منوع

حملة ( تجرّد ) بتاعة الإخوان هتفشل فشل زريع , لسبب بسيط , كلمة ( تجرّد ) دي أصلا لغه عربيه فصحى وأغلب الشعب مش هيفهم معناها , و بما إن أنصار الإخوان اغلبهم من غير المتعلمين أو الحاصلين على دبلون , كان لازم اسم الحمله يتكتب بالبلدي واللغه الدارجه عشان جمهورهم يفهم ( حملة شلّح لدعم محمد مرسي ) !!.

.

قبل انتخابات الرئاسه أعلن محمد مرسي إن فيه 200 مليار دولار جايين مصر بمجرد فوزه في الأنتخابات , هه ياخوانا جت ال 200 مليار ؟ إنتو متأكدين ؟ عدتوهم كويس لاحسن يكونو ناقصين دولارين تلاته ولا حاجه ؟.
.
وقبل الدستور قال القرضاوي إن فيه 20 مليار دور جايين لو وافقنا عالدستور , هه ياخوانا جت ال 20 مليار ؟ عدتوهم كويس ؟
.
ومن شهرين تلاته كده قالو إكتشفنا أكبر بير بترول في العالم والمجموعه الشمسيه , هه وصل البترول ؟ متأكدين ؟ طيب عايرتوه كويس واتأكدتو إنه أكبر بير في العالم , لحسن يكون ناقص برميلين ولا حاجه ؟
.
ومن شهر تقريبا قالو هنحقق الإكتفاء الذاتي من القمح , حققت يامولانا ياللي هناك الإكتفاء الذاتي ولا لسه ؟ متأكد .............؟ طيب على خيرة الله .
.
أنا بس ليه طلب عند الدكتور مرسي , بقى أنا ياريس عايز أربي عيالي بالحلال , وعشت في الخليج وشفت الفلوس بتعمل ايه في الناس , لا عايز أشرب خمره ولا حشيش ولا يطلع لي كرش , أبوس إيديك ياريس كفايه نهضه على كده عشان نعرف نربي عيالنا , إنت عارف الفلوس لما بتزيد عن حدها بتبقى نقمه وبلاء على صاحبها !!.

.

.

وخلي بالك إن الإخوان اللي نامو وصحيو لقو حملتهم جمعت 4 مليون توقيع هما نفسهم اللي رئيسهم خاد 5 مليون صوت في انتخابات الرئاسه بعد ما أعلنو أياميها النفير والزفير , ورفعو حالة الإستعداد للمرحلة bb ( برسيم بلدي يعني ) , ودي أعلى مرحله عندهم , ويعد ما صرفو مليارات وانتشرو في المحافظات والقرى والنجوع والشقوق ذي الصراصير , وبعد ما خبطو على بيوت الناس وشحنوهم في الإتوبيسات , يعني أقصى ما عندهم كان 5 مليون , إنما سبحانك يارب بقى , شكلهم كده هيجمعو 500 مليون توقيع على بكره بالليل ( وهما قاعدين ), على فكره يا إخوان أنا بشكك في أخر 3 توقيعات في ال 500 مليون توقيع اللي هتجمعوهم , أديني بقول لكو من أولها أهه !!.

.

لما يدخل عليك زبون بكرش سابقه ب 6 خطوات , وتكتشف إن عرضه عرضين ذي توب القماش الدبلان , وعنده خلفيه عسكريه أكبر من خلفية شفيق , وبعدين تلاقيه داخل من باب الصيدليه كأنه كشك سجاير متحرك وفاتح صدره ويسألك على حاجه تقول له ( لأ والله , أسف جدا معنديش الصنف ده ) , فكرك يعني إنه هيقولك (ميرسي ربنا يخليك ) ؟ يا راجل ؟ إنت عمرك سمعت عن كشك سجاير بيقول ميرسي ؟ , ماهو اكيد هيرمي في وشك بيضتين تلاته من اللي عنده في الكشك , البعض يحصل على هذا الشكل المفلطح كمنحه مزدوجه مع الغباوه , تباً لهؤلاء المفلطحين , تباً لك مفلطحانو !!.

.

لما قريت رأي عباس العقاد عن حسن البنا , اللي بيقول فيه إن جد حسن البنا مغربي الجنسيه وكان بيعمل في مجال تجارة الساعات , وإن الوحيدين اللي كانو بيعملو في المهنه دي في المغرب هما اليهود !!
طيب أنا هعتبر نفسي إنسان غير مسيس وقدامي رأيين :
رأيي بيقول ويفترض إن حسن البنا جده يهودي وإن ملامح وجهه بتدل على كده وبالتالي يشكك في خرافة جماعة الإخوان المسلمين برمّتها, ( وده رأي العقاد ) .
ورأي تاني بيعتبر إن حسن البنا من نسل الأنبياء بقى والصحابه والملايكه والقديسين والشهداء والصالحين وعاصرين اللمون ( وده رأي الدراويش والبهاليل ).
هنا السؤال : أصدق مين ؟ العقاد ؟ الأستاذ والأديب والفيلسوف والمفكر وأعظم المفكرين في تاريخ مصر الحديث ولا أصدق البهاليل ؟!!.

.

الإخوان وولاد أبو اسماعين عايزين يقلدونا ويعملو حمله موازيه لحملة ( تمرد ) , مفيش مشكله , حقهم طبعا , بس كلمة ( تمرّد ) دي مش لايقه عالخرفان خالص ( عمرك شفت خروف بيتمرد ؟! ) , المفروض يسمو حملتهم ( تمرّغ ) !!.

.

خبر عاجل , بعد انضمام أبو الفتوح لحملة ( تمرد ) لسحب الثقه من مرسي , حمدين صباحي يقرر جمع توكيلات لأبو اسماعين لإدارة شئون البلاد !!.

.

أنا شخصيا معنديش عداوه مسبقه مع الإخوان , كل اللي بيني وبينهم تار قديم وشوية دم وصفقة مع العسكر ومخطط لبيع مصر , يعني تقدر تقول خلاف سياسي بسيط ومن النوع المألوف كمان !!

.

محمد حسين