاجه كويسه , وانا قلت ده أخره 5 ريال فشاورت له على ديتول ( ب 5 ريال ) , ونظرتي مخيبتش , طلع ال 5 ريال من جيبه ( مفيش غيرها ) إنما سألني كام سؤال من اللي بيجيبو للواحد الطحال ! , أستخدمها كام مره في اليوم ؟ قلت له بمنتهى الهدوء وبابتسامه إنجليزي صفره ( 3 مرات ) , طيب هي ما بتأثر على سكر ولا ضغط ولا شئ ؟ زودت ابتسامتي الصفره وقلت ( لأ ) , إنما بعد ما دفع ال 5 ريال جاب أخري بقى , قالي , طيب أنا مش هتعود عليها لو وقفتها ؟!! قلت له لأ مش هتتعود , وممكن تنام من غيرها عادي طالما عندك العزيمه والإراده , بس هيحصل لك شوية أرق في أول يومين تلاته !!.

.

.

الفيديو اللي ظهر فيه وجدي غنيم لابس ذي عسكري برتبه عسكريه كبيره وبيهلفط بالكلام , الفيديو ده لو كان موجود أيام عبد الناصر ولا السادات ولا حتى أيام مبارك , كان زمان المخابرات العسكريه بعتت إتنين شرطه عسكريه لوجدي غنيم جابوه من قفاه واتحاكم محاكمه عسكريه أغلب ظني عقوبتها ( الإعدام رميا بالرصاص ) , لانه بيعني إنهيار الدوله النظاميه لصالح دولة الميليشيات الإرهابيه المسلحه , بس هنعمل ايه بقى إذا كان رئيسنا أصلا عضو في هذه الميليشيات الإرهابيه المسلحه ؟!!.يا دين النبي , نياهاهاها , يا جدعان كنت بهزر والله العظيم كنت بهزر , هموت يا ناس , بيقولك جبهة معرفش إيه كده الإسلامجيه في سوريا قالت عن مذيعة الجزيره اللي اغتصبوها هناك إنها لم تتعرض للإغتصاب ولكنها كانت تمارس جهاد المناكحه !! , أنا قلت الكلام ده يوميها بس كنت بهزر والله , كنت بألش يا ناس , اغتصاب ايه اللي بقى بقدرة قادر جهاد مناكحه ؟ يعني الشباب يغتصبو البنات في الشارع وقدام القاضي يقولو إحنا كنا بنطبق جهاد المناكحه ( بيان على المعلم ) ؟!!.

.

.

.

عاجل : بعد فتوى تحريم ( تلوين البيض في شم النسيم ) لأن في ذلك تشبه بغير المسلمين , المجمع الكنسي في مصر يصدر فتوى للأقباط بعدم جواز عمل ( كحك العيد ) لأن في ذلك تشبه بأمي وخالتي سنيه وخالتي أم مينا جارتنا  !!.

.حتى الإخوان لما حبو يعملو معرض ملابس للجمهور بسعر مخفض إختارو إنهم يعملو معرض ( لانجريهات حريمي وأندر ورور يا جناب العمده ) !! , أكيد المشرف على المعرص قصدي المعرض ده هو متولي عبد المقصود , واقطع دراعي من هنا إن اللي بيدخل منهم كلية طب بيختار في التخصص أمراض نسا أو أنف وأذن ( وحنجره ) !!.

.

.

صباح الخير , في إنتخابات حزب الدستور في اسكندريه هتلاقي أدب ونظام ورقي وحضاره , ده حتى فيه راجل محترم جدا واقف بيعزف موسيقى قدام المقر الإنتخابي , حاجه كده من ريحة أوروبا اللي بنسمع عنها في الكتب والحواديت , إحنا جامدين أوي على فكره , مش قلت لكو لو دخلنا أي إنتخابات هنكتسح فيها ؟, و بإذن الله هنفوز بأغلبيه ساحقه في انتخابات برلمان السويد !!.

.

محمد حسين