منوع

..........بوست في الكلام الممنوع ........... + 58!! :
.
لازم نفرق بين الديانه اليهوديه كديانه وبين الصهيونيه كفكر سياسي استعماري مغتصب
.
هل تعلم أن أينشتاين اللي أفاد البشريه كلها بعلمه وأبحاثه كان يهودي وإن حسن البنا اللي أذى البشريه كلها بجهله وافتكاساته كان مسلم !! , ماهي البطن قلابه يابن عمي , ومش كل مسلم إسمه عمر بن الخطاب ولا كل يهودي اسمه شارون !!.

.في رأيي الشخصي , أفضل إختراع اخترعته البشريه ( بعد مشابك الغسيل ومزيلات العرق ) هو الأيس كريم , أه والله , إي وربي , وأفضل طريقه لأكل الأيس كريم هي إنك تاكله وانت سايق العربيه في ساعة ضهريه ( بين الشجر يا بهيه ) , إنما بقى تاني أسوأ حاجه في اختراع الأيس كريم ( بعد إني بوسخ هدومي وبتظبط في البيت ) هي طريقة نطق السعوديين له , بيقولو عليه ( عايص كريم ) ! , يا سنه سوخه ياولاد , عايص كريم ؟!........... , يعني لو فيه شركه اسمها ( بيومي ) عملت أيس كريم هيسموها ....................... عايص كريم بيومي !!.

.

البوست ده مهم أوي , شيرّه بقى واطبعه واعمله حجاب وحطه تحت المخده , هتحتاجه في يوم من الأيام , وابقى قول العبد لله قال , بص يا سيدي , سيبك بقى من أم الأهلي على أم الزمالك , خلينا في حال البلد , ركز كده ولو كنت متدين صلي لك ركعتين واقرا صفحتين قرأن قبل ما تقرأ البوست ولو كنت فلاتي اشربلك سجارتين حشيش وتعالى , بقى يا سيدي من يوم الإخوان ما مسكو الحكم وهما ركزو على حاجتين اتنين , الشرطه والجيش , هو فيه حد معاه سلاح غيرهم ؟ فيه حد هيحمي حكم الإخوان غيرهم ؟ دوّر كده في صفحات الإخوان وقولي مره واحده بس شتمو فيها الشرطه من يوم ما مسكو البلد ؟ إمبارح كان فيه فيديو لظابط شرطه بيسب ست مصريه بأوسخ الألفاظ , أتحداك تلاقيهم متعاطفين مع الست المصريه , مكتب الإرشاد في بلد بتشحت من طوب الأرض قرر زيادة مرتبات الشرطه أكتر من مره ( لو سمحت شوف راتب أمين الشرطه كام وراتب الطبيب كام ؟!! ) , والنهارده قررو في نفس أم البلد اللي بتشحت من طوب الأرض إنهم يعملو قروض مفتوحه لظباط الجيش بدون فوايد , هو ده التظبيط المظبوط على رأي عادل إمام , يتحرق الأطباء على الصيادله على المهندسين على فتنه هي وابوها عالكل كليله , أهم حاجه ( الظابط والظابط والتظبيط !!.)
هتفضل عايش إنت في المدينه الفاضله بتاعة مولانا أفلاطون , على فكره أفلاطون نفسه لما كان حد في الشارع بيقول له ( أمك ) , كان بيرد عليه ويقول له أمك على أبوك على اللي خلفوك يا سَن أوف بيتش .
الخلاصه يا مولانا إحنا في معجنه ولازم تكشف عن ساقيك وتنزل وتلغوص عشان تاخد حقك , إنسى بقى كلمة فلول وعسكر واعرف هدفك فين ومين اللي هيجيب لك حقك , مفيش حد بياخد حقه من المعجنه بالشوكه والسكينه يا توتو وفوفو وميمي وسوسو وكل المحبين بجاردن سيتي !!.
..................... اللهم قد بلغت اللهم فاشهد.

.

عندما شاهدت الفريق السيسي في تفتيش حرب على إحدى الكتائب وهو يداعب إحدى الفانات الجميلات ( المزز ) وهو عمّال يهزّر وينظّر ويخزق ويلزق ويمزق , أدركت أن الفن دخل الجيش وجنّدوه , واحتمال يكون الجيش هو اللي دخل الفن وحزّموه !!.

.

صباح الخير , على الريق كده عايز أبارك للأستاذ جمال التلاوي , الأديب والمفكر والمبدع والمثقف على توليه منصب رئيس الهيئه العامه للكتاب ! , ولو حضرتك هتقولي أنا معرفوش يا بيه ولا قريت له كتاب ولا طقطوقه ولا زغلوله حتى هقولك ولا أنا والله يا برنس , إنما إعمل بحث على جوجل عن إسم جمال التلاوي وشوف إيداعاته في قصر ثقافة المنيا !! , المنيا ياريس ( مش ألمانيا ) , وهتلاقي واحد بينظر للمفكر والفيلسوف جمال التلاوي اسمه الشاعر محمد عبد القوي حسن ولو حضرتك قلت أنا معرفش ده كمان هقولك والله العظيم ولا أنا , إدو للإخوان فرصو يكملو ال 3 سنين وبإذن الله هيكون رئيس مهرجان القاهره السينمائي الدولي القادم اسمه ( سيد محمد أبو شفطوره ) , شفطوره يا جدع , شف (طوووووووووووره ) !!.

.

وزير الزراعه الجديد بينفي حكاية تحقيق الإكتفاء الذاتي من القمح وبيقول نسعى لزيادة 30 % في إنتاج البرسيم !! , حرام عليك يا أخي والله , إنت هتروح من ربنا فين ؟ , يعني نسيب عيالنا يموتو من الجوع عشان خاطر اللي عيّنوك ياكلو وأكلهم يزيد ويفيض ؟!!.

.

محمد حسين